BTV NEWS

នាយករដ្ឋមន្ត្រីនេប៉ាល់ជំរុញឱ្យមានភាពស្ងប់ស្ងាត់ ខណៈមនុស្សបីនាក់ស្លាប់ក្រោយភាពចលាចលក្រុមកាន់សាសនាហិណ្ឌូ និងមូស្លីម

ប្រធានាធិបតីអ៊ុយក្រែន៖ ការពន្យារពេលមីស៊ីលការពារដែនអាកាស បានធ្វើឱ្យមនុស្សជាច្រើនបាត់បង់ជីវិត

ការវាយប្រហារដោយយានដ្រូននៅអេហ្ស៊ីបបង្កឱ្យមានការព្រួយបារម្ភផ្នែកសន្តិសុខអំពីការនាំចេញប្រេងតាមព្រែកជីកស៊ុយអេ

ពលរដ្ឋប៉ាឡេស្ទីននៅតំបន់ហ្កាហ្សា ពុំមានអារម្មណ៍រីករាយចំពោះកិច្ចព្រមព្រៀងជាមួយអ៊ីស្រាអែលទេ

ព័ត៌មានអន្តរជាតិ

USGS៖ រញ្ជួយដីកម្រិត ៦,២រ៉ិចទ័រ កើតមាននៅម្ដុំភាគខាងកើតឥណ្ឌូនេស៊ី

ទីភ្នាក់ងារស្ទាបស្ទង់ភូគព្ភសាស្ត្រសហរដ្ឋអាមេរិក (USGS) បានឱ្យដឹងថា រញ្ជួយដីកម្រិត ៦,២រ៉ិចទ័រ បានកើតមាននៅម្ដុំភាគខាងកើតនៃប្រទេសឥណ្ឌូនេស៊ី នៅថ្ងៃសុក្រ (ទី៣ ខែកក្កដា ឆ្នាំ២០២៦) នេះ តែមិនមានរបាយការណ៍ភ្លាមៗ អំពីអ្នកស្លាប់ និងរបួស ឬការខូចខាតឡើយ។ការរញ្ជួយនេះបានកើតឡើងនៅជម្រៅ ១២០គីឡូម៉ែត្រ ចម្ងាយប្រហែល ៥៨គីឡូម៉ែត្រ នៅភាគខាងលិចទីក្រុង Tobelo ក្នុងខេត្ត North Maluku នៅម៉ោង ១១:៣១នាទី ម៉ោងក្នុងស្រុក (ត្រូវនឹងម៉ោង ២:៣១នាទី ម៉ោងសកល)។អ្នកស្រុមមា្នក់ឈ្មោះ Umar Abbas ជាអ្នករស់នៅលើកោះ Ternate ដែលមានចម្ងាយប្រហែល ១១៤គីឡូម៉ែត្រពីចំណុចកណ្តាលនៃរញ្ជួយដី បានប្រាប់សារព័ត៌មាន AFP ថា៖ «ខ្ញុំកំពុងអង្គុយ និងផឹកកាហ្វេនៅតូបកាហ្វេមួយកន្លែង ស្រាប់តែកៅអីរបស់ខ្ញុំចាប់ផ្តើមញ័រ។ ខ្ញុំភ័យស្លន់ស្លោមួយសន្ទុះ ព្រោះខ្ញុំនៅតែមានអារម្មណ៍តក់ស្លុតដោយសារការរញ្ជួយដីកន្លងមក»។ទីភ្នាក់ងារឧតុនិយម អាកាសធាតុ និងភូគព្ភសាស្ត្រ (BMKG) របស់ឥណ្ឌូនេស៊ី បានឱ្យដឹងថា មិនមានការគំរាមកំហែងពីការមានរលកយក្សស៊ូណាមិឡើយ។ឥណ្ឌូនេស៊ី និងប្រទេសជិតខាង ជួបប្រទះនឹងគ្រោះរញ្ជួយដីជាញឹកញាប់ ដោយសារតែទីតាំងរបស់ប្រទេសទាំងនេះ ស្ថិតនៅចំ «កងភ្លើង» ប៉ាស៊ីហ្វិក ដែលលាតសន្ធឹងពីជប៉ុន កាត់តំបន់អាស៊ីអាគ្នេយ៍ និងឆ្លងកាត់អាងប៉ាស៊ីហ្វិក៕

ចិនអះអាងថា កិច្ចប្រតិបត្តិការជប៉ុន-ឥណ្ឌា មិនគួរមានគោលដៅលើទីក្រុងប៉េកាំងនោះទេ

ចិននិយាយនៅថ្ងៃសុក្រនេះ កិច្ចសហប្រតិបត្តិការរវាងឥណ្ឌា និងជប៉ុន មិនគួរមានគោលដៅលើទីក្រុងប៉េកាំងនោះទេ ក្រោយមេដឹកនាំប្រទេសទាំង ២ បានឯកភាពធ្វើការជិតស្និតជាងមុនលើរ៉ែសំខាន់ ។ទំនិញយុទ្ធសាស្រ្តដែលត្រូវបានប្រើប្រាស់ចាប់ពីរថយន្តអគ្គិសនី និងស្មាតហ្វូន រហូតដល់ម៉ាស៊ីនយន្តហោះ និងមីស៊ីលតម្រង់គោលដៅ ត្រូវបានលើកយកមកពិភាក្សា អំឡុងជំនួបរវាងនាយករដ្ឋមន្រ្តីឥណ្ឌាលោក Narendra Modi និងនាយករដ្ឋមន្រ្តីជប៉ុនលោកស្រី Sanae Takaichi នៅក្នុងទីក្រុងញូវដែលី កាលពីថ្ងៃព្រហស្បតិ៍ ។នៅពេលសួរពីជំនួបមួយនោះ ក្រសួងការបរទេសចិននិយាយថា ប្រទេសគួរតែធ្វើការ ដើម្បីជំរុញការយល់ដឹង និងទំនុកចិត្ត ។លោក Guo Jiakun គឺជាអ្នកនាំពាក្យក្រសួងការបរទេសចិន និយាយប្រាប់សន្និសីទសារព័ត៌មានថា កិច្ចសហប្រតិបត្តិការរវាងប្រទេស គួរតែពុំមានគោលដៅ ឬធ្វើឲ្យប៉ះពាល់ដល់ផលប្រយោជន៍ភាគីទី ៣ ឡើយ កុំយកជាលេសសម្រាប់បង្កើតជាបក្ខពួកផ្តាច់មុខ ឬញុះញង់ឲ្យមានការប្រឈមមុខដាក់គ្នានោះឡើយ ។សូមបញ្ជាក់ថា លោក Modi និយាយក្រោយជំនួបជាមួយសមភាគីជប៉ុនលោកស្រី Takaichi ថា ឥណ្ឌា និងជប៉ុន បានចុះហត្ថលេខាលើកិច្ចព្រមព្រៀង ដើម្បីជំរុញកិច្ចសហប្រតិបត្តិការលើបញ្ញាសិប្បនិម្មិត(AI) លោហៈធាតុ ថាមពល ហើយនិងរៀបចំផែនទីបង្ហាញផ្លូវរួមគ្នា សម្រាប់សន្តិសុខសេដ្ឋកិច្ច ៕

ប្រធានសិទ្ធិមនុស្ស UN ៖ គ្រោះមហន្តរាយកំពុងកើតឡើងនៅទីក្រុង Al-Obeid ប្រទេសស៊ូដង់

ប្រធានសិទ្ធិមនុស្សអង្គការសហប្រជាជាតិ(UN) និយាយនៅថ្ងៃសុក្រនេះថា គ្រោះមហន្តរាយមនុស្សធម៌មួយទៀត កំពុងកើតឡើងនៅប្រទេសស៊ូដង់ នៅទីក្រុងឡោមព័ទ្ធ al-Obeid ដោយរូបលោកព្រមានពីលំអាននៃអំពើឃោឃៅ និងជំរុញឲ្យពិភពលោកចាត់វិធានការសង្រ្គោះជាបន្ទាន់ ។ ទីក្រុង Al-Obeid គឺជារដ្ឋធានីរបស់រដ្ឋ North Kordofan បានក្លាយជាការផ្តោតសំខាន់នៃការប្រយុទ្ធគ្នានាពេលថ្មីៗនេះ រវាងកងទ័ពស៊ូដង់ និងកងកម្លាងគាំទ្ររហ័ស(RSF) អំឡុងសង្រ្គាមដែលចាប់ផ្តើមឡើងកាលពីរយៈពេលជាង ៣ឆ្នាំមុន ហើយបណ្តាលឲ្យមានវិបត្តិមនុស្សធម៌ទ្រង់ទ្រាយធំ ។ ឧត្តមស្នងការសិទ្ធិមនុស្ស UNលោក Volker Turk និយាយថា ជនស៊ីវិលបានក្លាយជាកម្មវត្ថុនៃការឡោមព័ទ្ធអស់រយៈពេល ១៨ខែមកហើយ ក្នុងនោះពួកគេប្រឈមនឹងកង្វះខាតទឹកស្អាតនៅទីក្រុង al-Obeid និងការវាយប្រហារយានដ្រូនឥតឈប់ឈរ ។ អំឡុងការជជែកដេញដោលនៅក្រុមប្រឹក្សាសិទ្ធិមនុស្ស UN ស្ថិតក្នុងទីក្រុងហ្សឺណែវ ប្រទេសស្វីស លោក Turk និយាយប្រាប់ប្រតិភូថា ការិយាល័យរបស់លោកបានចងក្រងឯកសារជាច្រើនពីលំអាននៃការប្រហារជីវិត ការចាប់ពង្រាត់ ការធ្វើទារុណកម្ម និងអំពើហិង្សាផ្លូវភេទ តាមផ្លូវដែលពលរដ្ឋជម្លៀសខ្លួនឆ្លងកាត់នៅតំបន់ Kordofan ។ អង្គប្រជុំនេះ ត្រូវបានអំពាវនាវឡើងដោយអង់គ្លេសដែលប្រេសិតពិសេសរបស់ពួកគេធ្លាប់បានព្រមានរួចទៅហើយថា ជនស៊ីវិលរហូតដល់ ៥០ម៉ឺននាក់ ប្រឈមនឹងអំពើឃោឃៅទ្រង់ទ្រាយធំ ស្របពេលដែលកងកម្លាំង RSF បន្តកៀរគរកម្លាំងរបស់ខ្លួនម្តងហើយម្តងទៀតនៅជុំវិញទីក្រុង al-Obeid ដែលស្ថិតក្នុងចំណោមទីក្រុងធំបំផុតរបស់ស៊ូដង់ ៕

មនុស្សយ៉ាងហោចណាស់ ៤០នាក់ស្លាប់ ក្រោយរថយន្តក្រុងធ្លាក់ចូលទៅជ្រោះ នៅប៉ាគីស្ថាន

មនុស្សយ៉ាងហោចណាស់ ៤០នាក់ បានបាត់បង់ជីវិត នៅក្នុងប្រទេសប៉ាគីស្ថាន បន្ទាប់ពីរថយន្តក្រុងដឹកអ្នកដំណើរ ១គ្រឿង បានធ្លាក់ចូលជ្រោះ នៅថ្ងៃសុក្រ (ទី៣ ខែកក្កដា ឆ្នាំ២០២៦)នេះ។ នេះបើយោងតាមមន្ត្រីដែលបានប្រាប់សារព័ត៌មាន Anadolu។ហេតុការណ៍នេះបានកើតឡើងនៅខេត្ត Khyber Pakhtunkhwa ភាគពាយ័ព្យ ភ្លាមៗបន្ទាប់ពីរថយន្តក្រុងនោះបានឆ្លងផុតខេត្ត Balochistan ភាគនិរតី។ រថយន្តក្រុងនោះបានធ្វើដំណើរចេញពីទីក្រុង Dana Sar នៃតំបន់ Sherani ក្នុងខេត្ត Balochistan។ជាមួយគ្នានេះ អ្នកនាំពាក្យរដ្ឋបាលខេត្ត Balochistan លោក Shahid Rind បានប្រាប់សារព័ត៌មាន Anadolu ថា មនុស្ស ៨នាក់ផ្សេងទៀត បានរងរបួស ហើយកំពុងត្រូវបានព្យាបាល នៅមន្ទីរពេទ្យ។ ក្រុមជួយសង្គ្រោះមួយត្រូវបានចាប់ផ្តើមបញ្ជូនទៅភ្លាមៗ បន្ទាប់ពីកើតហេតុការណ៍នេះ។អភិបាលខេត្ត Balochistan លោក Sarfraz Bugti បាននិយាយថា លោកបានដឹកនាំប្រតិបត្តិការជួយសង្គ្រោះនៅកន្លែងកើតហេតុ៕

ការស្លាប់ជិត ៩.០០០នាក់ ត្រូវបានកត់ត្រានៅបារាំង អំឡុងរលកកម្ដៅក្ដៅខ្លាំងបំផុតខែមិថុនា

បារាំងបានកត់ត្រាករណីស្លាប់បន្ថែមចំនួន ២.០២៥នាក់ ក្នុងអំឡុងពេលរលកកម្ដៅក្ដៅខ្លាំងបំផុតខុសពីធម្មតាដែលបានកើតមាននៅប្រទេសនេះ កាលចុងខែមិថុនា ដោយមានអ្នកស្លាប់ជិត ៩.០០០នាក់ ត្រូវបានបញ្ជាក់ដោយប្រព័ន្ធអេឡិចត្រូនិចទូទាំងប្រទេស រវាងថ្ងៃទី២២ និងទី២៨ ខែមិថុនា។ នេះបើយោងតាមទិន្នន័យបឋមពីវិទ្យាស្ថានជាតិស្ថិតិ និងការសិក្សាសេដ្ឋកិច្ច (INSEE) ដែលត្រូវបានពិនិត្យដោយប្រព័ន្ធផ្សព្វផ្សាយ BFMTV នៅថ្ងៃសុក្រ (ទី៣ ខែកក្កដា ឆ្នាំ២០២៦) នេះ។ការកើនឡើងនេះ កើតមានឡើងស្របគ្នានឹងរលកកម្ដៅឡើងក្ដៅខ្លាំងបំផុត ដែលបានប៉ះពាល់ដល់តំបន់ភាគច្រើនរបស់ប្រទេស។ រដ្ឋមន្ត្រីក្រសួងសុខាភិបាលបារាំង លោកស្រី Stephanie Rist បាននិយាយថា តួលេខនេះនៅតែជាចំនួនបណ្តោះអាសន្ន ពីព្រោះលិខិតបញ្ជាក់មរណភាពតាមប្រព័ន្ធអេឡិចត្រូនិច មិនគ្របដណ្តប់ការស្លាប់ទាំងអស់ដែលត្រូវបានកត់ត្រាទូទាំងប្រទេសនោះទេ។អាជ្ញាធរបានព្រមានថា ទិន្នន័យបច្ចុប្បន្នគួរតែត្រូវបានបកស្រាយដោយប្រុងប្រយ័ត្ន ហើយអាចមើលស្រាលផលប៉ះពាល់ពេញលេញដោយសាររលកកម្ដៅ។ បើយោងតាមមន្ត្រី បានឱ្យដឹងលិខិតបញ្ជាក់មរណភាពតាមប្រព័ន្ធអេឡិចត្រូនិចមានចំនួនប្រហែល ៦០ភាគរយនៃការស្លាប់ទូទាំងប្រទេស ទោះបីជាការគ្របដណ្តប់ខុសគ្នាយ៉ាងខ្លាំង នៅទូទាំងតំបន់ក៏ដោយ។គួរបញ្ជាក់ថា ប្រទេសបារាំងបានជួបប្រទះនឹងសីតុណ្ហភាពក្ដៅខ្លាំងជាច្រើនថ្ងៃ ដោយតំបន់ជាច្រើនកត់ត្រាអាកាសធាតុលើសពី ៣៥អង្សាសេ៕

មេដឹកនាំមីយ៉ាន់ម៉ាទៅកាន់ប្រទេសឡាវ ដែលជាដំណើរទស្សនកិច្ចលើកដំបូងនៅរដ្ឋសមាជិកអាស៊ាន

នៅថ្ងៃសុក្រនេះ មេដឹកនាំសហភាពមីយ៉ាន់ម៉ាលោក Min Aung Hlaing បានធ្វើដំណើរទៅដល់ប្រទេសឡាវ ដែលជាដំណើរទស្សនកិច្ចលើកដំបូងរបស់លោកទៅកាន់រដ្ឋជាសមាជិកអាស៊ាន ចាប់តាំងពីរូបលោកឡើងកាន់អំណាច ។លោកបានជួបប្រធានាធិបតីឡាវលោក Thongloun Sisoulith នៅក្នុងទីក្រុងវៀងច័ន្ទ ជាទីដែលពួកគេបានចុះហត្ថលេខាលើអនុស្សរណៈយោគយល់ជាច្រើន រួមទាំងកិច្ចសហប្រតិបត្តិការលើបច្ចេកវិទ្យាអវកាស ។ក្រុមអ្នកវិភាគនិយាយថា ដំណើរទស្សនកិច្ចនេះសំខាន់ខ្លាំងណាស់ សម្រាប់សក្ដានុពលភូមិសាស្ត្រនយោបាយក្នុងតំបន់ ដែលវាបង្ហាញការផ្លាស់ប្តូរប្រកបដោយសក្តានុពលបែបណាដែលសមាជិកមួយចំនួនក្នុងតំបន់ ត្រូវចូលរួមជាមួយរដ្ឋបាលគាំទ្រដោយយោធាមីយ៉ាន់ម៉ាមួយនេះ ។គួរឲ្យដឹងថា លោក Min Aung Hlaing បានផ្លាស់ប្តូរពីមេដឹកនាំយោធា ទៅជាមេដឹកនំាស៊ីវិលមីយ៉ាន់ម៉ា កាលពីខែមេសាកន្លងទៅ ៕

ក្រុមអ្នកវិទ្យាសាស្រ្ត៖ បម្រែបម្រួលអាកាសធាតុនៅពីក្រោយព្រឹត្តិការណ៍ World Cup ដ៏ក្តៅគគុក

យោងតាមការអះអាងរបស់ក្រុមអ្នកវិទ្យាសាស្រ្តបរិយាកាសនៅក្រុមចាត់ថ្នាក់អាកាសធាតុពិភពលោក(WWA) បានឲ្យដឹងថា បម្រែបម្រួលអាកាសធាតុពាក់ព័ន្ធនឹងការប្រើប្រាស់ប្រេងឥន្ធនៈហ្វូស៊ីល ធ្វើឲ្យមានអាកាសធាតុក្តៅខុសពីធម្មតា ដែលនឹងគ្របដណ្តប់លើការប្រកួតនៅព្រឹត្តការណ៍បាល់ទាត់ World Cup ។ព្រឹត្តការណ៍ប្រកួតនាថ្ងៃសៅរ៍ស្អែកនេះ រវាងក្រុមជម្រើសជាតិប៉ារ៉ាហ្គាយ និងបារាំង គ្រោងនឹងចាប់ផ្តើមនៅវេលាម៉ោង ៥ល្ងាច ម៉ោងក្នុងស្រុក នៅរដ្ឋ Philadelphia ស្របពេលដែលរលកកម្តៅវាយប្រហារតំបន់ជាច្រើននៅសហរដ្ឋអាមេរិក និងកាណាដា ។ខណៈពេលនោះដែរ មនុស្សជាង ១០០នាក់ ត្រូវបានព្យាបាលសម្រាប់ជំងឺសុរិយារោគ គឺជាជំងឺពាក់ព័ន្ធនឹងកម្តៅក្តៅខ្លាំង ក្រោយសីតុណ្ហភាពខ្ពស់ វាយប្រហារហ្វូងមនុស្សដែលបានជួបជុំគ្នាចូលរួមព្រឹត្តការណ៍រថភ្លើងចំហាយទឹកជាប្រវត្តិសាស្រ្តនៅរដ្ឋ Pennsylvania ។សេវាកម្មអាកាសធាតុជាតិសហរដ្ឋអាមេរិក បានព្រមានក្នុងសប្តាហ៍នេះថា “ដូមកម្តៅ” គឺជាប្រព័ន្ធសម្ពាធខ្ពស់ដែលទាក់យកខ្សល់ក្តៅនៅពីក្រោមវា អាចនឹងមើលឃើញកម្តៅកើនឡើងពី ៤០,៥អង្សាសេ ដល់ ៤៦អង្សាសេនៅតំបន់ Midwest និងតំបន់ឆ្នេរភាគខាងកើត ក្នុងនោះទឹកដីធ្វើម្ចាស់ផ្ទះការប្រកួតបាល់ទាត់ World Cup មួយចំនួន នឹងរងផលប៉ះពាល់ ។ស្ថានភាពបែបនេះ នឹងគំរាមកំហែងផងដែរដល់វិបត្តិប្រព័ន្ធថាមពល និងធ្វើឲ្យប៉ះពាល់ដល់ការបា្ររព្ធពិធីកណ្តាលវាល ខួបលើកទី ២៥០នៃការប្រកាសឯករាជ្យរបស់សហរដ្ឋអាមេរិក នៅថ្ងៃទី ៤ ខែកក្កដាស្អែកនេះ ៕

នាយករដ្ឋមន្ត្រីម៉ុលដាវីលាលែងពីតំណែង ខណៈរដ្ឋាភិបាលដួលរលំ ដោយសាររឿងអាស្រូវក្រុមហ៊ុនរដ្ឋ

នាយករដ្ឋមន្ត្រីម៉ុលដាវី លោក Alexandru Munteanu បានប្រកាសលាលែងពីតំណែង នៅថ្ងៃសុក្រ (ទី៣ ខែកក្កដា ឆ្នាំ២០២៦) នេះ ដោយធ្វើឱ្យរដ្ឋាភិបាលរបស់លោកដួលរលំ ក្នុងពេលមានផលប៉ះពាល់នយោបាយកាន់តែខ្លាំងឡើង ដោយសាររឿងអាស្រូវពាក់ព័ន្ធនឹងក្រុមហ៊ុនគ្រប់គ្រងអាកាសចរណ៍ MoldATSA ដែលគ្រប់គ្រងដោយរដ្ឋ។នៅក្នុងសេចក្តីថ្លែងការណ៍មួយដែលបានបង្ហោះនៅលើវេទិកាបណ្ដាញសង្គម Facebook លោក Munteanu បានបញ្ជាក់ថា លោកមិនអាចបន្តកាន់តំណែងដោយមិនធ្វើឱ្យប៉ះពាល់គោលការណ៍របស់លោកបានទៀតទេ។តាមរយៈសេចក្ដីថ្លែងការណ៍នោះ លោកបានលើកឡើងថា៖ «ខ្ញុំបានទទួលយកសំណើធ្វើជានាយករដ្ឋមន្ត្រីដោយមានការទទួលខុសត្រូវយ៉ាងខ្លាំង និងដោយមានជំនឿយ៉ាងមុតមាំថា ខ្ញុំអាចចូលរួមចំណែកក្នុងការផ្លាស់ប្តូរអ្វីៗឱ្យកាន់តែប្រសើរឡើង។ នៅពេលដែលខ្ញុំយល់ថា ខ្ញុំមិនអាចអនុវត្តអាណត្តិរបស់ខ្ញុំស្របតាមគោលការណ៍ និងជំនឿដែលខ្ញុំមានទៀតទេ ខ្ញុំបានជ្រើសរើសចាកចេញ»។ការលាលែងពីតំណែងរបស់លោក Munteanu ធ្វើឱ្យរដ្ឋាភិបាលទាំងមូលដួលរលំដោយស្វ័យប្រវត្តិ ក្រោមក្របខ័ណ្ឌរដ្ឋធម្មនុញ្ញរបស់ប្រទេសម៉ុលដាវី។ ការចុះចេញរបស់លោកបានកើតឡើងប៉ុន្មានថ្ងៃបន្ទាប់ពីភាពចម្រូងចម្រាសលើក្រុមហ៊ុន MoldATSA បានបង្កឱ្យមានវិបត្តិនយោបាយ ដែលជំរុញឱ្យប្រធានាធិបតី លោកស្រី Maia Sanduto សន្យាថា នឹងមាន «ការបោសសម្អាតយ៉ាងទូលំទូលាយ» បន្ទាប់ពីមានការចោទប្រកាន់ អំពីការតែងតាំង និងអភិបាលកិច្ច នៅឯសហគ្រាសគ្រប់គ្រងដោយរដ្ឋ៕

អង្គការណាសាចុះបេសកកកម្មជាមួយការបាញ់បង្ហោះរូបយន្តអវកាសទៅជួយសង្រ្គោះតេឡេស្កូប SWIFT

បេសកកម្មលើកដំបូង ដើម្បីសង្រ្គោះយានអវកាសចាស់ Neil Gehrels Swift Observatory(ឬ តេឡេស្កូប SWIFT)របស់អង្គការណាសា កំពុងចាប់ផ្តើមហើយ ក្រោយយានអវកាសមានមុខងារជារូបយន្ត ត្រូវបានបាញ់បង្ហោះចេញពីតំបន់ប៉ាស៊ីហ្វិកខាងត្បូងនាថ្ងៃសុក្រនេះ ដើម្បីសាកល្បងឃ្លាំមើលយ៉ាងជិតដែលអាចផ្លាស់ប្តូររបៀបដែលផ្កាយរណបមួយនេះ ផ្លាស់ទីចេញពីគន្លងផែនដីបាន ។រូបយន្តអវកាស LINK ដែលផលិតឡើងដោយក្រុមហ៊ុន Katalyst Space Technologies មានមូលដ្ឋាននៅរដ្ឋ Arizona សហរដ្ឋអាមេរិក ត្រូវបានបញ្ជូនទៅកាន់គន្លងតារាវិថីនៅលើយានចម្លង Stargazer នៅលើរយៈកម្ពស់ ១២គ.មពីលើកោះ Kwajalein Atoll ស្ថិតក្នុងប្រជុំកោះ Marshall ។ រូបយន្តនេះ នឹងចំណាយពែល ២ខែ ដើម្បីព្យាយាមតាមឲ្យទាន់តេឡេស្កូប SWIFT មុនពេលប្រើប្រាស់ដៃរបស់វា ដើម្បីទាញតេឡេស្កូបមួយនេះ ទៅកាន់គន្លងខ្ពស់ជាងមុន ។ យានអវកាសគោចរក្នុងគន្លងតារាវិថីតម្លៃ ៥០០លានដុល្លាររបស់អង្គការណាសាមួយគ្រឿងនេះ ប្រឈមនឹងការឆេះ ពេលវាធ្លាក់ចូលក្នុងបរិយាកាសរបស់ផែនដីនាដំណាច់ឆ្នាំ ២០២៦នេះ ។គួររំឭកថា លោក Ghonhee Lee ដែលជាប្រធានប្រតិបត្តក្រុមហ៊ុន Katalyst Space Technologies ធ្លាប់បាននិយាយថា នេះមិនមែនជាឱកាសធានា ១០០ភាគរយថា ជាបេសកកម្មជោគជ័យនោះទេ ។ អ្នករាល់គ្នានៅអង្គការណាសា និងក្រុមហ៊ុន Katalyst ដឹងច្បាស់ថា យានអវកាស SWIFT កំពុងស្ថិតក្នុងហានិភ័យខ្ពស់បែបណា ។ លោកបន្តថា លោកសង្ឃឹមថានឹងអាចសហការណ៍ជាមួយទីបញ្ជាការអវកាសសហរដ្ឋអាមេរិក សម្រាប់ការធ្វើតេស្តបន្ថែមលើចលនាគន្លងគោចរ ប៉ុន្តែវាផ្អែកលើភាពជោគជ័យរបស់បេសកកម្មមួយគត់ ដើម្បីសង្រ្គោះយានអវកាស SWIFT ៕

ប្រធានាធិបតិស្ដីទីវ៉េណេស៊ុយអេឡា ការពារការឆ្លើយតបគ្រោះរញ្ជួយដី ក្រោយមានការរិះគន់ជាច្រើនថ្ងៃ

ប្រធានាធិបតីស្តីទីរបស់ប្រទេសវ៉េណេស៊ុយអេឡា លោកស្រី Delcy Rodriguez កាលពីថ្ងៃព្រហស្បតិ៍ (ទី២ ខែកក្កដា ឆ្នាំ២០២៦) បានបដិសេធការចោទប្រកាន់ ដែលថា រដ្ឋាភិបាលរបស់លោកស្រី បានឆ្លើយតបយឺតពេក ចំពោះការបំផ្លិចបំផ្លាញដែលបង្កឡើងដោយគ្រោះរញ្ជួយដី ២លើក ជាហេតុការណ៍ដែលបានឆក់យកជីវិតមនុស្សយ៉ាងហោចណាស់ជាង ២.០០០នាក់ហើយ បន្ទាប់ពីមានការរិះគន់យ៉ាងទូលំទូលាយជាច្រើនថ្ងៃ ចំពោះការប្រតិបត្តិឆ្លើយតបជាផ្លូវការ។ជនស៊ីវិលគ្រប់មជ្ឈដ្ឋាន ដែលរួមមានអ្នកនៅរស់រានមានជីវិត សមាជិកគ្រួសារ គ្រូពេទ្យស្ម័គ្រចិត្ត និងក្រុមជួយសង្គ្រោះបរទេស បានចុះទៅកាន់តំបន់គ្រោះមហន្តរាយ ជាពិសេសរដ្ឋ La Guaira ភាគខាងជើងដែលរងគ្រោះខ្លាំងបំផុត ចាប់តាំងពីការរញ្ជួយដីកម្រិត ៧,២ និង ៧,៥រ៉ិចទ័រ បានវាយប្រហារកាលពីថ្ងៃទី២៤ ខែមិថុនា។មនុស្សជាច្រើនដែលនាំគ្នាជីកកកាយតាមគំនរបាក់បែក រួមជាមួយអង្គការជំនួយអន្តរជាតិ និយាយថា ការឆ្លើយតបរបស់រដ្ឋាភិបាលមានភាពយឺតយ៉ាវ និងគ្មានប្រសិទ្ធភាព ដោយជំនួយនានា ដូចជាអាហារ និងសម្ភារៈវេជ្ជសាស្ត្រ ត្រូវបានពន្យារពេល និងកង្វះខាតគ្រឿងចក្រធុនធ្ងន់ជាបន្តបន្ទាប់ ដើម្បីកាយយកកម្ទេចកម្ទី អំឡុងប្រតិបត្តិការស្វែងរកដែលកំពុងបន្ត។អំឡុងសន្និសីទសារព័ត៌មាន លោកស្រី Rodriguez បានលើកឡើងថា៖ «វាគឺជាសោកនាដកម្មដោយសារគ្រោះធម្មជាតិ ក្នុងទំហំដែលយើងមិនធ្លាប់ស្រមៃដល់ទាល់តែសោះ ទោះបីជាយើងដឹងថា ព្រឹត្តិការណ៍រញ្ជួយដីអាចកើតឡើងនៅក្នុងប្រទេសរបស់យើងក៏ដោយ។ យើងមិនបានរង់ចាំ ១ថ្ងៃ ២ថ្ងៃ ឬ៣ថ្ងៃនោះទេ។ យើងបានចាត់វិធានការភ្លាមៗ»។លោកស្រីបានបន្តថា មន្ត្រីចំនួន ៤.០០០នាក់ ត្រូវបានដាក់ពង្រាយភ្លាមៗ ដោយបង្កើនដល់ ១៤.០០០នាក់នៅថ្ងៃបន្ទាប់ ហើយបន្ទាប់មកម្តងទៀតដល់តួលេខបច្ចុប្បន្ន ១៩.០០០នាក់។ ហើយលោកស្រីបានប្រាប់អ្នកសារព័ត៌មានថា លោកស្រីក៏បានចេញផងដែរនូវក្រឹត្យគ្រាអាសន្ន ដើម្បីឲ្យដំណើរការនីតិវិធីបន្ទាន់។លោកស្រី Rodriguez បានបន្ថែមថា៖ «យើងបានធ្វើអ្វីគ្រប់យ៉ាងតាមសិទ្ធិអំណាចរបស់យើង ហើយយើងនឹងបន្តធ្វើអ្វីគ្រប់យ៉ាងតាមសិទ្ធិអំណាចរបស់យើង និងច្រើនជាងនេះ។ ខ្ញុំត្រូវឆ្លងកាត់បទពិសោធន៍ដ៏ឈឺចាប់មួយចំនួន»៕

បណ្ដាញសង្គម

ព័ត៌មានថ្មីៗ

អតីតគ្រូបង្វឹកក្រុមជម្រើសជាតិកូរ៉េ Hong Myung-bo សុំទោសក្រោយធ្លាក់ពី World Cup

តើការធ្វើពហិការរបស់ UEFA អាចមានផលប៉ះពាល់អ្វីខ្លះដល់ FIFA?

អ្នកស្វែងរកការងារជាង ១០០នាក់ ទទួលបានលទ្ធផលល្អក្នុងវេទិកាការងារ និងកិច្ចសម្ភាសន៍ការងាររបស់ NEA

អង្គការមជ្ឈមណ្ឌលវប្បធម៌ខ្មែរកម្ពុជាក្រោម ចុះចែក និងផ្តល់សម្ភារៈសិក្សាដល់សិស្សមានជីវភាពខ្វះខាត និងកុមារកំព្រាចំនួន ៥៤នាក់នៅភូមិគោកឃ្លាង សង្កាត់គោកឃ្លាង ខណ្ឌសែនសុខ

កម្មវិធីបណ្តុះបណ្តាលជំនាញ ១,៥លាននាក់ ជួយឱ្យយុវជនក្រីក្រ និងពលរដ្ឋជាង ២ពាន់នាក់នៅតាកែវ មានជំនាញ និងចំណូលសមរម្យ

មន្រ្តីឧទ្យានុរក្ស ប្តេជ្ញាការពារបេតិកភណ្ឌធម្មជាតិដ៏មានតម្លៃរបស់កម្ពុជាឱ្យនៅស្ថិតស្ថេរគង់វង្ស

ចេះគុនខ្មែរ និងឃីកបុកស៊ីង ចំណេញលើចំណេញ និងងាយបត់បែនតាមស្ថានការណ៍

កាកបាទក្រហមកម្ពុជាប្រគល់ផ្ទះ១ខ្នងដល់គ្រួសារកងទ័ពជួរមុខ ដែលមានជីវភាពខ្វះខាតនៅខេត្តកំពង់ស្ពឺ

អ្នករាយការណ៍ពិសេស UN ប្រចាំកម្ពុជា ធ្វើទស្សនកិច្ចទៅកាន់ជំរុំជនភៀសសឹកក្នុងខេត្តបន្ទាយមានជ័យ ឃើញផ្ទាល់គ្រួសារដែលរងផលប៉ះពាល់ដោយសារជម្លោះតាមព្រំដែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានអន្តរជាតិ

USGS៖ រញ្ជួយដីកម្រិត ៦,២រ៉ិចទ័រ កើតមាន​នៅម្ដុំ​ភាគខាងកើតឥណ្ឌូនេស៊ី

ចិនអះអាងថា កិច្ចប្រតិបត្តិការជប៉ុន-ឥណ្ឌា មិនគួរមានគោលដៅលើទីក្រុងប៉េកាំងនោះទេ

ប្រធានសិទ្ធិមនុស្ស UN ៖ គ្រោះមហន្តរាយកំពុងកើតឡើងនៅទីក្រុង Al-Obeid ប្រទេសស៊ូដង់

មនុស្សយ៉ាង​ហោច​ណាស់​ ៤០នាក់ស្លាប់ ក្រោយរថយន្ត​ក្រុងធ្លាក់ចូលទៅជ្រោះ នៅប៉ាគីស្ថាន

ការស្លាប់ជិត ៩.០០០នាក់ ត្រូវបានកត់ត្រានៅបារាំង អំឡុង​រលកកម្ដៅ​ក្ដៅ​ខ្លាំង​បំផុតខែមិថុនា