នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ឆមាសទី១ឆ្នាំ២០២៦ កម្ពុជានាំចេញគ្រាប់ស្វាយចន្ទី មានទឹកប្រាក់ជាង ១,១ ពាន់លានដុល្លារអាមេរិក
មូលនិធិអភិវឌ្ឍន៍ EDFមើលឃើញថា ធុរកិច្ចបណ្តុះបណ្ដាលថ្មី និងSME ជាក្បា​ល​ម៉ាស៊ីន​ជំរុញ​កំណើន​សេដ្ឋកិច្ច​កម្ពុជា
លំហូរទឹកប្រាក់វិនិយោគចូលកម្ពុជានៅឆមាសទី១ ឆ្នាំ២០២៦ មាន ៤.៣ ប៊ីលានដុល្លារ កើនឡើង ៧ដង
កម្ពុជាមានរោងចក្រ-សហគ្រាសក្នុងវិស័យកម្មន្តសាលកំពុងដំណើរការ បានកើនដល់ ៤៧,៧ ពាន់

សេដ្ឋកិច្ច និង កសិកម្ម

ចំណូលកំពង់ផែស្វយ័តភ្នំពេញ សម្រេចបានជាង​ ៣០លានដុល្លារ ក្នុងរយៈពេល១១ខែ

2021/12/13 08:13:06 pm        642
Facebook Telegram Linkin
ភ្នំពេញ៖ ប្រាក់ចំណូល​របស់​កំពង់​ផែ​ស្វយ័ត​ភ្នំពេញ​ ដែលជា​ក្រុមហ៊ុន​ចុះបញ្ជី​នៅ​ផ្សា​រមូល​ប​ត្រ​កម្ពុជា (CSX) ក្នុង​រយៈពេល ១១​ខែ​ឆ្នាំ​២០២១ មាន​ប្រមាណ​ជាង ៣០​លាន​ដុល្លារ កើនឡើង​ប្រហែល ១៤​ភាគរយ​បើ​ធៀប​នឹង​រយៈពេល​ដូចគ្នា​ឆ្នាំ​២០២០។ទិន្នន័យ​របស់កំពង់​ផែ​ស្វយ័ត​ភ្នំពេញ​ ចុះ​កាលបរិច្ឆេទ​ថ្ងៃទី​៩ ខែធ្នូ ឆ្នាំ​២០២១ បាន​បង្ហាញថា ចាប់ពី​ខែមករា ដល់​ខែ វិច្ឆិកា ឆ្នាំ​២០២១ ចំណូល​ដែល ក​.​ស​.​ភ រកបាន​មាន​ចំនួន​សរុប ៣០,៣៩ លានដុល្លារ កើនឡើង ១៤​ភាគរយ​បើ​ធៀប​នឹង​រយៈពេល​ដូចគ្នា​ឆ្នាំ​២០២០។យោងតាមកំពង់​ផែ​ស្វយ័ត​ភ្នំពេញ ក្នុងចំណោម​ចំណូល​ទាំងនោះ​រួមមាន ចំណូល​ពី​ប្រតិបត្តិការ​ផែ​(Port Operation) មាន​ចំនួន ២៤,៣៧លាន​ដុល្លារ កើន ១៦​ភាគរយ ធៀប​រយៈពេល​ដូចគ្នា​ឆ្នាំ​២០២០, ចំណូល​ពី​អាជ្ញាធរ​ផែ​ ៣,២៣​លាន​ដុល្លារ ធ្លាក់ចុះ ៣​ភាគរយ​, ចំណូល​ពី​សេវាកម្ម​ផ្សេងៗ ៣០ម៉ឺន​ដុល្លារ កើន ៨៩​ភាគរយ និង​ចំណូល​ផ្សេងៗ​ ២,៤៧លានដុល្លារ កើន ១២​ភាគរយ​។ដោយឡែក​សម្រាប់​ខែ វិច្ឆិកា ចំណូល​សរុប​ដែល កំពង់​ផែ​ស្វយ័ត​ភ្នំពេញ​​ ទទួល​បាន​មាន​ចំនួន ២,៧៦លាន​ដុល្លារ កើនឡើង ១៩​ភាគរយ​ពី​ចំនួន ២,៣៣លាន​ដុល្លារ​ក្នុង​ខែវិច្ឆិកា ឆ្នាំ​២០២០​។ ក្នុងនោះ​ចំណូល​ពី​ប្រតិបត្តិការ​ផែ មាន​ចំនួន ២,២៩លាន​ដុល្លារ កើន ២៤​ភាគរយ​​។ប្រាក់ចំណូល​ប្រចាំឆ្នាំ​២០២០ របស់ ក​.​ស​.​ភ (​មិនទាន់​ធ្វើ​សវនកម្ម​) មាន​ចំនួន ២៩,៤៨ លាន​ដុល្លារ ធ្លាក់ចុះ ៦ ភាគរយ​បើ​ធៀប​នឹង ៣១,៣១ លាន​ដុល្លារ (​ធ្វើ​សវនកម្ម​រួច​) កាលពី​ឆ្នាំ ២០១៩​៕អត្ថបទ៖ វណ្ណៈ

រាជរដ្ឋាភិបាល កំណត់យកអាករលើតម្លៃបន្ថែម ១០ភាគរយ ចំពោះប្រតិបត្តិករ​ធ្វើ​អាជីវកម្ម​ក្រៅ​ប្រទេស

2021/12/13 07:47:02 pm        1058
Facebook Telegram Linkin
ភ្នំពេញ៖ រាជរដ្ឋាភិបាលកំណត់យកអាករលើតម្លៃបន្ថែម តាមអត្រា ១០% ពីអនិវាសនជន (ប្រតិបត្តិករក្រៅប្រទេស) ដែលធ្វើប្រតិបត្តិការពាណិជ្ជកម្មតាមប្រព័ន្ធអេឡិចត្រូចនិច សម្រាប់ការផ្គត់ផ្គង់សេវាដល់ និវាសនជន (ដែលជាអតិថិជន) នៅក្នុងព្រះរាជជាណាចក្រកម្ពុជា។អគ្គនាយកដ្ឋានពន្ធដារចេញសេចក្តីណែនាំ ស្តីពីការអនុវត្តអាករលើតម្លៃបន្ថែម ចំពោះ​ប្រតិបត្តិការ​ពាណិជ្ជកម្មតាមប្រព័ន្ធ អេឡិចត្រូចនិច ដែលផ្គត់ផ្គង់​ទំនិញឌីជីថល​ ឬសេវាឌីជីថល ឬ​រាល់​សកម្មភាពពាណិជ្ជកម្មតាមប្រព័ន្ធអេឡិចត្រូនិក ​ដោយអ្នកជាប់ពន្ធ​ អនិវាសជន ពីក្រៅ​ព្រះរាជា​ណា​ចក្រកម្ពុជា ដល់និវាសនជនក្នុងស្រុក រាជរដ្ឋាភិបាលនឹងត្រូវកំណត់យកអាករលើតម្លៃបន្ថែម។ ចំពោះការ​ផ្គត់ផ្គង់ទំនិញឌីជីថល​ ឬសេវាឌីជីថល ឬរាល់សកម្មភាពពាណិជ្ជកម្ម​តាម​ប្រព័ន្ធ​អេឡិចត្រូនិក ពីក្រៅព្រះរាជាណាចក្រកម្ពុជា មកក្នុងព្រះរាជាណាចក្រកម្ពុជា អ្នកជាប់ពន្ធ​អនិវាសនជន (ប្រតិបត្តិករក្រៅប្រទេស) ​ដល់អតិថិជននៅក្នុង​ព្រះរាជាណាចក្រកម្ពុជា ត្រូវមាន​កាតព្វកិច្ច​ប្រមូលអាករលើតម្លៃបន្ថែមតាមអត្រា ១០% ពីបុគ្គលនិវាសនជន ​ដែលមិនបានចុះបញ្ជី តាម​របបស្វ័យប្រកាស ​និងត្រូវដាក់លិខិតប្រកាសអាករលើតម្លៃបន្ថែមប្រចាំខែ ព្រមទាំងបំពេញ​ព័ត៌មាន​លម្អិត និង​បង់អាករលើតម្លៃបន្ថែមជូនអគ្គនាយកដ្ឋានពន្ធដារ។ជុំវិញអាករតម្លៃបន្លែម លោកឧកញ៉ា ឈិន កេន ប្រធានសមាគមបច្ចេកវិទ្យាឌីជីថលនៃកម្ពុជាថា វិស័យ​បច្ចកវិទ្យាបានកំពុងរីកចម្រើននៅក្នុងពិភពលោក ដែលនិន្នាការនេះកម្ពុជាកំពុងតែក្តោប​យក​ការប្រើប្រាស់បច្ចេកវិទ្យា ​ក្នុងការទំនាក់ទំនង ជាពិសេសសម្រាប់បម្រើការធ្វើអាជីវកម្ម។ ស្របតាមបរិបថរីកចម្រើននេះ វាគឺជាឱកាសកម្ពុជា ដើម្បីប្រមូល ចំណូលអាករលើតម្លៃបន្ថែម ទោះបី​ការប្រមូលចំណូលប្រភេទនេះតិច ឬច្រើនក្តី រាជរដ្ឋាភិបាលអាចសន្សំ ដើម្បី​ពូនជ្រុំ​ជា​ទុនសម្រាប់ការអភិវឌ្ឍប្រទេស។បន្ថែមពីលើនេះ លោកឧកញ៉ា បានស្នើសុំដល់ស្ថាប័នអនុវត្ត ពន្យាពេលនៃការចុះបញ្ជីបន្ត ដើម្បី​ទុកឱកាស ​ដល់ក្រុមហ៊ុនមានលទ្ធភាពចុះបញ្ជី ​ ខណៈក្រុមហ៊ុនមួយចំនួននៅតែមានផលវិបាក ក្នុង​ស្ថានភាពនៃវិបត្តិជម្ងឺកូវីស ១៩នេះ៕ អត្ថបទ៖ សុន រ៉ាឌី

World Bank ព្យាករកំណើនសេដ្ឋកិច្ចកម្ពុជា ២,២ភាគរយឆ្នាំ២០២១

2021/12/09 11:48:06 pm        850
Facebook Telegram Linkin
ភ្នំពេញ៖ ធនាគារពិភពលោក ធ្វើបច្ចុប្បន្នភាពចុងក្រោយ បានបង្ហាញថា ផលិតផលសរុបក្នុង​ស្រុក​របស់កម្ពុជាក្នុងឆ្នាំ២០២១​ ត្រូវបានព្យាករ ​នឹងមានកំណើនត្រឹមតែ ២,២ភាគរយ នឹងនៅឆ្នាំ២០២២ រំពឹងថា នឹងបន្តងើបឡើងដល់ ៤,៥ភាគរយ ប៉ុន្តែដំណើរការនៃការងើបឡើងនេះ នឹងជួបហានិភ័យទៅវិញ ប្រសិនបើមានការផ្ទុះឡើងនៃវីរុសនេះជាថ្មីម្តងទៀត។លោកស្រី ម៉ារីយ៉ាម សាលីម (Maryam Salim) ប្រធានគ្រប់គ្រងនៃធនាគារពិភពលោក​ប្រចាំ​ប្រទេស​កម្ពុជា លើក​​ឡើងនៅក្នុងការធ្វើបច្ចុប្បន្នភាពសេដ្ឋកិច្ចកម្ពុជា ថ្ងៃទី៩ខែធ្នូ ឆ្នាំ២០២១នេះថា ក្នុង​ពេលបច្ចុប្បន្ន កម្ពុជា​កំពុង​តែ​រស់​នៅ​ជាមួយជំងឺកូវីដ-១៩ ប្រជាជនចំនួនច្រើនលើសលប់​បាន​ចាក់វ៉ាក់សាំង​ការពាររួច​ ហើយរដ្ឋាភិបាល​ក៏បាន​ចាប់​ផ្តើម​បើក​ប្រទេសឱ្យដំណើរការឡើងវិញ​សឹងតែគ្រប់​ផ្នែកផងដែរ​ ដោយបន្តអនុវត្តវិធានការការពារ​សុខភាព​ដែល​មាន​ជា​ធរ​មាន​ស្រាប់។ ពាក់ព័ន្ធសេដ្ឋកិច្ច តាមការធ្វើបច្ចុប្បន្នភាពចុងក្រោយរបស់ធនាគារពិភពលោក ក្នុងឆ្នាំ២០២១ នេះ ផលិត​ផល​សរុប​ក្នុងស្រុករបស់កម្ពុជា ត្រូវបានព្យាករថា ​នឹងមានកំណើនត្រឹមតែ ២,២ភាគរយ​ប៉ុណ្ណោះ ​ដោយសារវិស័យសេវាកម្ម រួម​មាន​វិស័យ​ទេសចរណ៍, និងវិស័យសំណង់ ​និងអចលនទ្រព្យ នៅមានកំណើនយឺត។ ទន្ទឹមគ្នានេះ ​វិស័យជា​ប្រពៃណី​ក្នុង​ការ​ជំរុញ​កំណើន ​ជាពិសេសឧស្សាហកម្មកាត់ដេរ, ទំនិញ​ធ្វើដំណើរ ​និងស្បែកជើង ​និងឧស្សាហកម្មផលិតកង់ រួមទាំង​វិស័យ​កសិកម្មផង នៅតែបន្តដើរតួក្នុង​ការ​ទ្រទ្រង់​ដល់ការស្តារសេដ្ឋកិច្ចឱ្យងើបឡើងវិញពីវិបត្តិកូវីដ-១៩។​ ចំណែកការ​នាំ​ចេញ, ផលិត​សម្រាប់​ការ​នាំចេញបានរើបឡើងវិញ ​ជាពិសេសផលិតផលកសិកម្មមានការកើនឡើង ក្នុង​នោះឱនភាព​ផ្នែក​ពាណិជ្ជ​កម្ម ​ក៏បានរីកទំហំកាន់តែធំគួរឱ្យកត់សម្គាល់ផងដែរ។ ជុំវិញកំណើនសេដ្ឋកិច្ចនេះដែរ បើតាមការព្យាករទុកសម្រាប់ពេលខាងមុខ ​កំណើនសេដ្ឋកិច្ច​របស់​កម្ពុជា​នឹង​បន្ត​ងើប​ឡើង​វិញបន្ទាប់ពីវិធានការរឹតត្បិតពាក់ព័ន្ធ​នឹងកូវីដ-១៩ ត្រូវបានដកចេញ។ នៅក្នុងឆ្នាំ ២០២២ ​សេដ្ឋកិច្ចត្រូវបានរំពឹងថា នឹងបន្តងើបឡើងវិញ ចំពេលមានការរឹតបន្តឹង​ទាក់ទង​នឹង COVID-19 ដោយកំណើន GDP ត្រូវបានព្យាករណ៍ថា នឹងឈានដល់ ៤.៥% ប៉ុន្តែដំណើរការនៃ​ការ​ងើប​ឡើងនេះ ​នឹង​ជួប​ហានិ​ភ័យ​ទៅ​វិញ ​ប្រសិន​បើមានការផ្ទុះឡើងនៃវីរុសនេះជាថ្មីម្តងទៀត៕ អត្ថបទ៖ សុន រ៉ាឌី

កម្ពុជាជំរុញកិច្ចសហប្រតិបត្តិការធុរកិច្ច និងសេដ្ឋកិច្ចក្រុមប្រទេសនិយាយភាសាបារាំង

2021/12/08 08:03:55 pm        271
Facebook Telegram Linkin
ភ្នំពេញ៖ កម្ពុជាបង្ហាញពីឆន្ទៈក្នុងការពង្រឹងទំនាក់ទំនងពាណិជ្ជកម្មសេដ្ឋកិច្ច និងចំណងការទូត ជាមួយប្រទេសជាសមាជិកអង្គការ OIF ដែលកត្តាទាំងនេះនឹងផ្តល់សារៈសំខាន់ដល់កម្ពុជា និងប្រទេសក្នុងតំបន់ ជាពិសេសចំណងសហប្រតិបត្តិការលើពហុវិស័យ រួមមាន វប្បធ៌ម ទេសចរណ៍ សង្គមកិច្ច និងចូលរួមចំណែកស្តារសេដ្ឋកិច្ចឡើងវិញ បន្ទាប់ពីទទួលផលប៉ះពាល់ដោយជំងឺរាតត្បាតសកលកូវីដ-១៩។នេះជាការលើកឡើងរបស់ឯកឧត្តម ប៉ាន សូរស័ក្ត មន្ត្រីក្រសួងពាណិជ្ជកម្ម អញ្ជើញជាអធិបតី​ប្រកាស​បើកកម្មវិធី ​ដែលធ្វើឡើងនៅរាជធានីភ្នំពេញ ក្រោមកិច្ចសហការរៀបចំដោយក្រសួង​ការ​បរទេស និងសហប្រតិបត្តិការអន្តរជាតិ និងអង្គការក្រុមប្រទេសនិយាយភាសារបារាំង។ កម្មវិធីនេះក៏មានការអញ្ជើញចូលរួមពីសំណាក់ឯកអគ្គរដ្ឋទូតបារាំងប្រចាំកម្ពុជា ក្រុមប្រឹក្សា​អភិវឌ្ឍន៍​កម្ពុជា តំណាងអន្តរក្រសួងស្ថាប័ន ដៃគូរអភិវឌ្ឍន៍ និងតំណាងវិស័យឯកជនជាច្រើនរូប។ក្នុងកម្មវិធីនេះ ឯកឧត្តមរដ្ឋមន្ត្រីបានស្វាគមន៍ និងគាំទ្រដល់បេសកកម្មសេដ្ឋកិច្ច និងពាណិជ្ជកម្ម​ហ្វ្រង់កូហ្វូនី​ ដែលត្រូវបានផ្តួចផ្តើមដោយអង្គការក្រុមប្រទេសនិយាយភាសារបារាំង ក្នុងគោល​បំណង​បង្កើតទំនាក់ទំនងសេដ្ឋកិច្ច ​រវាងប្រទេសប្រើប្រាស់ភាសាបារាំង​ និងប្រទេសក្នុងតំបន់។ជាមួយគ្នានេះ ឧត្តមរដ្ឋមន្ត្រីបានបញ្ជាក់ពីឆន្ទៈក្នុងការពង្រឹងទំនាក់ទំនងពាណិជ្ជកម្ម សេដ្ឋកិច្ច និងចំណងការទូត ជាមួយប្រទេសជាសមាជិកអង្គការក្រុមប្រទេសនិយាយភាសារបារាំង ដែលកត្តាទាំងនេះ​នឹងផ្តល់សារៈសំខាន់ដល់កម្ពុជា និងប្រទេសក្នុងតំបន់ ជាពិសេសចំណង​សហប្រតិបត្តិការ​លើពហុវិស័យ រួមមាន វប្បធ៌ម ទេសចរណ៍ សង្គមកិច្ច និងចូលរួមចំណែក​ស្តារសេដ្ឋកិច្ច​ឡើងវិញ បន្ទាប់ពីទទួលផលប៉ះពាល់ដោយជម្ងឺរាតត្បាតសកល កូវីដ-១៩។ទន្ទឹមនឹងនេះ ឯកឧត្តមរដ្ឋមន្ត្រី បានលើកទឹកចិត្តដល់ប្រតិបត្តិករសេដ្ឋកិច្ច និងវិនិយោគិន​ក្រុម​ប្រទេសនិយាយ​ភាសារបារាំង មកពីគ្រប់ទ្វីបទាំងអស់ ឱ្យពិនិត្យពីសក្តានុពលពាណិជ្ជកម្ម​ដែលកម្ពុជាមាន និងកាលានុវត្តភាពថ្មីៗ ហើយអាចជ្រើសរើសកម្ពុជាជាទីតាំងសម្រាប់​ពង្រីក​សហប្រតិបត្តិការថ្មីក្នុងតំបន់ និងចូលរួមក្នុងខ្សែច្រវ៉ាក់តំលៃដែលកំពុងមានឧត្តមភាពរីកចម្រើន។គួរបញ្ជាក់ផងដែរថា ប្រទេសជាសមាជិក និងប្រទេសអង្កេតការទាំងអស់​របស់​អង្គការ​ក្រុមប្រទេស​និយាយភាសារបារាំង​ មានសរុបចំនួន ៨៨ប្រទេស ហើយនៅឆ្នាំ២០២០ កម្ពុជាសម្រេច​បានទំហំពាណិជកម្មសរុប ៩,៦ប៊ីលានដុល្លាអាមេរិកជាមួយ​ប្រទេសក្រុមប្រទេស​និយាយ​ភាសារ​បារាំង ដោយក្នុងនោះកម្ពុជាបាននាំចេញ ៦,៥ប៊ីលានដុល្លាអាមេរិក កើនឡើងប្រមាណ ៤% ធៀបនឹងឆ្នាំ២០១៩៕អត្ថបទ៖ វណ្ណៈ 

បុរី ខេភី ម៉ន ដានី បើកលក់គម្រោងវីឡាថ្មីគ្រប់ប្រភេទ តម្លៃត្រឹមតែជាង ២ម៉ឺនដុល្លារ

2021/12/06 06:31:23 pm        94
Facebook Telegram Linkin
ភ្នំពេញ ៖ ក្រុមហ៊ុន ខេភី (KP) ម៉ន ដានី បានប្រកាសលក់វីឡាថ្មីគ្រប់ប្រភេទ ដែលមានតម្លៃចាប់ពី ២២.០០០ដុល្លារ ដល់ ៤៤.០០០ដុល្លារអាម៉េរិក តែប៉ុណ្ណោះ និងបញ្ចុះថ្លៃរហូត ២០% ត្រឹមបំណាច់ឆ្នាំ២០២១នេះជូនដល់អតិថិជនដែលមានបំណងចង់បានផ្ទះវីឡាទំនើប ទាន់សម័យ និងរស់នៅដោយផាសុខភាព។​នៅក្នុងឱកាសពិធីចែកមហារង្វាន់សរុប ៤០ម៉ឺនដុល្លារ ជូនអតិថិជននៅគម្រោងទី២៩ ស្ថិតនៅលើផ្លូវជាតិលេខ៣ កាលពីថ្ងៃទី៥ ខែធ្នូ ឆ្នាំ២០២១កន្លងទៅនេះ លោក ឃុនថាវង្ស ផងផាន់ និងលោកស្រី ម៉ន ដានី ម្ចាស់លំនៅដ្ឋានវីឡា ខេភី ម៉ន ដានី បានមានប្រសាសន៍ថា ក្រៅពីតម្លៃពិសេសជូនអតិថិជន ក៏មានបន្ថែមសម្ភារៈបំពាក់ជាច្រើនផ្សេងទៀត ដូចជា ម៉ាស៊ីនត្រជាក់ ទូរដាក់ចានលើក្រោម ចង្ក្រានអគ្គិសនី ម៉ាស៊ីនបឺតផ្សែង គ្រឿងសម្ភារៈបន្ទប់ទឹក និងម៉ាស៊ីនងូតទឹកក្តៅទឹកត្រជាក់ទៀតផង។ ទាក់ទងនឹងគោលបំណងនៃកម្មវិធីផ្តល់រង្វាន់នេះ ម្ចាស់លំនៅដ្ឋានវីឡា ខេភី ម៉ន ដានី បានបញ្ជាក់ដូច្នេះថា​លោក ឃុនថាវង្ស បានបញ្ជាក់បន្ថែមថា ចក្ខុវិស័យរបស់ ខេភី ម៉ន ដានី មិនត្រឹមតែផ្តល់លំនៅដ្ឋានទំនើបជូនអតិថិជនប៉ុណ្ណោះទេ តែក៏ជាការផ្តល់ នូវឱកាសវិនិយោគដែលមានប្រាក់ចំណេញខ្ពស់ក្នុងរយៈពេលឆាប់ជូនអតិថិជនដែលតែងតែគាំទ្រផងដែរ។សូមជម្រាបថា លំនៅដ្ឋានវីឡាប្រណីត ខេភី ម៉ន ដានី គម្រោងទី២៩ ស្ថិតនៅភូមិភានសា ឃុំព្រះនិពា្វន្ត ស្រុកគងពិសី ខេត្តកំពង់ស្ពឺ ចម្ងាយ២៩គីឡូម៉ែត្រពីទីក្រុងភ្នំពេញ។ គម្រោងមួយនេះ សាងសង់ជាវីឡាទំនើបចំនួន ៥ពាន់ខ្នង អមដោយរុក្ខជាតិបៃតងស្រងាត់ ហ៊ុមព័ទ្ធដោយបឹង ទីធ្លាហាត់ប្រាណលំហែកាយ ដែលពោរពេញទៅដោយបរិយាកាសធម្មជាតិ និងមានចំងាយតែ១គីឡូម៉ែត្រពីផ្លូវក្រវ៉ាត់ក្រុងទី៣ តែប៉ុណ្ណោះ។ រហូតមកទល់បច្ចុប្បន្ន គម្រោងទី២៩នេះ ទទួលបានការគាំទ្រយ៉ាងខ្លាំងពីភ្ញៀវគ្រប់ទិសទី គិតចាប់ពីថ្ងៃលក់ជាផ្លូវការ កាលពីថ្ងៃទី២០ ខែមករា ឆ្នាំ២០២១ លក់ផ្ទះចេញអស់ជាង ៨០%ហើយ៕​អត្ថបទ ៖ បូរ៉ាវី

កម្ពុជា-ចិន ឯកភាពគ្នាជំរុញទំហំពាណិជ្ជកម្មទ្វេភាគី ឱ្យដល់១០ប៊ីលានដុល្លារ នៅឆ្នាំ២០២៣

2021/12/06 06:46:21 pm        477
Facebook Telegram Linkin
ភ្នំពេញ៖ ប្រទេសកម្ពុជា និងប្រទេសចិន បានបញ្ជាក់ជាថ្មី លើការជំរុញទំហំពាណិជ្ជកម្មទ្វេភាគីឱ្យឡើងដល់ ១០ប៊ីលានដុល្លារ នៅឆ្នាំ២០២៣ខាងមុខ ស្របពេលដែលប្រទេសទាំងពីរ នឹងអនុវត្តកិច្ចព្រមព្រៀងពាណិជ្ជកម្មសេរីទ្វេភាគីនៅដើមឆ្នាំក្រោយ។ការបញ្ជាក់នេះ បានធ្វើឡើងក្នុងជំនួបទ្វេភាគីរវាងឯកឧត្តម ប្រាក់ សុខុន ឧបនាយករដ្ឋមន្រ្តី និងជារដ្ឋមន្រ្តីការបរទេស និងកិច្ចសហប្រតិបត្តិការអន្តរជាតិ និងឯកឧត្តម វ៉ាង យី ទីប្រឹក្សារដ្ឋ និងជារដ្ឋមន្រ្តីការបរទេស នៃសាធារណរដ្ឋប្រជាមានិតចិននៅប្រទេសចិន។យោងតាមរបាយការណ៍ក្រសួងពាណិជ្ជកម្ម ក្នុងរយៈពេលចំនួន១០ខែ ក្នុងឆ្នាំ២០២១នេះ ទំហំពាណិជ្ជកម្មទ្វេភាគី រវាងចិននិងកម្ពុជា ​មានចំនួនទឹកប្រាក់កើនរហូតដល់ ៨ ៩៣១ លានដុល្លារ​អាមេរិក មានកំណើន ៣៨.៥៦ភាគរយ បើធៀបនឹងរយៈពេលដូចគ្នា កាលពីឆ្នាំ២០២០។ យោងតាមសេចក្ដីប្រកាសព័ត៌មានរបស់ក្រសួងការបរទេស ស្ដីពីលទ្ធផលនៃទស្សនកិច្ចរបស់ ឯកឧត្តម ប្រាក់ សុខុន ​ទៅកាន់ខេត្តជឺជាំង ប្រទេសចិន ​នាថ្ងៃទី៣-៥ ខែធ្នូ ឆ្នាំ២០២១ បានឱ្យដឹងថា ប្រមុខការទូតកម្ពុជា-ចិន បាន​កត់សម្គាល់ដោយការ ពេញចិត្តនូវការរីកចំរើននៃពាណិជ្ជកម្មទ្វេភាគី ក្នុងអំឡុងពេលនៃជំងឺរាតត្បាតសាកលកូវីដ-១៩។ភាគីទាំងពីរ បានសម្តែងការអបអរសាទរ ការចូលជាធរមាននៃកិច្ចព្រមព្រៀងពាណិជ្ជកម្មសេរី កម្ពុជា-ចិន ​និងកិច្ចព្រមព្រៀងភាពជាដៃគូសេដ្ឋកិច្ច ​គ្រប់ជ្រុងជ្រោយក្នុងតំបន់ ​នៅដើមឆ្នាំក្រោយ ហើយបានប្តេជ្ញាចិត្តនឹងទាញយកប្រយោជន៍ឱ្យបានច្រើនពីកិច្ចព្រមព្រៀងទាំងពីរខាងលើ ដើម្បីជំរុញពាណិជ្ជកម្ម ទ្វេភាគីរវាងប្រទេសទាំងពីរឱ្យដល់ ១០ប៊ីលានដុល្លារអាមេរិក នៅឆ្នាំ២០២៣។នៅក្នុងដំណើរទស្សនកិច្ចនេះ រដ្ឋមន្ត្រីការបរទេសទាំងពីរ ក៏បានធ្វើជាសាក្សីក្នុងពិធីចុះហត្ថលេខា លើកិច្ចព្រមព្រៀងសហប្រតិបត្តិការស្តីពី ការត្រួតពិនិត្យអនាម័យសត្វ ​និងភូតគាមអនាម័យ និង សុវត្ថិភាពចំណីអាហារ រវាងកម្ពុជា និងចិនផងដែរ៕អត្ថបទ៖ វណ្ណៈ

ចិនកំពុងពិនិត្យវាយតម្លៃលើផ្លែមៀន និងត្រីប្រារបស់កម្ពុជា នាំចេញផ្ទាល់ទៅកាន់ទីផ្សារចិន

2021/12/06 06:29:24 pm        790
Facebook Telegram Linkin
ភ្នំពេញ៖ ប្រទេសចិន បាននិងកំពុងសិក្សា និងវាយតម្លៃលើស្តង់ដារភូតគាមអនាម័យ លើផ្លែមៀន និងត្រីប្រារបស់កម្ពុជា ដើម្បីជំរុញការនាំចេញផលិតផលទាំងពីរនេះ ដោយផ្ទាល់ទៅកាន់ប្រទេសចិន។ឯកឧត្តម វ៉ាង វិនធៀន ឯកអគ្គរដ្ឋទូតចិនប្រចាំកម្ពុជា នៅព្រឹកថ្ងៃទី០៦ ខែធ្នូ ឆ្នាំ២០២១នេះ បាន​ប្រកាស​ដំណឹងល្អសម្រាប់កម្ពុជា ដោយភាគីចិនបានសម្រេចក្នុងការសិក្សា និងវាយ​តម្លៃផ្នែក​ហានិភ័យ ផ្នែកភូតគាមអនាម័យ លើផ្លែមៀន និងត្រីប្រារបស់កម្ពុជា តាមរយៈប្រព័ន្ធវីដេអូពីចម្ងាយ ដែលជាវិធានការសំខាន់។ឯកឧត្តម បន្តថា តាមគោលការណ៍ការសិក្សាពិនិត្យវាយតម្លៃផ្នែកហានិភ័យនេះ ត្រូវធ្វើការចុះពិនិត្យ និងសិក្សាទៅទីតាំងចំការ និងដល់ទីតាំងចិញ្ចឹមត្រីដោយផ្ទាល់ ប៉ុន្តែដោយសារវិបត្តិកូវីដ១៩ ធ្វើអ្នក​ជំនាញ​របស់ចិន​ពិបាក​ធ្វើដំណើរ ​ទើបភាគីចិន ឯកភាពក្នុងការវាយតម្លៃ​តាមរយៈប្រព័ន្ធវីដេអូ​ពី​ចម្ងាយ។បើតាមឯកឧត្តម វ៉ាង វិនធៀន បន្ទាប់ពីការសិក្សាវាយតម្លៃនេះរលូនល្អ ផ្លែមៀនរបស់កម្ពុជា នឹង​អាច​នាំ​ចេញ​ទៅចិននៅរដូវប្រមូលផលឆ្នាំក្រោយ និងត្រីប្រាអាចនាំចេញបានក្នុងពេលដ៏ខ្លីខាងមុខនេះ។ថ្លែងក្នុងពិធីសម្ពោធផ្លូវជាតិលេខ១១ ​នៅខេត្តព្រៃវែង នៅព្រឹកថ្ងៃទី៥ ខែធ្នូ ឆ្នាំ២០២១នេះ ឯកឧត្តម វ៉ាង វិនធៀន មានប្រសាសន៍ថា ភាគីចិនបានធ្វើការសម្រេចចិត្តក្នុងសិក្សា និងវិភាគហានិភ័យលើ​ផ្លែ​មៀន និងត្រីប្រារបស់កម្ពុជា ​ដោយតាមរយៈវីដេអូពីចម្ងាយ ជាវិធានការសំខាន់មួយ​ដើម្បី​អនុវត្ត​កូសង់ស៊ីស ក្នុងការប្រជុំតាមរយៈប្រព័ន្ធវីដេអូរវាងឯកឧត្តមនាយករដ្ឋមន្ត្រី លី ខឺឈាង ជាមួយ​សម្តេចតេជោ នាយករដ្ឋមន្ត្រី ប្រសិនរលូនផ្លែមៀនកម្ពុជា នឹងអាចនាំចេញទៅកាន់ទីផ្សារប្រទេស​ចិន​នាពេលរដូវប្រមូលផលលើកក្រោយ រីឯត្រីប្រាវិញ នឹងនាំចេញទៅកាន់ប្រទេសចិន​ក្នុង​ពេល​ដ៏ខ្លីខាងមុខ។បើតាមអគ្គនាយកដ្ឋានកសិកម្ម ​បច្ចុប្បន្ននេះ​ផ្ទៃដីដាំមៀនប៉ៃលិន​ មានចំនួនប្រមាណ៨ពាន់ហិកតា។ មៀនប៉ៃលិន​ ភាគច្រើនដាំដុះនៅខេត្តចំនួនរួមមាន​ ប៉ៃលិន​ បន្ទាយមានជ័យ ​បាត់ដំបង និងពោធិ៍សាត់៕អត្ថបទ៖ វណ្ណៈ 

អាជ្ញាធរខេត្តកំពង់ធំ លើកទឹកចិត្តដល់ម្ចាស់សហគា្រស បន្តកែច្នៃគ្រឿងយន្តកសិកម្ម ដើម្បីបង្កើនភាពងាយស្រួលដល់កសិករ

2021/12/04 08:39:03 pm        70
Facebook Telegram Linkin
កំពង់ធំ៖ អាជ្ញាធរខេត្តកំពង់ធំ លើកទឹកដល់ម្ចាស់សហគ្រាសកែច្នៃគ្រឿងយន្តកសិកម្មបង្កើនការផលិតបន្ថែម ដើម្បីបំពេញតម្រូវការ ផ្តល់ភាពងាយស្រួលដល់កសិករអនុវត្តផ្តាល់ទទួលបានផលច្រើន និងកាត់បន្ថយការប្រើការប្រើប្រាស់កម្លាំងពលកម្ម។ នៅព្រឹកថ្ងៃទី០៤ ខែធ្នូ ឆ្នាំ២០២១ លោក ព្រឹម រដ្ឋា អភិបាលរងខេត្តកំពង់ធំ អញ្ជើញផ្តល់ប័ណ្ណសរសើរដល់សហគ្រាសកែច្នៃគ្រឿងយន្តកសិកម្ម(០០៧ AI)។ ជាមួយគ្នានេះលោក លើកទឹកចិត្តដល់ម្ចាស់សហគា្រសបន្តកែច្នៃគ្រឿងយន្តកសិកម្ម ដើម្បីបង្កើនភាពងាយស្រួលដល់កសិករក្នុងការបង្ករបង្កើនផល។ លោកបន្តថា គ្រឿងយន្តកសិកកម្ម គឺសម្ភារៈដែលមិនអាចខ្វះសម្រាប់កសិករអនុវត្ត នៅលើវាលស្រែ និងចំការដោយផ្ទាល់ បើទោះបីជាកម្ពុជាមិនទាន់មានរោងចក្រផលិតគ្រឿងយន្តកសិកម្មក៏ដោយ ប៉ុន្តែកសិកប្រមាណ៨០% នៃប្រជាជនសរុបក្នុងប្រទេសកម្ពុជា ស្ទើរគ្រប់រូបត្រូវការជាចាំបាច់យកទៅប្រើប្រាស់! ក្នុងនោះសម្ភារៈ ឬគ្រឿងយន្តខ្លះមិនទាន់អាចបំពេញនូវតម្រូវការរបស់កសិករបានឡើយ ដូច្នេះត្រូវមានការកែច្នៃដោយស្នាដៃកូនខ្មែរបន្ថែម ដើម្បីយកទៅបម្រើលើការដាំដុះស្រូវ និងដំណាំកសិឧស្សាហកម្មផ្សេងទៀត។ លោកបន្ថែមថា ក្នុងខេត្តកំពង់ធំ មានប្រជាពលរដ្ឋប្រមាណ៨៥% មានមុខរបរ ជាកសិករ។ ក្នុងនោះផ្ទៃដីជាង២៣ម៉ឺនហិកតា សម្រាប់ដំណាំស្រូវដែលស្ថិតនៅក្រោមផ្លូវជាតិលេខ៦ អនុគ្រោះផ្នែកការដាំដុះដំណាំស្រូវ វស្សា ស្រូវបណ្តេញទឹក ស្រូវបង្កើនរដូវ និងស្រូវប្រាំងជាដើម។ ខាងលើផ្លូវជាតិលេខ៦ អនុគ្រោះផ្នែកដំណាំឈើហូបផ្លែ និងដំណាំកសិកឧស្សាហកម្ម! ដែលដំណាំកៅស៊ូ មានចំនួន ២៨ក្រុមហ៊ុន កំពុងដាំដុះលើផ្ទៃដី ជាង៧៨០០០ហិកតា។ ដំណាំស្វាយចន្ទីរដាំដុះលើផ្ទៃដីប្រមាណជាង៧៨០០០ហិកតា និងដំណាំស្វាយលើផ្ទៃដីជាង៨០០០ហិកតា ផងដែរ។ លោក អុល ចំណាប់ ម្ចាស់សហគ្រាសកែច្នៃគ្រឿងយន្តកសិកម្ម (០០៧ AI) ស្ថិតនៅក្រុងស្ទឹងសែន ខេត្តកំពង់ធំ លើកឡើងថា ដោយក្តីស្រឡាញ់វិស័យកសិកម្ម និងចេះផ្នែកគ្រឿងយន្តផងនោះ រូបលោកបានសម្រេចចិត្តបង្កើតសហគ្រាសកែច្នៃគ្រឿងយន្តកសិកម្មនេះឡើង និងបានធ្វើការចុះបញ្ជីការពារម៉ាកប្រើប្រាស់ និងកែច្នៃ មិនចម្លងម៉ូដ ពីសហគ្រាសដ៏ទៃ។ លោកបន្តថា ដោយសារប្រទេសកម្ពុជាយើងមិនមានផលិតសម្ភារខ្លួនឯង, រូបលោក សម្រេចយកសម្ភារៈផ្គត់ជាផលិតផលរបស់បរទេស ដូចជាផលិតផលរបស់ប្រទេសថៃ និងផលិតផលរបស់ជប៉ុនជាដើម មកធ្វើជាគ្រឿងបង្គំ។ បច្ចុប្បន្នសហគ្រាសទាំងមូល បាន និងកំពុងផលិតគ្រឿងយន្តកសិកម្មកែច្នៃចំនួន១២ប្រភេទ និងមានការពេញនិយមដោយកសិករទិញយកទៅប្រើប្រាស់លើឧបករណ៍បួនប្រភេទមានម៉ាស៊ីនបូមទឹក ម៉ាស៊ីនព្រោះស្រូវ ម៉ាស៊ីនបាញ់ថ្នាំ និងត្រាក់ទ័រច្នៃពីម៉ាស៊ីនគោយន្ត ដែលក្នុងមួយខែសរុបធទាំង៤ប្រភេទអាចផលិតចន្លោះពី៣០គ្រឿង ទៅ៣៥គ្រឿង៕

កំពង់ផែស្វយ័តក្រុងព្រះសីហនុ នឹងមានផែទឹកជ្រៅសម្រាប់នាវាធំៗចូលចតនៅឆ្នាំ២០២៥

2021/12/03 08:57:06 pm        772
Facebook Telegram Linkin
ព្រះសីហនុ៖ ចំណតកុងតឺន័រថ្មីនៅខេត្តព្រះសីហនុ ដែលមានប្រវែង ៣៥០ម៉ែត្រនិងជម្រៅទឹក១៤,៥ ម៉ែត្រនឹងត្រូវសាងសង់ ឡើងក្នុងឆ្នាំ២០២២ ហើយនឹងដាក់ដំណើរការ រយៈពេល៣ឆ្នាំបន្ទាប់ ដែលនឹងអនុញ្ញាតនាវាដឹកទំនិញធំៗមកពីអាមេរិកនិងអឺរ៉ុបចូលចតបាន។ចំណតកំពង់ផែស្វយ័តក្រុងព្រះសីហនុ ក្នុងជំហានទី១ ដែលមានប្រវែង៣៥០ម៉ែត្រ និង​ជម្រៅទឹក ១៤.៥ម៉ែត្រ ​ដោយទទួលបានប្រាក់កម្ចីជាង ២០០លានដុល្លារពីជប៉ុន នឹង​ចាប់ផ្តើមដំណើរការ​សាងសង់​នៅឆ្នាំ២០២២​ និង​បញ្ចប់ការ​សាងសង់​នៅដើមឆ្នាំ២០២៥ ខណៈបច្ចុប្បន្ននេះ សម្រេច​បាន​ការគូសប្លង់​រួចរាល់​ហើយ និងកំពុងដំណើរការដេញថ្លៃ។ឯកឧត្តម លូ គឹមឈន់ ប្រតិភូរាជរដ្ឋាភិបាលកម្ពុជាទទួលបន្ទុកជា​អគ្គនាយកកំពង់ផែស្វយ័ត ក្រុង​ព្រះសីហនុ មាន​ប្រសាសន៍ថា កំពង់ផែស្វយ័តក្រុងព្រះសីហនុ ​បានដាក់ផែនការ​សាងសង់ ចំណត​កំពង់​ផែស្វយ័តក្រុង​ ព្រះសីហនុ​ក្នុង​ជំហាន​ទី១​ ឱ្យរួចរាល់ក្នុងការឆ្នាំ២០២៥។សម្រាប់ជំហានទី២ នឹងសាងសង់រួចរាល់ក្នុងឆ្នាំ២០២៨ ​និងជំហានទី៣ ​ក្នុងឆ្នាំ២០៣០ ដើម្បី​ឱ្យ​នាវាទៅ មក​ពី​អាមេរិក និងអឺរ៉ុប ៨៥ភាគរយ ចូលចត​បាន​មិនចាំ​បាច់ឆ្លងកាត់កំពង់ផែ​ប្រទេស​សិង្ហបុរី និងជំហានទី៣ អាច​មាន​សមត្ថ​ភាព​ចូល​ទៅអឺរ៉ុប ​និងអាមេរិកស្ទើរ ១០០ភាគរយ ។ក្នុងរយៈពេល៩ខែឆ្នាំ២០២១នេះ​ កំពង់ផែស្វយ័តក្រុងព្រះសីហនុ ​ទទួលបានជាង ២៥៤ ពាន់លានរៀល ឬ​ប្រមាណ​៦២លានដុល្លារ ​កើនឡើងជិត៣០លានពាន់លាន បើធៀប​នឹង​រយៈពេល​ដូចគ្នា​កាលពីឆ្នាំ២០២០ ​ដែលមាន​តែ​ជាង​២២៧ ពាន់លានរៀល។ ចំណូលទាំងនោះ​បាន​មកពីការលើកដាក់នាវា ចំណូលលើកដាក់លើទីលាន, ចំណូល​បាន​ពី​សេវា​កំពង់ផែ, ចំណូល​ ពីការរក្សា​ទុកកុងតឺន័រ, ចំណូល​បាន​មក​ពីការ​ជួលតំបន់សេដ្ឋកិច្ចពិសេស និងចំណូលផ្សេងៗ។ឯកឧត្តម លូ គឹមឈន់ បានឱ្យដឹងថា ​នៅពេលដែលកំពង់ផែទឹកជ្រៅនេះ សាងសង់​រួចរាល់​នៅឆ្នាំ​២០២៥ នឹង​អាច​អនុញ្ញាត​ឱ្យ​កប៉ាល់​ដែលសមត្ថភាពផ្ទុក​ កុងតឺន័ររហូតដល់ជាង៤ពាន់កុងតឺន័រ អាចចូលចត​ដែលពេលនោះ ​កប៉ាល់ ប្រមាណ៩៣% ​នៃកប៉ាល់ក្នុងតំបន់អាស៊ី ចូលចត​នៅ​កម្ពុជា​បាន ​ដែល​នឹងធ្វើឱ្យ​តម្លៃ​ដឹកជញ្ជូន​ទាប​ជាងមុន ដែលតាម​ការ​ប៉ាន់​ស្មាន​តម្លៃ​ដឹកជញ្ជូន អាច​ចុះជាង២០០ដុល្លារក្នុងមួយកុងតឺន័រ៕អត្ថបទ៖ វណ្ណៈ

រយៈពេល១១ខែឆ្នាំនេះ ការនាំចេញកសិផល​ក្រៅ​ពី​ស្រូវ-អង្ករ​មាន​កំណើន​ជិត៥០ភាគរយ

2021/12/02 12:30:48 pm        144
Facebook Telegram Linkin
ភ្នំពេញ៖ មន្រ្តីជាន់ខ្ពស់នៃរដ្ឋាភិបាលកម្ពុជា បានបង្ហាញថា គិតក្នុងរយៈពេល១១ខែ ឆ្នាំ២០២១ ការនាំចេញកសិផលក្រៅពីស្រូវ-អង្ករ មានចំនួនសរុបជាង ៤លាន៦សែនតោន កើនឡើងចំនួនជាង ១លាន ៥សែនតោន២៧ ស្មើនឹង ៤៩,៤៧ភាគរយ ប្រៀបធៀបនឹងរយៈពេលដូចគ្នាក្នុងឆ្នាំ២០២០ ដែលមានចំនួនជាង ៣លានតោន។នៅក្នុងបណ្តាញសង្គម កាលពីថ្ងៃទី៣០ ខែវិច្ឆិកាកន្លងទៅ ឯកឧត្តម វេង សាខុន រដ្ឋមន្រ្តីក្រសួងកសិកម្មរុក្ខាប្រមាញ់ និងនេសាទ បានរៀបរាប់ថា ការនាំចេញកសិផលក្រៅពីស្រូវ-អង្ករ ដែលទទួលកំណើនរហូតជិត ៥០ភាគរយ នៅឆ្នាំ២០២១នេះ រួមមាន៖ ផលិតផលដំឡូងមី (ដំឡូងមីស្រស់, ដំឡូងមីក្រៀម, ម៉្សៅដំឡូងមី, កាកសំណល់ដំឡូងមី) ចំនួនសរុបជាង ២លាន ៣សែនតោន ក្នុងនោះនាំចេញទៅវៀតណាម ថៃ ចិន អ៊ីតាលី និងសហរដ្ឋអាម៉េរិកជាដើម។ សម្រាប់ផលិតផល គ្រាប់ស្វាយចន្ទី ចំនួនជាង ៩២ម៉ឺនតោន នាំចេញទៅវៀតណាម ថៃ ឥណ្ឌា ជប៉ុន និងកូរ៉េ។ គ្រាប់ពោតចំនួនជាង ១៧ម៉ឺនតោន នាំចេញទៅវៀតណាម ថៃ កោះតៃវ៉ាន់ បង់ក្លាដេស និងកូរ៉េ។ ដូងប្រេងចំនួនជាង ៥ម៉ឺន ៥ពាន់តោន នាំចេញទៅឥណ្ឌា និងម៉ាឡេស៊ី ខណៈម្រេចចំនួនជាង ២ម៉ឺន ៧ពាន់តោន នាំចេញទៅអាល្លឺម៉ង់ បារាំង ឥណ្ឌា ប៊ែលហ្ស៊ិ កោះតៃវ៉ាន់ ប៉ូឡូញ ចក្រភពអង់គ្លេស កាណាដា អារ៉ាប់រួម។ចំណែក ថ្នាំជក់ចំនួនជាង ៤ពាន់តោន នាំចេញទៅវៀតណាម ប៊ែលហ្ស៊ិ ហុងគ្រី ចិន ឥណ្ឌូនេស៊ី និងអាល្លឺម៉ង់ និងផលិតផលចំនួន ៨៧មុខផ្សេងទៀត មានចំនួនសរុបជាង ១៧ម៉ឺនតោន។យោងតាមប្រព័ន្ធទិន្នន័យគ្រឹះភូតគាមអនាម័យជាតិ (National Phytosanitary Database) ទទួលបាន​ពី​អគ្គនាយកដ្ឋានកសិកម្ម បានឲ្យដឹងថា ក្នុងរយៈពេល១១ខែ ឆ្នាំ២០២១នេះ ការនាំចេញ​កសិផល​ទៅក្រៅប្រទេស មានបរិមាណសរុបចំនួនជាង ៧លានតោន ទៅកាន់ទិសដៅ ៦៨ប្រទេស គឺមាន​ការ​កើន​ឡើងចំនួនជាង ៣លាន៤សែនតោន ស្មើនឹងជាង ៨៧ភាគរយ បើធៀប​នឹងរយៈពេល​ដូចគ្នា​ក្នុងឆ្នាំ២០២០ ដែលទទួលបានត្រឹមតែ ៣លាន ៦សែនតោន៕អត្ថបទ៖ ឈិត បូរ៉ាវី 

បណ្ដាញសង្គម

ព័ត៌មានថ្មីៗ

សមត្ថកិច្ចបង្ក្រាប​ទីតាំង​សង្ស័យលួចលាក់ប្រព្រឹត្តបទល្មើស Online Scams នៅនៅក្នុងក្រុងបាវិតឃាត់ខ្លួនមនុដ្ស៣៨នាក់
08/01/2026 08:08 PM
Facebook Telegram Linkin
ប្រធានក្រុមការងាររាជរដ្ឋាភិបាលចុះមូលដ្ឋានស្រុករមាសហែក នាំយកទៀនចំណាំព្រះវស្សា ទេយ្យទាន និងបច្ច័យប្រគេនព្រះសង្ឃគង់ចាំព្រះវស្សានៅវត្តទាំង៥៣ ក្នុងស្រុករមាសហែក ខេត្តស្វាយរៀង
08/01/2026 06:08 PM
Facebook Telegram Linkin
ក្រសួងកសិកម្ម និងក្រសួងទេសចរណ៍សហការគ្នាជំរុញខ្សែក្រវាត់បៃតងនៅតាមតំបន់ទេសចរណ៍កាន់តែប្រសើរ
08/01/2026 06:08 PM
Facebook Telegram Linkin
ក្រុមហ៊ូទីអះអាងថា ខ្លួនបានបង្ខំឲ្យនាវាដឹកប្រេងអារ៉ាប៊ីសាអ៊ូឌីត ៨គ្រឿង បង្វែរទិសដៅ ដោយសារការបិទខ្ទប់ផ្លូវសមុទ្រ
08/01/2026 05:08 PM
Facebook Telegram Linkin
ការចំណាយសរុបរបស់អ៊ុយក្រែនក្នុងឆ្នាំ ២០២៦ នឹងមានចំនួន ១៧៦,៨ ពាន់លានដុល្លារ
08/01/2026 04:08 PM
Facebook Telegram Linkin
សហភាពអឺរ៉ុប នឹងពង្រីកការអនុវត្តច្បាប់ស្តីពីបញ្ញាសិប្បនិម្មិត (AI) ចាប់ពីថ្ងៃទី២ ខែសីហា
08/01/2026 04:08 PM
Facebook Telegram Linkin
រដ្ឋាភិបាលឥណ្ឌា៖ ពលរដ្ឋឥណ្ឌា ១៦នាក់ ស្លាប់និង ៧៥នាក់ រងរបួស ចាប់តាំងពីជម្លោះនៅមជ្ឈិមបូព៌ាផ្ទុះឡើង ក្នុងឆ្នាំនេះ
08/01/2026 04:08 PM
Facebook Telegram Linkin
អគារស្នាក់ការគណបក្សប្រជាជនកម្ពុជាឃុំត្រប់ ស្រុកបាធាយ ត្រូវបានសម្ពោធដាក់ឲ្យប្រើប្រាស់ជាផ្លូវការ
08/01/2026 04:08 PM
Facebook Telegram Linkin
នាយករដ្ឋមន្ត្រីកាតា និងមេដឹកនាំក្រុមហាម៉ាស ពិភាក្សាតាមទូរស័ព្ទអំពីការអនុវត្តបទឈប់បាញ់នៅតំបន់ហ្កាហ្សា
08/01/2026 04:08 PM
Facebook Telegram Linkin
កូរ៉េខាងជើងថា ផែនការផ្គត់ផ្គង់ប្រេងឥន្ធនៈរបស់ NATO បង្ហាញថា សម្ព័ន្ធយោធានេះកំពុងត្រៀមរៀបចំធ្វើ​សង្គ្រាម
08/01/2026 04:08 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.