នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ប្រមុខការទូតកម្ពុជាជួបពិភាក្សាការងារជាមួយប្រមុខការទូតប្រទេសលីទុយអានី លើការពង្រឹង និងពង្រីកកិច្ចសហប្រតិបត្តិការប្រទេសទាំងពីរ
ឧបនាយករដ្ឋមន្រ្តី ហ៊ុន ម៉ានី សាទរ​ចំពោះ​ផ្លែផ្កា​នៃ​កិច្ច​ប្រជុំ«២+២» កម្ពុជា-ចិន ហើយ​បាន​សម្រេច​ឈាន​ទៅ​ដល់កម្រិតកិច្ចប្រជុំ«៣+៣» នាពេលខាងមុខទៀត
ប្រមុខការទូតកម្ពុជាប្រកាសត្រៀមធ្វើការយ៉ាងជិតស្និទ្ធជាមួយទូតថ្មីប្រទេសនូវែលសេឡង់ ដើម្បីជំរុញកិច្ចសហប្រតិបត្តិការប្រទេសទាំងពីរឱ្យកាន់តែប្រសើរឡើង
ថ្លៃលក់រាយប្រេងឥន្ធនៈតាមស្ថានីយចាប់ថ្ងៃទី២៤ មេសានេះ សាំងឡើងបន្ដិច ខណៈ​ម៉ាស៊ូត​បន្ត​ធ្លាក់​ចុះ

ព័ត៌មានជាតិ

អ្នកនាំពាក្យ៖ ការហក់ឡើងតម្លៃប្រេង អាចនឹងប៉ះពាល់ទំនិញផលិតក្នុងស្រុក តិចតួចជាងទំនិញនាំចូល

2026/03/11 11:18:33 am        277
Facebook Telegram Linkin
អ្នកនាំពាក្យក្រសួងពាណិជ្ជកម្ម ថ្លែងថា ការហក់ឡើងតម្លៃប្រេងឥន្ធនៈលើទីផ្សារ វានឹងអាចប៉ះពាល់ដល់ទំនិញលើទីផ្សារ ជាពិសេស ទំនិញដែលនាំចូលនឹងអាចហក់ឡើងខ្ពស់ ខណៈដែលមុខទំនិញផលិត និងវេចខ្ចប់នៅក្នុងស្រុកនឹងប៉ះពាល់ដូចគ្នា តែនៅក្នុងកម្រិតតិច តូច។ឯកឧត្តម ប៉ែន សុវិជាតិ អ្នកនាំពាក្យនិងជារដ្ឋលេខាធិការក្រសួងពាណិជ្ជកម្ម បានថ្លែងប្រាប់ BTV ស្តីអំពីតម្លៃទំនិញនាំចូល និងទំនិញដែលផលិត និងវេចខ្ចប់ក្នុងស្រុក នាពេលបច្ចុប្បន្ននេះថា ជុំវិញបញ្ហាតម្លៃប្រេងឥន្ធនៈឡើងថ្លៃ ដោយសារសង្គ្រាមនៅតំបន់ មជ្ឈិមបូព៌ានេះ នឹងធ្វើឱ្យថ្លៃទំនិញសព្វសារពើ នឹងឡើងថ្លៃ ជាពិសេសមុខទំនិញដែលនាំចូលសម្រាប់បម្រើទីផ្សារក្នុងស្រុក ព្រោះបញ្ហា តម្លៃដឹកជញ្ជូន និងតម្លៃធានារ៉ាប់រងការដឹកជញ្ជូនជាអន្តរជាតិនឹងកើនឡើង។ ឯកឧត្តម បន្ថែមថា ស្របពេលនេះដែរ អ្វីដែលជាភ័ព្វសំណាង, កម្ពុជាកំពុងក្លាយខ្លួនជាប្រទេសផលិតជាបណ្តើរៗ ជាក់ស្តែង បន្ទាប់ពីការផ្ទុះជម្លោះព្រំដែនកម្ពុជា-ថៃ, ប្រជាជនកម្ពុជាបានធ្វើពហិការមិនប្រើផលិតផលថៃ ក្នុងនោះចលនានៃសកម្មភាពអាជីវកម្ម ក្នុងស្រុកក៏បានកើតឡើងយ៉ាងផុលផុស ផលិតនិងកែច្នៃគ្រឿងបរិភោគ-ឧបភោគ និងចំណីអាហារផ្សេងៗ បានកើតឡើងជាបន្តបន្ទាប់ ចំពោះផលិតផលមួយចំនួន ក៏បានឆ្លើយតបទៅនិងសេចក្តីត្រូវការក្នុងស្រុកផងដែរ។ ដូច្នេះចំពោះទំនិញដែលយើងមាន ទោះបីការ ផលិតត្រូវការប្រេង ក៏ប៉ុន្តែកំណើននៃទឹកប្រាក់ ឬតម្លៃ វាមិនធំដូចទំនិញដែលនាំចូលនោះទេ។ ឯកឧត្តម លើកឡើងបន្ថែមថា នៅក្នុង រយៈពេលខ្លីនេះ យើងពុំទាន់ឃើញឥទ្ធិពលអវិជ្ជមានណាមួយកើតឡើងនោះទេ ប៉ុន្តែនៅក្នុងរយៈពេលវែង គឺអាចឆ្លុះបញ្ចាំងអំពីថ្លៃលើ ទីផ្សារ ដែលកើតឡើងដោយសារបញ្ហាប្រេងឥន្ធនៈនេះ។ (ចំពោះទំនិញទាំងអស់នេះដែលយើងមាន ថ្វីត្បិតការផលិតនៅពឹងពាក់ប្រេង ប៉ុន្តែកំណើននៃទឹកប្រាក់ឬក៏ថ្លៃ វាប្រាកដជាមិនសូវជាធំ ដូចទំនិញដែលនាំចូលទេ) ។ លោក មៀវ សុខទ្រី ប្រធានសមាគមអ្នកផលិតចំណីអាហារកម្ពុជា លើកឡើងថា ជុំវិញទំនិញដែលផលិតក្នុងស្រុក បន្ទាប់ពី ប្រជាជនកម្ពុជាធ្វើពហិការមិនប្រើផលិតផលថៃ ឃើញថា សហគ្រាសជាច្រើនបានកើតឡើងជាបន្តបន្ទាប់ ហើយនៅក្នុងរយៈពេលដ៏ខ្លី ខាងមុខនេះ យើងនឹងមានផលិតផលកាន់តែច្រើនថែមទៀត បន្ទាប់រោងចក្រថ្មីៗដាក់ឱ្យដំណើរការបន្ថែម។ តែទោះយ៉ាងណា នៅក្នុង កាលៈទេសៈនេះ ពិភពលោកកំពុងជួបប្រឈមបញ្ហាប្រេងឥន្ធនៈ ដែលនឹងធ្វើឱ្យអតិផរណាទំនិញហក់ឡើងថ្លៃ ក្នុងនោះសម្រាប់កម្ពុជា វិញ មកដល់ពេលនេះមិនទាន់មានផលប៉ះពាល់នៅឡើយ ប៉ុន្តែបើបញ្ហាសង្គ្រាមនេះនៅអូសបន្លាយ ទំនិញគ្រប់ប្រភេទនឹងហក់ឡើង ថ្លៃជាមិនខាន។(បច្ចុប្បន្ននេះយើងមិនទាន់មានផលប៉ះពាល់អីទេ ក៏ប៉ុន្តែក្នុងរយៈពេល១០ ទៅ១៥ទៅមុខ យើងនឹងមានការឡើងថ្លៃទំនិញខ្លះហើយ) ។ឯកឧត្តម ប៉ែន សុវិជាតិ សង្កត់ធ្ងន់ថា បន្ទាប់ពីការផ្ទុះឡើងបញ្ហាប្រេងសាំងនេះ ក្រសួងពាណិជ្ជកម្មដាក់វិធានថ្មីៗបន្ទាន់ ដើម្បីរក្សា ប្រភពផ្គត់ផ្គង់សម្រាប់ការចែកចាយទីផ្សារក្នុងស្រុក និងការចេញសេចក្តីណែនាំ អនុវត្តតឹងរឹងលើស្ថានីយ៍ ឬដេប៉ូនៅទូទាំងប្រទេស មិន ឱ្យដំឡើងថ្លៃហួសហេតុ បញ្ហានេះក្រសួងតាមដានជាប្រចាំ ជាពិសេសការបើកឬបិទស្ថានីយ៍របស់ខ្លួនមិនសមស្របណាមួយ ដើម្បីទុក លក់នៅពេលប្រេងឡើងថ្លៃ៕ អត្ថបទ៖ សុន រ៉ាឌី

ស្អែកនេះ ក្រសួងការងារនឹងនាំយកឱកាសការងារជិត ១ពាន់កន្លែងទៅកាន់ខេត្តកំពង់ចាម សម្រាប់​អតីត​ពលក​រខ្មែរ និងអ្នកកំពុងស្វែងរកការងារ

2026/03/11 10:31:30 am        195
Facebook Telegram Linkin
ក្រសួងការងារ និងបណ្តុះបណ្តាលវិជ្ជាជីវៈ គ្រោងនាំយកឱកាសការងារសរុបចំនួន ៩១៩ កន្លែង​តាម​រយៈ«​វេទិកាការងារ និងយុទ្ធនាការចុះឈ្មោះអ្នកសេដ្ឋកិច្ចក្រៅប្រព័ន្ធ» ទៅកាន់​ខេត្ដ​កំពង់​ចាម សម្រាប់​អតីតពលករខ្មែរ និងអ្នកកំពុងស្វែងរកការងារ ដែលរៀបចំនៅថ្ងៃទី ១២ ខែមីនា ឆ្នាំ​២០២៦​ នៅវិទ្យាស្ថានពហុបច្ចេកទេសខេត្តកំពង់ចាម។លោក ស៊ុន មេសា អ្នកនាំពាក្យក្រសួងការងារ និងបណ្តុះបណ្តាលវិជ្ជាជីវៈ បាន​ថ្លែង​ថា «អតីត​ពលករ​ខ្មែរ និងអ្នកស្វែងរកការងារ អាចចូល​រួមវេទិការនេះចាប់ពីម៉ោង ៧:៣០ព្រឹក ដល់ម៉ោង ៤:០០​ល្ងាច ដើម្បីចាប់យកឱកាសការងារដែលខ្លួនពេញចិត្ត អាចប្រឹក្សាផ្ទាល់ពីក្រុមហ៊ុន និង​ទទួល​បាន​ព័ត៌មានអំពីដំណើរចុះឈ្មោះអ្នកសេដ្ឋកិច្ចក្រៅប្រពន្ធ័»។ បើតាមអ្នកនាំពាក្យថា ទីភ្នាក់ងារជាតិមុខរបរ និងការងារ(NEA) នៃក្រសួងការងារ និង​បណ្ដុះ​បណ្ដាល​វិជ្ជា​ជីវៈ បានសហការជា​មួយគណៈ​កម្មា​ធិការសម្រប​សម្រួល​ការ​អភិវឌ្ឍ​សេដ្ឋកិច្ច​ក្រៅ​ប្រព័ន្ធ ​និងក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដើម្បីរៀបចំវេទិកាការងារ និង​​យុទ្ធនាការចុះឈ្មោះអ្នកសេដ្ឋកិច្ចក្រៅប្រព័ន្ធ។ ការ​សហការ​នេះ​ក៏ទទួល​បាន​ការ​គាំទ្រ​ពី​អង្គការ​អន្តរជាតិ​ខាងការងារ(ILO) និងដៃគូ​អាជីវ​កម្ម​ជា​ច្រើនផ្សេងទៀត។ក្នុងកម្មវិធីនេះ អ្នកចូលរួមនឹងមានឱកាសដាក់ CV ភ្លាម និង​ទទួល​សម្ភាសន៍​ផ្ទាល់​ជាមួយ​តំណាង​ក្រុម​ហ៊ុន​ភ្លាមៗ និងអត្ថប្រយោជន៍​ជា​ច្រើន​ទៀត។ បងប្អូនចាប់អារម្មណ៍អាចទាក់ទង NEA តាម​លេខ​ ០១៧ ៤៦៧ ៤២៣ ឬ ០៨៨ ៩០៩ ៩៦៩៩ និងតាមគេហទំព័រ www.nea.gov.kh សម្រា​ប់​ព័ត៌មានលម្អិត៕

អ្នកវិនិយោគចិនមកពីក្រុងប៉េកាំង ទៅស្វែងរកឱកាសវិនិយោគនៅខេត្តកំពង់ស្ពឺ

2026/03/11 10:00:13 am        91
Facebook Telegram Linkin
កំពង់ស្ពឺ៖ ក្រុមអ្នកវិនិយោគមកពីក្រុងប៉េកាំង នៃប្រទេសចិន បានស្វែងរកឱកាសវិនិយោគ និងជួបពិភាក្សាការងារជាមួយឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ ដើម្បីបានព័ត៌មានបន្ថែម ពីសក្ដានុពលនៃខេត្តមួយនេះ ដែលកំពុងមានកំណើនស្រាប់ ផ្នែករោងចក្រ សហគ្រាស ដែលផលិតផលិតផល នាំចេញទៅក្រៅប្រទេស ហើយស្របជាមួយនេះ វិស័យកសិកម្ម និងទេសចរណ៍ ក៏មានការរីកចម្រើនដែរនោះ ។ ក្នុងជំនួបជាមួយក្រុមធុរជនប្រទេសចិន នៅថ្ងៃទី១០ ខែមីនា ឆ្នាំ២០២៦ ឯកឧត្តមបណ្ឌិតអភិបាលខេត្ត បានថ្លែងថា បច្ចុប្បន្ន ខេត្តកំពង់ស្ពឺ កំពុងទទួលបានការចាប់អារម្មណ៍ខ្លាំង ពីសំណាក់អ្នកវិនិយោគិននានា ជាពិសេសអ្នកវិនិយោគិន នៃសាធារណរដ្ឋប្រជាមានិតចិន ដែលគិតមកទល់ពេលនេះ ខេត្តមានអ្នកវិនិយោគិនចិន ប្រមាណជាង៩៥ភាគរយ ។ប៉ុន្តែយ៉ាងណាក៏ដោយ ឯកឧត្តម ជាម ច័ន្ទសោភ័ណ គូសបញ្ជាក់ថា ទន្ទឹមនឹងការចាប់អារម្មណ៍នេះ មានអ្នកវិនិយោគជាច្រើន បានចាញ់បោកឈ្មួញកណ្តាល ក្នុងការដាក់លុយឱ្យទិញដី រត់ការឯកសារគតិយុត្តផ្សេងៗ ហើយក្រោយទទួលបានលុយកាក់ ឈ្មួញកណ្តាលទាំងនោះ ក៏បានគេចខ្លួនបាត់ ដែលទីបំផុតបន្ទុកទាំងអស់ ត្រូវបានធ្លាក់មកលើអាជ្ញាធរ និងថ្នាក់ដឹកនាំខេត្តជាអ្នកដោះស្រាយ ។ជាមួយនេះ អភិបាលខេត្តកំពង់ស្ពឺ បានបន្ថែមថា ដើម្បីបញ្ជៀសនូវហានិភ័យនេះ គប្បីអ្នកវិនិយោគិនទាំងអស់ ទំនាក់ទំនង់ដោយផ្ទាល់មករដ្ឋបាលខេត្ត ឬមន្ទីរជំនាញពាក់ព័ន្ធ ដើម្បីទទួលបានព័ត៌មានជាក់លាក់ ជុំវិញការដាក់ទុនទីតាំងវិនិយោគ ហើយមួយវិញទៀត ការទំនាក់ទំនងផ្ទាល់មកអាជ្ញាធរ ឬអង្គភាពពាក់ព័ន្ធ គឺមានសុវត្ថិភាពគ្រប់គ្រាន់ ជាពិសេសបានការណែនាំ និងចង្អុលបង្ហាញចំគោលដៅដែលអ្នកវិនិយោគចង់បាន ដោយក្នុងនោះ ក៏បានឱកាសក្នុងការជួយសម្របសម្រួល ជ្រោមជ្រែង និងលើកទឹកចិត្តពីគណៈបញ្ជាការឯកភាពខេត្តដោយផ្ទាល់ ។គួរបញ្ជាក់ថា បច្ចុប្បន្ននេះ នៅខេត្តកំពង់ស្ពឺ មានរោងចក្រសហគ្រាសចំនួនជិត ១ ៦០០កន្លែង ហើយអាចផ្ដល់ឱកាសការងារដល់ប្រជាពលរដ្ឋ ប្រមាណជាង ៣០ម៉ឺនកន្លែង ហើយកំពុងមានតម្រូវការកម្មករ និយោជិកបន្ថែមជាង ១ម៉ឺននាក់ ខណៈដែលហេដ្ឋារចនាសម្ព័ន្ធ មានផ្លូវគមនាគមន៍ជាដើម ក៏មានការរីកចម្រើន អំណោយផលល្អ ដល់ការដឹកជញ្ជូនផលិតផល ទៅកាន់កំពង់ផែរខេត្តព្រះសីហនុ ៕អត្ថបទ បាន សុខរិទ្ធិ

ប្រធានសមាគម TAFTAC សុំការគាំទ្រពី CDC ដើម្បីជំរុញការវិនិយោគក្នុងវិស័យរបស់ខ្លួនឱ្យកាន់តែរីកចចម្រើន

2026/03/11 09:08:49 am        158
Facebook Telegram Linkin
ប្រធានសមាគម TAFTAC ស្នើសុំក្រុមប្រឹក្សាអភិវឌ្ឍន៍កម្ពុជា បន្តគាំទ្រនូវសកម្មភាពរបស់សមាគម ដើម្បីជំរុញការវិនិយោគក្នុងវិស័យ កាត់ដេរសម្លៀកបំពាក់ ស្បែកជើង និងផលិតផលធ្វើដំណើរ និងឧស្សាហកម្មគាំទ្រផ្សេងៗទៀត ដើម្បីភាពរីកចម្រើននៅក្នុងទីផ្សារកម្ពុជា។ឯកឧត្តម ជា វុទ្ធី អគ្គលេខាធិការគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា នៅថ្ងៃទី១០ ខែមីនា ឆ្នាំ ២០២៦នេះ បានទទួលជួបពិភាក្សាការងារជាមួយគណៈប្រតិភូសមាគម TAFTAC ដឹកនំាដោយលោក Enjoy Ho ប្រធានសមាគមវាយនភណ្ឌ សម្លៀកបំពាក់ ស្បែកជើង និងទំនិញធ្វើដំណើរ (TAFTAC), ក្នុងជំនួបនោះ ឯកឧត្តមអគ្គលេខាធិការបានស្វាគមន៍យ៉ាង កក់ក្តៅ និងបានសម្តែងនូវសេចក្តីសោមនស្ស ដល់ប្រតិភូសមាគម ។ ឯកឧត្តមអគ្គលេខាធិការបានអបអរសារទរចំពោះលោក Enjoy Ho ដែលត្រូវបានជ្រើសរើសជាប្រធានសមាគម ក្នុងអាណត្តិឆ្នាំ២០២៦-២០២៨, ក្នុងនោះឯកឧត្តមបានចែករំលែកនូវបទពិសោធន៍ ការងារមួយចំនួនជាមួយអតីតប្រធានសមាគម និងកិច្ចសហប្រតិបត្តិផ្សេងៗ នាពេលកន្លងមក រវាងក្រុមប្រឹក្សាអភិវឌ្ឍន៍កម្ពុជា (ក.អ.ក.) និងសមាគម ក្នុងការលើកកម្ពស់បរិស្ថានវិនិយោគនៅកម្ពុជា។  ក្នុងជំនួបនោះដែរ, លោក Enjoy Ho បានជម្រាបជូនពីសាវតាររបស់សមាគម ដែលបានប្រែក្លាយពីសមាគម រោងចក្រកាត់ដេរ នៅកម្ពុជា (GMAC) មកជាសមាគម TAFTAC ដែលមកទល់ពេលនេះមានអាយុកាលប្រមាណ៣០ឆ្នាំ។ លោកប្រធានសមាគមក៏បាន វាយតម្លៃខ្ពស់ ចំពោះកិច្ចសហប្រតិបត្តិការយ៉ាងល្អរវាងសមាគម និង ក.អ.ក. នាពេលកន្លងមក ព្រមទាំងបានស្នើសុំ ក.អ.ក. បន្តគាំទ្រ នូវសកម្មភាពរបស់សមាគម ដើម្បីជំរុញការវិនិយោគក្នុងវិស័យកាត់ដេរសម្លៀកបំពាក់ ស្បែកជើង ផលិតផលធ្វើដំណើរ និងឧស្សាហកម្ម គាំទ្រផ្សេងៗទៀត។  ជាការឆ្លើយតប, ឯកឧត្តមអគ្គលេខាធិការ បានបង្ហាញនូវឆន្ទៈក្នុងការរក្សានូវកិច្ចសហការល្អជាមួយសមាគម។ ជាមួយគ្នានេះ ដើម្បីឱ្យសមាគមមានសកម្មភាពថ្មីគួរឱ្យកត់សម្គាល់ ក្នុងអាណត្តិថ្មី ឯកឧត្តមអគ្គលេខាធិការបានស្នើឱ្យសមាគម៖ ទី១-ធ្វើការគិតគូរលើ ការចូលរួមកាត់បន្ថយហានិយភ័យនៃការបំពុលបរិស្ថាន តាមរយៈការសិក្សារៀបចំទីតាំងសមស្របណាមួយ សម្រាប់គម្រោងវិនិយោគ បោកគក់ ជ្រលក់ពណ៌ និងទី២- ធ្វើការគិតគូរទាក់ទាញឧស្សាហកម្មខ្សែទឹកខាងលើ (upstream industry) ដែលបម្រើដល់ខ្សែច្រវាក់ ផ្គង់ផ្គង់ សម្រាប់ឧស្សាហកម្មកាត់ដេរសម្លៀកបំពាក់ ស្បែកជើង និងផលិតផលធ្វើដំណើរ ក្នុងនោះក្រុមប្រឹក្សាអភិវឌ្ឍន៍កម្ពុជាបាន ត្រៀមលក្ខណៈរួចរាល់ សម្រាប់ផ្តល់កិច្ចសហការធ្វើកិច្ចការនេះ។ សូមបញ្ជាក់ថា នៅក្នុងរយៈពេល២ខែ ដើមឆ្នាំ២០២៦នេះ បើយោងតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា, កម្ពុជា បាននំាំចេញសម្លៀកបំពាក់ និងគ្រឿងបន្ទាប់បន្សំដែលធ្វើពីក្រណាត់ មានទឹកប្រាក់ជាង ១,១ ពាន់លានដុល្លារ កើនជាង ៦%, សម្លៀក បំពាក់ និងគ្រឿងបន្ទាប់បន្សំមិនធ្វើពីក្រណាត់ ៧១៥ លានដុល្លារ កើនជាង ៣%, ស្បែកជើង ស្រោមជើង និងវត្ថុប្រហាក់ប្រហែល ៣៤៣ លានដុល្លារ កើនជាង ៣% បើធៀបរយៈពេលដូចគ្នាឆ្នាំ២០២៥៕អត្ថបទ៖ សុន រ៉ាឌី

ក្នុងឆ្នាំ២០២៥ សមត្ថកិច្ចបង្ក្រាបករណីជួញដូរមនុស្សបាន ២៧២ករណី ឃាត់​ខ្លួន​ជន​សង្ស័យ​ជាង ៤០០នាក់ និងរំដោះជនរងគ្រោះជិត ១ពាន់នាក់

2026/03/11 09:02:37 am        203
Facebook Telegram Linkin
ភ្នំពេញ៖ នៅក្នុងឆ្នាំ២០២៥ កន្លងមកនេះ គណៈ​កម្មាធិការ​ជាតិ​ប្រយុទ្ធ​ប្រឆាំង​អំពើ​ជួញ​ដូរ​មនុស្ស ​បានធ្វើការបង្ក្រាបករណីជួញដូរមនុស្ស និងអំពើធ្វើអាជីវកម្មផ្លូវភេទ បានចំនួន ២៧២​ករណី ​ឃាត់ខ្លួនជនសង្ស័យជាង ៤០០នាក់ និងសង្គ្រោះជនរងគ្រោះបានចំនួនជិត ១ពាន់នាក់។លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុ​ប្រធាន​អចិន្ត្រៃយ៍​គណៈកម្មាធិការ​ជាតិប្រយុទ្ធប្រឆាំងអំពើជួញដូរមនុស្សបានថ្លែងប្រាប់ BTV នៅរសៀលថ្ងៃទី១០ ខែមីនា នេះថា ក្នុងឆ្នាំ២០២៥ គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស បាន​ធ្វើ​ការ​បង្ក្រាប​ករណីជួញដូរមនុស្ស បានសរុប ២៧២ករណី (ធៀបនឹងឆ្នាំ២០២៤ ចំនួន ១៩៨​ករណី ​កើន ៧៤ករណី) ស្មើនឹង ៣៧,៣៧% ចែកចេញជា ៖ ករណីអំពើជួញ​ដូរ​មនុស្ស​បង្ក្រាប​បាន ​១២៨ករណី (ធៀបនឹងឆ្នាំ២០២៤ ចំនួន៥៣ករណី កើន៧៥ករណី) និងឃាត់ខ្លួនជនសង្ស័យ ២០៩នាក់ (ស្រី ១៥នាក់) ជន​បរទេស ១៧នាក់ (ចិន១៣នាក់ ថៃ០៤នាក់)។ សង្គ្រោះជនរងគ្រោះ ៦០៩នាក់ (ស្រី២៤៧​នាក់) និងមានអាយុក្រោម១៥ឆ្នាំ ២៧នាក់ (ស្រី១០នាក់) និងអាយុ១៥- ១៧ឆ្នាំ ៣៣នាក់ (ស្រី​១៤នាក់) អាយុ១៨ឆ្នាំឡើង ៥៤៩នាក់ (ស្រី២២៣នាក់) ដែលត្រូវ​បាន​បញ្ជូន​ទៅ​សង្គម​កិច្ច ៦៣នាក់ ដើម្បីផ្តល់កិច្ចគាំពារទៅអគ្គនាយកដ្ឋានអន្តោប្រវេសន៍ ៣០នាក់ និងគ្រួសារ ៥១៦​នាក់​។លោកជំទាវបានបន្តថា ករណីអំពើធ្វើអាជីវកម្មផ្លូវភេទបង្ក្រាបបាន ១៤៤ករណី បើប្រៀបធៀបទៅនិងឆ្នាំ២០២៤ ថយចុះ ១ករណី បានឃាត់ខ្លួនជនសង្ស័យ ២០១នាក់ (ស្រី ៣៨នាក់) ហើយមានជនបរទេស២៦នាក់ ផងដែរ។ សង្គ្រោះជនរងគ្រោះ ៣៨៥នាក់ (ស្រី៣៧៧នាក់) មានអាយុក្រោម១៥ឆ្នាំ ១២២នាក់ (ស្រី១២១នាក់) , អាយុ១៥-១៧ឆ្នាំ មាន១៣៧នាក់ស្រី និងអាយុ១៨ឆ្នាំឡើង ១២៦នាក់ (ស្រី១១៩នាក់)៕

អាជ្ញាធររាជធានី បើកប្រតិបត្តិការបង្ក្រាបទីតាំង Scams Online មួយកន្លែង ឃាត់​ជន​សង្ស័យ​៦៥​នាក់ នៅខណ្ឌបឹងកេងកេង

2026/03/11 08:44:27 am        620
Facebook Telegram Linkin
ភ្នំពេញ៖ កម្លាំងគណៈបញ្ជាការឯកភាពរដ្ឋបាលរាជធានីភ្នំពេញ កាលពីវេលាយប់ថ្ងៃទី១០ ខែមីនា ឆ្នាំ២០២៦ បានបើកប្រតិបត្តិការស្រាវជ្រាវចុះបង្ក្រាបទីតាំងឆបោកតាមប្រព័ន្ធបច្ចេកវិទ្យា (Online Scams) មួយកន្លែង ស្ថិតនៅចំណុចខុនដូរ ហ្គោលឌិន វ័ន (Golden One) អគារលេខ៤១ ជាន់ទី៣០ ផ្លូវលេខ៣៦០ ភូមិ៧ សង្កាត់ទួលស្វាយព្រៃទី១ ខណ្ឌបឹងកេងកង រាជធានីភ្នំពេញដោយបានឃាត់ខ្លួនជនសង្ស័យចំនួន៦៥នាក់ ។ ប្រតិបត្តិការទ្រង់ទ្រាយធំនេះ ធ្វើឡើងក្រោមការចង្អុលបង្ហាញដឹកនាំដោយឯកឧត្តមឃួង ស្រេង អភិបាលរាជធានីភ្នំពេញ និងក្រោមការដឹកនាំបញ្ជាដោយឯកឧត្តម ឧត្តមសេនីយ៍ឯក ជួនណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដែលដឹកនាំប្រតិបត្តិការចុះអនុវត្តដោយលោកឧត្តមសេនីយ៍ទោ ប៊ុន សុសិក្ខា និងលោកឧត្តមសេនីយ៍ត្រី ស ថេន ស្នងការរង ដោយមានកម្លាំងការិយាល័យជំនាញចំនួន០៤ប្រតិបត្តិការ មានការិល័យប្រឆាំងបទល្មើសបច្ចេកវិទ្យា, ការិល័យអន្តរាគមន៍ និងតម្រួតបទបញ្ជា , ការិល័យគ្រប់គ្រងជនបរទេស និងការិល័យស៊ើបអង្កេត និងអនុវត្តនីតិវិធី ក្រោមការសម្របសម្រួលនីតិវិធីច្បាប់ដោយលោកសេង ហៀង ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញផងដែរ ។ ជាលទ្ធផល នៃប្រតិបត្តិការនេះ កម្លាំងសមត្ថកិច្ច បានឃាត់ខ្លួនមនុស្សចំនួន ៦៥នាក់ ក្នុងនោះ​មាន​ជន​ជាតិចិន០៨នាក់ (ប្រុស) , ជនជាតិខ្មែរ៥៧ នាក់ (ស្រី២៧នាក់) ។ ដោយដក​ហូត​វត្ថុ​តាង ​និងសម្ភារពាក់ព័ន្ធរួមមាន ៖ កុំព្យូទ័រ ALL in One : ៨៩ គ្រឿង , ម៉ូនីទ័រ០១គ្រឿង , CPU : ០១ គ្រឿង , ទូរស័ព្ទបម្រើអោយបទល្មើស ៣៨៤គ្រឿង និងស៊ីមកាតអន្តរជាតិ មួយចំនួនធំ រួម​ទាំង​វត្ថុ​តាងពាក់ព័ន្ធផ្សេងទៀតផងដែរ ។ មន្ត្រីនគរបាលជំនាញ បញ្ជាក់ថា ៖ ជនសង្ស័យបានប្រើប្រាស់ប្រទេសកម្ពុជាប្រព្រឹត្តបទល្មើស ឆបោក​តាម​ប្រព័ន្ធបច្ចេកវិទ្យា (Scams Online) ក្រោមរូបភាពអូស​ទាញ​លោម​លួង​ដាក់​ប្រាក់​ឱ្យ​វិនិយោគ​ក្លែង​កា្លយ (Investment Scams) ដែលជនរងគ្រោះជាគោលដៅទៅខាងទ្វីបអ៊ឺរ៉ុប ។ បច្ចុប្បន្ន ជនសង្ស័យទាំង៦៥នាក់ និងវត្ថុតាងពាក់ព័ន្ធ ត្រូវបានបញ្ចូនខ្លួន ទៅកា​ន់​ស្នង​ការ​ដ្ឋាន​នគរបា​ល​រាជធានីភ្នំពេញ ដើម្បីចាត់វិធានការទៅតាមផ្លូវច្បាប់៕ អត្ថបទ៖ លីហេង

ពលរដ្ឋ និងនិស្សិតខ្មែរដែលស្នាក់នៅតំបន់មជ្ឈិមបូព៌ាទាំង៥៩៥នាក់ មានសុវត្ថិភាពទាំងអស់គ្នាប៉ុន្តែត្រូវមានការប្រុងប្រយ័ត្នជានិច្ចខណៈសង្រ្គាមបន្តផ្ទុះកាន់តែខ្លាំង

2026/03/11 08:11:45 am        222
Facebook Telegram Linkin
បងប្អូនប្រជាពលរដ្ឋ ក៏ដូចជានិស្សិតខ្មែរ ដែលកំពុងស្នាក់ និងរស់នៅតំបន់មជ្ឈិមបូព៌ាទាំងអស់ មានសុវត្ថិ ធម្មតាទេ ប៉ុន្តែត្រូវមានការប្រុងប្រយ័ត្នខ្ពស់ជានិច្ច ខណៈសង្រ្គាមរវាងអាមេរិក អ៊ីស្រាអែល និងអែរ៉ង់បន្តផ្ទុះ កាន់តែខ្លាំងឡើង និងគួរឲ្យខ្លាចបំផុតនោះ។ នេះបើតាមសេចក្តីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរ ជាតិ។ សេចក្តីប្រកាសព័ត៌មានរបស់ក្រសួងការបរទេស ដែលបានចេញកាលពីយប់ថ្ងៃទី១០ ខែមីនា ឆ្នាំ ២០២៦នេះ បានបញ្ជាក់ថា ខ្លួនបានបន្តតាមដានដោយយកចិត្តទុកដាក់ និងក្តីបារម្ភបំផុតចំពោះការវិវត្ត នៃសភាពការណ៍ជម្លោះនៅតំបន់មជ្ឈិមបូព៌ា ហើយស្ថានទូតកម្ពុជាប្រចាំនៅតំបន់នោះ បានទទួលការណែ នាំឲ្យទាក់ទងជាប្រចាំជាមួយអាជ្ញាធរពាក់ព័ន្ធរបស់ប្រទេសម្ចាស់ផ្ទះ ក៏ដូចជាមួយតំណាងប្រជាពលរដ្ឋ និងនិស្សិតកម្ពុជា ដើម្បីតាមដានអំពីសុខទុក្ខ និងសេចក្តីត្រូវការជំនួយជាយថាហេតុ ដើម្បីធានាសុវត្ថិភាព របស់ពួកគេ។ ក្រសួងការបរទេសកម្ពុជាបានបញ្ជាក់ទៀតថា តាមព័ត៌មានដែលទទួលបានក្នុងពេលថ្មីៗនេះប្រជា ពលរដ្ឋកម្ពុជារួមទាំងនិស្សិតសរុបទាំងអស់ចំនួន៥៩៥នាក់ដែលកំពុងស្នាក់នៅមជ្ឈិមបូព៌ា បានរក្សាការប្រុងប្រយ័ត្នយ៉ាងខ្ជាប់ខ្ជួន និងមានសុវត្ថិភាពទាំងអស់គ្នា។ យ៉ាងណាក៏ដោយក្រសួងការបរទេស និងសហប្រតិបត្តិការអន្តរជាតិ បានអំពាវនាវជាថ្មីម្តងទៀតឲ្យបងប្អូន ក៏ដូចជានិស្សិតខ្មែរទាំងអស់ ដែលកំពុងស្នាក់នៅតាម បណ្តាប្រទេសនានាក្នុងតំបន់មជ្ឈិមបូព៌ា រួមមានដូចជាអ៊ីស្រាអែល កាតា គុយវ៉ែត អារ៉ាប៊ីសាអូឌីត អេមីរ៉ាត់អារ៉ាប់រួម និងប្រទេសបារ៉ែនជាដើមនោះ សូមបន្តគោរពតាមការណែនាំរបស់ប្រទេសម្ចាស់ផ្ទះអំពីកិច្ចការពារសុវត្ថិភាពផ្ទាល់ខ្លួនបន្ថែមទៀតផងដែរ។ សូមបញ្ជាក់ថា បើគិតរហូតដល់ថ្ងៃទី១១ ខែមីនា ឆ្នាំ២០២៦នេះ គឺមានរយៈពេល១២ថ្ងៃហើយ ក្រោយអាមេរិក និងអ៊ីស្រាអែលបានបើកការវាយប្រហារទៅលើប្រទេសអែរ៉ង់ ដែលបានបណ្តាលឲ្យអ្នកស្លាប់ជាច្រើនជាបន្តបន្ទាប់ និងអគារហេដ្ឋារចនាសម្ព័ន្ធរងការខ្ទិចខ្ទាំយ៉ាងសម្បើម ហើយមិនតែប៉ុណ្ណោះ ក្រោយសង្រ្គាមនៅមជ្ឈិមបូព៌ានេះកើតឡើងអស់រយៈពេលជិតពីរសប្តាហ៍មកនេះក៏បានបណ្តាលឲ្យពិភពលោករងផលប៉ះពាល់យ៉ាងខ្លាំងពីបញ្ហាប្រេង និងឧស្ម័ន្រផងដែរ ដោយតម្លៃប្រេងបានហក់ឡើងខ្ពស់ជា បន្តបន្ទាប់គួរឲ្យព្រួយបារម្ភនោះ៕

អ្នកនាំពាក្យច្រានចោលការលើកឡើងរបស់រដ្ឋមន្រ្ដីការបរទេសថៃថា សម្ដេចធិបតីបង្ហោះសារតាមបណ្តាញសង្គមពាក់ព័ន្ធនឹងការចរចារឿងព្រំដែនគោកជាមួយថៃនឹងត្រូវធ្វើនៅក្រោយចូលឆ្នាំថ្មី

2026/03/10 10:28:52 pm        182
Facebook Telegram Linkin
ភ្នំពេញ៖ អ្នកនាំពាក្យរាជរដ្ឋាភិបាលកម្ពុជា ឯកឧត្តម ប៉ែន បូណា បានប្រកាសច្រានចោល ជុំវិញការលើកឡើងរបស់រដ្ឋមន្រ្ដីការបរទេសថៃ ប្រាប់ទៅកាន់បណ្ដាញសារព័ត៌មានរបស់ពួកគេថា សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានមានប្រសាសន៍ ឬបង្ហោះសារតាមបណ្តាញសង្គមណាមួយអំពីការចរចាតាមរយៈយន្តការគណៈកម្មការចម្រុះខណ្ឌសីមាព្រំដែនគោក (JBC) នឹងត្រូវធ្វើនៅក្រោយពិធីបុណ្យចូលឆ្នាំថ្មីនោះទេ។ អ្នកនាំពាក្យរាជរដ្ឋាភិបាលកម្ពុជា បានចេញសេចក្តីបំភ្លឺព័ត៌មាន នៅយប់ថ្ងៃទី១០ ខែមីនា ឆ្នាំ២០២៦នេះថា នៅថ្ងៃទី១០ ខែមីនា ឆ្នាំ២០២៦ នេះ ប្រព័ន្ធផ្សាយព័ត៌មានថៃបានស្រង់សម្តីរបស់លោក ស៊ីហាសាក់ ភួងកេតកែវ រដ្ឋមន្ត្រីការបរទេសថៃមកផ្សាយថា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជាបានបង្ហោះសារតាមបណ្តាញសង្គមថា កិច្ចចរចាដើម្បីទាមទារទឹកដីមកវិញអាចត្រូវធ្វើឡើងនៅក្រោយពិធីបុណ្យចូលឆ្នាំថ្មី ឬក្រោយកម្មវិធី «នគរសង្ក្រាន»។ ពាក់ព័ន្ធបញ្ហានេះ អ្នកនាំពាក្យរាជរដ្ឋាភិបាលកម្ពុជាសូមបញ្ជាក់ជូនថា៖ទី១៖ សម្តេចបវរធិបតី នាយករដ្ឋមន្ត្រីពុំដែលបានមានប្រសាសន៍ឬបង្ហោះសារតាមបណ្តាញសង្គមណាមួយអំពីការចរចាតាមរយៈយន្តការគណៈកម្មការចម្រុះខណ្ឌសីមាព្រំដែនគោក (JBC) នឹងត្រូវធ្វើនៅក្រោយពិធីបុណ្យចូលឆ្នាំថ្មីដូចដែលបានលើកឡើងខាងលើនោះឡើយ។ ទី២៖ ជំហររបស់រាជរដ្ឋាភិបាលកម្ពុជាមានភាពច្បាស់លាស់ គឺគោរពនិងអនុវត្តយ៉ាងម៉ឺងម៉ាត់តាមស្មារតីនៃសេចក្តីប្រកាសរួមថ្ងៃទី២៧ ខែធ្នូ ឆ្នាំ២០២៥ និងកិច្ចព្រមព្រៀងផ្សេងទៀតដែលមានស្រាប់ ដោយអនុញ្ញាតឱ្យគណៈកម្មការចម្រុះខណ្ឌសីមាព្រំដែនគោក (JBC) ធ្វើការងារឱ្យបានឆាប់រហ័សបំផុតដើម្បីដោះស្រាយបញ្ហាព្រំដែននិងធានាសន្តិភាពយូរអង្វែងតាមព្រំដែនរវាងប្រទេសទាំងពីរ ដោយមិនរង់ចាំដល់ក្រោយពិធីចូលឆ្នាំនោះឡើយ។ អ្នកនាំពាក្យរាជរដ្ឋាភិបាលកម្ពុជាបានបញ្ជាក់ថា ជាក់ស្តែង គិតចាប់ពីបទឈប់បាញ់លើកទី២ ចូលជាធរមានកាលពីវេលាម៉ោង ១២:០០ នាទី ថ្ងៃត្រង់ ថ្ងៃទី២៧ ខែធ្នូ ឆ្នាំ២០២៥ មក រដ្ឋលេខាធិការដ្ឋានកិច្ចការព្រំដែនដែលតំណាងឱ្យ JBC កម្ពុជាបានដាក់សំណើទៅកាន់គាគីថៃចំនួន ៥លើកមកហើយដើម្បីស្នើសុំឱ្យភាគីថៃចាត់បញ្ជូនក្រុមការងារវាស់វែងចម្រុះដើម្បីចុះធ្វើការងារនៅលើដីជាក់ស្តែង៕

ផ្លូវល្បាយក្រួសនៅដីសម្បទានសង្គមកិច្ចឃុំដូនបា បានកំពុងលើកកម្ពស់ការរស់នៅគ្រួសារអតីតយុទ្ធជន

2026/03/10 06:44:23 pm        145
Facebook Telegram Linkin
ផ្លូវក្រាលដីល្បាយក្រួសចំនួន ១ខ្សែ ប្រវែងសរុប ៩ ៥៧០ ម៉ែត្រ ស្ថិតក្នុងដីសម្បទានសង្គមកិច្ចឃុំដូនបា ស្ថិតនៅឃុំដូនបា ស្រុកគាស់ក្រឡ ខេត្តបាត់ដំបង បានស្ថាបនាយ៉ាងល្អប្រសើរ ដោយផ្លូវនេះបានកំពុងសម្រួលដល់ការធ្វើដំណើររបស់ប្រជាពលរដ្ឋ ជាពិសេសអតីតយុទ្ធជនរាប់រយគ្រួសារដែលកំពុងរស់នៅតំបន់នោះ។ឯកឧត្តមបណ្ឌិត ចាន់ ដារ៉ុង រដ្ឋលេខាធិការ តំណាងដ៏ខ្ពង់ខ្ពស់ឯកឧត្តម ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ លើកឡើងនៅក្នុងការចុះត្រួតពិនិត្យ វាយតម្លៃលើការងារស្ថាបនាផ្លូវក្រាលល្បាយក្រួសចំនួន១ខ្សែ មាន៨កំណាត់ ប្រវែងសរុប ៩ ៥៧០ ម៉ែត្រ ទទឹង ៨ ម៉ែត្រ, និងសំណង់សិល្បការ្យផ្សេងៗ ស្ថិតនៅភូមិគោករកា ឃុំដូនបា ស្រុកគាស់ក្រឡ ខេត្តបាត់ដំបង នៅថ្ងៃទី ១០ ខែមីនា ឆ្នាំ២០២៦ នេះថា ជុំវិញការអភិវឌ្ឍផ្លូវនៅតាមជនបទ រាជរដ្ឋាភិបាលក្រោមការដឹកនាំប្រកបដោយគតិបណ្ឌិត របស់ សម្តេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភា បានសម្រេចនូវសមិទ្ធផលជាច្រើន ដែលជា មូលដ្ឋានសម្រាប់រាជរដ្ឋាភិបាលបន្តវេន ដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ដោយសម្តេចទាំងទ្វេបានគិតគូរយ៉ាងខ្លាំងលើការអភិវឌ្ឍ និងការរស់នៅរបស់ប្រជាជននៅជនបទ។ឯកឧត្តមបណ្ឌិត បន្តថា ជាក់ស្តែងការអភិវឌ្ឍនៅតំបន់ដីសម្បទានសង្គមកិច្ច ឃុំដូនបានេះ បានបង្ហាញយ៉ាងច្បាស់ អំពីការ យកចិត្តទុកដាក់របស់រារដ្ឋាភិបាល បង្កើតជាសហគមន៍សម្រាប់ការរស់នៅរបស់អតីតយុទ្ធជន មានផ្ទះ មានដីធ្វើចម្ការ មានផ្លូវ មាន ភ្លើង និងមានសំណង់សិល្បៈការ្យផ្សេងៗបាននិងកំពុងកើតឡើងជាបន្តបន្ទាប់។ នេះជាការចូលរួមចំណែកយ៉ាងធំធេងរបស់រាជរដ្ឋាភិ- បាល ក្នុងការជំរុញបង្កើតនូវហេដ្ឋារចនាសម្ព័ន្ធគាំទ្រនានា សម្រាប់ការរស់នៅរបស់ប្រជាពលរដ្ឋ ជាពិសេសអតីតយុទ្ធជននៅតំបន់នោះ ឱ្យមានជីវភាពរស់នៅកាន់តែធូរធារ។ជុំវិញផ្លូវខាងលើនេះ, ឯកឧត្តមបណ្ឌិត បានវាយតម្លៃខ្ពស់ និងបានឯកភាពទទួលយកគម្រោងផ្លូវទាំងនោះ ក្រោមការស្ថាបនា របស់ក្រុមហ៊ុន រ៉ូយ៉ាល់ មេគង្គ ខនស្ត្រាក់ សិន & ឌីវើឡុបមែន ដែលបានស្ថាបនាប្រកបដោយគុណភាពខ្ពស់ ដើម្បីជួយសម្រួលដល់ ការធ្វើដំណើរ មិនថាប្រជាពលរដ្ឋនៅមូលដ្ឋាន ឬប្រជាពលរដ្ឋធ្វើដំណើរឆ្លងកាត់ឡើយ ជាពិសេសជំរុញដល់ការដឹកជញ្ជូនកសិផល របស់គ្រួសារអតីតយុទ្ធជន ពីចម្ការទៅគេហដ្ឋាន ឬទៅកាន់ទីផ្សារ និងទៅកាន់ឧស្សាហកម្ម និងតំបន់កែច្នៃផ្សេងៗជាដើម៕អត្ថបទ៖ សុន រ៉ាឌី

បច្ចុប្បន្នកម្ពុជារក្សាបានទំនាក់ទំនងផ្លូវការជាមួយប្រទេសចំនួន ១៧៥ និងមានស្ថានតំណាងចំនួន ៤៦នៅទូទាំងពិភពលោក

2026/03/10 05:55:20 pm        210
Facebook Telegram Linkin
ភ្នំពេញ៖ក្រសួងការបរទេស និងសហប្រតិបត្តិការអន្តរជាតិបានគូសបញ្ជាក់ថា តួនាទីរបស់កម្ពុជា ជាតួអង្គប្រកបដោយបុរេសកម្ម និងគោរពច្បាប់នៅលើឆាកអន្តរជាតិ ខណៈតាមរយៈកិច្ចខិតខំប្រឹងប្រែងរបស់កម្ពុជាបានពង្រីកទំនាក់ទំនងការទូតដោយរក្សាទំនាក់ទំនងផ្លូវការជាមួយប្រទេសចំនួន ១៧៥ និងមានស្ថានតំណាងកម្ពុជាចំនួន ៤៦ នៅទូទាំងពិភពលោក។ នេះបើយោងតាមសេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិ ស្ដីពីការបិទបញ្ចប់សន្និបាតបូកសរុបលទ្ធផលការងារប្រចាំឆ្នាំ។ក្រសួងការបរទេស និងសហប្រតិបត្តិការអន្តរជាតិ បានបិទបញ្ចប់សន្និបាតបូកសរុបលទ្ធផលការងារប្រចាំឆ្នាំរយៈពេលពីរថ្ងៃ ដែលបានប្រព្រឹត្តទៅពីថ្ងៃទី៥ ដល់ថ្ងៃទី ៦ ខែមីនា ឆ្នាំ២០២៦ នៅរាជធានីភ្នំពេញ ដើម្បីពិនិត្យឡើងវិញនូវវឌ្ឍនភាព និងសមិទ្ធផល ដែលសម្រេចបានក្នុងឆ្នាំ២០២៥ និងលើកទិសដៅ ការងារសម្រាប់ឆ្នាំ២០២៦។ សន្និបាតបូកសរុបលទ្ធផលការងារ បានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ និងមានការចូលរួមពីសំណាក់ប្រធានបេសកកម្មកម្ពុជានៅបរទេស និងមន្ត្រីការទូតរបស់ក្រសួង។ ក្នុងឱកាសនោះដែរ តំណាងមន្ត្រីជាន់ខ្ពស់មកពីស្ថាប័នពាក់ព័ន្ធ ក៏ត្រូវបានអញ្ជើញចូលរួមធ្វើបទបង្ហាញនិងចូលរួមក្នុងពិធីបើក និងពិធីបិទនៃ អង្គសន្និបាតផងដែរ។ក្នុងឱកាសនោះដែរ ឯកឧត្តមឧបនាយករដ្ឋមន្ត្រីបានគូសបញ្ជាក់ពីការវិវត្តនៃតួនាទីរបស់កម្ពុជា ជាតួអង្គប្រកបដោយបុរេ សកម្ម និងគោរពច្បាប់នៅលើឆាកអន្តរជាតិ ព្រមទាំងកិច្ចខិតខំប្រឹងប្រែងរបស់កម្ពុជាក្នុងការពង្រីកទំនាក់ទំនងការទូតដោយរក្សាទំនាក់ទំនងផ្លូវការជាមួយប្រទេសចំនួន ១៧៥ និងមានស្ថានតំណាងកម្ពុជាចំនួន ៤៦ នៅទូទាំងពិភពលោក។ ឯកឧត្តមឧបនាយករដ្ឋមន្ត្រី ក៏បានលើកឡើងពីការប្តេជ្ញាចិត្តយ៉ាងមុតមាំរបស់កម្ពុជា ក្នុងការ គាំទ្រពហុភាគីនិយម និងតួនាទីបុរេសកម្មរបស់កម្ពុជា ក្នុងការលើកកម្ពស់សណ្តាប់ធ្នាប់អន្តរជាតិ ដោយផ្អែកលើ ច្បាប់។សន្និបាតបូកសរុបលទ្ធផលការងារប្រចាំឆ្នាំនេះ ក៏មានកិច្ចប្រជុំចង្អៀតដែលផ្តោតការពិភាក្សាលើការផ្លាស់ ប្តូរសណ្តាប់ធ្នាប់អន្តរជាតិ និងផលបច្ច័យ ជម្រើសយុទ្ធសាស្ត្ររបស់កម្ពុជាសម្រាប់អនាគត និងកាក សេដ្ឋកិច្ចកម្ពុជា ក៏ដូចជាកំណែទម្រង់ផ្ទៃក្នុង សំដៅពង្រឹងធនធានមនុស្សនិងសមត្ថភាពស្ថាប័ន ដើម្បីតេដោយ បញ្ហាប្រឈមដែលកំពុងកើតមាន។ឯកឧត្តមឧបនាយករដ្ឋមន្ត្រី ក៏បានសង្កត់ធ្ងន់លើសារៈសំខាន់នៃការពង្រឹងគោលនយោបាយការបរទេស បុរេសកម្ម និងការប្រាស្រ័យទាក់ទងជាយុទ្ធសាស្ត្រ ដើម្បីពង្រឹងភាពធន់របស់កម្ពុជា ក្នុងការការពារផលប្រយោជន៍ ស្នូលរបស់ជាតិ រួមមានការរក្សាអព្យាក្រឹតភាព ឯករាជ្យភាព អធិបតេយ្យ និងបូរណភាពទឹកដី ព្រមទាំងលើក កម្ពស់សន្តិភាព ឯកភាពជាតិ និងវឌ្ឍនភាពសង្គម-សេដ្ឋកិច្ច។ ចំពោះទំនាក់ទំនងជាមួយប្រទេសជិតខាង ឯកឧត្តមឧបនាយករដ្ឋមន្ត្រី បានសង្កត់ធ្ងន់លើជំហរជាគោលការណ៍របស់កម្ពុជាក្នុងការស្វែងរកដំណោះស្រាយ ដោយសន្តិវិធីចំពោះជម្លោះព្រំដែន និងទំនាស់នានា ស្របតាមច្បាប់អន្តរជាតិ និងកិច្ចព្រមព្រៀងទ្វេភាគី ព្រមទាំង លើកកម្ពស់ការជឿជាក់ និងទំនុកចិត្តគ្នា ភាពជាអ្នកជិតខាងល្អ និងកិច្ចសហប្រតិបត្តិការឈ្នះ-ឈ្នះ៕

បណ្ដាញសង្គម

ព័ត៌មានថ្មីៗ

ប្រមុខការទូតកម្ពុជាជួបពិភាក្សាការងារជាមួយប្រមុខការទូតប្រទេសលីទុយអានី លើការពង្រឹង និងពង្រីកកិច្ចសហប្រតិបត្តិការប្រទេសទាំងពីរ
04/24/2026 09:04 AM
Facebook Telegram Linkin
សហភាពអឺរ៉ុប អនុម័តជាផ្លូវការប្រាក់កម្ចីដល់អ៊ុយក្រែនចំនួន៩០ពាន់លានអឺរ៉ូ និងដាក់ទណ្ឌកម្មថ្មីលើរុស្ស៊ី
04/24/2026 09:04 AM
Facebook Telegram Linkin
ឧបនាយករដ្ឋមន្រ្តី ហ៊ុន ម៉ានី សាទរ​ចំពោះ​ផ្លែផ្កា​នៃ​កិច្ច​ប្រជុំ«២+២» កម្ពុជា-ចិន ហើយ​បាន​សម្រេច​ឈាន​ទៅ​ដល់កម្រិតកិច្ចប្រជុំ«៣+៣» នាពេលខាងមុខទៀត
04/24/2026 08:04 AM
Facebook Telegram Linkin
លោក Trump ត្រូវបានរាយការណ៍ថានឹងអញ្ជើញលោក Putin ចូលរួមកិច្ចប្រជុំកំពូល G20 នៅទីក្រុង Miami
04/24/2026 08:04 AM
Facebook Telegram Linkin
លោកTrump៖ លីបង់និងអ៊ីស្រាអែល ព្រមព្រៀងបន្ថែមពេលបទឈប់បាញ់អ៊ីស្រាអែល-ហេសបូឡា រយៈពេល៣សប្តាហ៍
04/24/2026 08:04 AM
Facebook Telegram Linkin
លោក Trump និយាយថា សហរដ្ឋអាមេរិក មិនប្រញាប់ប្រញាល់បញ្ចប់សង្គ្រាមជាមួយអ៊ីរ៉ង់ទេ
04/24/2026 08:04 AM
Facebook Telegram Linkin
ប្រមុខការទូតកម្ពុជាប្រកាសត្រៀមធ្វើការយ៉ាងជិតស្និទ្ធជាមួយទូតថ្មីប្រទេសនូវែលសេឡង់ ដើម្បីជំរុញកិច្ចសហប្រតិបត្តិការប្រទេសទាំងពីរឱ្យកាន់តែប្រសើរឡើង
04/24/2026 08:04 AM
Facebook Telegram Linkin
ថ្លៃលក់រាយប្រេងឥន្ធនៈតាមស្ថានីយចាប់ថ្ងៃទី២៤ មេសានេះ សាំងឡើងបន្ដិច ខណៈ​ម៉ាស៊ូត​បន្ត​ធ្លាក់​ចុះ
04/24/2026 07:04 AM
Facebook Telegram Linkin
ការវាយប្រហារយានដ្រូនរុស្ស៊ីសម្លាប់មនុស្ស ៣នាក់ នៅទីក្រុង Dnipro របស់អ៊ុយក្រែន
04/23/2026 09:04 PM
Facebook Telegram Linkin
មេបញ្ជាការកងទ័ពប៉ាគីស្ថានលោក Munir ជួបពិភាក្សាការងារជាមួយប្រធានាធិបតីអ៊ីរ៉ង់លោក Pezeshkian
04/23/2026 09:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.