នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឆមាសទី១ឆ្នាំនេះ កម្ពុជានាំចេញគ្រាប់ស្វាយចន្ទី មានទឹកប្រាក់ជាង ១,១ ពាន់លានដុល្លារ
មូលនិធិអភិវឌ្ឍន៍ EDFមើលឃើញថា ធុរកិច្ចបណ្តុះបណ្ដាលថ្មី និងSME ជាក្បា​ល​ម៉ាស៊ីន​ជំរុញ​កំណើន​សេដ្ឋកិច្ច​កម្ពុជា
លំហូរទឹកប្រាក់វិនិយោគចូលកម្ពុជានៅឆមាសទី១ ឆ្នាំ២០២៦ មាន ៤.៣ ប៊ីលានដុល្លារ កើនឡើង ៧ដង
កម្ពុជាមានរោងចក្រ-សហគ្រាសក្នុងវិស័យកម្មន្តសាលកំពុងដំណើរការ បានកើនដល់ ៤៧,៧ ពាន់

សេដ្ឋកិច្ច និង កសិកម្ម

រោងចក្រផលិតចំណីអាហារស្ដង់ដារមួយ ត្រូវបានបើកដំណើរការក្នុងខេត្តកំពត ដើម្បីកាត់បន្ថយការនាំចូល

2022/05/13 12:18:09 am        1078
Facebook Telegram Linkin
កំពត៖ រោងចក្រផលិតចំណីអាហារស្ដង់ដារមួយ ត្រូវបានបើកដំណើរការនៅថ្ងៃនេះ នៅខេត្តកំពត ដើម្បីជួយបំពេញនូវតម្រូវការប្រើប្រាស់របស់ប្រជាជនកម្ពុជា និងកាត់បន្ថយការនាំចូល។រោងចក្រផលិតចំណីអាហាស្តង់ដារដំបូងគេនៅកម្ពុជា របស់ក្រុមហ៊ុន ស៊ីភី ដែលមានទីតាំងនៅ​ក្នុងស្រុកជុំគីរី ខេត្តកំពត ត្រូវបានបើកដំណើរការនៅព្រឹកថ្ងៃទី១២ ខែឧសភានេះ ជាមួយនឹង​ការ​ប្ដេជ្ញា​ថា​នឹង​ជួយ​ផ្គត់ផ្គង់​តម្រូវការចំណីអាហារនៅកម្ពុជា​ឲ្យបានច្រើនបំផុតតាមដែលអាចធ្វើទៅបាន ដើម្បី​កាត់បន្ថយការនាំចូល។សម្តេចក្រឡាហោម ស ខេង នាយករដ្ឋមន្ត្រីស្តីទី នៃព្រះរាជាណាចក្រកម្ពុជា ដែលបានអញ្ជើញជា អធិបតីសម្ពោធបើកឱ្យដំណើរការរោងចក្រនេះ មានប្រសាសន៍ថា ប្រទេសកម្ពុជា ​ត្រូវការលើក​កម្ពស់​គុណភាពនៃការផលិតចំណីអាហារ ​ឲ្យមានដំណើរការល្អ ​ជាបន្តបន្ទាប់ ដើម្បីកាត់បន្ថយការ​នាំ​ចូលពីប្រទេសជិតខាង ​ហើយនឹងផ្តល់នូវផលិតផលដ៏មានគុណភាព​ជូនប្រជាជនកម្ពុជា ព្រោះ​កន្លងមក​ការ​ចិញ្ចឹម​ និង​ការផលិតចំណីអាហារ ​មិនទាន់អាចឆ្លើយតបទៅ​នឹងតម្រូវការនៅឡើយទេ។សម្ដេចក្រឡាហោម ​បានបញ្ជាក់ថា ក្នុងមួយឆ្នាំៗ មានការនាំចូលរាប់ពាន់តោន​នៃ​ចំណី​អាហារពី​ប្រទេសជិតខាង ​ដូច្នេះ​ទាមទារ​ជំរុញការផលិតបន្ថែម ។លោក វីតាយ៉ា គ្រាងគ្រីវីត (Wittaya Kreangkrivit) ក្រុមប្រឹក្សាភិបាលរងជាន់ខ្ពស់ ​នៃក្រុមហ៊ុន ស៊ី.ភី ខេមបូឌា ចំកាត់ បានឱ្យដឹងថា ក្រុមហ៊ុននេះ ​បានចំណាយទុន​៥លានដុល្លារ ក្នុងការវិនិយោគបង្កើត​រោងចក្រផលិតចំណីអាហារនេះ។ រោងចក្រនេះផ្ដល់ការងារ១០០កន្លែង ​និងក្នុងមួយថ្ងៃៗ ​ត្រូវធ្វើសត្វឃាត (ជ្រូក) ១០០០ក្បាល ស្មើ​នឹង៣០ភាគរយ ​នៃតម្រូវការប្រើប្រាស់ទូទាំងប្រទេស។ ក្រុមហ៊ុន មានគម្រោងពង្រីករោងចក្រ​ផលិតចំណីអាហារបន្ថែមបីទៀត ​ដើម្បីបំពេញតម្រូវការប្រើប្រាស់​របស់​ប្រជាពល រដ្ឋកម្ពុជា​ឲ្យ​បានគ្រប់គ្រាន់។ឯកអគ្គរាជទូតថៃប្រចាំកម្ពុជា ដែលបានចូលរួមក្នុងពិធីនេះដែរ បានមានប្រសាសន៍ថា ក្រុមហ៊ុន ស៊ីភី ​គឺជាក្រុមហ៊ុនកសិ-ឧស្សាហកម្ម ​និងអាហារឈានមុខគេមួយនៅក្នុងប្រទេសថៃ ដែលបាន​សហការ​ជាមួយរដ្ឋាភិបាលថៃរហូតមក។ ​នៅថ្ងៃនេះ ​គឺជាឱកាសដ៏ល្អសម្រាប់ក្រុមហ៊ុន ជា​ចំណែក​មួយនៃការជួយជ្រោមជ្រែងប្រទេសកម្ពុជា ​ទាក់ទងនឹងការលើកកម្ពស់ស្តង់ដារ​ឧស្សាហកម្មផលិត​ចំណីអាហារ និងអភិវឌ្ឍផលិតផលផ្នែកអាហារ ​ឱ្យមានការទទួលស្គាល់លើឆាកអន្តរជាតិ។ក្រុមហ៊ុន ស៊ី.ភី មានអាជីវកម្មផលិតចំណីសត្វ (Feed) អាជីវកម្មចិញ្ចឹមសត្វ (Farm) និងអាជីវកម្មចំណីអាហារ (Food) ៕ អត្ថបទ៖ អន សារឹម

ក្រុមហ៊ុនពហុអាជីវកម្មជប៉ុន បន្តពង្រីកអាជីវកម្មរបស់ខ្លួនមកខេត្តព្រះសីហនុ

2022/05/11 11:23:58 pm        748
Facebook Telegram Linkin
ព្រះសីហនុ៖ ក្រុមហ៊ុន មីតស៊ូប៊ីស៊ី ខបភើរ៉េស៊ីន (Mitsubishi Corporation) និងជាប្រធានសមាគមធុរកិច្ចជប៉ុនប្រចាំប្រទេសកម្ពុជា បានចូលជួបសម្តែងការគួរសម និងពិភាក្សាការងារជាមួយរដ្ឋបាលខេត្តព្រះសីហនុ នៅសាលប្រជុំក្រុមប្រឹក្សាខេត្ត រសៀលថ្ងៃទី១០ ខែឧសភា ឆ្នាំ២០២២ ក្នុងការស្វែងយល់ និងចាប់យកឱកាសវិនិយោគពហុអាជីវកម្ម នៅខេត្តព្រះសីហនុ។លោក យូកុ កាន់ដា ប្រធានផ្នែកចាត់ការទូទៅ ក្រុមហ៊ុន មីតស៊ូប៊ីស៊ី ខបភើរ៉េស៊ីន បានលើកឡើងថា សក្ដានុពលរបស់ ខេត្ដព្រះសីហនុ ជាមួយនឹងភាពរួសរាយរាក់ទាក់ របស់ប្រជាពលរដ្ឋ គាត់ពិត​ជា​មានភាពកក់ក្ដៅសប្បាយរីករាយ ក្នុងការធ្វើទស្សនកិច្ចនៅខេត្ដព្រះសីហនុបន្ដបន្ទាប់ និងបាន ចូលរួម​សកម្មភាពសង្គមខ្លះ ​គឺកម្មវិធីរើសសំរាមសម្អាត​អនាម័យ បរិស្ថាននៅឆ្នេរអូរត្រេះ ក្រុង-ខេត្ដព្រះសីហនុ។ ដំណើរទស្សនកិច្ចថ្ងៃនេះ វាជាឱកាសដ៏ប្រសើរ ដែលលោក​ នឹងអញ្ជើញទៅបញ្ចុះបឋម​សីលាបុកគ្រឹះឃ្លាំង​អ៊ីអននៅថ្ងៃស្អែកនេះ។ជាមួយគ្នានោះលោក ម៉ាង ស៊ីណេត អភិបាលរង ​នៃគណៈអភិបាលខេត្តព្រះសីហនុ ក៏​បាន​លើកឡើង​ដែរថា ខេត្តជាខេត្តទេសចរណ៍ ហើយការអភិវឌ្ឍរយៈពេលប៉ុន្មានឆ្នាំចុងក្រោយនេះ បានធ្វើឱ្យខេត្តក្លាយជាតំបន់សេដ្ឋកិច្ចពិសេស ពហុបំណង​ ដែលមានវិស័យសំខាន់ៗដូចជា វិស័យសំណង់ ឧស្សាហកម្ម ពាណិជ្ជកម្ម ​ដឹកជញ្ជូន​ទេសចរណ៍។ល។ មានកំពង់ផែអន្តរជាតិទឹកជ្រៅ ព្រលានយន្តហោះអន្តរជាតិ ផ្លូវដែក​ និងផ្លូវគោកជាដើម ។ល។ លោក ក៏បានស្នើសុំ លោក យូកុ កាន់ដា ឱ្យជួយផ្សព្វផ្សាយពីសក្ដានុពលរបស់ខេត្ដព្រះសីហនុ ទៅ​អ្នកទេសចរ និងក្រុមហ៊ុនវិនិយោគជប៉ុនឱ្យចូល ​មកវិនិយោគនៅខេត្ដព្រះសីហនុ​ឱ្យកាន់​តែច្រើន​ឡើង​ថែមទៀត។សូមបញ្ជាក់ថា ខេត្ដព្រះសីហនុ សក្ដានុពលធម្មជាតិសម្បូបបែប​ ដូចជាកសិកម្ម ​ឧស្សាហកម្ម ពាណិជ្ជកម្ម ​និងទេសចរណ៍ ​សំណង់ជាវិស័យគោលដៅក្នុងការអភិវឌ្ឍ​សេដ្ឋកិច្ចខេត្ត ហើយ​រាជ​រដ្ឋាភិបាលចាត់​ ទុកនឹងប្រែក្លាយខេត្តព្រះសីហនុ​ ជាតំបន់សេដ្ឋកិច្ចពិសេសគំរូពហុបំណង​តែមួយ​គត់នៅព្រះរាជាណាចក្រកម្ពុជា ស្របតាមគោលនយោបាយ អភិវឌ្ឍន៍ វិស័យ​ឧស្សាហកម្ម​នៃ​រាជ​រដ្ឋាភិបាលកម្ពុជា​ ឆ្នាំ២០១៥ -២០២៥៕

ក្រសួងសេដ្ឋកិច្ច អនុវត្តប្រព័ន្ធឯកសារឌីជីថល ដើម្បីពន្លឿនការប្រមូលចំណូល និងចំណាយថ្នាក់ក្រោមជាតិ

2022/05/11 09:33:54 pm        1023
Facebook Telegram Linkin
ភ្នំពេញ៖ ក្រសួងសេដ្ឋកិច្ច និងហិរញ្ញវត្ថុ ដាក់ឲ្យអនុវត្តប្រព័ន្ធឯកសារឌីជីថល ហៅកាត់ថា FMIS Portal លើរដ្ឋបាលស្រុក-ឃុំ ចំនួន២៦០ ដោយអនុវត្តសាកល្បង ជាមួយទូរស័ព្ទឆ្លាតវៃ មានលក្ខណៈសាមញ្ញ និងផ្តល់ភាពងាយស្រួល ក្នុងទិសដៅជួយពន្លឿនដល់ការអនុវត្តចំណូល ចំណាយថវិការបស់រដ្ឋបាលស្រុក និងរដ្ឋបាលឃុំ។ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកឡើងនៅក្នុងពិធីប្រកាសដាក់ឲ្យប្រើប្រាស់ប្រព័ន្ធឯកសារឌីជីថល ជំនាន់ទី១ ជា​ផ្លូវការដល់រដ្ឋបាលស្រុក និងរដ្ឋបាលឃុំ នៅថ្ងៃទី១១ ខែមេសា ឆ្នាំ២០២២ នេះថា ការរៀបចំ​បង្កើត​ប្រព័ន្ធឯកសារឌីជីថល ជំនាន់ទី១ គឺមានលក្ខណៈសាមញ្ញ និងផ្តល់ភាពងាយស្រួលក្នុងការ​អនុវត្ត​ជាមួយទូរសព្ទឆ្លាតវៃតាមរយៈបណ្តាញអ៊ីនធើណេត ក្នុងទិសដៅដើម្បីជួយពន្លឿន​ដល់ការ​អនុវត្តចំណូល ចំណាយថវិការបស់រដ្ឋបាលស្រុក និងរដ្ឋបាលឃុំ។ឯកឧត្ដម ឧបនាយករដ្ឋមន្ត្រី បន្តថា ស្ថិតនៅក្នុងកាលៈទេសៈដ៏លំបាកនេះ រាជរដ្ឋាភិបាលបាន​ប្រែក្លាយវិបត្តិទៅ ជាកាលានុវត្តភាព ការកែទម្រង់វិស័យហិរញ្ញវត្ថុសាធារណៈ គ្មានការបង្អង់ និង​គ្មាន​ថយក្រោយនោះឡើយ ទោះបី ​កម្ពុជាឆ្លងកាត់ជម្ងឺកូវីដ ១៩ ជាពិសេសការកសាងចាប់​យក​ប្រព័ន្ធឌីជីថល ស្របតាមគន្លងថ្មីនៃសកលលោក ​នៅក្នុងយុគសម័យ​បដិវត្តន៍​ឧស្សាហកម្មជំនាន់ទី ៤។ ក្នុងស្មារតីនេះ ការងារកែទម្រង់ហិរញ្ញវត្ថុសាធារណៈ គឺជាចលករមុតស្រួចរបស់រាជរដ្ឋាភិបាល ក្នុងនោះការកែលម្អ ធនធានហិរញ្ញវត្ថុសាធារណៈរបស់ជាតិ គឺមានដំណាក់កាលសំខាន់ៗជាច្រើន, ចំពោះការដាក់ឲ្យអនុវត្តប្រព័ន្ធ ឯកសារឌីជីថល នេះវិញ គឺជាសមិទ្ធផលថ្មីមួយទៀត ដែលដាក់​ឲ្យអនុវត្តលើរដ្ឋបាលស្រុក-ឃុំ ចំនួន ២៦០ ​តាមទូរស័ព្ទឆ្លាតវៃ មានលក្ខណៈសាមញ្ញ និងផ្តល់ភាព​ងាយស្រួល ដោយមានទិសដៅដើម្បីជួយពន្លឿនដល់ ​ការអនុវត្តចំណូល ចំណាយថវិការបស់​រដ្ឋបាលស្រុក ​និងរដ្ឋបាលឃុំ ​ដោយបានផ្តល់ភាពងាយស្រួល​ ជូនដល់រដ្ឋបាលស្រុក-ឃុំទាំងនោះ។ សូមបញ្ជាក់ថា៖ ការដាក់ឲ្យប្រើប្រាស់ប្រព័ន្ធឯកសារឌីជីថល​ ជំនាន់ទី១ របស់ក្រសួងសេដ្ឋកិច្ច និង​ហិរញ្ញវត្ថុ ជូនដល់រដ្ឋបាលថ្នាក់ស្រុក ​និងឃុំ នៅពេលនេះ គឺជាការផ្លាស់ប្តូរមកប្រើប្រាស់​ប្រព័ន្ធ​បច្ចេកវិទ្យាព័ត៌មាន ​សម្រាប់ការគ្រប់គ្រងហិរញ្ញវត្ថុសាធារណៈ​ នេះវិញ ដោយក្នុង​នោះ​សម្រាប់​ជំហាន​ដំបូងនេះ បានអនុវត្តទៅលើខេត្តទាំងអស់នៅក្នុងព្រះរាជាណាចក្រកម្ពុជា ក្នុងនោះ​បានជ្រើសរើស​យករដ្ឋបាលស្រុកចំនួន ៧៥ ​និងរដ្ឋបាលឃុំចំនួន ១៨៥ ដើម្បីអនុវត្ត​សាកល្បង​នៃការប្រើប្រាស់ប្រព័ន្ធឯកសារឌីជីថល នេះ ៕អត្ថបទ៖ សុន រ៉ាឌី

កម្ពុជា-វៀតណាម បង្កើនការតភ្ជាប់សហគ្រាសដឹកជញ្ជូន ដើម្បីសម្រួលដល់ការធ្វើពាណិជ្ជកម្ម

2022/05/11 09:20:55 pm        470
Facebook Telegram Linkin
ភ្នំពេញ៖ កម្ពុជា-វៀតណាម បង្កើនកិច្ចសហប្រតិបត្តិការ នៃការតភ្ជាប់សហគ្រាសដឹកជញ្ជូន ការសម្របសម្រួល និងបែបបទនៃការនាំចេញ-នាំចូល ដើម្បីជួយដល់ការដឹកជញ្ជូននៃប្រទេសទាំងពីរ ឲ្យប្រព្រឹត្តទៅដោយរលូន និងជួយសម្រួលដល់ការធ្វើពាណិជ្ជកម្មឲ្យកាន់តែល្អប្រសើរ។លោកឧកញ៉ា ស៊ិន ចន្ធី ប្រធានសមាគមភស្តុភារកម្មកម្ពុជា បានថ្លែងប្រាប់ភ្នាក់ងារអ្នកយកព័ត៌មាន BTV នៅថ្ងៃទី១០ខែឧសភាឆ្នាំ២០២២ថា កម្ពុជា-វៀតណាម បានបើកកិច្ចប្រជុំ លើកិច្ច​សហប្រតិបត្តិការ និងការតភ្ជាប់សហគ្រាសដឹកជញ្ជូនរវាងប្រទេសទាំងពីរ​ ដែលកិច្ចការនេះ​មាន​សារៈសំខាន់ៗ សម្រាប់បង្កើនកិច្ចសហប្រតិបត្តិការ នៃវិស័យដឹកជញ្ជូនរវាងប្រទេសទាំងពីរបន្ថែម ការដោះស្រាយបញ្ហាកំពុងជួបប្រឈម ការសម្របសម្រួល និងបែបបទនីតិវិធីនៃការនាំចេញចូល និងការជម្រុញពាណិជ្ជកម្មជាដើម។លោកឧកញ៉ា បន្តថា ជុំវិញវិស័យដឹកជញ្ជូននេះ បច្ចុប្បន្ន ក្រុមហ៊ុនក្នុងស្រុក កំពុងជួបបញ្ហាប្រឈម​ជាច្រើនដូចជាប្រេងឡើងថ្លៃ ជាពិសេសសេវាដឹកជញ្ជូនតាមផ្លូវទឹក បានកំពុងហក់ឡើងខ្ពស់​ហួស​ហេតុ។ ដូច្នេះកិច្ចសហប្រតិបត្តិការ នៃការតភ្ជាប់សហគ្រាសដឹកជញ្ជូន ​រវាងកម្ពុជាវៀតណាម គឺការ​ជួយ​សម្រួលមួយផ្នែកនៃការដឹកជញ្ជូនឆ្លងកាត់ប្រទេសជិត ជាពិសេសជាការ​ជួយសម្រួល​ដល់ការ​ដឹកជញ្ជូន​កសិកផលរបស់កម្ពុជា ខណៈមួយឆ្នាំៗកម្ពុជាបាននាំចេញកសិផលទៅកាន់ប្រទេស​វៀតណាមជាច្រើន ដូចជាការនាំចេញស្រូវជាដើម។លោកឧកញ៉ា ស៊ិន ចន្ធី បន្តថា ទាក់ទងវិស័យដឹកជញ្ជូននេះ ភាគីនៃប្រទេសទាំងពីរ នឹងមាន​គម្រោង​ចុះហត្ថលេខាលើអនុស្សារណៈយោគយល់គ្នា ដើម្បីពង្រឹងដល់ការនាំចេញចូល ជា​ពិសេស​ការដឹកជញ្ជូនឆ្លងកាត់ប្រទេសវៀតណាម ទំាងផ្លូវទឹក និងផ្លូវគោក ដែលកន្លងមក​ការដឹកជញ្ជូន​ឆ្លងកាត់ប្រទេសនេះ ​មានការត្រួតពិនិត្យ​ស្មុគស្មាញ​ និងការចំណាយថ្លៃដើមបន្ថែមជាដើម ។ ដូច្នេះតាមរយៈកិច្ចសហប្រតិបត្តិនេះ នឹងជួយដោះស្រាយ​រាល់បញ្ហាបន្ថែម ដើម្បីជម្រុញ​ការ​ដឹក​ជញ្ជូនឆ្លងកាត់​ និងការធ្វើពាណិជកម្មប្រព្រឹត្តិទៅដោយរលូន។នៅក្នុងសិក្ខាសាលានេះ ភាគីវៀតណាម ​បានបង្ហាញនូវការយកចិត្តទុកដាក់ខ្ពស់ នៃ​ការតភ្ជាប់វិស័យដឹកជញ្ជូនរវាងប្រទេសទាំងពីរ ​ពិសេសការគិតគូរដល់ថ្លៃដើមនៃការដឹកជញ្ជូន ដែលបញ្ហានេះភាគីវៀតណាម ​នឹងលើកជូនទៅរដ្ឋាភិបាលរបស់ខ្លួន​ ដើម្បីដោះស្រាយ ដល់ដំណើរការនៃការដឹកជញ្ជូននៃប្រទេសទាំងពីរ។សូមបញ្ជាក់ថា៖ នៅថ្ងៃទី ១០ ខែ ឧសភា កម្ពុជា-វៀតណាម បើកកិច្ចប្រជុំសម្រាប់កិច្ច​សហប្រតិបត្តិការ​ និងការតភ្ជាប់សហគ្រាសដឹកជញ្ជូនរវាង​ប្រទេសទាំងពីរ ដែលក្នុងនោះ​ភាគីវៀតណាម បានការចូលរួមមាន៖ អនុប្រធាននាយកដ្ឋាននាំចូល និងនាំចេញ ក្រសួងឧស្សាហកម្ម និងពាណិជ្ជកម្ម, ឯកអគ្គរដ្ឋទូត វៀតណាមប្រចាំព្រះរាជាណាចក្រកម្ពុជា, នាយកក្រុមហ៊ុន Bee Logistic ប្រទេសវៀតណាម, នាយកពាណិជ្ជកម្មនៃក្រុមហ៊ុន Gemadept តំណាងសមាគមភ្នាក់ងារសមុទ្រ ឈ្មួញកណ្តាល និងសេវាកម្មវៀតណាម និងមានការជាង ៥០ ក្រុមហ៊ុន៕អត្ថបទ៖ សុន រ៉ាឌី

ពីថ្ងៃទី១១-២០ខែឧសភា ប្រេងសាំងធម្មតាឡើង ៣០០រៀល និងប្រេងម៉ាស៊ូតឡើង ២០០រៀល ធៀបនឹងសន្ទស្សន៍ចាស់

2022/05/11 07:36:48 pm        388
Facebook Telegram Linkin
ភ្នំពេញ៖ ក្រសួងពាណិជ្ជកម្មប្រកាសពីតម្លៃលក់រាយប្រេងឥន្ធនៈតាមស្ថានីយនានាទូទាំងប្រទេស ចាប់ពីថ្ងៃទី១១-២០ ខែឧសភា ឆ្នាំ២០២២ ដោយប្រេងសាំងធម្មតាត្រូវលក់តម្លៃ ៥.៥៥០រៀល/លីត្រ(ឡើង៣០០រៀល) និងប្រេងម៉ាស៊ូតត្រូវលក់តម្លៃ ៥.៨០០រៀល/លីត្រ(ឡើង២០០រៀល)។

ឆ្នាំ២០២១ កំពង់ផែស្វយ័តភ្នំពេញរកប្រាក់ចំណេញបានជាង ១២លានដុល្លារ

2022/05/10 10:31:36 pm        1355
Facebook Telegram Linkin
ភ្នំពេញ៖ ឆ្នាំ២០២១ កន្លងទៅកំពង់ផែស្វយ័តភ្នំពេញ សម្រេចបានលទ្ធផលអាជីវកម្មរបស់ខ្លួន ដោយទទួលបាននូវបរិមាណកុងតឺន័រចំនួន ៣៤៨.៨៩៨TEUs ដែលអនុវត្តបានលើសផែនការឆ្នាំ ២០២១ចំនួន១៣ភាគរយ។នេះបើតាមប្រសាសន៍ ឯកឧត្តម ហ៊ឺ បាវី ប្រតិភូរាជរដ្ឋាភិបាល ទទួលបន្ទុកជាប្រធានអគ្គនាយក​កំពង់ផែ​ស្វយ័ត​ភ្នំពេញ ថ្លែងក្នុងពិធីបើកមហាសន្និបាតភាគហ៊ុនិកលើកទី៧ នៅទីស្នាក់ការកណ្ដាល​កំពង់ផែ​ស្វយ័តភ្នំពេញ កាលពីព្រឹកថ្ងៃទី ១០ ឧសភា។ឯកឧត្តម ហ៊ឺ បាវី បានថ្លែងថា សម្រាប់ឆ្នាំ ២០២១ កំពង់ផែស្វយ័តភ្នំពេញ សម្រេចបានលទ្ធផល​អាជីវកម្ម​ដោយ​ទទួលបាននូវបរិមាណកុងតឺន័រចំនួន ៣៤៨.៨៩៨TEUsគឺលើសផែនការឆ្នាំ២០២១ចំនួន១៣% នឹងកើនលើស ២០% បើធៀប​នឹង​ការ​អនុវត្តឆ្នាំ២០២០ ​។ ចំណែកឯលទ្ធផលហិរញ្ញវត្ថុ កំពង់ផែស្វយ័តភ្នំពេញ​ទទួលបាននូវ​ប្រាក់​ចំណេញ​ចំនួន ១២លាន៧០៧ពាន់ ៨៣១ដុល្លារ ដែលអនុវត្តបានលើសផែនការឆ្នាំ២០២១ ចំនួន១៥% និងកើនឡើង២៩% ធៀបនឹងការអនុវត្តឆ្នាំ២០២០ ​ហើយ​ឯកឧត្តម ក៏បានបង្ហាញនូវមោទនភាព ចំពោះស្នាដៃ​និងលទ្ធផលដែលសម្រេចបាន ​និងបានលើកឡើង​អំពីកិច្ចការជាច្រើនទៀត​ដែល​ជា​ផែនការសកម្មភាពរបស់កំពង់ផែស្វយ័តភ្នំពេញ។ឯកឧត្តម មានប្រសាសន៍ថា ទន្ទឹមនឹងលទ្ធផលដែលសម្រេចបានមកនេះ កំពង់ផែស្វយ័តភ្នំពេញ​ក៏​នៅមានផែនការការងារជាអាទិភាពបន្តទៀត​សម្រាប់អនុវត្តឆ្នាំ ​២០២២ ក្នុងនោះរួមមាន​គម្រោង​ពង្រីក​ហេដ្ឋា​រចនាសម្ព័ន្ធចំណត​ផែកុងតឺន័រLM១៧ ជំហានទី៣ ​ដំណាក់កាលទី២(២០២២-២០២៣) ដើម្បីពង្រីក​សមត្ថភាពផ្ទុកកុងតឺន័រឲ្យបានដល់ចំនួន៥០ម៉ឺនTEU/ឆ្នាំ និង​គម្រោង​អភិវឌ្ឍន៍​ចំណត​ផែរណប​តាមដងទន្លេនៅតាមទីតាំងមួយចំនួនទៀត រួមមាន៖ ចំណតផែរណបពហុបំណង​កោះរកា (LM២៦) ,ចំណតផែរណបពហុបំណងTS១១ ,ចំណតផែរណបពហុបំណងព្រែកអញ្ចាញ (UM១) ,ចំណតផែរណបពហុបំណងទន្លេបិទ(UM២) និងចំណតផែរណបពហុបំណងឆ្លូង(ក្រចេះ) កំពង់ឆ្នាំង ព្រែកក្តាម ដើម្បីបង្កើនសេវាកម្មរបស់កំពង់ផែស្វយ័តភ្នំពេញ ឲ្យដល់អតិថិជន៕អត្ថបទ៖ មុត សុទ្ធ

ប្រទេសឆែក គ្រោងផ្តល់ជំនួយលើការអភិវឌ្ឍវិស័យកសិកម្មកម្ពុជា ដើម្បីជំរុញការនាំចេញ

2022/05/10 08:21:26 pm        661
Facebook Telegram Linkin
ភ្នំពេញ៖ ប្រទេសឆែក គ្រោងផ្តល់ជំនួយបច្ចេកទេស​លើការអភិវឌ្ឍវិស័យកសិកម្មដល់កម្ពុជា ដើម្បីជំរុញ​ការផលិត​ផ្គត់ផ្គង់​ទីផ្សារ​ និង​នាំចេញ​ទៅកាន់​ទីផ្សារ​អឺរ៉ុប​។​កម្ពុជា និង​សាធារណរដ្ឋ​ឆែក ​គ្រោង​នឹង​ចុះ​អនុស្សរណៈនៃ​ការយោគយល់​គ្នា (MoU) ​ស្តីពី​កិច្ច​សហប្រតិបត្តិការ​លើ​វិស័យ​កសិកម្ម​ក្នុង​ពេល​ឆាប់ៗ​នេះ ​លើ​ការ​បណ្តុះបណ្តាល​ ការ​លើក​កម្ពស់​គុណភាព ​និង​ផលិតភាព​ផលិតកម្ម​កសិកម្ម ​ដើម្បី​ឆ្លើយតប​តាម​តម្រូវការ​ទីផ្សារ​នាំចេញ​ទៅកាន់​ទីផ្សារ​អឺរ៉ុប​។ឯកឧត្តម វេង សាខុន រដ្ឋមន្ត្រី​ក្រសួង​កសិកម្ម​ បាន​ជួប​កាលពេលថ្មីៗនេះ ​ពិភាក្សា​ការងារ​ជាមួយ​ ឯកឧត្តម ម៉ារទីន វ៉ាវរ៉ា ឯកអគ្គរដ្ឋទូត​នៃ​សាធារណរដ្ឋ​ឆែក​ប្រចាំ​កម្ពុជា ​នៅ​ទីស្តីការ​ក្រសួងកសិកម្ម ដោយ​ភាគី​ទាំង​២​ បាន​លើក​យក​ប្រធានបទ​សំខាន់ៗ​មក​ពិភាក្សា​គ្នា​ជា​ជំហាន​បឋម​ក្នុង​ការ​ធ្វើ​កិច្ច​សហប្រតិបត្តិការ​រវាង​ប្រទេស​ទាំង​២​ទាក់ទង​នឹង​ការ​អភិវឌ្ឍ​វិស័យ​កសិកម្មរុក្ខាប្រមាញ់ និង​នេសាទ​នាពេល​អនាគត ដែល​ក្នុងនោះ​មាន ដូចជា ការងារ​បណ្តុះ​បណ្តាល​​ធនធាន​មនុស្ស ​ទាំង​រយៈពេល​ខ្លី និង​ពេល​វែង ការ​ផ្លាស់ប្តូរ​​មន្ត្រី​ជំនាញ​ឱ្យ​ទៅ​ធ្វើ​ទស្សនកិច្ច​សិក្សា ​ដើម្បី​ដកស្រង់​បទ​ពិសោធន៍​លើ​ការងារ​អនុវត្ត​បច្ចេកទេស​ផ្ទាល់​។ភាគី​ទាំង​ ២​ បាន​ពិភាក្សាលើការ​សហការគ្នា​លើ​ការ​អភិវឌ្ឍ​វិស័យ​វារីវប្បកម្ម​ទាំង​ទឹកសាប​ និង​សមុទ្រ​, ការធ្វើ​ទំនើបកម្ម​កសិកម្ម និង ការ​ពង្រឹង​សមត្ថភាព​លើ​ការកែច្នៃ​កសិផល​ផងដែរ​។ឯកឧត្តម វេង សាខុន មានប្រសាសន៍ថា ភាគីទាំងពីរ​សង្ឃឹម ថា​នឹង​ឈានទៅ​អនុវត្ត​លើ​ខ្លឹមសារ MoU នេះ​ឱ្យ​ចេញ​ជា​ផ្លែផ្កា​ ដើម្បី​ជា​ប្រយោជន៍​សម្រាប់​ប្រទេស​ទាំង​ ២ ​នាពេល​ឆាប់ៗ​នេះ​។ឯកឧត្តម ​រដ្ឋមន្ត្រី​បាន​មាន​ប្រសាសន៍​ថា​ នាពេល​អនាគត​ដ៏ខ្លី ​កិច្ចសហប្រតិបត្តិការ​នេះ ​នឹង​លេចចេញ​ជា​រូបរាង ​និង​ទទួល​បាន​ជោគជ័យ ជាពិសេស​គឺ​ភាគី​កម្ពុជា​ផ្ទាល់​ដែល​កំពុង​ត្រូវ​ការ​កសាង​ធនធានមនុស្ស​តាមរយៈការបណ្តុះបណ្តាល ​ការ​លើក​កម្ពស់​គុណភាព ​និង​ផលិតភាព​ផលិតកម្ម​កសិកម្ម ​ដើម្បី​ឆ្លើយតប​តាម​តម្រូវការ​ទីផ្សារ​នាំចេញ ​និង​ជាពិសេស​ទៅកាន់​ទីផ្សារ​អឺរ៉ុប​​។បើ​យោងតាម​ ឯកឧត្តម វេង សាខុន រដ្ឋាភិបាល​ឆែក​ដែល​បាន​ទិញ​អង្ករ​ពី​កម្ពុជា​ចំនួន​ជាង ​៧ ០០០​ តោន​ក្នុង​​ឆ្នាំ​ ២០២១​ ហើយ​សង្ឃឹមថា​ បរិមាណ​នេះ​នឹង​កើន​ឡើង​នាពេល​អនាគត​៕ អត្ថបទ៖ វណ្ណៈ 

កម្ពុជា និងស្រីលង្កា ឯកភាពធ្វើសកម្មភាពជំរុញចលនាទេសចរណ៍ឡើងវិញ

2022/05/10 08:14:37 pm        399
Facebook Telegram Linkin
ភ្នំពេញ៖ នៅថ្ងៃទី១០ ខែឧសភានេះ ឯកឧត្តម ថោង ខុន រដ្ឋមន្ត្រីក្រសួងទេសចរណ៍កម្ពុជា បានចុះហត្ថលេខាលើអនុសារណៈយោគយល់គ្នាជាមួយលោកជំទាវ Chaminda l. Colonne ឯកអគ្គរដ្ឋទូតប្រទេសស្រីលង្កា ប្រចាំនៅកម្ពុជាជាលើកដំបូង ដើម្បីជំរុញចលនាទេសចរណ៍រវាងប្រទេសពីរអោយមានភាពល្អប្រសើរឡើងវិញ ។បើតាមឯកឧត្តម ទី្រ ឈីវ ទីប្រឹក្សាក្រសួងទេសចរណ៍ បានថ្លែងអោយក្រោយជំនួប​ចុះហត្ថលេខា​នេះថា នៅក្នុងខ្លឹមសារអនុសារណៈការយោគយល់គ្នាលើកិច្ច​សហប្រតិបត្តិការ​នៃវិស័យទេស​ចរណ៍នេះ គឺ​ភាគីប្រទេសទាំងពីរ ​នឹងជម្រុញអោយមានសកម្មភាពទេសចរណ៍នានាដូចជា ការតភ្ជាប់ជើងហោះហើរត្រង់រវាងប្រទេសពីរ ​ដោយចាប់ផ្តើមពីការតភ្ជាប់ជើងហោះហើរជា Charter flight ជម្រុញការរៀបចំកញ្ចប់ទស្សនកិច្ចសាសនាព្រះពុទ្ធ កម្ពុជា ស្រីលង្ការ ហើយក្នុងនោះដែរភាគី​ទាំង​ពីរ​នឹងជម្រុញ​អោយ​មានការ​ផ្លាស់ប្តូរ​ទស្សនកិច្ចរវាងព្រះសង្ឃ ​ថ្នាក់ដឹកនាំសង្ឃ និងគ្រឹះស្ថាន​សិក្សា​ពុទ្ធសាសនៈបណ្ឌិតនានាទៀតជាដើម។នៅក្នុងជំនួបនេះដែរ ឯកឧត្តម ថោង ខុន បានក៏បានលើកឡើងដែរថា ​បច្ចុប្បន្នកម្ពុជា ក៏កំពុង​អនុវត្ត​គោលនយោបាយទេសចរណ៍ផ្នែកសាសនាព្រះពុទ្ធ ​តាមការដាក់ចុះនូវយន្តការគឺ​ ខេត្តមួយ ត្រូវបាន​មានវត្តអារ៉ាមគំរូយ៉ាងតិចចំនួន២ ដែលជាវត្តទាក់ទាញភ្ញៀវទេសចរជាតិអន្តរជាតិផ្នែក​សាសនា​ព្រះពុទ្ធ​អោយទៅទស្សនានៅក្នុងវត្តទាំងនោះ ​ជាពិសេសនៅខេត្តសៀមរាប ​នៅបាត់ដំបងជាដើម។ លោកជំទាវ Chaminda l. Colonne បានថ្លែងថា នៅក្នុង​មុនពេលពិភពលោកមិនទាន់មានការ​រាត​ត្បាត​កូវីដ១៩ កម្ពុជា ស្រីលង្ការមានផ្លាស់ប្តូរ​ទេសចរណ៍ផ្នែកសាសនា​ព្រះពុទ្ធមានភាព​ល្អ​ប្រសើរ ក្នុងនោះ ភ្ញៀវទេសចរមកពីស្រីលង្ការមកទស្សនាកម្ពុជា ​មានកំណើនប្រមាណ២៣% ហើយរំពឹងថា ក្រោយវិបត្តិកូវីដ១៩ធូរស្រាលនេះ កម្ពុជា ស្រីលង្កា ​នឹងមានការផ្លាស់ប្តូរដំណើរទស្សនកិច្ច និងទេសចរណ៍មានភាពល្អប្រសើរដូចដើមវិញ។ សូមបញ្ជាក់ថា នៅក្នុងជំនួបនេះដែរភាគីទាំងពីរ ក៏បានឯកភាពបង្កើតក្រុមការងារកម្ពុជាស្រីលង្កា ដើម្បីជម្រុញអោយមានកិច្ចប្រជុំរៀងរាល់៣ខែម្តង ​ដើម្បីបូកសរុបលទ្ធផលការងារ តាមដានការ​អនុវត្តខ្លឹមសារអនុសារណៈកិច្ចសហប្រតិបត្តិការក្នុងវិស័យទេសចរណ៍នេះនៃប្រទេសទាំងពីរ៕អត្ថបទ៖ ស៊ុម សុខជា

ប្រជាពលរដ្ឋបំពេញ​កាតព្វកិច្ច​បង់ពន្ធ ​ជាការចូលរួមចំណែកអភិវឌ្ឍន៍ប្រទេស

2022/05/10 07:42:05 pm        414
Facebook Telegram Linkin
នំពេញ៖ អ្នកជំនាញគ្រប់គ្រងពន្ធធំ នៃអគ្គនាយកដ្ឋានពន្ធដារ លើកឡើងថា កាតព្វកិច្ចពន្ធដារ គឺជាកាតព្វកិច្ចសម្រាប់ប្រជាពលរដ្ឋគ្រប់រូប ការចូលរួមពីប្រជាពលរដ្ឋលើការបំពេញកាតព្វកិច្ចបង់ពន្ធ តាមរយៈដោយផ្ទាល់ ឬប្រយោល គឺជាការចូលរួមចំណែកយ៉ាងសំខាន់ដល់អភិវឌ្ឍន៍ប្រទេសទាំងអស់គ្នា ។ឯកឧត្ដមបណ្ឌិត អេង រតនា ប្រធាននាយកដ្ឋានគ្រប់គ្រងអ្នកជាប់ពន្ធធំ នៃអគ្គនាយកដ្ឋានពន្ធដារ លើកឡើងក្នុងវេទិការ ស្ដីពីអាជីពការងារ ដែលរៀបចំដោយវិទ្យាស្ថានខេមអេដ នាចុងសប្តាហ៍​កន្លងមកថា ការចូលរួមបង់ពន្ធរបស់ប្រជាពលរដ្ឋកម្ពុជា តាមរយៈដោយផ្ទាល់ ឬប្រយោលក្តី គឺជាការចូលរួមអភិវឌ្ឍន៍ប្រទេសយ៉ាងសំខាន់ ដើម្បីបង្កើនគ្រប់ហេដ្ឋារចនាសម្ព័ន្ធឲ្យកាន់តែរឹងមាំ ជាពិសេសការបង្កើននូវធនធានមនុស្សឲ្យកាន់តែសំបូរបែប ដើម្បីជម្រុញ​អភិវឌ្ឍន៍ប្រទេសកម្ពុជា​ឲ្យកាន់តែខ្លាំងដូចបណ្តា​ ប្រទេសរីកចម្រើនមួយចំនួន។ឯកឧត្ដមបណ្ឌិត លើកឡើងបន្តថា កាតព្វកិច្ចពន្ធដារ គឺជាកាតព្វកិច្ចសម្រាប់ប្រជាពលរដ្ឋគ្រប់រូប ព្រោះធនធានពន្ធដារ ​គឺមានសារៈសំខាន់ណាស់ សម្រាប់ប្រទេសជាតិ ក៏ដូចជាលើកកម្ពស់​ជីវភាពប្រជាជនទាំងមូលផងដែរ ចំណែកធនធានមនុស្សក្នុងអាជីពនៃវិស័យគណនេយ្យ សវនកម្ម និងពន្ធដារ ក៏មានសារៈសំខាន់ផងដែរ សម្រាប់ជួយសម្រួលដល់ការប្រមូលពន្ធ និងត្រួតពិនិត្យរបាយការណ៍ហិរញ្ញវត្ថុ ប្រកបទៅបានដោយរលូន។ ក្នុងវេទិការនេះដែរ លោក ខេស៊ី បាណេត នាយកវិទ្យាស្ថានខេមអេដ បានបន្ថែមទៀតថា គណនេយ្យ គឺជាមធ្យោបាយយ៉ាងសំខាន់ សម្រាប់ការដំណើរការនៃអាជីវកម្ម ក៏ដូចជាបម្រើការ​ដល់ការប្រមូលពន្ធ ដើម្បីជាចំណូលរដ្ឋសម្រាប់រាជរដ្ឋាភិបាល នៃព្រះរាជាណាចក្រកម្ពុជា។ ប្រសិនបើការអនុវត្តគណនេយ្យប្រកបដោយគុណភាព​ និងស្តង់ដារ ការគ្រប់គ្រងអាជីវកម្ម​ក៏​ប្រកប​ទៅដោយជោគជ័យ រីឯការប្រមូលពន្ធ ក៏ធ្វើឡើងប្រកបដោយគុណភាព ​និងតម្លាភាពផងដែរ ដើម្បីផលប្រយោជន៍ដល់ប្រទេសជាតិទាំងមូល៕អត្ថបទ៖ សុន រ៉ាឌី

ការនាំចេញស្រូវ-អង្ករកម្ពុជាទៅទីផ្សារអន្តរជាតិ ទទួលបានចំណូលជាង ៥០០លានដុល្លារ ក្នុងរយៈពេលបួនខែដើមឆ្នាំ

2022/05/09 06:31:13 pm        922
Facebook Telegram Linkin
ភ្នំពេញ៖ កម្ពុជានាំចេញស្រូវ អង្ករ ទៅកាន់ទីផ្សារអន្តរជាតិ ទទួលបានចំណូល ៥១៦លានដុល្លារ ក្នុងរយៈពេល៤ខែដើមឆ្នាំ២០២២នេះ ខណៈការ​នាំចេញ​អង្ករ​បាន​ចំនួន​ជាង​ ២២​ម៉ឺន​តោន នៅក្នុងរយៈពេល​ ៤​ខែ ឆ្នាំ​២០២២ ​នេះ កើន​ឡើង​ប្រមាណ​ ១៥ ​ភាគរយ បើ​ធៀប​នឹង​រយៈពេល​ដូចគ្នាក្នុង​ឆ្នាំ​២០២១​។សេចក្តី​ប្រកាស​ព័ត៌មាន​របស់​សហព័ន្ធ​ស្រូវ​អង្ករ​កម្ពុជា​ បាន​ឱ្យដឹងថា ចាប់ពី​ខែមករា ​ដល់​ខែមេសា ឆ្នាំ​ ២០២២ កម្ពុជា ​បាន​នាំចេញ​អង្ករ​ចំនួន ២២១ ១៣៨ តោនកើនឡើង​ ១៤,៨ ​ភាគរយ។ដោយឡែកការ​នាំចេញ​ស្រូវ​បាន​ចំនួន ១ ៦៤៨ ៤៧៤ តោន ដោយ​ទាំង​ស្រូវ​ និង​អង្ករ​មានតម្លៃ​ទឹកប្រាក់សរុប​មាន​ចំនួន ៥១៦,២១ លាន​ដុល្លារ​។តាម​សេចក្តី​ប្រកាស​ព័ត៌មាន​របស់​សហព័ន្ធ​ស្រូវ​អង្ករ​កម្ពុជា​ បានឱ្យដឹង​ទៀតថា ក្រុមហ៊ុន​នាំចេញ​ចំនួន ៤៨ ក្រុមហ៊ុន បាន​ធ្វើការ​នាំចេញ​ទៅកាន់​គោលដៅ​ចំនួន ៥៤ ប្រទេស​។ ក្នុងនោះ​ កម្ពុជា​បាន​នាំទៅ​ប្រទេស​ចិន និង​តំបន់​ស្វយ័ត​ហុងកុង ម៉ាកាវ បាន​ចំនួន ១១៥ ២៥៥ តោន ​ស្មើនឹង​ ៥២​ ភាគរយ​នៃ​ការនាំចេញ​សរុប ដែល​គិត​ជា​ទឹកប្រាក់​មាន​ចំនួន ៦២,៧៤ លាន​ដុល្លារ​។ដោយឡែក តំបន់​អឺរ៉ុប​មាន​បរិមាណ ចំនួន ៦៨ ៥៥៥ តោន ឬ​ស្មើនឹង ៣១ ​ភាគរយ ទទួល​បាន​ទឹកប្រាក់​ចំនួន ៥១,០២ លាន​ដុល្លារ​។ចំណែក តំបន់​សមាជិក​អាស៊ាន ចំនួន ២១ ៨៧៦ តោន ឬ​ស្មើនឹង ៩,៨៩ ភាគរយ​ទទួល​បាន​ទឹកប្រាក់​ចំនួន​ ១៣,៩០​ លាន​ដុល្លារ និង​បណ្តា​ប្រទេស​ផ្សេងៗ​ ក្រៅពី​តំបន់​ខាងលើ​បាន​ចំនួន ១៥ ៤៥២ តោន ឬ​ស្មើនឹង ៦,៩៩ ​ភាគរយ គិត​ជា​ទឹកប្រាក់​មាន​ចំនួន ១១,៧៤ លាន​ដុល្លារ​។អង្ករ​ដែល​សហព័ន្ធ​បាន​នាំចេញ​រួមមាន ប្រភេទ​អង្ករ​ក្រអូប​គ្រប់​ប្រភេទ​មាន​ចំនួន ៦៧,១២ ​ភាគរយ​, អង្ក​រស ចំនួន ៣០,១៣​ ភាគរយ​, អង្ករ​ចំហុយ​ចំនួន ១,០៧ ​ភាគរយ និង​អង្ករ​សរីរាង្គ​ចំនួន ១,៦៨ ​ភាគរយ​៕អត្ថបទ៖ វណ្ណៈ

បណ្ដាញសង្គម

ព័ត៌មានថ្មីៗ

អ្នករាយការណ៍ពិសេសរបស់អង្គការសហប្រជាជាតិ កោតសរសើរយុទ្ធនាការបង្ក្រាបឧក្រិដ្ឋកម្មឆបោកតាមប្រព័ន្ធអ៊ីនធឺណិតរបស់កម្ពុជា
08/01/2026 10:08 AM
Facebook Telegram Linkin
មន្ត្រីក្រុមហាម៉ាស៖ អ៊ីស្រាអែលត្រូវតែអនុម័តកិច្ចព្រមព្រៀងរបស់លោក Trump មុនពេលដែលក្រុមហាម៉ាសអនុវត្ត
08/01/2026 10:08 AM
Facebook Telegram Linkin
ជនភៀសខ្លួនមកពីម៉ារ៉ុក ត្អូញត្អែរពីភាពអត់ឃ្លាននិងអំពើហិង្សានៅដែនដីអេស្ប៉ាញ បន្ទាប់ពីប្រញាប់ប្រញាល់ឆ្លងព្រំដែន
08/01/2026 10:08 AM
Facebook Telegram Linkin
អេស្ប៉ាញ៖ ជនអន្តោប្រវេសន៍កំពុងវិលត្រឡប់ចេញពីដែនដី Ceuta បន្ទាប់ពីមនុស្សជិត៦០នាក់បានស្លាប់
08/01/2026 10:08 AM
Facebook Telegram Linkin
សមត្ថកិច្ចកម្ពុជាបានរកឃើញនារីជនជាតិសិង្ហបុរីនៅភ្នំពេញ ដោយមិនមានការចាប់បង្ខាំង ឬចាប់ជំរិតនោះទេ
08/01/2026 09:08 AM
Facebook Telegram Linkin
[UPDATE] ក្រសួងអេស្ប៉ាញ៖ ជនអន្តោប្រវេសន៍ជាង ២៥.០០០នាក់ បានវិលត្រឡប់ទៅ​ម៉ារ៉ុកវិញពីដែនដី Ceuta
07/31/2026 09:07 PM
Facebook Telegram Linkin
[UPDATE]ជនអន្តោប្រវេសន៍ប្រហែល ៦០.០០០នាក់ ចូលដែនដី​ Ceuta របស់អេស្ប៉ាញ ខណៈមាន​អ្នកស្លាប់ ៣៤នាក់​
07/31/2026 09:07 PM
Facebook Telegram Linkin
របាយការណ៍៖ ណាតូចង់​ពង្រីកខែល​ការពារ​នុយក្លេអ៊ែរ នៅអឺរ៉ុប ក្នុង​ពេលមានការគំរាមកំហែង​ពីរុស្ស៊ី
07/31/2026 09:07 PM
Facebook Telegram Linkin
មនុស្ស ២៥នាក់ស្លាប់ និង ៤៤នាក់រងរបួស ក្នុងគ្រោះថ្នាក់រថយន្តក្រុង នៅភាគខាងជើងអាល់ហ្សេរី
07/31/2026 09:07 PM
Facebook Telegram Linkin
មន្រ្តី UN៖ អាមេរិកឡាទីន នឹងមើលឃើញបាតុភូតអែល នីញ៉ូដ៏ខ្លាំងកា្លបំផុត
07/31/2026 09:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.