នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម
សម្ដេចតេជោ អំពាវនាវដល់រាជរដ្ឋាភិបាលយកចិត្តទុកដាក់សាងសង់កន្លែងស្នាក់នៅសម្រាប់សិស្សជាស្ត្រី

នយោបាយ​ និង ការអភិវឌ្ឍន៍

វិភាគ៖ អង្គការសង់ត្រាល់ បានចេញជារបាយការណ៍បែបបំភ័យសាធារណៈមតិ គ្មានលក្ខណៈវិទ្យាសាស្ត្រ ហើយចង់បំផុសកំហឹងសង្គម

2023/08/20 02:30:02 am        1015
Facebook Telegram Linkin
ភ្នំពេញ៖ មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) នៅថ្ងៃទី១៧ ខែសីហា បានចេញអត្ថបទចំនួន៤ទំព័រដែលមានចំណងជើងថា “តើកម្ពុជាអាចប្រឈម វិបត្តិសង្គម និងសេដ្ឋកិច្ចបែបណាក្រោយការបោះឆ្នោត?”។ ឆ្លងតាមការវិភាគលើអត្ថបទនេះ សង់ត្រាល់បានបង្ហាញចំនួន៤ចំណុចធំៗ ទី១ ចំនួនរោងចក្រកាត់ដេរនៅកម្ពុជា បានបិទទ្វាជាបន្តបន្ទាប់(៨ខែដើមឆ្នាំមានរោងចក្រ១០៧៧) ទី២ ការថមថយនៃកំណើននៃការនាំចេញផលិតផលកាត់ដេរ ស្បែកជើង និងផលិតផលធ្វើដំណើរ ទី៣ កម្ពុជាមិនបានអនុវត្តលក្ខខ័ណ្ឌការងារ និងទី៤ បញ្ហាប្រព័ន្ធអនុគ្រោះពន្ធEBAរបស់អឺរ៉ុប និង GSPរបស់អាមេរិក។ សម្រាប់អ្នកតាមដានបញ្ហាសង្គមលើវិស័យការងារ និងសង្គមជាទូទៅមើលឃើញថា អត្ថបទរបស់អង្គការដែលទទួលជំនួយពីលោកខាងលិចមួយនេះ គ្មានលក្ខណៈវិទ្យាសាស្ត្រ តួលេខមិនច្បាស់លាស់ ប្រើការសន្និដ្ឋានផ្តេសផ្តាសបង្កើតសេនារីយូនយោបាយបំភៃសាធារណៈមតិ ហើយ​បំផុសឱ្យពលរដ្ឋមានកំហឹងក្នុងសង្គមកម្ពុជាទៅវិញ។ ចំណុចទី១ស្តីពីការបិទទ្វារោងចក្រនៅកម្ពុជា ការបិទឬបើកនៃរោងចក្រដែលជារបរនៃការវិនិយោគគឺជារឿងចៀសមិនផុត។ ប៉ុន្តែជាក់ស្តែងជាទូទៅសុខភាពវិស័យការងារ និងស្ថេរភាពសេដ្ឋកិច្ចកម្ពុជា ទាំងមូលមានស្ថេរភាពល្អប្រសើរនិងបន្តរីកចម្រើន​បន្តទៀតនៅឆមាសទី២ឆ្នាំ២០២៣ និងនៅឆ្នាំ២០២៤ ក្នុងនោះធនាគារពិភពលោក មូលនីធិរូបិយវត្ថុអន្តរជាតិ និងក្រសួងសេដ្ឋកិច្ច និងហិរញ្ញវត្ថុរបស់កម្ពុជា​ បានព្យាករណ៍ថាសេដ្ឋកិច្ចកម្ពុជា​មានកំណើនក្នុងរង្វង់៥.៥%ទៅ៥.៨% ក្នុងឆ្នាំ២០២៣ ហើយក្នុងឆ្នាំ២០២៤ កំណើននឹងកើនដល់ក្នុងរង្វង់៦.១%ទៅ ៦.៦% ដែលជាសញ្ញាណវិជ្ជមាននៃកំណើនសេដ្ឋកិច្ចកម្ពុជាធៀបប្រទេសនានាក្នុងតំបន់។  ជាមួយលក្ខខណ្ឌល្អប្រសើរបែបនេះ កំណើននៃការវិនិយោគរោងចក្រនៅកម្ពុជាក្នុងវិស័យកាត់ដេរ និងវានភណ្ឌដែលត្រូវបានគេវាយតម្លៃថាធ្លាក់ចុះ បែរជាកើនឡើងពីជាង ១ ៣២០ រោងចក្រនៅចុងឆ្នាំ២០២២ ដល់ ជាង ១ ៣៣០ នៅគិតក្នុងខែមិថុនា ឆ្នាំ២០២៣នេះ និងផ្តល់ការងារផ្លូវការដល់បងប្អូនកម្មករនិយោជិតជាង ៨៣ម៉ឺននាក់។ ក្នុងរយៈពេល ៦ខែដើមឆ្នាំ២០២៣ មានរោងចក្រសហគ្រាសក្នុងវិស័យវាយនភណ្ឌ កាត់ដេរបើកថ្មីប្រមាណ ៦០រោងចក្របន្ថែម ដែលបានបង្កើតការងារជូនបងប្អូនកម្មករនិយោជិតប្រមាណ ៣ម៉ឺននាក់។ ការណ៍នេះ សបញ្ជាក់ពីនិន្នាការធម្មតាក្នុងវិស័យកាត់ដេរ និងបង្ហាញពីសេចក្តីទុកចិត្តទាំងស្រុងរបស់អ្នកវិនិយោគទាំងក្នុងស្រុក និងក្រៅស្រុក​មកលើរាជរដ្ឋាភិបាលកម្ពុជាទាំងក្នុងអាណត្តិទី៦ និងអាណត្តិទី៧ខាងមុខ។ មួយវិញទៀត តាមការព្យាកររបស់អង្គការ ILO ក្នុងឆ្នាំ២០២៣នេះ ចំនួនការងារសរុបរបស់កម្ពុជានៅតែមានកំណើនប្រមាណ ១,៣% ដែលមានន័យថា ស្ថានភាពទីផ្សារការងាររបស់កម្ពុជាមានភាពរឹងមាំ និងនៅតែផ្តល់ក្តីសង្ឈឹមខ្ពស់ដល់ប្រជាជន ជាពិសេសយុវជន។ ទី២ ការថមថយនៃការនាំចេញផលិតផល កាត់ដេរ ស្បែកជើងនិងផលិតផលធ្វើដំណើរ កម្ពុជានិងបណ្តាប្រទេសក្នុងតំបន់ផ្សេងទៀតដូចជាវៀតណាម បង់ក្លាដែស ឥណ្ឌូនេស៊ី ស្រីលង្ការ គឺជាប្រទេសផលិតដើម្បីផ្គត់ផ្គង់ផលិតផលសំលៀកបំពាក់ ស្បែកជើង និងផលិតផលធ្វើដំណើរទៅកាន់ទីផ្សារពិភពលោក ក្នុងនោះមានអឺរ៉ុប អាមេរិក ជប៉ុន និងបណ្តាប្រទេសអាស៊ាន។ ជាចៃដន្យអាក្រក់របស់ពិភពលោក ក្រោយការរងគ្រោះក្នុងវិបត្តិកូវីដ១៩ដ៏ធ្ងន់ធ្ងរហើយនោះ ពិភពលោកទាំងមូលដែលកំពុងដើរអូសជើងចេញពីវិបត្តិសាកលនេះ ត្រូវជួបប្រទះបញ្ហាសង្គ្រាមរវាងរុស្ស៊ី និងអ៊ុយក្រែន។ វិបត្តិនេះ បានទាញពន្យឺតការងើបឡើងនៃសេដ្ឋកិច្ចពិភពលោកទាំងមូលជាពិសេស សេដ្ឋកិច្ចសហភាពអឺរ៉ុបដែលបានប៉ះពាល់ខ្លាំងជាងគេពីវិបត្តិសង្គ្រាមរុស្ស៊ី និងអ៊ុយក្រែន ហើយគួរបញ្ជាក់ផងដែរថាទីផ្សារសហភាពអឺរ៉ុប ជាទីផ្សារនាំចេញធំជាងគេមួយរបស់កម្ពុជា ក៏ដូចជាប្រទេសនាំចេញផលិតផលកាត់ដេរដទៃផ្សេងទៀត។  ប្រការនេះ បានធ្វើឱ្យតម្រូវការសាកលសម្រាប់ផលិតផលគ្រប់មុខដែលរួមទាំង សម្លៀកបំពាក់ ស្បែកជើង និងផលិតផលធ្វើដំណើរ និងកាបូប បានថយចុះតាំងពីត្រីមាសទី២ឆ្នាំ២០២២រហូតដល់បច្ចុប្បន្ន (គិតត្រឹមត្រីមាសទី១ឆ្នាំ២០២៣)។ ក្នុងនោះ តម្លៃនាំចូលនៃផលិតផលវាយនភណ្ឌ កាត់ដេរ ស្បែកជើង និងផលិតផលធ្វើដំណើរនិងការបូបរបស់ពិភពលោក បានធ្លាក់ចុះមកនៅត្រឹម១២៥ពាន់លានដុល្លារអាម៉េរិកនៅត្រីមាសទី១ឆ្នាំ២០២៣ ខណៈដែលធ្លាប់កើនឡើងរហូតដល់១៥០ពាន់លានដុល្លារអាម៉េរិក។​ នេះបើតាមការផ្សព្វផ្សាយរបស់មជ្ឈមណ្ឌពាណិជ្ជកម្មអន្តរជាតិដែលបានទាញយកនៅថ្ងៃទី៨ ខែសីហា ឆ្នាំ២០២៣។  ប្រការនេះ បានធ្វើឱ្យប្រទេសផ្គត់ផ្គង់ដូច កម្ពុជា វៀតណាម ឥណ្ឌូនេស៊ី ស្រីលង្កា បង់ក្លាដែសជាដើមរងផលប៉ះពាល់។ ការនាំចេញរបស់ឥណ្ឌូនេស៊ី បានធ្លាក់ចុះរហូតដល់១៩.២% ខណៈវៀតណាមធ្លាក់ចុះ១៥.៧% ហើយស្រីលង្កាក៏បានធ្លាក់ចុះ១៤.៦% ដោយឡែកកម្ពុជាក៏មានការធ្លាក់ចុះចំនួន១៨.៦%។ ជារួម ការធ្លាក់ចុះផលិតផលសម្លៀកបំពាក់ ស្បែកជើង ផលិតផលធ្វើដំនើរ និងកាបូបជានិន្នាការរួមរបស់សកលលោក ប៉ុន្តែមិនមែនបញ្ហាដាច់ដោយឡែករបស់កម្ពុជានោះទេ។  សម្រាប់អ្នកតាមដានវិស័យកាត់ដេរនៅកម្ពុជា មូលហេតុកំណើននៃការនាំចេញផលិតផលកាត់ដេរ ស្បែកជើង ការបូប និងផលិតផលធ្វើដំណើរនៅឆ្នាំ២០២២ មានកម្រិតខ្ពស់ គឺដោយសារតែកម្ពុជាបានគ្រប់គ្រងការរីករាលដាលជំងឺកូវីដ-១៩ បានល្អប្រសើរ ដោយរាជរដ្ឋាភិបាលបានដាក់ចេញនូវវិធានសុខាភិបាល និងការអន្តរាគមន៍នានាយ៉ាងមានប្រសិទ្ធភាព និងទាន់ពេលវេលា ជាពិសេសគឺការធានាបាននូវនិរន្តរភាពច្រវ៉ាក់ផលិតកម្មរបស់រោងចក្រសហគ្រាសនៅកម្ពុជា ដែលធ្វើឱ្យម្ចាស់ម៉ាកនៅទូទាំងពិភពលោក បានបង្វែរការបញ្ជាទិញមកកម្ពុជា ខណៈដែលកាលណោះ តម្រូវការរបស់ពិភពលោក មានការកើនឡើងខ្ពស់ ហើយប្រទេសនាំចេញផលិតផលនេះផ្សេងទៀតនៅមានការឆ្លងរាលដាលជំងឺកូវីដ-១៩ខ្លាំងនៅឡើយ។ ដោយឡែកការថយចុះនាពេលនេះ ក្រៅពីតម្រូវការពិភពលោកមានការថយចុះ ការបញ្ជាទិញម្ចាស់ម៉ាកធំៗដែលធ្លាប់បង្វែរការទិញនៅកម្ពុជាកាលពីឆ្នាំ២០២២នោះ បានត្រឡប់ទៅបញ្ជាទិញពីប្រទេសដែលខ្លួនធ្លាប់បញ្ជាទិញមុនបរិបទកូវិដវិញហើយ ព្រោះពេលនេះ បណ្តាប្រទេសទាំងអស់ក្នុងតំបន់បានបិទបញ្ចប់វិបត្តិកូវីដ១៩រួចហើយ និងមានដំណើរការសេដ្ឋកិច្ច សង្គមដូចកម្ពុជាដែរ។   ទី៣ ការអនុវត្តលក្ខខណ្ឌការងារ គិតមកដល់ឆ្នាំ២០២៣នេះ ប្រាក់ឈ្នួលគោលរបស់កម្មកររោងចក្រកាត់ដេរបានកើនដល់២០០ដុល្លារក្នុងមួយខែ ដោយបានកើនឡើងបន្ថែមចំនួន៤០០% ចាប់ពីឆ្នាំ១៩៩៧ដែលមានប្រាក់ឈ្នួលគោលត្រឹម៤០ដុល្លារ។ បើប្រៀបធៀបប្រាក់ឈ្នួលជាមួយបណ្តាប្រទេសជិតខាងក្នុងតំបន់ នៅឆ្នាំ២០២៣នេះ កម្មកររបស់ឡាវ ទទួលបានចំនួន ៧៥ដុល្លារអាម៉េរិក, មីយ៉ាន់ម៉ា ទទួលបាន ​៦៩ដុល្លារអាម៉េរិក, វៀតណាម ទទួលបានចន្លោះ១៣៨ និង ១៩៨ទៅតាមតំបន់, ស្រីលង្កា ទទួលបាន៣៩ដុល្លារ ហើយបង់ក្លាដែស ទទួលបានចំនួន៧៥ដុល្លារអាម៉េរិក។ ដោយឡែក នៅកម្ពុជា បើបូកប្រាក់ឈ្នួលញអប្បបរមា និងប្រាក់ឧបត្ថមផ្សេងៗ (ប្រាក់ថ្លៃបាយ, ប្រាក់ធ្វើការថែមម៉ោង, ប្រាក់ធ្វើការទៀងទាត់, ប្រាក់ធ្វើដំណើរ, និងប្រាក់អតីតភាពការងារ) កម្មករម្នាក់ៗជាមធ្យមទទួលបានប្រាក់ចំណូលក្នុងរង្វង់២១៧ដុល្លារអាម៉េរិក ទៅ២៥៩ដុល្លារអាម៉េរិកក្នុងមួយខែ។  សូមបញ្ជាក់ថា លក្ខខណ្ឌការងារ និងសុខដុមនីយម្មទំនាក់ទំនងវិជ្ជាជីវៈ ត្រូវបានលើកកម្ពស់ជាបន្តបន្ទាប់តាមរយៈ ការពង្រឹងការអនុវត្តច្បាប់ និងលិខិតបទដ្ឋានគតិយុត្តិជាតិ និងអន្តរជាតិ ពាក់ព័ន្ធនឹងវិស័យ​ការងារ ហើយប្រទេសកម្ពុជា បានផ្តល់សច្ចាប័នលើអនុសញ្ញាអន្តរជាតិខាងការងាររបស់អង្គការ ILO ចំនួន១៣ ក្នុងនោះកម្ពុជាជាប្រទេសតែមួយគត់ក្នុងតំបន់ដែលបានផ្តល់សច្ចាប័នអនុសញ្ញាស្នូលទាំង ៨របស់អង្គការ ILO។  បន្ថែមលើនេះ កម្ពុជាបាននិងកំពុងអនុវត្តគោលនយោបាយពាណិជ្ជកម្មផ្សារភ្ជាប់ជាមួយនឹងអនុលោមភាពការងារ និងធានាឱ្យបាននូវកេរ្តិ៍ឈ្មោះផលិតផលនាំចេញរបស់យើងជាប្រភពទំនិញដែលមានការគោរពតាមលក្ខខណ្ឌការងារ និងសិទ្ធិការងារ។ ក្នុងន័យនេះ កម្ពុជាបានទទួលយកការអនុស្សរណៈនៃការយោគយល់គ្នា “កម្មវិធីគម្រោងរោចក្រកាន់តែប្រសើរនៅកម្ពុជា” រវាងរាជរដ្ឋាភិបាល និង ILO-BFC ចំនួន ៨លើក ដោយចាប់ផ្តើមដំបូងនៅឆ្នាំ២០០៣ ហើយបច្ចុប្បន្ន កម្ពុជាបាននិងកំពុងអនុវត្តអនុស្សរណៈនៃការយោគយល់គ្នាឆ្នាំ២០២០-២០២២ ដែលចុះហត្ថលេខា​នៅក្នុងឆ្នាំ២០១៩ និងជាចុងក្រោយ អនុស្សរណៈនៃការយោគយល់គ្នានេះ នឹងត្រូវបន្តបន្ថែមទៀតសម្រាប់ឆ្នាំ២០២៣-២០២៧។ រដ្ឋាភិបាលកម្ពុជាក្នុងអាណត្តិទី៦ ក្នុងបរិបទកូវីដ១៩ បានផ្តល់វ៉ាក់សាំងជូនកម្មករដោយឥតគិថ្លៃដើម្បីធានាបាននូវសុខភាព និងរក្សាការងារជូនកម្មករនិយោជិត ហើយបានបើកប្រាក់ឧបត្ថម្ភដល់កម្មករនិយោជិតដែល បានព្យួរកិច្ចសន្យាការងារចំនួន ៧០ដុល្លារអាម៉េរិក (រាជរដ្ឋាភិបាល ៤០ដុល្លារអាម៉េរិក និងនិយោជក ៣០ដុល្លារអាម៉េរិក)។ មួយវិញទៀត រដ្ឋាភិបាលតាមរយៈក្រសួងការងារ និងបណ្តុះបណ្តាលវិជ្ជាជីវៈ ​បានរៀបចំការបណ្តុះបណ្តាលជំនាញដល់កម្មករដែលព្យួរកិច្ចសន្យាការងារបានចំនួន៦,៨ម៉ឺននាក់ និងបានប្រកាសត្រៀមបណ្តុះបណ្តាលកម្មករ ឬយុវជនកម្ពុជាដែលងាយរងគ្រោះ ឬមកពីគ្រួសារក្រីក្រចំនួន១.៥លាននាក់ ដែលចង់អភិវឌ្ឍនជំនាញ ឬចង់បានជំនាញជាក់លាក់ដើម្បីបង្កើនប្រាក់ចំណូល។  មិនតែប៉ុណ្ណោះ កម្មករនិយោជិត ក៏នឹងទទួលបានផងដែរនូវប្រាក់សោធននិវត្តន៍ ប្រាក់ថែមម៉ោង​ ប្រាក់ធ្វើការទៀតទាត់ ផ្តល់សេវាធានារ៉ាប់រងរបបសន្តិសុខសង្គមផ្នែកហានិភ័យការងារ និងផ្នែកថែទាំសុខភាពដល់កម្មករនិយោជិតក្នុងអំឡុងពេលព្យួរកិច្ចសន្យាការងារទៀតផង និងការធ្វើដំណើរតាមរថយន្តក្រុងដោយឥតគិតថ្លៃ។ល។ អ្វីដែលបានលើកឡើងសម្រាប់កម្មករនេះ នៅមិនទាន់រាប់បញ្ចូលការឧបត្ថមសម្រាប់កម្មការនីមានផ្ទៃពោះ ដូចជាអនុញ្ញាតិឱ្យចេញមុនម៉ោង ១៥នាទី, ឈប់សម្រាកចំនួន ៩០ថ្ងៃ តាមច្បាប់ស្តីពីការងារ និងទទួលបានប្រាក់ឈ្នួលសរុប ១២០% ដោយ ៥០% ទទួលបានពីនិយោជក និង ៧០% ទៀតទទួលបានពី ប.ស.ស., ទទួលបានប្រាក់ឧបត្ថម្ភ មុន និងក្រោយ សម្រាលកូន សរុបចំនួន ១លាន ៩២ម៉ឺនរៀល ឬ ៤៨០ដុល្លារអាម៉េរិក/១នាក់ដោយមិនទាន់រាប់បញ្ចូលការឧបត្ថមរបស់ដល់ស្តី្រកម្មករដែលនឹងទទួលបានការឧបត្ថមពេលឆ្លងទន្លេកូន១រូប បាន៨០ម៉ឺនរៀល ភ្លោះ២រូប បាន១.២លានរៀល និងភ្លោះ៣រូបទទួលបាន១.៦លានរៀល និងការឧបត្ថមពីសម្តេចតេជោ និងសម្តេចកិត្តិព្រឹទ្ធបណ្ឌិតផ្ទាល់ចំនួន៥លានរៀលទៀតផងទេ។ ទី៤ ប្រព័ន្ធអនុគ្រោះពន្ធ EBAរបស់សហភាពអឺរ៉ុប និង GSPរបស់អាមេរិក តាមពិតការលើកឡើងស្តីពីប្រព័ន្ធងនុគ្រោះពន្ធEBA និង GSPរបស់អាមេរិកនេះ គឺជារឿងនយោបាយ​តែប៉ុណ្ណោះដែលវាហាក់ដូចជាអាយ៉ៃឆ្លើយឆ្លងដែលមិនចេះចប់ព្រោះអ្នកលើកឡើងមិនចង់ចប់។ ចំណុចនេះ គឺជាចំណុចដែលគណបក្សប្រឆាំង​ និងសង្គមស៊ីវិលប្រើវាជាប្រធានបទវាយប្រហារមកលើរាជរដ្ឋាភិបាល។ កម្ពុជាទទួលបានប្រព័ន្ធអនុគ្រោះពន្ធ EBAរបស់សហភាពអឺរ៉ុប(អ្វីៗគ្រប់យ៉ាងលើកលែងតែអាវុធ) នៅឆ្នាំ២០០១ក្នុងចំណោមប្រទេសក្រីក្រចំនួន៣នៅអាស៊ាន ក្នុងនោះមានឡាវ មីយ៉ាន់ម៉ា និងកម្ពុជា។ កាលពីខែសីហា ឆ្នាំ២០២០ សហភាពអឺរ៉ុបបានប្រកាសយកពន្ធលើផលិតផលកម្ពុជាចំនួន២០%នៃផលិតនាំចូលទាំងអស់ដែលស្មើប្រមាណ៨០មុខ។ ផ្ទុយទៅវិញ បើទោះបីជាយកពន្ធ២០%ក៏ដោយ ក៏ការនាំចេញរបស់កម្ពុជានៅបន្តកើនឡើងដដែល។ ជាក់ស្តែងតម្លៃនាំចេញសរុបរបស់កម្ពុជានៅឆ្នាំ២០២២ បានកើនឡើង១៧,១% ក្នុងនោះការនាំចេញទៅអឺរ៉ុបបានកើនឡើង ២៥,៣% (វិស័យកាត់ដេរនាំចេញទៅអឺរ៉ុបកើនឡើង ២១,៧%) ដែលបញ្ជាក់ឱ្យឃើញថា កម្ពុជា បានត្រៀមខ្លួនរួចរាល់សម្រាប់ការចាកចេញពីក្រុមប្រទេសអភិវឌ្ឍន៍តិចតួច ហើយ EBA មិនមែនជាបញ្ហាចម្បងក្នុងការរាំងស្ទះដល់ការអភិវឌ្ឍសេដ្ឋកិច្ច-សង្គម របស់កម្ពុជាទៀតឡើយ ផ្ទុយទៅវិញការដកផ្នែកខ្លះនៃប្រព័ន្ធអនុគ្រោះពន្ធ EBA កាលពីឆ្នាំ ២០២០ បានជួយឱ្យកម្ពុជាបានត្រៀមខ្លួនកាន់តែប្រសើរ មានភាពម្ចាស់ការ និងមានភាពប្រកួតប្រជែងដោយឡែករបស់ខ្លួន។ គួរកត់សម្គាល់ថា EBAនេះ នឹងត្រូវបានទាំងស្រុងនៅឆ្នាំ២០២៧ព្រោះកម្ពុជាលែងជាប្រទេសក្រីក្រដែលស្ថិតក្នុងកូតារបស់សហភាពអ៊ឺរ៉ុបទៀតហើយ។ ដោយឡែក ប្រព័ន្ធអនុគ្រោះពន្ធទូទៅរបស់សហរដ្ឋអាមេរិក(GSP)វិញគឺជាប្រពន្ធអនុគ្រោះពន្ធដែលផ្តល់ឱ្យប្រទេសក្រីក្រ ឬមានកំណើនតិចតួចបំផុតក្នុងនាំចូលមុខទំនិញដោយមិនជាប់ពន្ធ។ សម្រាប់កម្ពុជា ប្រពន្ធអនុគ្រោះពន្ធនេះ បានផុតតាំងពីថ្ងៃទី៣១ ខែធ្នូ ឆ្នាំ២០២០មកម្លេះបន្ទាប់ពីកម្ពុជាទទួលបាននៅឆ្នាំ១៩៩៧។ សូមរំលឹកថា ក្នុងឆ្នាំ២០២២កន្លងទៅ ទំហំ​ពាណិជ្ជកម្ម​ទ្វេភាគី​កម្ពុជា​-​អាមេរិក មាន​ទំហំជាង ៩.២​ ពាន់​លាន​ដុល្លារ កើនឡើង ១៨.៦​ ភាគរយ​បើ​ធៀប​ឆ្នាំ ២០២១។ ជាមួយទំហំពាណិជ្ជកម្មនេះ ទំហំពាណិជ្ជកម្មរវាងកម្ពុជា និងអាមេរិក នៅតែបន្តមានវឌ្ឍនភាពបើទោះបីអត់មានប្រព័ន្ធGSPក៏ដោយ។ ប៉ុន្តែមិនមានន័យថា កម្ពុជាមិនទទួលប្រព័ន្ធអនុគ្រោះពន្ធGSPរបស់អាមេរិកនោះទេព្រោះការផ្តល់ឱ្យវានឹងនាំឱ្យជញ្ជីងពាណិជ្ជកម្មរបស់កម្ពុជាមានកំណើនបន្ថែមទៀត។  ទាំងនេះ គឺជាចំណុចត្រួសៗដែលរដ្ឋាភិបាលកម្ពុជា បានប្រឹងប្រែងផ្តល់ដំណោះស្រាយ និងសម្រួលជូនកម្មករនិយោជិត ប៉ុន្តែមិនត្រូវបានកត់ចំណាំដោយមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស(សង់ត្រាល់)។ តើវាជា ការមើលមិនឃើញ ស្តាប់មិនឮឬយ៉ាងណា? ប៉ុន្តែផ្ទុយទៅវិញ មានតែចំណុចអវិជ្ជមានដែលគ្មានការពិត មិនគ្រប់ជ្រុងជ្រោយ មិនឆ្លុះបញ្ចាំងពីទិដ្ឋភាពជាក់ស្តែងនៃសង្គមកម្ពុជាក្នុងវិស័យកាត់ដេរ។ ហេតុអ្វីបានជាដូចនេះ? តើដូចពាក្យគេថាអង្គការមួយចំនួននៅកម្ពុជាដើម្បីទទួលបានជំនួយសម្រាប់ប្រតិបត្តិការក្នុងអង្គការ បានយកបញ្ហាកម្មកររោងចក្រ សិទ្ធិការងារ ប្រព័ន្ធអនុគ្រោះពន្ធEBAរបស់អ៊ឺរ៉ុប និងGSPរបស់អាមេរិក។ល។... ជាឆ្នាំងបាយរបស់ខ្លួន?  មួយវិញទៀត ក្នុងរបាយការណ៍របស់ខ្លួនកាលពីថ្ងៃទី១៧ ខែសីហាដែលនិយាយថា៖ «ការ​ឈឺចាប់​ចំពោះ​បញ្ហា មិន​បាន​រួម​ចំណែក​ក្នុង​ការ​ស្វែងរក​ដំណោះស្រាយ ឬ​ធ្វើ​ឱ្យ​ស្ថានភាព​ប្រសើរ​ឡើង​ឡើយ មាន​តែ​ការ​ចូលរួម​ឈឺឆ្អាល​របស់​យុវជន និង​ពលរដ្ឋ​គ្រប់​គ្នា​ប៉ុណ្ណោះ​ទើប​ធ្វើ​ឱ្យ​ស្ថានភាព​ប្រសើរ​ឡើង​ជាង​នេះ​សម្រាប់ ៥​ឆ្នាំ​ខាងមុខ។ យើង​នឹង​ក្លាយ​ជា​ពលរដ្ឋ​អាត្មា​និយម​នៅ​ពេល​ដែល​យើង​ម្នាក់ៗ​បន្ត​នៅ​ស្ងៀមស្ងាត់​ចំពោះ​បញ្ហា​ដែល​កំពុង​កើតមាន​ទ្បើង​ក្នុង​សង្គម»។ សំណួរសួថាតើអង្គការសង់ត្រាល់ចង់បានអ្វីឱ្យពិតប្រាកដ? តើមិនមែនជាការដុតរោលឱ្យពលរដ្ឋមានកំហឹងទេឬយ៉ាងម៉េច? នេះជាសំណួររបស់ពលរដ្ឋ។  សូមបញ្ជាក់ថា ទម្រាំមានសន្តិភាពដូចសព្វថ្ងៃកម្ពុជារងចាំរយៈពេល៥០០ឆ្នាំដើម្បីមានកម្ពុជាមួយដែលមានរដ្ឋធម្មនុញ្ញតែមួយ រាជបល្ល័ង្កតែមួយ រាជរដ្ឋាភិបាលតែមួយដែលគ្មានការបែងចែកទឹកដី និងតំបន់កាន់កាប់។ ក្នុងនាមជាប្រទេសប្រជាធិបតេយ្យ កម្ពុជា បានបើកលំហអង្គការសង្គមស៊ីវិលក្នុងការធ្វើប្រតិបត្តិការនៅទូទាំងប្រទេសដោយគ្មានការរិតត្បិត។ គិតត្រឹមបំណាច់ឆ្នាំ២០២២ សមាគម និងអង្គការមិនមែនរដ្ឋាភិបាល មានជាង៦ពាន់ស្ថាប័ន ហើយរដ្ឋាភិបាលតែងតែចាត់ទុកសមាគម និងអង្គកការមិនមែនរដ្ឋាភិបាលទាំងនោះ ជាដៃគូសហការមិនអាចខ្វះបាន។ ​ ដូចនេះ​ វត្តមានសមាគម និងអង្គការ គួរតែដើរតួនាទីជាអ្នកផ្តល់ព័ត៌មាន ផ្តល់ទិន្នន័យ និងការវិភាគជាក់ស្តែងឱ្យរដ្ឋាភិបាលកម្ពុជាដើម្បីឱ្យកែតម្រូវចំណុចខ្វះខាត ហើយជឿថា រដ្ឋាភិបាលកម្ពុជានឹងមិនចង្អៀតចង្អល់ក្នុងការទទួលចំណុចអវិជ្ជមានដើម្បីស្ថាបនានោះទេ៕ដោយ៖ សុវណ្ណ ធរណិន្ទសាគរ

រយៈពេល៥ឆ្នាំ សមាគមវិស័យឯកជនរួមចំណែកអភិវឌ្ឍន៍វិស័យអប់រំ និងធនធានមនុស្ស ប្រកបដោយប្រសិទ្ធភាពជាមួយរដ្ឋាភិបាល

2023/08/20 12:21:10 am        1167
Facebook Telegram Linkin
ភ្នំពេញ៖ រយៈពេល៥ឆ្នាំ កន្លងមក សមាគមគ្រឹះស្ថានឧត្ដមសិក្សាបច្ចេកទេស និងបណ្ដុះបណ្ដាលវិជ្ជាជីវៈឯកជនរួមចំណែកអភិវឌ្ឍន៍វិស័យអប់រំ និងធនធានមនុស្សប្រកបដោយប្រសិទ្ធភាពជាមួយ រដ្ឋាភិបាលកម្ពុជា។ សមាគមគ្រឹះស្ថានឧត្ដមសិក្សាបច្ចេកទេស និងបណ្ដុះបណ្ដាលវិជ្ជាជីវៈឯកជន នៅព្រឹកថ្ងៃទី១៩ ខែសីហា ឆ្នាំ២០២៣នេះ បានបើកកិច្ចប្រជុំស្ដីពីការបូកសរុបលទ្ធផលការងារកន្លងមក និងលើកទិសដៅ ការងារបន្ដរបស់សមាគមក្រោមអធិបតីភាពដ៏ខ្ពង់ខ្ពស់ឯកឧត្តមបណ្ឌិត ណុប នរិន្ទ ប្រធានសមាគមគ្រឹះស្ថានឧត្ដមសិក្សាបច្ចេកទេស និងបណ្ដុះបណ្ដាលវិជ្ជាជីវៈឯកជន។សមាគមគ្រឹះស្ថានឧត្ដមសិក្សាបច្ចេកទេស និងបណ្ដុះបណ្ដាលវិជ្ជាជីវៈឯកជន បង្កើតឡើងក្នុងគោលបំណង៖ រួមចំណែកអភិវឌ្ឍន៍វិស័យអប់រំ និងធនធានមនុស្សប្រកបដោយប្រសិទ្ធភាពជាមួយរដ្ឋាភិបាលកម្ពុជា ដែលមានក្រសួងការងារ និងបណ្ដុះបណ្ដាលវិជ្ជាជីវៈនិងគណៈកម្មាធិការទទួលស្គាល់គុណភាពអប់រំនៃកម្ពុជា ជាសេនាធិការ និងស្របតាមយុទ្ធសាស្ដ្រចតុកោណរបស់រាជរដ្ឋាភិបាល ដែលមានសម្ដេចតេជោ ហ៊ុន សែន ជាប្រមុខដឹកនាំដ៏ឈ្លាសវៃប្រកបដោយគតិបណ្ឌិត បានធ្វើឱ្យប្រទេសជាតិទាំងមូលទទួលបានសុខសន្ដិភាពពេញលេញ និងការអភិវឌ្ឍលើគ្រប់វិស័យ។បើតាមឯកឧត្តមបណ្ឌិត ណុប នរិន្ទ ប្រធានសមាគមគ្រឹះស្ថានឧត្ដមសិក្សាបច្ចេកទេស និងបណ្ដុះ បណ្ដាលវិជ្ជាជីវៈឯកជន បានលើកឡើងថា សមាគមបានបើកដំណើរមកដល់ពេលនេះ ក្រៅពីការងារអប់រំ បណ្ដុះបណ្ដាលបច្ចេកទេសវិជ្ជាជីវៈ សមាគម ក៏បានចូលរួមចំណែកយ៉ាង សកម្មនៅក្នុងកិច្ចការសង្គម ដូចជា៖ ចូលរួមបរិច្ចាគឈាមជូន មជ្ឈមណ្ឌលជាតិផ្ដល់ឈាម, ឧបត្ថម្ភថវិកាដល់កាកបាទក្រហមកម្ពុជា, មន្ទីរពេទ្យគន្ធបុប្ផា, ចូលរួមឧបត្ថម្ភថវិកាដល់ គណៈកម្មការជាតិប្រយុទ្ធប្រឆាំងនឹងជំងឺកូវីដ១៩, ឧបត្ថម្ភអង្ករ និងថវិកា ជូនសហភាពសហព័ន្ធយុវជនកម្ពុជា និងផ្ដល់អាហារូបករណ៍ជូនថ្នាក់ដឹកនាំ ដើម្បីផ្ដល់ជូនសិស្ស-និស្សិតក្រីក្រជារៀងរាល់ឆ្នាំ។ ដោយឡែកឆ្នាំសិក្សា២០២២-២០២៣ ការផ្ដល់អាហារូបករណ៍ជូនថ្នាក់ដឹកនាំ សរុបចំនួន៣,៥០០កន្លែង។ឯកឧត្តមបណ្ឌិត បានបន្ដថា សមាគម បានចូលរួមចំណែកការងារមនុស្សធម៌ជាមួយរាជរដ្ឋាភិបាល តាមរយៈការអភិវឌ្ឍធនធាន សកម្មភាពមនុស្សធម៌ជាច្រើន ទោះបីប្រទេសកម្ពុជា និងសកលលោក ជួបវិបត្ដិកូវីដ១៩ក្ដី ក៏សមាគមខិតខំប្រឹងប្រែងចូលរួមការងារ មនុស្សធម៌ ជាមួយរាជរដ្ឋាភិបាលរហូតមកដល់សព្វថ្ងៃនេះ ។ឯកឧត្តមបណ្ឌិត ណុប នរិន្ទ បានបញ្ជាក់បន្ថែមទៀតថា កន្លងមក និងបច្ចុប្បន្នរាជរដ្ឋាភិបាលកម្ពុជា បានផ្ដល់ការអនុគ្រោះដ៏ខ្ពង់ខ្ពស់បំផុតដល់គ្រឹះស្ថានសិក្សាឯកជន ដោយឱ្យបង់ពន្ធលើប្រាក់បៀវត្ស ពន្ធ កាត់ទុកលើការជួលទីតាំង ពន្ធប៉ាតង់ សមាគមបានបំពេញកាតព្វកិច្ចនេះជូនរដ្ឋពុំដែល​ខកខាននោះឡើយ។ ការអនុគ្រោះរបស់រាជរដ្ឋាភិបាលកម្ពុជា ពិតជាបានផ្ដល់ឱកាស​ដល់​គ្រឹះស្ថាន​សិក្សាឯកជនមានលទ្ធភាពក្នុងការបន្ដនិរន្ដភាព និងអភិវឌ្ឍន៍ស្ថាប័នរបស់ខ្លួនបានកាន់​តែ​រឹងមាំ​បន្ថែមទៀត៕

អភិបាលក្រុងតៃប៉ិ គ្រោងទៅបំពេញទស្សនកិច្ចនៅប្រទេសចិន ខណៈភាពតានតឹងកាន់តែកើនឡើងជាមួយកោះតៃវ៉ាន់

2023/08/18 08:55:33 pm        626
Facebook Telegram Linkin
ការិយាល័យរបស់ខ្លួន បាននិយាយកាលពីថ្ងៃសុក្រថា លោកអភិបាលក្រុងតៃប៉ិ នឹងធ្វើទស្សនកិច្ចនៅទីក្រុងសៀងហៃ នៅចុងខែនេះ សម្រាប់វេទិកាទីក្រុងប្រចាំឆ្នាំ ជាដំណើរមួយ ដែលនឹងប្រព្រឹត្តទៅ ស្របនឹងរនាំងនៃទំនាក់ទំនងដែលជាប់គាំងរវាងរដ្ឋាភិបាលតៃវ៉ាន់ និងចិន។ខណៈពេលដែលប្រទេសចិន បានបដិសេធមិននិយាយជាមួយរដ្ឋាភិបាលរបស់កោះតៃវ៉ាន់ ចាប់តាំងពីមេដឹកនាំដីកោះនេះ លោកស្រី សៃ អ៊ីងវិន (Tsai Ing-wen) ចូលកាន់តំណែងក្នុងឆ្នាំ ២០១៦ ដោយជឿថាលោកស្រីជាអ្នកបំបែកខ្លួនម្នាក់ ការផ្លាស់ប្តូរទស្សនកិច្ចរវាងទីក្រុងនិងទីក្រុង បានបន្តរហូតដល់មានការរំខានដោយជំងឺរាតត្បាត COVID-19។យ៉ាងណាក៏ដោយ រដ្ឋបាលរបស់លោកស្រី សៃ បាននិងកំពុងព្យាយាមយ៉ាងប្រុងប្រយ័ត្ន ដើម្បីបើកទំនាក់ទំនងឡើងវិញរវាងប្រជាជននិងប្រជាជន ដែលមិនសូវមានមានបញ្ហាប្រឈម ចាប់តាំងពីខ្លួន បានដកការគ្រប់គ្រងព្រំដែនដែលទាក់ទងនឹងជំងឺរាតត្បាត កាលពីចុងឆ្នាំមុន ក្នុងគោលបំណងបង្កើតសុច្ឆន្ទៈជាមួយប្រទេសចិន ហើយក្រុមមន្ត្រីសៀងហៃមួយក្រុម បានធ្វើទស្សនកិច្ចកម្រិតទាប ទៅកាន់ទីក្រុងតៃប៉ិកាលពីខែកុម្ភៈ។អភិបាលក្រុងតៃប៉ិ លោក ឈៀង វ៉ានអាន (Chiang Wan-an)មកពីគណបក្សប្រឆាំងដ៏ធំគឺ Kuomintang (គួកមីនតាង) ដែលនិយមទំនាក់ទំនងជិតស្និទ្ធជាមួយប្រទេសចិន នឹងទៅកាន់ទីក្រុងសៀងហៃនៅថ្ងៃទី ២៩-៣១ខែសីហា សម្រាប់វេទិកាទីក្រុងតៃប៉ិ-សៀងហៃ ដែលត្រូវបានរៀបចំជាលើកដំបូងក្នុងឆ្នាំ ២០១០។

ការប្រជែងផ្នែកអវកាស៖ រុស្ស៊ី ឥណ្ឌា ចិន និងសហរដ្ឋអាមេរិក កំពុងបោះជំហានឆ្ពោះទៅកាន់ប៉ូលខាងត្បូងនៃឋានព្រះចន្ទហើយ

2023/08/18 08:48:53 pm        569
Facebook Telegram Linkin
ការប្រណាំងទីអាកាសបានត្រលប់មកវិញហើយ ឥឡូវនេះមានប្រទេសជាច្រើនទៀតកំពុងប្រកួតប្រជែងគ្នា។ រយៈពេលប្រហែល៦ទសវត្សរ៍បន្ទាប់ពីសហភាពសូវៀត និងសហរដ្ឋអាមេរិក បានប្រណាំងប្រជែងគ្នាដើម្បីទៅដល់ឋានព្រះចន្ទ មានការប្រកួតប្រជែងថ្មីមួយបានលេចឡើង។ នៅពេលនេះ ការផ្តោត គឺនៅលើប៉ូលខាងត្បូងនៃភពព្រះចន្ទ ដែលក្រុមអ្នកវិទ្យាសាស្ត្របានរកឃើញដើមដាននានានៃប្រភពទឹកកក។ប្រទេសរុស្ស៊ី កាលពីសប្តាហ៍មុនបានបាញ់បង្ហោះយានអវកាសចុះចតភពព្រះចន្ទជាលើកដំបូងរបស់ខ្លួនក្នុងរយៈពេល៤៧ឆ្នាំ ដោយគេរំពឹងថា យាននោះនឹងចុះចតនៅក្នុងតំបន់នេះក្នុងរយៈពេលប៉ុន្មានថ្ងៃខាងមុខនេះ។ ជាមួយគ្នានេះ យានអាវកាសរបស់ប្រទេសឥណ្ឌា ក៏ស្ថិតនៅមិនឆ្ងាយប៉ុន្មានដោយគោលដៅរបស់ខ្លួន គឺចង់ឲ្យយានចុះចតនៅថ្ងៃទី២៣ ខែសីហា ខាងមុខនេះ។ទន្ទឹមនឹងនោះ សហរដ្ឋអាមេរិក កំពុងប្រញាប់ប្រញាល់ក្លាយជាប្រទេសដំបូងគេ ដែលចុះចតដោយអវកាសយានិកនៅទីតាំងឋានព្រះចន្ទនោះ ជាមួយនឹងបេសកកម្មយានិកដែលបានគ្រោងទុកសម្រាប់ឆ្នាំ២០២៥។ ប្រទេសចិនក៏មានគម្រោងបេសកកម្មទៅកាន់តំបន់នោះផងដែរ ដោយមាន និងគ្មានអវកាសយានិក មុនពេលចុងបញ្ចប់នៃទសវត្សរ៍នេះ។ប្រសិនបើសហរដ្ឋអាមេរិកមិនមែនជាប្រទេសដំបូងគេដែលចុះចតដោយអវកាសយានិកនៅក្នុងតំបន់ដែលចង់បានទេ នោះអាចនឹងមានផ្នែកងងឹតដ៏ខ្លាំងក្លានៃការប្រកួតប្រជែងអាវកាសលើឋានព្រះច័ន្ទ។ អ្នកគ្រប់គ្រងអង្គការ ណាសា លោក Bill Nelson បាននិយាយថា លោកមានការព្រួយបារម្ភថា ប្រទេសចិនអាចព្យាយាមអះអាងសិទ្ធិលើទីតាំងនៅភពព្រះចន្ទ ប្រសិនបើប្រទេសនេះទៅដល់ទីនោះមុនអាមេរិក៕

រដ្ឋាភិបាលបារាំង បើកកិច្ចប្រជុំវិបត្តិអាកាសធាតុ ខណៈរលកកម្ដៅកើនឡើង

2023/08/18 08:43:18 pm        551
Facebook Telegram Linkin
រដ្ឋាភិបាលបារាំង បានបើកកិច្ចប្រជុំវិបត្តិមួយកាលពីថ្ងៃព្រហស្បតិ៍ (១៧ សីហា) ដើម្បីពិភាក្សាអំពីវិធានការដោះស្រាយរលកកម្តៅ ដែលសីតុណ្ហភាពអាចឡើងលើសពី៤០ អង្សាសេនៅចុងសប្តាហ៍នេះ។ ការិយាល័យនេះបានប្រាប់សារព័ត៌មាន AFP ថា មន្ត្រីរាជការជាន់ខ្ពស់មកពីការិយាល័យនាយករដ្ឋមន្ត្រី លោកស្រី Elisabeth Borne ក៏ដូចជាក្រសួងមហាផ្ទៃ ក្រសួងសុខាភិបាល ក្រសួងកសិកម្ម និងក្រសួងដឹកជញ្ជូន បានចូលរួមកិច្ចប្រជុំនេះផងដែរ។ទីក្រុងប៉ារីស បាននិងកំពុងបង្កើនវិធានការការពារអាកាសធាតុក្តៅនៅរដូវក្តៅនេះ បន្ទាប់ពីកម្ដៅដ៏ខ្លាំង និងចំហេះព្រៃដ៏កាចសាហាវក្នុងឆ្នាំ២០២២មក។ នាយកដ្ឋានចំនួន៧នៃនាយកដ្ឋានទាំង៩៦របស់បារាំងដីគោក បានប្រកាសអាសន្នរួចហើយសម្រាប់ព្យុះរដូវក្តៅ និងកម្ដៅខ្លាំង ហើយនាយកដ្ឋានចំនួន១២ផ្សេងទៀតនឹងចូលរួមប្រកាសអាសន្ននៅថ្ងៃសុក្រនេះ ដោយភាគច្រើននៅក្នុងភាគខាងកើត និងខាងត្បូងនៃប្រទេសបារាំង។អ្នកជំនាញឧតុនិយមលោកស្រី Christelle Robert មកពី Meteo France បាននិយាយថា នៅចុងសប្តាហ៍ សីតុណ្ហភាពនៅក្នុងតំបន់ Languedoc និងតំបន់ Provence នៅភាគខាងត្បូង អាចកើនឡើងដល់៤១អង្សាសេ។ ក្រុមអ្នកព្យាករណ៍រំពឹងថា សីតុណ្ហភាពខ្ពស់នឹងបន្តដល់ដើមសប្តាហ៍ក្រោយទៀតផងដែរ៕

ការបញ្ចេញសំណល់ទឹកហ្វូគូស៊ីម៉ា ជាការសាកល្បងដំបូងសម្រាប់ការរួបរួមរបស់ជប៉ុន និងកូរ៉េខាងត្បូង

2023/08/18 08:39:58 pm        500
Facebook Telegram Linkin
ប្រធានាធិបតីអាមេរិកលោក ចូ បៃដិន ចង់ពង្រឹងទំនាក់ទំនងមិត្តភាពរវាងជប៉ុន និងកូរ៉េខាងត្បូង នៅក្នុងកិច្ចប្រជុំកំពូលមួយនៅថ្ងៃសុក្រនេះ ប៉ុន្តែការត្រៀមខ្លួនរបស់ភាគីទាំងពីរក្នុងការដោះស្រាយបញ្ហាយប្រឈម នឹងត្រូវបានសាកល្បងនៅពេលដែលទីក្រុងតូក្យូ ចាប់ផ្តើមបញ្ចេញទឹកពីរោងចក្រនុយក្លេអ៊ែរ ហ្វ៊ូគូស៊ីម៉ា ដែលបានខូចខាត ចូលទៅក្នុងសមុទ្រ។មន្ត្រីបួនរូបនៅក្នុងប្រទេសជប៉ុន និងកូរ៉េខាងត្បូងបានប្រាប់សារព័ត៌មាន រ៉យទ័រ ថា ប្រទេសជប៉ុន បានពន្យារពេលគម្រោងការបញ្ចេញសំណល់ទឹកនេះរួចហើយ ដើម្បីជៀសវាងការញុះញង់ឱ្យមានការប្រឆាំងនយោបាយនៅក្នុងប្រទេសកូរ៉េខាងត្បូង មុនពេលប្រធានាធិបតីកូរ៉េខាងត្បូង លោក Yoon Suk Yeol ចូលរួមជាមួយនាយករដ្ឋមន្ត្រីជប៉ុន លោក Fumio Kishida ក្នុងកិច្ចប្រជុំជាមួយលោក បៃដិន នៅឯវិមានសម្រាលលំហែ Camp David នៅថ្ងៃសុក្រនេះ ។ការបញ្ចេញចោលសំណល់ទឹកវិទ្យុសកម្ម អាចនឹងធ្វើឡើងប៉ុន្មានថ្ងៃបន្ទាប់ពីកិច្ចប្រជុំកំពូល ដែលសហរដ្ឋអាមេរិក បានប្រកាសថាជាកិច្ចប្រជុំត្រីភាគីជា «ប្រវត្តិសាស្ត្រ» ដែលនឹងផ្តល់ «ការប្រឆាំងដ៏ក្លាហាន» ទល់នឹងគូប្រជែងតំបន់ គឺប្រទេសចិន។ មន្ត្រីម្នាក់ក្នុងចំណោមមន្ត្រី ដែលសុំមិនបញ្ចេញឈ្មោះបាននិយាយថា បញ្ហានោះបានដាក់សម្ពាធនយោបាយក្នុងស្រុកតិចតួចប៉ុណ្ណោះទៅលើលោក Yoon។ស្របពេលមានការរិះគន់យ៉ាងទូលំទូលាយពីក្នុងប្រទេស និងក្រៅប្រទេស រដ្ឋាភិបាលជប៉ុនបាននិងកំពុងជំរុញឱ្យបញ្ចេញទឹកសំណល់មានមេរោគនុយក្លេអ៊ែរ នៅរដូវក្តៅនេះ ពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដៃអ៊ីឈី ដែលរងការវាយប្រហារដោយការរញ្ជួយដីដ៏ធំ និងរលកយក្សស៊ូណាមិកាលពីខែមីនាឆ្នាំ២០១១៕

គណបក្សភឿថៃ ទទួលបានការគាំទ្រពីគណបក្សគូប្រជែង ដើម្បីបង្កើតរដ្ឋាភិបាល

2023/08/18 08:36:41 pm        728
Facebook Telegram Linkin
កាលពីថ្ងៃព្រហស្បតិ៍ (១៧ សីហា) គណបក្សភឿថៃ ទទួលបានការគាំទ្រពីគណបក្សគាំទ្រយោធា ជាគូប្រជែង ដែលជាកម្លាំងជំរុញដ៏សំខាន់ ក្នុងការបង្កើតរដ្ឋាភិបាលមុនការបោះឆ្នោតជ្រើសរើសនាយករដ្ឋមន្ត្រីនៅក្នុងសភានៅសប្តាហ៍ក្រោយ។គណបក្សគណបក្សរួមសាងជាតិថៃ ឬហៅថា UTN ដែលជាគណបក្សមានអតីតមេដឹកនាំរដ្ឋប្រហារលោក ប្រាយុទ្ធ ចាន់អ៊ូចា (Prayut Chan-o-cha) ជាបេក្ខជននាយករដ្ឋមន្ត្រី នៅក្នុងការបោះឆ្នោតសកលខែឧសភា បាននិយាយកាលពីថ្ងៃព្រហស្បតិ៍ថា ខ្លួននឹងជួយគណបក្សភឿថៃ ដើម្បីបង្កើតរដ្ឋាភិបាលមួយ។ លោក ប្រាយុទ្ធ ដែលបច្ចុប្បន្នជានាយករដ្ឋមន្ត្រីចាំផ្ទះ បានឡើងកាន់អំណាចដំបូងក្នុងរដ្ឋប្រហារ ប្រឆាំងនឹងរដ្ឋាភិបាលដឹកនាំដោយគណបក្សភឿថៃក្នុងឆ្នាំ ២០១៤។ប្រទេសថៃ បានចំណាយពេលជាង៥ខែនៅក្រោមរដ្ឋាភិបាលចាំផ្ទះ បន្ទាប់ពីមេដឹកនាំនៃគណបក្សបោះជំហានទៅមុខ ដែលឈ្នះការបោះឆ្នោតសកល ត្រូវបានរារាំងចំនួនពីរដងដោយក្រុមគូប្រជែងអភិរក្សនិយម និងគាំទ្រយោធា ក្នុងសំណើរបស់លោកដើម្បីក្លាយជានាយករដ្ឋមន្ត្រី។បក្សភឿថៃ គ្រោងនឹងតែងតាំងសេដ្ឋីអចលទ្រព្យលោក សេដ្ឋា ថាវីស៊ីន ជានាយករដ្ឋមន្ត្រីក្នុងការបោះឆ្នោតដែលគ្រោងធ្វើនៅថ្ងៃអង្គារសប្តាហ៍ក្រោយ ហើយត្រូវការការគាំទ្រពីសភាទ្វេភាគីច្រើនជាងពាក់កណ្តាល រួមទាំងព្រឹទ្ធសភាដែលតែងតាំងដោយយោធាផងដែរ។ គណបក្សនេះ បានប្រមូលការគាំទ្រពីគណបក្សនយោបាយចំនួន១៣បក្សផ្សេងទៀត ប៉ុន្តែវាក៏នឹងត្រូវការការគាំទ្រមួយចំនួនពីព្រឹទ្ធសភាដែលមិនបានជាប់ឆ្នោតផងដែរ៕

អាមេរិកសន្យាជំរុញយុគសម័យថ្មី ខណៈលោក Biden ត្រៀមធ្វើជាម្ចាស់ផ្ទះជំនួបកំពូលលើកដំបូង ជាមួយជប៉ុន និងកូរ៉េខាងត្បូង

2023/08/18 08:32:41 pm        521
Facebook Telegram Linkin
សហរដ្ឋអាមេរិក បានសន្យាបង្កើតយុគសម័យថ្មី ក្នុងទំនាក់ទំនងជាមួយសម្ព័ន្ធមិត្តសំខាន់បំផុតរបស់ខ្លួន នៅអាស៊ី ខណៈតំបន់នេះ ព្យាយាមដោះស្រាយការគំរាមកំហែងបង្កឡើងដោយប្រទេសចិនដ៏ពិតប្រាកដដែលកំពុងកើនឡើង និងពីប្រទេសកូរ៉េខាងជើងដែលមានអាវុធនុយក្លេអ៊ែរ។លោក Joe Biden ត្រូវបានគេរំពឹងថានឹងទាញយកផលប្រយោជន៍ពីការបន្ទន់ឥរិយាបថថ្មីនេះក្នុងទំនាក់ទំនងរវាង ប្រទេសជប៉ុន និងប្រទេសកូរ៉េខាងត្បូង ដែលបានផ្តល់ទីតាំងដល់ទាហានអាមេរិករាប់ម៉ឺននាក់ ដើម្បីប្រកាសកិច្ចសហប្រតិបត្តិការថ្មី លើបច្ចេកវិទ្យា និងការពារមីស៊ីល នៅពេលដែលលោក ជួបមេដឹកនាំទាំងពីរ នៅថ្ងៃសុក្រនេះ។ លោក Biden នឹងទទួលប្រធានាធិបតីកូរ៉េខាងត្បូងលោក Yoon Suk Yeol និងនាយករដ្ឋមន្ត្រីជប៉ុន លោក Fumio Kishida នៅវិមានសម្រាកលំហែ Camp David សម្រាប់ជំនួបកំពូលតែមួយលើកដំបូង ដែលមន្ត្រីសហរដ្ឋអាមេរិក និយាយថា នឹងជំរុញទស្សនៈរួមនៅតំបន់អាស៊ី-ប៉ាស៊ីហ្វិក សេរី និងបើកចំហរ។លោក Kurt Campbell អ្នកសម្របសម្រួលនៅសេតវិមាន សម្រាប់កិច្ចការរតំបន់ឥណ្ឌូ-ប៉ាស៊ីហ្វិក បាននិយាយថាទំនាក់ទំនងទីក្រុងវ៉ាស៊ីនតោន ជាមួយទីក្រុងសេអ៊ូល និងទីក្រុងតូក្យូ នឹងជាការកំណត់ទំនាក់ទំនងត្រីភាគីសម្រាប់សតវត្សរ៍ទី២១នេះ ក្នុងពេលមានរបាយការណ៍ថា ជំនួបកំពូលនឹងបង្កើតគំនិតផ្តួចផ្តើម លើកិច្ចសហប្រតិបត្តិការដែលត្រូវពង្រីក ស្តីពីការការពារមីស៊ីលបាលីស្ទីក សមយុទ្ធយោធារួមគ្នា និងបណ្តាញខ្សែទូរស័ព្ទទាន់ហេតុការណ៍សន្តិសុខត្រីភាគី។

ទីក្រុងញូវយ៉ក បានហាមប្រាមកម្មវិធីវីដេអូកម្សាន្ត TikTok លើឧបករណ៍គ្រប់គ្រងដោយរដ្ឋាភិបាល ជុំវិញបញ្ហាសុវត្ថិភាព

2023/08/18 08:27:59 pm        544
Facebook Telegram Linkin
កាលពីថ្ងៃពុធ (១៦ សីហា) ទីក្រុងញូវយ៉ក របស់សហរដ្ឋអាមេរិក បានដាក់បម្រាមចំពោះកម្មវិធីវីដេអូកម្សាន្ត TikTok ទៅលើឧបករណ៍ដែលគ្រប់គ្រងដោយរដ្ឋាភិបាល ដោយលើកឡើងពីកង្វល់សុវត្ថិភាព ដោយចូលរួមជាមួយទីក្រុង និងរដ្ឋមួយចំនួនទៀតរបស់សហរដ្ឋអាមេរិក ដែលបានដាកការរឹតត្បិតលើកម្មវិធីចែករំលែកវីដេអូខ្លីមួយនេះ។កម្មវិធី TikTok ដែលត្រូវបានប្រើប្រាស់ដោយជនជាតិអាមេរិកជាង ១៥០លាននាក់ និងគ្រប់គ្រងដោយក្រុមហ៊ុនបច្ចេកវិទ្យាយក្សរបស់ចិន ឈ្មោះ ByteDance បានប្រឈមមុខនឹងការអំពាវនាវកាន់តែខ្លាំងឡើងពីសមាជិកសភាសហរដ្ឋអាមេរិក សម្រាប់ការហាមឃាត់ទូទាំងប្រទេស ជុំវិញការព្រួយបារម្ភអំពីឥទ្ធិពលរបស់រដ្ឋាភិបាលចិន ដែលអាចកើតមានក្នុងសហរដ្ឋអាមេរិក។ទីភ្នាក់ងារជាច្រើនរបស់ទីក្រុងញូវយ៉ក តម្រូវឱ្យលុបកម្មវិធីនេះក្នុងរយៈពេល៣០ថ្ងៃ ហើយបុគ្គលិកនឹងបាត់បង់សិទ្ធិក្នុងការចូលប្រើកម្មវិធី និងគេហទំព័ររបស់កម្មវិធីបណ្ដាញសង្គមមួយនេះនៅលើឧបករណ៍ និងបណ្តាញដែលគ្រប់គ្រងដោយទីក្រុង។ រដ្ឋញូវយ៉ក ធ្លាប់បានដាក់បម្រាមកម្មវិធី TikTok នៅលើឧបករណ៍ចល័តដែលចេញដោយរដ្ឋ រួចមកហើយ។ក្រុមហ៊ុន TikTok បាននិយាយថា ខ្លួនមិនបានចែករំលែក ហើយនឹងមិនចែករំលែកទិន្នន័យអ្នកប្រើប្រាស់របស់សហរដ្ឋអាមេរិកណាមួយ ជាមួយរដ្ឋាភិបាលចិនឡើយ ហើយបានចាត់វិធានការជាច្រើនដើម្បីការពារឯកជនភាព និងសុវត្ថិភាពរបស់អ្នកប្រើប្រាស់កម្មវិធី TikTok ផងដែរ។ បណ្ដារដ្ឋ និងទីក្រុងជាច្រើនរបស់សហរដ្ឋអាមេរិក បានដាក់ការរឹតបន្តឹងលើកម្មវិធីវីដេអូកម្សាន្ត TikTok ចំពោះឧបករណ៍រដ្ឋាភិបាលជាច្រើន៕

មេដឹកនាំបេឡារុស ជួបជាមួយរដ្ឋមន្ត្រីការពារជាតិចិន នៅទីក្រុង Minsk

2023/08/18 08:22:51 pm        504
Facebook Telegram Linkin
មេដឹកនាំប្រទេសបេឡារុស លោក Alexander Lukashenko បានជួបជាមួយរដ្ឋមន្ត្រីការពារជាតិចិន លោក Li Shangfu ក្នុងទីក្រុង Minsk កាលពីថ្ងៃព្រហស្បតិ៍ នៅក្នុងជំនួបមួយស្តីពីការកសាង​ទំនាក់ទំនង​យោធាកាន់តែជិតស្និទ្ធជាមួយប្រទេសចិន។ កាលពីដើមសប្តាហ៍នេះ ភាគីទាំងពីរនេះបានចូលរួមក្នុងសន្និសីទអន្តរជាតិស្តីពីសន្តិសុខ នៅក្នុងទីក្រុងមូស្គូ របស់ប្រទេសរុស្ស៊ី ដែលលោក Li បានព្រមានដល់គូប្រជែងរបស់ប្រទេសចិនថា «កុំប្រឡែងលេជាមួយភ្លើង» លើបញ្ហាកោះតៃវ៉ាន់។ពាក្យសម្តីរបស់លោក បានគាំទ្រដល់ការលើកឡើងកាលពីពេលមុនដោយមន្ត្រី​ប្រទេសចិន​ផ្សេងទៀត និងបានធ្វើឡើងក្នុងពេលប្រតិបត្តិការសិកពិសេសនៅតែបន្តរបស់រុស្ស៊ី នៅក្នុងប្រទេសអ៊ុយក្រែន។ កាលពីពេលមុន ប្រទេសចិន បានបង្ហាញពីផែនការរបស់ខ្លួនដើម្បីបញ្ចប់ជម្លោះនេះ។ លោក Lukashenko បានមកធ្វើទ្សនកិច្ចនៅទីក្រុងប៉េកាំង កាលពិខែកុម្ភៈ និងខែមីនា ឆ្នាំ២០២៣ ដើម្បីជួបជាមួយមេដឹកនាំនាំចិន លោក Xi Jinping ក្នុងគោលបំណងជំរុញភាពជាដៃគូយុទ្ធសាស្ត្ររវាងប្រទេសចិន និងបេឡារុស។

បណ្ដាញសង្គម

ព័ត៌មានថ្មីៗ

កម្ពុជា​ធ្វើសិក្ខាសាលាថ្នាក់តំបន់ស្តីពីការផ្លាស់ប្ដូរទស្សនកិច្ចសហគ្រិនស្រ្តីអាស៊ាន-ចិន ក្រោមមូលបទ “ការដោះស្រាយបញ្ហាប្រឈម និងជំរុញភាពជាអ្នកដឹកនាំក្នុងការអភិវឌ្ឍសហគ្រាសធុនមីក្រូ តូច និងមធ្យម”
08/18/2026 05:08 PM
Facebook Telegram Linkin
UN ជំរុញឱ្យអ៊ីរ៉ង់ និងអាមេរិក បន្តការចរចា និងបន្ថយវោហាសាស្ត្រ ខណៈកាលកំណត់៦០ថ្ងៃខិតមកដល់
08/18/2026 05:08 PM
Facebook Telegram Linkin
២០ខែមកនេះការកសាងផ្លូវក្រវាត់ព្រំដែនបានប្រវែងផ្លូវជាង ២៦៤ គីឡូម៉ែត្រ ស្នើនឹងប្រមាណ ៩៨,៨៧%
08/18/2026 05:08 PM
Facebook Telegram Linkin
Politico៖ លោក Xi នឹងជួបលោក Trump នៅសេតវិមាន តែនឹងមិនចូលរួមមហាសន្និបាត UN ឡើយ​
08/18/2026 05:08 PM
Facebook Telegram Linkin
UN ជំរុញឱ្យមានភាពអត់ធ្មត់ក្នុងប្រទេសយេម៉ែន ខណៈការវាយប្រហាររបស់ក្រុមហ៊ូទីបង្កើនការស្លាប់និងរបួសជនស៊ីវិល
08/18/2026 05:08 PM
Facebook Telegram Linkin
មន្រ្ដីជាន់ខ្ពស់សមាគមអតីតយុទ្ធជនកម្ពុជាទទួលគ្រឿងឥស្សរយសជាន់ខ្ពស់ពីសមាគមអតីតយុទ្ធជនម៉ាឡេស៊ី
08/18/2026 04:08 PM
Facebook Telegram Linkin
កម្ពុជាប្រាប់ទៅឯកអគ្គរាជទូតកាណាដាអំពីការឈ្លានពានរបស់ថៃមកលើកម្ពុជាជាការរំលោភច្បាប់អន្តរជាតិយ៉ាងធ្ងន់ធ្ងរ
08/18/2026 04:08 PM
Facebook Telegram Linkin
​កម្ពុជានឹងបំបែកកំណត់ត្រានាំអង្ករចេញឱ្យបាន ១លានតោនក្នុងឆ្នាំ២០២៦នេះ ខណៈ៧ខែបាននាំចេញអង្ករចំនួន ៧០៧,៤៧១ តោនរួចហើយ
08/18/2026 04:08 PM
Facebook Telegram Linkin
មេដឹកនាំប្រទេសមីយ៉ាន់ម៉ាលោក មីន អោងឡាំង នឹងអញ្ជើញមកបំពេញទស្សនកិច្ចនៅកម្ពុជានាដើមខែកញ្ញា
08/18/2026 04:08 PM
Facebook Telegram Linkin
រយៈពេល១ឆ្នាំ៖ សមត្ថកិច្ចបញ្ជូនសំណុំរឿង Online Scams ជិត ៤០០ករណីទៅតុលាការ និងជនសង្ស័យជាង៤ពាន់នាក់
08/18/2026 04:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.