BTV NEWS

លោក Trump ប្រាប់ពីកិច្ចចរចា «ល្អ» ជាមួយអ៊ីរ៉ង់ និងបញ្ជាក់ជាថ្មីពីការគំរាមវាយប្រហារគោលដៅនានា

ក្រុមគ្រួសារអ្នកដំណើរនៃជើងហោះហើរ MH370 ចង់បានការពិត ខណៈតុលាការចិនបើកសវនាការបណ្តឹងឧទ្ធរណ៍

ជប៉ុនស្នើឱ្យអ៊ីរ៉ង់អនុវត្ត «ភាពបត់បែនជាអតិបរិមា» ដើម្បីបន្ថយភាពតានតឹងនៅមជ្ឈិមបូព៌ាឱ្យបានឆាប់

រដ្ឋមន្ត្រីការពារជាតិអ៊ីស្រាអែល៖ យន្តហោះចម្បាំងអាមេរិកហោះចេញពីអ៊ីស្រាអែលទៅវាយប្រហារអ៊ីរ៉ង់

ព័ត៌មានអន្តរជាតិ

រដ្ឋមន្រ្តីការបរទេសជប៉ុន បញ្ជាក់ឡើងវិញពីការគាំទ្ររបស់ទីក្រុងតូក្យូ សម្រាប់អ៊ុយក្រែន

រដ្ឋមន្រ្តីការបរទេសជប៉ុនលោក Toshimitsu Motegi បានបញ្ជាក់ឡើងវិញការគាំទ្ររបស់ទីក្រុងតូក្យូ សម្រាប់ទីក្រុងគីវ អំឡុងជំនួបទ្វេភាគីជាមួយសមភាគីអ៊ុយក្រែនលោក Andrei Sybiha ។អំឡុងជំនួបជាមួយលោក Sybiha នៅទីក្រុងតូក្យូ លោក Motegi និយាយថា ជប៉ុននឹងបន្តធ្វើការជាមួយសហគមន៍អន្តរជាតិ ដើម្បីគាំទ្រអ៊ុយក្រែន ហើយនិងលើកកម្ពស់ការស្តាឡើងវិញរបស់អ៊ុយក្រែន ហើយនិងការកសាងឡើងវិញ តាមរយៈកិច្ចសហប្រតិបត្តិការលើវិស័យឯកជន និងរដ្ឋ ។ដោយឡែក លោក Sybiha និយាយដែរថា ទីក្រុងគីវ ត្រៀមខ្លួនរួចរាល់ក្នុងការបង្កើនកិច្ចសហប្រតិបត្តិការជាមួយជប៉ុនលើបញ្ហាសន្តិសុខ ជាពិសេសសម្រាប់បច្ចេកវិទ្យាយានដ្រូន ។ក្រោយជំនួបនោះ រដ្ឋមន្រ្តីប្រទេសទាំង ២ បានចុះហត្ថលេខាផងដែរលើអនុស្សរណៈយោគយល់នៃការអភិវឌ្ឍធនធានមនុស្ស តាមរយៈកម្មវិធីជំនួយអភិវឌ្ឍន៍ផ្លូវការ(ODA) របស់ជប៉ុន ៕

កងកម្លាំងអ៊ីស្រាអែលឃាត់ខ្លួនស្ត្រីប៉ាឡេស្ទីនក្នុងការវាយឆ្មក់ នៅតំបន់វេសបែង

ភ្លាមៗបន្ទាប់ពីម៉ោង ១ ព្រឹកថ្ងៃពុធ នៅពេលដែលលោក Abdelrahman Badr បាននិយាយថា លោកបានឮសំឡេងជើងនៅខាងក្រៅផ្ទះរបស់ខ្លួននៅក្នុងទីក្រុង Hebron ក្នុងតំបន់វេសបែង (West Bank) ដែលគ្រប់គ្រងដោយអ៊ីស្រាអែល។ បន្តិចក្រោយមក កងកម្លាំងអ៊ីស្រាអែលបានមកដល់មាត់ទ្វាររបស់លោក។ ពួកគេកំពុងស្វែងរកប្រពន្ធរបស់ខ្លួន។កងកម្លាំងបានចាប់ខ្លួន អ្នកស្រី Itaf Badr ដែលបម្រើការនៅក្នុងក្រុមប្រឹក្សាភិបាលនៃអង្គការសប្បុរសធម៌សុខភាពដ៏លេចធ្លោមួយ ហើយបាននិយាយថា អ្នកស្រីត្រូវបានចាប់ខ្លួនដើម្បីសួរចម្លើយ ដោយដឹកអ្នកស្រីតាមរថយន្តចេញទៅទាំងពេលយប់។ នេះបើយោងតាមលោក Abdelrahman។ក្រុមគ្រួសាររបស់អ្នកស្រី Itaf Badr និងក្រុមសិទ្ធិប៉ាឡេស្ទីនបាននិយាយថា អ្នកស្រី គឺជាស្ត្រីប៉ាឡេស្ទីនម្នាក់ក្នុងចំណោមស្ត្រីប៉ាឡេស្ទីន ៥នាក់ ដែលត្រូវបានឃុំខ្លួនដោយកងកម្លាំងសន្តិសុខអ៊ីស្រាអែលនៅទូទាំងតំបន់វេសបែងកាលពីថ្ងៃពុធ។ ការវាយឆ្មក់នៅពេលព្រឹកព្រលឹម បានកំណត់គោលដៅទីក្រុងជាច្រើន ក្នុងនោះមាន Hebron, Ramallah, Nablus និង Bethlehem។ នៅក្នុងការកាន់កាប់រយៈពេលជាច្រើនទសវត្សរ៍របស់អ៊ីស្រាអែល បុរសនិងក្មេងប្រុសប៉ាឡេស្ទីន បានរងទុក្ខវេទនាដ៏អាក្រក់និងធ្ងន់ធ្ងរបំផុតពីសកម្មភាពរបស់យោធា ហើយត្រូវបានចាប់ឃុំខ្លួនទ្រង់ទ្រាយធំ ឬចំណាយពេលជាច្រើនឆ្នាំ នៅក្នុងពន្ធនាគារ ដោយសារការគប់ដុំថ្មទៅលើកងទ័ពអ៊ីស្រាអែល៕

ឥណ្ឌា និងជប៉ុន ចុះហត្ថលេខាលើកិច្ចព្រមព្រៀង AI លោហៈធាតុ និងថាមពល ក្រោយជំនួបលោក Modi-Takaichi

នាយករដ្ឋមន្រ្តីឥណ្ឌាលោក Narendra Modi និយាយក្រោយជំនួបជាមួយសមភាគីជប៉ុនលោកស្រី Sanae Takaichi ថា នៅថ្ងៃព្រហស្បតិ៍នេះ ឥណ្ឌា និងជប៉ុន បានចុះហត្ថលេខាលើកិច្ចព្រមព្រៀង ដើម្បីជំរុញកិច្ចសហប្រតិបត្តិការលើបញ្ញាសិប្បនិម្មិត(AI) លោហៈធាតុ ថាមពល ហើយនិងរៀបចំផែនទីបង្ហាញផ្លូវរួមគ្នា សម្រាប់សន្តិសុខសេដ្ឋកិច្ច ។លោកស្រី Takaichi ស្ថិតក្នុងដំណើរទស្សនកិច្ចរយៈពេល ៣ថ្ងៃរបស់លោកស្រី ទៅកាន់ទីក្រុងញូវដែលី ស្របពេលដែលប្រទេសដៃគូអាស៊ីទាំង ២ មាននូវជំនួបកំពូលប្រចាំលើកទី ១៩ ។លោក Modi និយាយប្រាប់ក្រុមអ្នកសារព័ត៌មានថា ការបញ្ចូលគ្នារវាងបច្ចេកវិទ្យាច្បាស់លាស់របស់ជប៉ុន និងសមត្ថភាពកម្មវិធី Software របស់ឥណ្ឌា វានឹងផ្តល់សន្ទុះ និងកម្លាំងថ្មីដល់ការអភិវឌ្ឍ AI សកល ។យោងតាមទិន្នន័យរដ្ឋាភិបាលឥណ្ឌា បានឲ្យដឹងថា ពាណិជ្ជកម្មទ្វេភាគីរវាងប្រទេសទាំង ២ បានឈានដល់ ២៧,៥ពាន់លានដុល្លារ ក្នុងឆ្នាំសារពើពន្ធ ២០២៥-២៦ ខណៈការវិនិយោគរបស់ជប៉ុននៅឥណ្ឌា មានចំនួន ៣,២ពាន់លានដុល្លារ ចន្លោះខែមេសា និងខែធ្នូ ឆ្នាំ ២០២៥ ។លោក Modi និយាយទៀតថា ប្រទេសទាំង ២ ដែលជាសមាជិករបស់ក្រុមប្រទេស Quad ដែរនោះ បានចុះហត្ថលេខាលើកិច្ចព្រមព្រៀងពាក់ព័ន្ធនឹងគម្រោងសហអភិវឌ្ឍន៍លើវិស័យការពារជាតិ ។លោកបន្តថា តាមរយៈគំនិតផ្តួចផ្តើមជីវឧស្ម័នឥណ្ឌា-ជប៉ុន ពួកយើងនឹងបង្កើតរោងចក្រជីវឧស្ម័ន និងរោងចក្រជីកសិកម្មសរីរាង្គនៅប្រទេសឥណ្ឌា ៕

ការវាយប្រហាររបស់រុស្ស៊ីលើទីក្រុងគីវ របស់អ៊ុយក្រែន បានសម្លាប់មនុស្ស ១៣នាក់

រដ្ឋមន្ត្រីក្រសួងមហាផ្ទៃអ៊ុយក្រែនលោក Ihor Klymenko និយាយនៅថ្ងៃព្រហស្បតិ៍នេះថា ការវាយប្រហាររបស់រុស្ស៊ីលើរដ្ឋធានីគីវ បានសម្លាប់មនុស្ស ១៣នាក់ និងធ្វើឲ្យខូចខាតអគារស្នាក់នៅយ៉ាងធ្ងន់ធ្ងរចំនួន ២០ខ្នង ស្របពេលដែលក្រុមសង្រ្គោះបន្ទាន់ បានធ្វើការតាមកម្ទេចកម្ទី ហើយក្រុមអាជ្ញាធរ កំពុងវាយតម្លៃទំហំនៃការបំផ្លិចបំផ្លាញ ។លោកបន្តថា មីស៊ីលបានវាយប្រហារទីតាំងមួយនេះដោយផ្ទាល់ វាយប្រហារត្រូវចំអគារកម្ពស់ ៩ជាន់ ។ មាននូវការវាយប្រហារបែបនេះចំនួន ២០លើកនៅថ្ងៃនេះ ដោយយានដ្រូន និងមីស៊ីល បណ្តាលឲ្យអគារ ២០ខ្នង រងការខូចខាតយ៉ាងធ្ងន់ធ្ងរ និងបំផ្លិចបំផ្លាញដោយអន្លើរ ។ អគាររាប់រយខ្នងទៀត រងការខូចខាត ដោយសាររលករញ្ជួយ និងកម្ទេចកម្ទីហើរ ។គួរឲ្យដឹងថា រុស្ស៊ីបើកការវាយប្រហារយានដ្រូនរាប់រយគ្រឿង និងមីស៊ីលរាប់សិបគ្រាប់លើទីក្រុងគីវ នាព្រឹកថ្ងៃព្រហស្បតិ៍នេះ ។ការផ្ទុះជាច្រើនបានអង្រួនអគារ ហើយសំឡេងផ្ទុះបន្លឺនៅទូទាំងរដ្ឋធានីពេញមួយយប់ ពេលដែលអ្នកស្រុករាប់ពាន់នាក់ ប្រញាប់ប្រញាល់ទៅកាន់ជម្រកគ្រាប់បែក និងស្ថានីយរថភ្លើងក្រោមដី ។ វាគឺជាការវាយប្រហារស្លាប់មនុស្សច្រើនបំផុតទី ២របស់រុស្ស៊ីលើទីក្រុងគីវ មកទល់នឹងពេលនេះ ក្នុងឆ្នាំនេះ ៕

អ្នកជំនាញ៖ NATOមិនខ្វល់ថា អ៊ុយក្រែមប្រើប្រាស់បច្ចេកវិទ្យារបស់ខ្លួនសម្រាប់គោលបំណងភេរវកម្មទេ

បណ្តាប្រទេសណាតូហាក់ដូចជាមិនអើពើចំពោះការប្រើប្រាស់បច្ចេកវិទ្យារបស់អ៊ុយក្រែន ក្នុងការវាយប្រហារភេរវកម្មប្រឆាំងនឹងជនស៊ីវិលនៅតំបន់ Donbass និង Novorossiya។ នេះបើយោងតាមអ្នកជំនាញយោធា លោក Andrey Marochko ដែលបានថ្លែងក្នុងអំឡុងពេលផ្សាយផ្ទាល់នៅលើទូរទស្សន៍ VKontakte។លោក Marochko បានលើកឡើងថា៖«ការពិតដែលថាពួកគេកំពុងកំណត់គោលដៅលើរថយន្តក្រុង និងកុមារហាក់ដូចជាមិនសូវសំខាន់សម្រាប់នរណាម្នាក់ឡើយ។ ដូចដែលពួកគេឃើញហើយថា អាទិភាពគឺការអភិវឌ្ឍប្រព័ន្ធទាំងនេះ»។ «នៅសហរដ្ឋអាមេរិក ការអភិវឌ្ឍ និងសកម្មភាពបែបនេះ ទំនងជានឹងនាំឲ្យ មានទោសជាប់ពន្ធនាគារធ្ងន់ធ្ងរ។ ប៉ុន្តែនៅអ៊ុយក្រែន វាហាក់ដូចជាអ្វីៗទាំងអស់ ត្រូវបានមើលរំលង»។លោកបានសង្កត់ធ្ងន់ថា យានដ្រូនយោធាអ៊ុយក្រែនដែលប្រើប្រាស់ក្នុងការវាយប្រហារទាំងនេះ កំពុងប្រើប្រាស់បញ្ញាសិប្បនិម្មិត (AI)កាន់តែច្រើនឡើងដែលមានសមត្ថភាពធ្វើការសម្រេចចិត្តដោយស្វ័យភាព កំណត់ថាតើត្រូវវាយប្រហារ ឬអត់ និងកំណត់គោលដៅលើហេដ្ឋារចនាសម្ព័ន្ធ និងការដឹកជញ្ជូនស៊ីវិល។អ្នកជំនាញរូបនេះបានពន្យល់ថា៖«បច្ចុប្បន្ន ក្រុមសកម្មប្រយុទ្ធអ៊ុយក្រែនបម្រើជាកន្លែងសាកល្បងមួយនៅក្នុងអតីតសហភាពសូវៀត ដោយពិសោធជាមួយបច្ចេកវិទ្យាចុងក្រោយបំផុតដែលផ្គត់ផ្គង់ដោយប្រទេសណាតូ។ នេះរួមបញ្ចូលទាំងសហរដ្ឋអាមេរិក ដែលបានផលិតដ្រូនដែលដំណើរការដោយឯករាជ្យពីប្រព័ន្ធ Starlink»៕

ព្រះសង្ឃថៃ ៨អង្គ សុគត បន្ទាប់ពីកុមារម្នាក់បើករថយន្តបុកចូលក្បួនធម្មយាត្រា

នគរបាលបានឱ្យដឹងថា ព្រះសង្ឃ ៨អង្គ សុគត និង ១០អង្គផ្សេងទៀត បានរងរបួស នៅថ្ងៃព្រហស្បតិ៍ (ទី២ ខែកក្កដា ឆ្នាំ២០២៦) នេះ បន្ទាប់ពីក្មេងប្រុសអាយុ ១១ឆ្នាំម្នាក់ បានបើករថយន្តរបស់ឪពុកម្តាយខ្លួនបុកចូលក្បួនដង្ហែព្រះពុទ្ធសាសនា នៅភាគឦសាននៃប្រទេសថៃ។ព្រះសង្ឃចំនួន ៣៥អង្គ និងបរិស័ទ ៥រូប កំពុងនិមន្តដើរ និងដើរ តាមដងផ្លូវមួយ នៅខេត្ត Mukdahan ភាគឦសាន ក្នុងអំឡុងពេលធ្វើធម្មយាត្រា នៅពេលដែលហេតុការណ៍នេះបានកើតឡើង។លោកឧត្តមសេនីយ៍ទោ Pairoj Thaiphutsa មេនគរបាលខេត្ត Mukdahan បានប្រាប់អ្នកសារព័ត៌មានថា៖ «ជនសង្ស័យជាកុមារ។ រថយន្តនេះត្រូវបានយកទៅពិនិត្យកោសល្យវិច្ច័យ ដើម្បីកំណត់មូលហេតុ»។ លោកបានបន្ថែមថា «យើងបានស្នើសុំឱ្យឪពុកម្តាយរបស់កុមារមកពិនិត្យ ដើម្បីយើងអាចកំណត់ថា តើអ្នកណាជាអ្នកត្រូវទទួលខុសត្រូវ ចំពោះការថែទាំកុមារ ដូច្នេះយើងអាចបន្តដំណើរការផ្លូវច្បាប់»។នគរបាលបានបញ្ជាក់ថា ក្មេងប្រុសនោះបានបើករថយន្តភីកអាប់របស់ឪពុកម្តាយខ្លួនដោយគ្មានការអនុញ្ញាត មុនពេលបាត់បង់ការគ្រប់គ្រងលើរថយន្ត ហើយបុកចូលក្បួនរបស់ព្រះសង្ឃ។ ព្រះសង្ឃ ៥អង្គបានសុគតនៅកន្លែងកើតហេតុ ហើយក្រោយមក ៣អង្គទៀត បានទទួលអនិច្ចធម នៅក្នុងមន្ទីរពេទ្យ ខណៈដែលព្រះសង្ឃជាង ១០អង្គផ្សេងទៀត កំពុងទទួលការព្យាបាល។ក្រុមសង្គ្រោះបន្ទាន់ និងក្រុមជួយសង្គ្រោះ ត្រូវបានបញ្ជូនទៅកាន់កន្លែងកើតហេតុ ហើយអ្នករងរបួស ត្រូវបានបញ្ជូនទៅមន្ទីរពេទ្យខេត្ត Mukdahan៕

ប្រព័ន្ធផ្សព្វផ្សាយ៖ ការដឹកជញ្ជូនប្រេងឆ្លងកាត់ច្រកសមុទ្រហ័រមូស កើនឡើងដល់ ១០ លានបារ៉ែល ក្នុងមួយថ្ងៃ

ដោយដកស្រង់សម្តីមន្ត្រីរដ្ឋបាលអាមេរិកម្នាក់ដែលមិនបញ្ចេញឈ្មោះ សារព័ត៌មាន Bloomberg បានចុះផ្សាយថា ការដឹកជញ្ជូនប្រេងប្រចាំថ្ងៃឆ្លងកាត់ច្រកសមុទ្រហ័រមូស បានលើសពី ១០ លានបារ៉ែល។ យោងតាមប្រភពព័ត៌មាន ប្រេងចំនួន ៥ លានបារ៉ែលទៀតក្នុងមួយថ្ងៃ កំពុងត្រូវបានដឹកជញ្ជូនតាមរយៈ ផ្លូវជំនួស។ Bloomberg បានកត់សម្គាល់ថា មុនពេលប្រតិបត្តិការយោធារវាងសហរដ្ឋអាមេរិក និងអ៊ីស្រាអែលប្រឆាំងនឹងអ៊ីរ៉ង់ចាប់ផ្តើម ប្រេងប្រហែល ២០ លានបារ៉ែល បានឆ្លងកាត់ផ្លូវទឹកនេះ ជារៀងរាល់ថ្ងៃ។នាពេលថ្មីៗនេះ តំណាងអចិន្ត្រៃយ៍របស់អ៊ីរ៉ង់ប្រចាំការិយាល័យអង្គការសហប្រជាជាតិនៅទីក្រុងហ្សឺណែវ លោក Ali Bahreini បានបញ្ជាក់ថា ច្រកសមុទ្រហ័រមូស ត្រូវបានបើកឡើងវិញសម្រាប់នាវាពាណិជ្ជកម្ម និងការដឹកជញ្ជូនអន្តរជាតិ៕

អ៊ីរ៉ង់ ព្រមានអាមេរិក និងអ៊ីស្រាអែល ពីការវាយប្រហារមុនពិធីបុណ្យសពអតីតមេដឹកនាំកំពូលលោក Khamenei

មេបញ្ជាការយោធាអ៊ីរ៉ង់ មួយរូប បានព្រមាន សហរសដ្ឋអាមេរិក និងអ៊ីស្រាអែល នៅថ្ងៃព្រហស្បតិ៍នេះ ទល់នឹងការវាយប្រហារណាមួយលើអ៊ីរ៉ង់ ខណៈប្រទេសនេះត្រៀមរៀបចំពិធីបុណ្យសពរបស់អតីតមេដឹកនាំកំពូល លោក Ayatollah Ali Khamenei ដែលត្រូវបានសម្លាប់ ក្នុងការវាយប្រហារតាមអាកាសនៅថ្ងៃដំបូងនៃសង្គ្រាមថ្ងៃទី២៨កុម្ភៈឆ្នាំនេះ ។ លោក Ali Abdollahi មេបញ្ជាការនៃទីស្នាក់ការកណ្ដាល Khatam al-Anbiya បាននិយាយក្នុងសេចក្ដីថ្លែងការណ៍ចេញផ្សាយដោយសារព័ត៌មានរដ្ឋថា ពួកលោកព្រមានដល់សត្រូវរបស់អ៊ីរ៉ង់ ពិសេសអាមេរិក និងរបបជ្វីហ្វអ៊ីស្រាអែល ជៀសវាងការគណនាខុសណាមួយ ហើយត្រូវគិតអំពីការសងសឹកដ៏ខ្លាំងក្លាពីកងកម្លាំងប្រដាប់អាវុធរបស់អ៊ីរ៉ង់ចំពោះការគំរាមកំហែង និងការឈ្លានពានណាមួយមកលើប្រទេសរបស់ខ្លួន។ពិធីបុណ្យសពសម្រាប់លោក Khamenei នឹងចាប់ផ្ដើមនៅថ្ងៃទី៤កក្កដា ក្នុងរដ្ឋធានីតេអេរ៉ង់ និងបញ្ចប់នៅថ្ងៃទី៩កក្កដា ដោយសពនឹងត្រូវបញ្ចុះក្នុងទីក្រុង Mashhad ដែលជាក្រុងកំណើតរបស់លោក។កាលពីថ្ងៃពុធ១កក្កដា សប្ដាហ៍នេះ រដ្ឋមន្ត្រីការបរទសអ៊ីរ៉ង់ លោក Abbas Araqchi បានចេញការព្រមានស្រដៀងគ្នានេះ ថា ទីក្រុងតេអេរ៉ង់ នឹងផ្ដល់ការឆ្លើយតបភ្លាមៗ និងម៉ឺងម៉ាត់ ចំពោះការគំរាមកំហែងណាមួយមកលើប្រជាជន ឬមេដឹកនាំរបស់ខ្លួន បន្ទាប់ពីការអត្ថាធិប្បាយពីរដ្ឋមន្ត្រីការពារជាតិអ៊ីស្រាអែល លោក Israel Katz ថា មេដឹកនាំកពូលបច្ចុប្បន្នរបស់អ៊ីរ៉ង់ គឺលោក Mojtaba Khamenei គឺជាគោលដៅនៃការសម្លាប់៕

រដ្ឋមន្ត្រីការបរទេសស៊ីរីទៅទស្សនកិច្ចនៅទីក្រុងបេរូត បន្ទាប់ពីលោក TRUMP លើកឡើងអំពីការប្រយុទ្ធប្រឆាំងនឹងក្រុមហេសបូឡា

រដ្ឋមន្ត្រីការបរទេសស៊ីរី បានធ្វើដំណើរទៅកាន់ទីក្រុងបេរូត នាថ្ងៃព្រហស្បតិ៍នេះ ដើម្បីជួបជាមួយថ្នាក់ដឹកនាំរដ្ឋាភិបាលលីបង់ ដែលជាដំណើរទស្សនកិច្ចលើកដំបូងរបស់លោកនៅទីនោះ បន្ទាប់ពីប្រធានាធិបតីអាមេរិក លោក ដូណាល់ ត្រាំ បានលើកឡើងពីលទ្ធភាពរបស់កងកម្លាំងស៊ីរីប្រយុទ្ធប្រឆាំងនឹងក្រុមហេសបូឡាដែលគាំទ្រដោយអ៊ីរ៉ង់នៅក្នុងប្រទេសលីបង់។ទោះជាយ៉ាងណាក៏ដោយ ប្រធានាធិបតីស៊ីរី លោក Ahmed Al-Sharaa នាពេលកន្លងមក បដិសេធអ្វីដែលលោកហៅថា ជាពាក្យចចាមអារ៉ាមអំពីវត្តមានស៊ីរីណាមួយចូលទៅក្នុងប្រទេសលីបង់។រដ្ឋមន្ត្រីស៊ីរី លោក Asaad Al-Shibani បានជួបជាមួយប្រធានាធិបតីលីបង់ លោក Joseph Aoun នៅពេលចុះពីយន្តហោះ ហើយបន្ទាប់មកបានធ្វើដំណើរទៅកាន់កិច្ចប្រជុំជាមួយប្រធានសភា លោក Nabih Berri ដែលជាសម្ព័ន្ធមិត្តរបស់ក្រុមហេសបូឡា។រដ្ឋាភិបាលថ្មីរបស់ប្រទេសស៊ីរីក្រោមការដឹកនាំរបស់អតីតមេបញ្ជាការនៃក្រុមអាល់កៃដា លោក Sharaa បានក្លាយជាសម្ព័ន្ធមិត្តរបស់សហរដ្ឋអាមេរិក ចាប់តាំងពីកងកម្លាំងរបស់លោក បានផ្តួលរំលំអតីតប្រធានាធិបតី លោក បាសា អាល់អាសាដ ( Bashar al-Assad) ក្នុងឆ្នាំ ២០២៤ ហើយភាគច្រើនបាននៅក្រៅសង្គ្រាមក្នុងតំបន់រវាងសហរដ្ឋអាមេរិក និងអ៊ីស្រាអែល និងអ៊ីរ៉ង់៕

លោកស្រី von der Leyen៖ EU នឹងផ្តល់ ២០០លានអឺរ៉ូ ដើម្បីជំរុញការតភ្ជាប់តំបន់កូកាសខាងត្បូង

ក្នុងអំឡុងពេលទស្សនកិច្ច នៅទីក្រុងបាគូ ប្រទេសអាស៊ែបៃហ្សង់ កាលពីថ្ងៃពុធ (ទី១ ខែកក្កដា ឆ្នាំ២០២៦) ប្រធានគណៈកម្មការអឺរ៉ុប លោកស្រី Ursula von der Leyen បាននិយាយថា សហភាពអឺរ៉ុប (EU) នឹងផ្តល់ជំនួយឥតសំណងរហូតដល់ ២០០លានអឺរ៉ូ (២២៨លានដុល្លារ) ដើម្បីជំរុញការដឹកជញ្ជូន ថាមពល និងការតភ្ជាប់ឌីជីថល នៅទូទាំងតំបន់កូកាសខាងត្បូង (South Caucasus)។អំឡុងពេលជួបជាមួយប្រធានាធិបតីអាស៊ែបៃហ្សង់ លោក Ilham Aliyev រួមជាមួយលោកស្រី Marta Kos ស្នងការទទួលបន្ទុកកិច្ចការបន្ថែមសមាជិក EU លោកស្រី Von der Leyen បាននិយាយថា គំនិតផ្តួចផ្តើមនេះ ត្រូវបានរៀបចំឡើង ដើម្បីគាំទ្រសន្តិភាព រវាងអាស៊ែបៃហ្សង់ និងអាមេនី ដោយពង្រឹងការតភ្ជាប់ ក្នុងតំបន់ និងផ្តល់ជំនួយដល់សហគមន៍ ក្នុងតំបន់។អាមេនី និងអាស៊ែបៃហ្សង់ បានមានសង្គ្រាមជាមួយគ្នាអស់រយៈពេលជិត ៤ទសវត្សរ៍ ពាក់ព័ន្ធនឹងតំបន់ភ្នំ Nagorno-Karabakh ហើយបានឈានដល់កិច្ចព្រមព្រៀងសន្តិភាពសម្របសម្រួលដោយសហរដ្ឋអាមេរិកកាលពីខែសីហាឆ្នាំមុន បន្ទាប់ពីបានជួបជាមួយលោកប្រធានាធិបតី Donald Trump នៅឯសេតវិមាន។លោកស្រី von der Leyen បានបន្ថែមថា៖ «សន្តិភាពតាមរយៈកញ្ចប់តភ្ជាប់របស់យើង នឹងជួយកសាងអនាគតដ៏សុខសាន្ត និងវិបុលភាព សម្រាប់តំបន់កូកាសខាងត្បូង។ ហើយដោយមានការរួមគ្នា យើងអាចប្រែក្លាយសន្តិភាពនៅលើក្រដាសទៅជាសន្តិភាពជាក់ស្ដែង»៕

បណ្ដាញសង្គម

ព័ត៌មានថ្មីៗ

អ៊ូហ្គង់ដាប្រកាសគ្មានជំងឺអេបូឡា បន្ទាប់ពីអ្នកជំងឺចុងក្រោយចេញពីមន្ទីរពេទ្យ

ក្រុមអ្នកសង្កេតការណ៍អាស៊ានប្រចាំប្រទេសកម្ពុជា និង ប្រធានបេសកកម្មក្រុមអ្នកសង្កេតការណ៍អាស៊ាន (HOM AOT) ហ្វីលីពីនប្រចាំកម្ពុជា ធ្វើបទបង្ហាញ «ស្តីពីវឌ្ឍនភាពនៃការងារខណ្ឌសីមា និងបោះបង្គោលព្រំដែនរវាងកម្ពុជានិងថៃ»

កូរ៉េខាងត្បូងចេញការជូនដំណឹងបន្ទាន់ អំពីការសង្ស័យលេចធ្លាយផូស្វ័រ នៅមូលដ្ឋានទ័ពអាកាសអាមេរិក

វិមានក្រឹមឡាំង៖ ការវាយប្រហាររបស់អ៊ុយក្រែន លើនាវាអ៊ីរ៉ង់ គួរត្រូវបានចាត់ទុកថា ជាការវាយប្រហារលើអ៊ីរ៉ង់

រញ្ជួយដីកម្រិត ៥,៧រ៉ិចទ័រ ធ្វើឱ្យញ័រខេត្ត Qinghai របស់ប្រទេសចិន

របាយការណ៍៖ លោក Trump ហាក់កាន់តែទោរទៅរកលោក Zelenskyy ជាងលោក Putin

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877