BTV NEWS

Kazuyoshi Miura កីឡាករបាល់ទាត់អាជីពវ័យចំណាស់បំផុតស៊ុតបញ្ចូលទីជាលើកដំបូងក្នុងរយៈពេលជិត ៤ឆ្នាំ នៅវ័យ ៥៩ឆ្នាំ

វីរបុរស World Cup របស់កាប់វែរ Vozinha ព្រមព្រៀងផ្ទេរទៅកាន់ក្លិប Colo-Colo របស់ស៊ីលី

សារដ៏ចម្រូងចម្រាស «The Malvinas are Argentine» ត្រូវបានបោះពុម្ពផ្សាយដោយឥតគិតថ្លៃនៅអាហ្សង់ទីន

ក្រុម ស.ស.យ.ក អលស្ដារ គ្រោងរៀបចំការប្រកួតសប្បុរសធម៌ នាចុងខែសីហា ក្រោយជំនួបមិត្តភាពផ្លូវការលើកដំបូង

ព័ត៌មានកីឡា

លោក Koji រំពឹងកូនក្រុមលេងបានល្អ ទល់ក្រុមអារូបា ដែលជាបទពិសោធន៍ថ្មី សម្រាប់ក្រុមគោព្រៃកម្ពុជា

លោក Koji Gyotoku គ្រូបង្វឹកក្រុមជម្រើសជាតិកម្ពុជា បានចាត់ទុកជំនួបមិត្តភាពអន្ដរជាតិ ជាមួយក្រុមជម្រើសជាតិអារូបា នាល្ងាចថ្ងៃទី២៥ ខែមីនា ឆ្នាំ២០២៥ គឺជាបទពិសោធន៍ថ្មីមួយ សម្រាប់ក្រុមគោព្រៃ ដែលត្រូវជួបក្រុមមកពីទ្វីបផ្សេង ហើយសង្ឃឹមថា កូនក្រុមនឹងបង្ហាញការលេងមួយដ៏ល្អ ចំពោះមុខអ្នកគាំទ្រ ក្នុងជំនួបមិត្តភាពបើកឆាកឆ្នាំថ្មីនេះ ។ថ្លែងក្នុងសន្និសីទសារព័ត៌មានមុនការប្រកួតនៅថ្ងៃទី២៤ ខែមីនានេះ លោក Koji បានលើកថា ការប្រកួតជាមួយអារូបា គឺជាជំនួបដ៏ល្អមួយ ដែលលោកនឹងព្យាយាមជំរុញកូនក្រុមលេងឲ្យអស់ពីសមត្ថភាព ។ ទោះបីការប្រមូលផ្ដុំមិនទាន់ល្អតាមផែនការ តែលោកពិតជាចង់ឈ្នះការប្រកួតនេះ ពិសេសគឺការបង្ហាញទម្រង់លេងដ៏ល្អរបស់កូនក្រុម ។រីឯប្រធានក្រុមគោព្រៃកម្ពុជា កីឡាករ កាន់ ម៉ូ ក៏បានបង្ហាញនូវការប្ដេជ្ញាចិត្តយ៉ាងមុតមាំក្នុងការប្រកួតនេះ ដើម្បីស្វែងរកជ័យជម្នះជូនអ្នកគាំទ្រកម្ពុជា ។ យ៉ាងណា កាន់ ម៉ូ ថាការប្រកួតនេះ មែនជាការប្រកួតងាយស្រួយឡើយ ទោះបីអារូបា បានធ្វើដំណើរវែងឆ្ងាយក៏ដោយ ។ដោយឡែកលោក Marvic Bermudez គ្រូបង្វឹកក្រុមជម្រើសជាតិអារូបា និងកីឡាករ Nickenson Paul បានសម្ដែងក្ដីរីករាយក្នុងការមកប្រកួតមិត្តភាពនៅកម្ពុជា ។ លោកទទួលស្គាល់ពីគុណភាពកីឡាកររបស់កម្ពុជា តែបើក្រឡេកទៅមើលចំណាត់ថ្នាក់ពិភពលោកក្រុមទាំងពីរ គឺប្រហាក់ប្រហែលគ្នា ។ ដូច្នេះលោកសង្ឃឹមថា ការប្រកួតមិត្តភាពនេះ នឹងក្លាយជាការប្រកួតទាក់ទាញ ។គួរដឹងថា ជំនួបមិត្តភាពអន្ដរជាតិ រវាងក្រុមជម្រើសជាតិកម្ពុជា និងក្រុមជម្រើសជាតិអារូបា នឹងធ្វើឡើងនាវេលាម៉ោង ៧៖៣០នាទីយប់ថ្ងៃទី២៥ ខែមីនា ឆ្នាំ២០២៥ នៅពហុកីឡដ្ឋានជាតិមរតកតេជោ ។ នេះគឺជាជំនួបមិត្តភាពទី២ កំឡុងថ្ងៃ FIFA Day ប្រចាំខែមីនា ឆ្នាំ២០២៥ ដោយប្រកួតទី១ របស់ក្រុមគោព្រៃ បានរងបរាជ័យក្រោមថ្វីជើងក្រុមម្ចាស់ផ្ទះវៀតណាម ២-១ គ្រាដែលប្រកួតដំបូងរបស់ក្រុមជម្រើសជាតិអារូបា គឺចាញ់ក្រុមសមាជិកលីគកំពូលកម្ពុជា វិសាខា ៣-១ កាលពីថ្មីៗកន្លងទៅ ។ អត្ថបទ លី ឈុនឡា

កីឡា ១០ប្រភេទ នឹងត្រូវរៀបចំអបអរសាទរពិធីបុណ្យទន្លេ លើកទី៩ នៅខេត្តតាកែវ ចុងសប្ដាហ៍នេះ

ពិធីបុណ្យទន្លេ លើកទី៩ ឆ្នាំ២០២៥ នៅខេត្តតាកែវ នឹងប្រព្រឹត្តទៅ នាថ្ងៃទី២១, ២២, និងថ្ងៃទី២៣ ខែមីនា ចុងសប្ដាហ៍នេះ ជាមួយការត្រៀមរៀបចំនូវទស្សនីយភាពជាច្រើន ក្នុងនោះក៏មានសកម្មភាពកីឡាផងដែរ ដោយអនុគណៈកម្មការរៀបចំព្រឹត្តិការណ៍កីឡាលើទឹក និងតាមដងទន្លេ នៃក្រសួងទេសចរណ៍ បានត្រៀមរៀបចំនូវសកម្មភាពកីឡាចំនួន ១០ប្រភេទ ដើម្បីអបអរសាទរព្រឹត្តិការណ៍ដ៏ធំប្រចាំឆ្នាំនេះ។ឯកឧត្តម វ៉ាហេង ដាវុធ រដ្ឋលេខាធិការក្រសួងទេសចរណ៍ បានឲ្យដឹងថា កីឡាទាំង ១០ប្រភេទ ដែលត្រូវរៀបចំដើម្បីអបអរសាទរពិធីបុណ្យទន្លេ នៅខេត្តតាកែវ នាចុងសប្ដាហ៍នេះ រួមមានកីឡារត់កម្សាន្ដមហាជនចម្ងាយ ៥គីឡូម៉ែត្រ, កីឡាវាយសីមហាជន, កីឡាប៉េតង់មហាជន, កីឡាអុកចត្រង្គ, កីឡាទូកកាយ៉ាក, កីឡារែក និងលោតម៉ឹក, ប្រដាល់គុនខ្មែរ, កីឡាប៉ារ៉ាម៉ូទ័រ ឬកីឡាហោះហើរ, កីឡាបាល់ទាត់ និងការបង្ហោះគោមជាដើម ។ឯកឧត្តមបានគូសបញ្ជាក់ថា កីឡាភាគច្រើន ដែលនឹងត្រូវរៀបចំកំឡុងពិធីបុណ្យទន្លេឆ្នាំនេះ គឺជាកីឡាលក្ខណៈមហាជន ដើម្បីគាស់រំលេចនូវប្រភេទកីឡាប្រពៃណី ក៏ដូចជាកីឡាប្រជាប្រិយ កំឡុងទសវត្សរ៍ឆ្នាំ១៩៨០ ឬមុនឆ្នាំនេះ ឲ្យត្រឡប់មកវិញ ដើម្បីរំឮកនូវអនុស្សាវរីយ៍សម្រាប់ប្រជាពលរដ្ឋខ្មែរ បាននឹកឃើញនូវសកម្មភាពកីឡាពីអតីតកាល ក្រោមម្លប់សន្ដិភាព ដែលដឹកនាំដោយរាជរដ្ឋាភិបាលបច្ចុប្បន្ន ដូចជាកីឡាអុកចត្រង្គ លេងរែក និងការលេងលោកម៉ឹកជាដើម ។ដូច្នេះតាមរយៈសកម្មភាពកីឡាទាំងអស់នេះ ក្រៅពីផ្ដល់នូវទស្សនីយភាពកម្សាន្ដជូនភ្ញៀវជាតិ និងអន្ដរជាតិ សម្រាប់ប្រជាពលរដ្ឋ ដែលចូលរួមពិធីបុណ្យទន្លេនេះ ក៏អាចចូលរួមលេងកម្សាន្ដបានផងដែរ ដោយកីឡាស្ទើរទាំងអស់ នឹងត្រូវរៀបចំនៅតំបន់បឹងតាកែវ លើកលែងកីឡាបាល់ទាត់ប៉ុណ្ណោះ ដែលនឹងត្រូវរៀបចំនៅកីឡដ្ឋានគិរីវង់សុខសែនជ័យ ។គួរដឹងថា ពិធីបុណ្យទន្លេ លើកទី៩ ឆ្នាំ២០២៥ នឹងប្រារព្ធពិធីបើកផ្លូវការនៅថ្ងៃទី២២ ខែមីនា ក្រោមអធិបតីភាពដ៏ខ្ពង់ខ្ពស់របស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ក្រោមប្រធានបទ «គុណតម្លៃនៃទន្លេ៖ ផ្សារភ្ជាប់វប្បធម៌ និងទេសចរណ៍ធម្មជាតិ» ដោយផ្សារភ្ជាប់ជាមួយពាក្យស្លោកសំខាន់ៗ ដូចជា «ទេសចរណ៍ រីកលូតលាស់ក្នុងសន្ដិភាព» «ម្នាក់!ជាអ្នកផ្សព្វផ្សាយទេសចរណ៍កម្ពុជាម្នាក់» និង «ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍» ជាដើម ៕ អត្ថបទ លី ឈុនឡា

រាជរដ្ឋាភិបាល ផ្ដល់ប្រាក់រង្វាន់ជាង ១លាន ២សែនដុល្លារ ដល់អត្តពលិកជ័យលាភីលើឆាកអន្ដរជាតិចំនួន ១១ប្រភេទកីឡា

រាជរដ្ឋាភិបាលកម្ពុជា បានប្រាក់រង្វាន់លើកទឹកចិត្តសរុបចំនួន ៤,៩៨៤,៩០០,០០០រៀល ឬប្រមាណ ១,២៤៦,២២៥ដុល្លារ ដល់គ្រូបង្វឹក គ្រូជំនួយ និងកីឡាករ-កីឡាការិនីជ័យលាភី ចំនួន ១១ប្រភេទកីឡា ដែលដណ្ដើមបានមេដាយពីព្រឹត្តិការណ៍អន្ដរជាតិចំនួន ១៦ផ្សេងគ្នា កាលពីឆ្នាំ២០២៣ និងឆ្នាំ២០២៤ កន្លងទៅ។ពិធីប្រគល់ប្រាក់រង្វាន់លើកទឹកចិត្តរបស់រាជរដ្ឋាភិបាលនេះ ធ្វើឡើងក្រោមអធិបតីភាពឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ដ្រី រដ្ឋមន្ដ្រីក្រសួងអប់រំ យុវជន និងកីឡា នៅមជ្ឈមណ្ឌលជាតិហ្វឹកហ្វឺនកីឡា នៅល្ងាចថ្ងៃទី១៩ ខែមីនា ឆ្នាំ២០២៥ ។ ចំពោះប្រភេតកីឡា ដែលទទួលបានប្រាក់រង្វាន់លើកទឹកចិត្ត ក្រោយចូលរួមប្រកួតលក្ខណៈហ្គេម និងការប្រកួតជើងឯកកម្រិតអន្ដរជាតិនានា រួមមានកីឡាប៉េតង់ ការ៉ាតេ ចំបាប់ កាយសម្ព័ន្ធ ហែលទឹកពាក់ជើងទា កាយវប្បកម្ម យុទ្ធគុនចម្រុះ វ៉ូវីណាម ជឺជីតស៊ូ តេក្វាន់ដូ WT និងកីឡាយូដូ។ក្នុងឱកាសនោះដែរ ឯកឧត្តមបណ្ឌិតសភាចារ្យ ហង់ជួន ណារ៉ុន បានអបអរសាទរគ្រូបង្វឹក គ្រូជំនួយ ពិសេសកីឡាករ-កីឡាការិនីទាំងអស់ ដែលទទួលបានប្រាក់រង្វាន់លើកទឹកចិត្តពីរាជរដ្ឋាភិបាល ក្រោយពីការខិតខំប្រឹងប្រែងហ្វឹកហាត់ និងប្រកួតប្រជែងដណ្ដើមមេដាយជូនជាតិ ។ ឯកឧត្តមទទួលស្គាល់ ការផ្ដល់ប្រាក់រង្វាន់មានការយឺតយ៉ាវ តែយ៉ាងណាក្រសួងអប់រំ ពិសេសប្រមុខរាជរដ្ឋាភិបាល មិនបានភ្លេច ឬប្រងើយកន្ដើយចំពោះប្រាក់រង្វាន់នេះឡើយ ដោយរាជរដ្ឋាភិបាល ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជា បានយកចិត្តទុកដាក់ខ្ពស់ ក្នុងការជំរុញក្រសួង-ស្ថាប័នពាក់ព័ន្ធ រហូតទទួលបានថវិកាសម្រាប់ផ្ដល់ជូនគ្រូបង្វឹក គ្រូជំនួយ និងកីឡាករ-កីឡាការិនីជ័យលាភីទាំងអស់គ្នា ។ឯកឧត្តមឧបនាយករដ្ឋមន្ដ្រីបន្ថែមទៀតថា ទោះបីកម្ពុជាមានគោលការណ៍ផ្ដល់ប្រាក់រង្វាន់លើកទឹកចិត្តមួយខ្ពស់ជាងបណ្ដាប្រទេសជិតខាង តែក្រោមការដឹកនាំរបស់សម្ដេចធិបតីនាយករដ្ឋមន្ដ្រី នៅតែបន្ដគោលនយោបាយ ដែលដាក់ចេញដោយសម្ដេចតេជោ ហ៊ុន សែន អតីតនាយករដ្ឋមន្ដ្រី ដើម្បីផ្ដល់នូវការលើកទឹកចិត្តដល់កីឡាករ-កីឡាការិនីទាំងអស់ ដែលខិតខំប្រឹងប្រែង លះបង់ ក៏ដូចជាការប្រកួតប្រជែង ដើម្បីលើកមុខមាត់ កិត្តិយស និងដណ្ដើមមេដាយជូនជាតិមាតុភូមិ ។ ដូច្នេះឯកឧត្តមសង្ឃឹមថា សហព័ន្ធកីឡាជាតិទាំងអស់ នឹងបន្ដការខិតខំប្រឹងប្រែងអភិវឌ្ឍ និងបណ្ដុះនូវធនធានថ្នាលបន្ដវេនបន្ថែមទៀត ដើម្បីត្រៀមការប្រកួតប្រជែងលើឆាកអន្ដរជាតិ និងត្រៀមធ្វើម្ចាស់ផ្ទះកីឡាយុវជនអាស៊ី ឆ្នាំ២០២៩ ខាងមុខ ។យោងតាមរបាយការណ៍ឯកឧត្តម ប៉ុន សុខ អគ្គនាយកនៃអគ្គនាយដ្ឋានកីឡា ចំពោះប្រភេទកីឡា ដែលបានចូលរួមប្រកួតលក្ខណៈហ្គេម និងការប្រកួតជើងឯកកម្រិតអន្ដរជាតិនានា ហើយបានទទួលប្រាក់រង្វាន់លើកទឹកចិត្តពីរាជរដ្ឋាភិបាល ក្រោយដណ្ដើមបានមេដាយជូនជាតិនេះ រួមមាន៖១. ការចូលរួមប្រកួតកីឡាសាកលវិទ្យាល័យអាស៊ីអាគ្នេយ៍ លើកទី២១ ឆ្នាំ២០២៤ នៅឥណ្ឌូនេស៊ី កម្ពុជា ឈ្នះមេដាយ ៩គ្រឿង (មាស ១ ប្រាក់ ៥ និងសំរឹទ្ធ ៣) លើប្រភេទកីឡាប៉េតង់ តេក្វាន់ដូ WT, ការ៉ាតេ និងយូ ។២. ការប្រកួតកីឡាសិស្សមធ្យមអាស៊ីអាគ្នេយ៍ លើកទី១៣ ឆ្នាំ២០២៤ នៅវៀតណាម កម្ពុជា ឈ្នះមេដាយសរុប ៩គ្រឿង (មាស ២ ប្រាក់ ១ និងសំរឹទ្ធ ៦) ។៣. ការប្រកួតកីឡាកាយវប្បកម្មជើងឯកពិភពលោក លើកទី១៤ ឆ្នាំ២០២៣ នៅកូរ៉េខាងត្បូង កម្ពុជា ឈ្នះមេដាយសំរឹទ្ធ ២គ្រឿង។៤. ការប្រកួតកីឡាយុទ្ធគុនចម្រុះជើងឯកពិភពលោក ឆ្នាំ២០២៣ នៅថៃ កម្ពុជាឈ្នះមេដាយ ២គ្រឿង (ប្រាក់ ១ និងសំរឹទ្ធ ១)។៥. ការប្រកួតកីឡាប៉េតង់ជើងឯកអាស៊ី លើកទី៥ ឆ្នាំ២០២៣ នៅម៉ាឡេស៊ី កម្ពុជាឈ្នះមេដាយ ៦គ្រឿង (មាស១ ប្រាក់១ និងសំរឹទ្ធ៤) ។៦. ការប្រកួតកីឡាវ៉ូវីណាមជើងឯកពិភពលោក លើកទី៧ ឆ្នាំ២០២៣ នៅវៀតណាម កម្ពុជា ឈ្នះមេដាយ ២០គ្រឿង (មាស៦ ប្រាក់៥ និងសំរឹទ្ធ៩) ។៧. ការប្រកួតកីឡាកាយសម្ព័ន្ធអាអេរ៉ូប៊ិចជើងឯកអាស៊ី លើកទី៨ ឆ្នាំ២០២៣នៅម៉ុងហ្គោលី កម្ពុជាឈ្នះមេដាយ ២គ្រឿង(មាស១ និងសំរឹទ្ធ១) ។៨. ការប្រកួតកីឡាហែលទឹកពាក់ជើងទាជើងឯកអាស៊ី លើកទី១៨ ឆ្នាំ២០២៣ នៅថៃ កម្ពុជាឈ្នះមេដាយ ៥គ្រឿង (មាស២ ប្រាក់១ និងសំរឹទ្ធ២)។៩. ការប្រកួតជឺជីតស៊ូជើងឯកអាស៊ី លើកទី៨ ឆ្នាំ២០២៤ នៅអារ៉ាប់រួម កម្ពុជាឈ្នះមេដាយសំរឹទ្ធ ៥គ្រឿង ។១០. ការប្រកួតកីឡាកាយសម្ព័ន្ធជើងឯកអាស៊ី លើកទី៩ ឆ្នាំ២០២៤ នៅវៀតណាម កម្ពុជាឈ្នះមេដាយសំរឹទ្ធ ១គ្រឿង។១១. ការប្រកួតកីឡាយុទ្ធគុនចម្រុះជើងឯកអាស៊ី លើកទី២ នៅកម្ពុជា កម្ពុជាឈ្នះមេដាយ ១៥គ្រឿង (មាស១ ប្រាក់៥ និងសំរឹទ្ធ៩)។១២. ការប្រកួតកីឡាតេក្វាន់ដូ ITF ជើងឯកអាស៊ី លើកទី១០ ឆ្នាំ២០២៤ នៅឥណ្ឌា កម្ពុជា ឈ្នះមេដាយ ២៤គ្រឿង (មាស៣ ប្រាក់៧ និងសំរឹទ្ធ១៤) ។១៣. ការប្រកួតកីឡាការ៉ាតេជើងឯកអាស៊ីអាគ្នេយ៍ លើកទី១០ ឆ្នាំ២០២៤ នៅហ្វីលីពីន កម្ពុជា ឈ្នះមេដាយ ៥គ្រឿង (មាស២ ប្រាក់១ និងសំរឹទ្ធ២) ។១៤. ការប្រកួតកីឡាចំបាប់ជើងឯកអាស៊ីអាគ្នេយ៍ លើកទី២ ឆ្នាំ២០២៤ នៅកម្ពុជា កម្ពុជាឈ្នះមេដាយ ២៧គ្រឿង (មាស៣ ប្រាក់១៧ និងសំរឹទ្ធ៧) ។១៥. ការប្រកួតកីឡាការ៉ាតេជើងឯកអាស៊ីអាគ្នេយ៍ លើកទី១១ ឆ្នាំ២០២៣ នៅថៃ កម្ពុជាឈ្នះមេដាយ ៧គ្រឿង (ប្រាក់ ១ និងសំរឹទ្ធ៦) ។១៦. ការប្រកួតកីឡាជឺជីតស៊ូជើងឯកអាស៊ីអាគ្នេយ៍លើកទី៣ ឆ្នាំ២០២៤ នៅឥណ្ឌូនេស៊ី កម្ពុជាឈ្នះមេដាយ ២១គ្រឿង (មាស៩ ប្រាក់៤ និងសំរឹទ្ធ៨) ៕ អត្ថបទ លី ឈុនឡា

មកស្គាល់ពីប្រទេសអារូបា ត្រូវប្រកួតមិត្តភាពអន្តរជាតិជាមួយកម្ពុជា

កម្ពុជា នឹងបើកពហុកីដ្ឋានជាតិ(អូឡាំពិក)ទទូលក្រុមបាល់ទាត់ធ្វើដំណើរមកពីមហាសមុទ្រអាត្លង់ទិចខាងជើង អារូបា ថ្ងៃទី២៥ ខែមីនា ឆ្នាំ២០២៥ ការប្រកួតមិត្តភាពអន្តរជាតិ (FIFA DAY)។ដោយអាចមានបងប្អូនប្រជាជនកម្ពុជាយើងមួយចំនួន មិនធ្លាប់ដឹង លឺ និងស្គាល់ប្រទេសនេះ ហើយដោយក្រុមជម្រើសជាតិ ត្រូវប្រកួតជាមួយផង ថ្ងៃនេះ BTV News សូមណែនាំជួន។អារូបា គឺជារដ្ឋដែនដីកោះស្ថិតក្រោមអធិបតេយ្យរបស់ព្រះរាជាណាចក្រហូឡង់ មានទីតាំងនៅសមុទ្រការ៉ាអ៊ីបខាងត្បូងនៃមហាសុទ្រអាត្លង់ទិចខាងជើង ចម្ងាយ២៩គីឡូម៉ែត្រខាងជើងឧបទ្វីបប៉ារ៉ាហ្កាណានៃប្រទេវេណេស៊ុយអេឡា និង៨០គីឡូម៉ែត្រភាគពាយព្យប្រទេសដែនកោះហូឡង់មួយទៀត ក្យួរ៉ាសាវ។អារូបា ឆ្នាំ១៩៨៦ បានក្លាយជាដែនដីកោះស្វយ័តពីព្រះរាជាណាចក្រហូឡង់ ដោយមានឈ្មោះផ្លូវការប្រទេសអារួបា រឺ Country of Aruba ប៉ុន្តែកិច្ចការមួយចំនួនដូចជាការបរទេសនិងការពារជាតិនៅក្រោមហូឡង់ចាត់ចែង។ដោយមានប្រជាជនសរុបជាង១១ម៉ឺននាក់ ជិត៨០%ជាជនជាតិដើមហូឡង់ និងភាគច្រើនប្រើភាសាប៉ាពៀមិនតូ និងហូឡង់ផ្លូវការ ប្រទេសដែនដីកោះមួយនេះមានទំហំ១៨០គីឡូម៉ែត្រក្រឡា និងទីក្រុងឈ្មោះ អូរែនជឺស្តាត រឺប្រជាជននៅទីនោះតែងហៅថា ផ្លាយ៉ា និងជាកន្លែងទេសចរណ៍ដ៏ទាក់ទាញលើពិភពលោក។នយោបាយអារូបាកើតឡើងក្នុងក្របខ័ណ្ឌ សភា(ស្តេតិន)ដែលមានសមាជិក២១រូបបោះឆ្នោតរៀងរាល់បួនឆ្នាំ និងគណៈរដ្ឋមន្ត្រី៨រូប។ អគ្គទេសាភិបាលអារូបាត្រូវបានតែងតាំងដោយមហាក្សត្រហូឡង់ក្នុងអាណត្តិ៦ឆ្នាំ។ ចំណែកនាយករដ្ឋមន្ត្រី និងឧបនាយករដ្ឋមន្ត្រី ត្រូវជ្រើសតាំងដោយសភាស្តេតិន ៤ឆ្នាំម្ដង។បច្ចុប្បន្នប្រមុខរដ្ឋរបស់ប្រទេសអារូបាគឺព្រះមហាក្សត្រ Willem-Alexander នៃព្រះរាជាណាចក្រហូឡង់ អគ្គទេសាភិបាលគឺឯកឧត្ដម Juan Alfonso Boekhoudt និងលោកជំទាវ Evelyn Wever-Croes ជានាយករដ្ឋមន្ត្រី។មកចាប់អារម្មណ៍ផ្នែកកីឡារបស់ប្រទេសកោះដ៏តូចច្រឡឹងនេះវិញម្ដង។សម្រាប់កីឡាដែលមានប្រជាប្រិយបំផុតនៅអារូបាគឺបាល់ទាត់ បាល់បោះ បេស្បល់ និងបាល់ទះ ព្រមទាំងសម្មភាពកីឡានានាទាក់ទងនឹងទេសចរណ៍ដែលជាវិស័យចម្បងក្នុងសេដ្ឋកិច្ច។ អារូបានបង្ហាញខ្លួនក្នុងព្រឹត្តិការណ៍អូឡាំពិកតាំងពីឆ្នាំ១៩៨៨។ដោយឡែកសម្រាប់កីឡាបាល់ទាត់ ក្រុមបាល់ទាត់ជម្រើសជាតិអារូបា ក៏ដូចជាសហព័ន្ធកីឡាបាល់ទាត់អារូបាត្រូវបង្កើតឡើងនៅឆ្នាំ១៩៣២ ហើយបានក្លាយជាសមាជិកសហភាពបាល់ទាត់សមុទ្រការ៉ាអ៊ីប(CFU) សហព័ន្ធបាល់ទាត់អាមេរិកខាងជើង កណ្ដាល និងការ៉ាអ៊ីប(CONCACAF ) និងសហ័ន្ធបាល់ទាត់អន្តរជាតិ (FIFA) តាំងពីឆ្នាំ១៩៨៨។ក្រៅពីក្រុមបាល់ទាត់ជម្រើសជាតិបុរស អារូបាមានជម្រើសជាតិនារី និងក្រុមបាល់ទាត់ជម្រើសជាតិយុវជន និងយុវនារីអាយុក្រោម១៣ឆ្នាំ ១៥ឆ្នាំ ១៧ឆ្នាំ ២០ឆ្នាំ និងអាយុក្រោម២១ឆ្នាំ។អារូបាមានលីគអាជីពបាល់ទាត់៣កម្រិតគឺលីគកំពូលមានឈ្មោះថា Aruban Division di Honor ដែលមាន១០ក្លឹបចូលរួម Division One និង Division Two។ ប្រទេសនេះក៏មានលីគបាល់ទាត់នារី និងយុវជនផងដែរ។ ក្រៅពីនេះក៏រៀបចំឱ្យមានការប្រកួតប្រចាំប្រទេសដែលមានឈ្មោះ Copa Betico Croes។បច្ចុប្បន្នជម្រើសជាតិអារូបា ឈរនៅចំណាត់ថ្នាក់លេខ១៩៥លើពិភពលោក ក្រោមកម្ពុជា១៥លេខ។ ចំពោះសមាសភាពកីឡាករ ដែលត្រូវបានលោក Marvic Bermúdez គ្រូបង្វឹកក្រុមជម្រើសជាតិអារូបា កោះហៅមកជួបក្រុមជម្រើសជាតិកម្ពុជា នាថ្ងៃទី២៥ ខែមីនា ភាគច្រើនជាកីឡាករកំពុងប្រកបអាជីពនៅប្រទេសហូឡង់ ហើយមាន ៥រូបប៉ុណ្ណោះ ដែលលេងនៅលីគអារូបា និងមាន ២រូបប្រកបអាជីពនៅអង់គ្លេស និងអាល្លឺម៉ង់។ក្រឡេកទៅចាប់អារម្មណ៍លទ្ធផលប្រមាណ ១០ប្រកួតចុងក្រោយ ក្រុមមកពីទ្វីបអាមេរិកខាងត្បូងមួយនេះ មិនធ្លាប់ទទួលបានជ័យជម្នះឡើយ ដោយស្គាល់ស្មើម្ដងគត់ ក្រៅពីនោះ សុទ្ធតែរងបរាជ័យ គ្រាដែល ២ប្រកួត កាលពីចុងឆ្នាំ២០២៤ គឺបានចាញ់ក្រុម ព័រតូរីកូ ដោយលទ្ធផល ៥-១ និងចាញ់ក្រុមសាំងម៉ារតាំង ១-០ ក្នុងពានរង្វាន់ CONCACAF Nations League៕

ពាន FIFA Club World Cup ធ្វើដំណើរដល់ទីក្រុង Atlanta សហរដ្ឋអាមេរិក

ទីក្រុង Atlanta បានស្វាគមន៍ពានរង្វាន់ Club World Cup របស់ FIFA នៅកីឡដ្ឋាន Mercedez-Benz កាលពីពេលថ្មីៗនេះ ជាផ្នែកមួយនេះដំណើរទេសចរណ៍របស់ពាន។ពានរង្វាន់ដែលបានរចនាឡើងដោយសហការជាមួយម៉ាកគ្រឿងអលង្ការប្រណីត Tiffany & Co និងបានដាក់បង្ហាញកាលពីឆ្នាំមុន មានរាងជាថាសមាសទម្រង់ជារង្វង់មូល ដែលរួមមានរូបភាពតំណាងដែលបង្ហាញពីប្រវត្តិដ៏សម្បូរបែបរបស់កីឡា ក៏ដូចជាឈ្មោះសមាគមសមាជិកទាំងអស់របស់ FIFA ទាំង ២១១ ផងដែរ។ពានរង្វាន់នេះក៏មានការឆ្លាក់ជា ១៣ ភាសាផ្សេងគ្នាផងដែរ ជាមួយនឹងអក្សរស្ទាប។បន្ទាប់ពីទីក្រុង Atlanta ពានរង្វាន់ Club World Cup ត្រូវបន្តដំណើរទេចរណ៍របស់ខ្លួនជុំវិញពិភពលោកទៅកាន់ទីក្រុង Auckland ប្រទេសនូវែសេឡង់ ទីក្រុងឡុងដ៍ចក្រភពអង់គ្លេស ទីក្រុងសេអ៊ូល និងតូក្យូជាដើម។ការប្រកួតបាល់ទាត់ជើងឯកក្លិបពិភពលោក FIFA Club World Cup នឹងចាប់ផ្តើមព្រឹត្តិការណ៍ដំបូងរបស់ខ្លួន ជាមួយនឹងការចូលរួមចំនួន ៣២ ក្រុមពីមកពីទ្វីប អឺរ៉ុប អាមេរិកខាងត្បូង អាហ្វ្រិក អាស៊ីចូលរួម ប្រកួតជាលក្ខណៈវិលជុំបែកចែកពូលដូច World Cup របស់ក្រុមជម្រើសជាតិផងដែរ៕ អត្ថបទ៖នាង សុភាវុធ

គ្រូកម្ពុជាថា ចង់ឈ្នះវៀតណាម ជារឿងពិបាក តែលោក Kim Sang Sik បានប្រុងប្រយ័ត្នខ្ពស់

ក្រុមជម្រើសជាតិកម្ពុជា នឹងត្រូវធ្វើការប្រកួតមិត្តភាពអន្ដរជាតិផ្លូវការ ជាមួយក្រុមជម្រើសជាតិវៀតណាម នាវេលាម៉ោង ៧៖៣០នាទីយប់ថ្ងៃទី១៩ ខែមីនា ឆ្នាំ២០២៥ នេះ នៅកីឡដ្ឋាន Gò Đậu នាខេត្ត Binh Duong ។ ថ្លែងក្នុងសន្និសីទសារព័ត៌មាន មុនការប្រកួតគ្រូបង្វឹកក្រុមទាំងពីរ បានបង្ហាញការគោរពគ្នាទៅវិញទៅមក និងមានការប្រុងប្រយ័ត្នរៀងខ្លួន ក្នុងការប្រកួតមិត្តភាពនេះ ។លោក Koji Gyotoku គ្រូបង្វឹកក្រុមជម្រើសជាតិកម្ពុជា បានសម្ដែងក្ដីរីករាយក្នុងការប្រកួតទល់នឹងក្រុមខ្លាំងប្រចាំតំបន់ ហើយការប្រកួតជាមួយក្រុមជម្រើសជាតិវៀតណាមនេះ ក្រុមខ្លួនពិតជាចង់ឈ្នះ តែលោកទទួលស្គាល់ថា វាពិតជាមិនងាយស្រួលណោះទេ ដ្បិតវៀតណាម គឺជាក្រុមជើងឯកពានរង្វាន់ប្រចាំតំបន់អាស៊ាន ហើយក៏ជាក្រុមដែលល្អបំផុតមួយក្នុងតំបន់ ស្របពេលកម្ពុជាត្រៀមខ្លួនមិនទាន់បានល្អឡើយ ។ យ៉ាងណាលោកនឹងព្យាយាមបង្ហាញភាពខ្លាំងរបស់ក្រុមគោព្រៃដល់អ្នកគាំទ្ររបស់ខ្លួនក្នុងការប្រកួតយប់នេះ ។គ្រូបង្វឹកជនជាតិជប៉ុនដដែលបន្ថែមទៀតថា លោកបានសិក្សាក្រុមម្ចាស់ផ្ទះវៀតណាម តាមរយៈការប្រកួតជើងឯកអាស៊ីអាគ្នេយ៍ កាលពីឆ្នាំ២០២៤ ពិសេសជំនួបវគ្គផ្ដាច់ព្រ័ត្រជាមួយថៃ ដែលវៀតណាមពិតជាស័ក្ដិសមគ្រងជើងឯក ដោយសារការរៀបចំក្រុមបានយ៉ាងល្អរបស់គ្រូបង្វឹកលោក Kim Sang-Sik ។ ទាក់ទងនឹងការអវត្តមានរបស់ខ្សែប្រយុទ្ធ Nguyen Xuan Son លោកក៏សោកស្ដាយដែរ ព្រោះលោកចង់ឲ្យកូនក្រុមលេងទល់នឹងកីឡាករឆ្នើមៗរបស់វៀតណាម ។ បែបននេះក្ដី វៀតណាម នៅមានកីឡាករមានគុណភាពខ្ពស់ជាច្រើនទៀត សម្រាប់ការប្រកួតមិត្តភាពនេះ ។សម្រាប់លោក Kim Sang-Sik វិញ ក៏បានវាយតម្លៃខ្ពស់ ចំពោះភាពរីកចម្រើន និងការផ្លាស់ប្ដូររបស់ក្រុមជម្រើសជាតិកម្ពុជា ដោយលោកបានក្រើនរំឮកកូនក្រុម ត្រូវមានការប្រុងប្រយ័ត្នខ្ពស់ ចំពោះក្រុមគោព្រៃ ដែលមានកីឡាករចូលសញ្ជាតិរហូតដល់ ៦រូប ពិសេសខ្សែប្រយុទ្ធដ៏គ្រោះថ្នាក់ Abdel Kader Coulibaly ។ យ៉ាងណាមិញលោកក៏បានត្រៀមនូវវិធីសាស្ដ្រដើម្បីដោះស្រាយបញ្ហានេះដែរ ។គ្រូបង្វឹកសញ្ជាតិកូរ៉េខាងត្បូងដដែលបន្ថែមទៀតថា ចំណាត់ថ្នាក់ FIFA របស់ក្រុមជម្រើសជាតិកម្ពុជា មិនខ្ពស់នោះទេ ប៉ុន្ដែក្នុងចរន្ដនៃកីឡាករចូលសញ្ជាតិមានការផ្លាស់ប្ដូររៀងរាល់ថ្ងៃ ហើយគ្រប់ក្រុមកាន់តែខ្លាំងឡើងតាមពេលវេលា ជាក់ស្ដែងក្នុងការប្រកួតជើងឯកអាស៊ីអាគ្នេយ៍ ឆ្នាំ២០២៤ កន្លងទៅ គឺកម្ពុជាមិនងាយចាញ់ឡើយ ។ ដូច្នេះលោកនឹងព្យាយាមរៀបចំក្រុមឲ្យបានល្អ ដើម្បីទទួលបានជ័យជម្នះក្នុងការប្រកួតដំបូង ក្នុងឆ្នាំ២០២៥ បន្ទាប់ពីការគ្រងជើងឯក ASEAN Cup 2024 ជាមួយក្រុមគោព្រៃកម្ពុជានេះ ។គួរដឹងថា ជំនួបមិត្តភាពអន្ដរជាតិ រវាងកម្ពុជា ជាមួយក្រុមម្ចាស់ផ្ទះវៀតណាម នារាត្រីថ្ងៃពុធនេះ នឹងមានការផ្សាយផ្ទាល់លើកញ្ចក់ទូរទស្សន៍ BTV-News ។ ក្រោយបញ្ចប់ការប្រកួតនេះ កម្ពុជានឹងត្រូវត្រឡប់មកមាតុភូមិវិញ ដើម្បីបើកទ្វារផ្ទះទទួលក្រុមជម្រើសជាតិអារូបា មកពីទ្វីបអាមេរិកខាងត្បូងវិញម្ដង នាថ្ងៃទី២៥ ខែមីនាខាងមុខ នៅពហុកីឡដ្ឋានជាតិ(អូឡាំពិក) រាជធានីភ្នំពេញ ៕ អត្ថបទ លី ឈុនឡា

ក្រុមជម្រើសជាតិអារូបា បានមកដល់កម្ពុជាហើយ ត្រៀមជួបគោព្រៃ នាដើមសប្ដាហ៍ក្រោយ

ក្រុមបាល់ទាត់ជម្រើសជាតិអារូបា បានធ្វើដំណើរមកដល់ទីក្រុងភ្នំពេញហើយ ក្រោយធ្វើដំណើរជាង ១ម៉ឺន ៧ពាន់គីឡូម៉ែត្រ ដើម្បីត្រៀមការប្រកួតមិត្តភាពអន្ដរជាតិ កំឡុងថ្ងៃ FIFA Day ជាមួយក្រុមជម្រើសជាតិកម្ពុជា នាថ្ងៃទី២៥ ខែមីនាខាងមុខ នៅពហុកីឡដ្ឋានជាតិ(អូឡាំពិក) រាជធានីភ្នំពេញ។ចំពោះសមាសភាពកីឡាករ ដែលត្រូវបានលោក Marvic Bermúdez គ្រូបង្វឹកក្រុមជម្រើសជាតិអារូបា កោះហៅមកជួបក្រុមជម្រើសជាតិកម្ពុជា នាដើមសប្ដាហ៍ក្រោយនេះ ភាគច្រើនជាកីឡាករកំពុងប្រកបអាជីពនៅប្រទេសហូឡង់ ហើយមាន ៥រូបប៉ុណ្ណោះ ដែលលេងនៅលីគអារូបា និងមាន ២រូបប្រកបអាជីពនៅអង់គ្លេស និងអាល្លឺម៉ង់។ក្រឡេកទៅចាប់អារម្មណ៍លទ្ធផលប្រមាណ ១០ប្រកួតចុងក្រោយ ក្រុមមកពីទ្វីបអាមេរិកខាងត្បូងមួយនេះ មិនធ្លាប់ទទួលបានជ័យជម្នះឡើយ ដោយស្គាល់ស្មើម្ដងគត់ ក្រៅពីនោះ សុទ្ធតែរងបរាជ័យ គ្រាដែល ២ប្រកួត កាលពីចុងឆ្នាំ២០២៤ គឺបានចាញ់ក្រុម ព័រតូរីកូ ដោយលទ្ធផល ៥-១ និងចាញ់ក្រុមសាំងម៉ារតាំង ១-០ ក្នុងពានរង្វាន់ CONCACAF Nations League។សម្រាប់ដំណើរមកកាន់ប្រទេសកម្ពុជាលើកដំបូងនេះដែរ មុននឹងជួបការប្រកួតផ្លូវការជាមួយក្រុមជម្រើសជាតិកម្ពុជា ក្រុមជម្រើសជាតិអារូបា នឹងមានការប្រកួតមិត្តភាពកម្ដៅសាច់ដុំមួយ ជាមួយក្រុមវិសាខា សមាជិកលីគកំពូលកម្ពុជា នាថ្ងៃទី២២ ខែមីនាចុងសប្ដាហ៍នេះ ស្របពេលក្រុមម្ចាស់ផ្ទះកម្ពុជា ក៏មានការប្រកួតមិត្តភាពអន្ដរជាតិមួយដែរ ដោយត្រូវជួបក្រុមម្ចាស់ផ្ទះវៀតណាម នៅរាត្រីថ្ងៃពុធនេះ មុនត្រឡប់មកស្វាគមន៍ក្រុមភ្ញៀវអារូបាវិញម្ដង នាថ្ងៃទី២៥ ខែមីនា ឆ្នាំ២០២៥ ខាងមុខ៕

ក្រុមការពារជើងឯក Svay Rieng Cup បន្ដជ័យជម្នះ ខណៈខ្សែប្រយុទ្ធ ថន ដារ៉ាពេជ្រ រកបាន ១៩គ្រាប់ត្រឹម ២ប្រកួត

ការប្រកួតពានរង្វាន់ ស្វាយរៀង ខាប់ (Svay Rieng Cup) លើកទី៧ ឆ្នាំ២០២៥ បានបញ្ចប់ការប្រកួតសន្សំពិន្ទុ សប្ដាហ៍ទី៣ ដោយក្រុមការពារជើងឯក ស្នងការដ្ឋាននគរបាលខេត្តស្វាយរៀង បន្ដធ្វើបានយ៉ាងល្អក្នុងការប្រកួតទី២ របស់ខ្លួន ដោយបានយកឈ្នះក្រុមបាល់ទាត់ភូមិហ៊ីង ៧-០ កាលពីចុងសប្ដាហ៍កន្លងទៅ ។សម្រាប់គ្រាប់បាល់ជ័យជម្នះក្នុងការប្រកួតទី២ ក្នុងពូលA របស់ក្រុមជើងឯកឆ្នាំចាស់នេះ ធ្វើសម្រេចដោយកីឡាករ ថន ដារ៉ាពេជ្រ រកបាន ៤គ្រាប់ម្នាក់ឯង ព្រមទាំងមិត្ដរួមក្រុម អឹម សផានិត្យ និង កែវ សុចិត្រា ម្នាក់ ១គ្រាប់ ខណៈ ១គ្រាប់ទៀត ជាគ្រាប់ភ្លាត់ចូលទីខ្លួនឯង(Own Goal) របស់កីឡាករ ថោន និមល សមាជិកក្រុមភូមិហ៊ីង។តាមរយៈជ័យជម្នះនេះ នាំឲ្យក្រុមស្នងការដ្ឋាននគរបាលខេត្តស្វាយរៀង រកបាន ៦ពិន្ទុពេញ ក្រោយឈ្នះ ២ប្រកួតជាប់គ្នា តែឈរលេខ២ បណ្ដោះអាសន្ន តាមពីក្រោយក្រុមកាំភ្លើងធំ ដែលរកបាន ៦ពិន្ទុស្មើគ្នា តែមានផលសងគ្រាប់បាល់ច្រើនជាង ។អ្វីដែលគួរឲ្យចាប់អារម្មណ៍ដែលនោះ ក្នុងជ័យជម្នះ ២ប្រកួតរបស់ក្រុមស្នងការដ្ឋាននគរបាលខេត្តស្វាយរៀង ដែលរកបាន ២៥គ្រាប់ គឺខ្សែប្រយុទ្ធ ថន ដារ៉ាពេជ្រ រកបាន ១៩គ្រាប់ម្នាក់ឯង ដែលកំពុងឈរកំពូលតារាងអ្នកស៊ុតបញ្ចូលទីច្រើនជាងគេ បន្ទាប់ពីប្រកួតទី១ រូបគេរកបានរហូតដល់ ១៥គ្រាប់ឯណោះ ។ចំពោះលទ្ធផលការប្រកួតផ្សេងៗ ក្នុងសប្ដាហ៍ទី៣ នៃពានរង្វាន់ Svay Rieng Cup លើកទី៧ វិញ រួមមានពូលG ក្រុម CSR Sport បានយកឈ្នះក្រុមយុវជនខ្មែរខេមរា ៧-១ និងក្រុមស៊ាំម៉ូរ៉ៃភូមិកឹង បានយកឈ្នះក្រុមសាលាចំរើនសូនីតា ៤-០ ។ រីឯពូលH ក្រុមមេសរថ្ងកអេហ្វស៊ី បានយកឈ្នះក្រុមហនុមានពោធិ៍ថ្មី ៤-១ និងក្រុម ស.ស.យ.ក ឃុំត្នោត បានយកឈ្នះក្រុមភូមិយើងអេហ្វស៊ី ៣-០៕ អត្ថបទ លី ឈុនឡា

ការប្រកួតកីឡាដណ្តើមពានរង្វាន់នាយឧត្តមសេនីយ៍កិតិ្តសង្គហបណ្ឌិត ហ៊ីង ប៊ុនហៀង បញ្ចប់ដោយជោគជ័យ

ការប្រកួតកីឡា ប្រឡងប្រណាំង ៨វិញ្ញាសារយោធា ដណ្តើមពានរង្វាន់ នាយឧត្តមសេនីយ៍ កិតិ្តសង្គហបណ្ឌិត ហ៊ីង ប៊ុនហៀង និងលោកជំទាវ ប៉ែន ចន្នី ឆ្នាំ២០២៥ ដើម្បីអបអរសាទរក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរនាពេលខាងមុខ ត្រូវបានប្រារព្ធពិធីបិទការប្រកួតផ្លូវការ ព្រឹកថ្ងៃទី១៧ ខែមីនា ឆ្នាំ២០២៥ នៅបញ្ជាការដ្ឋានអង្គរក្ស ស្ថិតនៅក្នុងក្រុងតាខ្មៅ ខេត្តកណ្តាល។ឧត្តមសេនីយ៍ត្រី លី ឧត្តម ស្នងការរង ស្នងការដ្ឋានឃោសនា-ព័ត៌មាន តំណាងឧត្តមសេនីយ៍ឯក ណុប រ័ត្ននិមល មេបញ្ជាការរង បញ្ជាការដ្ឋានអង្គរក្ស និងជាប្រធានក្រុមប្រឹក្សាប្រឡងប្រណាំង បានឲ្យដឹងថា ការប្រកួតនេះ បានធ្វើការប្រកួតជម្រុះ ពីថ្ងៃ២៦ ខែកុម្ភៈ ដល់ថ្ងៃទី១៧ ខែមនា ឆ្នាំ២០២៥ ដោយមានកីឡាករចូលរួមចំនួន ២២ក្រុម មកពីកងឯកភាពចំណុះបញ្ជាការដ្ឋានអង្គរក្ស ។ ឆ្លងកាត់ការប្រកួតយ៉ាងស្វិតស្វាញ កងអន្តរាគមន៍ទី៣ ការពារ៣១១ ទទួលបានចំណាត់ថ្នាក់លេខ១លើវិញ្ញាសាសណ្តាប់ធ្នាប់ជួរទ័ព និងលំហាត់ប្រាណយោធា វិញ្ញាសារត់ប្រដាប់អាវុធចម្ងាយ ៧គីឡូម៉ែត្រ និងវិញ្ញាសាសែងប្រង់ការ៥០គីឡូក្រាម ចម្ងាយ៤គីឡូម៉ែត្រ និងវិញ្ញាសាបាល់ទះ។វិញ្ញាសាឆ្លងកាត់ឧបសគ្គទាំង២៥ លេខ១បានទៅលើកងវរសេនាតូចទី១ កាំជ្រួចការពារអាកាស ឯ វិញ្ញាសាអូស-រុញរថយន្តទម្ងន់ ៧តោន កងអន្តរាគមន៍ទី១ ប្រឆាំងភេរវកម្ម ទទួលបានចំណាត់ថ្នាក់លេខ១ , វិញ្ញាសាបាញ់អាវុធវែងអាកា៤៧ បីចម្ងាយ បីកាយវិការ និងចោលគ្រាប់បែក កងអន្តរាគមន៍ទី១ កាំជ្រួចការពារអាកាស ទទួលបានចំណាត់ថ្នាក់លេខ១ , និងវិញ្ញាសារដោះរៀបអាវុធបីប្រភេទ កងអន្តរាគមន៍ចល័ត៩៩៩ ទទួលបានចំណាត់ថ្នាក់លេខ១។នាយឧត្តមសេនីយ៍ កិតិ្តសង្គហបណ្ឌិត ហ៊ីង ប៊ុនហៀង អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការ បញ្ជាការដ្ឋានអង្ករក្ស បានសម្តែងនូវការកោតសរសើរនិងវាយតម្លៃចំពោះកីឡាករ ដែលនាយទាហាន ពលទាហាន បញ្ជាការដ្ឋានអង្គរក្ស ដែលបានខិតខំប្រឹងប្រែង ក្នុងការប្រកួតប្រឡងប្រណាំងនេះ។ នាយឧត្តមសេនីយ៍ បានមានប្រសាសន៍បន្តថា ការរៀបចំការប្រកួតប្រឡងប្រណាំងនេះ ត្រូវបានប្រារព្ធជារៀងរាល់ឆ្នាំដើម្បីចូលរួមអបអរសាទរក្នុងឱកាសនៃពិធីបុណ្យចូលឆ្នាំថ្មីប្រពៃណីជាតិខ្មែរ និងដើម្បីរួមចំណែកលើកស្ទួយវិស័យកីឡានៅទូទាំងប្រទេស និងស្របតាមអនុសាសន៍របស់សម្តេចធិបតី នាយករដ្ឋមន្ត្រី ហ៊ុន ម៉ាណែត ដែលលើកឡើងថា ប្រជាពលរដ្ឋម្នាក់ ត្រូវលេងកីឡាមួយមុខ ឬឲ្យបានមួយប្រភេទ។ ឯកឧត្តម កិតិ្តសង្គហបណ្ឌិត មានប្រសាសន៍បន្តថា យើងសូមអរគុណចំពោះសន្តិភាព និងនយោបាយឈ្នះឈ្នះរបស់សម្តេចអគ្គមហាសេនាបតីតេជោ ហ៊ុនសែន ដែលបាននាំមកនូវការឯកភាពជាតិពេញលេញនូវទូទាំងប្រទេស។ នាយឧត្តមសេនីយ៍ កិត្តិសង្គហបណ្ឌិត បានផ្តាំផ្ញើដល់ក្រុមកីឡាករ ក៏ដូចជានាយ និងពលទាហាន បញ្ជាការដ្ឋានអង្គរក្ស ត្រូវបន្តថែរក្សាសុខភាព និងត្រូវជៀសអោយឆ្ងាយពីគ្រឿងញៀន ដោយប្តូរពីការប្រើប្រាស់គ្រឿងញៀន មកជាការលេងកីឡាពង្រឹងនូវកាយសម្បទា សាមគ្គីភាពផ្ទៃក្នុង និងការងារហ្វឹហ្វឺន ពិសេសត្រូវប្រកាន់ខ្ជាប់នូវអភិក្រមទាំងបី គឺលះបង់ ស្មោះត្រង់ និងបម្រើ ការពារប្រមុខថ្នាក់ដឹកនាំ និងក្រុមគ្រួសារ ហើយបោះទ័ពនៅទីណា ត្រូវជួយប្រជាពលរដ្ឋ ឲ្យប្រជាពលរដ្ឋស្រលាញ់ ពេលចេញទៅឲ្យប្រជាជននឹករលឹក។ ហើយបានជម្រុញឲ្យក្រុមកីឡាករ ខិតខំហ្វឹកហាត់ ដើម្បីប្រកួតដណ្តើមពានរង្វាន់ អបអរសាទរខួបបញ្ជាការដ្ឋាអង្គរក្ស នៅខែកញ្ញា ឆ្នាំ២០២៥ខាងមុខនេះជាបន្តទៀត។ក្នុងឱកាសនោះ នាយឧត្តមសេនីយ៍ កិតិ្តសង្គហបណ្ឌិត ហ៊ីង ប៊ុនហៀង បានផ្តល់ជូនរង្វាន់លើកទឹកចិត្តជ័យលាភី ក្រុមកីឡាចំណាត់ថ្នាក់លេខ១ នូវថវិកាចំនួន ៣ពាន់ ៥០០ដុល្លា រួមនឹងភេសជ្ជៈ ហើយចំណាត់ថ្នាក់លេខ២ ថវិកា ៥លានរៀល រួមនិងភេសជ្ជៈផងដែរ៕

ប្រធានសហព័ន្ធប្រដាល់សកល ចាត់ទុកកម្មវិធីអន្ដរក្លិប ជាចលករថ្មី ដើម្បីជំរុញការផ្សព្វផ្សាយ និងអភិវឌ្ឍន៍

ឯកឧត្ដម ប៊ុយ សុភ័ណ្ឌ ប្រធានសហព័ន្ធកីឡាប្រដាល់សកលកម្ពុជា បានបង្ហាញនូវសេចក្ដីសោមនស្សរីករាយ ក្រោយកម្មវិធីប្រកួតកីឡាប្រដាល់អន្ដរក្លិប (Cambodia Inter Club) បានទទួលការគាំទ្រយ៉ាងផុសផុលពីសំណាក់ទស្សនិក ពិសេសជនបរទេស ដោយឯកឧត្តមបានចាត់ទុកនេះ គឺជាចលករថ្មីមួយទៀត ក្នុងការជំរុញការផ្សព្វផ្សាយ ក៏ដូចជាការអភិវឌ្ឍសម្រាប់កីឡាប្រដាល់សកលកម្ពុជា ។ការគូសបញ្ជាក់នេះ បន្ទាប់ពីសហព័ន្ធបានសហការជាមួយស្ថាប័ន Cambodia Inter Club Championship រៀបចំកម្មវិធីអន្ដរក្លិប នៅរាជធានីភ្នំពេញ កាលពីចុងសប្ដាហ៍កន្លងទៅ នៅទីតាំង Factory សង្កាត់ចាក់អង្រែលើ ខណ្ឌមានជ័យ ដោយមានអ្នកគាំទ្រប្រុស-ស្រី ពិសេសជនបរទេសចូលរួមទស្សនា និងគាំទ្រយ៉ាងច្រើនកុះករ ជាមួយការប្រកួតគុនខ្មែរផង និងប្រដាល់សកលផងនេះ ។ជាមួយការកម្មវិធីដែលមានទស្សនិកជនទស្សនាពេញទីតាំងប្រកួតនេះ ឯកឧត្តម ប៊ុយ សុភ័ណ្ឌ បានចាត់ទុកនេះគឺជារឿងដ៏ល្អសម្រាប់សហព័ន្ធ ក្នុងការផ្សព្វផ្សាយប្រភេទកីឡាប្រដាល់សកលស្ម័គ្រចិត្ត និងអាជីព ក៏ដូចជាការប្រកួតគុនខ្មែរផងដែរ ដែលបានបំផុសនូវចលនាកីឡាជាតិជារួម ដោយឡែកសម្រាប់កីឡាប្រដាល់សកលក៏ដូច្នោះដែរ ដែលមានសន្ទុះអ្នកគាំទ្រច្រើន ពិសេសគឺជនបរទេសតែម្ដង ។ប្រធានសហព័ន្ធដដែលបន្ថែមថា ទោះបីការរៀបចំកម្មវិធីអន្ដរក្លិបនេះ មិនទាន់ធំ តែការរៀបចំភាគច្រើនជាជនបរទេស ដែលមានបទពិសោធន៍ច្រើន និងជំនាញក្នុងការផ្សព្វផ្សាយ ។ ដូច្នេះនេះជាទុនមួយដែលសហព័ន្ធអាចសហការជាមួយដៃគូ ដើម្បីរៀបចំកម្មវិធីឲ្យកាន់តែមានលក្ខណៈអាជីពនាថ្ងៃអនាគត ដើម្បីផ្ដល់ឱកាសឲ្យកីឡាករ-កីឡាការិនីកម្ពុជា បានចូលរួមដុសខាតសមត្ថភាព ត្រៀមការប្រកួតថ្នាក់ជាតិ និងអន្ដរជាតិនានា ។គួរដឹងថា កម្មវិធីអន្តរក្លិបបានប្រព្រឹត្តទៅជារឿយៗ ដោយមានការចូលរួមពីកីឡាករក្នុងស្រុក និងបរទេស ទាំងអ្នកស្ម័គ្រចិត្ត និងលក្ខណៈអាជីពបានចូលរួមការប្រកួតបញ្ចេញសមត្ថភាព ក៏ដូចជាត្រៀមសម្រាប់កីឡាករអាជីពបានចូលរួមប្រកួតអន្តរជាតិតំណាងប្រទេសនាពេលខាងមុខ ជាក់ស្ដែងក្នុងកម្មវិធីនេះ ក៏មានការប្រកួតមិត្តភាពកម្រិតអាជីព រវាងកីឡាករជម្រើសជាតិកម្ពុជា Anvar Nasredinov ដោយបានយកឈ្នះកីឡាករនីហ្សេរីយ៉ា ដោយពិន្ទុផងដែរ៕ អត្ថបទ លី ឈុនឡា

បណ្ដាញសង្គម

ព័ត៌មានថ្មីៗ

ជនប៉ាឡេស្ទីនជម្លៀសខ្លួនស្វាគមន៍កងកម្លាំងអន្តរជាតិនៅហ្កាហ្សា និងអំពាវនាវឲ្យកសាងផ្ទះសម្បែងរបស់ពួកគេឡើងវិញ

ពលរដ្ឋវិលត្រឡប់ទៅកាន់តំបន់ភាគខាងត្បូងលីបង់វិញ ក្រោយការដកទ័ពរបស់អ៊ីស្រាអែល

ប្រធានាធិបតីហ្វីលីពីន លោក Marcos ប្រាប់ថា ប្រហែលដល់ពេលត្រូវពិនិត្យថាមពលនុយក្លេអ៊ែរឡើងវិញ

EU បញ្ចូនយន្តហោះ និងអ្នកពន្លត់អគ្គិភ័យទៅជួយទប់ទល់ចំហេះព្រៃ នៅបារាំង និងអេស្ប៉ាញ

ប្រធានាធិបតីអ៊ុយក្រែន ធ្វើដំណើរទៅដល់អង់គ្លេស សម្រាប់ជំនួបជាមួយលោកនាយករដ្ឋមន្រ្តី Burnham

ទីក្រុងប៉េកាំងជំរុញឱ្យសហរដ្ឋអាមេរិកឈប់គំរាមកំហែងដាក់ទណ្ឌកម្ម លើក្រុមហ៊ុន AI របស់ចិន

កងកម្លាំងអ៊ីស្រាអែល វាយប្រហារទីក្រុងជាច្រើននៅតំបន់វ៉េសប៊ែង ខណៈអំពើហិង្សាកាន់តែអាក្រក់ទៅ

អ្នកស្ម័គ្រចិត្តដំបូងទទួលវ៉ាក់សាំងបង្ការជំងឺអេបូឡា ជាផ្នែកមួយនៃការសាកល្បងរបស់សាកលវិទ្យាល័យ Oxford

សម្តេចរដ្ឋសភាធិបតី ឃួន សុដារី អញ្ជើញបំពេញទស្សនកិច្ចផ្លូវការ និងមិត្តភាពនៅសាធារណរដ្ឋសង្គមនិយមវៀតណាម

នគរបាលទីក្រុងប៊ែរឡាំង បាញ់សម្លាប់ជនសង្ស័យសំខាន់ ក្នុងការវាយប្រហារដ៏សាហាវ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877