BTV NEWS

ពោធិ៍សាត់ក្លាយជាខេត្តទី២៣ ដែលបានបញ្ចប់ការបន្ទោបង់ពាសវាលពាកាល(ODF)ទាំងស្រុង

ឧបនាយករដ្ឋមន្រ្តី កើត រិទ្ធ៖យប់នេះក្រសួងយុត្តិធម៌មានភាពចាំបាច់ផ្អាកជាបណ្តោះអាសន្នមុខងាររបស់ព្រះរាជអាជ្ញារងឈ្មោះ គ្រី សីហា ដែលដោះលែងដោយរំលោភអំណាចនូវជនល្មើស

សម្តេចរដ្ឋសភាធិបតី ឃួន សុដារី ៖ កិច្ចប្រជុំក្រុមអ្នកនយោបាយអន្តរសភាអាស៊ានលើកទី១៦បានផ្លាស់ប្តូរនូវទស្សនៈយ៉ាងសកម្មក្នុងការជំរុញការទូតសភា កិច្ចសហប្រតិបត្តិការ និងភាពជាដៃគូដើម្បីប្រជាពលរដ្ឋ

លោក Prabowo ថាលោក Trump ជាអ្នកចរចាតឹងតែង ខណៈកិច្ចប្រជុំពាណិជ្ជកម្មឥណ្ឌូនេស៊ី-អាមេរិកនៅបន្ត

ព័ត៌មានជាតិ

ឯកឧត្តម ហ៊ុន ម៉ានី រៀបចំខួបកំណើតរួមសម្រាប់កុមារ៦០០នាក់នៅអង្គការផ្ទះបាយកុមារ

ភ្នំពេញ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា នៅព្រឹកថ្ងៃទី៣១ខែឧសភានេះ បានដឹកនាំសមាជិកសមាជិកា និងសហការី រួមទាំងសមាជិក សមាជិកា ស.ស.យ.ក. អញ្ជើញចូលរួមរៀបចំខួបកំណើតដល់ប្អូនៗកុមារនៅអង្គការផ្ទះបាយកុមារ។ក្នុងឱកាសប្រកបដោយក្ដីសោមនស្សរីករាយនេះ ឯកឧត្តម ហ៊ុន ម៉ានី បានធ្វើការកោតសរសើរ និងថ្លែងអំណរគុណដល់ លោក ង៉ូវ ឈីវ ប្រធានអង្គការផ្ទះបាយកុមារ និងប្អូនៗយុវជនទាំងអស់ ដែលបានខិតខំប្រឹងប្រែងថែរក្សានូវស្ថេរភាពរបស់អង្គការផ្ទះបាយកុមារកន្លងមក។ ជាមួយគ្នានេះ ឯកឧត្តម បានថ្លែងអំណរគុណដល់សមាជិក សមាជិកា ស.ស.យ.ក. បងប្អូនអ្នកផលិតមាតិកាលើបណ្ដាញសង្គម និងសប្បុរសជនទាំងអស់ ដែលតែងបានចូលរួមចំណែករៀបចំកម្មវិធីជួបជុំ ចូលរួមឧបត្ថម្ភជាស្បៀងអាហារ ជាថវិកា និងកាដូ ដើម្បីចែកជូនដល់ប្អូនៗជារៀងរាល់ឆ្នាំ។ឯកឧត្តមបានបន្តថា ការចំណាយពេលមួយថ្ងៃ ឬមួយពេលរបស់យើងទាំងអស់គ្នា គឺជាការចូលរួមដ៏មានន័យ ក្នុងការផ្ដល់ជាកម្លាំងចិត្ត និងជាមធ្យោបាយដល់អង្គការផ្ទះបាយកុមារឱ្យបន្តបំពេញបេសកកម្មរបស់ខ្លួន ដើម្បីជួយប្អូនៗកុមារក្រីក្រខ្វះខាត។ បន្ថែមពីនេះ ជំនួបនេះ គឺជាការបង្កើតអនុស្សាវរីយ៍ និងរឹតចំណងទំនាក់ទំនងរវាង ប៉ា និង កូន តាមរយៈការចែករំលែកក្ដីស្រលាញ់ និងបង្កើតបរិយាកាសដ៏កក់ក្ដៅ។ ឯកឧត្តម ក៏បានផ្ដាំដល់ប្អូនៗផងដែរថា «យើងមានឱកាសជួបគ្នារាល់ឆ្នាំ ដោយប៉ាមិនទៅណាទេ ប៉ានឹងចាំជួយកូនៗទាំងអស់គ្នា។ ដូច្នេះ សូមកូនៗខិតខំប្រឹងប្រែងរៀនសូត្រ ក្រេបជញ្ជក់ចំណេះដឹង ដើម្បីមានអនាគតល្អ និងក្លាយជាធនធានល្អសម្រាប់សង្គមជាតិ។»សូមជម្រាបថា ជានិច្ចជាកាល ឯកឧត្តម ហ៊ុន ម៉ានី តែងតែឆ្លៀតពេលវេលាដ៏មមាញឹក អញ្ជើញមកជួបកុមារនៅក្នុងអង្គការផ្ទះបាយកុមារ ២ដង ក្នុងមួយឆ្នាំ ដើម្បីបង្ហាញក្ដីស្រលាញ់ ការយកចិត្តទុកដាក់ សួរសុខទុក្ខ ព្រមទាំងនាំយកសម្ភារៈចាំបាច់មួយចំនួនមកឧបត្ថម និងចែកជូនដល់កូនៗ ប្អូនៗនៅអង្គការផ្ទះបាយកុមារ ជាពិសេសបង្កើតនូវបរិយាកាសរីករាយ បង្កើនភាពស្និទ្ធស្នាលជាមួយប្អូនៗផងដែរ៕អត្ថបទ៖ទូច សោភ័ណ

ក្រសួងចំនួន៣ ឯកភាពគ្នាលើចំណុចសំខាន់ៗ៣ ដើម្បីលើកកម្ពស់វិស័យកសិកម្ម ធនធានទឹក និងអភិវឌ្ឍន៍ជនបទ

ភ្នំពេញ៖ ថ្នាក់ដឹកនាំក្រសួងកសិកម្ម រុក្ខាប្រមាញ់ និងនេសាទ, ក្រសួងធនធានទឹក និងឧតុនិយម និងក្រសួងអភិវឌ្ឍន៍ជនបទ បន្ទា់ពីបើកកិច្ចប្រជុំត្រី-វិស័យលើកទី៤ ស្តីពីកសិកម្ម-ទឹក-ជនបទ បានឯកភាពគ្នាទៅលើចំណុចសំខាន់ៗចំនួន៣ ដើម្បីសម្របសម្រួលការអនុវត្តកម្មវិធីគោលនយោបាយអាទិភាព និងសកម្មភាពដែលពាក់ព័ន្ធនឹងសហគមន៍កសិកម្មទំនើប សហគមន៍កសិករប្រើប្រាស់ទឹក និងភូមិគំរូ។ ឯកឧត្តម ឃឹម ហ្វីណង់ អនុរដ្ឋលេខាធិការក្រសួង និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កាលពីល្ងាចថ្ងៃទី៣០ ខែឧសភានេះ បានមានប្រសាសន៍ប្រាប់ព័ត៌មាន ប៊ីធីវី ឱ្យដឹងថា ចំណុចសំខាន់ៗទាំង៣ ដែលថ្នាក់ដឹកនាំបានឯកភាពគ្នានេះ មានដូចជា៖ ១. ផែនការសកម្មភាព ៣ឆ្នាំរំកិល (២០២៥-២០២៧) និងផែនការប្រចាំ២០២៥។ ២. ប្រើថវិការាជរដ្ឋាភិបាល សម្រាប់គ្រោងសកម្មភាពឆ្នាំ២០២៦ បន្តគាំទ្រដល់សកម្មភាពរបស់ សហគមន៍គោលដៅឆ្នាំ២០២៥ និងសហគមន៍ដែលនឹងត្រូវកំណត់បន្ថែមចំនួន៥ទៀត ក្នុងឆ្នាំ២០២៦។ និង ៣. ឯកសារទស្សនទានសម្រាប់រៀបចំ “ការសិក្សារៀបចំក្របខ័ណ្ឌយុទ្ធសាស្ត្រត្រី-វិស័យរយៈពេល ៥ឆ្នាំ (២០២៦-២០៣០)” ដើម្បីតម្រង់ទិសការងារត្រី-វិស័យ និងជាឧបករណ៍ដើម្បីកៀរគរធនធាន។ ឯកឧត្តម អនុរដ្ឋលេខាធិការ បានបញ្ជាក់ឱ្យដឹងទៀតថា កិច្ចសហប្រតិបត្តិត្រី-វិស័យ រវាងក្រសួងកសិកម្ម រុក្ខាប្រមាញ់ និងនេសាទ, ក្រសួងធនធានទឹក និងឧតុនិយម និងក្រសួងអភិវឌ្ឍន៍ជនបទ គឺជាគំនិតផ្តួចផ្តើមមួយដែលបានធ្វើឡើងដោយរដ្ឋមន្រ្តីនៃក្រសួងទាំង៣ ក្នុងគោលដៅតម្រង់ទិសគោលនយោបាយអាទិភាព នៃក្រសួងនីមួយៗ ចាប់ដៃធ្វើការរួមគ្នា សំដៅគាំទ្រដល់ការលើកកម្ពស់ជីវភាពប្រជាកសិករនៅទីជនបទ និងការអភិវឌ្ឍនៅតាមសហគមន៍មូលដ្ឋាន។ ឯកឧត្តម បានបន្តទៀតថា តាមរយៈការតម្រង់ទិសនៃគោលនយោបាយអាទិភាពរបស់ក្រសួងទាំងបី នឹងផ្តល់នូវអត្ថប្រយោជន៍ជាច្រើនដល់ប្រជាកសិករ តាមរយៈការជ្រើសរើសនូវទីតាំងយុទ្ធសាស្រ្ត ដើម្បីធ្វើការអភិវឌ្ឍន៍រួមគ្នាដើម្បីបង្កើននូវល្បឿននៃការអភិវឌ្ឍន៍ លើកកម្ពស់ជីវភាពរបស់ប្រជាកសិករ ក៏ដូចជា ធានាឱ្យបាននូវការអភិវឌ្ឍន៍នៅក្នុងមូលដ្ឋានទាំងមូលតែម្តង។ ហើយកិច្ចប្រជុំលើកទី៤នេះ បានកត់សម្គាល់ឃើញថា គឺចាប់ផ្តើមឃើញផ្លែផ្កានៃការធ្វើការរួមគ្នាជាបណ្តើរៗផងដែរ។ នៅក្នុងសេចក្តីប្រកាសព័ត៌មានរួម ស្តីពីកិច្ចប្រជុំត្រី-វិស័យលើកទី៤ ស្តីពីកសិកម្ម-ទឹក-ជនបទ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានកត់សម្គាល់ពីសមិទ្ធផលជាក់ស្តែង ដែលយន្តការត្រី-វិស័យសម្រេចបានក្នុងពេលកន្លងមក រួមមានការ ចាប់ផ្តើមអនុវត្តកិច្ចអន្តរាគមន៍រួមគ្នានៅក្នុងសហគមន៍ចំនួន៣ និងការត្រៀមបញ្ចូលសហគមន៍អាទិភាពជាបន្តបន្ទាប់ទៀត នៅក្នុងផែនការសកម្មភាពរយៈពេលវែងរបស់ខ្លួន។ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានបញ្ជាក់ និងអះអាងពីការខិតខំប្រឹងប្រែងរបស់ក្រសួងក្នុងការបន្តពង្រឹងនិងលើកកម្ពស់សមិទ្ធកម្ម ដើម្បីចូលរួមចំណែកដល់ កិច្ចខិតខំប្រឹងប្រែងរបស់ការងារត្រី-វិស័យ ជាពិសេសការលើកកម្ពស់ប្រសិទ្ធភាពសេដ្ឋកិច្ចវិស័យកសិកម្ម តាមរយៈការកសាងអាងស្តុកទឹក ប្រព័ន្ធធារាសាស្ត្រដែលមានលក្ខណៈពេញលេញ និងការប្រើប្រាស់កម្មវិធីទាញយក ព័ត៌មានកសិ-ឧតុនិយម។ ដោយឡែក ឯកឧត្តម ឆាយ ឬទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ បានវាយតម្លៃខ្ពស់លើកិច្ចប្រឹងប្រែងរបស់ក្រសួងទាំង៣ ដែលជាសហថាមពលគាំទ្រដល់ការអនុវត្តយុទ្ធសាស្ត្រ បញ្ចកោណ ដំណាក់កាលទី១ ឱ្យកាន់តែមានប្រសិទ្ធភាព។ ឯកឧត្តមរដ្ឋមន្ត្រី ក៏បានបញ្ជាក់អះអាងពីការប្តេជ្ញាចិត្ត យ៉ាងមុតមាំក្នុងការចូលរួមគាំទ្រ និងអនុវត្តសកម្មភាពការងារត្រី-វិស័យ៕ អត្ថបទ៖ ឈិត បូរ៉ាវី

ក្រុមការងាររាជរដ្ឋាភិបាលចុះមូលដ្ឋានឃុំកណ្ដឹងស្រុកបាទីខេត្តតាកែវ បើកវេទិកាសាធារណៈផ្សព្វផ្សាយពិគ្រោះយោ បល់ស្តីពីការអភិវឌ្ឍន៍នៅមូលដ្ឋាន និង ការលើកកម្ពស់ការចូលរួមរបស់ប្រជាពលរដ្ឋ

(តាកែវ): ក្រុមការងាររាជរដ្ឋាភិបាលចុះមូលដ្ឋានឃុំកណ្ដឹង ស្រុកបាទី ខេត្តតាកែវ បើកវេទិកាសាធារណៈផ្សព្វផ្សាយពិគ្រោះយោបល់ស្តីពីការអភិវឌ្ឍន៍នៅមូលដ្ឋាន និង ការលើកកម្ពស់ការចូលរួមរបស់ប្រជាពលរដ្ឋក្នុងមូលដ្ឋាននាថ្ងៃទី៣១ខែឧសភា ឆ្នាំ២០២៥នេះ ស្ថិតក្នុងបរិវេណវត្ត សុរភី(កកោះ) ក្រោមអធិបតីភាពឯកឧត្តម គូន សារឿន អនុ ប្រធានក្រុមការងាររាជរដ្ឋាភិបាលចុះមូលដ្ឋានឃុំកណ្ដឹង ស្រុកបាទី ខេត្តតាកែវ។ តំណាងឲ្យឯកឧត្តម ឈិត បូរ៉ាវុធ ប្រធានក្រុមការងាររាជរដ្ឋាភិបាលចុះមូលដ្ឋានឃុំកណ្ដឹង ស្រុកបាទី ខេត្តតាកែវ ឯកឧត្តម គូន សារឿន បានថ្លែងថា វត្តមានចូលរួមពី សំណាក់ប្រជាពលរដ្ឋក្នុងមូលដ្ឋានយ៉ាងច្រើនកុះករនាពេលនេះ បានបង្ហាញឱ្យឃើញកាន់តែច្បាស់នូវស្មារតីយក ចិត្តទុកដាក់របស់បងប្អូនប្រជាពលរដ្ឋ ក្នុងការចូលរួមផ្តល់មតិយោបល់កែលម្អ និងផ្តល់មតិរិះគន់ស្ថាបនាដល់រដ្ឋ បាលឃុំក៏ដូចជាអង្គភាពផ្តល់សេវានៅថ្នាក់មូលដ្ឋានក្នុងបុព្វហេតុតម្រង់ទិសសម្រាប់ជាយន្តការអនុវត្តបន្តទៅមុខទៀត ។ ឯកឧត្តម គូន សារឿន បានបញ្ជាក់ថា នេះជាលើកទី២ ហើយសម្រាប់ការរៀបចំវេទិកាផ្សព្វផ្សាយពិគ្រោះយោបល់នៅថ្នាក់រដ្ឋបាលឃុំកណ្តឹងរបស់យើង ដែលកាលពីលើកទី១ គឺយើងបានរៀបចំឡើងនៅក្នុងវត្តបន្ទាយត្រាវស្ថិតក្នុងភូមិឱភាសាំង ក្នុងវេទិកានោះ ក្រុមការងារយើងទទួលបាន សំណើ សំនូមពរ ក៏ដូចជាការផ្តល់មតិយោបល់យ៉ាងច្រើនកុះករ ហើយក៏បានដោះស្រាយ និង លើកផែនការដោះ ស្រាយជាបន្តបន្ទាប់បានរួចរាល់។ ហើយការរៀបចំវេទិកា សាធារណៈនាថ្ងៃនេះគឺជាឱកាសមួយដ៏មានសារៈសំខាន់បំផុតសម្រាប់បងប្អូនប្រជាពលរដ្ឋក្នុងការចូលរួមផ្តល់មតិ យោបល់ និងលើកជាសំនូមពរ ឬ បញ្ហាប្រឈមផ្សេងៗទាក់ទងនឹងការបំពេញការងារអភិវឌ្ឍន៍មូលដ្ឋាន ការអនុវត្តតួនាទី និងភារកិច្ចរបស់អាជ្ញាធរភូមិ-ឃុំ ប៉ុស្តិ៍នគរបាលរដ្ឋបាលឃុំ មណ្ឌលសុខភាព និងសាលារៀន ដែលជាអង្គភាពផ្តល់សេវាផ្ទាល់ ។ ឯកឧត្តម គូន សារឿនបានបន្តថា យើងបានដឹង និងបានជឿជាក់ថា ការអភិវឌ្ឍន៍អាចប្រព្រឹត្តិទៅបានយ៉ាងរឹងមាំ និងថេរភាពនោះចាំបាច់ ទាមទារឱ្យមានការចូលរួមយ៉ាងសកម្មពីប្រជាពលរដ្ឋ។ មតិយោបល់និងសំឡេងដែលចេញពីគំនិត និងបទ ពិសោធន៍របស់បងប្អូនប្រជាពលរដ្ឋគឺជាគ្រឿងផ្សំដ៏សំខាន់សម្រាប់ការបង្កើតផែនការ និងគម្រោងអភិវឌ្ឍន៍នៅ មូលដ្ឋានឱ្យត្រូវចំគោលដៅនិងតម្រូវការពិត ប្រាកដ ។ផ្អែកលើមូលដ្ឋានខាងលើនេះហើយ ទើបយើងរៀបចំឱ្យមានវេទិកាផ្សព្វផ្សាយពិគ្រោះយោបល់ ស្តីពីការ អភិវឌ្ឍន៍ និងការចូលរួមរបស់ប្រជាពលរដ្ឋនាពេលនេះឡើងគឺ ដើម្បីចង់បាននូវមតិចូលរួមរបស់បងប្អូនប្រជា ពលរដ្ឋយើងអំពីបញ្ហា និងសំណូមពរផ្សេងៗ ពាក់ព័ន្ធនឹងការផ្តល់សេវាឬក៏បញ្ហាមួយចំនួនដែលពាក់ព័ន្ធនឹងស្ថានភាពរស់នៅប្រចាំថ្ងៃរបស់បងប្អូនប្រជាពលរដ្ឋក្នុងមូលដ្ឋានឃុំកណ្ដឹងយើងទាំងមូល ។ឯកឧត្តមក៍សូមឱ្យបងប្អូនយកចិត្តទុកដាក់ខ្ពស់ដោយផ្តោតសំខាន់ទៅលើបញ្ហាមួយចំនួនដូចជា-ការអភិវឌ្ឍន៍មូលដ្ឋានភូមិ-ឃុំ។ការអនុវត្តគោលនយោបាយភូមិ-ឃុំមានសុវត្ថិភាព ទាំង៧ចំណុច។ការទទួល និងការផ្តល់សេវាសាធារណៈជូនប្រជាពលរដ្ឋ។ឥរិយាបទ របស់អ្នកផ្តល់សេវា (រដ្ឋបាលឃុំ ប៉ុស្តិ៍នគរបាលរដ្ឋបាល មណ្ឌលសុខភាព និងសាលារៀន) ។ការយកចិត្តទុកដាក់ ដោះស្រាយនូវបញ្ហាប្រឈមនានាចំពោះប្រជាពលរដ្ឋ។ បើតាមការសរុបកំណត់ហេតុក្នុងវេទិកាសាធារណះនេះពីសំណាក់លោក យ៉ាង វុទ្ធី ស្មៀនឃុំកណ្តឹងបានឲ្យដឹងថាប្រជាពលរដ្ឋដែលបានចូលរួមនោះបានឡើងជាសំណូមពរចំនួន៣៧ករណី ដែលក្នុងនោះមានដូចជាបញ្ហាស្នើសុំឲ្យមានការដាក់ស្លាកសញ្ញាចរាចរណ៍ .ការស្ថាបនាផ្លូវបន្ថែម. ការដាក់សន្ទះទឹកប្រពន្ធ័លូបង្ហូរទឹកតាមដងផ្លូវ. ការស្តារប្រឡាយទឹក.បញ្ហាគ្រឿងញៀន.បញ្ហាអនាម័យបរិស្ថាននៅតាមដងផ្លូវ.បញ្ហាក្មេងទំនើង.ជាដើម ។ក្នុងនោះប្រជាពល រដ្ឋបានសាទរទទួលយកការបកស្រាយនិងឆ្លើយតបវិញចំនួន ១១ សំណូមពរ ។ ដោយឡែកចំពោះសំណូមពរមួយចំនួនទៀតលោក ស្រី សំបូរ មេឃុំកណ្តឹង បានឆ្លើយតបថាបន្ទាប់ពីចប់ពីអង្គវេទិកានេះទៅនឹងជួបប្រជុំគ្នា ដោយសន្យាថានឹងដោះស្រាយឲ្យបានរាល់បញ្ហា នៅក្នុងឆ្នាំ២០២៦ ខាងមុខ ។ ទន្ទឹមនិងនេះដើម្បីឲ្យការលប់បំបាត់រាល់បញ្ហាក្មេងទំនើងវិញខាងសមត្ថកិច្ចមូលដ្ឋានក៍បានស្នើឲ្យឪពុកម្តាយនិងអាណាព្យាបាលទាំងឡាយចូលរួមអប់រំណែនាំដល់កូនចៅរបស់ខ្លួនដើម្បីប្រែក្លាយខ្លួនជាកូនល្អ ជាយុវជនល្អនៅក្នុងសង្គម។ក្រៅពីការកោតសសើរដល់អាជ្ញាធរភូមិឃុំដែលបានខិតខំកសាងរាល់ប្រពន្ធ័ហេដ្ឋារចនាសម្ព័ន្ធនានា .បំពេញបាននូវសេវាការតម្រូវការចាំបាច់.ព្រមទាំងបានផ្តល់ប្រយោជន៍ជូនប្រជាពលរដ្ឋបានគាប់ប្រសើរ ក៍ដូចជាកិច្ចខិតខំប្រឹងប្រែងលុបបំបាត់ និងបង្រ្កាបរាល់បទល្មើសទាំង ឡាយបានជា បន្តបន្ទាប់ពីសំណាក់កម្លាំងមានសមត្ថកិច្ចដើម្បីសុខសុវត្ថិភាពក្នុងមូលដ្ឋាននោះ។ ឯកឧត្តម គូន សារឿន អនុប្រធាន តំណាងឲ្យឯកឧត្តម ឈិត បូរ៉ាវុធ ដែលជាប្រធានក្រុមការងាររាជរដ្ឋាភិបាលចុះមូលដ្ឋានឃុំកណ្ដឹង ស្រុកបាទី ខេត្តតាកែវនៅមុនបញ្ចប់នៃវេទិការសាធារណះនាវេលាថ្ងៃនេះក៍បានសំណូមពរឲ្យបងប្អូនប្រជាពលរដ្ឋក្នុងមូលដ្ឋានទាំងអស់ត្រូវថែរក្សាឲ្យបាននូវកត្តាសុខសន្តិភាពនិងចូលរួម រក្សាការពារនូវរាល់សមិទ្ធផលដែលកើតមាននានានៅក្នុងមូលដ្ឋានឃុំកណ្តឹងទាំងមូលនេះឲ្យបានស្ថិត ស្ថេរគង់វង្សបានយូរអង្វែងផងដែរ៕ អត្ថបទ.ភារម្យ

ឯកឧត្ដមរដ្ឋមន្ត្រី ជា វ៉ាន់ដេត បានអញ្ជើញដឹកនាំគណៈប្រតិភូចូលរួមកិច្ចប្រជុំថ្នាក់រដ្ឋមន្ត្រីសហគមន៍ទូរគមនាគមន៍អាស៊ីប៉ាស៊ីហ្វិក នៅទីក្រុងតូក្យូ ប្រទេសជប៉ុន

ទីក្រុងតូក្យូ៖ កាលពីថ្ងៃទី៣០-៣១ ខែឧសភា ឆ្នាំ២០២៥ ឯកឧត្ដម ជា វ៉ាន់ដេត រដ្ឋមន្ត្រីក្រសួងប្រៃសណីយ៍និងទូរគមនាគមន៍ (ក.ប.ទ.) បានអញ្ជើញដឹកនាំគណៈប្រតិភូចូលរួមកិច្ចប្រជុំថ្នាក់រដ្ឋមន្ត្រីសហគមន៍ទូរគមនាគមន៍អាស៊ីប៉ាស៊ីហ្វិក (Asia-Pacific Telecommunity Ministerial Meeting- APTMM) នៅទីក្រុងតូក្យូ ប្រទេសជប៉ុន ដោយមានការចូលរួមពីរដ្ឋមន្រ្តីនិងតំណាងពីក្រសួងទទួលបន្ទុកទូរគមនាគមន៍និងបច្ចេកវិទ្យាព័ត៌មាននិងគមនាគមន៍ នៃបណ្តាប្រទេសនៅតំបន់អាស៊ីប៉ាស៊ីហ្វិក ចំនួន ៣៣ប្រទេស សហភាពទូរគមនាគមន៍អន្តរជាតិ (ITU) អង្គការអន្តរជាតិ ដៃគូអភិវឌ្ឍ និងវិស័យឯកជន សរុប ២១៦នាក់។កិច្ចប្រជុំ APTMM ឆ្នាំ២០២៥ ក្រោមប្រធានបទ “ការចាប់យកបច្ចេកវិទ្យាឈានមុខចុងក្រោយសម្រាប់បរិវត្តកម្មឌីជីថលប្រកបដោយនិរន្តរភាព បរិយាប័ន្ន និងសមធម៌ នៅក្នុងតំបន់អាស៊ីប៉ាស៊ីហ្វិក” បានពិនិត្យនិងអនុម័តសេចក្តីថ្លែងការណ៍ ហៅថា “សេចក្តីថ្លែងការណ៍តូក្យូ” ដែលជាផែនទីបង្ហាញផ្លូវសម្រាប់រយៈពេល5ឆ្នាំបន្ទាប់ ពាក់ព័ន្ធនឹងការតភ្ជាប់ឌីជីថល សហគ្រិនភាពនិងនវានុវត្តន៍ឌីជីថល សុវត្ថិភាព និងទំនុកចិត្ត ការកសាងសមត្ថភាពនិងបរិយាបន្នឌីជីថល និរន្តរភាព និងកិច្ចសហការនិងភាពជាដៃគូ។ ឯកឧត្ដមរដ្ឋមន្ត្រីបានថ្លែងសន្ទរកថាក្នុងកិច្ចប្រជុំ ដោយរំលេចអំពីកិច្ចខិតខំប្រឹងប្រែងរបស់កម្ពុជាក្នុងការជំរុញនវានុវត្តន៍ឌីជីថលប្រកបដោយបរិយាបន្ន រួមមាន (១) ការជំរុញការកសាងប្រព័ន្ធអេកូឡូស៊ីនវានុវត្តន៍ឌីជីថល (២) ការបណ្តុះបណ្តាលធនធានមនុស្សលើជំនាញបច្ចេកវិទ្យាឌីជីថល ចាប់ពីអក្ខរកម្មមូលដ្ឋានដល់កម្រិតខ្ពស់ រួមបញ្ចូលការផ្តល់អាហារូបករណ៍និងការបង្កើតមជ្ឈមណ្ឌលបច្ចេកវិទ្យាសហគមន៍ (៣) ការលើកកម្ពស់ជំនាញឌីជីថល ផ្អែកលើផែនទីបង្ហាញផ្លូវអភិវឌ្ឍន៍ជំនាញឌីជីថលកម្ពុជា (៤) ការរៀបចំយុទ្ធសាស្ត្រជាតិស្តីពីបញ្ញាសិប្បនិម្មិត (៥) ការដាក់ឱ្យប្រើថ្នាលផ្ទៀងផ្ទាត់ឯកសារ VERIFY.GOV.KH និង (៦) ការអភិវឌ្ឍថា្នល DG SuperApp។ក្នុងឱកាសនៃកិច្ចប្រជុំនេះ ឯកឧត្ដមរដ្ឋមន្ត្រីក៏បានជួបពិភាក្សាការងារជាមួយតំណាង ITU ដើម្បីបន្តពង្រឹងកិច្ចសហការរវាងស្ថាប័នទាំងពីរ។ តំណាង ITU បានអបអរសាទរនិងកោតសរសើរនូវសមិទ្ធផលនានាដែល ក.ប.ទ. សម្រេចបាននាពេលកន្លងមក និងបានសន្យាបន្តការគាំទ្រចំពោះដំណើរការបរិវត្តកម្មឌីជីថលនៅកម្ពុជាបន្តទៀត ព្រមទាំងបានលើកឡើងអំពីការជួយផ្សព្វផ្សាយនិងជំរុញការទទួលស្គាល់នូវថ្នាលផ្ទៀងផ្ទាត់ឯកសារ VERIFY.GOV.KH និងការបង្កើតមជ្ឈមណ្ឌលបច្ចេកវិទ្យាសហគមន៍ នៅក្នុងកិច្ចប្រជុំជាមួយបណ្តាប្រទេសផ្សេងៗ។ទន្ទឹមនឹងនេះ ឯកឧត្ដមរដ្ឋមន្ត្រីបានជួបពិភាក្សាទ្វេភាគីជាមួយរដ្ឋមន្ត្រីក្រសួងកិច្ចការផ្ទៃក្នុងនិងទូរគមនាគមន៍របស់ប្រទេសជប៉ុន ដោយផ្តោតលើ (១) កិច្ចសហការក្នុងការកសាងមជ្ឈមណ្ឌលទិន្នន័យជាតិ (២) ការសិក្សាអំពីការបង្កើតប្រព័ន្ធគមនាគមន៍បើកចំហនិងមានសុវត្ថិភាព (Open RAN) និង(៣) ការវិនិយោគរបស់ក្រុមហ៊ុនបច្ចេកវិទ្យាឌីជីថលរបស់ជប៉ុនមកកម្ពុជា ជាពិសេសក្នុងសួនឌីជីថល។ ជាមួយគ្នានេះ ឯកឧត្ដមរដ្ឋមន្ត្រីក៏បានជួបពិភាក្សាការងារជាមួយរដ្ឋមន្រ្តីក្រសួងសន្តិសុខផ្ទៃក្នុងនិងបច្ចេកវិទ្យានៃប្រទេសម៉ាល់ឌីវ ដោយផ្តោតលើ (១) វឌ្ឍនភាពនៃបរិវត្តកម្មឌីជីថល (២) ការចែករំលែកបទពិសោធ និង(៣) ការណែនាំនិងជំរុញការប្រប្រាស់ថ្នាលផ្ទៀងផ្ទាត់ឯកសារ VERIFY.GOV.KH សម្រាប់ប្រទេសម៉ាល់ឌីវ។គួរបញ្ជាក់ផងដែរថា កិច្ចប្រជុំថ្នាក់រដ្ឋមន្ត្រីសហគមន៍ទូរគមនាគមន៍អាស៊ីប៉ាស៊ីហ្វិក រៀបចំឡើងរៀងរាល់៥ឆ្នាំម្តង ដោយមានការចូលរួមពីរដ្ឋមន្រ្តីទទួលបន្ទុកទូរគមនាគមន៍និងនិងបច្ចេកវិទ្យាព័ត៌មាននិងគមនាគមន៍ ទាំង៣៨ជាសមាជិកនៃបណ្តាប្រទេសនៅតំបន់អាស៊ីប៉ាស៊ីហ្វិក អង្គការអន្តរជាតិ ដៃគូអភិវឌ្ឍ និងវិស័យឯកជន។

សិស្សានុសិស្សនៅស្រុកបន្ទាយស្រីជិត២០០០នាក់ ទទួលបានសេវាព្យាបាលពីក្រុមគ្រូពេទ្យ TYDA

នៅព្រឹកថ្ងៃទី៣១ ខែ ឧសភា ឆ្នាំ ២០២៥ នេះសមាគមគ្រូពេទ្យស្ម័គ្រចិត្តយុវជនសម្តេចតេជោ (TYDA) ចុះពិនិត្យ និងព្យាបាលជំងឺ ទូទៅ និងសុខភាពមាត់ធ្មេញ ជូនសិស្សានុសិស្សជិត២០០០នាក់ មកពីសាលាបឋមសិក្សាចំនួន៣ នៃស្រុកបន្ទាយស្រី មានសាលាបឋមសិក្សាព្រះដាក់ សាលាបឋមសិក្សា ស្រះស្រង់ និងសាលាបឋមសិក្សាតាប៉ាង ដែលពិធីនេះធ្វើឡើងនៅបរិវេណសាលាបឋមសិក្សាព្រះដាក់ ភូមិព្រះដាក់ ឃុំព្រដាក់ ស្រុកបន្ទាយស្រី ខេត្តសៀមរាប។ ក្រោមអធិបតីភាព ឯកឧត្តមបណ្ឌិត ពេជ សោភ័ន ទេសរដ្ឋមន្ត្រីទទួលបន្ទុក បេសកកម្មពិសេស និងជាប្រធានលេខាធិការដ្ឋាន គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ «គ វ អ» តំណាងដ៏ខ្ពង់ខ្ពស់លោកជំទាវបណ្ឌិត ពេជ ចន្ទមុន្នី ហ៊ុនម៉ាត។ជាកិច្ចចាប់ផ្តើមលោក ស៊ឹម ស៊ូយេង អនុប្រធានប្រតិបត្តិសមាគមគ្រូពេទ្យស្ម័គ្រចិត្តយុវជន សម្តេចតេជោ បានផ្តាំផ្ញើការសួរសុខទុក្ខ ពីសំណាក់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ចំពោះ លោកគ្រូ អ្នកគ្រូ ក្មួយៗដែលមកទទួលសេវានាឱកាសនេះទាំងអស់។ លោក ស៊ូយេង បានអោយដឹងទៀតថា ក្រុមគ្រូពេទ្យ TYDA ដឹកនាំដោយលោកបណ្ឌិត ពេជ ចន្ទមុន្នី ហ៊ុនម៉ាណែត ជាង១០ឆ្នាំមកហើយ ប្រកបដោយក្តីស្រឡាញ់យកចិត្តទុកដាក់ដ៏ជ្រាលជ្រៅចំពោះការព្យាបាលដល់ប្រជាពលរដ្ឋទូទៅនៅទូទាំងប្រទេស ជាក់ស្តែងថ្ងៃនេះ ក្រោមការចង្អុលបង្ហាញរបស់លោកជំទាវបណ្ឌិត លោកបានដឹកនាំគ្រូពេទ្យជាង៣០០នាក់ ចុះមកព្យាបាលជំងឺទូទៅ ជាពិសេសសុខភាពមាត់ធ្មេញ ជូនលោក អ្នកគ្រូនិងសិស្សានុសិស្សនៅទីនេះ ដោយមិនមានការគិតថ្លៃអ្វីទាំងអស់ ប្រកបដោយក្តីស្រឡាញ់ និងស្នាមញញឹម ក្នុងន័យជម្រុញលើកកម្ពស់សុខភាពសហគមអោយកាន់តែប្រសើរ។ឯកឧត្តមបណ្ឌិត ពេជ សោភ័ន ទេសរដ្ឋមន្ត្រីទទួលបន្ទុក បេសកកម្មពិសេស និងជាប្រធានលេខាធិការដ្ឋាន គណៈកម្មាធិការជាតិជំរុញការអនុវត្តវិធានការគន្លឹះក្នុងវិស័យអប់រំ «គ វ អ» សូមកោតសសើរចំពោះក្រុមគ្រូពេទ្យ TYDA ទាំងអស់ ដែលបានលះបង់កម្លាំងចិត្តខិតខំចុះព្យាបាលជំងឺជូនប្រជាពលរដ្ឋអស់រយះពេលជាងច្រើនឆ្នាំកន្លងមកនេះ ក្រោមការដឹកនាំរបស់លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត មិនថាព្យុះភ្លៀង រងាក្តៅណាទេ គឺដើម្បីសុខមាលភាពប្រជាពលរដ្ឋ។ទន្ទឹមនឹងនេះដែរឯកឧត្តម បានលើកឡើងថា រាជរដ្ឋាភិបាលកម្ពុជា នីតិកាលទី៧ នៃរដ្ឋសភា បានបង្កើតគណៈកម្មាធិការជាតិ ដើម្បីជម្រុញការអនុវត្តវិធានការគន្លឹះក្នុងវិស័យអប់រំ (គ.វ.អ.) ហើយគណៈកម្មាធិការជាតិនេះ មានសម្តេចធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ជាប្រធាន។ឯកឧត្តមបណ្ឌិតទេសរដ្ឋមន្ត្រី បានបញ្ជាក់ផងដែរថា នៅក្នុង ការអនុវត្តការងារ លេខាធិការដ្ឋាននេះ ដើរតួនាទីជាសេនាធិការ របស់ គ.វ.អ ក្នុងគោលបំណងជួយគាំទ្រដល់ការ លើកកម្ពស់ ការអប់រំតាមរយៈ ការពង្រឹងអភិបាលកិច្ចសាលារៀន, ការពិនិ ត្យកែលម្អកម្មវិធីសិក្សា និងរៀបចំកម្មវិធីសិក្សា និងសកម្មភាព ក្រៅម៉ោងសិក្សាឲ្យស្របតាមតម្រូវការក្នុងពង្រឹងចំណេះដឹង វិន័យ សីលធម៍ និងឥរិយាបថសិស្ស, ការយកចិត្តទុកដាក់ លើសុខភាពសិស្សតាមរយៈកម្មវិធីអាហារូបត្ថម្ភ ដល់កុមារ និង ការត្រួតពិនិត្យគុណភាពចំណីអាហារនៅតាមសាលារៀន និង ការជំរុញនិងលើកទឹកចិត្ត ការចូលរួមរបស់មាតាបិតា អា ណាព្យាបាល និងសហគមន៍ក្នុងការអប់រំ ។ រចនាសម្ព័ន្ឋលេខា ធិការដ្ឋាន គ.វ.អ រួមមានផ្នែកចំណុះចំនួន ០៤ ៖ ផ្នែកគោល នយោបាយ, ផ្នែកគាំទ្រសាលារៀន, ផ្នែកតាមដាន ត្រួតពិនិត្យ និង វាយតម្លៃ, និង ផ្នែករដ្ឋបាល ហិរញ្ញវត្ថុ និងទំនាក់ទំនង សាធារណៈ ។លោកគ្រូអ្នកគ្រូដែលជាគណៈគ្រប់គ្រងសាលារៀនទាំងបីខាងលើសូមគោរពថ្លែងអំណរគុណដល់ក្រុមគ្រូពេទ្យ TYDA ដែលមានលោកជំទាវបណ្ឌិត ពេជ ចន្នមុន្នី ជាប្រធាន បានចាត់អោយក្រុមគ្រូពេទ្យជំនាញ ចុះមកព្យាបាលជំងឺជូនសិស្សានុសិស្សរបស់ពួកគាត់ ដល់សាលារៀន ក្នុងការរួមចំណែកលើកកម្ពស់សុខភាពសហគមជាពិសេសកុមា ដែលជាទំពាំងស្នងឫស្សី នេះជាការលើកឡើងរបស់ពួកគាត់។សូមជម្រាបថាសកម្មភាពពិនិត្យ និងព្យាបាលជំងឺទូទៅ និងសុខភាពមាត់ធ្មេញជូន លោកគ្រូ អ្នកគ្រូ និងសិស្សានុសិស្សនៅសាលាទាំង៣ខាងលើនេះ សរុបចំនួន ១៧៤៩នាក់ ស្មើរនឹង ៣២៨៤ករណី និងបញ្ជូលទៅព្យាបាលបន្តនៅភ្នំពេញមានចំនួន១៣ករណី ក្រោមជំនួយឧបត្ថមទាំងស្រុងពីសម្តេចធិបតី ហ៊ុន ណែត និងលោកជំទាវបណ្ឌិតផ្ទាល់៕ អត្ថបទ: សំ ងីម

វិទ្យាស្ថានជាតិពហុបច្ចេកទេសអង្គរប្រកាសផ្ដល់អាហារូបករណ៍ ១០០% ចំនួន ២,៤០០កន្លែង លើការបណ្ដុះបណ្ដាលជំនាញវិជ្ជាជីវៈដល់យុវជន

សៀមរាប៖ វិទ្យាស្ថានជាតិពហុបច្ចេកទេសអង្គរ ខេត្តសៀមរាប បានប្រកាសផ្ដល់អាហារូបករណ៍ ១០០% ចំនួន២,៤០០កន្លែង សម្រាប់ការបណ្ដុះបណ្ដាលជំនាញវិជ្ជាជីវៈកម្រិត១ ដល់ក្រុមយុវជនមកពីគ្រួសារក្រីក្រ និងគ្រួសារងាយរងហានិភ័យ ព្រមទាំងមានប្រាក់ឧបត្ថម្ភចំនួន២៨ម៉ឺនរៀលក្នុងមួយខែថែមទៀត។ អាហារូបករណ៍ទាំង២,៤០០កន្លែងនេះ ត្រូវបានបែងចែកទៅតាមមុខជំនាញដែលសុទ្ធតែមានតម្រូវការខ្ពស់ក្នុងទីផ្សារ រួមមាន៖ (១).ជំនាញបរិក្ខារត្រជាក់ក្នុងគេហដ្ឋាន ៤៨០នាក់ (២).ជំនាញដំឡើងបណ្ដាញអគ្គិសនីក្នុងអគារ ៤៨០នាក់ (៣).ជំនាញថែទាំនិងជួសជុលរថយន្ត ៤២០នាក់ (៤).ជំនាញធុរកិច្ចភេសជ្ជៈ ៣០០នាក់ (៥).ជំនាញផលិតនំ ៣០០នាក់ (៦).ជំនាញការងារកំបោរ ១៨០នាក់ (៧).ជំនាញដំឡើងនិងថែទាំកាមេរ៉ាសុវត្ថិភាព ១២០នាក់ (៨).ជំនាញសេវាកម្មកុំព្យូទ័រ ៦០នាក់ (៩).ជំនាញរចនាក្រាហ្វិកដោយកុំព្យូទ័រ ៦០នាក់។ សម្រាប់យុវជនគោលដៅទាំងពីរក្រុមខាងលើដែលចាប់អារម្មណ៍ក្នុងការដាក់ពាក្យ សូមទាក់ទងមកកាន់វិទ្យាស្ថានជាតិពហុបច្ចេកទេសអង្គរ ដែលមានទីតាំងតាមបណ្ដោយមហាវិថីសម្ដេចវិបុលបញ្ញា សុខ អាន ឬទាក់ទងតាមរយៈទូរស័ព្ទលេខ៖ ០៨៧ ៥២៧ ៨៧៦ / ០៧៧ ៤៨៩ ៣៩៨ / ០៩៧ ៣៧២ ១៦២៧។ ក្រៅពីក្រុមយុវជនគោលដៅមកពីគ្រួសារក្រីក្រ និងគ្រួសារងាយរងហានិភ័យ វគ្គបណ្ដុះបណ្ដាលពិសេសនេះក៏បើកចំហសម្រាប់យុវជន និងប្រជាពលរដ្ឋទូទៅ រួមទាំងកម្មករ-កម្មការិនីផងដែរ ដែលអាចដាក់ពាក្យចូលសិក្សាជំនាញបច្ចេកទេសវិជ្ជាជីវៈនេះបានដោយឥតបង់ថ្លៃដូចគ្នា គ្រាន់តែមិនទទួលបានប្រាក់ឧបត្ថម្ភប្រចាំខែពីរាជរដ្ឋាភិបាល។ គួរបញ្ជាក់ដែរថា ការផ្ដល់ជូនអាហារូបករណ៍នេះ គឺជាការអនុវត្តកម្មវិធីគោលនយោបាយបណ្ដុះបណ្ដាលបច្ចេកទេសនិងវិជ្ជាជីវៈ (TVET) ១.៥លាននាក់ របស់រាជរដ្ឋាភិបាលនីតិកាលទី៧ នៃរដ្ឋសភា ក្រោមអាណត្តិដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងទិសដៅលើកកម្ពស់ជីវភាពយុវជនមកពីគ្រួសារក្រីក្រ និងគ្រួសារងាយរងហានិភ័យ តាមរយៈការផ្ដល់ឱ្យពួកគេនូវជំនាញជាក់លាក់មួយ និងមានលទ្ធភាពទទួលបានប្រាក់ចំណូលសមរម្យ៕

ជនល្មើសឆបោកតាមអនឡាញ ជាង២៤០០០នាក់ត្រូវបានបង្រ្កាប ខ្លះត្រូវបានបណ្តេញចេញពីកម្ពុជា

ឯកឧត្តម សន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ និងជាប្រធានគណៈកម្មការចំពោះកិច្ចបង្ក្រាបបទល្មើសឆបោកតាមប្រព័ន្ធអនឡាញបានបញ្ជាក់ ក្នុងសន្និសីទកាសែតស្តីពីលទ្ធផលនៃកិច្ចខិតខំប្រឹងប្រែងរបស់ក្រសួងមហាផ្ទៃ ក្នុងការបង្ការទប់ស្កាត់ និងបង្រា្កបបទល្មើសឆបោកតាមអនឡាញ និងអំពើជួញដូរមនុស្ស នៅស្តីទីក្រសួងមហាផ្ទៃ នាព្រឹកថ្ងៃទី៣០ ខែឧសភាអោយដឹងថា គិតត្រឹមខែឧសភា ឆ្នាំ២០២៥នេះ មន្ត្រីក្រសួងមហាផ្ទៃ បានបង្រ្កាបជនល្មើសដែលពាក់ព័ន្ធនឹងឧក្រិដ្ឋកម្មឆបោកតាមប្រព័ន្ធអនឡាញ និងជួញដូរមនុស្សបានជាង២៤,០០០នាក់ ហើយជនល្មើសទាំងនោះ មាន៤៥សញ្ជាតិផ្សេងៗគ្នា។ ។ ក្នុងនោះដែរ ទីតាំងធំៗដែល បានបង្ក្រាបមានចំនួន៤៧ទីតាំងឯកឧត្តម បានបន្ថែមថា គិតពីថ្ងៃទី១៨ ខែសីហា ឆ្នាំ២០២២ មកត្រឹមថ្ងៃទី១៥ ខែឧសភា ឆ្នាំ២០២៥ ក្នុងចំណោមជនល្មើសជាង២៤០០០នាក់ មាន ២៣៩៩០នាក់ ត្រូវបានបណ្តេញចេញពីកម្ពុជា។ សមត្ថកិច្ចបានកសាងសំណុំរឿងពាក់ព័ន្ធនឹងអំពើឆបោកតាមអនឡាញនេះជូនទៅតុលាការ ចំនួន៣៨ករណី ដែលមានមនុស្ស២១៨នាក់ (១១សញ្ជាតិ) ក្នុងនោះ មានជនបរទេស១៩៣នាក់ និងជនជាតិខ្មែរ ២៥នាក់។ ដោយឡែក ទីតាំងបទល្មើសអំពើឆបោកតាមអនឡាញមានចំនួន១១រាជធានី-ខេត្ត ដែលមានភាគច្រើនស្ថិតនៅខេត្តព្រះសីហនុ ខណៈឧក្រិដ្ឋជន គឺជាជនជាតិចិន ភូមា ហ្វីលីពីន វៀតណាម ឥណ្ឌូណេស៊ី បង់ក្លាដេស ឥណ្ឌា និងមួយចំនួនទៀត មកពីតំបន់អាស៊ីកណ្តាល។ សូមបញ្ជាក់ថា មន្ត្រីជំនាញក្រសួងមហាផ្ទៃក៏បាន ជួយសង្គ្រោះពលរដ្ឋដែលរងគ្រោះ ក្នុងបទល្មើសឆបោកតាមអនឡាញ និង ជួញដូរមនុស្ស បានចំនួន ៤៨៤០នាក់ ដែលមាន២៧សញ្ជាតិ៕

ការបង្ក្រាបបទល្មើសឆបោកតាមប្រព័ន្ធអនឡាញ និងជួញដូរមនុស្សនៅតែជាអាទិភាពរបស់ក្រសួងមហាផ្ទៃ

រាជរដ្ឋាភិបាលកម្ពុជាតាមរយះក្រសួងមហាផ្ទៃ នៅតែបន្ដធ្វើ ការងារប្រយុទ្ធប្រឆាំងអំពើជួញដូរមនុស្ស និងការឆបោកតាមប្រព័ន្ធអនឡាញ ដែលជាក្ដីកង្វល់រួម របស់ពិភពលោកមិនមែនសម្រាប់តែកម្ពុជាមួយនោះទេ។លោកជំទាវ ជូ ប៊ុនអេង ដ្ឋលេខាធិការក្រសួងមហាផ្ទៃ និងជាអនុប្រធានអចិន្ដ្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បានថ្លែង ក្នុងសន្និសីទសារព័ត៌មាន នៅថ្ងៃទី៣០ ខែឧសភា ឆ្នាំ២០២៥ អោយដឹងថា មកដល់ពេលនេះ គ្រប់ប្រទេសទាំងអស់នៅក្នុងពិភពលោក បានបង្ហាញនូវការយល់ឃើញដូចៗគ្នាថា ឧក្រិដ្ឋកម្មនៃការជួញដូរមនុស្ស កាន់តែមានភាពស្មុគស្មាញ និង កាន់តែពិបាកទប់ស្កាត់ ក្នុងចំណោមបទល្មើសទាំងឡាយ ដែលជាបទល្មើសឆ្លងដែនពីព្រោះតែក្រុមជនល្មើសមាននៅគ្រប់ទីកន្លែង រហូតមានអង្គការចាត់តាំងនៅពីខាងក្រោយខ្នង ។ ប៉ុន្ដែសម្រាប់កម្ពុជា នៅតែសហការយ៉ាងស្អិតរមួតជាមួយបណ្ដាប្រទេសនានានៅលើពិភពលោក ដើម្បីប្រយុទ្ធប្រឆាំងបទល្មើសនេះ។លោកជំទាវ ជូ ប៊ុនអេង បានបន្ថែមទៀតថា កន្លងមកមន្ត្រីជំនាញពាក់ពន្ធ័របស់ក្រសួងមហាផ្ទៃ បាន បង្ក្រាប ទប់ស្កាត់ បទល្មើស ដែលឈានទៅដល់ការចាប់ឃាត់ខ្លួនជនល្មើសដែលភាគច្រើនជាជនបរទេស យកមកផ្តន្ទាទោស តាមច្បាប់ និងខ្លះទៀត ត្រូវបានបណ្តេញចេញ ជាច្រើនពាន់នាក់។ នៅពេលនេះ រាជរដ្ឋាភិបាលកម្ពុជានៅតែ ប្ដេជ្ញាចិត្តយ៉ាងមុតមាំបន្តសហការជាមួយគ្រប់បណ្តាប្រទេសនៅលើពិភពលោក ដើម្បីទប់ស្កាត់ អោយបានកាន់ប្រសើរឡើង។ កិច្ចការងារទាំងអស់នេះកម្ពុជាបាន អនុវត្តតាំងពីពេលដែលកម្ពុជាមិនទាន់ស្គាល់អ្វី ដែលហៅថា ការជួញដូរមនុស្ស ឬឆបោកតាមប្រព័ន្ធអនឡាញមកម្លេះ។ ឯកឧត្តមសន្តិបណ្ឌិត សុខ ផល រដ្ឋលេខាធិការក្រសួងមហាផ្ទៃ បានថ្លែងអះអាងថាបទល្មើសឆបោកតាមប្រពន្ធ័អនឡាញ និង អំពើជួញដូរមនុស្សកើតឡើងដំបូងនៅអំឡុងឆ្នាំ១៩៩០ ដែលផ្តើមចេញការប្រើប្រាស់ទំនាក់ទំនងតាមអ៉ីម៉ែល រហូតវិវត្តន៍ដល់ពេលបច្ចុប្បន្ន បច្ចេកវិទ្យាកាន់តែទំនើប នាំអោយជនល្មើស កាន់តែបង្កើនវិធីសាស្រ្តថ្មីៗ ដើម្បីឆបោកតាមអនឡាញនេះ។ កម្ពុជាមិនមែនជាបង្កើតអោយមានបទល្មើសទាំងនោះឡើយ ប៉ុន្តែកម្ពុជាក៏ជាប្រទេសដែលរងគ្រោះ ព្រោះតែក្រុមជនល្មើសបានយកកម្ពុជាទីតាំងដើម្បីប្រព្រឹត្តិបទល្មើស។ ឯកឧត្តមសន្តិបណ្ឌិត សុខ ផល បានបន្តទៀតថា ក្រសួងមហាផ្ទៃ បានប្រើប្រាស់នូវយុទ្ធសាស្ដ្រចំនួន៤ធំៗ រួមមាន ការបង្ការ, ទប់ស្កាត់, ការអនុវត្តច្បាប់ និងការគាំពារសង្គមសម្រាប់ជនរងគ្រោះ។ លោកស្រីសង្កត់ធ្ងន់ទៀតថា ក្រៅពីយុទ្ធសាស្ដ្រទាំង៤នេះហើយក៏ទាមទារដាច់ខាតឲ្យមានកិច្ចសហការជាមួយស្ថាប័នពាក់ព័ន្ធទាំងជាតិ និងអន្ដរជាតិ ព្រមទាំងការចូលរួមរបស់ភាគីពាក់ព័ន្ធទាំងអស់ផងដែរ។គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ក៏ដូចជាក្រសួងមហាផ្ទៃ តាំងពីដំណាក់ការនៃការដឹកនាំរបស់សម្ដេចក្រឡាហោម ស ខេង រហូតមកដល់ឯកឧត្តម អភិសន្ដិបណ្ឌិត ស សុខា គឺបានផ្សព្វផ្សាយនូវរបាយការណ៍នៃកិច្ចប្រតិបត្តិការជារៀងរាល់ឆ្នាំជូនសាធារណៈជន ដើម្បីអាចសិក្សាបាននូវអ្វីដែលជាលទ្ធផល នៃកិច្ចខិតខំប្រឹងប្រែងរបស់រាជរដ្ឋាភិបាលកម្ពុជា លើការងារប្រយុទ្ធប្រឆាំងអំពើជួញដូរមនុស្ស។ កម្ពុជាបានប្រើប្រាស់យន្ដការដែលមានស្រាប់ចាប់តាំងពីឆ្នាំ២០០៧ រហូតដល់ឆ្នាំ២០១៤ បានបង្កើតនូវយន្ដការរួមមួយ ដែលហៅថា គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស ហៅកាត់ (គ.ជ.ប.ជ) មាន២២ក្រសួង ស្ថាប័នជាសមាជិក និង៥អង្គភាពជំនាញ ចូលរួមក្នុងប្រតិបត្តិការ ក្នុងនោះក៏មានរដ្ឋបាលថ្នាក់ជាតិ និងថ្នាក់ក្រោមជាតិផងដែរ ៕

រដ្ឋបាលខេត្តបន្ទាយមានជ័យ និងពលរដ្ឋប្រមាណ១០០០នាក់ជិះកង់ប្រមូលថវិការជួយដល់មន្ទីរពេទ្យគន្ធបុប្ផា

រដ្ឋបាលខេត្តបន្ទាយមានជ័យនិងពលរដ្ឋបានរៀបចំបេីកព្រឹត្ដិការណ៍ជិះកង់ ដើម្បីប្រមូលថវិកាពីការចូលរួមរបស់សប្បុរសជន ជួយដល់មន្ទីរពេទ្យគន្ធបុប្ផា ក្នុងយុទ្ធនាការ " ១ម៉ឺននាក់ ១ម៉ឺនរៀល" ដែលជាការផ្តួចផ្តើមដោយលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ដើម្បីជួយដល់មន្ទីរពេទ្យគន្ធបុប្ផា ក៏ដូចជាជួយសង្គ្រោះដល់កុមារកម្ពុជា។ ចំពោះព្រឹត្តិការណ៍នៃការជិះកង់នោះផងដែរក៏មានការចូលរួមពីបណ្ដា មហាជន មន្ទីរ អង្គភាព ប្រជាពលរដ្ឋសិស្សានុសិស្សបានចូលរួមជិះកង់ក្នុងព្រឹត្តិការណ៍នេះប្រមាណ១០០០នាក់ ដោយជិះជុំវិញក្រុងសិរីសោភ័ណ ធ្វេីឡេីងនៅព្រឹកថ្ងៃទី៣១ ខែឧសភា ឆ្នាំ ២០២៥នេះ។ថ្លែងក្នុងការបេីកព្រឹត្តការជិះកង់នោះដែរឯកឧត្ដម អភិបាលខេត្តបន្ទាយមានជ័យបញ្ជាក់ ថា ការរៀបចំព្រឹត្តិការណ៍ តាមរយៈយុទ្ធនាការជិះកង់នេះ គឺជាផ្នែកមួយដើម្បីរួមចំណែកក្នុងការចូលរួមយុទ្ធនាការ ១ម៉ឺនរៀល ១ម៉ឺននាក់ សម្រាប់កុមារនៅកម្ពុជា ដែលយុទ្ធនាការនេះមានគោលបំណង ជំរុញចលនាកៀរគរការបរិច្ចាគឱ្យកាន់តែផុសផុល និងសកម្មបន្ថែមទៀត ក្នុងចំណោមមន្រ្តីរាជការ ថ្នាក់ដឹកនាំរដ្ឋបាល មន្ទីរ/អង្គភាព អាជីវករ ពាណិជ្ជករ ម្ចាស់សហគ្រាស/ក្រុមហ៊ុន និងសប្បុរសជនទាំងអស់ ក្នុងខេត្តបន្ទាយមានជ័យ ក្នុងមហាចលនាមនុស្សធម៌របស់ជាតិ ក្នុងស្មារតី “ខ្មែរជួយខ្មែរ”។ ម្យ៉ាងទៀតការរៀបចំយុទ្ធនាការជិះកង់របស់យើងនៅថ្ងៃនេះ គឺដើម្បីសុខភាពល្អទាំងអស់គ្នាផង ជាពិសេស ក៏ដូចជាការចូលរួមអបអរសាទរ “ទិវាកុមារអន្តរជាតិ ១មិថុនា” ផង និងដើម្បីជាការរម្លឹកឱ្យមានការបន្តការបរិច្ចាគជូន មូលនិធិគន្ធបុប្ផាកម្ពុជា ក្នុងគោលបំណងរួមសាមគ្គីគ្នា នាំក្តីសង្ឃឹម និងស្នាមញញឹមដល់ ទារក និងកុមារ នៅកម្ពុជា។ជាមួយគ្នានោះឯកឧត្តម អភិបាលខេត្ត បានអំពាវនាវដល់សប្បុរសជន ឲ្យចូលរួមថវិកាទៅតាមលទ្ធភាព ក្នុងយុទ្ធនាការនេះ ដើម្បីជាការចូលរួមចំណែកក្នុងការលើកកម្ពស់ជួយដល់កុមារកម្ពុជា ដែលកំពុងសម្រាកព្យាបាលនៅក្នុងមន្ទីរពេទ្យគន្ធបុប្ផា បានចំណាយថវិកាជាមធ្យម ប្រមាណជា១២ម៉ឺនដុល្លាអាមេរិកក្នុង១ថ្ងៃ ឬស្មើនឹងប្រមាណជាង៤៣លានដុល្លាអាមេរិកក្នុង១ឆ្នាំ៕ដោយឃិន សារិទ្ធ

នគរបាលខណ្ឌកំបូលឃាត់ម៉ូតូ ១០គ្រឿង ករណីប្រេីប្រាស់សុីម៉ាំងបំពងសំឡេង

ដោយអនុវត្តតាមផែនការដឹកនាំរបស់ ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ កាលពីយប់ថ្ងៃទី៣០ ខែឧសភា ឆ្នាំ២០២៥ កម្លាំងអធិការដ្ឋាននគរបាលខណ្ឌកំបូលបានធ្វេីការឃាត់ម៉ូតូ ចំនួន ១០គ្រឿង ករណីប្រេីប្រាស់សុីម៉ាំងបំពងសំឡេង រំខានប្រជាពលរដ្ឋ នៅចំណុចផ្លូវជាតិលេខ៤ សង្កាត់កន្ទោក ខណ្ឌកំបូល រាជធានីភ្នំពេញ។ ម៉ូតូទាំង ១០ រួមមាន ១-ម៉ូតូ ០១គ្រឿងម៉ាក Scoopy ស៊េរីឆ្នាំ២០២២ ពណ៌ខ្មៅ ពាក់ផ្លាកលេខ ភ្នំពេញ 1Kl-3215 ។២- ម៉ូតូ ០១គ្រឿងម៉ាក Honda CRF ពណ៌ ខ្មៅ ឆ្នាំ២០១៩ ពាក់ផ្លាកលេខ ភ្នំពេញ1 LQ 9238 ។៣-ម៉ូតូ ០១គ្រឿងម៉ាក Yamaha Exciter ពណ៌ផ្កាឈូក ពាក់ផ្លាកលេខ ភ្នំពេញ 1HL-5091។ ៤-ម៉ូតូ ០១គ្រឿងម៉ាក Excitor ពណ៌ សលាយខ្មៅ ឆ្នាំ២០១៦ (គ្មានផ្លាកលេខ) ។ ៥-ម៉ូតូ ០១គ្រឿងម៉ាក Honda vorio ពណ៌កាត់ស្តាំង ឆ្នាំ២០២៤ ពាក់ផ្លាកលេខ ភ្នំពេញ 1LH-8674 ។ ៦-ម៉ូតូ ០១គ្រឿងម៉ាក សូនិច ពាក់ផ្លាកលេខ បន្ទាយមានជ័យ 1C-5557 ។ ៧-ម៉ូតូ ០១គ្រឿងម៉ាក ហុងដា (SL) ពណ៌ក្រហមលាយខ្មៅ (គ្មានផ្លាកលេខ) ។៨-ម៉ូតូ ០១គ្រឿងម៉ាក Honda Wave ពណ៍ស ពាក់ផ្លាកលេខ ភ្នំពេញ 1CJ-6260 ។ ៩-ម៉ូតូ ០១គ្រឿងម៉ាក YAMAHA MZLAS ពណ៍ ប្រផេះ ឆ្នាំ២០១៨ ពាក់ផ្លាកលេខ ភ្នំពេញ 1JG-9428 ។ ១០-ម៉ូតូ ០១គ្រឿងម៉ាក Excitor ពណ៌ខ្មៅលាយស្វាយ ពាក់ផ្លាកលេខ ភ្នំពេញ 1KR-5873 ។ ក្រោយឃាត់បានកម្លាំងអធិការដ្ឋាននគរបាលខណ្ឌកំបូលបានណែនាំអប់រំ និងធ្វេីកិច្ចសន្យា ដល់អ្នកបេីបរម៉ូតូ និងតម្រូវឱ្យម្ចាស់ម៉ូតូយកបំពង់ស៊ីម៊ាំងដើមមកដោះដូរដូចដើមវិញ ទើបប្រគល់ម៉ូតូឱ្យត្រឡប់ទៅផ្ទះវិញ៕តារាវុទ្ធី

បណ្ដាញសង្គម

ព័ត៌មានថ្មីៗ

មន្ត្រីជាន់ខ្ពស់៖ កិច្ចព្រមព្រៀងហ្កាហ្សា ទំនងជិតសម្រេចបានហើយខណៈអ៊ីស្រាអែលនឹងកែប្រែការទាមទារដកកម្លាំង

លោក Trump ថាកិច្ចព្រមព្រៀងពន្ធជាមួយឥណ្ឌា ជិតសម្រេចហើយ ខណៈកិច្ចព្រមព្រៀងអឺរ៉ុប ក៏អាចទៅរួច

ការស្ទង់មតិ៖ អត្រាគាំទ្ររបស់លោក Trump លើអន្តោប្រវេសន៍ ធ្លាក់ដល់កម្រិតទាបបំផុតនៃអាណត្តិថ្មីនេះ

អ៊ីស្រាអែល បើកការវាយប្រហារផ្លូវអាកាសដ៏ខ្លាំងក្លាលើរដ្ឋធានីស៊ីរី ដោយប្តេជ្ញាការពារជនជាតិ Druze

ក្រុមផ្តល់ជំនួយហ្កាហ្សាបន្ទោសក្រុមប្រដាប់អាវុធហាម៉ាសថាជាដើមហេតុបណ្ដាលឲ្យមនុស្ស២០នាក់ ស្លាប់ក្នុងការប្រជ្រៀតជាន់គ្នា

កុមារជួបកង្វះអាហារូបត្ថម្ភទទួលការព្យាបាលនៅមន្ទីរពេទ្យ Nasser ស្ថិតក្នុងតំបន់ហ្កាហ្សា

តើហេតុអ្វីបានជាអឺរ៉ុបប្រឈមនឹងរលកកម្តៅបំបែកកំណត់ត្រា?

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877