BTV NEWS

សល់តែ៦ថ្ងៃទៀតប៉ុណ្ណោះ សម្រាប់ «យុទ្ធនាការ ១ម៉ឺនរៀល ១ម៉ឺននាក់ ឆ្នាំ២០២៦» របស់មូលនិធិគន្ធបុប្ផាកម្ពុជា, សូមចូលរួមបរិច្ចាគ ដើម្បីមន្ទីរពេទ្យគន្ធបុប្ផា អាចបន្តបេសកកម្មសង្រ្គោះជីវិតទារក និងកុមារនៅកម្ពុជា

កម្ពុជាសង្កត់ធ្ងន់ពីសារៈសំខាន់នៃការអនុវត្តសេចក្តីសម្រេចចិត្តរបស់ក្រុមប្រឹក្សាសន្តិសុខ និងការមិនអាចរំលោភបំពានបានលើសាលដីការបស់តុលាការយុត្តិធម៌អន្តរជាតិ

រដ្ឋមន្រ្តីក្រសួងបរិស្ថានគាំទ្រយ៉ាងពេញទំហឹង ចំពោះគម្រោងវិនិយោគ ដែលជួយដល់នរន្តរភាពបរិស្ថាននៅកម្ពុជា

សម្តេចតេជោ ហ៊ុន សែន នឹងបំពេញទស្សនកិច្ចមិត្តភាពផ្លូវការនៅប្រទេសចិនរយៈពេលបីថ្ងៃចាប់ពីថ្ងៃទី២៥ដល់២៧ ខែមិថុនាខាងមុខនេះ

ព័ត៌មានជាតិ

ក្រុមការងារក្រសួងធនធានទឹក ចុះពិនិត្យផលប៉ះពាល់គម្រោងសាងសង់ទំនប់ទប់ទឹកប្រៃ នៅភូមិសាស្រ្តឃុំថ្មស

ក្រុមការងារក្រសួងធនធានទឹក និងឧតុនិយម សហការជាមួយរដ្ឋបាលខេត្តកោះកុង បានចុះត្រួតពិនិត្យរួមគ្នាពីផលប៉ះពាល់ពីគម្រោងស្ថាបនាទំនប់ទប់ទឹកប្រៃប្រវែង១០គីឡូម៉ែត្រ នៅភូមិសាស្រ្តឃុំថ្មស ស្រុកបូទុមសាគរ។ក្រុមការងារបច្ចេកទេសក្រសួងធនធានទឹក និងឧតុនិយម បានជួបពិភាក្សាគ្នារវាងរដ្ឋបាលខេត្តកោះកុង មន្ទីរជំនាញពាក់ព័ន្ធ និងអាជ្ញាធរមូលដ្ឋានស្រុកបូទូមសាគរ អំពីគម្រោងសាងសង់ទំនប់ទប់ទឹកប្រៃស្ថិតនៅភូមិចំការលើ និងភូមិស្រែថ្មី មុននឹងដំណើរការស្ថាបនាជាផ្លូវការ។ឯកឧត្តម ឈុន ពុធថារិទ្ធ អគ្គនាយកនៃអគ្គនាយកនាយកដ្ឋានកិច្ចការបច្ចេកទេសនៃក្រសួងធនធានទឹក និងឧតុនិយម បានឱ្យដឹងនៅថ្ងៃទី១៥ ខែមីនា ឆ្នាំ២០២៥ថា ក្រុមការងារជំនាញកំពុងសម្របសម្រួលអំពីផលប៉ះពាល់នានាជាមួយមន្ទីរបរិស្ថាន និងរដ្ឋបាលឃុំថ្មស និងសុំគោលការណ៍បន្ថែមពីរដ្ឋបាលខេត្តកោះកុង ដើម្បីរកច្រកចេញសម្រាប់សាងសង់ទំនប់ការពារទឹកប្រៃ១ខ្សែខាងលើនេះ ដោយមានប្រវែង១០គីឡូម៉ែត្រ ទទឹង៤ម៉ែត្រ កម្ពស់១ម៉ែត្រកន្លះ។ឯកឧត្តម ឈុន ពុធថារិទ្ធ គូសបញ្ជាក់ទៀតថា ទំនប់ការពារទឹកប្រៃនេះដែរ នឹងជួយការពារទឹកសមុទ្រមិនឱ្យជោរលិចដីស្រែបង្កបង្កើនផលរបស់ប្រជាពលរដ្ឋ និងជាទំនប់ស្ទាក់ទឹកសាបទុកសម្រាប់ប្រជាពលរដ្ឋប្រើប្រាស់។ ខណៈខ្នងទំនប់ដើរតួនាទីយ៉ាងសំខាន់ជាផ្លូវគមនាគមន៍សម្រាប់ប្រជាពលរដ្ឋធ្វើដំណើរឆ្លងកាត់ពីភូមិមួយទៅភូមិមួយ និងដឹកជញ្ជូនផលិតផលកសិកម្ម ព្រមទាំងជាតំបន់ទេសចរណ៍ដ៏ទាក់ទាញក្នុងតំបន់ផងដែរ។ដោយឡែកសម្រាប់ប្រជាពលរដ្ឋរស់នៅក្នុងភូមិចំការលើ និងភូមិស្រែថ្មី បាននាំគ្នាបង្ហាញការសាទរដោយពួកគាត់ចង់បានទំនប់ទប់ទឹកប្រៃនេះយូរឆ្នាំមកហើយ ដើម្បីផ្តល់លទ្ធភាពការបង្កបង្កើនផលស្រូវ គ្រាឆ្នាំៗមិនពុំអាចធ្វើស្រែស្រូវបានទេ ព្រោះតែទឹកប្រៃហូរចូល។គួរជម្រាបថា ទំនប់ការពារទឹកប្រៃចំការលើនេះ ជាទំនប់ចាស់តាំងពីឆ្នាំ១៩៦៨ ហើយត្រូវបានអាជ្ញាធរឃុំថ្មស និងប្រជាពលរដ្ឋ ស្នើសុំកាលពីឆ្នាំ២០២០ មកម្ល៉េះ ប៉ុន្តែទើបទទួលបានការសម្រេចពីក្រសួងសេដ្ឋកិច្ច និងហិរញ្ញវត្ថុ នៅឆ្នាំ២០២៥៕

កម្ពុជា រៀបចំព្រឹត្ដិការណ៍ សម្ដែងសិល្បៈអន្ដរជាតិ សៀមរាបអង្គរលើកកម្ពស់វិស័យសិល្បៈកម្ពុជា

ក្រសួងទេសចរណ៍ និងក្រសួងវប្បធម៌ និងវិចិត្រសិល្បៈ និងអាជ្ញាធរខេត្ដសៀមរាប បានសហការគ្នារៀបចំព្រឹត្ដិការណ៍ សម្ដែងសិល្បៈអន្ដរជាតិ សៀមរាបអង្គរ ដើម្បីលើកកម្ពស់វិស័យសិល្បៈកម្ពុជា ផ្លាស់ប្តូរវប្បធម៌ អរិយធម៌ ពង្រឹងទំនាក់ទំនងចំណងមិត្តភាពរវាងកម្ពុជា និងអន្តរជាតិ។ព្រឹត្ដិការណ៍នេះ ធ្វើឡើងនៅរាត្រីថ្ងៃទី១៥ខែមីនាឆ្នាំ២០២៥នៅសួនក្បែព្រះរាជដំណាក់ក្រុងសៀមរាប។ឯកឧត្ដម ហួត ហាក់ រដ្ឋមន្ដ្រីក្រសួងទេសចរណ៍ បានថ្លែងថា «ព្រឹតិ្តការណ៍សម្តែងសិល្បៈអន្តរជាតិ សៀមរាប-អង្គរ»បង្ហាញអំពីសិល្បៈអរូបីយ ស្របជាមួយជំនាញ ចំណេះដឹងហត្ថកម្ម ដោយបានសំដែងចេញជាតម្លៃពិតរបស់វប្បធម៌ជាតិ បញ្ចេញជាសោភណភាព នៃគំនិតច្នៃប្រឌិត និងទេពកោសល្យរបស់សិល្បករ-សិល្បការិនីគ្រប់ៗរូប អំពីអត្ថន័យ សីលធម៌ គុណធម៌ គតិធម៌ និងឧត្តមគតិ ដែលមានលក្ខណៈពិសេស ប្រកបដោយអត្តសញ្ញាណភាពជាតិ សម្រាប់ប្រជាជាតិនីមួយៗយ៉ាងពិតប្រាកដ។ឯកឧត្ដមបន្ដថា ការសម្តែងសិល្បៈអន្តរជាតិនេះ មានការរួមបញ្ចូលទម្រង់សិល្បៈបុរាណ និងអន្តរជាតិ ដើម្បីលើកកម្ពស់គុណតម្លៃនៃសិល្បៈវប្បធម៌ផ្សារភ្ជាប់ទេសចរណ៍ ដែលបង្កើតបានជាផលិតផលទេសចរណ៍ដ៏ទាក់ទាញ និងបានរួមចំណែកដល់ការអភិវឌ្ឍប្រកបដោយចីរភាព និងជាកាលានុវត្តភាពសម្រាប់វិស័យទេសចរណ៍ ប្រកបដោយភាពពេញចិត្តដល់ទេសចរគ្រប់រូប។ ជាមួយគ្នានេះ ព្រឹតិ្តការណ៍នេះ ក៏ជាការចូលរួមចំណែកផ្សព្វផ្សាយទីផ្សារទេសចរណ៍ដ៏សំខាន់ និងជាការពាំនាំ ចែករំលែកអំពីវប្បធម៌ អត្តសញ្ញាណ និងការរស់នៅក្នុងតំបន់ទៅកាន់ ទេសចរជាតិ និងអន្តរជាតិ ដែលមិនត្រឹមតែចូលរួមទាក់ទាញភ្ញៀវទេសចរ ប៉ុណ្ណោះទេ ថែមទាំងចូលរួមជំរុញការបង្កើតថ្មី សហគ្រិនភាព និងភាពច្នៃប្រឌិតលើផ្នែកសិល្បៈផងដែរ។ បន្ថែមលើពីនេះ ការរៀបចំព្រឹត្តិការណ៍នេះឡើង ដើម្បីលើកកម្ពស់វិស័យសិល្បៈកម្ពុជា ផ្លាស់ប្តូរវប្បធម៌ អរិយធម៌ ពង្រឹងទំនាក់ទំនងចំណងមិត្តភាពរវាងកម្ពុជា និងអន្តរជាតិ ក្នុងកិច្ចសហប្រតិបត្តិការល្អនៃវិស័យទេសចរណ៍រវាងផ្នែករដ្ឋ-ឯកជន និងផ្សព្វផ្សាយពីសក្តានុពលទេសចរណ៍ដ៏សម្បូរបែបរបស់កម្ពុជា ឱ្យកាន់តែទូលំទូលាយទៅកាន់ភ្ញៀវទេសចរទាំងជាតិ-អន្តរជាតិ ជាពិសេសមកទស្សនាគោលដៅទេសចរណ៍ក្នុងខេត្តសៀមរាប និងជំរុញចលនាការផ្លាស់ប្តូររវាងប្រជាជន និងប្រជាជន ការផ្សារភ្ជាប់សិល្បៈ វប្បធម៌ ប្រពៃណី សំដៅទាក់ទាញទេសចរ និងវិនិយោគិនអន្តរជាតិឱ្យមកទស្សនា និងវិនិយោគនៅកម្ពុជាកាន់តែច្រើនថែមទៀត។តាមរយៈព្រឹត្ដិការណ៍នេះ នឹងអាចផ្សព្វផ្សាយកាន់តែទូលំទូលាយនូវវប្បធម៌ អរិយធម៌ ប្រពៃណី និងសក្តានុពលទេសចរណ៍ដ៏សម្បូរបែប ទៅកាន់ប្រជាជនកម្ពុជា និងប្រជាជននៅទូទាំងពិភពលោក។លោក ង៉ូវ សេងកាក់ អភិបាលរងខេត្ដសៀមរាប មានប្រសាសន៍ដឹងគុណសម្តេចធិបតី ហ៊ុន ម៉ាណែត នាយករដ្ឋមន្ត្រី ដែលបានគិតគូរជាយុទ្ធសាស្ត្រសម្រាប់វិស័យទេសចរណ៍កម្ពុជា ក៏ដូចជាខេត្តសៀមរាប តាមរយៈការដាក់ចេញនូវយុទ្ធនាការ "ទស្សនាខេត្តសៀមរាបឆ្នាំ២០២៤" នាពេលកន្លងមក។ ជាក់ស្ដែងការសម្តែងគុនសៅលីញ-ល្បុក្កតោនៅអង្គរ បុណ្យទន្លេ ពិព័រណ៌ម្ហូបអាហារកម្ពុជា-ចិន ពិព័រណ៌ទេសចរណ៍កម្ពុជា-ចិន និងព្រឹត្តិការណ៍ Gumball 3000 ជាដើម។ លោកបន្ថែមថា ព្រឹត្តិការណ៍នេះ ត្រូវបានរៀបចំឡើង សំដៅជំរុញការផ្សព្វផ្សាយគោលដៅទេសចរណ៍ខេត្តសៀមរាប ឱ្យកាន់តែទូលំទូលាយទៅកាន់ទីផ្សារអន្តរជាតិ ក្នុងន័យចូលរួមចំណែកលើកកម្ពស់ប្រពៃណី វប្បធម៌ អរិយធម៌ខ្មែរ ក៏ដូចជាផ្សព្វផ្សាយពីសក្តានុពលធនធានវប្បធម៌ ប្រវត្តិសាស្រ្ត និងធនធានធម្មជាតិទៅកាន់ពិភពលោក ដើម្បីជំរុញឱ្យមានការរីកចម្រើននូវវិស័យទេសចរណ៍ក្នុងខេត្តសៀមរាប ក៏ដូចជាវិស័យទេសចរណ៍ទូទាំងព្រះរាជាណាចក្រកម្ពុជា៕

រដ្ឋបាលខេត្តកំពត អំពាវនាវឱ្យពលរដ្ឋមកពិនិត្យទិន្នន័យក្បាលដីរបស់ខ្លួន ឱ្យច្បាស់លាស់

អភិបាលខេត្តកំពត បានអំពាវនាវ ឱ្យពលរដ្ឋដែលមានដី នៅក្នុងតំបន់បិទផ្សាយ ត្រូវទៅត្រួតពិនិត្យផ្ទៀងផ្ទាត់ទិន្នន័យក្បាលដីរបស់ខ្លួន ឱ្យបានច្បាស់លាស់ ក្នុងរយៈពេល១៥ថ្ងៃ ដើម្បីជៀសវាងកំហុសណាមួយកើតឡើង ជាយថាហេតុ ចំពោះបណ្ណកម្មសិទ្ធិដីធ្លីរបស់ខ្លួន។នៅព្រឹកថ្ងៃទី១៥ ខែមីនា ឆ្នាំ២០២៥ ឯកឧត្តម ម៉ៅ ធនិន អភិបាលខេត្តកំពត បានអញ្ជើញជាអធិបតីក្នុងពិធីចែកវិញ្ញាបនបត្រសម្គាល់ម្ចាស់អចលនវត្ថុ ចំនួន ១ភូមិ និងប្រកាសបិទផ្សាយជាធារណៈនូវឯកសារ នៃការវិនិច្ឆ័យ ចំនួន២ ភូមិ ក្នុងស្រុកដងទង់ ដែលពិធីនេះធ្វើឡើងក្នុងបរិវេណវត្តទ្វេរសិក្ខារតនារាម ស្ថិតនៅភូមិព្រៃឃ្មុំ ឃុំខ្ចាយខាងជើង ស្រុកដងទង់ ខេត្តកំពត។នាឱកាសនោះ ឯកឧត្តម ម៉ៅ ធនិន អភិបាលខេត្តកំពត បានលើកឡើងថា ដោយអនុវត្តតាមគោលនយោបាយដីធ្លីរបស់រាជរដ្ឋាភិបាល ក៏ដូចជាដើម្បីឈានទៅសម្រេចបាននូវគោលនយោបាយដីធ្លីដែលបានដាក់ចេញដោយរាជរដ្ឋាភិបាល កាត់បន្ថយទំនាស់ដីធ្លី និងឱ្យប្រជាពលរដ្ឋកាន់កាប់ដីធ្លីដោយស្របច្បាប់ អាជ្ញាធរខេត្តកំពត មន្ទីរជំនាញ រួមនឹងអាជ្ញាធរគ្រប់មូលដ្ឋាន បាននិងកំពុងសហការគ្នាយ៉ាងសស្រាក់សស្រាំក្នុងការចុះវាស់វែងដី ដើម្បីចុះបញ្ជីមានលក្ខណៈជាប្រព័ន្ធ និងពន្លឿនឱ្យការចេញបណ្ណកម្មសិទ្ធិជូនបងប្អូនប្រជាពលរដ្ឋបានលឿនបំផុត។ ឯកឧត្តមអភិបាលខេត្ត ក៏បានអំពាវនាវផ្តាំផ្ញើដល់ម្ចាស់ដី ឬប្រជាពលរដ្ឋដែលរស់នៅក្នុងភូមិដែលបានបិទផ្សាយទិន្នន័យជាសាធារណៈនូវឯកសារនៃការវិនិច្ឆ័យទាំងអស់ ត្រូវមកពិនិត្យផ្ទៀងផ្ទាត់ទិន្នន័យក្បាលដីរបស់ខ្លួនឲ្យបានច្បាស់លាស់ ដូចជាផ្ទៃក្រឡា ព្រំដី ឈ្មោះម្ចាស់កម្មសិទ្ធិ ប្រភេទទ្រព្យ ប្រភពនៃការកាន់កាប់ ទីកន្លែងកំណើត និងថ្ងៃខែឆ្នាំកំណើតជាដើម ។ល។ ដើម្បីជៀសវាងមានកំហុសពេលចេញបណ្ណ ព្រោះរយៈពេលនៃការតវ៉ាមានត្រឹមតែ ១៥ថ្ងៃប៉ុណ្ណោះចាប់ពីថ្ងៃបិទផ្សាយតទៅ ដោយពុំគិតពីថ្ងៃឈប់សម្រាក។លោក ព្រាប សុផាត ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តកំពតបានឱ្យដឹងថា ក្នុងថ្ងៃនេះរដ្ឋបាលខេត្តបានចែកវិញ្ញាបនបត្រសម្គាល់ម្ចាស់អចលនវត្ថុចំនួន ១ភូមិ ដែលមានក្បាលដី សរុបចំនួន១.៨៥៤ ក្បាលដី ស្មើនឹង ៩៩៤ គ្រួសារ និងប្រកាសបិទផ្សាយជាធារណៈនូវឯកសារ នៃការវិនិច្ឆ័យ ចំនួន២ភូមិស្ថិតក្នុងឃុំខាយខាងត្បូង ស្រុកដងទង់ ÷ ក្នុងនោះភូមិឈ្លីតលើ មានក្បាលដីសុរុបចំនួន ១.៨០២ ក្បាលដី ស្មើនឹង ៨៦០ គ្រួសារ, ភូមិត្រពាំងអណ្តូង មានក្បាលដីសុរុបចំនួន ១.៤៥០ ក្បាលដី ស្មើនឹង ៧៨២ គ្រួសារ៕

សម្ដេចធិបតីនាយករដ្ឋមន្រ្ដី៖ ផ្លូវថ្មើរជើង (Walk Street) ភ្នំពេញបាន និងកំពុងទទួលបានការចាប់អារម្មណ៍យ៉ាងខ្លាំងពីប្រជាពលរដ្ឋ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នៅថ្ងៃទី១៦ ខែមីនា ឆ្នាំ ២០២៥នេះ បានបញ្ជាក់ថា ផ្លូវថ្មើរជើង (Walk Street) ភ្នំពេញបាននិងកំពុងទទួលបានការចាប់អារម្មណ៍យ៉ាងខ្លាំងពីប្រជាពលរដ្ឋ ជាពិសេស ប្រជាពលរដ្ឋដែលរស់នៅក្នុងរាជធានីភ្នំពេញ។ សម្ដេចនាយករដ្ឋមន្រ្ដី បានបញ្ជាក់ថា ពីមួយសប្ដាហ៍ ទៅមួយសប្ដាហ៍ រដ្ឋបាលរាជធានីភ្នំពេញតែងរៀបចំមានការសម្ដែងសិល្បៈបុរាណ ប្រពៃណី សម័យ បណ្ណាល័យចល័ត កន្លែងលក់ដូរ និងកន្លែងកម្សាន្តសប្បាយផ្សេងៗ ខុសៗពីគ្នាជារៀងរាល់សប្ដាហ៍ ជាក់ស្ដែង នៅសប្ដាហ៍ទី២ ខែមីនា នេះ បានរៀបចំឱ្យមានល្ខោនខោល ដកស្រង់ឈុតមួយក្នុងរឿង ចម្បាំងកុម្ភការ នៅក្នុងរាត្រីថ្ងៃសៅរ៍ ហើយសម្រាប់ថ្ងៃអាទិត្យ នឹងមានរបាំប្រពៃណី របាំវាយក្រាប ដើម្បីឱ្យបងប្អូនប្រជាពលរដ្ឋ និងភ្ញៀវទេសចរបរទេស បានទស្សនាយល់ដឹងកាន់តែច្បាស់ពី របាំប្រពៃណីរបស់ដូនតាខ្មែរយើង ។ សូមជម្រាបថា ផ្លូវថ្មើរជើង (Walk Street) ត្រូវបានរដ្ឋបាលរាជធានីភ្នំពេញដាក់ឱ្យដំណើរការសាកល្បង២ថ្ងៃ ក្នុង១សប្ដាហ៍គឺថ្ងៃសៅរ៍ និងថ្ងៃអាទិត្យ ចាប់ពីម៉ោង៦ល្ងាចដល់ម៉ោង១១យប់ នៅតាមបណ្តោយតីរវិថីព្រះស៊ីសុវត្ថិ ចាប់ពីវិថីបក្សីចាំក្រុង (ផ្លូវលេខ៩៤) រហូតដល់មុខព្រះបរមរាជវាំង ហើយចាប់តាំងពីថ្ងៃដាក់ឱ្យសាកល្បងលើកដំបូង រហូតមកដល់ពេលនេះ គឺរក្សាបាននូវ សន្តិសុខ សុវត្ថិភាព សណ្ដាប់ធ្នាប់ល្អ ដោយប្រជាពលរដ្ឋ មិនមានបញ្ហាអ្វីទាំងអស់ រាប់ទាំងអ្នកធ្វើមុខរបរអាជីវកម្ម ក៏ដូចជាប្រជាពលរដ្ឋ ដែលធ្វើដំណើរកម្សាន្ត៕

ខេត្តបន្ទាយមានជ័យ ដង្ហែរក្បួនទទួលជ័យលាភីផ្តល់សេវាសាធារណៈគំរូថ្នាក់ជាតិវិស័យអប់រំ និងសុខាភិបាល

នៅព្រឹកថ្ថៃទី១៥មីនាឆ្នាំ២០២៥នេះ រដ្ឋបាលខេត្តបន្ទាយមានជ័យ បានរៀបចំពិធីអបអរសាទរ និងដង្ហែរក្បួនការទទួលបានជ័យលាភីការផ្តល់សេវាសាធារណះគំរូថ្នាក់ជាតិលើវិស័យអប់រំ និងវិស័យសុខាភិបាល ។ ពិធីនេះបានប្រព្រឹត្តិទៅក្រោមវត្តមានចូលរួមពីឯកឧត្តម អុំ រាត្រី អភិបាលខេត្តបន្ទាយមានជ័យ រួមទាំងមន្រ្តីរាជការ និងលោកគ្រូអ្នកគ្រូសិស្សនិស្សិត ចូលរួមយ៉ាងច្រើនកុះករផងដែរ ។ក្នុងពិធីនោះដែរឯកឧត្ដម អុំ រាត្រី អភិបាលនៃគណៈអភិបាលខេត្តបន្ទាយមានជ័យ បានសម្តែងនូវការកោតសរសើរចំពោះការខិតខំប្រឹងប្រែង ដើម្បីទទួលបានជ័យលាភីរបស់អង្គភាពទាំង៦ នេះជាការទទួលបានជោគជ័យរបស់ខេត្ត ដែលមានអង្គភាពទាំង៦ ទទួលជ័យលាភី ក្នុងការផ្តល់សេវាសាធារណៈគំរូ ថ្នាក់ជាតិធ្វើការប្រកួតប្រជែងទទួលបានចំណាត់ថ្នាក់ល្អ នៅទូទាំង ប្រទេសនោះ។ឯកឧត្ដម បន្តថា កត្តាទាំងអស់នេះហើយគឺជាមោតនភាពមួយរបស់ខេត្តបន្ទាយមានជ័យ ក្នុងនោះមានវិស័យអប់រំ ចំនួន២ រួមមាន សាលាមត្តេយ្យសិក្សា ធនធានកកោះ ជាប់ចំណាត់ថ្នាក់ លេខ៤ និងសាលាមតេយ្យសិក្សា ធនធានគយម៉ែង ជាប់ចំណាត់ថ្នាក់លេខ៨ ។ ដោយឡែកចំពោះវិស័យសុខាភិបាល មាន ០៤អង្គភាព គឺ ១-មន្ទីរពេទ្យបង្អែកសិរីសោភ័ណ CPA1ជាប់ចំណាត់ថ្នាក់លេខ២, ២-មន្ទីរពេទ្យបង្អែកព្រះនេត្យព្រះ (CPA2) ជាប់ចំណាត់ ថ្នាក់លេខ៣Ç, ៣-មន្ទីរពេទ្យបង្អែកខេត្តមិត្តភាពកម្ពុជា ជប៉ុនមង្គលបូរី (CPA3) ជាប់ចំណាត់ថ្នាក់លេខ៦ និង៤-មន្ទីរពេទ្យ បង្អែកម៉ាឡៃសន្តិភាព (CPA1) ជាប់ចំណាត់ថ្នាក់លេខ ៧។ ឯកឧត្ដម បញ្ជាក់ថា ស្របពេលដែលយើងទទួលបានជ័យលាភីគំរូថ្នាក់ជាតិបានល្អប្រសើរ ដូច្នេះគប្បីត្រូវធ្វើការពង្រឹងគុណភាពវិស័យអប់រំ និងវិស័យសុខាភិបាលឲ្យកាន់តែមានភាពល្អប្រសើរបន្ថែមទៀតព្រោះថាវិស័យទាំងពីរនេះ គឺបានដើរតួរនាទីដ៏សំខាន់សម្រាប់សង្គមជាតិទៅថ្ងៃខាងមុខផងដែរ៕

ម្ចាស់អាជីវកម្មក្នុងវិស័យដឹកជញ្ជូនក្នុងប្រទេសកម្ពុជាកំពុងត្រៀមខ្លួនស្រូបយកឱកាសវិនិយោគ

ម្ចាស់ធ្វើអាជីវកម្មក្នុងវិស័យដឹកជញ្ជូនទាំងក្នុងនិងក្រៅស្រុក ជួបជុំផ្លាស់ប្តូរបទពិសោធន៍ និងការស្វែងរកដៃគូពាណិជ្ជកម្មលើវិស័យ ដឹកជញ្ជូន និងឡូជីស្ទិក ដើម្បីពង្រីងនិងពង្រីកវឌ្ឍនភាពរបស់ខ្លួនឱ្យកាន់តែប្រសើរ ស្របពេលសេដ្ឋកិច្ចកម្ពុជាក្នុងឆ្នាំ២០២៥នេះ ត្រូវបានរំពឹងថា នឹងមាននិន្នាការកើនឡើង។លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូននិងខ្សែច្រវាក់ផ្គត់ផ្គង់នៅកម្ពុជា ថ្លែងលើកឡើងនៅក្នុងសន្និបាត និងជំនួបម្ចាស់អាជីវកម្ម ឡូជីស្ទិក នាំចេញ-ចូល និងដឹកជញ្ជូន លើកទី៦ នៅល្ងាចថ្ងៃទី១៥ ខែមីនា ឆ្នាំ២០២៥ នេះថា ជុំវិញវិស័យ ដឹកជញ្ជូននេះ សម្រាប់កម្ពុជាបានចាប់ផ្តើមងើបឡើងវិញតាំងពីចុងឆ្នាំ២០២៣ គាំទ្រដោយកំណើននៃការស្រូបយកវិនិយោគិនមក បណ្តាក់ទុនជាបន្តបន្ទាប់ ជាពិសេសនៅក្នុងឆ្នាំ២០២៤ និងនៅដើមឆ្នាំ២០២៥ នេះជាដើម ដែលបង្ហាញឱ្យឃើញថា កម្ពុជានៅតែបន្ត ស្រូបយកសក្តានុពលវិនិយោគឥតឈប់ឈរ។លោកបន្តថា ស្របពេលពេលការរីកចម្រើនសេដ្ឋកិច្ចក្នុងស្រុកនេះ វិស័យដឹកជញ្ជូនក៏បានងើបឡើងគួកត់សម្គាល់ បច្ចុប្បន្ន កំពុងមានសកម្មភាពមមាញឹក ជាពិសេសការដឹកជញ្ជូនទំនិញក្នុងស្រុក និងការដឹកជញ្ជូនបម្រើទីផ្សារនាំចេញជាដើម ខណៈការនាំ ចេញរបស់កម្ពុជា បាននិងកំពុងបង្ហាញនូវនិន្នាការកើនឡើងយ៉ាងល្អប្រសើរ។ ដូច្នេះការជួបជុំស្វែងរកដៃគូពាណិជ្ជកម្ម ក៏ដូចជា វិនិយោគនេះ ពិតជាមាឋសារៈសំខាន់ ដើម្បីគាំទ្រដល់វិស័យដឹកជញ្ជូនក្នុងស្រុក និងកំណើនសេដ្ឋកិច្ចជាតិផងដែរ។ សូមបញ្ជាក់ថា នៅក្នុងឆ្នាំ ២០២៥ នេះ រាជរដ្ឋាភិបាលរំពឹងថា វិស័យសេវាកម្ម នឹងបន្តនិន្នាការកើនឡើងល្អ ក្នុងកំណើន ៥,៦ ភាគរយ ដោយសារការងើបឡើងវិញនៃសកម្មភាពសេដ្ឋកិច្ចក្នុងស្រុក ជាពិសេសអនុវិស័យសណ្ឋាគារ និងភោជនីយដ្ឋាន និងសេវាកម្មទេសចរ ក៏ដូចជាអនុវិស័យដឹកជញ្ជូន និងស្តុក ក៏ត្រូវបានរំពឹងថា នឹងមានកំណើនរឹងមាំ ដោយមានសកម្មភាពដឹកជញ្ជូនកាន់តែមមាញឹក។ ទន្ទឹមនឹងនេះ ការដាក់ចេញនូវចក្ខុវិស័យក្នុងការអភិវឌ្ឍហេដ្ឋរចនាសម្ព័ន្ធដឹកជញ្ជូនរួមមាន៖ ផ្លូវអាកាស ផ្លូវទឹក និងផ្លូវគោក តាមរយៈ នៃការដាក់ចេញផែនការមេគ្រប់ជ្រុងជ្រោយ ស្តីពីការដឹកជញ្ជូនអន្តរមធ្យោបាយនិងភស្តុភាកម្មកម្ពុជា ២០២៣-២០៣៣ បានដើរតួ យ៉ាងសំខាន់លើការជំរុញនៃកំណើនអនុវិស័យនេះ៕អត្ថបទ៖ សុន រ៉ាឌី,

យុវសិស្សសាលារៀនសុវណ្ណភូមិ ឈ្នះពានរង្វាន់ និងដំណើរទស្សនកិច្ចទៅប្រទេសអូស្ត្រាលី

ជាមោទនភាពសម្រាប់សាលារៀនសុវណ្ណភូមិ ម៉ាន់ សុផារាជ យុវសិស្សថ្នាក់ទី១២ នៃសាលារៀនសុវណ្ណភូមិ សាខា ពោធិ៍ចិនតុងទី២ កំពុងចេញដំណើរទៅទីក្រុងស៊ីដនី ប្រទេសអូស្ត្រាលី បន្ទាប់ពីឈ្នះពានរង្វាន់ជាជ័យលាភីប្រចាំ តំបន់ នៅក្នុងការប្រកួតប្រជែង Unlock Your Unlimited Future ដែលរៀបចំឡើងដោយ សាកលវិទ្យាល័យ វ៉េសស្ទើន ស៊ីដនី (Western Sydney) នៃប្រទេសអូស្ត្រាលី។នាថ្ងៃទី១០ ខែកុម្ភៈ ឆ្នាំ២០២៥ វីដេអូដ៏មានអត្ថន័យ និងបង្កប់ទស្សនៈពីការធ្វើទំនើបកម្មកសិកម្ម និងឧស្សាហ៍កម្ម និងការសម្រួលការរស់នៅរបស់ប្រជាកសិករក្នុងតំបន់ ដែលស្របតាមគោលដៅអភិវឌ្ឍន៍ប្រកបដោយចីរភាពរបស់អង្គការសហប្រជាជាតិ ត្រូវបានជ្រើសរើសជាវីដេអូលេចធ្លោជាងគេ ជាពិសេសសុផារាជក៏ទទួលបានការកោត សរសើរលើសមត្ថភាព និងចក្ខុវិស័យដ៏ពិសេសពីសាកលវិទ្យាធិការងនៃសាកលវិទ្យាល័យ Western Sydney។មានត្រឹមតែទូរស័ព្ទទំនើបមួយគ្រឿង ជាមួយនឹងក្តីសុបិន្តដ៏ច្បាស់លាស់មួយ សុផារាជ អាចសម្រេចបានក្តីស្រមៃ និង ឆ្លុះបញ្ចាំងឱ្យឃើញថាភាពច្នៃប្រឌិត គឺគ្មានដែនកំណត់ មិនកំណត់ដោយស្តង់ដាណាមួយ ប៉ុន្តែអាស្រ័យលើសមត្ថភាព ឆន្ទៈ និងចក្ខុវិស័យច្បាស់លាស់។ក្នុងនាមជាជ័យលាភី សុផារាជនឹងធ្វើដំណើរទៅកាន់ប្រទេសអូស្ត្រាលីរយៈពេល ៤យប់ ៥ថ្ងៃ ដោយមានលោកឪពុក របស់គាត់រួមដំណើរជាមួយផងដែរ។ មុននឹងចាកចេញ សុផារាជ បានបង្ហាញពីអារម្មណ៍រីករាយ និងមោទនភាព ដោយមិនធ្លាប់នឹកស្មានដល់ថា ការចាប់ផ្តើមដ៏សាមញ្ញមួយ ប្រើប្រាស់ឧបករណ៍ធម្មតាមួយ អាចនាំខ្លួន និងគ្រួសារទៅដល់ប្រទេសអូស្ត្រាលីបានទេ។សាលារៀនសុវណ្ណភូមិ បានលើកឡើងថា សមិទ្ធផលដ៏មានកិត្តិយសនេះ មិនត្រឹមតែជាការទទួលស្គាល់ពីភាពឆ្នើម និងអស្ចារ្យរបស់ សុផារាជ តែម្នាក់ឯងប៉ុណ្ណោះទេ ប៉ុន្តែក៏បានបំភ្លឺឱ្យឃើញពីគុណភាពអប់រំ និងទេពកោសល្យរបស់សិស្សានុសិស្សនៃសាលារៀនសុវណ្ណភូមិផងដែរ។ គណៈគ្រប់គ្រង នៃសាលារៀនសុវណ្ណភូមិទាំងអស់ បានចូលរួមអបអរសាទរនូវសមិទ្ធផលដ៏អស្ចារ្យនេះ។ ភាពជោគជ័យរបស់យុវជនរូបនេះ ក្លាយជាការលើកទឹកចិត្តដ៏ធំសម្រាប់សិស្សានុសិស្សផ្សេងៗទៀត ក្នុងការហ៊ានចូលរួម ហ៊ានប្រកួត និងអភិវឌ្ឍភាពច្នៃប្រឌិតខ្លួន៕ អត្ថបទ៖ ឈិត បូរ៉ាវី

កម្ពុជា-ចិនរួមគ្នាផ្សព្វផ្សាយពីវប្បធម៌ និងពង្រឹងទំនាក់ទំនងមិត្តភាពប្រជាជន និងប្រជាជនប្រទេសទាំងពីរ

ស្របតាមយុទ្ធសាស្រ្តអនុវត្តគម្រោង «គំនិតផ្តួចផ្តើមខ្សែក្រវ៉ាត់ និងផ្លូវ» ដើម្បីលើកកម្ពស់ការផ្លាស់ប្តូរវប្បធម៌ រវាងប្រទេសចិន និងកម្ពុជា សហព័ន្ធអ្នកវិនិយោគកម្ពុជា និងគណៈកម្មាធិការស្រុកសាភីងប៉ា បានរៀបចំព្រឹត្តិការណ៍ស៊ុបចិន ឆុងឈីង សាភីងប៉ា ៣៦០ នៅរាជធានីភ្នំពេញ ដែលមានការអញ្ជើញពីភ្ញៀវកិត្តិយសយ៉ាងច្រើនកុះករតំណាងស្ថានទូតចិនប្រចាំនៅកម្ពុជា និងក្រោមអធិបតីភាព ឯកឧត្តម លី ធុច ទេសរដ្ឋមន្ត្រី នៃព្រះរាជាណាចក្រកម្ពុជា ដើម្បីរួមគ្នាផ្សព្វផ្សាយពីវប្បធម៌ និងពង្រឹងទំនាក់ទំនងមិត្តភាពប្រជាជន និងប្រជាជនប្រទេសទាំងពីរ។អ្នកឧកញ៉ា លី ឃុនថៃ ប្រធានសមាគមសហព័ន្ធអ្នកវិនិយោគកម្ពុជា នៅក្នុងពិធីសម្ពោធស៊ុបចិន ឆុងឈីង សាភីងប៉ា ៣៦០ រសជាតិ កាលពីល្ងាចថ្ងៃទី១៤ មីនា ឆ្នាំ២០២៥កន្លងទៅ បានមានប្រសាសន៍ថា ព្រឹត្តិការណ៍នេះ រៀបចំឡើងក្នុងគោលបំណងផ្សព្វផ្សាយពីវប្បធម៌ និងពង្រឹងទំនាក់ទំនងមិត្តភាពនៃប្រជាជននិងប្រជាជន ប្រទេសនិងប្រទេស រវាងកម្ពុជា និងចិន បានកាន់តែជិតស្និទ្ធឡើងថែមទៀត។អ្នកឧកញ៉ា បានលើកឡើងបន្តថា ការផ្តួចផ្តើមរៀបចំកម្មវិធីនាពេលនេះ គឺជាសក្ខីភាពជាក់ស្តែងដែលបង្ហាញថា សមាគមសហព័ន្ធអ្នកវិនិយោគកម្ពុជា បានខិតខំបំពេញបេសកម្មរបស់ខ្លួនយ៉ាងសកម្ម ធ្វើយ៉ាងណាលើកកម្ពស់ផ្សព្វផ្សាយ និងទាក់ទាញវិនិយោគមកកម្ពុជា ដើម្បីរួមចំណែកជាមួយរាជរដ្ឋាភិបាលជំរុញការអភិវឌ្ឍសេដ្ឋកិច្ច។ អ្នកឧកញ៉ាបានបន្ថែមបាន វេទិកានេះដែរ ក៏ជាឱកាសដល់ភ្ញៀវជាតិ និងអន្តរជាតិជាច្រើន បានមកជួបគ្នា ស្គាល់គ្នា និងអាចឈានដល់ការបង្កើនការទំនាក់ទំនងពាណិជ្ជកម្ម និងការវិនិយោគរួមគ្នាផងដែរ។នៅចំពោះមុខអង្គពិធីនាឱកាសនេះ ឯកឧត្តម ទេសរដ្ឋមន្ត្រី លី ធុច បានមានប្រសាសន៍ថា ដូចដឹងស្រាប់ហើយថា កម្ពុជា និងចិន បានកសាងនូវទំនាក់ទំនងជាប្រវត្តិសាស្រ្តជាអមតៈពុំអាចកាត់ថ្លៃបាន ពោរពេញដោយភាពជិតស្និទ្ធិបំផុត និងមិនអាចបំបែកគ្នាបានជាមិត្តដែកថែប និងប្តេជ្ញាគៀកស្មាគ្នាកសាងសហគមវាសនាមួយជាមួយគ្នា។ ឯកឧត្តម បានបន្តទៀតថា អស់រយៈពេលប្រមាណ ៦៧ឆ្នាំ និងកម្រងកាទូតជាផ្លូវការ កម្ពុជា-ចិន បានពង្រឹងនិងពង្រីកនូវចំណងមិត្តភាពឲ្យកាន់តែស៊ីជម្រៅ កាន់តែជិតស្និទ្ធ កាន់តែរឹងមាំ ដើម្បីបម្រើឲ្យផលប្រយោជន៍នៃប្រជាជន និងប្រជាជាតិទាំងពីរ។ ដូចនេះ ការរៀបចំព្រឹត្តិការណ៍នាពេលនេះឡើង បានគូសបញ្ជាក់អំពីចំណងមិត្តភាពដ៏រឹងមាំ និងល្អប្រសើរឡើងបន្ថែមទៀតរបស់ប្រទេសទាំងពី។សូមបញ្ជាក់ថា ព្រឹតិ្តការណ៍ខាងលើនេះ គឺជាការនាំមកនូវបទពិសោធន៍នៃរសជាតិថ្មីដែលមិនធ្លាប់មានពីមុនមក និងមានតែមួយគត់នៅក្នុងរាជធានីភ្នំពេញ។ ព្រឹត្តិការណ៍នេះ ធ្វើឡើងដើម្បីលើកកម្ពស់ការផ្លាស់ប្តូរវប្បធម៌ រវាងប្រទេសចិន និងកម្ពុជា កាន់តែពិសេសទៀតនោះ ស៊ុបចិន ៣៦០ រសជាតិ នឹងរួមបញ្ចូលគ្នានូវធាតុផ្សំនៃទីក្រុងឆុងឈីង ដែលជារសជាតិនៃសាភីងប៉ា ព្រមទាំងទីផ្សារមរតកកម្មនៃវប្បធម៌អរូបីដ៏មានតម្លៃ និងកម្មវិធីសិល្បៈជាច្រើន ដែលនឹងជួយឱ្យប្រជាជនកម្ពុជា បានយល់ និងបានដឹងកាន់តែច្បាស់អំពីវប្បធម៌នៃទីក្រុងឆុងឈីង៕អត្ថបទ ឈិត បូរ៉ាវី

សម្ដេចធិបតីនាយករដ្ឋមន្រ្ដី ដាក់ចេញវិធានការទប់ស្កាត់ និងកាត់បន្ថយការបំពុលតំបន់ទឹកសាធារណៈ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នៅថ្ងៃទី១២ ខែមីនា ឆ្នាំ២០២៥នេះ បានដាក់ចេញ សារាចរ ស្តីពីវិធានការទប់ស្កាត់ និងកាត់បន្ថយការបំពុលតំបន់ទឹកសាធារណៈ ដើម្បីឆ្លើយតបទៅនឹងកំណើនសេដ្ឋកិច្ចជាតិក្នុងរយៈពេលជាង២ទសវត្សរ៍ចុងក្រោយនេះ។ តាមរយៈសារាចរ សម្ដេចធិបតីបានបញ្ជាក់ថា ទន្ទឹមនឹងការទទួលបាននូវកំណើនសេដ្ឋកិច្ចជាតិក្នុងរយៈពេលជាង២ទសវត្សរ៍ចុងក្រោយនេះ រាជរដ្ឋាភិបាលតែងបានយកចិត្តទុកដាក់ខ្ពស់លើការទប់ស្កាត់ការបំពុលបរិស្ថាន និងផលប៉ះពាល់សុខភាព សាធារណៈ ដែលអាចកើតចេញពីសកម្មភាពអភិវឌ្ឍន៍សេដ្ឋកិច្ចជាតិ។ ជាក់ស្តែងនៅក្នុងកម្មវិធីនយោបាយ របស់រាជរដ្ឋាភិបាលនីតិកាលទី៧ នៃរដ្ឋសភា ឆ្នាំ២០២៣-២០២៨ បានចាត់ទុកការកែទម្រង់ការគ្រប់គ្រង បរិស្ថាននិងធនធានធម្មជាតិ ជាការងារអាទិភាព។ ក្នុងនោះការងារតាមដាន ត្រួតពិនិត្យការបំពុលទឹក និងការទប់ស្កាត់ការសាយភាយសារធាតុពុលចូលក្នុងបរិស្ថាន ក៏ត្រូវបានដាក់បញ្ចូលជាផែនការសកម្មភាពនៃ កម្មវិធីនយោបាយ សំដៅធានាបាននូវការគាំទ្រដល់ការអភិវឌ្ឍ និងការប្រើប្រាស់ប្រកបដោយចីរភាព ការការពារសុខភាពសាធារណៈនិងជីវៈចម្រុះ។សម្ដេចធិបតី បានបញ្ជាក់នៅក្នុង សារាចរថា កន្លងមក រាជរដ្ឋាភិបាលបានសង្កេតឃើញថា ទោះបីជាមានបញ្ញត្តិវិធានការគ្រប់គ្រងនិងត្រួតពិនិត្យ ការបំពុលទឹក ប្រភពទឹកសាធារណៈ បានចែងនៅក្នុងច្បាប់ឬលិខិតបទដ្ឋានគតិយុត្តពាក់ព័ន្ធមួយចំនួនក្តី ក៏ការអនុវត្តវិធានការការពារគុណភាពទឹកតំបន់ទឹកសាធារណៈ រួមទាំងវិធានការគ្រប់គ្រងនិងត្រួតពិនិត្យ ការបញ្ចេញសំណល់រាវឬសារធាតុបំពុលទឹកពីប្រភពបំពុលនានា នៅមានកម្រិតនិងមិនទាន់ឆ្លើយតបទៅនឹង កំណើនសកម្មភាពនៃការអភិវឌ្ឍនាពេលថ្មីៗនេះ ដែលជាហេតុបង្កឱ្យមានកង្វល់អំពីការបំពុលប្រភពទឹក សាធារណៈនិងសុខភាពប្រជាពលរដ្ឋដែលអាស្រ័យនឹងប្រភពទឹកទាំងនោះ។ ក្នុងករណីនេះ រាជរដ្ឋាភិបាល បានធ្វើការណែនាំដល់ក្រសួង ស្ថាប័នពាក់ព័ន្ធ និងរដ្ឋបាលថ្នាក់ក្រោមជាតិ ត្រូវផ្តល់កិច្ចសហការដល់ក្រសួងបរិស្ថាន៖ ១-ជំរុញម្ចាស់កម្មសិទ្ធិឬអ្នកទទួលខុសត្រូវនៃរោងចក្រ សហគ្រាស សួនឧស្សាហកម្ម តំបន់ សេដ្ឋកិច្ចពិសេស អាជីវកម្មធនធានរ៉ែ មូលដ្ឋានសុខាភិបាល ទីសត្តឃាត និងមន្ទីរពិសោធន៍ជាដើម ត្រូវបំពាក់និងដំណើរការប្រព័ន្ធប្រព្រឹត្តកម្មសំណល់រាវ និងបំពាក់ឧបករណ៍ស្វ័យត្រួតពិនិត្យ ការបញ្ចេញសំណល់រាវ ស្របតាមលិខិតបទដ្ឋានគតិយុត្តជាធរមាន និងមានផែនការ មធ្យោបាយ និងសម្ភារៈបច្ចេកទេសឆ្លើយតបបន្ទាន់ក្នុងករណីកើតមានឧបទ្ទវហេតុការបំពុលទឹក។២- ជំរុញម្ចាស់កម្មសិទ្ធិឬអ្នកទទួលខុសត្រូវនៃអគារអាជីវកម្ម សេវាកម្ម បុរីលំនៅឋាន អគារសហកម្មសិទ្ធិ រមណីយដ្ឋាន សណ្ឋាគារ ភោជនីយដ្ឋាន ផ្សារ ផ្សារទំនើប ឬមណ្ឌលកម្សាន្តជាដើម ត្រូវបំពាក់ ប្រព័ន្ធប្រព្រឹត្តកម្មទឹកកខ្វក់ឱ្យស្របតាមស្តង់ដាសុវត្ថិភាពបរិស្ថាន មុននឹងបង្ហូរទៅតំបន់ទឹក សាធារណៈ ឬបង្ហូរចូលបណ្តាញលូសាធារណៈ ដែលភ្ជាប់ទៅស្ថានីយប្រព្រឹត្តកម្មទឹកកខ្វក់រួម។៣- ជំរុញការអនុវត្តន៏រន្តរភាពកសិកម្ម តាមរយៈការគ្រប់គ្រង ការប្រើប្រាស់ជីកសិកម្ម ថ្នាំកសិកម្ម សារធាតុចិញ្ចឹម ឱ្យបានសមស្របតាមលក្ខខណ្ឌសុវត្ថិភាពនិងស្តង់ដាបរិស្ថាន ចៀសវាងការបង្ហូរ ឬលេចជ្រាបសំណល់រាវពីតំបន់កសិកម្ម ដែលបង្កការបំពុលដល់ប្រភពទឹកសាធារណៈ។៤- ជំរុញកិច្ចសហប្រតិបត្តិការកិច្ចគាំពារបរិស្ថានឆ្លងដែនជាមួយបណ្តាប្រទេសជិតខាងនឹងក្នុងតំបន់ និងចូលរួមសហការចាត់វិធានការបន្ទាន់ក្នុងការកាត់បន្ថយការបំពុលទឹកសាធារណៈ ដោយ អនុលោមតាមច្បាប់និងលិខិតបទដ្ឋានគតិយុត្តជាធរមាន។៥- ជំរុញការរៀបចំហេដ្ឋារចនាសម្ព័ន្ធតាមដាននិងគ្រប់គ្រងគុណភាពទឹកសាធារណៈ តាមរយៈ ការដំឡើងស្ថានីយតាមដានគុណភាពទឹកស្វ័យប្រវត្ត កសាងមជ្ឈមណ្ឌលគ្រប់គ្រងទិន្នន័យ គុណភាពទឹកសាធារណៈ និងបំពាក់រថយន្តតាមដានគុណភាពទឹកសាធារណៈចល័ត។៦-ជំរុញការសិក្សាស្រាវជ្រាវផ្នែកបរិស្ថានទឹក ផលប៉ះពាល់នៃការបំពុលទឹកដល់សុខភាពសាធារណៈ ជីវៈចម្រុះ និងសេដ្ឋកិច្ច និងការស្ដារគុណភាពទឹកដែលទទួលរងការបំពុល។៧- ជំរុញលើកកម្ពស់ការយល់ដឹងនិងបំផុសការចូលរួមពីសាធារណជន ក្នុងកិច្ចគាំពារគុណភាព ទឹកសាធារណៈ តាមរយៈការរៀបចំវេទិកាសាធារណៈ ការផ្សព្វផ្សាយសារ ឬភាពយន្តអប់រំខ្លី។

កាកបាទក្រហមស្រុកអន្លង់វែង ផ្តល់អំណោយមនុស្សធម៌ ដល់ពលរដ្ឋរងគ្រោះ ដោយសារភ្លើងឆេះផ្ទះ

ឧត្តរមានជ័យ៖ នៅព្រឹកថ្ងៃទី១៥ មីនា ២០២៥ លោក ងួន ទ្ធីរិទ្ធ អភិបាលនៃគណៈអភិបាលស្រុកអន្លង់វែង តំណាងឯកឧត្តម មាន ចាន់យ៉ាដា អភិបាលនៃគណៈអភិបាលខេត្ត និងជាប្រធានគណៈកម្មាធិការកាកបាទក្រហមខេត្តឧត្តរមានជ័យ បានដឹកនាំក្រុមការងារកាកបាទក្រហមកម្ពុជា ចុះសាកសួរសុខទុក្ខដល់ប្រជាពរដ្ឋ ដែលរងគ្រោះដោយសារភ្លើងឆេះផ្ទះ កាលពីរសៀលថ្ងៃទី១២ ខែមីនា ឆ្នាំ២០២៥ នៅវេលាម៉ោង ១៩-០០នាទី។ក្នុងឱកាសនោះដែរលោកអភិបាលស្រុកអន្លង់វែង រួមទាំងក្រុមការងារបាននាំយកអំណោយមនុស្សធម៌របស់ឯកឧត្តម មាន ចាន់យ៉ាដា អភិបាលនៃគណៈអភិបាលខេត្ត និងជាប្រធានគណៈកម្មាធិការសាខាកាកបាទក្រហមកម្ពុជា ខេត្ដឧត្តរមានជ័យ ប្រគល់ជូនដល់ក្រុមគ្រួសារដែលរងគ្រោះដោយសារភ្លើងឆេះផ្ទះ ក្នុងនោះរួមមានសម្ភារៈគ្រឿងឧបភោគបរិភោគថវិកាមួយចំនួន ដើម្បីចូលរួមរំឡែកទុក្ខ និងការខ្វះខាតរបស់បងប្អូនផងដែរ។ជាមួយគ្នានោះដែរលោកអភិបាលស្រុក បានបន្តថា ក្នុងនាមអាជ្ញាធរស្រុកក៏ដូចជាក្រុមការងារកាកបាទក្រហមសាខាស្រុកអន្លង់វែង និងមិនទុក្ខឲ្យបងប្អូនប្រជាពលរដ្ឋណាម្នាក់ដែលប្រឈម និងការលំបាកខ្វះខាតនោះទេ គឺកាកបាទក្រហមនៅតាមជួយដល់បងប្អូនគ្រប់ពេកវេលានិងមិនទុកឲ្យបងប្អូនខ្វះខាតស្រៀងអាហារនោះឡើយ។លោក បញ្ជាក់ថា ថ្វីត្បិតតែសំម្ភារៈស្បៀងអាហារគ្រឿងឧបភោគបរិភោគដែលយកមកផ្តល់ជូនដល់បងប្អូនប្រជាពលរដ្ឋ នៅពេលនេះមិនអាចគ្រប់គ្រាន់បានយូរអង្វែងក្តី ប៉ុន្តែវាអាចជួយកាត់បន្ថយចំពោះតម្រូវការខ្វះខាតចាំបាច់របស់បងប្អូនបានមួយគ្រាធំផងដែរ៕

បណ្ដាញសង្គម

ព័ត៌មានថ្មីៗ

រលកកម្ដៅដ៏ក្ដៅបំផុតមិនធ្លាប់មាន បង្កឱ្យមានការព្រមានពីសុខភាពនៅទូទាំងទ្វីបអឺរ៉ុប

ប្រធានាធិបតីរុស្ស៊ី លោក Putin និយាយថា ទីក្រុងគីវ ចង់បង្កអស្ថិរភាពដល់រុស្ស៊ី

សហរដ្ឋអាមេរិក ជំរុញសន្តិភាពយូរអង្វែង ខណៈកិច្ចចរចារវាងអ៊ីស្រាអែលនិងលីបង់ ចាប់ផ្តើម

អង្គការសហប្រជាជាតិ ចាប់ផ្តើមជម្លៀសនាវិកជាង១១.០០០នាក់ ដែលជាប់ខ្លួននៅច្រកសមុទ្រ Hormuz

រដ្ឋមន្ត្រីការបរទេសអាមេរិក ច្រានចោលការទាមទារឲ្យបង់ប្រាក់របស់អ៊ីរ៉ង់នៅច្រកសមុទ្រ Hormuz ខណៈភាពតានតឹងនៃកិច្ចព្រមព្រៀងកើនឡើង

មេដឹកនាំកំពូលកូរ៉េខាងជើង បង្ហាញផែនការសម្រាប់នាវាចម្បាំងកងទ័ពជើងទឹកបំពាក់អាវុធនុយក្លេអ៊ែរទម្ងន់១០.០០០តោន

លោកTrump និងអ៊ីរ៉ង់ខ្វែងគំនិតគ្នាជុំវិញការធ្វើអធិការកិច្ចនុយក្លេអ៊ែរនិងទ្រព្យសកម្មបង្កកក្នុងកិច្ចព្រមព្រៀងបញ្ចប់សង្គ្រាម

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877