BTV NEWS

អង្គការ UNESCO ប្រចាំប្រទេសកម្ពុជាបញ្ជាក់ជំហរសហការបន្ថែមទៀតជាមួយក្រសួងទេសចរណ៍ដើម្បីអភិវឌ្ឍទេសចរណ៍វប្បធម៌-បេតិកភណ្ឌ និងចាត់ទុកទេសចរណ៍ជាមូលបទសំខាន់មួយសម្រាប់ព្រឹត្តិការណ៍អបអរសាទរខួបទី៧៥ឆ្នាំ នៃសមាជិកភាពរបស់កម្ពុជា

ទេសចរអន្តរជាតិគាំទ្រខេត្តសៀមរាបជាគោលដៅវប្បធម៌ដ៏ល្អបំផុតរបស់ពិភពលោកដែលត្រូវទស្សនា

ក្រសួងបរិស្ថាន ស្នើឱ្យអ្នកទេសចរណ៍មកកម្សាន្តឱ្យបានច្រើនថែមទៀតនៅតំបន់ឆ្នេរសមុទ្រកម្ពុជា ដែលរក្សាបានសម្រស់ដ៏ស្រស់ស្អាត

អ្នកទេសចរជាង៦ម៉ឺននាក់ ទស្សនារមណីយដ្ឋានអង្គរ នៅថ្ងៃពិធីបុណ្យចូលឆ្នាំចិន វៀតណាម

វប្បធម៌ និងទេសចរណ៍

នាវាទេសចរណ៍ WESTERDAM ដឹកភ្ញៀវទេសចរជិត២០០០នាក់ ចូលសំចតធ្វើទស្សនកិច្ចនៅកម្ពុជា

នាយនាវីទីបញ្ជាការជួរមុខ អគ្គលេខាធិការដ្ឋាន គ.ជ.ស.ស. ប្រាប់ឲ្យដឹងថា មាននាវាទេសចរណ៍បរទេស ១គ្រឿង ឈ្មោះ WESTERDAM សញ្ជាតិ Holland ដឹកភ្ញៀវទេសចរជិត ២០០០នាក់ បានចូលចតដល់កំពង់ផែស្វយ័តក្រុងព្រះសីហនុ ដោយសុវត្ថិភាពដើម្បីទូរទស្សនកិច្ចនៅកម្ពុជា នាព្រលឹមថ្ងៃទី១៥ ខែធ្នូ ឆ្នាំ២០២៥ ។ នាវាទេសចរណ៍នេះ ផ្ទុកមនុស្សចម្រុះជាតិសាសន៍ ២៦៧៧នាក់ ក្នុងនោះមានភ្ញៀវទេសចរចំនួន ១.៨៧៧នាក់ ស្រី ៩៩៩នាក់ (៤៣សញ្ជាតិ) និងនាវិកចំនួន ៨០០នាក់ ស្រី ១៥៧នាក់ (៤០សញ្ជាតិ) ចំនួនភ្ញៀវដែលមានច្រើនជាងគេ គឺជនជាតិអាមេរិក និងអូស្ត្រាលី ។ នាវានេះ មានបណ្តោយប្រវែងជិត ៣០០ម៉ែត្រ ទទឹងប្រវែងជាង ៣០ម៉ែត្រ និងជំរៅទឹកជាង ៨ម៉ែត្រ វាមកពីប្រទេសថៃ នឹងបន្តដំណើរទេសចរណ៍អន្តរជាតិទៅប្រទេសម៉ាឡេស៊ី យប់ថ្ងៃទី១៥ ខែធ្នូ ឆ្នាំ២០២៥ ។

កម្ពុជាថ្កោលទោសយោធាថៃបានបំផ្លាញខូចខាតទាំងស្រុងប្រាសាទតាក្របីរបស់កម្ពុជា ខណៈប្រាសាទនេះជានិមិត្តរូប នៃវប្បធម៌អរិយធម៌ដ៏រុងរឿងរបស់ខ្មែរ

បន្ទាប់ពីទទួលរងការបាញ់បំផ្លាញយ៉ាងធ្ងន់ធ្ងរពីសំណាក់យោធាថៃកាលពីថ្ងៃទី៩ ខែធ្នូ ឆ្នាំ២០២៥ ប្រាសាទ តាក្របី ជាទីសក្ការៈរបស់កម្ពុជា បន្តទទួលរងការបាញ់កម្ទេចជាថ្មី បណ្តាលឱ្យរូបរាង និងរចនាសម្ព័ន្ធប្រាសាទត្រូវបាន បំផ្លាញទាំងស្រុង នាថ្ងៃទី១០ ខែធ្នូ ឆ្នាំ២០២៥ ទោះជាក្រសួងវប្បធម៌ និងវិចិត្រសិល្បៈបានអំពាវនាវរួចហើយក៏ដោយ។ នេះបើតាមសេចក្តីថ្លែងការណ៍ថ្កោលទោសយោធាថៃរបស់ក្រសួងវប្បធម៌ និងវិចិត្រសិល្បៈ កម្ពុជា។ តាមសេចក្ដីថ្លែងការណ៍បានឱ្យដឹងថា ប្រាសាទតាក្របី ត្រូវបានសាងសង់ក្នុងអំឡុងសតវត្សទី១១ គ.ស.ក្នុងសម័យព្រះបាទសូរ្យវរ្ម័នទី១ និង ព្រះបាទឧទ័យទិត្យវរ្ម័នទី២ ស្ថិតនៅភូមិសែនមនោរម្យ១ ឃុំគោកខ្ពស់ ស្រុកបន្ទាយអំពិល ខេត្តឧត្តរមានជ័យ ជាទីតាំង បុរាណដ្ឋានអភិរក្សយ៉ាងខ្ជាប់ខ្ជួនដោយស្ថាប័នវប្បធម៌កម្ពុជា និងជាទីគោរពសក្ការៈទៅតាមជំនឿ ប្រពៃណី ទំនៀមទម្លាប់ របស់ប្រជាជនកម្ពុជា។ ប្រាសាទតាក្របី ជានិមិត្តរូបនៃវប្បធម៌អរិយធម៌ដ៏រុងរឿងរបស់ខ្មែរ ថែរក្សាការពារដោយខ្មែរ ស្ថិតនៅក្នុងព្រៃភ្នំដែលជាជម្រកដ៏សុខសាន្ត និងពុំទទួលរងការខូចខាតពីធម្មជាតិ ឬអាយុកាល ប៉ុន្តែត្រូវបានសម្លាប់ តែមួយពព្រិចភ្នែកដោយយោធាថៃ។ក្រសួងវប្បធម៌ និងវិចិត្រសិល្បៈ បន្តថ្កោលទោសចំពោះទង្វើអសីលធម៌មកលើវិស័យវប្បធម៌ដោយយោធាថៃ ដែលជាឧក្រិដ្ឋកម្មដ៏ធ្ងន់ធ្ងរមកលើបេតិកភណ្ឌ ជាទង្វើអគតិនិងគ្មានអរិយធម៌ និងជាការបន្តមិនគោរពដល់អនុសញ្ញា នានានៃកិច្ចការពារបេតិកភណ្ឌ ដោយរួមទាំងអនុសញ្ញាឆ្នាំ១៩៥៤ និងឆ្នាំ១៩៧២។ ក្រសួងវប្បធម៌និងវិចិត្រសិល្បៈ បន្តអំពាវនាវដល់បណ្តាប្រទេសលើសកលលោក អង្គការជំនាញអន្តរជាតិ ប្រជាជាតិលើពិភពលោក ចូលរួម ថ្កោលទោសទង្វើឧក្រិដ្ឋកម្មនេះ និងជំរុញឱ្យយោធាថៃបញ្ឈប់ជាបន្ទាន់នូវការបំផ្លិចបំផ្លាញវប្បធម៌ និងបញ្ឈប់ការ ឈ្លានពាន ដោយងាកមករកដំណោះស្រាយដោយសន្តិវិធី ជាពិសេសគោរពសេចក្តីប្រកាសរួមទីក្រុងកូឡាឡាំពួរ។ក្រសួងវប្បធម៌ និងវិចិត្រសិល្បៈ រួមជាមួយប្រជាជនកម្ពុជាទាំងអស់សូមកាន់ទុក្ខចំពោះការខូចខាតទាំងស្រុង របស់ប្រាសាទតាក្របី និងចងចាំទុកនូវទង្វើឧក្រិដ្ឋកម្មនេះនៅក្នុងប្រវត្តិសាស្ត្រនៃការបំផ្លិចបំផ្លាញរបស់យោធាថៃ។ ទោះជាប្រាសាទតាក្របីត្រូវបានបំផ្លាញស្ទើរអស់រូបរាង ប៉ុន្តែប្រាសាទនេះនៅតែឈរជានិមិត្តរូបនៃវប្បធម៌អរិយធម៌ខ្មែរ និងជាភស្តុតាងនៃសោកនាដកម្មវប្បធម៌ សម្រាប់បង្រៀនដល់ជនជំនាន់ក្រោយឱ្យរឹតតែស្រឡាញ់ការពារបេតិកភណ្ឌ និងទប់ស្កាត់ទង្វើឧក្រិដ្ឋកម្មនេះកុំឱ្យកើតមានជាថ្មីនៅគ្រប់ទីកន្លែងទាំងអស់របស់ពិភពលោក៕

ក្រសួងទេសចរណ៍ និងស្ថានទូតបារាំងប្រចាំកម្ពុជា សហការរួមគ្នាអភិវឌ្ឍវិស័យទេសចរណ៍ និងការបណ្តុះបណ្តាលវិជ្ជាជីវៈទេសចរណ៍ឱ្យដល់កម្រិតអន្តរជាតិ

ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានពិភាក្សាការងារជាមួយ ឯកឧត្តម Oliver Richard ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបារាំងប្រចាំកម្ពុជា និងសហការីអំពីការពង្រឹង និងពង្រីកកិច្ចសហប្រតិបត្តិការទេសចរណ៍ នៅស្ថានទូតបារាំងប្រចាំកម្ពុជា។ក្នុងឱកាសជំនួបដ៏សំខាន់ ឯកឧត្តមឯកអគ្គរដ្ឋទូត បានគូសបញ្ជាក់ជូនអំពីការចូលរួមដ៏សំខាន់របស់ប្រទេសបារាំងក្នុងការអភិវឌ្ឍវិស័យទេសចរណ៍កម្ពុជារហូតមក តាមរយៈគម្រោងសហប្រតិបត្តិការជាច្រើនកន្លងមក និងការសន្យាបន្តជួយបន្ថែមតទៅទៀតក្នុងវិស័យទេសចរណ៍ និងបដិសណ្ឋារកិច្ច។ជាកិច្ចឆ្លើយតប ឯកឧត្តមរដ្ឋមន្រ្តី បានថ្លែងអំណរគុណ កោតសរសើរ និងវាយតម្លៃខ្ពស់ យ៉ាងជ្រាលជ្រៅដល់ប្រទេសបារាំង រដ្ឋាភិបាលបារាំង ប្រជាជនបារាំង និងស្ថានទូតបារាំងប្រចាំកម្ពុជាដែលតែងតែជួយឧបត្តម្ភ និងគាំទ្ររដ្ឋាភិបាលកម្ពុជា និងប្រជាជនកម្ពុជារហូតមក ក្នុងការស្តារ និងអភិវឌ្ឍប្រទេសលើគ្រប់វិស័យ ជាពិសេសក្នុងការអភិវឌ្ឍវិស័យទេសចរណ៍។ ទន្ទឹមនឹងនេះដែរ ឯកឧត្តមរដ្ឋមន្រ្តី ក៏បានថ្លែងអំណរគុណដល់ស្ថានទូតបារាំងប្រចាំកម្ពុជាដែលបានជួយផ្សព្វផ្សាយសក្តានុពលទេសចរណ៍ និងកាលានុវត្តភាពវិនិយោគ ពិសេសគឺសភាពការណ៍ពិតពីនយោបាយ សុខសន្តិភាព សុវត្ថិភាព និងសណ្តាប់ធ្បាប់សាធារណៈល្អប្រសើរដល់វិនិយោគិន និងប្រជាជនបារាំងដែលចង់ស្វែងយល់ពីកម្ពុជា។ តាមរយៈកិច្ចសហប្រតិបត្តិការដ៏ល្អកន្លងមក ដែលបានធ្វើឱ្យចំនួនភ្ញៀវទេសចរបារាំងមកទស្សនាកម្ពុជាមានចំនួនច្រើនឡើងជារៀងរាល់ឆ្នាំ និងជាទីផ្សារធំទាំង១០របស់កម្ពុជា។ក្នុងជំនួបប្រកបដោយលទ្ធផលផ្លែផ្កានេះ ភាគីទាំងពីរក៏បានពិភាក្សា និងផ្លាស់ប្តូរមតិយោបល់ស៊ីជម្រៅ និងប្រកបដោយការស្ថាបនាលើកិច្ចសហការរួមគ្នា ជាលក្ខណៈបុរេសកម្ម ដើម្បីរៀបចំភូមិហ្រ្វង់កូហ្វូន (Village Francophone) ឱ្យមានភាពទាក់ទាញ រស់រវើក ប្រកបដោយខ្លឹមសារស៊ីជម្រៅ និងបង្ហាញពីសក្តានុពលទេសចរណ៍ និងកាលានុវត្តភាពវិនិយោគដល់ប្រតិភូជាន់ខ្ពស់ ព្រមទាំងអ្នកចូលរួមក្នុងការកិច្ចប្រជុំកំពូលហ្រ្វង់កូហ្វូនីលើកទី២០ នាឆ្នាំ២០២៦ ខាងមុខ ឱ្យបានទូលំទូលាយដល់ពិភពលោក៕

សត្វស្លាបនៅតំបន់រ៉ាមសារព្រែកទាល់ កើនឡើងច្រើនដែលជាផ្នែកមួយយ៉ាងសំខាន់ទាក់ទាញភ្ញៀវទេសចរ

បាត់ដំបង៖ លោក កត បូរ៉ាន ប្រធានមន្ទីរបរិស្ថានខេត្តបាត់ដំបង ថ្លែងឱ្យដឹងថា សម្រាប់ឆ្នាំ២០២៥នេះ សត្វស្លាបទឹកនៅតំបន់រ៉ាមសារព្រែកទាល់មានការកើនឡើងច្រើនគួរឱ្យកត់សម្គាល់ ខណៈបន្ទាយសត្វស្លាបដ៏ធំមួយនេះមិនត្រឹមតែជាជម្រកធម្មជាតិដ៏មានសុវត្ថិភាពសម្រាប់សត្វស្លាបទឹកដ៏កម្រ និងជិតផុតពូជរាប់ម៉ឺនក្បាលប៉ុណ្ណោះទេ ថែមទាំងជាគោលដៅទេសចរណ៍ធម្មជាតិប្រកបដោយនិរន្តរភាពដ៏គួរឱ្យចាប់អារម្មណ៍។លោក កត បូរ៉ាន ថ្លែងឱ្យដឹងបន្ថែមថា តំបន់រ៉ាមសារព្រែកទាល់មានសត្វជាង១០០ប្រភេទកំពុងរស់នៅហើយបច្ចុប្បន្ននេះមានការគ្រប់គ្រងបានល្អដោយមានការសហការគ្នាជាមួយនឹងកងទ័ពហើយក្នុងរយៈពេលជាងមួយឆ្នាំនេះការគ្រប់គ្រងតំបន់រ៉ាមសារព្រែកទាល់គឺបានជោគជ័យដោយការកើនឡើងនៃសត្វស្លាបមានប្រភេទសត្វធំដូចជា ទុង តាដក់ ននៀលនៅរដូវកាលនៃការបន្តពូជ។ លោក កត បូរ៉ាន គូសបញ្ជាក់ថា ទន្ទឹមនឹងការកើនឡើងនៃចំនួនសត្វស្លាបជាមួយគ្នានោះការថែរក្សាអភិរក្សមានភាពល្អប្រសើរជាងមុនៗបើប្រៀបធៀបទៅនឹងប៉ុន្មានឆ្នាំមុន។លោកប្រធានមន្ទីរបរិស្ថាន ថ្លែងឱ្យដឹងបន្ថែមថា សម្រាប់ភ្ញៀវទេសចរមកទស្សនានៅទីនេះអាចជិះទូកតាមព្រៃលិចទឹក និងឡើងលើប៉មសង្កេតការណ៍ដើម្បីគយគន់សត្វស្លាបក្នុងចម្ងាយជិតដោយសារឆ្នាំនេះទឹកទន្លេឡើងធំជាងបណ្ដាឆ្នាំមុនៗ។លោក កត បូរ៉ាន អំពាវនាវដល់បងប្អូនប្រជាពលរដ្ឋ ក៏ដូចជាភ្ញៀវទេសចរជាតិ និងអន្តរជាតិអញ្ជើញទៅទស្សនាកម្សាន្តនៅតំបន់អភិរក្សសត្វស្លាបឱ្យបានច្រើនកុះករ ។សូមជម្រាបថា តំបន់សត្វស្លាបរ៉ាមសារព្រែកទាល់មិនមែនគ្រាន់តែជាកន្លែងទស្សនាកម្សាន្តនោះទេ ប៉ុន្តែជាទីកន្លែងដែលផ្តល់បទពិសោធន៍ដ៏ជ្រាលជ្រៅដល់ភ្ញៀវទេសចរក្នុងការស្វែងយល់ពីទំនាក់ទំនងរវាងមនុស្ស ធម្មជាតិ និងវប្បធម៌។អាជ្ញាធរពាក់ព័ន្ធ និងអង្គការអភិរក្សនៅតែបន្តធ្វើការយ៉ាងយកចិត្តទុកដាក់ ដើម្បីធានាថាការរីកចម្រើននៃវិស័យទេសចរណ៍នឹងប្រព្រឹត្តទៅដោយរលូន និងមិនបង្កផលប៉ះពាល់ដល់ជីវៈចម្រុះ និងជម្រកសត្វស្លាប។ តំបន់ព្រែកទាល់កំពុងតែដើរតួនាទីយ៉ាងសំខាន់ក្នុងការជំរុញវិស័យទេសចរណ៍ធម្មជាតិរបស់កម្ពុជាឱ្យកាន់តែមានភាពលេចធ្លោសម្រាប់ភ្ញៀវទេសចរជាតិ និងអន្តរជាតិ។ តំបន់នេះជាជម្រកបន្តពូជចុងក្រោយនៅអាស៊ីអាគ្នេយ៍ សម្រាប់ប្រភេទសត្វស្លាបដែលរងការ គំរាមកំហែងលើពិភពលោកពីរប្រភេទគឺ ទុងប្រផេះ និងរនាលស។ លើសនេះទៀតតំបន់នេះជាជម្រកពង កូនសត្វស្លាបធំជាងគេបំផុតនៅក្នុងតំបន់សម្រាប់ប្រភេទសត្វស្លាប ដែលទទួលរងការគំរាមកំហែងលើ ពិភពលោកចំនួន៦ប្រភេទទៀតគឺ សត្វស្មោញ ត្រដក់តូច ពពូលទឹក ត្រយ៉ងខ្លួនស រនាលពណ៌ និងអកត្រីក្បាលប្រផេះ និងជាជម្រកពងកូនរបស់សត្វត្រដក់ធំ ធំជាងគេទីពីលើពិភពលោក៕

ក្រសួងទេសចរណ៍ និងក្រុមប្រឹក្សាធុរកិច្ចអាម៉េរិក-អាស៊ាន-USABC សហការផ្សព្វផ្សាយពីសក្តានុពលទេសចរណ៍ និងកាលានុវត្តភាពវិនិយោគកម្ពុជា

ឯកឧត្ដម ហួត ហាក់ រដ្ឋមន្ត្រីក្រសួងទេសចរណ៍ បានទទួលជួបពិភាក្សាការងារជាមួយប្រតិភូរបស់ក្រុមប្រឹក្សាធុរកិច្ចអាម៉េរិក-អាស៊ាន (US-ASEAN Business Council) ដឹកនាំដោយឯកឧត្តមឯកអគ្គរដ្ឋទូត TED Osius អនុប្រធានជាន់ខ្ពស់ និងនាយកគ្រប់គ្រងតំបន់ ព្រមទាំងលោក-លោកស្រីតំណាងក្រុមហ៊ុនអាម៉េរិកធំៗ ដែលជាសមាជិកក្រុមប្រឹក្សា ស្តីអំពីកិច្ចសហប្រតិបត្តិក្នុងវិស័យទេសចរណ៍ ក្នុងដំណើរទស្សនកិច្ចសិក្សាស្វែងយល់ពីស្ថានភាពពិត និងកាលានុវត្តភាពវិនិយោគក្នុងវិស័យជាច្រើនរួមទាំងវិស័យទេសចរណ៍ បដិសណ្ឋារកិច្ចនៅប្រទេសកម្ពុជា។ក្នុងឱកាសនៃជំនួបប្រកបដោយផ្លែផ្កានេះ ឯកឧត្តមឯកអគ្គរដ្ឋទូតជាប្រធានប្រតិភូ បានកោតសរសើរ និងវាយតម្លៃខ្ពស់អំពីការរីកចំរើនលើគ្រប់វិស័យរបស់កម្ពុជាយ៉ាងលឿន និងក្នុងរយៈពេលខ្លី ចាប់តាំងពីឯកឧត្តមបានអញ្ជើញមកទស្សនាកម្ពុជាជាលើកដំបូងកាលពីឆ្នាំ១៩៩៦។ ទន្ទឹមនឹងនេះដែរ ឯកឧត្តមប្រធានប្រតិភូ ក៏បានលើកឡើងពីការពេញចិត្តរបស់អ្នកវិនិយោគិនអាម៉េរិក ដែលជាសមាជិកក្នុងការវិនិយោគនៅកម្ពុជាកន្លងមក និងការស្វែងយល់បន្ថែមទៀតពីស្ថានភាពពិត និងកាលានុវត្តវិនិយោគបន្ថែមទៀតពីរាជរដ្ឋាភិបាលកម្ពុជា។ជាការឆ្លើយតបក្នុងជំនួបដ៏សំខាន់នេះ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានកោតសរសើរ វាយតម្លៃខ្ពស់ និងថ្លែងអំណរគុណយ៉ាយជ្រាលជ្រៅជូនចំពោះឯកឧត្តមឯកអគ្គរដ្ឋទូត TED Osius និងសមាជិកក្រុមប្រឹក្សា ដែលបានអញ្ជើញពីក្រុមហ៊ុន ConocoPhillips, Marriott International, Mastercard, Visa, Ford & RMA, Coca-Cola និង Vriens & Partners ដែលបានជ្រើសរើសកម្ពុជាក្នុងការបោះទុនវិនិយោគដោយទំហំច្រើនលានដុល្លារអាម៉េរិក ដែលពិតជាការបង្ហាញនូវទំនុកចិត្តយ៉ាងមុតមាំលើការដឹកនាំដ៏ត្រឹមត្រូវរបស់រាជរដ្ឋាភិបាលកម្ពុជាក្រោមអាណត្តិរបស់សម្តេចអគ្គមហាសេនាបតី តេជោ ហ៊ុន សែន ប្រធានព្រឹទ្ធសភា និងបន្តដល់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី។ ជាមួយគ្នានេះ ឯកឧត្តមរដ្ឋមន្រ្តី បានគូសបញ្ជាក់ជូនប្រតិភូពីការធានាបាននូវកត្តាសុខសន្តិភាព ស្ថិរភាពនយោបាយ សុខសុវត្ថិភាព សណ្តាប់ធ្នាប់សាធារណៈល្អប្រសើរ និងការធានា និងលើកទឹកចិត្តអ្នកវិនិយោគដែលបានដាក់ចេញដោយរាជរដ្ឋាភិបាលកម្ពុជា សំដៅផ្តល់ទំនុកចិត្តដល់វិនិយោគិនបរទេសមកបណ្តាក់ទុននៅកម្ពុជាដែលជាប្រទេសមានសក្តានុពលទេសចរណ៍ដ៏សំបូរបែប និងកាលានុវត្តភាពវិនិយោគដ៏ទាក់ទាញ។ តាមរយៈកិច្ចជំនួបដ៏សំខាន់ និងប្រកបដោយផ្លែផ្កានេះភាគីទាំងពីរ បានយល់ស្របគ្នាថា ប្រទេសកម្ពុជា ជាប្រទេសមានសក្តានុពលទេសចរណ៍ដ៏សំបូរបែប និងកាលានុវត្តភាពវិនិយោគដ៏ទាក់ទាញ ដែលនឹងសហការរួមគ្នាធ្វើការផ្សព្វផ្សាយឱ្យទូលំទូលាយដើម្បីទាក់ទាញភ្ញៀវទេសចរ និងវិនិយោគិនពីសហរដ្ឋអាម៉េរិកមកទស្សនា និងស្វែងយល់ពីឱកាសវិនិយោគឱ្យកាន់តែច្រើនឡើងបន្ថែមទៀត។សូមបញ្ជាក់ជូនថាក្រុមប្រឹក្សាធុរកិច្ចអាម៉េរិក-អាស៊ាន (US-ASEAN Business Council ឬ USABC) ជាអង្គការដ៏សំខាន់បណ្តុំនូវក្រុមហ៊ុនអាម៉េរិកធំៗ ដែលប្រកបអាជីវកម្មក្នុងសមាគមប្រជាជាតិអាស៊ីអាគ្នេយ៍ (ASEAN) បង្កើតឡើងក្នុងឆ្នាំ ១៩៨៥។ ក្រុមប្រឹក្សាមានទីស្នាក់ការកណ្ដាលនៅរដ្ឋធានីវ៉ាស៊ីនតោន ឌីស៊ី និងការិយាល័យនៅទីក្រុងធំៗ ផ្សេងៗ ទៀតដូចជា៖ ញូវយ៉ក, បាងកក, ហាណូយ, ហ្សាកាតា, គូឡាឡាំពួ, ម៉ានីលា ហ្វីលីពីន និងសិង្ហបុរី។ ក្រុមហ៊ុនរបស់សហរដ្ឋអាមេរិកដែលជាសមាជិករបស់ក្រុមប្រឹក្សាមានដូចជា Abbott, ConocoPhillips, Marriott International, Mastercard, Visa, Meta, 3M, Ford & RMA Cambodia, Manulife, Coca-Cola, Plug and Play, Vriens & Partners៕

ទេសចរជាតិ-អន្តរជាតិប្រមាណ ៣ម៉ឺននាក់ អញ្ជើញទៅទស្សនាព្រឹត្តិការណ៍តារាសាគរសាទរទេសចរណ៍សមុទ្រនៅខេត្តកោះកុង

រយៈពេល៤ថ្ងៃ នៃព្រឹត្តិការណ៍តារាសាគរសាទរទេសចរណ៍សមុទ្រ នៅស្រុកគិរីសាគរ ខេត្តកោះកុង មានភ្ញៀវទេសចរសរុប៣ម៉ឺននាក់ បានចាប់អារម្មណ៍ទៅទស្សនាកម្សាន្ត ក្រោមបរិយាកាសលើកស្ទួយទាក់ទាញវិស័យកីឡា និងទេសចរណ៍។ចាប់ពីថ្ងៃទី២៧ដល់ថ្ងៃទី៣០ ខែវិច្ឆិកា ឆ្នាំ២០២៥ មានភ្ញៀវទេសចរជាតិ និងអន្តរជាតិសរុបប្រមាណជា៣ម៉ឺននាក់ បានចាប់អារម្មណ៍នាំគ្នាសម្រុកទៅទស្សនាកម្សាន្តយ៉ាងច្រើនកុះករនៅព្រឹត្តិការណ៍តារាសាគរសាទរទេសចរណ៍សមុទ្រ។លោក លី ម៉េងឈិន ប្រធានក្រុមប្រឹក្សាភិបាលក្រុមហ៊ុនខូលថល ស៊ីធី បានឱ្យដឹងក្នុងពិធីបិទព្រឹត្តិការណ៍តារាសាគរសាទរទេសចរណ៍សមុទ្រ យប់ថ្ងៃទី៣០ ខែវិច្ឆិកា ថា រយៈពេលប៉ុន្មានថ្ងៃនេះ ទឹកដីដ៏ស្រស់ស្អាតនៃតារាសាគរ បានប្រែជាមានភាពរស់រវើកយ៉ាងខ្លាំងដែលមិនធ្លាប់មានពីមុនមក ដោយសារវត្តមានរបស់ ថ្នាក់ដឹកនាំ និងភ្ញៀវទេសចរមកពីគ្រប់ទិសទីទាំងអស់។ យើងបានរួមគ្នាធ្វើជាសាក្សីនៃការប្រណាំងប្រជែងល្បឿន និងភាពរំភើបរបស់កីឡាករដែលបានពុះជ្រែករលកសមុទ្រក្រោមផ្ទៃមេឃពណ៌ខៀវក្នុងការប្រកួតម៉ូតូទឹក, យើងបានទទួលបទពិសោធន៍នៃភាពអត់ធ្មត់ និងបញ្ញាវៀងវៃក្នុងការប្រកួតស្ទូចត្រី និងរីករាយជាមួយផលដែលទទួលបាន។លោក លី ម៉េងឈិន បានបន្តទៀតថា ពេលព្រឹកព្រលឹម មានការរត់ប្រណាំងពាក់កណ្តាលម៉ាឡាតុង និងការប្រកួតជិះកង់ បានប្រើប្រាស់ជំហានជើងដើម្បីវាស់វែងសម្រស់អេកូឡូស៊ីនៃតារាសាគរ និងបង្ហាញពីស្មារតីកីឡាដែលហ៊ានយកឈ្នះលើខ្លួនឯង និងមិនបោះបង់។ ដូច្នេះលោក ចាត់ទុកថា សកម្មភាពដ៏សម្បូរបែបទាំងនេះ មិនត្រឹមតែបង្ហាញពីភាពទាក់ទាញនៃការប្រកួតកីឡាប៉ុណ្ណោះទេ ថែមទាំងបានបកស្រាយយ៉ាងល្អឥតខ្ចោះនូវសក្តានុពលធំធេងនិងគ្មានដែនកំណត់នៃកីឡា និងទេសចរណ៍ ដែលធ្វើឱ្យអ្នកចូលរួមគ្រប់រូបដក់អារម្មណ៍យ៉ាងជ្រាលជ្រៅពីភាពស្រស់ស្អាត និងបរិយាកាសល្អឯកនៃតារាសាគរ ក្នុងនាមជាគោលដៅទេសចរណ៍លំហែជាប់មាត់សមុទ្រលំដាប់ថ្នាក់ពិភពលោកមួយ។លោកប្រធានក្រុមប្រឹក្សាភិបាលក្រុមហ៊ុនខូលថល ស៊ីធី ក៏បានរំលេចដែរថា ភាពរីកចម្រើនយ៉ាងឆាប់រហ័សនៃគម្រោងតារាសាគរ គឺជាសក្ខីភាពយ៉ាងច្បាស់នៃចំណងមិត្តភាព ដែកថែប ដ៏យូរអង្វែងរវាងកម្ពុជា និងចិន។ ក្រោមការផ្សារភ្ជាប់យ៉ាងស៊ីជម្រៅរវាងគំនិតផ្ដួចផ្ដើម ខ្សែក្រវាត់ និងផ្លូវ និងយុទ្ធសាស្ត្របញ្ចកោណ របស់ប្រទេសចិន និងកម្ពុជា លោកពិតជាមានសំណាងណាស់ដែលបានក្លាយជាអ្នកចូលរួមចំណែកនៅក្នុងដំណើរការប្រវត្តិសាស្ត្រ។ដោយឡែកលោកជំទាវ ឈី វ៉ា អភិបាលខេត្តកោះកុង លើកឡើងថា រាជរដ្ឋាភិបាលកម្ពុជានីតិកាលទី៧ នៃរដ្ឋសភា បានខិតខំលើកកម្ពស់ និងជំរុញវិស័យទេសចរណ៍កម្ពុជាឆ្ពោះទៅកាន់អនាគតថ្មី ដោយក្រសួងទេសចរណ៍ បានដាក់ចេញនូវគំនិតផ្តួចផ្តើមយុទ្ធសាស្ត្រក្រោមចក្ខុវិស័យអភិវឌ្ឍវិស័យទេសចរណ៍កម្ពុជា ប្រកបដោយគុណភាព ភាពរស់រវើក ភាព ប្រកួតប្រជែង ចីរភាព និងបរិយាបន្ន សំដៅឆ្ពោះទៅកាន់អនាគតថ្មី ដោយឈរលើគោលការណ៍គ្រឹះ “ទេសចរណ៍ផ្សារភ្ជាប់ទឹក ដី និងធម្មជាតិ” សំដៅធ្វើឱ្យកម្ពុជាក្លាយជាគោលដៅទេសចរណ៍សកល ឈានមុខប្រកបដោយភាពសម្បូរបែប ពោរពេញដោយកាលានុវត្តភាព និងភាពកក់ក្តៅ ក្នុងការរួមចំណែកលើកកម្ពស់កិត្យានុភាព និងភាពធន់របស់កម្ពុជា។លោកជំទាវអភិបាលខេត្ត បង្ហាញថា ខេត្តកោះកុង ជាខេត្តមួយ សម្បូរទៅដោយតំបន់ទេសចរណ៍ដែលមានសក្តានុពល រួមមាន៖ តំបន់សមុទ្រ កោះ ឆ្នេរ ព្រៃភ្នំ ទឹកជ្រោះ និងរីសត រមណីយដ្ឋាននានាជាច្រើន និងមានក្រុមហ៊ុនតូចធំជាច្រើន បាននិងកំពុងបណ្តាក់ទុនវិនិយោគ លើការផ្តល់ផលិតផលសេវាកម្មទេសចរណ៍៕

១១ខែឆ្នាំនេះ ទេសចរអន្តរជាតិទិញសំបុត្រទស្សនារមណីយដ្ឋានអង្គរជាង ៨៦ម៉ឺននាក់ទទួលចំណូលជាង ៤០លានដុល្លារពីការលក់សំបុត្រ

យោងតាមរបាយការណ៍របស់គ្រឹះស្ថានអង្គរ បានបង្ហាញនៅថ្ងៃទី១ខែធ្នូឆ្នាំ២០២៥នេះថាក្នុងរយៈពេល១១ខែឆ្នាំ២០២៥នេះ ភ្ញៀវទេសចរណ៍អន្តរជាតិទិញសំបុត្រទស្សនារមណីយដ្ឋានអង្គរមានចំនួន៨៦៧,១៩៥នាក់ ដោយទទួលបានប្រាក់ចំណូលចំនួន៤០លាន៤៨ម៉ឺន០៩៤៥ដុល្លា បើធៀបនឹងឆ្នាំ២០២៤ ថយចុះ៣ភាគរយ។របាយការណ៍ដដែលបានបង្ហាញថា ក្នុងខែវិច្ឆិកាឆ្នាំ២០២៥នេះ មានអ្នកទេសចរអន្ដរជាតិចំនួន១០ម៉ឺន១ ៦៧៧នាក់ បានទិញបណ្ណចូលទស្សនារមណីយដ្ឋានអង្គរ ដែលចំនួននេះ មានការថយចុះជាង១៨ភាគរយ បៀបធៀបនឹងឆ្នាំ២០២៤ ដោយទទួលបានប្រាក់ចំណូលពីការលក់បណ្ណនេះ មានចំនួន៤លាន៩០ម៉ឺន៥១៦៤ដុល្លាអាមេរិក ថយចុះជាង១៧ភាគរយ បើធៀបនឹងឆ្នាំ២០២៤កន្លងកន្លងមក។ គ្រឹះស្ថានអង្គរ បន្ថែមថាក្នុងរយៈពេល១១ខែ ចាប់ពីខែមករា ដល់ខែដំណាច់ខែវិច្ឆិកាឆ្នាំ២០២៥នេះ ភ្ញៀវទេសចរបរទេសទិញសំបុត្រចូលទស្សនាអង្គរមានចំនួន៨៦៧,១៩៥នាក់ ថយចុះជាង៣ភាគរយ បើធៀបរយៈពេលដូចគ្នាឆ្នាំ២០២៤ និងទទួលបានប្រាក់ចំណូលចំនួន ៤០លាន៤៨ម៉ឺន០៩៤៥ដុល្លាអាមេរិក ថយចុះជាង៣ភាគរយ បើធៀបនឹងឆ្នាំ២០២៤កន្លងទៅ៕

ក្រោយចុះក្នុងបញ្ជីបេតិកភណ្ឌពិភពលោកល្ខោនខោលវត្តស្វាយអណ្ដែតមានការគាំទ្រ និងអ្នកបន្តវេនកើនឡើង

រយៈពេល៧ឆ្នាំហើយ ដែលល្ខោនខោលវត្តស្វាយអណ្ដែត ស្ថិតក្នុងសង្កាត់សារិកាកែវ ក្រុងអរិយក្សត្រ ខេត្តកណ្ដាល ត្រូវបានចុះក្នុងបញ្ជីបេតិកភណ្ឌវប្បធម៌អរូបិយ នៃមនុស្សជាតិ របស់អង្គការយូណេស្កូ ដែលបច្ចុប្បន្ន សិល្បៈបុរាណបន្សល់មកពីដូនតាជាច្រើនជំនាន់មួយនេះ កំពុងមានការគាំទ្រ ហើយក៏មានអ្នកបន្តវេនកើនឡើងផងដែរ ។ក្នុងកិច្ចសម្ភាសន៍ជាមួយ BTV ព្រះគ្រូមង្គលវង្សាចារ្យ ជា ប៊ុនធឿន ព្រះគ្រូចៅអធិការវត្តស្វាយអណ្ដែត និងជាប្រធានសហគមន៍ល្ខោនខោលវត្តស្វាយអណ្តែត បានមានសង្ឃដីកាថា ក្រោយពីចុះក្នុងបញ្ជីបេតិកភណ្ឌវប្បធម៌អរូបិយ នៃមនុស្សជាតិ ល្ខោនខោលវត្តស្វាយអណ្ដែតកាន់តែមានភាពល្បីរន្ទឺ ដែលកាលពីមុនមានការសម្ដែងត្រឹមនៅក្នុងភូមិស្រុក ប៉ុន្តែបច្ចុប្បន្ននេះមានការគាំទ្រច្រើន ហើយត្រូវបានអញ្ជើញទៅសម្ដែង នៅក្នុងព្រឹត្តិការណ៍ធំៗ ក្នុងរាជធានីភ្នំពេញ និងកម្មវិធីជាច្រើននៅតាមបណ្ដាខេត្តនានា ជាមួយនេះ ក៏ធ្លាប់ទៅសម្ដែងនៅប្រទេសសាធារណរដ្ឋកូរ៉េ (កូរ៉េខាងត្បូង) ផងដែរ ។ ព្រះអង្គមានសង្ឃដីកាបន្តថា រាល់ឆ្នាំក៏មានកុមារា និងយុវជនជាច្រើននាក់ផងដែរ បានមករៀនសម្ដែងល្ខោនខោល ខណៈដែលសព្វថ្ងៃ ល្ខោនខោលវត្តស្វាយអណ្ដែតមានសមាជិក រហូតដល់ជាង១០០នាក់ បើធៀបនឹងពេលមុន មានតិចតួចប៉ុណ្ណោះ ដែលសញ្ញាល្អ នៃកំណើនអ្នកបន្តវេននេះ បង្ហាញថាល្ខោនខោលខ្មែរ មិនងាយផុតដង្ហើម និងសាបសូន្យនោះទេ ។គួរបញ្ជាក់ថា ល្ខោនខោលមានតួអង្គសំខាន់ត្រូវសម្ដែងចំនួនបួន គឺតួនាយរោង (តួប្រុស មានព្រះរាមព្រលក្ខណ៍), តួនាងឯក (តួស្រីនាសេដា), តួយក្ស (តួក្រុងរាប) និងតួស្វា (មានសហុមានជាដើម) ។ ល្ខោនខោលវត្តស្វាយអណ្ដែត ត្រូវបានចុះក្នុងបញ្ជីបញ្ជីបេតិកភណ្ឌវប្បធម៌អរូបិយ នៃមនុស្សជាតិ របស់អង្គការយូណេស្កូ កាលពីថ្ងៃទី២៨ ខែវិច្ឆិកា ឆ្នាំ២០១៨ ក្នុងចំណោមបេតិកភណ្ឌអរូបិយរបស់កម្ពុជាចំនួន៧ រួមមាន របាំព្រះរាជទ្រព្យ ល្ខោនស្រមោលស្បែកធំ ល្បែងទាញព្រ័ត្រ ចាប៉ីដងវែង គុនល្បុក្កតោ និងក្រមាខ្មែរ៕ អត្ថបទ បាន សុខរិទ្ធិ

ព្រឹត្តិការណ៍វាយកូនហ្គោល Vattanac Legends Championship 2025 រយៈពេល ៣ថ្ងៃ បញ្ចប់ទៅដោយជោគជ័យជាប្រវត្តិសាស្រ្តថ្មីមិនធ្លាប់មាន ដែលប្រទេសកម្ពុជាធ្វើជាម្ចាស់ផ្ទះលើកដំបូងរៀបចំព្រឹត្តិការណ៍ប្រកួតវាយកូនហ្គោលកម្រិតអន្តរជាតិ

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ អញ្ជើញជាអធិបតីក្នុងពិធីប្រគល់ពានរង្វាន់Vattanac Legends Championship 2025 ដល់កីឡាករស្កុតឡែន DAVID DRYSDALE ដែលជាម្ចាស់ជើងឯកការប្រកួតកីឡាវាយកូនហ្គោលលំដាប់អន្តរជាតិ Vattanac Legends Championship ជាមួយប្រាក់រង្វាន់ ៨២.៥០០ ដុល្លារ។ក្នុងពិធីដ៏មហាកិត្តិយសនេះ មានការអញ្ជើញចូលរួមពីអ្នកឧកញ៉ា សំ អាង, អ្នកឧកញ៉ា ឈុន លាង សហស្ថាបនិកក្រុមហ៊ុនវឌ្ឍនៈ គ្រុប, អ្នកឧកញ៉ា សំអាង វឌ្ឍនៈ អគ្គនាយកក្រុមហ៊ុន វឌ្ឍនៈ គ្រុប ព្រមទាំងភ្ញៀវកិត្តិយសជាតិ និងអន្តរជាតិយ៉ាងច្រើនកុះករ។សូមជម្រាបជូនថា ជោគជ័យនៃព្រឹត្តិការណ៍ Vattanac Legends Championship 2025 ជំរុញឲ្យស្ថាប័ន Legends Tour និងកីឡាករល្បីៗទាំងអស់បន្តស្នាក់នៅ ហើយធ្វើដំណើរទស្សនកិច្ចកម្សាន្តនៅខេត្តសៀមរាប និងបន្តធ្វើការប្រកួតពានរង្វាន់វាយកូនហ្គោលមួយទៀតឈ្មោះថា Vattanac Legends Championship Legacy Edition 2025 ដែលនឹងធ្វើការប្រកួតនៅថ្ងៃទី ២៦ - ២៨ ខែវិច្ឆិកា ឆ្នាំ២០២៥ នៅទីលានវាយកូនហ្គោលដ៏ប្រណីត វឌ្ឍនៈហ្គោលរីហ្សត៕

ទេសចរអន្តរជាតិអះអាងថា រាជធានីភ្នំពេញជាគោលដៅទេសចរណ៍ល្អមួយលើពិភពលោក

ភ្ញៀវទេសចរអន្តរជាតិ បានបង្ហាញការចាប់អារម្មណ៍ជាខ្លាំងថា រាជធានីភ្នំពេញ គឺជាគោលដៅទេសចរណ៍ ដែលគេចូលចិត្តជាងគេនៅក្នុងតំបន់អាស៊ាន និងលើពិភពលោក ហើយការបង្ហាញការពេញចិត្តខ្លាំងរបស់ភ្ញៀវទេសចរអន្តរជាតិ គឺបានធ្វើឡើង ខណៈ Website ទេសចរណ៍អន្តរជាតិមួយចុះផ្សាយរាជធានីភ្នំពេញ ជាប់ចំណាត់ថ្នាក់ទី១០ លើពិភពលោក ជាទីក្រុងដែលមានភ្ញៀវទេសចរចូលចិត្តជាងគេ។ភ្ញៀវទេសចរអន្តរជាតិ មកពីប្រទេសនានា បានថ្លែងប្រាប់BTV នៅថ្ងៃទី២៤ ខែវិច្ឆិកា នេះថា អំឡុងពេលស្នាក់នៅដើរកម្សាន្តទេសចរណ៍នៅរាជធានីភ្នំពេញ គឺមានភាពបៃតង អគារជាច្រើនមានរចនាបថស្អាតប្លែក ម្ហូបអាហារឆ្ងាញ់ មានគោលដៅទេសចរណ៍ រមណីយដ្ឋានទេសចរណ៍ វប្បធម៌ ប្រវត្តិសាស្រ ច្រើនកន្លែង ជាពិសេសនៅពេលរាត្រី មានគឺភ្ញៀវទេសចរចេញដើរកម្សាន្តច្រើនដែលធ្វើឱ្យមកទស្សនាម្តងហើយចង់មកម្តងទៀត។លោក ម៉ម វាសនា ប្រធានមន្ទីរទេសចរណ៍រាជធានីភ្នំពេញ បានឲ្យដឹងថា ជារួម ចាប់តាំងពីរាជធានីភ្នំពេញ បើកដំណើរការផ្លូវថ្មើជើង នៅមាត់ទន្លេចតុមុខមក គឺបានផ្តល់តម្លៃបន្ថែមជាច្រើន ជាពិសេស គឺការទាក់ទាញភ្ញៀវទេសចរក្នុងស្រុក មកពីតាមបណ្តាខេត្តជាច្រើនអញ្ជើញមកទស្សនារាជធានីភ្នំពេញនៅរៀងរាល់ថ្ងៃចុងសប្តាហ៍ ហើយក្នុងនោះភ្ញៀវទេសចរអន្តរជាតិ ក៏មានពេញចិត្ត ចូលចិត្តអញ្ជើញទៅដើរទស្សនាកម្សាន្តច្រើនផងដែរ។តាមប្រភពពី វេបសាយអន្តរជាតិ www.cbtraveler.com បានចុះផ្សាយថា ទីក្រុងភ្នំពេញ របស់ប្រទេសកម្ពុជា គឺបានជាប់ចំណាត់ថ្នាក់ទី១០ លើពិភពលោក ជាទីក្រុងដែលមានភ្ញៀវទេសចរចូលចិត្ត ខណៈចំណាត់ថ្នាក់ទី១ គឺបានទៅ ទីក្រុងTokyo ប្រទេសជប៉ុន។បើតាមមន្ត្រីជំនាញនៃក្រសួងទេសចរណ៍ បានឲ្យដឹងថា ការផ្តល់ចំណាត់ថ្នាក់នេះ គឺបានធ្វើឡើងតាមរយៈក្រុមហ៊ុនទីភ្នាក់ងារ និងក្រុមការងារទេសចរណ៍ធ្វើការងារជាអន្តរជាតិ ចុះធ្វើការស្ទាប់ស្ទង់មតិ និងផ្តល់ការវាយតម្លៃ ពីសំណាក់ភ្ញៀវទេសចរអន្តរជាតិនានា ដែលបានអញ្ជើញទៅដើរកម្សាន្តទេសចរណ៍នៅតាមទីក្រុងនានា តាមបណ្តាប្រទេសនៅពិភពលោក៕ អត្ថបទ ស៊ុម សុខជា

បណ្ដាញសង្គម

ព័ត៌មានថ្មីៗ

ហ្វូស៊ីលរបស់សត្វដាយណូស័រតូចជាងគេបំផុត ត្រូវបានរកឃើញនៅប្រទេសអាហ្សង់ទីន

ពលរដ្ឋលីបង់កសាងជីវិតឡើងវិញនៅទីក្រុងភាគខាងត្បូង បើទោះបីជាព្រួយបារម្ភពីសង្រ្គាមថ្មីក៏ដោយ

ស៊ីរីបញ្ជាក់ពីការរត់គេចខ្លួនទ្រង់ទ្រាយធំចេញពីជំរំដាក់សាច់ញាតិក្រុម ISIL

ក្រុមសកម្មជន៖ កងនាវាជាង ១០០គ្រឿង គ្រោងនឹងធ្វើដំណើរទៅកាន់ហ្កាហ្សាចេញពីអេស្ប៉ាញ

ស្រ្តីស៊ូដង់ជម្លៀសខ្លួនរៀបរាប់ទុក្ខលំបាកសព្វសារពើរបស់ពួកគេដោយសារសង្រ្គាមអំឡុងពិធីបុណ្យរ៉ាម៉ាដន

បារាំងចាត់ទុកថា អះអាងរបស់រុស្ស៊ី ពាក់ព័ន្ធនឹងការផ្ទេរអាវុធនុយក្លេអ៊ែរទៅអ៊ុយក្រែន គឹគ្មានមូលដ្ឋាន

អូម៉ង់បង្ហាញពី «ភាពបើកចំហមិនធ្លាប់មាន» ពីអាមេរិក និងអ៊ីរ៉ង់ អំឡុងកិច្ចពិភាក្សា នៅទីក្រុងហ្សឺណែវ

រដ្ឋមន្ត្រីធម្មការកោតសរសើរសន្និបាតក្រសួង ដែលសម្រេចបានសមិទ្ធផលគួរជាទីមោទនៈ

មនុស្សជិត ៨.០០០នាក់ ស្លាប់ពេលធ្វើដំណើរតាមផ្លូវអន្តោប្រវេសន៍ឆ្នាំ២០២៥ តែចំនួនទំនងខ្ពស់ជាងនេះឆ្ងាយ

លោក Pezeshkian បញ្ជាក់ឡើងវិញពីការប្រឆំាងរបស់អ៊ីរ៉ង់ចំពោះការផលិតអាវុធនុយក្លេអ៊ែរ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

វប្បធម៌ និងទេសចរណ៍

នាវាទេសចរណ៍ WESTERDAM ដឹកភ្ញៀវទេសចរជិត២០០០នាក់ ចូលសំចតធ្វើទស្សនកិច្ចនៅកម្ពុជា

សត្វស្លាបនៅតំបន់រ៉ាមសារព្រែកទាល់ កើនឡើងច្រើនដែលជាផ្នែកមួយយ៉ាងសំខាន់ទាក់ទាញភ្ញៀវទេសចរ

ទេសចរជាតិ-អន្តរជាតិប្រមាណ ៣ម៉ឺននាក់ អញ្ជើញទៅទស្សនាព្រឹត្តិការណ៍តារាសាគរសាទរទេសចរណ៍សមុទ្រនៅខេត្តកោះកុង

ក្រោយចុះក្នុងបញ្ជីបេតិកភណ្ឌពិភពលោកល្ខោនខោលវត្តស្វាយអណ្ដែតមានការគាំទ្រ និងអ្នកបន្តវេនកើនឡើង

ទេសចរអន្តរជាតិអះអាងថា រាជធានីភ្នំពេញជាគោលដៅទេសចរណ៍ល្អមួយលើពិភពលោក

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

វប្បធម៌ និងទេសចរណ៍

នាវាទេសចរណ៍ WESTERDAM ដឹកភ្ញៀវទេសចរជិត២០០០នាក់ ចូល​សំចត​ធ្វើ​ទស្សន​កិច្ច​នៅ​កម្ពុជា

សត្វស្លាបនៅតំបន់រ៉ាមសារព្រែកទាល់ កើនឡើងច្រើន​ដែលជាផ្នែក​មួយ​យ៉ាង​សំខាន់​ទាក់​ទាញ​ភ្ញៀវ​ទេសចរ

ក្រោយចុះក្នុងបញ្ជីបេតិកភណ្ឌពិភពលោកល្ខោនខោលវត្តស្វាយអណ្ដែតមានការគាំទ្រ និងអ្នកបន្តវេនកើនឡើង

ទេសចរអន្តរជាតិអះអាងថា រាជធានីភ្នំពេញជាគោលដៅទេសចរណ៍ល្អមួយលើពិភពលោក

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

នាវាទេសចរណ៍ WESTERDAM ដឹកភ្ញៀវទេសចរជិត២០០០នាក់ ចូលសំចតធ្វើទស្សនកិច្ចនៅកម្ពុជា

សត្វស្លាបនៅតំបន់រ៉ាមសារព្រែកទាល់ កើនឡើងច្រើនដែលជាផ្នែកមួយយ៉ាងសំខាន់ទាក់ទាញភ្ញៀវទេសចរ