ស្វាយរៀង ៖ លោក ឡឹក សំអុន មេឃុំថ្មី ស្រុកកំពង់រោទិ៍ ខេត្តស្វាយរៀង នៅថ្ងៃទី២៤ ខែមេសា ឆ្នាំ២០២៦នេះបានប្រាប់ទូរទស្សន៍ BTV ឱ្យដឹងថា កសិករដែលមានដីទំនាប ដីជាប់ប្រពន្ធ័សាស្ត្រ សម្រេចផលិតស្រូវប្រាំជំហ៊ាន២ បានប្រមាណ៣៥% នៃផ្ទៃដីបង្កបង្កើនផលស្រូវរដូវប្រាំងរបស់ឃុំប្រមាណជាង១ពាន់ហិចតា ។​លោកបានបញ្ជាក់បន្ថែមថា កក្តាដែលកសិករផលិតស្រូវប្រាំងឆ្នាំនេះ អូសបន្លាយពេលដោយប្រេងសាំង ថ្នាំពុលកសិកម្ម និងសម្ភារះផ្សេងៗមានតម្លៃខ្ពស់ ពេលផលិតស្រូវបានប្រឈមតម្លៃស្រូវថោក និងកង្វះទីផ្សារ ទើបកសិករលោកមានការរារែកក្នុងការផលិត ។តាមរបាយការណ៏របស់មន្ទីរកសិកម្មខេត្តដែល BTV ទទួលបាននៅរសៀលថ្ងៃនេះ ដោយគិតត្រឹមថ្ងៃទី២០ ខែមេសា ឆ្នាំ២០២៦នៅទូទាំងខេត្ត កសិករផលិតស្រូវរដូវប្រាំងវគ្គ២ បានចំនួន ២ម៉ឺន០ពាន់៨២១ហិចតា ស្មើនិង៨៦.៧៥% ស្រុកដែលធ្វើបានច្រើនជាងគេគឺស្រុកកំពង់រោទិ និងស្រុកស្វាយជ្រំ ឯស្រុក ក្រុងចំនួន៦ទៀតក្រុមកសិករបាននិងកំពុងបន្តធ្វើដោយលែងរង់ចាំប្រេងសាំង និងសម្ភារៈកសិកម្មចុះថោកដើម្បីផលិតសម្រាំងពូជបន្តធ្វើនៅឆ្នាំបន្ទាប់៕ ដោយ ៖ ភា សារិត

អភិបាលរដ្ឋ Georgia (ចចជៀ) លោក Brian Kemp បានប្រកាសអាសន្ន កាលពីថ្ងៃសុក្រ (ទី២៤ ខែមេសា ឆ្នាំ២០២៦) សម្រាប់តំបន់ចំនួន ៩១ នៅក្នុងរដ្ឋនេះ ជាកន្លែងដែលអាជ្ញាធរកំពុងប្រឹងប្រយុទ្ធជាមួយចំហេះព្រៃធំៗ ២ ដែលបានបណ្តាលឲ្យខូចខាតទ្រព្យសម្បត្តិច្រើនបំផុត ខណៈដែលផ្ទះសម្បែង និងអគារផ្សេងទៀតជាង ១២០ខ្នង ត្រូវបានបំផ្លាញដោយអណ្ដាតភ្លើង។ចំហេះព្រៃនៅតំបន់ Highway 82 និង Pineland Road ដែលការឆាបឆេះមួយបង្កឡើងដោយបាឡុងពិធីជប់លៀង និងមួយទៀតដោយអណ្ដាតភ្លើងរបស់ជាងផ្សារ គឺជាចំហេះព្រៃអាក្រក់បំផុតក្នុងចំណោមភ្លើងឆេះព្រៃរាប់សិបកន្លែង ដែលកំពុងបំផ្លាញតំបន់ជនបទរដ្ឋ Georgia ជាទីដែលរងគ្រោះដោយគ្រោះរាំងស្ងួត និងរដ្ឋជិតខាង ដូចជា Florida, South Carolina និង Alabama ជាដើម ក្នុងរយៈពេលប៉ុន្មានថ្ងៃថ្មីៗនេះ។មិនទាន់មានរបាយការណ៍ អំពីអ្នកស្លាប់ និងរបួសនៅឡើយទេ នៅក្នុងរដ្ឋ Georgia ដែលរងគ្រោះខ្លាំងជាងគេ។ ប៉ុន្តែបើយោងតាមរបាយការណ៍ប្រព័ន្ធផ្សព្វផ្សាយព័ត៌មានផ្សេងៗ បានឲ្យដឹងថា អ្នកពន្លត់អគ្គិភ័យស្ម័គ្រចិត្តម្នាក់ បានបាត់បង់ជីវិត កាលពីល្ងាចថ្ងៃទី២៣ ខែមេសា បន្ទាប់ពីមានបញ្ហាសុខភាពភ្លាមៗ ដែលមិនត្រូវបានបញ្ជាក់ ខណៈពេលកំពុងប្រយុទ្ធប្រឆាំងនឹងចំហេះព្រៃ នៅភាគខាងជើងរដ្ឋ Florida។គិតត្រឹមយប់ថ្ងៃទី២៤ ខែមេសា ចំហេះព្រៃ Highway 82 និង Pineland បានឆេះបំផ្លាញផ្ទៃដីរួមបញ្ចូលគ្នាជាង ១៦០.០០០ហិកតា ដោយបានដុតបំផ្លាញផ្ទះសម្បែង និងសំណង់ផ្សេងៗទៀតយ៉ាងហោចណាស់ ១២២ខ្នង។ នេះបើយោងតាមមន្ត្រីព្រៃឈើរដ្ឋ Georgia។អភិបាលរដ្ឋ បានប្រាប់សន្និសីទសារព័ត៌មានថា ចំនួននៃការបំផ្លិចបំផ្លាញនេះ បានក្លាយជាការខាតបង់ទ្រព្យសម្បត្តិដ៏ធំបំផុត ដោយសារព្រឹត្តិការណ៍ចំហេះព្រៃតែមួយ ក្នុងប្រវត្តិសាស្ត្ររបស់រដ្ឋ Georgia។ លោកបានបន្ថែមថា ផ្ទះជិត ១.០០០ខ្នងទៀត នៅតែរងការគំរាមកំហែង៕

ប្រទេសចិនបានលើកឡើងថា ខ្លួនកំពុងតាមដានយ៉ាងយកចិត្តទុកដាក់ដល់ផែនការនីតិបញ្ញត្តិរបស់សហរដ្ឋអាមេរិក បន្ទាប់ពីគណៈកម្មាធិការកិច្ចការបរទេសនៃសភាអាមេរិក បានជំរុញសេចក្តីព្រាងច្បាប់គ្រប់គ្រងការនាំចេញដែលផ្តោតលើបន្ទះឈីប ដែលទីក្រុងប៉េកាំង បានព្រមានថា អាចរំខានដល់ខ្សែច្រវាក់ផ្គត់ផ្គង់សកល ប្រសិនបើត្រូវបានអនុម័ត។ទីក្រុងប៉េកាំងបានពិពណ៌នាអំពីចំណាត់ការរបស់សមាជិកសភាអាមេរិកថា ជាការពង្រីកអត្ថន័យសន្តិសុខជាតិ ដើម្បីបង្ហាញអំពីភាពត្រឹមត្រូវនៃការទប់ស្កាត់ពាណិជ្ជកម្ម ហើយបានបញ្ជាក់ថា ការប្រើប្រាស់ការគ្រប់គ្រងការនាំចេញមិនត្រឹមត្រូវ នឹងធ្វើឲ្យខូចសណ្តាប់ធ្នាប់សេដ្ឋកិច្ចអន្តរជាតិ និងប៉ះពាល់ដល់ឧស្សាហកម្មបន្ទះឈីបសកល។ នេះបើយោងតាមសេចក្តីថ្លែងការណ៍ពីក្រសួងពាណិជ្ជកម្ម នៅថ្ងៃសៅរ៍ (ទី២៥ ខែមេសា ឆ្នាំ២០២៦) នេះ។ប្រទេសចិនបានសង្កត់ធ្ងន់ថា ខ្លួននឹងវាយតម្លៃដោយប្រុងប្រយ័ត្ន អំពីផលប៉ះពាល់លើផលប្រយោជន៍ជាតិរបស់ខ្លួន ប្រសិនបើសេចក្តីព្រាងច្បាប់ត្រូវបានអនុម័ត ហើយបានប្ដេជ្ញាថា នឹងចាត់វិធានការចាំបាច់ ដើម្បីការពារសិទ្ធិស្របច្បាប់របស់ក្រុមហ៊ុនក្នុងស្រុក តែមិនបានរៀបរាប់លម្អិត អំពីវិធានការតបតដែលអាចកើតមាននោះឡើយ។គួរបញ្ជាក់ថា គណៈកម្មាធិការកិច្ចការបរទេសនៃសភាអាមេរិក បានជំរុញសេចក្តីព្រាងច្បាប់គ្រប់គ្រងការនាំចេញរបស់គណបក្សទាំង២ កាលពីថ្ងៃទី២២ ខែមេសា ដោយបញ្ជាក់ពីការមានបំណងកាន់តែខ្លាំងឡើងនៅក្នុងសភា ក្នុងការពង្រឹងការរឹតត្បិត លើបញ្ញាសិប្បនិម្មិត និងបច្ចេកវិទ្យាបន្ទះឈីបដែលមានលំហូរទៅកាន់ប្រទេសចិន ទោះបីជារដ្ឋបាលរបស់លោកប្រធានធិបតី Donald Trump រហូតមកដល់ពេលនេះ បានចៀសវាងការដាក់កម្រិតសំខាន់ថ្មីក៏ដោយ៕

ប្រធានាធិបតីអាមេរិក លោក Donald Trump បានប្រាប់សារព័ត៌មាន Reuters កាលពីថ្ងៃសុក្រ (ទី២៤ ខែមេសា ឆ្នាំ២០២៦) ថា ប្រទេសអ៊ីរ៉ង់គ្រោងផ្ដល់ការស្នើដែលមានគោលបំណងបំពេញតាមការទាមទាររបស់សហរដ្ឋអាមេរិក ខណៈដែលការចរចារវាងភាគីទាំង២ ត្រូវបានគេរំពឹងថា នឹងចាប់ផ្ដើមមានឡើងវិញ នៅប៉ាគីស្ថាន។ក្នុងអំឡុងពេលផ្ដល់សម្ភាសន៍តាមទូរស័ព្ទ លោក Trump បាននិយាយថា «ពួកគេកំពុងផ្ដល់ការស្នើរបស់ពួកគេ ហើយយើងនឹងត្រូវរង់ចាំមើល»។ តែយ៉ាងណាក្ដី លោកបានបញ្ជាក់ថា លោកមិនទាន់ដឹងថា តើការស្នើនោះជាអ្វីនៅឡើយទេ។នៅពេលត្រូវបានសួរថា តើអ្នកណាដែលសហរដ្ឋអាមេរិកកំពុងចរចាជាមួយនោះ លោក Trump បានឆ្លើយថា៖ «ខ្ញុំមិនចង់និយាយរឿងនោះទេ ប៉ុន្តែឥឡូវនេះ យើងកំពុងដោះស្រាយជាមួយបុគ្គលដែលទទួលខុសត្រូវ»។លោក Trump មានគម្រោងបញ្ជូនបេសកជនពិសេស លោក Steve Witkoff និងលោក Jared Kushner ទៅពិភាក្សាជាមួយលោក Abbas Araghchi នៅទីក្រុងអ៊ីស្លាម៉ាបាដ ហើយអ្នកទាំង២ នឹងចេញដំណើរនៅព្រឹកថ្ងៃសៅរ៍ (ទី២៥ ខែមេសា ឆ្នាំ២០២៦) នេះ។ នេះបើយោងតាមអ្នកនាំពាក្យសេតវិមាន លោកស្រី Karoline Leavitt ដែលបានប្រាប់អ្នកសារព័ត៌មានកាលពីថ្ងៃសុក្រ។គួរបញ្ជាក់ថា សារព័ត៌មាន Reuters បានរាយការណ៍មុននេះថា រដ្ឋមន្ត្រីការបរទេសអ៊ីរ៉ង់ លោក Araghchi ត្រូវបានគេរំពឹងថា នឹងស្ថិតនៅក្នុងរដ្ឋធានីអ៊ីស្លាម៉ាបាដរបស់ប៉ាគីស្ថាន នៅថ្ងៃសុក្រ ដើម្បីពិភាក្សាអំពីសំណើ សម្រាប់ការចាប់ផ្តើមការចរចាសន្តិភាពឡើងវិញជាមួយសហរដ្ឋអាមេរិក៕

កំពង់ចាម ៖ នៅព្រឹកថ្ងៃសៅរ៍ ទី២៥ ខែមេសា ឆ្នាំ២០២៦ សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទីនៃព្រះរាជាណាចក្រកម្ពុជា បានអញ្ជើញជួបសំណេះសំណាលជាមួយក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរ អង្គភាពនានាជុំវិញខេត្តកំពង់ចាម សរុបចំនួន១,១៩៣នាក់ ដែលពិធីនេះបានប្រារព្ធធ្វើឡើងសាលាខេត្តកំពង់ចាម។ យោងតាមឯកឧត្តម ជា ធីរិទ្ធ អ្នកនាំពាក្យសម្ដេចតេជោ អ្វីដែលជាគោលដៅនៃការចុះជួបសំណេះសំណាលនេះ គឺជាការអនុវត្ត ក៏ដូចជាពង្រឹងគណនេយ្យភាពរវាងព្រឹទ្ធសភា ជាមួយអង្គបោះឆ្នោត ដើម្បីឱ្យមានតម្លាភាព ក៏ដូចជាជំរុញឱ្យការងារមូលដ្ឋានកាន់តែមានប្រសិទ្ធភាព។ ការចុះជួបសំណេះសំណាលរបស់សម្ដេចតេជោនៅពេលនេះ ក៏ដើម្បីផ្សារភ្ជាប់ទំនាក់ទំនងឱ្យកាន់តែជិតស្និទ្ធជាមួយអាជ្ញាធរមូលដ្ឋាន និងធ្វើការក្រើនរំឭក និងជំរុញដល់មន្ត្រីនៅមូលដ្ឋាន ឱ្យបង្កើនការយកចិត្តទុកដាក់លើភារកិច្ចជាដែនសមត្ថកិច្ចរបស់ខ្លួន ទន្ទឹមនឹងការផ្តល់សេវាសាធារណៈជូនប្រជាពលរដ្ឋ ឱ្យបានល្អប្រសើរ និងការដោះស្រាយបញ្ហានានា ដែលជាក្តីកង្វល់របស់ប្រជាពលរដ្ឋនៅមូលដ្ឋានឱ្យមានប្រសិទ្ធភាព និងទាន់ពេលវេលា។នាឱកាសនោះ សម្តេចតេជោហ៊ុន សែន បានបង្ហាញនូវក្តីរីករាយ ដែលបានវិលមកជួបជាមួយបងប្អូនក្រុមប្រឹក្សាខេត្ត ក្រុង ស្រុក ឃុំ សង្កាត់ និងថ្នាក់ដឹកនាំមន្ទីរអង្គភាពនានា ក្នុងខេត្តកំពង់ចាមនេះសាជាថ្មី។ សម្តេចតេជោបានកោតសរសើរ និងវាយតម្លៃខ្ពស់ចំពោះមន្ត្រីរាជការ នៅខេត្តកំពង់ចាមទាំងអស់ ដែលបានខិតខំបំពេញការងារបម្រើសេវាសាធារណៈជូនដល់ប្រជាពលរដ្ឋនៅពេលកន្លងមក ជាពិសេសការរួមគ្នារក្សាឱ្យបាននូវសន្តិសុខសណ្តាប់ធ្នាប់ និងរបៀបរៀបរយក្នុងសង្គម ទប់ស្កាត់បាននូវទង្វើបង្កចលាចលនានាក្នុងសង្គម។សម្តេចតេជោក៏បានក្រើនរំឭកដល់មន្ត្រីរាជការទាំងអស់ ជាពិសេសក្រុមប្រឹក្សាឃុំ សង្កាត់ ឱ្យបន្តយកចិត្តទុកដាក់បំពេញតួនាទីភារកិច្ចបម្រើជាតិ និងប្រជាជនឱ្យបានល្អប្រសើរ ជាពិសេសបន្តយកចិត្តទុកដាក់ផ្តល់នូវសេវាចាំបាច់នានាជូនប្រជាពលរដ្ឋឱ្យបានលឿន រហ័ស ចៀសវាងបង្កនូវបញ្ហានានាដែលនាំឱ្យមានការថ្នាំងថ្នាក់ដល់ទឹកចិត្តរបស់ប្រជាពលរដ្ឋ។ សម្តេចតេជោបានរំឭកដល់មន្រ្តីទាំងអស់ត្រូវបន្តរក្សានូវស្ថិរភាពជាតិ និងយកចិត្តទុកដាក់រក្សាសន្តិសុខសណ្ដាប់ធ្នាប់សង្គម ដោយបន្តអនុវត្តគោលនយោបាយភូមិ ឃុំ មានសុវត្ថិភាព រួមមាន ការបង្ក្រាបនូវបទល្មើសផ្សេងៗ ដូចជា ចោរឆក់ ចោរប្លន់ ការជួញដូរគ្រឿងញៀន ជាពិសេសបង្ក្រាបឱ្យបាននូវអំពើឆបោកតាមអនឡាញ(Scam Online)។សម្ដេចតេជោក៏បានមានប្រសាសន៍គាំទ្រដល់ការប្រមូលប្រាក់ចំណូលទាំងផ្នែកពន្ធគយ រួមទាំងទប់ស្កាត់ការរកស៊ីមិនបង់ពន្ធ ឬ រត់គេចពន្ធជាដើម។ ទន្ទឹមនេះ សម្ដេចតេជោក៏ឱ្យអាជ្ញាធរត្រូវយកចិត្តទុកដាក់ដោះស្រាយជម្លោះដីធ្លីជូនប្រជាពលរដ្ឋឱ្យបានរហ័ស និងមានប្រសិទ្ធភាព ជាពិសេសការដោះស្រាយក្រៅប្រព័ន្ធតុលាការ ដោយមិនត្រូវលំអៀងខាងភាគីណានោះទេ គឺត្រូវឈរនៅកណ្ដាលជានិច្ច។ សម្តេចក៏បានណែនាំឱ្យខិតខំ គ្រប់គ្រងម៉ាក្រូសេដ្ឋកិច្ចជាពិសេសខណៈដែលប្រេងឥន្ធនៈឡើងថ្លៃ ត្រូវចេះសន្សំសំចៃលើការចំណាយដែលមិនចាំបាច់នានា។ សម្តេចតេជោក៏បានណែនាំឱ្យបន្តយកចិត្តទុកដាក់ចំពោះបងប្អូនអតីតយុទ្ធជន និងនិវត្តន៍ជនដែលមានក្នុងមូលដ្ឋានតាមរយៈការជួយយកអាសារគាត់ និងការចុះជួបសំណេះសំណាលពួកគាត់រយៈកម្មវិធីផ្សេងៗជាដើម។ សម្ដេចតេជោក៏បានជំរុញឱ្យអាជ្ញាធរមូលដ្ឋានត្រូវចូលរួមទាំងអស់គ្នាក្នុងការថែរក្សាធនធានធម្មជាតិដែលមាននៅមូលដ្ឋាន ទប់ស្កាត់ការបំភ្លេចបំផ្លាញ និងរួមគ្នាក្នុងការថែរក្សាឱ្យបានគង់វង្ស។ សម្ដេចតេជោក៏បានក្រើនរំឭកដល់មន្ត្រីទាំងអស់ ចៀសវាងភាពអសកម្ម ឬការគៀបសង្កត់ណាមួយ និងត្រូវចាំថា«មន្ត្រីមិនមែនជាចៅហ្វាយរបស់ប្រជាជននោះទេ គឺជាអ្នកបម្រើដ៏ស្មោះត្រង់របស់ប្រជាជន» ម្យ៉ាងវិញទៀតចៀសវាងប្ដីស័ក្តិ៣ ប្រពន្ធស័ក្តិ៤ កូនស័ក្តិ៥ ដែលធ្វើឱ្យមានបញ្ហាក្នុងមូលដ្ឋាន។នាឱកាសនេះផងដែរ សម្តេចតេជោ ហ៊ុន សែន ក៏បានកោតសរសើរដល់មន្ត្រីគ្រប់ជាន់ថ្នាក់ នៃខេត្តកំពង់ចាម ទាំងអស់ដែលបានរួមសហការគ្នាអភិវឌ្ឍខេត្តមួយនេះឱ្យទទួលបាននូវការរីកចម្រើនជាបន្តបន្ទាប់៕

យោធាអាមេរិក កាលពីថ្ងៃសុក្រ (ទី២៤ ខែមេសា ឆ្នាំ២០២៦) បានប្រាប់ឲ្យដឹងថា ខ្លួនបានវាយប្រហារនាវា ១គ្រឿង នៅភាគខាងកើតមហាសមុទ្រប៉ាស៊ីហ្វិក ដោយសម្លាប់មនុស្ស ២នាក់ ដែលនេះគឺជាការវាយប្រហារចុងក្រោយបំផុត ជាអ្វីដែលត្រូវបានថ្កោលទោសដោយក្រុមសិទ្ធិមនុស្សថា ជា «ការសម្លាប់ក្រៅប្រព័ន្ធតុលាការ» និងត្រូវបានពិពណ៌នាដោយទីក្រុងវ៉ាស៊ីនតោនថា ជាការផ្តោតលើ «ភេរវករគ្រឿងញៀន»។ទីបញ្ជាការភាគខាងត្បូងសហរដ្ឋអាមេរិក បានចោទប្រកាន់ថា នាវាដែលវាយប្រហារនៅថ្ងៃសុក្រនោះ ត្រូវបានដំណើរការដោយ «ក្រុមដែលត្រូវបានចាត់ទុកជាអង្គការភេរវករ» តែមិនបានបង្ហាញអត្តសញ្ញាណឡើយ។ ទីបញ្ជាការនេះបានបន្ថែមថា គ្មានកងកម្លាំងយោធាអាមេរិកណាម្នាក់រងរបួសនោះទេ ខណៈបានពិពណ៌នាអំពីអ្នកដែលត្រូវបានសម្លាប់ថា ជា «ភេរវករគ្រឿងញៀនជាបុរស» ដោយមិនផ្តល់ព័ត៌មានលម្អិតបន្ថែមឡើយ។ទីបញ្ជាការភាគខាងត្បូងសហរដ្ឋអាមេរិក បានឲ្យដឹងនៅលើបណ្ដាញ X ថា៖ «ព័ត៌មានស៊ើបការណ៍សម្ងាត់ បានបញ្ជាក់ថា នាវាកំពុងធ្វើដំណើរតាមផ្លូវដែលគេថា ជាផ្លូវជួញដូរគ្រឿងញៀន នៅភាគខាងកើតមហាសមុទ្រប៉ាស៊ីហ្វិក ហើយបានពាក់ព័ន្ធនឹងប្រតិបត្តិការជួញដូរគ្រឿងញៀន»។វីដេអូឃ្លីបរយៈពេល ១៦វិនាទីដែលបញ្ចេញដោយទីបញ្ជាការភាគខាងត្បូង បានបង្ហាញពីនាវា ១គ្រឿង កំពុងត្រូវបានវាយប្រហារនៅក្នុងដែនទឹកនោះ។ យោធាអាមេរិកបានធ្វើការវាយប្រហារបែបនេះជាច្រើនលើក នៅភាគខាងកើតមហាសមុទ្រប៉ាស៊ីហ្វិក ក្នុងរយៈពេលប៉ុន្មានសប្តាហ៍ថ្មីៗនេះ៕

ប្រជាជនប៉ាឡេស្ទីន នៅតំបន់ West Bank និងភាគកណ្តាលនៃតំបន់ហ្កាហ្សា ប្រើប្រាស់សិទ្ធិរបស់ខ្លួន នៅថ្ងៃសៅរ៍ (ទី២៥ ខែមេសា ឆ្នាំ២០២៦) នេះ សម្រាប់ការបោះឆ្នោតក្រុង ដែលនេះជាដំណើរការបែបនេះលើកដំបូង ចាប់តាំងពីមានសង្គ្រាមហ្កាហ្សា ដោយព្រឹត្តិការណ៍នេះត្រូវបានសម្គាល់ដោយការមានក្រុមនយោបាយតិចតួច និងការខកចិត្តគ្រប់ទិសទី នៅដែនដីនេះ។បើយោងតាមគណៈកម្មការរៀបចំការបោះឆ្នោតកណ្តាលដែលមានមូលដ្ឋាននៅទីក្រុង Ramallah បានឲ្យដឹងថា មនុស្សជិត ១,៥លាននាក់ បានចុះឈ្មោះបោះឆ្នោតនៅក្នុងតំបន់ West Bank ដែលត្រូវបានកាន់កាប់ដោយអ៊ីស្រាអែល ព្រមទាំង ៧០.០០០នាក់ នៅក្នុងតំបន់ Deir al-Balah នៃតំបន់ហ្កាហ្សា។បញ្ជីឈ្មោះបោះឆ្នោតភាគច្រើន ត្រូវបានផ្សារភ្ជាប់ជាមួយគណបក្សជាតិនិយមមិនពាក់ព័ន្ធសាសនា Fatah របស់មេដឹកនាំ លោក Mahmud Abbas ឬក្រុមអ្នកឈរឈ្មោះជាបេក្ខជនឯករាជ្យ។ មិនមានបញ្ជីឈ្មោះដែលមានទំនាក់ទំនងជាមួយក្រុមហាម៉ាសនោះឡើយ ជាគូប្រជែងសំខាន់របស់កណបក្ស Fatah ដែលគ្រប់គ្រងស្ទើរតែពាក់កណ្តាលនៃតំបន់ហ្កាហ្សា។នៅក្នុងទីក្រុងភាគច្រើន បេក្ខជនដែលគាំទ្រដោយគណបក្ស Fatah នឹងប្រកួតប្រជែងជាមួយបញ្ជីឈ្មោះឯករាជ្យដែលដឹកនាំដោយបេក្ខជនមកពីក្រុមនានា ដូចជារណសិរ្សប្រជាជន ដើម្បីរំដោះប៉ាឡេស្ទីន (ម៉ាក្សនិយម-លេនីននិយម) ជាដើម។គណៈកម្មការរៀបចំការបោះឆ្នោត បានប្រាប់សារព័ត៌មាន AFP ថា ស្ថានីយបោះឆ្នោត នៅតំបន់ West Bank នឹងបើកពីម៉ោង ៧:០០ព្រឹក ម៉ោងក្នុងស្រុក (ត្រូវនឹង ៤:០០ ម៉ោងសកល) ដល់ម៉ោង ៧:០០ល្ងាច ខណៈពេលដែលនៅទីក្រុង Deir al-Balah របស់តំបន់ហ្កាហ្សាស្ទ្រីប ការិយាល័យបោះឆ្នោតនឹងបិទនៅម៉ោង ៥:០០ល្ងាច ដើម្បីសម្រួលដល់ការរាប់ នៅពេលថ្ងៃ ដោយសារតែកង្វះខាតអគ្គិសនី នៅក្នុងតំបន់ដែលត្រូវបានបំផ្លិចបំផ្លាញដោយសង្គ្រាម។គួរបញ្ជាក់ថា តំបន់ហ្កាហ្សា ដែលស្ថិតនៅក្រោមការគ្រប់គ្រងរបស់ក្រុមហាម៉ាស ចាប់តាំងពីឆ្នាំ២០០៧ មក នឹងឃើញដំណើរការបោះឆ្នោតជាលើកដំបូង ចាប់តាំងពីការបោះឆ្នោតនីតិបញ្ញត្តិឆ្នាំ២០០៦ ជាពេលដែលចលនាសកម្មប្រយុទ្ធមួយនេះបានទទួលជ័យជម្នះ៕

ភ្នំពេញ ៖ កម្លាំងគណៈបញ្ជាការឯកភាពរាជធានីភ្នំពេញ បានបន្តប្រតិបត្តិការឆ្មក់ចុះបង្ក្រាបទីតាំងឆបោកតាមប្រព័ន្ធអនឡាញ Online Scams នៅក្នុងអាគារខុនដូរប៉ោលី (BAOLI INTER CITY) ស្ថិតក្នុងភូមិ៣ សង្កាត់វាលវង់ ខណ្ឌ៧មករា កាលពីវេលាយប់ថ្ងៃទី២៤ ខែមេសា ឆ្នាំ២០២៦ ។ ប្រតិបត្តិការនេះ ធ្វើឡើងក្រោមការដឹកនាំបញ្ជាផ្ទាល់ដោយឯកឧត្តម ឃួង ស្រេង ប្រធានគណៈបញ្ជាការឯកភាពរាជធានីភ្នំពេញ និងលោកឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ និងក្រោមការសម្របសម្រួលនីតិវិធីច្បាប់ដោយលោកសេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ ផងដែរ ។ ជាលទ្ធផល នៃប្រតិបត្តិការ កម្លាំងអាជ្ញាធរចម្រុះ បានឃាត់ខ្លួនជនបរទេស៤០នាក់ ដោយបែងចែងជា០៣ផ្នែកពាក់ព័ន្ធ ក្នុងនោះរួមមាន ៖ ១. ជាប់ពាក់ព័ន្ធករណី ឆបោកតាមប្រព័ន្ធបច្ចេកវិទ្យា (ONLINE SCAMS) ក្រោមរូបភាពឆបោកអូសទាញឱ្យជនរងគ្រោះដាក់ប្រាក់វិនិយោគ រកឃើញ ៖ ជនបរទេសសរុបចំនួន២២នាក់ មាន០២សញ្ជាតិ ក្នុងនោះ ជនជាតិចិន ២០នាក់ (ប្រុស) និងជនជាតិរុស្ស៊ីចំនួន ០២នាក់ (ស្រី ០១នាក់) ។ សម្ភារៈវត្ថុតាងដែលបានដកហូតរួមមានដូចខាងក្រោម៖ ទូរស័ព្ទដៃ ចំនួន៥០៦គ្រឿង , កុំព្យូទ័រលើតុ (ALL IN ONE) ចំនួន២០ គ្រឿង , ធុង CPU ចំនួន១៨គ្រឿង , អេក្រង់ (MONITOR) ចំនួន១៥គ្រឿង , កុំព្យូទ័រយួរដៃ (LAPTOP) ចំនួន ០២ គ្រឿង។បានបន្តឆែកឆេរបន្ទប់លេខ ៣២០៦A ជាន់ទី៣២ (ឃ្លាំង) ដកហូតបានទូរស័ព្ទដៃចំនួន១២២គ្រឿង , កុំព្យូទ័រលើតុ (ALL IN ONE) ចំនួន១៥ គ្រឿង , ធុង CPU ចំនួន១២គ្រឿង , អេក្រង់ (MONITOR) ចំនួន ២០ គ្រឿង។២. ឃាត់ជនជាតិបង់ក្លាដេស១២នាក់ ជាប់ពាក់ព័ន្ធករណីឆបោក Online Scams ក្រោមរូបភាពប្រើប្រាស់រូបថតនារីស្អាតៗ បោកប្រាស់លេងល្បែងលើវេបសាយក្លែងក្លាយ ដោយបានដកហូតសម្ភារៈ រួមមាន ៖ទូរស័ព្ទដៃ ចំនួន០២គ្រឿង , កុំព្យូទ័រយួរដៃ (LAPTOP) ចំនួន០៥គ្រឿង។៣. រកឃើញជនបរទេស០៦នាក់ (ស្រី ០៣នាក់) ក្នុងនោះមាន ជនជាតិថៃ០២នាក់ (ស្រី), ជនជាតិមីយ៉ាន់ម៉ា០១នាក់ (ប្រុស), ជនជាតិវៀតណាម ០១នាក់ (ស្រី) និងជនជាតិចិន ០២នាក់ ជាប់ពាក់ព័ន្ធនឹងគ្មានលិខិតឆ្លងដែន ។ បច្ចុប្បន្ន ជនសង្ស័យទាំង៤០នាក់ ត្រូវបញ្ចូនខ្លួនទៅកាន់ស្នងការដ្ឋាននគរបាលរាជធានីភ្នំពេញ ដើម្បីចាត់វិធានការទៅតាមផ្លូវច្បាប់ ៕ លីហេង

 ចំហេះព្រៃនៅភាគខាងជើងប្រទេសជប៉ុន បានបន្តរាលដាល ដោយអណ្តាតភ្លើងបានឆាបឆេះខិតទៅជិតតំបន់លំនៅឋាននៅថ្ងៃសៅរ៍ ទី ២៥ ខែមេសានេះ។យោងតាមអង្គភាពពន្លត់អគ្គិភ័យក្នុងស្រុកបានឲ្យដឹងថា ចំហេះព្រៃបានជំរុញឱ្យអាជ្ញាធរពង្រីកបទបញ្ជាជម្លៀសប្រជាជនជាង ៣.០០០ នាក់។ក្រុមពន្លត់អគ្គិភ័យមកពីខាងក្រៅតំបន់ត្រូវបាននាំទៅកាន់តំបន់នោះ ដែលធ្វើឱ្យចំនួនបុគ្គលិកដែលកំពុងប្រយុទ្ធទប់ស្កាត់ចំហេះព្រៃនៅលើដីកើនឡើងដល់ប្រហែល ១.០០០ នាក់។ ទោះជាយ៉ាងណា អណ្តាភ្លើងនៅតែមិនទាន់អាចទប់ស្កាត់បាននៅឡើយ ខណៈស្ថិតនៅក្នុងស្ថានភាពក្តៅស្ងួត។ ប៉ុន្តែពុំមានរបាយការណ៍អំពីអ្នកស្លាប់ និងរបួសត្រូវបានរាយការណ៍នោះទេ ក្រៅពីអគារចំនួនប្រាំបីកន្លែង រួមទាំងលំនៅឋានមួយខ្នងត្រូវបានបំផ្លាញ នេះបើយោងតាមការចេញផ្សាយរបស់ប្រព័ន្ធផ្សព្វផ្សាយរដ្ឋ NHK។

សៀមរាប ៖ មន្ត្រីជាន់ខ្ពស់ក្រសួងមហាផ្ទៃ នៅក្នុងកិច្ចប្រជុំផ្សព្វផ្សាយផែនការ ស្តីពីការបន្តនិរន្តរភាពយុទ្ធនាការបោសសម្អាតការឆបោកតាម Online Scams នៅ នារសៀលថ្ងៃទី២៣ ខែមេសា ឆ្នាំ២០២៦ នៅខេត្តសៀមរាប បានជំរុញឱ្យមានការបង្ក្រាប និងទប់ស្កាត់បទល្មើសតាមប្រព័ន្ធបច្ចេកវិទ្យា ដើម្បីសុវត្ថិភាពសាធារណៈ។នាយឧត្តមសេនីយ៍ សួស អង្គារ៍ រដ្ឋលេខាធិការក្រសួងមហាផ្ទៃ ក៏បានមានប្រសាសន៍ជំរុញដល់គណៈបញ្ជាការឯកភាពរដ្ឋបាលក្រុង ស្រុក និង កងកម្លាំងទាំងបី បន្តអនុវត្តឲ្យបានផុលផុសថែមទៀត ទៅតាមច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា ដែលរាជរដ្ឋាភិបាលបានប្រកាសដាក់ឲ្យប្រើប្រាស់ កាលពីថ្ងៃទី៦ ខែមេសា ឆ្នាំ២០២៦កន្លងទៅថ្មីៗនេះ ឲ្យមានប្រសិទ្ធភាពខ្ពស់។នាយឧត្ដមសេនីយ៍ បានផ្តាំផ្ញើដល់ក្រុមការងារទាំងអស់ ត្រូវទទួលខុសត្រូវ និងត្រួតពិនិត្យទីតាំងសង្ស័យ តាមសណ្ឋាគារ ផ្ទះសំណាក់ ឬទីតាំងផ្សេងៗទៀត ក្នុងដែនសមត្ថកិច្ចទទួលខុសត្រូវរបស់ខ្លួន។នាយឧត្តមសេនីយ៍ បានបញ្ជាក់ថា ការឆបោកតាមប្រព័ន្ធអនឡាញ កំពុងក្លាយជាបញ្ហាសង្គមធ្ងន់ធ្ងរ ដែលប៉ះពាល់ដល់សន្តិសុខ សណ្តាប់ធ្នាប់សាធារណៈ និងជីវភាពរស់នៅរបស់ប្រជាពលរដ្ឋ។ ដូច្នេះហើយការបន្តអនុវត្តយុទ្ធនាការបង្ក្រាប និងទប់ស្កាត់ប្រភេទបទល្មើសនេះ ត្រូវការការសហការយ៉ាងជិតស្និទ្ធពីគ្រប់ស្ថាប័នពាក់ព័ន្ធ ជាពិសេសអាជ្ញាធរមូលដ្ឋាន និងកម្លាំងសមត្ថកិច្ចគ្រប់ថ្នាក់ផងដរ៕លោក សំកុល សុចិត្រា អភិបាលរងខេត្តសៀមរាប បានលើកឡើងថា ខេត្តសៀមរាប គឺជាខេត្តប៉ូលសេដ្ឋកិច្ចទេសចរណ៍ដ៏សំខាន់ ដូចនេះ បញ្ហាបទល្មើសតាមប្រព័ន្ធបច្ចេកវិទ្យា គឺចាំបាច់ត្រូវទប់ស្កាត់ និងបង្ក្រាបឱ្យបានដល់កម្រិតអតិបរិមា ក្នុងគោលដៅរក្សាការពារទ្រព្យសម្បត្តិរបស់ប្រជាពលរដ្ឋ និងសុវត្ថិភាពសាធារណៈផងដែរ។ ជាពិសេស មុខមាត់របស់ខេត្តសៀមរាប ភ្ញៀវទេសចរ និងអ្នកវិនិយោគនានា។លោកបន្ដថា តាមរយៈបទពិសោធន៍ នៃការបង្ក្រាបបទល្មើសតាមប្រព័ន្ធបច្ចេកវិទ្យាកន្លងមក ពិនិត្យឃើញថា បញ្ហាដែលកើតចេញពីបទល្មើស Online Scams គឺធ្វើឱ្យមាន៖ប៉ះពាល់ដល់ស្ថិរភាពហិរញ្ញវត្ថុ ដូចជា ការបាត់បង់សាច់ប្រាក់យ៉ាងច្រើនសន្ធឹកសន្ធាប់ចេញពីសេដ្ឋកិច្ចមូលដ្ឋាន តាមរយៈល្បែងស៊ីសងអនឡាញ និងការវិនិយោគក្លែងក្លាយនិងបាត់បង់សីលធម៌សង្គម ដូចជា ការប្រើប្រាស់រូបភាពអាសអាភាស ឬការគំរាមកំហែងតាមអនឡាញ ដើម្បីជម្រិតទារប្រាក់ ឬក្រោមរូបភាពបទល្មើសផ្សេងៗជាច្រើន។លោក បានណែនាំដល់សមត្ថកិច្ចពាក់ព័ន្ធ ត្រូវបានយកចិត្តទុកដាក់បន្ថែម លើការងារប្រយុទ្ធប្រឆាំងបទល្មើស Online Scams គឺអនុវត្តច្បាប់ដោយម៉ឺងម៉ាត់ ដោយត្រូវពង្រឹងការអនុវត្តច្បាប់ ។ បន្តធ្វើរដ្ឋបាលចំហ និងមានវិធានការចំពោះទីតាំងប្រមូលផ្តុំ ខុនដូ ផ្ទះជួល ឬទីតាំងអាជីវកម្មបង្កប់ល្បែងអនឡាញខុសច្បាប់ ត្រូវតែបង្ក្រាបឱ្យអស់ពីមូលដ្ឋាន ដោយមិនមានការយោគយល់។ ត្រូវបង្កើនការអប់រំផ្សព្វផ្សាយ អំពីបញ្ហាបទល្មើស Online Scams ដល់ប្រជាជន និងព្រមទាំងបន្តអនុវត្តគោលនយោបាយ ភូមិ-ឃុំ-សង្កាត់មានសុវត្ថិភាព៕ ដោយ ៖ សាវី