BTV NEWS

ការលាលែងពីតំណែងរបស់រដ្ឋមន្ត្រីអប់រំឥណ្ឌា គឺជាជ័យជម្នះដ៏ធំ សម្រាប់ក្រុមបាតុករយុវជន

លោក Trump រិះគន់ព័ត៌មានក្លែងក្លាយ និងបង្កឱ្យមានភាពចម្រូងចម្រាស ជុំវិញការបោះឆ្នោតឆ្នាំ២០២៨

មនុស្សយ៉ាងតិច ៥នាក់ស្លាប់ ក្នុងហេតុការណ៍បាក់ដី នៅភាគខាងជើងចិន

ម៉ិកស៊ិកនឹងមិនតបតពន្ធរបស់លោក Trump ទេ ខណៈការនាំចេញត្រូវបានការពារដោយកិច្ចព្រមព្រៀងពាណិជ្ជកម្ម

ព័ត៌មានអន្តរជាតិ

អ៊ីរ៉ង់ជំរុញឱ្យសន្សំសំចៃថាមពល ក្រោយការវាយប្រហាររបស់អាមេរិកបង្កការខូចខាតរោងចក្រថាមពល

ទីភ្នាក់ងារសារព័ត៌មានពាក់កណ្តាលផ្លូវការ ISNA នៅថ្ងៃសុក្រ (ទី១៧ ខែកក្កដា ឆ្នាំ២០២៦) នេះ បានរាយការណ៍ថា ក្រសួងថាមពលអ៊ីរ៉ង់បានជំរុញឱ្យប្រជាពលរដ្ឋកាត់បន្ថយការប្រើប្រាស់អគ្គិសនី ដើម្បីជួយឱ្យមានស្ថិរភាពនៃការផ្គត់ផ្គង់ថាមពល នៅក្នុងខេត្តភាគខាងត្បូងរបស់ប្រទេស បន្ទាប់ពីមានការវាយប្រហាររបស់សហរដ្ឋអាមេរិក លើរោងចក្រថាមពល ដោយលើកឡើងពីការខូចខាត ដោយសារកម្ដៅខ្លាំង និងហេដ្ឋារចនាសម្ព័ន្ធ។សារព័ត៌មាន ISNA បានឱ្យដឹងថា ក្រសួងបានស្នើសុំឱ្យអតិថិជនបិទម៉ាស៊ីនត្រជាក់រយៈពេល ១ម៉ោង ក្នុងអំឡុងពេលមានការប្រើប្រាស់ច្រើនបំផុត ដើម្បីជួយធានាបាននូវការផ្គត់ផ្គង់អគ្គិសនីដែលមានស្ថិរភាពជាងមុនដល់ខេត្តដែលរងប៉ះពាល់។បញ្ជាការដ្ឋានកណ្តាលសហរដ្ឋអាមេរិក បានប្រាប់កាលពីថ្ងៃព្រហស្បតិ៍ថា ខ្លួនបានបញ្ចប់ការវាយប្រហារវាយលុកថ្មី លើអ៊ីរ៉ង់ ដែលជាយប់ទី៦ ជាប់ៗគ្នានៃប្រតិបត្តិការយោធារបស់សហរដ្ឋអាមេរិកដែលកំណត់គោលដៅលើធនធានយោធាអ៊ីរ៉ង់។ភាពតានតឹងក្នុងតំបន់ បានកើនឡើងចាប់តាំងពីខែកុម្ភៈ នៅពេលដែលសហរដ្ឋអាមេរិក និងអ៊ីស្រាអែលបានចាប់ផ្តើមការវាយលុករួមគ្នាប្រឆាំងនឹងអ៊ីរ៉ង់។ ទីក្រុងតេអេរ៉ង់បានឆ្លើយតបដោយការវាយប្រហារដោយមីស៊ីល និងយានដ្រូន ដោយកំណត់គោលដៅលើប្រទេសឈូងសមុទ្រដែលមានធនធានយោធាអាមេរិក។អ៊ីរ៉ង់ និងសហរដ្ឋអាមេរិកបានចុះហត្ថលេខាលើអនុស្សរណៈនៃការយោគយល់គ្នា (UN) ដែលសម្របសម្រួលដោយប៉ាគីស្ថានកាលពីខែមុន ដែលមានគោលបំណងបញ្ចប់ជម្លោះ និងឈានដល់កិច្ចព្រមព្រៀងសន្តិភាពយូរអង្វែង។ តែភាពតានតឹងបានកើនឡើងក្នុងរយៈពេលប៉ុន្មានថ្ងៃថ្មីៗនេះ ជុំវិញបញ្ហាច្រកសមុទ្រ Hormuz ដោយភាគីទាំង២ បានវាយប្រហារគ្នាទៅវិញទៅមក៕

ប្រភពយោធាស៊ីរីបដិសេធថា អ៊ីរ៉ង់មិនបានទម្លាក់គ្រាប់បែកលើមូលដ្ឋាន al-Tanf ទេ

ប្រភពយោធាស៊ីរីបានធ្វើការបដិសេធ ដោយប្រាប់សារព័ត៌មាន AFP នៅថ្ងៃសុក្រ (ទី១៧ ខែកក្កដា ឆ្នាំ២០២៦) នេះថា អ៊ីរ៉ង់មិនបានទម្លាក់គ្រាប់បែកលើមូលដ្ឋាន al-Tanf នៅជិតព្រំដែនភាគអាគ្នេយ៍របស់ប្រទេសស៊ីរីជាមួយហ្ស៊កដានី និងអ៊ីរ៉ាក់នោះទេ ដោយការបញ្ជាក់នេះ បានកើតឡើងបន្ទាប់ពីកងឆ្មាំបដិវត្តន៍អិស្លាម (IRGC) របស់ទីក្រុងតេអេរ៉ង់ បានឱ្យដឹងថា ពួកគេបានកំណត់គោលដៅលើទីតាំងនោះជាការឆ្លើយតបទៅនឹងការវាយប្រហាររបស់សហរដ្ឋអាមេរិក។ដោយបាននិយាយក្នុងលក្ខខណ្ឌមិនបញ្ចេញឈ្មោះ ប្រភពនេះបានបញ្ជាក់ថា៖ «យើងបដិសេធមិនមានការទម្លាក់គ្រាប់បែករបស់អ៊ីរ៉ង់ណាមួយ ដែលកំណត់គោលដៅលើតំបន់ al-Tanf នោះទេ»។កងកម្លាំងអាមេរិកបានឱ្យដឹងថា ខ្លនបានដកចេញពីមូលដ្ឋាននេះនៅដើមឆ្នាំនេះ បន្ទាប់ពីកងទ័ពត្រូវបានឈរជើងនៅទីនោះ ជាផ្នែកមួយនៃសម្ព័ន្ធប្រឆាំងក្រុមជ្រុលនិយមដឹកនាំដោយសហរដ្ឋអាមេរិក។ គួរបញ្ជាក់ថា ប្រព័ន្ធផ្សព្វផ្សាយរដ្ឋបានរាយការណ៍ថា នៅថ្ងៃទី១៧ ខែកក្កដា កងឆ្មាំបដិវត្តន៍អ៊ីរ៉ង់ បានអះអាងថា ខ្លួនបានវាយប្រហារមជ្ឈមណ្ឌលបញ្ជាការប្រតិបត្តិការពិសេសរបស់សហរដ្ឋអាមេរិកនៅតំបន់ al-Tanf ក្នុងប្រទេសស៊ីរី ដើម្បីសងសឹក ចំពោះការសម្លាប់ទាហានអ៊ីរ៉ង់ នៅទីក្រុង Iranshahr៕

ក្រសួងការពារជាតិ៖ កិច្ចសហប្រតិបត្តិការយោធាចិន-រុស្ស៊ី មិនមានគោលបំណងប្រឆាំងនឹងប្រទេសទី៣ ទេ

អ្នកនាំពាក្យក្រសួងការពារជាតិចិន លោក Jiang Bin បានប្រាប់សន្និសីទសារព័ត៌មានថា៖«កិច្ចសហប្រតិបត្តិការយោធារវាងចិន និងរុស្ស៊ី មិនមានគោលដៅប្រឆាំងនឹងប្រទេសទីបីណាមួយឡើយ»។អ្នកនាំពាក្យរូបនេះបាននិយាយថា៖«កិច្ចសហប្រតិបត្តិការរវាងកងកម្លាំងប្រដាប់អាវុធចិន និងរុស្ស៊ី តែងតែផ្អែកលើគោលការណ៍មិនចូលបក្សសម្ព័ន្ធ មិនប្រឈមមុខដាក់គ្នា និងមិនមានគោលដៅប្រឆាំងនឹងប្រទេសទីបីណាមួយឡើយ»។លោកកបានសង្កត់ធ្ងន់ថា៖«កិច្ចសហប្រតិបត្តិការរវាងចិន និងរុស្ស៊ី មានតួនាទីសំខាន់ក្នុងការការពារអធិបតេយ្យភាព និងសន្តិសុខរបស់ប្រទេសទាំងពីរ ព្រមទាំងគាំទ្រសន្តិភាព និងស្ថិរភាពអន្តរជាតិ និងតំបន់»។នៅថ្ងៃទី ៦-១៣ ខែកក្កដា រុស្ស៊ី និងចិនបានធ្វើសមយុទ្ធ Joint Sea 2026 នៅក្នុងសមុទ្រលឿង ជិតកំពង់ផែ Qingdao របស់ប្រទេសចិន។ កងទ័ពជើងទឹករុស្ស៊ី ត្រូវបានតំណាងនៅក្នុងសមយុទ្ធកងទ័ពជើងទឹកដោយនាវាចម្បាំង Varyag របស់កងនាវា ប៉ាស៊ីហ្វិក នាវាចម្បាំង Rezky នាវាមុជទឹកប្រើម៉ាស៊ូត-អគ្គិសនី Ufa និងនាវាជួយសង្គ្រោះ Igor Belousov។ កងទ័ពជើងទឹកចិន ត្រូវបានតំណាងដោយនាវាពិឃាត Anshan និង Kaifeng នាវាចម្បាំង Wuhu ដែលជានាវាមុជទឹកប្រើម៉ាស៊ូត-អគ្គិសនី Yuan-class នាវានាវាគាំទ្រផ្គត់ផ្គង់សម្ភារៈទូទៅ Kekexilihu និងនាវាជួយសង្គ្រោះ Yangchenghu។ក្រោយពីសមយុទ្ធយោធាជើងទឹករួមគ្នារវាងរុស្ស៊ី និងចិន បានបញ្ចប់ កងទ័ពជើងទឹករបស់ប្រទេសទាំងពីរបានចាប់ផ្តើមបំពេញបេសកកម្មល្បាតតាមសមុទ្ររួមគ្នា៕

WHO៖ រលកកម្តៅនៅអឺរ៉ុបបានបណ្តាលឲ្យមនុស្សជាង ២០០.០០០នាក់ ស្លាប់ ក្នុងរយៈពេល ៤ឆ្នាំ

លោកវេជ្ជបណ្ឌិត Hans Henri P. Kluge នាយកប្រចាំតំបន់អឺរ៉ុបរបស់អង្គការសុខភាពពិភពលោក (WHO) បានប្រាប់ទីភ្នាក់ងារព័ត៌មាន TASS ថា មនុស្សជាង ២០០.០០០នាក់ បានស្លាប់ ដោយសារក្តៅ ខ្លាំង ក្នុងរយៈពេល ៤ឆ្នាំ កន្លងមក នៅក្នុងតំបន់អឺរ៉ុបដែលអង្គការនេះបានធ្វើការងារ។អ្នកជំនាញរូបនេះ បាននិយាយថា៖«នៅទូទាំងតំបន់អឺរ៉ុបដែលអង្គការសុខភាពពិភពលោកបានបំពេញការងារ មនុស្សជាង ២០០.០០០ នាក់ បានស្លាប់ ដោយសារកម្តៅ ក្នុងរយៈពេល ៤ឆ្នាំ កន្លងមកនេះ (២០២២-២០២៥) ហើយអត្រាមរណភាពទាក់ទងនឹងកម្តៅ បានកើនឡើង ៣០% ក្នុងរយៈពេលពីរទសវត្សរ៍កន្លងមកនេះ។ ទាំងនេះមិនមែនជាការព្យាករណ៍ទេ។ រឿងនេះ កំពុងកើតឡើងនៅពេលនេះ»។ លោកក៏បានកត់សម្គាល់ផងដែរថា៖«នៅរដូវក្តៅនេះ ទិន្នន័យពីប្រទេសចំនួន ៥ ប៉ុណ្ណោះ បានបង្ហាញពីចំនួនអ្នកលើសជិត ១០.០០០នាក់ ដោយសារកម្តៅ។តំបន់អឺរ៉ុបគឺជាតំបន់មួយក្នុងចំណោមតំបន់ចំនួន ៦ របស់អង្គការ WHO។ តំបន់នេះរួមបញ្ចូលរដ្ឋចំនួន ៥៣ នៅទូទាំងទ្វីបអឺរ៉ុប និងអាស៊ីកណ្តាល រួមទាំងប្រទេសរុស្ស៊ី ទួរគី បណ្តាប្រទេសនៅតំបន់កូកាស( Caucasus) កាហ្សាក់ស្ថាន កៀហ្ស៊ីស៊ីស្ថាន និងតាហ្ស៊ីគីស្ថាន៕

សហរដ្ឋអាមេរិកបន្តវាយប្រហារអ៊ីរ៉ង់ ៦ជាប់គ្នា ខណៈទីក្រុងតេអេរ៉ង់វាយបកលើសម្ព័ន្ធមិត្តរបស់អាមេរិក

សហរដ្ឋអាមេរិកបានពង្រីកយុទ្ធនាការវាយប្រហារតាមអាកាសរបស់ខ្លួនប្រឆាំងនឹងអ៊ីរ៉ង់ នៅព្រឹកថ្ងៃសុក្រនេះ ដោយកំណត់គោលដៅស្ពាន និងហេដ្ឋារចនាសម្ព័ន្ធផ្សេងទៀត ខណៈដែលអ៊ីរ៉ង់បានបើកការវាយប្រហារដោយមីស៊ីល និងយានដ្រូនថ្មីប្រឆាំងនឹងប្រទេសសម្ព័ន្ធមិត្តរបស់អាមេរិកនៅមជ្ឈិមបូព៌ា និងបានព្រមានថា ការសងសឹករបស់ខ្លួន អាចកើនឡើង។ការវាយប្រហារចុងក្រោយនេះ គឺជាការវាយប្រហារ ៦យប់ជាប់ៗគ្នារបស់សហរដ្ឋអាមេរិក ខណៈទីក្រុងវ៉ាស៊ីនតោន បានបង្កើនការកំណត់គោលដៅវាយប្រហារលើហេដ្ឋារចនាសម្ព័ន្ធ បន្ទាប់ពីលោក ប្រធានាធិបតី ដូណាល់ ត្រាំ បានព្រមានថា នឹងវាយប្រហារលើស្ពាន និងរោងចក្រថាមពលរបស់អ៊ីរ៉ង់ ដើម្បីដាក់សម្ពាធឲ្យទីក្រុងតេអេរ៉ង់ បន្ធូរបន្ថយការគ្រប់គ្រងយ៉ាងតឹងរ៉ឹងរបស់ខ្លួនលើច្រកសមុទ្រហ័រមូស។កងឆ្មាំបដិវត្តន៍អ៊ីរ៉ង់ (IRGC) បាននិយាយនៅថ្ងៃសុក្រនេះថា ពួកគេបានវាយប្រហារលើទីតាំងរ៉ាដាចំនួនពីរ ដែលជាកម្មសិទ្ធិរបស់សហរដ្ឋអាមេរិក នៅក្នុងប្រទេសអូម៉ង់ ដែលស្ថិតនៅតំបន់ឈូងសមុទ្រ។សេចក្តីថ្លែងការណ៍មួយបានបញ្ជាក់ថា កងកម្លាំងរបស់ពួកគេ បានកំណត់គោលដៅ និងបំផ្លាញរ៉ាដាតាមដានសកម្មភាពនាវាចរណ៍ នៅតំបន់ Salamah Rocks និងរ៉ាដាតាមដានផ្លូវអាកាសរបស់សហរដ្ឋអាមេ រិក ដែលត្រូវបានដាក់ប្រចាំការនៅតំបន់ Ghanam»៕

ទឹកជំនន់នៅរដ្ឋ Texas បណ្ដាលឱ្យមនុស្ស ២នាក់ស្លាប់ ខណៈរដ្ឋត្រៀមសម្រាប់ភ្លៀងធ្លាក់ខ្លាំងលើកទី១

អភិបាលរដ្ឋ Texas លោក Greg Abbott កាលពីរសៀលថ្ងៃព្រហស្បតិ៍ (ទី១៦ ខែកក្កដា ឆ្នាំ២០២៦) បានឱ្យដឹងថា ភ្លៀងធ្លាក់ខ្លាំង បានបណ្ដាលឱ្យមនុស្ស ២នាក់ស្លាប់ នៅរដ្ឋនេះ ខណៈដែលទឹកជំនន់បានហូរនាំពួកគេទៅជាមួយរថយន្តរបស់ពួកគេ ខណៈពេលដែលរដ្ឋកំពុងត្រៀមលក្ខណៈទប់ទល់នឹងភ្លៀងធ្លាក់ខ្លាំងបំផុតជាលើកដំបូង ក្នុងរយៈពេល ២៤ម៉ោងខាងមុខ។លោក Abbott បាននិយាយទៀតថា ក្រុមឆ្លើយតបបន្ទាន់បានជួយសង្គ្រោះមនុស្ស ២៣០នាក់ រួមទាំងបុរសម្នាក់ និងសត្វសុនខរបស់គាត់ដែលត្រូវបានទាញចេញពីឡានដឹកទំនិញ ដោយប្រើឧទ្ធម្ភាគចក្រ និងអ្នកហែលទឹកជួយសង្គ្រោះ។ រដ្ឋ Texas បានដាក់ពង្រាយក្រុមឆ្លើយតបបន្ទាន់ ២.៣៥០នាក់ និងឧបករណ៍ ១.៤០០គ្រឿង ក្នុងនោះរួមទាំងឧទ្ធម្ភាគចក្រប្រភេទ Black Hawk និងទូកជួយសង្គ្រោះទឹកហូរលឿន ខណៈដែលមន្ត្រីកំពុងព្យាយាមបញ្ចៀសកុំឱ្យមានការស្លាប់មនុស្ស ដូចកាលពីមួយឆ្នាំមុន នៅពេលដែលទឹកជំនន់ បានកើតមានពាសពេញតំបន់ Hill Country របស់រដ្ឋ Texas ដោយបានឆក់យកជីវិតមនុស្សយ៉ាងហោចណាស់ ១៣៥នាក់ រួមទាំងអ្នកបោះជំរុំ និងគ្រូណែនាំ ២៧នាក់ ដែលភាគច្រើនជាកុមារ នៅឯជំរំរដូវក្តៅមួយ។សេវាអាកាសធាតុជាតិបានរាយការណ៍ថា ទឹកភ្លៀងកម្រិត ១០ ទៅ ២០អ៊ីញ (២៥ ទៅ ៥០ សង់ទីម៉ែត្រ) បានធ្លាក់ពាសពេញតំបន់មួយចំនួននៃតំបន់ Hill Country ក្នុងរយៈពេល ២ថ្ងៃកន្លងទៅ៕

កូរ៉េខាងជើងហៅទីក្រុងសេអ៊ូលថា ជាអាយ៉ង សម្រាប់ការចូលរួមក្នុងសមយុទ្ធដែនសមុទ្រជាមួយអាមេរិក

ប្រព័ន្ធផ្សព្វផ្សាយរដ្ឋរបស់ប្រទេសកូរ៉េខាងជើង នៅថ្ងៃសុក្រ (ទី១៧ ខែកក្កដា ឆ្នាំ២០២៦) នេះ បានហៅកូរ៉េខាងត្បូងថាជា «អាយ៉ង» បន្ទាប់ពីបានចូលរួមក្នុងសមយុទ្ធដែនសមុទ្រដឹកនាំដោយសហរដ្ឋអាមេរិក ដោយលើកឡើងថា ទីក្រុងសេអ៊ូល និងវ៉ាស៊ីនតោន នឹងត្រូវទទួលខុសត្រូវ ចំពោះ «ការកើនឡើងនូវភាពតានតឹងមិនអាចទាយទុកមុនបាន» ណាមួយ នៅក្នុងតំបន់។ការអត្ថាធិប្បាយពីប្រព័ន្ធផ្សព្វផ្សាយរដ្ឋកូរ៉េខាងជើង KCNA បានកើតឡើងបន្ទាប់ពីមានសមយុទ្ធ Rim of the Pacific Exercise (RIMPAC) នៅកោះហាវ៉ៃរបស់សហរដ្ឋអាមេរិក កាលពីសប្តាហ៍មុន ដែលបានឃើញកងទ័ពជើងទឹកកូរ៉េខាងត្បូងដឹកនាំកងកម្លាំងដែនសមុទ្រជាលើកដំបូង។សមយុទ្ធនេះត្រូវបានគេចាត់ទុកថា ជាលំហាត់សមដែនសមុទ្រអន្តរជាតិដ៏ធំបំផុតរបស់ពិភពលោក ហើយត្រូវបានធ្វើឡើងរៀងរាល់ ២ឆ្នាំម្តង។ ហើយបើយោងតាមគេហទំព័រ RIMPAC បានឱ្យដឹងថា ប្រទេសប្រហែល ៣០ បានចូលរួមនៅឆ្នាំនេះ ក្នុងនោះរួមមានទាំងជប៉ុន កាណាដា និងអូស្ត្រាលីផងដែរ។KCNA បានផ្សាយថា «កងកម្លាំងអាយ៉ងកូរ៉េខាងត្បូង បានចូលរួមក្នុងនាមជាសមាសភាគដ៏សំខាន់មួយ» នៅចំពេលដែល «ការឃុបឃិតគ្នាផ្នែកយោធាកំពុងលេចឡើងកាន់តែច្បាស់ឡើងៗ» ដោយនេះជាការសំដៅទៅលើការពង្រឹងកិច្ចសហប្រតិបត្តិការយោធា រវាងកូរ៉េខាងត្បូង និងជប៉ុន ព្រមទាំងទំនាក់ទំនងរវាងកូរ៉េខាងត្បូងជាមួយអង្គការណាតូ (NATO) នាពេលថ្មីៗនេះ។នេះជាលើកដំបូងហើយ ក្នុងរយៈពេលប្រហែល ១ឆ្នាំ និង ៣ខែ ដែលកូរ៉េខាងជើងបានប្រើពាក្យថា «អាយ៉ង» ដើម្បីសំដៅទៅលើទីក្រុងសេអ៊ូល៕

នគរបាលអង់គ្លេសចោទប្រកាន់បុរសម្នាក់ពីបទចារកម្មដែលជាប់ពាក់ព័ន្ធនឹងអ៊ីរ៉ង់

នគរបាលអង់គ្លេសបាននិយាយនៅថ្ងៃសុក្រនេះថា ពួកគេបានចោទប្រកាន់បុរសអាយុ ៣៩ឆ្នាំម្នាក់ពីបទសង្ស័យថា បានជួយសេវាស៊ើបការណ៍សម្ងាត់របស់អ៊ីរ៉ង់ ដែលជាករណីចុងក្រោយបង្អស់នៅក្នុងឧប្បត្តិហេតុជាបន្តបន្ទាប់ដែលពាក់ព័ន្ធនឹងទីក្រុងតេអេរ៉ង់ និងបទល្មើសដែលស្ថិតនៅក្រោមច្បាប់សន្តិសុខជាតិរបស់ចក្រភពអង់គ្លេស។នគរបាលបានអះអាងថា ជនសង្ស័យឈ្មោះ Vahid Aberi មកពីទីក្រុង Liverpool ភាគខាងជើងប្រទេសអង់គ្លេស ត្រូវបាននាំទៅកាន់ប៉ុស្តិ៍នគរបាលមួយ នៅតំបន់ភាគកណ្តាលប្រទេសអង់គ្លេស។ ជាមួយគ្នានេះ អាជ្ញាធរក៏បានធ្វើការឆែកឆេរនៅអាសយដ្ឋានមួយចំនួន ក្នុងទីក្រុង Birmingham) និង Liverpool ផងដែរ។មន្ត្រីសន្តិសុខចក្រភពអង់គ្លេស បានព្រមានម្តងហើយម្តងទៀតថា អ៊ីរ៉ង់បានព្យាយាមប្រើប្រាស់ក្រុមឧក្រិដ្ឋជន ដើម្បីធ្វើសកម្មភាពអរិភាពនៅក្នុងប្រទេសនេះ។ ចាប់តាំងពីការចាប់ផ្តើមនៃសង្គ្រាមអាមេរិក-អ៊ីរ៉ង់មក មានការវាយប្រហារប្រឆាំងនឹងជនជាតិជ្វីហ្វមួយចំនួននៅក្នុងប្រទេសអង់គ្លេស ដែលជាប់ទាក់ទងនឹងអ៊ីរ៉ង់។ក្នុងគោលបំណងប្រើប្រាស់អំណាចថ្មី ដែលត្រូវបានបង្កើតឡើងដើម្បី ទប់ស្កាត់ការប្រើប្រាស់ក្រុមតំណាងដែលទទួលការគាំទ្រពីរដ្ឋ ចក្រភពអង់គ្លេសបានហាមឃាត់ការគាំទ្រដល់កងឆ្មាំបដិវត្តន៍អ៊ិស្លាមអ៊ីរ៉ង់ (IRGC) កាលពីដើមសប្តាហ៍នេះ៕

លោក Xi បង្ហាញចិនជាអ្នកដឹកនាំសណ្តាប់ធ្នាប់ AI សកលថ្មី ដោយប្រជែងការក្ដោបក្ដាប់របស់អាមេរិក

នាថ្ងៃសុក្រ (ទី១៧ ខែកក្កដា ឆ្នាំ២០២៦) នេះ ប្រធានាធិបតីចិន លោក Xi Jinping បានចាត់ទុកទីក្រុងប៉េកាំងជាអ្នកគាំទ្រឈានមុខនៃសណ្តាប់ធ្នាប់បញ្ញាសប្បនិម្មិត (AI) សកលថ្មី ដោយលោកបានប្រើប្រាស់សន្និសីទបច្ចេកវិទ្យាលំដាប់កំពូលរបស់ប្រទេសចិន ដើម្បីលើកកម្ពស់បច្ចេកវិទ្យាកូដបើកចំហ (Open-source Technology) និងប្រជែងនឹងឥទ្ធិពលរបស់សហរដ្ឋអាមេរិក ជុំវិញវិធាននានាដែលគ្រប់គ្រងលើវិស័យកំពុងរីកដុះដាលយ៉ាងឆាប់រហ័សមួយនេះ។នៅក្នុងសុន្ទរកថាទៅកាន់ពិធីបើកសន្និសីទបញ្ញាសិប្បនិម្មិតពិភពលោក (WAIC) នៅទីក្រុងស៊ាងហៃ លោក Xi បានជំរុញឱ្យប្រទេសនានា «ចាប់យកឱកាសដ៏កម្រ និងជាប្រវត្តិសាស្ត្រ» នៃបច្ចេកវិទ្យា AI កូដបើកចំហ (Open-source AI) ហើយលោកបានប្តេជ្ញាជួយដល់ប្រទេសកំពុងអភិវឌ្ឍន៍ កសាងសមត្ថភាព AI ព្រមទាំងបានព្រមានប្រឆាំងនឹងការលេចឡើងនូវ «ភាពអយុត្តិធម៌ប្រវត្តិសាស្ត្រថ្មីៗ» ដែលបណ្តាលមកពីលទ្ធភាពទទួលបានបច្ចេកវិទ្យានេះមិនស្មើគ្នា។ការកត់សម្គាល់ទាំងនេះបានក្លាយជាការបញ្ជាក់យ៉ាងច្បាស់បំផុតរបស់លោក Xi អំពីមហិច្ឆតារបស់ចិន ក្នុងការរៀបចំទម្រង់គ្រប់គ្រង AI សកល ដោយបានចាត់ទុកម៉ូដែលកូដបើកចំហ (Open-source Models) របស់ខ្លួនថា ជាផលប្រយោជន៍សាធារណៈសកល និងបានដាក់ទីក្រុងប៉េកាំងជាជម្រើសមួយជំនួសឱ្យទីក្រុងវ៉ាស៊ីនតោន នៅក្នុងដំណាក់កាលដ៏សំខាន់នៃការប្រកួតប្រជែងដណ្តើមភាពជាអ្នកដឹកនាំផ្នែកបច្ចេកវិទ្យា។ជាមួយគ្នានេះ លោក Xi ក៏បានអំពាវនាវផងដែរឱ្យប្រព័ន្ធ AI នៅតែស្ថិតក្រោមការគ្រប់គ្រងរបស់មនុស្ស និងបានជំរុញឱ្យប្រទេសនានាបង្កើតយន្តការព្រមានដំបូង និងឆ្លើយតប ក្នុងគ្រាអាសន្ន ដើម្បីគ្រប់គ្រងហានិភ័យ AI នៅក្នុងសេចក្តីថ្លែងការណ៍ដ៏ច្បាស់លាស់បំផុតរបស់លោកមិនធ្លាប់មានរហូតមកដល់ពេលនេះ ស្តីពីសុវត្ថិភាព AI។ លោកបានជំរុញបន្ថែមទៀតឱ្យមាននូវវិធានការ ដើម្បីការពារប្រឆាំងនឹងសេណារីយ៉ូបាត់បង់ការគ្រប់គ្រង ដោយព្រមានអំពីគ្រោះថ្នាក់ដែលបង្កឡើងដោយប្រព័ន្ធ AI ស្វយ័ត ដែលអាចគេចពីការត្រួតពិនិត្យ និងការគ្រប់គ្រងរបស់មនុស្ស៕

របាយការណ៍៖ លោក Trump ខឹងសម្បា ចំពោះការរិះគន់របស់លោក Netanyahu លើគម្រោងលក់ F-35 ឱ្យទួរគី

ប្រធានាធិបតីអាមេរិក លោក Donald Trump បានបង្ហាញអារម្មណ៍ «ខឹងសម្បាយ៉ាងខ្លាំង» ចំពោះការរិះគន់ជាសាធារណៈរបស់នាយករដ្ឋមន្ត្រីអ៊ីស្រាអែល លោក Benjamin Netanyahu ចំពោះគម្រោងលក់យន្តហោះចម្បាំង F-35 របស់សហរដ្ឋអាមេរិកទៅឱ្យប្រទេសទួរគី។ នេះបើយោងតាមរបាយការណ៍របស់គេហទំព័រព័ត៌មាន Axios កាលពីថ្ងៃព្រហស្បតិ៍ (ទី១៦ ខែកក្កដា ឆ្នាំ២០២៦)។ដោយដកស្រង់សម្តីមន្ត្រីសេតវិមាន ២រូប សារព័ត៌មាននេះបានឱ្យដឹងថា មិនមានកិច្ចប្រជុំណាមួយ ត្រូវបានគ្រោងទុកទេ ទោះបីជាមានរបាយការណ៍នៅក្នុងប្រព័ន្ធផ្សព្វផ្សាយអ៊ីស្រាអែលថា លោក Trump នឹងធ្វើជាម្ចាស់ផ្ទះទទួលលោក Netanyahu នៅថ្ងៃចន្ទសប្ដាហ៍ក្រោយក៏ដោយ។មន្ត្រីម្នាក់ បើតាមសេចក្ដីរាយការណ៍ បាននិយាយថា លោក Trump មានកាខឹងសម្បារ ចំពោះការកត់សម្គាល់របស់លោក Netanyahu ក្នុងអំឡុងពេលផ្ដល់សម្ភាសន៍ជាមួយប្រព័ន្ធផ្សព្វផ្សាយ Fox News ពោលគឺមិនយូរប៉ុន្មាន មុនពេលប្រធានាធិបតីអាមេរិកធ្វើដំណើរទៅកាន់ទីក្រុង Ankara របស់ទួរគី ដើម្បីចូលរួមកិច្ចប្រជុំកំពូលអង្គការណាទូ (NATO) នៅថ្ងៃទី ៧-៨ ខែកក្កដា។ ចំណែកមន្ត្រីម្នាក់ទៀតបានប្រាប់ថា លោក Trump ជឿថា លោក Netanyahu «គ្មានសិទ្ធិ» ជ្រៀតជ្រែក ក្នុងគម្រោងលក់អាវុធនេះទេ។គួរបញ្ជាក់ថា នាយករដ្ឋមន្ត្រីអ៊ីស្រាអែល ត្រូវបានគេរាយការណ៍ថា បានស្វែងរកការជួបជាមួយលោក Trump អស់រយៈពេលជាង ២សប្តាហ៍មកហើយ។ លោកបានទៅទស្សនកិច្ចការិយាល័យប្រធានាធិបតី Oval Office ចំនួន ៦ដង ចាប់តាំងពីលោក Trump បានវិលត្រឡប់មកកាន់តំណែងវិញ ក្នុងខែមករា ឆ្នាំ២០២៥៕

បណ្ដាញសង្គម

ព័ត៌មានថ្មីៗ

គណបក្សប្រជាជនកម្ពុជាខេត្តកំពង់ស្ពឺ ប្រជុំបូកសរុបលទ្ធផលការងារខែកក្កដា ឆ្នាំ២០២៦ និងលើកទិសដៅភារកិច្ចខែបន្ទាប់

ក្រសួងអប់រំ ផ្ដល់ឱកាសឱ្យសិស្សធ្វើទស្សនកិច្ចសិក្សានៅសិង្ហបុរី តាមរយៈកម្មវិធី ME-NISTER

មនុស្សយ៉ាងតិច ៥នាក់ស្លាប់ ក្នុងហេតុការណ៍បាក់ដី នៅភាគខាងជើងចិន

កម្មវិធីប្រកួតប្រជែងនិយាយជាសាធារណៈសម្រាប់និស្សិតសាកលវិទ្យាល័យរបស់អង្គភាពអ្នកនាំពាក្យរាជរដ្ឋាភិបាល រកឃើញអ្នកទទួលបានជ័យលាភីហើយ

ចិនតវ៉ាប្រឆាំងនឹងទណ្ឌកម្មរបស់សហភាពអឺរ៉ុប លើក្រុមហ៊ុនចិន ពាក់ព័ន្ធនឹងបញ្ហារុស្ស៊ី

មនុស្សជាង ១៦០.០០០នាក់ រត់គេចពីចំហេះព្រៃ នៅប្រទេសបារាំង និងអេស្ប៉ាញ

ប្រទេសចិនជម្លៀសមនុស្សជាង ២០.០០០នាក់ ខណៈព្យុះទីហ្វុង Noul បក់បោកជិតដល់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានអន្តរជាតិ

អ៊ីរ៉ង់ជំរុញឱ្យសន្សំសំចៃថាមពល ក្រោយការវាយប្រហាររបស់អាមេរិកបង្កការខូចខាតរោងចក្រថាមពល

ប្រភពយោធាស៊ីរីបដិសេធថា អ៊ីរ៉ង់មិនបានទម្លាក់គ្រាប់បែកលើមូលដ្ឋាន al-Tanf ទេ

ក្រសួងការពារជាតិ៖ កិច្ចសហប្រតិបត្តិការយោធាចិន-រុស្ស៊ី មិនមានគោលបំណងប្រឆាំងនឹងប្រទេសទី៣ ទេ

WHO៖ រលកកម្តៅនៅអឺរ៉ុបបានបណ្តាលឲ្យមនុស្សជាង ២០០.០០០នាក់ ស្លាប់ ក្នុងរយៈពេល ៤ឆ្នាំ

សហរដ្ឋអាមេរិកបន្តវាយប្រហារអ៊ីរ៉ង់ ៦ជាប់គ្នា ខណៈទីក្រុងតេអេរ៉ង់វាយបកលើសម្ព័ន្ធមិត្តរបស់អាមេរិក

ទឹកជំនន់នៅរដ្ឋ Texas បណ្ដាលឱ្យមនុស្ស ២នាក់ស្លាប់ ខណៈរដ្ឋត្រៀមសម្រាប់ភ្លៀងធ្លាក់ខ្លាំងលើកទី១

កូរ៉េខាងជើងហៅទីក្រុងសេអ៊ូលថា ជាអាយ៉ង សម្រាប់ការចូលរួមក្នុងសមយុទ្ធដែនសមុទ្រជាមួយអាមេរិក

នគរបាលអង់គ្លេសចោទប្រកាន់បុរសម្នាក់ពីបទចារកម្មដែលជាប់ពាក់ព័ន្ធនឹងអ៊ីរ៉ង់

លោក Xi បង្ហាញចិនជាអ្នកដឹកនាំសណ្តាប់ធ្នាប់ AI សកលថ្មី ដោយប្រជែងការក្ដោបក្ដាប់របស់អាមេរិក

របាយការណ៍៖ លោក Trump ខឹងសម្បា ចំពោះការរិះគន់របស់លោក Netanyahu លើគម្រោងលក់ F-35 ឱ្យទួរគី

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានអន្តរជាតិ

អ៊ីរ៉ង់ជំរុញឱ្យសន្សំ​សំចៃ​ថាមពល ក្រោយ​ការវាយប្រហាររបស់អាមេរិកបង្ក​ការខូចខាត​រោងចក្រថាមពល

ប្រភពយោធាស៊ីរីបដិសេធថា អ៊ីរ៉ង់មិន​បានទម្លាក់គ្រាប់បែកលើមូលដ្ឋាន al-Tanf ទេ​

ក្រសួងការពារជាតិ៖ កិច្ចសហប្រតិបត្តិការយោធាចិន-រុស្ស៊ី មិនមានគោលបំណងប្រឆាំងនឹងប្រទេសទី៣ ទេ

WHO៖ រលកកម្តៅនៅអឺរ៉ុបបានបណ្តាលឲ្យមនុស្សជាង ២០០.០០០នាក់ ស្លាប់ ក្នុងរយៈពេល ៤ឆ្នាំ

សហរដ្ឋអាមេរិកបន្តវាយប្រហារអ៊ីរ៉ង់ ៦ជាប់គ្នា ខណៈទីក្រុងតេអេរ៉ង់វាយបកលើសម្ព័ន្ធមិត្តរបស់អាមេរិក

ទឹកជំនន់នៅរដ្ឋ Texas បណ្ដាល​ឱ្យ​មនុស្ស ២នាក់ស្លាប់ ខណៈរដ្ឋត្រៀមសម្រាប់ភ្លៀងធ្លាក់ខ្លាំងលើក​ទី១

កូរ៉េខាងជើងហៅទីក្រុងសេអ៊ូលថា ជាអាយ៉ង​ សម្រាប់ការ​ចូល​រួម​ក្នុងសមយុទ្ធដែនសមុទ្រជាមួយ​អាមេរិក

នគរបាលអង់គ្លេសចោទប្រកាន់បុរសម្នាក់ពីបទចារកម្មដែលជាប់ពាក់ព័ន្ធនឹងអ៊ីរ៉ង់

លោក Xi បង្ហាញចិនជាអ្នកដឹកនាំសណ្តាប់ធ្នាប់ AI សកលថ្មី ដោយ​ប្រជែងការក្ដោបក្ដាប់របស់អាមេរិក

របាយការណ៍៖ លោក Trump ខឹងសម្បា ចំពោះការរិះគន់របស់លោក Netanyahu លើគម្រោងលក់ F-35 ឱ្យទួរគី

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

អ៊ីរ៉ង់ជំរុញឱ្យសន្សំសំចៃថាមពល ក្រោយការវាយប្រហាររបស់អាមេរិកបង្កការខូចខាតរោងចក្រថាមពល

ប្រភពយោធាស៊ីរីបដិសេធថា អ៊ីរ៉ង់មិនបានទម្លាក់គ្រាប់បែកលើមូលដ្ឋាន al-Tanf ទេ

ទឹកជំនន់នៅរដ្ឋ Texas បណ្ដាលឱ្យមនុស្ស ២នាក់ស្លាប់ ខណៈរដ្ឋត្រៀមសម្រាប់ភ្លៀងធ្លាក់ខ្លាំងលើកទី១

កូរ៉េខាងជើងហៅទីក្រុងសេអ៊ូលថា ជាអាយ៉ង សម្រាប់ការចូលរួមក្នុងសមយុទ្ធដែនសមុទ្រជាមួយអាមេរិក

លោក Xi បង្ហាញចិនជាអ្នកដឹកនាំសណ្តាប់ធ្នាប់ AI សកលថ្មី ដោយប្រជែងការក្ដោបក្ដាប់របស់អាមេរិក