នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម
សម្ដេចតេជោ អំពាវនាវដល់រាជរដ្ឋាភិបាលយកចិត្តទុកដាក់សាងសង់កន្លែងស្នាក់នៅសម្រាប់សិស្សជាស្ត្រី

នយោបាយ​ និង ការអភិវឌ្ឍន៍

មេដឹកនាំកូរ៉េខាងជើង ចុះពិនិត្យតំបន់ដីស្រែដែលរងគ្រោះពីព្យុះទីហ្វុង ខណៈមានកង្វល់ពីកង្វះស្បៀងអាហារ

2023/08/18 08:09:49 pm        255
Facebook Telegram Linkin
ប្រព័ន្ធផ្សព្វផ្សាយរដ្ឋរបស់កូរ៉េខាងជើង បាននិយាយនៅថ្ងៃសុក្រ (១៨ សីហា) នេះថា មេដឹកនាំកូរ៉េខាងជើងលោក គីម ជុងអ៊ុន បានចុះត្រួតពិនិត្យដីស្រែចម្ការ ដែលរងគ្រោះដោយព្យុះទីហ្វុង បន្ទាប់ពីព្យុះត្រូពិច ខានុន បានបោកបក់លើឧបទ្វីបកូរ៉េកាលពីសប្តាហ៍មុន ស្របពេលមានការព្រួយបារម្ភកាន់តែខ្លាំងឡើងអំពីវិបត្តិស្បៀងអាហារនៅក្នុងប្រទេសផ្តាច់ខ្លួនឆ្ងាយពីគេមួយនេះ។រូបថតដែលចាក់ផ្សាយដោយទូរទស្សន៍រដ្ឋកូរ៉េខាងជើង KRT បានបង្ហាញលោក គីម សម្លឹងមើលជុំវិញវាលស្រែ និងសង្កេតមើលយានដ្រូនបើកបាញ់ទឹកលើដំណាំជាមួយក្រុមមន្ត្រី ដែលរួមមានប្អូនស្រីរបស់លោក គឺលោកស្រី គីម យ៉ូជុង ផងដែរ។ កាលបរិច្ឆេទពិតប្រាកដនៃដំណើរត្រួតពិនិត្យនេះ មិនត្រូវបានបញ្ជាក់ដោយទូរទស្សន៍ KRT នោះទេ។លោក គីម បានសរសើរកិច្ចខិតខំប្រឹងប្រែងរបស់យោធាក្នុងការសង្គ្រោះដំណាំ ហើយបាននិយាយថា កងទ័ពត្រូវបានចល័តទៅតំបន់ប៉ះពាល់ ដោយសារតែពួកគេមិនអាចបាត់បង់ដីស្រែចំការ ដោយសារគ្រោះធម្មជាតិទៅលើវិស័យកសិកម្មជួរមុខ ដែលទាក់ទងដោយផ្ទាល់ជាមួយនឹងការរស់នៅរបស់ប្រជាជនបានទេ ដោយលោកបានលើកឡើងបែបនេះ នៅក្នុងសុន្ទរកថា ដែលបានរាយការណ៍ដោយប្រព័ន្ធផ្សព្វផ្សាយរដ្ឋកូរ៉េខាងជើង។កូរ៉េខាងជើង បានទទួលរងការខ្វះខាតស្បៀងអាហារយ៉ាងធ្ងន់ធ្ងរក្នុងប៉ុន្មានទសវត្សរ៍ថ្មីៗនេះ រួមទាំងគ្រោះទុរ្ភិក្សក្នុងទសវត្សរ៍ឆ្នាំ១៩៩០ ដែលជារឿយៗ ជាលទ្ធផលនៃគ្រោះមហន្តរាយធម្មជាតិ។ ក្រុមអ្នកជំនាញអន្តរជាតិបានព្រមានថា ការបិទព្រំដែនអំឡុងពេលជំងឺរាតត្បាតកូវីដ១៩ ធ្វើឲ្យវិបត្តិស្បៀងអាហារកាន់តែអាក្រក់ទៅៗសម្រាប់ប្រទេសនេះផងដែរ៕

លោក ដូណាល់ ត្រាំ បានលុបចោលសន្និសីទសារព័ត៌មាន ដើម្បីចេញផ្សាយរបាយការណ៍ស្តីពីការបោះឆ្នោតឆ្នាំ២០២០

2023/08/18 08:06:01 pm        270
Facebook Telegram Linkin
អតីតប្រធានាធិបតីអាមេរិក លោក ដូណាល់ ត្រាំ បាននិយាយកាលពីថ្ងៃព្រហស្បតិ៍ថា លោកបានលុបចោលសន្និសីទសារព័ត៌មានដែលគ្រោងធ្វើនៅសប្តាហ៍ក្រោយ ដើម្បីចេញផ្សាយរបាយការណ៍ស្តីពីការបោះឆ្នោតឆ្នាំ២០២០ ក្នុងរដ្ឋ Georgia ដោយនិយាយថា ក្រុមមេធាវីរបស់លោកនឹងដាក់ទឡ្ហីករណ៍នោះនៅក្នុងឯកសារតុលាការជំនួសវិញ។លោក ត្រាំ បាននិយាយកាលពីដើមសប្តាហ៍នេះថា លោកនឹងធ្វើសន្និសីទសារព័ត៌មាននៅថ្ងៃចន្ទ ដើម្បីបញ្ចេញរបាយការណ៍លម្អិតចំនួន១០០ទំព័រ ទៅក្នុងអ្វីដែលលោកបានពិពណ៌នាថាជា «ការក្លែងបន្លំការបោះឆ្នោត» នៅក្នុងរដ្ឋ Georgia អំឡុងការបោះឆ្នោតឆ្នាំ២០២០ ដែលលោកបានចាញ់ប្រធានាធិបតីប្រជាធិបតេយ្យ លោក ចូ បៃដិន។ លោក ត្រាំ ត្រូវបានចោទប្រកាន់នៅក្នុងរដ្ឋ Georgia និងនៅតុលាការសហព័ន្ធ ពីបទប៉ុនប៉ងបង្វែរលទ្ធផលបោះឆ្នោតទាំងនោះ។លោក ត្រាំ បាននិយាយនៅលើបណ្ដាញសង្គម Truth Social ថា «ជាជាងការចេញផ្សាយរបាយការណ៍ស្តីពីការបោះឆ្នោតប្រធានាធិបតីរដ្ឋ Georgia ឆ្នាំ២០២០ នៅថ្ងៃច័ន្ទ ខ្ញុំជឿថា ក្រុមមេធាវីរបស់ខ្ញុំចង់បញ្ជូនភស្តុតាង ដែលមិនអាចប្រកែកបាន និងច្រើនលើសលប់នៃការក្លែងបន្លំការបោះឆ្នោត ព្រមទាំងភាពមិនប្រក្រតីនៅក្នុងឯកសារទាំងនេះ ទៅកាន់តុលាការច្បាប់ជាផ្លូវការវិញ»។លោកបានបន្ថែមថា ដូច្នេះសន្និសីទសារព័ត៌មាន គឺលែងចាំបាច់ទៀតហើយ។ ចាប់តាំងពីការបរាជ័យរបស់លោកនៅឆ្នាំ២០២០មក លោក ត្រាំ បានអះអាងម្តងហើយម្តងទៀតថា ការបោះឆ្នោតត្រូវបានបំផ្លាញដោយការក្លែងបន្លំយ៉ាងទូលំទូលាយ។ ការទាមទារទាំងនោះត្រូវបានបដិសេធដោយតុលាការ ការពិនិត្យរបស់រដ្ឋ និងសមាជិកនៃរដ្ឋបាលផ្ទាល់របស់លោកផងដែរ៕

បណ្តាសិស្សពេញចិត្តការប្រើប្រាស់បណ្ណាល័យ សាលាឌីជីថល ផ្តល់ភាពងាយស្រួលច្រើនក្នុងការសិក្សា

2023/08/18 07:26:36 pm        304
Facebook Telegram Linkin
កណ្ដាល៖ ក្នុងអំឡុងក្រសួងអប់រំយុវជន និងកីឡា ប្រកាសសាកល្បងប្រើប្រាស់បណ្ណាល័យ សាលាឌីជីថល ដែលគេអាចចូលមើលអានបាននៅតាមទូរសព្ទដៃស្មាតហ្វូន និងតាមប្រព័ន្ធអេឡិចត្រូនិចនានា តាមរយៈLinkតំណភ្ជាប់ http:// sala.moeys.gov.kh/books នេះ បណ្តាសិស្សានុសិស្សមានការពេញចិត្តខ្លាំងនាំគ្នាចូលអានសិក្សាស្រាវជ្រាវមេរៀនបានលឿន ងាយស្រួល និងអាចមើលគ្រប់ទីកន្លែង។បើតាមបណ្តាសិស្សនៃ អនុវិទ្យាល័យ ហ៊ុន សែន ស្វាយរលំ ក្រុងតាខ្មៅ បានថ្លែងប្រាប់BTV នៅថ្ងៃទី១៨ ខែសីហានេះថា ចាប់តាំងពីក្រសួងអប់រំបានបើកឲ្យមានគេហទំព័រ ​សាលាឌីជីថល គឺពួកគេតែងតែប្រើប្រាស់ទូរសព្ទដៃចូលអាន សៀវភៅ ស្រាវជ្រាវមេរៀនលំហាត់ និងអានរឿងទិទាននានា​ដែលមានប្រយោជន៍ដល់សិក្សារៀនសូត្រ ​នៅក្នុងសាលា ។ទន្ទឹមនឹងការផ្តល់អត្ថប្រយោជន៍ច្រើន ដល់ការសិក្សានេះដែរ បណ្តាសិស្សានុសិស្សទាំងនេះ ក៏បាន​អំពាវនាវ និងសំណូមពរមិត្តសិក្សានៅតាមបណ្តាសាលារៀនទាំងអស់ សូមនាំគ្នាប្រើប្រាស់​ទូរសព្ទដៃខ្លួនឲ្យមានប្រយោជន៍ដល់សិក្សា​ ចូលអានសិក្សាស្រាវជ្រាវមេរៀននានា ចៀសវាង​ការប្រើប្រាស់ទូរសព្ទដៃ ​លេងហ្គេម ឬមើលរឿងផ្សេងៗគ្មានប្រយោជន៍ដល់ការសិក្សា ហើយឈាន​ទៅរកការបំផ្លាញអនាគតរបស់យើង។លោក សុខ ថា ប្រធាននាយកដ្ឋានបច្ចេកវិទ្យា និងព័ត៌មានវិទ្យា នៃក្រសួងអប់រំយុវជន និងកីឡា បានថ្លែងថា នៅក្នុងដំណាក់កាលប្រកាសសាកល្បងប្រើប្រាស់គេហទំព័រ​សាលាឌីជីថលនេះ បានដាក់បញ្ចូលសៀវភៅមេរៀនចាប់ពីកម្រិតថ្នាក់មត្តេយ្យរហូតដល់ថ្នាក់ទី១២ ​និងថ្នាក់ឧត្តមសិក្សា ព្រមទាំងមានសៀវភៅរឿងទិទាន ​សៀវភៅពាក់ព័ន្ធនានាទៀតជាង ៥០០ក្បាល និងមានក្លិបវីដេអូរៀន និងការបង្រៀនជាច្រើនក្លិបទៀត។លោក បន្តថា មកដល់ពេលនេះ បណ្ណាល័យសាលាឌីជីថល មានសាលាចុះឈ្មោះបង្កើតគណនីចូលយកឯកសាររៀន​ និងការបង្រៀនប្រមាណជាង១០០គណនី ហើយគេហទំព័រសាលាឌីជីថលនេះ គ្រោងនឹងប្រើប្រាស់ផ្លូវការ នៅពាក់កណ្តាលខែក្រោយនេះ ពេលនោះក្រសួងនឹងបញ្ចូលឯកសារមេរៀន ក្លិបវីដេអូ និងសៀវភៅ សម្រាប់រៀន និង​បង្រៀនជាច្រើនទៀត ដើម្បីផ្តល់ជាបណ្តុំចែករំលែកឯកសារសៀវភៅរៀន និងការបង្រៀន មួយ​សម្រាប់បម្រើឲ្យអប់រំនៅតាមសាលារៀនរដ្ឋ ​និងឯកជនទាំងអស់នៅកម្រិតទូទំាងប្រទេស៕អត្ថបទ ស៊ុមសុខជា

មន្ត្រីជាន់ខ្ពស់ក្រសួងវប្បធម៌ ជំរុញកូនខ្មែរចូលរួមការអភិរក្ស និងបន្តចាប់យកសាកលភាវូបនីយកម្មផ្នែកសិល្បៈ

2023/08/18 07:17:19 pm        138
Facebook Telegram Linkin
ភ្នំពេញ៖ មន្រី្តជាន់ខ្ពស់វប្បធម៌ ​និងវិចិត្រសិល្បៈ ចង់ឲ្យកុលបុត្រខ្មែរ មានភាពជឿនលឿនតាមរយៈការឈរលើមូលដ្ឋានគ្រឹះរបស់ដូនតា និងចាប់យកនូវអ្វីដែលសកលភាវូបនីយកម្មផ្នែកសិល្បៈ។ការលើកឡើងរបស់លោក ឈឹម សុធី ប្រធាននាយកដ្ឋានសិល្បៈសូនរូប និងសិល្បៈសិប្បកម្ម នៃក្រសួងវប្បធម៌ និងវិចិត្រសិល្បៈ យ៉ាងដូច្នេះ ក្នុងឱកាសផ្តល់កិច្ចសម្ភាសន៍ជាមួយ BTV ព័ត៌មាន នាព្រឹកថ្ងៃទី១៨ ខែសីហានេះ ដោយផ្តោតលើវឌ្ឍនភាពនៃវិស័យសិល្បៈសូនរូប និងសិល្បៈសិប្បកម្ម ក្នុងឆ្នាំ២០២៣ នាយកដ្ឋានមានគោលដៅធំៗចំនួន២ សម្រាប់អនុវត្តគម្រោងផែនការ ថវិកាកម្មវិធីរបស់ជាតិ ក៏ដូចជារបស់ក្រសួងវប្បធម៌ និងវិចិត្រសិល្បៈ គឺសិល្បៈគំនូរ សិល្បៈខ្មុកស្មាច់ នៅវត្តស្វាយអណ្តែត និងមហោស្រពសិល្បៈចម្លាក់ស្មិត។ ជាមួយគ្នានោះលោក ប្រធាននាយកដ្ឋាន បានបន្តថា ក្រៅពីគម្រោងធំៗ ដែលជាកម្មវិធីថវិកាជាតិ យើងមានកម្មវិធីបន្ទាប់បន្សំ ដូចជា៖ កម្មវិធីបណ្តុះបណ្តាលក្នុងប្រព័ន្ធ ក្រៅប្រព័ន្ធ តាមរយៈOnline និងការអញ្ជើញសិល្បករ មកពីតាមបណ្តាខេត្តនានា បានស្នើសុំមន្រី្តជំនាញពីនាយកដ្ឋាន ទៅធ្វើការបើកវគ្គបណ្តុះបណ្តាលបន្ថែមលើជំនាញបច្ចេកទេស របស់សិប្បករ អាជីវករ រកទទួលទាន ផ្នែកសិល្បៈសូនរូប និងសិល្បៈសិប្បកម្ម ដើម្បីយកទៅអនុវត្តឲ្យបានត្រឹមត្រូវតាមក្បួនខ្នាត និងរចនាបថ។ទន្ទឹមនឹងនោះលោក ឈឹម សុធី ក៏ចង់ឲ្យមានការផ្សាភ្ជាប់ និងដំណើរការទាំងពីរ ទាំងការអភិរក្ស និងការបង្កើតថ្មី (អភិរក្ស+ការបង្កើតថ្មី) ដែលដូនតាបុព្វបុរស បានកសាងនូវអ្វីដែលល្អហើយ ដូចជា៖ ប្រាសាទបុរាណ វត្តអារាម រូបចម្លាក់ បន្សល់ទុកបានយ៉ាងល្អ។ លោកសំណូមពរដល់កូនខ្មែរ និងយុវជនជំនាន់ក្រោយ ចូលរួមបន្តនូវអ្វីជាប្រណិតភាពកេរ្តិ៍ដំណែល​នេះឲ្យបានទៅមុខ។ ហើយយើងក៏មិនត្រូវភ្លេចនូវអ្វីដែលជាការបង្កើតថ្មី តាមរយៈសិល្បៈ​សហសម័យ។ ​កាលណាយើងផ្តោតតែលើប្រណិតភាពនឹងពេក ក៏យើងមិនអាចដើរទាន់ពិភពលោក​ផងដែរ៕អត្ថបទ រដ្ឋា

រដ្ឋមន្រ្ដីក្រសួងអប់រំ ដាក់ចេញគោលនយោបាយ ៨ចំណុច លើវិស័យអប់រំសម្រាប់អាណត្តិទី៧នេះ

2023/08/18 07:06:07 pm        519
Facebook Telegram Linkin
ភ្នំពេញ៖ ឯកឧត្តមបណ្ឌិតសភាចារ្យ ហង់ ជួនណារ៉ុន រដ្ឋមន្រ្ដីក្រសួងអប់រំ យុវជន និងកីឡា បានដាក់ចេញនូវគោលនយោបាយគណបក្សប្រជាជនកម្ពុជា លើវិស័យអប់រំ សិក្សាធិការ សម្រាប់អាណត្តិទី៧នេះ ​ដើម្បីលើកកម្ពស់ និងពង្រឹងគុណភាពវិស័យអប់រំក្នុងប្រទេសកម្ពុជា។ ក្នុងចំណោមគោលនយោបាយទាំង ៨ចំណុនោះ ឯកឧត្តមបណ្ឌិតសភាចារ្យ ហង់ ជួនណារ៉ុន បានថ្លែងថា គោលនយោបាយ កំណែទម្រង់សាលារៀន គឺដើម្បីបង្កើនគណនេយ្យភាព និងស្វ័យភាពរបស់សាលារៀន និងដើម្បីលើកទឹកចិត្តដល់ការចូលរួមរបស់មាតាបិតានៅ​ក្នុងការគ្រប់គ្រងសាលារៀន ការពង្រឹងទំនាក់ទំនងរវាងសាលាជាមួយនឹងមាតាបិតា។ ឯកឧត្ដម បន្តថា ការធ្វើកំណែទម្រង់សាលារៀននេះ គឺមានគោលដៅដើម្បីលើកកម្ពស់​និង​ពង្រឹង​គុណភាព​អប់រំដើម្បីឆ្លើយតបទៅនឹងទីផ្សារការងារ និងការអភិវឌ្ឍសង្គមសេដ្ឋកិច្ចកម្ពុជាឆ្ពោះទៅ​សម្រេចបាននូវចក្ខុវិស័យឲ្យកម្ពុជាក្លាយទៅជាប្រទេសដែលមានចំណូលមធ្យមកម្រិតខ្ពស់នៅក្នុងឆ្នាំ២០៣០ និងជាប្រទេសអភិវឌ្ឍន៍នៅក្នុងឆ្នាំ២០៥០។ឯកឧត្ដមបន្តថា ក្រសួងអប់រំបាន យកចិត្តទុកដាក់ដល់គ្រូបង្រៀន និងកំណែទម្រង់គ្រឹះស្ថាន​បណ្ដុះបណ្ដាលគ្រូ ដោយផ្តោតទៅលើការបង្កើនប្រាក់បៀវត្សរ៍ជូនដល់គ្រូបង្រៀន ការបង្កើន​គុណវុឌ្ឍិគ្រូបឋមសិក្សា និងគ្រូមូលដ្ឋានឲ្យដល់កម្រិតបរិញ្ញាបត្រ និងគ្រូឧត្ដមឲ្យដល់កម្រិត​បរិញ្ញាបត្រជាន់ខ្ពស់ ការលើកកម្ពស់វិជ្ជាជីវៈនិងកិត្តិយសគ្រូបង្រៀន ការកែលម្អលក្ខខណ្ឌការងារ​និងជីវភាពរស់នៅរបស់គ្រូ ការអភិវឌ្ឍវិជ្ជាជីវៈជាប្រចាំ ការអនុវត្តគន្លងអាជីពគ្រូបង្រៀន ការប្រារព្ធទិវាគ្រូបង្រៀន និងការផ្តល់ពានរង្វាន់សម្តេចតេជោដល់សាលារៀនស្អាត នាយក​សាលាល្អ គ្រូល្អ គ្រូបង្រៀនភាសាខ្មែរល្អ ​និងគ្រូល្អបង្រៀនគណិតវិទ្យាថ្នាក់ដំបូង។ ឯកឧត្ដមរដ្ឋមន្រ្ដីបញ្ជាក់ថា ការធ្វើកំណែទម្រង់គ្រឹះស្ថានបណ្តុះបណ្តាលគ្រូ គឺផ្ដោតទៅលើការកែ​លម្អគុណភាព និងកម្មវិធីបណ្តុះបណ្តាល និងវិក្រឹត្យការគ្រូបង្រៀន ​ការកែលម្អវិធីសាស្ដ្របង្រៀន ការស្រាវជ្រាវ​ ការពង្រឹងស្តង់ដាវិជ្ជាជីវៈគ្រូបង្រៀន ​និងការលើកកម្ពស់សមត្ថភាពវិជ្ជាជីវៈគ្រូឧទ្ទេស ក៏ដូចជាការកែលម្អហេដ្ឋារចនាសម្ព័ន្ធឲ្យស្របទៅតាមបរិបទសតវត្សរ៍ទី២១៕អត្ថបទ៖ វ៉ន ដារ៉ា

បណ្ដាក្រសួងស្ថាប័នបន្តផ្ដល់សេវាល្អដល់ពលរដ្ឋអំឡុងពេលរៀបចំរាជរដ្ឋាភិបាលថ្មីអាណត្តិទី៧

2023/08/18 07:01:07 pm        89
Facebook Telegram Linkin
ភ្នំពេញ៖ ទោះបីជារាជរដ្ឋាភិបាលថ្មី អាណត្តិទី៧នេះ ត្រូវប្រកាសជាផ្លូវការនាថ្ងៃទី២២ ខែសីហា ខាងមុខ ប៉ុន្ដែបណ្ដាក្រសួង ស្ថាប័ននានា ក្នុងកាលទេសអន្តរកាលនេះ បានបន្តធ្វើកិច្ចការងារលើវិស័យរបស់ខ្លួនបានយ៉ាងល្អប្រសើរទាំងវិស័យអប់រំ និងការផ្ដល់សេវានានាដល់ប្រជាពលរដ្ឋនៅទូទាំងប្រទេសកម្ពុជា។ ជាក់ស្ដែងក្រោយបញ្ចប់ការឃោសនាបោះឆ្នោត ការប្រកាសលទ្ធផលបោះឆ្នោត រហូតឈានដល់ការត្រៀមរៀបចំកិច្ចប្រជុំរដ្ឋសភាជាតិលើកដំបូង សម្រាប់នីតិកាលទី៧ នាថ្ងៃទី ២១ ខែសីហាខាងមុខនេះ ក្រសួងអប់រំ យុវជន និងកីឡា បានបន្តដំណើការការបង្រៀន និងការរៀន​សូត្រ​ដល់​សិស្សានុសិស្សនៅគ្រប់កម្រិតសិក្សា និងបន្តធ្វើកិច្ចការងាររបស់ខ្លួន ដោយផ្ដល់សេវានានា​ដល់ប្រជាពលរដ្ឋ និងសាធារណៈជនទូទៅជាប្រក្រតីភាព។ឯកឧត្ដម រស់ សុវាចា អ្នកនាំពាក្យក្រសួងអប់រំ យុវជន និងកីឡាបានថ្លែងថា បុគ្គលិកអប់រំគ្រប់​លំដាប់ថ្នាក់ បានបន្តអនុវត្តការងារទៅតាមតួនាទីរបស់ខ្លួន ដើម្បីបន្តលើកកម្ពស់គុណភាពអប់រំ យុវជន និងកីឡា និងបន្តថែរក្សា ការពង្រឹងគុណភាពការងារគ្រប់ប្រភេទដល់សាធារណៈជនទូទៅ។ ចំណែកឯកឧត្ដម ជិន ម៉ាលីន អ្នកនាំពាក្យក្រសួងយុត្តិធម៌ បានមានប្រសាសន៍ថា ទោះពីជាបច្ចុប្បន្នរដ្ឋាភិបាលថ្មីមិនទាន់បានរៀបចំរួចរាល់ក៏ដោយ ក៏ប៉ុន្ដែក្រសួង ស្ថាប័នរដ្ឋនានា នៅបន្តធ្វើកិច្ចការងារលើការផ្ដល់សេវាដល់ប្រជាពលរដ្ឋបានយ៉ាងល្អប្រសើរជាធម្មតា ក្នុងតួនាទីជាអង្គភាពរដ្ឋបាលអចិន្រ្ដៃយរបស់រដ្ឋ។សូមជម្រាបថា រាជរដ្ឋាភិបាលអាណត្តិទី៧ នឹងប្រកាសចូលកាត់តំណែងជាផ្លូវការចាប់ពីថ្ងៃទី២២ ខែសីហា ឆ្នាំ២០២៣នេះ ​ដោយក្នុងនោះ ឯកឧត្តមកិត្តិទេសាភិបាលបណ្ឌិត​ ហ៊ុន ម៉ាណែត ជា​នាយករដ្ឋមន្ត្រីថ្មីនៃកម្ពុជារួមជាមួយ នឹងគណៈរដ្ឋមន្រ្ដីវ័យក្មេងមាន​សក្ដានុពល​ជាច្រើនរូបទៀតដែលសុទ្ធតែចេញមកពីគណបក្សប្រជាជនកម្ពុជា៕អត្ថបទ៖ វ៉ន ដារ៉ា

យុវជនសង្គមស៊ីវិលអំពាវនាវសង្គមស៊ីវិលនានា និងក្រុមប្រឆាំងចូលរួមអភិវឌ្ឍន៍ជាតិជាមួយរដ្ឋាភិបាលថ្មី

2023/08/18 06:57:18 pm        310
Facebook Telegram Linkin
ភ្នំពេញ៖ លោក ហេង សំណាង ប្រធានក្រុមយុវជនសង្គមស៊ីវិល បានអំពាវនាវដល់អង្គការសង្គមស៊ីវិលនានា និងក្រុមដែលមាននិន្នាការប្រឆាំងចូលរួមធ្វើការងារជាមួយរាជរដ្ឋាភិបាលថ្មី អាណត្តិទី៧នេះ ដើម្បីចូលរួមអភិវឌ្ឍប្រទេសកម្ពុជាឱ្យមានការអភិវឌ្ឍរីកចម្រើនបន្ថែមទៀត និងរក្សាបាននូវស្ថិរភាពនយោបាយ និងសង្គមរបស់កម្ពុជា។ លោក ហេង សំណាង បានលើកឡើងថា ប្រទេកម្ពុជា​កំពុងតែបង្កើតឡើងនូវទំព័រប្រវត្តិសាស្រ្ដថ្មី​បន្ថែម​ទៀត ​តាមរយៈការទទួលបាននូវក្បាលមាស៊ីនដឹកនាំប្រទេសថ្មី ដែលមាននាយករដ្ឋមន្រ្តី​វ័យក្មេង និងឈ្លាសវៃបំផុត រួមជាមួយនឹងគណៈរដ្ឋមន្រ្ដីជំនាន់ថ្មីសុទ្ធតែជាឥស្សរជនដែលមាន​សក្ដានុពល​ខ្លាំងក្នុងការដឹកនាំប្រទេសជាតិ។ លោកថ្លែងថា យុវជនសង្គមស៊ីវិលមិនអាចបំភ្លេចបានឡើយនូវការខិតខំរបស់​គណបក្សប្រជាជន​កម្ពុជា​ដឹកនាំដោយសម្តេចអគ្គមហាសេនាបតីតេជោ ហ៊ុន សែន និងឥស្សរជនជាន់ខ្ពស់​ជាច្រើន​រូបទៀត ដែលភាគច្រើន គឺសុទ្ធតែឆ្លងកាត់បទពិសោធន៍ច្រើនដូចពាក្យថា​ (ក្មេងដើរលឿន ចាស់ស្គាល់ផ្លូវ)។ កត្តាទាំងនេះ ហើយដែលប្រជាជនខ្មែរទូទាំងប្រទេសអបអរសាទរ និង​គោលនយោបាយនានារបស់រាជរដ្ឋាភិបាលជាបន្តបន្ទាប់គ្រប់ៗអាណត្តិ។លោក សំណាង លើកឡើងថា អ្វីដែលជាការកត់សម្គាល់ គណៈរដ្ឋមន្រ្ដីថ្មីក្នុងអាណត្តិទី៧នេះ គឺឯកឧត្ដមបណ្ឌិត ហ៊ុន ម៉ាណែត ជានាយករដ្ឋមន្រ្ដីថ្មីនៃកម្ពុជា បានរៀនសូត្រចេះដឹងខ្ពង់ខ្ពស់ ទាំងផ្នែកសេដ្ឋកិច្ច យោធា និងផ្នែកនយោបាយ ពិសេសបទពិសោធន៍​ការទូតដែលបានអនុវត្ត​ការងារដោយផ្ទាល់នាកន្លងមក។ លោកសង្កេតឃើញថា កម្ពុជាមិនយូរមិនឆាប់ក្រោមការដឹកនាំរបស់ឯកឧត្ដមបណ្ឌិត ហ៊ុន ម៉ាណែត នឹងនាំកម្ពុជាឆ្ពោះទៅមហាអំណាចក្នុងតំបន់​ ព្រោះកត្តាភូមិសាស្រ្ត ​និងធនធានមនុស្ស ដែលជា​កត្តាសត្យានុម័តដូច្នេះយុវជនកម្ពុជាគ្រប់រូបបានត្រៀមខ្លួនក្នុងការចូលរួមដើម្បីធ្វើឱ្យកម្ពុជាមានការអភិវឌ្ឍរីកចម្រើន៕អត្ថបទ៖វ៉ន ដារ៉ា

រដ្ឋមន្ត្រីការបរទេសអ៊ីរ៉ង់៖ទំនាក់ទំនងជាមួយអារ៉ាប៊ីសាអ៊ូឌីត«ដំណើរការក្នុងទិសដៅត្រឹមត្រូវ»

2023/08/18 06:53:03 pm        89
Facebook Telegram Linkin
អ៊ីរ៉ង់៖ រដ្ឋមន្ត្រីការបរទេសអ៊ីរ៉ង់ លោក Hossein Amir-Abdollahian បាននិយាយនៅទីនេះ កាលពីថ្ងៃព្រហស្បតិ៍ថា ទំនាក់ទំនងរវាងប្រទេសរបស់លោក និងអារ៉ាប៊ីសាអ៊ូឌីត កំពុងដំណើរការក្នុងទិសដៅត្រឹមត្រូវ ហើយភាគីទាំងពីរ នឹងជំរុញកិច្ចសហប្រតិបត្តិការលើវិស័យផ្សេងៗ។លោក Amir-Abdollahian បានធ្វើអត្ថាធិប្បាយនៅក្នុងសន្និសីទសារព័ត៌មានរួមគ្នាជាមួយរដ្ឋមន្ត្រីការបរទេសអារ៉ាប៊ីសាអ៊ូឌីត Faisal bin Farhan Al Saud បន្ទាប់ពីកិច្ចប្រជុំរបស់ពួកគេ នៅក្នុងរដ្ឋធានីរីយ៉ាដ (Riyadh)ប្រទេសអារ៉ាប៊ីសាអ៊ូឌីត។ប្រមុខការទូតអ៊ីរ៉ង់ ដែលកំពុងបំពេញទស្សនកិច្ចផ្លូវការលើកដំបូងទៅកាន់អារ៉ាប៊ីសាអ៊ូឌីត ចាប់តាំងពីប្រទេសទាំងពីរ បានយល់ព្រមស្តារទំនាក់ទំនងការទូតឡើងវិញ នៅក្នុងកិច្ចព្រមព្រៀងដែលសម្របសម្រួលដោយប្រទេសចិន កាលពីខែមីនា បាននិយាយថា ជំនួបរបស់លោកជាមួយរដ្ឋមន្ត្រីអារ៉ាប៊ីសាអ៊ូឌីតគឺ «ទទួលបានផ្លែផ្កា»។លោកបាននិយាយថា ប្រទេសឹអ៊ីរ៉ង់ប្តេជ្ញាអនុវត្តកិច្ចព្រមព្រៀងដែលសម្រេចបានរវាងប្រទេសទាំងពីរក្នុងវិស័យសន្តិសុខ និងសេដ្ឋកិច្ច ហើយនឹងបង្កើតគណៈកម្មការបច្ចេកទេស និងប្រតិបត្តិ ដើម្បីជំរុញការអនុវត្តរបស់ពួកគេ។លោក Amir-Abdollahian បានបញ្ជាក់ថា ប្រធានាធិបតីអ៊ីរ៉ង់ នឹងទៅបំពេញទស្សនកិច្ច នៅអារ៉ាប៊ីសាអ៊ូឌីត ក្នុងពេលឆាប់ៗនេះ៕

ស្ថានទូតកូរ៉េបង្កើតកម្មវិធីតម្រង់ទិសដល់និស្សិតអាហារូបករណ៍ថ្នាក់ក្រោយឧត្តមសិក្សានៅកម្ពុជា

2023/08/18 06:46:23 pm        269
Facebook Telegram Linkin
ភ្នំពេញ៖ ស្ថានទូតនៃសាធារណរដ្ឋកូរ៉េ ប្រចាំនៅព្រះរាជាណាចក្រកម្ពុជា នៅថ្ងៃទី១៧ ខែសីហា ឆ្នាំ២០២៣ បានការប្រារព្ធកម្មវិធីតម្រង់ទិសសម្រាប់ និស្សិតអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋកូរ៉េ (GKS) ថ្នាក់ក្រោយឧត្តមសិក្សា ឆ្នាំ២០២៣ នៅសាលពហុបំណងជាន់ផ្ទាល់ដី នៃស្ថានទូតសាធារណរដ្ឋកូរ៉េ រាជធានីភ្នំពេញ។បើតាមសេចក្ដីប្រកាសព័ត៌មានរបស់ស្ថានទូតកូរ៉េ ឆ្នាំនេះនិស្សិតកម្ពុជាចំនួន ២៨ នាក់ (អនុបណ្ឌិត ២៧ នាក់ បណ្ឌិត ១ នាក់) ត្រូវបានជ្រើសរើសជានិស្សិត សម្រាប់កម្មវិធីអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋកូរ៉េ ថ្នាក់ក្រោយឧត្តមសិក្សា ហើយគ្រោង នឹងចូលទៅសាធារណរដ្ឋកូរ៉េ នៅចុងខែសីហានេះ។កម្មវិធីតម្រង់ទិសសម្រាប់និស្សិតអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋកូរ៉េ (GKS) ថ្នាក់ក្រោយ ឧត្តមសិក្សា នៅឆ្នាំនេះ មានការចូលរួមពីនិស្សិតកម្ពុជាដែលជាប់អាហារូបករណ៍ថ្នាក់អនុបណ្ឌិត និងបណ្ឌិត និងតំណាងអតីតនិស្សិតសិក្សានៅសាធារណរដ្ឋកូរ៉េ ប្រចាំនៅព្រះរាជាណាចក្រកម្ពុជា ដែលបានធ្វើ មាតុភូមិនិវត្តន៍ ហើយកំពុងបំពេញការងារក្នុងវិស័យផ្សេងៗ បន្ទាប់ពីបានបញ្ចប់ការសិក្សានៅសាកលវិទ្យាល័យ ក្នុងសាធារណរដ្ឋកូរ៉េ។ឯកឧត្តម PARK Jung-Wook ឯកអគ្គរដ្ឋទូតនៃសាធារណរដ្ឋកូរ៉េ ប្រចាំនៅកម្ពុជា ដែលបាន បានអបអរសាទរចំពោះនិស្សិតដែលបានជាប់អាហារូបករណ៍ឧបត្ថម្ភ ដោយ រដ្ឋាភិបាលសាធារណរដ្ឋកូរ៉េ (GKS) ថ្នាក់ក្រោយឧត្តមសិក្សា ហើយតាមរយៈកម្មវិធីអាហារូបករណ៍ ថ្នាក់ក្រោយ ឧត្តមសិក្សានេះ។ ឯកឧត្ដមរំពឹងថា និស្សិតកម្ពុជានឹងកសាងចំណេះជំនាញ និងបទពិសោធន៍នៅសាធារណរដ្ឋកូរ៉េ ហើយ ដោយផ្អែកលើចំណុចទាំងនេះ ពួកគេនឹងបំពេញការ ងារយ៉ាង សកម្ម ទៅ ថ្ងៃ អនាគត។លោក Noeum Sokvichhai ជាអតីតនិស្សិតអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋកូរ៉េ ថ្នាក់អនុ- បណ្ឌិត ឆ្នាំ២០១០-១៤) និងជា(Attorney-at-law, Head of Corporate, Commercial and Investinent Practice Group at Sithisak Law Office) បានលើកទឹកចិត្តដល់និស្សិត អាហារូបករណ៍ ជាសិស្ស ប្អូនទាំងអស់ថា៖«សូមចងចាំថា អ្នកតំណាងឱ្យ ព្រះរាជាណាចក្រកម្ពុជា នៅសាធារណរដ្ឋកូរ៉េ និងតំណាងឱ្យព្រះរាជាណាចក្រកម្ពុជា និងសាធារណរដ្ឋកូរ៉េ នៅពេលអ្នកត្រឡប់មកវិញ»។លោក Mork Chansokol និស្សិតអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋ កូរ៉េ (ថ្នាក់អនុបណ្ឌិត)លើកឡើថា៖«ខ្ញុំមានគម្រោងចូលរៀនផ្នែកគ្រប់គ្រងពាណិជ្ជកម្មនៅសាកលវិទ្យាល័យ Soongsil ក្នុងសាធារណរដ្ឋកូរ៉េ ហើយបន្ទាប់ពីទទួលបានសញ្ញាបត្រអនុបណ្ឌិត ខ្ញុំសង្ឃឹមថានឹងចូលរួមចំណែកក្នុងការអភិវឌ្ឍទំនាក់ទំនងទ្វេភាគីរវាងសាធារណរដ្ឋកូរ៉េ និងព្រះរាជាណាចក្រកម្ពុជា តាមរយៈការជំរុញ ការវិនិយោគរបស់សាធារណរដ្ឋកូរ៉េនៅព្រះរាជាណាចក្រកម្ពុជា និងរួមចំណែកបង្កើតការងារថ្មីៗនៅ ព្រះរាជាណាចក្រកម្ពុជា»។កម្មវិធីអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋកូរ៉េ មានគោលបំណងជំរុញការផ្លាស់ប្តូរការអប់រំជាអន្តរជាតិ និងលើកកម្ពស់មិត្តភាពរវាងប្រទេសនានា ដោយការផ្តល់ឱកាសឱ្យនិស្សិតបរទេសបានសិក្សានៅ គ្រឹះស្ថានឧត្តមសិក្សានៅក្នុងសាធារណរដ្ឋកូរ៉េ។សូមជម្រាបថាកម្មវិធីអាហារូបករណ៍ឧបត្ថម្ភដោយរដ្ឋាភិបាលសាធារណរដ្ឋកូរ៉េ មានថ្នាក់បរិញ្ញាបត្រ(GKS-U) និងថ្នាក់ ក្រោយ ឧត្តមសិក្សា(GKS-G) ហើយអត្ថប្រយោជន៍ផ្សេងៗជាច្រើន ត្រូវបានផ្តល់ជូនដល់និស្សិត អាហារូបករណ៍ ដែលជាប់ រួមមាន សំបុត្រយន្តហោះទៅមក ថ្លៃបណ្តុះបណ្តាលភាសាកូរ៉េ ថ្លៃសិក្សា ថ្លៃធានារ៉ាប់រងផ្នែកវេជ្ជសាស្ត្រ និង ប្រាក់ឧបត្ថម្ភសម្រាប់ការរស់នៅ ជាដើម។រដ្ឋាភិបាលនៃសាធារណរដ្ឋកូរ៉េ ក្នុងរយៈពេលកន្លងមកនេះ បានជ្រើសរើសនិស្សិតអាហារូបករណ៍ប្រហែល ៣០០ នាក់ពីព្រះរាជាណាចក្រកម្ពុជា។ ស្ថានទូតនៃសាធារណរដ្ឋកូរ៉េ ប្រចាំនៅព្រះរាជាណាចក្រកម្ពុជា នៅឆ្នាំ២០២២ និងឆ្នាំ២០២៣ បានរៀបចំកម្មវិធីជួបជុំអតីតនិស្សិតសិក្សានៅសាធារណរដ្ឋកូរ៉េ ដើម្បីគាំទ្រដល់ការកសាង បណ្តាញទំនាក់ទំនង រវាងអតីតនិស្សិត ដែលបានត្រឡប់មកព្រះរាជាណាចក្រកម្ពុជាវិញ ហើយកំពុងបំពេញ ការងារក្នុងវិស័យផ្សេងៗដូចជា រដ្ឋាភិបាល ធុរកិច្ច និងការអប់រំជាដើម បន្ទាប់ពីបានបញ្ចប់ការសិក្សា នៅសាកលវិទ្យាល័យក្នុងសាធារណរដ្ឋកូរ៉េ៕

ទីភ្នាក់ងារចារកម្មកូរ៉េខាងត្បូង៖ ប្រទេសកូរ៉េខាងជើងកំពុងរៀបចំសម្រាប់ការសាកល្បងសព្វាវុធជុំថ្មី

2023/08/18 06:45:13 pm        100
Facebook Telegram Linkin
កូរ៉េខាងត្បូង៖ ទីភ្នាក់ងារស៊ើបការណ៍សម្ងាត់របស់ប្រទេសកូរ៉េខាងត្បូង បានប្រាប់សមាជិកសភា កាលពីថ្ងៃព្រហស្បតិ៍ថា ប្រទេសកូរ៉េខាងជើងកំពុងរៀបចំសម្រាប់ការបង្ហាញសញ្វអាវុធបង្កហេតុជុំថ្មីមួយ ដូចជាការធ្វើតេស្តមីស៊ីលរយៈចម្ងាយឆ្ងាយ និងការបាញ់បង្ហោះផ្កាយរណបចារកម្ម ខណៈដែលប្រទេសនេះ បង្កើនសកម្មភាពខុសច្បាប់ ដើម្បីគាំទ្រដល់សេដ្ឋកិច្ចដ៏ផុយស្រួយរបស់ខ្លួន។ភាពលំបាកខាងសេដ្ឋកិច្ចរ៉ាំរ៉ៃរបស់កូរ៉េខាងជើង និងកង្វះស្បៀងអាហារ បានកាន់តែអាក្រក់ទៅៗ ដោយសារតែជំងឺរាតត្បាត COVID-19 និងការដាក់ទណ្ឌកម្មរបស់UN។ ប៉ុន្តែប្រទេសនេះ នៅតែបានធ្វើការសាកល្បងមីស៊ីលជាច្រើនគ្រាប់ ចាប់តាំងពីឆ្នាំមុន ចំពេលមានការសង្ស័យថា កម្មវិធីអាវុធរបស់ខ្លួន ត្រូវបានផ្តល់មូលនិធិដោយសកម្មភាពអ៊ីនធឺណិតខុសច្បាប់ និងការលាក់បាំងការនាំចេញសម្ភារៈហាមឃាត់។សេវាស៊ើបការណ៍សម្ងាត់ជាតិនោះ បានប្រាប់ក្រុមសមាជិកសភានៅក្នុងសន្និសីទបិទទ្វារថា សេដ្ឋកិច្ចរបស់ប្រទេសកូរ៉េខាងជើង បានធ្លាក់ចុះជារៀងរាល់ឆ្នាំក្នុងឆ្នាំ ២០២០-២០២២ ហើយផលិតផលក្នុងស្រុកសរុបរបស់ខ្លួនកាលពីឆ្នាំមុន គឺតិចជាង ១២ ភាគរយ ក្នុងឆ្នាំ ២០១៦ នេះបើយោងតាម លោក យ៉ូ សាងប៊ុម( Yoo Sang-bum) ដែលជាសមាជិកសភាម្នាក់ ដែលបានបានចូលរួមសន្និសីទនោះ។ក្រុមអ្នកជំនាញខាងក្រៅ ជឿថា កង្វះខាតស្បៀងអាហារ និងបញ្ហាសេដ្ឋកិច្ចនាពេលបច្ចុប្បន្នរបស់ប្រទេសកូរ៉េខាងជើង គឺអាក្រក់បំផុត ចាប់តាំងពីមេដឹកនាំគីម ជុងអ៊ុន ឡើងកាន់អំណាចនៅចុងឆ្នាំ ២០១១។ ប៉ុន្តែពួកគេនិយាយថា មិនមានសញ្ញាណាមួយនៃគ្រោះទុរភិក្ស ឬចលាចលសាធារណៈដ៏ធំដែលអាចគំរាមកំហែងដល់ការក្តោបក្តាប់អំណាចរបស់លោក គីម លើប្រជាជន ២៦លាននាក់របស់លោកនោះទេ។

បណ្ដាញសង្គម

ព័ត៌មានថ្មីៗ

គណៈប្រតិភូជាន់ខ្ពស់នៃកម្ពុជា-សហភាពអឺរ៉ុប​ អញ្ជេីញចុះទស្សនកិច្ចសិប្បកម្មកែច្នៃគ្រាប់ស្វាយចន្ទី​ និងសហគមន៍កសិកម្ម នៅខេត្តស្ទឹងត្រែង
08/18/2026 05:08 PM
Facebook Telegram Linkin
កម្ពុជា​ធ្វើសិក្ខាសាលាថ្នាក់តំបន់ស្តីពីការផ្លាស់ប្ដូរទស្សនកិច្ចសហគ្រិនស្រ្តីអាស៊ាន-ចិន ក្រោមមូលបទ “ការដោះស្រាយបញ្ហាប្រឈម និងជំរុញភាពជាអ្នកដឹកនាំក្នុងការអភិវឌ្ឍសហគ្រាសធុនមីក្រូ តូច និងមធ្យម”
08/18/2026 05:08 PM
Facebook Telegram Linkin
UN ជំរុញឱ្យអ៊ីរ៉ង់ និងអាមេរិក បន្តការចរចា និងបន្ថយវោហាសាស្ត្រ ខណៈកាលកំណត់៦០ថ្ងៃខិតមកដល់
08/18/2026 05:08 PM
Facebook Telegram Linkin
២០ខែមកនេះការកសាងផ្លូវក្រវាត់ព្រំដែនបានប្រវែងផ្លូវជាង ២៦៤ គីឡូម៉ែត្រ ស្នើនឹងប្រមាណ ៩៨,៨៧%
08/18/2026 05:08 PM
Facebook Telegram Linkin
Politico៖ លោក Xi នឹងជួបលោក Trump នៅសេតវិមាន តែនឹងមិនចូលរួមមហាសន្និបាត UN ឡើយ​
08/18/2026 05:08 PM
Facebook Telegram Linkin
UN ជំរុញឱ្យមានភាពអត់ធ្មត់ក្នុងប្រទេសយេម៉ែន ខណៈការវាយប្រហាររបស់ក្រុមហ៊ូទីបង្កើនការស្លាប់និងរបួសជនស៊ីវិល
08/18/2026 05:08 PM
Facebook Telegram Linkin
មន្រ្ដីជាន់ខ្ពស់សមាគមអតីតយុទ្ធជនកម្ពុជាទទួលគ្រឿងឥស្សរយសជាន់ខ្ពស់ពីសមាគមអតីតយុទ្ធជនម៉ាឡេស៊ី
08/18/2026 04:08 PM
Facebook Telegram Linkin
កម្ពុជាប្រាប់ទៅឯកអគ្គរាជទូតកាណាដាអំពីការឈ្លានពានរបស់ថៃមកលើកម្ពុជាជាការរំលោភច្បាប់អន្តរជាតិយ៉ាងធ្ងន់ធ្ងរ
08/18/2026 04:08 PM
Facebook Telegram Linkin
​កម្ពុជានឹងបំបែកកំណត់ត្រានាំអង្ករចេញឱ្យបាន ១លានតោនក្នុងឆ្នាំ២០២៦នេះ ខណៈ៧ខែបាននាំចេញអង្ករចំនួន ៧០៧,៤៧១ តោនរួចហើយ
08/18/2026 04:08 PM
Facebook Telegram Linkin
មេដឹកនាំប្រទេសមីយ៉ាន់ម៉ាលោក មីន អោងឡាំង នឹងអញ្ជើញមកបំពេញទស្សនកិច្ចនៅកម្ពុជានាដើមខែកញ្ញា
08/18/2026 04:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.