នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី ដឹកនាំគណៈប្រតិភូចូលក្រាបបង្គំគាល់ព្រះករុណា ព្រះមហាក្សត្រ ទូលថ្វាយលទ្ធផលចុះបញ្ជីបូជនីយដ្ឋានចងចាំនៃកម្ពុជា ក្នុងបញ្ជីបេតិកភណ្ឌពិភពលោក
សភាតំណាងប្រជាជនចិនចាត់ទុកសម្តេចតេជោ ជាតួអង្គសំខាន់បន្ត​ពីព្រះបរម​រតនកោដ្ឋ​ក្នុង​ការ​ពូន​ជ្រំ​ទំនាក់ទំនងរវាងកម្ពុជា និងចិន
សម្តេចតេជោអនុញ្ញាតឱ្យសមាជិកគណៈកម្មាធិការអចិន្ត្រៃយ៍សភាប្រជាជនចិនជួបសម្តែងការគួរសម
ក្រុមការងារបច្ចេកទេសអន្តរក្រសួងបន្តចុះកំណត់និយាមកា និងបោះបង្គោលព្រំដីតាមបណ្តោយព្រែកជីកហ្វូណនតេជោ សម្រាប់កំណាត់ទី២ ក្នុងភូមិសាស្រ្តខេត្តកំពត

នយោបាយ​ និង ការអភិវឌ្ឍន៍

រដ្ឋបាលក្រុងសំរោង អនុវត្តដំណើរការសាកល្បងធ្វើបណ្ណព្រំដែនកម្ពុជា-ថៃ ជូនដល់ពលរដ្ឋ ក្នុងដែនសមត្ថកិច្ចរបស់ខ្លួន

2024/01/03 03:12:34 pm        158
Facebook Telegram Linkin
ឧត្ដរមានជ័យ៖ អនុវត្តតាមសេចក្តីសម្រេចរបស់រាជរដ្ឋាភិបាលកម្ពុជា ត្រូវបានដាក់ឲ្យអនុវត្តការសាកល្បង​ដំណើរការ​ចំពោះការផ្តល់សេវាធ្វើបណ្ណព្រំដែនកម្ពុជា-ថៃ ក្នុងដែនសមត្ថកិច្ចរបស់ខ្លួន ដើម្បីបង្ករភាពងាយស្រួលរហ័សបន្ថែមទៀតជូនប្រជាពលរដ្ឋ ក្នុងការផ្តល់សេវាសាកល្បងនេះ មានរយៈពេល៦ខែ។លោក ផុន ចាន់នឹល អភិបាលក្រុងសំរោង បានលើកឡើងថា ការផ្តល់សិទ្ធក្នុងការសម្រេចពីថ្នាក់​ខេត្ត​ទម្លាក់មកថ្នាក់មូលដ្ឋានក្រុង ស្រុក នៅពេលនេះ គឺមានសារៈសំខាន់ខ្លាំងណាស់​សម្រាប់​បងប្អូនប្រជាពលរដ្ឋរស់នៅក្នុងក្រុងសំរោង ក៏ដូចជាតាមបណ្តាលស្រុកផ្សេងៗទៀត​ក្នុងការ​មក​ទទួល​ស្នើសុំសេវាធ្វើបណ្ណព្រំដែន​កម្ពុជា-ថៃ បានបង្កភាពងាយស្រួលដល់ពលរដ្ឋគ្រប់ៗគ្នា​ដែលមាន​បំណង​ចង់ឆ្លងដែន​ចូលទៅប្រទេសថៃ ដោយស្របច្បាប់។លោកអភិបាលក្រុង បន្តថា សម្រាប់ការធ្វើបណ្ណព្រំដែននៅមូលដ្ឋាន​ ក្រុងសំរោង នាពេលនេះ គឺ​ប្រជាពលដ្ឋមកពីតាមបណ្តាលស្រុកផ្សេងគ្នា ក្នុងខេត្តឧត្តរមានជ័យ ខុសដែន​សមត្ថកិច្ចរបស់​ខ្លួននោះ គឺមិនអាចមកទទួលសេវាធ្វើបណ្ណព្រំដែននេះបាននោះទេ គឺ​តម្រូវ​តែ​ពលរដ្ឋ​ដែល​មាន​ទីលំនៅ​អចិន្រ្តៃយ៍ ក្នុងក្រុងសំរោងតែប៉ុណ្តោះ។ ដោយក្នុង​បណ្ណព្រំដែនកម្ពុជា-ថៃ​មួយ​សន្លឹកមាន​តម្លៃពីរម៉ឺនរៀល​ សម្រាប់សេវាបង់ជូនរដ្ឋ។ ដំណើរការសាកល្បងនេះ មានរយៈពេល៦ខែ គិតចាប់ពីថ្ងៃទី១ខែកមរា ឆ្នាំ២០២៤ ។យ៉ាងណាម៉ិញបងប្អូនប្រជាពលរដ្ឋ បានសម្តែងនូវការសប្បាយរីករាយ និងគាំទ្រយ៉ាងពេញ​ទំហឹង​ចំពោះរាជរដ្ឋាភិបាលកម្ពុជា​អាណត្តិ​ថ្មី​ ដែល​មានសម្តេចធិបតី ហ៊ុន ម៉ាណែត នាយរដ្ឋមន្រ្តី​នៃកម្ពុជា ជា​និច្ចកាល​សម្តេចធិបតី តែងតែ​បាន​គិតគូរ​យកចិត្តទុកដាក់ខ្ពស់ពី​សុខទុក្ខ និងការលំបាកនានា​របស់ប្រជាពលរដ្ឋគ្រប់ៗគ្នា។ពលរដ្ឋ បានបញ្ជាក់ឲ្យដឹងថា ការផ្តល់សេវាធ្វើបណ្ណព្រំដែនទម្លាក់ឲ្យកាន់តែ​ដល់មូលដ្ឋាន​របស់​ពួកគាត់​ក៏ដូចជាការផ្តល់សេវាផ្សេងៗនោះ គឺវាអាចកាត់​បន្ថយនៅ​ការ​ចំណាយ​ផ្សេងៗ​​របស់ពួកគាត់​បាន​មួយកម្រិតផងដែរ។សូមបញ្ជាក់ថា ប្រជាពលរដ្ឋអាចមកទទួលសេវាស្នើសុំធ្វើបណ្ណព្រំដែនកម្ពុជា-ថៃនេះ បាន​នៅអង្គភាពច្រកចេញចូលតែមួយបានជាធម្មតា នៅរដ្ឋបាលខេត្តឧត្តរមានជ័យ ប្រសិនបើបងប្អូន​ប្រជាពលរដ្ឋណា​មិនចង់ធ្វើនៅតាមបណ្តាលក្រុងស្រុកសាមីរបស់ខ្លួននោះ។ បណ្ណព្រំដែននេះ គឺ​ពលរដ្ឋមានសិទ្ធធ្វើដំណើរឆ្លងដែនចូលទៅប្រទេសថៃ មានរយៈពេល១សប្តាហ៍ទើបផុតកំណត់ លើខេត្តចំនួនបីគឺខេត្តសុរិន្ទ តាមច្រកអូរស្មាច់ ក្រុងសំរោង ខេត្តស៊ីសាកេត ច្រកជាសាងាំ ស្រុកអន្លង់វែង និងខេត្តបុរីរុំ ច្រកជប់គគី ស្រុកបន្ទាយអំពឹល ខេត្តឧត្តរមានជ័យ៕ អត្ថបទ៖ សា​រិទ្ធិ

សហរដ្ឋអាមេរិក បានស្តីបន្ទោសការអធិប្បាយដែលមិនទទួលខុសត្រូវរបស់រដ្ឋមន្ត្រីអ៊ីស្រាអែល

2024/01/03 02:17:38 pm        102
Facebook Telegram Linkin
ក្រសួងការបរទេសអាមេរិក បានច្រានចោលការអត្ថាធិប្បាយថ្មីៗដែលធ្វើឡើងដោយរដ្ឋមន្ត្រីអ៊ីស្រាអែលពីររូប ដោយហៅពួកគេថា «គ្មានការទទួលខុសត្រូវ» និង «បង្កឲ្យផ្ទុះកំហឹង» ចំពោះការតស៊ូមតិសម្រាប់ការតាំងទីលំនៅថ្មីរបស់ប៉ាឡេស្ទីន នៅខាងក្រៅតំបន់ហ្កាហ្សា។អ្នកនាំពាក្យក្រសួងការបរទេសលោក Matthew Miller បាននិយាយនៅក្នុងសេចក្តីថ្លែងការណ៍មួយថា៖« សហរដ្ឋអាមេរិក បានច្រានចោលសេចក្តីថ្លែងការណ៍ថ្មីៗរបស់រដ្ឋមន្ត្រីអ៊ីស្រាអែល លោក Bezalel Smotrich និង លោក Itamar Ben Gvir ដែលតស៊ូមតិសម្រាប់ការតាំងទីលំនៅថ្មីរបស់ប៉ាឡេស្ទីន នៅខាងក្រៅតំបន់ហ្កាហ្សា»។លោកបានបន្ថែមថា៖«វោហាស័ព្ទនេះ បង្កឲ្យផ្ទុះកំហឹង និងមិនទទួលខុសត្រូវ។ យើងត្រូវបានប្រាប់ម្តងហើយម្តងទៀត និងជាប់លាប់ដោយរដ្ឋាភិបាលអ៊ីស្រាអែល រួមទាំងដោយនាយករដ្ឋមន្រ្តីថា សេចក្តីថ្លែងការណ៍បែបនេះ មិនឆ្លុះបញ្ចាំងពីគោលនយោបាយរបស់រដ្ឋាភិបាលអ៊ីស្រាអែលនោះទេ។ ពួកគេគួរតែបញ្ឈប់ជាបន្ទាន់»។លោក Smotrich រដ្ឋមន្ត្រីហិរញ្ញវត្ថុរបស់អ៊ីស្រាអែល និងលោក Gvir ដែលជារដ្ឋមន្ត្រីសន្តិសុខជាតិរបស់ប្រទេសនេះ បានរងការរិះគន់កាលពីដើមសប្តាហ៍នេះ បន្ទាប់ពីពួកគេម្នាក់ៗ បានលើកឡើងថា សង្គ្រាមនៅតំបន់ហ្កាហ្សា អាចបណ្តាលឲ្យមានការតាំងទីលំនៅថ្មីរបស់ប្រជាជនប៉ាឡេស្ទីន។សារព័ត៌មាន The Times of Israel បានរាយការណ៍ថា លោក Smotrich បានថ្លែងប្រាប់អ្នកសារព័ត៌មានកាលពីថ្ងៃចន្ទថា ដំណោះស្រាយចំពោះសង្គ្រាមគឺ «ដើម្បីលើកទឹកចិត្តដល់ការធ្វើការផ្លាស់ទីដោយស្ម័គ្រចិត្តរបស់អ្នកស្រុកហ្កាហ្សា ទៅកាន់ប្រទេសដែលនឹងយល់ព្រមទទួលយកជនភៀសខ្លួន»។

ឥទ្ធិពលរបស់អ៊ីរ៉ង់នៅសមុទ្រក្រហម បង្កើនការភ័យខ្លាចចំពោះការរំខានពាណិជ្ជកម្ម

2024/01/03 02:10:05 pm        181
Facebook Telegram Linkin
ការបញ្ជូននាវាចម្បាំងរបស់អ៊ីរ៉ង់ ទៅកាន់សមុទ្រក្រហម គឺជាទង្វើដ៏ព្រហើនបំផុតរបស់ខ្លួន ដែលប្រឈមមុខនឹងកងកម្លាំងសហរដ្ឋអាមេរិក នៅក្នុងផ្លូវពាណិជ្ជកម្មដ៏សំខាន់ ដោយបានលើកតម្កើងក្រុមសកម្មប្រយុទ្ធហួទីដែលមីស៊ីល បានរំខានដល់ការដឹកជញ្ជូន ក្នុងរយៈពេលពីរខែកន្លងទៅនេះ។ទីក្រុងតេអេរ៉ង់ ទំនងជាមិនចង់បានការប្រឈមមុខដាក់គ្នាដោយផ្ទាល់ទេ នាវាចម្បាំងចាស់របស់ខ្លួន មិនត្រូវគ្នានឹងក្រុមការងារដែនសមុទ្រដែលដឹកនាំដោយសហរដ្ឋអាមេរិក ដែលកំពុងល្បាតដែនទឹកនៅ ប្រទេសយេម៉ែនទេ ប៉ុន្តែវាត្រូវការការព្យាករពីឥទ្ធិពលរបស់អ៊ីរ៉ង់ នៅក្នុងតំបន់ទៅកម្រិតមួយផ្សេងទៀត។ ឥទ្ធិពលនោះ កំពុងបង្កើនភាពតានតឹង បន្ទាប់ពីក្រុមហួទី បានចាប់ផ្តើមវាយប្រហារលើនាវា ដែលពួកគេអះអាងថា ធ្វើដំណើរទៅកាន់ ឬគ្រប់គ្រងដោយក្រុមហ៊ុននានា ក្នុងប្រទេសអ៊ីស្រាអែល ក្នុងគោលបំណងដើម្បីបញ្ចប់ការវាយប្រហារដោយយោធាលើតំបន់ហ្កាហ្សា។លោក Kevjn Lim អ្នកវិភាគនៅក្រុមហ៊ុន S&P Global Market Intelligence ដែលមានមូលដ្ឋាននៅទីក្រុង Tel Aviv បាននិយាយថា អ៊ីរ៉ង់បានច្រានចោលការអំពាវនាវពីមហាអំណាចលោកខាងលិច ដើម្បីដាក់សម្ពាធលើក្រុមហួទីឲ្យបញ្ចប់ការវាយប្រហាររបស់ពួកគេ នៅសមុទ្រក្រហម។ ករណីនោះ រាប់បញ្ចូលទាំងការវាយប្រហារលើនាវាដឹកកុងតឺន័រ AP Moller-Maersk A/S បន្ទាប់ពីប្រទេសដាណឺម៉ាក បាននិយាយថាខ្លួនកំពុងចូលរួមជាមួយក្រុមការងារនេះ។លោក Lim បានបន្ថែថា៖«ពួកគេមិនបង្ហាញឆន្ទៈក្នុងការបន្ថយល្បឿនទេ ដូច្នេះយើងទំនងជានឹងឃើញការកំណត់គោលដៅបន្ថែមទៀតទៅលើទ្រព្យសម្បត្តិពាណិជ្ជកម្ម និងនាវាសមុទ្រអាមេរិកតទៅទៀត។

ក្រសួងអប់រំ៖ ការតម្រូវឱ្យសិស្សប្រឡងចូលសាកលវិទ្យាល័យជាការសម្រេច​របស់គ្រឹះស្ថាននីមួយៗ

2024/01/03 01:41:45 pm        430
Facebook Telegram Linkin
ក្នុងឆ្នាំសិក្សាថ្មី ២០២៣-២០២៤នេះ ការតម្រូវ​ឱ្យសិស្ស​ប្រឡង​ចូល​សាកលវិទ្យាល័យ​មាន​វិសាល​ភាព​កាន់តែធំ សម្រាប់កម្ពុជា។ ជាក់ស្ដែងសម្រាប់សាកលវិទ្យាល័យភូមិន្ទភ្នំពេញ ជា​សាកល​ធំ​របស់រដ្ឋ ក៏បានធ្វើកំណែទម្រង់ថ្មី ដោយតម្រូវឱ្យសិស្សគ្រប់រូប ត្រូវឆ្លង​កាត់​ការ​ប្រឡង​ចូល​ជាដាច់ខាត។ ជុំវិញ​រឿងនេះអ្នកនាំពាក្យក្រសួងអប់រំ​បាន​លើកឡើងថា​ ការ​តម្រូវ​ឱ្យ​សិស្ស​ប្រឡង​ចូល​សិក្សា គឺផ្អែកលើតម្រូវការ និងស្ថានភាពជាក់ស្ដែង និងជាការ​សម្រេច​ចិត្ត​របស់​គ្រឹះស្ថាន​នីមួយៗ។ ការចូលសិក្សានៅសាកលវិទ្យាល័យ នៅកម្ពុជាបច្ចុប្បន្នមានទាំងការដាក់ពាក្យសិក្សា និង​មាន​ទាំង​ការ​តម្រូវ​ឱ្យ​សិស្សប្រឡងចូល។ កន្លងទៅ គឺមានវិទ្យាស្ថានជាតិបច្ចេកវិទ្យា ហៅកាត់ថាសាលា តិចណូ សាកលវិទ្យាល័យវិទ្យាសាស្ត្រសុខាភិបាល វិទ្យាស្ថាន​ភាសា​បរទេស នៃ​សាកលវិទ្យាល័យ​ភូមិន្ទ​ភ្នំពេញ ដេប៉ាតឺម៉ង់ប្រព័ន្ធផ្សព្វផ្សាយនិងសារគមនាគមន៍ បានអនុវត្ត​គោលការណ៍​ប្រឡង​ចូល​ជា​យូរ​មកហើយ។ឈានចូល​មកដល់ឆ្នាំសិក្សាថ្មី ២០២៣-២០២៤ នេះសាកលវិទ្យាល័យភូមិន្ទភ្នំពេញ ជាសាកល​វិទ្យាល័យ​ដ៏​ធំរបស់រដ្ឋ បានធ្វើកំណែទម្រង់ ដោយតម្រូវឱ្យសិស្សគ្រប់មុខជំនាញ ត្រូវប្រឡង​ចូល​សិក្សា​ជា​ដាច់​ខាត ពុំអាចបង់ថ្លៃសិក្សាដូចពីមុននោះទេ។ នេះជាកំណែទម្រង់ធំមួយ ជាក់ស្ដែង​សិស្ស​ជាង ១ម៉ឺននាក់ បាន​ចូលរួម​ប្រឡង​ដើម្បី​សិក្សា​នៅ​សាកលវិទ្យាល័យ​ភូមិន្ទ​ភ្នំពេញ​ក្នុង​ឆ្នាំ​សិក្សា​ថ្មីនេះ​។ពាក់ព័ន្ធនឹងការប្រឡងចូលសិក្សានៅតាមសាកលវិទ្យាល័យនេះ លោកស្រី ឃួន វិច្ឆិកា អ្នក​នាំ​ពាក្យ​ក្រសួងអប់រំបានលើកឡើងថា ការតម្រូវឱ្យសិស្សប្រឡងចូលនេះ គឺជាការ​សម្រេច​ចិត្ត​រប​ស់​គ្រឹះស្ថាន​នីមួយៗ ដោយផ្អែកលើតម្រូវការ និងស្ថានភាពជាក់ស្ដែង។ ពិសេសគឺ​ធានា​គុណភាព​អប់រំ ក៏ដូចជាគុណភាពក្រោយបញ្ចប់ការសិក្សាសម្រាប់តម្រូវការទីផ្សារ។ អ្នកនាំពាក្យបន្ថែមថា ការតម្រូវឱ្យសិស្សប្រឡងចូលនេះ ក៏ជានីតិវិធីបន្ថែម ក្នុង​ការ​ពិនិត្យ​មើល​លទ្ធភាព​បេក្ខជន​ដែលមានលក្ខណៈសម្បត្តិប្រសើរជាងគេ ក្នុងការសិក្សា​លើ​មុខ​ជំនាញ​ជាក់លាក់​នោះ​។សូមជម្រាបថា សម្រាប់សាកលវិទ្យាល័យភូមិន្ទភ្នំពេញ ដែល​បានផ្លាស់ប្ដូរ​ឱ្យ​មាន​ការ​ប្រឡង​ចូលគ្រប់​មុខ​ជំនាញនេះ គឺធ្វើឡើងក្រោមហេតុផលសំខាន់ពីរ គឺទី១ដើម្បីជ្រើសរើសសិស្សពូកែ មាន​សមត្ថភាពអាចបន្តការសិក្សាដោយមិនបោះបង់ពាក់កណ្ដាលទី និងទី ២ គឺដោយ​សារ​ការ​ខ្វះ​បន្ទប់សិក្សា​ជាដើម។ នេះជាការលើកឡើងរបស់ សាកលវិទ្យាធិការនាពេលកន្លងមក៕ អត្ថបទ៖ គឹមហុក

ឆ្នាំ២០២៣ កម្ពុជាទទួលជើងហោះហើរអន្តរជាតិងើបឡើងវិញជិត ៥០ភាគរយ

2024/01/03 12:31:31 pm        328
Facebook Telegram Linkin
រដ្ឋលេខាធិការដ្ឋានអាកាសចរណ៍ស៊ីវិល បានឱ្យដឹងថា នៅក្នុងឆ្នាំ២០២៣ កម្ពុជា មាន​កំណើន​ជើង​ហោះហើរអន្តរជាតិងើបឡើងវិញបានប្រមាណ ៥០% បើប្រៀបធៀប​ចំនួន​ជើងហោះហើរ​ដឹក​អ្នក​ដំណើរ​អន្តរជាតិសរុប នៅឆ្នាំ២០១៩ មុនពេលមិនទាន់មានវិបត្តិកូវីដ១៩។ឯកឧត្តម ស៊ីន ចាន់សិរីវុត្ថា អនុរដ្ឋលេខាធិការ និង​អ្នក​នាំ​ពាក្យ​រដ្ឋលេខាធិការដ្ឋាន​អាកាសចរណ៍​ស៊ីវិល បានថ្លែងប្រាប់ BTV នៅថ្ងៃទី៣ ខែមករា ឆ្នាំ២០២៤នេះថា កំណើនជើងហោះហើរ ចាប់​ពី​ក្រោយ​​វិបត្តិកូវីដ១៩នេះពីមួយខែទៅមួយខែ គឺមានកំណើនការហោះហើរក្នុងរង្វង់ ៥% និង​ចំនួន​អ្នក​ដំណើរ​គឺ​មានកំណើនប្រមាណជាង ១០% ហើយកំណើនជើងហោះហើរ ឆ្នាំ២០២៣ កើន​៤៥% ប្រៀបធៀបឆ្នាំ២០២២។ ឯកឧត្តម បានបញ្ជាក់ថា នៅក្នុងឆ្នាំ២០២៣នេះ គឺមានក្រុមហ៊ុនអាកាសចរណអន្តរជាតិ បើក​ជើង​ហោះ​ហើរពីបណ្តាប្រទេសនានា មកកាន់រាជធានីភ្នំពេញគឺមានកំណើនប្រមាណ៨៧% ក្នុង​នោះ​មានក្រុមហ៊ុនបើកជើងហោះហើរចំនួន២៨ក្រុមហ៊ុន មានកំណើន​ជើង​ហោះ​ហើរ​ក្នុង​មួយ​ថ្ងៃ​មួយ​ៗ​មាន​រង្វង់១២០ជើង និងមានអ្នកដំណើរអន្តរប្រមាណ ១៤០០នាក់ ខណៈឆ្នាំ​២០១៩ គឺ​មាន​ចំនួន​ហោះហើរប្រមាណ២៧០ជើង និងមានអ្នកដំណើរប្រមាណ១៦០០នាក់ក្នុងមួយថ្ងៃ។ដោយឡែកសម្រាប់អាកាសយន្តដ្ឋានអន្តរជាតិខេត្តសៀមរាប ដែល​ទើប​នឹង​ចាប់​ផ្តើម​បើក​ដំណើរ​ការ​នៅ​ពេល​ថ្មីនេះ នៅក្នុងឆ្នាំ២០២៣ គឺចំនួនជើងហោះហើរបាន​ងើប​ឡើង​វិញ​បាន​ប្រមាណ​ជាង​៤០%​ ក្នុ​ងនោះមានក្រុមហ៊ុន បើកជើងហោះហើរចំនួន១០ក្រុមហ៊ុន មានជើង​ហោះហើរ​សរុប​ជិត​៥០​ជើង​ក្នុងមួយថ្ងៃៗ និងមានអ្នកដំណើរប្រមាណ៤៥០០នាក់ក្នុងមួយថ្ងៃៗ ខណៈកាលពី​ឆ្នាំ២០១៩ គឺមានក្រុមហ៊ុនបើកជើងហោះហើរចំនួន៤០ក្រុមហ៊ុន មានជើងហោះហើរ​ចំនួន​១០០​ជើង និងមានអ្នកដំណើរប្រមាណជាង១០០០០នាក់ក្នុងមួយថ្ងៃ។ ឯកឧត្តម ស៊ីន ចាន់សិរីវុត្ថា បន្តថា ដោយឡែកសម្រាប់តែអាកាសយានដ្ឋានអន្តរជាតិកងកេង នៅខេត្តព្រះសីហនុ គឺ​បាន​ងើប​ឡើង​វិញ​បានប្រមាណតែរង្វង់២ជើងក្នុងមួយថ្ងៃៗ៕ អត្ថបទ៖ ស៊ុម សុខជា 

សម្ដេចធិបតី៖ រាជរដ្ឋាភិបាលបន្តយកចិត្តទុកដាក់ខ្ពស់លើវិស័យទឹក ពិសេសទឹកស្អាតជូនពលរដ្ឋប្រើប្រាស់បានគ្រប់គ្រាន់តាមតម្រូវការ

2024/01/03 12:11:38 pm        302
Facebook Telegram Linkin
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានមានប្រសាសន៍ថា ទឹកស្អាត គឺជាប្រភពនៃសុខុមាលភាព និងសេចក្តីត្រូវការជាចាំបាច់របស់ប្រជាពលរដ្ឋ ដើម្បី​ជា ផ្នែកមួយទ្រទ្រង់ដល់សុខភាព និងប្រព័ន្ធភាពស៊ាំ ហើយរាជរដ្ឋាភិបាល នីតិកាលទី៧ បាន​បន្ត​យក​ចិត្ត​ទុកដាក់ខ្ពស់លើវិស័យទឹក ពិសេសទឹកស្អាត ជូនដល់ប្រជាពលរដ្ឋ​កម្ពុជា​​ប្រើប្រាស់​បាន​គ្រប់​គ្រាន់តាមតម្រូវការ។ សម្ដេចថ្លែងថា ទឹក គឺជាអាទិភាពគន្លឹះទី៣ នៃយុទ្ធសាស្ត្របញ្ចកោណ-ដំណាក់កាលទី១ ក្នុង​ចំណោម​អាទិភាពគន្លឹះទាំង៥ មាន "មនុស្ស ផ្លូវ ទឹក ភ្លើង និងបច្ចេកវិទ្យា" ដោយនៅ​ក្នុង​បញ្ចកោណ​ទី២ មានកិច្ចការអាទិភាពចំនួន ៥ ហើយការលើកកម្ពស់ការតភ្ជាប់ និងបង្កើន​ប្រសិទ្ធភាព​វិស័យទឹកស្អាត គឺជាកិច្ចការអាទិភាពទី២ នៃបញ្ចកោណទី២ របស់រាជរដ្ឋាភិបាល នីតិកាល​ទី៧ ដែលមានគោលដៅផ្តោតលើការបន្តកសាង ពង្រឹងមូលដ្ឋានគ្រឹះ និង​បុរេ​លក្ខ​ខណ្ឌ​គន្លឹះ​ៗ សម្រាប់បង្កើនផលិតភាព តាមរយៈការបង្កើនប្រសិទ្ធភាពហេដ្ឋារចនាសម្ព័ន្ធគាំទ្រ និង​ការ​កសាង​ហេដ្ឋារចនាសម្ព័ន្ធថ្មីៗ។ សូមជម្រាបថា កាលពីថ្ងៃទី២៨ ខែធ្នូ ឆ្នាំ២០២៣ សមិទ្ធផលថ្មីសន្លាង​មួយក្នុង​ទឹកដី​ខេត្ត​ពោធិ៍សាត់ ត្រូវបានដាក់សម្ពោធឱ្យប្រើប្រាស់ជាផ្លូវការ គឺរោងចក្រផលិតទឹកស្អាតកម្ពុជា-ជប៉ុន ក្រុង​ពោធិ៍សាត់ ដើម្បីដោះស្រាយកំណើននៃតម្រូវការទឹកស្អាត និងលើក​កម្ពស់​ហេដ្ឋា​រចនា​សម្ព័ន្ធ​ទឹក​ស្អាត​នៅ​ក្នុងខេត្តពោធិ៍សាត់ ក្រោមគម្រោងជំនួយឥតសំណងរបស់រដ្ឋាភិបាលជប៉ុន តាមរយៈ​ទីភ្នាក់​ងារ JICA។ រោងចក្រនេះ មានសមត្ថភាពផលិតបានចំនួន ៦ ៦០០ម៉ែត្រគូប/ថ្ងៃ និងអាច​ជំរុញ​សមត្ថភាពផលិតទឹកស្អាតរបស់រដ្ឋាករទឹកពោធិ៍សាត់ដល់ ១៣ ៨៦០ម៉ែត្រគូប/ថ្ងៃ។ ការណ៍​នេះ នឹងបន្តពង្រឹងការចែកចាយទឹកស្អាត ប្រកបដោយគុណភាព សុវត្ថិភាព និរន្តរភាព និង​តម្លៃ​សមរម្យ​ដល់​ប្រជាពលរដ្ឋជាង ១៥ ០០០គ្រួសារ នៅក្នុងក្រុងពោធិ៍សាត់ និងផ្នែកខ្លះ​នៃ​ស្រុក​បាកាន និងស្រុកកណ្តៀង៕

លោកណេតាន់យ៉ាហ៊ូ កំពុងរងសម្ពាធដ៏ខ្លាំងការពីសង្រ្គាម នយោបាយ និងថវិកា

2024/01/03 12:07:27 pm        77
Facebook Telegram Linkin
នៅពេលដែលតុលាការកំពូលរបស់អ៊ីស្រាអែលកាលពីល្ងាចថ្ងៃចន្ទ បានប្រកាសច្បាប់កែប្រែប្រព័ន្ធតុលាការរបស់លោកនាយករដ្ឋមន្ត្រី បេនចាមីន ណេតាន់យ៉ាហ៊ូ (Benjamin Netanyahu)ថា ខុសច្បាប់និងមិនអាចអនុវត្តបានទេ គណបក្ស Likud របស់ខ្លួន បានរិះគន់ប្រព័ន្ធយុត្តិធម៌ចំពោះការសម្រេច ក្នុងអំឡុងសង្គ្រាមលើក្រុមហាម៉ាស នៅពេលដែលឯកភាពជាតិ គឺសំខាន់បំផុតនោះ។ប៉ុន្តែការឆ្លើយតបទៅនឹងការរិះគន់នោះ បានបង្ហាញថា វាគឺជាការកែប្រែច្បាប់ដែលនាំឲ្យមានការបែកបាក់គ្នា និងសង្គ្រាម ដែលចំនួនអ្នករិះគន់ កំពុងកើនឡើង។ ដូចដែលអ្នកនាំពាក្យយោធាលោក Daniel Hagari បាននិយាយថា អ៊ីស្រាអែល ត្រូវបានបែងចែក និងចុះខ្សោយចំពោះផែនការរបស់តុលាការ ប្រហែលជា បានដើរតួ ក្នុងការសម្រេចចិត្តរបស់ក្រុមហាម៉ាសក្នុងការវាយប្រហារ នៅក្នុងខែតុលា។សំឡេងជាច្រើនដែលទាញយកប្រយោជន៍ពីការទំនាក់ទំនងរវាងសង្រ្គាម និងការប៉ុនប៉ងដ៏មានប្រជានិយម ដើម្បីធ្វើឲ្យប្រព័ន្ធតុលាការចុះខ្សោយ ឆ្លុះបញ្ចាំងពីសម្ពាធកាន់តែកើនឡើងនិងតឹងតែងទៅលើលោក ណេតាន់យ៉ាហ៊ូទាំងផ្នែកយោធា ការទូត ថវិកា និងតុលាការ នៅពេលដែលលោកចាប់ផ្តើមឆ្នាំទីពីររបស់ខ្លួនដឹកនាំរដ្ឋាភិបាលចម្រុះស្តាំនិយម និងសាសនា ក្នុងប្រវត្តិសាស្ត្រអ៊ីស្រាអែល។សំណួរថាតើរដ្ឋាភិបាលរបស់លោក នឹងអាចបន្តឋិតថេរ នៅក្នុងឆ្នាំ២០២៤ដែរឬទេនោះ គឺជាប្រធានបទថ្មីនៃការជជែកដេញដោល ដែលឥឡូវនេះ នឹងបង្ហាញពីការមិនយកចិត្តទុកដាក់ទៅលើស្ថានភាពនៃជម្លោះប្រដាប់អាវុធដ៏អាក្រក់បំផុតរបស់អ៊ីស្រាអែល ក្នុងរយៈពេលកន្លះសតវត្សរ៍។លោក Amichai Cohen សមាជិកជាន់ខ្ពស់នៅវិទ្យាស្ថានប្រជាធិបតេយ្យអ៊ីស្រាអែល ដែលជាវិទ្យាស្ថានស្រាវជ្រាវសេរី បាននិយាយថា៖«មានភាពមិនស៊ីសង្វាក់គ្នាពិតប្រាកដរវាងការគ្រប់គ្រងរបស់លោកក្នុងសភា និងការមិនទុកចិត្តយ៉ាងខ្លាំងពីសំណាក់សាធារណជន ហើយវា គឺជាភាពច្របូកច្របល់ ដែលខ្ញុំមិនគិតថា អាចបន្តបានទៅទៀតបានទេ»។

ទីភ្នាក់ងារមុខរបរ និងការងារ៖ ឱកាសការងារក្នុងស្រុក ២៥,៥៩៧កន្លែង កំពុងរង់ចាំបងប្អូនចូលបម្រើការ

2024/01/03 11:56:20 am        265
Facebook Telegram Linkin
នៅថ្ងៃទី២ ខែមករា ឆ្នាំ២០២៣ នេះ ទីភ្នាក់ងារជាតិមុខរបរ និងការងារ (NEA) នៃ​ក្រសួងការងារ និងបណ្តុះបណ្តាលវិជ្ជាជីវៈ បានជូនដំណឹងដល់សាធារណៈជន នូវ​ឱកាស​ការងារ​ក្នុង​ស្រុកមានចំនួន ២៥,៥៩៧ កន្លែង ក្នុងវិស័យសំខាន់ៗបី នៃខេត្តចំនួន ១០ សម្រាប់​បងប្អូន​ងាយ​ស្រួល​ជ្រើសរើសចូលបម្រើការងារ។ ការផ្តល់ឱកាសការងារក្នុងស្រុក សរុប ២៥,៥៩៧កន្លែង ក្នុងនោះមានបីវិស័យគឺ វិស័យ​ឧស្សាហកម្ម ចំនួន ១៦,៤៨៣កន្លែង វិស័យសេវាកម្ម ចំនួន ២,៣៣៧កន្លែង និងវិស័យកសិកម្ម ចំនួន ៦,៧៧៧កន្លែង។ បន្ថែមពីនេះ ឱកាសការងារ មាននៅក្នុងខេត្តចំនួន ១០ មាន​ខេត្ត​កំពង់ស្ពឺ ៩,២២៣កន្លែង ខេត្តរតនគិរី ៦,៦០០កន្លែង ខេត្តកណ្តាល ២,២៥០កន្លែង ខេត្តកំពង់ឆ្នាំង ១,១៥០កន្លែង ខេត្តកំពង់ចាម ១,១០៤កន្លែង ខេត្តក្រចេះ ១,០៩០កន្លែង រាជធានីភ្នំពេញ ១,១០៣កន្លែង ខេត្តពោធិ៍សាត់ ១,០៩៨កន្លែង ខេត្តបន្ទាយមានជ័យ ៦១៦កន្លែង ខេត្តកោះកុង ៤២៩កន្លែង និងខេត្តផ្សេងៗទៀត ៩៣៤កន្លែង។ ទន្ទឹមគ្នានោះ មានមុខរបរចំនួន ១០ ប្រភេទ សម្រាប់បងប្អូនជ្រើសរើសតាមចំណង់ចំណូលចិត្ត និង​ជំនាញរបស់ខ្លួន ដែលមាន អ្នកបញ្ជាម៉ាស៊ីនដេរ កម្មករចំការដំណាំ អ្នកដោះខាត់លោហៈ អ្នក​ក្រឡឹងកង់ និងអ្នកសំលៀងឧបករណ៍ អ្នកប្រឹក្សាយោបល់ខាងហិរញ្ញវត្ថុ និងវិនិយោគទុន មន្ត្រី​ឥណទាន និង​ប្រាក់កម្ចី អ្នកបច្ចេកទេសត្រួតពិនិត្យដំណើរការផលិត អ្នកបម្រើ(Waiters) នាយក​គ្រប់គ្រងការផ្គត់ផ្គង់ការចែកចាយនិងពាក់ព័ន្ធ វិជ្ជាជីវៈខាងការផ្សព្វផ្សាយនិងទីផ្សារ អ្នកបោកគក់ និង​អ្នកអ៊ុតដោយប្រើដៃ និងមុខរបរផ្សេងៗទៀត។ តាមរយៈ​ការចេញផ្សាយរបស់ក្រសួង សម្រាប់បងប្អូនប្រជាពលរដ្ឋដែលចង់ស្វែងរកការងារ សូមទាក់​ទងមកទីភ្នាក់ងារជាតិមុខរបរ និងការងារ (NEA) នៃក្រសួងការងារ និង​បណ្តុះបណ្តាល​វិជ្ជាជីវៈ តាមលេខទូរស័ព្ទ ០៧៧ ២៣ ២៣ ៧៨ ឬ ០១៦ ៧៨ ៦៦ ៥៥ (Telegram)។សូមបញ្ជាក់ដែរថា ក្រោមការដឹកនាំរបស់ថ្នាក់ដឹកនាំរាជរដ្ឋាភិបាល ទីភ្នាក់ងារជាតិមុខរបរ និងការងារ (NEA) នៃក្រសួងការងារ និងបណ្តុះបណ្តាលវិជ្ជាជីវៈ បានចេញផ្សាយ​ឱកាស​ការងា​រនេះ កាលថ្ងៃទី២ ខែមករា ឆ្នាំ២០២៣។ បន្ថែមពីនេះ ក្រសួងបាននឹង​កំពុងគិតគូរយ៉ាង​យក​ចិត្ត​ទុក​ដាក់ពីវិស័យការងាររបស់ប្រជាពលរដ្ឋ និងព្យាយាមបង្កើនបន្ថែមទៀត ដើម្បីការកំណើន​សេដ្ឋកិច្ច​នៅ​ប្រទេសកម្ពុជា៕

ឯកឧត្តម សាយ សំអាល់ អំពាវនាវយុវជនបង្កើនចំណេះដឹង ដើម្បីឲ្យកម្ពុជាទទួលជោគជ័យ​គោលដៅ២០៥០

2024/01/03 11:12:11 am        215
Facebook Telegram Linkin
ភ្នំពេញ៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់បានថ្លែងថា រាជរដ្ឋាភិបាលរំពឹងឆ្នាំ២០៥០ កម្ពុជានឹងមានកំណើនធនធានមនុស្ស ដែល​ពោរពេញដោយចំណេះដឹង និងសមត្ថភាព សម្រាប់ចូលរួម​ប្រែក្លាយ​ប្រទេស​កម្ពុជា​ជា​ប្រទេស​​មាន​ប្រាក់​ចំណូលកម្រិតខ្ពស់ ដូចនេះសូមយុវជន ជាពិសេសសិស្ស​និស្សិត ត្រូវ​ខិតខំ​បង្កើន​ចំណេះ​ដឹង​របស់ខ្លួនឲ្យកាន់តែទូលំទូលាយ ។ក្នុងពេលជួបសំណេះសំណាល ជាមួយនិស្សិតជ័យលាភីអាហារូបករណ៍ ដែលនឹង​ត្រូវ​ទៅ​បន្ត​ការ​សិក្សា​នៅ​ណូវែលហ្សេឡង់ អូស្ត្រាលី និងបារាំង កាលពីថ្ងៃទី២ ខែមករា ឆ្នាំ២០២៣ ឯកឧត្តម​ឧប​នាយក​រដ្ឋ​មន្ត្រីមានប្រសាសន៍ថា រាជរដ្ឋាភិបាលតាំងពីអាណត្តិមុន រហូតមកដល់អាណត្តិថ្មី ដែល​ដឹក​នាំ​ដោយ​សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា នៅតែខិតខំ​អភិវឌ្ឍន៍​ធន​ធាន​មនុស្ស និងត្រូវបានដាក់ចូលក្នុងយុទ្ធសាស្ត្របញ្ចកោណ ដំណាក់កាលទី១ (ធនធានមនុស្ស ភ្លើង ទឹក ផ្លូវ និងបច្ចេកវិទ្យា) ។ ឯកឧត្តម បានបន្តថា យុវជន ជាពិសេសនិស្សិតជ័យលាភីអាហារូបករណ៍ ដែល​បាន​ទៅ​សិក្សា​នៅ​ក្រៅ​ប្រ​ទេសនេះ ត្រូវសិក្សាអំពីសភាពការណ៍នយោបាយ និងដំណើរ​វិវឌ្ឍន៍​ផ្នែក​សេដ្ឋកិច្ច​សកល​លោក ​ដើម្បីទុកជាបទពិសោធន៍ សម្រាប់ស្វែងយល់ អំពីអ្វីដែលត្រូវយកមកអនុវត្ត និង​អ្វី​ដែល​ត្រូវ​ជៀស​វាង ដើម្បីអភិវឌ្ឍន៍ខ្លួនឯងឱ្យកាន់តែល្អប្រសើរ និងចូលរួមអភិវឌ្ឍន៍សង្គមជាតិ ឱ្យ​កាន់​តែ​ឈាន​ឆ្ពោះ​ទៅមុខ ។ ក្នុងឱកាសនោះ ជាការឆ្លើយតប និស្សិតជ័យលាភីអាហារូបករណ៍ទាំងអស់ បានប្ដេជ្ញាថា ពេល​បញ្ចប់​ការសិក្សាហើយវិលត្រឡប់មកមាតុភូមិកម្ពុជាវិញ នឹង​ចូលរួម​ចំណែក​ជាមួយ​រាជ​រដ្ឋា​ភិបាល​ក្នុ​​ងការកសាង និងអភិវឌ្ឍន៍ប្រទេសជាតិ ស្របតាមយុទ្ធសាស្ត្របញ្ចកោណដំណាក់កាលទី១ និង​ដំណាក់​កាលបន្តបន្ទាប់ទៀត តាមសក្តានុពល និងជំនាញរៀងៗខ្លួន ។គួរបញ្ជាក់ថា និស្សិតជ័យលាភីអាហារូបករណ៍ទាំងអស់ នឹងត្រូវចេញ​ដំណើរ​ទៅ​បន្ត​ការ​សិក្សា​ថ្នាក់​អនុបណ្ឌិត និងបណ្ឌិតនៅអូស្ត្រាលី ណូវែលហ្សេឡង់ និងបារាំង នាខែមករា ឆ្នាំ២០២៤នេះ ដោយ​សិក្សា​លើមុខវិជ្ជាវិទ្យាសាស្ត្រវិស្វកម្ម នីតិសាស្ត្រ វិទ្យាសាស្រ្តនយោបាយ អប់រំ ការរចនា​ទីក្រុង វិជ្ជាជីវៈឆ្មប សេដ្ឋកិច្ច សុខភាពសាធារណៈ សហគ្រិនភាព និងនវានុវត្តន៍ គោល​នយោបាយ​សាធារណៈ និងបច្ចេកវិទ្យាជីវសាស្រ្ត រួមនឹងមុខវិជ្ជាសំខាន់ៗជាច្រើនទៀត ៕ អត្ថបទ បាន សុខរិទ្ធិ

និស្សិត និងពលរដ្ឋខ្មែររស់នៅតំបន់អឺរ៉ុប ប្រកាសស្វាគមន៍ដំណើរទស្សនកិច្ច​សម្តេចធិបតីទៅកាន់ប្រទេសបារាំង និងស្វីស

2024/01/03 10:25:31 am        214
Facebook Telegram Linkin
ភ្លាមៗក្រោយទទួលដំណឹងពីដំណើរទស្សនកិច្ចរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ទៅកាន់ប្រទេសបារាំង និងប្រទេសស្វីសនាពេលខាងមុខនេះ បង​ប្អូន​ប្រជា​ពលរដ្ឋ ក៏ដូចជានិស្សិតខ្មែរដែលកំពុងសិក្សា និងរស់នៅ​តំបន់​អឺរ៉ុប​បាន​ប្រកាស​ចាំ​ទទួល​ស្វាគមន៍​ដំណើរ​ទស្សនកិច្ចរបស់សម្តេចនាថ្ងៃទី១៨-១៩ ខែមករា ឆ្នាំ២០២៤ខាងមុខនេះ។តាមរយៈវិដេអូឃ្លីបដាច់ដោយឡែកពីគ្នា របស់បងប្អូនប្រជាពលរដ្ឋខ្មែរ និងនិស្សិតខ្មែរទាំងនោះ បាន​លើក​ឡើងថា ពួកគេពិតជាមានភាពកក់ក្តៅ និងក្តីរំភើបយ៉ាងខ្លាំងបន្ទាប់ពីឮដំណឹងថា សម្តេច​ធិបតី នាយករដ្ឋមន្រ្តីនឹងដឹកនាំគណៈប្រតិភូកម្ពុជាទៅកាន់ប្រទេសបារាំង និងស្វី​ស​ខាង​មុខ​នេះ ដើម្បីចូលរួមក្នុងកិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោក (WEF) ឆ្នាំ២០២៤ នៅប្រទេសស្វីស។ ហើយបងប្អូន ទាំងនោះក៏បានរំពឹងថា ដំណើរទស្សន​កិច្ច​ជា​លើក​ដំបូង​របស់​សម្តេច​ធិបតី​ទៅ​កាន់​ប្រទេសបារាំង និងស្វីស ក្រោយសម្តេចធ្វើជានាយករដ្ឋមន្រ្តីកម្ពុជានេះ នឹង​ទទួ​ល​បាន​ផ្លែផ្កា និងផលប្រយោជន៍សម្រាប់ជាតិ និងប្រ ជាជន​កម្ពុជា​កាន់​តែ​ល្អ​ប្រសើរ​បន្ថែម​ទៀត​។បងប្អូនប្រជាពលរដ្ឋ ក៏ដូចជានិស្សិតខ្មែរទាំងនោះបានប្រកាសថា ពួកគេនឹងរង់ចាំទទួលស្វាគមន៍ ដោយ​ស្មោះស្ម័គ្រចំពោះដំណើរទស្សនកិច្ចរបស់សម្តេច និ​ង​ថ្លែង​កោត​សរសើរ​ចំពោះ​សម្តេច​ថា​ជា​មេ​ដឹកនាំ វ័យក្មេង និងឆ្លាតវៃមួយរូប ដែលមាន​ចក្ខុវិស័យ​វែង​ឆ្ងាយ​ និង​ប្រកដ​និយម ដើម្បី​ដឹកនាំ​ប្រទេស​កម្ពុជា ឲ្យកាន់តែមានភាពរីកចម្រើនបន្ថែមទៀតផងដែរ។បងប្អូនប្រជាពលរដ្ឋ ក៏ដូចជានិស្សិតខ្មែរ ទាំងនោះក៏បានថ្លែងអំណរអគុណចំពោះការដឹកនាំរបស់ សម្តេច​ធិបតី ហ៊ុន ម៉ាណែត និងសម្តេចតេជោ ហ៊ុន សែន អតីតនាយករដ្ឋមន្រ្តី ដែល​បាន​ធ្វើ​ឲ្យ​ប្រទេសកម្ពុជា មានសុខសន្តិភាព និងការអភិវឌ្ឍរហូតដល់សព្វថ្ងៃនេះផងដែរ។សូមបញ្ជាក់ថា តបតាមការអញ្ជើញរបស់ប្រធានាធិបតីបារាំងលោក អេម៉ានុយអែល ម៉ាក្រុង សម្តេច​ធិបតី ហ៊ុន ម៉ាណែត នឹងបំពេញ​ទស្សនកិច្ច​ ​ផ្លូវការ​នៅ​ប្រទេស​បារាំង​ចំនួន​ពីរ​ថ្ងៃ​គឺ​ចាប់​ពី​ថ្ងៃ​ទី១៨-១៩ ខែមករា ឆ្នាំ២០២៤ខាងមុខនេះ ហើយ​បន្ទាប់​សម្តេច​នឹង​អញ្ជើញ​បន្ត​ដំណើរ​ទៅ​កាន់​ប្រទេស​ស្វីស ដើម្បីចូលរួមក្នុងកិច្ចប្រជុំប្រចាំឆ្នាំរបស់វេទិកាសេដ្ឋកិច្ចពិភពលោក (WEF) ឆ្នាំ២០២៤។ក្នុងដំណើរទស្សនកិច្ចជាលើកដំបូងរបស់សម្តេចធិបតី ទៅកាន់​តំបន់​អឺរ៉ុប​នេះ​ត្រូវ​បាន​ប្រធានា​ធិបតី​បារាំង នឹងធ្វើឲ្យទំនាក់ទំនងកម្ពុជា និង​បារាំង​កាន់​តែ​រីក​ចម្រើន​ទៅ​មុខ​បន្ថែម​ទៀត​នូវ​ការ​ធ្វើ​ពិពិធកម្ម ដើម្បីគ្រប់គ្រងផលប្រយោជន៍រួមគ្នា នៃប្រទេសទាំងពីរ។ នៅក្នុងលិខិតអញ្ជើញ លោក​ប្រធានា​ធិបតី បានរំពឹង​ថា​ «ដំណើរ​ទស្សនកិច្ច​នេះ​នឹ​ង​ធ្វើ​ឱ្យ​កិច្ច​សហប្រតិបត្តិការ​រវាង​ប្រទេស​យើង​ទាំង​ពីរ​កាន់តែ​មានភាពស៊ីជម្រៅបន្ថែមទៀត នូវការធ្វើពិពិធកម្ម ដើម្បី​គ្រប់គ្រង​ផល​ប្រយោជន៍​រួម​គ្នា ក្នុងនោះមានដូចជាបញ្ហាប្រឈមនៃសាកលភាវូបនីយកម្មដែលមានការផ្លាស់ប្តូរ និង​កំពុងជួបប្រទះនាពេលបច្ចុប្បន្ន ។ វានឹងអនុញ្ញាតឱ្យយើងពិនិត្យមើលនូវមធ្យោបាយ ដែល យើង​អាច​ប្រើ​ប្រាស់រួមគ្នា ដើម្បីពង្រឹងសណ្តាប់ធ្នាប់សកល ដែលផ្អែកលើវិធានច្បាប់ ដែល​នឹង​អនុញ្ញាត​ដល់​ការធានានូវ អធិបតេយ្យភាព និងពោរពេញទៅដោយឯករាជ្យ នៃរដ្ឋទាំងអស់»៕អត្ថបទ៖ បាន ចក់

បណ្ដាញសង្គម

ព័ត៌មានថ្មីៗ

ចាប់ពីថ្ងៃទី២៧ ខែមិថុនាដល់ថ្ងៃទី១៦ ខែកក្កដានេះ គ.ប.ឆ.ប. បង្រ្កាប ONLINESCAMS ២០ទីតាំងឃាត់ខ្លួនជនសង្ស័យ ១.៣៦២ នាក់ ក្នុងនោះជនជាតិវៀតណាម ៣៤៧នាក់
07/17/2025 10:07 PM
Facebook Telegram Linkin
រាជរដ្ឋាភិបាលបានកំណត់តម្លៃនិងតួនាទីព្រៃឈើ ដោយមិនកាត់ផ្តាច់ចេញពីវិស័យអាទិភាពរបស់រដ្ឋ
07/17/2025 09:07 PM
Facebook Telegram Linkin
ឯកឧត្តមឧបនាយករដ្ឋមន្ត្រី ប្រាក់ សុខុន អញ្ជើញធ្វើបាឋកថាស្តីពី «សភាពការណ៍អន្តរជាតិ និងនយោបាយការបរទេសរបស់កម្ពុជា» ចែករំលែកដល់សិស្សមន្ត្រីសាលាភូមិន្ទរដ្ឋបាល
07/17/2025 09:07 PM
Facebook Telegram Linkin
ក្រសួងការងារបដិសេធចំពោះជនខិលខូចប្រើប្រាស់រូប និងឈ្មោះ ឯកឧត្តម ហេង សួរ ក្នុងចេតនាឆបោកសាធារណជន
07/17/2025 09:07 PM
Facebook Telegram Linkin
តើហេតុអ្វីបានជាប្រទេសប៉ាគីស្ថានងាយរងគ្រោះដោយសារទឹកជំនន់ស្លាប់មនុស្ស?
07/17/2025 08:07 PM
Facebook Telegram Linkin
ឯកឧត្តមឧបនាយករដ្ឋមន្ត្រី ហ៊ុន ម៉ានី ជួបសំណេះសំណាលជាមួយសមាជិក សមាជិកា ក្រុមការងារគ្រូពេទ្យស្ម័គ្រចិត្ត ឯកឧត្តម ហ៊ុន ម៉ានី ដែលទើបនឹងជ្រើសរើសថ្មី ប្រចាំសាកលវិទ្យាល័យវិទ្យាសាស្រ្តសុខាភិបាល ចំនួន ៥៨៤នាក់
07/17/2025 08:07 PM
Facebook Telegram Linkin
ការទម្លាក់គ្រាប់បែករបស់រុស្ស៊ីសម្លាប់មនុស្ស ៤នាក់ និង ២៧នាក់ រងរបួសនៅទីក្រុង Dobropillia ប្រទេសអ៊ុយក្រែន
07/17/2025 08:07 PM
Facebook Telegram Linkin
ក្រសួងឧស្សាហកម្ម ដាក់ប្រព័ន្ធបន្សុទ្ធទឹកស្អាតនៅមន្ទីរពេទ្យគន្ធបុប្ផា ជូនដល់អ្នកព្យាបាលជំងឺពិសា
07/17/2025 08:07 PM
Facebook Telegram Linkin
សាស្ត្រាចារ្យសាកលវិទ្យាល័យតូក្យូ ចាប់អារម្មណ៍ស្វែងយល់បន្ថែមអំពីកម្ពុជា និងការអភិវឌ្ឍសង្គម-សេដ្ឋកិច្ច
07/17/2025 08:07 PM
Facebook Telegram Linkin
សារព័ត៌មាន NBC News៖ ការវាយប្រហាររបស់អាមេរិក បានបំផ្លាញទីតាំងនុយក្លេអ៊ែរអ៊ីរ៉ង់តែមួយប៉ុណ្ណោះ
07/17/2025 08:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.