នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ជន​ជាតិចិន ៣២៩នាក់ ពាក់​ព័ន្ធករណីឆបោកតាមប្រព័ន្ធអនឡាញ (Online Scams) ត្រូវបានបណ្ដេញចេញ​ពី​ព្រះរាជាណាចក្រកម្ពុជា
រាជរដ្ឋាភិបាលកម្ពុជា បង្កើតក្រុមការងារចម្រុះចំណុះលេខាធិការដ្ឋាន គ.ប.ឆ.ប.ដើម្បីបង្កើនប្រសិទ្ធភាពបង្ក្រាប និងបោសសម្អាតការឆបោកតាមប្រព័ន្ធបច្ចេកវិទ្យា
អភិបាលរាជធានីណែនាំឱ្យមន្ត្រី និងកងកម្លាំងប្រឹងប្រែងបន្ថែមទៀតលើការរក្សាសន្តិសុខ និងការងារនានា
ករណី Online Scams ៖ តំណាងអយ្យការសម្រេចចោទប្រកាន់លើមន្ត្រីនគរបាលផ្កាយបី១នាក់ ,ផ្កាយពីរ ១នាក់ និងពាក់ព័ន្ធ ៤នាក់ផ្សេងទៀត

ព័ត៌មានជាតិ

រមណីយដ្ឋានភ្នំជីសូរ្យ ជារមណីយដ្ឋានទេសចរណ៍ប្រវត្តិសាស្រ្តរបស់ខេត្តតាកែវ គួបផ្សំនឹងទស្សនីយភាពធម្មជាតិកំពុងទាក់ទាញទេសចរជាតិ និងអន្តរជាតិមកទស្សនាយ៉ាងច្រើន

2026/03/09 11:10:11 am        221
Facebook Telegram Linkin
ឆ្លៀតឱកាសនៃព្រឹត្តិការណ៍ជិះកង់ «ភ្នំពេញ–តាកែវ» ចម្ងាយ ៧៨ គីឡូម៉ែត្រ ក្រោមប្រធានបទ «ទេសចរណ៍រីកលូតលាស់ក្នុងសន្តិភាព» ឯកឧត្តម ហួត ហាក់ រដ្ឋមន្ដ្រីក្រសួងទេសចរណ៍ និងលោកជំទាវ រួមជាមួយឯកឧត្តម វ៉ី សំណាង អភិបាលនៃគណៈអភិបាលខេត្តតាកែវ អញ្ជើញចុះពិនិត្យស្ថានភាពជាក់ស្តែងនៅរមណីយដ្ឋានភ្នំជីសូរ្យ ដែលជាតំបន់សក្តានុពលទេសចរណ៍ប្រវត្តិសាស្ត្រដ៏ល្បីល្បាញឆ្លុះបញ្ជាំងនូវនូវប្រាសាទបុរាណដែលមានកេរ្តិ៍ដំណែលវប្បធម៌ អរិយធម៌បេតិកភណ្ឌដ៏ល្អនៅខេត្តតាកែវ។សូមជម្រាបជូនបន្ថែមថា រមណីយដ្ឋានភ្នំជីសូរ្យ មានរូបសម្រស់អមដោយទេសភាពបៃតងដ៏ស្រស់ត្រកាល និងខ្យល់អាកាសបរិសុទ្ធ ដែលមានទីតាំងសិ្ថតនៅក្នុងឃុំរវាង ស្រុកសំរោង ខេត្តតាកែវ។ ប្រាសាទភ្នំជីសូរ្យនេះទៀតសោត បានស្ថាបនាលើខ្នងភ្នំមួយមានកម្ពស់ ៣៨០ម៉ែត្រ នៅដើមសតវត្សរ៍ទី១១ (១០០២-១០៥០) ដោយព្រះបាទសូរ្យវរ្ម័នទី១ សំរាប់ឧទ្ទិសដល់ព្រហ្មញ្ញសាសនា។ ប្រាសាទនេះសាងសង់អំពីថ្មភក់ និងលីប៉ូនីត មានបណ្តោយ ៦០ម និងទទឹង ៥០ម និងមានថែវ២ជាន់ព័ទ្ធជុំវិញ។ ថែវទី២ មានទំហំតូចជាងថែវទី១ និងនៅចំកណ្តាល មានទីសក្តារៈមួយដ៏សំខាន់ ហើយមានទ្វារឆ្លាស់ពីរ ខាងក្នុងមានបដិមាករមួយធ្វើអំពីឈើ។

អាជ្ញាធរនឹងបិទចរាចរណ៍យានយន្តធុនធំគ្រប់ប្រភេទលើកំណាត់ផ្លូវខេត្តលេខ ៣៧១ (ឆ្លូង-រកាខ្នុរ) ចាប់ពីថ្ងៃទី១០ មីនាស្អែកនេះតទៅ ដើម្បីស្ថាបនាស្ពានព្រែកសំរោង

2026/03/09 10:28:07 am        229
Facebook Telegram Linkin
មន្ទីរសាធារណការ និងដឹកជញ្ជូនខេត្តក្រចេះ នៅថ្ងៃទី៩ ខែមីនានេះបានជូនដំណឹង ស្តីពីការបិទចរាចរណ៍យានយន្តធុនធំគ្រប់ប្រភេទចាប់ពីទម្ងន់ ១៥ តោន ធ្វើចរាចរណ៍លើកំណាត់ផ្លូវខេត្តលេខ ៣៧១ (ឆ្លូង-រកាខ្នុរ) ចាប់ពីថ្ងៃទី ១០ ខែមីនា ឆ្នាំ២០២៦ តទៅ ដើម្បីស្ថាបនាស្ពានព្រែកសំរោង ដោយរុះរើស្ពានដែកបេឡេត៍ រួចសាងសង់ឡើងវិញ អំពីបេតុងសរសៃដែក ស្ថិតក្នុងឃុំខ្សាច់អណ្តែត ស្រុកឆ្លូង ខេត្តក្រចេះ។ប្រធានមន្ទីរសាធារណការ និងដឹកជញ្ជូនខេត្តក្រចេះបានឱ្យដឹងថា៖ គម្រោងការងារស្ថាបនាស្ពានព្រែកសំរោង អំពីបេតុងសរសៃដែក ប្រវែង ១៨ម៉ែត្រ ទទឹង ១០,៩ម៉ែត្រ នៅលើកំណាត់ផ្លូវខេត្តលេខ ៣៧១ ស្ថិតក្នុងឃុំខ្សាច់អណ្តែត ស្រុកឆ្លង នឹងចាប់ផ្តើម អនុវត្តការងាររុះរើស្ពានដែកបេឡេត៍ចាស់ ដើម្បីបើកដំណើរការអនុវត្តការដ្ឋានស្ពានថ្មីនៅថ្ងៃទី១០ ខែមីនា ឆ្នាំ២០២៦ នេះហើយ។ដោយស្ថានភាពផ្លូវវាងការដ្ឋានខាងលើ ត្រូវធ្វើដំណើរតាមផ្លូវលំក្រាលដីល្បាយថ្ម ប្រវែង ៤គីឡូម៉ែត្រ មាន ទទឹងតូច និងគ្រឹះមិនរឹងមាំ សម្រាប់ទ្រទម្ងន់រថយន្តប្រភេទដឹកទំនិញធុនធំ ដែលអាចបណ្តាលឱ្យកកស្ទះចរាចរ និង ធ្វើឱ្យស្រុតខូចខាតតួផ្លូវពេលរថយន្តធុនធំឆ្លងកាត់។ ក្នុងន័យនេះ ដើម្បីបញ្ចៀសការកកស្ទះចរាចរ និងធានានូវការ ធ្វើចរាចរណ៍សម្រាប់រថយន្តប្រភេទទេសចរណ៍ ឬរថយន្តប្រភេទលក្ខណៈគ្រួសារ ព្រមទាំងរថយន្តដឹកទំនិញធុនតូច ធ្វើដំណើរបានដោយរលូន និងសុវត្ថិភាព មន្ទីរសាធារណការ និងដឹកជញ្ជូនខេត្តក្រចេះ សូមធ្វើការជូនដំណឹង បញ្ចៀសចរាចរចំពោះយានយន្តគ្រប់ប្រភេទដែលធ្វើដំណើរឆ្លងកាត់តាមកំណាត់ផ្លូវជាតិលេខ ៣៧១ (ឆ្លង-រកាខ្នុរ) ចាប់ពីថ្ងៃទី១០ ខែមីនា ឆ្នាំ២០២៦ ដូចខាងក្រោម៖បិទចរាចរណ៍ទាំងស្រុងយានយន្តធុនធំគ្រប់ប្រភេទ ទម្ងន់ផ្ទុកសរុបចាប់ពី ១៥តោន និងសូមបង្វែរ ទិសដៅចរាចរណ៍តាមផ្លូវជាតិលេខ ៧៣ (ឆ្លង-ប្រធាតុ) សម្រាប់ការដឹកទំនិញមកកាន់ខេត្តក្រចេះចំពោះរថយន្តធុនតូច ប្រភេទទេសចរណ៍ រថយន្តលក្ខណៈគ្រួសារ រថយន្តដឹកទំនិញធុនតូចចាប់ពី ១៥តោនចុះ និងម៉ូតូ-កង់ អាចធ្វើចរាចរណ៍បានធម្មតាតាមរយៈផ្លូវវាង ប្រវែង ០៤គីឡូម៉ែត្រ ដែល ក្រុមការងារបានដាក់ទិសបង្ហាញទីតាំងធ្វើដំណើរ។អាស្រ័យហេតុនេះ សូមសាធារណជន និងបងប្អូនប្រជាពលរដ្ឋទាំងអស់ មេត្តាជ្រាប យោគយល់ អធ្យាស្រ័យ និងបញ្ចៀសការធ្វើដំណើរឆ្លងកាត់តាមកំណាត់ផ្លូវខាងលើ តាមកាលបរិច្ឆេទដូចបានជម្រាបជូនដោយក្ដីអនុគ្រោះ រហូតដល់ការដ្ឋានស្ថាបនាស្ពានព្រែកសំរោងបានរួចរាល់ជាស្ថាពរ។មន្ទីរសាធារណការ និងដឹកជញ្ជូនខេត្តក្រចេះសង្ឃឹមយ៉ាងមុតមាំថាៈ សាធារណជន និងបងប្អូនប្រជាពលរដ្ឋ ដែលធ្វើដំណើរតាមកំណាត់ផ្លូវខេត្តលេខ ៣៧១ ខាងលើ ពិតជាអនុវត្តបានល្អនូវសេចក្តីជូនដំណឹងនេះដោយស្មារតី យោគយល់ខ្ពស់៕

សម្តេចព្រះមហាសង្ឃរាជ បួរ គ្រី យាងសម្ពោធឱ្យប្រើប្រាស់ជាផ្លូវការនូវអគារសិក្សាថ្មី១ខ្នង ចំនួន៥បន្ទប់ និងសមទ្ធិផលនានាក្នុងសាលាបឋមសិក្សាបង្ហើរខ្លែងស្រុកតំបែរ

2026/03/09 09:09:47 am        182
Facebook Telegram Linkin
(ត្បូងឃ្មុំ)៖ នាព្រឹកថ្ងៃទី៨ ខែមីនា ឆ្នាំ២០២៦ សម្តេចព្រះអភិសិរីសុគន្ធាមហាសង្ឃរាជាធិបតីកិត្តិឧទ្ទេសបណ្ឌិត បួរ គ្រី សម្តេចព្រះមហាសង្ឃរាជ នៃគណៈធម្មយុត្តិកនិកាយនៃព្រះរាជាណាចក្រកម្ពុជា ព្រះសាកលវិទ្យាធិការ នៃពុទ្ធិកសាកលវិទ្យាល័យព្រះសីហមុនីរាជា និងជាព្រះប្រធានប៉ុស្ដិ៍សុខភាពសម្ដេចព្រះរាជគ្រូ បួរ គ្រី ព្រះករុណាព្រះមហាក្សត្រ សីហមុនី បានយាងជាព្រះរាជាអធិបតីភាពដ៏ខ្ពង់ខ្ពស់ក្នុងពិធីសម្ពោធដាក់ឱ្យប្រើប្រាស់ជាផ្លូវការនូវអគារសិក្សាថ្មី ១ខ្នង មានចំនួន ៥បន្ទប់ និងសមិទ្ធផលនានាក្នុងសាលាបឋមសិក្សាបង្ហើរខ្លែង ស្ថិតនៅភូមិបង្ហើរខ្លែង ឃុំត្រពាំងព្រីង ស្រុកតំបែរ ខេត្តត្បូងឃ្មុំ។ពិធីនេះប្រព្រឹត្តិទៅដោយមានការអញ្ជើញចូលរួមពីសំណាក់លោក ងួន ស្តេចភក្តី រដ្ឋលេខាធិការក្រសួងធម្មការនិងសាសនា ទទួលបន្ទុកពុទ្ធិកសាកលវិទ្យាល័យព្រះសីហមុនីរាជា និងជាប្រធានក្រុមការងាររាជរដ្ឋាភិបាលចុះមូលដ្ឋានឃុំត្រពាំងព្រីង តំណាងដ៏ខ្ពង់ខ្ពស់ លោក បណ្ឌិត ចាយ បូរិន រដ្ឋមន្ត្រីក្រសួងធម្មការ និងសាសនាលោក គន់ រ័ត្នមុនី អភិបាលរងខេត្ត តំណាងដ៏ខ្ពង់ខ្ពស់លោក ប៉ែន កុសល្យ អភិបាលនៃគណៈអភិបាលខេត្តត្បូងឃ្មុំ ព្រមទាំងវត្តមានរបស់ ព្រះមន្ត្រីសង្ឃលោក លោកស្រី លោកឧកញ៉ា សប្បុរសជននានា ព្រមថ្នាក់ដឹកនាំ មន្ត្រីរាជការ អាជ្ញាធរមូលដ្ឋាន លោកគ្រូ អ្នកគ្រូ និងសិស្សានុសិស្សយ៉ាងច្រើនកុះករ។ក្នុងឱកាសនោះ លោក សុខ សារិទ្ធ អភិបាលនៃគណៈអភិបាលស្រុកតំបែរ បានឡើងថ្លែងរបាយការណ៍សង្ខេបអំពីវឌ្ឍនភាពនានារបស់ស្រុកតំបែរក្រោមការដឹកនាំរបស់ប្រមុខរាជរដ្ឋាភិបាលកម្ពុជា និងថ្លែងអំណរគុណចំពោះការចូលរួមបរិច្ចាកសាងសង់អគារសិក្សាថ្មី ក្រោមជំនួយគាំទ្រពីលោក ងួន ស្តេចភក្តី និងក្រុមការងាររាជរដ្ឋាភិបាលចុះជួយមូលដ្ឋាន ដែលបានគៀងគរជំនួយពីសប្បុរសជនរហូតសម្រេចបាននូវសមទ្ធិផលអគារសិក្សាថ្មីមួយខ្នងបន្ថែមទៀត ដែលចំណាយថវិការប្រមាណ ៩៤,៥៥០ ដុល្លារអាមេរិក សម្រាប់បម្រើជាប្រយោជន៍ដល់ការអប់រំសិស្សានុសិស្សនៅសាលាបឋមសិក្សាបង្ហើរខ្លែង។ បន្ថែមពីនេះលោក គន់ រ័ត្នមុនី អភិបាលរងខេត្តត្បូងឃ្មុំ បានថ្លែងកោតសរសើរដោយស្មោះចំពោះការខិតខំប្រឹងប្រែង និងយកចិត្តទុកដាក់ខ្ពស់របស់ក្រុមការងាររាជរដ្ឋាភិបាលចុះមូលដ្ឋានឃុំត្រពាំងព្រីង ដែលបានអនុវត្តភារកិច្ចរបស់ខ្លួនប្រកបដោយស្មារតីទទួលខុសត្រូវ និងការប្តេជ្ញាចិត្តខ្ពស់ក្នុងការបម្រើប្រជាពលរដ្ឋ។ លោកបានគូសបញ្ជាក់ថា ការរួមចំណែករបស់ក្រុមការងារនេះ បានជួយជំរុញឱ្យមានការអភិវឌ្ឍជាបន្តបន្ទាប់លើវិស័យនានា ជាពិសេសវិស័យអប់រំ ដែលជាវិស័យអាទិភាពមួយសម្រាប់ការកសាងធនធានមនុស្សប្រកបដោយគុណភាព។ក្នុងឱកាសដ៏វិសេសវិសាលនៃពិធីសម្ពោធដាក់ឱ្យប្រើប្រាស់ជាផ្លូវការនេះ សម្តេចព្រះមហាសង្ឃរាជ បួរ គ្រី ទ្រង់បានមានព្រះបន្ទូលប្រកបដោយព្រះរាជហប្ញទ័យបីតិសោមនស្សថា ៖ ការកសាងសាលារៀន គឺជាការវិនិយោគដែលផ្តល់ផលចំណេញខ្ពស់បំផុតសម្រាប់សង្គមជាតិ ព្រោះទីនេះជាចំណុចចាប់ផ្តើមនៃការអប់រំបណ្តុះបណ្តាលកុមារា កុមារី ឲ្យក្លាយជាគ្រាប់ពូជដ៏មានគុណភាព និងជាសសរទ្រូងដ៏រឹងមាំដែលនឹងត្រូវបន្តវេនការពារ អភិវឌ្ឍជាតិមាតុភូមិឱ្យកាន់តែត្រចះត្រចង់ប្រកបដោយភាពទទួលខុសត្រូវ ស្វាហាប់ពោរពេញដោយថាមពល និងមានក្រមសីលធម៌វិជ្ជាជីវៈខ្ពស់។ សម្តេចជាអម្ចាស់បានមានព្រះរាជបន្ទូលបន្តថា ៖សមិទ្ធផលអគារសិក្សាថ្មីនេះ គឺជាផ្លែផ្កាដែលកើតចេញពីការខិតខំប្រឹងប្រែង និងសហការរបស់មន្ត្រីទាំងថ្នាក់ជាតិនិងថ្នាក់ក្រោមជាតិស្របតាមមាគ៌ាដឹកនាំដ៏ឈ្លាសវៃ និងមុតស្រួចនៃ យុទ្ធសាស្ត្របញ្ចកោណ របស់រាជរដ្ឋាភិបាលកម្ពុជាដែលដឹកនាំដោយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងសម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភាជាតិ និងជាប្រធានឧត្តមក្រុមប្រឹក្សាផ្ទាល់ព្រះមហាក្សត្រនៃព្រះរាជាណាចក្រកម្ពុជា។ជាមួយគ្នានេះសម្តេចព្រះមហាសង្ឃរាជបានប្រោសព្រះរាជទានគ្រឿងឥស្សរិយយសជូនដល់ លោកឧកញ៉ា ថ្នាក់ដឹកនាំ លោក លោកស្រី សប្បុរសជន និងលោកគ្រូ អ្នកគ្រូ ដែលបានចូលរួមចំណែកក្នុងការកសាង និងគាំទ្រការអភិវឌ្ឍវិស័យអប់រំ។ បន្ថែមពីនេះសម្តេចជាអម្ចាស់ទ្រង់ក៏បានប្រទានព្រះរាជអំណោយដល់សិស្សានុសិស្សរួមមាន៖ សៀវភៅចំនួន ១,៣៣៦ក្បាល, បន្ទាត់ ១,៣៣៦ដើម, ប៊ិច ១,៣៣៦ដើម និងថវិកាម្នាក់២,០០០រៀល។ ចំពោះប្រជាពលរដ្ឋទទួលបានសារ៉ុង ១ និងថវិកា ៥០០០រៀល។ ដោយឡែក កងកម្លាំងចំនួន ៤៧នាក់ និងប្រជាការពារ ១៨នាក់ ម្នាក់ៗទទួលបានថវិកា ២០,០០០រៀល និងលោកគ្រូ អ្នកគ្រូ ២៧នាក់ ម្នាក់ៗទទួលបានថវិកា ៥០,០០០រៀល ដែលសរុបជាថវិកាប្រមាណជាង ១១លានរៀល និងថវិកាដែលទទួលបានពីសប្បុរសជននានា បន្ថែមជាមួយគ្នានេះដែរសប្បុរសជនដែលមានសទ្ធាជ្រះថ្លាលោក សុខ សារិទ្ធមហាឧបាសិកា សុខ ណៃ ក៏ចូលរួមសាងសង់សាលាឆាន់ក្នុងវត្តត្រពាំងព្រីងចំនួន ១៥,០០០ ដុល្លារអាមេរិកផងដែរ៕

មន្ត្រីជាន់ខ្ពស់ក្រសួងការងារជំរុញឱ្យភាគីពាក់ព័ន្ធនៃកម្មវិធី DEY III បន្តជួយជ្រោមជ្រែងដល់ SMEs ដើម្បីគាំទ្រដល់ការបង្កើតការងារដល់យុវជន

2026/03/09 08:51:05 am        192
Facebook Telegram Linkin
បាត់ដំបង-កំពង់ធំ៖ ដោយមើលឃើញពីសារៈសំខាន់ក្នុងការបង្កើតឱកាសការងារនៅតាមសហគ្រាសធុនតូចនិងមធ្យម (SMEs) លោកជំទាវ ហ៊ឹម សុធារ័ត្ន អនុរដ្ឋលេខាធិការក្រសួងការងារ និងបណ្ដុះបណ្ដាលវិជ្ជាជីវៈ បានជំរុញឱ្យភាគីពាក់ព័ន្ធនៃកម្មវិធីមុខរបរនិងការងារសមរម្យសម្រាប់យុវជននៅកម្ពុជា ដំណាក់កាលទី៣ (DEY III) បន្តជួយជ្រោមជ្រែងដល់ SMEs បន្ថែមទៀត ដើម្បីគាំទ្រដល់ការបង្កើតការងារក្នុងស្រុកដល់យុវជន និងអតីតពលករត្រឡប់មកពីប្រទេសថៃ។ការជំរុញលើកទឹកចិត្តយ៉ាងមុតមាំនេះ ធ្វើឡើងក្នុងឱកាសដែលលោកជំទាវអនុរដ្ឋលេខាធិការ ហ៊ឹម សុធារ័ត្ន រួមជាមួយលោក ឈា ឡាយហ៊ី អគ្គនាយករងនៃអគ្គនាយកដ្ឋានសហគ្រាសធុនតូចនិងមធ្យម តំណាងក្រសួងឧស្សហកម្ម វិទ្យាសាស្ត្រ បច្ចេកទេស និងនវានុវត្តន៍ និងលោក សុខ ណារិន តំណាងប្រចាំប្រទេសកម្ពុជានៃអង្គការ UNIDO បានធ្វើទស្សនកិច្ចពិនិត្យមើលសហគ្រាសធុនតូចនិងមធ្យម (SMEs) ដែលទទួលផលពីកម្មវិធី DEY III ដែលជាសកម្មភាពមួយរបស់កម្មវិធី DEY III ក្នុងគោលបំណងជួយគាំទ្រនិងអភិវឌ្ឍសហគ្រាសធុនតូចនិងមធ្យម ក៏ដូចជាគាំទ្រដល់យុវជននៅកម្ពុជាឱ្យទទួលបានការងារ និងលក្ខខណ្ឌការងារល្អប្រសើរដែលផ្តល់ដោយសហគ្រាសធុនតូចនិងមធ្យម។ទស្សនកិច្ចនេះមានរយៈពេល២ថ្ងៃ ចាប់ពីថ្ងៃទី៤-៦ ខែមីនា ឆ្នាំ២០២៦ ដោយក្នុងនោះលោកជំទាវអនុរដ្ឋលេខាធិការ ប្រតិភូតំណាងក្រសួង និងដៃគូអភិវឌ្ឍន៍បានទៅពិនិត្យមើលសហគ្រាសធុនតូចនិងមធ្យមនៅខេត្តបាត់ដំបងចំនួន៣សហគ្រាស (សិប្បកម្មប្រេងខេអេច សិប្បកម្មតាកាឌា សិប្បកម្មធូបូ) និងនៅខេត្តកំពង់ធំចំនួន២សហគ្រាស (សិប្បកម្មកែច្នៃត្រី សោភ័ណសុខម៉េង និងសិប្បកម្មសណ្តែកសៀងលឹមស្រេង)។តាមរយៈទស្សនកិច្ចនេះដែរ ប្រតិភូតំណាងក្រសួង ដៃគូអភិវឌ្ឍន៍ និងម្ចាស់សហគ្រាសបានពិភាក្សាអំពីសកម្មភាពដែលកម្មវិធី DEY III បានផ្តល់ឱកាសដល់ម្ចាស់សហគ្រាសឱ្យទទួលបានការបណ្តុះបណ្តាលពង្រឹងសហគ្រិនភាព ដូចជា ការប្រើប្រាស់ធនធានប្រកបដោយប្រសិទ្ធភាព ការពង្រឹងស្តង់ដាសុវត្ថិភាពចំណីអាហារនិងផលិតផល ការអនុវត្តប្រកបដោយអនាម័យខ្ពស់ ដែលបានជួយពង្រឹងសមត្ថភាពផលិតកម្ម គុណភាពផលិតផល និងការទទួលស្គាល់ខ្ពស់លើទីផ្សារ។ គួរកត់សម្គាល់ថា សហគ្រាសធន់តូចនិងមធ្យមទាំងនោះក៏បានបង្កើតឱកាសការងារដល់ប្រជាជនមូលដ្ឋាន ជាពិសេសដល់ស្ត្រី យុវជន និងអតីតពលករត្រឡប់មកពីប្រទេសថៃផងដែរ។ជាមួយគ្នានេះ ម្ចាស់សហគ្រាសធុនតូចនិងមធ្យមដែលជាអ្នកទទួលផលពីកម្មវិធី DEY III បានសម្តែងការពេញចិត្ត និងអរគុណដល់បណ្តាក្រសួង ដៃគូអភិវឌ្ឍន៍ និងស្ថាប័នពាក់ព័ន្ធទាំងអស់ដែលបានខិតខំប្រឹងប្រែងអនុវត្តកម្មវិធី DEY III ជួយគាំទ្រដល់សហគ្រាសរបស់ពួកគាត់ឱ្យមានឱកាសរីកលូតលាស់ រួមចំណែកដល់ការបង្កើតការងារក្នុងស្រុក និងជាផ្នែកមួយនៃកម្លាំងសេដ្ឋកិច្ចនៅកម្ពុជា។ដោយមើលឃើញពីសារៈសំខាន់ក្នុងការបង្កើតឱកាសការងារនេះហើយ ទើបលោកជំទាវ បានជំរុញលើកទឹកចិត្តដល់តំណាងក្រសួង និងដៃគូអភិវឌ្ឍន៍នៃកម្មវិធី DEY III តំណាងមន្ទីរពាក់ព័ន្ធក្នុងតំបន់ សូមបន្តខិតខំជួយគាំទ្រជ្រោមជ្រែងដល់សហគ្រាសធុនតូចនិងមធ្យមបន្ថែមទៀត ដែលជាគោលដៅមួយនៃកម្មវិធី DEY III ដើម្បីគាំទ្រដល់ការបង្កើតការងារក្នុងស្រុក និងលើកកម្ពស់លក្ខខណ្ឌការងារល្អប្រសើរនៅកម្ពុជា៕

រដ្ឋបាលខេត្តក្រចេះ បើកកិច្ចប្រជុំពិនិត្យពិភាក្សា និងដាក់វិធានការស្តីពីការគ្រប់គ្រងហានិភ័យនៃការទិញលក់ប្រេងឥន្ទនៈ និងសុវត្ថិភាពអ្នកប្រើប្រាស់

2026/03/09 08:42:16 am        204
Facebook Telegram Linkin
រសៀលថ្ងៃអាទិត្យ ទី៨ ខែមីនា ឆ្នាំ២០២៦នេះ ឯកឧត្តម វ៉ា ថន អភិបាល នៃគណអភិបាលខេត្តក្រចេះ បានអញ្ជើញដឹកនាំកិច្ចប្រជុំជាមួយមន្ទីរ អង្គភាព និងអភិបាល ក្រុង /ស្រុក និងស្ថាប័នពាក់ព័ន្ធ ដើម្បីពិនិត្យពិភាក្សានិងដាក់វិធានការ ស្តីពីការគ្រប់គ្រង ហានិភ័យនៃការទិញលក់ប្រេងឥន្ទនៈ និងសុវត្ថិភាពអ្នកប្រើប្រាស់នៅក្នុងខេត្តក្រចេះ។កិច្ចប្រជុំនេះ បានធ្វើឡើងបន្ទាប់ពីមានការផ្ទុះឡើងនៃតម្លៃលក់រាយប្រេងឥន្ទនៈ នៅតាមតំបន់ជនបទដាច់ស្រយាលមួយចំនួនក្នុងខេត្តក្រចេះមានការកើនឡើងខ្ពស់ បង្កផលប៉ះពាល់ដល់ជីវភាព និងការរស់នៅប្រចាំថ្ងៃរបស់បងប្អូនប្រជាពលរដ្ឋ។លោក ជា វេង ប្រធានមន្ទីរពាណិជ្ជកម្មខេត្ត បានឱ្យដឹងថា ខេត្តក្រចេះ មានស្ថានីយ៍ប្រេង សរុបចំនួន ១១១កន្លែង ក្នុងនោះ ស្រុកឆ្លូង មានចំនួន ១១ ស្ថានីយ៍ ស្រុកស្នួល មានចំនួន ៣៦ ស្ថានីយ៍ ស្រុកអូរគ្រៀងសែនជ័យ មាន ១៣ ស្ថានីយ៍ ក្រុងក្រចេះ មាន ២០ ស្ថានីយ៍ ស្រុកចិត្របុរី មាន ១៣ ស្ថានីយ៍ ស្រុកសំបូរ មាន ៦ ស្ថានីយ៍ និងស្រុកព្រែកប្រសព្វ មាន ១២ ស្ថានីយ៍។ គិតត្រឹមថ្ងៃទី៧ ខែមិនា ឆ្នាំ២០២៦ មានស្ថានីយ៍ប្រេងឥន្ទនៈ ប្រមាណជា ៥០ ស្ថានីយ៍ហើយត្រូវបានបិតជាបណ្តោះអាសន្ន។លោក ជា វេង ប្រធានមន្ទីរពាណិជ្ជកម្មខេត្ត បានបញ្ជាក់ថា តាមការស៊ើបសួររបស់មន្ត្រី នៃមន្ទីរពាណិជ្ជកម្មខេត្ត បានរកឃើញថា នៅខាងភូមិព្រៃគោ ក្នុងស្រុកឆ្លូង និងនៅឃុំតាម៉ៅ ស្រុកព្រែកប្រសព្វ ពិតជាមានករណីលក់ប្រេងឥន្ទនៈក្នុងតម្លៃពី ៧,០០០រៀល ទៅ ៨,០០០រៀល ក្នុង១លីត្រ ពិតមែន នៅតាមតូបតូចៗតាមភូមិ នាពេលកន្លងទៅ។ ដោយឡែកនៅស្ថានីយប្រេងឥន្ទនៈ ដេប៉ូចែកចាយបន្ត ក្នុងស្រុក ក្រុង គឺមិនមានឡើយ។ជាមួយគ្នានោះ ឯកឧត្តម វ៉ា ថន អភិបាលខេត្ត បានជម្រុញណែនាំឱ្យមន្ទីរជំនាញ អង្គភាព ស្ថានប័នពាក់ព័ន្ធ និងអាជ្ញាធរមូលដ្ឋាន ត្រូវចុះផ្សព្វផ្សាយអប់រំណែនាំដល់ម្ចាស់ស្ថានីយ៍ ប្រេងឥន្ទនៈ ដេប៉ូចែកចាយ និងអ្នកលក់រាយនៅតាមផ្ទះ ត្រូវអនុវត្តតាមសេចក្តីជូនដំណឹង របស់ក្រសួងពាណិជ្ជកម្ម និងគោរពតាមច្បាប់។ ប្រសិនបើក្នុងករណីរកឃើញថា មិនអនុវត្តតាមច្បាប់ ត្រូវធ្វើកិច្ចសន្យា ផាកពិន័យជាប្រាក់ និងអាចឈានដល់ការដក អាជ្ញាប័ណ្ណបញ្ឈប់តែម្តង។ឯកឧត្តម មានប្រសាសន៍បន្តថា ដើម្បីបង្ការ ទប់ស្កាត់ ជៀសវាងកុំឱ្យមានការខ្វះខាត ប្រេងឥន្ទនៈក្នុងការផ្គត់ផ្គង់ជូនប្រជាពលរដ្ឋ នៅតាមស្ថានីយប្រេងឥន្ទនៈ ដេប៉ូចែកចាយបន្ត ត្រូវដាក់កំណត់ឱ្យបានច្បាស់ក្នុងការលក់ និងផ្គត់ផ្គង់ប្រេងឥន្ទនៈ ដូចជាក្នុងរថយន្ត១គ្រឿង អាចចាក់ប្រេងបានពី ២០ ទៅ៣០លីត្រ ជាដើម។ទន្ទឹមនឹងនោះ ឯកឧត្តមអភិបាលខេត្តក្រចេះ បានណែនាំដល់រដ្ឋបាលខេត្ត ត្រូវចេញសេចក្តី ណែនាំស្តីពី ការគ្រប់គ្រងហានិភ័យនៃការទិញ-លក់ប្រេងឥន្ធនៈ និងសុវត្ថិភាពអ្នកប្រើប្រាស់ នៅក្នុងខេត្តក្រចេះជាបន្ទាន់៕ ដោយ សេង ម័រ

សមត្ថកិច្ចចុះរដ្ឋបាលត្រួតពិនិត្យទីតាំងស្នាក់នៅ១៣៤ទីតាំង ក្នុងរាជធានីភ្នំពេញ រកឃើញជនបរទេសខុសច្បាប់ មួយចំនួនពាក់ព័ន្ធបទល្មើសផ្សេងៗគ្នា

2026/03/09 08:28:47 am        284
Facebook Telegram Linkin
ភ្នំពេញ ៖ កម្លាំងគណៈបញ្ជាការឯកភាពរដ្ឋបាលរាជធានីភ្នំពេញ នៅថ្ងៃទី០៨ ខែមីនា ឆ្នាំ២០២៦ បានបន្តប្រតិបត្តិការចុះរដ្ឋបាលពិនិត្យទីតាំងស្នាក់នៅ១៣៤ទីតាំងក្នុងភូមិសាស្ត្ររាជធានីភ្នំពេញ រកឃើញជនបរទេសខុសច្បាប់មួយចំនួន ជាប់ពាក់ព័ន្ធបទល្មើសគ្រឿងញៀន, ស្នាក់នៅដោយខុសច្បាប់ និងលបលួចឆ្លងដែនមកកម្ពុជាដោយខុសច្បាប់ ។ ការបន្តចុះពិនិត្យរដ្ឋបាលទ្រង់ទ្រាយធំនេះ ធ្វើឡើងក្រោមការដឹកនាំដោយលោកអភិបាលរងរាជធានីភ្នំពេញ០៣រូប ដោយមានការចូលរួមពីកម្លាំងស្នងការដ្ឋាននគរបាលរាជធានីភ្នំពេញ , កម្លាំងកងរាជអាវុធហត្ថរាជធានី , និងអាជ្ញាធរពាក់ព័ន្ធនៅតាមមូលដ្ឋានខណ្ឌចំនួន០២ គឺខណ្ឌច្បារអំពៅ និងខណ្ឌពោធិ៍សែនជ័យ ។ ជាលទ្ធផល កម្លាំងអាជ្ញាធរចម្រុះ បានត្រួតពិនិត្យលើជនបរទេសសរុប៥៩៨នាក់ (ស្រី១៦៧នាក់) ដោយក្នុងចំណោមជនបរទេសមួយចំនួន ត្រូវបានរកឃើញថា មានពាក់ព័ន្ធបទល្មើសទាំង០៣ខាងលើ ក៏ត្រូវបានឃាត់ខ្លួន អមដោយការដកហូតវត្ថុតាងពាក់ព័ន្ធបទល្មើសមួយចំនួនធំផងដែរ។ ក្នុងការពិនិត្យរដ្ឋបាលនេះដែរ កម្លាំងអាជ្ញាធរមានសមត្ថកិច្ច ពុំបានរកឃើញថាមានទីតាំងណាមួយ ឬជនបរទេសណាម្នាក់ ជាប់ពាក់ព័ន្ធបទល្មើសឆបោកតាមប្រព័ន្ធបច្ចេកវិទ្យា ( Online Scams ) នោះឡើយ ។ បច្ចុប្បន្ន ជនសង្ស័យជាជនបរទេស និងវត្ថុតាងពាក់ព័ន្ធ ត្រូវបានបញ្ចូនខ្លួនទៅកាន់ស្នងការដ្ឋាននគរបាលរាជធានីភ្នំពេញ ដើម្បីបន្តនីតិវិធីច្បាប់ ៕ លីហេង

រដ្ឋមន្រ្តីការងារ ចាត់ទុកកម្មការិនីគឺជា “វីរនារី” និងលើក​ទឹកចិត្ត​ឱ្យ​រួមគ្នា​យក​ចិត្ត​ទុក​ដាក់​លើក​កម្ពស់​សិទ្ធិ​កម្មការិនី​បន្ថែមទៀត

2026/03/08 04:40:33 pm        314
Facebook Telegram Linkin
ស្របពេលដែលកម្ពុជាអបអរសាទរខួបលើកទី១១៥ នៃទិវាអន្តរជាតិនារី ៨មីនា ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា កម្មការិនីគួរ​តែ​ត្រូវ​បាន​ចាត់​ទុក​ជា ​“វីរនារី” ពីព្រោះពួកគាត់ពិតជាបានលះបង់ជាច្រើន រាប់ទាំងការជួយការងារផ្ទះ មើល​ថែ​រក្សាកូន ឪពុកម្តាយ រកចំណូលសម្រាប់ផ្គត់ផ្គង់គ្រួសារដើម្បីលើកកម្ពស់ជីវភាព ជួយ​ដល់​សេដ្ឋកិច្ច​គ្រួសារ និងសេដ្ឋកិច្ចជាតិ។ ហេតុនេះ ការលើកកម្ពស់សិទ្ធិសេរីភាព លក្ខខណ្ឌការងារ និង​សុវត្ថិភាពការងារ សម្រាប់កម្មករនិយោជិត ជាពិសេសស្រ្តីគឺជាការងារចាំបាច់ និងអាទិភាពមួយ។ក្នុងឱកាសអញ្ជើញជាអធិបតីក្នុងសន្និបាតផ្សព្វផ្សាយរបាយការណ៍បូកសរុបលទ្ធផលការងារឆ្នាំ២០២៥ និងលើកទិសដៅអនុវត្តឆ្នាំ២០២៦ របស់ក្រុមប្រឹក្សាសហជីពជាតិកម្ពុជា (CCNU) និងពិធីអបអរសាទរខួបលើកទី១១៥ នៃទិវាអន្តរជាតិនារី ៨មីនា ឆ្នាំ២០២៦ ក្រោមប្រធានបទ “សន្តិភាព និងសន្តិសុខសម្រាប់ស្រ្តី និងគ្រួសារ” នៅព្រឹកថ្ងៃទី៨ ខែមីនានេះ ឯកឧត្តមរដ្ឋមន្រ្តី បានមានប្រសាសន៍ថា ការអបអរសាទរទិវានារី ៨ មីនា មិនមែនគ្រាន់តែដើម្បីជានិមិត្តរូបនោះទេ តែជាការអបអរសារទរនឹងសមិទ្ធផលឆ្នាំចាស់ និងការតម្រង់ទិសសម្រាប់បេសកកម្មឆ្នាំថ្មី២០២៦ របស់ CCNU ជាពិសេសគឺជាការជួបជុំ ដើម្បីរឹតចំណងសាមគ្គីភាព បង្កើនភាពស្និទ្ធស្នាល សម្ដែងនូវការដឹងគុណយ៉ាងជ្រាលជ្រៅចំពោះការចូលរួម និងផ្សារភ្ជាប់គុណតម្លៃរបស់ស្ត្រីកម្ពុជាក្នុងសហជីព ការថែរក្សាសុខសន្តិភាព និងការកសាងមាតុភូមិឱ្យរីកចម្រើនដូចបច្ចុប្បន្ន។ឆ្លៀតក្នុងឱកាសនោះ ឯកឧត្តមរដ្ឋមន្រ្តី បានលើកទឹកចិត្តដល់ថ្នាក់ដឹកនាំសហជីព អង្គការវិជ្ជាជីវៈផ្សេងទៀត និងកម្មករនិយោជិតទាំងអស់ ឱ្យបង្កើនកិច្ចសហការគ្នាក្នុងការរាយការណ៍ពីការរំលោភបំពានសិទ្ធិសេរីភាព លក្ខខណ្ឌការងារ ផលប្រយោជន៍ ឬភាពមិនប្រក្រតីនានា ទៅដល់ក្រុមអធិការកិច្ច ឬមន្រ្តីផ្សះផ្សារដោះស្រាយវិវាទការងារ របស់ក្រសួងការងារដើម្បីអន្តរាគមន៍ជាបន្ទាន់ ព្រោះថាមានតែបងប្អូននៅមូលដ្ឋានទេដែលជាភ្នែក ច្រមុះ ត្រចៀករបស់ក្រសួង។បន្ថែមពីនេះ ក៏ត្រូវបង្កើនការជ្រើសរើសយកយន្តការដោះស្រាយបញ្ហានៅកន្លែងការងារ រវាងនិយោជក និងកម្មករនិយោជិត តាមរយៈការចាប់ដៃគូជាមួយរាជរដ្ឋាភិបាល ក្រសួងការងារ ក៏ដូចជាយន្តការកិច្ចសន្ទនាសង្គម និងត្រីភាគីរបស់ ILO ដែលវាប្រសើរជាងការជ្រើសរើសយកការ “បិទផ្លូវ” ដែលមិនអាចដោះស្រាយបញ្ហាបាន តែបង្កការប៉ះពាល់ដល់សិទ្ធិអ្នកដទៃថែមទៀតផង៕ អត្ថបទ៖ ឈិត បូរ៉ាវី 

សម្តេចប្រធានរដ្ឋសភា យកឱកាសនៃទិវាអន្តរជាតិនារី ៨ មីនា ជួបសំណេះសំណាល និងចែក​អំណោយ​ជូនពលរដ្ឋភៀសសឹកនៅស្រុកក្រឡាញ់ និងស្រុកពួក ខេត្តសៀមរាប

2026/03/08 03:47:44 pm        236
Facebook Telegram Linkin
ឆ្លៀតក្នុងឱកាសនៃទិវាអន្តរជាតិនារី ៨ មីនា លើកទី១១៥ នៅព្រឹកថ្ងៃទី៨ ខែមីនា ឆ្នាំ២០២៦នេះ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា បាន​អញ្ជើញ​ចុះ​ជួបសំណេះសំណាល និងចែកអំណោយជូនប្រជាពលរដ្ឋភៀសសឹក ដែល​កំពុង​ស្នាក់​នៅ​ជំរុំ​បណ្តោះអាសន្ន នៅវត្តបូណ៌ខ្នាតេជោ ស្ថិតនៅឃុំចន្លាស់ដៃ ស្រុកក្រឡាញ់ និង វត្ត​សសរ​ស្តម្ភ ស្រុកពួក ខេត្តសៀមរាប។នៅក្នុងឱកាសជួបសំណេះសំណាលនេះ សម្តេចប្រធានរដ្ឋសភា បាននាំ​នូវ​ការ​ផ្តាំ​ផ្ញើ​សាក​សួរ​សុខ​ទុក្ខ​យ៉ាង​កក់ក្តៅ និងទឹកចិត្តអាណិតស្រឡាញ់ពីសម្តេចអគ្គមហាសេនាបតីតេជោ ហ៊ុន សែន ប្រធាន​ព្រឹទ្ធសភា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ចំពោះបងប្អូន ក្មួយៗ ប្រជាពលរដ្ឋទាំងអស់ ដែលកំពុងរស់នៅក្នុងជំរំជនភៀសសឹក។សម្តេចប្រធានរដ្ឋសភាបានសម្តែងនូវទឹកចិត្តអាណិតអាសូរ និងសេចក្តីស្រលាញ់ជ្រាលជ្រៅចំពោះប្រជាពលរដ្ឋជាខ្លាំង។ សម្តេចយល់ច្បាស់ពីអារម្មណ៍របស់បងប្អូនប្រជាពលរដ្ឋជាជនភៀសសឹកទាំងអស់ ជាពិសេស ស្ត្រី ក្មេងស្រី និងជនចាស់ជរា ដែលត្រូវឃ្លាតចាកឆ្ងាយពីផ្ទះសម្បែង ដែលធ្លាប់រស់នៅប្រកបដោយភាពសុខសាន្ត ហើយត្រូវមករស់នៅក្នុងជំរំប្រមូលផ្តុំបែបនេះ។ ទោះបីមានការថែទាំ ការធានាសុវត្ថិភាព និងការផ្តល់សេវាសំខាន់ៗក៏ដោយ ក៏មិនស្រួលដូចការរស់នៅក្នុងផ្ទះរបស់ខ្លួនឡើយ។ ដូចពាក្យចាស់ពោលថា«គ្មានកន្លែងណា ប្រសើរជាងផ្ទះយើងឡើយ»។រាជរដ្ឋាភិបាល កំពុងខិតខំគ្រប់មធ្យោបាយ ដើម្បីធ្វើយ៉ាងណា ឲ្យប្រជាពលរដ្ឋអាចវិលត្រឡប់ទៅលំនៅឋានវិញបាន ប៉ុន្តែពេលនេះ មិនទាន់អាចវិលត្រឡប់ទៅបានទេ ដោយសារហេតុផល អសន្តិសុខ និងសុវត្ថិភាព។ ថ្នាក់ដឹកនាំរាជរដ្ឋាភិបាល តែងតែគិតគូរពីសុខសុវត្ថិភាព និងអាយុជីវិតរបស់ប្រជាពលរដ្ឋជាអាទិភាព។ក្នុងកាលៈទេសៈដ៏លំបាកនេះ សម្តេចបានអំពាវនាវ និងលើកទឹកចិត្តដល់បងប្អូនទាំងអស់ សូមបន្តអត់ធ្មត់ និងស៊ូទ្រាំមួយរយៈពេលទៀត រង់ចាំរហូតដល់ស្ថានភាពមានប្រក្រតីភាពឡើងវិញ ពេលនោះបងប្អូនអាចត្រឡប់ទៅភូមិស្ថានរបស់ខ្លួនវិញបាន។  សូមថែទាំសុខភាព ទាំងផ្លូវកាយ និងផ្លូវចិត្តឱ្យបានល្អជាប់ជាប្រចាំ ។ សូមបន្តជឿជាក់លើរាជរដ្ឋាភិបាល ដែលមានសម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី និងថ្នាក់ដឹកនាំកំពូល បិតាសន្តិភាព គឺសម្តេចតេជោ ហ៊ុន សែន ព្រោះលោកមិនដែលទុកចោលប្រជាពលរដ្ឋម្តងណានោះឡើយ៕ 

មន្ទីររ៉ែខេត្តបាត់ដំបង អំពាវនាវពលរដ្ឋកុំទិញប្រេងស្តុកទុកនាំបង្កហានិភ័យ

2026/03/08 03:38:13 pm        257
Facebook Telegram Linkin
លោក លឹម ប៊ុនលី ប្រធានមន្ទីររ៉ែ និងថាមពលខេត្តបាត់ដំបង បាន​អំពាវ​នាវ​ដល់​បង​ប្អូន​ប្រជា​ពលរដ្ឋ​​សូ​ម​កុំទិញប្រេងស្តុកទុកក្នុងពីដុងជ័រដែលអាចបង្កហានិភ័យ ខណៈ​បច្ចុប្បន្ន​នេះ​ប្រេង​មាន​គ្រប់​គ្រាន់​សម្រាប់ផ្គត់ផ្គង់តម្រូវការប្រើប្រាស់ប្រចាំថ្ងៃ។លោក លឹម ប៊ុនលី គូសបញ្ជាក់ថា នៅទូទាំងខេត្តបាត់ដំបងមានស្ថានីយប្រេងឥន្ធនៈ៣៨៧ស្ថានីយហើយប្រេងក្នុងស្តុកមានគ្រប់គ្រាន់សម្រាប់ផ្គត់ផ្គង់ដល់អតិថិជន។លោកប្រធានមន្ទីរ អំពាវនាវដល់ក្រុមហ៊ុនផ្គត់ផ្គង់ប្រេងត្រូវលក់ប្រេងទៅឱ្យស្ថានីយដែលជាដៃគូរបស់ខ្លួនឱ្យបានទាន់ពេលវេលា។លោកអំពាវនាវទៅដល់ស្ថានីយលក់ប្រេងនៅទូទាំងខេត្តបាត់ដំបងត្រូវលក់ប្រេងទៅតាមតម្លៃដែលកំណត់ដោយក្រសួងពាណិជ្ជកម្ម កុំឆ្លៀតឱកាសដំឡើងថ្លៃ ប្រសិនបើម្ចាស់ស្ថានីយណាធ្វើខុសច្បាប់ដូចជាលក់ក្នុងតម្លៃខុសគោលការណ៍ក្រុមហ៊ុនធំ ឬរដ្ឋកំណត់ ឬមានប្រេងតែមិនបើកលក់នោះ ក្រសួងនឹងដកវិញ្ញាបនបត្រឈប់ឱ្យប្រកបអាជីវកម្មតទៅទៀត។សូមជម្រាបថា បច្ចុប្បន្ននេះតំណាងស្ថានីយប្រេងឥន្ធនៈធំៗនៅក្នុងខេត្តបាត់ដំបងបានអនុវត្តន៍ការលក់ប្រេងទៅតាមតម្លៃកំណត់របស់ក្រសួងពាណិជ្ជកម្មពុំមានការដំឡើងថ្លៃនោះទេ។មន្ទីររ៉ែ និងថាមពល មន្ទីរពាណិជ្ជកម្ម និងសាខាក.ប.បខេត្តបាត់ដំបងបាននិងកំពុងបន្តចុះតាមដាន ត្រួតពិនិត្យការលក់ជាប្រចាំ ដើម្បីធានាការលក់ និងជំរុញឱ្យស្ថានីយប្រេងឥន្ធនៈអនុវត្តឱ្យបានគត់មត់តាមលក្ខណៈស្តង់ដាបច្ចេកទេស និងបង្ការការឆ្លៀតឱកាសដំឡើងថ្លៃប្រេងឥន្ធនៈខុសប្រក្រតីជាដើម៕

មន្រ្ដីជាន់ខ្ពស់រាជរដ្ឋាភិបាល៖ រាជរដ្ឋាភិបាលតែងដោះស្រាយសុខទុក្ខ និងពង្រឹង​សុខដុមនីយកម្ម​សាសនា

2026/03/08 03:26:13 pm        236
Facebook Telegram Linkin
ឯកឧត្តមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស ថ្លែងថា រាជ​រដ្ឋាភិបាល​តែងយកចិត្តទុកដាក់ដោះស្រាយសុខទុក្ខ និងពង្រឹងសុខដុមនីយកម្មសាសនា ដោយ​បើក​ជំនឿសាសនាយ៉ាងទូលំទូលាយជូនប្រជាពលរដ្ឋ។ការលើកឡើងបែបនេះរបស់ឯកឧត្តមបណ្ឌិត អូស្មាន ហាស្សាន់ បានធ្វើឡើងនៅថ្ងៃទី៧ ខែមីនា ឆ្នាំ​២០២៦ ក្នុងពិធីចែកកញ្ចប់អាហារស្រាយបួសខែរ៉ាម៉ាឌន ជូនសាសនិកឥស្លាម ៤៣០គ្រួសារ នៅខេត្តកោះកុង។ឯកឧត្តមទេសរដ្ឋមន្រ្តីទទួលបន្ទុកបេសកម្មពិសេស បានបន្ថែមទៀតដែរថា ឈរលើ​មូលដ្ឋាន​នៃ​ការ​ពង្រឹងសុខដុមនីយកម្មសាសនិកនៃគ្រប់សាសនា ប្រឆាំងនូវរាល់ទង្វើរើសអើង សំដៅ​ទប់​ស្កាត់​ការ​យកសាសនាធ្វើជាអាជីវកម្មដែលអាចបង្កជាវិបត្តិសាសនានៅកម្ពុជា។ កម្ពុជា មានមោទន​ភាព​ចំពោះ​ប្រជាពលរដ្ឋរបស់ខ្លួនដែលគោរពកាន់សាសនាផ្សេងៗគ្នា ក្រោមរូបភាពសាមគ្គីគ្នាយ៉ាងល្អ ដែល​នេះត្រឹមតែជាមោទនភាពសម្រាប់តែកម្ពុជាប៉ុណ្ណោះទេ តែជា​មោទនភាព​សម្រាប់​បណ្តា​ប្រទេស​ក្នុងតំបន់ក៏ដូចជាពិភពលោក។ឯកឧត្តម អូស្មាន ហាស្សាន់ ពន្យល់ដែរថា តាមរយៈគោលនយោបាយដ៏ត្រឹមត្រូវ​របស់​រាជរដ្ឋាភិបាល​ដែលមានកិច្ចសហការគ្នាល្អជាមួយគ្រ់ស្ថាប័ន អង្គភាព ក៏ដូចជាដៃគូពាក់ព័ន្ធ ដើម្បីធ្វើឱ្យមានប្រសិទ្ធភាពខ្ពស់លើការងារ និងបង្កភាពងាយស្រួលជូនពលរដ្ឋគ្រប់សាសនិកនៅព្រះរាជាណាចក្រកម្ពុជាទាំងបច្ចុប្បន្ន និងទៅអនាគត។ ចំណែកឯលោក ឡៅ ប៊ុនខេង អភិបាលរងខេត្តកោះកុង គាំទ្រចំពោះការផ្តល់នូវសុខដុមនីយកម្ម​សាសនា​ដោយមិនប្រកាន់ការអើងរើសណាមួយក្នុងមូលដ្ឋាន សំដៅធ្វើ​យ៉ាងរក្សាបានការ​រស់នៅ​ប្រកប​ដោយសុខសន្តិភាព និងការអភិវឌ្ឍន៍ ក្រោមគោលនយោបាយរបស់រាជរដ្ឋាភិបាល អាណត្តិទី៧នេះ។ រដ្ឋបាលខេត្តបានផ្តល់ឱកាសការងារ មុខតំណែងតួនាទី និងលើកកម្ពស់ផ្នែកសាសនាជូនដល់បងប្អូនសាសានិកខ្មែរឥស្លាមគ្រប់ពេលវេលា ក្រោមម្លប់សុខសន្តិភាព។លោកអភិបាលរងខេត្ត បានចាត់ទុកថា ជាក់ស្តែង អំណោយដែលបានចែកជូននៅពេលនេះ រួមមានកញ្ចប់អាហារស្រាយបួសចំនួន ៤៣០ កញ្ចប់ ដែលជាជំនួយសប្បុរសធម៌ទទួលបានពី អង្គការ Qatar Charity នៃរដ្ឋកាតា នឹងជួយសម្រាលបន្ទុក និងអបអរសាទរដល់បងប្អូនសាសនិកឥស្លាមក្នុងអំឡុងពេលបំពេញកាតព្វកិច្ចបួសក្នុងខែដ៏ពិសិដ្ឋនេះ៕

បណ្ដាញសង្គម

ព័ត៌មានថ្មីៗ

លោក Netanyahu ថាលោកទទួលការព្យាបាលជំងឺមហារីកក្រពេញប្រូស្តាតដោយជោគជ័យ
04/24/2026 09:04 PM
Facebook Telegram Linkin
លោក Zelenskiy ធ្វើដំណើរទៅដល់អារ៉ាប៊ីសាអ៊ូឌីត ដើម្បីស្វែងរកកិច្ចសហប្រតិបត្តិការសន្តិសុខ
04/24/2026 08:04 PM
Facebook Telegram Linkin
មនុស្ស ២នាក់ស្លាប់ អំឡុងការវាយប្រហារតាមអាកាស ខណៈយោធោអ៊ីស្រាអែលចេញការព្រមានជម្លៀស នៅភាគខាងត្បូងលីបង់
04/24/2026 08:04 PM
Facebook Telegram Linkin
សមាជិកសភាហេសបូឡា៖ បទឈប់បាញ់ «គ្មានន័យ» ទេ ដោយសារតែការវាយប្រហាររបស់អ៊ីស្រាអែល
04/24/2026 08:04 PM
Facebook Telegram Linkin
កងកម្លាំងរក្សាសន្តិភាពឥណ្ឌូនេស៊ីរបស់ UN ស្លាប់ដោយសាររបួស អំឡុងការផ្ទុះ នៅលីបង់
04/24/2026 07:04 PM
Facebook Telegram Linkin
ទីក្រុងប៉េកាំងច្រានចោលការចោទប្រកាន់របស់លោក Trumpថា នាវាអ៊ីរ៉ង់ស្ទាក់ចាប់បានមានអំណោយពីចិន
04/24/2026 07:04 PM
Facebook Telegram Linkin
អាល្លឺម៉ង់ និងអ៊ីតាលី សង្កត់ធ្ងន់លើការរួបរួម ក្នុងចំណោមសមាជិករបស់អង្គការណាតូ
04/24/2026 07:04 PM
Facebook Telegram Linkin
លោក Putinនិយាយថា រុស្ស៊ីនឹងការពារផលប្រយោជន៍របស់ខ្លួននៅតំបន់អាក់ទិក
04/24/2026 07:04 PM
Facebook Telegram Linkin
ក្តីបារម្ភ និងភាពមិនច្បាស់លាស់កើតមាននៅអ៊ីរ៉ាក់ ខណៈអាមេរិកបញ្ឈប់ការដឹកជញ្ជូនប្រាក់ដុល្លារ
04/24/2026 07:04 PM
Facebook Telegram Linkin
គណៈកម្មការស៊ើបអង្កេតតង់ហ្សានី៖ មនុស្សជាង ៥០០នាក់ ត្រូវបានសម្លាប់ក្នុងអំពើហិង្សាបោះឆ្នោតឆ្នាំមុន
04/24/2026 07:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.