BTV NEWS

ព្រះមហាក្សត្របានចេញព្រះរាជក្រម ប្រកាសឲ្យប្រើប្រាស់ច្បាប់ធម្មនុញ្ញ ស្តីពីវិសោធនកម្មមាត្រា៣៣

ក្នុងគោលបំណងមនុស្សធម៌! អាជ្ញាធរកម្ពុជាសម្រេចបើកច្រកទ្វារព្រំដែនអនុញ្ញាតដល់អនុព័ន្ធយោធាថៃប្រចាំនៅភ្នំពេញ និងមនុស្សពីរនាក់ធ្វើដំណើរតាមច្រកទ្វារអន្តរជាតិប៉ោយប៉ែត-ខ្លងលីកទៅព្យាបាលជំងឺនៅខេត្តស្រះកែវ

ចៅក្រមស៊ើបសួរសាលាដំបូងរាជធានីភ្នំពេញសម្រេចឃុំខ្លួនជនត្រូវចោទ៨នាក់ជាបណ្តោះអាសន្នពាក់ព័ន្ធអំពើឆបោកតាមឆបោកតាមប្រព័ន្ធអនឡាញ

ត្រឹមថ្ងៃទី១៩កក្កដា សមត្ថកិច្ចរាជធានី-ខេត្ត បង្រ្កាបករណីឆបោកតាមប្រព័ន្ធបច្ចេកវិទ្យា ៥២ទីតាំង ឃាត់ខ្លួនជនសង្ស័យ ២.៧៦៧ នាក់ មានជនជាតិចិនចំនួន ៨៤៣នាក់

ព័ត៌មានជាតិ

CMACចុះហត្ថលេខាជាមួយJICAនិងJICSដេីម្បីអនុវត្តន៍គម្រោងជំនួយលទ្ធកម្មសម្ភារបច្ចេកទេសបោសសម្អាតមីន

( ភ្នំពេញ)៖ នៅព្រឹកថ្ងៃថ្ងៃទី៦ ខែមិថុនា ឆ្នាំ២០២៥ នៅទីបញ្ជាការស៊ីម៉ាក់ភ្នំពេញ ឯកឧត្តម ហេង រតនា ប្រតិភូរាជរដ្ឋាភិបាល ទទួលបន្ទុកជាអគ្គនាយកមជ្ឍមណ្ឌលសកម្មភាពកម្ចាត់មីនកម្ពុជា ស៊ីម៉ាក់ និងលោក SANUI KAZU MASA ប្រធានទីភ្នាក់ងារសហប្រតិបត្តិការ អន្តរជាតិជប៉ុន (JICA) ប្រចាំនៅកម្ពុជា រួមជាមួយលោក FUJI SAKI Seiyu ប្រធានគម្រោង នៃក្រុមហ៊ុនប្រឹក្សាយោបល់ប្រព័ន្ធសហប្រតិបត្តិការអន្តរជាតិជប៉ុន (JICS) បានចុះហត្ថលេខារួមគ្នាលើកំណត់ហេតុគណៈ កម្មាធិការពិគ្រោះយោបល់នៃគម្រោងកម្មវិធីហិរញ្ញប្ប ទានឥតសំណង របស់រាជរដ្ឋាភិបាលប្រទេសជប៉ុន សម្រាប់កម្មវិធីអភិវឌ្ឍន៍សេដ្ឋកិច្ចនិងសង្គម សម្រាប់ព្រះរាជាណាចក្រកម្ពុជា ដើម្បីអនុវត្តន៍គម្រោងជំនួយលទ្ធកម្មសម្ភារបច្ចេកទេសបោសសម្អាតមីនផ្តល់ជូនអង្គភាព CMAC ដែលជាហិរញ្ញប្បទានឥតសំណងមានទឹកប្រាក់សរុបចំនួន១.១៦៦លានយ៉េន ស្មើនឹងប្រមាណ ៧,៨ លានដុល្លាសហរដ្ឋអាមេរិក។គម្រោងនេះ គឺដើម្បីពង្រឹងសមត្ថភាពអង្គភាពCMAC តាមរយ:ធ្វើទំនើបកម្មសម្ភារបច្ចេកទេស ដោយទិញសម្ភារបច្ចេកទេសរួមមានគ្រឿងចក្រកម្ទេចមីន ឧបករណ៍រាវមីនALIS គ្រឿងយន្តរ៉ូបតជីកកាយមីន រថយន្តពីរបាំង និង រថយន្តBus ព្រមទាំងរថយន្តដឹកគ្រឿចក្រកម្ទេចមីនធុនធ្ងន់ផងដែរ។មានប្រសាសន៍នៅក្នុងពិធិនោះ លោក SANUI KAZUMASA បានកោតសរសើរនូវទំនាក់ទំនងល្អជាយូរអង្វែងក្នុងនាមជាដៃគូ រវាងអង្គភាព ស៊ីម៉ាក់ និងចៃកា ហត្ថលេខារួមគ្នា នៃគម្រោងកម្មវិធីហិរញ្ញប្បទានឥតសំណង របស់រាជរដ្ឋាភិបាលជប៉ុន សម្រាប់កម្មវិធីអភិវឌ្ឍន៍សេដ្ឋកិច្ចនិងសង្គម សម្រាប់ព្រះរាជា ណាចក្រកម្ពុជា ដើម្បីអនុវត្តន៍គម្រោងជំនួយលទ្ធកម្មសម្ភារបច្ចេកទេសបោសសម្អាតមីនផ្តល់ជូនអង្គភាព CMAC ដែលជាផ្នែកថ្មីមួយទៀតនៃកិច្ចសហប្រតិបត្តិការួមគ្នា។ លោក FUJISAKI Seiyu ប្រធានគម្រោង (JICS) បានមានប្រសាសន៍ថា ក្រុមហ៊ុនប្រឹក្សាយោបល់ប្រព័ន្ធសហប្រតិបត្តិការអន្តរជាតិជប៉ុនបានប្តេជ្ញាចិត្ត និងត្រៀមខ្លួនរួចរាល់ក្នុងការដំណើការលទ្ធកម្មសម្ភារបច្ចេក ទេសសម្រាប់អង្គភាពស៊ីម៉ាក់ប្រកបដោយវិជ្ជាជីវៈ។ នៅក្នុងពិធីចុះហត្ថលេខានេះ ឯកឧត្តម ហេង រតនា បញ្ជាក់ថា នេះគឺជាការពន្លឿនទៅមុខនៃកិច្ចសហប្រតិ បត្តិការ ការអភិវឌ្ឍបច្ចេកវិទ្យា និងសម្ភារៈគាំទ្រការ បោសសម្អាតមីន ក៏ដូចជាការបណ្តុះបណ្តាលក្នុងវិស័យសកម្មភាពមីនដល់ប្រទេសដែលរងផលប៉ះពាល់ដោយ សារគ្រាប់មីន/យុទ្ធភណ្ឌមិនទាន់ផ្ទុះដោយប្រើប្រាស់បច្ចេកវិទ្យាថ្មីៗប្រកបដោយប្រសិទ្ធភាព ដែលជាជំនួយរបស់រាជរដ្ឋាភិបាលប្រទេសជប៉ុន សម្រាប់កម្មវិធីអភិវឌ្ឍន៍សេដ្ឋកិច្ចនិងសង្គម៕ (ភារម្យ)

គ្រួសារក្រីក្រ និងងាយរងហានិភ័យជាង ៥ម៉ឺនគ្រួសារនៅខេត្តស្វាយរៀង បានទទួលជំនួយសង្គមក្នុងកញ្ចប់គ្រួសារ

ស្វាយរៀង ៖ លោក ថោង សាមាន ប្រធានមន្ទីរផែនការខេត្តស្វាយរៀង នៅថ្ងៃទី៦ ខែមិថុនា ឆ្នាំ២០២៥នេះ បានថ្លែងប្រាប់ទូរទស្សន៍ btv ឲ្យដឹងថា អនុវត្តគោលនយោបាយរាជរដ្ឋាភិបាល លើកកំពស់ជីវភាព និងសុខមាលភាពជូនពលរដ្ឋ មន្ទីរ និងផ្នែកពាក់ព័ន្ធបានចុះជំរឿន ធ្វើអត្តសញ្ញាណកម្មគ្រួសារក្រីក្រ និងគ្រួសារងាយរងហានីភ័យគិតត្រឹមថ្ងៃទី៣០ ខែឧសភា ឆ្នាំ២០២៥នេះ ដោយបានរកឃើញគ្រួសារក្រីក្រចំនួន ៣ម៉ឺន ២ពាន់ ៥៥៩គ្រួសារ និងគ្រួសារងាយរងហានិភ័យចំនួន១ម៉ឺន ៧ពាន់ ៤៥០គ្រួសារ សរុបរួមគ្រួសារក្រីក្រ និងគ្រួសារងាយរងហានិភ័យមានចំនួន ៥ម៉ឺន ៩គ្រួសារ បើកគិតភាគរយ ស្មើនិង ៣០.០៤%នៃចំនួនគ្រួសារសរុបក្នុងខេត្ត។លោកបានបញ្ជាក់ថា ក្នុងគោលនយោបាយរាជរដ្ឋាភិបាល លើកកំពស់ជីវភាព និងសុមាលភាព គ្រួសារមានប័ណ្ណសមធម៌ ឬប័ណ្ណក្រីក្រ គឺទទួលបញ្ចប់ក្រីក្រ ឯគ្រួសារងាយរងហានិភ័យទទួលបាននូវកញ្ចប់សេវកម្មសុខភាព និងព្យាបាលជំងឺផ្សេងៗដោយឥតគិតលុយ ។តាមរបាយការណ៍របស់មន្ទីរសង្គមកិច្ច អតីតយុទ្ធជន និងយុវនីតិសម្បទាខេត្តស្វាយរៀងដែល btv ទទួលបានតាមសាតេឡេក្រាមបញ្ជាក់ឲ្យដឹងថា អនុវត្តកម្មវិធីជាតិជំនួយសង្គមក្នុងកញ្ចប់គ្រួសារ ដែលរាជរដ្ឋាភិបាលផ្ដល់តាមរយៈមន្ទីរសង្គមកិច្ច រយះពេល៥ខែ ចាប់ពីថ្ងៃទី១០ ខែធ្នូ ឆ្នាំ២០២៤ ដល់ថ្ងៃទី១០ ខែឧសភា ឆ្នាំ២០២៥ មានចំនួន៣ម៉ឺន៨២៩គ្រួសារ ស្មើនិងទឹកប្រាក់ ១១ប៊ីលាន ៧៧៧លាន ៣៨៨ពាន់រៀលគត់ ៕ ដោយ ៖ ភា សារិទ្ធ

ព្រះសង្ឃនិងពលរដ្ឋខេត្តស្វាយរៀងគាំទ្ររាជរដ្ឋាភិបាលប្រើយន្តការICJដើម្បីដោះស្រាយបញ្ហាព្រំដែនជាមួយថៃ

ស្វាយរៀង ៖ ព្រះសង្ឃ និងពលរដ្ឋខេត្តស្វាយរៀង បានសំដែងហឫទ័យ និងទឹកចិត្តគាំទ្រចំពោះរាជរដ្ឋាភិបាល ដាក់ពាក្យបណ្ដឹង ទៅតុលាការអន្តរជាតិ ICJ ដើម្បីឱ្យជួយដោះស្រាយបញ្ហាទំនាស់ព្រំដែនជាមួយប្រទេសថៃ បន្ទាប់ពីកងការឈ្លានពានរបស់ កងទ័ពថៃចូលទឹកដីកម្ពុជា កាលពីចុងខែមុន និងបានបាញ់សម្លាប់ទាហានខ្មែរម្នាក់ផង ។ព្រះសង្ឃ និងពលរដ្ឋនៅក្នុងខេត្តស្វាយរៀង ដែលបានតាមដានរឿងព្រំដែនជាមួយថៃ បានគាំទ្រការប្រើប្រាស់ យន្តការតុលាការអន្តរជាតិ ICJ ដោយយល់ឃើញថា ការចរចារកដំណោះស្រាយជាឯកតោភាគី ពិបាកនឹងឈានដល់ភាព ជោគជ័យ ព្រោះបញ្ហានេះ បានអូសបន្លាយយូរឆ្នាំណាស់មកហើយ ដូច្នេះមានតែតុលាការអន្តរជាតិទេ ទើបអាចវិនិច្ឆ័យ បញ្ហានេះ ដូចជាករណីប្រាសាទព្រះវិហារជាដើម ។ព្រះសង្ឃ និងពលរដ្ឋខេត្តស្វាយរៀង ជឿទុកចិត្តលើការសម្រេចចិត្តរបស់រាជរដ្ឋាភិបាលក្នុងការទទួលយកការ សម្រេចរបស់តុលាការយុត្តិធម៌អន្តរជាតិ និងថ្កោលទោសចំពោះទង្វើដ៏ងងើលរបស់ថៃ ដែលបានបញ្ជូនកងកម្លាំងទ័ពចូល មកឈ្លានពានបង្កអសន្តិសុខលើបូរណភាពរបស់ព្រះរាជាណាចក្រកម្ពុជា ៕ ដោយ ៖ ភា សារិទ្ធ

បទពិសោធ និងអនុសាសន៍របស់កម្ពុជាលើកឡើងក្នុងសន្និសីទពិភពលោកលើប្រធានបទ "បរិវត្តកម្មទេសចរណ៍ និងនិរន្តភាព ត្រូវបានទទួលការសាទរ និងគាំទ្រយកជាគំរូ

សាធារណរដ្ឋកូរ៉េ៖ នាព្រឹកថ្ងៃទី៥ ខែមិថុនា ឆ្នាំ២០២៥ ឯកឧត្តម ហួត ហាក់ រដ្ឋមន្រ្តីក្រសួងទេសចរណ៍ បានអញ្ជើញថ្លែងសុន្ទរកថាគន្លឹះក្នុងសន្និសីទឧស្សាហកម្មទេសចរណ៍ពិភពលោកលើកទី៤ ក្រោមប្រធានបទ "បរិវត្តកម្មទេសចរណ៍ និងនិរន្តភាព (Tourism Transformation & Sustainability)" ដោយមានអ្នកចូលរួមជាថ្នាក់ដឹកនាំ អង្គទូតបរទេសប្រចាំសាធារណរដ្ឋកូរ៉េ អ្នកជំនាញអន្តរជាតិក្នុងវិស័យទេសចរណ៍ និងក្រុមហ៊ុនឯកជនជាច្រើននាក់។ ក្នុងសុន្ទរកថាគន្លឹះ ឯកឧត្តមរដ្ឋមន្រ្តី បានចែករំលែកបទពិសោធនៃការអភិវឌ្ឍវិស័យទេសចរណ៍ ជាពិសេសក្នុងបរិបទដែលកម្ពុជាបានឆ្លងកាត់នូវសម័យកាលដ៏ល្វីងជូរចត់ និងសែនពិបាករហូតដល់បានទទួលនូវសុខសន្តិភាពដ៏ពេញលេញ ដែលកម្ពុជាបានឆ្លុះបញ្ចាំងដល់ពិភពលោកពីតម្លៃមិនអាចកាត់ថ្លៃបាននៃសន្តិភាព និងទំនាក់ទំនងមិនអាចកាត់ផ្តាច់បានរវាងសន្តិភាព និងទេសចរណ៍ ដូចពាក្យស្លោកប្រកបដោយគតិបណ្ឌិតរបស់សម្តេចមហាបវរធិបតី "ទេសចរណ៍រីកលូតលាស់ក្នុងសន្តិភាព"។ ទន្ទឹមនឹងនេះដែរ ឯកឧត្តមរដ្ឋមន្រ្តី ក៏បានគូសបញ្ជាក់ថាការរក្សានូវនិរន្តភាពជារឿងដ៏ពិបាកតែអាចសម្រេចតាមរយៈសកម្មភាពរួមគ្នាជាក់ស្តែងដែលឯកឧត្តមរដ្ឋមន្រ្តីបានលើកជាអនុសាសន៍ចំនួន៤ ដែលឯកឧត្តមរដ្ឋមន្រ្តីបានលើកឡើងក្នុងសុន្ទរកថាគន្លឹះ។ បទពិសោធ និងអនុសាសន៍ដែលបានលើកឡើងដោយឯកឧត្តមរដ្ឋមន្រ្តី ត្រូវបានទទួលការសាទរគំាទ្រ និងត្រូវបានយកជាកម្មវត្ថុនៃគំនិតពិភាក្សាក្នុងសនិ្នសីទកម្រិតអន្តរជាតិដែលគំាទ្រដោយអង្គការសហប្រជាជាតិទេសចរណ៍ (UNWTO)៕

TOP STORY | មន្រ្ដីនាំពាក្យក្រសួងការបរទេសកម្ពុជាទាត់ចោលការចោទប្រកាន់ផ្ទុយពីការពិតថា កងទ័ពព្រំដែនកម្ពុជា បានរំលោភបំពានទៅលើអធិបតេយ្យភាពរបស់ប្រទេសថៃ

ភ្នំពេញ៖ ឯកឧត្តម ជុំ សុន្ទរី អ្នកនាំពាក្យក្រសួងការបរទេស និងសហប្រតិបត្តិការអន្តរជាតិ បានបញ្ជាក់ថាប្រាប់ BTV នៅថ្ងៃទ៦ ខែមិថុនា ឆ្នាំ២០២៥នេះថា ពាក់ព័ន្ធនឹងករណីបាតុកម្មនៅមុខស្ថានទូតព្រះរាជា ណាចក្រកម្ពុជានៅទីក្រុងបាងកក នៅព្រឹកថ្ងៃទី ៦ មិថុនា ២០២៥ នេះ ខ្ញុំសូមប្រកាសទាត់ចោលនូវការចោទប្រកាន់ផ្ទុយពីការពិត ថាកងទ័ពព្រំដែនកម្ពុជា បានរំលោភបំពានទៅលើអធិបតេយ្យភាពរបស់ប្រទេសថៃ ។ឯកឧត្តម ជុំ សុន្ទរី បានបញ្ជាក់ថា ហេតុការណ៍ពិតប្រាកដ គឺនៅព្រលឹមថ្ងៃទី២៨ ខែឧសភា ឆ្នាំ២០២៥ វេលាម៉ោងប្រមាណ ៥ និង ៣០នាទីព្រឹក មានករណីផ្ទុះអាវុធមួយបានកើតឡើងនៅពេលដែលកងកម្លាំងយោធាថៃបានបើកការបាញ់ប្រហារមកលើទីតាំងកងទ័ពកម្ពុជា ក្នុងភូមិតេជោមរកត ឃុំមរកត ស្រុកជាំក្សាន្ត ខេត្តព្រះវិហារ ដែលជាតំបន់ត្រូវបានទទួលស្គាល់ថាជាប៉ុស្តិ៍យោធាកម្ពុជាជាយូរមកហើយ។ ការផ្ទុះអាវុធ នេះ បាន បណ្តាល ឱ្យទាហាន ខ្មែរ ម្នាក់បាត់បង់ជីវិត ។ឯកឧត្តម ជុំ សុន្ទរី បានថ្លែងថា ការវាយប្រហារនេះបានបំពានទៅលើ អធិបតេយ្យភាពរបស់កម្ពុជា ហើយនិង MOU ដែលបានចុះហត្ថលេខារវាងរដ្ឋាភិបាលប្រទេសទាំងពីរក្នុងខែមិថុនាឆ្នាំ២០០០ ដែលមានគោលដៅថែរក្សាសន្តិភាព និងស្ថេរភាពនៅតាមបណ្តោយព្រំដែនប្រទេសទាំងពីរ ពិសេស តំបន់មានទំនាស់ ។ឯកឧត្តមបញ្ជាក់បន្ថែមថកម្ពុជាបានប្រកាន់ខ្ជាប់ជានិច្ចនូវការគោរពអធិបតេយ្យភាពរបស់ប្រទេសជិតខាង និងការប្តេជ្ញាចិត្តក្នុងការប្រែក្លាយព្រំដែនរួម ទៅជាតំបន់សន្តិភាព មិត្តភាព កិច្ចសហប្រតិបត្តិការ និងការអភិវឌ្ឍ។ កម្ពុជាមានការប្តេជ្ញាចិត្តដ៏មោះមុត ដោះស្រាយជម្លោះតាមច្បាប់អន្តរជាតិ និងដោយសន្តិវិធី៕

ឯកឧត្តមបណ្ឌិតសភាចារ្យ ហង់ជួន ណារ៉ុន អញ្ជើញជាអធិបតី បើកវេទិកា “អភិបាលកិច្ច និងរចនាសម្ព័ន្ធស្រាវជ្រាវនៅអាស៊ីលើកទី២”

នាព្រឹកថ្ងៃទី០៦ ខែមិថុនា ឆ្នាំ២០២៥ នៅវិទ្យាស្ថានបច្ចេកវិទ្យាកម្ពុជា ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញជាអធិបតីក្នុងពិធីបើកជាផ្លូវការវេទិកា “អភិបាលកិច្ច និងរចនាសម្ព័ន្ធស្រាវជ្រាវនៅអាស៊ី Gouvernance et Structuration de la Recherche en Asie” លើកទី២។នាឱកាសនេះ ឯកឧត្តមបណ្ឌិតសភាចារ្យឧបនាយករដ្ឋមន្ត្រី បានសម្តែងនូវមោទនភាព និងភាពរីករាយយ៉ាងក្រៃលែងក្នុងការស្វាគមន៍ភ្ញៀវកិត្តិយសទាំងអស់មកកាន់ប្រទេសកម្ពុជា ដែលជាប្រទេសសម្បូរទៅដោយបេតិកភណ្ឌ និងនវានុវត្តន៍។ ក្នុងនាមរាជរដ្ឋាភិបាលកម្ពុជា និងក្រសួងអប់រំ យុវជន និងកីឡា ឯកឧត្តមបណ្ឌិតសភាចារ្យឧបនាយករដ្ឋមន្ត្រី បានថ្លែងអំណរគុណចំពោះទីភ្នាក់ងារសាកលវិទ្យាល័យហ្វ្រង់កូហ្វូនី (AUF) និងបណ្ឌិតសភាអន្តរជាតិហ្វ្រង់កូហ្វូនីវិទ្យាសាស្ត្រ (AIFS) ចំពោះការប្តេជ្ញាចិត្តរបស់ខ្លួនក្នុងការលើកកម្ពស់ការស្រាវជ្រាវបែបពហុភាសា និងបរិយាបន្ននៅទ្វីបអាស៊ី។បន្ថែមពីនេះការជ្រើសរើសកម្ពុជាជាម្ចាស់ផ្ទះសម្រាប់ព្រឹត្តិការណ៍អន្តរជាតិដ៏សំខាន់នេះ ឆ្លុះបញ្ចាំងពីកិច្ចសហប្រតិបត្តិការហ្វ្រង់កូហ្វូនីដ៏រឹងមាំក្នុងការស្រាវជ្រាវ ក៏ដូចជាការកើនឡើងនៃសារៈសំខាន់របស់ទ្វីបអាស៊ីនៅក្នុងនិន្នាការវិទ្យាសាស្ត្រសកល។ គូសបញ្ជាក់ផងដែរថាក្នុងការលើកកម្ពស់ការអភិវឌ្ឍន៍ការស្រាវជ្រាវសាកលវិទ្យាល័យ និងនវានុវត្តន៍នៅក្នុងពិភពហ្វ្រង់កូហ្វូនី ជាពិសេសនៅក្នុងតំបន់អាស៊ីប៉ាស៊ីហ្វិក បានរួមចំណែកយ៉ាងធំធេងដល់ការកែលម្អគុណភាពអប់រំឧត្តមសិក្សានៅក្នុងតំបន់របស់អាស៊ី អាគ្នេយ៍នេះ។ ការរៀបចំវេទិកា “អភិបាលកិច្ច និងរចនាសម្ព័ន្ធស្រាវជ្រាវនៅអាស៊ីលើកទី២” នេះនៅរាជធានីភ្នំពេញ គឺស្របតាមបរិបទតំបន់ដែលកំពុងរីកចម្រើនយ៉ាងឆាប់រហ័ស ដែលត្រូវបានកំណត់ដោយការវិនិយោគកាន់តែខ្លាំងឡើង ក្នុងការស្រាវជ្រាវ និងនវានុវត្តន៍។ ប្រទេសនានាដូចជា វៀតណាម ថៃ ម៉ាឡេស៊ី ឥណ្ឌូនេស៊ី និងឡាវ បានវិនិយោគក្នុងការបង្កើនសក្តានុពលវិទ្យាសាស្ត្ររបស់ពួកគេ ដើម្បីដោះស្រាយបញ្ហាប្រឈមធំៗនាពេលបច្ចុប្បន្ន ដូចជាសុខភាពសាធារណៈ ការផ្លាស់ប្តូរឌីជីថល ការអភិវឌ្ឍប្រកបដោយចីរភាព និងការសម្របខ្លួនទៅនឹងការប្រែប្រួលអាកាសធាតុ។ លើសពីនេះ ការរៀបចំព្រឹត្តិការណ៍នេះនៅវិទ្យាស្ថានបច្ចេកវិទ្យាកម្ពុជា (ITC) បង្ហាញពីការទទួលស្គាល់កាន់តែខ្លាំងឡើងនៃប្រទេសកម្ពុជាក្នុងបរិបទវិទ្យាសាស្ត្រក្នុងតំបន់ ក៏ដូចជាបំណងប្រាថ្នារបស់យើងក្នុងការចូលរួមយ៉ាងសកម្មក្នុងការបង្កើតការស្រាវជ្រាវប្រទេសកម្ពុជាក្រោមការដឹកនាំដោយសម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី បានកំណត់ការស្រាវជ្រាវជាមូលដ្ឋានគ្រឹះនៃការអភិវឌ្ឍរបស់ខ្លួន ក្នុងហេតុផលនេះ ជាដំបូង រាជរដ្ឋាភិបាលកម្ពុជាគាំទ្រការបង្កើតមជ្ឈមណ្ឌលឧត្តមភាពផ្នែកវិទ្យាសាស្ត្រសង្គម និងបច្ចេកវិទ្យាបៃតង ហើយរាជរដ្ឋាភិបាលគាំទ្រដល់កិច្ចសហការក្នុងតំបន់ ក៏ដូចជា ជាមួយបណ្តាញសាកលវិទ្យាល័យអាស៊ាន ដើម្បីចែករំលែកធនធានគ្នាទៅវិញទៅមក។ឯកឧត្តមបណ្ឌិតសភាចារ្យឧបនាយករដ្ឋមន្ត្រី សង្ឃឹមជឿជាក់ថា ការពិភាក្សាក្នុងលើវេទិកាថ្ងៃនេះ ដែលនឹងផ្តោតលើការវាយតម្លៃពហុនិយម និងអន្តរភាវូបនីយកម្មប្រកបដោយសមធម៌ មានសារៈសំខាន់ដើម្បីសម្រេចបាននូវការកែសម្រួលលក្ខណៈវិនិច្ឆ័យសម្រាប់ការរីកចម្រើន ដើម្បីផ្តល់តម្លៃដល់ស្នាដៃជាភាសាមូលដ្ឋាន និងកិច្ចសហការជាមួយភាគីពាក់ព័ន្ធក្នុងស្រុក (អង្គការក្រៅរដ្ឋាភិបាល ក្រុមហ៊ុន ជាដើម) ។ជាថ្មីម្តងទៀតតាងនាម រាជរដ្ឋាភិបាលកម្ពុជា និងក្រសួងអប់រំយុវជន និងកីឡា ឯកឧត្តមបណ្ឌិតសភាចារ្យឧបនាយករដ្ឋមន្ត្រី ក៏បានលើកទឹកចិត្តអ្នកចូលរួមនិងប្រែក្លាយវេទិកាថ្ងៃនេះទៅជាវេទិកាមួយសម្រាប់កិច្ចសន្ទនាប្រកបដោយការយកចិត្តទុកដាក់ និងតម្លាភាព ដែលជាពេលវេលាសម្រាប់ការបង្កើតដំណោះស្រាយសមស្របទៅនឹងបរិបទអាស៊ីរបស់យើង ៕

TOP STORY | ប្រមុខការពារជាតិកម្ពុជាបដិសេធចំពោះថៃដែលស្នើឲ្យកម្ពុជាដកកងទ័ពចេញពីទីតាំងតំបន់មុំបី

នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា បានបដិសេធចំពោះ រដ្ឋមន្រ្តីការពារជាតិថៃ ដែលបានស្នើឲ្យកម្ពុជាដកកងទ័ពរបស់ខ្លួននៅតំបន់មុំបី ដោយមិនព្រមដកពីព្រោះទីតាំងខាងលើជាទីតាំងស្ថិតក្នុងដែនអធិបតេយ្យភាពរបស់កម្ពុជា។ នេះបើតាមផេកហ្វេសបុកផ្លូវការរបស់នាយឧត្តមសេនីយ៍ ទៀ សីហា ដែលបានបង្ហោះនាថ្ងៃទី៦ ខែមិថុនា ឆ្នាំ២០២៥នេះ។តាមរយៈផេកហ្វេសបុកនេះនាយឧត្តមសេនីយ៍ ទៀ សីហា បានឲ្យដឹងថា នៅរសៀលថ្ងៃទី៥ ខែមិថុនា ឆ្នាំ២០២៥ ខ្ញុំបានជួបពិភាក្សាជាមួយឯកឧត្តម PHUMTHAM WECHAYACHAI ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិថៃ អំពីភាពតានតឹងតាមព្រំដែន ដែលបានប្រព្រឹត្តិទៅស្រុកអារញ្ញប្រថេត ខេត្តស្រះកែវ ព្រះរាជាណាចក្រថៃ។នាយឧត្តមសេនីយ៍ទៀ សីហា បានបញ្ជាក់ថា«ចំនុចភាគីថៃ បានស្នើសុំឲ្យកម្ពុជាដកកងទ័ពចេញពីទីតាំងឈរជើងនៅតំបន់មុំបីដែលប្រយុទ្ធគ្នាកាលពីថ្ងៃទី២៨ ឧសភាកន្លងទៅភាគីកម្ពុជា បដិសេធមិនទទួលយកការស្នើសុំនោះទេ ព្រោះទីតាំងខាងលើ ជាទីតាំងស្ថិតក្នុងដែនអធិបតេយ្យភាពរបស់កម្ពុជា ដែលបានឈរជើងជាអចិន្ត្រៃយ៍តាំងពីដើមរៀងមក។ ភាគីកម្ពុជា មិនអាចថយពីទីតាំងដែលកងទ័ពកម្ពុជាបានឈរជើងជាយូរណាស់មកហើយ និងដែលស្ថិតក្នុងដែនអធិបតេយ្យភាពរបស់កម្ពុជា បានឡើយ»។ នៅក្នុងផេកហ្វេសបុកនាយឧត្តមសេនីយ៍ ទៀ សីហា បានលើកឡើងទៀតថា ក្នុងកិច្ចជំនួបនោះភាគីទាំងពីរបានឯកភាពកាត់បន្ថយភាពតានតឹង ដោយភាគី បានរក្សាការប្រាស្រ័យទាក់ទងគ្នាទៅវិញទៅមក ការយោគយល់គ្នា និងរក្សាការសន្ទនាដោយសន្តិវិធីទៅថ្ងៃខាងមុខទៀត ក្នុងគោលបំណងចៀសវាងការប៉ះទង្គិចយោធាគ្នាកម្ពុជា-ថៃផងដែរ។តាមប្រភពដដែល នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិ កម្ពុជា បានបញ្ជាក់ទៀតថា ដរាបណាភាគីថៃ នៅប្រើផែនទីខុសគ្នា មាត្រដ្ឋានខុសគ្នា នោះយើងនឹងមិនអាចរកចំនុចកណ្តាលក្នុងការថែរក្សាស្ថិរភាពព្រំដែនបានឡើយ។ ឯកឧត្តមបានបន្ថែមទៀតថា ភាគីកម្ពុជា នៅតែប្រកាន់ស្មារតី នៃការគោរពអនុស្សរណៈនៃការយោគយល់គ្នា ឆ្នាំ២០០០ (MOU 2000) ដូចដែលមានកន្លងមក។ ហេតុនេះហើយបានជាភាគីកម្ពុជា សម្រេចចិត្តរៀបចំសំណុំរឿងបញ្ជូនវិវាទតំបន់ទាំង៤ (តំបន់មុំបី ប្រាសាទតាមាន់ធំ ប្រាសាទតាមាន់តូច និងប្រាសាទតាក្របី) ទៅតុលាការយុត្តិធម៌អន្តរជាតិ(ICJ) នៅទីក្រុងឡាអេ ដើម្បីបញ្ចប់ជម្លោះ និងកំណត់ព្រំដែនជាក់លាក់។ យ៉ាងណាក៏ដោយប្រមុខការពារជាតិកម្ពុជា នៅតែបង្ហាញជំហដដែលថា កម្ពុជាមានបំណងទទួលយកតែសន្តិភាព ស្ថិរភាព និងតំកល់ប្រយោជន៍ប្រជាជនយើងទាំងសងខាងជាធំ។ ក្នុងនោះភាគីថៃ ក៏បានបង្ហាញពីការគោរពសិទ្ធិកម្ពុជាក្នុងការដាក់ចំនុចទាំង៤ ទៅតុលាការយុត្តិធម៌អន្តរជាតិ(ICJ) ។ យើងក៏បានឯកភាពគ្នាក្នុងការបន្តយន្តការចរចាក្នុងកិច្ចប្រជុំគណៈកម្មាធិការព្រំដែនទូទៅGENERAL BORDER COMMITTEE (GBC) ,គណៈកម្មការព្រំដែនចំរុះ JOIN BORDER COMMISSION(JBC) និងគណៈកម្មាធិការព្រំដែនតំបន់ REGIONAL BORDER COMMITTEE(RBC)ទៅលើចំនុចដទៃៗទៀតនាថ្ងៃខាងមុខ។ បើតាមការអះអាងរបស់ប្រមុខការពារជាតិកម្ពុជា បានឲ្យដឹងទៀតថា ភាគីថៃក៏បានបញ្ជាក់ និងច្រានចោលរាល់ព័ត៌មានអុចអាល និងរុញស្ថានការណ៍ ដែលបាននឹងធ្វើឲ្យប៉ះពាល់សន្តិអារម្មណ៍កងទ័ពយើងទាំងពីរ និងប្រជាជនយើងទាំងពីរ ដូចជាការលើកឡើងពីការបិទច្រកព្រំដែនអន្តរជាតិ, ការលុបកិច្ចប្រជុំJBC និងព័ត៌មានផ្សេងៗទៀតក្រៅផ្លូវការផងដែរ៕ អត្ថបទ៖បាន ចក់

ព្រឹកស្អែក សម្តេចធិបតីនឹងអញ្ជើញសម្ពោធដាក់ឱ្យប្រើប្រាស់ជាផ្លូវការ អគារសិក្សា អគារទីចាត់ការ និងអគារស្នាក់នៅរបស់វិស័យអប់រំ ក្នុងខេត្តរតនគិរី

ភ្នំពេញ៖ នៅព្រឹកថ្ងៃទី៧ ខែមិថុនា ឆ្នាំ២០២៥ ស្អែកនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នឹងអញ្ជើញជាអធិបតីដ៏ខ្ពង់ខ្ពស់ ក្នុងពិធីសម្ពោធដាក់ឱ្យប្រើប្រាស់ជាផ្លូវការ អគារសិក្សា អគារទីចាត់ការ និងអគារស្នាក់នៅរបស់វិស័យអប់រំក្នុងខេត្តរតនគិរី។ យោងតាមរបាយការណ៍របស់ ឯកឧត្តម ញ៉ែម សំអឿន អភិបាលនៃគណៈអភិបាលខេត្តរតនគិរី បានឱ្យដឹងថា នៅក្នុងខេត្តរតនគិរី មានសន្តិសុខល្អប្រសើរ ទាំងសន្តិសុខសង្គម និង សន្តិសុខនយោបាយ។ គណៈបញ្ជាការឯកភាពរដ្ឋបាលខេត្ត បានយកចិត្តទុកដាក់ជាប្រចាំធ្វើឱ្យបទល្មើសគ្រប់ប្រភេទយើងអាចគ្រប់គ្រងបាន ជាពិសេសគ្រឿងញៀន ក្មេងទំនើងត្រូវបានចាត់វិធានការយ៉ាងតឹងរឹងបំផុតតាមអនុសាសន៍ដឹកនាំដ៏ខ្ពង់ខ្ពស់ របស់ សម្តេចមហាបវរធិបតីនាយករដ្ឋមន្ត្រី នៃព្រះរាជាណាចក្រកម្ពុជា។ក្រោមការដឹកនាំដ៏ប៉ិនប្រសប់ ឈ្លាសវៃ និងស្វាហាប់ ប្រកបដោយចក្ខុវិស័យរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និង ដោយមានការឧបត្ថម្ភគាំទ្រ ចង្អុលបង្ហាញពី ឯកឧត្តម ដៀង អំ ប្រធានក្រុមការងារ ចុះមូលដ្ឋានខេត្ត គួបផ្សំនឹងការខិតខំប្រឹងប្រែងយកចិត្តទុកដាក់ច្នៃប្រឌិតខ្ពស់ របស់ រដ្ឋបាលខេត្ត ធ្វើឱ្យខេត្តរតនគិរីមានការរីកចម្រើន និងប្រែមុខមាត់យ៉ាងឆាប់រហ័ស។ លទ្ធផលសំខាន់ៗ នៃការអភិវឌ្ឍដែលសម្រេចបានមានដូចជា៖ការសាងសង់វិមានឯករាជ្យ ដែលផ្ទៃបាតមានអង្កត់ផ្ចិត ៥៨ ម៉ែត្រ និងកម្ពស់ ២៤ ម៉ែត្រ សម្រេចបាន៨០%, ការសាងសង់ផ្លូវបេតុង និងផ្លូវកៅស៊ូ នៅជុំវិញបឹងកន្សែង, ការ សាងសង់អគារមន្ទីរសុខាភិបាលខេត្ត នៅក្នុងបរិវេណអតីតព្រលានយន្តហោះខេត្ត ដែល ជាអំណោយដ៏ថ្លៃថ្លារបស់សម្តេចមហាបវរធិបតីនាយករដ្ឋមន្ត្រី ក្នុងទឹកប្រាក់ជាង ៣លាន ដុល្លាសហរដ្ឋអាមេរិច, ការកសាងរូបសំណាកគ្រួសារដំរី រូបសំណាកសត្វអក, ការសាង សង់អាស្រមលោកតា ប៊ូ ជួង លោកតា ខាំឡែន, បន្តសាងសង់បណ្ណាល័យសាធារណៈ នៅបរិវេណណបឹងកន្សែង ដែលជាអំណោយឧបត្ថម្ភដ៏ថ្លៃថ្លារបស់សម្តេចមហាបវរធិបតី នាយករដ្ឋមន្ត្រី និងសម្តេចអគ្គមហាសេនាបតីតេជោ ប្រធានព្រឹទ្ធសភា និងការតម្លើង ទូរទស្សន៍ LED ទំហំ ៥ម៉ែត្រ x ៨ម៉ែត្រ នៅបរិវេណនៅបឹងកន្សែង ដើម្បីចាក់ផ្សាយ ព្រឹត្តិការណ៍ផ្សេងៗរបស់ថ្នាក់ដឹកនាំ នាពេលនេះដែរ ខ្ញុំបាទសូមគោរពរាយការណ៍បន្ថែម ជូនសម្តេចមហាបវរធិបតី ចំពោះគម្រោងដែលកំពុងដំណើរការសិក្សា និងសាងសង់ រួមមាន ផ្លូវក្រវ៉ាត់ព្រំដែន, អាកាសយានដ្ឋានលំផាត់ស្ថិតក្នុងភូមិសាស្ត្រស្រុកលំផាត់ លើផ្ទៃដី ១.៩០៥ហិកតា, គម្រោងវិនិយោគវារីអគ្គីសនីស្រែពកក្រោម៣ និងស្ថានីយ៍ ថាមពលដើរដោយពន្លឺព្រះអាទិត្យ ដែលមានសមត្ថភាពផលិតថាមពលសរុប ៨០០ មេហ្គាវ៉ាត់, ការកសាងហេដ្ឋារចនាសម្ព័ន្ធច្រកទ្វារព្រំដែនអន្តរជាតិអូរយ៉ាដាវ និងការបង្កើត ច្រកទ្វារព្រំដែនជាមួយខេត្តអត្ថពី នៃសាធារណរដ្ឋប្រជាធិបតេយ្យប្រជាមានិតឡាវ និងច្រកទ្វារព្រំដែនជាមួយខេត្តកន្ទុម នៃសាធារណរដ្ឋសង្គមនិយមវៀតណាម, គម្រោងសាងសង់អគារសាលាខេត្តថ្មី ដែលស្ថិតនៅបរិវេណអតីតព្រលានយន្តហោះ ខេត្ត, គម្រោងពង្រឹងផ្លូវជាតិលេខ៧៨ និងបច្ចុប្បន្នរដ្ឋបាលខេត្តកំពុងអនុវត្តយ៉ាង សកម្មនូវកម្មវិធីពិសេសជំរុញការវិនិយោគខេត្តភូមិភាគឦសាន ដោយបានពិនិត្យ ផ្ទៀងផ្ទាត់ និងធ្វើបច្ចុប្បន្នភាព ទិន្នន័យ សក្តានុពល ផ្ទៃដីកសិកម្ម កសិ-ឧស្សាហកម្ម និងទេសចរណ៍ ដើម្បីបង្កលក្ខណៈងាយស្រួលដល់អ្នកវិនិយោគ និងដើម្បីឆ្លើយតបចំពោះ កម្មវិធីពិសេសជំរុញការវិនិយោគខេត្តទាំងបួន ភូមិភាគឦសាន (២០២៥-២០២៨) របស់ រាជរដ្ឋាភិបាលឱ្យសម្រេចបានប្រសិទ្ធផល និងមានប្រសិទ្ធភាពខ្ពស់។ខេត្តរតនគិរីមានក្រុមហ៊ុនសម្បទានដីសេដ្ឋកិច្ចសរុបចំនួន ២៧ ក្រុមហ៊ុន ក្នុងនោះវិនិយោគដោយក្រុមហ៊ុនវៀតណាមចំនួន ១៣ ចិន ៣ ឥណ្ឌា ១ និងក្រុមហ៊ុនក្នុងស្រុកចំនួន១០។ វិស័យកសិកម្ម៖ ខេត្តមានដំណាំកៅស៊ូ ៧០.៩៩៦ ហិកតា, ដំណាំស្វាយចន្ទី ៩៨.៤៣៦ហិកតា, ដំណាំដំឡូងមី ១៨.៣០៨ហិកតា, ដំណាំធុរេន ជាង ១.២០០ ហិកតា, ដំណាំចេកអំបូងលឿង ជាង ៤.០០០ហិកតា និងមានកសិដ្ឋានចិញ្ចឹមគោ ចំនួន២៨.៦៤២ក្បាល។ វិស័យសុខាភិបាល៖ នៅក្នុងខេត្តមានស្រុកប្រតិបត្តិចំនួន ២កន្លែង មន្ទីរពេទ្យ បង្អែកចំនួន២ គឹមន្ទីរពេទ្យបង្អែកខេត្ត និងមន្ទីរពេទ្យបង្អែកបរកែវ មានគ្រែសម្រាក ២៩៣គ្រែ មណ្ឌលសុខភាព ៣០មណ្ឌល (មានគ្រែចំនួន៧មណ្ឌលសុខភាពជាអតីត ពេទ្យស្រុក អត់គ្រែ២៣មណ្ឌលសុខភាព) ប៉ុស្តិ៍សុខភាពចំនួន៦ និងសេវាឯកជនសរុប ចំនួន ៣០២ទីតាំង។ វិស័យទេសចរណ៍ ក្នុងខេត្តមានរមណីដ្ឋាន និងតំបន់ទេសចរណ៍ជាច្រើនសម្រាប់ បម្រើសេវាកម្ម ការកម្សាន្ត និងសម្រាកលំហែរបស់ភ្ញៀវទេសចរជាតិ និងអន្តរជាតិ មាន ដូចជារមណីដ្ឋានបឹងកន្សែង, បឹងយក្សឡោម, បឹងលម្អដ, បឹងយក្សម៉ាយ, ទឹកធ្លាក់ កាចាញ, ទឹកធ្លាក់កាទៀង, ទឹកធ្លាក់ចាអ៊ុង, ទឹកធ្លាក់អូរស៊ិនលែ និងរមណីដ្ឋានផ្សេងៗជា ច្រើនទៀត។ ជាមួយគ្នានេះ ដើម្បីបង្កើនការចាប់អារម្មណ៍ពីភ្ញៀវទេសចរ រដ្ឋបាលខេត្ត បានតុបតែងភ្លើងលម្អ និងបានបំពាក់បន្ថែមបង្គោលភ្លើងបំភ្លឺនៅតាមដងផ្លូវក្នុងក្រុង បានលុង កាន់តែលើកកម្ពស់សោភ័ណភាព និងសុវត្ថិភាពនាពេលរាត្រី។វិស័យការងារបណ្តុះបណ្តាលវិជ្ជាជីវៈ៖ ក្នុងខេត្តមានសហគ្រាស គ្រឹះស្ថាន សរុប ចំនួន ៣០៦ សហគ្រាស មានកម្មករនិយោជិតសរុប ១៦.៥៦៨នាក់ សហគ្រាស គ្រឹះស្ថានចូលប្រើប្រាស់សេវាតាមប្រព័ន្ធ LACMS មានចំនួន ១៦៥សហគ្រាស និងមាន តម្រូវការកំលាំងពលកម្មចំនួន ២.៩០០នាក់។ វិស័យឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍៖ ខេត្តមានរោងចក្រ ចំនួន៧ ក្នុងនោះរោងចក្រកែច្នៃជ័រកៅស៊ូចំនួន៣ រោងចក្រវេចខ្ចប់ចេកចំនួន២ រោងចក្រ កែច្នៃជ័រកៅស៊ូ-ផ្លែឈើ ចំនួន១ និងរោងចក្រកែច្នៃដំឡូងមីចំនួន១ មានកម្មករសរុប ចំនួន១.២៦០នាក់។ សហគ្រាសធុនតូច និងមធ្យម និងសិប្បកម្មមានចំនួន ៣២៩ មូលដ្ឋាន មានកម្មករសរុបចំនួន ១.៥៩៩នាក់។ វិស័យអប់រំ យុវជន និងកីឡា៖ រដ្ឋបាលខេត្ត បានសហការជាមួយមន្ទីរអប់រំ យុវជន និងកីឡា ដៃគូអភិវឌ្ឍ សប្បុរសជន និងអាជ្ញាធរមូលដ្ឋាន ដោយបានខិតខំ សាងសង់ ជួសជុលអគារសិក្សា និងបើកថ្នាក់រៀននៅតាមភូមិដាច់ស្រយាល តំបន់ជួប ការលំបាក ក្នុងគោលបំណងបង្ខិតសេវាអប់រំ ឱ្យនៅជិតលំនៅដ្ឋានរបស់ប្រជាពលរដ្ឋ តាមតែអាចធ្វើទៅបាន។ទូទាំងខេត្ត មានមត្តេយ្យសិក្សាគ្រប់រូបភាពចំនួន ២២៨ កន្លែង, បឋមសិក្សា ចំនួន ២៣៨. អនុវិទ្យាល័យចំនួន ២២. វិទ្យាល័យចំនួន ១៨ និងសាលាឯកជនចំនួន ៥០៦កន្លែង។ ចំនួនសិស្សសរុប ៦៣.៥២៣នាក់ ស្រី ៣១.០២២នាក់ ក្នុងនោះសិស្ស ជនជាតិដើមភាគតិច ២៧.៤៧៣នាក់ ស្រី ១៣.៤៧៨នាក់ និងបុគ្គលិកអប់រំសរុប ចំនួន ១.៧១៩នាក់ ស្រី ៧៧៩នាក់។ ខេត្តបានរៀបចំគាំទ្រសាលារៀនស្តង់ដាគំរូ សាធារណៈចំនួន ៤០កន្លែង ក្នុងនោះ មត្តេយ្យសិក្សា ១កន្លែង បឋមសិក្សា ២៤កន្លែង និងមធ្យមសិក្សា១៥កន្លែង ព្រមទាំងរៀបចំគាំទ្រការផ្តល់សេវាសាធារណៈគំរូក្នុងវិស័យ អប់រំចំនួន ៣កន្លែងគឺ មត្តេយ្យសិក្សា ១កន្លែង និងវិទ្យាល័យ ២កន្លែង។អប់រំក្រៅប្រព័ន្ធ៖ ខេត្តបានអនុវត្តកម្មវិធីអក្ខរកម្មវិជ្ជាជីវៈ, កម្មវិធីក្រោយអក្ខរកម្ម, មជ្ឈមណ្ឌលសិក្សាសហគមន៍, កម្មវិធីចូលរៀនឡើងវិញ, កម្មវិធីសមមូល(បំពេញវិជ្ជា) ដែលមានសិស្សសរុប ១.៧៩៦នាក់ ស្រី ៩៤៣នាក់។ ការងារយុវជន៖ មានក្រុមប្រឹក្សាកុមារ, ក្រុមប្រឹក្សាយុវជនកាយរឹទ្ធជាតិកម្ពុជា សមាជិកភ្លេងកាយរឹទ្ធ និងយុវជនកាកបាទក្រហមកម្ពុជា សរុបចំនួន ៣៣.៣៩៤នាក់។ ក្រៅពីនេះកាយរឹទ្ធជាតិកម្ពុជាខេត្តមានសមាជិកចំនួន ៨៤០នាក់, សមាជិកភ្លេងកាយរឹទ្ធ ចំនួន ១០០នាក់, ឧបករណ៍ភ្លេងកាយរឹទ្ធមានចំនួន ១០៨គ្រឿង, យុវជនកាកបាទ ក្រហមកម្ពុជាចំនួន ៦២០នាក់។គិតមកទល់ពេលនេះ សំណង់អគារសិក្សាជាអំណោយដ៏ថ្លៃថ្លារបស់ សម្តេចអគ្គ មហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា មាន ចំនួន ៤៨ ខ្នង ស្មើនឹង ៣០២បន្ទប់ រួមទាំងហេដ្ឋារចនាសម្ព័ន្ធអប់រំផ្សេងៗទៀត។ សំណង់ហេដ្ឋារចនាសម្ព័ន្ធអប់រំដែលមិនទាន់បានធ្វើពិធីសម្ពោធមាន ២៦កន្លែង និង ខ្លោងទ្វារចំនួន ៤កន្លែង រួមមាន៖ អគារសិក្សា ចំនួន ១៤កន្លែង ស្មើនឹង ១១០បន្ទប់, អាគារទីចាត់ការ ចំនួន ៨កន្លែង ស្មើនឹង ៣២បន្ទប់, អគារសយនដ្ឋាន ចំនួន ៥កន្លែង ស្មើនឹង ៩១បន្ទប់, អគារពិសោធន៍ ចំនួន ១កន្លែង ស្មើនឹង ៥បន្ទប់។ ភាពជោគជ័យ៖ ការប្រឡងសញ្ញាបត្រមធ្យមសិក្សាទុតិយភូមិរយៈពេល៥ឆ្នាំ ចុង ក្រោយ យើងទទួលបានលទ្ធផល ដូចខាងក្រោម៖ និទ្ទេស A ចំនួន ៣២នាក់និទ្ទេស B ចំនួន ២១០នាក់ និទ្ទេស C ចំនួន ៨៣៤នាក់ និទ្ទេស D ចំនួន ១.៨៨២នាក់ និទ្ទេស E ចំនួន ១.៩២៧នាក់។ សិស្សប្រលងជាប់សរុប ៤.១៨៣នាក់ ក្នុងនោះសិស្សជាជនជាតិដើមភាគតិច ចំនួន ២.០០១នាក់។ បើធៀបនឹង ៥ឆ្នាំមុនមានសិស្សប្រឡងជាប់ត្រឹមតែ ៥១៨នាក់។ គ្រឹះស្ថានសិក្សាសាធារណៈ និងឯកជនះ បើធៀប៥ឆ្នាំមុនកើនឡើង ៨២ សាលា ចំនួនសិស្សកើនឡើង ៤.១៧០នាក់ ស្រី១.៩៨១នាក់។ជាមួយគ្នានេះ វិស័យផ្សេងៗទៀតក៏មានដំណើរការយ៉ាងល្អ ធានាចូលរួមអនុវត្ត យុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល សំដៅរួមចំណែកអនុវត្ត ឱ្យបានជោគជ័យនូវចក្ខុវិស័យ «កម្ពុជាជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០ និងជាប្រទេសមានចំណូលខ្ពស់នៅឆ្នាំ២០៥០៕

ឯកអគ្គរដ្ឋទូតបារាំងប្រចាំកម្ពុជាកោតសរសើរចំពោះរចនាបថ និងសមត្ថភាពព្រលានយន្តហោះអន្តរជាតិតេជោ

ឯកអគ្គរដ្ឋទូតនៃស្ថានទូតបារាំងប្រចាំកម្ពុជា បានសម្តែងការកោតសរសើរ និងមិននឹកស្មានដល់ថាកម្ពុជាអាចកសាងព្រលានយន្តហោះថ្មីនេះយ៉ាងអស្ចារ្យ ហើយឯកឧត្តមសង្ឃឹមថា កម្ពុជានឹងអាចទាក់ទាញក្រុមហ៊ុនវិនិយោគបារាំងមកកាន់តែច្រើនបន្ថែមទៀតដើម្បីវិនិយោគទាំងជាមួយព្រលានផង និងប្រទេសកម្ពុជាផង។ឯកឧត្តម Jacques Pellet ឯកអគ្គរដ្ឋទូត នៃស្ថានទូតបារាំងប្រចាំនៅកម្ពុជា បានឱ្យដឹងយ៉ាងដូច្នេះ ក្នុងឱកាសឯកឧត្តមបានដឹកនាំគណៈប្រតិភូ និងក្រុមហ៊ុនឯកជនមកពីវិស័យសណ្ឋាគារ ភោជនីយដ្ឋាន និងទេសចរណ៍ប្រមាណជា៦០នាក់ ទស្សនកិច្ចពីវឌ្ឍនភាពនៃដំណើរការសាងសង់ព្រលានយន្តហោះអន្តរជាតិតេជោ កាលពីព្រឹកថ្ងៃទី៦ ខែមិថុនា ឆ្នាំ២០២៥នេះ ខណៈគ្រោងដាក់ឲ្យដំណើរការនាខែកញ្ញាខាងមុខ។ បើតាម អ្នកឧកញ៉ា ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន ឯ.ក (CAIC) បានមានប្រសាសន៍ឱ្យដឹងថា ឯកអគ្គរដ្ឋទូតនៃស្ថានទូតបារាំង អញ្ជើញមកពិនិត្យវឌ្ឍនភាពព្រលានយន្តហោះតេជោនាពេលនេះ គឺឯកឧត្តមពិតជារំភើបយ៉ាងខ្លាំង ដោយសារគាត់មិននឹកស្មានដល់ថាព្រលានយន្តហោះនេះសាងសង់ដោយកូនខ្មែរ តែមានគុណភាពខ្ពស់ គួរឱ្យកោតសរសើរ។ អ្នកឧកញ៉ា បានបន្តថា មានក្រុមហ៊ុន និងដែលជាយីហោរ (brand) ល្បីៗរបស់បារាំងជាច្រើនបានត្រៀមបើកដំណើរការនៅក្នុងព្រលានយន្តហោះអន្តរជាតិតេជោនេះផងដែរ។សូមបញ្ជាក់ទៀតថា មន្រ្តីជាន់ខ្ពស់មកពីបណ្តាទូតសំខាន់ៗប្រចាំប្រទេសកម្ពុជាជាច្រើនរូប គណៈប្រតិភូមកពីស្ថាប័នរដ្ឋ និងឯកជន រួមទាំងក្រុមអ្នកសារព័ត៌មានជាតិ និងអន្តរជាតិជាច្រើន បានអញ្ជើញមកទស្សនា និងស្វែងយល់ពីអាកាសយានដ្ឋានអន្តរជាតិតេជោ ដោយមន្រ្តីទូត និងអ្នកសារព័ត៌មានទាំងនោះបានវាយតម្លៃនូវភាពអស្ចាររ្យរបស់្រលានថ្មីនេះផងដែរ។បើតាមអ្នកឧកញ៉ា ក៏បានបញ្ជាក់ឱ្យដឹងផងដែរថា គិតមកដល់ពេលនេះ អាកាសយានដ្ឋានអន្តរជាតិតេជោ សម្រេចការសាងសង់ប្រមាណជាង៩៦% នឹងគ្រោងបើកឱ្យដំណើរការ គឺនៅថ្ងៃទី៩ ខែកញ្ញា និងថ្ងៃសម្ពោធដាក់ឱ្យប្រើប្រាស់ជាផ្លូវការ នៅថ្ងៃទី២០ ខែតុលា ឆ្នាំ២០២៥ខាងមុខ ក្រោមអធិបតីភាពដ៏ខ្ពង់ខ្ពស់របស់ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។ ព្រលានយន្តហោះអន្តរជាតិតេជោថ្មីនេះ សាងសង់ឡើងលើផ្ទៃដីជាង ២ ៦០០ហិចតា ជាព្រលានយន្តហោះលំដាប់ 4F ដែលអាចធ្វើអោយយន្តខ្នាតធំចុះចតបានដូចជា ប្រភេទ Airbus A380 និងប្រភេទ Boeing 747 និងអាចទទួលអ្នកដំណើរបានរហូតដល់ ១៣លាននាក់ ក្នុង១ឆ្នាំ ក្នុងដំណាក់កាលទី១៕ អត្ថបទ៖ ឈិត បូរ៉ាវី

សម្តេចធិបតី និងលោកជំទាវបណ្ឌិតនឹងអញ្ជើញចូលរួមសន្និសីទអង្គការសហប្រជាជាតិ ស្តីពីមហាសមុទ្រ លើកទី៣ នៅទីក្រុងនីស នៅថ្ងៃទី៩-១១ ខែមិថុនា ខាងមុខនេះ

ភ្នំពេញ៖ តបតាមការអញ្ជើញរបស់ ឯកឧត្តម Emmanuel Macron ប្រធានាធិបតីនៃសាធារណរដ្ឋបារាំង និង ឯកឧត្តម António Guterres អគ្គលេខាធិការ អ.ស.ប. សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត នឹងដឹកនាំគណៈប្រតិភូជាន់ខ្ពស់កម្ពុជា អញ្ជើញចូលរួម សន្និសីទ អ.ស.ប. ស្តីពីមហាសមុទ្រ លើកទី៣ (UNOC3) ដែលនឹងប្រព្រឹត្តទៅនៅទីក្រុងនីស ប្រទេសបារាំង នៅថ្ងៃទី៩-១១ ខែមិថុនា ឆ្នាំ២០២៥។ថ្នាក់ដឹកនាំអញ្ជើញអមដំណើរ សម្តេចធិបតី និង លោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត រួមមាន ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ រដ្ឋមន្ត្រី និងមន្ត្រីជាន់ខ្ពស់ផ្សេងទៀតនៃរាជរដ្ឋាភិបាល។ក្នុងឱកាសចូលរួមសន្និសីទ UNOC3 នៅប្រទេសបារាំង ក្រោមប្រធានបទ «ការពន្លឿនសកម្មភាព និងការកៀរគរគ្រប់តួអង្គដើម្បីរក្សា និងប្រើប្រាស់ មហាសមុទ្រប្រកបដោយចីរភាព» សម្តេចធិបតី នឹងធ្វើសេចក្តីថ្លែងការណ៍ជាតិ នៅក្នុងកិច្ចពិភាក្សា ទូទៅដោយគូសបញ្ជាក់ពីចក្ខុវិស័យ ការប្តេជ្ញាចិត្ត និងគំនិតផ្តួចផ្តើមរបស់កម្ពុជាពាក់ព័ន្ធអភិបាល កិច្ចមហាសមុទ្រ ភាពធន់នឹងអាកាសធាតុ និងការអភិវឌ្ឍប្រកបដោយចីរភាព។សម្តេចធិបតី ក៏នឹងមានជំនួបទ្វេភាគីជាមួយថ្នាក់ដឹកនាំនានានៅអំឡុងពេលសន្និសីទ ដើម្បីពង្រឹងទំនាក់ទំនងទ្វេភាគី និងពង្រឹងការប្តេជ្ញាចិត្តរបស់កម្ពុជាចំពោះកិច្ចសហប្រតិបត្តិការពហុភាគី។ ការចូលរួមរបស់កម្ពុជា បញ្ជាក់ពីការយកចិត្តទុកដាក់យ៉ាងមុតមាំចំពោះកិច្ចខិតខំប្រឹងប្រែង ជាសកលក្នុងការដោះស្រាយបញ្ហាប្រឈមទាក់ទងនឹងមហាសមុទ្រ និងការលើកកម្ពស់ការប្រើប្រាស់ប្រកបដោយចីរភាពនៃធនធានមហាសមុទ្រ និងសមុទ្រស្របតាមគោលដៅអភិវឌ្ឍន៍ប្រកបដោយ ចីរភាព ក្នុងគោលដៅទី១៤ (ជីវិតក្រោមទឹក)៕

បណ្ដាញសង្គម

ព័ត៌មានថ្មីៗ

បេសកជនអាមេរិក៖ បទឈប់បាញ់អ៊ីស្រាអែល-ស៊ីរី បានចូលជាធរមាន ខណៈអ្នកស្លាប់កើនឡើងជាង១ពាន់នាក់

NHK៖ ក្រុមចម្រុះដែលកំពុងកាន់អំណាចរបស់ជប៉ុន បាត់បង់ការគ្រប់គ្រងនៅសភាជាន់ខ្ពស់

មនុស្ស ៣នាក់ស្លាប់ និងរាប់រយនាក់បានរួចជីវិត បន្ទាប់ពីឆេះសាឡាងនៅកណ្ដាលសមុទ្រឥណ្ឌូនេស៊ី

ពលរដ្ឋហ្កាហ្សាលើស ៨០នាក់ បានស្លាប់ក្នុងការបាញ់ប្រហារយ៉ាងឃោរឃៅនៅទីតាំងរថយន្តជំនួយ UN

[UPDATE] ចំនួនអ្នកស្លាប់ដោយសារជំនន់ទឹកភ្លៀងនៅកូរ៉េខាងត្បូង កើនឡើងដល់១៧នាក់ និង១១ នាក់បាត់ខ្លួន

វិមានក្រឹមឡាំង៖លោក Putin បើកឱ្យមានសន្តិភាពជាមួយអ៊ុយក្រែនលុះត្រាតែក្រោយពេលគោលដៅយោធារុស្ស៊ីត្រូវបានសម្រេច

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877