ទីក្រុងមូស្គូ បាននិយាយថា ខ្លួនមានផែនការបន្តវាយប្រហារទីក្រុងគីវ។ រដ្ឋមន្ត្រីការបរទេសរុស្ស៊ី លោក Sergey Lavrov បានបញ្ជូនសារនេះទៅកាន់រដ្ឋមន្ត្រីការបរទេសសហរដ្ឋអាមេរិក លោក Marco Rubio ក្នុងការសន្ទនាតាមទូរស័ព្ទកាលពីពេលថ្មីៗនេះ។ ក្រសួងការបរទេសអាមេរិក បាននិយាយថា លោក Lavrov បានផ្តួចផ្តើមការសន្ទនាតាមទូរស័ព្ទនេះដោយលោកបានចោទប្រកាន់អ៊ុយក្រែនថា បានវាយប្រហារទីតាំងស៊ីវិលនៅក្នុងប្រទេសរុស្ស៊ី។ លោកក៏បាននិយាយផងដែរថា កងកម្លាំងរុស្ស៊ី នឹងបន្តកំណត់គោលដៅលើសហគ្រាសឧស្សាហកម្មការពារជាតិ និងមជ្ឈមណ្ឌលធ្វើការសម្រេចចិត្ត នៅក្នុងទីក្រុងគីវ។ ក្រសួងការបរទេសរុស្ស៊ី បានចេញសេចក្តីថ្លែងការណ៍មួយដោយបាននិយាយថា ចំណាត់ការនេះគឺជាការសងសឹកចំពោះការវាយប្រហាររបស់អ៊ុយក្រែននៅក្នុងទីក្រុង Luhansk គ្រប់គ្រងដោយរុស្ស៊ី។ សេចក្តីថ្លែងការណ៍ ក៏បានជំរុញឱ្យពលរដ្ឋ និងអ្នកការទូតបរទេសចាកចេញពីទីក្រុងគីវជាបន្ទាន់។ ប្រភពព័ត៌មានអ៊ុយក្រែន បាននិយាយថា រុស្ស៊ីបានបើកការវាយប្រហារទ្រង់ទ្រាយធំដោយបានសម្លាប់មនុស្សច្រើននាក់ និងរងរបួសជាង ៨០ នាក់នៅក្នុងទីក្រុងគីវ និងតំបន់ផ្សេងៗទៀត។ ប្រធានាធិបតីអ៊ុយក្រែន លោក Volodymyr Zelenskyy បានរិះគន់ខ្លាំងៗចំពោះរុស្ស៊ីសម្រាប់ការវាយប្រហារនេះ។ លោកបាននិយាយថា ទីក្រុងមូស្គូ បានប្រើប្រាស់មីស៊ីល Oreshnik ដ៏មានអានុភាពក្នុងការវាយប្រហារ។ មីស៊ីលបាលីស្ទីកថ្មីនេះត្រូវបានគេនិយាយថា មានល្បឿនលឿនជាងសំឡេង និងមានសមត្ថភាពបំពាក់ក្បាលគ្រាប់នុយក្លេអ៊ែរ។

ឯកអគ្គរដ្ឋទូតរុស្ស៊ីប្រចាំអង្គការសហប្រជាជាតិ បាននិយាយកាលពីថ្ងៃអង្គារ ទី២៦ ខែឧសភា ថា សហរដ្ឋអាមេរិក មិនបានផ្តល់ទិដ្ឋាការដល់អនុរដ្ឋមន្ត្រីការបរទេសរុស្ស៊ី លោក Alexander Alimov ដើម្បីចូលរួមក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិទេ និងបានចាត់ទុកថា ជាការរំលោភលើកាតព្វកិច្ចរបស់សហរដ្ឋអាមេរិកក្រោមកិច្ចព្រមព្រៀងទីស្នាក់ការកណ្តាលអង្គការសហប្រជាជាតិ។ លោក Vassily Nebenzia បានធ្វើអត្ថាធិប្បាយនៅក្នុងកិច្ចប្រជុំក្រុមប្រឹក្សាសន្តិសុខអង្គការសហប្រជាជាតិដែលមានសមាជិក១៥រូប ដឹកនាំដោយរដ្ឋមន្ត្រីការបរទេសចិន លោក Wang Yi ថា លោក Alimov មានបំណងចូលរួមក្នុងកិច្ចប្រជុំ។ ក្រសួងការបរទេស និងបេសកកម្មអង្គការសហប្រជាជាតិរបស់សហរដ្ឋអាមេរិក មិនបានឆ្លើយតបភ្លាមៗចំពោះសំណួរអំពីសេចក្តីថ្លែងការណ៍របស់លោក Nebenzia ទេ។ លោក Nebenzia និយាយថា «គណៈប្រតិភូរុស្ស៊ី ដោយផ្អែកលើការអញ្ជើញរបស់រដ្ឋមន្ត្រីការបរទេសចិន លោក Wang Yi គួរតែត្រូវមានតំណាងក្នុងអំឡុងពេលកិច្ចប្រជុំនៅកម្រិតថ្នាក់អនុរដ្ឋមន្ត្រីការបរទេសនៃសហព័ន្ធរុស្ស៊ី លោក Alexander Alimov ដែលពិនិត្យមើលបញ្ហាទាក់ទងនឹងអង្គការសហប្រជាជាតិ»។ លោកបាននិយាយបន្ថែមថា «ទោះជាយ៉ាងណា ទោះបីជាយើងព្យាយាមបញ្ចុះបញ្ចូលភាគីសហរដ្ឋអាមេរិកឱ្យចេញទិដ្ឋាការដល់លោកក៏ដោយ ក៏ទិដ្ឋាការនោះមិនត្រូវបានផ្តល់ឱ្យនៅទីបំផុតដែរ»។ លោក Nebenzia បាននិយាយថា ក្រោមកិច្ចព្រមព្រៀងទីស្នាក់ការកណ្តាលរបស់អង្គការសហប្រជាជាតិ ការចូលទៅកាន់ទីស្នាក់ការកណ្តាលរបស់អង្គការសហប្រជាជាតិនៅទីក្រុងញូវយ៉ក «ត្រូវផ្តល់ជូនមន្ត្រីទាំងអស់នៃរដ្ឋជាសមាជិក»។ លោកបាននិយាយថា រុស្ស៊ីក៏បានចាត់ទុកបញ្ហានេះថាជា «គំរូដ៏អាក្រក់មួយនៃការមិនគោរពចំពោះតំណែងប្រធានក្រុមប្រឹក្សាសន្តិសុខរបស់ប្រទេសចិន និងប្រធានបទ ដែលកំពុងពិភាក្សានៅថ្ងៃនេះ គឺធម្មនុញ្ញអង្គការសហប្រជាជាតិ»។

រដ្ឋមន្ត្រីការបរទេសចិន លោក Wang Yi បាននិយាយកាលពីថ្ងៃអង្គារ ទី២៦ ខែឧសភា ថា លោកសង្ឃឹមថាភាគីនានាក្នុងជម្លោះនៅអ៊ីរ៉ង់ នៅតែអាចប្តេជ្ញាចិត្តក្នុងការបន្តបទឈប់បាញ់ និងបន្តជួបគ្នានៅពាក់កណ្តាលផ្លូវ។ អ៊ីរ៉ង់ បាននិយាយកាលពីថ្ងៃអង្គារថា សហរដ្ឋអាមេរិក បានរំលោភលើបទឈប់បាញ់ បន្ទាប់ពីសហរដ្ឋអាមេរិក បានធ្វើអ្វីដែលខ្លួនហៅថាជាការវាយប្រហារការពារនៅភាគខាងត្បូងប្រទេសអ៊ីរ៉ង់ ខណៈរដ្ឋមន្ត្រីការបរទេសអាមេរិក លោក Marco Rubio បាននិយាយថា ការចរចាកិច្ចព្រមព្រៀងដើម្បីបញ្ឈប់ជម្លោះអាច «ចំណាយពេលពីរបីថ្ងៃ»។ លោក Wang Yi បានប្រាប់អ្នកសារព័ត៌មាននៅអង្គការសហប្រជាជាតិក្នុងទីក្រុងញូវយ៉កបន្ទាប់ពីដឹកនាំកិច្ចប្រជុំក្រុមប្រឹក្សាសន្តិសុខដែលមានសមាជិក១៥រូបថា «យើងសង្ឃឹមថា ភាគីពាក់ព័ន្ធនៅតែអាចប្តេជ្ញាចិត្តក្នុងការបន្តបទឈប់បាញ់ និងបន្តជួបគ្នានៅពាក់កណ្តាលផ្លូវ ដូច្នេះសន្តិភាពអាចវិលត្រឡប់ទៅតំបន់មជ្ឈិមបូព៌ាវិញ បានកាន់តែឆាប់តាមដែលអាចធ្វើទៅបាន»។ លោក Wang បាននិយាយបន្ថែមថា «ដូចដែលយើងបាននិយាយ បញ្ហាដែលមានជាយូរមកហើយមិនអាចដោះស្រាយបានក្នុងពេលតែមួយយប់នោះទេ»។ «ទោះជាយ៉ាងណា រាល់ជំហានឆ្ពោះទៅមុខក្នុងការចរចា នាំមកនូវក្តីសង្ឃឹមកាន់តែច្រើនចំពោះសន្តិភាព »។

ភាពវឹកវរនៅក្នុងប្រទេសបូលីវី បានបន្តកាលពីថ្ងៃអង្គារ ទី២៦ ខែឧសភា បន្ទាប់ពីការតវ៉ារយៈពេលជាច្រើនសប្តាហ៍ដែលបានហ៊ុមព័ទ្ធរដ្ឋាភិបាលរបស់ប្រធានាធិបតី លោក Rodrigo Paz ខណៈសមាជិកសភា មានចំណាត់ការដកចេញវិធានការរឹតត្បិតលើការដាក់ពង្រាយកងកម្លាំងប្រដាប់អាវុធដើម្បីបង្ក្រាបជម្លោះសង្គម។ ក្រុមអ្នកតវ៉ា កំពុងជំរុញឲ្យរដ្ឋាភិបាលនិយមកណ្តាលរបស់លោក Paz ដកចេញវិធានការរឹតត្បិតថវិកា និងដោះស្រាយការកើនឡើងការចំណាយលើជីវភាពរស់នៅ។ ការតវ៉ា បានបណ្តាលឱ្យមានការរំខានដល់ខ្សែច្រវ៉ាក់ផ្គត់ផ្គង់កាន់តែខ្លាំងឡើងនៅក្នុងទីក្រុងនានាដូចជា ទីក្រុង La Paz និងទីក្រុង El Alto ជាកន្លែងដែលកង្វះស្បៀង ប្រេងឥន្ធនៈ និងថ្នាំពេទ្យ កំពុងធ្វើឲ្យប៉ះពាល់ដល់ទីផ្សារ មន្ទីរពេទ្យ និងស្ថានីយប្រេងឥន្ធនៈ។ វិស័យជាច្រើន ដែលមានកំហឹងចំពោះការបិទផ្លូវ និងរងផលប៉ះពាល់ បានចេញធ្វើបាតុកម្មតាមដងផ្លូវដើម្បីទាមទារដំណោះស្រាយពីរដ្ឋាភិបាលរបស់លោក Paz។ ក្នុងការប៉ុនប៉ងដើម្បីបន្ធូរបន្ថយភាពតានតឹង ប្រធានាធិបតីបូលីវី លោក Rodrigo Paz បាននិយាយ ថា លោកនឹងកាត់បន្ថយប្រាក់ខែលោក និងប្រាក់ខែរដ្ឋមន្ត្រីរបស់លោក ពាក់កណ្តាល។ លោកនិយាយថា ការកាត់បន្ថយប្រាក់ខែបានបង្ហាញពី «ការប្តេជ្ញាចិត្តរបស់រដ្ឋាភិបាលចំពោះប្រទេស»។ កាលពីថ្ងៃអង្គារ សភាជាន់ទាបរបស់ប្រទេសបូលីវី បានបើកកិច្ចប្រជុំតាមអ៊ីនធឺណិត ដើម្បីជំរុញសេចក្តីស្នើច្បាប់ដែលត្រូវបានអនុម័តដោយព្រឹទ្ធសភារួចហើយ ដែលនឹងលុបចោលការរឹតបន្តឹងលើការប្រើប្រាស់កងកម្លាំងប្រដាប់អាវុធក្នុងជម្លោះសង្គម។

អ៊ីស្រាអែល កំពុងបង្កើនយុទ្ធនាការយោធារបស់ខ្លួននៅភាគខាងត្បូងប្រទេសលីបង់ ទោះបីជាមាន «បទឈប់បាញ់» ដែលបានសម្របសម្រួលដោយសហរដ្ឋអាមេរិកក៏ដោយ។ បន្ថែមលើការពង្រីកបទបញ្ជាជម្លៀសដោយបង្ខំនៅទូទាំងទីក្រុងនិងភូមិជាច្រើន ការទម្លាក់គ្រាប់បែករបស់អ៊ីស្រាអែលកាលពីពេលថ្មីៗនេះ បានវាយប្រហារលើទីតាំងដូចជាតំបន់ Nabatieh នៅភាគខាងត្បូង និងតំបន់ Mashghara នៅជ្រលងភ្នំ Bekaa ភាគខាងកើតប្រទេស។ លោក Ali Rizk អ្នកវិភាគកិច្ចការសន្តិសុខនិងជាអ្នកឧបត្ថម្ភទស្សនាវដី្ត Responsible Statecraft បានប្រាប់សារព័ត៌មាន Al Jazeera ថា ក្រុមហេសបូឡា មិនចាញ់សង្គ្រាមទេ។ លោកអះអាងថា ការពង្រីកធំរបស់អ៊ីស្រាអែល គ្រាន់តែបង្ហាញពីការបង្អាក់ចំពោះការអនុវត្តនៅសមរភូមិរបស់ក្រុមហេសបូឡាប៉ុណ្ណោះ ប៉ុន្តែសម្ពាធក្នុងស្រុកកាន់តែខ្លាំងឡើងលើនាយករដ្ឋមន្ត្រីអ៊ីស្រាអែល លោក Benjamin Netanyahu។

លោកប្រធានាធិបតី Donald Trump មានគម្រោងកោះប្រជុំគណៈរដ្ឋមន្ត្រីទាំងមូលរបស់លោកនៅឯឧស្យានសម្រាកលំហែប្រធានាធិបតី Camp David នៅថ្ងៃពុធ ទី២៧ ខែឧសភា នេះ ខណៈការវាយប្រហារថ្មីរបស់សហរដ្ឋអាមេរិកលើអ៊ីរ៉ង់បានគំរាមកំហែងដល់ការចរចាសម្រាប់កិច្ចព្រមព្រៀងសន្តិភាព។ កិច្ចប្រជុំដ៏កម្រនៅបរិវេណឧស្យាន Camp David ក្នុងរដ្ឋ Maryland ដែលត្រូវបានបញ្ជាក់ដោយមន្ត្រីរដ្ឋបាលមួយរូប បានកើតឡើងខណៈកងឆ្មាំបដិវត្តន៍អ៊ីស្លាមបានគំរាមកំហែងសងសឹកបន្ទាប់ពីបញ្ជាការកណ្តាលសហរដ្ឋអាមេរិកបាននិយាយថា ខ្លួនបានបើកការវាយប្រហារការពារខ្លួន លើទូកនៅភាគខាងត្បូងអ៊ីរ៉ង់ ដែលកំពុងព្យាយាមដាក់មីន និងទីតាំងបាញ់មីស៊ីល។ ភាពតានតឹងដែលចេះតែកើនឡើងកាន់តែខ្លាំង ប្រឈមនឹងការរារាំងកិច្ចខិតខំប្រឹងប្រែងរបស់លោក Trump ដើម្បីធានាបានកិច្ចព្រមព្រៀងជាមួយអ៊ីរ៉ង់ដែលនឹងបញ្ចប់ជម្លោះ និងបើកច្រកសមុទ្រ Hormuz ឡើងវិញ ជាផ្លូវទឹកដ៏សំខាន់សម្រាប់ពាណិជ្ជកម្មដែលស្ថិតក្រោមប្រកួតប្រជែងពីសហរដ្ឋអាមេរិក និងអ៊ីរ៉ង់។ លោក Trump ប្រឈមនឹងសម្ពាធកាន់តែខ្លាំងដើម្បីធានាបាននូវកិច្ចព្រមព្រៀងមួយបន្ទាប់ពីបានបង្ហាញថាភាគីទាំងពីរជិតឈានដល់កិច្ចព្រមព្រៀងមួយ។ ខណៈបញ្ហាអ៊ីរ៉ង់ត្រូវបានគេរំពឹងថានឹងគ្របដណ្ដប់លើកិច្ចពិភាក្សានៅឯ Camp David មន្ត្រីរូបនេះបាននិយាយថា សមាជិកគណៈរដ្ឋមន្ត្រីក៏នឹងពិភាក្សាអំពីសេដ្ឋកិច្ច និងកិច្ចខិតខំប្រឹងប្រែងដើម្បីដោះស្រាយបញ្ហាក្លែងបន្លំ ក្នុងចំណោមអាទិភាពរដ្ឋបាលផ្សេងទៀតផងដែរ៕

ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីក្នុងពិធី “សម្ពោធរោងចក្រផលិតកែច្នៃកៅស៊ូក្រុមហ៊ុន គីមស៍ រ៉ាប់ប៊ើរ (ខេមបូឌា)” នៅខេត្តត្បូងឃ្មុំ នាព្រឹកថ្ងៃពុធ ទី២៧ ខែឧសភា ឆ្នាំ២០២៦ បានបញ្ជាក់ដោយកំណត់យកកំណត់យកថ្ងៃទី០៧ ខែកក្កដា ឆ្នាំ២០២៦ (៧/៧/២០២៦) សម្ពោធដាក់ឱ្យប្រើប្រាស់ជាផ្លូវការកំណាត់ផ្លូវជាតិលេខ៧ (ស្គន់-ក្រុងកំពង់ចាម)។ គួរបញ្ជាក់ថា គម្រោងពង្រីក និងលើកកម្រិតផ្លូវជាតិលេខ៧ជាបួនគន្លង ចាប់ពីទីប្រជុំជនស្គន់ ស្រុកជើងព្រៃ រហូតដល់ក្រុងកំពង់ចាម ខេត្តកំពង់ចាម ប្រវែង៤៥,៥០៤ គីឡូម៉ែត្រ (PK000+000 – PK45+502.84)សម្រេចលទ្ធផលជារួម៩៩%ហើយ គិតត្រឹងចុងខែឧសភា ឆ្នាំ២០២៦នេះ។ ចំពោះការងារសេសសល់បន្ទាប់បន្សំ គឺការពិនិត្យឡើងវិញនូវលទ្ធផលការងារដូចជា៖ កៅស៊ូAC,គំនូសសញ្ញាចរាចរណ៍,ផ្លាកសញ្ញាចរាចរណ៍, បរិក្ខាសុវត្ថិភាព,សួនច្បារពុះចែកទ្រូងផ្លូវ,រុក្ខជាតិលម្អតូច-ធំជាដើម។ ផ្លូវជាតិលេខ៧ គឺជាខ្សែផ្លូវយ៉ាងសំខាន់ និងជាសរសៃឈាមសេដ្ឋកិច្ចដ៏មានសក្ដានុពល ជួយសម្រួលការធ្វើដំណើរ ,ការដឹកជញ្ជូនផលិតផលកសិកម្ម,កសិឧស្សាហកម្ម ព្រមទាំងលើកកម្ពស់ការអភិវឌ្ឍ និងសកម្មភាពសេដ្ឋកិច្ច-សង្គមជាតិ។ គួរបញ្ជាក់ថា ផ្លូវ ស្ពាន គឺជាសរសៃឈាមនៃសេដ្ឋកិច្ចជាតិ និងជាអាទិភាពគន្លឹះទី២ ក្នុងចំណោមអាទិភាពគន្លឹះទាំង៥ “មនុស្ស ផ្លូវ ទឹក ភ្លើង និងបច្ចេកវិទ្យា” នៃយុទ្ធសាស្ត្របញ្ចកោណដំណាក់កាលទី១ ដោយក្នុងកិច្ចការអាទិភាពទី២ នៃបញ្ចកោណទី២ គឺការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន និងក៏ជាគម្រោងយុទ្ធសាស្រ្តមួយដ៏សំខាន់សម្រាប់ការតភ្ជាប់ទំនាក់ទំនង និងជាក្តីសង្ឃឹមរវាងប្រជាពលរដ្ឋ«មានផ្លូវ មានក្តីសង្ឃឹម»៕

ភ្នំពេញ៖ ប្រមុខការទូតកម្ពុជា និងព័រទុយហ្គាល់ ចុះហត្ថលេខាលើ អនុស្សរណៈនៃការយោគយល់គ្នា ស្តីពីកិច្ចពិគ្រោះយោបល់ទ្វេភាគី រវាងកម្ពុជា និងព័រទុយហ្គាល់ ដែលបង្កើតជាក្របខ័ណ្ឌផ្លូវការមួយសម្រាប់ការផ្លាស់ប្តូរកិច្ចការងារការទូតជាទៀងទាត់ និងបង្កើនកិច្ចសហប្រតិបត្តិការកាន់តែជិតស្និទ្ធលើបញ្ហាតំបន់ និងសកលលោក។ ការចុះអនុស្សរណៈនេះ ក្នុងឱកាស ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានអញ្ជើញជួបពិភាក្សាការងារជាមួយ ឯកឧត្តម Paulo Rangel រដ្ឋមន្ត្រីការបរទេសព័រទុយហ្គាល់ នៅថ្ងៃទី២៦ ខែឧសភា ឆ្នាំ២០២៦។ ក្នុងឱកាសនោះ ភាគីទាំងពីរបានពិភាក្សាគ្នាអំពីការស្វែងរកលទ្ធភាពពង្រឹងកិច្ចសហប្រតិបត្តិការសេដ្ឋកិច្ច និងបានប្តេជ្ញាចិត្តធ្វើការងារយ៉ាងជិតស្និទ្ធ ដើម្បីជំរុញការគាំទ្រគ្នាទៅវិញទៅមកនៅក្នុងក្របខ័ណ្ឌតំបន់ និងអន្តរជាតិ។ ជំនួបនេះក៏បានបញ្ចប់ដោយការចុះហត្ថលេខាលើ អនុស្សរណៈនៃការយោគយល់គ្នា ស្តីពីកិច្ចពិគ្រោះយោបល់ទ្វេភាគី រវាងកម្ពុជា និងព័រទុយហ្គាល់ ដែលបង្កើតជាក្របខ័ណ្ឌផ្លូវការមួយសម្រាប់ការផ្លាស់ប្តូរកិច្ចការងារការទូតជាទៀងទាត់ និងបង្កើនកិច្ចសហប្រតិបត្តិការកាន់តែជិតស្និទ្ធលើបញ្ហាតំបន់ និងសកលលោក ដែលជាកង្វល់រួម៕

នៅថ្ងៃទី២៦ ខែឧសភា ឆ្នាំ២០២៦ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ បានអញ្ជើញជួបពិភាក្សាការងារទ្វេភាគីជាមួយ ឯកឧត្តម António Guterres អគ្គលេខាធិការអង្គការសហប្រជាជាតិ និងបានបញ្ជាក់ជាថ្មីនូវសារៈសំខាន់នៃការដោះស្រាយជម្លោះនានាដោយសន្តិវិធី និងស្របតាមច្បាប់អន្តរជាតិ។ ជំនួបនេះបានរំលឹកឡើងវិញនូវកិច្ចពិភាក្សារវាង សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តមអគ្គលេខាធិការ អំឡុងពេលនៃកិច្ចពិភាក្សាទូទៅនៃមហាសន្និបាតអ.ស.ប. លើកទី៨០ នៅទីក្រុងញូវយ៉ក (UNGA 80) កាលពីខែកញ្ញា ឆ្នាំ២០២៥។ ឯកឧត្តមឧបនាយករដ្ឋមន្ត្រី ក៏បានបញ្ជាក់ជាថ្មីនូវសារៈសំខាន់នៃការដោះស្រាយជម្លោះនានាដោយសន្តិវិធី និងស្របតាមច្បាប់អន្តរជាតិ៕

ទីភ្នាក់ងារសារព័ត៌មានរដ្ឋ KCNA បាននិយាយនៅថ្ងៃពុធ ​២៧​​ ឧសភា ​នេះ ​ថា​ កូរ៉េខាងជើងបានសាកល្បងមីស៊ីលផ្លោងតាកទិក​ រ៉ូកែតកាំភ្លើងធំ និងមីស៊ីលកំណត់ទិសដៅស្វ័យកម្មមានភាពជាក់លាក់ដោយ​ប្រើ​​បច្ចេក​វិទ្យា​បញ្ញាសិប្បនិម្មិត (AI ) ដែ​លត្រូវបានផលិត​​ឡើងសម្រាប់សង្គ្រាមសម័យទំនើបក្រោមការត្រួតពិនិត្យរបស់មេដឹកនាំលោក​​​ Kim Jong Un ​។​ បន្ទាប់ពីបាន​​បង្កើន​ការអភិវឌ្ឍមីស៊ីលផ្លោងបាលីស្ទីក​រយៈចម្ងាយឆ្ងាយ និងអាវុធ​មាន​សមត្ថភាពបំពាក់​​ក្បាលគ្រាប់នុយក្លេអ៊ែរជាបន្តបន្ទាប់ កូរ៉េខាងជើងបានធ្វើឱ្យប្រសើរឡើងនូវឃ្លាំងអាវុធតាកទិក​និងទំនើប​របស់ខ្លួនជាលំដាប់ ដោយសន្យាថានឹងដាក់ពង្រាយនៅជិតព្រំដែនជាមួយកូរ៉េខាងត្បូង។ ​​KCNA ​​បាននិយាយថា​ ការសាកល្បង​នេះបានវាយតម្លៃពីអំណាច​នៃ "ក្បាលគ្រាប់បេសកកម្មពិសេស" លើមីស៊ីលផ្លោងតាកទិក​ ​ភាពជឿជាក់នៃជើ​​​ងទម្រ​​បាញ់​រ៉ូកែត​កាំភ្លើងធំពហុជំនាញ​រយៈចម្ងាយឆ្ងាយ និងភាពត្រឹមត្រូវនៃមីស៊ីលតម្រង់​គោលដៅ​បំពាក់​បច្ចេកវិទ្យា​ AI ។ សារព័ត៌មាន​ដដែល​បន្ត​ថា​ លោក Kim ​បាននិយាយថា ការបាញ់សាកល្បង​នេះ​បាន​បង្ហាញថា អាវុធ និងប្រព័ន្ធបាញ់បង្ហោះដោយស្វ័យប្រវត្តិ ត្រូវបានធ្វើឱ្យប្រសើរឡើងដោយជោគជ័យ "ស័ក្តិសមនឹងលក្ខខណ្ឌត្រឹមត្រូវនៃសង្គ្រាមសម័យទំនើប ដើម្បីបង្កើនការអនុវត្តរបស់អាវុធ​ទាំងនោះក្នុងការប្រយុទ្ធ។  មេដឹកនាំ​កូរ៉េខាងជើងរូបនេះ​​​ បាននិយាយថា ការសាកល្បងទាំងនេះបានបញ្ជាក់ពីការ​ត្រៀមខ្លួនប្រយុទ្ធរបស់មីស៊ីលកំណត់ទិសដៅស្វ័យកម្ម​​ ដែលនឹងត្រូវដាក់ពង្រាយនៅអង្គភាពកាំភ្លើងធំ នៅជិតព្រំដែនជាមួយកូរ៉េខាងត្បូង ដោយ​​បំពាក់នូវ​​ប្រព័ន្ធរុករកដ៏ជាក់លាក់ និងការគ្រប់គ្រងដឹកនាំដោយបច្ចេកវិទ្យា​ AI ដែលអាចវាយប្រហារគោលដៅនៅចម្ងាយ១០០​ គីឡូម៉ែត្រ ​៕