BTV NEWS

ប្រាសាទប្រែរូប ស្ថាបត្យកម្មឥដ្ឋដ៏លេចធ្លោសម័យអង្គរ និងការគ្រប់គ្រងបេតិកភណ្ឌ

ផ្លូវថ្មើរជើងចតុមុខបង្កើតឱកាសការងារ និងជំរុញសេដ្ឋកិច្ចមូលដ្ឋានកាន់តែរស់រវើក

សម្ដេចតេជោ បង្ហាញការចាប់អារម្មណ៍ចំពោះលិខិតចំហររបស់លោក Surachart Bamungsuk អ្នកជំនាញផ្នែកសន្តិសុខ និងភូមិសាស្ត្រនយោបាយរបស់ថៃ និងចែករំលែកជូនប្រជាជន កម្ពុជា និងថៃបានជ្រាបបន្ថែម

ក្រសួងការងារបន្តពង្រីកយុទ្ធនាការទប់ស្កាត់ពលកម្មកុមារ និងជំរុញការចុះបញ្ជិកា ប.ស.ស. និងការចុះឈ្មោះក្នុងប្រព័ន្ធស្វ័យប្រវត្តិកម្មទិន្នន័យសហគ្រាស (LACMS) របស់ក្រសួងការងារ ដល់បណ្ដា២៥ រាជធានី-ខេត្ត

ព័ត៌មានជាតិ

ព្រះមហាក្សត្រ៖ កម្ពុជាបន្តគាំទ្រចិនតែមួយ និងសង្ឃឹមថា មិត្តចិននឹងបន្តជួយ ព្រមទាំងផ្ទេរបច្ចេកវិទ្យាថ្មីៗ ដល់កម្ពុជា

ព្រះករុណា ព្រះមហាក្សត្រក្នុងព្រះរាជពិធីលៀងសាយភោជន៍ផ្លូវរដ្ឋជាកិត្តិយសជូនឯកឧត្តម ស៊ី ជីនពីង ប្រធានាធិបតីចិន និងគណៈប្រតិភូ, ព្រះអង្គបានមានព្រះរាជបន្ទូលថា កម្ពុជាបន្តគាំទ្រឥតងាករេចំពោះគោលនយោបាយចិនតែមួយ ហើយសង្ឃឹមថា មិត្តចិននឹងបន្តផ្ដល់ជំនួយសម្រាប់ការអភិវឌ្ឍ ក៏ដូចជាបន្តចែករំលែកបទពិសោធ និងផ្ទេរបច្ចេកវិទ្យាដល់កម្ពុជាបន្ថែមទៀត។ក្នុងព្រះរាជពិធីលៀងសាយភោជន៍ផ្លូវរដ្ឋជាកិត្តិយសជូនឯកឧត្តម ស៊ី ជីនពីង ប្រធានាធិបតី នៃសាធារណរដ្ឋប្រជាមានិតចិន និងគណៈប្រតិភូដែលបំពេញទស្សនកិច្ចផ្លូវរដ្ឋចំនួនពីរថ្ងៃនៅកម្ពុជា ព្រះករុណា ព្រះបាទសម្ដេចព្រះបរមនាថ នរោត្ដម សីហមុនី ព្រះមហាក្សត្រ ព្រះអង្គបានមានព្រះរាជបន្ទូលថា កម្ពុជាបន្តគាំទ្រឥតងាករេចំពោះគោលនយោបាយចិនតែមួយ ហើយសង្ឃឹមថា មិត្តចិននឹងបន្តផ្ដល់ជំនួយសម្រាប់ការអភិវឌ្ឍសេដ្ឋកិច្ចកម្ពុជា ក៏ដូចជាបន្តចែករំលែកបទពិសោធន៍ល្អៗ និងផ្ទេរបច្ចេកវិទ្យាថ្មីៗដល់កម្ពុជាបន្ថែមទៀត។ក្រៅពីមានព្រះរាជបន្ទូលបែបនេះ ព្រះករុណាព្រះមហាក្សត្រ ក៏បានមានព្រះរាជបន្ទូលថ្លែងនូវអំណរគុណចំពោះមិត្តចិនដែលតែងយកចិត្តទុកដាក់ជួយទំនុកបម្រុងដល់កម្ពុជាជានិច្ច ជាពិសេសជំនួយអភិវឌ្ឍ។សូមជម្រាបជូនថា ឯកឧត្តម ស៊ី ជីនពីង ប្រធានរដ្ឋនៃសាធារណរដ្ឋប្រជាមានិតចិនអញ្ជើញមកបំពេញទស្សនកិច្ចផ្លូវរដ្ឋនៅកម្ពុជារយៈពេល ២ ថ្ងៃគឺពីថ្ងៃទី១៧ ដល់ទី១៨ ខែមេសា ឆ្នាំ២០២៥ តបតាមការអញ្ជើញរបស់ព្រះករុណា ព្រះមហាក្សត្រ។ ដំណើរទស្សនកិច្ចនេះបាននាំមកនូវជោគជ័យថ្មីៗថែមទៀតចំពោះទំនាក់ទំនងកិច្ចសហប្រតិបត្តិការលើគ្រប់វិស័យជាពិសេសវិស័យពាណិជ្ជកម្ម វិនិយោគ ការទូត សេដ្ឋកិច្ច-សង្គមវ ប្បធម៌ និងទេសចរណ៍ជាដើម៕ ដោយ៖ គង់ ឌិន

ចិនសន្យានាំចូលកសិផលដែលមានគុណភាពពីកម្ពុជា និងជំរុញអ្នកវិនិយោគបន្ថែម

នៅព្រឹកថ្ងៃទី១៩ ខែមេសា ឆ្នាំ២០២៥នេះ ស្ថានទូតចិនប្រចាំនៅកម្ពុជា បានរៀបចំសន្និសីទសារព័ត៌មាន ដើម្បីបង្ហាញអំពីលទ្ធផលក្រោយដំណើរទស្សនកិច្ចផ្លូវរដ្ឋ របស់ឯកឧត្ដម ស៊ី ជីនពីង ប្រធានាធិបតីសាធារណរដ្ឋប្រជាមានិតចិន នៅកម្ពុជា រយៈពេល២ថ្ងៃកន្លងទៅ កាលពីថ្ងៃទី១៧ ដល់ ១៨ ខែមេសាឆ្នាំ២០២៥។ឯកឧត្តម វ៉ាង វិនពីង ឯកអគ្គរដ្ឋទូតចិនប្រចាំនៅកម្ពុជា បានថ្លែងថា ភាគីទាំងពីរបានបញ្ជាក់ជាថ្មីថា កម្ពុជា ចិន ជាមិត្តដែកថែប ដែលជឿទុកចិត្តគ្នាទៅវិញ ទៅមកនិងគាំទ្រគ្នាគ្រប់កាលៈទេសៈ។ ក្នុងរយៈកាលប៉ុន្មានឆ្នាំចុងក្រោយនេះ ក្រោមការដឹកនាំប្រកបដោយយុទ្ធសាស្រ្តរបស់ឯកឧត្តមប្រធានាធិបតី ស៊ី ជីនពីង និងថ្នាក់ដឹកនាំនៅកម្ពុជា ប្រទេសទាំងបានឯកភាពគ្នាកសាងសហគមន៍វាសនារួម កម្ពុជា ចិន ក្នុងយុគ្គសម័យថ្មី ប្រកបដោយគុណភាពខ្ពស់ កម្រិតខ្ពស់ ស្តង់ដាខ្ពស់ ជាមួយនឹងការបន្តពង្រឹងទំនុកចិត្តជាយុទ្ធសាស្រ្ត កិច្ចសហប្រតិបត្តិការជាផ្លែផ្កាជាក់ស្តែង និងការផ្លាស់ប្តូរប្រជាជន និងប្រជាជនកាន់តែញឹកញាប់ដែលបង្កើតបាននូវគំរូថ្មីនៃទំនាក់ទំនងអន្តរជាតិ និងសហគមន៍វាសនារួមសម្រាប់មនុស្សជាតិ។បន្ថែមលើសពីនេះ ភាគីចិន បានសន្យាការនាំចូលនូវកសិផលដែលមានគុណភាពខ្ពស់ របស់កម្ពុជាអោយកាន់តែច្រើនឡើងបន្ថែមទៀត ខណៈដែលកន្លងមក ចិនបាននាំចូលនូវផលិតផលកសិកម្មមួយចំនួនរួចហើយដូចជា ចេកអំបូងលឿង ស្វាយកែវរមៀត គ្រាប់ចន្ទី ត្រី តាមរយះកិច្ចព្រមព្រៀងពាណិជ្ជកម្មសេរីកម្ពុជា ចិន និង អសិប ជាដើម។ ដោយឡែកពាក់ពន្ធ័នឹងការវិនិយោគ ភាគីចិន បានសន្យាថា នឹងផ្សព្វផ្សាយ ព្រមទាំងជម្រុញអោយវិនិយោគិនចិន បន្ត និង បន្ថែមការវិនិយោគនៅកម្ពុជា អោយបានកាន់តែច្រើនបន្ថែមទៀត ដើម្បីផ្តល់ផលប្រយោជន៍អោយគ្នាទៅវិញទៅមក។ឯកឧត្តមឯកអគ្គរដ្ឋទូតបានបន្តថា ក្រោមការឯកភាពជាយុទ្ធសាស្ត្រកម្រិតខ្ពស់ប្រទេសទាំង២ ដោយគណៈកម្មាធិការសម្របសម្រួលអន្តររដ្ឋាភិបាលកម្ពុជា ចិន ដោយយន្តការគ្រប់គ្រងរួម និងការអនុវត្តផែនការសកម្មភាព ស្តីពីការកសាងសហគមន៍វាសនារួម កម្ពុជា ចិន ក្នុងយុគសម័យថ្មី ជាចំនុចចម្បង ភាគីទាំង២ នឹងបន្តជម្រុញក្របខណ្ឌកិច្ចសហប្រតិបត្តិការត្បូងពេជ្រ កម្ពុជា ចិន ដែលមានវិស័យអទិភាពចំនួន ៦និង ពន្លឿន ការកសាង”ច្រករបៀងឧស្សហកម្ម និង បច្ចេកវិទ្យា” និង “ច្រករបៀងមច្ឆា និង អង្ករ” ព្រមទាំងពង្រឹងទំនុកចិត្តនយោបាយអោយកាន់តែខ្ពស់ ពង្រឹងកិច្ចសហប្រតិបត្តិការផ្តល់ផលប្រយោជន៍ទៅវិញទៅមក។សូមបញ្ជាក់ថាកាលពីឆ្នាំ២០២៤ ទំហំពាណិជ្ជកម្មទ្វេភាគីរវាងកម្ពុជា-ចិន សម្រេចបាន ១៣៧៦២លានដុល្លារអាម៉េរិក កើនឡើង ២៤,២៣% ក្នុងនោះការនាំចេញរបស់កម្ពុជាសម្រេចបាន១៦០៧លានដុល្លារអាម៉េរិកកើនឡើង២២,២៧%។ ក្នុងនោះដែរ ក្រុមហ៊ុន សហគ្រាសចិន ដែលបានចុះបញ្ជីពាណិជ្ជកម្មនៅកម្ពុជាមានចំនួន ២ ៩២១ កើនឡើង ២០,៦៥%៕ អត្ថបទ៖ ដាវណ្ណ

កូនប្រុសពៅរបស់សម្ដេចធិបតី ហ៊ុន ម៉ាណែត ទទួលបានមេដាយមាស១គ្រឿងទៀតហើយ ពីការប្រឡងផ្នែកគណិតវិទ្យាកម្រិតពិភពលោក នៅប្រទេសអូស្ត្រាលី

កុមារា ហ៊ុន ពេជមុនី្នរិទ្ធិសិទ្ធិ កូនប្រុសពៅរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី នៃព្រះរាជាណាចក្រកម្ពុជា ទទួលបានមេដាយមាសកម្រិតពិភពលោក ១គ្រឿងទៀតហើយ ពីការប្រឡងផ្នែកគណិតវិទ្យា។តាមរយៈហ្វេសប៊ុកលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានបញ្ជាក់ថា ការប្រឡើងគឺធ្វើឡើងនៅប្រទេសអូស្ត្រាលី ដោយមានប្រទេសចំនួន១៥ប្រទេសចូលរួមប្រឡង។

សម្តេចធិបតី ហ៊ុន ម៉ាណែត និងលោកជំទាវ ចូលបច្ច័យ ១ម៉ឺនដុល្លារដល់គ្រួសារសពដែលទទួលមរណភាពនៅថៃដោយសារគ្រោះរញ្ជួយដី

ភ្នំពេញ៖ កាលពីល្ងាចថ្ងៃទី១៨ ខែមេសា ឆ្នាំ២០២៥កន្លងទៅនេះ ថ្នាក់ដឹកនាំរបស់ក្រសួងការងារ និងបណ្តុះបណ្តាលវិជ្ជាជីវៈ និងឯកឧត្តម ហ៊ុន សារឿន ឯកអគ្គរាជទូតកម្ពុជាប្រចាំប្រទេសថៃ ព្រមទាំងមានការចូលរួមពីតំណាងក្រុមការងារ ESEA, និងតំណាងសមាគមទីភ្នាក់ងារជ្រើសរើសពលករកម្ពុជា (ACRA) បាននាំយកសារលិខិតរំលែកមរណទុក្ខ និងថវិការបស់សម្តេចធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ចំនួន ១ម៉ឺនដុល្លារ ជូនក្រុមគ្រួសារនៃសពពលករខ្មែរលោក ផល្លា រតនា ដែលកំពុងធ្វើបុណ្យសពនៅក្នុងប្រទេសថៃ។យោងតាមក្រសួងការងារ និងបណ្តុះបណ្តាលវិជ្ជាជីវៈ បានឲ្យដឹងថា លោក ផល្លា រតនា អាយុ ២៤ឆ្នាំជាពលករខ្មែរដែលធ្វើការ និងរស់នៅក្នុងប្រទេសថៃបានទទួលមរណភាព ដោយសារការរញ្ជួយដីក្នុងប្រទេសថៃ កាលពីថ្ងៃទី២៨ ខែមីនា ឆ្នាំ២០២៥។នៅក្នុងពិធីបូជាសពដែលបានរៀបចំធ្វើនៅវត្តបាភ្លីយ៉ៃក្លាង ឃុំបាងភ្លីយ៉ៃ ស្រុកបាភ្លី ខេត្តសាមុទ្រប្រាកាន ប្រទេសថៃ ថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ បានសម្តែងនូវសមានទុក្ខក្តុកក្តួលរន្ធត់ចិត្ត និងសេចក្តីសោកស្តាយស្រណោះអាឡោះអាល័យជាទីបំផុត និងសូមចូលរួមមរណទុក្ខដ៏ក្រៀមក្រំ ជូនចំពោះលោក សៅ ផល្លា និងលោកស្រី ឆាយ សោភ័ណ្ឌ ជាឪពុកម្តាយនៃសព ព្រមទាំងក្រុមគ្រួសារ ចំពោះការបាត់បង់កូនជាទីស្រឡាញ់ ដែលបានលាចាកលោក និងលាចាកពីក្រុមគ្រួសារ។ ក្រសួងការងារ និងបណ្តុះបណ្តាលវិជ្ជាជីវៈ បានឧទ្ទិសបួងសួងដល់ដួងវិញ្ញាណក្ខន្ធ លោក ផល្លា រតនា សូមបានទៅកាន់សុគតិភពកុំបីឃ្លៀងឃ្លាតឡើយ៕

ឯកឧត្តម ហ៊ុន ម៉ានី លើកទឹកចិត្តដល់សមាជិក សមាគមវិទ្យុ និងទូរទស្សន៍អនឡាញសំឡេងជនពិការភ្នែក

ឯកឧត្តម ឧបនាយករដ្ឋមន្ត្រី ហ៊ុន ម៉ានី រដ្ឋមន្ត្រីក្រសួងមុខងារសាធារណៈ និងជាប្រធានសហភាពសហព័ន្ធយុវជនកម្ពុជា នាល្ងាចថ្ងៃទី ១៨ ខែមេសា ឆ្នាំ ២០២៥ បានចួបសំណេះសំណាល និងលើកទឹកចិត្តដល់សមាជិកសមាគមវិទ្យុ និងទូរទស្សន៍អនឡាញសំឡេងជនពិការភ្នែក។ ការលើកទឹកចិត្តនេះ គឺស្របពេលដែលសមាគមវិទ្យុ និងទូរទស្សន៍អនឡាញសំឡេងជនពិការភ្នែកកំពុងបន្តបេសកកម្មការងារ ផ្ដល់ជាឧត្តមប្រយោជន៍ជាច្រើនសម្រាប់ជនមានពិការភាពនៅកម្ពុជា។ឯកឧត្តមឧបនាយករដ្ឋមន្ត្រី ហ៊ុន ម៉ានី បានឆ្លៀតឱកាសក្រោយចប់ពិធីបុណ្យចូលឆ្នាំប្រពៃណីជាតិខ្មែរ ដោយចួបសំណេះសំណាល់ និងលើកទឹកចិត្តដោយផ្ទាល់ដល់សមាជិក នៃសមាគមវិទ្យុ និងទូរទស្សន៍អនឡាញសំឡេងជនពិការភ្នែក។ក្នុងការចួបសំណេះសំណាលនេះ ឯកឧត្តម ហ៊ុន ម៉ានី បានលើកទឹកចិត្ត និងជំរុញឱ្យគ្រប់សមាជិកនៃសមាគម ទោះខ្លួនមានពិការភាពក្ដី ត្រូវតែប្រឹងប្រឹងរៀនសូត្រ ប្រឹងប្រែងបំពេញការងារ ដុះខាត់សមត្ថភាពឱ្យកាន់តែខ្លាំង។ឯកឧត្តម បានផ្ដល់ជាអនុសាសន៍ផងដែរថា មិនត្រូវចាត់ទុកពិការភាពជាចំណុចខ្សោយរបស់ខ្លួននោះទេ។ ឯកឧត្តម លើកទឹកចិត្តផងដែរឱ្យពួកគេ យកសម្ដេចតេជោ ហ៊ុន សែន ធ្វើជាគំរូ។ ក្នុងនាមជារដ្ឋមន្ត្រីក្រសួងមុខងារសាធារណៈផងដែរ ឯកឧត្តមលើកឡើងចំពោះមុខសមាជិកនៃសមមាគមថា បច្ចុប្បន្នរាជរដ្ឋាភិបាលផ្ដល់សិទ្ធិស្មើគ្នា ដោយគ្មានការរើសអើងសម្រាប់ជនមានពិការភាព។ឯកឧត្តមបញ្ជាក់ថា ជនមានពិការភាពដែលមានសមត្ថភាព អាចដាក់ពាក្យចូលរួមប្រកួតប្រជែងធ្វើជាមន្ត្រីរាជការ ដូចជនទូទៅដោយស្មើភាពគ្នា។ មានសមត្ថភាពពិតប្រាកដ មានឱកាសប្រកួតប្រជែង មានឱកាសជាប់ជាមន្ត្រីរាជការ។ក្នុងការសំណេះសំណាលនេះដែរ ឯឧត្តម ហ៊ុន ម៉ានី បានលើកឡើងពីការបន្តគាំទ្រ និងជួយដោះស្រាយបញ្ហារបស់សមាគម។ លើសពីនេះ ឯកឧត្តមនឹងស្វែងរកភាគីឯកជន ដើម្បីចូលរួមក្នុងការជួយជ្រោមជ្រែងដំណើរការរបស់សមាគម។សមាគមវិទ្យុ និងទូរទស្សន៍អនឡាញសំឡេងជនពិការភ្នែក ត្រូវបានបង្កើតឡើងនៅឆ្នាំ ២០១០។ បច្ចុប្បន្នសមាគមនេះ មានបុគ្គលិកសរុប ៩០នាក់ និងមានជនមានពិការភាពបំពេញការងាររហូតដល់ ៥០នាក់។ សមាគមនេះ ជាស្ថាប័នមួយដែលមានភាគរយជនមានពិការភាព បំពេញការងារច្រើនជាងគេនៅកម្ពុជា។ អត្ថបទ៖គឹមហុក

លោកជំទាវបណ្ឌិតសភាចារ្យ ភឿង សកុណា អនុញ្ញាតឲ្យឯកអគ្គរដ្ឋទូតអូស្រ្តាលី ប្រចាំនៅកម្ពុជា ជួបពិភាក្សាការងារ

ភ្នំពេញ ៖ នារសៀលថ្ងៃទី១៨ ខែមេសា ឆ្នាំ២០២៥នេះ លោកជំទាវបណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានអនុញ្ញាតឲ្យឯកឧត្តម ដឺរិក យីប (Derek Yip) ឯកអគ្គរដ្ឋទូតថ្មីរបស់អូស្រ្តាលីប្រចាំនៅកម្ពុជា ចូលជួបសម្តែងការគួរសម និងពិភាក្សាការងារ នាទីសី្តក្រសួង។ជាកិច្ចចាប់ផ្តើមលោកជំទាវបណ្ឌិតសភាចារ្យ ភឿង សកុណា សូមស្វាគមន៍ឯកឧត្តម ឯកអគ្គរដ្ឋទូតថ្មី រួមនិងសហការី ដែលបានអញ្ជើញមកជួបសម្តែងការគួរសម និងពិភាក្សាការងារ។ ក្នុងជំនួបនេះភាគីទាំងពីរ បានរំលេចអំពីកិច្ចសហប្រតិបតិ្តការ នាពេលកន្លងមក រវាងប្រទេសកម្ពុជា និងអូស្រ្តាលី។ ដោយរដ្ឋាភិបាលអូស្រ្តាលី ធ្លាប់បានប្រគល់វត្ថុបុរាណមកឲ្យព្រះរាជាណាចក្រកម្ពុជាវិញ ក្នុងនោះភាគីប្រទេសអូស្រ្តាលី ក៏ធ្លាប់បានខ្ចីវត្ថុបុរាណខ្មែរ ទៅដាក់តាំងពិព័រណ៌ក្នុងវិចិត្រសាលជាតិអូស្រ្តាលី នៃទីក្រុង កង់បេរ៉ា (Canberra) បន្ថែមពីនេះក្រសួងវប្បធម៌ និងវិចិត្រសិល្បៈ ក៏មានកិច្ចសហប្រតិបតិ្តការជាមួយសាកលវិទ្យាល័យហ្វ្លីនដឺ អូស្រ្តាលី ផ្តោតលើការធ្វើកំណាយស្រាវជ្រាវរាជធានី សម័យកណ្តាល និងបុរាណដ្ឋានជុំវិញ នៅខេត្តកំពង់ចាម ខេត្តកំពង់ឆ្នាំង និងខេត្តកណ្តាល។ គម្រោងរៀបចំមនី្ទរពិសោធន៍ សម្រាប់ការអភិរក្ស និងជួសជុល វាយណភណ្ឌនៅសារមនី្ទរផងដែរ។ នាពេលអនាគត លោកជំទាវបណ្ឌិតសភាចារ្យ ភឿង សកុណា និងឯកឧត្តម ដឺរិក យីប (Derek Yip) មានបំណងចង់ឲ្យមានការផ្លាស់ប្តូរបន្ថែមទៀត លើសិល្បករ សិល្បការិនី សិល្បៈទស្សនីយភាព របាំ តន្រី្ត និងគំនូរជាដើម៕អត្ថបទ រដ្ឋា

អភិបាលខេត្តប៉ៃលិន ថ្លែងអំណរគុណដល់បងប្អូនអ្នកស្ម័គ្រចិត្ត និងបុគ្គលិកសម្អាតអនាម័យ ក្នុងព្រឹត្តិការណ៍សង្ក្រាន្តប៉ៃលិន ២០២៥

ប៉ៃលិន៖ លោកជំទាវបណ្ឌិត បាន ស្រីមុំ អភិបាល នៃគណៈអភិបាលខេត្តប៉ៃលិនបានមានប្រសាសន៍កោតសរសើរ និងថ្លែងអំណរគុណដល់អ្នកស្ម័គ្រចិត្ត និងបងប្អូនជាបុគ្គលិកសម្អាតអនាម័យ ដែលបានជួយសម្អាតអនាម័យបរិស្ថាន ក្នុងព្រឹត្តិការណ៍សង្ក្រាន្តប៉ៃលិន បុណ្យចូលឆ្នាំថ្មីប្រពៃណីជាតិខ្មែរ ម្សាញ់ សប្តស័ក ព.ស. ២៥៦៨ គ.ស ២០២៥ ដែលបានប្រព្រឹត្តទៅអស់រយៈពេល ៣ថ្ងៃ បានយ៉ាងល្អប្រសើរ ដោយមិនមានសំរាមពាសវាលពាសកាលឡើយ។លោកជំទាវបណ្ឌិតអភិបាលខេត្តប៉ៃលិន បានមានប្រសាសន៍បែបនេះ ក្នុងឱកាសអញ្ជើញសំណេះសំណាល និងផ្តល់គ្រឿងឧបភោគបរិភោគ ភេសជ្ជៈ ថវិកាឧបត្ថម្ភដល់បងប្អូនអ្នកស្ម័គ្រចិត្ត ក្រុង-ស្រុក និងឃុំ/សង្កាត់ និងបុគ្គលិកសម្អាតអនាម័យ ដែលបានចូលរួមសម្អាតអនាម័យបរិស្ថាន ក្នុងព្រឹត្តិការណ៍សង្ក្រាន្តប៉ៃលិន ២០២៥ នាព្រឹកថ្ងៃទី១៨ ខែមេសា ឆ្នាំ២០២៥ នៅមាត់ស្ទឹងប៉ៃលិន ជាទីតាំងរៀបចំសង្ក្រាន្តប៉ៃលិន។ លោកជំទាវបណ្ឌិត បាន ស្រីមុំ បានមានប្រសាសន៍បញ្ជាក់ថា៖ ក្នុងរយៈពេល០៣ថ្ងៃ នៃព្រឹត្តិការណ៍ក្នុងព្រឹត្តិការណ៍សង្ក្រាន្តប៉ៃលិន ២០២៥ បងប្អូនអ្នកស្ម័គ្រចិត្ត និងបុគ្គលិកសម្អាតអនាម័យ បានដើរតួនាទីយ៉ាងសំខាន់ ក្នុងការធ្វើឱ្យសង្ក្រាន្តប៉ៃលិនមានសោភ័ណភាពស្អាត លើកកម្ពស់អនាម័យបរិស្ថាន មិនមានសំរាមពាសវាលពាសកាល ដែលនេះសបញ្ជាក់ឱ្យឃើញថា ការយកចិត្តទុកដាក់របស់បងប្អូន ក្នុងការសម្អាតនូវអនាម័យបរិស្ថានបានយ៉ាងល្អប្រសើរ ពិសេសទាំងមុនពេល និងក្រោយពេលសង្ក្រាន្ត នៅមាត់ស្ទឹងប៉ៃលិន និងកន្លែងផ្សេងៗទៀត គឺមិនមានសំរាមពាសវាលពាសកាលឡើយ។លោកជំទាវបណ្ឌិតអភិបាលខេត្ត បានមានប្រសាសន៍បន្ថែមថា៖ ក្រៅពីការយកចិត្តទុកដាក់ ទាំងកម្លាំងកាយ និងកម្លាំងចិត្ត របស់បងប្អូនអ្នកស្ម័គ្រចិត្ត និងបុគ្គលិកសម្អាតអនាម័យយើង ជាពិសេសបងប្អូនប្រជាពលរដ្ឋ ដែលមកកម្សាន្តសប្បាយក្នុងពិធីសង្ក្រាន្តប៉ៃលិន បានយកចិត្តទុកដាក់ក្នុងការវេចភ្ជាប់ និងទុកដាក់សំរាម ប្រកបដោយការទទួលខុសត្រូវរៀងៗខ្លួន ដែលធ្វើឱ្យព្រឹត្តិការណ៍សង្ក្រាន្តប៉ៃលិនឆ្នាំនេះ មានសោភ័ណភាពស្អាត និងបង្កភាពសប្បាយរីករាយ ព្រមទាំងផ្ដាំផ្ញើដល់បងប្អូនយើង ដែលបានចូលរួមសម្អាតអនាម័យបរិស្ថាន សូមបន្តចែករំលែកនូវបទពិសោធន៍ ការទុកដាក់សំរាម វេចខ្ចប់សំរាម ជូនដល់បងប្អូនប្រជាពលរដ្ឋ ដើម្បីរួមគ្នាធ្វើឱ្យខេត្តប៉ៃលិនយើងទាំងមូល គ្មានសំរាមរាយប៉ាយ៕

ដំណើរទស្សនកិច្ចរបស់ឯកឧត្តម ស៊ី ជីនពីង បានកំពុងជួយពន្លឿនគម្រោងជីកព្រែកហ្វូណនតេជោ

ភ្នំពេញ ៖ វិស័យឯកជន ចាត់ទុកដំណើរទស្សនកិច្ចផ្លូវការរបស់ ឯកឧត្តម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន បាន និងកំពុងជួយពន្លឿនដល់គម្រោងជីកព្រែកហ្វូណនតេជោ ដែលជាសមិទ្ធផលប្រវត្តិសាស្រ្តរបស់កម្ពុជា សម្រាប់បម្រើផលប្រយោជន៍មហា សាលដល់សេដ្ឋកិច្ចជាតិ។ លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជា លើកឡើងក្នុងកិច្ចសម្ភាសន៍ ជា មួយ BTV ស្តីពីដំណើរបំពេញទស្សនកិច្ចផ្លូវរដ្ឋរបស់ ឯកឧត្តម ស៊ី ជីនពីង ប្រធានាធិបតីនៃសាធារណរដ្ឋប្រជាមានិតចិន នៅកម្ពុជា នេះថា ជុំវិញការអភិវឌ្ឍហេដ្ឋារចនាសម្ព័ន្ធរូបវ័ន្ត រាជរដ្ឋាភិបាលបាននិងកំពុងយកចិត្តទុកដាក់បំផុត ដោយបានជំរុញអភិវឌ្ឍគ្រប់ ដណ្តប់នៅទូទាំងប្រសើរកាន់តែប្រសើរ គាំទ្រដល់សកម្មភាពរស់រវើក ជាពិសេសនៅក្នុងសកម្មភាពសេដ្ឋកិច្ច ព្រោះហេដ្ឋារចនាសម្ព័ន្ធ ជាពិសេសផ្លូវ ស្ពាន និងកំពង់ផែ ត្រូវបានរាជរដ្ឋាភិបាលចាត់ទុកជាសរសៃឈាមនៃសេដ្ឋកិច្ច បម្រើដល់ការដឹកជញ្ជូនទាំងសកម្មភាព ក្នុងស្រុក និងនាំចេញ។លោក បន្តថា ហេដ្ឋរចនាសម្ព័ន្ធគមនាគមន៍ គឺជាឆ្អឹងខ្នងដ៏សំខាន់សម្រាប់វិស័យដឹកជញ្ជូន បច្ចុប្បន្នហេដ្ឋរចនាសម្ព័ន្ធសំខាន់ៗ បានកំពុងឆ្លើយតបដល់ការដឹកជញ្ជូនរួមមាន៖ ផ្លូវក្រវ៉ាត់ក្រុង ការពង្រីកកំពង់ផែ ការកសាងព្រលានយន្តហោះ ដោយហេដ្ឋរចនាសម្ព័ន្ធ ទាំងនេះគឺជាការជួយជំរុញដល់ការសម្រួលពាណិជ្ជកម្ម ជាពិសេសព្រែកជីកហ្វូណនតេជោ ដែលរាជរដ្ឋាភិបាលបាននិងកំពុងយកចិត្ត ទុកដាក់អភិវឌ្ឍជីកព្រែកហ្វូណនតេជោនេះ។ ចំណែកតាមរយៈដំណើរទស្សនកិច្ចផ្លូវការ របស់ឯកឧត្តម ស៊ី ជីនពីង ប្រធានាធិបតីនៃ សាធារណរដ្ឋប្រជាមានិតចិន នាពេលនេះ បាននិងកំពុងជួយពន្លឿនដល់គម្រោងជីកព្រែកហ្វូណនតេជោ ដើម្បីជំរុញឱ្យកម្ពុជាមាន ឱកាសបម្រើការដឹកជញ្ជូនកាន់តែប្រសើរ ជំរុញដល់ការដោះដូរពាណិជ្ជកម្មរបស់កម្ពុជានៅលើទីផ្សារអន្តរជាតិ ជាពិសេសការធ្វើ ពាណិជ្ជកម្មទ្វេភាគី កម្ពុជា-ចិននេះជាដើម។ សូមបញ្ជាក់ថា ជុំវិញគម្រោងព្រែកជីកហ្វូណនតេជោ នៅថ្ងៃម្សិលមិញនេះ កម្ពុជា-ចិនបានចុះកិច្ចព្រមព្រៀង និងកិច្ចសន្យា ចំនួន ៥ ពាក់ព័ន្ធនឹង “គម្រោងគ្រប់គ្រងធនធានទឹកចម្រុះហ្វូណនតេជោ”រួមមាន៖ (១) កិច្ចសន្យាភាពជាដៃគូរវាងរដ្ឋ និងឯកជន ដែលមាន ឯកឧត្តមស៊ុន ចាន់ថុល ដោយទទួលបានសិទ្ធប្រទានធ្វើជាតំណាងភាគីរាជរដ្ឋាភិបាលកម្ពុជា ចុះហត្ថលេខាជាមួយឯកឧត្តម អៀង ស៊ុនលី តំណាងក្រុមហ៊ុនហ្វូណនតេជោ ខូសថល-អ៊ីនឡេន វ័រធើវេយ ឯ.ក, (២) កិច្ចព្រមព្រៀងម្ចាស់ភាគហ៊ុន, (៣) កិច្ចព្រម ព្រៀងវិនិយោគ, (៤) កិច្ចសន្យាវិស្វកម្ម លទ្ធកម្ម និងសាងសង់ និង (៥) កិច្ចសន្យាប្រតិបត្តិការ និងការថែទាំ។ការអនុវត្តគម្រោងខាងលើនេះ ក្រោមការឯកភាពដ៏សំខាន់ ដែលសម្រេចបានរវាងប្រមុខដឹកនាំនៃប្រទេសទាំងពីរ កម្ពុជា-ចិន គម្រោងគ្រប់គ្រងធនធានទឹកចម្រុះហ្វូណនតេជោ នេះគឺជាការជំរុញកិច្ចសហប្រតិបត្តិការប្រកបដោយគុណភាព ក្រោមគំនិតផ្តួចផ្តើម “ខ្សែក្រវ៉ាត់និងផ្លូវ” ក៏ដូចជាក្របខ័ណ្ឌ “កិច្ចសហប្រតិបត្តិការត្បូងពេជ្រ” ដែលនឹងធ្វើឱ្យប្រសើរឡើងនូវការកសាងសហគមន៍ជោគ វាសនារួមគ្នា កម្ពុជា-ចិន នៅក្នុងយុគសម័យថ្មី។ នេះជាការបោះជំហានដ៏សំខាន់មួយ ក្នុងការកែប្រែមុខមាត់កម្ពុជា នៅក្នុងវិស័យ នាវាចរណ៍ ក៏ដូចជាការដឹកជញ្ជូនតាមផ្លូវទឹក និងផ្លូវសមុទ្រ។ ផ្លូវទឹកមួយខ្សែនេះនឹងតភ្ជាប់ប្រព័ន្ធទន្លេមេគង្គ និងផ្លូវសមុទ្រ ចាប់ពី ព្រែកតាកែវ នៃទន្លេមេគង្គ ឆ្លងកាត់តាមព្រែកតាឯកនៃទន្លេបាសាក់ រួចចូលតាមព្រែកតាហ៊ីង នៃទន្លេបាសាក់ក្នុងស្រុកកោះធំ និងបន្ត រហូតដល់សមុទ្រ ខេត្តកែប ដោយឆ្លងកាត់ខេត្តចំនួន៤ រួមមាន៖ ខេត្តកណ្តាល ខេត្តតាកែវ ខេត្តកំពត និងខេត្តកែប៕អត្ថបទ៖ សុន រ៉ាឌី

កម្ពុជា-ចិនចុះកិច្ចព្រមព្រៀង និងកិច្ចសន្យាចំនួន ៥ ច្បាប់ សម្រាប់គម្រោងព្រែកជីកហ្វូណនតេជោ

ភ្នំពេញ ៖ កិច្ចព្រមព្រៀងនិងកិច្ចសន្យា ចំនួន ៥ ច្បាប់ ពាក់ព័ន្ធនឹងគម្រោងគ្រប់គ្រងធនធានទឹកចម្រុះហ្វូណនតេជោ (គម្រោងព្រែកជីក ហ្វូណនតេជោ) ត្រូវបានចុះហត្ថលេខាជាផ្លូវការ រវាងរាជរដ្ឋាភិបាលកម្ពុជា និងសាធារណរដ្ឋប្រជាមានិតចិន។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាប្រធានអនុគណៈកម្មាធិការ ដើម្បីរៀបចំវាយតម្លៃរបាយការណ៍សិក្សាសមិទ្ធិលទ្ធភាព និងរៀបចំចរចាកិច្ចសន្យាភាពជាដៃគូរវាងរដ្ឋ និងឯកជន នៃគម្រោងព្រែកជីក ហ្វូណនតេជោ នៅថ្ងៃទី១៧ ខែមេសា ឆ្នាំ២០២៥ ម្សិលមិញនេះ បានអញ្ជើញជាអធិបតី និងជាហត្ថលេខីក្នុងពិធីចុះហត្ថលេខា លើកិច្ច ព្រមព្រៀង និងកិច្ចសន្យាចំនួន ៥ ពាក់ព័ន្ធនឹងគម្រោងគ្រប់គ្រងធនធានទឹកចម្រុះហ្វូណនតេជោ រួមជាមួយ លោក Wang Tong Zhou ប្រធានក្រុមហ៊ុនសំណង់គមនាគមន៍ចិន (China Communications Construction Company – CCCC)។ កិច្ចព្រមព្រៀងនិងកិច្ចសន្យាទាំង៥ ពាក់ព័ន្ធនឹងគម្រោងគ្រប់គ្រងធនធានទឹកចម្រុះហ្វូណនតេជោ ដែលត្រូវបានចុះហត្ថលេខា នោះរួមមាន៖ (១) កិច្ចសន្យាភាពជាដៃគូរវាងរដ្ឋ និងឯកជន ដែលមានឯកឧត្តមស៊ុន ចាន់ថុល ដោយទទួលបានសិទ្ធប្រទាន ធ្វើជា តំណាងភាគីរាជរដ្ឋាភិបាលកម្ពុជា ចុះហត្ថលេខាជាមួយឯកឧត្តមអៀង ស៊ុនលី តំណាងក្រុមហ៊ុនហ្វូណនតេជោ ខូសថល-អ៊ីនឡេន វ័រធើវេយ ឯ.ក (២)កិច្ចព្រមព្រៀងម្ចាស់ភាគហ៊ុន, (៣) កិច្ចព្រមព្រៀងវិនិយោគ, (៤) កិច្ចសន្យាវិស្វកម្ម លទ្ធកម្ម និងសាងសង់ និង (៥) កិច្ចសន្យាប្រតិបត្តិការ និងការថែទាំ។គម្រោងខាងលើនេះ ត្រូវបានអនុវត្តក្រោមការឯកភាពដ៏សំខាន់ ដែលសម្រេចបានរវាងប្រមុខដឹកនាំនៃប្រទេសទាំងពីរ កម្ពុជា-ចិន, គម្រោងគ្រប់គ្រងធនធានទឹកចម្រុះហ្វូណនតេជោនេះ គឺជាការជំរុញកិច្ចសហប្រតិបត្តិការប្រកបដោយគុណភាព ក្រោមគំនិត ផ្តួចផ្តើម “ខ្សែក្រវ៉ាត់និងផ្លូវ” ក៏ដូចជាក្របខ័ណ្ឌ “កិច្ចសហប្រតិបត្តិការត្បូងពេជ្រ” ដែលនឹងធ្វើឱ្យប្រសើរឡើងនូវការកសាងសហ- គមន៍ជោគវាសនារួមគ្នាកម្ពុជា-ចិន នៅក្នុងយុគសម័យថ្មី និងត្រូវបានរំពឹងទុកថា នឹងចូលរួមជំរុញយ៉ាងខ្លាំងនូវវិស័យនានា ហើយនេះ ជាការបោះជំហានដ៏សំខាន់ ក្នុងការកែប្រែមុខមាត់កម្ពុជា នៅក្នុងវិស័យនាវាចរណ៍ ក៏ដូចជាការដឹកជញ្ជូនតាមផ្លូវទឹក និងផ្លូវសមុទ្រ។ នៅពេលគម្រោងនេះបញ្ចប់ការស្ថាបនាជាស្ថាពរ រំពឹងថា នឹងចូលរួមលើកកម្ពស់ការតភ្ជាប់, ពន្លឿនការធ្វើទំនើបកម្មហេដ្ឋារចនាសម្ព័ន្ធ ដឹកជញ្ជូន, និងរួមចំណែកដល់ការអភិវឌ្ឍប្រកបដោយចីរភាពនៃទំនាក់ទំនង និងការធ្វើពាណិជ្ជកម្មប្រកបដោយប្រសិទ្ធភាព និងភាព ងាយស្រួល រវាងកម្ពុជាទៅកាន់តំបន់នានាដែលជាដៃគូពាណិជ្ជកម្ម និងសេដ្ឋកិច្ចរបស់ខ្លួន។ លើសពីការដឹកជញ្ជូន គម្រោងនេះរួម បញ្ចូលការគ្រប់គ្រងធនធានទឹក ប្រព័ន្ធធារាសាស្រ្ត និងកសិកម្ម ដែលមានចក្ខុវិស័យឆ្ពោះទៅមុខ ហើយត្រូវបានរំពឹងថា នឹងបង្កើនផលិតភាព កសិកម្មតាមបណ្តោយខ្សែផ្លូវទឹកមួយនេះ។ បន្ថែមពីនេះ វាក៏នឹងជំរុញការធ្វើសមាហរណកម្មនៃវិស័យសំខាន់ៗ នៅទូទាំងកម្ពុជា ទៅកាន់តំបន់ និងពិភពលោក ជាអាទិ៍រួមមាន៖ ឧស្សាហកម្ម, កសិកម្ម, ភស្តុភារកម្ម, និងវិស័យកំពង់ផែ។គួររម្លឹកដែរថា “គម្រោងគ្រប់គ្រងធនធានទឹកចម្រុះហ្វូណនតេជោ” ជាគំនិតផ្តួចផ្តើមដ៏ខ្ពង់ខ្ពស់ប្រកបដោយចក្ខុវិស័យដ៏វែងឆ្ងាយរបស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភា។ គម្រោងនេះបច្ចុប្បន្ន បាននិងកំពុង អនុវត្តដោយរាជរដ្ឋាភិបាល នីតិកាលទី៧ នៃរដ្ឋសភា ក្រោមការដឹកនាំប្រកបដោយគតិបណ្ឌិតរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ដើម្បីបន្សល់ទុកជាប្រវត្តិសាស្ត្រ សម្រាប់ជាប្រយោជន៍ដល់អ្នកជំនាន់ក្រោយ។ គម្រោងនេះ ត្រូវប្រារព្ធពិធី បើកការដ្ឋានជាផ្លូវការ យ៉ាងមហោឡារិក និងអធិកអធម កាលពីថ្ងៃទី៥ ខែសីហា ឆ្នាំ២០២៤ ក្រោមអធីបតីភាពដ៏ខ្ពង់ខ្ពស់ សម្តេច ធិបតីនាយករដ្ឋមន្ត្រី គម្រោងព្រែកជីកនេះ គ្រោងស្ថាបនារួចរាល់នៅអំឡុង ឆ្នាំ២០២៨ ខាងមុខ៕អត្ថបទ៖ សុន រ៉ាឌី

ឯកឧត្តម ប៉ែន បូណា៖ អ្នកដឹកនាំដែលធ្វើឱ្យពលរដ្ឋសុខសប្បាយ ខុសពីឧទ្ទាមនយោបាយដែលបន្លាចពលរដ្ឋឱ្យភិតភ័យ

ភ្នំពេញ ៖ ឯកឧត្តម ប៉ែន បូណា ប្រធានអង្គភាពអ្នកនាំពាក្យរាជរដ្ឋាភិបាល មានប្រសាសន៍បញ្ជាក់ថា ពិធីបុណ្យចូលឆ្នាំថ្មីរយៈពេលបីថ្ងៃដែលទើបតែកន្លងទៅនេះមានសភាពអធិកអធមយ៉ាងក្រៃលែង។ ភ្ញៀវទេសចរជាតិនិងបរទេសចំនួនជិត ២៤ លាននាក់ បានចូលរួមកម្សាន្តសប្បាយដោយទឹកចិត្តសោមនស្សរីករាយឥតឧបមា។ តួលេខនេះបង្ហាញថា ប្រជាពលរដ្ឋខ្មែរម្នាក់អាចដើរកម្សាន្តលើសពីរមួយដង។ នេះគឺជាផ្លែផ្កានៃសុខសន្តិភាព ក្រោមការដឹកនាំរបស់រាជរដ្ឋាភិបាលនៃគណបក្សប្រជាជនកម្ពុជា។ បើគ្មានសុខសន្តិភាព គ្មានហេដ្ឋារចនាសម្ព័ន្ធល្អ គ្មានការកើនឡើងនៃជីវភាពរស់នៅ និងគ្មានការបង្កលក្ខណៈងាយស្រួលពីសំណាក់អាជ្ញាធររាជរដ្ឋាភិបាលទេ ប្រជាពលរដ្ឋខ្មែរគ្មានឱកាសកម្សាន្តសប្បាយបែបនេះឡើយ។គួរកត់សម្គាល់ថា ពីមួយឆ្នាំទៅមួយឆ្នាំ ចំនួនប្រជាពលរដ្ឋដែលចូលរួមកម្សាន្តសប្បាយនិងបញ្ចេញស្នាមញញឹមប្រកបដោយភាពកក់ក្តៅនៅក្នុងពិធីបុណ្យធំៗបានកើនឡើងជាលំដាប់។ នេះគឺជាទឡ្ហីករណ៍ដែលបង្ហាញថា ប្រជាពលរដ្ឋខ្មែរទទួលបានផលពីការដឹកនាំប្រទេសកាន់តែច្រើនឡើងៗជាលំដាប់។ គ្មានទេ ការសប្បាយបែបនេះ នៅក្នុងប្រទេសដែលញាំញីដោយភ្លើងសង្គ្រាម ដែលពលរដ្ឋអត់បាយក្រហាយទឹកនិងគ្មានជំនឿចិត្តលើការដឹកនាំរបស់រដ្ឋាភិបាល។ ស្នាមញញឹមប្រកបដោយក្តីសង្ឃឹមរបស់ប្រជាពលរដ្ឋខ្មែរដែលបាននិងកំពុងកើតឡើងនាពេលនេះ គឺជាផ្លែផ្កានៃសុខសន្តិភាពដែលកើតចេញពីគោលនយោបាយដឹកនាំប្រទេសដ៏ត្រឹមត្រូវរបស់រាជរដ្ឋាភិបាល។ផ្ទុយស្រឡះពីនេះ ក្រុមជ្រុលនិយមឯណោះវិញ តែងតែបង្កការភ័យខ្លាចដល់ប្រជាពលរដ្ឋជានិច្ចតាមរយៈការបញ្ចេញសារនយោបាយលាបពណ៌ ញុះញង់ បំបែកបំបាក់ខ្មែរ បង្កអរិភាពជាមួយប្រទេសជិតខាង និងជាមួយមហាអំណាចក្នុងតំបន់ជាដើមដែលសុទ្ធសឹងជានយោបាយបង្កជម្លោះដ៏គ្រោះថ្នាក់។ គោលបំណងរបស់ពួកគេ គឺធ្វើឱ្យមានភាពវឹកវរ ជ្រួលច្របល់ និងអស្ថិរភាពសង្គមដើម្បីឆ្លៀតឱកាសផ្តួលរំលំរាជរដ្ឋាភិបាលតាមរយៈចលនាបដិវត្តន៍ពណ៌ខុសច្បាប់ ទាញប្រទេសឱ្យក្រឡាប់ធ្លាក់ចូលទៅក្នុងអតីតកាលដ៏ខ្មៅងងឹត។ សកម្មភាពបែបនេះ គឺដើម្បីបម្រើមហិច្ឆតានយោបាយដ៏ខ្មៅកខ្វក់របស់ខ្លួនតែម្យ៉ាងគត់ដោយមិនខ្វាយខ្វល់ពីជោគវាសនាប្រទេសជាតិនិងប្រជាពលរដ្ឋឡើយ។ សកម្មភាពផ្ទុយគ្នាទាំងស្រុងរវាងរាជរដ្ឋាភិបាលនិងក្រុមជ្រុលនិយម បានធ្វើឱ្យប្រជាពលរដ្ឋខ្មែរអាចបែងចែកយ៉ាងច្បាស់ដាច់ស្រឡះពីគ្នារវាងមេដឹកនាំដែលបង្កលក្ខណៈឱ្យប្រជាពលរដ្ឋបានសុខសប្បាយ និងក្រុមនយោបាយដែលបង្កការភ័យខ្លាចជាប្រចាំ។ នេះគឺជាជំនួយស្មារតីយ៉ាងល្អសម្រាប់ប្រជាពលរដ្ឋខ្មែរក្នុងការជ្រើសរើសមេដឹកនាំតាមរយៈការបោះឆ្នោត៥ឆ្នាំម្តង។ ការជ្រើសរើសមេដឹកនាំល្អបង្កឱ្យមានការរីកចម្រើននិងស្នាមញញឹម។ ផ្ទុយទៅវិញ ការសម្រេចចិត្តខុសនាំឱ្យប្រទេសធ្លាក់ចុះទៅរកក្តីវិនាសអន្តរាយដូចអតីតកាលវិញជាមិនខាន។ គណបក្សប្រជាជនកម្ពុជាដែលទទួលបានការគាំទ្រឱ្យដឹកនាំប្រទេសជារៀងរហូតមក គឺជាសក្ខីភាពបញ្ជាក់ថា ប្រជាពលរដ្ឋខ្មែរចេះបែងចែកយ៉ាងច្បាស់រវាងអាក្រក់និងល្អ សនិងខ្មៅ ហើយពួកគេចង់បានស្នាមញញឹម និងការជួបជុំសប្បាយរីករាយក្រោមម្លប់សុខសន្តិភាព ដោយបដិសេធចោលទាំងស្រុងក្រុមនយោបាយដែលប៉ុនប៉ងនាំតែក្តីអន្តរាយដល់ប្រទេសជាតិ៕

បណ្ដាញសង្គម

ព័ត៌មានថ្មីៗ

សមត្ថកិច្ចចុះត្រួតពិនិត្យទីតាំងចំនួន៣ នៅក្រុងប៉ោយប៉ែតលួចប្រព្រឹត្ត Online Scams ឃាត់ខ្លួនជនបរទេស និងខ្មែរចំនួន ១៥២នាក់

យោធាគូវ៉ែត៖ ប្រព័ន្ធការពារដែនអាកាសស្ទាក់ចាប់ការវាយប្រហារដោយមីស៊ីល និងយានដ្រូនរបស់សត្រូវ

PSG អបអរពាន Champions League នៅទីក្រុងប៉ារីសក្រោយឈ្នះ Arsenal

ប្រធានគណៈកម្មាធិការយោធា៖ សមាជិក NATO អាចដើរតួនាទីក្នុងការបើកច្រកសមុទ្រហ័រមូស

អ៊ុយក្រែនច្រានចោលការអះអាងរបស់ក្រុងមូស្គូដែលថា រោងចក្រនុយក្លេអ៊ែររបស់រុស្ស៊ី ត្រូវវាយប្រហារដោយដ្រូន

ការវាយប្រហារដោយយានដ្រូនបានសម្លាប់មនុស្សជិត ៧០ នាក់ នៅតំបន់ KORDOFAN នៃប្រទេស ស៊ូដង់

IAEA ជំរុញបញ្ឈប់ការវាយប្រហាររោងចក្រនុយក្លេអ៊ែរ ដើម្បីបញ្ចៀសហានិភ័យនៃគ្រោះថ្នាក់នុយក្លេអ៊ែរ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877