នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
សម្ដេចធិបតី៖ រាជរដ្ឋាភិបាល និងមហាគ្រួសារខ្មែរ​នៅ​ជាមួយ​កងទ័ព​ជួរ​មុខ​គាំទ្រ​គ្រប់​មធ្យោបាយ​ទាំង​អស់
សម្ដេចធិបតី ដឹកនាំគណៈប្រតិភូចូលក្រាបបង្គំគាល់ព្រះករុណា ព្រះមហាក្សត្រ ទូលថ្វាយលទ្ធផលចុះបញ្ជីបូជនីយដ្ឋានចងចាំនៃកម្ពុជា ក្នុងបញ្ជីបេតិកភណ្ឌពិភពលោក
សភាតំណាងប្រជាជនចិនចាត់ទុកសម្តេចតេជោ ជាតួអង្គសំខាន់បន្ត​ពីព្រះបរម​រតនកោដ្ឋ​ក្នុង​ការ​ពូន​ជ្រំ​ទំនាក់ទំនងរវាងកម្ពុជា និងចិន
សម្តេចតេជោអនុញ្ញាតឱ្យសមាជិកគណៈកម្មាធិការអចិន្ត្រៃយ៍សភាប្រជាជនចិនជួបសម្តែងការគួរសម

នយោបាយ​ និង ការអភិវឌ្ឍន៍

គណបក្សប្រជាធិបតេយ្យអាមេរិក ឈ្នះការបោះឆ្នោតស្ដីពីសិទ្ធិរម្លូតកូន នៅរដ្ឋឃិនថាក់គីនិងរដ្ឋ អូហៃយ៉ូ

2023/11/08 11:34:41 am        72
Facebook Telegram Linkin
គណបក្សរបស់លោក Joe Biden បានទទួលជ័យជម្នះក្នុងការបោះឆ្នោតដ៏ធំចំនួនពីរកាលពីថ្ងៃអង្គារ ខណៈអភិបាលរដ្ឋមកពីគណបក្សប្រជាធិបតេយ្យ លោក អែនឌី បេស៊ៀ (Andy Beshear)ត្រូវបានជាប់ឆ្នោតជាថ្មី នៅក្នុងរដ្ឋឃិនថាក់គី (Kentucky) ហើយក្រុមអ្នកបោះឆ្នោតរដ្ឋ អូហៃយ៉ូ (Ohio) បានគាំទ្រវិធានការបោះឆ្នោតដែលបញ្ជាក់ពីសិទ្ធិរម្លូតកូននៅក្នុងរដ្ឋធម្មនុញ្ញរបស់រដ្ឋនេះ ។ លោក Beshear ទទួលបានអាណត្តិទីពីរនៅក្នុងរដ្ឋធ្លាប់គ្រប់គ្រងដោយគណបក្សសាធារណៈរដ្ឋមួយជាទីដែលអតីតប្រធានាធិបតី លោក Donald Trump បានផ្តួល Biden ចំនួន២៦ ពិន្ទុកាលពីឆ្នាំ ២០២០ ។ សារព័ត៌មាន AP បានព្យាករណ៍ថា លោកBeshear បានយកឈ្នះគូប្រជែងខាងគណបក្សសាធារណរដ្ឋដែលទើបជាប់ថ្មីៗ គឺ លោកដានីញែលកាម៉េរ៉ុន (Daniel Cameron) ដែលត្រូវបានគាំទ្រដោយលោក Trump ពីរម៉ោងបន្ទាប់ពីការបោះឆ្នោតបានបិទនៅរដ្ឋ Kentucky។ក្រោយមកសេតវិមានបាននិយាយថា លោក Biden បានទូរស័ព្ទទៅលោក Beshear ដើម្បីអបអរសាទរលោកចំពោះជ័យជម្នះរបស់លោក។ក្រុមអ្នកបោះឆ្នោតក្នុងរដ្ឋ Ohio ជារដ្ឋគ្រប់គ្រងដោយគណបក្សសាធារណរដ្ឋ ដែល Trump បានឈ្នះចំនួន៨ពិន្ទុក្នុងឆ្នាំ កាលពីឆ្នាំ២០២០ ទំនងជាគាំទ្រយ៉ាងច្រើនលើសលប់ចំពោះវិធានការបោះឆ្នោតដែលបានកំណត់សិទ្ធិក្នុងការរំលូតកូននៅក្នុងរដ្ឋធម្មនុញ្ញរបស់រដ្ឋនេះ ។ វិធានការបោះឆ្នោតនេះបានធ្វើឡើងបន្ទាប់ពីអភិបាលរដ្ឋ Ohio លោកម៉ៃដេវ៉ាញ (Mike DeWine) បានចុះហត្ថលេខាលើច្បាប់មួយ ដែលគេហៅថា ពង្រាងច្បាប់ដ៏រន្ធត់ចិត្ត ដែលហាមឃាត់ការរម្លូតកូន បន្ទាប់ពីមានផ្ទៃពោះប្រាំមួយសប្តាហ៍ នៅពេលដែលស្ត្រីជាច្រើនមិនទាន់ដឹងថាពួកគេមានផ្ទៃពោះ។លទ្ធផលនៅក្នុងរដ្ឋ Ohio គឺជាឧទាហរណ៍ចុងក្រោយបំផុតនៃអ្នកបោះឆ្នោតដែលច្រានចោលគោលនយោបាយរំលូតកូនដោយកំហិត បន្ទាប់ពីតុលាការកំពូលកាលពីឆ្នាំមុនបានបដិសេធសេចក្ដីសម្រេចជាប្រវត្តិសាស្ត្រស្ដីពីសិទ្ធិរម្លូតកូន(Roe vs Wade) ដែលកំណត់សិទ្ធិស្របច្បាប់ចំពោះនីតិវិធីនៅកម្រិតសហព័ន្ធ៕

អាមេរិក និងចិន បើកកិច្ចចរចាគ្រប់គ្រងអាវុធក្នុងន័យ«ស្ថាបនា»

2023/11/08 11:30:35 am        91
Facebook Telegram Linkin
សហរដ្ឋអាមេរិក បាននិយាយកាលពីថ្ងៃអង្គារទី៧ ខែវិច្ឆិកាថា ខ្លួនបានបើកកិច្ចពិភាក្សាក្នុងន័យស្ថាបនាជាមួយប្រទេសចិនក្នុងសប្តាហ៍នេះ ស្តីពីការគ្រប់គ្រងអាវុធ និងការមិនរីកសាយភាយជាផ្នែកនៃកិច្ចខិតខំប្រឹងប្រែង ដើម្បីរក្សាទំនាក់ទំនងបើកចំហ មុនពេលលទ្ធភាពកិច្ចប្រជុំរបស់ប្រធានាធិបតីអាមេរិក និងចិននៅក្នុងខែនេះ។កិច្ចពិភាក្សាស្តីពីការគ្រប់គ្រងអាវុធ នៅទីក្រុងវ៉ាស៊ីនតោន កាលពីថ្ងៃចន្ទ ដែលមន្ត្រីអាមេរិក បានពិពណ៌នាថាជាលើកដំបូង ចាប់តាំងពីរដ្ឋបាលលោក អូបាម៉ា ត្រូវបានដឹកនាំដោយឧបការីរដ្ឋមន្ត្រីការបរទេសអាមេរិក អ្នកស្រីMallory Stewart និងលោក Sun Xiaobo អគ្គនាយកនៃក្រសួងការបរទេសចិន។អាទិភាពមួយក្នុងចំណោមអាទិភាពចម្បងៗរបស់សហរដ្ឋអាមេរិក គឺដើម្បីធានាថា ការប្រកួតប្រជែងខ្លាំងរវាងប្រទេសដែលមានសេដ្ឋកិច្ចធំជាងគេទាំងពីរ ហើយការខ្វែងគំនិតគ្នារបស់ពួកគេជុំវិញបញ្ហាជាច្រើនពីពាណិជ្ជកម្មទៅកោះតៃវ៉ាន់ និងសមុទ្រចិនខាងត្បូង មិនក្លាយទៅជាជម្លោះ។ទីក្រុងវ៉ាស៊ីនតោន ក៏មានការព្រួយបារម្ភផងដែរអំពីការពង្រីកការផលិតអាវុធនុយក្លេអ៊ែររបស់ចិន ដែលតាមការប៉ាន់ប្រមាណ មាន៥០០ក្បាលគ្រាប់ យោងតាមមន្ទីរបញ្ចកោណ នៅតែតិចជាងអាវុធរបស់អាមេរិក និង រុស្ស៊ី ប៉ុន្តែអ្នកវិភាគខ្លះជឿថា អាចបង្កើនហានិភ័យនៃជម្លោះ។ក្រសួងការបរទេសសហរដ្ឋអាមេរិក បាននិយាយថា៖ «ភាគីទាំងពីរ បានធ្វើការពិភាក្សាយ៉ាងច្បាស់លាស់ និងស៊ីជម្រៅលើបញ្ហាដែលទាក់ទងនឹងការគ្រប់គ្រងអាវុធ និងការមិនរីកសាយភាយជាផ្នែកនៃកិច្ចខិតខំប្រឹងប្រែងបន្ត ដើម្បីរក្សាទំនាក់ទំនងបើកចំហរ និងទទួលខុសត្រូវក្នុងការគ្រប់គ្រងទំនាក់ទំនងរវាងសហរដ្ឋអាមេ រិក-សាធារណរដ្ឋប្រជាមានិតចិន(PRC)។

ក្រសួងវប្បធម៌ ផ្តល់ឱកាសសិក្សាវគ្គបណ្តុះបណ្តាលភាពយន្តខ្លីកម្ពុជា ដោយឥតគិតថ្លៃ

2023/11/08 11:08:44 am        270
Facebook Telegram Linkin
ភ្នំពេញ៖ ក្រសួងវប្បធម៌ និងវិចិត្រសិល្បៈ បានប្រកាសផ្តល់ឱកាសសិក្សាវគ្គបណ្តុះបណ្តាលភាពយន្តខ្លីកម្ពុជា ដោយឥតគិតថ្លៃ នឹងផ្តោតសំខាន់លើការសរសេរអត្ថបទភាពយន្ត (Script) ការដឹកនាំរឿង (Directing) ការថត (Cinematography) ព្រមទាំងជំនាញមួយចំនួនទៀត ដូចជា៖ ការតុបតែងលំអរឆាក(Arts and Prop) ការកាត់ត-ផ្តុំរូបភាព (Editing) ការផ្តុំសំឡេង (Sound mixing) សិក្ខាកាមមិនតម្រូវឲ្យបង់ប្រាក់កម្រៃអ្វីទាំងអស់ សម្រាប់ការបណ្តុះបណ្តាលនេះ។លោក ប៉ុក បូរក្ស ប្រធាននាយកដ្ឋានសិល្បៈភាពយន្ត និងផ្សព្វផ្សាយវប្បធម៌ បានថ្លែងប្រាប់BTV ព័ត៌មាន នាព្រឹកថ្ងៃទី៨ ខែវិចិ្ឆកា ឆ្នាំ២០២៣នេះថា ដោយមានការគាំទ្រពីក្រសួងវប្បធម៌ និងវិចិត្រ​សិល្បៈ នាយកដ្ឋានសិល្បៈភាពយន្ត ​និងផ្សព្វផ្សាយវប្បធម៍ រួមជាមួយមជ្ឈមណ្ឌល​បណ្តុះបណ្តាល​ជំនាញ និងទទួលការថតភាពយន្តនៅកម្ពុជា និង Cine Hub នឹងបើកវគ្គបណ្តុះបណ្ដាល​ភាពយន្តខ្លីកម្ពុជា (Cambodia Film Lab) ​ក្នុងគោលបំណងផ្ដល់ឱកាសដល់អ្នកមានទេពកោសល្យ និងឧបនិស្ស័យក្នុងការផលិតភាពយន្ត ចូលរួមពង្រឹងសមត្ថភាព និងបង្កើតធនធានមនុស្សថ្មីៗ​ក្នុងវិស័យភាពយន្ត។លោក ប៉ុក បូរក្ស បានបញ្ជាក់ទៀតថា យើងទាំងអស់គ្នាបានដឹងហើយថា ដើម្បីលើកកម្ពស់គុណភាពផលិតផលភាពយន្តក្នុងស្រុកមួយបាន យើងត្រូវការបណ្តុះបណ្តាលធនធានមនុស្ស មូលធនមនុស្ស គឺជាកត្តាសត្យានុម័តក្នុងការផលិតភាពយន្តមួយឲ្យមានកម្រិតស្តង់ដា។ ក៏ប៉ុន្តែទន្ទឹមនឹងមានធនធានមនុស្សហើយនោះ យើងនៅត្រូវការហេដ្ឋារចនាសម្ព័ន្ធ និងការជួយលើកទឹកចិត្តដទៃទៀត ពីសំណាក់ក្រសួង ស្ថាប័នពាក់ព័ន្ធ ដើម្បីធ្វើឲ្យការផលិតភាពយន្តនោះ មានគុណភាពមួយ ដែលអាចប្រកួតប្រជែង នឹងខ្សែភាពយន្តហូរចូលពីក្រៅប្រទេស ជាពិសេសក៏ជាឱកាសមួយឲ្យផលិតកររបស់យើង ឈានជើងចូលទៅប្រកួតប្រជែងនៅលើឆាកអន្តរជាតិ។ យើងអាចដណ្តើមទីផ្សារគេបាន​នៅក្រៅប្រទេស លុះត្រាតែយើងមានគុណភាពមួយ ​គេទទួលយកបាន។ កន្លងមក​តាមការ​ខិតខំជួយ​សម្របសម្រួល​របស់ក្រសួងវប្បធម៌​ និង​វិចិត្រសិល្បៈ គឺមានផលិតករ មានស្នាដៃភាព​យន្តខ្មែរជាច្រើន ​ក៏បានចេញទៅក្រៅប្រទេស យកទៅ​ដាក់​បញ្ចាំង​ប្រកួតប្រជែង​លើ​ទីផ្សារអន្តរជាតិ ស្មើមុខ ​ស្មើមាត់ នេះជាចំណុចមួយនៃ​ការវិវត្តន៍​ថ្មីលើវិស័យសិល្បៈភាពយន្ត៕អត្ថបទ រដ្ឋា

ជប៉ុនជាម្ចាស់ផ្ទះជំនួបកំពូល G7 អំពាវនាវឲ្យមានកិច្ចសហប្រតិបត្តិការសម្រាប់ការផ្អាកប្រយុទ្ធមនុស្សធម៌នៅហ្កាហ្សា

2023/11/08 10:46:44 am        87
Facebook Telegram Linkin
រដ្ឋមន្ត្រីការបរទេសជប៉ុន លោកស្រីយ៉ូកូកាមិកាវ៉ា (Yoko Kamikawa) បាននិយាយកាលពីថ្ងៃអង្គារថា សហគមន៍អន្តរជាតិត្រូវការកិច្ចសហប្រតិបត្តិការឆ្ពោះទៅរកការផ្អាកការប្រយុទ្ធដើម្បីមនុស្សធម៌ក្នុងសង្គ្រាមអ៊ីស្រាអែល និងក្រុមហាម៉ាស ដើម្បីផ្តល់ការផ្គត់ផ្គង់សំខាន់ៗដល់ជនស៊ីវិលនៅតំបន់ហ្កាហ្សា ក្នុងកិច្ចប្រជុំក្រុមរដ្ឋមន្ត្រីការបរទេសប្រទេសជាសមាជិកទាំង៧ រួមមាន ចក្រភពអង់គ្លេស កាណាដា បារាំង អាល្លឺម៉ង់ អ៊ីតាលី ជប៉ុន និងសហរដ្ឋអាមេរិក។ បន្ទាប់ពីកិច្ចប្រជុំទទួលទានអាហារថ្ងៃត្រង់ថ្ងៃដំបូងនៃការជួបជុំគ្នារយៈពេលពីរថ្ងៃ គឺថ្ងៃទី៧និង៨ វិច្ឆិកា នៅទីក្រុងតូក្យូ លោកស្រី Kamikawa ក៏បានប្រាប់អ្នកសារព័ត៌មានថា ប្រទេសជាសមាជិកទាំង៧ នឹងបង្ហាញជំហររួបរួម ចំពោះស្ថានភាពចុងក្រោយបំផុតនៅតំបន់មជ្ឈិមបូព៌ា ក្នុងសេចក្តីថ្លែងការណ៍មួយនៅថ្ងៃពុធនេះ ។ប្រមុខការទូតជប៉ុន រូបនេះ បាននិយាយថា អ៊ីស្រាអែលបានសម្រុកទម្លាក់គ្រាប់បែកដ៏សន្ធាប់ទៅលើទឹកដីប៉ាឡេស្ទីន គ្រប់គ្រងដោយក្រុមហាម៉ាស ជាការឆ្លើយតបទៅនឹង ការវាយប្រហារភេរវកម្ម ដោយក្រុមសកម្មប្រយុទ្ធប៉ាឡេស្ទីនកាលពីខែមុន។ការអត្ថាធិប្បាយរបស់លោកស្រីធ្វើឡើងស្របពេលមានការរិះគន់កាន់តែខ្លាំងឡើងលើវិសាលភាពនៃការវាយប្រហារតាមផ្លូវអាកាស និងថ្មើរជើង របស់អ៊ីស្រាអែល ដែលមួយចំនួននិយាយថាបំពានច្បាប់អន្តរជាតិ ក្នុងការសងសឹកចំពោះការវាយប្រហារឆ្លងព្រំដែនដ៏គួរឱ្យភ្ញាក់ផ្អើលរបស់ក្រុមហាម៉ាសកាលពីថ្ងៃទី ៧ខែតុលា។ប្រភពរដ្ឋាភិបាលបាននិយាយថា ប្រទេសប្រជាធិបតេយ្យធំៗទាំងនោះ គ្រោងថ្កោលទោសក្រុមហាម៉ាសនៅក្នុងសេចក្តីថ្លែងការណ៍សម្រាប់ការវាយប្រហារដ៏គួរឱ្យភ្ញាក់ផ្អើលរបស់ខ្លួនទៅលើអ៊ីស្រាអែលដែលបានបង្កឱ្យមានការវាយបកពីអ៊ីស្រាអែលដែលនៅតែបន្តក្នុងតំបន់ហ្កាហ្សារហូតដល់សព្វថ្ងៃនេះ៕

ខេត្តព្រះវិហារ ប្រារព្ធទិវាបុណ្យឯករាជ្យជាតិ៩វិច្ឆិកា និងខួបលើកទី១៩ឆ្នាំ នៃការគ្រងព្រះបរមរាជសម្បត្តិព្រះមហាក្សត្រ

2023/11/07 04:02:17 pm        182
Facebook Telegram Linkin
ព្រះវិហារ៖ នៅព្រឹកថ្ងៃទី០៧ ខែវិច្ឆិកា ឆ្នាំ២០២៣ រដ្ឋបាលខេត្តព្រះវិហារ ប្រារព្ធមីទ្ទីងអបអរសាទរខួបអនុស្សាវរីយ៍លើកទី៧០ ទិវាបុណ្យឯករាជ្យជាតិ៩វិច្ឆិកា (៩ វិច្ឆិកា ១៩៥៣-២០២៣) និងខួបលើកទី១៩ឆ្នាំ នៃការគ្រងព្រះបរមរាជសម្បត្តិ របស់ព្រះករុណា ព្រះបាទសម្ដេច ព្រះបរមនាថ នរោត្ដម សីហមុនី ព្រះមហាក្សត្រ នៃព្រះរាជាណាចក្រកម្ពុជា។ ពិធីនេះប្រារព្ធធ្វើឡើងនៅស្ដូបវិមានឯករាជ្យ ស្ថិតក្នុងក្រុងព្រះវិហារ ខេត្តព្រះវិហារ ក្រោមអធិបតីភាពឯកឧត្តម គីម រិទ្ធី អភិបាលនៃគណៈអភិបាលខេត្តព្រះវិហារ មានចូលរួមពីសំណាក់ឯកឧត្តម លោកជំទាវ ជាសមាជិកក្រុមប្រឹក្សាខេត្ត អភិបាលរងខេត្ត កងកម្លាំងប្រដាប់អាវុធ មន្ត្រីរាជការ​ បងប្អូនប្រជាពលរដ្ឋ ​លោកគ្រូអ្នកគ្រូ សិស្សានុសិស្ស យុវជនកាកបាទក្រហម ​កាយរឹទ្ធិ និងយុវជនស.ស.យ.ក ខេត្ត ​ជាច្រើនរូបទៀត។នាឱកាសនោះ ឯកឧត្តម គីម រិទ្ធី បានមានប្រសាសន៍ថា ថ្ងៃនេះជាថ្ងៃ​ឧត្ដុង្គឧត្ដម​ដែលខេត្តព្រះវិហារ បានប្រារព្ធពិធីអបអរសាទរខួបអនុស្សាវរីយ៍លើកទី៧០​ នៃទិវាបុណ្យឯករាជ្យជាតិ ​៩វិច្ឆិកា និងផ្សាភ្ជាប់ជាមួយព្រះរាជពិធីគ្រងព្រះបរមរាជសម្បត្តិខួបលើកទី ១៩ឆ្នាំ របស់ព្រះករុណាព្រះបាទ សម្ដេចព្រះបរមនាថ នរោត្ដម សីហមុនី ​ព្រះមហាក្សត្រ នៃព្រះរាជាណាចក្រកម្ពុជា ជាទីគោរពសក្ការៈរបស់យើងផងដែរ។ពិធីនេះធ្វើឡើងក្នុងន័យដើម្បីសម្តែងនូវ​មនោសញ្ចេតនា​សោមនស្ស​រីករាយ ​អបអរសាទរ នៃការ​គ្រងរាជសម្បត្តិរបស់ព្រះអង្គ ​ក៏ដូចជាការដឹងគុណនូវទិវាជាប្រវត្តិសាស្ត្រ និង​ស្នា​ព្រះហស្ថ​ដ៏​ឧត្ដុង្គឧត្ដម​ថ្លៃថ្លារបស់ ​ព្រះករុណា ព្រះបាទសម្តេច ​ព្រះនរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ ព្រះបរមរតនកោដ្ឋ ដែលព្រះអង្គទ្រង់​បានលះបង់នូវព្រះកាយពល​ និង​ព្រះ​បញ្ញាញាណ​យ៉ាង​ក្លៀវក្លា​បំផុត​ ធ្វើការតស៊ូ​ក្នុងក្របខ័ណ្ឌ​ព្រះរាជបូជនីយកិច្ច ​ដើម្បី​ទាមទារឯករាជ្យ​នៅប្រទេសកម្ពុជា ឲ្យរួចចាកផុត​ពី​អាណានិគម​និយម​បារាំង ដើម្បីមាតុភូមិ និងប្រជាពលរដ្ឋខ្មែរគ្រប់រូប ​រហូតដណ្តើមបានទាំងស្រុងមកវិញនូវ ឯករាជ្យជាតិជូនជាតិមាតុភូមិពេញ​បរិបូរណ៍​ នាថ្ងៃទី០៩ ខែវិច្ឆិកា ឆ្នាំ១៩៥៣។ឯកឧត្តម បានបន្ដថា រាជរដ្ឋាភិបាលកម្ពុជាចាប់ពីអាណត្តិទី១ រហូត ដល់អាណត្តិទី៦ ដឹកនាំដោយ សម្តេចអគ្គមហាសេនាបតីតេជោ​ ហ៊ុន សែន ក្រោមម្លប់ដ៏ត្រជាក់របស់​ព្រះបរមរតនកោដ្ឋ និង ព្រះករុណា​ ព្រះបាទ​សម្តេចព្រះបរមនាថ ​នរោត្តម សីហមុនី តែងតែ​ដង្ហែរតាមព្រះរាជតម្រិះដ៏ថ្លៃថ្លា​របស់ព្រះអង្គ​ និងបានសម្តែងនូវ​មនោសញ្ចេតនា​គោរព​ស្រលាញ់​ ក្នុងទឹកចិត្តប្រកបដោយ កតញ្ញុតាធម៌​ដ៏ជ្រាលជ្រៅ ​និងស្មោះត្រង់​ចំពោះ​ព្រះអង្គ ​ជា​ព្រះបិតា ​ឯករាជ្យជាតិ ​បង្រួបបង្រួម​ជាតិ និង​ផ្សះផ្សាជាតិ ក្រោមបាវចនា ជាតិ សាសនា ព្រះមហាក្សត្រ ​ក្នុងទិសដៅថែរក្សា ការពាររដ្ឋ​ធម្មនុញ្ញ ពង្រឹងសន្តិភាព ស្ថេរភាពនយោបាយ ការបង្រួបបង្រួមជាតិ​ ផ្សះផ្សាជាតិ និងអភិវឌ្ឍន៍​ប្រទេសជាតិឲ្យមានការការរីកចម្រើនដូចសព្វថ្ងៃ ​និងបន្តដល់រាជរដ្ឋាភិបាលកម្ពុជា​ អាណត្តិទី៧ នៃរដ្ឋសភា​ ដឹកនាំដោយសម្តេចមហាបរវរធិបតី ហ៊ុន​ ម៉ាណែត ​នាយករដ្ឋមន្ត្រី។ សមិទ្ធផល ទាំងនេះ​ គឺផ្តើមចេញពីកម្លាំង​សាមគ្គី​ដ៏​មុតស្រួច​របស់ប្រជាជាតិយើង ​ដែលមានតម្លៃជ្រាលជ្រៅ ជា​ប្រវត្តិសាស្រ្ត ដោយបានបង្កើតជា​មូលដ្ឋានគ្រឹះ​រឹងមាំ​លើគ្រប់​វិស័យ ដើម្បីធានា​ដល់​ការស្ថិតស្ថេរគង់វង្ស និងរីកចម្រើនរបស់កម្ពុជា៕ 

គណៈប្រតិភូដ៏ធំបំផុតនៅពិព័រណ៍នាំចូលអន្តរជាតិ CIIE បង្ហាញពីការប្តេជ្ញាចិត្តរបស់អាមេរិក ចំពោះប្រទេសចិន

2023/11/07 02:19:25 pm        125
Facebook Telegram Linkin
លោក នីកូឡាស បឺនស៍ (Nicholas Burns) ឯកអគ្គរដ្ឋទូតសហរដ្ឋអាមេរិក ប្រចាំនៅប្រទេសចិន បាននិយាយថា សហរដ្ឋអាមេរិក កំពុងបង្ហាញការប្តេជ្ញាចិត្តរបស់ខ្លួនចំពោះទំនាក់ទំនងទ្វេភាគីជាមួយប្រទេសចិន តាមរយៈការបញ្ជូនគណៈប្រតិភូដ៏ធំបំផុតទៅកាន់ពិព័រណ៍នាំចូលអន្តរជាតិចិន (CIIE) នៅទីក្រុងសៀងហៃ។សហរដ្ឋអាមេរិក បានបញ្ជូនគណៈប្រតិភូដ៏ធំបំផុតរបស់ខ្លួនទៅកាន់ព្រឹត្តិការណ៍ពិព័រណ៍នាំចូលអន្តរជាតិចិន CIIE ដែលប្រព្រឹត្តទៅពីថ្ងៃទី៥ ដល់ថ្ងៃទី១០ ខែវិច្ឆិកា។ ក្រសួងកសិកម្មសហរដ្ឋអាមេរិក (USDA) កាលពីថ្ងៃច័ន្ទ បានរៀបចំស្តង់អាហារ និងកសិកម្មជាច្រើននៅក្នុងពិព័រណ៍នេះជាលើកដំបូងរបស់ខ្លួន។ឯកអគ្គរដ្ឋទូតសហរដ្ឋអាមេរិក ប្រចាំប្រទេសចិន រូបនេះ បានថ្លែងសុន្ទរកថាក្នុងពិធីបើកនៅក្នុងព្រឹត្តិការណ៍នេះ ដោយបញ្ជាក់សារជាថ្មីអំពីទំនាក់ទំនងសេដ្ឋកិច្ច និងពាណិជ្ជកម្ម «សំខាន់ពិសេស» របស់សហរដ្ឋអាមេរិក ជាមួយប្រទេសចិន។លោក Nicholas Burns បាននិយាយថា «ក្នុងនាមរដ្ឋាភិបាលសហរដ្ឋអាមេរិក យើងមានសេចក្តីសោមនស្សរីករាយណាស់ដែលបានមានវត្តមាននៅព្រឹត្តិការណ៍ពិព័រណ៍នាំចូលអន្តរជាតិចិន CIIE នេះ។ យើងមានអាជីវកម្ម និងអ្នកតាំងពិព័រណ៍ច្រើនជាងគេនៅឆ្នាំនេះ ហើយបានបង្ហាញពីការប្តេជ្ញាចិត្តរបស់សហរដ្ឋអាមេរិក ចំពោះទំនាក់ទំនងមួយនេះ។ ទំនាក់ទំនងសេដ្ឋកិច្ច និងពាណិជ្ជកម្មរបស់យើងមានសារៈសំខាន់ណាស់ជាមួយប្រទេសចិន ដែលទទួលបានទំហំទឹកប្រាក់ចំនួន ៦៩០ពាន់លានដុល្លារ ក្នុងពាណិជ្ជកម្មទ្វេភាគីក្នុងឆ្នាំ២០២២ ហើយនោះគឺជាកម្រិតខ្ពស់បំផុតដែលមិនធ្លាប់មានពីមុនមក»៕

ប្រធានកិច្ចការបរទេសEUទទួលស្គាល់ថា សង្រ្គាមរវាងអ៊ីស្រាអែល និងក្រុមហាម៉ាស កំពុងប៉ះពាល់ដល់ការគាំទ្រអ៊ុយក្រែន

2023/11/07 02:03:21 pm        147
Facebook Telegram Linkin
លោក ចូសិប បូរ៉ែល ( Josep Borrell) តំណាងជាន់ខ្ពស់នៃសហភាពអឺរ៉ុបទទួលបន្ទុកកិច្ចការបរទេស និងគោលនយោបាយសន្តិសុខ បានទទួលស្គាល់ថា សង្គ្រាមរវាងអ៊ីស្រាអែល និងក្រុមហាម៉ាស កំពុងប៉ះពាល់ដល់ការគាំទ្រអន្តរជាតិសម្រាប់អ៊ុយក្រែនរួចទៅហើយ។លោកបូរ៉ែល បានទទួលស្គាល់ថា ខណៈពេលដែលជម្លោះទាំងពីរ មានភាពខុសប្លែកគ្នាខ្លាំង ការកើនឡើងនៅមជ្ឈិមបូព៌ា កំពុងប៉ះពាល់ដល់គោលនយោបាយសម្ព័ន្ធមិត្តចំពោះអ៊ុយក្រែន និងការគាំទ្រអន្តរជាតិទាំងស្រុងរួចទៅហើយ។លោកបានថ្លែងថា៖«ក្នុងអំឡុងពេលដំណើរទស្សនកិច្ចថ្មីៗរបស់ខ្ញុំទៅក្រុងវ៉ាស៊ីនតោនសម្រាប់កិច្ចប្រជុំកំពូលរួមជាមួយនឹងប្រធានពីររូបគឺ [ប្រធានគណៈកម្មាធិការអឺរ៉ុប] លោកស្រី [Ursula von der Leyen] និង [ប្រធានក្រុមប្រឹក្សាអឺរ៉ុប] លោក[Charles Michel] ខ្ញុំមានឱកាស ដើម្បីបង្ហាញពីការព្រួយបារម្ភរបស់ខ្ញុំដោយផ្ទាល់ទៅកាន់លោកប្រធានាធិបតីបៃដិន និង លោករដ្ឋមន្ត្រីការបរទេសប្ល៊ីនខិនថា ការគាំទ្រអន្តរជាតិរបស់យើងចំពោះអ៊ុយក្រែន អាចនឹងរលាយបាត់ទៅដោយសារតែអ្វីដែលត្រូវបានគេមើលឃើញថា ជា ការអនុវត្តស្តង់ដាទ្វេ។លោក បានបញ្ជាក់ថា ប្រទេសជាច្រើននៃអ្វីដែលហៅថា Global South នៅតែចាត់ទុកសង្គ្រាមរុស្ស៊ី-អ៊ុយក្រែនជាបញ្ហាក្នុងតំបន់ ជាជាងបញ្ហាសកល ដែលជាកង្វល់ចម្បងរបស់បស្ចិមប្រទេស ហើយលោកខាងលិចត្រូវតែដោះស្រាយឲ្យបានឆាប់រហ័ស «ព្រោះយើងមិនអាចទ្រាំទ្របាន»នឹងផលវិបាកនៃសង្គ្រាមនេះទេ»។

នាយករដ្ឋមន្ត្រីអូស្ត្រាលីលើកឡើងថា ជំនួបជាមួយប្រធានាធិបតីចិន ប្រកបដោយវិជ្ជមាន និងស្ថាបនា

2023/11/07 01:56:21 pm        152
Facebook Telegram Linkin
លោកនាយករដ្ឋមន្ត្រីអូស្ត្រាលី អង់តូនី អាល់បានី (Anthony Albanese) បាននិយាយថា លោកពេញចិត្តនឹងការចូលរួមប្រកបដោយវិជ្ជមាន ជាមួយលោកប្រធានាធិបតីចិន Xi Jinping នៅក្នុងទីក្រុងប៉េកាំង កាលពីថ្ងៃចន្ទដើមសប្ដាហ៍នេះ។ លោក Xi បាននិយាយកាលពីថ្ងៃចន្ទថា ទំនាក់ទំនងស្ថិរភាពរវាងចិន និងអូស្ត្រាលីបានបម្រើផលប្រយោជន៍ឲ្យគ្នាទៅវិញទៅមក ហើយប្រទេសទាំងពីរគួរតែពង្រីកកិច្ចសហប្រតិបត្តិការរវាងគ្នា និងគ្នា ដោយបានបញ្ជូនសញ្ញាច្បាស់លាស់ថាទីក្រុងប៉េកាំងបានត្រៀមខ្លួនរួចជាស្រេចដើម្បីចាកចេញពីភាពតានតឹងនាពេលថ្មីៗនេះ។លោក Albanese ជាមេដឹកនាំអូស្ត្រាលីដំបូងគេដែលបានធ្វើទស្សនកិច្ចនៅទីក្រុងប៉េកាំងចាប់តាំងពីឆ្នាំ ២០១៦ បាននិយាយថា ជម្លោះនៅក្នុងពិភពលោកត្រូវបានលើកឡើង នៅក្នុងកិច្ចប្រជុំនៅឯមហាសាលប្រជាជនរួមទាំងការឈ្លានពានរបស់រុស្ស៊ីលើអ៊ុយក្រែននិងជម្លោះនៅមជ្ឈិមបូព៌ា។ លោកក៏បានលើកឡើងផងដែរអំពីសំណុំរឿងរបស់អ្នកនិពន្ធជនជាតិអូស្ត្រាលីលោក យ៉ាង ហេងជុន (Yang Hengjun) ដែលត្រូវបានជាប់ពន្ធនាគារនៅទីក្រុងប៉េកាំងរយៈពេលបួនឆ្នាំពីបទចារកម្ម។ អស់រយៈពេលជាច្រើនទសវត្សរ៍មកហើយ ប្រទេសចិន និងអូស្ត្រាលី បានកសាងទំនាក់ទំនងលើពាណិជ្ជកម្ម ដោយទីក្រុងប៉េកាំងបានក្លាយជាដៃគូពាណិជ្ជកម្មដ៏ធំបំផុតរបស់ទីក្រុងកង់បេរ៉ា ជាមួយនឹងការទិញអាហារ និងធនធានធម្មជាតិរបស់អូស្ត្រាលី មុនពេលទំនាក់ទំនងកាន់តែជូរចត់បន្ទាប់ពីអូស្ត្រាលី កាលពីឆ្នាំ២០១៧ បានចោទប្រកាន់ប្រទេសចិនថាបានជ្រៀតជ្រែកក្នុងនយោបាយរបស់ខ្លួន៕

រដ្ឋមន្ត្រីការបរទេសប៉េរូលាលែងពីតំណែង បន្ទាប់ពីភាពចម្រូងចម្រាស់ ក្នុងដំណើរទស្សនកិច្ចរបស់ប្រធានាធិបតី ទៅកាន់សហរដ្ឋអាមេរិក

2023/11/07 01:53:02 pm        87
Facebook Telegram Linkin
រដ្ឋមន្ត្រីការបរទេសប្រទេសប៉េរូ លោកស្រី Ana Cecilia Gervasi បានលាលែងពីតំណែង កាលពីថ្ងៃចន្ទ ក្នុងពេលមានការចោទសួរជុំវិញថាតើ លោកស្រីបានដោះស្រាយយ៉ាងដូចម្តេចចំពោះដំណើរទស្សនកិច្ចរបស់ប្រធានាធិបតី លោកស្រី ឌីណា បូលូអាត( Dina Boluarte) កាលពីសប្តាហ៍មុន ទៅកាន់សហរដ្ឋអាមេរិក។ លោកស្រី Gervasi ពុំបាននិយាយយោងទៅរកដំណើរទស្សនកិច្ចនៅសហរដ្ឋអាមេរិក របស់លោកស្រី Boluarte នោះទេនៅក្នុងលិខិតលាលែងពីតំណែងរបស់លោកស្រី ដែលត្រូវបានឃើញដោយសារព័ត៌មានរ៉យទ័រ និងប្រព័ន្ធផ្សព្វផ្សាយផ្សេងទៀត។ ទោះជាយ៉ាងណា ប្រព័ន្ធផ្សព្វផ្សាយព័ត៌មាន ក្នុងតំបន់ បានរាយការណ៍ថា លោកស្រីស្ថិតនៅក្រោមសម្ពាធ បន្ទាប់ពីពុំបានរៀបចំជំនួបផ្លូវការរវាងលោកស្រី Boluarte និងប្រធានាធិបតី លោក Joe Biden។ ការលាលែងពីតំណែងរបស់លោកស្រី ត្រូវបានបញ្ជាក់ដោយនាយករដ្ឋមន្ត្រី លោក Alberto Otarola នៅក្នុងសន្និសីទសារព័ត៌មាន ទោះបីជាលោកពុំបាននិយាយយោងច្បាស់លាស់ចំពោះដំណើរទស្សនកិច្ចទៅកាន់សហរដ្ឋអាមេរិកក៏ដោយ។ លោកបាននិយាយថាការដាក់ជំនួសលោកស្រី Gervasi អាចត្រូវប្រកាសនៅថ្ងៃអង្គារនេះ។ ឯកអគ្គរដ្ឋទូតរបស់ប្រទេសប៉េរូ ប្រចាំសហរដ្ឋអាមេរិក លោក Gustavo Meza Cuadra ក៏បានលាលែងកាលពីថ្ងៃចន្ទ។ នៅក្នុងលិខិតលាលែងពីតំណែងរបស់លោក លោកបាននិយាយលើកឡើងពី ដំណើរទស្សនកិច្ចរបស់លោកស្រី Boluarte ដោយនិយាយថាលោកទទួលខុសត្រូវសម្រាប់ការរៀបចំដំណើរទស្សនកិច្ចនេះ។ក្រសួងការបរទេសនិយាយថាជំនួសឲ្យជំនួបទ្វេភាគី លោកស្រី Boluarte និងលោក Biden មានការសន្ទនាជាលក្ខណៈឯកជននៅក្រៅសម្ព័ន្ធសម្រាប់វិបុលភាពសេដ្ឋកិច្ច ក្នុងកិច្ចប្រជុំកំពូលទ្វីបអាមេរិក ក្នុងទីក្រុងវ៉ាស៊ីនតោន។ សភា បានកោះហៅលោកស្រី Gervasi ទៅកាន់សវនាការ ជុំវិញមូលហេតុតម្រាយផ្លូវជាផ្លូវការសម្រាប់ដំណើរទស្សនកិច្ចរបស់លោកស្រី Boluarte រៀបរាប់ឲ្យដឹងចំពោះជំនួបទ្វេភាគី ដែលពុំបានធ្វើឲ្យកើតឡើង។

ម៉ាឡេស៊ី បញ្ជាក់ថា ខ្លួននឹងមិនទទួលស្គាល់ទណ្ឌកម្មឯកតោភាគីលើក្រុមអ្នកគាំទ្រក្រុមប៉ាឡេស្ទីនទេ

2023/11/07 01:48:43 pm        127
Facebook Telegram Linkin
ប្រទេសម៉ាឡេស៊ី បាននិយាយនៅថ្ងៃអង្គារនេះថា ខ្លួននឹងមិនទទួលស្គាល់ទណ្ឌកម្មឯកតោភាគីជាការឆ្លើយតបទៅនឹងសំណើច្បាប់របស់សហរដ្ឋអាមេរិក ដើម្បីដាក់ទណ្ឌកម្មប្រឆាំងនឹងក្រុមអ្នកគាំទ្របរទេសនៃក្រុមហាម៉ាស និងក្រុមសកម្មប្រយុទ្ធផ្សេងទៀត ដែលកំពុងប្រតិបត្តិការ នៅក្នុងប្រទេសប៉ាឡេស្ទីន។ច្បាប់ការពារហិរញ្ញប្បទានអន្តរជាតិរបស់ក្រុមហាម៉ាស ដែលមានគោលបំណងកាត់ផ្តាច់ការផ្តល់ហិរញ្ញប្បទានអន្តរជាតិដល់ក្រុមនេះ ត្រូវបានអនុម័តដោយសភាតំណាងសហរដ្ឋអាមេរិក កាលពីសប្តាហ៍មុន ហើយកំពុងរង់ចាំការបោះឆ្នោតពីព្រឹទ្ធសភា។នាយករដ្ឋមន្ត្រីម៉ាឡេស៊ី លោក អាន់វ៉ា អ៊ីប្រាហ៊ីម បាននិយាយថា រដ្ឋាភិបាលរបស់លោក កំពុងតាមដានយ៉ាងដិតដល់នូវការវិវឌ្ឍលើការអនុម័តច្បាប់នេះ ដោយបន្ថែមថា វាអាចប៉ះពាល់ដល់ប្រទេសម៉ាឡេស៊ី លុះត្រាតែមានការបញ្ជាក់ឲ្យឃើញថា មានការផ្តល់ជំនួយជាសម្ភារៈដល់ក្រុមហាម៉ាស ឬក្រុមជីហាដអ៊ីស្លាមប៉ាឡេស្ទីន។លោកអាន់វ៉ា បាននិយាយនៅក្នុងការឆ្លើយតបជាលាយលក្ខណ៍អក្សរទៅកាន់សភានៅថ្ងៃអង្គារនេះថា៖ «ទណ្ឌកម្មណាមួយប្រឆាំងនឹងម៉ាឡេស៊ី ក៏អាចប៉ះពាល់ដល់ការវាយតម្លៃរបស់រដ្ឋាភិបាលសហរដ្ឋអាមេរិនិងក្រុមហ៊ុនអាមេរិក ទៅកាន់ប្រទេសម៉ាឡេស៊ី ក៏ដូចជាប៉ះពាល់ដល់ឱកាសវិនិយោគរបស់ក្រុមហ៊ុនអាមេរិក នៅក្នុងប្រទេសម៉ាឡេស៊ីផងដែរ»។

បណ្ដាញសង្គម

ព័ត៌មានថ្មីៗ

ជនបរទេស១៣នាក់ត្រូវបានឃាត់ខ្លួនក្នុងប្រតិបត្តិការបង្រ្កាបបទល្មើសតាមប្រព័ន្ធបច្ចេកវិទ្យានៅសៀមរាប
07/21/2025 09:07 PM
Facebook Telegram Linkin
​ការអនុវត្ត​វិធានការគន្លឹះក្នុងវិស័យអប់រំ (គ.វ.អ.) នៅសាលាបឋមសិក្សា ត្រពាំងអារ័ក្ស ស្រុកកំពង់ស្វាយ ខេត្តកំពង់ធំ
07/21/2025 08:07 PM
Facebook Telegram Linkin
អ្នកជំនាញ UN ជំរុញឲ្យក្រុមតាលីបង់ដោះលែងប្តីប្រពន្ធសញ្ជាតិអង់គ្លេសវ័យចំណាស់ជាប់ឃុំនៅអាហ្វហ្គានីស្ថាន
07/21/2025 08:07 PM
Facebook Telegram Linkin
អ៊ីរ៉ង់បន្ទោសអឺរ៉ុបថា បានធ្វើឲ្យដួលរលំនៃកិច្ចព្រមព្រៀងនុយក្លេអ៊ែរ មុនការចរចាថ្មី
07/21/2025 08:07 PM
Facebook Telegram Linkin
កសិករកំពង់ធំជាង១០០គ្រួសារ ទទួលផលចំណេញច្រើនជាងមុន ក្រោយស្ម័គ្រចិត្តចងក្រងជាសហគមន៍កសិកម្មទំនើប
07/21/2025 08:07 PM
Facebook Telegram Linkin
ទាហានប៉ារ៉ាប៉ាគីស្ថាន ៨នាក់ និងសមាជិកក្រុមប្រយុទ្ធ ៤នាក់ ត្រូវបានសម្លាប់ អំឡុងការប៉ះទង្គិចគ្នា នៅភាគពាយព្យ
07/21/2025 08:07 PM
Facebook Telegram Linkin
វិមានក្រឹមឡាំងមិនច្រានចោលពីលទ្ធភាពមានកិច្ចប្រជុំ Putin-Trump នៅទីក្រុងប៉េកាំង ក្នុងខែកញ្ញា
07/21/2025 08:07 PM
Facebook Telegram Linkin
វិមានក្រឹមឡាំងទទួលស្គាល់ភាពតានតឹងក្នុងទំនាក់ទំនងជាមួយអាស៊ែបៃហ្សង់ តែសង្ឃឹមថា នឹងប្រសើរឡើងវិញ
07/21/2025 07:07 PM
Facebook Telegram Linkin
រដ្ឋទូតឥណ្ឌូនេស៊ី ត្រៀមផ្តល់ការគាំទ្រ និងកិច្ចសហការជាមួយកម្ពុជាដើម្បីប្រយុទ្ធប្រឆាំងការឆបោកតាមបច្ចេកវិទ្យា
07/21/2025 07:07 PM
Facebook Telegram Linkin
អភិបាលខេត្តប៉ៃលិនពិនិត្យទីតាំងសាងសង់ខ្លោងទ្វារនៅច្រកទ្វារព្រំដែនអន្តរជាតិព្រំ
07/21/2025 07:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.