នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ក្រុមហ៊ុន TH Automotive Manufacturing Co., Ltd​ នឹង​សម្ពោធជាផ្លូវការ​ រោងចក្រផ្គុំ និងដំឡើងរថយន្តរបស់ខ្លួន​នៅកម្ពុជា​ ក្នុងឆ្នាំ២០២៦នេះ
ប្រធានគណៈកម្មាធិការគណបក្សខេត្តតាកែវ ណែនាំសមាជិកមូលដ្ឋានឱ្យយកចិត្ត​ទុកដាក់​បម្រើ​ពលរដ្ឋ
សម្ដេចតេជោ ណែនាំឱ្យដាក់បេក្ខភាពស្រ្ដីជាប់ឆ្នោតយ៉ាងតិចមួយឃុំមួយរូប និងមានស្ត្រីធ្វើស្មៀនឃុំ
សម្ដេចតេជោស្នើស្ថាប័នពាក់ព័ន្ធចាត់វិធានការភ្លាមៗចំពោះអ្នកប្រព្រឹត្តទង្វើអសីលធម៌លើបណ្ដាញសង្គម

នយោបាយ​ និង ការអភិវឌ្ឍន៍

អាជ្ញាធរ និងពលរដ្ឋនៅតាមបណ្ដោយសណ្ដស្ទឹងព្រែកត្នោត ត្រៀមលក្ខណៈរួចរាល់ ដើម្បីគេចចេញពីគ្រោះទឹកជំនន់

2023/08/01 10:29:21 pm        1191
Facebook Telegram Linkin
ភ្នំពេញ៖ អាជ្ញាធរ និងប្រជាពលរដ្ឋរស់នៅ ខណ្ឌដង្កោ រាជធានីភ្នំពេញ បានត្រៀមលក្ខណៈរួចរាល់ ដើម្បីគេចចេញពីគ្រោះទឹកជំនន់ពីខេត្តកំពង់ស្ពឺ ហូរចូលក្នុងស្ទឹងព្រែកត្នោត។បើតាមលោកស្រី សឿង សេរី ចៅសង្កាត់ដង្កោ នៅថ្ងៃទី១ ខែសីហានេះ ​បានប្រាប់BTVថា ការត្រៀមលក្ខណៈទុកជាមុននោះមានដូចជា៖ កម្លាំងប្រជាការពារភូមិ ​ប៉ាវសម្រាប់ទប់ទឹក និង​សម្ភារៈផ្សេងៗទៀតជាដើម។ ​ក្នុងករណីអាជ្ញាធរសង្កាត់មិនអាចគ្រប់គ្រងស្ថានការណ៍បាន នឹងរាយការណ៍ទៅថ្នាក់លើដើម្បីជួយអន្តរគមន៍។ លើសពីនេះ លោកស្រីចៅសង្កាត់បានក្រើនរំលឹកដល់ប្រជាពលរដ្ឋរស់នៅតាមដងស្ទឹងព្រែក​ត្នោត​ត្រូវមានការប្រុងប្រយ័ត្នទុកជាមុន ​បើទោះបីពេលនេះទឹកស្ទឹងព្រែកត្នោតមិនទាន់បង្កជាបញ្ហាក្តី។ប្រជាពលរដ្ឋ បានលើកឡើងដែរថា ​ជា​ទម្លាប់​ក្នុង​រដូវវស្សាទឹកស្ទឹងព្រែកត្នោត​តែងតែ​ឡើង ហើយ​ដើម្បីការពារកុំឲ្យខូចខាតទ្រព្យសម្បត្តិក្នុងផ្ទះ​ គឺពួកយើងបានត្រៀមលក្ខណៈរួចរាល់ ​ពោលដូចជា៖រៀបចំ​សម្ភារៈទុកដាក់លើធ្នើ និង​ឧស្សាហ៍ងើបមើលទឹកស្ទឹង ​ប្រសិនបើទឹកឡើងធំ នឹងប្រញាប់​ទៅ​ទីទួលមានសុវត្ថិភាព ​និងរាយការណ៍ទៅអាជ្ញាធរមូលដ្ឋានផងដែរ។ក្នុងរយៈពេលប៉ុន្មានថ្ងៃមកនេះ ​ប្រទេសកម្ពុជា ​បានរងឥទ្ធិពលព្យុះទី៥ ឈ្មោះដុកស៊ូរី បង្កឱ្យ​មានភ្លៀងធ្លាក់​នៅស្ទើរទូទាំងប្រទេស​ ក្នុងនោះក៏​មានខេត្តកំពង់ស្ពឺផងដែរ។ ហើយទឹកជំនន់នៅខេត្តកំពង់ស្ពឺ​ហូរចូលស្ទឹកព្រែកត្នោត អាចបង្កផលប៉ះពាល់ដល់ប្រជាពលរដ្ឋរស់​នៅតាមបណ្ដោយសណ្ដរស្ទឹង។​ យ៉ាងណាក្តី គិតមកដល់ពេលនេះ ​ទឹកស្ទឹកព្រែកត្នោត មិនទាន់ឡើងខ្លាំង​ក្លាយជាជំនន់នោះទេ៕ អត្ថបទ៖ទូច សោភ័ណ

ក្រុមការងារកាកបាទក្រហមកម្ពុជា ពិនិត្យទីតាំងសាងសង់ផ្ទះថ្មីចំនួន២ខ្នង ជូនពលរដ្ឋងាយរងគ្រោះ

2023/08/01 10:11:11 pm        136
Facebook Telegram Linkin
កំពង់ឆ្នាំង៖ អនុវត្តតាមអនុសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន នៅថ្ងៃទី១ ខែសីហា ឆ្នាំ២០២៣នេះ ក្រុមការងារកាកបាទក្រហមកម្ពុជា ​ដឹកនាំដោយលោកជំទាវ ម៉ែន នារីសោភ័គ អគ្គលេខាធិការរងទី១ បានចុះពិនិត្យទីតាំងសាងសង់ផ្ទះថ្មីចំនួន ២ខ្នង ជា​ព្រះរាជអំណោយដ៏​ឧត្ដុង្គឧត្ដម​របស់ ហ្លួងម៉ែ នរោត្តម មុនិនាថ សីហនុ ព្រះប្រធានកិត្តិយស​កាកបាទក្រហមកម្ពុជា តាមរយៈសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទ​ក្រហមកម្ពុជា ជូនដល់ប្រជារាស្ត្រងាយរងគ្រោះបំផុតចំនួន ២គ្រួសារ រស់នៅភូមិវាលស្បូវ ឃុំតាំងក្រសាំង ស្រុកទឹកផុស ខេត្តកំពង់ឆ្នាំង។ជនងាយរងគ្រោះបំផុតទាំង ២គ្រួសារ ដែលទទួលផ្ទះរួមមាន ៖ ១. លោកយាយ គ្រែក ហ៊ី អាយុ ៧៥ឆ្នាំ ជាចាស់ឥតទីពឹង។ ២. អ្នកស្រី ឡឹម ញ៉ឹប អាយុ ៤៧ឆ្នាំ ជាស្ត្រីមេម៉ាយ មានកូន ៣នាក់ក្នុងបន្ទុក។តាមការបញ្ជាក់របស់លោកជំទាវ ម៉ែន នារីសោភ័គ បានឱ្យដឹងថា ​កាកបាទក្រហមកម្ពុជា បាន​ទទួលនូវព្រះរាជូបត្ថម្ភពីសម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ព្រះប្រធានកិត្តិយសកាកបាទក្រហមកម្ពុជា ​នៅក្នុងឱកាសព្រះរាជពិធីបុណ្យ​ចម្រើន​ព្រះជន្ម​របស់ព្រះអង្គ កាលពីថ្ងៃទី ១៨ ខែមិថុនា ឆ្នាំ២០២៣។ បន្ទាប់ពីបានទទួលព្រះរាជូបត្ថម្ភនេះ ​សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្តល់​អនុសាសន៍​ដល់មន្ត្រីក្រោមឱវាទចុះពិនិត្យមើលទីតាំងណា​ដែល​សមស្រប គ្រួសារណាដែលជាមុខសញ្ញាងាយរងគ្រោះបំផុតរបស់កាកបាទក្រហមកម្ពុជា ដើម្បីសាងសង់ផ្ទះជូនឱ្យបានសមរម្យ។ ជាក់ស្តែង បេសកកម្មក្នុងថ្ងៃនេះ គឺក្រុមការងារ បានចុះមកពិនិត្យស្ថានភាពជាក់ស្តែងរួចហើយ ហើយដែលក្រុមជាងសាងសង់ផ្ទះនឹងចុះមកសាងសង់ឱ្យបានឆាប់ៗ ទៅតាមអនុសាសន៍របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន៕

រដ្ឋមន្ត្រីការងារលើកទឹកចិត្តនិស្សិតដែលសិក្សានៅក្រៅប្រទេស ចូលរួមលើកកម្ពស់កិត្តិយសជាតិ

2023/08/01 10:00:04 pm        195
Facebook Telegram Linkin
ភ្នំពេញ៖ ឯកឧត្តមបណ្ឌិត អ៊ិត សំហេង រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានលើក​ទឹកចិត្ត​ដល់ក្រុមនិស្សិតកម្ពុជា​ដែលទៅសិក្សានៅក្រៅប្រទេស ឬទទួលបានអាហារូបករណ៍ទៅសិក្សានៅក្រៅប្រទេស សូមចូលរួមលើកកម្ពស់កិត្តិយសជាតិកម្ពុជា ពង្រឹងសាមគ្គីជាមួយគ្នា ​ពិសេសត្រូវខិតខំសិក្សាយកចំណេះជំនាញ ដើម្បីវិលមកបម្រើប្រទេស​ជាតិវិញ​ឱ្យកាន់តែរីកចម្រើនទៅមុខ។ក្នុងឱកាសជួបសំណេះសំណាល និងផ្ដល់អនុសាសន៍ណែនាំដល់ក្រុមនិស្សិតកម្ពុជា ​២៤នាក់ ដែល​ទទួលអាហារូបករណ៍ពីរដ្ឋាភិបាលជប៉ុន នៅព្រឹកថ្ងៃទី១ ខែសីហា ឆ្នាំ២០២៣នេះ ​ឯកឧត្តមរដ្ឋមន្ត្រី បានណែនាំដល់ក្រុមនិស្សិតទាំងអស់ ​សូមជួយផ្សព្វផ្សាយពីស្ថានភាពនយោបាយ ស្ថិរភាព​នយោបាយ​ការអភិវឌ្ឍ ​ការខិតខំប្រឹងប្រែងរបស់ថ្នាក់ដឹកនាំរាជរដ្ឋាភិបាល​នៅក្នុងប្រទេស​ទៅដល់អ្នក​ទៅសិក្សាមុនៗ ​និងប្រជាជនដែលរស់នៅធ្វើការនៅទីនោះ។ ឯកឧត្តម បានលើកឡើងពីគោលនយោបាយអភិវឌ្ឍន៍ជាតិ និងបទពិសោធន៍ជាច្រើនជូនក្រុម​និស្សិត​ខាងលើ ពិសេសគឺគោលនយោបាយជាតិ ឆ្នាំ២០៣០ កម្ពុជាក្លាយជាប្រទេសមានចំណូល​មធ្យមកម្រិតខ្ពស់ និងឆ្នាំ២០៥០ កម្ពុជាក្លាយជាប្រទេសមានចំណូលកម្រិតខ្ពស់។ ​ត្រង់ចំណុចនេះ ឯកឧត្តម​ បានណែនាំដល់ទៀតថា ​នៅពេលក្លាយជាអ្នកដឹកនាំបន្តវេនជំនាន់ក្រោយ ក៏ត្រូវគិតគូរពីគោល​នយោបាយ​ទាំងនេះផងដែរ។តាមរបាយការណ៍របស់​លោក ចេង គឹមអូន ប្រធានប្រតិភូនិស្សិតកម្ពុជាដែលទទួលអាហារូបករណ៍​ពីរដ្ឋាភិបាលជប៉ុនឆ្នាំ២០២៣ ​បានឱ្យដឹងថា ក្នុងចំណោមនិស្សិតទាំង២៤នាក់នេះ គឺជាមន្ត្រីរាជ​ការថ្នាក់​ជាតិ និងថ្នាក់ក្រោមជាតិសរុប ១៤ស្ថាប័ន។ មុខជំនាញដែលត្រូវសិក្សានោះរួមមាន ៨ជំនាញ៖ ១-អភិវឌ្ឍន៍ហេដ្ឋាន​រចនាសម្ពន្ធ ២-អភិវឌ្ឍន៍វិស័យឯកជន ៣-លើកកម្ពស់គុណអប់រំ ៤-អភិវឌ្ឍន៍កសិកម្ម និងអភិវឌ្ឍន៍ជនបទ ៥-លើកកម្ពស់បរិស្ថានរស់នៅទីក្រុង ៦-លើកម្ពស់​ប្រព័ន្ធថែទាំ​សុខភាព និងសន្តិសុខសង្គម ៧-លើកកម្ពស់មុខងាររដ្ឋបាលសាធារណៈ និង៨-កសាងទំនាក់ទំនងអន្តរជាតិ។អាហារូបករណ៍របស់រដ្ឋាភិបាលជប៉ុនសម្រាប់មន្ត្រីរាជការកម្ពុជានេះ ​គឺជាគម្រោងជំនួយឥតសំណង​ដែលត្រូវបានអនុវត្តចាប់តាំងពីឆ្នាំ២០០០ ​មកដល់ពេលបច្ចុប្បន៍មាន​និស្សិត​កម្ពុជា​ជាង៥០០នាក់​ហើយដែលបានទទួលអាហារូបករណ៍នេះ។ កម្មវិធីនេះ ផ្ដោតលើទំនាក់ទំនងកិច្ចសហប្រតិបត្តិការទ្វេភាគីកម្ពុជា-ជប៉ុន​ ការអភិវឌ្ឍសមត្ថភាព​មន្ត្រី​រាជការ ​ការចូលរួមអភិវឌ្ឍន៍ ​និងបង្កើតផែនការអភិវឌ្ឍសេដ្ឋកិច្ច/សង្គម ស្របតាម​គោលនយោបាយរបស់រាជរដ្ឋាភិបាលកម្ពុជា៕

អ្នកគាំទ្រ និយាយលាទាំងទឹកភ្នែក ចំពោះតារាចម្រៀងប៉ុប Coco Lee ក្នុងពិធីបុណ្យសព នៅហុងកុង

2023/08/01 09:49:27 pm        121
Facebook Telegram Linkin
ចិន៖ ក្រុមមនុស្ស ដែលមានទឹកភ្នែករលីងរលោង បាននិយាយលាទៅកាន់សពតារាចម្រៀង និងអ្នកនិពន្ធបទចម្រៀង Coco Lee នៅថ្ងៃអង្គារ (ទី១ ខែសីហា) ខណៈដែលពិធីបុណ្យសព ត្រូវបានធ្វើប្រារព្ធឡើង នៅភាគខាងកើតទីក្រុងហុងកុង ដើម្បីជូនដំណើរតារាដ៏ល្បីឈ្មោះ ដែលបានទទួលមរណភាព ក្នុងវ័យ ៤៨ឆ្នាំបន្ទាប់ពីប្រកបអាជីពលើវិថីសិល្បៈចម្រៀងអស់រយៈពេល ៣ទសវត្សរ៍។អ្នកគាំទ្រ ដែលជាច្រើននាក់បានស្លៀកពាក់ពណ៌ខ្មៅ បានស្រែកថា «លាហើយ Coco!» ហើយសូមជូនពរឲ្យធ្វើដំណើរទៅទីស្ងប់សុខ ខណៈដែលឡានដឹកក្តារមឈូសរបស់នាង បានរំកិលចេញពីអគារ បន្ទាប់ពីរៀបចំពិធីរួចរាល់ នៅខាងក្នុងនោះ។ក្នុងចំណោមអ្នកដែលមានវត្តមាននោះ បុរសម្នាក់ឈ្មោះ ចាវ ផឹង (Zhao Peng) ដែលជាអ្នកគាំទ្ររបស់លោកស្រី Lee តាំងពីវ័យ ៥ឆ្នាំមកម្ល៉េះនោះ បាននិយាយថា «ពិតជាពិបាកទ្រាំណាស់ ដែលឃើញគាត់ (លោកស្រី Coco Lee) ចាកចេញដោយគ្មានថ្ងៃត្រឡប់បែបនេះ»។ អ្នកស្រុកប៉េកាំងដែលពោរពេញដោយអារម្មណ៍រំជួលចិត្តរូបនេះ បានបន្ថែមថា លោកមិនសប្បាយចិត្តសោះឡើយ ដែលនឹងមិនអាចមើលការសម្ដែងរបស់តារាចម្រៀងប៉ុបអាមេរិកដើមកំណើតហុងកុងជារៀងរហូត។សូមបញ្ជាក់ថា បងប្អូនស្រី ២នាក់របស់សព បានសរសេរបង្ហោះនៅលើបណ្ដាញសង្គម Facebook ថា អ្នកចម្រៀង Lee បានប្រឹងតស៊ូជាមួយនឹងជំងឺធ្លាក់ទឹកចិត្ត ហើយក៏បានបាត់បង់ជីវិត នៅថ្ងៃទី៥ ខែកក្កដា បន្ទាប់ប៉ុនប៉ងធ្វើអត្តឃាត នៅ ៣ថ្ងៃមុននោះ។ ក្នុងចំណោមការសម្ដែងដែលគួរឲ្យកត់សម្គាល់បំផុតរបស់លោកស្រី Lee គឺការសម្ដែងជាតួអ្នកចម្បាំងស្រី Mulan និងការសម្ដែង ក្នុងបទចម្រៀងដែលទទួលបានពានរង្វាន់អូស្ការ «A Love Before Time» ដកស្រង់ពីភាពយន្ត «Crouching Tiger និង Hidden Dragon»៕

ជប៉ុន និងចិនប្រកែកគ្នាអំពីផែនការបង្ហូរសំណល់ទឹក ហ៊្វូគូស៊ីម៉ា នៅក្នុងកិច្ចប្រជុំត្រៀមត្រួតពិនិត្យឡើងវិញការមិនរីកសាយអាវុធនុយក្លេអ៊ែរឬ NPT

2023/08/01 09:45:36 pm        153
Facebook Telegram Linkin
ជប៉ុន៖ ជប៉ុន និងចិនបានប៉ះពាក្យសំដីគ្នាក្នុងសន្និសីទអន្តរជាតិនៅទីក្រុងវីយែន ប្រទេសអូទ្រីស ជុំវិញផែនការរបស់ជប៉ុនក្នុងការបញ្ចេញសំណល់ទឹកនុយក្លេអ៊ែរដែលត្រូវបានធ្វើប្រព្រឹត្តកម្មរួច និងសម្លាប់មេរោគចេញពីរោងចក្រថាមពលនុយក្លេអ៊ែរ ហ្វ៊ូគូស៊ីម៉ា ដៃអ៊ីឈី ចូលទៅក្នុងមហាសមុទ្រ។ ការលើកសក្ខីកម្មនេះ បានផ្ទុះឡើងកាលពីថ្ងៃចន្ទ ចំថ្ងៃបើកនៃកិច្ចប្រជុំគណៈកម្មាធិការត្រៀមសន្និសីទត្រួតពិនិត្យឡើងវិញឆ្នាំ២០២៦នៃសន្ធិសញ្ញាមិនរីកសាយអាវុធនុយក្លេអ៊ែរ (NPT) ឆ្នាំ២០២៦ ។តំណាងរបស់ប្រទេសចិនបានសម្តែងការប្រឆាំងនឹងផែនការរបស់ប្រទេសជប៉ុនក្នុងការបញ្ចេញសំណល់ទឹកដែលបានធ្វើប្រព្រឹត្តកម្មរួចចេញពីរោងចក្រ ហ៊្វូគូស៊ីម៉ា ដោយហៅសំណល់ទឹកនោះថា "ជាទឹកកខ្វក់"។ តំណាងជប៉ុនលោក Hikihara Takeshi បានបដិសេធការអះអាងរបស់ចិន ហើយបានសម្តែងការព្រួយបារម្ភជុំវិញការចោទប្រកាន់នេះ។ឯកអគ្គរដ្ឋទូតលោក Hikihara បានពន្យល់អំពីខ្លឹមសារនៃរបាយការណ៍ដែលចេញផ្សាយនាពេលថ្មីៗនេះ ដោយទីភ្នាក់ងារថាមពលបរមាណូអន្តរជាតិ ដែលបានរកឃើញថា ផែនការបញ្ចេញទឹកចូលក្នុងសមុទ្រនេះ "ស្របតាមស្តង់ដារសុវត្ថិភាពអន្តរជាតិ"។ តំណាងចិនបានបន្តទទូចថា ផែនការនេះបានបំពានលើសន្ធិសញ្ញាអន្តរជាតិ។ ជាការឆ្លើយតបទៅវិញ លោក Hikihara បានចង្អុលបង្ហាញពីគ្រោះថ្នាក់នៃការបង្កើនការសង្ស័យដែលខ្វះភស្តុតាងវិទ្យាសាស្រ្ត។រដ្ឋាភិបាលជប៉ុនគ្រោងនឹងសម្លាប់មេរោគទឹកដែលបានធ្វើប្រព្រឹត្តកម្មរួច ប្រហែលមួយភាគប្រាំពីរនៃគោលការណ៍ណែនាំរបស់អង្គការសុខភាពពិភពលោកសម្រាប់គុណភាពទឹកផឹក មុនពេលបង្ហូរទឹកនោះទៅក្នុងសមុទ្រ ហើយគ្រោងនឹងចាប់ផ្តើមប្រតិបត្តិការនៅពេលណាមួយក្នុងរដូវក្តៅនេះ៕

ឯកឧត្តម គន់ គីម៖ ប៉ុន្មានថ្ងៃចុងក្រោយនេះខេត្តចំនួន៩ ជួបបញ្ហាជំនន់ទឹកភ្លៀងតែមិនធ្ងន់ធ្ងរ

2023/08/01 09:44:47 pm        373
Facebook Telegram Linkin
ភ្នំពេញ៖ ឯកឧត្តមទេសរដ្ឋមន្ត្រីកិត្តិសង្គហបណ្ឌិត គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាយ បានថ្លែងថា នារយៈពេលប៉ុន្មានថ្ងៃចុងក្រោយនេះ មានគ្រោះទឹកជំនន់ដោយសារទឹកភ្លៀងកើតឡើង ក្នុងខេត្តចំនួន៩ ប៉ុន្តែគ្មានផលប៉ះពាល់ និងខូចខាតធ្ងន់ធ្ងរនោះទេ។ ឯកឧត្តមទេសរដ្ឋមន្ត្រី មានប្រសាសន៍ប្រាប់ BTV នៅថ្ងៃទី១ ខែសីហា ឆ្នាំ២០២៣នេះថា ខេត្តជួបបញ្ហាជំនន់ទឹកភ្លៀង មានខេត្តកំពង់ស្ពឺ កោះកុង កែប កំពត ព្រះសីហនុ មណ្ឌលគិរី រតនគិរី ព្រះវិហារ និងសៀមរាប មានស្លាប់នៅកំពត ដោយសារទៅបោះតង់កន្លែងប្រឈមទឹកជន់ខ្លាំង ។ឆ្លើយតបនឹងបញ្ហានេះ គណៈកម្មាធិការគ្រប់គ្រងគ្រោះមហន្តរាយថ្នាក់ជាតិ និងខេត្តបានចាត់មន្ត្រី​ចុះពិនិត្យ ចែកជំនួយនៅទីតាំងខ្លះ និងតាមដានសភាពការណ៍ជាប្រចាំ ។ឯកឧត្តម បានបញ្ជាក់ថា គិតត្រឹមព្រឹកថ្ងៃទី១ ខែសីហានេះ ​ទឹកបានស្រកទៅវិញនៅខេត្តជាច្រើន នៅតែស្រុកភ្នំក្រវាញ ខេត្តពោធិ៍សាត់ និងស្ទឹងព្រែកត្នោត ខេត្តកំពង់ស្ពឺ ដែលទឹកនៅទ្រឹង និងកន្លែងខ្លះទៀត ចាប់ផ្តើមស្រកវិញ ​ហើយតាមការព្យាករណ៍នឹងមិនមានភ្លៀងច្រើនទៀតទេ ។គួរបញ្ជាក់ថា ​នារយៈពេលប៉ុន្មានថ្ងៃនេះ​ ជំនន់ទឹកភ្លៀង ​បានប៉ះពាល់ប្រជាពលរដ្ឋជាច្រើន​ពាន់​គ្រួសារ លិចលង់​ផ្ទះមួយចំនួន ហើយតំបន់ខ្លះក៏មានការ​ជម្លៀស​ពលរដ្ឋទៅកាន់ទីទួលសុវត្ថិភាព​ផងដែរ ៕ អត្ថបទ បាន សុខរិទ្ធិ

សហភាពអឺរ៉ុប នឹងពង្រឹងសន្តិសុខដែនសមុទ្រជាមួយប្រទេសហ្វីលីពិន

2023/08/01 09:38:48 pm        116
Facebook Telegram Linkin
អឺរ៉ុប៖ ប្រធានគណៈកម្មាធិការអឺរ៉ុប លោកស្រី von der Leyen បាននិយាយថាសហភាពអឺរ៉ុបត្រៀមជាស្រេចដើម្បីពង្រឹងកិច្ចសហប្រតិការជាមួយប្រទេសហ្វីលីពីនលើសន្តិសុខដែនសមុទ្រ។ លោកស្រី Von der Leyen បានជួបជាមួយប្រធានាធិបតីហ្វីលីពីន លោក Ferdinand Marcos Jr ក្នុងទីក្រុងម៉ានីលកាលពីថ្ងៃចន្ទ។ វាជាដំណើរទស្សនកិច្ចលើកដំបូង ធ្វើឡើងដោយប្រធាគណៈកម្មាធិការអឺរ៉ុបទៅកាន់ប្រទេសនៅអាស៊ីអាគ្នេយ៍មួយនេះ។ នៅក្នុងសន្និសីទសារព័ត៌មានបន្ទាប់ពីជំនួប លោកស្រី Von der Leyen និយាយថា គ្មានការគំរាមនៃការប្រើអំណាចនៅតំបន់ឥណ្ឌូ-ប៉ាស៊ីហ្វិក គឺជាបញ្ហាសំខាន់ចំពោះស្ថិរភាពរបស់យើង សន្តិភាពរបស់យើង និងភាពរុងរឿងនៃប្រជាជនរបស់យើង។ ដោយគ្មានឈ្មោះប្រទេសចិន លោកស្រី Von der Leyen បានគាំទ្រប្រទេសហ្វីលីពីន និងបញ្ជាក់ពីការទទួលស្គាល់របស់សហភាពអឺរ៉ុបថា រង្វាន់ឆ្នាំ២០១៦ របស់តុលាការអាជ្ញាកណ្តាល លើសមុទ្រចិនខាងត្បូងគ្របដណ្តប់ដោយស្របច្បាប់ដែលតុលាការបានផ្តល់មូលដ្ឋានសម្រាប់ការដោះស្រាយជម្លោះដោយសន្តិវិធីរវាងភាគីទាំងអស់។  លោកស្រី និយាយថា សហភាពអឺរ៉ុប ត្រៀមខ្លួនដើម្បីពង្រឹងកិច្ចសហប្រតិបត្តិការជាមួយទីក្រុងម៉ានីល លើសន្តិសុខដែនសមុទ្រ ដោយចែករំលែកព័ត៌មាន និងកសាងសមត្ថភាពរបស់ឆ្មាំសមុទ្រប្រទេសហ្វីលីពីន។ លោក Marcos បានឆ្លើយតបដោយនិយាយថា ប្រទេសហ្វីលីពីន និងសហភាពអឺរ៉ុប គឺជាដៃគូមានចិត្តដូចគ្នា តាមរយៈ តម្លៃលទ្ធិប្រជាធិបតេយ្យរួមគ្នា ភាពរុងរឿងប្រកបដោយនិរន្តរភាព និងពេញលេញ និតិរដ្ឋ សន្តិភាពនិងស្ថិរភាព និងសិទ្ធិមនុស្ស។ការគាំទ្ររបស់សហភាពអឺរ៉ុប សម្រាប់ប្រទេសហ្វីលីពីន លើបញ្ហាសមុទ្រចិនខាងត្បូង បន្ទាប់ពីមានការគាំទ្រស្រដៀងគ្នានេះដោយសហរដ្ឋអាមេរិក និងប្រទេសជប៉ុន។

ការវិភាគ៖ការកើនឡើងនៃកងកម្លាំងអាមេរិកនៅឈូងសមុទ្រពែក្សជាសញ្ញាថ្មីនៃជម្លោះរវាងអាមេរិក និងអ៊ីរ៉ង់កាន់តែអាក្រក់ទៅៗ

2023/08/01 09:36:13 pm        134
Facebook Telegram Linkin
អាមេរិក-អ៊ីរ៉ង់៖ ទាហានម៉ារីនរាប់ពាន់នាក់ដែលគាំទ្រដោយយន្តហោះចម្បាំង និងនាវាចម្បាំងទំនើបៗរបស់សហរដ្ឋអាមេរិក កំពុងបង្កើតវត្តមានបន្តិចម្តងៗនៅក្នុងឈូងសមុទ្រពែក្ស។ វាជាសញ្ញាមួយបង្ហាញថា ខណៈពេលដែលសង្រ្គាមរបស់អាមេរិកនៅក្នុងតំបន់ អាចនឹងត្រូវបញ្ចប់ ជម្លោះរបស់ខ្លួនជាមួយប្រទេសអ៊ីរ៉ង់ជុំវិញការពន្លឿនកម្មវិធីនុយក្លេអ៊ែររបស់ខ្លួន នៅតែបន្តកាន់តែអាក្រក់ទៅៗ ដោយគ្មានដំណោះស្រាយដែលអាចមើលឃើញឡើយ។ ការបញ្ជូនទ័ព និងយន្តហោះ USS Bataan ទៅកាន់ឈូងសមុទ្រ រួមជាមួយនឹងយន្តហោះចម្បាំងបំបាំងកាយ F-35 និងយន្តហោះចម្បាំងផ្សេងទៀត បានកើតឡើង នៅពេលដែលអាមេរិក ចង់ផ្តោតលើប្រទេសចិននិងរុស្ស៊ី។ប៉ុន្តែទីក្រុងវ៉ាស៊ីនតោន កំពុងមើលឃើញជាថ្មីម្តងទៀតថា ខណៈពេលដែលវាងាយស្រួលក្នុងការចូលទៅក្នុងតំបន់មជ្ឈិមបូព៌ា វាជាការលំបាកក្នុងការទទួលបានពេញលេញ ជាពិសេស នៅពេលដែលប្រទេសអ៊ីរ៉ង់បានបង្កើនសារធាតុអ៊ុយរ៉ានីញ៉ូមកាន់តែជិតដល់កម្រិតអាវុធដែលមិនធ្លាប់មាន បន្ទាប់ពីការបរាជ័យនៃកិច្ចព្រមព្រៀងនុយក្លេអ៊ែរឆ្នាំ២០១៥ របស់ខ្លួនជាមួយក្រុមមហាអំណាចពិភពលោក។ ពុំមានសញ្ញាណាមួយដែលថា ការទូតនឹងធ្វើឲ្យកិច្ចព្រមព្រៀងនេះរស់ឡើងវិញ ក្នុងពេលឆាប់ៗនេះទេ ហើយអ៊ីរ៉ង់ក្នុងប៉ុន្មានសប្តាហ៍ថ្មីៗនេះ បានបន្តការយាយី និងការរឹបអូសនាវាដែលព្យាយាមឆ្លងកាត់ច្រក សមុទ្រHormuz ។ ប្រហែល២០ភាគរយនៃប្រេងរបស់ពិភពលោកឆ្លងកាត់ផ្លូវទឹកតូចចង្អៀត ដែលតភ្ជាប់ឈូងសមុទ្រពែក្សទៅកាន់ពិភពលោកដ៏ទូលំទូលាយ៕

សង្គ្រាមកើតឡើងដល់អាជីវកម្មរុស្ស៊ី បន្ទាប់យានដ្រូនវាយប្រហារលើមជ្ឈមណ្ឌលពាណិជ្ជកម្មក្រុងមូស្គូ

2023/08/01 09:32:59 pm        149
Facebook Telegram Linkin
រុស្ស៊ី៖ ការដាក់ទណ្ឌកម្មសេដ្ឋកិច្ច គឺជាការឈឺក្បាលធំបំផុតសម្រាប់ជម្រើសពាណិជ្ជកម្មរបស់រុស្ស៊ី ចាប់តាំងពីការចាប់ផ្តើមសង្គ្រាមក្នុងប្រទេសអ៊ុយក្រែន ប៉ុន្តែការវាយប្រហារដោយយានដ្រូននៅចំបេះដូងមជ្ឈមណ្ឌលពាណិជ្ជកម្មរបស់ទីក្រុងមូស្គូ កំពុងបង្ខំឲ្យក្រុមហ៊ុនជាច្រើនគិតអំពីសុវត្ថិភាពបុគ្គលិករបស់ពួកគេ។ ការផ្ទុះមួយកាលពីព្រឹកថ្ងៃអាទិត្យបានធ្វើឲ្យរង្គើតំបន់ពាណិជ្ជកម្ម Moskva-Citi មានចម្ងាយតែប៉ុន្មានម៉ាយស៍ភាគខាងលិចវិមានក្រឹមឡាំង និងជាទីតាំងអគារកប់ពពកជាច្រើនខ្នង ជាអ្វីដែលក្រសួងការពារជាតិរុស្ស៊ី និយាយថា ជាការវាយប្រហារដោយយានដ្រូនអ៊ុយក្រែនដ៏មហន្តរាយ ដែលជាលើកទី២ ក្នុងមួយសប្តាហ៍។ គ្មាននណាម្នាក់រងរបួស និងមានការបំផ្លាញតិចតួចប៉ុណ្ណោះ ប៉ុន្តែការវាយប្រហារបែបនេះគឺជាការលំបាកសម្រាប់អាជ្ញាធរដែលបានប្រាប់សាធារណជនថា រុស្ស៊ីមានការគ្រប់គ្រងពេញលេញនូវអ្វីដែលពួកគេហៅថា ជា ប្រតិបត្តិការសឹកពិសេស ក្នុងប្រទេសអ៊ុយក្រែន។  ក្រុមហ៊ុនជាច្រើន នៅក្នុងប្រទេសរុស្ស៊ី បន្តអនុញ្ញាតឲ្យបុគ្គលិកធ្វើការតាមរបៀបចម្រុះរវាងការធ្វើការពីផ្ទះ និងនៅការិយាល័យ បន្ទាប់ពីការបិទផ្ទប់ដែលបានដាក់ក្នុងអំឡុងការរាតត្បាតវីរុសកូរ៉ូណា។ អ្នកនាំពាក្យវិមានក្រឹមឡាំង លោក Dmitry Peskov និយាយកាលពិថ្ងៃចន្ទថា ការវាយប្រហាររបស់អ៊ុយក្រែន លើទីក្រុងមូស្គូ និងគោលដៅរុស្ស៊ីផ្សេងទៀត គឺជាសកម្មភាពគ្រោះថ្នាក់ខ្លាំង ហើយរុស្ស៊ី នឹងមានចំណាត់ការទាំងអស់ដែលអាចធ្វើទៅបានដើម្បីការពារការវាយប្រហារទាំងនេះ។  ជាធម្មតាទីក្រុងគីវ មិនបានអះអាងទទួលខុសត្រូវ សម្រាប់ឧបទ្ទវហេតុជាក់លាក់លើទឹកដីរបស់រុស្ស៊ីនេះទេ ហើយក៏ពុំបានអះអាងការវាយប្រហារចុងក្រោយនេះដែរ ទោះបីជាប្រធានាធិបតីលោក Volodymyr Zelenskiy និយាយថា សង្គ្រាមកំពុងវិលត្រឡប់ជាបណ្តើៗទៅលើទឹកដីរុស្ស៊ី ចូលទៅកាន់មជ្ឈមណ្ឌលជានិមិត្តរូបរបស់ប្រទេសនេះ៕

ឧទ្ធម្ភាគចក្រយោធា ផ្តល់ជំនួយដល់ជនរងគ្រោះដោយទឹកជំនន់នៅក្រុងប៉េកាំងខណៈភ្លៀងបន្តធ្លាក់

2023/08/01 09:30:00 pm        119
Facebook Telegram Linkin
ចិន៖ ប្រទេសចិន បានដាក់ពង្រាយឧទ្ធម្ភាគចក្រយោធានៅថ្ងៃអង្គារនេះ ដើម្បីផ្តល់ការផ្គត់ផ្គង់ ដល់អ្នកដំណើររថភ្លើងដែលជាប់គាំងដំណើរ នៅក្នុងទីក្រុងប៉េកាំង បន្ទាប់ពីព្យុះភ្លៀងដ៏កំណាចវាយបក់បំផ្លាញនៅក្នុងរដ្ឋធានីប្រទេសចិន។ព្យុះទីហ្វុង Doksuri ជាព្យុះកំណាចដែលបានកន្លងផុតទៅ បានវាយបក់មកឆ្ពោះទៅភាគខាងជើង លើប្រទេសចិន ចាប់តាំងពីថ្ងៃសុក្រ នៅពេលដែលព្យុះនេះ វាយប្រហារនៅខេត្ត Fujian ភាគខាងត្បូង បន្ទាប់ពីឆ្លងកាត់ប្រទេសហ្វីលីពីន។ ភ្លៀងធ្លាក់ខ្លាំងបានចាប់ផ្តើមខ្លាំងនៅទីក្រុងប៉េកាំង និងនៅតំបន់ជុំវិញកាលពីថ្ងៃសៅរ៍ ដោយស្ទើរតែមានកម្រិតភ្លៀងធ្លាក់ជាមធ្យមសម្រាប់ពេញមួយខែកក្កដា ដែលបានធ្លាក់មកលើរដ្ឋធានីប្រទេសចិន ។  មនុស្សយ៉ាងហោចណាស់២នាក់ បានស្លាប់ ដោយសារទឹកជំនន់ នៅក្នុងទីក្រុងប៉េកាំង កាលពីថ្ងៃចន្ទ ខណៈអ្នករងរបួស២នាក់ផ្សេងទៀត ត្រូវបានរាយការណ៍នៅខេត្ត Liaoning( លាវនីង) ភាគឦសានកាលពីចុងសប្តាហ៍។ប្រព័ន្ធផ្សព្វផ្សាយរដ្ឋ CCTV បានរាយការណ៍ថា នៅថ្ងៃអង្គារនេះអង្គភាពយោធាមានទាហាន២៦នាក់ និងឧទ្ធម្ភាគចក្រ៤គ្រឿង បានចាប់ផ្តើមបេសកកម្មសង្គ្រោះទម្លាក់ជំនួយតាមអាកាស ដើម្បីផ្តល់កញ្ចប់អាហារដល់មនុស្សរាប់រាប់នាក់ និងអាវរងាដល់អ្នកដែលជាប់ខ្លួននៅក្នុងនិងនៅជុំវិញស្ថានីយ៍រថភ្លើងក្នុងស្រុក Mentougou ដែលរងគ្រោះខ្លាំងបំផុតរបស់ទីក្រុងប៉េកាំង៕

បណ្ដាញសង្គម

ព័ត៌មានថ្មីៗ

ជនជាតិអាមេរិកប៉ាឡេស្ទីចំណាយពេលពេញមួយយប់ជាមួយគ្រួសារក្នុងផ្ទះដែលឡោមព័ទ្ធដោយក្រុមតាំងលំនៅនិគមន៍អ៊ីស្រាអែល
08/18/2026 09:08 PM
Facebook Telegram Linkin
កាតានិយាយថា កិច្ចព្រមព្រៀងច្រកសមុទ្រ Hormuz អាចនឹងជួយឲ្យវិលត្រឡប់ទៅរកកិច្ចប្រជុំអាមេរិក-អ៊ីរ៉ង់
08/18/2026 08:08 PM
Facebook Telegram Linkin
ប្រធានាធិបតីចិន លោក Xi ជំរុញកុំ​ឱ្យ​ «បំផ្លាញ» ឋានៈជា «តំបន់សន្តិភាព» របស់អាមេរិកឡាទីន
08/18/2026 08:08 PM
Facebook Telegram Linkin
បេសកជន៖ អាមេរិក​បារម្ភយ៉ាងខ្លាំង ចំពោះការវាយប្រហារតាមអាកាសរបស់អ៊ីស្រាអែលលើមូលដ្ឋានទ័ពអាកាសស៊ីរី
08/18/2026 08:08 PM
Facebook Telegram Linkin
មនុស្សយ៉ាង​តចិច​ ២៥នាក់ ត្រូវបានសម្លាប់ អំឡុង​ការវាយប្រហារនៅរដ្ឋ​ Plateau របស់នីហ្សេរីយ៉ា
08/18/2026 07:08 PM
Facebook Telegram Linkin
មនុស្ស ៣នាក់ រងរបួស ហើយអគាររងការខូចខាតក្នុងការរញ្ជួយដីនៅភាគខាងត្បូងអេស្ប៉ាញ
08/18/2026 07:08 PM
Facebook Telegram Linkin
ពលរដ្ឋរស់នៅទីក្រុងម៉ានីល ដើរលុកទឹកតាមផ្លូវ ស្របពេលភ្លៀងវស្សាវាយប្រហារដ្ឋធានីហ្វីលីពីនមួយនេះ
08/18/2026 07:08 PM
Facebook Telegram Linkin
ទឹកជំនន់បង្ខំឲ្យមនុស្សរាប់ម៉ឺននាក់ជម្លៀសខ្លួននៅរដ្ឋ Odisha និងរដ្ឋ Assam ប្រទេសឥណ្ឌា
08/18/2026 07:08 PM
Facebook Telegram Linkin
មនុស្សម្នាក់ស្លាប់ និងច្រើននាក់ទៀតជាប់ខ្លួន ក្រោយផ្ទះចាស់បាក់រលំនៅទីក្រុង Kolkata ប្រទេសឥណ្ឌា
08/18/2026 07:08 PM
Facebook Telegram Linkin
សាកសពជនអន្តោប្រវេសន៍ ៩នាក់ ត្រូវបានរកឃើញនៅជិតតំបន់ឆ្នេរភាគខាងកើតទីក្រុង Tripoli ប្រទេសលីប៊ី
08/18/2026 07:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.