នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
រដ្ឋមន្រ្តីសុខាភិបាល «មន្រ្តីសុខាភិបាលត្រូវមានស្មារតីបុរេសកម្មជាប់ជាប្រចាំ និងប្រកបដោយគុណភាពការងារ ក្នុងនាមអ្នកបម្រើសេវាសុខាភិបាល»
សម្ពោធដាក់ឱ្យជាផ្លូវការអគារសាលាបឋមសិក្សាថ្មី១ខ្នង ២បន្ទប់ បន្ទាប់ពីជួសជុល និងសាងសង់ឡើងវិញរួចរាល់ ដើម្បីបម្រើឱ្យវិស័យអប់រំនៅក្នុងមូលដ្ឋាន
ព្រះអង្គម្ចាស់ នរោត្តម ចក្រាវុធ ជួបពិភាក្សាការងារជាមួយ ឯកឧត្តម Chen Zhou អនុរដ្ឋមន្រ្តី ក្រសួងទំនាក់ទំនងអន្តរជាតិចិន
សេដ្ឋកិច្ចកម្ពុជានៅបន្តរឹងមាំ៖ ២២ខែនៃរាជរដ្ឋាភិបាលអាណតិ្តទី៧របស់សម្តេចធិបតី រោងចក្រសហគ្រាសកើនជាង៥,៣ពាន់ដែលបង្ហាញពីភាពរឹងមាំ និងជំនឿទុកចិត្ត

ព័ត៌មានជាតិ

ក្រសួង​មហាផ្ទៃ​ និងអគ្គរដ្ឋអាជ្ញារុស្សី វាយតម្លៃខ្ពស់ចំពោះកិច្ចសហប្រតិបត្តិការប្រទេសទាំងពីរ

2025/05/27 04:59:50 pm        87
Facebook Telegram Linkin
ភ្នំពេញ​÷ ឯកឧត្ដ​ម​អភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងឯកឧត្ដម អ៊ីហ្គ័រ ក្រាស្នូវ (Igor Krasnov) អគ្គរដ្ឋអាជ្ញា នៃសហព័ន្ធរុស្ស៊ី បានអញ្ជើញនិងទទួលជួបពិភាក្សាការងារ នៅទីស្ដីការក្រសួងមហាផ្ទៃ នារសៀលថ្ងៃទី២៧ ខែឧសភា ឆ្នាំ២០២៥ ដោយក្នុងជំនួបនោះ ភាគីទាំងពីរ បានរម្លឹកឡើងវិញអំពីសវតានៃចំណងការទូតជាប្រវត្តិសាស្រ្តរវាងប្រទេសទាំងពីរ រួមវាយតម្លៃជាវិជ្ជមានចំពោះសមិទ្ធផលនៃកិច្ចសហប្រតិបត្តិការ កម្ពុជា-រុស្សុី រួមទាំងក្នុងវិស័យមហាផ្ទៃ។ ជាក់ស្ដែងក្នុងជំនួបនោះ ​​​​​​​ឯកឧត្ដ​ម​អភិសន្តិបណ្ឌិត ស សុខា បានវាយតម្លៃខ្ពស់ចំពោះទំនាក់ទំនងរវាងព្រះរាជាណាចក្រកម្ពុជា និងសហព័ន្ធរុស្ស៊ី ចាប់តាំងពីឆ្នាំ១៩៥៦ សម័យសហភាពសូវៀត និងរដ្ឋកម្ពុជា ដោយបានរួមចំណែកយ៉ាងសំខាន់ដល់ការស្តារ កសាង និងអភិវឌ្ឍសង្គមជាតិ បម្រើដល់ផលប្រយោជន៍ទៅវិញទៅមកនៃភាគីទាំងពីរ។ ក្នុងនាមរាជរដ្ឋាភិបាលកម្ពុជា ឯកឧត្ដ​ម​អភិសន្តិបណ្ឌិត ក៏បានថ្លែងអំណរគុណដល់រដ្ឋាភិបាលរុស្ស៊ី ដែលនៅតែបន្តគាំទ្រដល់កិច្ចសហប្រតិបត្តិការលើវិស័យអប់រំរវាងប្រទេសទាំងពីរ ដែលចាប់តាំងពីរឆ្នាំ១៩៨០ រហូតមក ភាគីរុស្ស៊ី បានទទួលសិស្សនិស្សិតកម្ពុជា ទៅបន្តការសិក្សាអប់រំលើមុខជំនាញផ្សេងៗ។  ឯកឧត្ដ​ម​អភិសន្តិបណ្ឌិត បានកោតសរសើរ និងវាយតម្លៃខ្ពស់ចំពោះ​កិច្ចប្រជុំលើកទី១១ នៃគណៈកម្មការអន្តររដ្ឋាភិបាលកម្ពុជា-រុស្ស៊ី ស្ដីពីកិច្ចសហប្រតិបត្តិការពាណិជ្ជកម្ម សេដ្ឋកិច្ច វិទ្យាសាស្ត្រ និងបច្ចេកទេស កាលពីថ្ងៃទី២៨ ខែមេសា ឆ្នាំ២០២៥ កន្លងទៅ ដែលកិច្ចប្រជុំនេះគឺជាយន្តការដ៏មានសារៈសំខាន់ណាស់ក្នុងការពង្រឹង និងពង្រីកកិច្ចសហប្រតិបត្តិការលើវិស័យផ្សេងៗ រវាងក្រសួង-ស្ថាប័នពាក់ព័ន្ធនៃប្រទេសទាំងពីរ។ ក្នុងកិច្ចសហប្រតិបត្តិការជាមួយក្រសួងមហាផ្ទៃ ឯកឧត្ដ​ម​អភិសន្តិបណ្ឌិត ក៏បានវាយតម្លៃខ្ពស់ចំពោះកិច្ចសហប្រតិបត្តិការអនុវត្តច្បាប់រវាងប្រទេសទាំងពីរ កម្ពុជា-​រុស្ស៊ី និងបានថ្លែងអំណរគុណដល់ស្ថាប័ននានានៃភាគីរុស្ស៊ី ដែលបាន​ផ្ដល់វគ្គបណ្ដុះបណ្ដាលជាច្រើនលើជំនាញផ្សេងៗដល់មន្ត្រីនគរបាលជាតិកម្ពុជា។ ជាការឆ្លើយតបអគ្គរដ្ឋអាជ្ញានៃសហព័ន្ធរុស្ស៊ី​ បានធ្វើបទបង្ហាញអំពីតួនាទី និងភារកិច្ចរបស់ការិល័យអគ្គរដ្ឋអាជ្ញានៃសហព័ន្ធរុស្ស៊ី ដែលមានផ្អែកមួយចំនួនអាចមានលទ្ធភាពបង្កើតកិច្ចសហប្រតិបត្តិការណាមួយជាមួយក្រសួងមហាផ្ទៃ ពាក់ព័ន្ធនឹងការអនុវត្តច្បាប់ និងប្រយុទ្ធប្រឆាំងឧក្រិដ្ឋកម្មឆ្លងដែន និងបញ្ហាគ្រឿងញៀន ជាដើម។ ក្នុងជំនួបនេះផងដែរ ឯកឧត្តមអភិសន្តិបណ្ឌិត ស សុខា និងឯកឧត្ដម អ៊ីហ្គ័រ ក្រាស្នូវ ក៏បានអបអរសាទរចំពោះវឌ្ឍនភាព និងវាយតម្លៃខ្ពស់ចំពោះកិច្ចខិតខំប្រឹងប្រែងយ៉ាងរវាងរដ្ឋាភិបាលនៃប្រទេសទាំងពីរ ក្នុងការបន្តពង្រឹង និងលើកកម្ពស់កិច្ចសហប្រតិបត្តិការលើវិស័យផ្សេងៗ ៕

ការប្រើប្រាស់សេវាសុខាភិបាលក្នុងមូលដ្ឋានខេត្តឧត្តរមានជ័យ មានការកើនឡើង នាពេលបច្ចុប្បន្ន

2025/05/27 04:54:43 pm        108
Facebook Telegram Linkin
នៅព្រឹកថ្ងៃទី២៧ ខែឧសភា ឆ្នាំ២០២៥ លោកវេជ្ជបណ្ឌិត ឃ្លោក ហួត ប្រធានមន្ទីរសុខាភិបាលខេត្ត ឧត្តរមានជ័យ បានណែនាំដល់មន្រ្តីសុខាភិបាលនៅតាមបណ្តាលមន្ទីរពេទ្យបង្អែកខេត្ត និងតាម មណ្ឌលសុខភាពទាំងអស់ធ្វើយ៉ាងណាត្រូវបង្កើននូវសមត្ថភាពវិជ្ជាជីវៈ ការយកចិត្តទុកដាក់​ឱ្យ​បានកាន់តែល្អប្រសើរឡើងបន្ថែមទៀត លើការផ្តល់សេវាសាធារណៈ ទូទៅជូនដល់ប្រជាពលរដ្ឋ ដែលមកទទួលសេវាពិនិត្យព្យាបាលជំងឺនៅមន្ទីរពេទ្យរដ្ឋប្រកបដោយភាពជឿជាក់ និងមានទំនុកចិត្តខ្ពស់ ខណៈបច្ចុប្បន្នមានពលរដ្ឋមកទទួលសេវាព្យាបាលនៅមន្ទីរពេទ្យរដ្ឋកាន់​តែមានការកើនឡើងច្រើននោះ។លោកវេជ្ជបណ្ឌិត បានឲ្យដឹងថា ការផ្តល់ទំនុកចិត្តប្រកបដោយភាពជឿជាក់ និងក្រមសីលធម៌​ល្អ​ពីក្រុម​គ្រូពេទ្យក្នុងការពិនិត្យព្យាបាលជំងឺនិងការផ្តល់សេវាសាធារណៈផ្សេងៗ ជូនពលរដ្ឋ​គឺជាកាតព្វកិច្ចមួយដ៏សំខាន់របស់អស់លោក លោកស្រីដែលជាមន្រ្តីសុខាភិបាលគ្រប់រូប​ត្រូវតែ​អនុវត្តឲ្យ​ខ្ជាប់ខ្ជួន​​ព្រោះអ្នកជំងឺផ្ញើអាយុជីវិតលើគ្រូពេទ្យប្រសិនបើមានការ​ធ្វេសប្រហែស​ដោយប្រការ​ណាមួយនោះ វាអាចប្រឈម និងបញ្ហាចំពោះមុខផងដែរ ពិសេសនោះចំពោះ​បងប្អូនដែលជាស្រ្តីមានផ្ទៃពោះ ​ចាស់ជរា និងកុមារតូចៗ ដែលមានបណ្ណសមធម៌ និងប័ណ្ណ ប ស ស ធ្វើយ៉ាងណាត្រូវតែសម្រួលការផ្តល់សេវាជូនពួកគាត់ឲ្យបានលឿន និងឆាប់រហ័សមិនត្រូវទុកឲ្យពួកគាត់រងចាំយូរនោះឡើយ ចំពោះការមកទទួលសេវានោះ។ទន្ទឹមគ្នានោះដែរលោកវេជ្ជបណ្ឌិត អ៊ុក សុមេធា ដែលជាប្រធានមន្ទីរពេទ្យបង្អែក​ខេត្តឧត្តរមានជ័យ បានលើកឡើងថា ចំពោះមន្ទីរពេទ្យបង្អែកខេត្ត បច្ចុប្បន្ននេះគឺមានប្រជាពលរដ្ឋមកទទួល​សេវា​ពិនិត្យព្យាបាលជំងឺដោយក្នុងមួយថ្ងៃៗមិនក្រោមពី២០០នាក់នោះទេ ។ក្នុងនោះប្រជាពលរដ្ឋដែលប្រើប្រាស់បណ្ណសមធម៌ និងបណ្ណ ប.ស.ស មានចំនួន៨០ភារយ ។ជាមួយគ្នានោះដែរលោកវេជ្ជបណ្ឌិត បានឲ្យដឹងថា សព្វថ្ងៃនេះ​មន្ទីរពេទ្យបង្អែកខេត្តកំពុងបាន​ខិតខំយក​ចិត្តទុក​គិតគូរ​ខ្ពស់ពីបញ្ហាប្រឈមនានារបស់ពលរដ្ឋដែលមកទទួល​សេវា​ពិនិត្យព្យាបាលជំងឺនៅមន្ទីររដ្ឋដោយមានការគាំទ្រ និងកោតសរសើរពីសំណាក់​ប្រជាពលរដ្ឋផងដែរ​ចំពោះការផ្តល់សេវាទូទៅគឺមានភាពលឿនរហ័ស និងមានទំនុកចិត្តខ្ពស់។លោកវេជ្ជបណ្ឌិត បានបន្តថា ដោយអនុវត្តតាមការណែនាំដ៏ខ្ពង់ខ្ពស់ពីប្រមុខរាជរដ្ឋាភិបាលកម្ពុជា និង​ឯកឧត្តមរដ្ឋមន្រ្តីក្រសួងសុខាភិបាល បច្ចុប្បន្ន បានធ្វើឱ្យមន្ទីរពេទ្យរដ្ឋមានការវិវត្តបាន​យ៉ាងល្អប្រសើរ ខណៈយើងមានគ្រឿងសម្ភារៈឧបករណ៍វេជ្ជសាស្រ្តទំនើបៗ ក្នុងការជួយសង្រ្គោះដល់អ្នកជំងឺត្រឹមត្រូវផងដែរ។ ជាមួយគ្នានោះដែរប្រជាពលរដ្ឋដែលមកទទួលសេវាពិនិត្យព្យាបាលជំងឺ​នៅមន្ទីរពេទ្យបង្អែត​ខេត្តឧត្តរមានជ័យ បានសម្តែងនូវ​ការ​កោតសរសើរ​ចំពោះក្រុម​គ្រូពេទ្យ​ដែល​ជានិច្ចកាល​បាន​យកចិត្តទុក​ដាក់ចំពោះពលរដ្ឋគ្រប់រូប និងប្រើពាក្យសំដីល្អៗផងដែរ។ប្រជាពលរដ្ឋបានបន្តថា កន្លងមកភាគច្រើនពួកគាត់បានទៅព្យាបាលជំងឺនៅប្រទេសជិតខាង​ប៉ុន្តែបច្ចុប្បន្នដោយមើលឃើញ​ពី​កត្តា​វិជ្ជមានល្អៗ​ច្រើនរបស់មន្ទីរពេទ្យរដ្ឋ និងមានសម្ភារ​វេជ្ជសាស្រ្តទំនើបសម្រាប់សង្រ្គោះមិនចាញ់មន្ទីរពេទ្យក្រៅស្រុកនោះ ទើបពួកគាត់សម្រេចចិត្ត​មកពិនិត្យ​ព្យាបាល​ជំងឺនៅក្នុងស្រុកវិញ​ដោយការមាន​ទំនុក​ចិត្តខ្ពស់​និងមានការជឿជាក់អាច​កាត់បន្ថយ​ការចំណាយផ្សេងៗ​របស់ពួកគាត់​បានមួយកម្រិតធំ​ដោយឡែកចំពោះពលរដ្ឋដែលមានបណ្ណសមធម៌ និងបណ្ណ ប.ស.ស វិញនោះ​ គឺការពិនិត្យព្យាបាលជំងឺពុំបាន​អស់ថវិកាអ្វីនោះឡើយ៕ អត្ថបទ៖ ឃិនសារិទ្ធ

ឯកឧត្តមទេសរដ្ឋមន្ត្រី កែវ រ៉េមី៖ រាជរដ្ឋាភិបាលកម្ពុជា ខិតខំលើកកម្ពស់សិទ្ធិមនុស្សនៅកម្ពុជា ជាពិសេសសិទ្ធិស្រ្តី ខុសពីប្រទេសមួយចំនួន ស្ត្រីត្រូវបានបំបិទសិទ្ធិ មិនឱ្យរៀនសូត្រខ្ពង់ខ្ពស់ និងមិនមានសិទ្ធិជ្រើសរើសគូអនាគត

2025/05/27 04:52:55 pm        109
Facebook Telegram Linkin
កំពង់ចាម ៖ ឯកឧត្តម កែវ រ៉េមី ទេសរដ្ឋមន្ត្រី ប្រធានគណៈកម្មាធិការសិទ្ធិមនុស្សកម្ពុជា បានអញ្ជើញជាអធិបតី ក្នុងពិធីបើកសិក្ខាសាលាផ្សព្វផ្សាយរបាយការណ៍ជាតិ ស្តីពីការអនុវត្តកតិកាសញ្ញាអន្តរជាតិ ស្តីពីសិទ្ធិពលរដ្ឋ និងនយោបាយ ខេត្តកំពង់ចាម នាព្រឹកថ្ងៃអង្គារ ១កើត ខែជេស្ឋ ឆ្នាំម្សាញ់ សប្តស័ក ព.ស. ២៥៦៩ ត្រូវនឹងថ្ងៃទី២៧ ខែឧសភា ឆ្នាំ២០២៥ នៅក្នុងសាលប្រជុំរបស់សាលាខេត្តកំពង់ចាម ដែលមានការចូលរួមពី ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ព្រមទាំងអភិបាលរងខេត្ត មន្ទីរជុំវិញខេត្ត រដ្ឋបាលសាលាខេត្ត កងរាជអាវុធហត្ថ នគរបាល តំណាងពន្ធនាគារ និស្សិត គរុសិស្ស រួមទាំងអ្នកនាំពាក្យតាមអង្គភាពនីមួយៗ ប្រមាណជា ៦០០នាក់ ។ សិក្ខាសាលានេះ រៀបចំដោយគណៈកម្មាធិការសិទ្ធិមនុស្សកម្ពុជា ដោយសហការជាមួយរដ្ឋបាលខេត្តកំពង់ចាម។ឯកឧត្តមទេសរដ្ឋមន្ត្រី បានលើកឡើងថា សិក្ខាសាលានាពេលនេះ រៀបចំឡើងក្នុងគោលបំណង (១)បង្ហាញពីកិច្ចខំប្រឹងប្រែង និងសមិទ្ធផលធំៗរបស់រាជរដ្ឋាភិបាលក្នុងការការពារ និងលើកកម្ពស់សិទ្ធិមនុស្សនៅកម្ពុជា (២)បង្ហាញពីការអនុវត្តជាទៀងទាត់នូវកាតព្វកិច្ចអន្តរជាតិរបស់រាជរដ្ឋាភិបាល ក្នុងនាមជារដ្ឋសមាជិកអង្គការសហប្រជាជាតិ (៣)បញ្រ្ជាបការយល់ដឹងបន្ថែមដល់អង្គភាព ថ្នាក់ក្រោមជាតិ ឱ្យយល់កាន់តែច្បាស់ពីកិច្ចខិតខំប្រឹងប្រែងរបស់រាជរដ្ឋាភិបាលលើវិស័យសិទ្ធិមនុស្ស និង(៤)ជំរុញការចូលរួមរបស់អង្គភាពថ្នាក់ក្រោមជាតិ ក្នុងការអនុវត្តសេចក្តីសង្កេតសន្និដ្ឋាន (អនុសាសន៍) នៃរបាយការណ៍ជាតិស្តីពីកតិកាសញ្ញាអន្តរជាតិ ស្តីពីសិទ្ធិពលរដ្ឋ និងនយោបាយ។ឯកឧត្តមទេសរដ្ឋមន្រ្តី បានសង្កត់ធ្ងន់ថា កម្ពុជាបានទទួលយកកតិកាសញ្ញា អនុសញ្ញាអន្តរជាតិចំនួន ៨លើ៩ និងខ្លឹមសារនៃកតិកាសញ្ញា អនុសញ្ញាអន្តរជាតិទាំងនោះត្រូវបានដាក់បញ្ចូលទៅក្នុងរដ្ឋធម្មនុញ្ញរបស់កម្ពុជា មានន័យថា ក្រោយពីកម្ពុជាទទួលយកនូវកតិកាសញ្ញា អនុសញ្ញាអន្តរជាតិទាំងនេះ កម្ពុជាត្រូវជាប់កាតព្វកិច្ចដ៏ធំនោះគឺការធ្វើរបាយការណ៍ជាតិ និងបញ្ជូនគណៈប្រតិភូសិទ្ធិមនុស្ស ទៅការពាររបាយការណ៍ទាំងនោះ នៅចំពោះមុខក្រុមប្រឹក្សាសិទ្ធិមនុស្សនៃអង្គការសហប្រជាជាតិ។ ឯកឧត្តមទេសរដ្ឋមន្រ្តី បានកត់សម្គាល់ថា កម្ពុជាបានស្វាគមន៍ និងអនុញ្ញាតឱ្យមានអ្នករាយការណ៍ពិសេសរបស់អង្គការសហប្រជាជាតិ និងដាក់ការិយាល័យរបស់ខ្លួននៅកម្ពុជា តាំងពីសម្ដេចតេជោ ហ៊ុន សែន អតីតនាយករដ្ឋមន្ត្រី និងបន្តរហូតមកដល់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនាពេលបច្ចុប្បន្ននេះផងដែរ។ ការដាក់ការិយាល័យរបស់អ្នករាយការណ៍ពិសេសរបស់អង្គការសហប្រជាជាតិនេះ មិនមែនមានន័យថា កម្ពុជាមិនគោរពសិទ្ធិមនុស្សនោះទេ ផ្ទុយទៅវិញ គឺក្នុងគោលដៅតាមដានការអនុវត្តសិទ្ធិមនុស្សនៅកម្ពុជា។ មិនតែប៉ុណ្ណោះ គ.ស.ម.ក. មិនដែលបដិសេធ និងតែងតែទទួលស្វាគមន៍ពិភាក្សាជាមួយតំណាងស្ថានទូតនានា រួមទាំងអង្គការអន្តរជាតិផងដែរ។ ឯកឧត្តមបានថ្លែងអំណរគុណដល់រាជរដ្ឋាភិបាលដែលបានលើកកម្ពស់ និងការពារសិទ្ធិមនុស្សនៅកម្ពុជា។ ជាពិសេស កម្ពុជាបានការពារ និងគោរពសិទ្ធស្រ្តី ខុសពីប្រទេសមួយចំនួននៅលើពិភពលោក ដែលស្ត្រីត្រូវបានបិទសិទ្ធិ សូម្បីតែប័ណ្ណបើកបរ មិនឱ្យរៀនសូត្រខ្ពង់ខ្ពស់ និងមិនមានសិទ្ធជ្រើសរើសគូអនាគត។បន្ថែមពីនេះ ឯកឧត្តមទេសរដ្ឋមន្ត្រី បានបញ្ជាក់ថា អ្វីដែលយើងគ្រប់គ្នាគួរមានមោទនភាពបំផុតក្នុងនាមជាប្រជាជនខ្មែរនោះ គឺកម្ពុជា ពុំមានទោសប្រហារជីវិតដូចប្រទេសដទៃឡើយ ដែលការលុបចោលទោសប្រហារជីវិតនេះ គឺជាការបំពេញកាតព្វកិច្ចមួយដ៏សំខាន់បំផុត ស្របតាមនិយាមនៃច្បាប់សិទ្ធិមនុស្សអន្តរជាតិ។ឯកឧត្តមទេសរដ្ឋមន្រ្តី ក៏បានកត់សម្គាល់ និងកោតសរសើរ ព្រមទាំងវាយតម្លៃខ្ពស់ចំពោះរបាយការណ៍របស់ឯកឧត្តម អ៊ុន ចាន់ដា អភិបាលនៃគណៈអភិបាលខេត្តកំពង់ចាម ដែលមានលក្ខណៈគ្រប់ជ្រុងជ្រោយ ស៊ីជម្រៅរៀបរាប់ពីវឌ្ឍនភាព ក៏ដូចជាភាពរីកចម្រើននៅក្នុងខេត្តទាំង មូល ជាពិសេសការយកចិត្តទុកដាក់ខ្ពស់ទៅលើវិស័យអប់រំជាខ្លាំងផង ដែរ។ មួយវិញទៀត គ.ស.ម.ក ក៏តែងតែចូលរួម ការពារសិទ្ធិរបស់បងប្អូនអ្នកស្រឡាញ់ភេទដូចគ្នា និងជនមានពិការភាព​ ហើយសេរីភាពនៃជំនឿសាសនា ក៏ប្រជាពលរដ្ឋកម្ពុជាទូទាំងប្រទេសមានសិទ្ធិពេញលេញក្នុងការជ្រើសរើសផងដែរ៕

ឯកឧត្ដមឧបនាយករដ្ឋមន្ត្រី ហ៊ុន ម៉ានី អញ្ជើញជាតំណាងដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត ក្នុងពិធីបិទវគ្គបណ្តុះបណ្តាលឆ្នាំ២០២៤ និងបើកវគ្គបណ្តុះបណ្តាលឆ្នាំ២០២៥ នៃសាលាភូមិន្ទរដ្ឋបាល

2025/05/27 04:49:37 pm        67
Facebook Telegram Linkin
ភ្នំពេញ ៖ នារសៀលថ្ងៃទី២៧ ខែឧសភា ឆ្នាំ២០២៥ ឯកឧត្ដម ហ៊ុន ម៉ានី ឧបនាយករដ្ឋមន្ត្រី រដ្ឋមន្ត្រីក្រសួងមុខងារសាធារណៈ តំណាងដ៏ខ្ពង់ខ្ពស់ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញជាអធិបតីដ៏ខ្ពង់ខ្ពស់ក្នុងពិធីបិទវគ្គបណ្តុះបណ្តាលឆ្នាំ២០២៤ និងបើកវគ្គបណ្តុះបណ្តាលឆ្នាំ២០២៥ នៃសាលាភូមិន្ទរដ្ឋបាល នៅវិទ្យាស្ថានបច្ចេកវិទ្យាកម្ពុជា។ ពិធីនេះ មានការអញ្ជើញចូលរួមពីថ្នាក់ដឹកនាំក្រសួងមុខងារសាធារណៈ តំណាងក្រសួ ស្ថាប័ន អភិបាលនៃគណៈអភិបាលខេត្តតាកែវ និងខេត្តកំពង់ស្ពឺ ក្រុមប្រឹក្សាសាលា គណៈគ្រប់គ្រងសាលា ក្រុមប្រឹក្សាវិទ្យាសាស្ត្រ សាស្ត្រចារ្យ គ្រូឧទ្ទេស មន្ត្រីរាជការ សិស្សមន្ត្រី កម្មសិក្សាការី និងសិក្ខាកាមទាំងអស់របស់សាលាភូមិន្ទរដ្ឋបាល សរុបប្រមាណ ២,០០០អង្គ/នាក់។ក្នុងសុន្ទរកថាស្វាគមន៍ និងរបាយការណ៍សង្ខេប ឯកឧត្តម យក់ ប៊ុនណា រដ្ឋលេខាធិការប្រចាំការក្រសួងមុខងារសាធារណៈ និងជានាយកសាលាភូមិន្ទរដ្ឋបាល បានមានប្រសាសន៍ថា ក្នុងក្របខណ្ឌនៃបេសកកម្មរបស់ខ្លួន សាលាភូមិន្ទរដ្ឋបាលសម្រេចបាននូវលទ្ធផលគួរជាទីមោទនៈ ជាបន្តបន្ទាប់ សម្រាប់ការអនុវត្តសកម្មភាពអភិវឌ្ឍធនធានមនុស្សក្នុងវិស័យសាធារណៈ ដោយចាប់តាំងពីការបើកឱ្យដំណើរការឡើងវិញរយៈពេលជាង៣០ឆ្នាំ ពោលគឺចាប់ពីឆ្នាំ១៩៩២ មកដល់ឆ្នាំ២០២៤ កន្លងមកនេះ សាលាសម្រេចបាននូវការបណ្តុះបណ្តាលមន្រ្តីរាជការ ទាំងវគ្គសិក្សារយៈពេលវែង និងវគ្គសិក្សារយៈពេលខ្លី សរុបចំនួន ៣០,២២៦ នាក់ (នារី ៦,៨៧៤ នាក់ ស្មើ ២២,៧៤%) ក្នុងនោះរួមមាន៖ សិស្សមន្ត្រីជាន់ខ្ពស់, សិស្សមន្ត្រីមធ្យម, សិស្សមន្ត្រីក្រមការ, កម្មសិក្សាការីមន្ត្រីជាន់ខ្ពស់, កម្មសិក្សាការីមន្ត្រីមធ្យម, កម្មសិក្សាការីមន្ត្រីគ្រប់គ្រងរដ្ឋបាល, កម្មសិក្សាការីមន្ត្រីក្រមការ, សិស្សមន្ត្រីក្របខណ្ឌថ្មី និងសិក្ខាកាមវគ្គខ្លី។ ដោយឡែក ជ័យលាភីដែលត្រូវទទួលវិញ្ញាបនបត្រ ឆ្នាំ២០២៤ នារសៀលនេះ មានចំនួនសរុប ៦៦៧នាក់ (នារី ១៤៧នាក់, ព្រះសង្ឃ១១អង្គ) រួមមាន៖ ១).វិក្រឹតការមន្ត្រីជាន់ខ្ពស់ ចំនួន ៩៨នាក់ (នារី ១៥នាក់, ព្រះសង្ឃ ៧អង្គ), ២).វិក្រឹតការមន្ត្រីមធ្យម ចំនួន ២៣៥នាក់ (នារី ៤៩នាក់), ៣).វិក្រឹតការមន្ត្រីគ្រប់គ្រងរដ្ឋបាល ចំនួន ៤១នាក់ (នារី ១១នាក់, ព្រះសង្ឃ ៤អង្គ), ៤).វិក្រឹតការមន្ត្រីក្រមការ ចំនួន ១៦នាក់ (នារី ៦នាក់), ៥).សិក្ខាកាមមន្ត្រីជាន់ខ្ពស់នៃសាកលវិទ្យាល័យការពារជាតិ ចំនួន ៩៨នាក់ (នារី ៦នាក់), ៦/សិក្ខាកាមមន្ត្រីមធ្យម ជំនាន់ទី៧ នៃក្រសួងបរិស្ថាន ចំនួន ២៣នាក់ (នារី ៩នាក់) និង ៧).សិក្ខាកាមមន្ត្រីខុទ្ទកាល័យនៃក្រសួង ស្ថាប័ន ចំនួន ១៦៥នាក់ (នារី ៥៧នាក់)។ទន្ទឹមនេះ ឯកឧត្តមនាយកសាលា បានលើកឡើងថា ក្នុងឆ្នាំ២០២៥ សាលាភូមិន្ទរដ្ឋបាលបានបើកវគ្គបណ្តុះបណ្តាលបន្តសម្រាប់សិស្សមន្ត្រីជាន់ខ្ពស់ជំនាន់ទី១៣, សិស្សមន្ត្រីក្រមការជំនាន់ទី១១ កម្មសិក្សាការី ឆ្នាំ២០២៥ សរុបចំនួន ៩៧៨ នាក់ (នារី ២១០នាក់, ព្រះសង្ឃ២០អង្គ)។ បន្ថែមលើចំនួនទាំងនេះ ឯកឧត្តមបានបញ្ជាក់ថា សាលាបាននិងកំពុងបើកវគ្គបណ្តុះបណ្តាលតម្រង់ទិសមន្ត្រីក្របខណ្ឌថ្មីឆ្នាំ២០២៤ មកពីក្រសួង ស្ថាប័ន និងរដ្ឋបាលថ្នាក់ក្រោមជាតិ ចំនួន ២,០២៤នាក់ (នារី ៨៧៩នាក់) និងវគ្គបណ្តុះបណ្តាលរយៈពេលខ្លី សរុបចំនួន ១,៥៦៦នាក់ (នារី ៣៧០នាក់) និងវគ្គផ្សេងៗទៀត ក្នុងក្របខណ្ឌជាមួយក្រសួង ស្ថាប័នថ្នាក់ជាតិ គ្រឹះស្ថានបណ្តុះបណ្តាលអន្តរជាតិ និងដៃគូអភិវឌ្ឍផងដែរ៕

វិទ្យាស្ថានពហុបច្ចេកទេសខេត្តព្រះវិហារប្រកាសផ្ដល់អាហារូបករណ៍វគ្គជំនាញ ១២០កន្លែង សិក្សាដោយឥតគិតថ្លៃដល់យុវជនមកពីគ្រួសារក្រីក្រ និងគ្រួសារងាយរងហានិភ័យ រួមទាំងប្រាក់ឧបត្ថម

2025/05/27 04:47:06 pm        63
Facebook Telegram Linkin
(ព្រះវិហារ)៖ នាពេលថ្មីៗនេះ វិទ្យាស្ថានពហុបច្ចេកទេសខេត្តព្រះវិហារ បានប្រកាសផ្ដល់ជូនអាហារូបករណ៍ ១០០% ចំនួន១២០កន្លែង ដល់ក្រុមយុវជនមកពីគ្រួសារក្រីក្រ និងគ្រួសារងាយរងហានិភ័យ ព្រមទាំងផ្ដល់ប្រាក់ ឧបត្ថម្ភប្រចាំខែថែមទៀត សម្រាប់ការសិក្សាមុខជំនាញសំខាន់ៗចំនួន៤មុខវិជ្ជា រយៈពេល៤ខែ។ការផ្ដល់ជូនអាហារូបករណ៍ពីសំណាក់វិទ្យាស្ថានពហុបច្ចេកទេសខេត្តព្រះវិហារនេះ គឺជាការអនុវត្ត កម្មវិធីអប់រំបណ្ដុះបណ្ដាលបច្ចេកទេសនិងវិជ្ជាជីវៈ (TVET) ១.៥លាននាក់ របស់រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ក្នុងទិសដៅលើកកម្ពស់ស្ថានភាពជីវិតយុវជនមកពីគ្រួសារក្រីក្រ និងគ្រួសារងាយរងហានិភ័យ តាមរយៈការផ្ដល់ឱ្យពួកគេនូវជំនាញជាក់លាក់មួយ និងមានលទ្ធភាពទទួលបានចំណូលសមរម្យ។មុខជំនាញដែលកំពុងមានតម្រូវការក្នុងទីផ្សារទាំង៤មុខនេះ រួមមាន៖ (១).ការដំឡើងបណ្ដាញអគ្គិសនីក្នុងអគារ ផ្ដល់ជូនសិក្ខាកាមចំនួន៣០នាក់ (២).សេវាកម្មកុំព្យូទ័រ ផ្ដល់ជូនសិក្ខាកាមចំនួន៣០នាក់ (៣).សេវាកម្មបរិក្ខារ ត្រជាក់ក្នុងគេហដ្ឋាន ផ្ដល់ជូនសិក្ខាកាមចំនួន៣០នាក់ និង(៤).សេវាកម្មសម្អាងកាយ ផ្ដល់ជូនសិក្ខាកាមចំនួន៣០នាក់ដែរ។ការទទួលពាក្យចូលសិក្សាមុខជំនាញ TVET ទាំង៤មុខនេះ ចាប់ផ្ដើមពីថ្ងៃជូនដំណឹងនេះតទៅ។ ចំពោះកាលបរិច្ឆេទ ចូលសិក្សា គឺចាប់ផ្ដើមពីថ្ងៃទី១ ខែកក្កដា ឆ្នាំ២០២៥ តទៅ។ប្រសិនបើយុវជនគោលដៅទាំងពីរក្រុមខាងលើចាប់អារម្មណ៍ក្នុងការសិក្សាមុខជំនាញនេះ សូមទាក់ទង មកកាន់វិទ្យាស្ថានពហុបច្ចេកទេសខេត្តព្រះវិហារ ដែលមានទីតាំងនៅភូមិដំណាក់ សង្កាត់កំពង់ប្រណាក ក្រុងព្រះវិហារ ខេត្តព្រះវិហារ (ក្រោយសាលាខេត្តព្រះវិហារ) ឬតាមមន្ត្រីចុះផ្សព្វផ្សាយតាមរយៈ QR Code មាននៅក្នុង សេចក្ដីជូនដំណឹងរបស់វិទ្យាស្ថានដែលភ្ជាប់មកជាមួយនេះ ឬអាចទាក់ទងតាមរយៈលេខទូរស័ព្ទ ០៧១ ២៨៦ ១៧៧៦ / ០៨៨ ៥៤១ ៥៥៦៦ / ០១២ ៦៤១ ៣២០ / ០៩២ ៨៨ ៧៨ ៩៨។គួរបញ្ជាក់ដែរថា ក្រៅពីក្រុមយុវជនគោលដៅមកពីគ្រួសារក្រីក្រ និងគ្រួសារងាយរងហានិភ័យ វគ្គបណ្ដុះបណ្ដាល ពិសេសនេះក៏បើកចំហសម្រាប់យុវជន និងប្រជាពលរដ្ឋទូទៅ រួមទាំងកម្មករ-កម្មការនីផងដែរ ដែលអាចដាក់ពាក្យចូល សិក្សាជំនាញបច្ចេកទេសនិងវិជ្ជាជីវៈបានដោយឥតបង់ថ្លៃដូចគ្នា គ្រាន់តែមិន ទទួលបានប្រាក់ ឧបត្ថម្ភប្រចាំខែពីរាជរដ្ឋាភិបាល៕

ដៃគូអន្តរជាតិបន្តជួយជ្រោមជ្រែងប្រទេសកម្ពុជាដើម្បីឆ្លើយតបទៅតំរូវការស្តង់ដារកូដិចអន្តរជាតិ

2025/05/27 04:45:19 pm        64
Facebook Telegram Linkin
ភ្នំពេញ ៖ដៃគូរអន្តរជាតិបន្តជួយជ្រោមជ្រែងប្រទេសកម្ពុជា ដើម្បីឆ្លើយតបទៅនឹងតំរូវការស្តង់ដារកូដិចអន្តរជាតិ។ កូដិច ឬក្រមអាហារ គឺជាបណ្តុំនៃស្តង់ដារម្ហូបអាហារអន្តរជាតិដែលបានបង្កើតដោយអង្គការអន្តរជាតិពីរធំៗគឺអង្គការ WHO និង អង្គការ FAO។លោកស្រី រេប៊ែកកា ប៊ែល តំណាងអង្គការស្បៀង និងកសិកម្មនៃសហប្រជាជាតិ (FAO) ប្រចាំប្រទេសកម្ពុជា បានមានប្រសាសន៍ថា អង្គការ FAO បានធ្វើការយ៉ាងជិតស្និតក្នុងភាពជាដៃគូជាមួយរាជរដ្ឋាភិបាលកម្ពុជា ក្នុងការផ្តល់មាតិយោបល់បច្ចេកទេសផ្សេងៗ ដើម្បីឱ្យកម្ពុជាទទួលបានស្តង់ដារកូដិចអន្តរជាតិ។ ការថ្លែងយ៉ាងដូច្នេះ បានធ្វើឡើងក្នុងពិធីបើកកិច្ចប្រជុំជាន់ខ្ពស់ និងសិក្ខាសាលាតម្រង់ទិសអំពីកូដិច (High-level Advocacy Meeting on Codex and codex orientation workshop) នាថ្ងៃទី២៧ ខែឧសភា ឆ្នាំ២០២៥នេះ ស្ថិតនៅសណ្ឋាគារ Sun and moon រាជធានីភ្នំពេញ។  ​លោក ស្រ៊ីដារ ដារម៉ាពូរី មន្រ្តីជាន់ខ្ពស់ផ្នែកសុវត្ថិភាពម្ហូបអាហារ និងអាហារូបត្ថម្ភរបស់អង្គការ FAO បានលើកឡើងដែរថា កូដិគឺជាបណ្តុំនៃស្តង់ដារម្ហូបអាហារអន្តរជាតិដែលបានបង្កើតឡើង ដោយគណៈកម្មាធិការដូដិច ដែលជាគំនិតផ្តួចផ្តើមរួមគ្នារបស់អង្គការ FAO និងWHO ក្នុងគោលបំណងការពារសុខភាពរបស់អ្នកប្រើប្រាស់ និងជួយជំរុញការអនុវត្តដោយស្មើភាពនៅក្នុងពាណិជ្ជកម្ពុជាអាហារ/ស្បៀង។ សម្រាប់ប្រទេសកម្ពុជាការចូលរួមក្នុងការងារកូដិច គឺជាឱកាសពិសេសក្នុងផ្សារភ្ជាប់ខ្លួនទៅនឹងស្តង់ដារពិភពលោក ពង្រឹងប្រព័ន្ធសុវត្ថិភាពម្ហូបអាហារជាតិ និងបើកច្រកទីផ្សារថ្មីសម្រាប់ផលិតផលកម្ពុជា។ឯកឧត្តម កែ គី រដ្ឋលេខាធិការក្រសួងឧហ្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ មានប្រសាសន៍ដែរថា ប្រទេសកម្ពុជាបានចូលជាសមាជិកអង្គការកូដិចអន្តរជាតិតាំងពីឆ្នាំ ១៩៧៥ ក្នុងគោលបំណងដើម្បីទទួលបាននូវការធ្វើពាណិជ្ជកម្មស្មើភាព និងទទួលបាននូវសុវត្ថិភាពម្ហូបអាហារការពារសុខភាពអ្នកប្រើប្រាស់តាមរយៈការចូលរួមក្នុងការបង្កើតស្តង់ដារម្ហូបអាហារកូដិចអន្តរជាតិ និងទាញយកស្តង់ដារម្ហូបអាហារអន្តរជាតិ នេះមកប្រើប្រាស់ធ្វើជាស្តង់ដារជាតិកម្ពុជា ដើម្បីងាយស្រួលក្នុងការធ្វើសមាហរណកម្មបទបញ្ញត្តិម្ហូបអាហាររបស់កម្ពុជាឱ្យចុះសម្រុងជាមួយស្តង់ដារអន្តរជាតិ ដែលផ្តល់ភាពងាយស្រួលដល់ផលិតផលរបស់កម្ពុជាក្នុងការនាំចេញទៅកាន់ទីផ្សារទូទាំងពិភពលោក និងទទួលការនាំចូលផលិតផលពីបរទេសមកវិញក្នុងលក្ខណៈស្តង់ដារស្មើភាពគ្នា។គួរបញ្ជាក់ដែរថា ដើម្បីឱ្យកម្ពុជាអាចចូលរួមសកម្មក្នុងការងារស្តង់ដារកូដិចអន្តរជាតិ អង្គការកូដិចដែលជាអង្គការមួយកើតឡើងពីគំនិតផ្តួចផ្តើម របស់អង្គការអន្តរជាតិពីរធំគឺអង្គការ WHO និង អង្គការ FAO បានតម្រូវឱ្យរដ្ឋជាសមាជិករបស់កូដិច ដែលមានកម្ពុជា ផងនោះត្រូវបង្កើតចំនុចទំនាក់ទំនងកូដិចជាតិ (National Codex Focal Point) ហើយដែលចំនុចទំនាក់ទំនងនេះ ត្រូវបានបង្កើតឡើងដំបូងនៅក្រសួងពាណិជ្ជកម្ម និងថ្មីៗនេះបានផ្ទេរមកវិទ្យាស្ថានស្តង់ដាករម្ពុជា នៅថ្ងៃ០៥ ខែ ធ្នូ ឆ្នាំ ២០២៤។ អត្ថបទ ៖ ទូច សោភ័ណ

ឯកឧត្តម គន់ គីម ចុះពិនិត្យការបន្តកសាងសមិទ្ធផល និងហេដ្ឋារចនាសម្ព័ន្ធ ភូមិប៊ុនរ៉ានីសែនជ័យ ដំណាក់ទ្រយឹង

2025/05/27 04:41:14 pm        199
Facebook Telegram Linkin
ពោធិ៍សាត់ ៖ ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្រ្តី អនុប្រធាន និងជាអគ្គលេខាធិការសមាគមអតីតយុទ្ធជន កម្ពុជា បានអញ្ជើញចុះពិនិត្យការបន្តកសាងសមិទ្ធផល និងហេដ្ឋារចនាសម្ព័ន្ធជូនអតីតយុទ្ធជន នៅភូមិប៊ុនរ៉ានីសែន ជ័យដំណាក់ទ្រយឹង ក្នុងឃុំព្រងិល ស្រុកភ្នំក្រវាញក្នុងខេត្តពោធិ៍សាត់នៅថ្ងៃទី២៧ ខែឧសភា នេះ ។​ឯកឧត្តមកិត្តិសង្គហបណ្ឌិត គន់ គីម បានអញ្ជើញដឹកនាំពិនិត្យវឌ្ឍនភាពទូទៅ ក្នុងភូមិប៊ុនរ៉ានីសែនជ័យដំណាក់ទ្រយឹង និងការសាងសង់ផ្ទះ បន្ថែមចំនួន៣០០ខ្នង ជាអំណោយដ៏ថ្លៃថ្លារបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាអនុប្រ ធានទី១ សមាគមអតីតយុទ្ធជនកម្ពុជា។ ឯកឧត្តមបានវាយតម្លៃ និងកោតសរសើរចំពោះឯកឧត្តម ខូយ រីដា អភិបាល ខេត្តពោធិ៍សាត់ និងបណ្តាមន្ទីរ-អង្គភាពជុំវិញខេត្តដែលបានខិតខំកសាងភូមិរ៉ានីសែនជ័យដំណាក់ទ្រយឹង រហូតទទួលបានសមិទ្ធផលជាបន្តបន្ទាប់។ឧត្តមកិត្តិសង្គហបណ្ឌិតថ្លែងថា ភូមិប៊ុនរ៉ានីសែនជ័យដំណាក់ទ្រយឹង បង្កើតឡើងសម្រាប់ អតីតយុទ្ធជន ក្រោមគំនិតផ្តួចផ្តើម និងកសាងដោយសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទ ក្រហមកម្ពុជា បានយកចិត្តទុកដាក់យ៉ាងខ្លាំងចំពោះអតីតយុទ្ធជន។ ក្នុងនោះអតីតយុទ្ធជនជាច្រើនគ្រួសារបាន ទទួលដីសម្បទានសង្គមកិច្ច និងផ្ទះព្រមទាំងសមិទ្ធផលដូចជា ផ្លូវ អគ្គិសនី ទឹកស្អាត សាលារៀន និងមណ្ឌល សុខភាព។ សកម្មភាពទាំងអស់បន្តដល់រាជរដ្ឋាភិបាល នីតិកាលទី៧ ដឹកនាំដោយសម្ដេចធិបតី ហ៊ុន ម៉ាណែត នាយករដ្ឋមន្ត្រី នៅតែយកចិត្តទុកដាក់ចំពោះអតីតយុទ្ធជនជារៀងរហូត និងបន្តអភិវឌ្ឍកសាងហេដ្ឋារចនាសម្ព័ន្ធ បន្ថែមទៀតនៅភូមិនេះ។ក្នុងនាមសម្តេចតេជោ ហ៊ុន សែន ប្រធានសមាគមអតីតយុទ្ធជនកម្ពុជា និងឯកឧត្តម ខូយ រីដា អភិបាលខេត្តពោធិ៍សាត់ ឯកឧត្តម បានអញ្ជើញផ្តល់ដី និងផ្ទះចំនួន៨ខ្នងជូនប្រជាពលរដ្ឋក្រីក្រី ដែលជាអំណោយដ៏ថ្លៃថ្លា របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។ ឯកឧត្តម បានចុះពិនិត្យដំណាំដាំដុះ និងបានកោតសរសើរដល់គ្រួសារអតីតយុទ្ធជនដែលកំពុងរស់នៅក្នុង ភូមិប៊ុនរ៉ានីសែនជ័យដំណាក់ទ្រយឹង បានធ្វើការដាំដុះដំណាំ មិនត្រឹមតែសម្រាប់ហូប និងសម្រាប់លក់ថែមទៀត ផង។ ឯកឧត្តមកិត្តិសង្គហបណ្ឌិត គន់ គីម បានជំរុញឱ្យគ្រួសារអតីតយុទ្ធជនទាំងអស់ ត្រូវបន្តធ្វើការដាំដុះដំណាំ បន្ថែមទៀត ដើម្បីបង្កើនជីវភាព «មានផ្ទះ មានដី ត្រូវតែមានដំណាំ» ៕អត្ថបទ៖ សេក ឧត្តម

សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ចាត់តំណាងចូលរួមរំលែកទុក្ខសពកងកម្លាំងមួកខៀវ ពលីក្នុងពេលបំពេញបេសកកម្មរបស់អង្គការសហប្រជាជាតិ នៅសាធារណរដ្ឋស៊ូដង់ខាងត្បូង

2025/05/27 03:58:53 pm        70
Facebook Telegram Linkin
ភ្នំពេញ៖ នៅរសៀលថ្ងៃទី២៧ ខែឧសភា ឆ្នាំ២០២៥ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ចាត់ឱ្យ ឯកឧត្តម យូ ឡាណា អគ្គលេខាធិការរងទី២ កាកបាទក្រហមកម្ពុជា ដឹកនាំគណៈប្រតិភូកាកបាទក្រហមកម្ពុជា អញ្ជើញគោរពវិញ្ញាណក្ខន្ធ និងចូលរួមរំលែកទុក្ខយ៉ាងក្រៀមក្រំបំផុតជាមួយឧបាសិកា ដួង ចំរើន ព្រមទាំងក្រុមគ្រួសារសព ចំពោះមរណភាព អនុសេនីយ៍ឯក ដួង ម៉ាហ្គាលី ប្រធានក្រុមប្រតិបត្តិការ ប្រចាំតំបន់ម៉ាឡាកាល់ នៃកងអនុសេនាធំ រាជអាវុធហត្ថលេខ៨៧២ មជ្ឈមណ្ឌលជាតិ គ្រប់គ្រងកងកម្លាំង រក្សាសន្តិភាព បោសសំអាតមីន និងកាកសំណល់សង្គ្រាម ដែលបានពលីកាលពីថ្ងៃទី១៣ ខែឧសភា ឆ្នាំ២០២៥ វេលាម៉ោង ២០:៥០នាទី ក្នុងជន្មាយុ ៣៤ឆ្នាំ ក្នុងបេសកកម្មរក្សាសន្តិភាពរបស់អង្គការសហប្រជាជាតិ នៅសាធារណរដ្ឋស៊ូដង់ខាងត្បូង។ សពត្រូវបានដឹកត្រឡប់មកដល់ប្រទេសកម្ពុជាកាលពីល្ងាចថ្ងៃទី២៦ ខែឧសភា ឆ្នាំ២០២៥នេះ និងកំពុងរៀបចំធ្វើបុណ្យតាមប្រពៃណីនៅវត្តជម្ពូវ័ន ស្ថិតក្នុងសង្កាត់ចោមចៅទី៣ ខណ្ឌពោធិ៍សែនជ័យ រាជធានីភ្នំពេញ។ក្នុងវេលាដ៏សែនក្ដុកក្ដួលបំផុតនេះ ឯកឧត្តមអគ្គលេខាធិការរងទី២ បានប្រគល់នូវសាររំលែកទុក្ខរបស់ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ជូនក្រុមគ្រួសារនៃសព ដែលមានខ្លឹមសារថា «ខ្ញុំ និងសហការី សូមចូលរួមសម្តែងនូវសមានទុក្ខដ៏ក្រៀមក្រំ ដោយសេចក្តីសោកស្តាយ ស្រណោះអាឡោះអាល័យពន់ពេក ជាមួយនិងឧបាសិកា ចំពោះការបាត់បង់ កូនជាទីស្រឡាញ់ ដែលប្រកបដោយកតញ្ញូតាធម៌ គុណធម៌ ចរិយាធម៌ គោរពប្រណិប័តន៍ចំពោះ ឪពុក ម្តាយ ក្រុមគ្រួសារ ព្រមទាំងមិត្តភក្តិ ញាតិសន្តានទាំងអស់។ ការលាចាករបស់ វរសេនីយ៍ឯក ដួង ម៉ាហ្គាលី ជាការបាត់បង់វីរៈយុទ្ធនារីកម្ពុជាដ៏ឆ្នើមមួយរូប ដែលបានពលីជីវិតក្នុងបេសកកម្មបម្រើជាតិ មាតុភូមិ និង ប្រជាជនកម្ពុជា ក្រោមឆ័ត្រអង្គការសហប្រជាជាតិ ដើម្បីរួមចំណែកនាំសុខសន្តិភាព មិនត្រឹមតែជូនជាតិ ប្រជាជននៃសាធារណរដ្ឋស៊ូដង់ខាងត្បូងប៉ុណ្ណោះទេ តែមានគុណតម្លៃចំពោះសន្តិភាពពិភពលោកទាំងមូល។»កាកបាទក្រហមកម្ពុជា បាននាំយកគ្រឿងឧបភោគ-បរិភោគ និងថវិកាមួយចំនួនចូលរួមរំលែកទក្ខជាមួយក្រុមគ្រួសារនៃសព និងសូមឧទ្ទិសបួងសួងសុំដួងវិញ្ញាណក្ខន្ធ វរសេនីយ៍ឯក ដួង ម៉ាហ្គាលី បានទៅកាន់ សុគតិភពកុំបីឃ្លៀងឃ្លាតឡើយ៕

ឯកឧត្តម ហ៊ុន ម៉ានី បានអញ្ជើញជាអធិបតីក្នុងពិធីប្រកាសទទួលស្គាល់ប្រធានគណៈកម្មាធិការសហភាពសហព័ន្ធយុវជនកម្ពុជា ខេត្តកំពង់ស្ពឺ

2025/05/27 03:55:06 pm        65
Facebook Telegram Linkin
កំពង់ស្ពឺ ៖ ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា បានថ្លែងក្នុងពិធីប្រកាសទទួលស្គាល់ប្រធានគណៈកម្មាធិការសហភាពសហព័ន្ធយុវជនកម្ពុជា ខេត្តកំពង់ស្ពឺ នាព្រឹកថ្ងៃទី ២៧ ខែឧសភា ឆ្នាំ ២០២៥នេះថា ការចូលរួមសកម្មភាពជាមួយស.ស.យ.ក. គឺជាការចូលរួមដោយគ្មានលក្ខខណ្ឌ ក្នុងន័យនេះ ការចូលរួមក្នុងកិច្ចការងារស្ម័គ្រចិត្ត ឬក៏សកម្មភាពរបស់ស.ស.យ.ក. មិនអាចទាមទារមកវិញនៅតំណែង ឬក៏តួនាទីណាមួយនោះទេ។​ផ្សារភ្ជាប់នឹងការលើកឡើងខាងលើនេះ ឯកឧត្តម ហ៊ុន ម៉ានី បានបន្តថា តាមរយៈវេទិកា ស.ស.យ.ក. សមាជិក សមាជិកា ម្នាក់ៗ អាចបង្ហាញសមត្ថភាពខ្លួនបាន ដោយចាប់ផ្តើមអនុវត្តពីសកម្មភាពតូចៗ ផ្សារភ្ជាប់ជាមួយនឹងមនសិការ ឆន្ទះពុះពារ ភាពច្នៃប្រឌិតក្នុងការបំពេញភារកិច្ចការងារ។ ឯកឧត្តម សង្កត់ធ្ងន់ថា តាមរយៈការអនុវត្តការងារស្ម័គ្រចិត្ត ដោយមិនរំពឹងទុកនូវការតបស្នង និងតួនាទីរបស់សមាជិក សមាជិកាណាម្នាក់ គឺបានបង្ហាញនូវសក្ខានុពលរបស់ពួកគេ សម្រាប់ថ្នាក់ដឹកនាំធ្វើការវិនិច្ឆ័យលក្ខណៈសម្បត្តិ ដើម្បីផ្តល់ឱកាសឱ្យបំពេញកិច្ចការងារធំណាមួយ។ឯកឧត្តម ហ៊ុន ម៉ានី កោតសរសើរ និងវាយតម្លៃខ្ពស់ចំពោះគណៈកម្មាធិការស.ស.យ.ក. ថ្នាក់ដឹកនាំ និងសមាជិក សមាជិកា ស.ស.យ.ក. ខេត្តកំពង់ស្ពឺទាំងអស់ ដែលបានបំពេញការងារប្រកបដោយប្រសិទ្ធភាពខ្ពស់ និងសម្រេចបានលទ្ធផលជាទីគាប់ប្រសើរ។ ឯកឧត្តម បានបន្តថា មិនមែនសម្រាប់តែខេត្តកំពង់ស្ពឺប៉ុណ្ណឹងទេ ដែលស.ស.យ.ក. ដើរតួជាដៃគូមួយយ៉ាងសំខាន់របស់រដ្ឋបាលខេត្ត ក្នុងនោះគឺនៅទូទាំងប្រទេសតែម្តង ដែលរចនាសម្ព័ន្ធគណៈកម្មាធិការស.ស.យ.ក. រាជធានី-ខេត្តទាំងអស់ បានធ្វើសកម្មភាពព្រមៗគ្នាឆ្លើយតបទៅនឹងគោលដៅរបស់រាជរដ្ឋាភិបាល ជាពិសេសនោះគឺស្របតាមក្របខណ្ឌទិសដៅនៃការអនុវត្តការងាររបស់រដ្ឋបាលខេត្ត។ ទន្ទឹមនឹងនេះ ឯកឧត្តម ក៏បានគូសបញ្ជាក់ផងដែរថា កម្មវិធីនិមួយៗដែលស.ស.យ.ក. រៀបចំគឺបង្កប់ន័យនៃការបំផុសចលនា និងការដាក់ទិសដៅ គោលដៅរួមសម្រាប់កម្ពុជា។ កម្មវិធីស.ស.យ.ក. មួយចំនួនមានលក្ខណៈផ្សាភ្ជាប់ជាមួយទិដ្ឋភាពជាក់ស្តែងរបស់កម្ពុជា ក្នុងនោះរួមមានកម្មវិធីបណ្តុះបណ្តាលមនសិការពលរដ្ឋល្អ ដែលមានគោលបំណងចង់ឱ្យយុវជន យុវនារី កម្ពុជាមានក្តីសង្ឃឹម ហើយបង្កើតនូវភាពជឿជាក់លើសង្គមជាតិកម្ពុជា។ ជាមួយគ្នានោះ តាមរយៈយុទ្ធនាការពលរដ្ឋល្អ សកម្មភាពសមាជិក ស.ស.យ.ក. ចូលរួមសង្កេតការណ៍បោះឆ្នោត ក្នុងនាមជាអង្គការសមាគម ក៏បានឆ្លុះបញ្ចាំងភាពជាសាក្សី នៃការប្រព្រឹត្តទៅរបស់លិទ្ធិប្រជាធិបតេយ្យសេរីពហុបក្សនៅកម្ពុជាផងដែរ។សូមជម្រាបជូនថា ពិធីប្រកាសទទួលស្គាល់ប្រធានគណៈកម្មាធិការសហភាពសហព័ន្ធយុវជនកម្ពុជា ខេត្តកំពង់ស្ពឺ នេះបានប្រព្រឹត្តទៅនាព្រឹកថ្ងៃទី២៧ ខែឧសភា ឆ្នាំ២០២៥ នៅសាលប្រជុំធំ សាលាខេត្តកំពង់ស្ពឺ។ អញ្ជើញមានវត្តមាននាឱកាសនោះរួមមាន ឯកឧត្តម ប្រធានក្រុមប្រឹក្សាភិបាលខេត្ត ឯកឧត្តមអភិបាលនៃគណៈអភិបាលខេត្ត ឯកឧត្តម លោកជំទាវ លោក លោកស្រី គណៈអចិន្រៃ្តយ៍ គណៈកម្មាធិការកណ្ដាល ស.ស.យ.ក. និង សមាជិក សមាជិកា សរុបប្រមាណជាង៤៣០ រូប៕អត្ថបទ រដ្ឋា

កម្ពុជា-បារ៉ែន ឯកភាពជំរុញឱ្យមានយន្តការពិគ្រោះយោបល់រវាងក្រសួងការបរទេស

2025/05/27 03:45:03 pm        201
Facebook Telegram Linkin
នាព្រឹកថ្ងៃទី២៧ ខែឧសភា ឆ្នាំ២០២៥, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានជួបពិភាក្សាការងារទ្វេភាគីជាមួយ ព្រះអង្គម្ចាស់ Salman bin Hamad Al Khalifa រជ្ជទាយាទ និងជានាយករដ្ឋមន្ត្រី នៃព្រះរាជាណាចក្របារ៉ែន ក្នុងឱកាសអញ្ជើញចូលរួមកិច្ចប្រជុំកំពូលអាស៊ានលើកទី៤៦ និងកិច្ចប្រជុំកំពូលពាក់ព័ន្ធ នៅទីក្រុងគូឡាឡាំពួ ប្រទេសម៉ាឡេស៊ី ។សម្ដេចបវរធិបតី បានជម្រាបជូនព្រះអង្គម្ចាស់រជ្ជទាយាទ អំពីការធ្វើពិពិធកម្មដៃគូពាណិជ្ជកម្មរបស់កម្ពុជា រួមទាំងតំបន់មជ្ឈិមបូព៌ា។ សម្ដេចបវរធិបតី បានបន្ថែមថា កម្ពុជាកំពុងពង្រីកការតភ្ជាប់ និងប្រព័ន្ធឡូជីស្ទីករបស់ខ្លួន តាមរយៈការកសាងហេដ្ឋារចនាសម្ព័ន្ធសំខាន់ៗដូចជា អាកាសយានដ្ឋានអន្តរជាតិ ផ្លូវល្បឿនលឿន និងការអភិវឌ្ឍសមត្ថភាពកំពង់ផែស្វយ័តក្រុងព្រះសីហនុ ឱ្យក្លាយជាមជ្ឈមណ្ឌលឡូជីស្ទីក និងមានសមត្ថភាពទទួលនាវាដឹកទំនិញពីទូទាំងពិភពលោក។ សម្ដេចបវរធិបតី បានគូសបញ្ជាក់ដែរថា ប្រទេសទាំងពីរកម្ពុជា-បារ៉ែន កំពុងចរចាគ្នាដើម្បីបង្កើតយន្តការពិគ្រោះយោបល់ទ្វេភាគីរវាងក្រសួងការបរទេសនៃប្រទេសទាំងពីរ។ យន្តការនេះនឹងរួមចំណែកដល់ការពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរឱ្យកាន់តែរីកចម្រេីន និងរឹងមាំបន្ថែមទៀត។ព្រះអង្គម្ចាស់ Salman bin Hamad Al Khalifa បានលេីកឡេីងថា ប្រទេសបារ៉ែនកំពុងស្វែងរកកិច្ចសហប្រតិបត្តិការជាមួយជាមួយប្រទេសផ្សេងៗ ក្នុងនោះរួមមាន វិស័យថាមពល បច្ចេកវិទ្យាហិរញ្ញវត្ថុ (FinTech) ធនាគារ និងបញ្ញាសិប្បនិម្មិត (AI)។ ព្រះអង្គម្ចាស់ក៏បានគូសបញ្ជាក់ផងដែរថា ប្រទេសបារ៉ែនក៏ជាមជ្ឈមណ្ឌលឡូជីស្ទីកដ៏សំខាន់មួយ ដែលបម្រើដល់វិស័យនាំចេញក្នុងតំបន់ និងពិភពលោក។ថ្នាក់ដឹកនាំនៃប្រទេសទាំងពីរបានឯកភាពគ្នាថា ប្រទេសទាំងពីរ មានលក្ខណៈបំពេញបន្ថែមគ្នាទៅវិញទៅមក លើវិស័យជាច្រើន ក្នុងនោះរួមមានការផ្គត់ផ្គង់អាលុយមីញ៉ូម សម្រាប់វិស័យសំណង់។ ភាគីបារ៉ែនគាំទ្រគំនិតផ្ដួចផ្ដើមបង្កើតយន្តការពិគ្រោះយោបល់ទ្វេភាគីរវាងក្រសួងការបរទេសនៃប្រទេសទាំងពីរ ដើម្បីរួមចំណែកជំរុញកិច្ចសហប្រតិបត្តិការបារែន-កម្ពុជា៕

បណ្ដាញសង្គម

ព័ត៌មានថ្មីៗ

រដ្ឋមន្រ្តីសុខាភិបាល «មន្រ្តីសុខាភិបាលត្រូវមានស្មារតីបុរេសកម្មជាប់ជាប្រចាំ និងប្រកបដោយគុណភាពការងារ ក្នុងនាមអ្នកបម្រើសេវាសុខាភិបាល»
07/15/2025 08:07 AM
Facebook Telegram Linkin
សម្ពោធដាក់ឱ្យជាផ្លូវការអគារសាលាបឋមសិក្សាថ្មី១ខ្នង ២បន្ទប់ បន្ទាប់ពីជួសជុល និងសាងសង់ឡើងវិញរួចរាល់ ដើម្បីបម្រើឱ្យវិស័យអប់រំនៅក្នុងមូលដ្ឋាន
07/15/2025 07:07 AM
Facebook Telegram Linkin
ការពិនិត្យឡើងវិញ៖ ភាពយន្តឯកសារពីតំបន់ហ្កហ្សារបស់ BBC បំពានគោលការណ៍ណែនាំអំពីភាពត្រឹមត្រូវ
07/14/2025 08:07 PM
Facebook Telegram Linkin
មនុស្សជាច្រើននាក់ស្លាប់ក្នុងអគ្គិភ័យនៅមជ្ឈមណ្ឌលសង្គ្រោះ ក្នុងរដ្ឋ Massachusetts
07/14/2025 08:07 PM
Facebook Telegram Linkin
ជំនួយការរបស់លោក Netanyahu ប្រឈមនឹងការចោទប្រកាន់ផ្លូវការ ជុំវិញការបែកធ្លាយព័ត៌មានយោធា
07/14/2025 08:07 PM
Facebook Telegram Linkin
រដ្ឋមន្ត្រីការបរទេសអ៊ីស្រាអែល និងប៉ាឡេស្ទីន នឹងចូលរួមកិច្ចប្រជុំរបស់ EU
07/14/2025 08:07 PM
Facebook Telegram Linkin
អ៊ីរ៉ង់៖ ការដាក់ទណ្ឌកម្មជាថ្មីរបស់ UN នឹងជួបជាមួយការឆ្លើយតបយ៉ាងសមស្រប
07/14/2025 07:07 PM
Facebook Telegram Linkin
វិមានក្រឹមឡាំង៖ ការបញ្ជូនអាវុធ និងគ្រាប់រំសេវទៅអ៊ុយក្រែនពីអាមេរិក កំពុងបន្តមានធម្មតា
07/14/2025 07:07 PM
Facebook Telegram Linkin
នគរបាលឃាត់ខ្លួនមនុស្ស ៨នាក់ ក្រោយមានការប៉ះទង្គិចរបស់ក្រុមប្រឆាំងជនអន្តោប្រវេសន៍ ក្នុងទីក្រុងនៅអេស្ប៉ាញ
07/14/2025 07:07 PM
Facebook Telegram Linkin
ព្រះអង្គម្ចាស់ នរោត្តម ចក្រាវុធ ជួបពិភាក្សាការងារជាមួយ ឯកឧត្តម Chen Zhou អនុរដ្ឋមន្រ្តី ក្រសួងទំនាក់ទំនងអន្តរជាតិចិន
07/14/2025 07:07 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.