BTV NEWS

ក្រសួងការងារ នឹងនាំយកឱកាសការងារជាង ៩ម៉ឺនកន្លែង រួមនឹងអត្ថប្រយោជន៍សង្គម និងការបណ្ដុះបណ្ដាលជំនាញដោយឥតគិតថ្លៃ ជូនដល់អតីតពលករ និងពលរដ្ឋនៅក្នុងខេត្តត្បូងឃ្មុំនៅចុងសប្ដាហ៍នេះ

សាខាកាកបាទក្រហមកម្ពុជាខេត្តបាត់ដំបង ប្រគល់ផ្ទះ១ខ្នងជូនគ្រួសារមានជីវភាពខ្វះខាត និងសមាជិកគ្រួសារច្រើន

គណៈកម្មការទី៩ព្រឹទ្ធសភា ប្រជុំជាមួយតំណាងរាជរដ្ឋាភិបាល ដើម្បីពិនិត្យសិក្សាលើសេចក្ដីព្រាងច្បាប់ស្តីពី វិសោធនកម្មច្បាប់ស្តីពីផ្លូវថ្នល់

គណៈវិស្វករកម្ពុជា បើកការវាយតម្លៃសម្បទាវិជ្ជាជីវៈវិស្វកម្ម ដល់បេក្ខជនវិស្វករអាជីពជាតិលើកទី៣៥

ព័ត៌មានជាតិ

វិទ្យាស្ថានបច្ចេកវិទ្យាកម្ពុជា សម្ពោធជាផ្លូវការមជ្ឈមណ្ឌលបណ្តុះបណ្តាលបច្ចេកទេសម៉ាស៊ីនត្រជាក់

វិទ្យាស្ថានបច្ចេកវិទ្យាកម្ពុជា (ITC) នៅព្រឹកថ្ងៃទី១៨ ខែមីនា ឆ្នាំ២០២៥នេះ បានចុះអនុស្សរណៈយោគយល់ និងសម្ពោធជាផ្លូវការនូវមជ្ឈមណ្ឌលបណ្តុះបណ្តាលបច្ចេកទេសម៉ាស៊ីនត្រជាក់ ប៉ាណាសូនិក ដើម្បីជំរុញការអភិវឌ្ឍន៍បច្ចេកវិទ្យា និងជំនាញបច្ចេកទេសដល់យុវជននៅកម្ពុជា ដែលប្រព្រឹត្តទៅក្រោមអធិបតីភាព ឯកឧត្តមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា និងឯកឧត្តម Atsushi UENO ឯកអគ្គរាជទូតជប៉ុនប្រចាំនៅកម្ពុជា។ នៅក្នុងកម្មវិធីនេះ បន្ទាប់ពីការរាយការណ៍របស់ ឯកឧត្តមសាស្ត្រាចារ្យបណ្ឌិត ប៉ូ គឹមថូ នាយកវិទ្យាស្ថានបច្ចេកវិទ្យាកម្ពុជា អំពីមជ្ឈមណ្ឌលថ្មីនេះ នឹងផ្តល់ការបណ្តុះបណ្តាលតាមរយៈការអនុវត្តន៍ផ្ទាល់ជាក់ស្តែង ព្រមទាំងការអភិវឌ្ឍន៍ជំនាញ ដើម្បីធានាថា សិស្សានុសិស្សអាចទទួលបានបទពិសោធន៍អប់រំដ៏ទូលំទូលាយស្របតាមស្តង់ដារ។ ហើយតាមរយៈការចុះអនុស្សរណៈ ក្រុមហ៊ុន ប៉ាណាសូនិក នឹងធ្វើការផ្ដល់នូវម៉ាស៊ីនត្រជាក់ចុងក្រោយបង្អស់ ការបណ្តុះបណ្តាល អាហារូបករណ៍ កម្មសិក្សា និងធនធានសំខាន់ៗផ្សេងទៀត ដល់វិទ្យាស្ថានបច្ចេកវិទ្យាកម្ពុជា។ ឯកឧត្តមបណ្ឌិតសភាចារ្យ ហង់ជួន ណារ៉ុន បានសម្តែងការអបអរសាទរ និងមានប្រសាសន៍ថា តាមរយៈការផ្តល់នូវសម្ភារៈបរិក្ខារទំនើបៗ និងការបណ្តុះបណ្តាលតាមស្តង់ដារនេះ ត្រូវបណ្ដុះបណ្ដាលសិស្សនិស្សិតនូវជំនាញចាំបាច់ និងសំខាន់ក្នុងការជំរុញនូវកំណើនសេដ្ឋកិច្ចជាតិ និងវិស័យឧស្សាហកម្ម។ ឯកឧត្តមបណ្ឌិត ក៏បានកោតសរសើរចំពោះការគាំទ្រជាបន្តបន្ទាប់របស់ក្រុមហ៊ុន ប៉ាណាសូនិក តាមរយៈ ការបរិច្ចាគឧបករណ៍ ម៉ាស៊ីនត្រជាក់ កម្មវិធីបណ្តុះបណ្តាល និងជំនួយផ្នែកអប់រំជាបន្តបន្ទាប់ ដល់វិទ្យាស្ថាន ITC ។ជាមួយគ្នានោះដែរ ឯកអគ្គរាជទូតជប៉ុនប្រចាំកម្ពុជា បានសម្តែងការគាំទ្រយ៉ាងខ្លាំងចំពោះគំនិតផ្តួចផ្តើមនេះ។ ឯកឧត្តម សង្ឃឹមថា និស្សិតបញ្ចប់ការសិក្សាផ្នែកវិស្វកម្មដែលត្រូវបានគាំទ្ររួមគ្នាដោយវិស័យសាធារណៈ និងឯកជនរបស់ប្រទេសជប៉ុន នឹងដើរតួយ៉ាងសកម្មនៅក្នុងក្រុមហ៊ុនជប៉ុនជាច្រើននាពេលអនាគត។ ឯកឧត្តម បានបន្ថែមថា កិច្ចសហការនេះ នឹងលើកកម្ពស់វិទ្យាស្ថាន ITC ឱ្យក្លាយទៅជាវិទ្យាស្ថានឈានមុខគេសម្រាប់ការសិក្សាផ្នែកវិស្វកម្មមេកានិកក្នុងប្រទេសកម្ពុជា និងបំពាក់បំប៉នយុវជនកម្ពុជានូវជំនាញចាំបាច់ដើម្បីទទួលបានជោគជ័យក្នុងទីផ្សារការងារពិភពលោក។បើតាម លោក Hisakazu Maeda អគ្គនាយក នៃសាខាក្រុមហ៊ុន ប៉ាណាសូនិក អេស៊ា ប៉ាស៊ីហ្វិក ភាពជាដៃគូនេះ ជាព្រឹត្តិការណ៍ដ៏សំខាន់មួយនៅក្នុងបេសកកម្មរួមគ្នា ដើម្បីរៀបចំយុវជនកម្ពុជាសម្រាប់អនាគត។ នៅពេលដែលបច្ចេកវិទ្យាជឿនលឿនក្នុងល្បឿនដ៏លឿន ប្រព័ន្ធអប់រំត្រូវតែវិវឌ្ឍន៍ជាចាំបាច់ ដើម្បីធានាថានិស្សិតទទួលបានជំនាញជាក់ស្តែងបន្ថែមលើចំណេះដឹងទ្រឹស្តី។ គំនិតផ្តួចផ្តើមនេះមិនមែនគ្រាន់តែជាការបើកដំណើរការមជ្ឃមណ្ឌលបណ្តុះបណ្តាលតែប៉ុណ្ណោះទេ វាគឺជាការវិនិយោគយុទ្ធសាស្ត្រ ក្នុងកម្លាំងពលកម្ម និងការអភិវឌ្ឍន៍សេដ្ឋកិច្ចរបស់ប្រទេសកម្ពុជា។សូមជំរាបជូនថា កិច្ចសហការ រវាងវិទ្យាស្ថានបច្ចេកវិទ្យាកម្ពុជា និងក្រុមហ៊ុន ប៉ាណាសូនិក ជាគំរូដ៏ល្អសម្រាប់ភាពជាដៃគូរវាងវិស័យសាធារណៈ និងឯកជន ដែលអាចជំរុញការអប់រំបច្ចេកវិទ្យា និងការអភិវឌ្ឍន៍សេដ្ឋកិច្ចនៅកម្ពុជា។ មជ្ឈមណ្ឌលបណ្តុះបណ្តាលបច្ចេកទេសម៉ាស៊ីនត្រជាក់ ប៉ាណាសូនិក ដែលទើបបង្កើតថ្មីនេះ នឹងផ្តល់ឱ្យនិស្សិត វិទ្យាស្ថាន ITC នូវបទពិសោធន៍ប្រើប្រាស់បច្ចេកវិទ្យាស្តង់ដារ បង្កើនជំនាញបច្ចេកទេសរបស់ពួកគេបន្ថែមទៀត ព្រមទាំងរៀបចំពួកគេសម្រាប់ការប្រកួតប្រជែងនៅលើទីផ្សារការងារពិភពលោក៕ អត្ថបទ៖ ឈិត បូរ៉ាវី

រដ្ឋមន្ត្រីធនធានទឹក ដឹកនាំសិក្ខាសាលា ស្តីពីការចាប់ផ្តើមសិក្សា និងវិភាគសន្តិសុខទឹកក្នុងអាងទន្លេសាប

ភ្នំពេញ៖ នៅព្រឹកថ្ងៃទី១៨ ខែមីនា ឆ្នាំ២០២៥ នេះ ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប បានអញ្ជើញជាអធិបតីបើកសិក្ខាសាលាស្តីពីការចាប់ផ្តើមសិក្សា និងវិភាគសន្តិសុខទឹកក្នុងអាងទន្លេសាប ដែលបានរៀបចំឡើងរួមគ្នាដោយអាជ្ញាធរទន្លេសាប ធនាគារពិភពលោក (WB) នាយកដ្ឋានកិច្ចការបរទេស និងពាណិជ្ជកម្មអូស្រ្តាលី (DFAT) ភាពជាដៃគូទឹកនៃប្រទេសអូស្រ្តាលី (AWP) និងភាពជាដៃគូសន្តិសុខទឹក និងអនាម័យសកល(GWSP) ពីថ្ងៃទី១៨ ដល់ថ្ងៃទី១៩ ខែមីនា ឆ្នាំ២០២៥ នៅខេត្តសៀមរាប។ថ្លែងក្នុងឱកាសបើកសិក្ខាសាលា ឯកឧត្តមរដ្ឋមន្ត្រីប្រធានអាជ្ញាធរទន្លេសាប បានមានប្រសាសន៍លើកឡើងថា បឹងទន្លេសាប គឺជាបឹងធម្មជាតិទឹកសាបដ៏ធំជាងគេបំផុតនៅក្នុងតំបន់អាស៊ីអាគ្នេយ៍ ជាអាងស្តុកទឹកធម្មជាតិដ៏ធំមួយដែលជួយកាត់បន្ថយទឹកជំនន់នៅតំបន់ខ្សែទឹកខាងក្រោមនៃទន្លេមេគង្គ ជាឋបនីយជីវមណ្ឌលដ៏មានសារៈសំខាន់ដែលជួយគាំពារជីវៈចម្រុះច្រើនប្រភេទ ជាជង្រុកស្បៀងដែលទ្រទ្រង់សង្គម-សេដ្ឋកិច្ចរបស់ប្រជាពលរដ្ឋមូលដ្ឋាន និងសង្គមជាតិទាំងមូល និងជាមជ្ឈមណ្ឌលវប្បធម៌ ទំនៀមទម្លាប់ ប្រពៃណីរបស់អ្នកស្រុក។ លើសពីនេះ ឯកឧត្តមរដ្ឋមន្ត្រីបានបញ្ជាក់ឱ្យដឹងថា សក្តានុពលដ៏ធំសម្បើមនៃតំបន់ទន្លេសាបបានជំរុញឱ្យប្រទេសកម្ពុជាបង្កើតបាននូវសមិទ្ធផលជាតិសំខាន់ៗរួមមាន មច្ឆជាតិ ធារាសាស្រ្ត និងទេសចរណ៍ ដែលរួមចំណែកក្នុងការលើកកម្ពស់ផលិតភាពកសិកម្ម និងបង្កើតឱកាសការងារបង្កើនប្រាក់ចំណូល និងជីវភាពរស់នៅរបស់បងប្អូនប្រជាពលរដ្ឋ ហើយដែលត្រូវរួមគ្នាការពារឱ្យមានប្រសិទ្ធភាព ស័ក្តិសិទ្ធិភាព ទាំងក្នុងពេលបច្ចុប្បន្ន និងទៅអនាគត ស្របតាមអនុសាសន៍ណែនាំដ៏ខ្ពង់ខ្ពស់របស់សម្តេចតេជោ ហ៊ុន សែន អតីតនាយករដ្ឋមន្រ្តី និងជាប្រធានព្រឹទ្ធសភា និងសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលបានលើកឡើងថា «យើងត្រូវរួមគ្នាការពារតំបន់ទន្លេសាប ដែលជាអត្តសញ្ញាណរបស់ជាតិយើង ដើម្បីជាប្រយោជន៍ដល់ប្រជាពលរដ្ឋខ្មែរទូទាំងប្រទេស» ។ជាចុងក្រោយ ឯកឧត្តមរដ្ឋមន្ត្រីបានបង្ហាញនូវជំនឿយ៉ាងមុតមាំថា សិក្ខាសាលាថ្ងៃនេះនឹងក្លាយជាវេទិកាពិភាក្សារវាងអ្នករៀបចំគោលនយោបាយ អ្នកសិក្សាស្រាវជ្រាវបច្ចេកទេសបែបវិទ្យាសាស្រ្ត ដៃគូអភិវឌ្ឍន៍ និងសហគមន៍មូលដ្ឋាន ដើម្បីទទួលបានធាតុចូលដ៏សំខាន់ ក្នុងការដោះសា្រយនូវរាល់បញ្ហាស្មុគស្មាញដែលទាក់ទងនឹងអាងទន្លេសាប សំដៅជំរុញដល់ការគ្រប់គ្រងធនធានទឹកនៅតំបន់ទន្លេសាប ប្រកបដោយយុទ្ធសាស្រ្ត និងចក្ខុវិស័យវែងឆ្ងាយ ធានាបាននូវសន្តិសុខទឹក និងបង្កើនភាពធន់របស់ប្រព័ន្ធអេកូឡូស៊ីបឹងទន្លេសាប ក្នុងបរិបទនៃការអភិវឌ្ឍ និងកំណើនសម្ពាធពីសកម្មភាពនានារបស់មនុស្ស និងបម្រែបម្រួលអាកាសធាតុ ព្រមទាំងការថែរក្សាការពារ និងអភិរក្សធនធានធម្មជាតិដែលជាប់ពាក់ព័ន្ធជាមួយវិសាលភាពនៃបឹងធម្មជាតិដ៏សំខាន់នេះ៕

ក្រសួងយុត្តិធម៌ និងតុលាការកំពូល ចេញសេចក្តីណែនាំរួម ស្តីពីការជូនដំណឹងអំពីសាលក្រម ឬសាលដីកាព្រហ្មទណ្ឌកំបាំងមុខ ដើម្បីធានាបាននូវសង្គតិភាពក្នុងការអនុវត្តនីតិវិធី

ភ្នំពេញ៖ ក្រសួងយុត្តិធម៌ និងតុលាការកំពូល បានចេញសេចក្តីណែនាំរួមស្តីពីការជូនដំណឹងអំពីសាលក្រម ឬសាលដីកាព្រហ្មទណ្ឌកំបាំងមុខ ដើម្បីធានាបាននូវសង្គតិភាពក្នុងការអនុវត្តនីតិវិធីនៃការជូនដំណឹងអំពីសាលក្រម ឬសាលដីកាព្រហ្មទណ្ឌកំបាំងមុខ។ នេះបើយោងតាម សេចក្តីណែនាំរួមស្តីពី ការជូនដំណឹងអំពីសាលក្រម ឬសាលដីកាព្រហ្មទណ្ឌកំបាំងមុខ ចុះថ្ងៃទី១២ ខែមីនា ឆ្នាំ២០២៥នេះ។សេចក្តីណែនាំរួម បានឱ្យដឹងថា យោងតាមសេចក្តីសម្រេចចិត្តមហាសន្និបាតបូកសរុបលទ្ធផលការងារវិស័យយុត្តិធម៌ទូទាំងប្រទេស ឆ្នាំ២០២៣ និងកំណត់ទិសដៅការងារជាអាទិភាពបន្ត ចុះថ្ងៃទី២ ខែឧសភា ឆ្នាំ២០២៤ និងដើម្បីធានាបាននូវសង្គតិភាពនៅក្នុងការអនុវត្តនីតិវិធីនៃការជូនដំណឹងអំពីសាលក្រម ឬសាលដីកាព្រហ្មទណ្ឌកំបាំងមុខ ស្របតាមខ្លឹមសារសេចក្តីសម្រេចចិត្តមហាសន្និបាតបូកសរុបលទ្ធផលការងារវិស័យយុត្តិធម៌ ក្រសួងយុត្តិធម៌ និង តុលាការកំពូល សូមធ្វើការណែនាំដល់ សាលាជម្រះក្តី និងអង្គការអយ្យការអមសាលាជម្រះក្តីគ្រប់ជាន់ថ្នាក់ ដូចខាងក្រោម៖១-ក្នុងករណីដែលភាគីពាក់ព័ន្ធមិនព្រមទទួលសេចក្តីសម្រេច ឬគ្មានបុគ្គលណាម្នាក់មានវត្តមាន នៅក្នុងលំនៅឋានរបស់ភាគីពាក់ព័ន្ធ ឬគ្មានបុគ្គលណាម្នាក់ដែលមានវត្តមាននៅក្នុងលំនៅឋានរបស់ភាគី ពាក់ព័ន្ធ យល់ព្រមទទួលសេចក្តីសម្រេច, នីតិវិធីនៃការជូនដំណឹងអំពីសាលក្រម ឬសាលដីកាព្រហ្មទណ្ឌ កំបាំងមុខ ត្រូវអនុវត្តស្របតាមមាត្រា ៤៨៨ (ការប្រគល់លិខិតចម្លងនៃសេចក្តីសម្រេចដល់មេឃុំ ឬ ចៅសង្កាត់) នៃក្រមនីតិវិធីព្រហ្មទណ្ឌ។២-ក្នុងករណីដែលភាគីពាក់ព័ន្ធពុំមានលំនៅឋាន ឬទីសំណាក់ ឬប្រសិនបើភាគីពាក់ព័ន្ធរស់នៅ ក្រៅដែនដីជាតិ, នីតិវិធីនៃការជូនដំណឹងអំពីសាលក្រម ឬសាលដីកាព្រហ្មទណ្ឌកំបាំងមុខត្រូវអនុវត្តស្រប តាមមាត្រា ៤៩០ (ភាគីដែលពុំមានទីលំនៅឋាន ឬទីសំណាក់ដែលគេស្គាល់) នៃក្រមនីតិវិធីព្រហ្មទណ្ឌ ប្រសិនបើមានភស្តុតាងច្បាស់លាស់បញ្ជាក់ពីហេតុទាំងនេះ។៣-បន្ថែមលើនីតិវិធីនៃការជូនដំណឹងតាមមាត្រា ៤៨៨ និងមាត្រា ៤៩០ នៃក្រមនីតិវិធីព្រហ្មទណ្ឌ ខាងលើ ការជូនដំណឹងពីសាលក្រម ឬសាលដីកាព្រហ្មទណ្ឌកំបាំងមុខ ត្រូវបិទផ្សាយនៅបញ្ជរបិទផ្សាយព័ត៌មាន របស់សាលាជម្រះក្តីមានសមត្ថកិច្ច និងត្រូវផ្សព្វផ្សាយតាមរយៈសារព័ត៌មានសរសេរ ឬគ្រប់មធ្យោបាយ ទូរគមនាគមន៍សោតទស្សន៍ ឬបណ្តាញសង្គមផ្លូវការរបស់សាលាជម្រះក្តី។ ប៉ុន្តែការគិតកាលបរិច្ឆេទនៃ ការជូនដំណឹងនៅតែត្រូវអនុវត្តតាមមាត្រា ៤៨៨ និងមាត្រា ៤៩០ នៃក្រមនីតិវិធីព្រហ្មទណ្ឌ។ ទម្រង់នៃដីកា ជូនដំណឹងត្រូវអនុវត្តតាមមាត្រា ៤៨៣ (និទ្ទេសដែលត្រូវចុះលើដីកាឱ្យដំណឹង) នៃក្រមនីតិវិធីព្រហ្មទណ្ឌ។ ដើម្បីអនុវត្តយន្តការនៃការជូនដំណឹងនេះ សាលាដំបូងរាជធានី ខេត្ត និងសាលាឧទ្ធរណ៍ ត្រូវបង្កើតឱ្យមាន បណ្តាញសង្គមផ្លូវការរបស់ខ្លួន រួមមាន ផេកហ្វេសបុក (Facebook Page) តេឡេក្រាម (Telegram) និង យូលអប (CoolApp) ឱ្យបានឆាប់រហ័ស ហើយត្រូវជូនដំណឹងអំពីបណ្តាញសង្គមផ្លូវការមកក្រសួងយុត្តិធម៌ និងតុលាការកំពូល ព្រមទាំងផ្សព្វផ្សាយដល់សាធារណជនឱ្យបានជ្រាប។៤-ការតាក់តែងសាលក្រម ឬសាលដីកា ត្រូវអនុវត្តតាមមាត្រា ៣៥៨ (និទ្ទេសដែលត្រូវចុះលើ សាលក្រម) និងមាត្រា ៣៩៦ (ការពន្លាតដល់សាលាឧទ្ធរណ៍នូវវិធានដែលអនុវត្តចំពោះសាលាដំបូង) នៃ ក្រមនីតិវិធីព្រហ្មទណ្ឌ ដើម្បីឱ្យការជូនដំណឹងពីសាលក្រម ឬសាលដីកាព្រហ្មទណ្ឌកំបាំងមុខមានភាពឆាប់រហ័ស។៥-ជាមួយគ្នានេះ ក្រសួងយុត្តិធម៌បានរៀបចំឱ្យមានយន្តការផ្សព្វផ្សាយផ្លូវការ តាមប្រព័ន្ធបច្ចេកវិទ្យា ឌីជីថលក្នុងវិស័យយុត្តិធម៌ ដែលរួមមាន ផេកហ្វេសប៊ុកផ្លូវការរបស់ក្រសួងយុត្តិធម៌ (ក្រសួងយុត្តិធម៌ Ministry of Justice) តេឡេក្រាមផ្លូវការ (ក្រសួងយុត្តិធម៌-Ministry of Justice) យូលអប (CoolApp) និង គេហទំព័រផ្លូវការ (https://www.moj.gov.kh) ដើម្បីធ្វើការផ្សព្វផ្សាយអំពីការជូនដំណឹងអំពីសាលក្រម ឬ សាលដីកាព្រហ្មទណ្ឌកំបាំងមុខរបស់សាលាជម្រះក្តីផងដែរ។ អាស្រ័យហេតុនេះ សាលាដំបូងរាជធានី ខេត្ត ឬ សាលាឧទ្ធរណ៍ ត្រូវផ្តល់សេចក្តីចម្លងសាលក្រម ឬសាលដីកាព្រហ្មទណ្ឌកំបាំងមុខ ព្រមទាំងដីកាជូនដំណឹង អំពីសេចក្តីសម្រេចនោះ មកក្រសួងយុត្តិធម៌ឱ្យបានឆាប់រហ័ស ដើម្បីធ្វើការជូនដំណឹងតាមរយៈយន្តការ ផ្សព្វផ្សាយផ្លូវការ តាមប្រព័ន្ធបច្ចេកវិទ្យាឌីជីថលក្នុងវិស័យយុត្តិធម៌ ខាងលើនេះ៕

ក្រសួងសង្គមកិច្ចកម្ពុជា ពិភាក្សាការងារក្របខ័ណ្ឌកិច្ចការពារកុមារជាមួយ ក្រសួងការបរទេសអង់គ្លេស

ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា នៅថ្ងៃទី ១៧ ខែមីនា ឆ្នាំ២០២៥ បានដឹកនាំគណៈប្រតិភូក្រសួង ចូលជួបសម្ដែងការគួរសម និងពិភាក្សាការងារជាមួយ ឯកឧត្តម David Lammy រដ្ឋមន្ត្រីការបរទេស នៃចក្រភពអង់គ្លេស នៅទីស្តីការក្រសួងការបរទេសនាទីក្រុងឡុងដ៍។ កិច្ចពិភាក្សានេះ ផ្តោតសំខាន់លើក្របខ័ណ្ឌកិច្ចការពារកុមារ ដើម្បីកែលម្អការថែទាំជំនួស កាត់បន្ថយចំនួនមណ្ឌល កាត់បន្ថយចំនួនកុមាររស់នៅក្នុងមណ្ឌលថែទាំ និងលើកកម្ពស់ការថែទាំកុមារនៅតាមគ្រួសារក្នុងសហគមន៍។ ឯកឧត្តមរដ្ឋមន្ត្រី ជា សុមេធី បានថ្លែងអំណរគុណចំពោះការទទួលបដិសណ្ឋាកិច្ចយ៉ាងកក់ក្តៅ និងបានចែករំលែកនូវព័ត៌មានអំពីការអភិវឌ្ឍប្រទេសក្រោមការដឹកនាំប្រកបដោយគតិបណ្ឌិត និងភាពស្វាហាប់របស់ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ រាជរដ្ឋាភិបាលអាណត្តិទី៧ បានបន្តលើកកម្ពស់ការអភិវឌ្ឍមូលធនមនុស្ស និងសុខុមាលភាពរបស់ពលរដ្ឋ តាមរយៈការបន្តជំរុញការអភិវឌ្ឍប្រព័ន្ឋគាំពារសង្គមឱ្យកាន់តែរឹងមាំ និងមានភាពធន់ ដែលជាអាទិភាពមួយ កំណត់ក្នុងយុទ្ធសាស្ត្របញ្ចកោណ ដំណាក់កាលទី១ គឺការផ្តោតលើការបន្តអភិវឌ្ឍប្រព័ន្ធគាំពារសង្គម តាមអភិក្រមហានិភ័យនៃវដ្តជីវិត ដោយឈរលើស្មារតី “មិនបោះបង់ពលរដ្ឋណាម្នាក់”។ក្នុងក្របខ័ណ្ឌកិច្ចការពារកុមារ ឯកឧត្តមរដ្ឋមន្ត្រី បានបញ្ជាក់ថា រាជរដ្ឋាភិបាលកម្ពុជា បានដាក់ឱ្យ អនុវត្តនូវច្បាប់ គោលនយោបាយ និងផែនការសកម្មភាពជាតិនានា ក្នុងនោះ ក្រសួងសង្គមកិច្ច អតីតយុទ្ធជន និងយុវនីតិសម្បទា មានការប្តេជ្ញាខ្ពស់ និងដាក់ចេញនូវគោលនយោបាយ និងកម្មវិធីជាក់លាក់ ដើម្បីកែលម្អការថែទាំជំនួស ការកាត់បន្ថយចំនួនមណ្ឌល និងចំនួនកុមាររស់នៅក្នុងមណ្ឌលថែទាំ និងលើកកម្ពស់ការថែទាំនៅតាមគ្រួសារនៅក្នុងសហគមន៍។ ជាមួយនឹងកម្មវិធីកំណែទម្រង់ការងារថែទាំ ជំនួសនេះ កម្ពុជាសម្រេចបានលទ្ធផលគួរជាទីមោទនៈ ក្នុងនោះ មណ្ឌលថែទាំកុមារត្រូវបានកាត់បន្ថយ ពី ៤០៦ មណ្ឌល នៅឆ្នាំ២០១៥ មកនៅត្រឹម ១៦៤ មណ្ឌល នៅឆ្នាំ២០២៤ ដែលចំនួនកុមារបានថយ ចុះពីប្រមាណ១ម៉ឺន ៦ពាន់នាក់ មកត្រឹម ជាង៤ពាន់នាក់។ឯកឧត្តម David Lammy បានសម្តែងនូវការស្វាគមន៍ និងថ្លែងអំណរគុណចំពោះ ឯកឧត្តមរដ្ឋមន្ត្រី និងគណៈប្រតិភូចំពោះជំនួបពិភាក្សា និងការចែករំលែកបទពិសោធន៍ការងារពាក់ព័ន្ធកិច្ចការពារកុមារ ការលើកកម្ពស់ ការថែទាំកុមារនៅតាមគ្រួសារ និងការកាត់បន្ថយកុមារពីមណ្ឌលថែទាំជំនួសនៅកម្ពុជា។ ឯកឧត្តម បានសម្តែង នូវការអបអរសាទរ និងកោតសរសើរចំពោះសមិទ្ធផលនៃការអនុវត្តកម្មវិធីថែទាំជំនួសចំពោះកុមារនៅក្នុងគ្រួសារ របស់រាជរដ្ឋាភិបាលកម្ពុជា។ សូមបញ្ជាក់ផងដែរថា ឯកឧត្តមរដ្ឋមន្ត្រី David Lammy បាននិងកំពុងដឹកនាំយុទ្ធនា ការកាត់បន្ថយមណ្ឌលថែទាំកុមារនៅលើពិភពលោក ហេតុដូចនេះ ឯកឧត្តម បានបង្ហាញពីចំណាប់អារម្មណ៍ក្នុងការទៅទស្សនកិច្ចនៅប្រទេសកម្ពុជា ដើម្បីស្វែងយល់អំពីការងារ និងបទពិសោធន៍ពាក់ព័ន្ធនឹងការលើកកម្ពស់ការ ថែទាំជំនួសចំពោះកុមារនៅក្នុងគ្រួសារ ដែលឈានទៅកាត់បន្ថយមណ្ឌលថែទាំ៕

ក្រសួងបរិស្ថាន និងដៃគូស្តារវត្តមានក្រពើភ្នំឡើងវិញ នៅតំបន់ឧទ្យានជាតិវីរៈជ័យ

ក្រសួងបរិស្ថាន សហការជាមួយដៃគូពាក់ព័ន្ធ លែងក្រពើភ្នំពូជសុទ្ធចំនួន ១០ ក្បាល ជាលើកដំបូង ទៅក្នុងតំបន់ដាច់ស្រយាលឆ្ងាយពីមនុស្សក្នុងឧទ្យានជាតិវីរៈជ័យ ក្នុងភូមិសាស្រ្តខេត្តរតនគីរី បន្ទាប់ពីប្រភេទនេះបានបាត់វត្តមានពីឧទ្យានជាតិនេះក្នុងរយៈពេលជាង ២០ឆ្នាំកន្លងមក។ ក្រុមការងារជំនាញ បានប្រើប្រាស់បច្ចេកវិទ្យាថ្មីចុងក្រោយ ដោយប្រើឧបករណ៍កត់ត្រា សម្លេង ដើម្បីតាមដានការបំផ្លាស់ទី និងការរស់រានមានជីវិតរបស់សត្វក្រពើភ្នំ ដែលជាការផ្តល់នូវទិន្នន័យដ៏មានសារសំខាន់ក្នុងការងារអភិរក្ស និងស្តារវត្តមានក្រពើភ្នំប្រភេទនេះ។ រហូតមកដល់បច្ចុប្បន្ននេះ ក្រពើភ្នំពូជសុទ្ធជិត២០០ក្បាល ត្រូវបានលែងចូលទៅក្នុងទីជម្រកធម្មជាតិ ដាច់ស្រយាលពីមនុស្សរស់នៅ និងមានសុវត្ថិភាពនៅតំបន់ជួរភ្នំក្រវាញ ភាគនិរតីនៃប្រទេសកម្ពុជា និងមានសំបុកពងកូនក្រពើភ្នំចំនួន៦០ក្បាល ត្រូវបានរកឃើញនៅក្នុងតំបន់ជួរភ្នំក្រវាញនេះផងដែរ។ដោយឡែក ឧទ្យានជាតិវីរៈជ័យ ធ្លាប់មានវត្តមានក្រពើភ្នំ រស់នៅក្នុងតំបន់ធម្មជាតិតាំងពីយូរយារណាស់មកហើយ ដូច្នេះកិច្ចខិតខំប្រឹងប្រែងដើម្បីស្តារវត្តមានប្រភេទនេះ នៅក្នុងតំបន់នេះ អាចនឹងទទួលបានជោគជ័យ៕

ស៊ីម៉ាក់ និង JICA បើកសិក្ខាសាលាស្តីពីការពង្រឹងសមត្ថភាពមន្ត្រីស៊ីម៉ាក់លើជំនាញប្រើប្រាស់គ្រឿងចក្របោសសម្អាតមីន និងម៉ាស៊ីនរាវមីន ALIS

ភ្នំពេញ៖ នៅព្រឹកថ្ងៃ ទី១៨ ខែមីនា ឆ្នាំ២០២៥ នៅទីបញ្ជាការស៊ីម៉ាក់ ឯកឧត្តម ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជា (CMAC) និងលោក KAMIISHI Hiroto តំណាងJICA ប្រចាំទីក្រុងតូក្យូ បានធ្វើជាអធិបតីភាពក្នុងពិធីបើកសិក្ខាសាលាស្តីពីការពង្រឹងសមត្ថភាពរបស់មន្ត្រីជំនាញអង្គភាពCMAC លើជំនាញប្រើប្រាស់គ្រឿងចក្របោសសម្អាតមីន និងម៉ាស៊ីនរាវមីនALIS គាំទ្រដោយJICA។ សិក្ខាសាលានេះ មានរយៈពេល១០ថ្ងៃ ចាប់ពីថ្ងៃទី១៧ ដល់ថ្ងៃទី២៧ ខែមីនា ឆ្នាំ២០២៥ ដោយមានការចូលរួមពីមន្ត្រីជំនាញខាងគ្រឿងចក្រកម្ទេចមីននិងម៉ាស៊ីនរាវមីនALIS សរុបចំនួន៣៦រូប រួមមាន មន្ត្រីជំនាញរបស់អង្គភាពCMAC ក្រុមហ៊ុនNippon Koei មន្ត្រីJICAនៅភ្នំពេញនិងតូក្យូ ព្រមទាំងលោកសាស្ត្រាចារ្យ Sato Motoyuki ស្ថាបនិកម៉ាស៊ីនរាវមីន ALIS។ សិក្ខាសាលានេះមានបំណង វាយតម្លៃនិងបង្តើនពង្រឹងសមត្ថភាពដល់មន្ត្រីជំនាញអង្គភាពCMAC ដែលកំពុងបំពេញប្រតិបត្តិការនៅការដ្ឋានបោសសម្អាតមីន លើការប្រើប្រាស់គ្រឿងចក្របោសសម្អាតមីន និងម៉ាស៊ីនរាវមីនALIS ការប្រមូលធាតុចូល និងព័ត៌មានសំខាន់ៗអំពីការប្រើប្រាស់គ្រឿងចក្រ និងម៉ាស៊ីនរាវមីនALIS ដើម្បីរៀបចំឯកសារ និងមេរៀនដែលឆ្លើយតបទៅនឹងទស្សនវិស័យរបស់អង្គភាពក្នុងការចែករំលែកចំណេះដឹង និងបទពិសោធន៍ក្នុងការបោសសម្អាតមីនទៅកាន់ប្រទេសដែលកំពុងរងផលប៉ះពាល់ដោយគ្រាប់មីន និងយុទ្ធភណ្ឌសង្រ្គាមនៅជុំវិញពិភពលោក។ ថ្លែងក្នុងពិធីបើកសិក្ខាសាលានេះ លោក KAMIISHI Hiroto បានកោតសរសើរ និងបានថ្លែងអំណរគុណយ៉ាងស្មោះស្ម័គ្រចំពោះអង្គភាពCMAC សម្រាប់កិច្ចខិតខំប្រឹងប្រែងរបស់ខ្លួនក្នុងការបោសសម្អាតមីន និងយុទ្ធភណ្ឌមិនទាន់ផ្ទុះ នៅកម្ពុជា ក៏ដូចជាការជួយដល់ប្រទេសនានា ដែលបាននិងកំពុងប្រឈមមុខនឹងការគំរាមកំហែងដោយសារគ្រាប់មីន និងសំណល់យុទ្ធភណ្ឌសង្គ្រាម ដូចជាប្រទេស កូឡុំប៊ី អ៊ុយក្រែន និងបណ្តាប្រទេសនៅទ្វិបអាហ្វ្រិក។ កិច្ចខិតខំប្រឹងប្រែងទាំងនេះរបស់អង្គភាពCMAC មិនត្រឹមតែជួយកាត់បន្ថយចំនួនគ្រាប់មីន និងយុទ្ធភណ្ឌមិនទាន់ផ្ទុះ ប៉ុន្តែបានជួយឱ្យប្រជាពលរដ្ឋដែលរងគ្រោះដោយសារយុទ្ធភណ្ឌសង្គ្រាម បានបង្កបង្តើនផលលើដីដែលបានបោសម្អាតមីនរួច ប្រយោជន៍ដើម្បីការអភិវឌ្ឍន៍សេដ្ឋកិច្ច និងសង្គមជាតិ។ លោក KAMIISHI Hiroto បានបន្តថា JICA មានមោទនភាពក្នុងការធ្វើការជាមួយអង្គភាពCMAC ដើម្បីគាំទ្រដល់កិច្ចខិតខំប្រឹងប្រែងរបស់ខ្លួន តាមរយៈគម្រោងនិងកិច្ចសហប្រតិបត្តិការផ្សេងៗ រួមទាំង គម្រោងពង្រឹងសមត្ថភាពអង្គភាព គម្រោងពង្រឹងសមត្ថភាពលើសកម្មភាពមីនមនុស្សធម៌ និងការបោសសម្អាតយុទ្ធភណ្ឌមិនទាន់ផ្ទុះនៅអ៊ុយក្រែនផងដែរ។ក្នុងឱកាសនេះដែរ ឯកឧត្តម ហេង រតនា បានថ្លែងអំណរគុណដល់JICA ដែលបានរៀបចំសិក្ខាសាលាដ៏មានសារៈសំខាន់នេះ ដើម្បីជំរុញដល់មន្ត្រី-បុគ្គលិក អង្គភាពCMAC ក្នុងការពង្រឹងសមត្ថភាពរបស់ខ្លួន ក្នុងការចែករំលែកចំណេះដឹង និងបទពិសោធន៍ទាំងនេះទៅកាន់បណ្តាប្រទេសដែលរងផលបះពាល់ដោយសារយុទ្ធភណ្ឌសង្គ្រាមដទៃទៀតក្នុងសកលលោក ជាពិសេសដូចជាប្រទេសអ៊ុយក្រែន។ ក្នុងន័យនេះ ឯកឧត្តម ហេង រតនា សូមសំណូមពរដល់បងប្អូនដែលបានចូលរួមក្នុងសិក្ខាសាលានេះ ត្រូវបញ្ចេញនូវទស្សនៈ ចំណេះដឹង បទពិសោធន៍ ក៏ដូចជាចូលរួមឱ្យសកម្មនៅក្នុងសិក្ខាសាលានេះ ព្រោះលទ្ធផលដែលទទួលបានពីសិក្ខាសាលានេះនិងអាចរៀបចំឯកសារជាមូលដ្ឋានសម្រាប់ធ្វើការវិភាគនិងអភិវឌ្ឍផែនការយុទ្ធសាស្រ្តមួយចំនួនលើផ្នែកការអភិវឌ្ឍធនធានមនុស្សនៅក្នុងអង្គភាពរបស់យើង។សូមជម្រាបថា កន្លងមកអង្គភាពCMAC បានដើរតួនាទីយ៉ាងសំខាន់ក្នុងការចែករំលែកចំណេះដឹង និងបទពិសោធន៍ជូនដល់បណ្តាប្រទេសដែលទទួលរងផលប៉ះពាល់ដោយសារគ្រាប់មីន និងយុទ្ធភណ្ឌសង្រ្គាមនៅជុំវិញពិភព លោក។ ចាប់តាំងពីឆ្នាំ២០១០ អង្គភាពCMAC បានផ្ដល់ការហ្វឹកហ្វឺនដល់ប្រទេសមួយចំនួនដូចជាប្រទេស កូឡុំប៊ី ប្រទេសឡាវ ប្រទេសមីយ៉ាន់ម៉ា ប្រទេសអង់ហ្គោឡា ប្រទេសអ៊ឺរ៉ាក់ ហើយថ្មីៗនេះប្រទេសអ៊ុយក្រែន និងបណ្តាប្រទេសមួយចំនួនទៀតមកពីតំបន់អាហ្រ្វិក។ ជាមួយគ្នានេះដែរ កាលពីពេលថ្មីៗកន្លងទៅនេះ រដ្ឋមន្ត្រីក្រសួងការបរទេសជប៉ុនលោកជំទាវ KAMIKAWA Yoko បានមកធ្វើទស្សនកិច្ចនៅបញ្ជាការCMAC ភ្នំពេញ និងបានធ្វើការប្រកាសលើការដាក់ចូលនៅទស្សនវិស័យចំនួន០៤ ដើម្បីពង្រឹងកិច្ចសហប្រតិបត្តិការរវាងកម្ពុជាជប៉ុន លើវិស័យសកម្មភាពមីន ក្នុងនោះរួមមាន៖ ១. លើកកំពស់ការយល់ដឹងអំពីការបោសសម្អាតមីនមនុស្សធម៌ និងជំរុញការចូលរួមក្នុងវិស័យសកម្មភាពមីនក្នុងឆាកអន្តរជាតិ ២. បង្កើតក្រុមការងារកិច្ចសហប្រតិបត្តិការអន្តរជាតិដោយភ្ជាប់ទំនាក់ទំនងនិងស្ថាប័នជាតិ ៣. កិច្ចសហប្រតិបត្តិការកម្ពុជា-ជប៉ុន លើការគាំទ្រការបោសសម្អាតមីនដល់ប្រទេសដែលរងផលប៉ះពាល់ដោយគ្រាប់មីននិង UXO នៅជុំវិញពិភពលោក ៤.អភិវឌ្ឍឧបករណ៍បោសសម្អាតមីន និងគ្រាប់ដោយប្រើប្រាស់បច្ចេកវិទ្យាទំនើបចុងក្រោយបំផុត៕

ក្រសួងមុខងារសាធារណៈ និងក្រសួងសេដ្ឋកិច្ចរៀបចំសិក្ខាសាលាពិគ្រោះយោបល់ស្តីពី «ការរៀបចំគុណវុឌ្ឍិ និងការពិពណ៌មុខតំណែងរបស់មន្ត្រីរាជការនៃវិទ្យាស្ថានជាតិស្ថិតិ»

ភ្នំពេញ៖ នៅព្រឹកថ្ងៃទី១៨ ខែមីនា ឆ្នាំ២០២៥នេះ ឯកឧត្តម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ និងជាប្រធានអនុគណៈកម្មាធិការប្រតិបត្តិនៃ គ.វ.រ. កំពុងអញ្ជើញដឹកនាំសិក្ខាសាលាពិគ្រោះយោបល់ស្តីពី «ការរៀបចំគុណវុឌ្ឍិ និងការពិពណ៌មុខតំណែងរបស់មន្ត្រីរាជការនៃវិទ្យាស្ថានជាតិស្ថិតិ»។សិក្ខាសាលានេះ ក៏មានវត្តមានអញ្ជើញចូលរួមពី ឯកឧត្តមបណ្ឌិត ផាន់ ផល្លា រដ្ឋលេខាធិការនៃក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមការងារចំពោះកិច្ចអន្តរក្រសួង ស្ថាប័ន, ឯកឧត្តម រិន វីរៈ រដ្ឋលេខាធិការក្រសួងផែនការ និងក្រុមប្រឹក្សាភិបាលនៃវិទ្យាស្ថានជាតិស្ថិតិ ដែលមកពីតំណាងក្រសួង ស្ថាប័នពាក់ព័ន្ធ ព្រមទាំងថ្នាក់ដឹកនាំ និងមន្ត្រីជំនាញនៃក្រសួងមុខងារសាធារណៈ។ក្នុងមតិស្វាគមន៍ និងបើកសិក្ខាសាលា ឯកឧត្តម យក់ ប៊ុនណា រដ្ឋលេខាធិការប្រចាំការនៃក្រសួងមុខងារសាធារណៈ បានបញ្ជាក់ជូនអង្គសិក្ខាសាលាថា “គោលបំណងនៃការជួបជុំនាពេលនេះ ដើម្បីពិនិត្យមើលអំពីការរៀបចំនូវមុខតំណែងថ្នាក់ដឹកនាំ និងមន្ត្រីនៃវិទ្យាស្ថានជាតិស្ថិតិ ដើម្បីគាំទ្រដល់ការអនុវត្តនូវមុខងារ ភារកិច្ចរបស់វិទ្យាស្ថានជាតិស្ថិតិ ដែលជាគ្រឹះស្ថានរដ្ឋបាលសាធារណៈ ត្រូវបានបង្កើតឡើងដោយរាជរដ្ឋាភិបាល ដើម្បីកសាង គាំទ្រការលើកកម្ពស់គុណភាពនៃប្រព័ន្ធស្ថិតិជាតិ ឱ្យកាន់តែមានគុណភាព ក្នុងការឆ្លើយតប គាំទ្រដល់ការរៀបចំគោលនយោបាយ ការសម្រេចចិត្តនានារបស់រាជរដ្ឋាភិបាល។” ឯកឧត្តមរដ្ឋលេខាធិការប្រចាំការ បានបញ្ជាក់បន្ថែមថា ការគិតគូរអំពីគុណវុឌ្ឍិ និងការវិវត្តនូវមុខដំណែងរបស់មន្ត្រី គឺជាចំណែកមួយក្នុងការគាំទ្រកិច្ចការងារផ្សេងៗទៀត។ ដោយនៅក្នុងក្របខណ្ឌកំណែទម្រង់របស់រាជរដ្ឋាភិបាល គឺចង់ជំរុញឱ្យដំណើរការនៃវិទ្យាស្ថានជាតិស្ថិតិ មានសមិទ្ធកម្មជាក់លាក់ មានមន្ត្រីដែលមានសមត្ថភាព ត្រូវតាមតម្រូវការនៃការងារ។ ឆ្លៀតក្នុងឱកាសនេះ ឯកឧត្តមរដ្ឋលេខាធិការប្រចាំការ បានជម្រាបជូនអង្គសិក្ខាសាលាថា “យើងខ្ញុំពីក្រសួងមុខងារសាធារណៈ ចូលរួមក្នុងការជួយគាំទ្រ និងចង់ស្តាប់មតិយោបល់របស់អង្គសិក្ខាសាលា ដើម្បីត្រៀមខ្លួនជួយ ហើយរឿងអ្វីដែលក្រសួងមុខងារសាធារណៈជួយបាន យើងខ្ញុំនឹងប្រឹងជួយឱ្យអស់លទ្ធភាព ព្រោះយើងចង់ឃើញការប្រើប្រាស់ធនធានបញ្ញវ័ន្ត យើងចង់ឃើញដំណើរការរបស់ស្ថាប័នប្រព្រឹត្តទៅមានប្រសិទ្ធភាពកាន់តែប្រសើរឡើង។”សូមជម្រាបថា សិក្ខាសាលានេះ មានការរៀចំឱ្យមានបទបង្ហាញស្តីពី «ការកំណត់គុណវុឌ្ឍិ និងការពិពណ៌នាមុខតំណែងគ្រប់គ្រង និងមុខតំណែងវិជ្ជាជីវៈរបស់មន្ត្រីរាជការនៃវិទ្យាស្ថានជាតិស្ថិតិ» ដោយឯកឧត្តម ស៊ុង វិនទិ នាយករងសាលាភូមិន្ទរដ្ឋបាល និងលោក លន គឹមហេង អគ្គនាយករងនៃអគ្គនាយកដ្ឋានគោលនយោបាយក្រសួងមុខងារសាធារណៈ ព្រមទាំងវេទិកាពិគ្រោះយោបល់ និងផ្តល់ធាតុចូល៕

នាវាកងទ័ពជប៉ុនមានអាទិភាពមុនគេបង្អស់ក្នុងការចូលចតនៅកំពង់ផែរាមបន្ទាប់ពីសាងសង់រួច

កម្ពុជានឹងអនុញ្ញាតឱ្យនាវាកងទ័ពជប៉ុនចូលចតមុនគេបង្អស់នៅ«កំពង់ផែរាម» ខេត្តព្រះសីហនុ ជាប្រវត្តិសាស្ត្រ បន្ទាប់ពីកំពង់ផែនេះបានសាងសង់រួច និងសម្ពោធដាក់ឲ្យប្រើប្រាស់ជំហានទី១ នៅដើមខែមេសា ឆ្នាំ២០២៥ខាងមុខនេះ។នេះជាការលើកឡើងរបស់ នាយឧត្តមសេនីយ៍ វង្ស ពិសេន អគ្គមេបញ្ជាការនៃកងយោធពលខេមរភូមិន្ទ នៅចំពោះមុខ លោកវរសេនីយ៍ឯក ហារ៉ា តាកាស៊ី នាយការិយាល័យសេនានុព័ន្ធជប៉ុនថ្មីប្រចាំកម្ពុជា ក្នុងឱកាសចូលជួបសម្តែងការគួរសម នាព្រឹកថ្ងៃទី១៨ ខែមីនា ឆ្នាំ២០២៥ នៅអគ្គបញ្ជាការដ្ឋាន។ ឯកឧត្តម បានលើកឡើងថា ការផ្ដល់អាទិភាពឱ្យនាវាជប៉ុនចូលចតមុនគេ និងជាប្រវត្តិសាស្ត្រនេះ អាស្រ័យដោយរាជរដ្ឋាភិបាលកម្ពុជា និងរាជរដ្ឋាភិបាលជប៉ុន មានគោលចំហរខ្ពស់នៅក្នុងកិច្ចសហប្រតិបត្តិការទំនាក់ទំនង និងការជឿទុកចិត្តគ្នាទៅវិញទៅមក ក្នុងភាពជាដៃគូយុទ្ធសាស្ត្រគ្រប់ជ្រុងជ្រោយ។ឯកឧត្តមអគ្គមេបញ្ជាការ បានគូសបញ្ជាក់ពីជំហររបស់ថ្នាក់ដឹកនាំ និងប្រមុខរាជរដ្ឋាភិបាលកម្ពុជា ក្រោយពីសម្ពោធដាក់ឲ្យប្រើប្រាស់ជំហានទី១ នឹងបើកចំហឱ្យនាវាប្រទេសផ្សេងៗទៀតដែលមកទស្សនកិច្ច ឬមកចូលរួមធ្វើសមយុទ្ធនៅកម្ពុជាចូលចតនៅកំពង់ផែរាម បន្ទាប់ពីការចូលចតរបស់នាវាជប៉ុន។ថ្លែងនៅក្នុងកិច្ចជំនួបនោះដែរ លោកវរសេនីយ៍ឯក ហារ៉ា តាកាស៊ី បានគូសបញ្ជាក់ពីកិច្ចសហប្រតិបត្តិការល្អរវាងកងទ័ពជើងទឹកប្រទេសទាំងពីរ(កម្ពុជា-ជប៉ុន) និងការថ្លែងអរគុណរបស់រាជរដ្ឋាភិបាលជប៉ុន ចំពោះរាជរដ្ឋាភិបាលកម្ពុជា ដែលបានយល់ព្រមឲ្យនាវាជប៉ុនចូលចតនៅកំពង់ផែរាមមុនគេ នេះបង្ហាញពីតម្លាភាពក្នុងការពង្រឹងសន្តិសុខអន្តរជាតិរបស់កម្ពុជា៕ អត្ថបទ៖ បាន ចក់

មន្រ្តីជំនាញ៖ ច្បាប់ខ្មែរបុរាណយកលំនាំទស្សនវិជ្ជាតាមបែបសាសនាជាពិសេសទស្សនវិជ្ជាពុទ្ធនិយម

ឯកឧត្តមបណ្ឌិត ហ៊ែល ចំរើន រដ្ឋលេខាធិការ និងជាអនុប្រធានប្រចាំការក្រុមប្រឹក្សានីតិកម្ម នៃក្រសួងសេដ្ឋកិច្ច និងហិរញ្ញវត្ថុ បានថ្លែងថា ច្បាប់ខ្មែរបុរាណយកលំនាំទស្សនវិជ្ជាតាមបែបសាសនា ជាពិសេសទស្សនវិជ្ជាពុទ្ធនិយម ដែលពលរដ្ឋខ្មែរប្រតិបត្តិរៀងមក បង្កប់ជម្រៅនៃសម្មតិសច្ចៈ ដែលជាសេចក្ដីពិតតាមរបៀបជាបញ្ញត្តិនៅរូបរាងខាងក្រៅ និងជម្រៅនៃបរមត្ថសច្ចៈ ជាសេចក្ដីពិតដែលបានកំណត់តាំងរូបរាងខាងក្នុង ដែលអាចមើលស្រមៃដឹងតាមរយៈការធ្វើសតិប្បដ្ឋានឬកម្មដ្ឋាន ដែលបង្ហាញនូវលក្ខណៈពិសេស នៃទំនាក់ទំនង ទស្សនវិជ្ជា ពុទ្ធវិជ្ជា និងនីតិវិជ្ជាខ្មែរ។ ការថ្លែងរបស់ឯកឧត្តមបានធ្វើឡើងក្នុងពិធីបើកវេទិកាស្តីពី «ទំនៀមជំនុំច្បាប់ខ្មែរ៖ ទស្សនវិជ្ជាច្បាប់បែបប្រពៃណី» ស្ថិតនៅសាលាភូមិន្ទរដ្ឋបាល នាព្រឹកថ្ងៃទី១៨ខែមីនានេះ ដោយមានការចូលរួមពីថ្នាក់ដឹកនាំក្រុមប្រឹក្សានីតិកម្ម នៃក្រសួងសេដ្ឋកិច្ច និងហិរញ្ញវត្ថុ ថ្នាក់ដឹកនាំសាលាភូមិន្ទរដ្ឋបាល នៃក្រសួងមុខងារសាធារណៈ សិស្សមន្រ្តីជាន់ខ្ពស់ និងក្រមការ ព្រមទាំងស្ថាប័នពាក់ព័ន្ធនានា។ នៅក្នុងអង្គវេទិកា ឯកឧត្តមបណ្ឌិត ហ៊ែល ចំរើន រដ្ឋលេខាធិការ និងជាអនុប្រធានប្រចាំការក្រុមប្រឹក្សានីតិកម្ម នៃក្រសួងសេដ្ឋកិច្ច និងហិរញ្ញវត្ថុ បានថ្លែងបន្តថា សម្រាប់ពុទ្ធវិជ្ជា មានច្បាប់បញ្ញត្តពីរយ៉ាង គឺច្បាប់បញ្ញត្តសន្មត ឬបញ្ញត្តតាមក្រមព្រះអយ្យការ ជាការបញ្ញត្តតម្រែតម្រង់ចរិយាសាស្រ្តរបស់មនុស្សឱ្យត្រឹមត្រូវតាមគន្លងនៃធម៌។ គន្លងធម៌នេះ គឺជាច្បាប់បរមត្ថ។ឯកឧត្តមបន្តថា ច្បាប់របស់ខ្មែរក៏មានលក្ខណៈពីរយ៉ាងដូចគ្នា គឺច្បាប់ទូន្មានដែលសំដៅលើច្បាប់ក្នុងកម្រិតជាបរមត្ថវិជ្ជា រីឯច្បាប់បង្គាប់ ជាច្បាប់សម្រាប់ចង្អុលបង្ហាញ ក្នុងករណីប្រាស់ចាកគន្លងនៃច្បាប់នឹងត្រូវមានទណ្ឌកម្មអនុវត្តដោយស្ថាប័នរដ្ឋបាល។ មាគ៌ាទាំងពីរ ដើរទន្ទឹមគ្នា ក្នុងប្រព័ន្ធយុត្តិធម៌របស់ខ្មែរយើងពីបរមបុរាណមក ជាពិសេសក្នុងច្បាប់កំពូលរបស់ខ្មែរយើង មានឈ្មោះថា ក្រមព្រះធម្មសាស្រ្ត ដែលជាច្បាប់កំពូលតាំងពីសម័យមុនអង្គរ សម័យអង្គរ និងសម័យក្រោយអង្គរ។ គួរបញ្ជាក់ដែរថា វេទិកាស្តីពី «ទំនៀមជំនុំច្បាប់ខ្មែរ៖ ទស្សនវិជ្ជាច្បាប់បែបប្រពៃណី»រៀបចំដោយក្រុមប្រឹក្សានីតិកម្មនៃក្រសួងសេដ្ឋកិច្ចនិងហិរញ្ញវត្ថុ និងសាលាភូមិន្ទរដ្ឋបាល ក្នុងគោលបំណងផ្សព្វផ្សាយនូវ «កម្រងឯកសារសិក្សាសាកល្បងអំពីទស្សនវិជ្ជាច្បាប់ខ្មែរពីបុរាណ»។ អត្ថបទ៖ទូច សោភ័ណ

សម្ដេចធិបតី ហ៊ុន ម៉ាណែត អញ្ជើញជាអធិបតីក្នុងវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ លើកទី១

នៅព្រឹកថ្ងៃទី១៨ ខែមីនា ឆ្នាំ ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដី នៃព្រះរាជាណាចក្រកម្ពុជា បានអញ្ជើញជាអធិបតីភាពដ៏ខ្ពង់ខ្ពស់ ក្នុងវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ លើកទី១ ស្ដីពី «កំណែទម្រង់វិមជ្ឈការ និង វិសហមជ្ឈការ ដើម្បីចូលរួមសម្រេចបានចក្ខុវិស័យ កម្ពុជាឆ្នាំ២០៥០» នៅសណ្ឋាគារសុខាភ្នំពេញ។គណៈកម្មាធិការជាតិសម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ នៅកាត់ថា គ.ជ.អ.ប. បានឱ្យដឹងថា វេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ លើកទី១នេះ ធ្វើឡើងក្នុងគោលបំណងរួមគ្នាវាយតម្លៃអំពីវឌ្ឍនភាព បញ្ហាប្រឈម កំណត់ដំណោះស្រាយ និងការតម្រង់ទិសផ្នែកគោលនយោបាយសម្រាប់សម្រួចការអនុវត្តកំណែទម្រង់វិមជ្ឈការ និងវិសហមជ្ឈការ ដើម្បីចូលរួមកសាងមូលដ្ឋានគ្រឹះឆ្ពោះទៅសម្រេចចក្ខុវិស័យកម្ពុជាឆ្នាំ២០៥០។វេទិកានេះបានប្រព្រឹត្តទៅដោយមានសមាសភាពចូលរួមមកពីតំណាងព្រឹទ្ធសភា រដ្ឋសភា ក្រុមប្រឹក្សាធម្មនុញ្ញ គណៈកម្មាធិការជាតិរៀបចំការបោះឆ្នោត សមាជិករាជរដ្ឋាភិបាល ឧត្តមក្រុមប្រឹក្សាពិគ្រោះ និងផ្តល់ យោបល់ ក្រសួង ស្ថាប័ននៃរាជរដ្ឋាភិបាល រដ្ឋបាលថ្នាក់ក្រោមជាតិ អង្គការសង្គមស៊ីវិល ដៃគូអភិវឌ្ឍន៍ វិស័យឯកជន និងអ្នកពាក់ព័ន្ធនានា សរុបប្រមាណ ១.៤០០នាក់។ ទន្ទឹមនេះ ក៏មានការៀបចំតាមប្រព័ន្ធ អនឡាញ (Zoom) ពីគ្រប់រដ្ឋបាលរាជធានី ខេត្ត ក្រុង ស្រុក ខណ្ឌផងដែរ។យោងតាមរបាយការណ៍សង្ខេបដោយឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រីរដ្ឋមន្ត្រីក្រសួងមហាផ្ទៃ និងជាប្រធាន គ.ជ.អ.ប. អំពីកិច្ចដំណើរការនៃការរៀបចំវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិនៅព្រឹកដែរនេះបានឱ្យដឹងថា វេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ ស្តីពី “កំណែទម្រង់វិមជ្ឈការ និង វិសហមជ្ឈការ ដើម្បីចូលរួមសម្រេចបានចក្ខុវិស័យកម្ពុជាឆ្នាំ២០៥០” ត្រូវបានរៀបចំឡើងក្រោម គំនិតផ្តួចផ្តើមដ៏ឈ្លាសវៃ និងចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា។កិច្ចដំណើរការរៀបចំវេទិកានេះត្រូវអនុវត្តទៅតាមជំហានសំខាន់ៗចំនួន បី រួមមាន៖ជំហានទី១៖ ការរៀបចំវេទិកានៅថ្នាក់ក្រោមជាតិ ដែលជំហាននេះត្រូវរៀបចំនៅថ្នាក់ឃុំ សង្កាត់ នៅថ្នាក់ក្រុង ស្រុក ខណ្ឌ និងនៅថ្នាក់រាជធានី ខេត្តនីមួយៗ។ ជំហានទី២៖ ការរៀបចំកិច្ចប្រជុំរបស់អនុគណៈកម្មាធិការនានានៃគ.ជ.អ.ប. និងការរៀបចំ កិច្ចប្រជុំគ.ជ.អ.ប. និង ជំហានទី៣៖ ការរៀបចំវេទិការវាងរាជរដ្ឋាភិបាលនិងរដ្ឋបាលថ្នាក់ក្រោមជាតិ ដែលបាន និងកំពុងប្រព្រឹត្តទៅយ៉ាងអធិកអធមនាពេលនេះ។ក្នុងជំហាននីមួយៗផ្តោតលើការពិនិត្យ និងពិភាក្សាលើប្រធានបទសំខាន់ៗចំនួន៧ ដែលពាក់ព័ន្ធនឹងរដ្ឋបាលថ្នាក់ក្រោមជាតិ រួមមាន៖ ១. ការរៀបចំរចនាសម្ព័ន្ធ ប្រព័ន្ធគ្រប់គ្រង និងនីតិវិធីការងារ, ២. ស្ថានភាពនៃការផ្ទេរ និងការអនុវត្តមុខងារ, ៣. ស្ថានភាពនៃការគ្រប់គ្រង និងការអភិវឌ្ឍធនធានមនុស្ស, ៤. ការគ្រប់គ្រង ការប្រើប្រាស់ធនធានហិរញ្ញវត្ថុ និងទ្រព្យសម្បត្តិរដ្ឋ, ៥. ទំនាក់ទំនងការងារ និងខ្សែគណនេយ្យភាពផ្ទៃក្នុងរដ្ឋបាលថ្នាក់ក្រោមជាតិ និងរវាង រដ្ឋបាលថ្នាក់ក្រោមជាតិជាមួយស្ថាប័នថ្នាក់ជាតិ និងជាមួយប្រជាពលរដ្ឋ, ៦. ការផ្តល់សេវាសាធារណៈ និងការអភិវឌ្ឍមូលដ្ឋាន និង, ៧. ការគាំទ្រ តាមដាន ត្រួតពិនិត្យ វាយតម្លៃ ការធ្វើអធិការកិច្ច និងសវនកម្ម។ឯកឧត្តមអភិសន្តិបណ្ឌិត ស សុខា បានឱ្យដឹងទៀតថា ដើម្បីធានាដល់ការរៀបចំវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិស្របតាម គោលការណ៍ ខ្លឹមសារ និងជំហាននានាដែលបានកំណត់ គ.ជ.អ.ប.បានសហការរៀបចំយន្តការ គាំទ្រ បណ្តុះបណ្តាល តាមដាន ត្រួតពិនិត្យ និងតម្រង់ទិសដល់រដ្ឋបាលថ្នាក់ក្រោមជាតិ ដំណើរការរៀបចំវេទិកានេះ។ រដ្ឋបាលឃុំ សង្កាត់ រដ្ឋបាលក្រុង ស្រុក ខណ្ឌ និងរដ្ឋបាលរាជធានី ខេត្តទូទាំងប្រទេស បានរៀបចំរបាយការណ៍បូកសរុបលទ្ធផលការងារសម្រាប់រយៈពេល៣ឆ្នាំ (២០២១-២០២៣) សម្រាប់ជាមូលដ្ឋានរៀបចំកិច្ចប្រជុំ និងវេទិកាដោយមានការចូលរួមពីគ្រប់តួអង្គពាក់ព័ន្ធ ដើម្បី ត្រួតពិនិត្យ វាយតម្លៃទៅលើលទ្ធផលការងារ និងបញ្ហាប្រឈម ព្រមទាំងបានកំណត់នូវវិធានការ ចាំបាច់នានាសម្រាប់ដោះស្រាយបញ្ហាប្រឈមដែលរដ្ឋបាលរបស់ខ្លួនបានជួបប្រទះ។ឯកឧត្តមអភិសន្តិបណ្ឌិត ស សុខា បានបញ្ជាក់ថា ផ្អែកលើមូលដ្ឋាននេះ ក្នុងរយៈពេល៣ឆ្នាំ (២០២១-២០២៣) កន្លងមកនេះ រដ្ឋបាលថ្នាក់ក្រោមជាតិបានបំពេញមុខងារ និងការទទួលខុសត្រូវរបស់ខ្លួនសម្រេចបានសមិទ្ធផលជាច្រើន រួមមាន ការថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គមតាមមូលដ្ឋាននីមួយៗ ការផ្តល់សេវាសាធារណៈដែលជាសេវាតម្រូវការ និងសេវាសំណូមពរនានារបស់ប្រជាពលរដ្ឋ ប្រកបដោយប្រសិទ្ធភាព តម្លាភាព គណនេយ្យភាព បរិយាបន្ន និងសមធម៌សង្គម ជាពិសេស សេវារដ្ឋបាលតាមយន្តការច្រកចេញចូលតែមួយ និងសេវាសង្គមគាំពារដល់ការលើកកម្ពស់ សុខុមាលភាព និងជីវភាពរបស់ប្រជាពលរដ្ឋ ជាពិសេសគ្រួសារក្រីក្រ គ្រួសាររងគ្រោះនិង ងាយរងគ្រោះ ជនមានពិការភាព ស្ត្រី និងកុមារ ព្រមទាំងការអភិវឌ្ឍហេដ្ឋារចនាសម្ព័ន្ធរូបវ័ន្ត នានានៅមូលដ្ឋាន ដូចជា ការសាងសង់ ការជួសជុល ការថែទាំផ្លូវថ្នល់ ស្ពាន លូ ប្រឡាយ ប្រព័ន្ធធារាសាស្ត្រ សួនច្បារ អគារសាលារៀន និងសំណង់សិល្បការ្យផ្សេងៗទៀតដែលជាតម្រូវការ នៅមូលដ្ឋាន៕

បណ្ដាញសង្គម

ព័ត៌មានថ្មីៗ

ក្រសួងកិច្ចការនារីដាក់ឱ្យអនុវត្តជាផ្លូវការកម្មវិធីភាពជាអ្នកដឹកនាំរបស់ក្មេងស្រី ដើម្បីបង្កើនមូលធនមនុស្សក្នុងសង្គម

គណៈប្រតិភូរដ្ឋសភាកម្ពុជា ចូលរួមកិច្ចប្រជុំក្រុមប្រឹក្សាពិគ្រោះយោបល់អាយប៉ាស្តីពីគ្រឿងញៀន លើកទី៩ (The 9th AIPACODD)

អយ្យការអមសាលាដំបូងខេត្តព្រះវិហារ ចុះធ្វើអធិការកិច្ចនៅពន្ធនាគារខេត្ត ដើម្បីពង្រឹងសីលធម៌វិជ្ជាជីវៈ និងការគោរពសិទ្ធិមនុស្ស

យុវជនបង្ហាញការដឹងគុណរាជរដ្ឋាភិបាលដែលផ្តល់ការបណ្តុះបណ្តាលជំនាញឥតគិតថ្លៃដល់ពួកគេ

កូឡុំប៊ីយកឈ្នះកុងហ្គោ ១-០ ធានាកៅអីឡើងវគ្គ ៣២ ក្រុមចុងក្រោយ World Cup 2026

ក្រូអាស៊ីស្រោចស្រង់ក្តីសង្ឃឹមឡើងវគ្គ ៣២ ក្រុមក្រោយយកឈ្នះប៉ាណាម៉ា ១-០

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

វិទ្យាស្ថានបច្ចេកវិទ្យាកម្ពុជា សម្ពោធជាផ្លូវការមជ្ឈមណ្ឌលបណ្តុះបណ្តាលបច្ចេកទេសម៉ាស៊ីនត្រជាក់

រដ្ឋមន្ត្រីធនធានទឹក ដឹកនាំសិក្ខាសាលា ស្តីពីការចាប់ផ្តើមសិក្សា និងវិភាគសន្តិសុខទឹកក្នុងអាងទន្លេសាប

ក្រសួងសង្គមកិច្ចកម្ពុជា ពិភាក្សាការងារក្របខ័ណ្ឌកិច្ចការពារកុមារជាមួយ ក្រសួងការបរទេសអង់គ្លេស

ក្រសួងបរិស្ថាន និងដៃគូស្តារវត្តមានក្រពើភ្នំឡើងវិញ នៅតំបន់ឧទ្យានជាតិវីរៈជ័យ

នាវាកងទ័ពជប៉ុនមានអាទិភាពមុនគេបង្អស់ក្នុងការចូលចតនៅកំពង់ផែរាមបន្ទាប់ពីសាងសង់រួច

មន្រ្តីជំនាញ៖ ច្បាប់ខ្មែរបុរាណយកលំនាំទស្សនវិជ្ជាតាមបែបសាសនាជាពិសេសទស្សនវិជ្ជាពុទ្ធនិយម

សម្ដេចធិបតី ហ៊ុន ម៉ាណែត អញ្ជើញជាអធិបតីក្នុងវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ លើកទី១

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

វិទ្យាស្ថានបច្ចេកវិទ្យាកម្ពុជា សម្ពោធជាផ្លូវការមជ្ឈមណ្ឌល​បណ្តុះបណ្តាល​បច្ចេក​ទេសម៉ាស៊ីន​ត្រជាក់

រដ្ឋមន្ត្រីធនធានទឹក ដឹកនាំសិក្ខាសាលា ស្តីពីការចាប់ផ្តើមសិក្សា និងវិភាគសន្តិសុខទឹក​ក្នុងអាង​ទន្លេសាប

ក្រសួងសង្គមកិច្ចកម្ពុជា ពិភាក្សាការងារក្របខ័ណ្ឌកិច្ចការពារកុមារជាមួយ ក្រសួងការបរទេស​អង់គ្លេស

ក្រសួងបរិស្ថាន និងដៃគូស្តារវត្តមានក្រពើភ្នំឡើងវិញ នៅតំបន់ឧទ្យានជាតិវីរៈជ័យ

នាវាកងទ័ពជប៉ុនមានអាទិភាពមុនគេបង្អស់ក្នុងការចូលចតនៅកំពង់ផែរាមបន្ទាប់ពីសាងសង់រួច

មន្រ្តីជំនាញ៖ ច្បាប់ខ្មែរបុរាណយកលំនាំទស្សនវិជ្ជាតាមបែបសាសនាជាពិសេសទស្សនវិជ្ជាពុទ្ធនិយម

សម្ដេចធិបតី ហ៊ុន​ ម៉ាណែត អញ្ជើញជាអធិបតីក្នុងវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ លើកទី១

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

វិទ្យាស្ថានបច្ចេកវិទ្យាកម្ពុជា សម្ពោធជាផ្លូវការមជ្ឈមណ្ឌលបណ្តុះបណ្តាលបច្ចេកទេសម៉ាស៊ីនត្រជាក់

រដ្ឋមន្ត្រីធនធានទឹក ដឹកនាំសិក្ខាសាលា ស្តីពីការចាប់ផ្តើមសិក្សា និងវិភាគសន្តិសុខទឹកក្នុងអាងទន្លេសាប

ក្រសួងសង្គមកិច្ចកម្ពុជា ពិភាក្សាការងារក្របខ័ណ្ឌកិច្ចការពារកុមារជាមួយ ក្រសួងការបរទេសអង់គ្លេស

សម្ដេចធិបតី ហ៊ុន ម៉ាណែត អញ្ជើញជាអធិបតីក្នុងវេទិការវាងរាជរដ្ឋាភិបាល និងរដ្ឋបាលថ្នាក់ក្រោមជាតិ លើកទី១