BTV NEWS

គណៈប្រតិភូរដ្ឋសភាកម្ពុជា ចូលរួមកិច្ចប្រជុំក្រុមប្រឹក្សាពិគ្រោះយោបល់អាយប៉ាស្តីពីគ្រឿងញៀន លើកទី៩ (The 9th AIPACODD)

អយ្យការអមសាលាដំបូងខេត្តព្រះវិហារ ចុះធ្វើអធិការកិច្ចនៅពន្ធនាគារខេត្ត ដើម្បីពង្រឹងសីលធម៌វិជ្ជាជីវៈ និងការគោរពសិទ្ធិមនុស្ស

យុវជនបង្ហាញការដឹងគុណរាជរដ្ឋាភិបាលដែលផ្តល់ការបណ្តុះបណ្តាលជំនាញឥតគិតថ្លៃដល់ពួកគេ

កម្ពុជាអាចនាំចេញកសិផលចំនួន៦មុខទៅកាន់ប្រទេសចិនឆ្លងកាត់ប្រទេសឡាវចំណាយពេលត្រឹមមួយសប្ដាហ៍

ព័ត៌មានជាតិ

សម្ដេចតេជោ ហ៊ុន សែន អនុញ្ញាតជូនគណៈប្រតិភូកុងស៊ុលកិត្តិយសចំនួន ១១ ប្រទេសចូលជួបសម្ដែងការគួរសម

នៅព្រឹកថ្ងៃទី១៨ ខែមីនា ឆ្នាំ២០២៥ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៃព្រះរាជាណាចក្រកម្ពុជា បានអនុញ្ញាតជូនគណៈប្រតិភូកុងស៊ុលកិត្តិយសចំនួន ១១ ប្រទេស ចូលជួបសម្ដែងការគួរសម និងពិភាក្សាការងារ នៅវិមានព្រឹទ្ធសភា រាជធានីភ្នំពេញ។ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឲ្យដឹងនៅក្រោយជំនួបនាព្រឹកនេះថា ប្រតិភូកិត្តិយសទាំង១១ ប្រទេសនេះ បានដឹកនាំដោយ ឯកឧត្តម Salah ESSA កុងស៊ុលកិត្តិយស នៃសាធារណរដ្ឋស៊ីប (Cyprus) នឹងអមដោយកុងស៊ុលកិត្តិយសចំនួន ១០ ទៀត ដូចជា កុងស៊ុលកិត្តិយស អ៊ីតាលី, អាល្លឺម៉ង់, ហ្វាងឡង់, ន័រវេស, អេស្បាញ, ស៊ុយអ៊ែត និងចក្រភពអង់គ្លេស ជាដើម។ នៅក្នុងឱកាសនោះសម្ដេចប្រមុខរដ្ឋស្ដីទី បានសម្ដែងនូវក្ដីរីករាយ និងស្វាគមន៍ចំពោះវត្តមាននៃបណ្ដាប្រតិភូកិត្តិយសទាំង១១ ប្រទេស បានចូលជួបសម្ដែងការគួរសម។ សម្ដេចក៏រំពឹងថា តាមរយៈជំនួននេះ នឹងធ្វើឱ្យទំនាក់ទំនង រវាងប្រទេសកម្ពុជា ជាមួយនឹងបណ្ដាប្រទេសទាំង១១ មានភាពរីកចម្រើនបន្ថែមទៀត។ នៅក្នុងឱកាសនោះឯកឧត្តម Salah ESSA ដែលជាតំណាងប្រតិភូកុងស៊ុលទាំង ១១ ប្រទេស បានថ្លែងនូវអំណរគុណ ចំពោះសម្ដេចតេជោ ដែលបានផ្ដល់ឱកាស និងអនុញ្ញាតឱ្យតំណាងកុងស៊ុលកិត្តិយសទាំង ១១ ប្រទេសបានចូលជួបសម្ដែងការគួរសមនាឱកាសនេះ។ ឯកឧត្តម ក៏បានអបអរសាទរ ចំពោះសម្ដេចតេជោ ដែលបានទទួលតួនាទីជាប្រធានព្រឹទ្ធសភា របស់ព្រះរាជាណាចក្រកម្ពុជា និងបង្ហាញនូវក្ដីរីករាយចំពោះការអភិវឌ្ឍរបស់ប្រទេសកម្ពុជា ក្រោមការដឹកនាំរបស់សម្ដេចតេជោ កាលពីនៅជាអតីតនាយករដ្ឋមន្រ្ដី និងភាពរីកចម្រើនរបស់កម្ពុជាមកដល់ពេលនេះដែលដឹកនាំបន្តដោយសម្ដេចមហាបវរធិបតី ហ៊ុន ម៉ាណែត ជានាយករដ្ឋមន្រ្ដីបន្តវេន។ ក្នុងឱកាសនោះសម្ដេចប្រមុខរដ្ឋស្ដីទី បានរំលេចអំពីកិច្ចសហប្រតិបត្តិការរវាងកម្ពុជាជាមួយនឹងប្រទេសទាំង១១ ជាពិសេសគឺផ្ដោតទៅលើការធ្វើពាណិជ្ជកម្ម, វិនិយោគ, ទេសចរណ៍ ជាមួយនឹងបណ្ដាប្រទេសទាំង១១ឱ្យមានការកើនឡើងបន្ថែមទៀត ដែលជាក្ដីចង់បានរបស់ប្រទេសកម្ពុជា។ សម្ដេចក៏ចង់ឱ្យបណ្ដាប្រទេសទាំង ១១ ជួយបន្ថែមទៀតដល់កម្ពុជាមិនត្រឹមតែក្នុងក្របខណ្ឌហិរញ្ញវត្ថុប៉ុណ្ណោះទេ ក៏ប៉ុន្ដែអ្វីដែលកម្ពុជាចង់បាននោះ គឺការបណ្ដុះនូវធនធានខួរក្បាល គឺសំដៅទៅលើធនធានមនុស្ស របស់ប្រទេសកម្ពុជាឱ្យមានភាពល្អប្រសើរ និងកើនឡើងបន្ថែមទៀត ដែលជាក្ដីចង់បានដ៏ធំបំផុតសម្រាប់កម្ពុជា។ នៅក្នុងឱកាសនោះដែរ ឯកឧត្តម Salah ESSA បានលើកឡើងថា ឯកឧត្តមនឹងខិតខំប្រឹងប្រែង ជាមួយនឹងតំណាងនៃកុងស៊ុលកិត្តិយសទាំង១០ប្រទេសទៀត ក្នុងការធ្វើយ៉ាងណាឱ្យការធ្វើវិនិយោគ, ពាណិជ្ជកម្ម, អភិវឌ្ឍសេដ្ឋកិច្ច និងទេសចរណ៍ រវាងប្រទេសកម្ពុជា ជាមួយនឹងបណ្តាប្រទេសទាំង ១១ មានការរីកចម្រើនបន្ថែមទៀត។ ជាពិសេសឯកឧត្តម នឹងខិតខំប្រឹងប្រែងក្នុងការទាក់ទាញ អ្នកវិនិយោគក្នុងចំណោមប្រទេសទាំង ១១ នេះ មកវិនិយោគ ធ្វើពាណិជ្ជកម្ម និងជំរុញទេសចរមកទស្សនាកម្ពុជា។ ឯកឧត្តម Salah ESSA បានបង្ហាញនូវការកោតសរសើរចំពោះលក្ខណៈអំណោយផលរបស់ប្រទេសកម្ពុជា ដែលមានកត្តាសុខសន្ដិភាព ក្រោមការដឹកនាំរបស់សម្ដេចតេជោ ហ៊ុន សែន ដែលជាអតីតនាយករដ្ឋមន្រ្ដី ធ្វើឱ្យប្រទេសកម្ពុជា មានសុខសន្ដិភាព និងមានភាពរីកចម្រើននឹងមានសន្ដិសុខជាតិល្អប្រសើរ។ ក្នុងឱកាសនោះសម្ដេចតេជោ បានអរគុណ ចំពោះ ឯកឧត្តម Salah ESSA និងតំណាងកុងស៊ុលទាំង ១០ ប្រទេស ដែលបានវាយតម្លៃដោយសុទិដ្ឋិនិយមចំពោះការអភិវឌ្ឍ និងរីកចម្រើនរបស់ប្រទេសកម្ពុជា រួមទាំងកត្តាសន្ដិសុខផងដែរ៕

មន្ដ្រីជាន់ខ្ពស់អន្តោប្រវេសន៍ ចុះត្រួតពិនិត្យ និងបើកប្រអប់សំបុត្រនៅតាមប៉ុស្ដិ៍នៃច្រកទ្វារអន្ដរជាតិ

ភ្នំពេញ៖ នៅថ្ងៃទី១៧ខែមីនា ឆ្នាំ២០២៥នេះ ឯកឧត្តមឧត្តមសេនីយ៍ឯកបណ្ឌិត ណុប នរិន្ទ អគ្គនាយករង និងជាប្រធានក្រុមការងាររៀបចំ ត្រួតពិនិត្យ បើកប្រអប់សំបុត្រតំណាងដ៏ខ្ពង់ខ្ពស់ឯកឧត្តមឧត្តមសេនីយ៍ឯក អគ្គនាយកអន្តោប្រវេសន៍ បានចុះបើកប្រអប់សំបុត្រនៅប៉ុស្ដិ៍នគរបាលច្រកទ្វារព្រំដែនអន្ដរជាតិម៉ឺនជ័យ ត្រពាំងផ្លុង និងត្រពាំងស្រែ នៃនាយកដ្ឋានច្រកទ្វារទី២។នាឱកាសនោះ ឯកឧត្ដមឧត្តមសេនីយ៍ឯកបណ្ឌិត ណុប នរិន្ទ ក៏បានពាំនាំនូវប្រសាសន៍ផ្ដាំផ្ញើសួរសុខទុក្ខរបស់ឯកឧត្តមឧត្ដមសេនីយ៍ឯកអគ្គនាយកដល់មន្រ្តីនគរបាលអន្តោប្រវេសន៍ដែលប្រចាំការនៅទីនោះផងដែរ។ជាមួយគ្នានេះដែរឧត្តមសេនីយ៍ឯក ណុប នរិន្ទ បានធ្វើការកោតសរសើរចំពោះការខិតខំប្រឹងប្រែងធ្វើការងារ និងការធ្វើបដិសណ្ឋារកិច្ចចំពោះភ្ញៀវជាតិ-អន្ដរជាតិ ដោយបញ្ចេញស្នាមញញឹមរាក់ទាក់ស្វាគមន៍របស់មន្ត្រីនគរបាលអន្តោប្រវេសន៍ផងដែរ។ជាចុងបញ្ចប់ឯកឧត្ដមឧត្តមសេនីយ៍ឯកបណ្ឌិត ណុប នរិន្ទ អគ្គនាយករងអន្តោប្រវេសន៍ ក៏បានធ្វើការណែនាំ និងក្រើនរំលឹកដល់មន្ដ្រីរបស់ខ្លួន ឱ្យគោរពវិន័យ ពង្រឹងការសាមគ្គីភាពផ្ទៃក្នុង ឲ្យបានល្អប្រសើរថែមទៀត ការស្លៀកពាក់ឯកសណ្ឋានឱ្យបានត្រឹមត្រូវក្នុងពេលបំពេញការងារ៕

ឯកឧត្ដម វ៉ាង វិនបីន៖ ការសម្តែងសិល្បៈ វប្បធម៌ខ្មែរ និងការកម្សាន្តផ្សេងទៀតនៅលើដងវិថីថ្មើរជើង (Walk Street) នឹងទាក់ទាញភ្ញៀវទេសចរចិនកាន់តែច្រើន

តាមរយៈបណ្ដាញសង្គមហ្វេសប៊ុកនាព្រឹកថ្ងៃទី១៨ ខែមីនា ឆ្នាំ២០២៥នេះ ឯកឧត្ដម វ៉ាង វិនបីន (Wang Wenbin) ឯកអគ្គរដ្ឋទូត វិសាមញ្ញនិងពេញសមត្ថភាព នៃសាធារណរដ្ឋប្រជាមានិតចិន ប្រចាំព្រះរាជាណាចក្រកម្ពុជា បង្ហាញក្ដីសង្ឃឹមថា ការសម្តែងសិល្បៈខ្មែរ និងសកម្មភាពវប្បធម៌ និងការកម្សាន្តផ្សេងទៀតនៅលើដងវិថីថ្មើរជើង (Walk Street) នឹងទាក់ទាញភ្ញៀវទេសចរចិនកាន់តែច្រើន។ឯកឧត្ដម វ៉ាង វិនបីន បានលើកឡើងថា «ចាប់តាំងពីបើកដំណើរការនាឆ្នាំនេះមក វិថីថ្មើរជើងនៅមាត់ទន្លេក្នុងរាជធានីភ្នំពេញ បានក្លាយជាកន្លែងកម្សាន្តចុងសប្តាហ៍ដ៏ពេញនិយមសម្រាប់អ្នករស់នៅក្នុងតំបន់ និងភ្ញៀវទេសចរ។»ឯកឧត្ដមសង្ឃឹមថា «ការសម្តែងសិល្បៈខ្មែរ និងសកម្មភាពវប្បធម៌ និងការកម្សាន្តផ្សេងទៀតនៅលើដងវិថីនេះនឹងទាក់ទាញភ្ញៀវទេសចរចិនកាន់តែច្រើន។»

ឯកឧត្តម ហ៊ុន ម៉ានី៖ ការលាបពណ៌ ការរើសអើង គឺជាប្រភពនៃការបែកបាក់សាមគ្គី ហើយនាំឲ្យជាតិចុះខ្សោយ

ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) បានលើកឡើងថា ការលាបពណ៌ នយោបាយជ្រុលនិយម រើសអើង និងការស្អប់ខ្ពើម គឺជាប្រភព នៃការបែកបាក់សាមគ្គីភាពផ្ទៃក្នុង ដែលនេះជាអ្វីដែលនាំដល់ការចុះខ្សោយនៃប្រជាជាតិយើងក្នុងអតីតកាល។តាមរយៈបណ្តាញសង្គមហ្វេសបុក ឯកឧត្តម ហ៊ុន ម៉ានី បានលើកឡើងថា ថ្ងៃទី១៨ ខែមីនា គឺជាខួបទី៥៥ នៃរដ្ឋប្រហារទម្លាក់ សម្តេចព្រះ នរោត្តម សីហនុ ព្រះប្រមុខរដ្ឋ ដោយក្រុម សេនាប្រមុខ លន់ ណុល និងទ្រង់ សិរីមតៈ។ ថ្ងៃនេះ កាលពី ៥៥ ឆ្នាំមុន កម្ពុជាដ៏កំសត់របស់យើងបានឈានជើងមកដល់មាត់ជ្រោះមរណៈដ៏សែនអាក្រក់បំផុតក្នុងប្រវត្តិសាស្រ្តរបស់ខ្លួន។ ឯកឧត្តមបានបន្ថែមថា សង្រ្គាម ការទម្លាក់គ្រាប់បែក អំពើហិង្សារ អសន្តិសុខបានមកញាំញីប្រជាពលរដ្ឋគ្មានស្រាកស្រាន្ត។ ក្រោយរដ្ឋប្រហារ១៨ មីនា កង់ប្រវត្តិសាស្រ្តបានខិតជិតទៅរកមហាសោកនាដកម្មដ៏គួរឱ្យសោកសង្រែងជាទីបំផុត ដែលយើងមិនធ្លាប់ស្គាល់។ អំពើប្រល័យពូជសាសន៍ ការសម្លាប់រង្គាល ទារុណកម្ម និងការងារដោយបង្ខំ បានសម្លាប់ប្រជាជនអស់ជិត ៣លាននាក់ ត្រឹមរយៈពេល ៣ឆ្នាំ ៨ខែ ២០ថ្ងៃ។ឯកឧត្តម បានសង្កត់ធ្ងន់ថា«មេរៀនប្រវត្តិសាស្រ្តមួយនេះ គឺជាការដាស់ស្មារតីដល់អ្នកជំនាន់ក្រោយឱ្យស្វែងយល់ពីភាពផុយស្រួយនៃសន្តិភាព និងការបំផ្លិចបំផ្លាញនៃសង្រ្គាម។ ព្រឹត្តិការណ៍នេះក៏បានបង្រៀនយើងផងដែរថា គ្មានអ្នកណាស្រលាញ់ជាតិយើងជាងជនជាតិយើង ដែលមានកំណើត និងបានរស់រានមានជីវិតលើទឹកដីយើងនោះទេ។ ការលាបពណ៌ នយោបាយជ្រុលនិយម រើសអើង និងការស្អប់ខ្ពើមគឺជាប្រភព នៃការបែកបាក់សាមគ្គីភាពផ្ទៃក្នុង ដែលនេះជាអ្វីដែលនាំដល់ការចុះខ្សោយនៃប្រជាជាតិយើងក្នុងអតីតកាល»។យ៉ាងណាក៏ដោយ ឯកឧត្តម ហ៊ុន ម៉ានី លើកឡើងផងដែរថា ក្រោយថ្ងៃរំដោះ ៧ មករា យើងត្រូវការពេលវេលាច្រើនណាស់ទម្រាំកសាងជាតិឱ្យរស់រានមានជីវិតឡើងវិញ ស្របពេលដែលមានសម្ពាធពីគ្រប់មជ្ឈដ្ឋាន រាប់បញ្ចូលទាំងហានិភ័យ នៃការវិលត្រលប់មកវិញនៃរបបប្រល័យពូជសាសន៍។ ថ្នាក់ដឹកនាំ និងប្រជាពលរដ្ឋយើងនៅពេលនោះបានតស៊ូប្រឹងប្រែង ខាំមាត់សង្កត់ចិត្ត អត់ធ្មត់ខ្ពស់បំផុត ខិតខំការពារជាតិក្នុងកាលៈទេសៈដ៏លំបាកនោះ ព្រមទាំងពុះពារ លះបង់សព្វបែបយ៉ាងដើម្បីទទួលបានមកវិញនូវសុខសន្តិភាព។ យើងត្រូវការពេលវេលា ជិត ២ ទសវត្សរ៍ទៀត ទើបយើងទទួលបានផ្លែផ្កានៃសន្តិភាពពេញលេញចាប់ផ្តើមការកសាងអភិវឌ្ឍជាតិលើគ្រប់វិស័យរហូតដល់សព្វថ្ងៃនេះ៕ អត្ថបទ បាន ចក់

សម្ដេចតេជោ វាយតម្លៃខ្ពស់ចំពោះលោក ដូណាល់ ត្រាំ មានសេចក្តីក្លាហានចេញដឹកនាំពិភពលោកប្រយុទ្ធប្រឆាំងព័ត៌មានក្លែងក្លាយផ្តើមពីបណ្តាញព័ត៌មានដែលផ្តល់ថវិកាដោយរដ្ឋាភិបាលអាមេរិកជាមុន

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី នៅយប់ថ្ងៃទី១៧ ខែមីនា ឆ្នាំ ២០២៥នេះ បានបង្ហោះសារលើបណ្ដាញសង្គម បង្ហាញការវាយតម្លៃខ្ពស់ចំពោះលោក ដូណាល់ ត្រាំ មានសេចក្តីក្លាហានចេញដឹកនាំពិភពលោកប្រយុទ្ធប្រឆាំងព័ត៌មានក្លែងក្លាយផ្តើមពីបណ្តាញព័ត៌មានដែលផ្តល់ថវិកាដោយរដ្ឋាភិបាលអាមេរិកជាមុន។សម្ដេចតេជោ បានសរសេរថា៖«យើងគួរតែវាយតម្លៃខ្ពស់ចំពោះលោកប្រធានាធិបតី ដូណាល់ ត្រាំ ដែលមានសេចក្តីក្លាហានចេញដឹកនាំពិភពលោក ដើម្បីប្រយុទ្ធប្រឆាំងព័ត៌មានក្លែងក្លាយ ដោយចាប់ផ្តើមពីបណ្តាញព័ត៌មានដែលផ្តល់ថវិកាដោយរដ្ឋាភិបាលអាមេរិកជាមុន»។ សម្ដេចប្រមុខរដ្ឋស្ដីទី បានបញ្ជាក់ថា នេះជាការរួមចំណែកដ៏ធំដើម្បីលុបបំបាត់ព័ត៌មានក្លែងក្លាយ ព័ត៌មានភូតកុហក លាបពណ៌ អុជអាល ញុះញង់ បង្កចលាចលស្ទើរពេញពិភពលោក ដែលចេញមកពីក្បាលម៉ាស៊ីនឃោសនាដែលលោកប្រធានាធិបតី ត្រាំ បញ្ឈប់ការផ្តល់ថវិកា។សម្ដេចតេជោថ្លែងថា៖«ដូចខ្ញុំបានជម្រាបអង្គប្រជុំអាស៊ាន អាមេរិកចំពោះមុខលោកប្រធានាធិបតី ត្រាំ នៅហ្វីលីពីនឆ្នាំ២០១៧ ថា ការមិនទុកលើអាមេរិកដោយប្រទេសមួយចំនួន វាក៏មានចំណែកចេញមកពីប្រព័ន្ធផ្សព្វផ្សាយអាមេរិក ដែលធ្វើឲ្យប្រទេសទាំងនោះយល់ច្រឡំថា ជាគោលជំហររដ្ឋាភិបាលអាមេរិក»។សម្ដេចតេជោបានបញ្ជាក់ថា៖«ចរិតមាយាទ និងសំដីនៃអ្នកយកព័ត៌មាន និងអ្នកនិយាយព័ត៌មានមួយចំនួនតូចនៃបណ្តាញព័ត៌មាននេះឫកធំជាងប្រមុខរដ្ឋ ឬប្រមុខរដ្ឋាភិបាលទៅទៀត គ្មានគុណធម៌ និងសីលធម៌ទេ»៕

ប.ស.ស. ប្រកាសឲ្យសមាជិកអាចស្នើសុំទូទាត់តាវកាលិកផ្នែកថែទាំសុខភាព តាមរយៈកម្មវិធីទូរស័ព្ទដៃបានចាប់ពីថ្ងៃនេះតទៅ

ភ្នំពេញ៖ បេឡាជាតិសន្តិសុខសង្គម (ប.ស.ស.) នៃក្រសួងការងារ និងបណ្ដុះបណ្ដាលវិជ្ជាជីវៈ បានប្រកាសដាក់ដំណើការ នៃការស្នើសុំទូទាត់តាវកាលិកផ្នែកថែទាំសុខភាពតាមប្រព័ន្ធអនឡាញ ដែលសមាជិក ប.ស.ស. គ្រប់រូប អាចស្នើសុំទាមទារប្រាក់ឧបត្ថម្ភរបស់ខ្លួនបាន ចាប់ពីពេលនេះតទៅ តាមរយៈកម្មវិធីទូរស័ព្ទដៃ NSSF member app។ឯកឧត្តម ម៉េង ហុង ប្រតិភូរាជរដ្ឋាភិបាលទទួលបន្ទុកជាអគ្គនាយកបេឡាជាតិសន្តិសុខសង្គម (ប.ស.ស.) នៅក្នុងកិច្ចប្រជុំផ្ទៃក្នុងប្រចាំខែ ដើម្បីត្រួតពិនិត្យ និងដោះស្រាយលើបញ្ហាប្រឈមរបស់នាយកដ្ឋានជំនាញ និងគ្រប់សាខា ប.ស.ស. ទូទាំងប្រទេស នៅព្រឹកថ្ងៃទី១៧ ខែមីនានេះ បានមានប្រសាសន៍ឲ្យដឹងថា ការស្នើសុំទូទាត់តាវកាលិកផ្នែកថែទាំសុខភាពតាមប្រព័ន្ធអនឡាញនេះ សមាជិក ប.ស.ស. គ្រប់រូប អាចស្នើសុំទាមទារប្រាក់ឧបត្ថម្ភរបស់ខ្លួន មានដូចជា៖ ប្រាក់បំណាច់ប្រចាំថ្ងៃ៧០% ក្នុងអំឡុងពេលសម្រាកមាតុភាព សម្រាកព្យាបាលជំងឺ និងសង្រ្គោះបន្ទាន់។ក្នុងឱកាសជាមួយគ្នា ឯកឧត្តមប្រតិភូរាជរដ្ឋាភិបាល បានជំរុញដល់សមាជិក ប.ស.ស. ទាំងអស់ព្យាយាមប្រើប្រាស់នូវប្រព័ន្ធបច្ចេកវិទ្យាថ្មីដែលបានដាក់ចេញ និងគ្រប់អង្គភាពក្រោមឱវាទ ប.ស.ស. នៃក្រសួងការងារ និងបណ្ដុះបណ្ដាលវិជ្ជាជីវៈ ត្រូវបង្កើន និងពង្រីកបន្ថែមចំពោះការប្រើប្រាស់នូវប្រព័ន្ធបច្ចេកវិទ្យា ដើម្បីអាចសម្រួលដល់កម្លាំងនៃធនធានមនុស្ស និងបង្កជាលក្ខណៈងាយស្រួល ឆាប់រហ័សដល់សមាជិក ប.ស.ស. ក៏ដូចជាប្រតិបត្តិការប្រចាំថ្ងៃរបស់ខ្លួនផ្ទាល់ផងដែរ។ឯកឧត្តមប្រតិភូរាជរដ្ឋាភិបាល ក៏បានផ្តល់អនុសាសន៍លើកទឹកចិត្ត និងណែនាំដល់ថ្នាក់ដឹកនាំ មន្រ្តី និងបុគ្គលិក ក្រោមឱវាទទាំងអស់ត្រូវរក្សាសាមគ្គីភាពផ្ទៃក្នុង និងអនុវត្តការងារឱ្យកាន់ ឆាប់រហ័សទាន់ពេលវេលា ប្រកបដោយទំនួលខុសត្រូវ និងយកចិត្តទុកដាក់ខ្ពស់ជាមួយនឹងភាពទន់ភ្លន់ ម៉ឺងមាត់ ប្រកបដោយក្រមសីលធម៌វិជ្ជាជីវៈខ្ពស់ លើការផ្ដល់សេវាដល់សមាជិក ប.ស.ស. គ្រប់ៗរូប៕

រាជរដ្ឋាភិបាលកម្ពុជា ជំរុញផ្សព្វផ្សាយនូវកតញ្ញូតាធម៌ និងលើកកម្ពស់ការបណ្តុះសីលធម៌ គុណធម៌

ភ្នំពេញ៖ ឯកឧត្តមរដ្ឋមន្រ្តីក្រសួងធម្មការ និងសាសនា បានជំរុញលើកទឹកចិត្តបន្តការផ្សព្វផ្សាយនូវកតញ្ញូតាធម៌ និងលើកកម្ពស់ការបណ្តុះសីលធម៌ គុណធម៌ ព្រោះថា មិនត្រឹមតែលើកកម្ពស់គុណតម្លៃរបស់បុគ្គលប៉ុណ្ណោះទេ ប៉ុន្តែជាមូលដ្ឋានគ្រឹះនៃក្រមសីលធម៌គ្រួសារ ធានាបាននូវរចនាសម្ព័ន្ធសុភមង្គលក្នុងគ្រួសារ និងសង្គមមានស្ថិរភាព។ ឯកឧត្តមបណ្ឌិត ចាយ បូរិន រដ្ឋមន្ត្រីក្រសួងធម្មការ និងសាសនា នៅក្នុងពិធីបុណ្យកតញ្ញូតាធម៌ និងសន្និសីទជំរុញអាហារបួសប្រចាំឆ្នាំលើកទី៧ ឆ្នាំ២០២៥ ក្រោមប្រធានបទ បញ្ចេញពន្លឺរស្មីនៃក្តីស្រលាញ់ កាលពីរសៀលថ្ងៃទី១៦ ខែមីនាកន្លងទៅ បានសម្តែងការកោតសរសើរ និងវាយតម្លៃខ្ពស់ចំពោះក្រុមប្រឹក្សាអីគ័នតាវ ឯកអនុត្តរធម៌ប្រចាំកម្ពុជា ដែលដើរតួនាទីយ៉ាងសំខាន់ ក្នុងឋានៈជាដៃគូរអភិវឌ្ឍន៍របស់រាជរដ្ឋាភិបាល ដោយបានរួមចំណែកលើការងារសង្គមកិច្ច ការងារមនុស្សធម៌ ការងារអប់រំបណ្តុះបណ្តាលយុវជន សុខុមាលភាព សង្គម ការថែរក្សាបរិស្ថាន និងការងារជួយលើកកម្ពស់សីលធម៌ ។ល។ ឯកឧត្តមរដ្ឋមន្រ្តី បានចាត់ទុកការប្រារព្ធកម្មវិធីនាពេលនេះ រៀបចំឡើងស្របពេលដែលសង្គមជាតិ តែងតែយកចិត្តទុកដាក់ជំរុញយ៉ាងផុសផុល បានបង្កើតវេទិការអប់រំចិត្ត តាមប្រព័ន្ធផ្សព្វផ្សាយនានា ដើម្បីតម្រង់ទិស និងបញ្ញាបដល់ប្រជាជនគ្រប់ស្រទាប់វណ្ណៈ ជាពិសេសយុវជនឱ្យមានការឈ្វេងយល់ និងចេះប្រណិប័តន៍នូវធម៌កតញ្ញូចំពោះឪពុកម្តាយ និងអ្នកមានគុណដទៃទៀត ស្តាប់ឱវាទគ្រូបង្រៀន ដើម្បីប្រែក្លាយខ្លួនជាកូនល្អ សិស្សល្អ និងពលរដ្ឋល្អក្នុងសង្គម។ ចំណែកឯអាហារបួស គឺជាអាហារសុខភាព ដែលប្រជាជនលើពិភពលោក រួមទាំងប្រទេសកម្ពុជាផង កំពុងងាកមកចាប់អារម្មណ៍ច្រើនដូចគ្នា។ អ្នកគ្រូឧបជ្ឈាយ៍ ឡាយ ស៊ូឈុន ប្រធានក្រុមប្រឹក្សាអ៊ីគ័នតាវ ឯកអនុត្តរធម៌ប្រចាំកម្ពុជា បានលើកឡើងថា សម្រាប់ប្រធានបទ “បញ្ចេញពន្លឺរស្មីនៃក្តីស្រលាញ់” ដើម្បីលើកកម្ពស់ដល់កតញ្ញូកតវេទី និងអាហារបួស។ ចំណែកឯអាហារបួស គឺជាអាហារមួយប្រភេទរបស់មនុស្ស ក្រៅពីជួយចិញ្ចឹមសរីរាង្គកាយ ឱ្យធំធាត់ប្រកបដោយភាពមាំមួនហើយនោះ ក៏ជាអាហារដែលនាំមកនូវសុខុមាលភាពល្អទាំងផ្លូវកាយនិង ផ្លូវចិត្តថែមទៀត។អ្នកគ្រូឧបជ្ឈាយ៍ បានបន្ថែមថា សព្វថ្ងៃនេះ នៅទូទាំងពិភពលោកមានប្រជាជនប្រមាណ ២២% បានទទួលទានម្ហូបបួសប្រចាំឆ្នាំ។ ពិតមែនតែតួលេខនេះនៅទាបនៅឡើយ តែនិន្នាការនៃការហូបម្ហូបបួសនៅមានការកើនឡើងជាលំដាប់ ពីមួយឆ្នាំទៅមួយឆ្នាំ។ ដោយឡែក សម្រាប់កម្ពុជាយើងវិញ ទោះបីជាមិនមានតួលេខ ច្បាស់លាស់ពីប្រជាជន ដែលទទួលទានអាហារបួស ប៉ុន្តែអាចនិយាយបានថា ចំនួនប្រជាជនហូបអាហារបួស ក៏មានការកើនឡើងដែរ ព្រោះដោយសារមានការកើនឡើងនូវចំនួន ភោជនីយដ្ឋានអាហារបួសនៅតាមរាជធានី-ខេត្តនានា៕

សំណង់រឹងកំពុងចាប់ផ្ដើមរីកនៅលើចិញ្ចើមផ្លូវព្រះមុនីវង្ស ដើម្បីត្រៀមចូលរួមសម្ពោធស្ពានអាកាសមរតកតេជោ

ភ្នំពេញ ៖ ខណៈស្ពានអាកាសមរតកតេជោជិតនឹងបញ្ចប់ការសាងសង់ និងដាក់សម្ពោធឱ្យប្រើប្រាស់ជាផ្លូវការនាពេលឆាប់ៗខាងមុខនោះ សំណង់រឹងដែលសាងសង់ពីឥដ្ឋ រៀបដែកចាក់ស៊ីម៉ង់ត៍ ក៏កំពុងសាងសង់នៅ លើចិញ្ចើមផ្លូវដើររបស់សាធារណជនជាបណ្ដើរៗផងដែរ។ការសាងសង់សំណង់រឹងនៅលើចិញ្ចើមផ្លូវសាធារណៈរបស់រដ្ឋ តាមបណ្ដោយមហាវិថីព្រះមុនីវង្សនេះ គឺទើបឃើញកើតមាននៅប៉ុន្មានថ្ងៃកន្លងមកនេះប៉ុណ្ណោះ ដោយមិនមានការហាមឃាត់ពីអាជ្ញាធរមូលដ្ឋាននោះឡើយ។ ប្រសិនបើមិនមានវិធានការទប់ស្កាត់នៅពេលនេះទេ អាចនឹងមានការរីករាលដាលនៃការសាងសង់សំណង់រឹងបែបនេះបន្តទៀត។ព័ត៌មានស្ដីពីការសាងសង់សំណង់រឹងនៅលើចិញ្ចើមថ្នល់ ជាប់គល់ស្ពានអាកាសមរតកតេជោនេះ ពល រដ្ឋបានជូនដំណឹងទៅលោក កែវ សាវឿន ចៅសង្កាត់ចាក់អង្រែលើ ក្នុងទឹកដីខណ្ឌមានជ័យ ជាច្រើនថ្ងៃកន្លងមកហើយ តែសំណង់នេះនៅតែបន្តការសាងសង់ជាដដែល។បញ្ហាសំណង់អាណាធិបតេយ្យនៅតាមមូលដ្ឋានមួយចំនួនធំ ត្រូវបានគេមើលឃើញថា បណ្ដាលមកពីការមិនយកចិត្តទុកដាក់ហាមឃាត់របស់អាជ្ញាធរនៅតាមមូលដ្ឋាន ដែលបង្កឱ្យសមត្ថកិច្ចជំនាញនៃអា ជ្ញាធររាជធានី/ខេត្ត ឈឺក្បាលនៅក្នុងការដោះស្រាយ។ពលរដ្ឋខ្លះក៏តាំងចិត្តនឹងសាងសង់សំណង់រឹងនៅលើចិញ្ចើមផ្លូវនៃមហាវិថីព្រះមុនីវង្សនេះដែរ ដោយ សារឃើញគំរូនៃការសាងសង់បែបនេះ៕ដោយ៖ គង់ ឌិន

កម្ពុជាស្នើអៀរឡង់ ជួយផ្តល់កម្ចីក្នុងអត្រាការប្រាក់ទាប ដើម្បីលើកកម្ពស់វិស័យសហគមន៍កសិកម្មទំនើប

ភ្នំពេញ៖ មន្រ្តីជាន់ខ្ពស់នៃរាជរដ្ឋាភិបាលកម្ពុជា បានលើកទឹកចិត្តឱ្យភាគីអៀរឡង់ ពិចារណាបង្កើនជំនួយឥតសំណង (ODA) តាមរយៈការផ្តល់ជំនួយជាកម្ចីការប្រាក់ទាប និងការប្រើប្រាស់បច្ចេកវិទ្យាទំនើបសម្រាប់សហគមន៍កសិកម្មទំនើប ដើម្បីជំរុញវិស័យកសិកម្មនៅកម្ពុជាកាន់តែល្អប្រសើរឡើងបន្ថែមទៀត។ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ក្នុងជំនួបសម្តែងការគួរសមជាមួយ ឯកឧត្តម Noel Grealish រដ្ឋមន្រ្តីក្រសួងកសិកម្ម ចំណីអាហារ និងសមុទ្រនៃសាធារណរដ្ឋអៀរឡង់ នាព្រឹកថ្ងៃទី១៧ មីនា ឆ្នាំ២០២៥នេះ បានសម្តែងនូវការស្វាគមន៍ និងក្តីសោមនស្សរីករាយចំពោះកិច្ចពិភាក្សាការងារ ដើម្បីឈានទៅពង្រឹងកិច្ចសហប្រតិបត្តិការរវាងប្រទេសទាំងពីរ កម្ពុជា-អៀរឡង់។ ដោយមើលឃើញពីសក្តានុពលនៃការបន្ស៉ីគ្នា រវាងសហគមន៍កសិកម្មទំនើបនៃកម្ពុជា និងអៀរឡង់ ឯកឧត្តមរដ្ឋមន្ត្រី បានលើកទឹកចិត្តឱ្យភាគីអៀរឡង់ ពិចារណាបង្កើនជំនួយ ODA តាមរយៈការផ្តល់ជំនួយជាកម្ចីការប្រាក់ទាប និងការប្រើប្រាស់បច្ចេកវិទ្យាទំនើបសម្រាប់សហគមន៍កសិកម្មទំនើប ដែលជាតម្រូវការសំខាន់សម្រាប់ការផលិតរួមគ្នា ដើម្បីកាត់បន្ថយថ្លៃដើមនិងជួយឲ្យផលិតផលកសិកម្មទទួលបានតម្លៃបន្ថែមខ្ពស់ ទ្រទ្រង់ការប្រែប្រួលអាកាសធាតុ និងជំរុញការនាំចេញកសិកម្មផងដែរ។ពាក់ព័ន្ធនឹងការងារធនធានមនុស្ស ឯកឧត្តមរដ្ឋមន្ត្រី បានបង្ហាញការគាំទ្រចំពោះការផ្តល់អាហារូបករណ៍សម្រាប់ការសិក្សានៅប្រទេសអៀរឡង់។ សិស្សនិងនិស្សិតដែលទទួលអាហារូបករណ៍ នឹងទទួលបានឱកាសក្នុងការពង្រឹងសមត្ថភាពផ្នែកភាសា កុំព្យូទ័រ និងទំនាក់ទំនង។ ឯកឧត្តម ក៏បានណែនាំឱ្យផ្តល់អាហារូបករណ៍សម្រាប់គ្រូបង្រៀន ដែលជាជនបង្គោលក្នុងការបណ្តុះបណ្តាលធនធានមនុស្សបន្ថែម និងមានផលវិជ្ជាមាននៃការអភិវឌ្ឍ។ លើសពីនេះ ឯកឧត្តមរដ្ឋមន្ត្រី ក៏បានផ្តោតលើការផ្លាស់ប្តូរសិស្ស-និស្សិត ដើម្បីធានាថាធនធានមនុស្សមានសមត្ថភាព និងសម្របសម្រួលជាមួយតម្រូវការបច្ចុប្បន្ន៕អត្ថបទ៖ ឈិត បូរ៉ាវី

ផលិតផលសក្តានុពលខ្មែរជាច្រើន ត្រូវបានដាក់តាំងបង្ហាញកម្មវិធីអបអរសាទរទិវាហ្វ្រង់កូហ្វូនី នៅប្រទេសជប៉ុន

ភ្នំពេញ៖ ផលិតផលសក្តានុពលខ្មែរសំខាន់ៗមួយចំនួន ដូចជា៖ អង្ករក្រអូបខ្មែរ គ្រាប់ស្វាយចន្ទីរ ម្រេចកំពត ដំណាប់ស្វាយ កាហ្វេមណ្ឌលគិរី ស្ករត្នោត ក្រម៉ាខ្មែរ និងវត្ថុអនុស្សាវរីយ៍ជាច្រើនទៀត ត្រូវបាននាំយកទៅដាក់តាំងបង្ហាញនៅក្នុងកម្មវិធីអបអរសាទរទិវាហ្វ្រង់កូហ្វូនី (Journée de la Francophonie) ដែលរៀបចំឡើងដោយក្រុមប្រឹក្សាលើកតម្កើងហ្វ្រង់កូហ្វូនីនៅប្រទេសជប៉ុន (Conseil pour la Promotion de la Francophonie au Japon) នៅវិទ្យាស្ថានភាសាបារាំង នៃទីក្រុងតូក្យូ។ យោងតាមក្រសួងពាណិជ្ជកម្មកម្ពុជា បានឲ្យដឹងលើផេកផ្លូវការ នាថ្ងៃទី១៧ ខែមីនានេះថា ព្រឹត្តិការណ៍នេះ មានរៀបចំនូវកម្មវិធីតាំងពិព័រណ៍ ការប្រគុំតន្ត្រី ការចាក់បញ្ចាំងភាពយន្ត និងសកម្មភាពជំរុញពាណិជ្ជកម្មជាច្រើនទៀត ក្នុងគោលបំណងដើម្បីពង្រឹងមិត្តភាពនិងកិច្ចសហប្រតិបត្តិការរវាងបណ្តាប្រទេសដែលប្រើប្រាស់ភាសាបារាំង ព្រមទាំងផ្សព្វផ្សាយអំពីវប្បធម៌ ទេសចរណ៍ និងសក្កានុពលវិនិយោគ ដោយមានការចូលរួមពីប្រទេសប្រើប្រាស់ភាសាបារាំង ចំនួន ១៩ប្រទេស។សូមជំរាបជូនថា ប្រទេសកម្ពុជា នឹងធ្វើជាម្ចាស់ផ្ទះកិច្ចប្រជុំកំពូលហ្វ្រង់កូហ្វូនី លើកទី២០ នៅឆ្នាំ២០២៦ ហើយក្នុងអំឡុងពិព័រណ៍ពិភពលោក ២០២៥ អូសាកា ខាងមុខនេះ ពន្លាជាតិកម្ពុជា ក៏នឹងចូលរួមក្នុងសកម្មភាពផ្សព្វផ្សាយនានា ដើម្បីលើកតម្កើងហ្វ្រង់កូហ្វូនី តាមការស្នើសុំរបស់អង្គការអន្តរជាតិហ្វ្រង់កូហ្វូនី (OIF) ផងដែរ៕

បណ្ដាញសង្គម

ព័ត៌មានថ្មីៗ

កូឡុំប៊ីយកឈ្នះកុងហ្គោ ១-០ ធានាកៅអីឡើងវគ្គ ៣២ ក្រុមចុងក្រោយ World Cup 2026

ក្រូអាស៊ីស្រោចស្រង់ក្តីសង្ឃឹមឡើងវគ្គ ៣២ ក្រុមក្រោយយកឈ្នះប៉ាណាម៉ា ១-០

តម្លៃផ្សារហ៊ុនសកលរង្គោះរង្គើ បន្ទាប់ពីការលក់ចេញភាគច្រើននាំមុខដោយក្រុមហ៊ុនបច្ចេកវិទ្យានិងបញ្ហាអាមេរិក-អ៊ីរ៉ង់

អង់គ្លេសធ្វើអ្វីហ្គាណាមិនចេញ ខណៈកៅអីវគ្គ ៣២ ក្រុមចុងក្រោយត្រូវរង់ចាំដល់ប្រកួតទីបី

នគរបាលដាក់បណ្ដឹងចោទប្រកាន់ពីបទឧក្រិដ្ឋប្រឆាំងជនបាញ់ប្រហារវ័យ១៥ ឆ្នាំនៅសាលាTacloban របស់ហ្វីលីពីន

ប្រធានាធិបតីអាមេរិក Donald Trump នឹងចូលរួមប្រគល់ពានរង្វាន់បាល់ទាត់ពិភពលោកនៅវគ្គផ្តាច់ព្រ័ត្រ

ទួរគី ឃុំខ្លួនមនុស្ស២០៩នាក់ ក្នុងការឆ្មក់បង្ក្រាបប្រឆាំងភេរវកម្ម ខណៈសន្តិសុខត្រូវបានរឹតបន្តឹងមុនកិច្ចប្រជុំណាតូ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877