នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុន TH Automotive Manufacturing Co., Ltd​ នឹង​សម្ពោធជាផ្លូវការ​ រោងចក្រផ្គុំ និងដំឡើងរថយន្តរបស់ខ្លួន​នៅកម្ពុជា​ ក្នុងឆ្នាំ២០២៦នេះ
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម

នយោបាយ​ និង ការអភិវឌ្ឍន៍

រដ្ឋមន្ត្រីទេសចរណ៍៖ ក្រសួងសម្រេចសមិទ្ធផលជាច្រើនផ្នែកបណ្តុះបណ្តាលអ្នកជំនាញទេសចរណ៍

2023/08/14 07:58:24 pm        448
Facebook Telegram Linkin
ភ្នំពេញ៖ នៅថ្ងៃទី១៤ ខែសីហានេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍ បាន​បើកកិច្ចប្រជុំបច្ចុប្បន្នភាព​សមិទ្ធផលការងាររបស់គណៈកម្មាធិការជាតិអ្នកជំនាញទេសចរណ៍ ហៅកាត់ថា MRA-TP នៅទីស្តីការក្រសួង ខណៈការងារ MRA-TP ដែលធ្វើការពាក់ព័ន្ធបណ្តុះ​បណ្តាលអ្នកជំនាញទេសចរណ៍ក្នុងក្របខណ្ឌជាតិ ​និងអាស៊ាន​ គឺបានសម្រេច​សមិទ្ធផល​ជាច្រើន នៅក្នុងរាជរដ្ឋាភិបាលអាណត្តិទី៦នេះ។ឯកឧត្តមរដ្ឋមន្ត្រី ថោង ខុន ថ្លែងថា ការអនុវត្តការងារ របស់គណៈកម្មាធិការជាតិអ្នកជំនាញ​ទេសចរណ៍ ​នៅក្នុងរាជរដ្ឋាភិបាលអាណត្តិទី៦ បើទោះជាមានភាពរអាក់រអួលដោយ​សារតែ​វិបត្តិកូវីដ-១៩ យ៉ាងណាក្តី ក៏មានសមិទ្ធផលមួយចំនួនធំគឺបានធ្វើការសម្រេចបាននៅក្នុងក្រ​ប​ខ័ណ្ឌជាតិ​ និងអាស៊ានដូចជា ក្រសួងទេសចរណ៍កម្ពុជា ដឹកនាំរៀបចំស្តង់ដា​សមត្ថភាពអ្នក​​​ជំនាញទេសចរណ៍ស្ប៉ា និងសុខុមាលភាពអាស៊ាន. ការងារដឹកនាំរៀបចំ​គោលការណ៍ណែនាំអាស៊ានស្តីពីការវាយតម្លៃការសិក្សាពីមុន (RPL). ការងារសម្របសម្រួលរៀបចំគោលការណ៍ណែនាំស្តីពីអនាម័យ និងសុវត្ថិភាពដល់អ្នកជំនាញទេសចរណ៍ និងសហគមន៍សម្រាប់ឧស្សាហកម្មទេសចរណ៍អាស៊ាន. ការងារបង្កើតឲ្យមានតែមសុវត្ថិភាពក្នុងការធ្វើដំណើរ សម្រាប់អាស៊ាន និងការងាររៀបចំកម្មវិធីសិក្សាអប់រំបច្ចេកទេសមធ្យមសិក្សាទុតិយភូមិផ្នែកទេសចរណ៍ និងការងារសហប្រតិបត្តិការអភិវឌ្ឍអ្នកជំនាញទេសចរណ៍រវាងអង្គការជាតិ និងអន្តរជាតិជាច្រើនទៀត។ឯកឧត្តម ថោង ខុន ថ្លែងថា បទពិសោធន៍នៃការកសាងរចនាសម្ព័ន្ធមូលដ្ឋាន​ការ​បណ្តុះបណ្តាលជំនាញទាំងនេះ នឹងត្រូវបានយកទៅអនុវត្តដោយសាលាជាតិទេសចរណ៍ ដែលក្រសួងទេសចរណ៍កំពុងតែសាងសង់ ក្រោមកិច្ចសហប្រតិបត្តិការជាមួយអង្គការ AFDរបស់ប្រទេសបារាំង ហើយសង្ឃឹមថានឹងអាចដំណើរការក្នុងដើមអាណត្តិរាជរដ្ឋាភិបាលទី៧ នេះ។ឯកឧត្តម បញ្ជាក់ថា ជាក់ស្តែងណាស់ ការងារអភិវឌ្ឍន៍ជំរុញវិស័យ​ទេសចរណ៍​ឲ្យមានការរីករចម្រើន គឺយើងត្រូវការចាំបាច់អ្នកជំនាញទេសចរណ៍មកធ្វើការ ពោល គឺ បើគ្មានអ្នកជំនាញទេសចរណ៍ធ្វើការងារនោះ វិស័យទេសចរណ៍មិនអាចរីកចម្រើននោះទេ។ ឯកឧត្តម ទ្រី ឈីវ ប្រធានលេខាធិការដ្ឋាន MRA -TP និងជាប្រធាននាយកដ្ឋានសហប្រិតបត្តិការអន្តរជាតិ និងអាស៊ាន ថ្លែងថា បច្ចុប្បន្នបណ្តាប្រទេសជាសមាជិកអាស៊ាន កំពុងទទួលស្គាល់ជំនាញវិជ្ជាជីវៈទេសចរណ៍ចំនួន៧០មុខជំនាញ គឺអាចធ្វើការងារចល័តបំលាស់ទីនៅតាមបណ្តាប្រទេសអាស៊ានបាន៕អត្ថបទ ស៊ុមសុខជា

សហគ្រិនវ័យក្មេងបង្ហាញការគាំទ្រចំពោះឯកឧត្តមកិត្តិទេសភិបាលបណ្ឌិត ជានាយករដ្ឋមន្ត្រីអាណត្តិថ្មី

2023/08/14 07:48:33 pm        307
Facebook Telegram Linkin
ភ្នំពេញ៖ ក្រុមសហគ្រិនវ័យក្មេង បានបង្ហាញនូវការគាំទ្រពេញទំហឹង ចំពោះឯកឧត្តមកិត្តិទេសភិបាលបណ្ឌិត ហ៊ុន ម៉ាណែត ជានាយករដ្ឋមន្រ្តីថ្មី អាណត្តិទី៧ រួមទាំងមានជំនឿ និងជឿជាក់យ៉ាងមុតមាំ ទៅលើធនធាន មនុស្ស និងទេពកោសល្យរបស់ឯកឧត្តម ។នៅក្នុងពិធីជួបសំណេះសំណាលម្ចាស់អាជីវកម្ម និងប្រគល់លិខិតតែងតាំង ថ្នាក់ដឹកនាំ ផែនសហ គ្រិនវ័យក្មេង របស់សាខាកិត្តិយស នៃយុវជនគណបក្សប្រជាជនកម្ពុជា រាជធានីភ្នំពេញ កាលពីយប់ថ្ងៃ ទី១៣ ខែសីហា នេះ ឯកឧត្តម ដួង អក្ខរា ប្រធានសាខាកិត្តិយស នៃផែន​សហគ្រិនវ័យក្មេង លើកឡើងថា ការគាំទ្រនេះ ដោយសារតែមើលឃើញយ៉ាងច្បាស់ ពី​សមត្ថភាពដឹកនាំ មានចំណេះដឹងខ្ពស់ ភាពក្លាហាន ការទទួលស្គាល់ពីសហគមន៍ជាតិ អន្តរជាតិ និងជាបុត្រាឆ្នើមរបស់សម្តេចតេជោ ហ៊ុន សែន ស្ថាបនិកសន្តិ ភាព បាននាំមកនូវសុខសន្តិភាព និងការអភិវឌ្ឍជាតិ មាតុភូមិដូចសព្វថ្ងៃនេះ ។ ឯកឧត្តម បានបន្តថា ផែនសហគ្រិនវ័យក្មេង មានសមាជិករាប់ម៉ឺននាក់ បានចូលរួមបោះឆ្នោតជូន គណបក្សប្រជាជនកម្ពុជា ហើយលទ្ធផលនៃការបោះឆ្នោតតំណាងរាស្រ្តឆ្នាំ២០២៣នេះទៀតសោត ក៏ បង្ហាញកាន់តែច្បាស់ពីការស្រឡាញ់ គាំទ្រ ចំពោះការដឹកនាំរបស់គណបក្សប្រជាជនកម្ពុជា ដែលមានយន្ត ការ និងចក្ខុវិស័យត្រឹមត្រូវ ច្បាស់លាស់ ដើម្បីបុពហេតុជាតិ ពីសំណាក់ប្រជាពលរដ្ឋរាប់លាននាក់ ទាំងក្នុង និងក្រៅប្រទេស ។ឯកឧត្តម សុខ ប្រសិទ្ធ រដ្ឋលេខាធិការក្រសួងព័ត៌មាន បានមានប្រសាសន៍ថា រាជរដ្ឋាភិបាល ដែល ដឹកនាំដោយគណបក្សប្រជាជនកម្ពុជា មានសម្ដេចតេជោជាស្នូល និងឯកឧត្តមបណ្ឌិត ហ៊ុន ម៉ាណែត ជានាយករដ្ឋមន្ត្រីថ្មី នឹងកាន់តែកសាង និងអភិវឌ្ឍន៍​ប្រទេសជាតិកាន់តែខ្លាំងថែមទៀត ពិសេសនឹងជួយលើក ​កម្រិតជីវភាពរបស់ពលរដ្ឋឱ្យកាន់តែល្អប្រសើរ ​និងកាន់តែមានភាពជឿជាក់ ។ឯកឧត្តម បានបន្តថា ការចូលរួមចំណែករបស់ថ្នាក់ដឹកនាំ សមាជិក សមាជិកា នៃសហគ្រិនវ័យ ក្មេង គឺជាសញ្ញាដ៏វិជ្ជមាន នៃការរួបរួមសាមគ្គីក្នុងសង្គមជាតិតែមួយ និងសូមឱ្យម្ចាស់អាជីវកម្ម និងសមា ជិក សមាជិកាទាំងអស់ រួមគ្នាការពារសន្តិភាព និងសេរីភាព ៕អត្ថបទ៖ បាន សុខរិទ្ធិ

សម្ដេច ស ខេង អះអាងថា ក្រោយសម្តេចលាចេញពីតំណែង មន្ដ្រីក្រោមឱវាទក្រសួងមហាផ្ទៃ បន្ដបំពេញតួនាទីខ្លួនជាធម្មតា

2023/08/14 07:29:20 pm        538
Facebook Telegram Linkin
ភ្នំពេញ៖ សម្ដេច ស ខេង ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ បានថ្លែងថា ​ក្រោយពីសម្ដេច លាចេញពីតំណែងជារដ្ឋមន្ដ្រីក្រសួងមហាផ្ទៃ ​ទៅជាសមាជិកឧត្តមក្រុមប្រឹក្សាផ្ទាល់​ព្រះមហាក្សត្រ គឺ​មន្ដ្រីក្រោមឱវាទក្រសួងមហាផ្ទៃទាំងអស់ ​នៅបន្ដបំពេញតួនាទីរបស់ខ្លួនជាធម្មតា ដើម្បីរួបរួម​គ្នា​បម្រើដល់ប្រទេសជាតិ ​ឲ្យមានការរីកចម្រើនបន្ថែមទៀត​ ដូចអ្វីដែលកំពុងធ្វើសព្វថ្ងៃនេះ។ក្នុងពិធីប្រគល់សញ្ញាបត្រថ្នាក់បរិញ្ញាបត្រ ​និងបរិញ្ញាបត្រជាន់ខ្ពស់វិទ្យាសាស្រ្តនគរបាល ជូនដល់​និស្សិតជ័យលាភី ​នៅបណ្ឌិត្យភានគរបាលកម្ពុជា ​នាថ្ងៃ១៤ សីហា ​ឆ្នាំ២០២៣នេះ សម្ដេចក្រឡា​ហោម ស ខេង បានលើកឡើងថា មន្ដ្រីមានឋានៈជាអគ្គនាយកដ្ឋាននានា​ចំណុះក្រសួងមហាផ្ទៃ គឺ​បន្ដការងារជាធម្មតា ហើយរឹតតែខិតខំបំពេញការងារបន្ថែមទៀត។ សម្ដេចបន្ថែមថា​ ក្រៅពីនោះ​ មន្ដ្រីនយោបាយ ​មានឋានៈរដ្ឋលេខាធិការ ​អនុរដ្ឋលេធិការ ក៏ត្រូវបន្ដ​ទទួល​នូវភារកិច្ចដែលក្រសួងប្រគល់ជូន ​ព្រោះមានការងារត្រូវធ្វើជាច្រើនបន្តទៀត។សម្ដេចក្រឡាហោម បានគូសបញ្ជាក់ថា​ «សម្រាប់ក្រសួងមហាផ្ទៃ ​គឺមានតែខ្ញុំទេដែលចេញពីក្រសួង ដើម្បីទៅបំពេញបេសកម្មផ្សេងទៀត។ ក្រៅពីនោះអាចថា មន្ដ្រីផ្ទេពីកន្លែងនេះ ពីកន្លែងនោះ វាជា​រឿងធម្មតាទេ។ ប៉ុន្ដែអ្នកភាគច្រើន ​ឬក៏ទាំងអស់ ក្រៅពីអ្នកដែលចេញហើយចេញ​តាមរយៈ​បញ្ចប់​អាណត្តិ ដូចខ្ញុំជាដើម ឬក៏អ្នកផ្ទេរចេញទៅកន្លែងផ្សេង អាហ្នឹងគឺគាត់ចេញ។ ប៉ុន្ដែអ្នកក្រៅពីហ្នឹងគឺបន្ដទៀត ក្នុងក្របខណ្ឌក្រសួងនេះ ។ អីចឹងទេ ខ្ញុំសង្ឃឹមជឿជាក់ថា អគ្គនាយក​ចុះដែលជាស្ថាប័នមុខងារសាធារណៈ នឹងបន្ដធ្វើការងាររបស់ខ្លួន»។ជាមួយគ្នានោះដែរ​សម្ដេចក្រឡាហោម ​សង្ឃឹមថា​ មន្ដ្រីក្រសួងមហាផ្ទៃ ​នឹង​បន្ដបំពេញការងាររបស់​ខ្លួន​បន្ថែមទៀត ដើម្បីឲ្យក្រសួងមានការរីកចម្រើនបន្ដទៀត ​ដើម្បីបម្រើដល់ប្រទេសជាតិ និងប្រជាជន​កម្ពុជា ពិសេស ក្នុងវិស័យដែលក្រសួងទទួលខុសត្រូវ។នាឱកាសនោះ សម្ដេច ស ខេង បានលើកឡើងដែរថា ​នៅប៉ុន្មានថ្ងៃទៀត រដ្ឋសភា នីតិកាលទី៧ នឹងបើកសម័យប្រជុំលើកដំបូងរបស់ខ្លួន ​ក្រោមព្រះរាជអធិបតីដ៏ខ្ពង់ខ្ពស់បំផុត របស់​ព្រះមហាក្សត្រ។ បន្ទាប់ពីនោះ នៅថ្ងៃទី២២ សីហា រាជរដ្ឋាភិបាលថ្មី នឹងត្រូវបានបង្កើតឡើង​តាមរយៈ ការបោះឆ្នោតផ្ដល់សេចក្ដីទុកចិត្តពីរដ្ឋសភា ដូច្នេះចាប់ពីថ្ងៃរសៀលថ្ងៃទី២២ សីហា ឆ្នាំ២០២៣​តទៅ ក្រោយ​ស្បថ​ចូលកាន់តំណែង​ រាជរដ្ឋាភិបាលថ្មីរួច​ រាជរដ្ឋាភិបាលថ្មី នឹង​បន្ដការងារពីរាជរដ្ឋាភិបាលចាស់៕អត្ថបទ៖ បានចក់

ក្រុមសកម្មប្រយុទ្ធវាយប្រហារក្បួនរថយន្តយោធាប៉ាគីស្ថាន ដែលអមដំណើរជនជាតិចិន

2023/08/14 07:26:54 pm        274
Facebook Telegram Linkin
ប៉ាគីស្ថាន៖ យោធាប៉ាគីស្ថាន និងប្រភពសន្តិសុខមួយបាននិយាយថា ក្រុមសកម្មប្រយុទ្ធបានវាយប្រហារក្បួនរថយន្តយោធាប៉ាគីស្ថាន នៅជិតកំពង់ផែយុទ្ធសាស្ត្រភាគនិរតីនៃទីក្រុង Gwadar កាលពីថ្ងៃអាទិត្យ (១៣ សីហា) ខណៈដែលក្បួននោះកំពុងអមដំណើរគណៈប្រតិភូជនជាតិចិន ទៅកាន់គម្រោងសាងសង់មួយ។ប្រទេសចិន បានវិនិយោគយ៉ាងច្រើននៅក្រោមគំនិតផ្តួចផ្តើមខ្សែក្រវាត់ និងផ្លូវរបស់ខ្លួននៅក្នុងខេត្តសម្បូររ៉ែ បាឡូជីស្ថាន (Balochistan) រួមទាំងការអភិវឌ្ឍន៍កំពង់ផែទឹកជ្រៅទីក្រុង Gwadar របស់ប្រទេសប៉ាគីស្ថាន ទោះបីជាមានការបះបោរផ្តាច់ខ្លួនជាច្រើនទសវត្សរ៍នៅក្នុងតំបន់នោះក៏ដោយ។បណ្ដាញទំនាក់ទំនងសាធារណៈរបស់យោធាប៉ាគីស្ថាន បាននិយាយនៅក្នុងសេចក្តីថ្លែងការណ៍មួយថា "ក្រុមភេរវករបានប្រើអាវុធធុនតូច និងគ្រាប់បែកដៃក្នុងអំឡុងពេលធ្វើសកម្មភាព" ដោយបន្ថែមថា សកម្មប្រយុទ្ធ២នាក់ត្រូវបានសម្លាប់ ហើយមិនមានគ្រោះថ្នាក់ណាមួយដល់បុគ្គលិកយោធា ឬជនស៊ីវិលឡើយ។ស្ថានកុងស៊ុលរបស់ចិននៅទីក្រុង Karachi ភាគខាងត្បូងប្រទេសប៉ាគីស្ថាន បានថ្កោលទោសការវាយប្រហារនេះ ដោយបន្ថែមនៅក្នុងសេចក្តីថ្លែងការណ៍មួយថា មិនមានអ្នករងរបួសក្នុងចំណោមពលរដ្ឋរបស់ខ្លួននៅលើក្បួននោះទេ។ មន្ត្រីសន្តិសុខប៉ាគីស្ថានម្នាក់ បាននិយាយក្នុងលក្ខខណ្ឌមិនបញ្ចេញឈ្មោះថា អ្នកវាយប្រហារ២នាក់បានស្លាប់ នៅក្នុងការប្រយុទ្ធគ្នាដោយកាំភ្លើង ដោយពុំមានអ្នករបួសណាមួយនៅក្នុងក្បួនទេ។ ប្រភពនោះបាននិយាយថា ការវាយប្រហារបានផ្តោតលើអ្នកដំណើរជនជាតិចិន ដែលធ្វើដំណើរពីអាកាសយានដ្ឋានទីក្រុង Gwadar ឆ្ពោះទៅការដ្ឋានសំណង់ក្នុងតំបន់កំពង់ផែនោះ៕

គណៈប្រតិភូនីហ្សេរីយ៉ា៖ របបសឹកនីហ្សេ បើកចំហចំពោះដំណោះស្រាយការទូត

2023/08/14 07:24:11 pm        264
Facebook Telegram Linkin
នីហ្សេរីយ៉ា៖ ក្រុមអ្នកប្រាជ្ញអ៊ីស្លាមជាន់ខ្ពស់របស់នីហ្សេរីយ៉ា បាននិយាយកាលពីថ្ងៃអាទិត្យបន្ទាប់ពីកិច្ចប្រជុំជាមួយរបបសឹកនីហ្សេ ក្នុងរដ្ឋធានី នីញ៉ាមេ ថា ក្រុមមេដឹកនាំរដ្ឋប្រហារនៅក្នុងប្រទេសនីហ្សេ បើកចំហចំពោះការទូតដើម្បីដោះស្រាយការប្រឈមមុខដាក់គ្នាជាមួយប្លុកក្នុងតំបន់របស់អាហ្រ្វិកខាងលិច។ដំណើរទស្សនកិច្ចរបស់ពួកគេធ្វើឡើងនៅពេលដែលសហគមន៍សេដ្ឋកិច្ចនៃរដ្ឋអាហ្រ្វិកខាងលិច (ECOWAS) កំពុងព្យាយាមស្វែងរកជម្រើសរបស់ខ្លួនក្នុងការស្តារការគ្រប់គ្រងស៊ីវិលនៅក្នុងប្រទេសនីហ្សេ ឡើងវិញ រួមទាំងអន្តរាគមន៍យោធាដ៏មានសក្តានុពល បន្ទាប់ពីការទម្លាក់ប្រធានាធិបតីនីហ្សេ លោក Mohamed Bazoum កាលពីថ្ងៃទី២៦ ខែកក្កដា ដែលជារដ្ឋប្រហារលើកទី៧ នៅអាហ្វ្រិកខាងលិច និងកណ្តាលក្នុងរយៈពេលបីឆ្នាំមកនេះ។ខណៈដែលប្លុកនៅតែជំរុញឱ្យមានដំណោះស្រាយដោយសន្តិវិធី ប្រធានប្លុក ECOWAS និងជាប្រធានាធិបតីនីហ្សេរីយ៉ា លោក Bola Tinubu បានយល់ព្រមលើបេសកកម្មកាលពីថ្ងៃសៅរ៍ទៅកាន់រដ្ឋធានី នីញ៉ាមេ ដោយគណៈប្រតិភូអ្នកប្រាជ្ញឥស្លាម ដែលបានប្តេជ្ញាលើកកម្ពស់ការសន្ទនាជាមួយរបបសឹកនីហ្សេ។ លោក Sheikh Abdullahi Bala Lau ដែលដឹកនាំគណៈប្រតិភូបាននិយាយថា កិច្ចប្រជុំរបស់ក្រុមនេះជាមួយមេដឹកនាំរបបសឹក លោកឧត្តមសេនីយ Abdourahamane Tiani គឺមានរយៈពេលជាច្រើនម៉ោង។ការបដិសេធពីមុនរបស់បណ្ដាមេដឹកនាំរដ្ឋប្រហារចំពោះកិច្ចខិតខំប្រឹងប្រែងការទូតដោយប្លុក ECOWAS សហរដ្ឋអាមេរិក និងប្រទេសដទៃទៀត បានបង្កើនទិដ្ឋភាពនៃជម្លោះបន្ថែមទៀតនៅក្នុងប្រទេសនៃតំបន់Sahel ដ៏ក្រីក្ររបស់អាហ្វ្រិកខាងលិច ដែលកំពុងដោះស្រាយជាមួយការបះបោរអ៊ីស្លាមជ្រុលនិយមមួយនេះ៕

តម្រូវការឧបករណ៍ផ្ដល់ភាពត្រជាក់បានហក់ឡើងយ៉ាងខ្លាំងនៅប្រទេសហ៊្សកដានី ខណៈសីតុណ្ហភាពកើនឡើង

2023/08/14 07:21:39 pm        232
Facebook Telegram Linkin
ហ្ស៊កដានី៖ សីតុណ្ហភាពខ្ពស់ជាបន្តបន្ទាប់ក្នុងប្រទេសហ្ស៊កដានី ពីខែកក្កដា និងរហូតដល់ខែសីហា បាននាំឱ្យមានការកើនឡើងនៃតម្រូវការឧបករណ៍ផ្ដល់ភាពត្រជាក់ នេះបើយោងតាមអ្នកគ្រប់គ្រងម្នាក់នៅហាងអេឡិចត្រូនិចនៅរដ្ឋធានី Amman (អាម៉ង់)។ អ្នកគ្រប់គ្រងផ្នែកដឹកជញ្ជូននៅក្រុមហ៊ុន Smart Buy លោក Soqrat Karaja បាននិយាយថា ហាងនេះបានលក់ម៉ាស៊ីនត្រជាក់ចន្លោះពី ១៥០គ្រឿង ទៅ ១៧០គ្រឿងកាលពីចុងសប្តាហ៍មុន ដោយបន្ថែមថាកាលពីខែមុន ហាងនេះបានលក់ម៉ាស៊ីនត្រជាក់ច្រើនគ្រឿងបំផុត ដែលមិនធ្លាប់មានពីមុនមក។អ្នកគ្រប់គ្រងនោះនិយាយថា «កំណើនអត្រាលក់កាលពីខែមុន គឺដោយសារសីតុណ្ហភាពខ្ពស់ដែលកំពុងបន្ត ហើយវាមានអត្រាស្មើនឹងការលក់រយៈពេលមួយឬពីរឆ្នាំ។ នេះជាលើកទីមួយហើយដែលការលក់មានកំណើនយ៉ាងខ្លាំងបែបនេះ ដោយសារសីតុណ្ហភាពឡើងដល់កម្រិតខ្ពស់»។ស្ថាបនិកនៃទីភ្នាក់ងារព្យាករណ៍អាកាសធាតុឯកជន Arabiaweather លោក Mohammed Al-Shaker បាននិយាយថា សីតុណ្ហភាពដ៏ខ្ពស់ដែលកំពុងបន្តនេះ មានផលប៉ះពាល់ផ្ទាល់ទៅលើការរស់នៅប្រចាំថ្ងៃរបស់ប្រជាជនក្នុងរដូវក្តៅ ដោយមនុស្សជាច្រើនបានកែប្រែកាលវិភាគចេញទៅក្រៅរបស់ពួកគេ ដើម្បីជៀសវាងផលប៉ះពាល់ពីកម្ដៅថ្ងៃ។លោក Al-Shaker បាននិយាយថា បណ្ដាប្រទេសភាគខាងកើតមេឌីទែរ៉ានេ រួមទាំងប្រទេសហ្ស៊កដានីកំពុងទទួលរងនូវលក្ខខណ្ឌអាកាសធាតុក្តៅខ្លាំង ដែលនឹងនាំឱ្យមានកំណើនសីតុណ្ហភាពនៅក្នុងប្រទេសហ្ស៊កដានី រវាងថ្ងៃសៅរ៍ដល់ថ្ងៃច័ន្ទនេះ ជាមួយនឹងកម្រិតសីតុណ្ហភាពដែលបានព្យាករណ៍ថានឹងឡើងដល់ជាង៤០អង្សាសេ៕

ការកាត់ផ្តាច់ចរន្តអគ្គិសនីកាន់តែអាក្រក់ឡើងនៅប្រទេសនីហ្សេ បន្ទាប់ពីការដាក់ទណ្ឌកម្មពីប្លុក ECOWAS

2023/08/14 07:18:15 pm        236
Facebook Telegram Linkin
នីហ្សេ៖ ប្រជាជនក្នុងប្រទេសនីហ្សេ កំពុងទទួលផលប៉ះពាល់ពីទណ្ឌកម្មដែលដាក់ដោយសហគមន៍សេដ្ឋកិច្ចនៃបណ្តារដ្ឋអាហ្រ្វិកខាងលិច (ECOWAS) ក្នុងការឆ្លើយតបទៅនឹងរដ្ឋប្រហារយោធានៅក្នុងប្រទេស ដែលបណ្តាលឱ្យមានការកាត់ផ្តាច់ចរន្តអគ្គិសនីរយៈពេលយូរ។ជាងមួយសប្តាហ៍មុន មេដឹកនាំនៃប្លុក ECOWAS ជាប្លុកតំបន់ ដែលមានសមាជិក១៥ប្រទេស ព្រមទាំងសហភាពសេដ្ឋកិច្ច និងរូបិយវត្ថុអាហ្វ្រិកខាងលិច (UEMOA) បានសម្រេចដាក់ទណ្ឌកម្មសេដ្ឋកិច្ច និងហិរញ្ញវត្ថុដល់ប្រទេសនីហ្សេ ដើម្បីឆ្លើយតបទៅនឹងការផ្លាស់ប្តូរអំណាចមិនស្របតាមរដ្ឋធម្មនុញ្ញ។ទណ្ឌកម្ម បានធ្វើឱ្យប្រទេសគ្មានព្រំដែនសមុទ្រមួយនេះ ទទួលបានការផ្គត់ផ្គង់ថាមពលតិចតួច ខណៈដែលប្រទេសនីហ្សេរីយ៉ា ដែលមានការផ្គត់ផ្គង់អគ្គិសនីមានចំនួន៧០ភាគរយនៃអគ្គិសនីរបស់ប្រទេសនីហ្សេ បានកាត់ផ្តាច់ការផ្គត់ផ្គង់ថាមពលដល់ប្រទេសនេះ ស្របតាមទណ្ឌកម្មរបស់ប្លុក ECOWAS។នៅក្នុងរដ្ឋធានី នីញ៉ាមេ របស់ប្រទេសនីហ្សេ និងទីក្រុងជាច្រើនផ្សេងទៀត ប្រជាជនកំពុងជួបការលំបាកក្នុងការទប់ទល់នឹងការដាច់ចរន្តអគ្គិសនីជាបន្តបន្ទាប់ និងយូរអង្វែង ហើយផ្លូវ និងតំបន់លំនៅឋាននានាកំពុងព្យាយាមសម្របខ្លួននឹងការធ្លាក់ចូលទៅក្នុងភាពងងឹតអស់ជាច្រើនម៉ោង។រដ្ឋប្រហារលើកទី៧ នៅអាហ្វ្រិកខាងលិច និងកណ្តាលក្នុងរយៈពេលបីឆ្នាំមួយនេះ ទទួលបានការថ្កោលទោសពីបណ្តាប្រទេសជាច្រើននៅទ្វីបអាហ្រ្វិក ដែលចាត់ទុកការផ្លាស់ប្តូរអំណាចដោយអធម្មនុញ្ញថា ជាការគំរាមកំហែងដល់ស្ថិរភាព និងការអភិវឌ្ឍន៍នៅលើទ្វីបទាំងមូល៕

សមាជិកព្រឹទ្ធសភាប៉ាគីស្ថាន៖ លោកខាងលិចមិនអាចបង្ខិតបង្ខំប្រទេសផ្សេងទៀតបានទេ

2023/08/14 07:14:07 pm        260
Facebook Telegram Linkin
ប៉ាគីស្ថាន៖ អ្នកនយោបាយប៉ាគីស្ថានមួយរូបបាននិយាយថា ប្រទេសលោកខាងលិចមិនអាចប្រើការបង្ខិតបង្ខំ ដើម្បីដាក់សម្ពាធប្រទេសផ្សេងទៀតឱ្យធ្វើសកម្មភាពតាមការចង់បានរបស់ខ្លួនទេ ខណៈដែលពួកគេកំពុងព្យាយាមការពារផលប្រយោជន៍ជាតិផ្ទាល់ខ្លួនរបស់ពួកគេ។នៅក្នុងបទសម្ភាសន៍ថ្មីៗនេះជាមួយបណ្តាញទូរទស្សន៍ចិនសកល (CGTN) លោក Mushahid Hussain ប្រធានគណៈកម្មាធិការក្រសួងការពារជាតិរបស់ព្រឹទ្ធសភាប៉ាគីស្ថាន បានចង្អុលបង្ហាញថា វិបត្តិអ៊ុយក្រែន ដែលកំពុងបន្ត គឺជាឧទាហរណ៍នៃការពង្រីកខ្លួនទៅភាគខាងកើតរបស់អង្គការណាតូ និងជាពេលវេលាល្អសម្រាប់ប្រទេសលោកខាងលិចមួយចំនួន ក្នុងការពង្រីកអំណាចរបស់ពួកគេ។លោក Hussain ក៏បានលើកឡើងផងដែរថា មានការជំរុញហួសហេតុពេកនៅពីក្រោយកិច្ចប្រជុំកំពូលសម្រាប់លទ្ធិប្រជាធិបតេយ្យ ដែលរៀបចំដោយសហរដ្ឋអាមេរិក។លោកបាននិយាយថា «នៅប្រទេសប៉ាគីស្ថាន យើងបានច្រានចោលនូវអ្វីដែលហៅថា កិច្ចប្រជុំកំពូលប្រជាធិបតេយ្យ ដែលរៀបចំដោយលោក ចូ បៃដិន កាលពីខែមីនាកន្លងទៅ ព្រោះកិច្ចប្រជុំនោះមិនមែននិយាយអំពីលទ្ធិប្រជាធិបតេយ្យ និងសិទ្ធិមនុស្សទេ។ ពួកគេចង់ប្រើប្រាស់ប្រជាធិបតេយ្យ និងសិទ្ធិមនុស្ស ជាអាវុធប្រឆាំងនឹងប្រទេសចិន និងប្រទេសដទៃទៀត ដូច្នេះកិច្ចប្រជុំនោះមានស្តង់ដារពីរ។ យើងគិតថា ភ្លាមៗនោះលោកខាងលិចកំពុងរកឃើញថា ប្រទេសទាំងនោះកំពុងរបេះចេញពីដៃរបស់ពួកគេ ហើយឥឡូវនេះពួកគេកំពុងអះអាងអំពីសិទ្ធិអំណាច ស្វ័យភាព និងផលប្រយោជន៍ស្នូលរបស់ពួកគេ គឺជាឥទ្ធិពលដ៏ខ្លាំងក្លាបំផុត មិនមែនជាផលប្រយោជន៍សម្រាប់អ្នកដែលធ្លាប់មានតួនាទីសំខាន់នៅឆ្ងាយពីលោកខាងលិចនោះទេ»៕

ការតម្រង់ជួរដ៏វែងក្នុងក្រុង Buenos Aires ខណៈការបោះឆ្នោតប្រជាមតិនៅអាហ្សង់ទីន បានបិទ

2023/08/14 07:11:37 pm        259
Facebook Telegram Linkin
អាហ្សង់ទីន៖ មានជួរដ៏វែងជាច្រើន នៅខាងក្រៅស្ថានីយ៍បោះឆ្នោតប្រជាមតិ ដែលត្រូវបានគេមើលឃើញនៅក្នុងទីក្រុង Buenos Aires ប្រទេសអាហ្សង់ទីន ភ្លាមៗមុនពេលការបោះឆ្នោតប្រជាមតិសម្រាប់ការបោះឆ្នោតបឋមបានបិទ កាលពីថ្ងៃអាទិត្យ។ នៅក្នុងរដ្ឋធានី មានការតម្រង់ជួរដ៏ច្របូកច្របល់ដ៏វែងដើម្បីបោះឆ្នោត ដោយមនុស្សមួយចំនួន ត្អូញត្អែរអំពីការពន្យាពេលការបោះឆ្នោតរបស់ពួកគេ និងកំហុសប្រព័ន្ធបោះឆ្នោត។យោងតាមប្រព័ន្ធផ្សព្វផ្សាយក្នុងតំបន់ បានឲ្យដឹងថា បណ្តឹងជាច្រើនត្រូវបានធ្វើឡើងទៅកាន់គណៈកម្មាធិការជាតិរៀបចំការបោះឆ្នោតប្រទេសអាហ្សង់ទីន អំពីភាពមិនប្រក្រតីនៃម៉ាស៊ីនមួយចំនួនដែលត្រូវបានប្រើសម្រាប់ការបោះឆ្នោតតាមប្រព័ន្ធអេឡិចត្រូនិកតែមួយ បណ្តាលឲ្យមានការរងចាំយូរ។នៅពេលនេះនេះ ប្រទេសអាហ្សង់ទីន កំពុងរងចាំលទ្ធផលបឋម។ លទ្ធផលបឋមគឺជាកាតព្វកិច្ចដែលធ្វើឲ្យក្លាយជារបៀបទូទៅក្នុងការត្រៀមរៀបចំដ៏ធំសម្រាប់ការបោះឆ្នោតសកលនៅក្នុងខែតុលា និងផ្តល់ការបញ្ជាក់ច្បាស់លាស់ ថានណាគឺជាបេក្ខជនដែលគេនិយមពេញចិត្តដើម្បីទទួលបានជ័យជម្នះតំណែងប្រធានាធិបតី៕

ឆ្មាំជាតិ និងកងទ័ពអាមេរិក ជួយពន្លត់ចំហេះព្រៃនិងជួយសង្គ្រោះនៅរដ្ឋហាវ៉ៃ

2023/08/14 07:08:37 pm        229
Facebook Telegram Linkin
អាមេរិក៖ សមាជិកកងទ័ពនឹងឆ្មាំជាតិអាមេរិក បានជួយក្នុងកិច្ចប្រឹងប្រែងដើម្បីពន្លត់ចំហេះព្រៃនៅរដ្ឋហាវ៉ៃដែលមានមនុស្សស្លាប់ច្រើន នៅក្នុងប៉ុន្មានថ្ងៃថ្មីៗនេះ ព្រមទាំងស្វែងរក ជួយសង្គ្រោះ និងប្រតិបត្តិការផ្តល់ជំនួយសង្គ្រោះ។ គិតត្រឹមថ្ងៃអាទិត្យចំនួនអ្នកស្លាប់បានកើនឡើងដល់៩៣នាក់ហើយត្រូវបានគេរំពឹងថានឹងបន្តកើនឡើង។ វីដេអូដែលបានចេញផ្សាយដោយ ក្រសួងការពារជាតិសហរដ្ឋអាមេរិក បានបង្ហាញពីសមាជិកឆ្មាំជាតិរដ្ឋហាវ៉ៃ កំពុងប្រើប្រាស់ឧទ្ធម្ភាគចក្រ Chinook កាលពីថ្ងៃពុធសប្តាហ៍មុន ដើម្បីទប់ទល់អគ្គិភ័យ នៅកោះ Maui។សមាជិកឆ្មាំជាតិ អាចត្រូវបានគេមើលឃើញកំពុងដើរឆ្លងកាត់កម្ទេចកម្ទីរដែលឆេះរោល ខណៈពួកគេបានជួយស្វែងរក និងកិច្ចប្រឹងប្រែងស្តារឡើងវិញ។ កងទ័ពសហរដ្ឋអាមេរិក បានជួយប្រជាជនក្នុងតំបន់ ក្នុងការប្រមែប្រមូលជំនួយស្បៀងអាហារ និងគ្រឿងផ្គត់ផ្គង់ផ្សេងៗទៀត នៅខាងក្រៅវិមានរដ្ឋ Capitol ក្នុងទីក្រុង Honolulu កាលពីថ្ងៃសុក្រ៕

បណ្ដាញសង្គម

ព័ត៌មានថ្មីៗ

កងកម្លាំងយេម៉ែនវាយប្រហារទីតាំងរបស់ក្រុម​ហ៊ូទី នៅខេត្ត​ភាគខាង​ជើង al-Jawf
08/18/2026 06:08 PM
Facebook Telegram Linkin
ហ្វីលីពីនមើលមិនឃើញផល​ប៉ះពាល់ដល់​ចំណងការពារជាតិ ដោយសារការ​​បញ្ជូន​កម្លាំង​របស់អាមេរិក​ទៅ​មជ្ឈិមបូព៌ាទេ​
08/18/2026 06:08 PM
Facebook Telegram Linkin
រដ្ឋមន្ត្រីការបរទេសចិន នឹងបំពេញទស្សនកិច្ចរយៈពេល ២ថ្ងៃ នៅកូរ៉េខាងត្បូង
08/18/2026 06:08 PM
Facebook Telegram Linkin
រដ្ឋមន្ត្រីការបរទេសអ៊ីរ៉ាក់ និងអ៊ីរ៉ង់ ពិភាក្សាតាមទូរស័ព្ទអំពីការវាយប្រហារដោយដ្រូនលើការិយាល័យមេដឹកនាំឃើដ
08/18/2026 06:08 PM
Facebook Telegram Linkin
ក្រុមហ៊ូទីអះអាងថា ខ្លួនបានធ្វើការវាយប្រហារថ្មីដោយដ្រូនទៅលើរោងចក្រចម្រាញ់ប្រេងរបស់អារ៉ាប៊ីសាអ៊ូឌីត
08/18/2026 06:08 PM
Facebook Telegram Linkin
លោក Lavrov បញ្ជាក់​ថា រុស្ស៊ី និងកូរ៉េខាងជើង គាំទ្រ​ឱ្យមាន​សណ្តាប់ធ្នាប់ពិភពលោកពហុប៉ូលថ្មី
08/18/2026 06:08 PM
Facebook Telegram Linkin
កូស្តារីកាជម្លៀសពលរដ្ឋចេញ ក្រោយទឹកជំនន់វាយប្រហារខេត្ត Limon និងតំបន់ផ្សេងទៀត
08/18/2026 06:08 PM
Facebook Telegram Linkin
ជប៉ុននឹងសាកល្បងមីស៊ីលល្បឿនលឿនជាងសំឡេង នៅ​អូស្ត្រាលី ក្រោមកិច្ចព្រមព្រៀងថ្មី
08/18/2026 06:08 PM
Facebook Telegram Linkin
ក្រុមហ៊ុន TH Automotive Manufacturing Co., Ltd​ នឹង​សម្ពោធជាផ្លូវការ​ រោងចក្រផ្គុំ និងដំឡើងរថយន្តរបស់ខ្លួន​នៅកម្ពុជា​ ក្នុងឆ្នាំ២០២៦នេះ
08/18/2026 06:08 PM
Facebook Telegram Linkin
ភ្លៀងធ្លាក់ខ្លាំងបង្កការជន់លិចផ្ទះសម្បែង និងដងផ្លូវនៅរដ្ឋធានី Lima របស់ប្រទេសប៉េរូ
08/18/2026 06:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.