នៅថ្ងៃពុធ ទី២៨ ខែមេសា ឆ្នាំ២០២៦ វេលាម៉ោង ១៤:៣០នាទីរសៀល ក្រសួងការពារជាតិ នៃព្រះរាជាណាចក្រកម្ពុជា បានសម្របសម្រួលដំណើរទស្សនកិច្ចលើកទី២ ប្រចាំឆ្នាំ២០២៦ របស់ក្រុមអនុព័ន្ធយោធាបរទេស (MACPP) ប្រចាំព្រះរាជាណាចក្រកម្ពុជា ដើម្បីចុះសង្កេតការណ៍ និងផ្ទៀងផ្ទាត់អំពីស្ថានភាពនៅស្ពានស្ទឹងមេទឹក ខេត្តពោធិ៍សាត់។គួរបញ្ជាក់ផងដែរថា ស្ពានស្ទឹងមេទឹក បានរងការវាយប្រហារដោយយន្តហោះចម្បាំងទម្លាក់គ្រាប់បែកពីសំណាក់កងទ័ពអាកាសរបស់ថៃ បណ្តាលឱ្យខូចខាតនិងដាច់ទាំងស្រុងមិនអាចចរាចរណ៍ទៅមកបាន កាលពីថ្ងៃទី១៣ ខែធ្នូ ឆ្នាំ២០២៥។ ស្ពាននេះគឺជាហេដ្ឋារចនាសម្ព័ន្ធស៊ីវិលសុទ្ធសាធ ដែលមានទីតាំងស្ថិតនៅចម្ងាយរាប់សិបគីឡូម៉ែត្រពីព្រំដែនកម្ពុជា-ថៃ។រាជរដ្ឋាភិបាល និងក្រសួងការពារជាតិ នៃព្រះរាជាណាចក្រកម្ពុជានៅតែប្តេជ្ញាចិត្តយ៉ាងមុតមាំក្នុងការដោះស្រាយបញ្ហាព្រំដែនទាំងអស់តាមសន្តិវិធី ស្របតាមច្បាប់អន្តរជាតិ និងកិច្ចព្រមព្រៀងទ្វេភាគី ដែលពាក់ព័ន្ធ ព្រមទាំងប្រកាន់ខ្ជាប់យ៉ាងម៉ឺងម៉ាត់នូវសេចក្តីប្រកាសរួម នៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅ (GBC) ចុះថ្ងៃទី ២៧ ខែធ្នូ ឆ្នាំ២០២៥។អាស្រ័យដូចបានជម្រាបជូនខាងលើ សូមសាធារណជន អ្នកសារព័ត៌មានជាតិ និងអន្តរជាតិជ្រាបជាព័ត៌មាន៕

ប្រទេសអេមីរ៉ាតអារ៉ាប់រួម (អារ៉ាប់រួម) បានឲ្យដឹងនៅថ្ងៃអង្គារ (ទី២៨ ខែមេសា ឆ្នាំ២០២៦) នេះថា ខ្លួនបានចាកចេញពី OPEC និង OPEC+ ជាការសម្រេចដែលផ្ដល់ផលប៉ះពាល់យ៉ាងធ្ងន់ធ្ងរដល់ក្រុមនាំចេញប្រេង និងមេដឹកនាំជាក់ស្តែងរបស់ប្លុកទាំង២ គឺអារ៉ាប៊ីសាអ៊ូឌីត នៅពេលដែលសង្គ្រាមអ៊ីរ៉ង់ បានបង្កឲ្យមានការរំខានភ្លាមៗជាប្រវត្តិសាស្ត្រដល់ថាមពល និងធ្វើឲ្យសេដ្ឋកិច្ចពិភពលោកមិនមានស្ថិរភាព។ការបាត់បង់អារ៉ាប់រួមដ៏គួរឲ្យភ្ញាក់ផ្អើលនេះ ដែលជាសមាជិកយូរអង្វែងរបស់ OPEC អាចបង្កើតឲ្យមានភាពច្របូកច្របល់ និងធ្វើឲ្យក្រុមនេះចុះខ្សោយ ដែលជាធម្មតាបានប្រឹងប្រែងបង្ហាញការរួបរួមគ្នា ទោះបីជាមានការខ្វែងគំនិតផ្ទៃក្នុង លើបញ្ហាជាច្រើន រាប់ចាប់ពីភូមិសាស្ត្រនយោបាយ រហូតដល់កូតាផលិតកម្មក៏ដោយ។ក្រុមផលិតរដ្ឋឈូងសមុទ្ររបស់ OPEC បាននិងកំពុងជួបការលំបាក ក្នុងការដឹកជញ្ជូនទំនិញនាំចេញឆ្លងកាត់ច្រកសមុទ្រ Hormuz ដែលជាផ្លូវដ៏តូចចង្អៀតមួយ នៅចន្លោះអ៊ីរ៉ង់ និងអូម៉ង់ ជាទីដែលប្រេងឆៅ និងឧស្ម័នធម្មជាតិរាវ ១ភាគ៥ របស់ពិភពលោក ជាធម្មតាឆ្លងកាត់ ដោយសារតែការគំរាមកំហែង និងការវាយប្រហាររបស់អ៊ីរ៉ង់ លើនាវានានា។ប៉ុន្តែការចាកចេញរបសើអារ៉ាប់រួម ពី OPEC តំណាងឲ្យជ័យជម្នះដ៏ធំមួយ សម្រាប់ប្រធានាធិបតីអាមេរិក លោក Donald Trump ដែលបានចោទប្រកាន់អង្គការនេះថា «យកប្រៀបលើប្រទេសផ្សេងៗ» ដោយការដំឡើងតម្លៃប្រេងហួសពីការពិត។ចំណាត់ការដកខ្លួននេះ បានកើតឡើងបន្ទាប់ពីអារ៉ាប់រួមដែលជាមជ្ឈមណ្ឌលពាណិជ្ជកម្ម ក្នុងតំបន់ និងជាសម្ព័ន្ធមិត្តដ៏សំខាន់បំផុតមួយរបស់ទីក្រុងវ៉ាស៊ីនតោន បានរិះគន់រដ្ឋអារ៉ាប់ថា មិនបានធ្វើគ្រប់គ្រាន់ ដើម្បីការពារវាពីការវាយប្រហារជាច្រើនរបស់អ៊ីរ៉ង់ អំឡុងសង្គ្រាម។ ទីប្រឹក្សាការទូតរបស់ប្រធានាធិបតីអារ៉ាប់រួម លោក Anwar Gargash បានរិះគន់ការឆ្លើយតបរបស់រដ្ឋអារ៉ាប់ និងឈូងសមុទ្រ ចំពោះការវាយប្រហាររបស់អ៊ីរ៉ង់ នៅក្នុងវគ្គមួយ នៅឯវេទិការដ្ឋមានឥទ្ធិពលឈូងសមុទ្រ កាលពីថ្ងៃចន្ទ៕

 ក្រុមហ៊ុនបច្ចេកវិទ្យាការពារជាតិ Terra Industries របស់នីហ្សេរីយ៉ា បានបញ្ចេញប្រព័ន្ធការពារជាតិគ្រប់គ្រងដោយខ្លួនឯង រួមទាំងយានដ្រូនស្ទាក់ចាប់ យានបោសសម្អាតគ្រាប់មីន និងកម្មវិធីចារកម្មសមរភូមិ នៅក្នុងការបង្ហាញមួយមានការចូលរួមពីក្រុមន្រ្តីយោធាជាន់ខ្ពស់ និងក្រុមតំណាងរដ្ឋាភិបាល ។ លោក Nathan Nwachuku គឺជាសហស្ថាបនិកបង្កើតក្រុមហ៊ុន Terra Industries បាននិយាយថា ថ្ងៃនេះពួកយើងបង្ហាញប្រព័ន្ធការពារជាតិថ្មីៗរបស់ខ្លួន ដូចជា យានដ្រូនស្ទាក់ចាប់ ឧបករណ៍បោសសម្អាតគ្រាប់មីន យានដែលអាចរកឃើញឧបករណ៍បំផ្ទុះកែច្នៃនៅលើដី និងកម្មវិធីស៊ើបការណ៍សម្ងាត់នៅសមរភូមិរបស់ពួកយើង ដែលនឹងអាចដំណើរការដោយស្វ័យប្រវត្តិកម្មវិធីរៀបផែនការ និងសម្របសម្រួលយោធា ។ លោកបន្តថា ពួកយើងបង្ហាញផងដែរ ពីការត្រៀមខ្លួនសម្រាប់ប្រតិបត្តិការនៅសមរភូមិ និងការដាក់ពង្រាយជាក់ស្តែងនៅសមរភូមិ ។ សូមបញ្ជាក់ថា ក្រុមហ៊ុន Terra Industries បានចុះហត្ថលេខាលើកិច្ចព្រមព្រៀងវិនិយោគរួមគ្នាជាមួយសាជីវកម្មឧស្សាហកម្មការពារជាតិ (DICON) គ្រប់គ្រងដោយរដ្ឋនីហ្សេរីយ៉ា កាលពីខែកុម្ភៈ។ លោក Babatunde Ayala គឺជាអគ្គនាយកសាជីវកម្ម DICON បាននិយាយថា កិច្ចសហការគឺចាំបាច់ ។បច្ចុប្បន្នក្រុមហ៊ុន Terra Industries ការពារមូលដ្ឋានហេដ្ឋារចនាសម្ព័ន្ធមានតម្លៃប្រហែល ១១ ពាន់លានដុល្លារនៅទូទាំងទ្វីបអាហ្វ្រិក ។ ក្រុមហ៊ុនអាយុកាល ២ឆ្នាំដែលបង្កកើតរួមគ្នាដោយសហស្ថាបនិក Nathan អាយុ ២២ឆ្នាំ និងសហស្ថាបនិក Maxwell Maduka អាយុ ២៤ឆ្នាំនេះ រកប្រាក់បាន ៣៤លានដុល្លារនៅដើមឆ្នាំនេះ ពីក្រុមហ៊ុនវិនិយោគជាច្រើន រួមទាំងក្រុមហ៊ុន Lux Capital និងក្រុមហ៊ុន 8VC ៕

រដ្ឋមន្ត្រីការពារជាតិហ្វីលីពីន នៅថ្ងៃអង្គារ (ទី២៨ ខែមេសា ឆ្នាំ២០២៦) នេះ បានលើកឡើងថា ប្រទេសហ្វីលីពីន មិនមានក្ដីបារម្ភនោះឡើយ អំពីការថយចុះសមត្ថភាពទប់ស្កាត់របស់សហរដ្ឋអាមេរិក នៅក្នុងតំបន់ឥណ្ឌូ-ប៉ាស៊ីហ្វិក ដោយសារតែសង្គ្រាម នៅតំបន់មជ្ឈិមបូព៌ា ទោះបីជាលោកបានព្រមានថា ប្រទេសចិនអាចព្យាយាមចាប់យកឱកាសជាក់ស្ដែងណាមួយក៏ដោយ។ការអត្ថាធិប្បាយរបស់លោក Gilberto Teodoro បានកើតឡើងនៅក្នុងបទសម្ភាសន៍ជាមួយសារព័ត៌មាន Reuters ក្នុងអំឡុងពេលមានសមយុទ្ធយោធារួមគ្នាប្រចាំឆ្នាំ ជាមួយសហរដ្ឋអាមេរិក ដែលបានទាក់ទាញប្រទេសចូលរួមច្រើនបំផុតមិនធ្លាប់មាន ក្នុងនោះរួមទាំងកងទ័ពប្រយុទ្ធរបស់ជប៉ុនជាលើកដំបូងផងដែរ។លោក Teodoro បានបន្ថែមថា សកម្មភាពថ្មីៗរបស់ចិន នៅក្នុងសមុទ្រចិនខាងត្បូង និងច្រកសមុទ្រតៃវ៉ាន់គឺ «មិនមែនអ្វីគួរឲ្យភ្ញាក់ផ្អើលឡើយ» ដោយនិយាយថា ទីក្រុងប៉េកាំងហាក់ដូចជាទាញយកអត្ថប្រយោជន៍នៅពេលដែលខ្លួនយល់ថា មហាអំណាចជាគូប្រជែង កំពុងជាប់ដៃនៅកន្លែងផ្សេង។លោក Teodoro បានបញ្ជាក់បន្ថែមថា លោកមានទំនុកចិត្តទាំងស្រុង លើសន្ធិសញ្ញាការពារជាតិទៅវិញទៅមក ដែលជាកតិកាសញ្ញាសន្តិសុខយូរអង្វែង រវាងទីក្រុងម៉ានីល និងទីក្រុងវ៉ាស៊ីនតោន ហើយមិនមានក្ដីបារម្ភឡើយ ជុំវិញអ្វី ដែលថា សង្គ្រាមអ៊ីរ៉ង់អាចធ្វើឲ្យចុះខ្សោយសមត្ថភាពជាយុទ្ធសាស្ត្ររបស់សហរដ្ឋអាមេរិក នៅតំបន់អាស៊ី។ថ្មីៗនេះ ប្រទេសចិនបានបង្កើនវត្តមានកងទ័ពជើងទឹករបស់ខ្លួន នៅជុំវិញកោះតៃវ៉ាន់ ក្នុងនោះរួមមានទាំងការធ្វើដំណើររបស់នាវាផ្ទុកយន្តហោះឆ្លងកាត់ច្រកសមុទ្រនេះផងដែរ។ ទីក្រុងម៉ានីល និងប៉េកាំង បានជាប់នៅក្នុងការប្រឈមមុខដាក់គ្នាតាមសមុទ្រជាបន្តបន្ទាប់ នៅសមុទ្រចិនខាងត្បូង ក្នុងរយៈពេលប៉ុន្មានឆ្នាំថ្មីៗនេះ ពាក់ព័ន្ធនឹងការអះអាងសិទ្ធិរៀងខ្លួនៗ៕

ក្រសួងសង្រ្គោះបន្ទាន់រុស្ស៊ី និយាយប្រាប់ទីភ្នាក់ងារព័ត៌មាន TASS ថា ចំនួនមនុស្សស្លាប់សរុបនៅក្នុងហេតុការណ៍អគ្គិភ័យឆាបឆេះការដ្ឋានសំណង់នៅតំបន់ភាគខាងជើងទីក្រុងមូស្គូ បានកើនឡើងដល់ ៥នាក់ ។ពួកគេរាយការណ៍ថា បច្ចុប្បន្ន ក្រុមភ្នាក់ងារពន្លត់អគ្គិភ័យ បានសង្រ្គោះមនុស្ស ៣១នាក់ ដោយប្រើប្រាស់ឧបករណ៍សង្រ្គោះ ដូចជាដងស្ទួច ។ មនុស្ស ៩នាក់ ទទួលបានការត្រួតពិនិត្យសុខភាពពីមន្រ្តីសុខាភិបាល ។ពួកគេបន្តថា ដងស្ទួចត្រូវបានដាក់ពង្រាយនៅជុំវិញបរិវេណអគារ ខណៈអង្គភាពពន្លត់ហ្គាស និងសេវាកម្មការពារផ្សែង បន្តការងាររបស់ពួកគេនៅក្នុងអគាររងការឆាប់ឆេះ ។ក្រសួងនិយាយទៀតថា ក្រុមមន្រ្តីជួយសង្រ្គោះជាង ១២០នាក់ និងរថយន្តពន្លត់អគ្គិភ័យ ក៏ដូចជាដងស្ទួចជាង ៣០គ្រឿង ត្រូវបានបញ្ជូនទៅកាន់កន្លែងហេតុ ។ អគ្គិភ័យនេះ ស្ថិតក្នុងគ្រោះថ្នាក់កម្រិតទី ៥ ដែលជាកម្រិតគ្រោះថ្នាក់ខ្ពស់បំផុត ។ពួកគេបានរាយការណ៍ពីដំបូងថា អគ្គិភ័យបានឆាបឆេះឡើងនៅអគារកម្ពស់ច្រើនជាន់ដែលកំពុងស្ថិតក្រោមការសាងសង់ ហើយមនុស្សជាង ២០០នាក់ បាននៅក្នុងអគារ ៕

អ៊ីរ៉ង់ នៅថ្ងៃអង្គារ (ទី២៨ ខែមេសា ឆ្នាំ២០២៦) បានលើកឡើងថា សហរដ្ឋអាមេរិកលែងអាច «កំណត់» អ្វីដែលប្រទេសដទៃត្រូវធ្វើទៀតហើយ ខណៈដែលទីក្រុងវ៉ាស៊ីនតោនបានថ្លឹងថ្លែងលើសំណើថ្មីពីទីក្រុងតេអេរ៉ង់ ជុំវិញការបិទច្រកសមុទ្រ Hormuz។ចាប់តាំងពីដើមដំបូងនៃសង្គ្រាមជាមួយសហរដ្ឋអាមេរិក និងអ៊ីស្រាអែល អ៊ីរ៉ង់បានបិទផ្លូវទឹកយុទ្ធសាស្ត្រនេះយ៉ាងមានប្រសិទ្ធភាព ដោយបានបង្កឲ្យមានការរំខានយ៉ាងខ្លាំងដល់ទីផ្សារថាមពលសកល និងធ្វើឲ្យច្រកសមុទ្រនេះកា្លយជាចំណុចកណ្តាលនៃការចរចា ដើម្បីបញ្ចប់ជម្លោះ។បើយោងតាមទូរទស្សន៍រដ្ឋ បានឲ្យដឹងថា អ្នកនាំពាក្យក្រសួងការពារជាតិ លោក Reza Talaei-Nik បាននិយាយថា «សហរដ្ឋអាមេរិកលែងមានឥទ្ធិពលកំណត់គោលនយោបាយរបស់ខ្លួនដល់ប្រទេសឯករាជ្យទៀតហើយ» ដោយលោកបានបន្ថែមថា ទីក្រុងវ៉ាស៊ីនតោននឹង «ត្រូវទទួលយកថា ខ្លួនត្រូវតែបោះបង់ចោលការទាមទារខុសច្បាប់ និងមិនសមហេតុផលរបស់ខ្លួន»។ទោះបីជាបទឈប់បាញ់បានបញ្ឈប់ការប្រយុទ្ធគ្នា រវាងអ៊ីរ៉ង់ សហរដ្ឋអាមេរិក និងអ៊ីស្រាអែលក៏ដោយ ក៏ការចរចា ស្តីពីការឈានដល់ការបញ្ចប់ជាអចិន្ត្រៃយ៍ ចំពោះជម្លោះនេះ មិនទាន់ចេញជាលទ្ធផលច្បាស់លាស់នៅឡើយទេ។សំណើដែលកំពុងត្រូវបានពិចារណានៅទីក្រុងវ៉ាស៊ីនតោន ត្រូវបានគេរាយការណ៍ថា នឹងមានការបើកឡើងវិញនូវច្រកសមុទ្រ Hormuz ដែលជាផ្លូវដ៏សំខាន់ សម្រាប់ការដឹកជញ្ជូនប្រេង និងឧស្ម័នសកល ខណៈដែលការចរចាទូលំទូលាយ ស្ដីអំពីសង្គ្រាម នៅតែបន្តមាន៕

 ក្រសួងការបរទេសចិន អំពាវនាវឲ្យសហរដ្ឋអាមេរិកបញ្ឈប់អនុវត្តខុស ក្នុងការបំពានទណ្ឌកម្មរបស់ខ្លួន ក្រោយពួកគេវាយប្រហារក្រុមហ៊ុនចម្រាញ់ប្រេងឯករាជ្យធំបំផុតរបស់ចិន ដោយសារចោទប្រកាន់ពួកគេថា បានទិញប្រេងអ៊ីរ៉ង់ ។ ថ្លែងទៅកាន់ក្រុមអ្នកសារព័ត៌មាននៅសន្និសីទសារព័ត៌មាន អ្នកនាំពាក្យក្រសួងការបរទេសចិនលោក Lin Jian និយាយថា ចិនតែងតែជំទាស់ឥតឈប់ឈរចំពោះទណ្ឌកម្មខុសច្បាប់ឯកតោភាគីដែលខ្វះមូលដ្ឋានច្បាប់អន្តរជាតិ ។ ក្រសួងរតនាគារសហរដ្ឋអាមេរិក បាននិយាយកាលពីថ្ងៃសុក្រសប្តាហ៍មុនថា ក្រុមហ៊ុនចម្រាញ់ប្រេងនោះ ស្ថិតក្នុងចំណោមអតិថិជនធំបំផុតរបស់អ៊ីរ៉ង់សម្រាប់ប្រេងឆៅ និងផលិតផលប្រេងសាំង ។  ទោះបីជាយ៉ាងណាក៏ដោយ ក្រុមហ៊ុនបានច្រានចោលរាល់ទំនាក់ទំនងណាមួយជាមួយអ៊ីរ៉ង់ ហើយនិងជំរុញឲ្យអាមេរិកដកចេញវិញទណ្ឌកម្មរបស់ពួកគេ ។ ក្រុមហ៊ុន Hengli Petrochemical ដែលប្រតិបត្តិការចម្រាញ់ប្រេង ៤០ម៉ឺនបារ៉ែលក្នុង ១ថ្ងៃនៅទីក្រុងតំបន់ឆ្នេរភាគឦសាន Dalian បាននិយាយកាលពីថ្ងៃអាទិត្យថា រោងចក្រចម្រាញ់ប្រេង និងគីមីឥន្ធនៈរបស់ពួកគេ នៅប្រតិបត្តិការធម្មតា ដោយពួកគេទទួលបានប្រេងឆៅដែលអាចដំណើរការបានរយៈពេលជាង ៣ខែទៀត ៕

 នគរបាលនិយាយថា ក្រុមនិស្សិត និងជនស៊ីវិល បានប៉ះទង្គិចគ្នាជាមួយក្រុមមន្រ្តីអនុវត្តច្បាប់នៅខេត្តប៉ាពួ ប្រទេសឥណ្ឌូនេស៊ី អំឡុងបាតុកម្មមានការចូលរួមដោយអ្នកស្រុករាប់រយនាក់ ទាមទារឲ្យដកចេញមន្រ្តីយោធាពីតំបន់របស់ពួកគេ ។ ប្រតិបត្តិការយោធា បានធ្វើឡើងនៅក្នុងតំបន់កាលពីដើមខែនេះ ដោយសារមនុស្ស ១៥នាក់ស្លាប់ រួមទាំងស្រ្តី និងកុមារផងដែរ ។ កាលពីសប្តាហ៍មុន ក្រុមឃ្លាំមើលសិទ្ធិមនុស្សឥណ្ឌូនេស៊ី បានបញ្ជាក់ពីការស្លាប់របស់មនុស្សទាំង ១៥នាក់នេះ ហើយពួកគេបានអំពាវនាវឲ្យរដ្ឋាភិបាលចុះប្រតិបត្តិការជាថ្មីនៅក្នុងតំបន់ ។ យោធានៅមិនទាន់ទទួលស្គាល់គ្រោះថ្នាក់នោះទេ ។ លោក Cahyo Sukarnito គឺជាអ្នកនាំពាក្យនគរបាលខេត្តប៉ាពួ និយាយថា កាលពីថ្ងៃចន្ទ បាតុករប្រហែល ៨០០នាក់ បានជួបជុំគ្នានៅតាមទីតាំង ៣កន្លែង នៅក្នុងរដ្ឋធានី Jayapura ខេត្តប៉ាពួ មុនពេលការជួបជុំគ្នានៅមជ្ឈមណ្ឌលទីក្រុង ។ លោកបន្តថា ឧស្ម័នបង្ហូរទឹកភ្នែក និងកាណុងបាញ់ទឹក ត្រូវបានដាក់ពង្រាយ ដើម្បីបំបែកហ្វូងបាតុករ នៅទីតាំងមួយកន្លែង ក្រោយពួកគេចោលដុំថ្មលើនគរបាល ៕

 ជនប៉ាឡេស្ទីនកំពុងប្រើប្រាស់កម្ទេចកម្ទីសល់ពីសង្រ្គាម ដើម្បីត្រួសត្រាយធ្វើជាផ្លូវនៅតំបន់ហ្កាហ្សា ។ គម្រោងគ្រប់គ្រងដោយកម្មវិធីអភិវឌ្ឍអង្គការសហប្រជាជាតិ(UNDP) បានកម្ទេចបេតុង និងចម្រឹងដែក ដើម្បីស្តាដែនដីមួយនេះឡើងវិញ ។លោក Alessandro Mrakic គឺជាអ្នកគ្រប់គ្រងការិយាល័យហ្កាហ្សារបស់កម្មវិធី UNDP និយាយថា នៅតំបន់ហ្កាហ្សា ពួកយើងកំពុងបោសសម្អាតកម្ទេចកម្ទីក្នុងទំហំដែលពុំធ្លាប់មានពីមុន ដែលជាកម្ទេចកម្ទីទម្ងន់ ៦១លានតោន ។លោកថា កម្មវិធីមួយនេះ បានប្រមូលកម្ទេចកម្ទីប្រហែល ២៨៧.០០០តោនរួចទៅហើយ ប៉ុន្តែការងារដែលបានធ្វើរួចមួយនេះ ស្មើនឹងប៉ុនចុងក្រចកប៉ុណ្ណោះ ។កិច្ចខិតខំបោសសម្អាតកម្ទេចកម្ទីនេះ បានកើតមាន ស្របពេលដែលវឌ្ឍនភាពនៃតំបន់ហ្កាហ្សា បានជាប់គាំង ក្នុងផែនការហ្កាហ្សារបស់ប្រធានាធិបតីសហរដ្ឋអាមេរិកលោក Donald Trump ។លោក Trumpបានរៀបចំឲ្យមានកិច្ចព្រមព្រៀងបទឈប់បាញ់កាលពីខែតុលាកន្លងទៅ ដែលជាកិច្ចព្រមព្រៀងមួយឈានទៅរកការរំសាយអាវុធក្រុមហាម៉ាស និងការសាងសង់តំបន់ហ្កាហ្សាឡើងវិញ ។ទោះបីជាយ៉ាងណាក៏ដោយ ការងារបោសសម្អាតកម្ទេចកម្ទី គឺជាជំហានដ៏ចាំបាច់មួយ ក្នុងការទទួលបានជំនួយបន្ថែមទៀតចូលទៅក្នុងតំបន់ហ្កាហ្សា ក៏ដូចជាការកសាងតំបន់មួយនេះឡើងវិញ ៕

 ផែនការរបស់អង់គ្លេស ក្នុងការហាមឃាត់មនុស្សជំនាន់ក្រោយពីការទិញបារី នឹងក្លាយជាច្បាប់ក្នុងសប្តាហ៍នេះ ជាហេតុនាំមកនូវគោលនយោបាយដែលគ្របដណ្តប់ដោយសំនួរជាច្រើនថាតើវានឹងមានប្រសិទ្ធិភាពបែបណាក្នុងការបញ្ឈប់ការជក់បារីនោះ ។ កាលពីសប្តាហ៍មុន ក្រុមតំណាងរាស្រ្តបានអនុម័តសំណើច្បាប់ថ្នាំជក់ និងបារីអេឡិចត្រូនិក ដែលណែនាំឲ្យមានការរឹតត្បិតអាយុ រារាំងនរណាម្នាក់ដែលកើតក្នុង ឬក្រោយថ្ងៃទី ១ ខែមករា ឆ្នាំ ២០០៩ ពីការទិញបារីស្របច្បាប់ ។ ដោយសាររាជានុម័តពីព្រះមហាក្សត្រ ដំណាក់កាលចុងក្រោយនៃដំណើរការនីតិបញ្ញត្តិនក្នុងសប្តាហ៍នេះ ច្បាប់នឹងរឹតបន្តឹងផងដែរបារីអេឡិចត្រូនិក ហើយនិងផលិតផលនីកូទីនផ្សេងទៀត ។ នៅទីក្រុងឡុងដ្រ៍ ប្រជាពលរដ្ឋមានការបែងចែកចំពោះប្រសិទ្ធិភាពនៃច្បាប់បំរាមមួយនេះ ។ លោក Minola Slaveschi គឺជានិស្សិតវ័យ ២១ឆ្នាំមួយរូបនិយាយថា លោកគិតថា វាសំខាន់ខ្លាំងណាស់ ក្នុងការហាមឃាត់យុវជន និងក្មេងៗពីការជក់បារី ។ លោកបន្តថា មាននូវមនុស្សច្រើនណាស់សព្វថ្ងៃដែលជក់បារីអេឡិចត្រូនិក និងជក់បារីនៅតាមដងផ្លូវ ។ ចំណែកឯលោក Harry Jordan ដែលជាកីឡាករវាយកូនបាល់អាយុ ២៣ឆ្នាំនិយាយថា មនុស្សនឹងស្វែងរកមធ្យោបាយផ្សេង ដើម្បីទិញផលិតផលទាំងនេះ ហើយវានឹងមិនអាចដោះស្រាយបញ្ហាបានឡើយ ។ សំណើរច្បាប់ខាងលើ បានលើកឡើងពីអាយុស្របច្បាប់សម្រាប់ការទិញថ្នាំជក់ ចាប់ពីមនុស្សកើតនៅក្នុងឆ្នាំ ២០០៩ និងក្រោយឆ្នាំ ២០០៩ ដែលនេះមានន័យថា នឹងធ្វើឲ្យមនុស្សជំនាន់ក្រោយប្រឈមនឹងបំរាមអស់មួយជីវិតតែម្តង ៕