BTV NEWS

បុគ្គលិកសម្អាតអនាម័យ និងប្រជាការពារ ដែលបម្រើការក្នុងព្រឹត្តិការណ៍នគរសង្ក្រាន្ត បានទទួលអំណោយពីថ្នាក់ដឹកនាំ

កិច្ចប្រជុំពេញអង្គគណៈរដ្ឋមន្ត្រីបានអនុម័តសេចក្តីព្រាងច្បាប់ស្តីពីកាតព្វកិច្ចយោធា

រូបសំណាកនាគព័ន្ធថ្មី ធ្វើពីស្ពាន់សុទ្ធទម្ងន់ ៨តោ នត្រូវបានដាក់តម្កល់លើផ្លូវជាតិលេខ៧

មូលនិធិសកល គាំទ្រវិស័យសុខាភិបាលកម្ពុជា ក្នុងការលុបបំបាត់ជំងឺ ជំងឺគ្រុនចាញ់ ជំងឺរបេង និងជំងឺអេដស៍

ព័ត៌មានជាតិ

សម្តេចធិបតី ហ៊ុន ម៉ាណែត អញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រី

សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា អញ្ជើញដឹកនាំកិច្ចប្រជុំពេញអង្គគណៈរដ្ឋមន្ត្រី នៅវិមានសន្តិភាព នាព្រឹកថ្ងៃសុក្រ ទី១៣ ខែមីនា ឆ្នាំ២០២៦។ កិច្ចប្រជុំពេញអង្គគណៈរដ្ឋមន្ត្រី ដើម្បីពិភាក្សា និងឆ្លងលើរបៀបវារៈដូចខាងក្រោម៖១- វឌ្ឍនភាពការអនុវត្តការងារ និងទិសដៅបន្តក្នុងការបោសសម្អាតការឆបោកតាមប្រព័ន្ធបច្ចេកវិទ្យា(ONLINE SCAMS)។២- សេចក្តីព្រាងច្បាប់ស្តីពីការប្រឆាំងការឆបោកតាមប្រព័ន្ធបច្ចេកវិទ្យា។៣- របាយការណ៍វឌ្ឍនភាពស្តីពីការដោះស្រាយបញ្ហាជនភៀសសឹក។៤- ការវាយតម្លៃស្ថានភាពសេដ្ឋកិច្ចកម្ពុជា ឆ្នាំ២០២៦ ផ្អែកទៅលើហានិភ័យថ្មីៗដែលកើតចេញពីការប្រែប្រួលនៃ ភូមិសាស្ត្រនយោបាយ សេដ្ឋកិច្ចសកល និងតំបន់ ព្រមទាំងបញ្ហាប្រឈមក្នុងស្រុក។

ក្រសួងការងារ សហការជាមួយអង្គការ ILO រៀបចំវគ្គបណ្តុះបណ្តាលគ្រូបង្គោល ស្តីពីប្រព័ន្ធគ្រប់គ្រងសុវត្ថិភាព និងសុខភាពការងារនៅកន្លែងធ្វើការ

ភ្នំពេញ៖ នាព្រឹកថ្ងៃទី១២ ខែមីនា ឆ្នាំ២០២៦ វិទ្យាស្ថានជាតិការងារ នៃក្រសួងការងារ និងបណ្តុះបណ្តាលវិជ្ជាជីវៈ សហការជាមួយគម្រោង ILO-Japan នៃអង្គការអន្តរជាតិខាងការងារ ដើម្បីបើកវគ្គបណ្តុះបណ្តាលគ្រូបង្គោលស្តីពី «ប្រព័ន្ធគ្រប់គ្រងសុវត្ថិភាព និងសុខភាពការងារនៅកន្លែងធ្វើការ»។ កម្មវិធីនេះត្រូវបានរៀបចំឡើងសម្រាប់អធិការការងារ អធិការពេទ្យការងារ និងមន្ត្រីជំនាញ ក្រោមអធិបតីភាព ឯកឧត្តម លឹម ស៊ុយហុង អនុរដ្ឋលេខាធិការ នៃក្រសួងការងារ និងបណ្តុះបណ្តាលវិជ្ជាជីវៈ។ក្នុងឱកាសនោះ ឯកឧត្តម លឹម ស៊ុយហុង បានបញ្ជាក់ថា គោលបំណងចម្បងនៃវគ្គបណ្តុះបណ្តាលនេះ គឺដើម្បីពង្រឹងសមត្ថភាពមន្ត្រីជំនាញឱ្យកាន់តែយល់ច្បាស់អំពីគោលនយោបាយសុវត្ថិភាព និងសុខភាពការងារតាមបណ្តាសហគ្រាស គ្រឹះស្ថាន និងរោងចក្រ ក្នុងគោលដៅបង្កើតបរិយាកាសការងារឱ្យមានសុវត្ថិភាពខ្ពស់សម្រាប់បងប្អូនកម្មករនិយោជិត។ ជាមួយគ្នានេះ ឯកឧត្តម បានសង្កត់ធ្ងន់ថា ការលើកកម្ពស់ចំណេះដឹងដល់មន្ត្រីអធិការកិច្ច គឺជាអាទិភាពគន្លឹះដែលមិនអាចខ្វះបាន ក្នុងការជំរុញការអភិវឌ្ឍវិស័យការងារ និងសន្តិសុខសង្គម។ លើសពីនេះ ឯកឧត្តម បានឱ្យដឹងថា ក្រសួងការងារ និងបណ្តុះបណ្តាលវិជ្ជាជីវៈកំពុងស្ថិតក្នុងដំណាក់កាលពិភាក្សាប្រមូលធាតុចូលយ៉ាងសកម្ម ដើម្បីរៀបចំសេចក្តីព្រាងច្បាប់ស្តីពីសុវត្ថិភាព និងសុខភាពការងារឱ្យមានលក្ខណៈគ្រប់ជ្រុងជ្រោយ និងឆ្លើយតបទៅនឹងតម្រូវការជាក់ស្តែង។វគ្គបណ្តុះបណ្តាលរយៈពេល ២ថ្ងៃនេះ ទទួលបានការណែនាំផ្ទាល់ពី លោកស្រីវេជ្ជបណ្ឌិត យូកា អ៊ូជីតា អ្នកជំនាញជាន់ខ្ពស់របស់អង្គការ ILO ប្រចាំតំបន់អាស៊ីប៉ាស៊ីហ្វិក។ ខ្លឹមសារសំខាន់ៗដែលត្រូវបានលើកយកមកបង្ហាញ រួមមាន ការវាយតម្លៃហានិភ័យនៅកន្លែងធ្វើការ ការកំណត់ប្រភេទគ្រោះថ្នាក់ វិធីសាស្ត្រកត់ត្រា និងការជូនដំណឹងអំពីជំងឺវិជ្ជាជីវៈផ្សេងៗ។ គួរកត់សម្គល់ថាមន្ត្រីដែលចូលរួមនឹងក្លាយជាគ្រូបង្គោលដែលមានសមត្ថភាពពេញលេញ ក្នុងការផ្ទេរចំណេះដឹងបន្ត និងរៀបចំផែនការបណ្តុះបណ្តាលនៅតាមមូលដ្ឋាន ដើម្បីធានាឱ្យសហគ្រាស និងរោងចក្រក្លាយជាកន្លែងធ្វើការដែលមានសុខដុមរមនា និងសុវត្ថិភាពបំផុត៕

ឯកឧត្តមឧបនាយករដ្ឋមន្ត្រី ហ៊ុន ម៉ានី អនុញ្ញាតទទួលជួបអ្នកសម្របសម្រួលអង្គការសហប្រជាជាតិប្រចាំកម្ពុជា

នាព្រឹកថ្ងៃទី១២ ខែមីនា ឆ្នាំ២០២៦ ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ បានអនុញ្ញាតឱ្យលោកជំទាវ Vladanka Andreeva អ្នកសម្របសម្រួលអង្គការសហប្រជាជាតិប្រចាំព្រះរាជាណាចក្រកម្ពុជា ចូលជួបសម្ដែងការគួរសម និងពិភាក្សាការងារ នៅទីស្តីការក្រសួងមុខងារសាធារណៈ។ក្នុងជំនួបនេះ ឯកឧត្តមឧបនាយករដ្ឋមន្ត្រី និងលោកជំទាវ បានផ្លាស់ប្តូរយោបល់លើកិច្ចសហប្រតិបត្តិការ រវាងក្រសួងមុខងារសាធារណៈ និងអង្គការសហប្រជាជាតិប្រចាំនៅកម្ពុជា នៅក្នុងក្របខ័ណ្ឌមុខងារសាធារណៈ និង ការបណ្តុះបណ្តាលសមត្ថភាពធនធានមនុស្សនៅកម្ពុជា។

រដ្ឋបាលរាជធានី និង ស.ស.យ.ក. ប្រជុំរៀបចំព្រឹត្តិការណ៍អបអរសាទរពិធីបុណ្យចូលឆ្នាំថ្មី ពុទ្ធសករាជ ២៥៧០

រដ្ឋបាលរាជធានីភ្នំពេញ និង ស.ស.យ.ក. បានបើកកិច្ចប្រជុំពិភាក្សា ដើម្បីត្រៀមរៀបចំព្រឹត្តិការណ៍អបអរសាទរពិធីបុណ្យចូលឆ្នាំថ្មី ឆ្នាំមមី ពុទ្ធសករាជ ២៥៧០ ដែលនឹងធ្វើឡើងនៅរាជធានីភ្នំពេញ។រដ្ឋបាលរាជធានីភ្នំពេញ សហការជាមួយសហភាពសហព័ន្ធយុវជនកម្ពុជា នឹងរៀបចំព្រឹត្តិការណ៍ដ៏ធំមួយនៅរាជធានីភ្នំពេញ ដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី អដ្ឋស័ក ពុទ្ធសករាជ ២៥៧០ ដោយចាប់ផ្តើមពីថ្ងៃទី១៤ រហូតដល់ថ្ងៃទី១៩ ខែមេសា ឆ្នាំ២០២៦។ ដើម្បីឱ្យព្រឹត្តិការណ៍ដ៏ធំមួយនេះដំណើរការទៅដោយរលូន សប្បាយរីករាយ និងជោគជ័យ នារសៀលថ្ងៃទី១២ ខែមីនា ឆ្នាំ២០២៦ រដ្ឋបាលរាជធានីភ្នំពេញបានរៀបចំកិច្ចប្រជុំស្តីពីការត្រៀមរៀបចំព្រឹត្តិការណ៍នេះក្រោមអធិបតីភាព ឯកឧត្តម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា និងឯកឧត្តម ឃួង ស្រេង អភិបាលនៃគណៈអភិបាល រាជធានីភ្នំពេញ នៅសាលារាជធានីភ្នំពេញ។ ឯកឧត្តម ឃួង ស្រេង មានប្រសាសន៍ថា ការអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ រដ្ឋបាលរាជធានីភ្នំពេញ តែងរៀបចំជារៀងរាល់ឆ្នាំនៅរមណីយដ្ឋានវប្បធម៌ប្រវត្តិសាស្ត្រវត្តភ្នំ ប៉ុន្តែសម្រាប់ឆ្នាំ២០២៦នេះ ក្រោមការសហការជាមួយសហភាពសហព័ន្ធយុវជនកម្ពុជា រដ្ឋបាលរាជធានីភ្នំពេញនឹងរៀបចំព្រឹត្តិការណ៍អបអរសាទរពិធីបុណ្យចូលឆ្នាំថ្មី ធំជាងឆ្នាំកន្លងទៅនៅរាជធានីភ្នំពេញ ដោយចាប់ផ្តើមពីថ្ងៃទី១៤ រហូតដល់ថ្ងៃទី១៩ ខែមេសាខាងមុខនេះ។ ឯកឧត្តម ឃួង ស្រេង បានបន្តថា ព្រឹត្តិការណ៍នេះ ធ្វើឡើង ដើម្បីថែរក្សាការពារវប្បធម៌ ទំនៀមទម្លាប់ ប្រពៃណីរបស់ដូនតា និងការស្គាល់ច្បាស់ពីអត្តសញ្ញាណជាតិ ជាផ្នែកមួយ នៃខឿនការពារជាតិដ៏រឹងមាំរបស់ប្រជាជន។ឯកឧត្តម ហ៊ុន ម៉ានី មានប្រសាសន៍ថា ព្រឹត្តិការណ៍ដ៏ធំនេះ ធ្វើឡើងដើម្បីអបអរសាទរពិធីបុណ្យចូលឆ្នាំថ្មី ប្រពៃណីជាតិខ្មែរ ឆ្នាំមមី ២០២៦ ហើយព្រឹត្តិការណ៍នេះ ក៏មិនខុសពីព្រឹត្តិការណ៍ «សាទរកម្ពុជា» ដែលបានរៀបចំឡើងកាលពីថ្ងៃទី៣១ ខែធ្នូ ចំថ្ងៃឆ្លងឆ្នាំសកល ឆ្នាំ២០២៥ឡើយ គឺក្នុងគោលបំណងនាំមកនូវការជួបជុំគ្នា ទាំងប្រជាពលរដ្ឋក្នុង និងក្រៅស្រុក។ ជាមួយនិងការផ្សព្វផ្សាយទៅកាន់បងប្អូនប្រជាពលរដ្ឋខ្មែរឯនាយសមុទ្រ អំពីអត្ថន័យនៃការជួបជុំសាច់ញាតិបងប្អូនក្នុងឱកាសពិធីបុណ្យចូលឆ្នាំថ្មី ប្រកបដោយភាពកក់ក្តៅ និងមនោសញ្ចេតនានឹកនា និងវិលត្រឡប់មកលេងស្រុកកំណើតវិញ។សូមបញ្ជាក់ថា ព្រឹត្តិការណ៍ដ៏ធំនេះនឹងធ្វើឡើងនៅទីតាំងធំៗចំនួន៣ទីតាំង និងតូចចំនួន៣ទីតាំងទៀត ក្នុងនោះទីតាំងធំៗចំនួន៣មានទី១ នៅរមណីយដ្ឋានវប្បធម៌ប្រវត្តិសាស្ត្រវត្តភ្នំ ទី២ ផ្លូវថ្មើជើងចតុមុខ និងទី៣ នៅសួនវឌ្ឍនៈ រហូតដល់ផ្សាររាត្រី។ ចំណែក៣ទីតាំងតូចៗ មានទី១ នៅសួនមុខវត្តបទុមវតី ទី២ បាសាក់លែន នៅផ្លូវលេខ៣០៨ និងទី៣ នៅផ្លូវលេខ១៥៥ ផ្លូវជុំវិញផ្សារទួលទំពូង ក្នុងខណ្ឌចំការមន៕អត្ថបទ ៖ ប្រាក់ វ៉ាន់ដា

ប្រជាពលរដ្ឋនៅឃុំស្ទឹងកែវ សម្តែងនូវការសប្បាយរីករាយចំពោះសមិទ្ធផលកើតឡើងនៅក្នុងមូលដ្ឋាន

ប្រជាពលរដ្ឋនៅឃុំស្ទឹងកែវ ស្រុកទឹកឈូ ខេត្តកំពត បានបង្ហាញនូវការសប្បាយរីករាយជាអនេក និងថ្លែងអំណអរគុណចំពោះការ យកចិត្តទុកដាក់របស់រាជរដ្ឋាភិបាល ផ្តល់ស្ពានបេតុង (ស្ពានដំរីផុង) ប្រវែង ៦០ ម៉ែត្រ ដោយពួកគាត់ចាត់ទុកជាសមិទ្ធផលដ៏មានតម្លៃ មិនអាចកាត់ថ្លៃបាន បម្រើផលប្រយោជន៍ដល់សហគមន៍មូលដ្ឋាន។ឯកឧត្តមបណ្ឌិត នួន ដាញ៉ិល រដ្ឋលេខាធិការ រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួង អភិវឌ្ឍន៍ជនបទ នៅថ្ងៃទី១២ ខែមីនា ឆ្នាំ២០២៦នេះ បានអញ្ជើញជាធិបតី ក្នុងពិធីបើកការដ្ឋានការងារស្ថាបនាស្ពានបេតុង ចំនួន ១កន្លែង (ស្ពានដំរីផុង) ប្រវែង៦០ ម៉ែត្រ ទទឹង៨ ម៉ែត្រ និងការស្ថាបនាផ្លូវក្រាលបេតុងសងខាងក្បាលស្ពានប្រវែងសរុប២០០ ម៉ែត្រ ស្ថិតនៅភូមិកំពង់ចិន ឃុំស្ទឹងកែវ ស្រុកទឹកឈូ ខេត្តកំពត, ក្នុងនោះពិធីនោះ អាជ្ញាធរ និងប្រជាពលរដ្ឋ បានសម្តែងនូវការសប្បាយ រីករាយ និងថ្លែងនូវការដឹងគុណជានិច្ចចំពោះរាជរដ្ឋាភិបាល ដែលបានផ្តល់សមិទ្ធផលជាប្រវត្តិសាស្រ្តថ្មីមួយនេះ នៅក្នុងមូលដ្ឋានរបស់ ពួគគាត់ ដែលនេះគឺជាការចូលរួមចំណែកដ៏សំខាន់ ដើម្បីលើកកម្ពស់ការរស់នៅ ខណៈដែលកន្លងមកប្រជាពលរដ្ឋនៅមូលដ្ឋាននោះ តែងតែជួបការលំបាកក្នុងការធ្វើដំណើរ ការដឹកជញ្ជូនកសិផល ជាពិសេសនៅពេលដែលមានបញ្ហាជំងឺដង្កាត់កើតឡើងជាដើម។ ឯកឧត្តមបណ្ឌិត ម៉ៅ ធនិន អភិបាលនៃគណៈអភិបាលខេត្តកំពត លើកឡើងថា ជុំវិញការស្ថាបនាស្ពានខាងលើនេះ គឺជាការ បំពេញនូវតម្រូវរបស់ប្រជាពលរដ្ឋនៅមូលដ្ឋាន ដែលនេះគឺជាសមិទ្ធផលមរតកអមតៈ ដែលរាជរដ្ឋាបាលក្រោមការដឹកនាំប្រកបដោយ ភាពវៃឆ្លាត របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានផ្តល់ស្ពានបេតុងដ៏ថ្លៃថ្លានេះដល់ទឹកដីខេត្តកំពត និង សម្រាប់បងប្អូនប្រជាពលរដ្ឋនៅក្នុងឃុំទាំងបី ក្នុងស្រុកទឹកឈូ។ ឯកឧត្តមអភិបាល បានរំលេចថា ស្ពាននេះមានអត្ថប្រយោជន៍ណាស់ ដល់បងប្អូនប្រជាពលរដ្ឋនៅក្នុងមូលដ្ឋាន សម្រាប់ការដឹកជញ្ជូនកសិផល ទៅកាន់ទីប្រជុំជន ទៅកាន់ផ្សារជាដើម។ឯកឧត្តមរដ្ឋលេខាធិការ លើកឡើងផងដែរថា ជុំវិញការបើកការដ្ឋានស្ថាបនាស្ពានបេតុងដំរីផុងនៅពេលនេះ ស្ថិតក្នុងបរិយា កាសដែលរាជរដ្ឋាភិបាលកម្ពុជាកំពុងបង្កើនការយកចិត្តទុកដាក់ និងសកម្មភាពប្រកបដោយភាពម៉ឺងម៉ាត់ និងម៉ត់ចត់ ក្នុងកិច្ចអភិវឌ្ឍន៍ លើគ្រប់វិស័យ ពិសេសការបង្កើនល្បឿននៃសកម្មភាពការងារអភិវឌ្ឍន៍ជនបទ និងកាត់បន្ថយភាពក្រីក្ររបស់ប្រជាពលរដ្ឋ។ ឯកឧត្តមរដ្ឋលេខាធិការ ថ្លែងឱ្យដឹងថា ចំពោះគម្រោងស្ថាបនាស្ពានខាងលើនេះ គឺអនុវត្តដោយបញ្ហាការដ្ឋានវិស្វកម្ម កងទ័ព ជើងគោក គ្រោងស្ថាបនាក្នុងរយៈពេល ៤ ខែ ចាប់ពីខែ មេសា ដល់ សីហា ឆ្នាំ ២០២៦ ក្នុងនោះឯកឧត្តមក៏បានស្នើដល់អ្នកទទួល ការងារស្ថាបនា ត្រូវអនុវត្តឱ្យបានចប់សព្វគ្រប់ទៅតាមផែនការរបស់ខ្លួន ដើម្បីឱ្យបងប្អូនប្រជាពលរដ្ឋធ្វើដំណើរដោយសប្បាយរីករាយ នៅក្នុងរដូវបុណ្យភ្ជុំបិណ្ឌនាពេលខាងមុខ និងបានស្នើដល់មន្រ្តីមូលមូលដ្ឋាន និងអាជ្ញាធរគ្រប់លំដាប់ថ្នាក់ បន្តសហការគ្នាឱ្យបានល្អ ក្នុងការជំរុញលើការគ្រប់គ្រង ការអភិវឌ្ឍ និងថែទាំឱ្យបានគង់វង្ស បន្ទាប់ពីស្ពាននេះស្ថាបនារួចរាល់៕អត្ថបទ៖ សុន រ៉ាឌី

ក្រសួងការបរទេស និងមជ្ឈមណ្ឌលអាស៊ាន-ជប៉ុន សហការគ្នារៀបចំសិក្ខាសាលាស្តីពី “ការលើកកម្ពស់ការយល់ដឹងអំពីអាស៊ានសម្រាប់យុវជន”

ក្រសួងការបរទេស និងសហប្រតិបត្តិការអន្តរជាតិ និងមជ្ឈមណ្ឌលអាស៊ាន-ជប៉ុន បានសហការគ្នារៀបចំសិក្ខាសាលាស្តីពី “ការលើកកម្ពស់ការយល់ដឹងអំពីអាស៊ានសម្រាប់យុវជន” នៅថ្ងៃទី១២ ខែមីនា ឆ្នាំ២០២៦ នេះ ក្រោមអធិបតីភាពលោកជំទាវ នេត ធីតាវិឈុណា អនុរដ្ឋលេខាធិការនៃក្រសួងការបរទេស និងសហប្រតិបត្តិការអន្តរជាតិ។ សិក្ខាសាលានេះ ដោយមានការចូលរួមពីយុវជនចំនួន ១០០នាក់ ពីសហភាពសហព័ន្ធយុវជនកម្ពុជា (ស.ស.យ.ក)។ក្រសួងការបរទេសនិងសហប្រតិបត្តិការអន្តរជាតិបានបញ្ជាក់ថា សិក្ខាសាលាសាលាស្តីពី “ការលើកកម្ពស់ការយល់ដឹងអំពីអាស៊ានសម្រាប់យុវជន” មានគោលបំណងពង្រឹង និងលើកកម្ពស់ការយល់ដឹងជាសាធារណៈអំពីអាស៊ាន ជាពិសេសក្នុងចំណោមយុវជនកម្ពុជា ដែលជាធាតុផ្សំដ៏សំខាន់ក្នុងកិច្ចខិតខំប្រឹងប្រែងរួមគ្នា ដើម្បីជំរុញដំណើរការកសាងសហគមន៍អាស៊ាន៕ អត្ថបទ៖ វង្ស សុភាព

កិច្ចប្រជុំអន្តរក្រសួងស្តីពីការត្រៀមរៀបចំកិច្ចប្រជុំគណៈកម្មាធិការចម្រុះកម្ពុជា-សហភាពអឺរ៉ុបលើកទី១៣ និងកិច្ចប្រជុំពាក់ព័ន្ធនៅចុងខែមីនា

ក្រសួងការបរទេស និងសហប្រតិបត្តិការអន្តរជាតិ នៅព្រឹកថ្ងៃទី១២ ខែមីនា ឆ្នាំ២០២៦ បានកិច្ចប្រជុំអន្តរក្រសួងស្តីពីការត្រៀមរៀបចំកិច្ចប្រជុំគណៈកម្មាធិការចម្រុះកម្ពុជា-សហភាពអឺរ៉ុបលើកទី១៣ និងកិច្ចប្រជុំពាក់ព័ន្ធ ដែលនឹងប្រព្រឹត្តទៅនៅចុងខែមីនា ឆ្នាំ២០២៦ នៅរាជធានីភ្នំពេញ។ កិច្ចប្រជុំនេះមានការចូលរួមពីតំណាងមកពីក្រសួង និងស្ថាប័នពាក់ព័ន្ធចំនួន២០។ កិច្ចប្រជុំអន្តរក្រសួងនេះ ដឹកនាំដោយ ឯកឧត្តម កាន់ ផារិទ្ធ រដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ។ នេះបើតាមការបញ្ជាក់របស់ក្រសួងការបរទេស និងសហប្រតិបត្តិការអន្តរជាតិ។ក្រសួងការបរទេសបានបន្តថា អង្គប្រជុំបានត្រួតពិនិត្យឡើងវិញនូវវឌ្ឍនភាពនៃការត្រៀមរៀបចំ និងបានពិភាក្សាអំពីអាទិភាពគន្លឹះ និងបញ្ហាសារសំខាន់ៗ ដែលត្រូវលើកយកទៅពិភាក្សានៅក្នុងកិច្ចប្រជុំខាងមុខ។ កិច្ចពិភាក្សាក៏បានគូសបញ្ជាក់អំពីអាទិភាពរបស់កម្ពុជា ក្នុងការលើកកម្ពស់កិច្ចសហប្រតិបត្តិការ និងការពង្រឹងភាពជាដៃគូរវាងកម្ពុជា និងសហភាពអឺរ៉ុប ផងដែរ៕ អត្ថបទ៖ វង្ស សុភាព

អនុប្រធានទី២ នៃព្រឹទ្ធសភា ជំរុញយុទ្ធសាស្ត្រ «ដំណោះស្រាយដោយខ្មែរ» ដើម្បីពង្រឹងភាពធន់សេដ្ឋកិច្ច និងអធិបតេយ្យជាតិ

ក្នុងពិធីបិទសិក្ខាសាលាស្តីពី "ភាពធន់ និងកាលានុវត្តភាព នៃយុទ្ធសាស្ត្រវិទ្យាសាស្ត្រ បច្ចេកវិទ្យា នវានុវត្តន៍ ឧស្សាហកម្ម និងពាណិជ្ជកម្ម៖ ការរក្សាលំនឹងក្នុងកាលៈទេសៈនៃសង្រ្គាមឈ្លានពានលើអធិបតេយ្យ និងបូរណភាពទឹកដីរបស់កម្ពុជា" នៅវិមានរដ្ឋសភាជាតិ កាលពីថ្ងៃទី១២ ខែមីនា ឆ្នាំ២០២៦ ឯកឧត្តមបណ្ឌិត ធន់ វឌ្ឍនា អនុប្រធានទី២ នៃព្រឹទ្ធសភា បានដាក់ចេញនូវទស្សនទាន «ដំណោះស្រាយដោយខ្មែរ» (Khmer Solutions) ដើម្បីពង្រឹងភាពម្ចាស់ការលើសេដ្ឋកិច្ចជាតិ ក្នុងបរិបទនៃវិបត្តិសកល និងបញ្ហាប្រឈមក្នុងតំបន់។ឯកឧត្តមបណ្ឌិត បានសង្កត់ធ្ងន់ថា សន្តិភាពគឺជាគ្រឹះនៃវិបុលភាព។ ចំពោះបញ្ហាព្រំដែនកម្ពុជា-ថៃ ឯកឧត្តមគាំទ្រការដោះស្រាយតាមផ្លូវច្បាប់ និងការចរចា ជៀសវាងការប្រើកម្លាំងយោធា។ ទន្ទឹមនឹងនេះ ឯកឧត្តមបានជំរុញយុទ្ធសាស្ត្រ «ខ្មែរដាំ ខ្មែរកែច្នៃ ខ្មែរហូប ខ្មែរលក់» ដោយចាត់ទុកស្ថានភាពបច្ចុប្បន្នជា «ឱកាសមាស» ក្នុងការលើកកម្ពស់ផលិតផល "Made in Cambodia" និងពង្រឹងសមត្ថភាពសហគ្រាសក្នុងស្រុក (MSMEs) តាមរយៈបច្ចេកវិទ្យា AI និងរ៉ូបូទិក។ដើម្បីសម្រេចចក្ខុវិស័យនេះ ឯកឧត្តមបានដាក់ចេញនូវការអំពាវនាវសំខាន់ៗចំនួន ៥ ចំណុច៖១. គាំទ្រ MSMEs៖ តាមរយៈយន្តការហិរញ្ញវត្ថុ ពន្ធ និងបច្ចេកវិទ្យា កែច្នៃវេចខ្ចប់។២. បង្កើនផលិតភាព៖ ប្រើប្រាស់ធនធានដីធ្លីឱ្យអស់លទ្ធភាព និងពង្រីកសម្ព័ន្ធភាពអាជីវកម្ម ជាមួយប្រទេសយុទ្ធសាស្រ្ត។៣. វិនិយោគការស្រាវជ្រាវ៖ បង្កើនកញ្ចប់ថវិកាស្រាវជ្រាវដល់គ្រឹះស្ថានឧត្តមសិក្សា។៤. រួមកម្លាំងស្ថាប័នអប់រំ៖ ជំរុញកិច្ចសហការរវាងសាលាដែលមានស្រាប់ ជាជាងបង្កើតថ្មីស្ទួនគ្នា។៥. ពង្រឹងភាសាអង់គ្លេស៖ ជំរុញសមត្ថភាពភាសាប្រជាជនខ្មែរឱ្យបានខ្ពស់ (ប្រហែលហ្វីលីពីន) នៅឆ្នាំ២០៥០។ជាទីបញ្ចប់ ឯកឧត្តមបានរំលឹកដល់សមាជិកសភា និងព្រឹទ្ធសភា ឱ្យបន្តចុះតាមដានសុខទុក្ខ និងដោះស្រាយបញ្ហាជូនប្រជាជននៅមូលដ្ឋាន ស្របតាមការណែនាំរបស់ សម្តេចតេជោ ហ៊ុន សែន៕

ក្រសួងអប់រំ និងក្រសួងការងារ ជំរុញការវិនិយោគលើការរៀបចំទារកដ្ឋាន ដើម្បីគាំពារ និងអភិវឌ្ឍកុមារតូចនៅកម្ពុជា

(ភ្នំពេញ)៖ នាព្រឹកថ្ងៃទី១២ ខែមីនា ឆ្នាំ២០២៦ នៅសណ្ឋាគារ ណូវ៉ូតែល ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានអញ្ជើញចូលរួមជាគណៈអធិបតី និងថ្លែងសុន្ទរកថាក្នុងពិធីបើកសិក្ខាសាលាថ្នាក់ជាតិ ស្តីពីការលើកកម្ពស់ការគ្រប់គ្រងទារកដ្ឋាន ដែលប្រព្រឹត្តទៅក្រោមអធិបតីភាពដ៏ខ្ពង់ខ្ពស់ ឯកឧត្ដមបណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងជាប្រធានគណៈកម្មាធិការជាតិគាំពារនិងអភិវឌ្ឍកុមារតូច។សិក្ខាសាលាថ្នាក់ជាតិនេះរៀបចំឡើងក្នុងគោលបំណងស្វែងរកការគាំទ្រ និងជំរុញការវិនិយោគលើការបង្កើតទារកដ្ឋានប្រកបដោយស្តង់ដានៅតាមសហគមន៍ សហគ្រាស និងទារកដ្ឋានឯកជន ព្រមទាំងចែករំលែកចំណេះដឹងពីការពង្រឹងការគាំពារ និងអភិវឌ្ឍកុមារតូច។នៅក្នុងអង្គសិក្ខាសាលាដែលមានអ្នកចូលរួមជាង ២០០រូប មកពីថ្នាក់ដឹកនាំក្រសួង-ស្ថាប័ន មានអាជ្ញាធរថ្នាក់ជាតិ ថ្នាក់ក្រោមជាតិ និងដៃគូអភិវឌ្ឍន៍ ឯកឧត្ដមបណ្ឌិតសភាចារ្យ ហង់ ជួនណារ៉ុន បានមានប្រសាសន៍ថា ការយកចិត្តទុកដាក់លើការពង្រឹងយន្តការគ្រប់គ្រងទារកដ្ឋាន គឺជាសមិទ្ធផលថ្មីមួយទៀតដែលឆ្លុះបញ្ចាំងពីការអនុវត្តតាមអនុសាសន៍ដ៏ខ្ពង់ខ្ពស់របស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងគោលដៅផ្តល់អត្ថប្រយោជន៍ផ្ទាល់ដល់កុមារតូច ដែលជាអ្នកបន្តវេនដ៏មានសក្តានុពល។ឯកឧត្ដមឧបនាយករដ្ឋមន្រ្តី បានបញ្ជាក់បន្ថែមថា ការផ្តល់សេវាទារកដ្ឋានក្នុងយុគសម័យទំនើប មិនមែនគ្រាន់តែជាការមើលថែទាំកុមារធម្មតាប៉ុណ្ណោះទេ ប៉ុន្តែវាជាប្រព័ន្ធផ្តល់សេវាអប់រំក្នុងដំណាក់កាលដំបូងនៃជីវិត ដែលរួមបញ្ចូលនូវបំណិនគ្រប់ជ្រុងជ្រោយ តាមរយៈការរៀនសូត្រដោយការលេង ការអប់រំសង្គមនិងអារម្មណ៍ ព្រមទាំងការផ្តល់សេវាប្រកបដោយសុវត្ថិភាព សុខភាព អាហារូបត្ថម្ភ និងអនាម័យ។នាឱកាសនោះ ឯកឧត្តមរដ្ឋមន្ត្រី ហេង សួរ បានគូសបញ្ជាក់ថា ការជំរុញការយល់ដឹងដល់ភាគីពាក់ព័ន្ធ និយោជក និងអ្នករៀបចំដំណើរការទារកដ្ឋាន អំពីយន្តការគ្រប់គ្រងទារកដ្ឋានប្រកបដោយប្រសិទ្ធភាព គឺពិតជាមានសារៈសំខាន់បំផុត។ ឯកឧត្តមបានលើកឡើងពីទស្សនវិស័យវែងឆ្ងាយរបស់រាជរដ្ឋាភិបាល ក្រោមការដឹកនាំរបស់សម្តេចតេជោ ប្រធានព្រឹទ្ធសភា និងសម្តេចធិបតី នាយករដ្ឋមន្ត្រី ដែលជានិច្ចកាលតែងតែយកចិត្តទុកដាក់ខ្ពស់ចំពោះស្ត្រី ជាពិសេសបងប្អូនកម្មការិនី តាមរយៈការដាក់ចេញនូវវិធានការ និងគោលនយោបាយលើកកម្ពស់សុខភាព ជីវភាព និងការគាំពារកុមារតូច។ ជាក់ស្តែង ក្រសួងការងារ និងបណ្តុះបណ្តាលវិជ្ជាជីវៈ បាននិងកំពុងអនុវត្តការផ្តល់ប្រាក់ឧបត្ថម្ភរបស់រាជរដ្ឋាភិបាលជូនកម្មការិនីមានផ្ទៃពោះ (សមាជិក ប.ស.ស.) ចំនួន៣ដំណាក់កាល ដើម្បីធានាថាម្តាយនិងទារកមានសុខភាពល្អ និងលូតលាស់បានពេញលេញ។ទន្ទឹមនឹងនេះ ឯកឧត្តមរដ្ឋមន្ត្រី ក៏បានសង្កត់ធ្ងន់លើការការពារសិទ្ធិស្ត្រីនៅកន្លែងធ្វើការ ឈរលើគោលការណ៍មិនរើសអើង ដូចជាការធានាការឈប់សម្រាកលំហែមាតុភាព ការអនុញ្ញាតឱ្យស្ត្រីមានផ្ទៃពោះចាប់ពី៣ខែឡើងទៅអាចចេញធ្វើការមុនម៉ោង ការរក្សាអតីតភាពការងារ និងការហាមឃាត់ដាច់ខាតនូវការបញ្ឈប់កម្មការិនីដោយសារការមានផ្ទៃពោះ។ ជាមួយគ្នានេះ ឯកឧត្តមរដ្ឋមន្ត្រី បានរំលេចពីវឌ្ឍនភាពនៃការរៀបចំទារកដ្ឋាននៅតាមរោងចក្រ ដូចជាករណីរោងចក្រ ម៉ាវ៉ល ហ្កាមិន (Marvel Garment) កាលពីឆ្នាំ២០២៥ និងបានបញ្ជាក់ពីការប្តេជ្ញាចិត្តរបស់ក្រសួង ក្នុងការបន្តជំរុញ និងលើកទឹកចិត្តឱ្យរោងចក្រ សហគ្រាស រៀបចំ ឬគាំទ្រដល់ការផ្តល់សេវាទារកដ្ឋានសម្រាប់កូនកម្មករនិយោជិតបន្ថែមទៀត អាស្រ័យតាមជម្រើសនិងតម្រូវការជាក់ស្ដែង។ជាទីបញ្ចប់ ឯកឧត្ដមបណ្ឌិតសភាចារ្យ ហង់ ជួនណារ៉ុន និងឯកឧត្តម ហេង សួរ បានអំពាវនាវដល់គ្រប់ភាគីពាក់ព័ន្ធទាំងអស់ ឱ្យបន្តកិច្ចសហការ និងបង្កើនការវិនិយោគលើកុមារតូច តាមរយៈការរៀបចំទារកដ្ឋានប្រកបដោយស្តង់ដា ដើម្បីពង្រីកសេវាថែទាំ និងផ្តល់ឱកាសរៀនសូត្រក្នុងវ័យដំបូងដល់ទារកនិងកុមារតូច ប្រកបដោយសមធម៌ និងបរិយាបន្ន៕

ក្រសួងរកឃើញថា ស្ថានីយ និងដេប៉ូលក់រាយប្រេងឥន្ធនៈជិត២.០០០ទីតាំង បានបិទបណ្តោះអាសន្នក្រោមហេតុផលអស់ស្តុក

ក្រសួងពាណិជ្ជកម្ម បានរកឃើញថា មានស្ថានីយ និងដេប៉ូលក់រាយប្រេងឥន្ធនៈជិត២.០០០ កន្លែង នៅទូទាំងប្រទេស បានបិទទ្វាបណ្តោះអាសន្ន ក្រោមហេតុផលអស់ស្តុក ក្នុងអំឡុងពេលផលរំខានពីការផ្គត់ផ្គង់ប្រេងឥន្ធនៈ និងឧស្ម័នជាសកល ដោយសារសង្គ្រាមនៅមជ្ឈឹមបូព៌ា។ ក្រសួងអះអាងថា ក្នុងករណីនេះ មន្រ្តីជំនាញរបស់ក្រសួងនឹងចុះត្រួតពិនិត្យស្វែករកការពិត ហើយប្រសិនបើរកឃើញថា មិនអស់ស្តុកដូចការលើកឡើងពួកគេនឹងរងការពិន័យជាប្រាក់ ឬឈានដល់ដកអាជ្ញាបណ្ណអាជីវកម្មជាបណ្តោះអាសន្ន។លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានថ្លែងថា ក្រុមមន្រ្តីជំនាញចម្រុះអន្តរក្រសួងនឹងចុះត្រួតពិនិត្យមើលស្ថានភាពជាក់ស្តែងចំពោះស្ថានីយ៍ប្រេងឥន្ធនៈ ដែលបានបិទអាជីវកម្ម ក្រោយហេតុផលស្តុក ការផ្គត់ផ្គង់ ក្នុងប្រតិបត្តិការអាជីវកម្ម។ មន្ត្រីជំនាញចុះពិនិត្យនេះ បន្ទាប់ពីមានស្ថានីយប្រតិបត្តិការលក់រាយប្រេងឥន្ធនៈ ជិត២.០០០ កន្លែង បានបិទទ្វារបណ្ដោះអាសន្ន ក្រោមហេតុផលអស់ស្តុក។ថ្លែងបទអន្តរាគមន៍ក្នុងសិក្ខាសាលាស្តីពី«ការពង្រឹងភាពធន់ជាតិ និងកាលានុវត្តភាពនៃយុទ្ធសាស្ត្រ អភិបាលកិច្ច វិទ្យាសាស្ត្រ បច្ចេកវិទ្យា នវានុវត្តន៍ ឧស្សាហកម្ម និងពាណិជ្ជកម្មកម្ពុជា» ដែលរៀបចំឡើង ដោយរដ្ឋសភា នៅថ្ងៃទី១២ ខែមីនា ឆ្នាំ២០២៦ថា កម្ពុជាមានស្ថានីយ៍ប្រេងឥន្ធនៈប្រតិបត្តិការអាជីវកម្មជាង ៦.៣០០កន្លែង។ គិតត្រឹមយប់ថ្ងៃទី១១ ខែមីនានេះ ក្រសួងពាណិជ្ជកម្ម បានរកឃើញ ស្ថានីយ៍ ដេប៉ូ និងអនុស្ថានីយ៍ប្រតិបត្តិការលក់រាយប្រេងឥន្ធនៈជិត ២.០០០ កន្លែង ក្នុងចំណោម ៦.៣០០កន្លែង បានបិទទ្វារបណ្ដោះអាសន្ន ក្រោមហេតុផលអស់ប្រេងពីស្តុក។ រដ្ឋមន្រ្តី បានព្រមានថា ក្នុងករណីក្រសួងរកឃើញមានប្រេងឥន្ធនៈស្តុកទុក មិនបញ្ចេញលក់ឱ្យប្រជាពលរដ្ឋនឹងរងការពិន័យ និងដកអាជ្ញាប័ណ្ណអាជីវកម្មតែម្តង។បើតាម លោកជំទាវ ចម និម្មល បានបង្ហាញក្តីរំពឹងថា តម្លៃប្រេងឥន្ធនៈលក់រាយនៅកម្ពុជា ក្នុងរយៈពេលប៉ុន្មានថ្ងៃខាងមុខនេះ នឹងធ្លាក់ចុះមកវិញ បន្ទាប់ពីមានសញ្ញាណល្អនៃតម្លៃប្រេងអន្តរជាតិធ្លាក់ចុះបន្តិចមកវិញនៅវេលាម៉ោងទៀបភ្លឺថ្ងៃទី១២ ខែមីនា ឆ្នាំ២០២៦។អត្ថបទ៖ ធូ វិរៈ

បណ្ដាញសង្គម

ព័ត៌មានថ្មីៗ

យោធាអាមេរិក៖ នាវាដឹកប្រេងមួយគ្រឿងទៀតដែលមានទំនាក់ទំនងជាមួយអ៊ីរ៉ង់ ត្រូវបានរឹបអូស

ប្រធានផ្នែកមនុស្សធម៌របស់UN៖ ស៊ីរីអាចជាដំណើររឿងជោគជ័យនៃការកសាងឡើងវិញ ក្រោមជំនួយអន្តរជាតិ

រដ្ឋមន្ត្រីការពារជាតិចិននឹងទៅបំពេញទស្សនកិច្ចនៅប្រទេសរុស្ស៊ី និងគៀហ្ស៊ីស៊ីស្ថាន នៅថ្ងៃទី២៣-២៨ ខែមេសា

សេតវិមាន៖ មេដឹកនាំអាមេរិកមិនបានផ្តល់ពេលវេលាច្បាស់លាស់សម្រាប់ការបញ្ចប់បទឈប់បាញ់ជាមួយអ៊ីរ៉ង់ទេ

UN៖ សង្គ្រាមអ៊ីរ៉ង់បានរុញច្រានមនុស្សជាង ៣០លាននាក់ ឲ្យធ្លាក់ចូលទៅក្នុងភាពក្រីក្រ

រាជបុត្ររបស់អតីតព្រះមហាក្សត្រអ៊ីរ៉ង់ បញ្ជាក់ថា ការចរចាជាមួយទីក្រុងតេអេរ៉ង់ គឺជា «ការចុះញ៉ម»

រុស្ស៊ីហៅភាពមិនអាចទាយទុកជាមុនបានថា ជាបញ្ហាចម្បងនៅក្នុងទំនាក់ទំនងជាមួយអាមេរិក

អ៊ីតាលី៖ វិបត្តិថាមពលធ្វើឲ្យផែនការចំណាយលើវិស័យការពារជាតិ ស្ថិតក្នុងភាពមិនប្រាកដប្រជា

លោក Zelenskyy៖ កិច្ចព្រមព្រៀងយានដ្រូន ត្រូវបានចុះហត្ថលេខាជាមួយប្រទេសឈូងសមុទ្រចំនួន៣

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877