BTV NEWS

សម្តេចតេជោ ហ៊ុន សែន ចែករំលែកអត្ថបទវិភាគរបស់អ្នកជំនាញផ្នែកទំនាក់ទំនងអន្តរជាតិ និងសន្តិសុខរបស់ប្រទេសថៃ ដែលមានចំណងជើងថា «ស្វាដោះសំណាញ់!»

សម្តេចធិបតី៖កម្ពុជាគាំទ្រពេញទំហឹង និងបន្តប្តេជ្ញាចិត្តធ្វើការយ៉ាងជិតស្និទ្ធជាមួយរដ្ឋសមាជិកអាស៊ាន ប្រទេសបូកបី និងដៃគូសន្ទនាដើម្បីបំប្លែងឯកសារទៅជាសកម្មភាពជាក់ស្តែង

សម្តេចធិបតី ហ៊ុន ម៉ាណែត៖នៅទូទាំងពិភពលោកនិន្នាការផ្លាស់ប្តូរចំនួនបីកំពុងរៀបចំរដ្ឋបាលសាធារណៈឡើងវិញទោះបីជាក្នុងកម្រិត និងល្បឿនខុសៗគ្នាក៏ដោយ

កិច្ចប្រជុំ ACCSM និង ACCSM+3 ជំរុញនវានុវត្តន៍ការផ្ដល់សេវាសាធារណៈកាន់តែប្រសើរនៅក្នុងតំបន់

ព័ត៌មានសំខាន់ៗ

វិមានក្រឹមឡាំងជំរុញឲ្យមានការឆ្លើយតបជាសកលជុំវិញការបាញ់ផ្លោងនៅរោងចក្រនុយក្លេអ៊ែរ Zaporizhzhia

រុស្ស៊ី៖ វិមានក្រឹមឡាំងបាននិយាយកាលពីថ្ងៃចន្ទថា ខ្លួនមានការព្រួយបារម្ភដោយការបាញ់ផ្លោងជាថ្មីនៅរោងចក្រថាមពលនុយក្លេអ៊ែរ Zaporizhzhia កាលពីចុងសប្តាហ៍ និងបានអំពាវនាវឱ្យប្រទេសនានាប្រើប្រាស់ឥទ្ធិពលរបស់ពួកគេ ដើម្បីជួយបញ្ចប់ការវាយប្រហារលើស្ថានីយ៍ថាមពលនុយក្លេអ៊ែរធំបំផុតរបស់អឺរ៉ុប។ រោងចក្រថាមពលនុយក្លេអ៊ែរ Zaporizhzhia នៅប្រទេសអ៊ុយក្រែនដែលស្ថិតក្រោមការគ្រប់គ្រងរបស់រុស្ស៊ី ត្រូវបានធ្វើឲ្យរង្គោះរង្គើរដោយការបាញ់ផ្លោងកាលពីថ្ងៃអាទិត្យ បណ្តាលឲ្យមានការថ្កោលទោសពីអង្គការឃ្លាំមើលនុយក្លេអ៊ែររបស់អង្គការសហប្រជាជាតិ ដែលបាននិយាយថា ការវាយប្រហារបែបនេះបង្កហានីភ័យគ្រោះមហន្តរាយធំ។ អ្នកនាំពាក្យវិមានក្រឹមឡាំងបាននិយាយថា យើងបានអំពាវនាវឱ្យប្រទេសទាំងអស់លើពិភពលោកប្រើប្រាស់ឥទ្ធិពលរបស់ពួកគេ ដូច្នេះកងកម្លាំងប្រដាប់អាវុធអ៊ុយក្រែននឹងបញ្ឈប់ការបាញ់ផ្លោង។ការបាញ់ផ្លោងម្តងហើយម្តងទៀតនៅរោងចក្រនៅភាគខាងត្បូងប្រទេសអ៊ុយក្រែន បានបង្កើនការព្រួយបារម្ភអំពីសក្តានុពលនៃគ្រោះថ្នាក់ធ្ងន់ធ្ងរដែលមានចម្ងាយត្រឹមតែ ៥០០គីឡូម៉ែត្រពីទីតាំងគ្រោះថ្នាក់នុយក្លេអ៊ែរដ៏អាក្រក់បំផុតរបស់ពិភពលោក ជាគ្រោះមហន្តរាយនៅរោងចក្រ Chornobyl កាលពីឆ្នាំ១៩៨៦៕អត្ថបទ៖ ប៊ុនថន

ប្រមុខសម្ព័ន្ធយោធាណាតូ៖ ជំរុញឲ្យបញ្ជូនអាវុធបន្ថែមឲ្យអ៊ុយក្រែន មុនការចរចាសន្តិភាព

អ៊ុយក្រែន៖ ប្រមុខសម្ព័ន្ធយោធាណាតូលោក Jens Stoltenberg និយាយថា ជម្លោះរវាងអ៊ុយក្រែន និងរុស្ស៊ីទំនងជានឹងបញ្ចប់បានតាមរយៈការចរចា ជាមូលហេតុដែលទីក្រុង Kiev ចាំបាច់ត្រូវការអាវុធបន្ថែមទៀត។ លោក Stoltenberg បាននិយាយនៅក្នុងសុន្ទរកថារបស់លោកនៅឯសម័យប្រជុំប្រចាំឆ្នាំ នៃសន្និបាតសភារបស់សម្ព័ន្ធយោធាណាតូលើកទី៦៨ ក្នុងទីក្រុង Madrid កាលពីថ្ងៃចន្ទថា យើងទាំងអស់គ្នាចង់ឲ្យសង្គ្រាមនេះបញ្ចប់ ដោយបន្ថែមថា បញ្ហានៅត្រង់ថា តើសហរដ្ឋអាមេរិកដែលដឹកនាំប្លុកយោធានេះ ត្រូវបញ្ចប់ជម្លោះនេះដោយរបៀបណា។ ប្រមុខអង្គការណាតូបានលើកឡើងថា យើងត្រូវតែដឹងថា សង្គ្រាមនេះទំនងនឹងបញ្ចប់តាមដំណាក់កាលមួយចំនួននៅតុចរចា។ ប៉ុន្តែយើងក៏ត្រូវតែដឹងផងដែរថា លទ្ធផលនៃការចរចាទាំងនោះអាស្រ័យលើកម្លាំងនៅលើសមរភូមិប្រយុទ្ធ។ លោកថា ដូច្នេះប្រសិនបើយើងចង់បានលទ្ធផលដែលអ៊ុយក្រែនអាចទទួលយកបាន ជាមធ្យោបាយល្អបំផុតនៃការសម្រេចបានគឺការផ្ដល់ការគាំទ្រខាងយោធាដល់អ៊ុយក្រែន។លោកថា សមាជិកណាតូទាំងអស់ត្រូវតែត្រៀមគាំទ្រអ៊ុយក្រែន សម្រាប់ជម្លោះអូសបន្លាយរយៈពេលវែង ដោយជំរុញឲ្យក្រុមតំណាងរាស្ត្របន្តការតស៊ូមតិ សម្រាប់ជំនួយបន្ថែមទៀតដល់អ៊ុយក្រែន។ ប៉ុន្តែប្រមុខសម្ព័ន្ធយោធាណាតូរូបនេះបានលើកឡើងថា លោកខាងលិចនឹងត្រូវតែសងយ៉ាងច្រើនចំពោះភាពរឹងរូសរបស់ខ្លួន ប្រសិនបើរុស្ស៊ីឈ្នះសង្គ្រាមក្នុងប្រទេសអ៊ុយក្រែន ព្រោះវានឹងក្លាយជាសញ្ញាចំពោះរបបអាជ្ញាធរផ្សេងទៀត ដែលពួកគេអាចសម្រេចបានគោលដៅដោយប្រើកម្លាំង ដែលនឹងបង្កគ្រោះថ្នាក់កាន់តែខ្លាំងថែមទៀតដល់ពិភពលោក៕អត្ថបទ៖ សុខមាន

ទួរគីនិយាយថា ក្រុមសកម្មប្រយុទ្ធ ១៨៤នាក់ត្រូវបានសម្លាប់ក្នុងប្រតិបត្តិការនៅស៊ីរី

ទួរគី៖ ក្រសួងការពារជាតិទួរគីបាននិយាយថា ក្រុមសកម្មប្រយុទ្ធ ១៨៤នាក់ត្រូវបានសម្លាប់ក្នុងប្រតិបត្តិការកាលពីថ្ងៃអាទិត្យ និងថ្ងៃច័ន្ទ។ ក្រសួងនិយាយថា ប្រតិបត្តិការនេះរួមមានការវាយប្រហារតាមអាកាស និងអាវុធបាញ់នៅលើដី។ ប្រទេសទួរគីនិយាយថា ប្រតិបត្តិការកាលពីចុងសប្តាហ៍របស់ខ្លួនគឺជាការសងសឹក ចំពោះការវាយប្រហារដោយគ្រាប់បែកនៅទីក្រុងអ៊ីស្តង់ប៊ុលកាលពីសប្តាហ៍មុន ដែលបានបណ្តាលឲ្យមនុស្ស ៦នាក់ស្លាប់ ដែលអាជ្ញាធរបានដាក់កំហុសលើក្រុមសកម្មប្រយុទ្ធឃឺដ។ កងកម្លាំងប្រជាធិបតេយ្យស៊ីរី (SDF) ដែលដឹកនាំដោយគណបក្សពលករឃឺដ(PKK) និង YPG បានបដិសេធការជាប់ពាក់ព័ន្ធក្នុងការបំផ្ទុះគ្រាប់បែកកាលពីថ្ងៃទី១៣ ខែវិច្ឆិកានៅលើផ្លូវថ្មើរជើងដ៏មមាញឹកមួយកន្លែង។ប្រទេសទួរគីនិយាយថា កងជីវពលឃឺដបានសម្លាប់មនុស្ស ២នាក់នៅក្នុងការវាយប្រហារដោយកាំភ្លើងធំពីភាគខាងជើងប្រទេសស៊ីរីកាលពីថ្ងៃចន្ទ ជាការបង្កើនការសងសឹកឆ្លងព្រំដែន បន្ទាប់ពីប្រតិបត្តិការតាមអាកាសរបស់ប្រទេសទួរគីកាលពីចុងសប្តាហ៍ និងការវាយប្រហារដោយគ្រាប់បែកដ៏ឃោឃៅ នៅទីក្រុងអ៊ីស្តង់ប៊ុលកាលពីមួយសប្តាហ៍កន្លងទៅនេះ។ កងកម្លាំងប្រដាប់អាវុធរបស់ទួរគីបាននិយាយថា ខ្លួនកំពុងឆ្លើយតប ហើយមន្ត្រីសន្តិសុខជាន់ខ្ពស់ម្នាក់បាននិយាយថា យន្តហោះរបស់ទួរគីបានចាប់ផ្តើមវាយលុកលើគោលដៅជាច្រើនកន្លែង នៅភាគខាងជើងប្រទេសស៊ីរី៕អត្ថបទ៖ សុខមាន

អគ្គិភ័យបណ្តាលឲ្យមនុស្ស ៣៦នាក់ស្លាប់ក្នុងទីក្រុង Anyang ប្រទេសចិន

ចិន៖ ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃអង្គារនេះថា អគ្គិភ័យនៅរោងចក្រមួយកន្លែងក្នុងទីក្រុង Anyang ខេត្ត Henan ប្រទេសចិនបានបណ្តាលឲ្យមនុស្ស ៣៦នាក់ស្លាប់ និង ២នាក់ផ្សេងទៀតរងរបួស។ វីដេអូ CCTV របស់រដ្ឋបានបង្ហាញឱ្យឃើញពីអគ្គិភ័យឆាបឆេះយ៉ាងសន្ធោសន្ធៅ ដោយមានផ្សែងខ្មៅពេញផ្ទៃអាកាស ហើយក្រុមអ្នកពន្លត់អគ្គីភ័យកំពុងប្រឹងប្រែងពន្លត់ភ្លើង។ យោងតាមប្រព័ន្ធផ្សព្វផ្សាយក្នុងស្រុកបានឱ្យរាយការណ៍ថា អគ្គិភ័យបានឆាបឆេះនៅក្រុមហ៊ុន Kaixinda Trading Co Ltd ក្នុងសង្កាត់ Wenfeng ឬតំបន់បច្ចេកវិទ្យាខ្ពស់ក្នុងទីក្រុង Anyang ហើយក្រុមអ្នកពន្លត់អគ្គិភ័យបានបញ្ជូនរថយន្តចំនួន ៦៣គ្រឿងទៅកាន់កន្លែងកើតហេតុ។អគ្គិភ័យត្រូវបានគ្រប់គ្រងមិនឲ្យរាលដាលនៅម៉ោង ៨យប់ថ្ងៃចន្ទម៉ោងក្នុងតំបន់ ហើយបានរលត់ទាំងស្រុងនៅម៉ោង ១១យប់។ ទូរទស្សន៍ CCTV បានរាយការណ៍ថា គិតត្រឹមព្រឹកថ្ងៃអង្គារ ទី២២ ខែវិច្ឆិកានេះ មនុស្ស ៣៦នាក់ត្រូវបានរាយការណ៍ថាបានស្លាប់ និង ២នាក់ត្រូវបានបញ្ជូនទៅមន្ទីរពេទ្យដើម្បីព្យាបាលរបួស ហើយមនុស្សពីរនាក់ផ្សេងទៀតនៅបាត់ខ្លួន៕អត្ថបទ៖ ប៊ុនថន

អង្គការសុខភាពពិភពលោកព្រមានថា ពលរដ្ឋអ៊ុយក្រែនប្រឈមការគំរាមកំហែងដល់អាយុជីវិតក្នុងរដូវរងា

អ៊ុយក្រែន៖ អង្គការសុខភាពពិភពលោកបានព្រមានថា ប្រជាពលរដ្ឋរាប់លាននាក់ក្នុងប្រទេសអ៊ុយក្រែន ប្រឈមនឹងការគំរាមកំហែងដល់អាយុជីវិតក្នុងរដូវរងានៅឆ្នាំនេះ ខណៈរុស្ស៊ីបន្តបាញ់ស្រោចលើហេដ្ឋារចនាសម្ព័ន្ធថាមពលរបស់ប្រទេសនេះ ស្របពេលសីតុណ្ហភាពចុះត្រជាក់។ ក្នុងរយៈពេលប៉ុន្មានសប្ដាហ៍ថ្មីៗនេះ ប្រទេសរុស្ស៊ីបានដាក់គោលដៅលើហេដ្ឋារចនាសម្ព័ន្ធថាមពល ក្នុងការវាយប្រហារដោយមីស៊ីល រួមទាំងស្ថានីយទឹក និងអគ្គិសនី បណ្ដាលឲ្យលំនៅឋានទូទាំងប្រទេសគ្មានអគ្គិសនីប្រើប្រាស់ ខណៈរដូវរងាជិតចូលមកដល់ ដែលជាការដាក់បន្ទុកលើវិបត្តិសុខភាពកាន់តែធ្ងន់ធ្ងរបន្ថែមទៀត។ លោក Hans Henri P Kluge ប្រធានអង្គការសុខភាពពិភពលោកប្រចាំតំបន់អឺរ៉ុបបាននិយាយថា ពាក់កណ្ដាលនៃហេដ្ឋារចនាសម្ព័ន្ធថាមពលរបស់អ៊ុយក្រែនត្រូវបានរងការខូចខាត ឬបំផ្លាញ។ បញ្ហានេះបានប៉ះពាល់រួចទៅហើយដល់ប្រព័ន្ធសុខភាព និងសុខភាពរបស់ប្រជាពលរដ្ឋ។លោកបានព្រមាននៅសន្និសីទសារព័ត៌មានមួយក្នុងទីក្រុង Kyiv ថា រដូវរងានេះនឹងក្លាយជាឱកាសក្នុងការស្រោចស្រង់ជីវិតមនុស្សដោយបន្ថែមថា ពលរដ្ឋអ៊ុយក្រែន ១០លាននាក់បច្ចុប្បន្នគ្មានអគ្គិសនីប្រើប្រាស់ទេ។ អង្គការសុខភាពពិភពលោកបានព្យាករណ៍ថា ពលរដ្ឋអ៊ុយក្រែនប្រមាណ ៣លាននាក់អាចចាកចេញពីលំនៅឋានរបស់ខ្លួនស្វែងរកកន្លែងកក់ក្ដៅ និងសុវត្ថិភាព។ សីតុណ្ហភាពត្រូវគេព្យាករណ៍ថានឹងធ្លាក់ចុះរហូតដល់ដក ២០អង្សាសេនៅតំបន់ជាច្រើនក្នុងប្រទេសនេះ៕អត្ថបទ៖ សុខមាន

រដ្ឋ New York ប្រកាសដាក់រដ្ឋក្នុងគ្រាអាសន្នបន្ទាប់ពីព្រិលធ្លាក់ខ្លាំង

អាមេរិក៖ អភិបាលរដ្ឋ New York លោកស្រី Kathy Hochul បានប្រកាសថា លោកប្រធានាធិបតី Joe Biden បានអនុម័តសំណើរបស់លោកស្រីរួចហើយ សម្រាប់ការប្រកាសដាក់រដ្ឋក្នុងគ្រាអាសន្នលើតំបន់ចំនួន ១១។ ក្រោយព្យុះព្រិលរដូវរងាជាប្រវត្តិសាស្ត្រដែលបានធ្លាក់កប់សហគមន៍នានាក្នុងរដ្ឋ New York កម្រាស់ជិត ៧ហ្វីតកាលពីសប្ដាហ៍មុន។ ដោយស្ថិតក្រោមការប្រកាសដាក់រដ្ឋក្នុងគ្រាអាសន្ន ជំនួយដោយផ្ទាល់ពីសហព័ន្ធគឺត្រូវផ្ដល់វិធានការការពារបន្ទាន់សម្រាប់រដ្ឋនេះ រួមទាំងប្រតិបត្តិការស្វែងរក និងជួយសង្គ្រោះ ព្រមទាំងសកម្មភាពនានាដើម្បីការពារហេដ្ឋារចនាសម្ព័ន្ធសំខាន់ដូចជាផ្លូវថ្នល់ និងស្ពាន ការគ្រប់គ្រងអាងស្តុកទឹក និងឧបករណ៍ប្រើប្រាស់ផ្សេងៗជាដើម។ គ្រឿងឧបករណ៍សម្រាប់ឆ្លើយតបបន្ទាន់របស់ទីភ្នាក់ងារជួយសង្គ្រោះរបស់រដ្ឋនេះ ត្រូវបន្តជួយដល់រដ្ឋាភិបាលក្នុងតំបន់នានាក្នុងកិច្ចខិតខំប្រឹងប្រែងសម្អាត និងស្ដារឡើងវិញក្រោយហេតុការណ៍ព្យុះព្រិលជាប្រវត្តិសាស្ត្រ។ព្រិលធ្លាក់កម្រាស់ ៨០អ៊ិញត្រូវបានរាយការណ៍នៅក្នុងឧទ្យាន Orchard Park ក្នុងតំបន់ Erie ដោយមានព្រិលធ្លាក់កម្រាស់ ៦អ៊ិញក្នុងមួយម៉ោង ខណៈដែលផ្នែកខ្លះទៀតនៃទីក្រុង Buffalo និងទីក្រុង Lackawanna នៅតែស្ថិតក្រោមបម្រាមធ្វើដំណើរនៅឡើយ។ លោកស្រី Hochu បាននិយាយថា គ្រោះថ្នាក់រថយន្តបុកគ្នាជិត ៩០ករណីត្រូវបានរាយការណ៍ មនុស្សជិត ២៩០នាក់ត្រូវបានជួយសង្គ្រោះចេញពីផ្លូវនានា និងមានការបំពានបម្រាមធ្វើដំណើរជាង ៣៩០ករណីផងដែរ៕អត្ថបទ៖ សុខមាន

សម្តេចតេជោ៖ UNដាក់គោលដៅអភិវឌ្ឍន៍៨ តែកម្ពុជាបានស្នើឱ្យបញ្ចូលគ្រាប់មីនជាអាទិភាពផងដែរ

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានអាជ្ញាធរមីនបានបញ្ជាក់អំពីគោលដៅអភិវឌ្ឍន៍ដោយចីរភាព ជាពិសេសគោលដៅអភិវឌ្ឍន៍សហស្សវត្សរបស់អង្គការសហប្រជាជាតិមានត្រឹម៨គោលដៅប៉ុណ្ណោះ ប៉ុន្តែកម្ពុជាបានដាក់ចេញរហូតដល់៩គោលដៅ សម្រាប់ផែនការអភិវឌ្ឍន៍ជាតិសំខាន់ៗរបស់ខ្លួននោះគឺបានដាក់បញ្ចូលបញ្ហាគ្រាប់មីន និងយុទ្ធភ័ណ្ឌមិនទាន់ផ្ទុះជាគោលដៅអាទិភាពផងដែរ។សម្ដេចតេជោប្រមុខរាជរដ្ឋា ភិបាលបានមានប្រសាសន៍យ៉ាងដូច្នេះក្នុងពេលអញ្ជើញជាអធិបតីដ៏ខ្ពង់ខ្ពស់ក្នុងពិធី បិទសន្និបាតជាតិខួប ៣០ឆ្នាំ នៃសកម្មភាពមីននៅកម្ពុជា ដែលបានធ្វើឡើង នៅសាលមហោស្រពកោះពេជ្រនាព្រឹកថ្ងៃទី២២វិច្ឆិកានេះ។សម្តេចបានគូសបញ្ជាក់ថា៖កម្ពុជាបានដាក់បញ្ចូលបញ្ហាគ្រាប់មីនជាគោលដៅអភិវឌ្ឍន៍ដោយចីរភាពទៅក្នុងផែនការយុទ្ធសាស្ត្រជាតិសំខាន់ៗរបស់ខ្លួនរហូតដល់ ៩ចំណុច ខណៈUNបានដាក់ត្រឹមតែ ៨គោលដៅ ហើយគោលដៅអភិវឌ្ឍន៍ដោយចីរភាពUNបានដាក់ចេញត្រឹមតែ១៧ប៉ុណ្ណោះ ប៉ុន្តែសម្រាប់កម្ពុជាបានដាក់ចេញរហូតដល់ ១៨គឺបន្ថែមមីន១ទៀត។សូមជម្រាបថា អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្រ្គោះជនពិការដោយសារមីន កាលពីរសៀលថ្ងៃទី២១ ខែវិច្ឆិកា ឆ្នាំ២០២២ បានបើកសន្និបាតជាតិខួប ៣០ឆ្នាំ នៃសកម្មភាពមីននៅកម្ពុជា ក្រោមប្រធានបទ «ផ្តល់ដីសុវត្ថិភាព បង្កើតស្នាមញញឹម» ហើយនៅថ្ងៃទី២២ វិច្ឆិកានេះ គឺជាពិធីបិទសន្និបាតបូកសរុបលទ្ធផលការងារ ក៏ដូចជាបង្ហាញនូវសមិទ្ធផលស្នាដៃ៣០ឆ្នាំ នៃសកម្មភាពកំចាត់មីននៅកម្ពុជា។ ពិធីដ៏ប្រពៃនេះក៏មានការអញ្ជើញចូលរួមពីមន្ត្រីនៃរាជរដ្ឋាភិបាលកម្ពុជា តំណាងកម្មវិធីអភិវឌ្ឍន៍អង្គការសហប្រជាជាតិ ប្រចាំកម្ពុជា, ឯកអគ្គរដ្ឋទូត ស្ថានទូត ប្រចាំកម្ពុជា, លោកឧកញ៉ា លោក លោកស្រី តំណាងវិស័យឯកជន ភ្ញៀវកិត្តិយសជាតិ អន្តរជាតិ, ប្រតិបត្តិករសកម្មភាពមីន តំណាងអង្គការសង្គមស៊ីវិល តំណាងអ្នកទទួលផល តំណាងជនរងគ្រោះដោយសារមានផងដែរ ហើយគោលបំណង នៃខួប៣០ ឆ្នាំដែលបានរៀបចំមហាសន្និបាតនេះ គឺដើម្បីអបអរសាទរនូវសមិទ្ធផលជាប្រវតិ្តសាស្រ្ត នៃសកម្មភាពមីន រយៈពេល ៣០ឆ្នាំកន្លងមក ដែលយើងទាំងអស់គ្នា រាជរដ្ឋាភិបាលកម្ពុជា ដៃគូអភិវឌ្ឍន៍ ប្រទេសជាមិត្ត អង្គការជាតិ អន្តរជាតិ និងសហគមន៍សកម្មភាពមីន ទាំងអស់ បានផ្តល់ការគាំទ្រ ចូលរួមពោរពេញដោយសុឆន្ទះ ចិត្តសប្បុរស អាណិតអាសូរ ការលះបង់ និងការប្តេជ្ញាចិត្តខ្ពស់ ចំពោះការដោះស្រាយការគំរាមកំហែងពីគ្រាប់មីន និងសំណល់ជាតិផ្ទុះពីសង្រ្គាមនៅកម្ពុជា៕ អត្ថបទ៖ មុត សុទ្ធ

សម្តេចតេជោ ហ៊ុន សែន ភ្ញាក់ផ្អើលចំពោះព័ត៌មានផ្សាយរឿងមិនពិតទាក់ទងនឹងកិច្ចជំនួបសម្តេចជាមួយអគ្គ UN និងលោក ចូ បៃឌិន

ភ្នំពេញ៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា មានការភ្ញាក់ផ្អើល បន្ទាប់ពីមានការលើកឡើងរបស់ជនអគតិ ឬសារព័ត៌មានមួយក្តាប់តូចបានផ្សាយថា អគ្គលេខាធិការអង្គការសហប្រជាជាតិ(UN) បានបញ្ជាសម្តេច ឲ្យធ្វើនេះធ្វើនោះ(ទាក់ទងសិទ្ធិមនុស្ស) ខណៈសម្តេចអះអាងថា ពេលដែលសម្តេចបានជួបជាមួយលោកអគ្គលេខាធិការរូបនេះ កាលពីប៉ុន្មានថ្ងៃមុននោះនិយាយតែអំពីបញ្ហាគ្រាប់មីន បញ្ហាសាលាក្តីខ្មែរក្រហម និងបញ្ហាការបញ្ជូនកងទ័ពមួកខៀវទៅក្រៅប្រទេសជាដើមនោះ។ថ្លែងនៅក្នុងឱកាសអញ្ជើញជាអធិបតី ក្នុងពិធីបិទសន្និបាតជាតិខួប៣០ឆ្នាំ នៃសកម្មភាពមីននៅកម្ពុជា ក្រោមប្រធានបទ«ផ្តល់ដីសុវត្ថិភាព បង្កើតស្នាមញញឹម» នាថ្ងៃទី២២ ខែវិច្ឆិកា ឆ្នាំ២០២២នេះ សម្តេចតេជោ នាយករដ្ឋមន្រ្តីបានបញ្ជាក់ថា សម្តេចពិតជាមានការភ្ញាក់ផ្អើល ក្រោយព័ត៌មាន ផ្សាយទាក់ទងកិច្ចជំនួបរបស់សម្តេចជាមួយ លោក Antionio Guterres នៅកម្ពុជា ក្នុងពេលប្រជុំកំពូលអាស៊ានលើកទី៤០-៤១ និងកិច្ចប្រជុំកំពូលពាក់ព័ន្ធនានាកាលពីប៉ុន្មានថ្ងៃមុននោះ ដោយមិនបានពិភាក្សា រឿងអ្វីដូចដែលក្រុមទាំងនោះបានផ្សព្វផ្សាយនោះឡើយ ហើយសម្តេចពិតជាឆ្ងល់យ៉ាងខ្លាំងមិនដឹងថា បានព័ត៌មានបែបបំភ្លើសនេះមកពីណា។ជាមួយគ្នានោះដែរ សម្តេចតេជោ ហ៊ុន សែន ក៏មានការហួសចិត្តចំពោះការផ្សព្វផ្សាយពីជំនួបរវាងសម្តេចតេជោ ជាមួយលោកប្រធានាធិបតីអាមេរិកចូ បៃឌិន ដែរថា ការជំនួបនោះលោក បៃឌិន បានលើកឡើងអំពីកញ្ញា សេង ធារី (អប្សារាក្បាលត្រងោល) ដែលកំពុងជាប់គុក និងបានដាក់គំនាបដល់សម្តេចរឿងនេះរឿងនោះ គឺគ្មានទាល់តែសោះ ដោយការផ្សាយរបស់ពួកគេទាំងនោះមិនដឹងបានព័ត៌មានមកពីខាងណានោះទេ។សម្តេចតេជោ ហ៊ុន សែន ក៏បានអំពាវនាវដល់ប្រព័ន្ធផ្សព្វផ្សាយទាំងអស់ ត្រូវគោរពអំពីក្រមសីលធម៌ និងវិជ្ជាជីវៈអ្នកសារព័ត៌មានផង ខណៈការផ្សព្វផ្សាយរបស់អ្នកព័ត៌មានទាំង នោះគ្មានការពិតទាល់តែសោះ ខណៈកិច្ចជំនួបរវាងសម្តេច ជាមួយអគ្គលេខាធិការអង្គការ សហប្រជាជាតិ និងប្រធានាធិបតីអាមេរិក កាលពីកន្លងទៅថ្មីៗនេះមិនបាននិយាយគ្នាដូចការផ្សព្វផ្សាយរបស់សារព័ត៌មានទាំងនោះឡើយ៕ អត្ថបទ៖ បាន ចក់

ប្រសាសន៍សំខាន់ៗរបស់សម្ដេចតេជោ ហ៊ុន សែន ក្នុងឱកាសបិទសន្និបាតជាតិខួប ៣០ឆ្នាំ នៃសកម្មភាពមីននៅកម្ពុជា

ភ្នំពេញ៖ នៅព្រឹកថ្ងៃទី២២ ខែវិច្ឆិកា ឆ្នាំ២០២២នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ក្នុងពិធី បិទសន្និបាតជាតិខួប ៣០ឆ្នាំ នៃសកម្មភាពមីននៅកម្ពុជា នៅមជ្ឈមណ្ឌលកោះពេជ្រ។ពិធីបិទសន្និបាតមីនព្រឹកនេះ មានការអញ្ជើញចូលរួមពីមន្ត្រីនៃរាជរដ្ឋាភិបាលកម្ពុជា តំណាងកម្មវិធីអភិវឌ្ឍន៍អង្គការសហប្រជាជាតិ ប្រចាំកម្ពុជា, ឯកអគ្គរដ្ឋទូត ស្ថានទូត ប្រចាំកម្ពុជា, លោកឧកញ៉ា លោក លោកស្រី តំណាងវិស័យឯកជន ភ្ញៀវកិត្តិយសជាតិ អន្តរជាតិ, ប្រតិបត្តិករសកម្មភាពមីន តំណាងអង្គការសង្គមស៊ីវិល តំណាងអ្នកទទួលផល តំណាងជនរងគ្រោះដោយសារមីនផងដែរ។គោលបំណង នៃខួប៣០ ឆ្នាំក៏ដូចជាពិធីបិទមហាសន្និបាតនេះ គឺដើម្បីអបអរសាទរនូវសមិទ្ធផលជាប្រវតិ្តសាស្រ្ត នៃសកម្មភាពមីន រយៈពេល ៣០ឆ្នាំកន្លងមក ដែលកម្ពុជាបានប្តេជ្ញាចិត្តខ្ពស់ ចំពោះការដោះស្រាយការគំរាមកំហែងពីគ្រាប់មីន និងសំណល់ជាតិផ្ទុះពីសង្រ្គាម។ខាងក្រោមនេះជាប្រសាសន៍សំខាន់ៗរបស់សម្ដេចតេជោ ហ៊ុន សែន៖- សម្តេចតេជោ ហ៊ុន សែន កោតសរសើរដល់អាជ្ញាធមីន, ប្រតិបត្តិករដោះមីន, អង្គការ-សមាគមដៃគូ និងប្រទេសជាមិត្ត ដែលបានប្រឹងប្រែងធ្វើកិច្ចការពាក់ព័ន្ធនឹងសកម្មភាពមីននៅកម្ពុជា ប្រកបដោយលទ្ធផលល្អប្រសើរ គួរជាទៅមោទនៈ។- សម្តេចតេជោ ហ៊ុន សែន ប្រកាសថា មីនជាបញ្ហាមួយ ដែលត្រូវបានយកចិត្តទុកដាក់នៅលើពិភពលោក ជាពិសេសប្រទេស ដែលធ្លាប់ញាំញីដោយសង្គ្រាម ហើយកម្ពុជាក៏បានដាក់ចេញគោលដៅសំខាន់ សម្រាប់សកម្មភាពមីននេះផងដែរ។- សម្តេចតេចជោ ហ៊ុន សែន ប្រកាសថា ជំនួបរវាងសម្តេច និងអគ្គលេខាធិការអង្គការសហប្រជាតិ លោក Antionio Guterres នៅកម្ពុជា ក្នុងពេលប្រជុំកំពូលអាស៊ានលើកទី៤០-៤១ និងកិច្ចប្រជុំកំពូលពាក់ព័ន្ធនានា មិនមានការពិភាក្សា ឬដាក់គំនាបមកកម្ពុជាពាក់ព័ន្ធបញ្ហានយោបាយផ្ទៃក្នុងកម្ពុជាឡើយ។- សម្តេចតេជោ ហ៊ុន សែន ប្រកាសថា កម្ពុជា-អង្គការសហប្រជាជាតិ បានពិភាក្សាគ្នា និងផ្តល់ធាតុចូល ពាក់ព័ន្ធសកម្មភាពមីន, សាលាក្តីខ្មែរក្រហម និងបញ្ហាសកល ដែលពិភពលោក និងតំបន់ កំពុងជួបប្រទះ។- សម្តេចតេជោ ហ៊ុន សែន ប្រកាសថា ការបោសសម្អាតមីន និងសំណល់ជាតិផ្ទុះពីសង្រ្គាម គឺជាការងារមួយយ៉ាងសំខាន់មិនអាចខ្វះបាន ក្នុងការជួយកាត់បន្ថយគ្រោះថ្នាក់ ដែលប្រែក្លាយដីរងផលប៉ះពាល់ទាំងនោះឱ្យក្លាយជាដីសុវត្ថិភាព សម្រាប់ប្រជាពលរដ្ឋប្រើប្រាស់។- សម្តេចតេជោ ហ៊ុន សែន បញ្ជាក់ថា កម្មវិធីសកម្មភាពមីនមនុស្សធម៌នៅកម្ពុជាចាប់ផ្តើមឡើងនៅឆ្នាំ១៩៩២ ដើម្បីឆ្លើយតបបន្ទាន់នឹងការធ្វើមាតុភូមិនិវត្តន៍ របស់ជនភៀសខ្លួន។- សម្តេចតេជោ ហ៊ុន សែន បន្តថា ក្នុងនាមជាប្រទេសស្រឡាញ់សន្តិភាព នៅឆ្នាំ១៩៩៧ កម្ពុជាបានចុះហត្ថលេខា និងបានក្លាយជារដ្ឋភាគី នៃអនុសញ្ញាស្តីពីការហាម ការប្រើប្រាស់ ការរក្សាទុក ការផលិត និងការផ្ទេរគ្រាប់មីនប្រឆាំងមនុស្ស (ឬហៅកាត់ថា អនុសញ្ញាអូតាវ៉ា) ក្នុងឆ្នាំ២០០០។- សម្ដេចតេជោ មានប្រសាសន៍ថា សន្តិភាពបានរួមចំណែកយ៉ាងខ្លាំងក្លាដល់កិច្ចដំណើរការពង្រឹងលទ្ធិប្រជាធិបតេយ្យ ការគោរពសិទ្ធិ និងសេចក្តីថ្លៃថ្នូររបស់មនុស្ស ដែលធ្វើឱ្យប្រជាជនកម្ពុជាបានយល់យ៉ាងច្បាស់អំពីគុណតម្លៃ នៃសុខសន្តិភាព និងប្តេជ្ញាចិត្តខ្ពស់ក្នុងការការពារមិនឲ្យបាត់បង់ទៅវិញជាដាច់ខាត ទោះបីក្នុងតម្លៃណាក៏ដោយ។- សម្តេចតេជោ ហ៊ុន សែន មានប្រសាសន៍ថា ក្នុងនាមជារដ្ឋភាគី កម្ពុជាមានមោទនភាពណាស់ ដោយបានក្លាយជាសមាជិកដ៏សកម្ម និងហ្មត់ចត់ក្នុងកិច្ចការបោសសម្អាតមីន និងមានការទទួលខុសត្រូវខ្ពស់ ចំពោះកាតព្វកិច្ចរបស់ខ្លួន។- សម្តេចតេជោ ហ៊ុន សែន បានសម្តែងដោយមោទនភាពថា ក្នុងឋានៈជាម្ចាស់ផ្ទះ កម្ពុជាបាននាំពិភពលោកឲ្យវិលត្រលប់មកកាន់ទីកំណើតដើម នៃចលនាហាមប្រាមការប្រើប្រាស់មីនប្រឆាំងមនុស្សនេះ ហើយបាននាំយកតថភាពពិត និងរូបភាពពិតរបស់អនុសញ្ញានេះ មកដាក់បង្ហាញចំពោះមុខកិច្ច ប្រជុំតែម្តង។- សម្តចេតេជោ ហ៊ុន សែន បន្តថា តាំងពីកម្ពុជាចាប់ផ្តើមស្តារ និងអភិវឌ្ឍន៍សេដ្ឋកិច្ចជាតិ រាជរដ្ឋាភិបាលបានកំណត់យកសកម្មភាពមីន ជាផ្នែកមួយដ៏សំខាន់ក្នុងគោលនយោបាយកាត់បន្ថយភាពក្រីក្រ និងផែនការយុទ្ធសាស្រ្តជាតិសំខាន់ៗ។ ដោយមើលឃើញពីសារសំខាន់នេះកម្ពុជា បានសម្រេចដាក់បញ្ចូលសកម្មភាពបោសសម្អាតមីន និងសំណល់ជាតិផ្ទុះពីសង្គ្រាម ចូលជាគោលដៅទី១៨ នៃគោលដៅអភិវឌ្ឍន៍ប្រកបដោយចីរភាពកម្ពុជា។- សម្តេចតេជោ ហ៊ុន សែន បញ្ជាក់ថា ថ្ងៃអនាគត កម្ពុជាគឺជាប្រទេសដែលគ្មានមីន ហើយការគំរាមកំហែងដោយសារសំណល់ជាតិផ្ទុះពីសង្រ្គាម ត្រូវបានកាត់បន្ថយឲ្យនៅកម្រិតអប្បបរមា និងមានការអភិវឌ្ឍសេដ្ឋកិច្ចសង្គម និងធនធានមនុស្ស ប្រព្រឹត្តទៅដោយសុវត្ថិភាព។ ផែនការយុទ្ធសាស្រ្តនេះ ជាផែនទីតម្រង់ទិស ដោះស្រាយបញ្ហាមីននិងសំណល់ជាតិផ្ទុះពីសង្រ្គាម និងឆ្លើយតបទៅនឹងការគំរាមកំហែងដែលនៅសេសសល់ក្រោយឆ្នាំ ២០២៥។- សម្តេចតេជោ ហ៊ុន សែន ប្រកាសថា ជាមួយនឹងចំណេះដឹង និងបទពិសោធន៍ ក្នុងរយៈពេល ៣ទសវត្សរ៍ កម្ពុជាបានប្រែក្លាយពីប្រទេសដែលរងគ្រោះដោយសារគ្រាប់មីន ទៅជាប្រទេសដែលចែករំលែកបទពិសោធន៍លើឆាកអន្តរជាតិ នៅតាមបណ្តាប្រទេសដែលកំពុងជួបប្រទះនឹងបញ្ហាមីន និងសំណល់ជាតិផ្ទុះពីសង្រ្គាម ដែលគណៈប្រតិភូមកពីបណ្តាប្រទេសជាច្រើន បានមកទស្សនាប្រទេសកម្ពុជា ដើម្បីរៀនសូត្រ និងទទួលបទពិសោធន៍។- សម្តេចតេជោ ហ៊ុន សែន ប្រកាសថា ការប្តេជ្ញាចិត្តរបស់កម្ពុជា បានធ្វើឱ្យមជ្ឈដ្ឋានជាតិ-អន្តរជាតិស្ញប់ស្ញែងនូវបេសកកម្មរបស់កម្ពុជា ក្នុងការចូលរួមប្រកបដោយកិត្តិយសដ៏ឧត្តុង្គឧត្តមបំផុត សម្រាប់មនុស្សជាតិលើពិភពលោកក្រោមឆ័ត្ររបស់អង្គការសហប្រជាជាតិ ដែលទង់ជាតិកម្ពុជាបន្តបង្ហូតខ្ពស់ត្រដែត ស្មើមុខស្មើមាត់ ស្មើសិទ្ធិ ស្មើភាពជាមួយបណ្តាប្រទេសបរិច្ចាគកងកម្លាំងទាំងអស់។- សម្តេចតេជោ ហ៊ុន សែន បានពិភាក្សាជាមួយនាយករដ្ឋមន្ត្រីថៃប្រាយុទ្ធ ច័ន្ទអូចា លើបញ្ហាដោះមីនតាមខ្សែបន្ទាត់ព្រំដែនកម្ពុជា-ថៃ ផ្តល់សុវត្ថិភាពដល់ប្រជាពលរដ្ឋទាំងសងខាង ទោះតំបន់នោះមិនទាន់ឯកភាពក្នុងការកំណត់ព្រំដែនក៏ដោយ ហើយកិច្ចការបន្ទាប់គណៈកម្មាធិការព្រំដែនប្រទេសទាំងពីនឹងធ្វើការជាមួយគ្នា។- សម្តេចតេជោ ហ៊ុន សែន មានប្រសាសន៍ថា កម្ពុជាបន្តកសាងស្នាដៃដ៏ធំធេងជាច្រើនដូចជា ការបោសសម្អាតមីន ការកំទេចគ្រាប់ ការស្ថាបនាសំណង់ផ្តេក-បញ្ឈរ ក្នុងតំបន់បេសកកម្មដែលមានហានិភ័យខ្ពស់។ ស្នាដៃរបស់វីរយុទ្ធនារីកម្ពុជា នាឆ្នាំ២០២២ នេះ បានទទួលលំដាប់លេខរៀងទី២ ក្នុងបណ្តាសហគមន៍អាស៊ាន និងលំដាប់លេខ១២ ក្នុងចំណោម ១២០ប្រទេសបរិច្ចាគកងកម្លាំង។- សម្តេចតេជោ ហ៊ុន សែន បានប្រកាសដល់អ្នកនយោបាយ និងក្រុមជ្រុលនិយមមួយចំនួន គប្បីកុំមានការធ្វើអត្ថាធិប្បាយលើសហួសហេតុ ភូតកុហក់ បំភ្លៃបំផ្លើស ពាក់ព័ន្ធជំនួបទ្វេភាគីរវាងសម្តេចតេជោ ហ៊ុន សែន ជាមួយលោក ចូ បៃដិន ប្រធានាធិបតីអាមេរិក ក្នុងពេលប្រជុំកំពូលអាស៊ានលើកទី៤០-៤១ និងកិច្ចកំពូលពាក់ព័ន្ធនានានៅកម្ពុជា។- សម្តេចតេជោ ហ៊ុន សែន ប្រកាសថា ជំនួបរវាងសម្តេច និងលោក Antionio Guterres អគ្គលេខាធិការUN ផ្តោតសំខាន់លើកិច្ចសហប្រតិបត្តិការលើវិស័យមីន, តុលាការកូនកាត់ (សាលាក្តីខ្មែរក្រហម) និងសកម្មភាពមនុស្សធម៌ក្រោមឆ័ត្រអង្គការសហប្រជាជាតិ តាមរយៈបញ្ជូនកម្លាំងទៅរក្សាសន្តិភាពប្រទេសដែលញាំញីដោយសង្គ្រាម។- សម្តេចតេជោ ហ៊ុន សែន ប្រកាសថា បើគ្មានការប្រែប្រួលទេ រដ្ឋមន្ត្រីការពារជាតិចិន និងជួបសន្ទនាជាមួយរដ្ឋមន្ត្រីការពារជាតិអាមេរិក លើទឹកសៀមរាបអង្គរ ក្នុងពេលកម្ពុជា កំពុងរៀបចំកិច្ចប្រជុំកំពូលរដ្ឋមន្ត្រីការពារជាតិអាស៊ាន។សង្កថាសម្ដេចតេជោ ហ៊ុន សែន ចប់នៅម៉ោង ៩និង០៣នាទី

សម្តេចតេជោ ហ៊ុន សែន អញ្ជើញជាអធិបតីបិទសន្និបាតជាតិខួប ៣០ឆ្នាំ នៃសកម្មភាពមីននៅកម្ពុជា

ភ្នំពេញ៖ នៅព្រឹកថ្ងៃទី២២ ខែវិច្ឆិកា ឆ្នាំ២០២២នេះ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា អញ្ជើញជាអធិបតីភាពដ៏ខ្ពង់ខ្ពស់ក្នុងពិធី បិទសន្និបាតជាតិខួប ៣០ឆ្នាំ នៃសកម្មភាពមីននៅកម្ពុជា ដែលពិធីនេះត្រូវប្រារព្ធធ្វើឡើងនៅមជ្ឈមណ្ឌលកោះពេជ្រ។ សូមជម្រាបថា អាជ្ញាធរកម្ពុជាគ្រប់គ្រងសកម្មភាពកំចាត់មីន និងសង្រ្គោះជនពិការដោយសារមីន កាលពីរសៀលថ្ងៃទី២១ ខែវិច្ឆិកា ឆ្នាំ២០២២ បានបើកសន្និបាតជាតិខួប ៣០ឆ្នាំ នៃសកម្មភាពមីននៅកម្ពុជា ក្រោមប្រធានបទ «ផ្តល់ដីសុវត្ថិភាព បង្កើតស្នាមញញឹម» ហើយនៅថ្ងៃទី២២ វិច្ឆិកានេះ គឺជាពិធីបិទសន្និបាតបូកសរុបលទ្ធផលការងារ ក៏ដូចជាបង្ហាញនូវសមិទ្ធផលស្នាដៃ៣០ឆ្នាំ នៃសកម្មភាពកំចាត់មីននៅកម្ពុជា។ ពិធីបិទសន្និបាត នាព្រឹកនេះ មានការអញ្ជើញចូលរួមពីមន្ត្រីនៃរាជរដ្ឋាភិបាលកម្ពុជា តំណាងកម្មវិធីអភិវឌ្ឍន៍អង្គការសហប្រជាជាតិ ប្រចាំកម្ពុជា, ឯកអគ្គរដ្ឋទូត ស្ថានទូត ប្រចាំកម្ពុជា, លោកឧកញ៉ា លោក លោកស្រី តំណាងវិស័យឯកជន ភ្ញៀវកិត្តិយសជាតិ អន្តរជាតិ, ប្រតិបត្តិករសកម្មភាពមីន តំណាងអង្គការសង្គមស៊ីវិល តំណាងអ្នកទទួលផល តំណាងជនរងគ្រោះដោយសារមានផងដែរ។ គោលបំណងនៃខួប៣០ ឆ្នាំក៏ដូចជាពិធីបិទមហាសន្និបាតនេះគឺដើម្បីអបអរសាទរនូវសមិទ្ធផលជាប្រវតិ្តសាស្រ្ត នៃសកម្មភាពមីន រយៈពេល ៣០ឆ្នាំកន្លងមក ដែលយើងទាំងអស់គ្នា រាជរដ្ឋាភិបាលកម្ពុជា ដៃគូអភិវឌ្ឍន៍ ប្រទេសជាមិត្ត អង្គការជាតិ អន្តរជាតិ និងសហគមន៍សកម្មភាពមីន ទាំងអស់ បានផ្តល់ការគាំទ្រ ចូលរួមពោរពេញដោយសុឆន្ទះ ចិត្តសប្បុរស អាណិតអាសូរ ការលះបង់ និងការប្តេជ្ញាចិត្តខ្ពស់ ចំពោះការដោះស្រាយការគំរាមកំហែងពីគ្រាប់មីន និងសំណល់ជាតិផ្ទុះពីសង្រ្គាមនៅកម្ពុជា។

បណ្ដាញសង្គម

ព័ត៌មានថ្មីៗ

TOP STORY | អ្នករាយការណ៍ពិសេសសិទ្ធិមនុស្សនៅកម្ពុជានឹងដាក់របាយការណ៍ទៅកាន់ក្រុមប្រឹក្សាសិទ្ធិមនុស្សអង្គការសហប្រជាជាតិស្តីពីស្ថានភាពសិទ្ធិមនុស្សនៅកម្ពុជានៅខែក្រោយ

ស្រែអំបិលឥណ្ឌូនេស៊ី រីកដុះដាលខ្លាំង ដោយសារគ្រោះរាំងស្ងួតបង្កឡើងពីបាតុភូតអែល នីញ៉ូ

អ្នកវិទ្យាសាស្រ្តណាសានិយាយថា បំណែកយានចម្លងរបស់ SpaceX បុកឋានព្រះចន្ទ ពុំមានហានិភ័យនោះទេ

មនុស្សរាប់ពាន់នាក់ត្រូវបានជម្លៀសចេញនៅភាគពាយ័ព្យចិន ក្រោយមានភ្លៀងធ្លាក់ខ្លាំង និងទឹកជំនន់

ក្រុមតារាវិទូចាប់បានរូបភាពប្លាស្មាកំពុងកួចលើផ្ទៃព្រះអាទិត្យកម្រិតច្បាស់ខ្ពស់បំផុត

ណាសា៖ សូរ្យគ្រាសពេញនឹងមើលឃើញនៅថ្ងៃទី ១២ ខែសីហា ឆ្នាំ ២០២៦ខាងមុខនេះ

ស្ត្រីម្នាក់ត្រូវបានចោទប្រកាន់ បន្ទាប់ពីបុរស ៤នាក់រងរបួស ដោយសារចាក់ នៅកណ្តាលទីក្រុងឡុងដ្រ៍

រោងចក្រចម្រាញ់ប្រេងនៅតំបន់ Yaroslavl របស់រុស្ស៊ី រងការឆាបឆេះ ក្រោយការវាយប្រហារយានដ្រូនអ៊ុយក្រែន

អ៊ីរ៉ង់ព្រមានរដ្ឋឈូងសមុទ្រថា សូមប្រាប់លោក Trump ឱ្យឈប់ បើមិនចង់រងការវាយប្រហារខ្លាំងក្លាទេ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានសំខាន់ៗ

វិមាន​ក្រឹម​ឡាំង​ជំរុញឲ្យមាន​ការឆ្លើយ​តប​ជា​សកល​ជុំវិញ​ការបាញ់​ផ្លោង​នៅ​រោងចក្រ​នុយក្លេអ៊ែរ Zaporizhzhia

ប្រមុខ​សម្ព័ន្ធ​យោធា​ណា​តូ៖ ​ជំរុញ​ឲ្យ​បញ្ជូន​អាវុធ​បន្ថែម​ឲ្យ​អ៊ុយក្រែន មុន​ការចរចា​សន្តិភាព​

ទួរគី​និយាយថា ក្រុម​សកម្មប្រយុទ្ធ ១៨៤​នាក់​ត្រូវ​បាន​សម្លាប់​ក្នុង​ប្រតិបត្តិការ​នៅ​ស៊ី​រី

អគ្គិភ័យ​បណ្តាល​ឲ្យ​មនុស្ស ៣៦​នាក់​ស្លាប់​ក្នុង​ទីក្រុង Anyang ប្រទេស​ចិន

អង្គការ​សុខភាព​ពិភពលោក​ព្រមាន​ថា ពលរដ្ឋ​អ៊ុយ​ក្រែ​ន​ប្រឈម​ការគំរាមកំហែង​ដល់​អាយុជីវិត​ក្នុង​រដូវរងា​

រដ្ឋ New York ប្រកាស​ដាក់​រដ្ឋ​ក្នុង​គ្រាអាសន្ន​បន្ទាប់ពី​ព្រិល​ធ្លាក់​ខ្លាំង

សម្តេចតេជោ៖ UNដាក់គោលដៅអភិវឌ្ឍន៍៨ តែកម្ពុជាបានស្នើឱ្យ​បញ្ចូលគ្រាប់មីន​ជាអាទិភាព​ផងដែរ