BTV NEWS

ការស្លាប់ជនអន្តោប្រវេសន៍នៅទីក្រុងសេអ៊ូតាប្រទេសអេស្ប៉ាញឡើងដល់ជាង៧០នាក់ ក្រោយសម្រុកឆ្លងដែនពីម៉ារ៉ុក

[UPDATE] បងប្អូនជនជាតិរុស្ស៊ី ដែលបាត់ខ្លួនត្រូវបានរកឃើញស្លាប់ក្នុងប្រទេសថៃ ដោយជនសង្ស័យសារភាពថាបានប្លន់សម្លាប់

បងប្អូនជនជាតិរុស្ស៊ីដែលបាត់ខ្លួនត្រូវបានគេរកឃើញស្លាប់នៅក្នុងប្រទេសថៃ ដោយជនសង្ស័យសារភាពថាបានប្លន់សម្លាប់

មនុស្សបីនាក់ស្លាប់ បន្ទាប់ពីការបំផ្ទុះគ្រាប់បែកនៅភោជនីយដ្ឋានមួយក្នុងទីក្រុងមូស្គូ ប្រទេសរុស្ស៊ី

ព័ត៌មានអន្តរជាតិ

ចិនជំរុញឱ្យអាមេរិក ដោះស្រាយបញ្ហាតៃវ៉ាន់«ដោយប្រុងប្រយ័ត្នបំផុត»ក្នុងជំនួបតាមទូរស័ព្ទរវាងលោកWang Yi -Rubio

ក្រសួងការបរទេសចិន បាននិយាយកាលពីថ្ងៃពុធ ១ កក្កដា សប្ដាហ៍នេះ ថាប្រមុខការទូតចិន លោក វ៉ាង យី (Wang Yi )បានជំរុញឱ្យអាមេរិកដោះស្រាយបញ្ហាទាក់ទងកោះតៃវ៉ាន់ «ដោយប្រុងប្រយ័ត្នបំផុត» ក្នុងអំឡុងការសន្ទនាតាមទូរស័ព្ទជាមួយរដ្ឋមន្ត្រីការបរទេសអាមេរិក លោក ម៉ាកូ រូប៊ីយ៉ូ (Marco Rubio )កាលពីថ្ងៃអង្គារសប្ដាហ៍នេះ។ យោងតាមសេចក្តីសង្ខេបផ្លូវការរបស់ចិននៃការសន្ទនាតាមទូរស័ព្ទ លោក វ៉ាង និយាយថា ការផ្លាស់ប្តូរបន្តិចបន្តួចលើបញ្ហាតៃវ៉ាន់អាចប៉ះពាល់ដល់ស្ថានភាពទាំងមូលដោយបន្ថែមថា ចិន និងសហរដ្ឋអាមេរិកគួរតែធ្វើការដើម្បីគ្រប់គ្រងហានិភ័យគ្រប់ប្រភេទ ។ ជំនួបតាមទូរស័ព្ទនេះបានកើតឡើងបន្ទាប់ពីកិច្ចប្រជុំកំពូលពាក់កណ្តាលខែឧសភារវាងប្រធានាធិបតីចិន លោក Xi Jinping និងប្រធានាធិបតីអាមេរិក លោក Donald Trump នៅទីក្រុងប៉េកាំង ជាទីដែលលោក Xi បានប្រាប់លោក Trump ថា ការគ្រប់គ្រងការខ្វែងគំនិតគ្នារបស់ប្រទេសទាំងពីរលើបញ្ហាកោះតៃវ៉ាន់មិនបានត្រឹមត្រូវ អាចរុញច្រានទំនាក់ទំនងចិន-អាមេរិក ធ្លាក់ចូលក្នុង «ទីដ៏គ្រោះថ្នាក់បំផុត»។ ទីក្រុងប៉េកាំងអះអាងថាកោះដែលគ្រប់គ្រងដោយលទ្ធិប្រជាធិបតេយ្យនេះជាទឹកដីរបស់ខ្លួន ហើយ ពុំច្រានចោលការប្រើប្រាស់កម្លាំងយោធាដើម្បីវាយក្រសោបមកដាក់ក្រោមការគ្រប់គ្រងឡើយ។ ក្រុងតៃប៉ិ បដិសេធការអះអាងរបស់ទីក្រុងប៉េកាំង ហើយសហរដ្ឋអាមេរិកត្រូវបានចងភ្ជាប់ដោយច្បាប់ដើម្បីផ្តល់មធ្យោបាយដល់ក្រុងតៃប៉ិក្នុងការការពារខ្លួន។ លោក Wang បាននិយាយថា សហរដ្ឋអាមេរិក និងចិនគួរតែធ្វើការដើម្បីកសាង «ទំនាក់ទំនងបែបស្ថាបនា និងមានស្ថិរភាពជាយុទ្ធសាស្ត្រ ហើយភាគីទាំងពីរគួរតែលុបបំបាត់ការរំខាន ជម្នះឧបសគ្គ និងបន្តដើរតាមទិសដៅត្រឹមត្រូវនេះយ៉ាងរឹងមាំ»។ ក្រសួងការបរទេសចិនបាននិយាយថា លោក Wang និងលោក Rubio បានយល់ព្រម «បន្តរក្សាការទំនាក់ទំនងតាមរបៀបដែលអាចបត់បែនបាន៕

អ្នកស្លាប់ក្នុងការរញ្ជួយដីនៅវ៉េណេស៊ុយអេឡា ឡើងដល់ជាង២ពាន់នាក់ ខណៈប្រកាសកាន់ទុក្ខទូទាំងប្រទេសរយៈពេល៧ថ្ងៃ

ក្តីសង្ឃឹមក្នុងការស្វែងរកអ្នករស់រានមានជីវិតបន្ថែមទៀតបានរសាត់ឆ្ងាយកាលពីថ្ងៃពុធ១កក្កដាសប្ដាហ៍នេះ ខណៈវ៉េណេស៊ុយអេឡាបានប្រារព្ធខួបមួយសប្តាហ៍ចាប់តាំងពីការរញ្ជួយដីពីរលើកបានសម្លាប់មនុស្ស២.២៩៥នាក់ ខណៈអ្នករួចជីវិតពីគ្រោះមហន្តរាយនេះកំពុងខ្វះខាតស្បៀងអាហារយ៉ាងខ្លាំង។ ខណៈចំនួនអ្នកស្លាប់កើនឡើង ប្រធានាធិបតីបណ្តោះអាសន្នរបស់ប្រទេសវ៉េណេស៊ុយអេឡា លោកស្រី Delcy Rodriguez បានប្រកាសកាន់ទុក្ខរយៈពេលប្រាំពីរថ្ងៃ ដោយនិយាយថា "ដួងព្រលឹងរបស់ប្រទេសនេះ ត្រូវបានដាច់រហែកដោយការបាត់បង់ជីវិតមនុស្ស"។ មនុស្សរាប់ម៉ឺននាក់នៅតែបាត់ខ្លួន។ អគារភាគច្រើនត្រូវបានដួលរលំនៅក្នុងទីក្រុង La Guaira ដែលរងគ្រោះខ្លាំងបំផុត នៅភាគខាងជើងរដ្ឋធានីការ៉ាកាស (Caracas) ត្រូវបានធ្វើកំណត់សម្គាល់ដោយអក្សរ D សម្រាប់ការស្លាប់ ជាសញ្ញាមួយដែលពួកគេត្រូវបានស្វែងរក ហើយពុំបានបង្ហាញសញ្ញានៃជីវិតឡើយ។ មានអ្នករស់រានមានជីវិតពីអព្ភូតហេតុជាច្រើន ដូចជាក្មេងប្រុសអាយុបីឆ្នាំម្នាក់ដែលត្រូវបានគេរកឃើញនៅមានជីវិតកាលពីថ្ងៃអង្គារ ប្រាំមួយថ្ងៃបន្ទាប់ពីការរញ្ជួយដីដ៏ខ្លាំងក្លាបំផុតរបស់វ៉េណេស៊ុយអេឡាក្នុងរយៈពេលជាងមួយសតវត្សរ៍មកនេះ។ប៉ុន្តែក្រុមអ្នកជំនាញនិយាយថា ជនរងគ្រោះដែលជាប់ខ្លួនក្នុងគំនរកម្ទេចថ្មទំនងជាមិនអាចរស់រានមានជីវិតលើសពី៧២ ម៉ោងបន្ទាប់ពីការរញ្ជួយដីនោះទេ។ លោក Jorge Rodriguez ប្រធានរដ្ឋសភាវ៉េណេស៊ុយអេឡា និយាយកាលពីថ្ងៃពុធថា ចំនួនអ្នកស្លាប់បានកើនឡើងដល់ ២.២៩៥ នាក់ និងមនុស្សជាង១១.០០០នាក់បានរងរបួស ហើយមនុស្សជិត ១៣.០០០ នាក់ គ្មានផ្ទះសម្បែង។អង្គការសហប្រជាជាតិប៉ាន់ប្រមាណថា មនុស្ស ៥០.០០០ នាក់កំពុងបាត់ខ្លួន៕

សភាអ៊ីរ៉ង់ ច្រានចោលបាយការណ៍ដែលថាទីភ្នាក់ងារ IAEA ចូលទៅកាន់ទីតាំងនុយក្លេអ៊ែររបស់អ៊ីរ៉ង់

ពេលនេះយើងអាចនាំមកឲ្យអ្នកបន្ថែមទៀតពីការអធិប្បាយរបស់ប្រធានសភាអ៊ីរ៉ង់ លោក Mohammad Bagher Ghalibaf លើដំណើរការរបស់ទីភ្នាក់ងារថាមពលអាតូមិកអន្តរជាតិ(IAEA)ចូលទៅកាន់រោងចក្រនុយក្លេអ៊ែរដែលត្រូវបានទម្លាក់គ្រាប់បែកនៅទីក្រុង Fordow ទីក្រុងNatanz និងទីក្រុង Isfahan។ លោកបាននិយាយថា របាយការណ៍ដែលថាអ៊ីរ៉ង់បានផ្តល់ដំណើរការគឺមិនពិតនោះទេ ហើយក្រុមអធិការកិច្ចរបស់ទីភ្នាក់ងារ IAEA ពុំមានសិទ្ធិត្រួតពិនិត្យទីតាំងនុយក្លេអ៊ែរដែលត្រូវបានទម្លាក់គ្រាប់បែកដោយសហរដ្ឋអាមេរិកឡើយ។ យោងតាមប្រព័ន្ធផ្សព្វផ្សាយផ្សាយ IRIB លោក Ghalibaf បាននិយាយថា បច្ចុប្បន្ន ក្រុមអធិការកិច្ច បានចូលទៅកាន់ទីតាំងចំនួនពីរកន្លែងប៉ុណ្ណោះ មានរោងចក្រថាមពល Bushehr និងរោងចក្ររ៉េអាក់ទ័រនៅទីក្រុងតេអេរ៉ង់។ លោក Ghalibaf បាននិយាយបន្ថែមថា សភាបានអនុម័តច្បាប់ហាមឃាត់ដំណើរការបែបនេះ។ សភាបានអនុម័តច្បាប់នេះហើយក្រុមប្រឹក្សាសន្តិសុខជាតិជាន់ខ្ពស់ក៏បានអនុម័តសេចក្តីសម្រេចដែលត្រូវគ្នានោះផងដែរ។ ការលើកឡើងរបស់លោក Ghalibaf ធ្វើឡើងបន្ទាប់ពីប្រមុខទីភ្នាក់ងារ IAEA លោក Rafael Grossi បាននិយាយថា ក្រុមអធិការកិច្ចរបស់ទីភ្នាក់ងារនឹងត្រូវចាប់ផ្តើមដំណើរការនិងត្រួតពិនិត្យទីតាំងនុយក្លេអ៊ែររបស់អ៊ីរ៉ង់ក្រោមអនុស្សរណៈនៃការយោគយល់ រវាងអ៊ីរ៉ង់និងសហរដ្ឋអាមេរិក ដោយលោក Grossi បាននិយាយថា យើងសង្ឃឹមថានឹងទៅដល់ទីនោះឆាប់ៗ ។

អ៊ីរ៉ង់ លើកឡើងពីការរំលោភរបស់សហរដ្ឋអាមេរិកលើកាតព្វកិច្ច ក្នុងកិច្ចចរចានៅទីក្រុងដូហា

អនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi បានប្រាប់ប្រព័ន្ធផ្សព្វផ្សាយរដ្ឋថា គណៈប្រតិភូអ៊ីរ៉ង់ បានបើកកិច្ចប្រជុំចំនួនពីរជុំជាមួយអ្នកសម្របសម្រួលប្រទេសកាតា និងប្រទេសប៉ាគីស្ថាន។ កិច្ចប្រជុំលើកដំបូងគឺជាកិច្ចប្រជុំក្រុមការងារត្រួតពិនិត្យនិងអនុវត្ត ជាស្ថាប័នមួយក្នុងចំណោមស្ថាប័នចំនួនបួនដែលត្រូវបានបង្កើតឡើងក្រោមអនុស្សរណៈនៃការយោគយល់រវាងសហរដ្ឋអាមេរិក និងអ៊ីរ៉ង់។ យោងតាមប្រព័ន្ធផ្សព្វផ្សាយ IRIB គណៈប្រតិភូអ៊ីរ៉ង់បានប្រើប្រាស់កិច្ចប្រជុំនេះដើម្បីលើកឡើងពី «ការរំលោភលើកាតព្វកិច្ចរបស់សហរដ្ឋអាមេរិកក្រោមមាត្រា១នៃអនុស្សរណៈនៃការយោគយល់» ដែលអំពាវនាវឱ្យបញ្ចប់សង្គ្រាមនៅគ្រប់ផ្នែក។ កិច្ចប្រជុំក៏បានពិភាក្សាអំពី «របាយការណ៍ព័ត៌មានអំពីសកម្មភាពរបស់សហរដ្ឋអាមេរិកដើម្បីពង្រឹងយុទ្ធោបករណ៍ និងកងកម្លាំងនៅក្នុងតំបន់ និងសេចក្តីថ្លែងការណ៍គំរាមកំហែង និងអន្តរាគមន៍ដោយមន្ត្រីអាមេរិក»។ កិច្ចប្រជុំបានសម្រេច បង្កើតបណ្តាញទំនាក់ទំនងភ្លាមៗក្នុងរយៈពេលមួយថ្ងៃ និងដើម្បីកត់ត្រាជាផ្លូវការនូវចំណុចខ្វះខាតនៃអនុស្សរណៈនៃការយោគយល់ ដើម្បីឱ្យបញ្ហាអាចត្រូវបានពិនិត្យ និងដោះស្រាយ។ កិច្ចប្រជុំជុំទីពីរជាមួយមន្ត្រីប្រទេសកាតា រួមទាំងធនាគារកណ្តាលរបស់ប្រទេស បានដោះស្រាយការបញ្ចេញមូលនិធិអ៊ីរ៉ង់ដែលត្រូវបានបង្កកក្នុងចំនួនប្រហែល៦ពាន់លានដុល្លារ។ យោងតាមលោក Gharibabadi បានឲ្យដឹងថា ការចរចាបានគ្របដណ្តប់លើបញ្ហាទាក់ទងនឹងការចំណាយប្រាក់ដំបូងចំនួន៦ពាន់លានដុល្លារនេះ ដោយមានកិច្ចព្រមព្រៀងមួយដែលអ៊ីរ៉ង់នឹងត្រូវប្រើប្រាស់មូលនិធិ ដើម្បីទិញទំនិញស្របតាមតម្រូវការដែលបានប្រកាសរបស់ខ្លួន។

សហរដ្ឋអាមេរិក បដិសេធមិនបន្តកិច្ចព្រមព្រៀងពាណិជ្ជកម្មអាមេរិកខាងជើង

រដ្ឋបាលលោក Trump បានបដិសេធមិនបន្តកិច្ចព្រមព្រៀងសហរដ្ឋអាមេរិក-ម៉ិកស៊ិក-កាណាដា ដោយចាប់ផ្តើមការរាប់ថយក្រោយរយៈពេល១០ឆ្នាំដើម្បីដំណើរការអនុវត្តកិច្ចព្រមព្រៀងពាណិជ្ជកម្ម ខណៈលោកកំពុងស្វែងរកការផ្លាស់ប្តូរ ព្យាយាមស្តារឡើងវិញការងារផលិតកម្មនិងកាត់បន្ថយឱនភាពពាណិជ្ជកម្មរបស់សហរដ្ឋអាមេរិកជាមួយប្រទេសជិតខាងអាមេរិកខាងជើង។ លោក Jamieson Greer អ្នកតំណាងពាណិជ្ជកម្មសហរដ្ឋអាមេរិកបាននិយាយនៅក្នុងសេចក្តីថ្លែងការណ៍ថា «សហរដ្ឋអាមេរិកមិនបានយល់ព្រមបន្តកិច្ចព្រមព្រៀងសហរដ្ឋអាមេរិក-ម៉ិកស៊ិក-កាណាដា( USMCA) ក្នុងទម្រង់បច្ចុប្បន្នរបស់ខ្លួនទេ»។ «ជាលទ្ធផលកិច្ចព្រមព្រៀងសហរដ្ឋអាមេរិក-ម៉ិកស៊ិក-កាណាដា មិនត្រូវបានបន្តឡើយ ប៉ុន្តែសហរដ្ឋអាមេរិកនឹងបន្តចូលរួមជាមួយប្រទេសម៉ិកស៊ិក និងកាណាដា ដើម្បីដោះស្រាយចំណុចខ្វះខាតនៃកិច្ចព្រមព្រៀង និងឱនភាពពាណិជ្ជកម្ម»។ លោក Greer បាននិយាយថា សហរដ្ឋអាមេរិកនឹងបន្តដំណើរការជុំចរចាទ្វេភាគីកិច្ចព្រមព្រៀងសហរដ្ឋអាមេរិក-ម៉ិកស៊ិក-កាណាដា(USMCA) ដែលគ្រោងធ្វើឡើងជាមួយប្រទេសម៉ិកស៊ិកក្នុងអំឡុងសប្តាហ៍ថ្ងៃទី ២០ ខែកក្កដា។ មន្ត្រីរដ្ឋបាលជាន់ខ្ពស់ម្នាក់បាននិយាយថា ការចរចានៅម៉ិកស៊ិកនឹងផ្តោតសំខាន់លើការពង្រឹងច្បាប់ប្រភពដើមរបស់អាមេរិកខាងជើងសម្រាប់រថយន្ត និងទំនិញឧស្សាហកម្មផ្សេងទៀត និងសន្តិសុខសេដ្ឋកិច្ចដើម្បីរារាំងប្រទេសដទៃទៀត រួមទាំងប្រទេសចិនពីការទទួលបានប្រយោជន៍ពីដំណើរការកិច្ចព្រមព្រៀងសហរដ្ឋអាមេរិក-ម៉ិកស៊ិក-កាណាដា(USMCA)។ រដ្ឋមន្ត្រីក្រសួងសេដ្ឋកិច្ចប្រទេសម៉ិកស៊ិក លោក Marcelo Ebrard បាននិយាយក្នុងសន្និសីទសារព័ត៌មានថា ប្រទេសម៉ិកស៊ិកចង់ជួយដោះស្រាយការព្រួយបារម្ភរបស់សហរដ្ឋអាមេរិកអំពីការបាត់បង់ការងារ និងឱនភាពពាណិជ្ជកម្ម ប៉ុន្តែសហរដ្ឋអាមេរិក និងម៉ិកស៊ិកនៅតែខ្វែងគំនិតគ្នាជុំវិញការទាមទាររបស់សហរដ្ឋអាមេរិកសម្រាប់ច្បាប់ប្រភពដើមរថយន្តក្នុងតំបន់ដែលកាន់តែតឹងរ៉ឹង។

អង្គការសុខភាពពិភពលោកព្រមានថារលកកម្ដៅនៅអឺរ៉ុបនឹងកាន់តែធ្ងន់ធ្ងរ និងគំរាមកំហែងដល់ការស្លាប់កាន់តែច្រើន

អង្គការសុខភាពពិភពលោក (WHO) កាលពីថ្ងៃពុធ១ កក្កដា សប្ដាហ៍នេះ បានព្រមានថារលកកម្ដៅដែលកំពុងគ្របដណ្ដប់ពាសពេញអឺរ៉ុប គឺជាសញ្ញានៃអ្វីដែលទ្វីបនេះទំនងជានឹងប្រឈមនៅក្នុងប៉ុន្មានឆ្នាំខាងមុខ ដោយសង្កត់ធ្ងន់ថារដូវក្តៅនឹងកាន់តែធ្ងន់ធ្ងរឡើង ខណៈការប្រែប្រួលអាកាសធាតុកើនឡើង។ លោក Hans Kluge នាយក WHO តំបន់ប្រចាំទ្វីបអឺរ៉ុប បាននិយាយថា រលកកម្ដៅបច្ចុប្បន្នគ្រាន់តែជា "ការហាត់សម" សម្រាប់អនាគត ដោយកត់សម្គាល់ថា អឺរ៉ុបកំពុងឡើងកម្ដៅក្នុងអត្រាច្រើនជាងពីរដងនៃអត្រាមធ្យមសកល ហើយរលកកម្ដៅកំពុងកាន់តែញឹកញាប់ ខ្លាំង និងអូសបន្លាយ។លោកបានព្រមានថា ការត្រៀមខ្លួនមិនគ្រប់គ្រាន់សម្រាប់ព្រឹត្តិការណ៍អាកាសធាតុធ្ងន់ធ្ងរបែបនេះនឹងបណ្តាលឱ្យមានអ្នកស្លាប់កាន់តែច្រើន និងការបាត់បង់មនុស្សកាន់តែច្រើន។ លោក Tedros Adhanom Ghebreyesus ប្រមុខអង្គការសុខភាពពិភពលោក កាលពីកន្លងទៅបានប្រកាសថា រលកកម្ដៅ ដែលកំពុងបន្តរហូតមកដល់ពេលនេះ បានបណ្តាលឱ្យមានមនុស្សស្លាប់ច្រើនជាង១.៣០០នាក់។ លោក Kluge ក៏បានគូសបញ្ជាក់ពីសម្ពាធកាន់តែខ្លាំងឡើងលើប្រព័ន្ធថែទាំសុខភាព ដោយកត់សម្គាល់ថា ការហៅទូរស័ព្ទទៅកាន់សេវាសង្គ្រោះបន្ទាន់បានកើនឡើងរហូតដល់ ៥០ ភាគរយនៅក្នុងទីក្រុងមួយចំនួនរបស់ប្រទេសបារាំង។ ទីក្រុងឡុងដ៍្រ បានកត់ត្រាចំនួនការហៅទូរស័ព្ទសង្គ្រោះបន្ទាន់ដែលគំរាមកំហែងដល់អាយុជីវិតខ្ពស់បំផុតរបស់ខ្លួនក្នុងមួយថ្ងៃ ខណៈប្រទេសអេស្ប៉ាញបានរាយការណ៍ពីការស្លាប់ដែលទាក់ទងនឹងកម្ដៅជាង៣០០នាក់ក្នុងរយៈពេលប៉ុន្មានថ្ងៃ ហើយ អ៊ីតាលីបានប្រកាសពីការស្លាប់ដែលទាក់ទងនឹងកម្ដៅចំនួន៥នាក់ក្នុងរយៈពេល២៤ ម៉ោង។ ទោះបីជាសីតុណ្ហភាពបានចាប់ផ្តើមថយចុះនៅក្នុងតំបន់ខ្លះក៏ដោយ មនុស្សជាង ៩៥លាននាក់នៅទូទាំងអឺរ៉ុបខាងកើត និងខាងត្បូងនៅតែបន្តស៊ូទ្រាំនឹងសីតុណ្ហភាពលើសពី ៣៥ អង្សាសេ ដោយក្រុមអ្នកឧតុនិយមព្យាករណ៍ថារលកកម្ដៅមួយទៀតនឹងចាប់ផ្តើមនៅចុងសប្តាហ៍នេះ៕

អ៊ុយក្រែន ព្រមានពីការវាយប្រហារទ្រង់ទ្រាយធំថ្មីរបស់រុស្ស៊ី ខណៈតំបន់ជាច្រើនកំពុងរងការវាយប្រហារ

លោកប្រធានាធិបតី Volodymyr Zelenskyy បានថ្លែងនៅក្នុងសន្និសីទសារព័ត៌មានជាមួយនាយករដ្ឋមន្ត្រីអៀរឡង់ លោក Micheál Martin នៅប្រទេសអៀរឡង់ កាលពីថ្ងៃពុធ ១ កក្កដា ថា រុស្ស៊ីកំពុងត្រៀមវាយប្រហារទ្រង់ទ្រាយធំមួយផ្សេងទៀតលើអ៊ុយក្រែន ខណៈតំបន់ជាច្រើននៃប្រទេសនេះកំពុងរងការវាយប្រហារឥតឈប់ឈរពេញមួយថ្ងៃ។ លោក Zelenskyy បាននិយាយថា ម្តង ឬពីរដងក្នុងមួយសប្តាហ៍ មានការវាយប្រហារតាមអាកាសទ្រង់ទ្រាយធំ។ថ្ងៃនេះមានព័ត៌មានគួរឱ្យព្រួយបារម្ភអំពីការត្រៀមវាយប្រហារតាមអាកាសទ្រង់ទ្រាយធំបែបនេះមួយទៀតរបស់រុស្ស៊ី។ពួកលោកមានទិន្នន័យចារកម្មពាក់ព័ន្ធដំណឹងនេះ។ លោក Zelenskyy បន្ថែមថា បន្ទាប់ពីសន្និសីទនេះ លោក និងក្រុមរបស់លោកនឹងត្រឡប់ទៅអ៊ុយក្រែនវិញឲ្យបានឆាប់បំផុត ហើយបានជំរុញឱ្យពលរដ្ឋអ៊ុយក្រែនប្រុងប្រយ័ត្ន និងថែរក្សាខ្លួនឯង។ លោក Ihor Terekhov អភិបាលក្រុង Kharkiv បានរាយការណ៍ថា ទីក្រុង Kharkiv ភាគឦសានត្រូវបានវាយប្រហារខ្លាំងបំផុត ដោយមានក្មេងប្រុសអាយុ១៥ ឆ្នាំម្នាក់បានស្លាប់ និងជនស៊ីវិល៣២នាក់បានរងរបួសនៅក្នុងការវាយប្រហារពេលថ្ងៃរបស់រុស្ស៊ីលើទីក្រុងនេះកាលពីថ្ងៃទី ១ ខែកក្កដាសប្ដាហ៍នេះ ។ លោក Terekhov បាននិយាយថា ទីក្រុងនេះត្រូវបានវាយប្រហារដោយគ្រាប់បែកទម្លាក់ពីលើអាកាសចំនួន៧ គ្រាប់។ សេវាសង្គ្រោះបន្ទាន់រដ្ឋអ៊ុយក្រែន បានរាយកាណ៍ថា នៅក្នុងតំបន់ Odesa មនុស្សពីរនាក់បានស្លាប់ និង ១៣ នាក់បានរងរបួស បន្ទាប់ពីការវាយប្រហារដោយមីស៊ីលបាលីស្ទិកលើតំបន់នេះ។ ទីភ្នាក់ងារនេះបានបន្ថែមថា ការវាយប្រហារនេះបានបំផ្លាញឃ្លាំងចំនួនពីរ។ យោងតាមក្រុមអាជ្ញាធរមូលដ្ឋាន ការវាយប្រហារ អ្នកស្លាប់ និងរបួសក៏ត្រូវបានរាយការណ៍ផងដែរនៅក្នុងតំបន់ Poltava, Dnipropetrovsk , Zaporizhzhia និង Kherson៕

អ៊ីរ៉ង់នឹងបើក«បណ្តាញទំនាក់ទំនង»លើអនុស្សរណៈនៃការយោគយល់(MoU)ជាមួយអាមេរិកក្រោយពិភាក្សានៅកាតា

ទីក្រុងតេអេរ៉ង់និយាយថា ខ្លួននឹងបង្កើត «បណ្តាញទំនាក់ទំនង» ជាមួយទីក្រុងវ៉ាស៊ីនតោន ដើម្បីរាយការណ៍ពីការរំលោភលើអនុស្សរណៈនៃការយោគយល់គ្នា (MoU) ដែលបានចុះហត្ថលេខារវាងភាគីទាំងពីរកាលពីពីរសប្តាហ៍មុន ដើម្បីបញ្ចប់សង្គ្រាមរវាងអាមេរិក និងអ៊ីស្រាអែលលើអ៊ីរ៉ង់។ អនុរដ្ឋមន្ត្រីការបរទេសអ៊ីរ៉ង់ លោក Kazem Gharibabadi បានធ្វើសេចក្តីប្រកាសនេះ បន្ទាប់ពីកិច្ចពិភាក្សាបច្ចេកទេសដោយប្រយោលរវាងអ៊ីរ៉ង់ និងសហរដ្ឋអាមេរិក ត្រូវបានធ្វើឡើងនៅប្រទេសកាតា កាលពីថ្ងៃពុធសប្ដាហ៍នេះ ខណៈភាគីទាំងពីរបានស្វែងរកការជំរុញការចរចារបស់ខ្លួន ដើម្បីបន្ធូរបន្ថយភាពតានតឹង បន្ទាប់ពីការបាញ់ផ្លោងដាក់គ្នាថ្មីៗនេះ។ ប្រទេសកាតាវិញ ក៏និយាយផងដែរថា ការចរចាដោយប្រយោជន៍រវាងអាមេរិកនិងអ៊ីរ៉ង់បានបង្កើតឲ្យមានវឌ្ឍនភាពជាវិជ្ជមាន ។ លោក Gharibabadi ក៏បាននិយាយផងដែរថា ផ្នែកមួយនៃទ្រព្យសម្បត្តិអ៊ីរ៉ង់ដែលបង្កកចំនួន ៦ ពាន់លានដុល្លារ នឹងត្រូវប្រើប្រាស់ដើម្បីទិញទំនិញដែលទីក្រុងតេអេរ៉ង់ត្រូវការ។ ប្រធានាធិបតីអាមេរិក លោក Donald Trump បាននិយាយកាលពីអតីតកាលថា មូលនិធិនេះនឹងត្រូវបានប្រើប្រាស់ដោយអ៊ីរ៉ង់ ដើម្បីទិញតែផលិតផលអាមេរិក ប៉ុណ្ណោះ។ អនុរដ្ឋមន្ត្រីការបរទេសអ៊ីរ៉ង់រូបនេះ និយាយថា ក្នុងអំឡុងពេលកិច្ចប្រជុំជាមួយមន្ត្រីកាតា រួមទាំងធនាគារកណ្តាល បញ្ហាមួយចំនួនទាក់ទងនឹងការចំណាយផ្នែកមួយនៃទឹកប្រាក់៦ ពាន់លានដុល្លារដំបូងត្រូវបានពិនិត្យឡើងវិញ៕

កិច្ចចរចារវាងអាមេរិក-អ៊ីរ៉ង់ បានបញ្ចប់នៅទីក្រុងដូហា ប្រទេសកាតា ដោយផ្តោតលើច្រកសមុទ្រហ័រមូស

អ៊ីរ៉ង់ និងសហរដ្ឋអាមេរិក បានបញ្ចប់កិច្ចចរចាដោយប្រយោលមួយជុំកាលពីថ្ងៃពុធ១កក្កដាសប្ដាហ៍នេះ ដោយគ្មានសញ្ញាណាមួយដែលពួកគេបានឈានទៅរកសន្តិភាពយូរអង្វែងនោះទេ ដោយផ្តោតជំនួសមកវិញលើបញ្ហាដែលពួកគេនិយាយថាត្រូវបានដោះស្រាយនៅពេលកិច្ចព្រមព្រៀងបណ្តោះអាសន្នត្រូវបានប្រកាសកាលពីពីរសប្តាហ៍មុន។ ប្រភពដែលដឹងការពិភាក្សានេះបាននិយាយថា អ្នកចរចាសម្រាប់ប្រទេសទាំងពីរបានចំណាយពេលពីរថ្ងៃនៅទីក្រុងដូហា ដើម្បីពិភាក្សាអំពីចរាចរណ៍ផ្លូវសមុទ្រនៅច្រកសមុទ្រហ័រមូស (Hormuz) និងការដោះលែងមូលនិធិបង្កករបស់អ៊ីរ៉ង់ ដែលជាបញ្ហាសំខាន់ពីរក្រោមកិច្ចព្រមព្រៀងដំបូង។ ក្រសួងការបរទេសកាតាបាននិយាយថា កិច្ចប្រជុំបន្ទាប់នឹងធ្វើឡើងបន្ទាប់ពីពិធីបុណ្យសពរបស់មេដឹកនាំកំពូលអ៊ីរ៉ង់ លោក អាយ៉ាតូឡា អាលី ខាមីណេ (Ayatollah Ali Khamenei) ដែលត្រូវបញ្ចុះនៅថ្ងៃទី៩ ខែកក្កដា។ អ្នកនាំពាក្យក្រសួងខាងលើ បាននិយាយនៅក្នុងសារមួយលើបណ្ដាញសង្គម X ថា ការពិភាក្សានៅទីក្រុងដូហាបានបង្កើត "វឌ្ឍនភាពវិជ្ជមាន" លើបញ្ហាទាក់ទងនឹងអនុស្សរណៈដែលបានបញ្ឈប់សង្គ្រាមកាលពីខែមិថុនា និងកំពុង "កសាងលើលទ្ធផល" នៃកិច្ចប្រជុំកំពូលមួយនៅប្រទេសស្វីស។ នៅទីក្រុងវ៉ាស៊ីនតោន ប្រធានាធិបតីអាមេរិក Donald Trump បាននិយាយថា ភាគីទាំងពីរកំពុងសម្រេចបានវឌ្ឍនភាពលើដែនកំណត់ដែលអាចធ្វើទៅបានចំពោះកម្មវិធីនុយក្លេអ៊ែររបស់អ៊ីរ៉ង់ ជាហេតុផលចម្បងដែលលោកបានចាប់ផ្តើមសង្គ្រាមជាមួយអ៊ីស្រាអែលកាលពីខែកុម្ភៈឆ្នាំ២០២៦នេះ។ លោកបានប្រាប់ក្រុមអ្នកសារព័ត៌មានថា ការរំសាយអាវុធនុយក្លេអ៊ែររបស់អ៊ីរ៉ង់ កំពុងដំណើរការទៅបានល្អ។ ពួកគេមានកិច្ចប្រជុំល្អណាស់ ហើយពួកលោកនឹងរង់ចាំមើល៕

លោក Trump និយាយថា អាមេរិកនិងអ៊ីរ៉ង់ចុះសម្រុងគ្នាខ្លាំងណាស់

ប្រធានាធិបតីសហរដ្ឋអាមេរិកលោក Donald Trump និយាយនៅថ្ងៃពុធនេះថា សហរដ្ឋអាមេរិកចុះសម្រុងខ្លាំងណាស់ជាមួយអ៊ីរ៉ង់និងជំនួបកាលពីពេលថ្មីៗនៅប្រទេសកាតាបានដំណើរការទៅយ៉ាងរលូន ។លោក Trump និយាយប្រាប់ក្រុមអ្នកសារព័ត៌មានថាការរំសាយអាវុធនុយក្លេអ៊ែររបស់អ៊ីរ៉ង់ កំពុងឆ្ពោះទៅមុខយ៉ាងល្អ ។ ពួកគេមាននូវជំនួបល្អខ្លាំងណាស់ដូចដែលពួកយើងបានមើលឃើញអញ្ចឹង ។ប្រភពដឹងច្បាស់ពីជំនួប និងមន្រ្តីអ៊ីរ៉ង់ម្នាក់ បានឲ្យដឹងថា សហរដ្ឋអាមេរិក និងអ៊ីរ៉ង់មាននូវជំនួបថ្នាក់បច្ចេកទេសនៅរដ្ឋធានីដូហា របស់ប្រទេសកាតា នាថ្ងៃពុធនេះ ស្របពេលដែលពួកគេព្យាយាមឯកភាពលើលំហូរការដឹកជញ្ជូនឆ្លងកាត់ច្រកសមុទ្រHormuz និងទទួលបានបទឈប់បាញ់យូរអង្វែង ។ប្រភពបន្តថា លោក Jared Kushner គឺជាកូនប្រសារប្រុសរបស់លោក Trump និងប្រេសិតពិសេសសហរដ្ឋអាមេរិកលោក Steve Witkoff បានជួបជាមួយនាយករដ្ឋមន្រ្តីកាតាដែលជាអ្នកសម្របសម្រួលនៅក្នុងកិច្ចប្រជុំជាមួយប៉ាគីស្ថានដើម្បីដាក់ចេញក្របខណ្ឌសម្រាប់កិច្ចចរចា ប៉ុន្តែពួកគេនឹងមិនចូលរួមកិច្ចប្រជុំដោយខ្លួនឯងនោះទេ៕

បណ្ដាញសង្គម

ព័ត៌មានថ្មីៗ

ក្រុមគ្រូពេទ្យស្ម័គ្រចិត្តឯកឧត្តម ហ៊ុន ម៉ានី ចុះពិនិត្យ ពិគ្រោះ ព្យាបាលជំងឺ ជូនប្រជាពលរដ្ឋក្នុងសង្កាត់ពញាពន់

សម្តេច ម៉ែន សំអន អញ្ជើញដឹកនាំកិច្ចប្រជុំគណៈបញ្ជាការយុទ្ធនាការបោះឆ្នោត គណៈកម្មាធិការបក្សខេត្តស្វាយរៀង

រដ្ឋបាលខេត្តពោធិ៍សាត់ផ្សព្វផ្សាយលក្ខន្តិកៈស្ដីពីគ្រូបង្រៀនជូនលោកគ្រូអ្នកគ្រូជាង ៥០០នាក់

មន្រ្តីសុខាភិបាលខេត្តតាកែវ អំពាវនាវឱ្យចូលរួមទប់ស្កាត់ការរីករាលដាលជំងឺអេដស៍ ខណៈអ្នកឆ្លងកើនឡើង

អនុប្រធានក្រុមការងារគណបក្សចុះជួយខេត្តស្វាយរៀងណែនាំមន្ត្រីបក្សត្រូវធ្វើគំរូដឹកនាំ និងអភិវឌ្ឍមូលដ្ឋាន

មន្ត្រីក្រសួងអប់រំ៖ ការសិក្សាមធ្យមសិក្សាជាស្ពានភ្ជាប់ផ្លូវជីវិត និងជាគ្រឹះសំខាន់សម្រាប់ការសិក្សាជាន់ខ្ពស់

ពលរដ្ឋភៀសសឹកចាប់ឆ្នោតជ្រើសរើសតូបលក់ដូរ នៅភូមិរង់ចាំ ជំហានដំបូងប្រមាណជា ៣០០តូប

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877