នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ការទស្សនាប្រាសាទអង្គរវត្តដើរចូលពីទិសខាងលិច ទេសចរគ្រប់រូបនឹងឃើញទិដ្ឋភាពដ៏ស្គឹមស្កៃ និងគោរពលើកតម្លៃប្រាសាទ
ចម្លាក់ទេពអប្សរនៅប្រាសាទអង្គរ មានអាយុកាលជិត១ពាន់ឆ្នាំ បង្អួតសម្រស់ជាមួយភ្ញៀវទេសចរ
កម្ពុជាត្រៀមខ្លួនជាគោលដៅទេសចរណ៍មូស្លីមប្រកបដោយភាពកក់ក្ដៅ សុវត្ថិភាព និងទំនុកចិត្ត
រមណីយដ្ឋាន មរកត ម្លេច ខេត្តកំពតផ្តល់សេវាជិះសេះកម្សាន្តដល់ភ្ញៀវទេសចរ និង​អ្នក​ស្នេហា​កីឡា​ជិះសេះ

វប្បធម៌ និងទេសចរណ៍

នាយកដ្ឋានបុរាណវិទ្យា និងបុរេប្រវត្តិវិទ្យា បង្ហាញវឌ្ឍនភាពការងារ ក្នុងការថែរក្សា និងការពារ ទីតាំងបុរាណដ្ឋាន ទាំងនៅលើដី ក្រោមដី និងក្រោមទឹក ក្នុងប្រទេសកម្ពុជា

2024/05/15 01:10:50 pm        659
Facebook Telegram Linkin
នាយកដ្ឋានបុរាណវិទ្យានិងបុរេប្រវត្តិវិទ្យា នៃអគ្គនាយកដ្ឋានបេតិកភណ្ឌរបស់ក្រសួងវប្បធម៌ និង​វិចិត្រ​សិល្បៈ បានបង្ហាញវឌ្ឍនភាពការងារ សម្រាប់ត្រីមាសទី១ ក្នុងការថែរក្សា និងការពារ​នូវ​ទីតាំង​បុរាណដ្ឋាន ទាំងនៅលើដី ក្រោមដី និងក្រោមទឹក ក្នុងប្រទេសកម្ពុជា។បើតាមលោក ឡេង វិទូ ប្រធានស្តីទី នាយកដ្ឋានបុរាណវិទ្យានិងបុរេប្រវត្តិវិទ្យា បានថ្លែងប្រាប់BTV ព័ត៌មាន​នាថ្ងៃទី១៥ ខែឧសភា ឆ្នាំ២០២៤នេះថា ការស្រាវជ្រាវបុរាណវិទ្យា រួមមាន៖ កំណាយ​បង្ការ​នៅ​ស្ថិតក្នុងទីធ្លារសាលាស្រុកអង្គរបុរី ខេត្តតាកែវ, កំណាយស្រាវជ្រាវនៅភ្នំចាស់ ខេត្តកំពង់ស្ពឺ​, សហការស្រាវជ្រាវជាមួយសាលាបារាំងចុងបូព៌ាប្រទេស, ការងារបណ្តុះបណ្តាល និង​ផ្សព្វផ្សាយ, រៀបចំសិក្ខាសាលាផ្សព្វផ្សាយអំពីលទ្ធផលស្រាវជ្រាវថ្មីក្នុងវិស័យបុរាណវិទ្យា និង​ពិនិត្យ និង​ដោះស្រាវវិវាទដីធ្លីទួលបុរាណមួយចំនួនតាមបណ្តាខេត្ត។លោក បន្តថា ការកំណាយបង្ការនៅស្ថិតក្នុងទីធ្លារសាលាស្រុកអង្គរបុរី ខេត្តតាកែវ​កំណាយ​បង្ការ​នេះ​មាន​គោលបំណងក្នុងការបញ្ជៀសផលប៉ះពាល់ផ្នែកបុរាណវិទ្យាលើទីតាំងអាគារ(វិហារចាស់) បច្ចុប្បន្ន​ស្ថិតក្នុងទីធ្លាសាលាស្រុកអង្គរបុរី។ ទីតាំងខាងលើគ្រោងមានការជួសជុលសំណង់ចាស់ ដើម្បី​យកមកប្រើប្រាស់ឡើងវិញ និងសាងសង់​បន្ទប់​ទឹក​ជិត​ទីតាំង​នោះ​មួយ​កន្លែង​សម្រាប់​បម្រើ​ដល់​សាធារណ​ជន ស្ថិតក្រោមគម្រោងអភិវឌ្ឍន៍របស់ធានាគារអភិវឌ្ឍអាស៊ី (ADB)។ ចំណុច​មួយ​ទៀត​ដើម្បីសិក្សាស្រាវជ្រាវ ប្រមូលទិន្នន័យផ្នែកបុរាណវិទ្យា ដែលជាធាតុផ្សំ​មួយ​ក្នុង​ការ​ចង​ក្រង​ព័ត៌មាន​បច្ចេកទេសលើទីតាំងផ្ទាល់ និងចងក្រងទុកជាឯកសារ និងបន្តផ្សព្វផ្សាយ​ទិន្នន័យ​នៃ​របប​គំហើញថ្មីនេះ។ ជាក់ស្តែងទីតាំងស្រុកអង្គរបុរី ជាក្រុងបុរាណ ហើយមានវត្តមាន​មនុស្ស​រស់​នៅ​តាំង​ពី​សម័យបុរេប្រវត្តិសាស្រ្តមកម្ល៉េះ។ ចំណែកការធ្វើកំណាយស្រាវជ្រាវនៅភ្នំចាស់ ខេត្តកំពង់ស្ពឺ ក្រោមជំនួយឧបត្ថមពីក្រុមហ៊ុន ខនស៍ ខេធី ស៊ីមេន (ភ្នំពេញ) ឯ.ក នាយកដ្ឋានបុរាណវិទ្យា និង​បុរេ​ប្រវត្តិវិទ្យា បានធ្វើកំណាយស្រាវជ្រាវនៅទីតាំងភ្នំចាស់ ខេត្តកំពង់ស្ពឺ។ ក្នុងគោល​បំណង​នៃ​ការ​ធ្វើ​កំណាយ​នេះ គឺដើម្បីសិក្សាស្រាវជ្រាវ ប្រមូលទិន្នន័យ​ផ្នែ​ក​បុរាណ​វិទ្យា​ទាក់​ទង​ និង​តំបន់​រមណីដ្ឋាន​ភ្នំចាស់ ដែលជាធាតុផ្សំមួយក្នុងការចងក្រងព័ត៌មានបច្ចេកទេសលើទីតាំងផ្ទាល់ និង​ចង​ក្រង​ទុកជាឯកសារ និងបន្តផ្សព្វផ្សាយទិន្នន័យនៃរបបគំហើញការស្រាវជ្រាវនេះ។ លទ្ធផល​បឋមតាមរយៈការសិក្សា និងការធ្វើកំណាយនេះ យើងរកឃើញ ឧបករណ៍ថ្មចំនួន១ បំណែក​កុលាលភាជន៍​មួយចំនួន និងបំណែកឆ្អឹងសត្វមួយចំនួនផងដែរ។ ភស្តុតាងទាំង​នេះអាច​បញ្ជាក់​បាន​ថា តំបន់នេះមានការប្រើប្រាស់ និងតាំងទីរបស់មនុស្សសម័យបុរេប្រវត្តិសាស្រ្ត។ ចំពោះ​ឧបករណ៍​ថ្ម និងបំណែកកុលាលភាជន៍ ត្រូវបានបញ្ជូនទៅធ្វើការវិភាគនៅប្រទេសអូស្រ្តាលី ដើម្បី​វិភាគ​រក​អាយុកាល និងមុខងារនៃប្រើប្រាស់របស់ឧបករណ៍ថ្ម។ ជាមួយគ្នានោះនាយកដ្ឋាន ក៏​បាន​សហការ​ស្រាវជ្រាវជាមួយសាលាបារាំងចុងបូព៌ាប្រទេស ចាប់តាំងពីឆ្នាំ២០២១ រហូតមក​ដល់​បច្ចុប្បន្ន​ក្រុម​ការងារស្រាវជ្រាវទាំងពីរស្ថាប័នបានសិក្សាស្រាវជ្រាវរកឃើញតំបន់សំខាន់ៗចំនួន៥ ស្ថិត​ក្នុងតំបន់ស្រុកឆែប ខេត្តព្រះវិហារ។ តំបន់ទី១ គឺត្រពាំងជាន់សន្លុង ទំហំ​ប្រមាណ​ជាង​១០​ហិកតា ដែលមានត្រពាំងបុរាណចំនួន២ ទួលអាចម៍ដែក និងទង់ដែងជាង១០០។ តំបន់ទី២ គឺ ភ្នំយក្ស​ព្រៅ ទំហំប្រមាណជាង៣៥ហិកតា ដែលមានភ្នំយក្សព្រៅ តំបន់រ៉ែទង់ដែង និងរ៉ែដែង និង​មាន​ទួល​អាចម៌ដែកនិងទង់ដែងសរុបចំនួន៣០។ តំបន់ទី៣ គឺឆែប០០១ ទំហំ​ប្រមាណ​ជាង​៦​ហិកតា ជាទីតាំងយករ៉ែដែក។ តំបន់ទី៤ គឺត្រពាំងស្វាយទោល ទំហំប្រមាណជាង១០ហិកតា ដែល​មាន​ទួលអាចម៍ដែកចំនួន១០ នៅក្បែរត្រពាំងស្វាយទោល និងតំបន់ទី៥ គឺភ្នំជ្រាប់ផ្តៅ ទំហំ​៨,៥ហិកតា ជាទីតាំងយករ៉ែទង់ដែងបុរាណដ៏ធំ ដែលមានបណ្តោយប្រវែង២០០ម៉ែត្រ ទទឹង​ប្រវែង​៦០​ម៉ែត្រ និងជម្រៅរហូតដល់២៥ម៉ែត្រ។ នៅតំបន់នេះ​ក៏ជា​​ការដ្ឋាន​យក​ថ្ម​បាយ​ក្រៀម​បុរាណ​ផង​ដែរ។ តំបន់យករ៉ែ និងផលិតលោហៈ ក្នុងស្រុកឆែប គឺជាតំបន់បេតិកភណ្ឌ​តែមួយ​គត់​ និង​ដំបូង​គេ ដែលមានទាំងកន្លែងយករ៉ែ និងកន្លែងផលិតទង់ដែងនៅជិតគ្នា។ តំបន់នេះ​ជា​ទីតាំង​ដ៏សំខាន់មួយដែលផលិតទង់ដែង សម្រាប់ផ្គត់ផ្គង់ដល់ចក្រភពអង្គរ។ បច្ចុប្បន្ននៅអាស៊ីអាគ្នេយ៍ គេ​រក​ឃើញអណ្តូងរ៉ែទង់ដែងបុរាណខ្នាតធំចំនួន៤ គឺនៅក្នុងប្រទេសថៃ នៅជ្រលងភ្នំ Khao Wong Prachan ខេត្ត Lopburi និងជ្រលងភ្នំPhu Lon ខេត្ត Nong Khai ក្នុងប្រទេសឡាវ ក្នុង​ខេត្ត Savannakhet និងនៅព្រះរាជាណាចក្រកម្ពុជា ស្ថិតក្នុងស្រុកឆែប ខេត្តព្រះវិហារ។ជាចុងក្រោយប្រធានស្តីទី នាយកដ្ឋានបុរាណវិទ្យានិងបុរេប្រវត្តិវិទ្យា បានបញ្ជាក់ថា ទិស​ដៅ​ផែន​ការ​ការងារ​បន្តនាឆ្នាំ២០២៤នេះ គឺនាយកដ្ឋាន​គ្រោង​នឹង​ធ្វើ​កំណាយ​ស្រាវជ្រាវ​នៅ​ក្នុង​ខេត្ត​ពោធិ៍សាត់ និងផ្ទៀងផ្ទាត់ និងកំណត់ដែនរក្សាការពារស្ថានីយបុរាណនៅស្រុកត្រពាំងប្រាសាទ ខេត្ត​ឧត្តរមានជ័យ និងធ្វើការផ្សព្វផ្សាយនូវលទ្ធផលស្រាវជ្រាវ លទ្ធផល​នៃ​ការ​កំណត់​ដែន​រក្សា​ការពារ និងអត្ថប្រយោជន៍និងគុណតម្លៃនៃបេតិកភណ្ឌជាតិជូនទៅដល់អាជ្ញាធរពាក់ព័ន្ធ និង​ប្រជា​ពលរដ្ឋ​ក្នុង​ស្រុកត្រពាំងប្រាសាទ ខេត្តឧត្តរមានជ័យ៕ អត្ថបទ រដ្ឋា 

ក្រុមស្រាវជ្រាវ ប្រទះឃើញព្រះកេសទេវតា ក្នុងកំណាយនៅខ្លោងទ្វារជ័យ

2024/05/15 10:07:12 am        300
Facebook Telegram Linkin
កាលពីថ្ងៃទី៨ ខែឧសភា ឆ្នាំ២០២៤ ក្រុមការងារស្រាវជ្រាវនៃនាយកដ្ឋានអភិរក្សប្រាសាទ និង​បុរាណវិទ្យា នៃអាជ្ញាធរជាតិអប្សរា បានប្រទះឃើញព្រះកេសទេវតាមួយ​កប់​ក្នុង​រណ្ដៅ​កំណាយ​ស្រាវជ្រាវ​ នៅបាតគ្រឹះខាងផ្នែកទេវតាទាញព្រ័ត្រ នៃខ្លោងទ្វារជ័យ។លោក អន សុភាព​ បុរាណវិទូ ដែលកំពុងធ្វើកំណាយនៅខ្លោងទ្វារជ័យបានបញ្ជាក់ថា ជាង​ពីរ​សប្ដាហ៍​មក​ហើយ ដែលក្រុមការងារបស់លោកបាននិងកំពុងធ្វើកំណាយស្រាវជ្រាវបុរាណវិទ្យា នៅ​ខ្លោង​ទ្វារជ័យនេះ។ លោកបញ្ជាក់ថា ការងារ​នេះ​ធ្វើ​ឡើង​ក្នុង​បំណង​ពិនិត្យ​មើល​រចនា​សម្ព័ន្ធ​បាត​គ្រឹះ ចម្លាក់កូរសមុទ្រទឹកដោះ ដើម្បីរៀបចំបង្រ្គប់​ឯកសារក្នុ​ង​គម្រោង​ជួស​ជុល​ចំណុច​នេះ​ឡើង​វិញ​។ តាមការលើកឡើងរបស់លោក អន សុភាព​ ជាការចៃដន្យ ក្នុង​ពេល​ក្រុម​ការងារ​លោក​កំពុង​កំណាយ​​នោះ ក៏បានប្រទះឃើញព្រះកេសមួយនៅស្អាត កប់ក្នុងរណ្ដៅជើង​គ្រឹះ​ទេវតា​ទាញ​ព្រ័ត្រ​តែម្ដង​។ ក្រោយការសិក្សា និងពិនិត្យ អ្នកជំនាញសន្និដ្ឋានថា ព្រះកេស​នោះ​បាន​បាក់​ធ្លាក់​ពី​រូប​ទេវតា នៅចំណុចលេខទី២៣ បើរាប់ពីជួរខាងមុខមក។ ព្រះកេសធ្វើពីថ្មភក់នេះមានបណ្ដោយ ២០ស.ម ទទឹង១១ស.ម និងកម្ពស់ ១២ស.ម។ ក្រោយកំណាយស្រាវជ្រាវបានមួយផ្នែកធំ អ្នកជំនាញបានសន្និដ្ឋានថា ​គ្រឹះ​ចម្លាក់​កូរ​សមុទ្រ​ទឹ​ក​ដោះ នៅខ្លោងទ្វារជ័យនេះនៅមានភាពមាំល្អ ព្រោះធ្លាប់បានជួសជុលម្ដងនៅសម័យកណ្ដាល និង​សម័យ​បារាំង។ យ៉ាងណា លោក អន សុភាព បញ្ជាក់ថា តាមការឱ្យយោបល់ពីអ្នកពាក់ព័ន្ធ គេ​ត្រូវ​កំណាយស្រាវជ្រាវនៅផ្នែកខាងលើបន្ថែមទៀត មើលស្ថានភាពតួស្ពានទាំងមូល ដើម្បី​មើល​ស្ថាន​ភាព​ជួសជុលនៅពេលនោះឱ្យបានល្អិតល្អន់ មុននឹងមានគម្រោងជួសជុល​ចម្លាក់កូរ​សមុទ្រ​ទឹកដោះនាពេលខាងមុខ៕ 

ប្រតិមាព្រះនារាយណ៍ផ្ទុំពីសំរឹទ្ធមកពីប្រាសាទមេបុណ្យខាងលិច និងបំណែកចំនួន៣៩ កំពុងវេចខ្ចប់ ដើម្បីត្រៀមបញ្ជូនទៅប្រទេសបារាំង

2024/05/07 11:13:20 am        224
Facebook Telegram Linkin
លោកជំទាវ ភឿង សកុណា រដ្ឋមន្ត្រីក្រសួងវប្បធម៌ និងវិចិត្រសិល្បៈ បានអញ្ជើញ​ចូលរួម​ក្នុង​ឱកាស “ពិធីប្រោះព្រំសុំសេចក្តីសុខនាអំឡុងពេលនៃការវេចខ្ចប់ និងដឹកជញ្ជូនប្រតិមាវិចិត្រព្រះ នារាយណ៍ជុំពីសំរឹទ្ធមកពីប្រាសាទមេបុណ្យ, នៅសារមន្ទីរជាតិកម្ពុជា ព្រឹកថ្ងៃទី៧ ខែឧសភា ឆ្នាំ២០២៤នេះ។ក្នុងពិធីប្រោះព្រំសុំសេចក្តីសុខនាអំឡុងពេលនៃការវេចខ្ចប់និងដឹកជញ្ជូនប្រតិមាវិចិត្រព្រះ នារាយណ៍ផ្ទុំ​​ពី​សំរឹទ្ធមកពីប្រាសាទមេបុណ្យ ខាងលើនេះមានការចូលរួមពីលោក Fabrice ETIENNE, អនុប្រធានបេសកកម្ម របស់ស្ថាទូតបារាំងប្រចាំនៅកម្ពុជា, M. Jamel OUBECHOU តំណាងនិងលោកស្រី Yannick LINTZ នាយកសារមន្ទីជាតិសិល្បៈអាស៊ីហ្គីមេ និងMme. Elke SELTER ប្រធានកម្មវិធីនៃស្ថាប័ន ALIPH។លោកជំទាវ ភឿង សកុណា រដ្ឋមន្ត្រីក្រសួងវប្បធម៌និងវិចិត្រសិល្បៈ បានថ្លែងថា ការរៀបចំ​ពិធី​សូត្រ​មន្តប្រោះព្រំសុំសេចក្តី សុខចម្រើន អំពីប្រតិមាព្រះនារាយណ៍​ផ្ទុំ​ពីសំរឹទ្ធ​មក​ពី​ប្រាសាទ​មេ​បុណ្យខាងលិច និងបំណែកចំនួន៣៩ ដែលកំពុងវេចខ្ចប់ នាវេលាព្រឹកនេះ ដើម្បីត្រៀម​បញ្ជូន​ទៅ​ប្រទេស​បារាំង​នាប៉ុន្មានថ្ងៃខាងមុខ។ ការបញ្ជូនប្រតិមាសំរឹទ្ធដ៏វិចិត្រនេះ ជាគម្រោង​សហ​ប្រតិបត្តិការ​ផ្នែកវិទ្យាសាស្ត្រ និងបច្ចេកទេសមួយរវាងបារាំង និងខ្មែរ ដែល​បាន​ឯកភាព​គ្នា​តាំង​ពី​ឆ្នាំ២០១៩ មកម៉្លេះ ប៉ុន្តែគម្រោងនេះត្រូវបានពន្យារពេលវេលាដោយសារវិបត្តិកូវីដ-១៩។ គម្រោងនេះ មានបំណងក្នុងការជួសជុល អភិរក្ស និងសិក្សា​វិភាគ​សមាស​ភាព​ផ្សំ​លើ​ប្រតិមា​ព្រះនារាយណ៍​ផ្ទុំ នៅវិទ្យាស្ថាន Centre de recherche et de restoration des musées de France (C2RMF) នៃប្រទេសបារាំង ដើម្បីធ្វើការឈ្វេងយល់​បន្ថែម​ពី​បច្ចេក​ទេស​ដ៏​ប៉ិន​ប្រសព្វ​នៃ​ការ​សិត លោហៈខ្នាតធំមហាសាលក្នុងអារ្យធម៌ខ្មែរនាសម័យអង្គរ។ លទ្ធផលនៃ​ការ​សិក្សា​ស្រាវជ្រាវ​នេះ នឹងបោះពុម្ពផ្សាយយ៉ាង ទូលំទូលាយដើម្បីចែក​រំលែក​ពី​បទ​ពិសោធន៍ និង​ទេព​កោសល្យ​ក្នុង​ការសិតលោហៈនៅក្នុងប្រវត្តិសាស្ត្រមនុស្សជាតិ។ ក្រៅពីការងារវិភាគបច្ចេកទេស ក្រុម​ជំនាញនឹងសាកល្បងផ្តុំបំណែកទាំង៣៩ដែលបានដាច់ចេញពីដងខ្លួនអស់រយៈកាល ជិត​១០០០ឆ្នាំមកហើយ និងរៀបចំផ្គុំតម្លើងជា3Dដើម្បីបានដឹងពីទីតាំងនៃបំណែកទាំងនោះ។ទន្ទឹមនឹងនេះផងដែរ លោកជំទាវរដ្ឋមន្ត្រី សូមជម្រាបជូនសាធារណជនជាតិនិងអន្តរជាតិថា ក្រោយ​គម្រោងអភិរក្សនិងវិភាគ ស្រាវជ្រាវនេះបញ្ចប់ ប្រតិមាដ៏វិចិត្រ​នេះនឹ​ង​ដាក់​តាំង​បង្ហាញ​ក្នុង​ពិព័រណ៍​មិន​អចិន្ត្រៃយ៍នៅសារមន្ទីរសិល្បៈអាស៊ីហ្គីមេ ហើយការដាក់តាំងនេះ នឹងមានបន្ថែម​រូប​ចម្លាក់​អំពី​សំរឹទ្ធចំនួន១២៦ផ្សេងទៀតដែលខ្ចីបន្ថែមពីសារមន្ទីរជាតិកម្ពុជានា ដំណាក់កាលទី២។ ពិព័រណ៍​មិនអចិន្ត្រៃយ៍ស្តីពី សំរឹទ្ធសម័យអង្គរៈ៖ សិល្បៈនៃអាទិទេព នឹងរៀបចំ​នៅ​សារមន្ទីរ​ជាតិ​ហ្គីមេ ​នាអំឡុងពាក់កណ្តាលឆ្នាំ២០២៥ ដោយបង្ហាញពី ការវិវឌ្ឍន៍បច្ចេក​ទេស​នៃ​ការ​សិត​លោហៈ​ក្នុង​អារ្យធម៌ខ្មែររាប់ចាប់ពីសម័យបុរេប្រវត្តិសាស្ត្រដល់សម័យក្រោយអង្គរ។ ក្រោយបញ្ចប់​ពិព័រណ៍មិនអចិន្ត្រៃយ៍នៅសារមន្ទីរហ្គីមេ ប្រតិមានេះនឹង បន្តដំណើរ​ទៅ​ដាក់​តាំង​នៅ​ប្រទេស​អាមេរិក​ចំនួន៣ទីតាំងបន្ថែមទៀត។ ការធ្វើដំណើររបស់ប្រតិមាព្រះនរាយណ៍ ដែលជាអាទិទេព​ព្រហ្មញ្ញសាសនារបស់ខ្មែរនាសម័យអង្គរ ប្រៀបដូចជា​ការ​នាំយក​នូវ​ទេពកោសល្យ​ល្អ​ឯក​នៃ​បច្ចេក​ទេស​សិត លោហៈដ៏អស្ចារ្យរបស់ជាតិខ្មែរ ចេញទៅផ្សព្វផ្សាយនៅលើឆាកអន្តរជាតិ ដើម្បីជា​ប្រយោជន៍​ឲ្យ​សាធារណជនបានឈ្វេង យល់បន្ថែម​ពី​ភាព​ឧត្តុង​ឧត្តម​ខ្ពង់​ខ្ពស់​នៃ​អារ្យធម៌​ខ្មែរ​នា​សម័យ​បុរាណ។លោកជំទាវ ភឿង សកុណា បានបញ្ជាក់ថា អស់រយៈកាលជាច្រើនទសវត្សម​ក​ហើយ​ដែល​បារាំង និង​កម្ពុជា មានកិច្ចសហប្រតិបត្តិការយ៉ាងល្អជាមួយគ្នាលើគ្រប់វិស័យ ជាពិសេសគឺ​កិច្ច​សហ​ប្រតិបត្តិការ​លើវិស័យវប្បធម៌ ដែលជាកម្លាំងចលករយ៉ាងសំខាន់ ក្នុងការផ្សារ​ភ្ជាប់ ទំនាក់​ទំនង​រវាង​ប្រទេស​ទាំងពីរ។ ជាក់ស្តែងនាពេលបច្ចុប្បន្ននេះ ក្រសួងមានកិច្ចសហការ​លើ​គម្រោង​ស្រាវ​ជ្រាវ​ បេតិកភណ្ឌរូបីនិងអរូបី ជាគម្រោងនាំមុខនៅកម្ពុជា ក្រោមកិច្ច​សហប្រតិបត្តិការ​ជា​មួយ​បណ្តា​អង្គការ វិទ្យាស្ថាន សាកលវិទ្យាល័យ និងស្ថាប័ននានាពីប្រទេសបារាំង ហើយគម្រោង​ទាំង​នោះ​ភាគ​ច្រើនកំពុងអនុវត្តនៅតំបន់រមណីយដ្ឋាន បេតិកភណ្ឌវប្បធម៌។ ផ្អែកលើលទ្ធផល​នៃ​កិច្ច​សហប្រតិបត្តិការល្អនេះ កាលពីពេលថ្មីៗកន្លងមក កម្ពុជាទទួលបានកញ្ចប់ ថវិកាកៅសិបម៉ឺនអឺរ៉ូ សម្រាប់​ប្រើប្រាស់ក្នុងការសិក្សាគម្រោងនៃការពង្រីកសារមន្ទីរជាតិកម្ពុជា ហើយការងារ​នេះ​នឹង​មាន​រយៈ​ពេលពីរឆ្នាំ។ គម្រោងនេះបានផ្តួចផ្តើមដំបូងនាអំឡុងពេលដំណើរទស្សនកិច្ចផ្លូវការរបស់ព្រះមហាក្សត្រនៃព្រះរាជាណាចក្រកម្ពុជាយាងទៅបំពេញបេសកកម្មនៅប្រទេសបារាំងកាលពីថ្ងៃទី១៣ ខែវិច្ឆិកា ឆ្នាំ២០២៣ និងទទួលបានការគាំទ្រទាំងស្រុងពីរដ្ឋាភិបាលនៃប្រទេសទាំងពីរ ក្នុងពេល​ដំណើរទស្សនកិច្ចផ្លូវការរបស់សម្តេចបវរធិបតី នាយករដ្ឋមន្ត្រីនៃព្រះ រាជាណា​ចក្រ​កម្ពុជា​នា​ថ្ងៃ​ទី​១៨-១៩ ខែមករា ឆ្នាំ២០២៤។ លទ្ធផលនៃកិច្ចសហការនានាកន្លងមក បានបង្ហាញអំពីឆន្ទៈ មោះមុត រវាងប្រទេសទាំងពីរក្នុងការជួយជ្រោមជ្រែងគាំទ្រលើផ្នែកវប្បធម៌៕ អត្ថបទ រដ្ឋា

អាជ្ញាធរជាតិអប្សរា ប្រទះឃើញបំណែករូបព្រះពុទ្ធបដិមាធ្វើពីថ្មភក់ ចំនួនជាង១០០បំណែក នៅប្រាសាទតាព្រហ្ម

2024/04/30 02:28:32 pm        317
Facebook Telegram Linkin
ក្រុមការងារនាយកដ្ឋានអភិរក្សប្រាសាទ និងបុរាណវិទ្យា នៃអាជ្ញាធរជាតិអប្សរា បានប្រទះ​ឃើញ​បំណែករូបព្រះពុទ្ធបដិមាធ្វើពីថ្មភក់ប្រមាណជាង១០០បំណែក នៅក្នុងបរិវេណ​របស់​ប្រាសាទ​តាព្រហ្ម ខណៈពេលដែលជីកដីធ្វើកំណាយសម្រាប់ស្រាវជ្រាវ កាលពីពេលថ្មីៗ។ បំណែកបដិមាទាំងនោះ មានដូចជា រូបព្រះពុទ្ធគង់ភ្នែនប្រក់នាគ រូបលោកកេស្វរៈ រូបព្រះពុទ្ធគង់​ភ្នែនប្រក់​នាគសមាធិ រូបប្រាជ្ញាបារមិតា រូបព្រះកេសព្រះពុទ្ធប្រក់នាគមួយកំណាត់ ដាច់ត្រឹម ក បាល័ង្ល និងបំណែកដៃជើងជាដើម។បុរាណវិទូ លោកស្រី នេត ស៊ីមន ឱ្យដឹងថា ដំបូងឡើយ គឺក្រុមការងារបានទៅធ្វើការ​សម្អាត​គំនរ​ដី ដែលស្ថិតផ្នែកខាងត្បូង នៃកំពែងថ្មបាយក្រៀមរបស់រោងទងទី៣ នៃប្រាសាទតាព្រហ្ម ដើម្បី​រៀបចំ​សម្រង់​ប្លង់បំណែកថ្មដែលរាយប៉ាយ ព្រមទាំងមានការថតរូប ចុះបញ្ជីចូលទៅក្នុង​ប្លង់​រួមរ​បស់​ប្រាសាទ​ឱ្យមានសណ្ដាប់ធ្នាប់ ដោយសារតែនៅទីនោះ មានថ្មរាយប៉ាយច្រើន។ កំឡុង​ពេល​សម្អាត ក្រុមការងារ ក៏បានប្រទះឃើញបំណែករូបបដិមាជាច្រើននៅទីនោះ។  លោកស្រី ស៊ីមន មានប្រសាសន៍ទៀតថា ដោយសារ​តែ​ក្រុម​ការងារ​ប្រទះ​ឃើញ​បំណែក​បដិមា​កប់​នៅ​ក្នុង​ដីជម្រៅពី១០ទៅ១៥សង់ទីម៉ែត្រ កាន់តែច្រើននោះ ក៏សម្រេចស្នើសុំយោបល់ពីថ្នាក់លើ ធ្វើ​រណ្តៅកំណាយ ដើម្បីស្រាវជ្រាវរកនៅក្រោមដីបន្ថែមទៀត។ នៅពេលជីកកាយដីជ្រៅបន្តិច ក៏​ប្រទះ​ឃើញ​បំណែករូបបដិមាកាន់តែច្រើន សរុបប្រហែលជាង១០០បំណែក។រហូតមក​ដល់​ពេលនេះ ក្រុមការងារមិនទាន់ដឹងច្បាស់នៅឡើយទេ ថាតើក្នុង​ជម្រៅ​ដី​ចុះទៅ​ក្រោម​ទៀត​អាច​នៅ​តែមានបដិមាដែរឬក៏យ៉ាងណាឡើយ។ បច្ចុប្បន្នក្រុមការងារ កំពុងតែលើក​យក​បំណែក​រូប​បដិមាជាច្រើនដែលគេបានប្រទះឃើញនោះ មកធ្វើការគូរប្លង់ បង់លេខ ព្រមទាំង​វាស់​វែង​ទំហំ​ខ្នាត​ជាបណ្តោះអាសន្ន។  ក្រុមអ្នកជំនាញបុរាណវិទ្យាបានសន្និដ្ឋានថា បំណែកព្រះពុទ្ធបដិមាដែលគេប្រទះឃើញទាំងនោះ គឺស្ថិតក្នុងរចនាបថបាយ័ន។ បំណែករូប​បដិមា​ដែលប្រទះឃើញខ្លះ មានកម្ពស់ប្រហែលកន្លះម៉ែត្រ និងទំហំពី៤០ទៅ៥០សង់ទីម៉ែត្រ៕

បឹង៥០០ រំលេចទេសភាពវាលស្មៅដ៏ស្រស់ស្អាតកំពុងផ្ទុះការចាប់អារម្មណ៍យ៉ាងខ្លាំង

2024/04/30 01:15:59 pm        767
Facebook Telegram Linkin
វាលស្មៅបាតបឹង ៥០០ ស្ថិតនៅក្នុងភូមិព្រៃស្វា ឃុំពត់សរ ស្រុកបាទី ខេត្តតាកែវ កំពុងផ្ទុះ​ការចាប់​អារម្មណ៍ជាខ្លាំងពីសំណាក់ប្រជាពលរដ្ឋ និងភ្ញៀវទេសចរ ទៅទស្សនា​កម្សាន្ត​ជា​រៀងរាល់​ពេល​ល្ងាច។ គួរជម្រាបជូនថា តំបន់បឹង ៥០០ នេះ គឺជាភូមិសាស្រ្ត​ដែលស្ថិត​នៅ​ក្នុង​ដីគម្រោង​សាង​សង់​អាកាស​យានដ្ឋានអន្តរជាតិតេជោ។ បច្ចុប្បន្ននេះ វាលស្មៅបាតបឹង ៥០០ បានបើក​ឱ្យ​ចូល​ទស្សនាកម្សាន្តដោយសេរី ដោយពុំមានការហាមឃាត់នោះទេ។ ជាមួយ​នឹង​ការ​អនុញ្ញាត​ឱ្យ​ចូល​ទស្សនា ក៏មានការសំណូមពរដល់ប្រជាពលរដ្ឋដែលខ្ចប់ម្ហូបអាហារយកទៅទទួលទាននៅទីនោះ ត្រូវ​ទុកដាក់ និងវិចខ្ចប់សំរាមឱ្យបានត្រឹមត្រូវ កុំចោលពាសវាលពាសកាល ដើម្បី​ជួយ​លើក​កម្ពស់អនាម័ន និងបរិស្ថាន៕ អត្ថបទ៖ ចេន សុភានាថ រូបភាព៖ ពូ-នាគខ្មៅ

រាជរដ្ឋាភិបាលជំរុញការរៀបចំផលិតផលទេសចរណ៍ដើម្បីទាក់ទាញទេសចរអន្តរជាតិទស្សនាសៀមរាបអង្គរ

2024/04/25 03:09:48 pm        134
Facebook Telegram Linkin
នៅថ្ងៃទី២៥ ខែមេសានេះ ឯកឧត្តម ថោង ខុន ទេសរដ្ឋមន្ត្រី ទទួលបន្ទុកបេសកកម្មពិសេស និង​ប្រធាន​គណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប អង្គរ បានកិច្ចប្រជុំលើកទី១ គណៈកម្មការ​គ្រប់គ្រង និងអភិវឌ្ឍន៍ទេសចរណ៍សៀមរាប អង្គរ ដែលកិច្ចប្រជុំនេះ​ក្រុមការងារ​អន្តរ​ក្រសួង ជំរុញការរៀបចំ អភិវឌ្ឍន៍ផលិតផលទេសចរណ៍ឲ្យបានច្រើន ដើម្បីទាក់ទាញ​ទេសចរ​ទស្សនា​ខេត្តសៀមរាប និងស្នាក់នៅយូរ។ឯកឧត្តម ទេសរដ្ឋមន្ត្រី ថោង ខុន ថ្លែងថា បច្ចុប្បន្ន នៅក្នុង​ដំណើរ​ការ​អនុវត្ត​ផែនការ​យុទ្ធសាស្ត្រ​អភិវឌ្ឍន៍​តំបន់​អង្គរ ឆ្នាំ២០២១ ឆ្នាំ២០៣៥ និងផែនការអភិវឌ្ឍខេត្តសៀមរាប បាននិងកំពុង​ទទួល​បាន​សមិទ្ធិផលជាបណ្តើរៗ ជាពិសេសបណ្តាញផ្លូវនៅក្នុងខេត្ត ផ្លូវតំបន់ប្រាសាទ តំបន់​ព្រៃអង្គរ ជាងនេះទៅទៀត គោលដៅទេសចរណ៍ នានាទៀត មានតំបន់ភ្នំគូលេន តំបន់បន្ទាយស្រី តំបន់​បឹង​ទន្លេសាប និងតំបន់មានសក្តានុពលនានា នៅជុំវិញខេត្តសៀមរាប គឺក្រុមការ​ងារ​អន្តរ​ក្រសួង បាននិងកំពុងគិតគូអភិវឌ្ឍន៍បន្ថែមឲ្យមានភាពប្លែកៗ និង​ការ​ទាក់​ទាញ​ទេសចរ​ស្នាក់​នៅ​យូរ​ទស្សនា​ខេត្តសៀមរាប។ឯកឧត្តម ថោង ខុន ថ្លែងថា សម្រាប់ការងារលក់សំបុត្រទស្សនាតំបន់អង្គរ សំគាល់ឃើញថា ភ្ញៀវ​អន្តរជាតិ​ភាគច្រើនទិញសំបុត្រទស្សនាតំបន់អង្គរចំនួន៣ថ្ងៃ ច្រើនជាងទិញ​សំបុត្រ​ចូល​ទស្សនា​១​ថ្ងៃ​ ដែលបញ្ហានេះបង្ហាញពីភាពរីកចម្រើនអភិវឌ្ឍខេត្តសៀមរាប និងទាក់ទាញ​ទេសចរ​អន្តរជាតិ​ស្នាក់​នៅ​យូរ ទស្សនាខេត្តសៀមរាប។ឯកឧត្តម សុខ សូកេន រដ្ឋមន្ត្រីក្រសួងទេសចរណ៍ថ្លែងថា នៅក្នុង​ដំណើរ​អនុវត្ត​យុទ្ធនាការ​ឆ្នាំ​ទស្សនា​សៀមរាប អង្គរ២០២៤ និងរៀបចំព្រឹត្តិការណ៍ទេសចរណ៍ជាតិ អន្តរជាតិ កន្លងមកនេះ គឺ​បានទាក់ទាញទេសចរជាតិ អន្តរជាតិទៅទស្សនាខេត្តសៀមរាប ហើយបច្ចុប្បន្ន ក្រសួង​ក៏​កំពុង​សហការ និងស្នើសុំស្ថាប័នរដ្ឋ ឯកជន និងភាគីពាក់ព័ន្ធរៀបចំកិច្ចប្រជុំ សិក្ខាសាលា រៀបចំ​ព្រឹត្តិការណ៍​កម្សាន្តសប្បាយនានា ទៅកាន់ខេត្តសៀមរាបឲ្យបានច្រើន។តាមការបញ្ជាក់​ពីតំណាងរដ្ឋបាលខេត្តសៀមរាប ថ្លែងថា តាមរយៈកំណើន​ទេសចរជាតិ​អន្តរជាតិ​ទស្សនា​ខេត្តសៀមរាបបច្ចុប្បន្ន គឺបានជំរុញមូលដ្ឋានអាជីវកម្មទេសចរណ៍ នៅខេត្តសៀមរាប ប្រមាណ​៨០ទៅ៨៥% គឺបានបើកដំណើរឡើងវិញ ស្របពេលខេត្ត​ក៏កំ​ពុង​បាន​រៀបចំ​អភិវឌ្ឍន៍​ដង​ស្ទឹង​សៀមរាប អភិវឌ្ឍន៍គោលដៅ​ទេសចរណ៍​នានា​ទៀត​កំពុង​ទាក់​ទាញ​ភ្ញៀវ​ទៅទស្សនា​ច្រើ​ន​ជា​ពិសេស​តំបន់បឹងទន្លេសាប តំបន់ភ្នំគូលេន និងតំបន់បន្ទាយស្រីជាដើម៕ អត្ថបទ៖ ស៊ុម សុខជា 

ចូលឆ្នាំខ្មែរ៤ថ្ងៃទូទាំងប្រទេសទទួលបានភ្ញៀវជាតិ-អន្តរជាតិដើរកម្សាន្តជាង ២១លាននាក់ ក្នុងនោះទេសចរបរទេស ១១ម៉ឺននាក់

2024/04/17 03:38:41 pm        535
Facebook Telegram Linkin
ក្នុងឱកាសពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំរោងរយៈពេល៤ថ្ងៃ គិតចាប់ពីថ្ងៃទី១៣ ដល់​ថ្ងៃ​ទី១៦ ខែមេសា ឆ្នាំ២០២៤នេះ នៅទូទាំងប្រទេសមានភ្ញៀវទេសចរជាតិ និងអន្តរជាតិ ដើរ​ទស្សនា​កម្សាន្ត​ប្រមាណជាង ២១លាននាក់ ខណៈចូលឆ្នាំ​ខ្មែរ​កា​ល​ពីឆ្នាំ​២០២៣ រយៈពេល៣ថ្ងៃ​មាន​ភ្ញៀវ​ដើរកម្សាន្តប្រមាណ ១៣លាន១៣ម៉ឺននាក់។ យោងតាងរបាយការណ៍ របស់ក្រសួងទេសចរណ៍ បានឲ្យដឹងថា ក្នុងចំណោមពលរដ្ឋ និង​ភ្ញៀវ​ទេសចរ​ជាតិ អន្តរជាតិ ដែលដើរកម្សាន្ត ថ្ងៃបុណ្យចូលឆ្នាំថ្មី ប្រពៃណីជាតិខ្មែរ ឆ្នាំរោង គ.ស ២០២៤ រយៈពេល៤ថ្ងៃ សរុបជាង ២១ លាននាក់នោះ ខណៈ​មាន​ទេសចរ​បរទេស​សរុប​ប្រមាណ ១១ម៉ឺននាក់។របាយការណ៍​បញ្ជាក់ថា រាជធានី ខេត្ត ចំនួន ប្រាំ ដែលទទួលបានទេសចរច្រើនជាងគេ រួមមាន ទី១ ខេត្តកំពង់ចាមទទួលបានភ្ញៀវដើរកម្សាន្តជាង ៥លាននាក់។ ទី២ ខេត្តព្រៃវែង​ទទួល​ភ្ញៀវ​ដើរ​កម្សាន្ត​សរុប​បានជិត ២លាន៣សែននាក់។ ទី៣ ខេត្តកំពង់ស្ពឺ ទទួលបានភ្ញៀវជាង ២លាននាក់។ ទី៤ ខេត្តបាត់ដំបង ទទួលភ្ញៀវបាន១លាន៧៣ម៉ឺននាក់ ទី៥ ខេត្តកំពត ទទួលភ្ញៀវបានជាង ១លាន​៤​សែននាក់។បណ្តាទេសចរជាតិអន្តរជាតិបានថ្លែងថា គ្រប់រាជធានីខេត្ត​ទាំង​អស់​សុទ្ធ​តែ​បាន​រៀបចំ​កម្ម​វិធី​សង្ក្រាន្ត​ឆ្នាំថ្មី បានទាក់ទាញពលរដ្ឋ និងភ្ញៀវទេសចរជាតិ-អន្តរជាតិ ចុះ​ទស្សនា​លេង​ល្បែង​កម្សាន្ត​ប្រជាប្រិយខ្មែរច្រើនក្នុងទឹកមុខញញឹមសប្បាយរីករាយ តម្លៃទំនិញសេវាកម្ម ម្ហូបអាហារ ហាក់​មិនសូវឡើងថ្លៃ ស្ថានភាពសន្តិសុខ សណ្តាប់ធ្នាប់ល្អប្រសើរ។ ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍បញ្ជាក់ថា ចំនួន​ភ្ញៀវ​ទាំង​ជាង ២១ លាននាក់នេះ គឺរដ្ឋបាលរាជធានីខេត្ត រាប់​បញ្ចូល​ចំនួន​ភ្ញៀវ​ទេសចរ​ដែល​ធ្វើ​ដំណើរ​កម្សាន្ត​នៅ​តាមរមណីយដ្ឋាន គោលដៅទេសចរណ៍ទូទាំងប្រទេស និងប្រជាជន​ដែល​បាន​ចូល​រួម​លេង​កម្សាន្ត​នៅ​តាម​ទីតាំងដែលមានការរៀបចំកម្មវិធីសង្រ្កាន្ត ព្រមជាមួយបងប្អូន​ប្រជាពលរដ្ឋ​ដែល​លេង​កម្សាន្ត​នៅ​តាមភូមិស្រុក និងកន្លែងជួបជុំនានា៕

ការស្រាវជ្រាវថ្មីបានរកឃើញវត្តមានសត្វជាង៧០០ប្រភេទខុសគ្នារស់នៅក្នុងតំបន់ព្រៃកោងកាងនៃប្រទេសកម្ពុជា

2024/04/17 02:35:14 pm        510
Facebook Telegram Linkin
អង្គការសត្វព្រៃ និងរុក្ខជាតិកម្ពុជា និងសហគ្រាសហ្វីស៊ីង ខេត អេកូឡូជីខល អេនធើប្រាយ ខូ អ៊ិល ធី ឌី សហការជាមួយក្រសួងបរិស្ថាន បានចងក្រងនូវរបាយការណ៍សិក្សា​ស្រាវជ្រាវ​ជា​លើក​ដំបូង​ ស្តីពីជីវៈចម្រុះនៅតំបន់ព្រៃកោងកាង នៃប្រទេសកម្ពុជា ដែលការ​ស្រាវជ្រាវ​ថ្មី​បាន​រក​ឃើញ​វត្ត​មាន​សត្វជាង ៧០០ប្រភេទខុសគ្នា រស់នៅក្នុងតំបន់ព្រៃកោងកាង នៃប្រទេសកម្ពុជា ។ នេះ​បើ​តា​មការឱ្យដឹងពីអង្គការ Fauna & Flora - Cambodia Programme ថ្ងៃទី១៧ ខែមេសា ឆ្នាំ​២០២៤ ។ការសិក្សាស្រាវជ្រាវរបស់អង្គការសត្វព្រៃ និង រុក្ខជាតិកម្ពុជា និង សហគ្រាស ហ្វីស៊ីងខេត អេកូឡូ​ជីខល​ អេនធើប្រាយ ខូ អ៊ិល ធី ឌី សហការជាមួយក្រសួងបរិស្ថាននេះ បានធ្វើ​ឡើង​នៅ​ក្នុង​ដែន​ជម្រក​សត្វ​ព្រៃ​ពាមក្រសោប ២៣ ៧៥០ ហិកតា និងតំបន់រ៉ាមសារកោះកាពិ ១២ ០០០ហិកតា ។ ការរកឃើញនេះ ផ្តល់ជាចំណេះដឹងមូលដ្ឋាន អំពីជីវៈចម្រុះក្នុងតំបន់នោះ ហើយ​យើង​រំពឹងថា​នឹង​អាច​រក​ឃើញប្រភេទសត្វថ្មីៗបន្ថែមទៀត ក្នុងការសិក្សាស្រាវជ្រាវនាពេលអនាគត ។ក្នុង​ស្រាវជ្រាវនេះ ក៏បានរកឃើញនូវប្រភេទសត្វជាច្រើនប្រភេទ ដូចជា សត្វស្វាកន្ទុយវែង ជា​ប្រភេទ​ជិត​ផុតពូជ, សំពោចធំ, សត្វភេរោមច្រមុះ, ភេខ្មៅ, និង ខ្លាត្រី ជាប្រភេទ​ងាយ​រង​គ្រោះ​ផង​ដែរ​៕ Photo credit: Fishing Cat Ecological Enterprise (FCEE)

«សង្ក្រាន្តបាកាន» ខេត្តពោធិ៍សាត់ រយៈពេល៤ថ្ងៃ មានប្រជាពលរដ្ឋច្រើនកុះករចូលមកលេងកម្សាន្ត​យ៉ាងសប្បាយរីករាយ

2024/04/17 02:02:50 pm        603
Facebook Telegram Linkin
ពោធិ៍សាត់៖ សង្ក្រាន្តបាកាន២០២៤ ដែលមានរយៈពេល៤ថ្ងៃពេញ គឺចាប់ថ្ងៃទី១៣ ដល់១៦ ខែមេសា ឆ្នាំ២០២៤ ដែលបានរៀបចំ​ធ្វើ​ឡើងក្នុងបរិវេណវត្តបាកាន ស្ថិតក្នុងឃុំត្រពាំងជង ស្រុកបាកាន មានប្រជាពលរដ្ឋក្មេងចាស់ប្រុសស្រីបានចូលមកទស្សនា លេងកម្សាន្ត​យ៉ាង​ច្រើន​កុះករ​ ជាមួយកម្មវិធីយ៉ាងសម្បូរបែប ក្នុងនោះមានការចាប់អារម្មណ៍ខ្លាំង​លើ​ការរាំង​ចង្វាក់​ប្រពៃណី​ខ្មែរ​ និងរាំទូលក្អមដោយយុវជន ៥០០នាក់មកពីឃុំទាំង៩ក្នុងស្រុកបាកាន។បើតាម ឯកឧត្តមបណ្ឌិត ទី ថានី អនុប្រធានក្រុមការងារចុះជួយស្រុកបាកាន និង​ជា​ប្រធាន​គណៈកម្មការ​រៀបចំ​សង្ក្រាន្តបាកានឆ្នាំ២០២៤ បានឲ្យដឹងថា រយៈពេល៤ថ្ងៃពេញ​នៃ​សង្ក្រាន្ត​បាកាន មានកម្មវិធីយ៉ាងច្រើនរួមមានការប្រគំតន្ត្រី​ដោយតារាចម្រៀងល្បីៗមកភ្នំពេញ តារា​កំប្លែង​ល្បីៗ​ , កម្មវិធីរាំចង្វាក់ប្រពៃណីខ្មែរ និងប្រកួតរាំម៉ាឌីហ្សុនទូលក្អមដោយយុវជន៥០០នាក់ , កម្ម​វិធី​ប្រដាល់​បែបស្រុកស្រែ ,ការសម្តែងរបាំងខ្មែរ ,តាំងពិព៌ណស្នាដៃនិងផលិតផលឃុំទាំង៩, ការ​លេង​ល្បែងប្រជាប្រិយខ្មែរជាច្រើនមុខ, កម្មវិធីប្រកួតបាល់ទះ , ហើយក៏មានក្រុមDJ និង​ការ​រាំ​កម្សាន្ត ដោយមានបាញ់ទឹកនិងបាញ់ពពុះសាប៊ូរផងដែរ ។ ឯកឧត្តម បានបញ្ជាក់បន្ថែមថា ចំពោះ​កម្ម​វិធី​រាំ​ចង្វាក់​ប្រពៃណីខ្មែរ​ដោយ​ក្រុម​យុវជន​ចំនួន ៥០០​នាក់​គឺ​ចង់​ឲ្យ​យុវជន​ចូលរួម​ថែ​រក្សា​នូវ​អ្វីជា​របស់ខ្មែរ ដូនតាយើងបានបន្សល់ទុកឲ្យ ចំណែកការប្រកួត​រាំម៉ាឌីហ្សុន​ទូល​ក្អម​ដោយ​យុវជ​ន​៥០០នាក់គឺមានអត្ថន័យចង់ឲ្យយុវជនចេះមានចិត្តអំណត់អត់ធ្មត់ និងជាពិសេស​គឺ​ចេះ​រួម​សាមគ្គី​ភាព​គ្នា​ទើបទទួលបានជ័យជម្នះ ដូចពាក្យ “សាមគ្គី១០ ជ័យជម្នះ១០” ។ក្នុងឱកាសអញ្ជើញជាអធិបតីភាពក្នុងពិធីបើកសង្ក្រាន្តបាកាន២០២៤ កាលពីរសៀលថ្ងៃទី១៣ មេសា ឯកឧត្តម ទី នរិន្ទ ប្រធានក្រុមការងារចុះជួយស្រុកបាកាន បាន​មាន​ប្រសាសន៍​លើក​ឡើង​ថា ដើម្បីផ្តល់ភាពសប្បាយរីករាយជូនដល់បងប្អូនប្រជាពលរដ្ឋក្នុងស្រុកបាកាន ក៏ដូច​ជា​ក្នុង​ខេត្ត​ពោធិ៍សាត់ ក្រុមការងារចុះជួយស្រុកបាកាន បានសហការជាមួយអាជ្ញាធរមូលដ្ឋាន ព្រះសង្ឃ និង​គណៈ​កម្មការវត្តបាកាន ដើម្បីរៀបចំសង្ក្រាន្តបាកានឆ្នាំ២០២៤នេះឡើង ក្រោមគំនិត​ផ្តួច​ផ្តើម​របស់​ ឯកឧត្តម កែវ រតនៈ រដ្ឋមន្ត្រីក្រសួងរ៉ែនិងថាមពល និងជាប្រធា​នក្រុម​ការងារ​ចុះ​ជួយ​មូល​ដ្ឋាន​ខេត្តពោធិ៍សាត់ ។ ក្រៅពីសង្ក្រាន្តបាកាន២០២៤នេះដែលជាកម្មវិធីធំថ្នាក់ស្រុក ឯកឧត្តម កែវ រតនៈ ក៏បានណែនាំឲ្យក្រុមការងារតាមឃុំទាំង៩ ក្នុងស្រុក​បាកាន​រៀបចំ​កម្ម​វិធី​សង្ក្រាន្ត​តាម​ឃុំរៀង​ៗ​ខ្លួនផងដែរ៕ 

រយៈពេល៤ថ្ងៃ នៃពិធីបុណ្យចូលឆ្នាំថ្មី ខេត្តត្បូងឃ្មុំ មានភ្ញៀវទេសចរដើរលេងកម្សាន្តជាង៦០ម៉ឺននាក់

2024/04/17 01:34:22 pm        162
Facebook Telegram Linkin
ត្បូងឃ្មុំ ៖ ក្រោម ដំបូលសន្តិភាពរយៈពេល០៤ថ្ងៃ នៅថ្ងៃទី១៣ ដល់១៦ ខែមេសា ឆ្នាំ២០២៤ ក្នុង​ឱកាសពិធីបុណ្យចូលឆ្នាំថ្មីប្រពៃណីជាតិ ឆ្នាំរោង ឆស័ក ព.ស ២៥៦៨ នៅទូទាំងខេត្តត្បូងឃ្មុំ មាន​ភ្ញៀវទេសចរ ដើរលេងកម្សាន្តតាមតំបន់រមណីយដ្ឋាននានា ប្រម៉ាណជាង ៦២ ម៉ឺននាក់ នេះ​បើ​តាម​ការបញ្ជាក់របស់លោក អឿន រិទ្ធិប្រធានមន្ទីទេសចរណ៍ ខេត្តត្បូងឃ្មុំ។លោក អឿន រិទ្ធ បានឱ្យដឹងថា រយះពេល ៤ ថ្ងៃ ក្នុងឱកាសបុណ្យចូលឆ្នាំប្រពៃណីជាតិ គឺមាន​ប្រជាពលរដ្ឋ និងភ្ញៀវទេសចរណ៍ដើរលេងកម្សាន្តក្នុងខេត្តត្បូងឃ្មុំប្រម៉ាណជាង៦២ ម៉ឺននាក់ ក្នុងនោះ តំបន់ដែល​មាន​ពលរដ្ឋទៅលេងច្រើនជាងគេ គឺនៅបុរីរដ្ឋបាលទីរួមខេត្ត ដែល​រដ្ឋបាល​ខេត្ត​រៀបចំ​ព្រឹត្តិការណ៍ «សង្ក្រាន្តត្បូងឃ្មុំ» រយៈពេល៤ថ្ងៃ មានភ្ញៀវទេសចរសរុបចំនួន ៥១២, ៣៦០​នាក់ ក្រោមការដឹកនាំរៀបចំដោយឯកឧត្តមបណ្ឌិត ជាម ច័ន្ទសោភ័ណ អភិបាល​នៃ​គណៈ​អភិបាល​ខេត្តត្បូងឃ្មុំ និងលោកជំទាវ ម៉េង វ៉ាន់ដានីន នៅរង្វង់មូលមុខសាលាខេត្តត្បូងឃ្មុំ។ព្រឹត្តិការណ៍ សង្ក្រាន្តត្បូងឃ្មុំ ឆ្នាំនេះ រដ្ឋបាលខេត្តបានរៀបចំលេងល្បែងប្រជាប្រិយខ្មែរ ទាញ​ព្រ័ត្រ, លាក់កន្សែង, វាយក្អម, ឡើងសសរខា្លញ់។ ជាមួយគ្នានេះ ក៏មានរៀបចំ «តំបន់ត្រជាក់» បាញ់ទឹ​ក និងប្រគុំតន្រ្តីរាំលេងកម្សាន្តសប្បាយ។ បន្ថែមពីនេះ មានកម្មវិធីលេងកម្សាន្តសប្បាយៗជាច្រើនទៀត ព្រមទាំង រៀបចំស្តង់ពិព័រណ៍ ការ​ប្រគុំ​តន្រ្តីសម័យ និងការបាញ់កាំជ្រួច អមជាមួយ​ការតុ​ប​តែង​ភ្លើង​លម្អ​នា​ពេល​រាត្រី​យ៉ាង​ស្រស់​ស្អាត​ផង​ដែរ។រដ្ឋបាលខេត្តត្បូងឃ្មុំ បានរៀបចំ <<សង្ក្រាន្តត្បូងឃ្មុំ>> នៅទីរួមខេត្ត រយៈពេល៤ថ្ងៃ គឺថ្ងៃទី១៣ ដល់​១៦ ខែមេសា ឆ្នាំ២០២៤ ដើម្បីអបអរពិធីបុណ្យចូលឆ្នាំថ្មីប្រពៃណីជាតិខ្មែរ ក៏ដូច​ជា​បង្ក​បរិយាកាស​សប្បាយរីករាយជូនពលរដ្ឋ (ក្រោមម្លប់សុខសន្តិភាព) ក្រោមការដឹកនាំ​របស់​សម្តេច​ធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ។សូមជម្រាបថា ទោះបីបុណ្យចូលឆ្នាំប្រពៃណីជាតិបានបញ្ចប់ តែតាមវត្ត​អារាម​មួយ​ចំនួន​ក្នុង​ខេត្ត​ត្បូងឃ្មុំ នៅបន្តលេងល្បែងប្រជាប្រិយ និងរាំកម្សាន្តនៅឡើយ ខណៈវត្ត​ខ្លះ​នឹង​បន្ត​លេង​រហូត​ដល់​ថ្ងៃ​២១ ឬ២២ ខែមេសា៕

បណ្ដាញសង្គម

ព័ត៌មានថ្មីៗ

អាជ្ញាធរម៉ិកស៊ិក បញ្ជាក់ពីការរកឃើញសាកសព ៦០នាក់ នៅរដ្ឋព្រំដែនភាគខាងជើងដ៏ហិង្សា
10/16/2025 03:10 PM
Facebook Telegram Linkin
ទេសរដ្ឋមន្ត្រី គន់ គីម៖ ចិនបានចាត់វិធានការបុរេសកម្ម ដើម្បីបង្កើនភាពធន់ និងការត្រៀម​រួចជា​ស្រេច​សហការជាមួយអាស៊ានទប់ទល់នឹងបញ្ហាគ្រោះមហន្តរាយនាពេលអនាគត
10/16/2025 03:10 PM
Facebook Telegram Linkin
កិច្ចប្រជុំប្រចាំសប្ដាហ៍របស់ក្រសួងពាណិជ្ជកម្ម ផ្ដោតលើរបៀបវារៈសំខាន់ចំនួន៦
10/16/2025 03:10 PM
Facebook Telegram Linkin
១សប្តាហ៍ គ្រោះថ្នាក់ចរាចរណ៍ បន្តឆក់យកជីវិតមនុស្ស២៨នាក់ របួសជិត៧០នាក់
10/16/2025 03:10 PM
Facebook Telegram Linkin
អតីតយុទ្ធជនជួបការលំបាករស់នៅខេត្តកំពង់ធំទទួលបានផ្ទះថ្មី អំណោយដ៏ថ្លៃថ្លា​របស់​សម្ដេចតេជោ
10/16/2025 01:10 PM
Facebook Telegram Linkin
វិទ្យាស្ថានពហុបច្ចេកទេសខេត្តបន្ទាយមានជ័យ ផ្តល់អាហារូបករណ៍ ២៣០០កន្លែង លើ ១៣មុខជំនាញ និងប្រាក់ឧបត្ថម្ភ ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ
10/16/2025 01:10 PM
Facebook Telegram Linkin
សម្ដេចតេជោ ហ៊ុន សែន បន្តបង្ហាញពីឫសគល់ស្ថានភាពពិតនៃជម្លោះព្រំដែនកម្ពុជា-ថៃ, ការព្យាយាមអត់ធ្មត់ និងប្រកាន់គោលជំហរដោះស្រាយជម្លោះដោយសន្តិវិធីរបស់កម្ពុជា
10/16/2025 01:10 PM
Facebook Telegram Linkin
អាល្លឺម៉ង់ សន្យាឱ្យជំនួយយោធាដ៏ធំទៅអ៊ុយក្រែន ខណៈទីក្រុងគីវត្រូវការ ១២០ពាន់លានដុល្លារ សម្រាប់ឆ្នាំ២០២៦
10/16/2025 01:10 PM
Facebook Telegram Linkin
អង្គការគ្រូពេទ្យគ្មានព្រំដែន បិទមណ្ឌលសង្គ្រោះបន្ទាន់ជាអចិន្ត្រៃយ៍នៅហៃទី ខណៈហិង្សាមិនអន់ថយ
10/16/2025 01:10 PM
Facebook Telegram Linkin
សម្តេច ម៉ែន សំអន ដឹកនាំគណៈប្រតិភូមកដល់មាតុប្រទេសវិញក្រោយចូលរួមកិច្ចប្រជុំលើកទី៨ ស្តីពី «ការអនុវត្តគម្រោងសាងសង់ ជួសជុល កែលម្អ សោភ័ណភាពស្តូបមិត្តភាពកម្ពុជា-វៀតណានៅកម្ពុជា»
10/16/2025 01:10 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.