BTV NEWS

ការលាលែងពីតំណែងរបស់រដ្ឋមន្ត្រីអប់រំឥណ្ឌា គឺជាជ័យជម្នះដ៏ធំ សម្រាប់ក្រុមបាតុករយុវជន

លោក Trump រិះគន់ព័ត៌មានក្លែងក្លាយ និងបង្កឱ្យមានភាពចម្រូងចម្រាស ជុំវិញការបោះឆ្នោតឆ្នាំ២០២៨

មនុស្សយ៉ាងតិច ៥នាក់ស្លាប់ ក្នុងហេតុការណ៍បាក់ដី នៅភាគខាងជើងចិន

ម៉ិកស៊ិកនឹងមិនតបតពន្ធរបស់លោក Trump ទេ ខណៈការនាំចេញត្រូវបានការពារដោយកិច្ចព្រមព្រៀងពាណិជ្ជកម្ម

ព័ត៌មានអន្តរជាតិ

ក្រុមឧទ្ទាមហ៊ូទី នៅយេម៉ែនប្រកាសបិទផ្លូវសមុទ្ររបស់ប្រទេសអារ៉ាប៊ីសាអ៊ូឌីត

ពួកឧទ្ទាមហ៊ូទីនៅយេម៉ែន បានប្រកាសពីការហាមឃាត់ផ្លូវសមុទ្ររបស់ប្រទេសអារ៉ាប៊ីសាអ៊ូឌីត កាលពីថ្ងៃចន្ទ ទី២០ ខែកក្កដា ដែលបង្កើនសង្គ្រាមរវាងសហរដ្ឋអាមេរិក និងអ៊ីរ៉ង់ ខណៈក្រុមឧទ្ទាមបានគំរាមកំហែងដល់សមត្ថភាពរបស់ក្រុមហ៊ុននាំចេញប្រេងកំពូលក្នុងការឆ្លងកាត់ច្រកសមុទ្រ Hormuz។ ក្រុមដែលគាំទ្រដោយអ៊ីរ៉ង់មួយនេះ មិនបាននិយាយថាតើខ្លួនមានផែនការដាក់បម្រាមដោយរបៀបណានោះទេ ដែលការប្រកាសធ្វើឡើងខណៈអ៊ីរ៉ង់បាននិយាយថាខ្លួនបានត្រឡប់ទៅរក «សង្គ្រាមទ្រង់ទ្រាយធំ» ជាមួយសហរដ្ឋអាមេរិកវិញ ហើយធ្វើឡើងខណៈទីក្រុងវ៉ាស៊ីនតោននិងទីក្រុងតេអេរ៉ង់ បានប្រយុទ្ធគ្នាដើម្បីគ្រប់គ្រងច្រកសមុទ្រ។ ប្រទេសអារ៉ាប៊ីសាអ៊ូឌីត និងក្រុមឧទ្ទាមហ៊ូទី បានប្រយុទ្ធតគ្នាកាលពីសប្តាហ៍មុនជាលើកដំបូងក្នុងរយៈពេលជាច្រើនឆ្នាំមកនេះដោយគំរាមកំហែងដល់បទឈប់បាញ់ឆ្នាំ២០២២ ដែលនៅតែបន្តទោះបីជាផុតកំណត់ក៏ដោយ។ ការបិទផ្លូវសមុទ្ររបស់ក្រុមឧទ្ទាមហ៊ូទី ប្រសិនបើត្រូវបានអនុវត្ត វាអាចធ្វើឱ្យសេដ្ឋកិច្ចរបស់ប្រទេសអារ៉ាប៊ីសាអ៊ូឌីតកាន់តែតានតឹងដោយកាត់ផ្តាច់ការចូលទៅកាន់កំពង់ផែសមុទ្រក្រហមរបស់ខ្លួន ដែលមានសារៈសំខាន់សម្រាប់ការនាំចេញប្រេង ខណៈការប្រយុទ្ធគ្នាជាថ្មីកំណត់គោលដៅលើការឆ្លងកាត់ច្រកសមុទ្រ Hormuz។ ការបិទផ្លូវទឹកនេះ ក៏ត្រូវបានគេរំពឹងថានឹងធ្វើឱ្យប៉ះពាល់ដល់ទីផ្សារសកលដែលពឹងផ្អែកលើប្រទេសអារ៉ាប៊ីសាអ៊ូឌីត ដែលផលិតប្រេងឆៅជាង១០លានបារ៉ែលក្នុងមួយថ្ងៃ សម្រាប់ការនាំចូលថាមពល។

ឈីលី ប្រកាសគ្រាអាសន្នដោយសារព្យុះ ភ្លៀងធ្លាក់ខ្លាំង និងទឹកជំនន់សម្លាប់មនុស្សមួយចំនួន

ព្យុះដែលបានបណ្ដាលឲ្យមានភ្លៀងធ្លាក់ខ្លាំងនិងទឹកជំនន់នៅក្នុងប្រទេសឈីលីបានឆក់យកជីវិតមនុស្សយ៉ាងហោចណាស់១០ នាក់ និងបំផ្លាញ ឬខូចខាតយ៉ាងធ្ងន់ធ្ងរដល់លំនៅឋានជាង១.០០០ខ្នង ដែលជំរុញឱ្យរដ្ឋាភិបាលប្រកាសគ្រាអាសន្នកាលពីថ្ងៃចន្ទដើមសប្ដាហ៍នេះ។ ភ្លៀងបានវាយប្រហារតំបន់រាំងស្ងួតភាគខាងជើងនៃទីក្រុងកំពង់ផែ Coquimbo និងតំបន់វាលខ្សាច់ Atacama ចាប់តាំងពីថ្ងៃពុធសប្តាហ៍មុន ជាកន្លែងដែលកម្រិតទឹកភ្លៀងខ្លាំងបែបនេះគឺខុសពីធម្មតាខ្លាំង ។កងទ័ពបានជម្លៀសប្រជាពលរដ្ឋពីតំបន់នានាដែលរងផលប៉ះពាល់។ យោងតាមតួលេខផ្លូវការ មនុស្ស១០នាក់បានស្លាប់ និងលំនៅឋានជាង១.១០០ ខ្នងត្រូវបានបំផ្លាញ ឬខូចខាតយ៉ាងធ្ងន់ធ្ងរដោយសារតែអាកាសធាតុអាក្រក់។ ដោយសារតែស្ថានភាពកាន់តែធ្ងន់ធ្ងរបានជំរុញឱ្យលោកប្រធានាធិបតី Jose Antonio Kast ប្រកាសអាសន្នក្នុងតំបន់ដែលរងផលប៉ះពាល់កាលពីថ្ងៃចន្ទ ។ វិធានការនេះអនុញ្ញាតឱ្យរដ្ឋាភិបាលដាក់ពង្រាយយោធា រឹតត្បិតសេរីភាពនៃការធ្វើដំណើរ និងចល័តជំនួយយ៉ាងឆាប់រហ័ស។ ទឹកក្នុងទន្លេដែលហក់ឡើងខ្ពស់ បានបិទផ្លូវ និងកាត់ផ្ដាច់សហគមន៍ដាច់ស្រយាលនានា ខណៈល្បប់ និងការដាច់ចរន្តអគ្គិសនី បានរំខានដល់ការផ្គត់ផ្គង់ទឹកស្អាតនៅទីក្រុង Coquimbo៕

ក្រុមហាម៉ាស តែងតាំង លោក Khalil Al-Hayya ជាមេដឹកនាំរួមថ្មីរបស់ខ្លួន

យោងតាមសេចក្តីថ្លែងការណ៍ពីក្រុមសកម្មប្រយុទ្ធប៉ាឡេស្ទីនកាលពីថ្ងៃចន្ទ ទី២០ ខែកក្កដា បានឲ្យដឹងថា ក្រុមហាម៉ាស បានតែងតាំងលោក Khalil Al-Hayya ជាមេដឹកនាំរួមរបស់ខ្លួនក្នុងចំណាត់ការមួយដែលអ្នកវិភាគម្នាក់និយាយថា អាចជាសញ្ញានៃជំហរកាន់តែតឹងរ៉ឹងរបស់ក្រុមនេះចំពោះការអំពាវនាវឱ្យមានការរំសាយអាវុធ។ លោក Hayya ចូលជំនួសលោក Yahya Sinwar ដែលត្រូវបានសម្លាប់នៅក្នុងការប្រយុទ្ធជាមួយកងកម្លាំងអ៊ីស្រាអែលកាលពីក្នុងខែតុលា ឆ្នាំ២០២៤ ខណៈក្រុមហាម៉ាសបានប្រយុទ្ធក្នុងសង្គ្រាមទ្រង់ទ្រាយធំរយៈពេលពីរឆ្នាំជាមួយអ៊ីស្រាអែលនៅក្នុងតំបន់ហ្កាហ្សា។ លោក Hayya ជាប្រធានក្រុមតំបន់ហ្កាហ្សាដែលបាននិរទេសខ្លួន និងជាអ្នកចរចាជាន់ខ្ពស់របស់ក្រុមនេះ បានក្លាយជាឥស្សរជនកណ្តាលក្នុងភាពជាអ្នកដឹកនាំរបស់ក្រុមហាម៉ាសចាប់តាំងពីការស្លាប់របស់លោក Sinwar និងលោក Ismail Haniyeh ដែលត្រូវបានសម្លាប់នៅក្នុងប្រទេសអ៊ីរ៉ង់កាលពីខែកក្កដា ឆ្នាំ២០២៤។ មន្ត្រីអ៊ីស្រាអែលបានប្រាប់សារព័ត៌មានរ៉យទ័រថា លោកត្រូវបានគេមើលឃើញថាមានចរិតប្រកាន់តឹងជាងលោក Khaled Meshaal ប្រធានការិយាល័យរបស់ក្រុមដែលនិរទេសខ្លួន និងជាអ្នកនាំមុខគេម្នាក់ទៀតសម្រាប់មេដឹកនាំ។ លោក Hayya គឺជាមន្ត្រីជាន់ខ្ពស់ម្នាក់ក្នុងចំណោមមន្ត្រីក្រុមហាម៉ាសដែលត្រូវបានកំណត់គោលដៅក្នុងឆ្នាំ២០២៥ នៅក្នុងការវាយប្រហាររបស់អ៊ីស្រាអែលនៅទីក្រុងដូហា ជាកន្លែងដែលលោកមានមូលដ្ឋាននៅទីនោះ។ ក្រុមសកម្មប្រយុទ្ធនេះ ប្រឈមនឹងបញ្ហាលំបាកបំផុតមួយចំនួនចាប់តាំងពីក្រុមត្រូវបានបង្កើតឡើងក្នុងឆ្នាំ ១៩៨៧ ដែលញាំញីដោយសង្គ្រាមរយៈពេលពីរឆ្នាំបង្កឡើងដោយការវាយប្រហាររបស់ខ្លួននៅថ្ងៃទី ៧ ខែតុលា ឆ្នាំ២០២៣ ទៅលើប្រទេសអ៊ីស្រាអែល និងការប្រឈមមុខទៅនឹងការទាមទារពីអន្តរជាតិឲ្យរំសាយអាវុធ។

ប៉េរូប្រកាសដាក់ទីក្រុង Junin ក្នុងក្រាអាសន្ន ៦០ថ្ងៃ បន្ទាប់ពីរញ្ជួយដីដ៏សាហាវសម្លាប់មនុស្សមួយចំនួន

រដ្ឋាភិបាលប៉េរូបានអនុម័តក្រឹត្យគ្រាអាសន្នរយៈពេល៦០ ថ្ងៃនៅទូទាំងស្រុកចំនួនប្រាំ ខណៈរលករញ្ជួយថ្មីពីរលើកកម្រិត៣,៤ រ៉ិចទ័របានវាយប្រហារខេត្ត Chupaca ទន្ទឹមនឹងប្រតិបត្តិការសង្គ្រោះបានផ្តល់ជំនួយស្បៀងអាហារចំនួន៧,៧៤ តោនដល់គ្រួសារចំនួន២៥០បន្ទាប់ពីការរញ្ជួយដីកាលពីថ្ងៃសៅរ៍សប្ដាហ៍មុន ដែលបានសម្លាប់មនុស្ស៥នាក់ ៣២នាក់រងរបួស និងបំផ្លាញផ្ទះសម្បែងចំនួន៧៦ ខ្នង។ មជ្ឈមណ្ឌលប្រតិបត្តិការសង្គ្រោះបន្ទាន់ជាតិ (COEN ជាភាសាអេស្ប៉ាញ) បានបញ្ជាក់ថា មិនមានអ្នកស្លាប់ថ្មី ឬការខូចខាតសម្ភារៈត្រូវបានរាយការណ៍ពីការរញ្ជួយដីទាំងនេះទេ។ ទោះជាយ៉ាងណាក៏ដោយ សកម្មភាពរញ្ជួយដីជាបន្តបន្ទាប់បានបង្កើនការព្រួយបារម្ភខ្លាំងក្នុងចំណោមប្រជាជនដែលបានជួបប្រទះរួចហើយដោយសារគ្រោះរញ្ជួយដីកាលពីថ្ងៃសៅរ៍។ ការរញ្ជួយដីកម្រិត៥,១ រ៉ិចទ័រ ដែលបានវាយប្រហារនៅម៉ោង៩និង២៤នាទីយប់ម៉ោងក្នុងស្រុកកាលពីថ្ងៃសៅរ៍ ១៨កក្កដាសប្ដាហ៍មុន មានចំណុចកណ្តាលចម្ងាយប្រាំពីរគីឡូម៉ែត្រភាគខាងត្បូងនៃស្រុក Chongos Bajo និងជម្រៅ ២៤ គីឡូម៉ែត្រ បានបង្កឱ្យមានការខូចខាតធ្ងន់ធ្ងរបំផុត។ រលករញ្ជួយកម្រិត៣,៧ រ៉ិចទ័របានកើតឡើងត្រឹមតែ១៧ នាទីក្រោយមក ដែលធ្វើឲ្យការបំផ្លិចបំផ្លាញកាន់តែធ្ងន់ធ្ងរ។ ជនរងគ្រោះទាំងប្រាំនាក់ បុរសបីនាក់ និងស្ត្រីពីរនាក់ រួមទាំងមនុស្សចាស់ពីរនាក់ និងក្មេងអាយុ ១៧ ឆ្នាំម្នាក់ សុទ្ធតែបានស្លាប់នៅក្នុងស្រុក Chongos Bajo ជាតំបន់ដែលមានប្រជាជនរស់នៅជិតបំផុតនៃចំណុចកណ្តាលនៃការរញ្ជួយដី។ របាយការណ៍ចុងក្រោយបញ្ជាក់ថា ផ្ទះចំនួន៧៦ ខ្នងត្រូវបានបំផ្លាញទាំងស្រុង ៩៥ ខ្នងមិនអាចរស់នៅបាន និង៧៤ខ្នងរងផលប៉ះពាល់ដោយផ្នែក។ ការខូចខាតភាគច្រើននៅក្នុងខេត្ត Chupaca ជាកន្លែងដែលផ្ទះសាងសង់ពីឥដ្ឋប្រពៃណីទាំងស្រុងបានដួលរលំក្រោមកម្លាំងរញ្ជួយដី៕

អ្នកស្លាប់កើនឡើងក្នុងការវាយប្រហាររបស់រុស្ស៊ី លើនាវាដឹកពោតនៅកំពង់ផែ Odesa របស់អ៊ុយក្រែន

មន្ត្រីអ៊ុយក្រែនបាននិយាយកាលពីថ្ងៃចន្ទ ទី ២០ ខែកក្កដា ថា ចំនួនអ្នកស្លាប់បានកើនឡើងដល់១០នាក់ក្នុងការវាយប្រហារដោយមីស៊ីលរបស់រុស្ស៊ីលើនាវាដឹកពោតនៅជិតកំពង់ផែ Odesa ភាគខាងត្បូងរបស់ប្រទេសអ៊ុយក្រែនកាលពីថ្ងៃអាទិត្យ ជាការវាយប្រហារដ៏បង្ហូរឈាមបំផុតក្នុងការផ្ទុះឡើងអំពើហិង្សារយៈពេលច្រើនសប្តាហ៍នៅសមុទ្រខ្មៅ។ កងទ័ពជើងទឹកអ៊ុយក្រែនបានសរសេរនៅលើកម្មវិធីផ្ញើសារ Telegram ថា រុស្ស៊ីបានវាយប្រហារនាវា Golden Leo ជានាវាបំពាក់ទង់ជាតិហ្គីណេ-ប៊ីសូ(Guinea-Bissau) មាននាវិកមកពីប្រទេសឥណ្ឌា និងប្រទេសស៊ីរី ដោយប្រើមីស៊ីលបីគ្រាប់បណ្តាលឱ្យមានអគ្គិភ័យ។ លោក Serhiy Lysak ប្រធានរដ្ឋបាលយោធារបស់ទីក្រុងបាននិយាយថា ការវាយប្រហារដាច់ដោយឡែកមួយទៀតរបស់រុស្ស៊ីលើកំពង់ផែ Odesa ជាកំពង់ផែសមុទ្រធំបំផុតរបស់អ៊ុយក្រែន បានសម្លាប់មនុស្សបីនាក់ និងរបួសបីនាក់ផ្សេងទៀតកាលពីថ្ងៃចន្ទ។ លោកបាននិយាយថា ហេដ្ឋារចនាសម្ព័ន្ធត្រូវបានវាយប្រហារ ប៉ុន្តែពុំបានផ្តល់ព័ត៌មានលម្អិតបន្ថែមទេ។ អាជ្ញាធរកំពង់ផែសមុទ្ររបស់អ៊ុយក្រែនបាននិយាយថា ប្រតិបត្តិការស្វែងរកនិងជួយសង្គ្រោះ បានអូសបន្លាយពេលពេញមួយយប់ ហើយសមាជិកនាវិកប្រាំបួននាក់និងអាកាសយានិកដែនសមុទ្រម្នាក់របស់ខ្លួនបានស្លាប់។ អាជ្ញាធរបាននិយាយបន្ថែមថា សមាជិកនាវិកប្រាំបីនាក់ក្នុងចំណោមសមាជិកនាវិក ១៧ នាក់របស់នាវាត្រូវបានជួយសង្គ្រោះ។

នាយករដ្ឋមន្ត្រីអង់គ្លេសថ្មី លោក Burnham ចូលកាន់តំណែងដោយមានការតែងតាំងគណៈរដ្ឋមន្ត្រីដ៏ភ្ញាក់ផ្អើល

នាយករដ្ឋមន្ត្រីថ្មីរបស់ចក្រភពអង់គ្លេស លោក Andy Burnham បានឡើងកាន់តំណែងកាលពីថ្ងៃចន្ទ ទី ២០ ខែកក្កដា ដោយបានរុះរើគណៈរដ្ឋមន្ត្រីនៃអ្នកស្មោះត្រង់របស់អ្នកកាន់តំណែងមុនខណៈលោកបានសន្យាផែនការ១០ឆ្នាំដើម្បីបន្ធូរបន្ថយសម្ពាធលើការចំណាយសម្រាប់ជីវភាពរស់នៅ និងបានបង្ហាញពីទំនោរទៅរកខាងឆ្វេងនិយម។ លោក Burnham បានចូលធ្វើការភ្លាមៗបន្ទាប់ពីជំនួសលោក Keir Starmer នៅការិយាល័យ Downing Street ដោយបានជួបសន្ទនាតាមទូរស័ព្ទជាមួយប្រធានាធិបតីសហរដ្ឋអាមេរិក លោក Donald Trump និងមេដឹកនាំអ៊ុយក្រែន លោក Volodymyr Zelenskyy មុនពេលតែងតាំងក្រុមរដ្ឋមន្ត្រីរបស់លោក។ លោក Burnham អាយុ៥៦ឆ្នាំ បានសន្យាថានឹងធ្វើឧស្សាហូបនីយកម្មឡើងវិញនៅចក្រភពអង់គ្លេសនិងបញ្ចប់ការដេកតាមដងផ្លូវរបស់អ្នកគ្មានលំនៅឋាន បន្ទាប់ពីលោកបានចូលគាល់ព្រះមហាក្សត្រ Charles ទី៣ នៅព្រះរាជវាំង Buckingham ដើម្បីក្លាយជាប្រមុខរដ្ឋាភិបាលបន្ទាប់ពីការចាកចេញរបស់លោក Starmer។ លោកបាននិយាយនៅខាងក្រៅវិមានផ្លូវការថ្មីរបស់លោកនៅការិយាល័យ 10 Downing Street ថា ចក្រភពអង់គ្លេសចាំបាច់ត្រូវបង្ហាញពិភពលោកថា ខ្លួនអាច «ទទួលបានស្ថិរភាពជាថ្មី» ដោយសន្យាថានឹងបង្កើតគំរូនយោបាយថ្មីនិងកសាងសេដ្ឋកិច្ចថ្មី។ អ្នកនាំពាក្យរដ្ឋាភិបាលអង់គ្លេសម្នាក់បាននិយាយថា លោក Burnham បានបញ្ជាក់ពី «ការប្តេជ្ញាចិត្តរបស់លោកចំពោះវិស័យការពារជាតិ និងសន្តិសុខ» នៅក្នុងការសន្ទនាតាមទូរស័ព្ទលើកដំបូងរបស់លោកជាមួយ លោក Trump។ ការិយាល័យ Downing Street បាននិយាយថា ចំពោះលោក Zelenskyy លោក Burnham បានបញ្ជាក់ជាថ្មីនូវ «ការប្តេជ្ញាចិត្តយ៉ាងមុតមាំរបស់លោក និងចក្រភពអង់គ្លេស» ចំពោះអ៊ុយក្រែនក្នុងការការពារការឈ្លានពានរបស់រុស្ស៊ី។ លោកបានចាប់ផ្តើមធ្វើការយ៉ាងឆាប់រហ័សដើម្បីពង្រឹងអំណាចរបស់លោកលើរដ្ឋាភិបាលថ្មីដោយរុះរើអ្នកស្មោះត្រង់នឹងលោក Starmer ជាច្រើននាក់ចេញពីគណៈរដ្ឋមន្ត្រីរបស់លោក និងរៀបចំឡើងវិញរដ្ឋមន្ត្រីផ្សេងទៀតដែលបានបម្រើការក្រោមរបបមុន។

ប្រធានាធិបតីអ៊ីរ៉ង់និយាយថាប្រទេសរបស់លោកកំពុងស្ថិតក្នុងសង្គ្រាមទ្រង់ទ្រាយធំពេញបន្ទុកជាមួយអាមេរិក

ប្រធានាធិបតីអ៊ីរ៉ង់លោក Masoud Pezeshkian បាននិយាយកាលពីថ្ងៃចន្ទ២០កក្កដាថាប្រទេសរបស់លោកកំពុងចូលរួមក្នុង «សង្គ្រាមទ្រង់ទ្រាយធំពេញបន្ទុក» ជាមួយសហរដ្ឋអាមេរិក ដោយសង្កត់ធ្ងន់លើសារៈសំខាន់នៃការរក្សាស្ថិរភាពសេដ្ឋកិច្ចក្នុងអំឡុងពេលសង្គ្រាម។ លោក Pezeshkian បានថ្លែងក្នុងកិច្ចប្រជុំក្រុមប្រឹក្សាជាន់ខ្ពស់តុលាការនៅទីក្រុងតេអេរ៉ង់ថា សង្គ្រាមថ្ងៃនេះមិនមែនជាសង្គ្រាមមីស៊ីលទេ។ សត្រូវបានឈានដល់ការសន្និដ្ឋានថាខ្លួនមិនអាចបង្ខំប្រទេសអ៊ីរ៉ង់ឱ្យចុះចាញ់ដោយការវាយប្រហារយោធាបានទេ នេះបើយោងតាមសេចក្តីថ្លែងការណ៍មួយចេញផ្សាយនៅលើគេហទំព័រការិយាល័យរបស់លោក។ លោកបាននិយាយថា សត្រូវបានធ្វើសង្គ្រាមកូនកាត់ប្រឆាំងនឹងអ៊ីរ៉ង់ ដោយពិពណ៌នាអំពីសេដ្ឋកិច្ច និងជីវភាពរស់នៅរបស់ប្រជាជនថាជាវិស័យសំខាន់បំផុតនៃការប្រឈមដាក់គ្នាជាមួយសត្រូវ និងបានបញ្ជាក់ពីភាពចាំបាច់ក្នុងការរក្សាស្ថិរភាពសេដ្ឋកិច្ច និងការពារទ្រព្យសម្បត្តិសង្គមជាអាទិភាពពីរនៃប្រព័ន្ធគ្រប់គ្រងក្នុងអំឡុងពេលសង្គ្រាម។ លោក Pezeshkian បានបន្ថែមថា រដ្ឋាភិបាលរបស់លោកបានការពារយ៉ាងពេញលេញ នូវសិទ្ធិ និងផលប្រយោជន៍ជាតិរបស់អ៊ីរ៉ង់ក្នុងការចរចាជាមួយសហរដ្ឋអាមេរិក រួមទាំងនៅក្នុងអនុស្សរណៈនៃការយោគយល់គ្នា (MoU) ដែលបានចុះហត្ថលេខាកាលពីថ្ងៃទី៨ ខែមិថុនា។ សហរដ្ឋអាមេរិកបានបើកការវាយប្រហារជាច្រើនលើកលើខេត្តភាគខាងត្បូងរបស់អ៊ីរ៉ង់ក្នុងរយៈពេលជាងមួយសប្តាហ៍កន្លងមកនេះ ដោយនិយាយថា ការវាយប្រហារទាំងនោះមានគោលបំណងកម្ទេចសមត្ថភាពរបស់អ៊ីរ៉ង់ក្នុងការគំរាមកំហែងដល់ការដឹកជញ្ជូនពាណិជ្ជកម្ម ក្នុងច្រកសមុទ្រហ័រមូស។អ៊ីរ៉ង់បានឆ្លើយតបជាមួយនឹងរលកនៃការវាយប្រហារដោយមីស៊ីល និងយានដ្រូន ដែលកំណត់គោលដៅមូលដ្ឋានទ័ព និងសម្ភារៈយោធារបស់សហរដ្ឋអាមេរិកនៅក្នុងប្រទេសក្នុងតំបន់ រួមទាំងប្រទេសកូវ៉ែត បារ៉ែន និងហ្ស៊កដានី៕

អាមេរិកត្រៀមធ្វើសង្គ្រាមកាន់តែទូលំទូលាយប្រឆាំងអ៊ីរ៉ង់ ខណៈលោកTrump ព្រមានសងសឹក

សារព័ត៌មាន Washington Post បានអះអាងដោយដកស្រង់សម្តីមន្ត្រីអាមេរិកមួយរូបថា អាមេរិកកំពុងត្រៀមសម្រាប់សង្គ្រាមកាន់តែទូលំទូលាយប្រឆាំងនឹងអ៊ីរ៉ង់។ លោកប្រធានាធិបតី Donald Trump បានព្រមានកាលពីថ្ងៃចន្ទ២០កក្កដាសប្ដាហ៍នេះថា អ៊ីរ៉ង់នឹងសងរាប់ដងមិនអស់ចំពោះការស្លាប់រាល់ទាហានអាមេរិក ។ បញ្ជាការកណ្តាលសហរដ្ឋអាមេរិក (CENTCOM) បានប្រកាសកាលពីថ្ងៃអាទិត្យថា ទាហានអាមេរិកម្នាក់ត្រូវបានសម្លាប់ក្នុងអំឡុងពេលប្រតិបត្តិការមួយនៅក្នុងប្រទេសអ៊ីរ៉ាក់ ហើយសាកសពរបស់ទាហានម្នាក់ទៀតត្រូវបានគេរកឃើញនៅកន្លែងនៃការវាយប្រហារដោយមីស៊ីលរបស់អ៊ីរ៉ង់លើមូលដ្ឋានអាមេរិកមួយក្នុងប្រទេសហ្ស៊កដានី។ យោងតាមរបាយការណ៍ ដោយមានវាយប្រហារតបតគ្នាជាបន្តបន្ទាប់រវាងអ៊ីរ៉ង់ និងសហរដ្ឋអាមេរិក ចំនួនទាហានអាមេរិកដែលត្រូវបានសម្លាប់ចាប់តាំងពីការបន្តការប៉ះទង្គិចគ្នាថ្មីៗនេះ បានឈានដល់យ៉ាងហោចណាស់បីនាក់ និងអាចបួននាក់។ ដោយសំដៅទៅលើបញ្ហានេះ សារព័ត៌មាន Washington Post បានបន្ថែម ដោយដកស្រង់សម្តីមន្ត្រីអាមេរិកថា សហរដ្ឋអាមេរិកកំពុងមានគម្រោងធ្វើសង្គ្រាមកាន់តែទូលំទូលាយប្រឆាំងនឹងអ៊ីរ៉ង់។ មន្ត្រីរូបនេះក៏បានប្រកាសផងដែរថា មន្ទីរបញ្ចកោណកំពុងបង្កើនចំនួនយន្តហោះយោធាអាមេរិកនៅក្នុងតំបន់ ដើម្បីជំរុញសមត្ថភាពប្រតិបត្តិការរបស់ខ្លួន ជាចំណាត់ការមួយដែលអាចបង្ហាញពីការត្រៀមខ្លួនរបស់ទីក្រុងវ៉ាស៊ីនតោនក្នុងការបង្កើនជម្លោះជាមួយអ៊ីរ៉ង៕

អ៊ីរ៉ង់៖ ការបើកកិច្ចចរចាឡើងវិញជាមួយទីក្រុងវ៉ាស៊ីនតោនមិនអាចទៅរួចទេ ដរាបណាសហរដ្ឋអាមេរិកនៅតែបន្តវាយប្រហារ

ប្រភពមួយរបស់អ៊ីរ៉ង់បានប្រាប់សារព័ត៌មាន TASSថា ទីក្រុងតេអេរ៉ង់សង្ស័យថា ការចរចាជាមួយទីក្រុងវ៉ាស៊ីនតោន មិនអាចត្រូវបានបើកឡើងវិញ ខណៈពេលដែលសហរដ្ឋអាមេរិក កំពុងបន្តវាយប្រហារលើប្រទេសនេះ។ លោកបានសង្កត់ធ្ងន់ថា៖«ជាអកុសល ពួកគេ [សហរដ្ឋអាមេរិក] កំពុងវាយប្រហារយើង នៅពេលនេះ ហើយយើងមិនអាចបើកកិច្ចចរចាឡើងវិញបានទេ ដរាបណាពួកគេនៅបន្តវាយប្រហារ។ ការពិភាក្សាអំពីគំនិតនៃការធ្វើកិច្ចចរចា គឺមិនអាចទទួលយកបានទេ»។លោកបានបន្ថែមថា ប្រសិនបើទីក្រុងវ៉ាស៊ីនតោនពិតជាស្វែងរកស្តារការចរចាឡើងវិញនោះ ខ្លួនគួរតែបញ្ឈប់ការវាយប្រហារ និងការទម្លាក់គ្រាប់បែកលើអ៊ីរ៉ង់ជាមុនសិន។ការកើនឡើងភាពតានតឹងមួយជុំទៀតរវាងសហរដ្ឋអាមេរិក និងអ៊ីរ៉ង់ បានចាប់ផ្តើមនៅថ្ងៃទី ០៨ ខែកក្កដា ទោះបីជាមានអនុស្សរណៈនៃការយោគយល់ (MoU) រវាងទីក្រុងវ៉ាស៊ីនតោន និងទីក្រុងតេអេរ៉ង់ក៏ដោយ សហរដ្ឋអាមេរិកបានធ្វើការវាយប្រហារតាមអាកាសជាបន្តបន្ទាប់លើអ៊ីរ៉ង់ ដែលត្រូវបានះអះអាងថា ជាការឆ្លើយតបទៅនឹងការវាយប្រហារលើនាវាពាណិជ្ជកម្មមួយគ្រឿងនៅក្នុងច្រកសមុទ្រហ័រមូស។ នៅថ្ងៃដដែលនោះ ប្រធានាធិបតីសហរដ្ឋអាមេរិក ដូណាល់ ត្រាំ បាននិយាយថា បទឈប់បាញ់ជាមួយអ៊ីរ៉ង់ លែងមានប្រសិទ្ធភាពទៀតហើយ។ ជាការឆ្លើយតប អ៊ីរ៉ង់បានចាប់ផ្តើមវាយប្រហារមូលដ្ឋានយោធារបស់សហរដ្ឋអាមេរិកនៅបារ៉ែន ហ្ស៊កដានី កាតា កូវ៉ែត អេមីរ៉ាតអារ៉ាប់រួម និងអូម៉ង់៕

ក្រុមអ្នកនយោបាយនៅអាល្លឺម៉ង់កាន់តែច្រើនឡើង កំពុងគាំទ្រឲ្យមានការចរចាជាមួយរុស្ស៊ី

អ្នកនយោបាយនៅអាល្លឺម៉ង់កាន់តែច្រើនឡើង កំពុងគាំទ្រឲ្យបើកការចរចាជាមួយរុស្ស៊ី។ នេះបើយោងតាមរបាយការណ៍របស់កាសែត The Times ដែលបានដកស្រង់ប្រភពមិនបញ្ចេញឈ្មោះ។យោងតាមសារព័ត៌មាននេះ មានការផ្លាស់ប្តូរគំនិតនៅក្នុងប្រទេសអាល្លឺម៉ង់ទាក់ទងនឹងការចរចាជាមួយរុស្ស៊ី ហើយកិច្ចខិតខំប្រឹងប្រែងផ្សេងៗដែលមិនសម្របសម្រួល ត្រូវបានធ្វើឡើង ដើម្បីបង្កើតបណ្តាញទំនាក់ទំនងជាមួយទីក្រុងមូស្គូ។ កាសែត The Times បាននិយាយថា លោក Ronald Pofalla អតីតសហប្រធានវេទិកាសាធារណៈ Petersburg Dialogue និងជាអតីតប្រធានអគ្គលេខាធិការសហព័ន្ធអាល្លឺម៉ង់ ដែលរក្សាទំនាក់ទំនងជាមួយភាគីរុស្ស៊ី អាចដើរតួជាអន្តរការីរវាងទីក្រុងមូស្គូ និងទីក្រុងប៊ែរឡាំង។នាពេលមុននេះ កាសែតអាល្លឺម៉ង់ Die Zeit បានរាយការណ៍ថា អាជ្ញាធរអាល្លឺម៉ង់បាននិងកំពុងរៀបចំយ៉ាងសកម្មសម្រាប់ការចរចាជាមួយរុស្ស៊ី អស់រយៈពេលប៉ុន្មានសប្តាហ៍មកហើយ៕

បណ្ដាញសង្គម

ព័ត៌មានថ្មីៗ

គណបក្សប្រជាជនកម្ពុជាខេត្តកំពង់ស្ពឺ ប្រជុំបូកសរុបលទ្ធផលការងារខែកក្កដា ឆ្នាំ២០២៦ និងលើកទិសដៅភារកិច្ចខែបន្ទាប់

ក្រសួងអប់រំ ផ្ដល់ឱកាសឱ្យសិស្សធ្វើទស្សនកិច្ចសិក្សានៅសិង្ហបុរី តាមរយៈកម្មវិធី ME-NISTER

មនុស្សយ៉ាងតិច ៥នាក់ស្លាប់ ក្នុងហេតុការណ៍បាក់ដី នៅភាគខាងជើងចិន

កម្មវិធីប្រកួតប្រជែងនិយាយជាសាធារណៈសម្រាប់និស្សិតសាកលវិទ្យាល័យរបស់អង្គភាពអ្នកនាំពាក្យរាជរដ្ឋាភិបាល រកឃើញអ្នកទទួលបានជ័យលាភីហើយ

ចិនតវ៉ាប្រឆាំងនឹងទណ្ឌកម្មរបស់សហភាពអឺរ៉ុប លើក្រុមហ៊ុនចិន ពាក់ព័ន្ធនឹងបញ្ហារុស្ស៊ី

មនុស្សជាង ១៦០.០០០នាក់ រត់គេចពីចំហេះព្រៃ នៅប្រទេសបារាំង និងអេស្ប៉ាញ

ប្រទេសចិនជម្លៀសមនុស្សជាង ២០.០០០នាក់ ខណៈព្យុះទីហ្វុង Noul បក់បោកជិតដល់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877