ភ្នំពេញ៖សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា និងជាប្រធានកិត្តិយសក្រុមប្រឹក្សាជាតិកម្ពុជាដើម្បីកុមារ មានប្រសាសន៍បញ្ជាក់ថា កុមារគឺជាធនធានដ៏មានតម្លៃ និងមិនអាចខ្វះបានសម្រាប់ការអភិវឌ្ឍប្រទេសជាតិ។ ជាក់ស្តែង យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលបានកំណត់យក «មនុស្ស» ជាវិស័យអាទិភាពចម្បងបំផុតក្នុងចំណោមអាទិភាពទាំង៥។ ហេតុនេះការវិនិយោគលើសុខុមាលភាព សុវត្ថិភាព និងការអភិវឌ្ឍកុមារនៅថ្ងៃនេះ គឺជាការកសាងមូលដ្ឋានគ្រឹះដ៏រឹងមាំនៃមូលធនមនុស្សប្រកបដោយសក្តានុពល ដើម្បីជំរុញសន្ទុះការអភិវឌ្ឍកម្ពុជាឱ្យកាន់តែរីកចម្រើន និងរុងរឿងនាពេលអនាគត។សម្ដេចធិបតី នាយករដ្ឋមន្រ្ដី មានប្រសាសន៍បញ្ជាក់បែបនេះ តាមរយៈសារលិខិត អបអរសាទរខួបលើកទី៧៧ ទិវាកុមារអន្តរជាតិ១មិថុនា, ខួបលើកទី២៥ ទិវាពិភលោកប្រឆាំងពលកម្មកុមារ ១២ មិថុនា និងទិវាកុមារកម្ពុជាឆ្នាំ២០២៦។ តាមរយៈសារលិខិតសម្ដេចធិបតី បានបញ្ជាក់ថា ការប្រារព្ធទិវាកុមារអន្តរជាតិ និងទិវាកុមារកម្ពុជា១មិថុនា នេះ គឺជាការបង្ហាញនូវឆន្ទៈមោះមុត និងការប្តេជ្ញាចិត្តខ្ពស់របស់រាជរដ្ឋាភិបាលក្នុងការបន្តលើកកម្ពស់ការអនុវត្តសិទ្ធិកុមារឱ្យកាន់តែមានប្រសិទ្ធភាព។ ទន្ទឹមនឹងនេះសម្ដេចធិបតី បានលើកទឹកចិត្តឱ្យបងប្អូនជនរួមជាតិទាំងអស់ រួមគ្នាបន្តលើកស្ទួយវិស័យសុខុមាលភាពកុមារឱ្យកាន់តែល្អប្រសើរ ដើម្បីឧត្តមប្រយោជន៍ និងអនាគតដ៏រុងរឿងរបស់កុមារកម្ពុជាគ្រប់រូប។ សម្ដេចធិបតីបានថ្លែងថា ឆ្នាំនេះទិវាកុមារអន្តរជាតិ និងទិវាកុមារកម្ពុជា១មិថុនា ត្រូវបានប្រារព្ធឡើងក្រោមប្រធានបទ «សន្តិភាព ជាមូលដ្ឋានគ្រឹះនៃការគោរព និងកិច្ចគាំពារសិទ្ធិកុមារ» និងទិវាពិភពលោកប្រឆាំងពលកម្មកុមារ១២មិថុនា ក្រោមប្រធានបទ «ប្តេជ្ញាលុបបំបាត់ទម្រង់ធ្ងន់ធ្ងរនៃពលកម្មកុមារនៅគ្រប់ខ្សែច្រវាក់ផលិតកម្ម ដើម្បីកសាងភាពធន់ និងការងារសមរម្យ» ដើម្បីរម្លឹកដល់ការអនុវត្តសិទ្ធិជាមូលដ្ឋានរបស់កុមារ និងបង្ហាញពីការយកចិត្តទុកដាក់របស់រាជរដ្ឋាភិបាល ក្នុងការដោះស្រាយបញ្ហាប្រឈមនានារបស់កុមារ ជាពិសេសការបង្ការទប់ស្កាត់ និងឆ្លើយតបចំពោះអំពើហិង្សាលើកុមារ ពលកម្មកុមារ សុវត្ថិភាពកុមារតាមប្រព័ន្ធអនឡាញ ដោយជួយគាំទ្រដល់កុមាររងគ្រោះ និងងាយរងគ្រោះពីហានិភ័យការគំរាមកំហែង ការកេងប្រវ័ញ្ច និងការរំលោភបំពាន គ្រប់ទម្រង់បានទាន់ពេលវេលាប្រកបដោយប្រសិទ្ធភាព ដើម្បីឱ្យកុមាររស់នៅនិងអភិវឌ្ឍដោយសុខដុមរមនា ក្រោមម្លប់សន្តិភាព។ សម្ដេចនាយករដ្ឋមន្រ្ដីបានថ្លែងថា៖«ជាការពិតណាស់ កុមារគឺជាធនធានដ៏មានតម្លៃ និងមិនអាចខ្វះបានសម្រាប់ការអភិវឌ្ឍប្រទេសជាតិ។ ជាក់ស្តែង យុទ្ធសាស្ត្របញ្ចកោណ ដំណាក់កាលទី១របស់រាជរដ្ឋាភិបាលបានកំណត់យក «មនុស្ស» ជាវិស័យអាទិភាពចម្បងបំផុតក្នុងចំណោមអាទិភាពទាំង៥។ ហេតុនេះ ការវិនិយោគលើសុខុមាលភាព សុវត្ថិភាព និងការអភិវឌ្ឍកុមារនៅថ្ងៃនេះ គឺជាការកសាងមូលដ្ឋានគ្រឹះដ៏រឹងមាំនៃមូលធនមនុស្សប្រកបដោយសក្តានុពល ដើម្បីជំរុញសន្ទុះការអភិវឌ្ឍកម្ពុជាឱ្យកាន់តែរីកចម្រើននិងរុងរឿងនាពេលអនាគត»។ សម្ដេចធិបតីបានបញ្ជាក់ថា រាជរដ្ឋាភិបាលកម្ពុជា បាននិងកំពុងអនុវត្តយ៉ាងសកម្មប្រកបដោយចក្ខុវិស័យវែងឆ្ងាយ ក្នុងការលើកកម្ពស់សិទ្ធិ និងឧត្តមប្រយោជន៍របស់កុមារដោយចាត់វិធានការអន្តរាគមន៍គ្រប់មធ្យោបាយទ្រទ្រង់សភាពការណ៍ស្ថិតក្នុងស្ថានការណ៍ដែលប្រទេសកម្ពុជា មានជម្លោះព្រំដែនជាមួយប្រទេសថៃ ដើម្បីធានាឱ្យកុមារក្រុមគ្រួសារ ប្រជាពលរដ្ឋភៀសសឹក ក៏ដូចជាសហគមន៍ទាំងមូលទទួលបាននូវគុណតម្លៃនៃការរស់នៅ ក្នុងសេរីភាព សេចក្តីថ្លៃថ្នូរ សមភាព និងសុវត្ថិភាពពេញលេញ។ សម្ដេចធិបតីបានបញ្ជាក់ថា លើសពីនេះទៀតរាជរដ្ឋាភិបាលតែងតែយកចិត្តទុកដាក់ខ្ពស់ក្នុងការផ្តល់ជំនួយមនុស្សធម៌ ការផ្តល់ជម្រកស្នាក់នៅបណ្តោះអាសន្ន ការសង្គ្រោះ បន្ទាន់ដល់កុមារ និងគ្រួសារភៀសសឹក ដើម្បីធានាឱ្យទារក កុមារតូច សិស្សានុសិស្ស ស្ត្រីមានផ្ទៃពោះ ជនចាស់ជរា ជនមានពិការភាព ទទួលបានសុវត្ថិភាព អាហារហូបចុក សេវាសុខភាព និងកុមារអាចបន្ត ការសិក្សារៀនសូត្រ ទោះស្ថិតក្នុងកាលៈទេសៈដ៏លំបាកនៃការភៀសសឹកក៏ដោយ៕

មន្ត្រីជាន់ខ្ពស់គណបក្សឃឺដអ៊ីរ៉ង់ Komala បាននិយាយថាអ៊ីរ៉ង់ បានបាញ់មីស៊ីលពីរគ្រាប់ទៅលើមូលដ្ឋានមួយកន្លែងដែលជាកម្មសិទ្ធិរបស់ក្រុមនេះនៅក្នុងតំបន់ក្រុមឃឺដ ក្នុងខេត្ត Erbil ប្រទេសអ៊ីរ៉ាក់ភាគខាងជើង។ មេដឹកនាំគណបក្ស Komala លោក Amjad Hussein Panahi បាននិយាយនៅក្នុងការបង្ហោះសារលើបណ្តាញសង្គម Facebook ថា ការវាយប្រហារនេះបានធ្លាក់លើទីស្នាក់ការកណ្តាលរបស់គណបក្សនៅក្នុងស្រុក Khalidan នៅពេលយប់។ លោកបាននិយាយថា ការវាយប្រហារ បានធ្វើឱ្យចំនួនសរុបនៃមីស៊ីល និងយានដ្រូនរបស់អ៊ីរ៉ង់ ដែលបានបាញ់ទៅលើទីតាំងរបស់ក្រុមនេះ ឡើងដល់ជាង៨០គ្រាប់។ គណបក្សសេរីភាពឃឺដ ជាគណបក្សឃឺដអ៊ីរ៉ង់មួយផ្សេងទៀតមានមូលដ្ឋាននៅក្នុងទីក្រុង Erbil បាននិយាយថា មីស៊ីលរបស់អ៊ីរ៉ង់ក៏បានវាយប្រហារមូលដ្ឋានមួយកន្លែងរបស់ខ្លួននៅជិតទីក្រុងនេះ ដោយអ្នកនាំពាក្យម្នាក់បាននិយាយថា គណបក្សបច្ចុប្បន្ន ត្រូវបានវាយប្រហារចន្លោះពី៥០ ទៅ៦០ លើក ចាប់តាំងពីសង្គ្រាមអាមេរិក-អ៊ីស្រាអែលលើអ៊ីរ៉ង់ បានចាប់ផ្តើម។

កម្លាំងជំនាញរបស់អគ្គស្នងការដ្ឋាននគរបាលជាតិ ដឹកនាំដោយ ឯកឧត្តម ឧត្តមសេនីយ៍ឯក អុី សុខឃី ឣគ្គស្នងការរងនគរបាលជាតិ​ និងមានការចូលរួមពីកម្លាំងគណៈបញ្ជាការឯកភាពខេត្ត ដឹកនាំដោយ លោក​ លៀម​ សូដា អភិបាលរងខេត្ត​ និងមានការចូលរួមពីកម្លាំងជំនាញ​ នៃស្នងការដ្ឋាននគរបាលខេត្ត​ ក្រោមការសម្របសម្រួលនីតិវិធីពី​ លោក សំរិទ្ធ សុខុន ព្រះរាជអាជ្ញារង​ កាលពីថ្ងៃទី៣១ ខែឧសភា ឆ្នាំ២០២៦ ចុះត្រួតពិនិត្យអគារស្នាក់នៅចំនួន០៣ ទីតាំង​ក្នុងភូមិសាស្រ្តក្រុងប៉ោយប៉ែត ពាក់ព័ន្ធករណីសង្ស័យរស់នៅប្រមូលផ្តុំ និងប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា បានរកឃើញនិងបង្រ្កាប​ ជនបរទេសនិងខ្មែរសុបចំនួន ១៥២នាក់​​​ នៅទីតាំងទី៣ដែលមានអគារ G99 ស្ថិតនៅភូមិប៉ោយប៉ែត សង្កាត់អូរជ្រៅ ក្រុងប៉ោយប៉ែត ខេត្តបន្ទាយមានជ័យនិងសម្ភារវត្ថុតាងសង្ស័យបម្រើអោយការប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (Online Scams)មួយចំនួន។បច្ចុប្បន្ន​ ជនបរទេសរួមទាំងជនជាតិខ្មែរនៅទីតាំងនោះ សរុបចំនួន ១៥២ នាក់ ស្រី៤៦នាក់​ (ខ្មែរចំនួន៨នាក់ ស្រី) ត្រូវបានបញ្ជូនទៅរក្សាទុកនៅមណ្ឌលកងវ៉ាដើម្បីបន្តនីតិវិធី៕

អង្គការសុខភាពពិភពលោកបាននិយាយកាលពីថ្ងៃអាទិត្យ ៣១ឧសភា ថា គិលានុបដ្ឋាកចំនួនបួននាក់ដែលកំពុងទទួលការព្យាបាលសម្រាប់ជំងឺអេបូឡាបណ្តាលមកពីវីរុសប្រភេទ Bundibugyo ត្រូវបានអនុញ្ញាតឱ្យចេញពីមន្ទីរពេទ្យមួយក្នុងទីក្រុង Bunia ក្នុងសាធារណរដ្ឋប្រជាធិបតេយ្យកុងហ្គោ បន្ទាប់ពីបានជាសះស្បើយពីជំងឺនេះ។ ការជាសះស្បើយបន្ថែមទៀតត្រូវបានគេរំពឹងទុក ជាពិសេសនៅពេលមនុស្សត្រូវបានគេធ្វើរោគវិនិច្ឆ័យទាន់ពេលវេលា និងអាចទទួលបានការថែទាំ និងខណៈការឆ្លើយតបកាន់តែខ្លាំងចំពោះការផ្ទុះឡើងនៃជំងឺនេះ ។ ទីភ្នាក់ងារនេះបាននិយាយថា បុគ្គលិកមន្ទីរពិសោធន៍ម្នាក់ក៏បានជាសះស្បើយកាលពីដើមសប្តាហ៍មុននេះផងដែរ ដោយធ្វើឱ្យចំនួនសរុបនៃមនុស្សដែលបានជាសះស្បើយពីវីរុសកើនឡើងដល់ប្រាំនាក់។ ទោះជាយ៉ាងណាក៏ដោយ ករណីសង្ស័យកំពុងត្រូវបានតាមដាននៅក្នុងប្រទេសប្រេស៊ីល និងអ៊ីតាលីដែលជាប់ទាក់ទងនឹងការធ្វើដំណើរទៅកាន់បណ្ដាប្រទេសដែលរងផលប៉ះពាល់។ ចំនួនករណីឆ្លងជំងឺអេបូឡាដែលបានបញ្ជាក់នៅក្នុងប្រទេសនេះបានកើនឡើងដល់២៨២នាក់ ដោយមានអ្នកស្លាប់ចំនួន ៤២ នាក់ បន្ទាប់ពីលទ្ធផលតេស្តវិជ្ជមានថ្មីចំនួន១៩ករណី ត្រូវបានកត់ត្រា នេះបើយោងតាមទិន្នន័យចេញផ្សាយដោយក្រសួងទំនាក់ទំនង។ កាលពីដើមខែនេះ អង្គការសុខភាពពិភពលោក (WHO) បានប្រកាសពីការផ្ទុះឡើងនៃជំងឺអេបូឡាបង្កឡើងដោយវីរុស Bundibugyo ដ៏កម្រនៅក្នុងសាធារណរដ្ឋប្រជាធិបតេយ្យកុងហ្គោ និងអ៊ូហ្គង់ដា ជាគ្រាអាសន្នសុខភាពសាធារណៈនៃកង្វល់អន្តរជាតិ ទោះបីជាវាមិនគ្រប់គ្រាន់តាមលក្ខណៈវិនិច្ឆ័យនៃភាពអាសន្ននៃជំងឺរាតត្បាតក៏ដោយ។ អំឡុងពេលចុះពិនិត្យស្ថានភាពនៅខេត្ត Ituri ភាគខាងកើតនៃប្រទេសកុងហ្គោ កាលពីថ្ងៃសៅរ៍ចុងសប្ដាហ៍មុនេះ លោក Tedros Adhanom Ghebreyesus ប្រមុខអង្គការ WHO បានកត់សម្គាល់ថា ទោះបីជាបច្ចុប្បន្នមិនទាន់មានវ៉ាក់សាំង ឬការព្យាបាលដែលមានអាជ្ញាប័ណ្ណសម្រាប់ជំងឺអេបូឡា បង្កឡើងដោយវីរុស Bundibugyo ក៏ដោយ វាមិនមែនគ្មានសង្ឃឹមទេ ព្រោះអ្នកជំងឺអាចរស់រានមានជីវិតបានជាមួយនឹងការថែទាំសុខភាពល្អ៕

បុគ្គលិកជួយសង្គ្រោះពីរនាក់បាននិយាយថា ការផ្ទុះគ្រាប់មីននៅភាគខាងជើងសហភាពមីយ៉ាន់ម៉ា បានសម្លាប់មនុស្សរាប់សិបនាក់កាលពីថ្ងៃអាទិត្យ ទី៣១ ខែឧសភា ដោយក្រុមឧទ្ទាមគ្រប់គ្រងតំបន់នោះបាននិយាយថា វាបណ្តាលមកពីការផ្ទុះគ្រាប់មីនដោយចៃដន្យ។ អ្នកឆ្លើយតបដំបូងម្នាក់ នៅក្នុងស្រុក Namhkam នៃរដ្ឋសាន ជាកន្លែងដែលការផ្ទុះបានកើតឡើង បាននិយាយថា មនុស្ស៤៦នាក់បានស្លាប់ រួមមានទាំងកុមារ៦នាក់ និងជាង៧០នាក់ផ្សេងទៀតបានរងរបួស។ អ្នកជួយសង្គ្រោះដែលបាននិយាយក្នុងលក្ខខណ្ឌអនាមិកដោយសារតែការព្រួយបារម្ភអំពីសន្តិសុខថា ការផ្ទុះដ៏ខ្លាំងនេះ បានបំផ្លាញលំនៅឋានជាច្រើនខ្នង ហើយអ្នករងរបួសច្រើននាក់ត្រូវបានបញ្ជូនទៅកាន់មន្ទីរពេទ្យក្នុងស្រុក។ លោកបាននិយាយបន្ថែមថា «អាចមានមនុស្សស្លាប់ច្រើនបន្ថែមទៀតនៅក្រោមលំនៅឋានដែលត្រូវបានបំផ្លាញរបស់ពួកគេ»។ អ្នកជួយសង្គ្រោះម្នាក់ទៀត បាននិយាយថា ចំនួនអ្នកស្លាប់មានចំនួនខ្ពស់ជាងនេះ ដល់៥៩នាក់ ហើយសាកសពត្រូវបានប្រមូលដោយបុគ្គលិកសង្គ្រោះបន្ទាន់ដើម្បីបូជា។ សហភាពមីយ៉ាន់ម៉ា ត្រូវបានញាំញីដោយសង្គ្រាមស៊ីវិល ចាប់តាំងពីយោធាដណ្តើមអំណាចក្នុងរដ្ឋប្រហារឆ្នាំ២០២១ ដោយកងកម្លាំងប្រដាប់អាវុធកំពុងប្រយុទ្ធប្រឆាំងនឹងក្រុមឧទ្ទាមគាំទ្រលទ្ធិប្រជាធិបតេយ្យ និងក្រុមប្រដាប់អាវុធជនជាតិភាគតិចដ៏មានឥទ្ធិពល។ កងទ័ពរំដោះជាតិតាអាង Ta'ang (TNLA) ជាក្រុមជនជាតិភាគតិចដ៏មានឥទ្ធិពលបំផុតមួយរបស់សហភាពនេះ បាននិយាយថា «ការផ្ទុះដោយចៃដន្យ» នៃគ្រឿងផ្ទុះដែលរក្សាទុកប្រើប្រាស់ដើម្បីបំផ្ទុះយករ៉ែ និងថ្ម បានផ្ទុះឡើងនៅម៉ោងប្រហែល ១២ ថ្ងៃត្រង់ ម៉ោងក្នុងស្រុក កាលពីថ្ងៃអាទិត្យ ក្នុងស្រុក Namhkam។

ប្រទេសទីម័រឡេស្តេ នៅថ្ងៃទី១ ខែមិថុនា ឆ្នាំ២០២៦នេះ បានដាក់ឱ្យប្រើប្រាស់ជាផ្លូវការនូវថ្នាលផ្ទៀងផ្ទាត់ឯកសារ verify.gov.tl ដែលជាប្រព័ន្ធផ្ទៀងផ្ទាត់ឯកសារឌីជីថលផ្អែកលើបច្ចេកវិទ្យា Blockchain ដំបូងបង្អស់របស់ប្រទេសនេះ និងជាសមិទ្ធផលថ្មីនៃកិច្ចសហប្រតិបត្តិការឌីជីថលរវាងកម្ពុជា និងទីម័រឡេស្តេ។ពិធីសម្ពោធនេះ ត្រូវបានរៀបចំឡើងនៅសាលពហុបំណង GMN ក្នុងទីក្រុងឌីលី ក្រោមអធិបតីភាពរបស់ឯកឧត្តម Miguel Marques Gonçalves Manetelu (មីហ្គើល ម៉ាកើស ហ្គនសែល ម៉ាណេថេ) រដ្ឋមន្ត្រីក្រសួងដឹកជញ្ជូន និងសារគមនាគមន៍ នៃសាធារណរដ្ឋប្រជាធិបតេយ្យទីម័រឡេស្តេ និងឯកឧត្តមបណ្ឌិត ជា វ៉ាន់ដេត រដ្ឋមន្ត្រីក្រសួងប្រៃសណីយ៍ និងទូរគមនាគមន៍ និងជាប្រធានគណៈកម្មាធិការរដ្ឋាភិបាលឌីជីថល នៃព្រះរាជាណាចក្រកម្ពុជា ព្រមទាំងមានការចូលរួមពីថ្នាក់ដឹកនាំ គណៈប្រតិភូជាតិ និងអន្តរជាតិជាង ៥០០នាក់។ថ្នាល verify.gov.tl ត្រូវបានអភិវឌ្ឍឡើងតាមរយៈកិច្ចសហប្រតិបត្តិការរវាងក្រសួងដឹកជញ្ជូន និងសារគមនាគមន៍របស់ទីម័រឡេស្តេ ក្រសួងប្រៃសណីយ៍ និងទូរគមនាគមន៍ និងគណៈកម្មាធិការរដ្ឋាភិបាលឌីជីថលនៃព្រះរាជាណាចក្រកម្ពុជា ក្រោមអនុស្សរណៈនៃការយោគយល់គ្នាដែលបានចុះហត្ថលេខាកាលពីខែមករា ឆ្នាំ២០២៥ ដើម្បីជំរុញការប្រើប្រាស់បច្ចេកវិទ្យាឌីជីថលក្នុងការលើកកម្ពស់សេវាសាធារណៈ និងការអភិវឌ្ឍសេដ្ឋកិច្ចឌីជីថល។ប្រព័ន្ធនេះ អនុញ្ញាតឱ្យមានការផ្ទៀងផ្ទាត់ឯកសារផ្លូវការបានយ៉ាងឆាប់រហ័ស និងមានសុវត្ថិភាពខ្ពស់ ដោយប្រើប្រាស់ QR Code និងបច្ចេកវិទ្យា Blockchain ដែលជួយការពារការក្លែងបន្លំ ការកែប្រែ និងការចម្លងឯកសារដោយខុសច្បាប់។ថ្នាល verify.gov.tl គឺជាភស្តុតាងបង្ហាញថា កិច្ចសហប្រតិបត្តិការឌីជីថលរវាងប្រទេសកំពុងអភិវឌ្ឍ អាចបង្កើតដំណោះស្រាយជាក់ស្តែងសម្រាប់ប្រជាពលរដ្ឋ និងរដ្ឋាភិបាល។ក្នុងដំណាក់កាលដំបូង ទីម័រឡេស្តេបានជ្រើសរើសយក បណ្ណបើកបរ ជាឯកសារទីមួយសម្រាប់ដាក់បញ្ចូល QR Code ដែលអាចផ្ទៀងផ្ទាត់បានតាមរយៈថ្នាល verify.gov.tl។ ការអនុវត្តនេះបានជួយកាត់បន្ថយចំណាយក្នុងការផលិតបណ្ណរឹង ពីប្រមាណ ៤ដុល្លារអាមេរិកក្នុងមួយបណ្ណ មកនៅត្រឹមប្រមាណ ១០សេនប៉ុណ្ណោះ។កម្ពុជា ក៏បានចែករំលែកបទពិសោធន៍ជោគជ័យនៃការប្រើប្រាស់ថ្នាល verify.gov.kh លើបណ្ណបើកបរ ដែលអនុញ្ញាតឱ្យប្រជាពលរដ្ឋបង្ហាញបណ្ណបើកបរឌីជីថល និងផ្ទៀងផ្ទាត់ភាពត្រឹមត្រូវបានក្នុងរយៈពេលតិចជាងមួយនាទី តាមរយៈកម្មវិធី DG SuperApp។នាពេលខាងមុខ ក្រុមការងារបច្ចេកទេសនៃប្រទេសទាំងពីរ នឹងបន្តពង្រីកការប្រើប្រាស់ថ្នាល verify.gov.tl ទៅលើឯកសារផ្លូវការផ្សេងៗទៀត រួមមានសញ្ញាបត្រអប់រំ និងឯកសារចុះបញ្ជីអត្រានុកូលដ្ឋាន ដើម្បីបង្កើនទំនុកចិត្ត និងប្រសិទ្ធភាពនៃសេវាសាធារណៈឌីជីថល។ថ្នាក់ដឹកនាំនៃប្រទេសទាំងពីរ បានចាត់ទុកការសម្ពោធ verify.gov.tl ថា ជាជំហានដ៏សំខាន់មួយក្នុងការជំរុញរដ្ឋាភិបាលឌីជីថល ការប្រយុទ្ធប្រឆាំងការក្លែងបន្លំឯកសារ និងការពង្រឹងកិច្ចសហប្រតិបត្តិការក្នុងវិស័យទូរគមនាគមន៍ បច្ចេកវិទ្យាព័ត៌មាន និងនវានុវត្តន៍ឌីជីថលរវាងកម្ពុជា និងទីម័រឡេស្តេ។ជាមួយនឹងការដាក់ឱ្យប្រើប្រាស់ថ្នាល verify.gov.tl ជាផ្លូវការ ទីម័រឡេស្តេកំពុងបោះជំហានថ្មីមួយឆ្ពោះទៅរកការកសាងរដ្ឋាភិបាលឌីជីថលប្រកបដោយសុវត្ថិភាព តម្លាភាព និងប្រសិទ្ធភាព ខណៈកម្ពុជា បន្តដើរតួនាទីជាដៃគូសំខាន់ក្នុងការចែករំលែកបទពិសោធន៍ និងបច្ចេកវិទ្យាឌីជីថលទៅកាន់តំបន់៕ អត្ថបទ៖ ស៊ូជីង

យោធាបាននិយាយកាលពីថ្ងៃអាទិត្យ ៣១ ខែឧសភា ថា កងទ័ពអ៊ីស្រាអែលបានដណ្តើមយកបន្ទាយបុរាណយុទ្ធសាស្ត្រមួយដែលស្ថិតនៅលើកំពូលភ្នំនៅភាគខាងត្បូងប្រទេសលីបង់ ក្នុងការឈ្លានពានដ៏ជ្រៅបំផុតចូលទៅក្នុងប្រទេសនេះក្នុងរយៈពេល២៦ឆ្នាំ។ ការដណ្តើមយកប្រាសាទ Beaufort នៅជិតទីក្រុង Nabatiyeh បានធ្វើឡើងបន្ទាប់ពីការវាយប្រហារតាមអាកាសជាច្រើនថ្ងៃ និងការប្រយុទ្ធគ្នាយ៉ាងខ្លាំងនៅក្នុងភូមិក្បែរៗនោះរវាងកងទ័ពអ៊ីស្រាអែល និងក្រុមសកម្មប្រយុទ្ធ ហេសបូឡា(Hezbollah)។ ការដណ្តើមយកនេះបានក្លាយជាការវាយរុលទៅមុខដ៏ខ្លាំងក្លារបស់អ៊ីស្រាអែលនៅក្នុងសង្គ្រាមអ៊ីស្រាអែល -ក្រុមហេសបូឡា ចុងក្រោយបង្អស់ ដែលបានចាប់ផ្តើមកាលពីថ្ងៃទី ២ ខែមីនា២០២៦ នៅពេលដែលក្រុមហេសបូឡា បានបាញ់រ៉ូកែតចូលទៅក្នុងភាគខាងជើងអ៊ីស្រាអែលពីរថ្ងៃបន្ទាប់ពីសហរដ្ឋអាមេរិក និងអ៊ីស្រាអែល បានវាយប្រហារខ្នងបង្អែកដ៏សំខាន់របស់ខ្លួនគឺ អ៊ីរ៉ង់។ ចាប់តាំងពីពេលនោះមក អ៊ីស្រាអែល បានបើកការឈ្លានពានដោយថ្មើរជើង ដោយដណ្តើមយកបានភូមិ និងទីប្រជុំជនលីបង់រាប់សិបកន្លែងនៅជិតព្រំដែន។ក្រុមហេសបូឡា បានបាញ់មីស៊ីល និងយានដ្រូនរាប់ពាន់គ្រាប់ទៅលើទាហានអ៊ីស្រាអែលនៅភាគខាងត្បូងប្រទេសលីបង់ និងភាគខាងជើងអ៊ីស្រាអែល។ ការវាយលុកកាន់តែខ្លាំងរបស់អ៊ីស្រាអែលបានកើតឡើងទោះបីជាមានបទឈប់បាញ់ដែលត្រូវបានអនុវត្តចាប់តាំងពីថ្ងៃទី ១៧ ខែមេសា និងប៉ុន្មានថ្ងៃមុនពេលលីបង់ និងអ៊ីស្រាអែលធ្វើកិច្ចចរចាជុំបន្ទាប់ដោយផ្ទាល់របស់ពួកគេនៅទីក្រុងវ៉ាស៊ីនតោន ដែលចាប់ផ្តើមនៅថ្ងៃអង្គារស្អែកនេះក៏ដោយ៕

នៅព្រឹកថ្ងៃអាទិត្យ ទី៣១ ខែឧសភា ឆ្នាំ២០២៦​ ឯកឧត្តម ឌី វិជ្ជា និងលោកជំទាវ ហ៊ុន ម៉ាណា បានអញ្ជើញនាំយកនូវទេយ្យវត្ថុ និងអំណោយដ៏ថ្លៃថ្លារបស់សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន,សម្ដេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ប្រគេនព្រះសង្ឃ១វត្តនិងចែកអំណោយប្រជាជន៦៥០គ្រួសារ ក្នុងនោះរួមមាន គ្រួសារយុទ្ធជននៅសមរភូមិជួរមុខ និងស្ត្រីមានផ្ទៃពោះផងដែរ។ ពិធីនេះប្រារព្ធឡើងនៅបរិវេនវត្តបាំងស្លឹក ស្ថិតក្នុងឃុំ​ជាំសង្កែ ស្រុកភ្នំស្រួច ខេត្តកំពង់ស្ពឺ។ ពិធីក៏បានរៀបចង្ហាន់ប្រគេនព្រះសង្ឃ និងរៀបចំអាហារថ្ងៃត្រង់សម្រាប់ប្រជាពលរដ្ឋដែលបានចូលរួមទាំង៦៥០គ្រួសារ។ ឯកឧត្តម ឌី វិជ្ជា និងលោកជំទាវ ហ៊ុន ម៉ាណាបានមានប្រសាន៍ផ្ដាំផ្ញើសួរសុខទុក្ខពីសំណាក់សម្ដេចតេជោ ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន,សម្ដេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដល់ព្រះសង្ឃគ្រប់ព្រះអង្គ និងពុទ្ធបរិស័ទ លោកយាយ លោកតា បងប្អូនប្រជាពលរដ្ឋទាំងអស់ និងបានឧទ្ទិសកុសលផលបុណ្យទាំងអស់ដែលបានធ្វើនៅថ្ងៃនេះ ទៅដល់វីរៈកងទ័ពកម្ពុជាដែលបានពលីជីវិតដើម្បីជាតិមាតុភូមិ និងបួងសួងសុំឲ្យប្រទេសជាតិជួបតែសេចក្តីសុខ សេចក្តីចម្រើន។ ក្នុងឱកាសនោះផងដែរ ឯកឧត្តម និងលោកជំទាវក៏បានចែកនូវកាតាបសិស្សដែលមាននូវសម្ភារៈសិក្សាជាច្រើនមុខ និងចំណីអាហារ ដល់សិស្សានុសិស្សចំនួន ៣៨៧នាក់,ក៏មានចែកវ៉ែនតាចំនួន៦១០វែនតា និងថ្នាំបន្តក់ភ្នែកចំនួន៧៨០ និងចែករទេះរុញសម្រាប់ជនពិការចំនួន០៣គ្រឿង។ទេយ្យវត្ថុសម្រាប់វត្តរួមមាន៖១-អង្ករ១តោន២-មី៣០កេសតូច៣-ត្រីងៀត១០គីឡូក្រាម៤-សាច់ក្រក១០គីឡូក្រាម៥-សាច់ផាត់១០គីឡូក្រាម៦-ទឹកដោះគោខាប់២កេស៧-កាហ្វេ៥កញ្ចប់ធំ៨-តែ២គីឡូក្រាម៩-ស្ករស១បេ១០-អំបិល១បេ១១-ទឹកត្រី៥យួរ១២-ទឹកស៊ីអ៊ីវ៥យួរ១៣-ទឹកម្ទេស៥យួរ១៤-ទឹកសៀង៥យួរ១៥-សាប៊ូដុំ១០០ដុំតូច១៦-ច្រាស និងថ្នាំដុសធ្មេញ១០០ឈុត១៧-ប្រេងកូឡា១០០ដប ១៨-ប្រេងខ្យល់១០០ដប១៩-ថ្នាំពេទ្យ២០ប្រអប់២០-ស្លាដក់៥២១-សាប៊ូម្ស៉ៅ១០កញ្ចប់២២-បច្ច័យ ២លានរៀលអំណោយសម្រាប់បងប្អូនប្រជាពលរដ្ឋ៦៥០គ្រួសារ ក្នុងមួយគ្រួសារៗទទួលបាន៖ ១-ថ្នាំពេទ្យ(៤មុខ) ១ប្រអប់២-ថ្នាំដុសធ្មេញ១ទីប ៣-ច្រាសដុសធ្មេញ ១៤-ប្រេងកូឡា ១ដបតូច ៥-ប្រងខ្យល់ ១ដបតូច៦-ធូបមួស ១ប្រអប់៧-ពិល ១៨-សាប៊ូដុសខ្លួន ១ដុំ៩-សាប៊ូកក់សក់ ១២កញ្ចប់១០-សាប៊ូបោកខោអាវ ១កញ្ចប់ ១១-សំឡីអនាម័យនារី១ដុំ ១២-ក្រមា១១៣-កន្សែង១១៤-សារុង១១៥-មុង១១៦-ភួយ១១៧-អង្រឹង១ ១៨-អាវភ្លៀង១១៩-កន្ទេល១២០-នំស្រួយលីលី១កញ្ចប់ធំ ២១-ទឹកដោះគោខាប់ ២កំប៉ុង ២២-ទឹកស៊ីអ៉ីវ១យួរ២៣-មី ១កេស ២៤-ត្រីខ ១យួរ ២៥-អង្ករ២៥គីឡូ (១បាវ)២៦-ធុងទឹកចំណុះ៣៥លីត្រ ១ ២៧-ថវិកា ៥០,០០០រៀល៕

នៅថ្ងៃអាទិត្យទី៣១ ខែឧសភា ឆ្នាំ២០២៦ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានអញ្ជើញចុះជួបបងប្អូនអាជីវករជាប្រជាពលរដ្ឋភៀសសឹក ដែលស្នាក់នៅផ្ទះបណ្តោះអាសន្នរបស់សមាគមអតីតយុទ្ធជន និងនិវត្តជនកម្ពុជា និងពិនិត្យទីតាំងរៀបចំផ្សារបណ្តោះអាសន្ន ស្ថិតក្នុងឃុំស្លក្រាម ស្រុកស្វាយចេក ខេត្តបន្ទាយមានជ័យ។ ក្រោមការយកចិត្តទុកដាក់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃព្រះរាជាណាចក្រកម្ពុជា និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ, ឯកឧត្តមកិត្តិសង្គហបណ្ឌិត គន់ គីម បានប្រកាសជូនប្រជាពលរដ្ឋភៀសសឹកពីការចាប់ផ្តើមធ្វើផ្សារបណ្តោះអាសន្នជូនប្រជាពលរដ្ឋភៀសសឹក ដើម្បីបងប្អូនមានទីតាំងលក់ដូរមានលក្ខណៈប្រមូលផ្តុំ ដែលនៅបរិវេណជិតផ្ទះបណ្តោះអាសន្នក្នុងភូមិសាស្រ្តខាងលើ។ ផ្សារបណ្តោះអាសន្ននេះ គឺជាផែនការសកម្មភាពដោះស្រាយជាជំហានៗរបស់រាជរដ្ឋាភិបាល ដើម្បីឲ្យអាជីវករជាប្រជាពលរដ្ឋភៀសសឹកទទួលបានទីតាំងលក់សមរម្យ មានសណ្តាប់ធ្នាប់ របៀបរៀបរយ និងអនាម័យ។បន្ទាប់ពីជួបអាជីវករប្រជាពលរដ្ឋភៀសសឹក, ឯកឧត្តមកិត្តិសង្គហបណ្ឌិត គន់ គីម បានអញ្ជើញជួបអាជីវករដែលបង្កើតមុខរបរ និងអាជីវកម្មតាមខ្នងផ្ទះបានដំណើរការប្រកបរបរទទួលទានជាបន្តបន្ទាប់ទៅតាមលទ្ធភាព ខណៈរាជរដ្ឋាភិបាលបានជួយដល់ជីវភាពប្រចាំថ្ងៃប្រជាពលរដ្ឋភៀសសឹកតាមរយៈការឧបត្ថម្ភគាំទ្រជាថវិកា៕

នៅបណ្ដាខេត្តស្ថិតក្នុងតំ​បន់ទំ​នាបកណ្ដាល​ចំនួន៣ រួម​មាន ខេត្តកំពង់​ចាម កំពង់​ឆ្នាំង និងខេត្ត​កំពង់ធំ មាន​​ឱកាសការងារជាង ៨,០០០កន្លែង សម្រាប់ផ្ដល់​ជូនអតីត​ពលករត្រឡប់​មកពីប្រទេ​សថៃ និងអ្នក​កំពុង​ស្វែងរកការងារធ្វើ។ នេះបើតាមឱ្យដឹ​ងពី​ក្រ​សួង​ការងារ និងបណ្ដុះ​បណ្ដាលវិ​ជ្ជាជីវៈដែ​លបានផ្សព្វ​ផ្សាយ​កាល​ពីពេល​ថ្មីៗនេះ។ តាមរយៈការផ្សព្វផ្សាយ ក្រសួងការងារ បានឱ្យដឹងថា គិតត្រឹមថ្ងៃទី៣០​ ខែឧសភា ឆ្នាំ២០២៦នេះ ខេត្តកំពង់ចាម កំពង់ឆ្នាំង និងខេត្តកំពង់​ធំមាន​ឱកាស​ការ​ងារ​សរុបចំនួន ៨,៣៥៧កន្លែង កំពុងរ​ង់ចាំបងប្អូនអតីតពលករត្រឡប់មកពីប្រទេសថៃ និងអ្នកកំពុងស្វែង​រកការងារធ្វើនៅ​ក្នុងវិស័យ​កសិ​កម្ម ឧស្សា​ហកម្ម និងវិស័យ​សេ​វា​កម្ម។ ដើម្បីទទួលបានឱកាស​ការងារ​ទាំងនោះ បងប្អូនអតី​តពលករត្រឡប់មកពី​ប្រទេសថៃ និងអ្នកកំពុងស្វែងរក​ការងារធ្វើ អាចស្វែងរកលេខទំនាក់ទំ​នង ឈ្មោះរោងចក្រ និងវិស័យដែលខ្លួនពេញចិត្តបានតាមរយៈខិត្ត​បណ្ណការងាររបស់ក្រសួងដែល​បានផ្សព្វផ្សា​យយ៉ាង​លម្អិត។ ជាមួយគ្នានេះ ក្រៅពីទំនាក់ទំនងផ្ទាល់​ជាមួយរោងចក្រ សហគ្រាស និងរោងចក្រផ្ទាល់ អ្នកស្វែងរកការងារទាំងអស់ ជាពិសេសបងប្អូនអតីត​ពលករ ក៏អាច​​ទាក់ទងមកប្រព័ន្ធទំនាក់ទំនង​បន្ទាន់ ១២៩៧ ដើម្បីឱ្យ​ក្រសួងការងា​រជួយសម្រ​បស​ម្រួល​ស្វែងរកកា​រងារជូ​នផងដែរ។ នេះបើតាម​ក្រសួង​កា​រ​ងារ​ដ​ដែល៕