BTV NEWS

ឯកឧត្ដមឧបនាយករដ្ឋមន្រ្តីប្រចាំការ វង្សី វិស្សុត អញ្ជើញជាអធិបតីក្នុងសិក្ខាសាលាដាក់ឱ្យអនុវត្តគម្រោងវាយតម្លៃលើផលប៉ះពាល់នៃលិខិតបទដ្ឋានគតិយុត្ត (RIA)

មន្ដ្រីក្រសួងផែនការខេត្តតាកែវ ទទួលបានការបណ្ដុះបណ្ដាលជំនាញ ប្រើប្រាស់ទិន្នន័យអង្កេតសេដ្ឋកិច្ច សង្គមកិច្ច និងកម្មវិធី SPSS ក្នុងគោលបំណង ពង្រឹងសមត្ថភាពមន្រ្តីនៅថ្នាក់ក្រោមជាតិ

ពិធីបើកសិក្ខាសាលាថ្នាក់តំបន់ស្តីពី «ការកសាងសមត្ថភាពរបស់អ្នកវាយតម្លៃបង្គោលអាស៊ាន លើគោលការណ៍ណែនាំស្តីពីការវាយតម្លៃការសិក្សាពីមុនលើអ្នកជំនាញទេសចរណ៍អាស៊ាន»

ឯកឧត្តមកិត្តិសេដ្ឋាបណ្ឌិត ជាម យៀប ៖កិច្ចប្រជុំ AIPA Caucus ជាវេទិកាចែករំលែកការអនុវត្តល្អបំផុត បទពិសោធន៍គំនិតផ្តួចផ្តើម គោលនយោបាយ និងការបង្កើតច្បាប់

ព័ត៌មានជាតិ

សម្តេចតេជោ ហ៊ុន សែន នឹងបើកកិច្ចប្រជុំសមាជរដ្ឋសភា និងព្រឹទ្ធសភា នៅថ្ងៃទី២ ខែមិថុនា

នៅថ្ងៃទី២ ខែមិថុនា ឆ្នាំ២០២៥ សមាជរដ្ឋសភា និងព្រឹទ្ធសភា នៃព្រះរាជាណាចក្រកម្ពុជា នឹងបើកកិច្ចប្រជុំក្រោម អធិបតីភាពដ៏ខ្ពង់ខ្ពស់របស់សម្តេចអគ្គមហាសេនាបតីតេជោ ហ៊ុន សែន ប្រធានសមាជរដ្ឋសភា និងព្រឹទ្ធសភា និងជាប្រធានព្រឹទ្ធសភា នៃព្រះរាជាណាចក្រកម្ពុជា តាមរបៀបវារៈដូចតទៅ៖១- ការពិភាក្សា និងអនុម័តប្រធានបទអំពីប្រព័ន្ធគាំពារសង្គម២- ការពិភាក្សា និងអនុម័តប្រធានបទអំពីសេដ្ឋកិច្ចក្រៅប្រព័ន្ធ៣- ការពិភាក្សា និងអនុម័តប្រធានបទអំពីវិស័យកសិកម្ម។

អគ្គនាយកអង្គការសុខភាពពិភពលោក«យើងត្រូវរំលឹកដល់គ្រប់ៗគ្នា និងរំលឹកដល់ពិភពលោក អំពីបទពិសោធន៍នៃនាវា អឹមអេស វេស្ទើរដាម ៖ កម្ពុជាប្រទេសតូច បេះដូងធំ»

លោក HE Dr Tedros Adhanom Ghebreyesus អគ្គនាយកអង្គការសុខភាពពិភពលោក បានបញ្ជាក់ថា «យើងត្រូវរំលឹកដល់គ្រប់ៗគ្នា និងរំលឹកដល់ពិភពលោក អំពីបទពិសោធន៍នៃនាវា អឹមអេស វេស្ទើរដាម ៖ កម្ពុជាប្រទេសតូច បេះដូងធំ» ។ក្នុងជំនួបអាទិភាពរបស់រដ្ឋមន្ត្រីសុខាភិបាលកម្ពុជា ជាមួយអគ្គនាយកអង្គការសុខភាពពិភពលោក ក្នុងវេលាដ៏មមាញឹកនាមហាសន្និបាតអង្គការសុខភាពពិភពលោកលើកទី៧៨ ដែលរដ្ឋជាសមាជិក១៩៤ប្រទេស បានអញ្ជើញចូលរួម នាថ្ងៃទី២៦ ខែឧសភា ឆ្នាំ២០២៥, Palais des Nations ក្រុងហ្សឺណែវ សហព័ន្ធស្វីស។ក្នុងជំនួបដ៏ស្និតស្នាលពិសេសដោយឡែកនេះ ឯកឧត្តមសាស្រ្តាចារ្យ ឈាង រ៉ា បានជម្រាបថ្លែងអំណរគុណជូនដល់ ឯកឧត្តមអគ្គនាយក WHO អំពីការគាំទ្ររបស់អង្គការសុខភាពពិភពលោក មកដល់សុខាភិបាលកម្ពុជា និងបានបញ្ជាក់ជូនអំពីអនុលោមភាពរបស់កម្ពុជា ជាមួយបេសកម្មរបស់អង្គការសុខភាពពិភពលោក។ ឯកឧត្តមសាស្រ្តាចារ្យរដ្ឋមន្រ្តី បានជម្រាបជូនអំពីចំនុចសំខាន់ៗ នៃវឌ្ឍនភាពសុខាភិបាលកម្ពុជា ដែលរួមមាន ៖ ១-ការលើកកម្ពស់សុខភាព សុខមាលភាពសហគមន៍ (PHC, Primary Health Care) តាមរយៈការដាក់ចេញយុទ្ធនាការអប់រំសុខភាពបឋម ការពង្រីកការចាក់វ៉ាក់សាំង, ២-ការពង្រីកការថែទាំព្យាបាល និងផ្តល់លទ្ធភាពឱសថអំពីជំងឺមិនឆ្លងក្នុងសហគមន៍, ៣-ការប្រកាសដាក់ឱ្យដំណើរការផែនការសកម្មភាពបង្ការ និងគ្រប់គ្រងជំងឺមហារីក ២០២៥-២០៣៣, ៤-ឥរិយាបទបុរេសកម្មលើការតាមដាន ត្រួតពិនិត្យជំងឺឆ្លងគ្រប់ប្រភេទដោយក្រុមការងារជំនាញឆ្លើយតបបន្ទាន់, ៥-ការរៀបចំ និងដាក់ដំណើរការផែនការយុទ្ធសាស្រ្តសុខាភិបាលដំណាក់កាលទី៤ (HSP4) ២០២៥-២០៣៣ ដែលជាក្របខ័ណ្ឌយុទ្ធសាស្រ្តរយៈពេលវែង ដ៏ទូលំទូលាយដែលស្របតាម SDGs និងចក្ខុវិស័យ នៃការសម្រេចបាននូវការគ្របដណ្តប់សុខភាពជាសកល។ ផែនការនេះបង្ហាញទិសដៅយុទ្ធសាស្ត្រចំនួន ៥៖ ក) ការពង្រឹងការថែទាំសុខភាពបឋម និងសេវាសំខាន់ៗ ខ) ការលើកកម្ពស់ធនធានមនុស្សសម្រាប់សុខភាព គ) ការលើកកម្ពស់ការផ្តល់ហិរញ្ញប្បទាន និងអភិបាលកិច្ចសុខាភិបាល ឃ) ពង្រីកប្រព័ន្ធសុខភាពឌីជីថល និងព័ត៌មាន ង) ការកសាងភាពធន់នឹងប្រព័ន្ធសុខភាព និងការត្រៀមលក្ខណៈសង្គ្រោះបន្ទាន់។ឯកឧត្តមសាស្រ្តាចារ្យរដ្ឋមន្ត្រីសុខាភិបាលកម្ពុជា បានរំលឹកដល់អនុស្សាវរីយ៍ដ៏អស្ចារ្យជាប្រវត្តិសាស្ត្រ ដែលបានចារឹកក្នុងបេះដូងកម្ពុជា និងពិភពលោក ខណៈកាលណោះ ជំងឺកូវីដ-១៩ ដ៏កាចសាហាវកំពុងយកជីវិតមនុស្សលោក សម្តេចតេជោ ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានព្រឹទ្ធសភានៃកម្ពុជា បានធ្វើការសម្រេចចិត្តជាប្រវត្តិសាស្ត្រផ្តល់ការអនុញ្ញាត និងចេញទៅទទួលយកដោយខ្លួនលោកផ្ទាល់ នូវអ្នកធ្វើដំណើរតាមនាវា អឹមអេស វេស្ទើរដាម ចំនួន ២២៥៧រូប ត្រូវបានអនុញ្ញាតិ្តអោយចូលចត និងសង្គ្រោះនៅកម្ពុជា ចំថ្ងៃទី១៣ ខែកុម្ភះ ឆ្នាំ២០២០ ជាថ្ងៃនៃក្តីស្រឡាញ់ (Valentine’s Day) ខណៈនាវានេះត្រូវបានបដិសេធន៍មិនអោយចូលចតនៅបណ្តារប្រទេសនានា។ ការសម្រេចចិត្តប្រកបដោយគតិបណ្ឌិតដ៏ខ្ពង់ខ្ពស់របស់ប្រមុខដឹកនាំកម្ពុជា ជាវីរះភាពដែលបញ្ជាក់នូវអត្ថន័យដ៏ជ្រាលជ្រៅបំផុតគឺ៖- ទី១ សេចក្តីក្លាហាន (courage)- ទី២ ការឆ្លើយតបទាន់ពេលវេលា (timely reactive)-ទី៣ អត្ថន័យនៃអាទិភាពលើអាទិភាព (sense of priorities)-ទី៤ ដំណោះស្រាយសុខភាពសាធារណៈដែលចាប់ផ្តើមមានបញ្ហា (public health problems solving) និង-ទី៥ សិទ្ធិដែលត្រូវរស់រាមានជីវិតរបស់អ្នកដំណើរដែលជាប់គាំងលើនាវា (Right to live and humanity)។HE Dr Tedros Adhanom Ghebreyesus អគ្គនាយកអង្គការសុខភាពពិភពលោក (DG-WHO) បានសំដែងនូវការកោតសរសើរ ចំពោះសុខាភិបាល និងរាជរដ្ឋាភិបាលកម្ពុជា ក្នុងភាពជាដៃគូយុទ្ធសាស្ត្រ របស់អង្គការសុខភាពពិភពលោក ដោយទទួលបានជោគជ័យដ៏ធំធេងលើការប្រយុទ្ធប្រឆាំងជំងឺកូវីដ-១៩កន្លងមក និងបានបញ្ជាក់ការគាំទ្ររបស់លោកលើអទិភាពសំខាន់ៗរបស់សុខាភិបាលកម្ពុជា៕អត្ថបទ រដ្ឋា

ការដោះស្រាយសំណើរបស់បងប្អូនកម្មករនៃក្រុមហ៊ុនដាប់ប៊ែលយូភី ស្ព័ត (ខេមបូឌា)ឯ.ក ត្រូវបានដោះស្រាយចប់ស្ទើរ១00%ប្រកបដោយការយកចិត្តទុកដាក់ និងលឿនរហ័ស

គិតត្រឹមម៉ោង ៤រសៀលថ្ងៃទី ២៦ខែឧសភានេះ ការដោះស្រាយសំណើរបស់កម្មករក្រុមហ៊ុនដាប់ប៊ែលយូភី ស្ព័ត (ខេមបូឌា)ឯ.ក ត្រូវបានដោះស្រាយចប់ស្ទើរគ្រប់ ១០០ភាគរយហើយ ក្រោមការសម្របសម្រួលដ៏លឿនរហ័សរបស់មន្ទីរការងារ និងបណ្តុះបណ្តាលវិជ្ជាជីវៈខេត្តស្វាយរៀងនៃក្រសួងការងារ និងបណ្ដុះបណ្ដាលវិជ្ជាជីវៈ។ នេះបើតាមអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈឯកឧត្តម ស៊ុន មេសាដែលបានបញ្ជាក់ឱ្យដឹងនៅថ្ងៃទី២៦នេះ។ ឯកឧត្តម ស៊ុន មេសា បានថ្លែងថា៖«ចាប់តាំងពីព្រឹកថ្ងៃទី ២៦ខែឧសភានេះ មន្រ្តីជំនាញនៃមន្ទីរការងារ និងបណ្ដុះបណ្ដាលវិជ្ជាជីវៈខេត្តស្វាយរៀង បានសម្របសម្រួល ដោយមានសមាសភាពពីតំណាងកម្មករនិយោជិត អ្នកពិនិត្យគុណភាព ប្រធានក្រុមតាមផ្នែកនីមួយៗ បានស្នើទៅក្រុមហ៊ុនចំនួន ១០ចំណុច ក្នុងនោះគិតត្រឹមម៉ោង ៤រសៀលនេះ ភាគីទាំងអស់បានសម្រេចឯកភាពគ្នាចំនួនរហូតទៅដល់ ៨ចំណុច។ដោយនៅសល់តែពីរចំណុចទៀតតែប៉ុណ្ណោះដែលភាគីទាំងពីរនឹងត្រូវបន្តជជែកពិភាក្សាគ្នាបន្ថែមទៀត»។ សំណើដប់ចំណុចនោះរួមមាន ការថែមម៉ាស៊ីនស្គែនវត្តមានឱ្យច្រើនជាងមុន, សំណើរៀបចំរោងអាហារ, ការសម្រួលម៉ោងពេលដល់ស្រ្តីមានផ្ទៃពោះ និងស្ត្រីមានកូនខ្ចី, ការសម្អាតអនាម័យក្នុងបន្ទប់ទឹក, ការផ្តល់ប្រាក់ថែទាំសុខភាព, ការផ្តល់ប្រាក់ជំនាញ, និងការបើកប្រាក់ឈ្នួលទៀងទាត់ជាដើម។ អ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈបានអះអាងថា៖ ក្រសួងទទួលយករាល់សំណើរបស់បងប្អូនកម្មករកម្មការិនីយកមកពិនិត្យ ហើយក្រសួងក៏ស្ដាប់ហេតុផលខាងភាគីក្រុមហ៊ុនផងដែរ។ ជាមួយគ្នានេះសំណើរបស់បងប្អូនកម្មករកម្មការិនី ក៏ត្រូវផ្ទៀងផ្ទាត់ជាមួយនឹងច្បាប់ និងភាពសមហេតុផលសមរម្យនៃការទទួលយកបានទាំងអស់គ្នាផងដែរ។ ឯកឧត្តមបានបន្តថា ដោយឈរលើស្មារតីយោគយល់គ្នាអធ្យាស្រ័យល្អ ការសម្របសម្រួលសម្រាប់បងប្អូននៅក្រុមហ៊ុនដាប់ប៊ែលយូភី ស្ព័ត (ខេមបូឌា)ឯ.កនេះទទួលបានលទ្ធផលលឿន ហើយរហ័សឈានដល់ការត្រូវរូវគ្នារហូតដល់ ៨ចំណុច ក្នុងចំណោម ១០ចំណុច ដែលទាំងនេះ គឺជារឿងមួយដែលសបញ្ជាក់ថា បងប្អូនកម្មករកម្មការិនី និងក្រុមហ៊ុន មានភាពចាស់ទុំ និងចេះយោគយល់អធ្យាស្រ័យគ្នាបានយ៉ាងល្អ ដើម្បីធានាថា បរិយាកាសនៃក្នុងរោងចក្រសហគ្រាសកាន់តែប្រសើរបន្ថែមទៀត។អ្នកនាំពាក្យរូបនេះថា ដោយឡែកចំណុចដែលនៅសល់ចំនួនពីរចំណុចនេះ ភាគីទាំងអស់នឹងបន្តដោះស្រាយនូវថ្ងៃស្អែកជាបន្តទៀតក្រោមការយល់ចិត្តទុកដាក់ និងតាមដានពីមន្រ្តីជំនាញនៃមន្ទីរការងារ និងបណ្ដុះបណ្ដាលវិជ្ជាជីវៈខេត្តស្វាយរៀងផងដែរ។គួរបញ្ជាក់ផងដែរថា រាជរដ្ឋាភិបាលកម្ពុជាតាំងពីអាណត្តិមុនៗជាពិសេសអាណត្តិទី៧ដែលដឹកនាំដោយសម្ដេចមហាបវរធិបតី ហ៊ុន ម៉ាណែត បានដាក់ចេញនូវអនុសាសន៍ចំនួន១០ចំណុចដល់ក្រសួងការងារ និងបណ្តុះបណ្តាលវិជ្ជាជីវៈដើម្បីលើកកម្ពស់ដល់វិស័យការងារ សន្តិសុខសង្គម និងការបណ្តុះបណ្តាលវិជ្ជាជីវៈក្នុងនោះកម្មករនិយោជិត គឺជាអាទិភាពមួយសំខាន់ដែលរាជរដ្ឋាភិបាលបានគិតគូរនិងផ្ដល់អត្ថប្រយោជន៍ជាច្រើនដែលនៅក្នុងនោះរួមមាន ការបន្តឡើងប្រាក់ឈ្នួលជាបន្តបន្ទាប់ប្រចាំឆ្នាំ ការផ្ដល់ការថែទាំសុខភាពដល់សមាជិកក្នុងបន្ទុក និងការបន្តប្រាក់ឧបត្ថម្ភដល់ស្ត្រីមានផ្ទៃពោះ រួមទាំងការបណ្តុះបណ្តាលជាដើមដែលនេះគឺសុទ្ធសឹងតែជាយន្តការគន្លឹះសំខាន់ៗដើម្បកែប្រែជីវភាពកម្មករនិយោជិត និងលក្ខខណ្ឌការងារ៕

សពកងទ័ពមួកខៀវកម្ពុជា២រូបពលីនៅប្រទេសស៊ូដង់ខាងត្បូង បានដឹកមកដល់កម្ពុជាល្ងាចនេះ

ភ្នំពេញ ៖ នៅល្ងាចថ្ងៃទី២៦ ខែឧសភានេះ ឯកឧត្តម ឧបនាយករដ្ឋមន្ត្រី ទៀ សីហា រដ្ឋមន្ត្រីក្រសួងការពារជាតិ បានអញ្ជើញ ក្នុងពិធីទទួលសព កងទ័ពមួកខៀវកម្ពុជា ចំនួន២រូប នៅក្នុងជួរកងអនុសេនាធំរាជអាវុធហត្ថលេខ ៨៧២ ដែលបានទទួលពលីជីវិត ក្នុងពេលបំពេញបេសកកម្មរក្សាសន្តិភាព អង្គការសហប្រជាជាតិ នៅសាធារណរដ្ឋស៊ូដង់ខាងត្បូង។សពកងទ័ពមួកខៀវកម្ពុជា ២រូប ដែលបានទទួលពលី ក្នុងឧបទ្ទវហេតុ ផ្ទុះអាវុធ កាលពីថ្ងៃទី១៣ ខែឧសភា ឆ្នាំ២០២៥ ក្នុងអំឡុងពេលបំពេញបេសកកម្មរក្សាសន្តិភាព អង្គការសហប្រជាជាតិ នៅទីក្រុងMalakal នៃសាធារណរដ្ឋស៊ូដង់ខាងត្បូងនោះ ទី១ កញ្ញា អនុសនីយ៍ឯក ដួង ម៉ាហ្គាលី ទី២ លោក អនុសេនីយ៍ទោ ផាក មុន្នី នាយទាហាន នៅក្នុងជួរនៃកងអនុសេនាធំរាជអាវុធហត្ថលេខ ៨៧២ ។ពិធីទទួលសព នៅអាកាសយានដ្ឋានអន្តរជាតិភ្នំពេញ គឺប្រារព្វតាមពិធីតាមបែបកងទ័ព និងតាមបែបពិធីសាសនា ដែលមានការជួបជុំ នាយទាហាន នាយទាហានរង ពលទាហាន និងបងប្អូនសាច់ញ្ញាតិនៃសព មានការនិមន្តព្រះសង្ឈបង្សុកូល រំកិលមឈូសសព ពិធីហែទង់ជាតិកម្ពុជា និង ទង់អង្គការសហប្រជាជាតិ គ្របលើមឈូស និងធ្វើយុទ្ធដំណើរសពពីព្រលានយន្តហោះ VIP ទៅកាន់កន្លែងប្រារព្ធពិធីសព នៅវត្តជម្ពូវ័ននៅរាធានីភ្នំពេញ និងវត្តក្បាលកោះ ក្រុងអរីយក្សត្រ ខេត្តកណ្តាល។តាមសារ របស់ឯកឧត្តម ឧបនាយករដ្ឋមន្ត្រី ទៀ សីហា បានសរសេរថា ក្នុងនាមថ្នាក់ដឹកនាំក្រសួងការពារជាតិ ព្រមទាំងនាយទាហាន នាយទាហានរង និងពលទាហាន ទាំងអស់នៃកងយោធពលខេមរភូមិន្ទ សូមចូលរួមរំលែកទុក្ខ និងសោកស្តាយចំពោះការបាត់បង់យោធិនទាំងរូប ០២រូប ដែលបានពលីក្នុងអំឡុងពេលបេសកកម្មក្នុងទីក្រុង Malakal នៃកងអនុសេនាធំរាជអាវុធហត្ថ ប្រចាំនៅសាធារណរដ្ឋស៊ូដង់ខាងត្បូង។ ឯកឧត្តម ឧបនាយករដ្ឋមន្ត្រី ទៀ សីហា បានសរសេរទៀតថា នេះជាការបាត់បង់យោធិនដ៏ឆ្នើមពីររូប ដែលបានធ្វើពលិកម្មដើម្បីបុព្វហេតុជាតិមាតុភូមិជាទីស្នេហា ចូលរួមថែក្សាសន្តិភាព ក្រោមឆត្រអង្គការសហប្រជាជាតិ និងរួមសុខទុក្ខជាមួយប្រជាជនកម្ពុជារហូតដល់ថ្ងៃអវសាននៃជីវិត និងបានបួងសួងដល់ដួងវិញ្ញាណក្ខន្ធ យោធិនទាំងពីររូប សូមស្ថិតក្នុងសុគតិភពជានិរន្តរ៍កុំបីឃ្លៀងឃ្លាតឡើយ។សូមបញ្ជាក់ថា កម្ពុជា បានបញ្ជូន កងកម្លាំងអនុសេនាធំរាជអាវុធហត្ថលេខ៨៧២ ចំនួន៧៣នាក់ ក្នុងនោះនារីចំនួន៣៦នាក់ ចេញទៅ បំពេញបេសកកម្មអង្គការសហប្រជាជាតិនៅសាធារណរដ្ឋស៊ូដង់ខាងត្បូង នៅថ្ងៃទី១២ ខែកុម្ភ:ឆ្នាំ២០២៥។បច្ចុប្បន្នកម្ពុជា មានកងកម្លាំងរក្សាសន្តិភាពចំនួន៦២៧នាក់ ក្នុងនោះមាននារីចំនួន១៣០នាក់ កំពុងបំពេញបេសកកម្មរក្សាសន្តិភាពអង្គការសហប្រជាជាតិUNនៅប្រទេសលីបង់ ស៊ូដង់ខាងត្បូង អាហ្វឹ្រកកណ្តាល និងសាធារណរដ្ឋប្រជាធិបតេយ្យកុងហោ្គ។អត្ថបទ ស៊ុម សុខជា

កម្ពុជា-ម៉ាឡេស៊ី វាយតម្លៃខ្ពស់ចំពោះភាពរីកចម្រើននៃទំនាក់ទំនងប្រទេសទាំងពីរ

នាសៀលថ្ងៃទី២៦ ខែឧសភា ឆ្នាំ២០២៥, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានជួបប្រជុំពិភាក្សាការងារទ្វេភាគីជាមួយ ឯកឧត្តម ដាតុ ស៊េរី អាន់វ៉ា អ៉ីប្រាហ៊ីម (Dato' Seri Anwar Ibrahim) នាយករដ្ឋមន្រ្តី នៃប្រទេសម៉ាឡេស៊ី ក្នុងឱកាសអញ្ជើញចូលរួមកិច្ចប្រជុំកំពូលអាស៊ានលើកទី ៤៦ និងកិច្ចប្រជុំកំពូលពាក់ព័ន្ធ នៅទីក្រុងគូឡាឡាំពួ ប្រទេសម៉ាឡេស៊ី ។ក្នុងឱកាសនៃជំនួប, សម្ដេចបវរធិបតី បានអបអរសាទរ និងកោតសរសើរចំពោះការរៀបចំយ៉ាងល្អប្រសើរនូវកិច្ចប្រជុំកំពូលអាស៊ានលើកទី៤៦ និងកិច្ចប្រជុំកំពូលពាក់ព័ន្ធ ព្រមទាំងបានថ្លែងអំណរគុណចំពោះការបដិសណ្ឋារកិច្ច និងការស្វាគមន៍យ៉ាងកក់ក្តៅជូនចំពោះ សម្ដេចបវរធិបតី និងគណៈប្រតិភូជាន់ខ្ពស់កម្ពុជា។ ជាមួយគ្នានេះ សម្ដេចបវរធិបតី បានសម្ដែងការគាំទ្រចំពោះការធ្វើជាប្រធានអាស៊ានរបស់ម៉ាឡេស៊ីនៅឆ្នាំ២០២៥ ព្រមទាំងបានវាយតម្លៃខ្ពស់ចំពោះកិច្ចសហប្រតិបត្តិការរវាងប្រទេសទាំងពីរ ដែលមានការវិវត្តរីកចម្រើនជាបន្តបន្ទាប់។ ជាការឆ្លើយតប, ឯកឧត្តម ដាតុ ស៊េរី អាន់វ៉ា អ៉ីប្រាហ៊ីម បានថ្លែងអំណរគុណចំពោះសម្ដេចបវរធិបតីដែលបានអញ្ជើញចូលរួមកិច្ចប្រជុំកំពូលអាស៊ានលើកទី៤៦ និងកិច្ចប្រជុំពាក់ព័ន្ធ ដែលកំពុងប្រព្រឹត្តទៅនៅទីក្រុងគូឡាឡាំពួ ប្រទេសម៉ាឡេស៊ី នាពេលនេះ និងបានវាយតម្លៃខ្ពស់ចំពោះវឌ្ឍនភាពនៃទំនាក់ទំនងល្អប្រសើររវាងប្រទេសទាំងពីរ។ ថ្នាក់ដឹកនាំទាំងពីរ បានពិភាក្សាអំពីការបន្តពង្រឹង និងពង្រីកកិច្ចសហប្រតិបត្តិការលើវិស័យសំខាន់ៗដូចជា វិស័យថាមពល និង ហាឡាល់ ដោយថ្នាក់ដឹកនាំទាំងពីរបានលេីកទឹកចិត្តដល់ក្រសួង-ស្ថាប័នពាក់ព័ន្ធកម្ពុជា-ម៉ាឡេស៊ី បន្តពិភាក្សាគ្នា ឱ្យបានស៊ីជម្រៅបន្ថែមទៀត៕

កិច្ចសហប្រតិបត្តិការរដ្ឋសភាកម្ពុជានិងថៃ បានពង្រឹងពង្រីកជាលំដាប់ ឆ្លើយតបតម្រូវការនិងផលប្រយោជន៍របស់ប្រជាពលរដ្ឋទំាងសងខាង

សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភានៃព្រះរាជាណាចក្រកម្ពុជា នៅរសៀលថ្ងៃទី២៦ ខែឧសភា ឆ្នាំ២០២៥ បានអនុញ្ញាតជូន ឯកឧត្តម ណាតាឆា ប៊ុនឆៃអ៊ីនសាវ៉ាត់ (NATTACHA BOONCHAIINSAWAT) សមាជិករដ្ឋសភានៃព្រះរាជាណាចក្រថៃ និងជាប្រធានក្រុមមិត្តភាពរដ្ឋសភាថៃ-កម្ពុជា ចូលជួបសម្តែងការគួរសម និងពិភាក្សាការងារ នៅវិមានរដ្ឋសភា ក្នុងពេលដែល ឯកឧត្តម បានអញ្ជើញដឹកនាំគណៈប្រតិភូរដ្ឋសភាថៃ មកបំពេញទស្សនកិច្ចនៅកម្ពុជា។នៅក្នុងឱកាសនេះ សម្តេចប្រធានរដ្ឋសភា បានសម្តែងក្តីសប្បាយរីករាយនិងស្វាគមន៍យ៉ាងកក់ក្តៅជាទីបំផុត ចំពោះដំណើរទស្សនកិច្ចរបស់ ឯកឧត្តម ណាតាឆា ប៊ុនឆៃអ៊ីនសាវ៉ាត់ មកកាន់កម្ពុជា ដែលបានឆ្លុះបញ្ចំាងពីទំនាក់ទំនងដ៏ល្អរវាងរដ្ឋសភាប្រទេសទំាងពីរ ជាពិសេសបានឆ្លើយតបនឹងអនុស្សរណៈនៃការយោគយល់គ្នាដែលថ្នាក់ដឹកនាំរដ្ឋសភាប្រទេសទំាងពីរ បានចុះហត្ថលេខា កាលពីឆ្នាំកន្លងទៅ។ ដំណើរទស្សនកិច្ចនេះ នឹងធ្វើឱ្យចំណងមិត្តភាពមិត្តភាពជាប្រពៃណីដែលមានតំាងពីយូរលង់ណាស់មកហើយ កិច្ចសហប្រតិបត្តិការ "ភាពជាដៃគូយុទ្ធសាស្ត្រ" ដែលថ្នាក់ដឹកនាំប្រទេសទំាងពីរបានសម្រេច កាន់តែរឹងមាំ ស៊ីជម្រៅឡើង ក្នុងការការពារនិងបម្រើផលប្រយោជន៍ពលរដ្ឋនៃប្រទេសទំាងពីរ។ សម្តេចរដ្ឋសភាធិបតី បានគូសបញ្ជាក់ថា ទំនាក់ទំនងប្រទេសភូមិផងរបងជាប់គ្នាទំាងពីរនេះ បានបម្រើដល់តម្រូវការនិងផលប្រយោជន៍ប្រជាជនទំាងសងខាង ហើយមានការចម្រើនជាលំដាប់ ទោះបីស្ថានការណ៍តំបន់និងពិភពលោកមានការប្រែប្រួលយ៉ាងណាក្តី។ ទំាងស្ថាប័ននីតិប្បញ្ញត្តិនិងនីតិប្រតិបត្តិនៅគ្រប់កម្រិត បានផ្លាស់ប្តូរដំណើរទស្សនកិច្ចទៅវិញទៅមក ក៏ដូចជាបានជួបប្រាស្រ័យទាក់ទងជាប់ជាប្រចាំ ដោយបើកចំហរ ស្មោះត្រង់ និងជឿជាក់គ្នា។ ជាក់ស្តែងនៅក្នុងឱកាសខួប ៧៥ឆ្នាំ នៃចំណងការទូតប្រទេសទំាងពីរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា និងលោកជំទាវ ផែថងថាន ស៊ីណាវ៉ាត់ នាយករដ្ឋមន្រ្តីថៃ បានចុះហត្ថលេខាលើឯកសារសហប្រតិបត្តិការចំនួន៧បន្ថែមទៀត ព្រមទំាងបានសម្ពោធនិមិត្តសញ្ញារំលឹកខួបលើកទី៧៥ នៃការបង្កើតទំនាក់ទំនងការទូតរវាងប្រទេសភូមិផងរបងជាមួយគ្នា នៅរាជធានីភ្នំពេញ នៅក្នុងដំណើរទស្សនកិច្ចរបស់ លោកជំទាវនាយករដ្ឋមន្រ្តីថៃ មកកាន់កម្ពុជា។ ព្រមជាមួយគ្នានេះ ព្រឹត្តិការណ៍ជាច្រើនក៏បានប្រារព្ធឡើង ដើម្បីអបអរសាទរដល់ខួប៧៥ឆ្នាំ នៃចំណងមិត្តភាពប្រទេសទំាងពីរ ដូចជាការលេងកីឡារួមគ្នាជាដើម។ឯកឧត្តម ណាតាឆា ប៊ុនឆៃអ៊ីនសាវ៉ាត់ បានថ្លែងអំណរគុណយ៉ាងជ្រាលជ្រៅ ជូនសម្តេចប្រធានរដ្ឋសភា ដែលបានអនុញ្ញាតដល់គណៈប្រតិភូរដ្ឋសភាថៃ បានចូលជួបសម្តែងការគួរសមនាឱកាសនេះ។ ឯកឧត្តម ក៏បានពាំនាំការផ្តាំផ្ញើនូវការសាកសួរសុខទុក្ខនិងក្តីនឹករលឹកពីសំណាក់ ឯកឧត្តមប្រធានរដ្ឋសភាថៃ ជូនសម្តេចប្រធានរដ្ឋសភាផងដែរ។ ឯកឧត្តមបានគួសបញ្ជាក់ថា ដំណើរទស្សនកិច្ចរបស់គណៈប្រតិភូក្រុមមិត្តភាពរដ្ឋសភាថៃនិងកម្ពុជា មកកាន់កម្ពុជានាឱកាសនេះ ក្នុងគោលបំណងលើកកម្ពស់កិច្ចសហប្រតិបត្តិការរដ្ឋសភាប្រទេសទំាងពីរឱ្យកាន់តែរឹងមាំនិងស៊ីជម្រៅឡើង។ ឯកឧត្តមបានយល់ស្របចំពោះប្រសាសន៍លើកឡើងរបស់សម្តេចប្រធានរដ្ឋសភា ដែលថាទំនាក់ទំនងដ៏ជិតស្និទ្ធរវាងប្រទេសទំាងពីរ បានឆ្លើយតបតម្រូវការ និងផលប្រយោជន៍របស់ពលរដ្ឋទំាងសងខាង។ ឯកឧត្តម ប្រធានក្រុមមិត្តភាពសភាថៃ-កម្ពុជា បានជម្រាបជូន សម្តេចប្រធានរដ្ឋសភា ពីលទ្ធផលនៃជំនួបពិភាក្សាការងាររវាង ឯកឧត្តម និងសម្តេចពិជ័យសេនា ទៀ បាញ់ ប្រធានក្រុមមិត្តភាពរដ្ឋសភាកម្ពុជា-ថៃ នាព្រឹកថ្ងៃទី២៦ ខែឧសភានេះ ទទួលបានលទ្ធផលជាទីមោទនៈ។ ភាគីទំាងពីរបានប្តេជ្ញាចិត្តរួមគ្នានៅក្នុងការពង្រឹង ពង្រីកកិច្ចសហប្រតិបត្តិការរវាងរដ្ឋសភានៃប្រទេសទំាងពីរឱ្យកាន់តែរឹងមាំបន្ថែមទៀត។ ភាគីទំាងពីរក៏បានផ្លាស់ប្តូរព័ត៌មានពីគ្នាទៅវិញទៅមក និងបានបង្កើតបណ្តាញទំនាក់ទំនងជាមួយគ្នា សម្រាប់កិច្ចសហប្រតិបត្តិការជាទៀងទាត់មួយផងដែរ។ នៅក្នុងកិច្ចការពារនិងស្វែងរកផលប្រយោជន៍ជូនពលរដ្ឋទំាងសងខាង សម្តេចប្រធានរដ្ឋសភានិង ឯកឧត្តម ណាតាឆា ប៊ុនឆៃអ៊ីនសាវ៉ាត់ បានផ្លាស់ប្តូរយោបល់គ្នានៅក្នុងការជំរុញវិស័យពាណិជ្ជកម្ម សេដ្ឋកិច្ច អប់រំ ទេសចរណ៍ ជាដើម។ ថៃជាប្រទេសមួយដែលឈរនៅក្នុងលេខរៀងទី៥ក្នុងចំណោមប្រទេសដែលបានវិនិយោគនៅកម្ពុជា។ ថ្នាក់ដឹកនាំប្រទេសទំាងពីរ បានប្តេជ្ញាចិត្ត ក្នុងការជំរុញទំហំពាណិជ្ជកម្មប្រទេសទំាងពីរឱ្យឈានដល់ទំហំ១៥ពាន់លានដុល្លារ នៅក្នុងឆ្នាំ២០២៧ខាងមុខនេះ។ ចំណែកវិស័យទេសចរណ៍វិញ រដ្ឋសភាប្រទេសទំាងពីរ បានគំាទ្រចំពោះគំនិតផ្តួចផ្តើម "ប្រាំមួយប្រទេស ទិសដៅតែមួយ បន្ថែមលើគំនិតផ្តួចផ្តើម "ព្រះរាជាណាចក្រពីរ គោលដៅតែមួយ ក្នុងបំណងលើកកម្ពស់វិស័យទេសចរណ៍សម្រាប់ប្រទេសទាំងពីរ ក៏ដូចជាតំបន់ទាំងមូល ឆ្ពោះទៅរកការរីកចម្រើនរួមគ្នា។សម្តេចប្រធានរដ្ឋសភា មានសុទិដ្ឋិនិយមថា រាជរដ្ឋាភិបាលថៃ ពិសេសរាជវង្សានុវង្សថៃ នឹងបន្តគំាទ្រដល់វិស័យអប់រំនៅកម្ពុជា ដោយនឹងបន្ថែមចំនួនអាហារូបករណ៍ដល់និស្សិតកម្ពុជា បានទៅសិក្សានៅប្រទេសថៃ។ សម្តេចបានគូសបញ្ជាក់ថា កម្ពុជាក្រោមការដឹកនាំរបស់សម្តេចតេជោ ហ៊ុន សែន ហើយបន្តមកដល់ការដឹកនាំដោយ សម្តេចធិបតី ហ៊ុន ម៉ាណែត នៅតែផ្តល់អាទិភាពខ្ពស់បំផុតចំពោះធនធានមនុស្ស ជាការសំខាន់នៅក្នុងការពន្លឿនការអភិវឌ្ឍន៍ប្រទេសជាតិ ឈានខ្ពស់ទៅប្រទេសមានចំណូលមធ្យមកម្រិតខ្ពស់នៅឆ្នាំ២០៣០ និងប្រទេសមានចំណូលខ្ពស់នៅឆ្នាំ២០៥០៕

ឯកឧត្ដម ឃួង ស្រេង ចុះពិនិត្យលូ ប្រឡាយ និងជំរុញការស្ដារ ដើម្បីបញ្ចៀសជំនន់ទឹកភ្លៀងនារដូវវស្សានៅភ្នំពេញ

ភ្នំពេញ ៖ ពេញមួយព្រឹកថ្ងៃទី២៦ ខែឧសភា ឆ្នាំ២០២៥ ឯកឧត្ដម ឃួង ស្រេង អភិបាលរាជធានីភ្នំពេញ បានដឹកនាំ អាជ្ញាធរមូលដ្ឋានខណ្ឌ និងមន្ត្រីជំនាញ ចុះពិនិត្យមើលប្រព័ន្ធលូ និងប្រឡាយក្នុងមូលដ្ឋានខណ្ឌចំនួន៥ មានខណ្ឌសែនសុខ ខណ្ឌពោធិសែនជ័យ ខណ្ឌកំបូល ខណ្ឌមានជ័យ និងខណ្ឌដង្កោ ដើម្បីរកមធ្យោយបាយក្នុងការបញ្ចៀសការជន់លិចដោយជំនន់ទឹកភ្លៀងនារដូវវស្សានេះ។ឯកឧត្ដម ឃួង ស្រេង បានចុះពិនិត្យមើលប្រឡាយអបផ្លូវរទេះភ្លើងផ្លូវជាតិលេខ៤ ក្នុងភូមិសាស្ត្រសង្កាត់ចោមចៅទី៣ ពិនិត្យមើលប្រឡាយអូលែ ក្នុងវិទ្យាល័យជម្ពូវ័ន ខណ្ឌពោធីសែនជ័យ ប្រឡាយទួលពង្រ និងពិនិត្យមើលការជីកស្តារប្រឡាយភូមិម័ល នៅក្នុងភូមិសាស្រ្តខណ្ឌដង្កោ និងខណ្ឌមានជ័យ។លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញបានឲ្យដឹងថា ក្នុងការចុះពិនិត្យមើលលូ ប្រឡាយខាងលើនេះ ឯកឧត្ដម ឃួង ស្រេង អភិបាលរាជធានីបានជំរុញអាជ្ញាធរខណ្ឌ និងមន្ទីរសាធារណការ និងដឹកជញ្ជូនរាជធានីភ្នំពេញ កាយប្រឡាយអូលែ ក្នុងវិទ្យាល័យជម្ពូវ័ន ខណ្ឌពោធីសែនជ័យជាមួយនិងការដាក់លូប្រអប់ទំហំ៦ម៉ែត្រ ភ្ជាប់ពីផ្លូវជាតិលេខ៤ទៅផ្លូវជាតិលេខ៣ ឲ្យបន្តហូរទៅប្រឡាយទួលពង្រ ដើម្បីពន្លឿនទឹកឲ្យហូរបានលឿនពីផ្លូវជាតិលេខ៤។ ទី២រកវិធីរំដោះទឹកពីផ្លូវជាតិលេខ៣ ភ្ជាប់ទៅប្រឡាយទួលពង្រដែរ។ បន្ថែមពីនេះទៀត ឯកឧត្ដម ឃួង ស្រេង បានជំរុញអាជ្ញាធរខណ្ឌពាក់ព័ន្ធ និងមន្ទីរសាធារណការ និងដឹកជញ្ជូនរាជធានីភ្នំពេញជីកស្តារប្រឡាយភូមិម័លនៅក្នុងភូមិសាស្រ្តខណ្ឌដង្កោ និងខណ្ឌមានជ័យ ដែលស្ថិតក្នុងគម្រោងវិនិយោគហេដ្ឋារចនាសម្ព័ន្ធប្រព័ន្ធលូ និងប្រព័ន្ធរំដោះទឹករបស់រាជរដ្ឋាភិបាល ដើម្បីធ្វើឲ្យប្រសើរឡើងនូវការជន់លិចនៅក្នុងភូមិសាស្ត្ររាជធានីភ្នំពេញ ដោយជីកឲ្យបានជ្រៅពី៥ទៅ៦ម៉ែត្រ ក្នុងប្រវែងប្រឡាយជិត៣គីឡូម៉ែត្រនេះ៕

ប្រមុខរដ្ឋាភិបាល កម្ពុជា-ឡាវ-វៀតណាម ពេញចិត្តចំពោះការរីកចម្រើន នៃទំនាក់ទំនងប្រទេសទាំងបី

ភ្នំពេញ ៖ នាព្រឹកថ្ងៃទី២៦ ខែឧសភា ឆ្នាំ២០២៥, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអញ្ជើញចូលរួមក្នុងជំនួបពិសារអាហារពេលព្រឹកការងារ ជាមួយ ឯកឧត្តមបណ្ឌិត សនសៃ ស៊ីផាន់ដន (Sonexay Siphandone) នាយករដ្ឋមន្ត្រី នៃសាធារណរដ្ឋប្រជាធិបតេយ្យប្រជាមានិតឡាវ និង ឯកឧត្តម ផាម មិញ ជីញ (Pham Minh Chinh) នាយករដ្ឋមន្ត្រី នៃសាធារណរដ្ឋសង្គមនិយមវៀតណាម ក្នុងឱកាសអញ្ជើញចូលរួមកិច្ចប្រជុំកំពូលអាស៊ានលើកទី ៤៦ និងកិច្ចប្រជុំកំពូលពាក់ព័ន្ធ នៅទីក្រុងគូឡាឡាំពួ ប្រទេសម៉ាឡេស៊ី។ ក្នុងជំនួបអាហារពេលព្រឹកការងារ, នាយករដ្ឋមន្ត្រីទាំងបី បានសម្ដែងនូវការពេញចិត្តចំពោះការរីកចម្រើននៃទំនាក់ទំនង និងបានវាយតម្លៃខ្ពស់ចំពោះវឌ្ឍនភាពនៃកិច្ចសហប្រតិបត្តិការលើគ្រប់វិស័យដែលត្រូវបានពង្រឹង និងពង្រីកជាបន្តបន្ទាប់។ ជាមួយគ្នានេះ, ប្រមុខរដ្ឋាភិបាលទាំងបី បានពិភាក្សាអំពីការជំរុញកិច្ចសហប្រតិបត្តិការបន្ថែមទៀត លើវិស័យសក្ដានុពលជាច្រើន រួមមាន៖ វិស័យពាណិជ្ជកម្ម, ការតភ្ជាប់ហេដ្ឋារចនាសម្ព័ន្ធ, ថាមពល (អគ្គិសនី), ទេសចរណ៍ ព្រមទាំងសន្តិសុខ និងការពារជាតិ ។ ជាមួយគ្នានេះ, ប្រមុខរាជរដ្ឋាភិបាលទាំងបី ក៏បានផ្លាស់ប្ដូរមតិយោបល់លើបញ្ហាតំបន់ និងអន្តរជាតិ៕

មន្រ្តីជាន់ខ្ពស់ក្រសួងអភិវឌ្ឍន៍ជនបទ វាយតម្លៃខ្ពស់ និងកោតសរសើរដល់នាយកដ្ឋានវិស្វកម្មនៃក្រសួងការពារជាតិ ដែលបានសាងសង់និងចូលរួមរក្សាគុណភាពផ្លូវជនបទ

(សៀមរាប)៖ លោក អ៊ិន ចន្ថា រដ្ឋលេខាធិការ និងជាសមាជិកគណៈកម្មាធិការលទ្ធកម្ម តំណាងដ៏ខ្ពង់ខ្ពស់លោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ ដែលបានចុះត្រួតពិនិត្យ និងវាយតម្លៃបញ្ចប់សុពលភាព លើគម្រោងការងារស្ថាបនាផ្លូវក្រាល ដីល្បាយក្រួសចំនួន ៣ ខ្សែ ប្រវែងសរុប ៦ ៣០០ ម៉ែត្រ នៅឃុំគោកធ្លកលើ ស្រុកជីក្រែង ខេត្តសៀមរាប នៅថ្ងៃទី២៦ ខែ ឧសភា ឆ្នាំ ២០២៥នេះ បានវាយតម្លៃខ្ពស់ និងបានកោតសរសើរដល់នាយកដ្ឋានវិស្វកម្ម ក្រសួងការពារជាតិ ដែលបានយកចិត្តទុកដាក់ ស្ថាបនា និងថែទំាផ្លូវរហូតដល់បញ្ចប់សុពលភាព ដោយរក្សានូវគុណភាពល្អប្រសើរ សម្រាប់ជាប្រយោជន៍ប្រើប្រាស់យូរអង្វែង ជូនដល់ប្រជាពលរដ្ឋនៅក្នុងសហគមន៍ និងសាធារណជនទូទៅ។ក្នុងឱកាសនោះដែរ លោករដ្ឋលេខាធិការ បានមានប្រសាសន៍ថា ក្រសួងអភិវឌ្ឍន៍ជនបទ ក្នុងនាមជាសេនាធិការផ្ទាល់របស់រាជរដ្ឋាភិបាលកម្ពុជា បាននិងកំពុងជំរុញការងារសាងសង់ ស្ដារឡើងវិញ កែលម្អ ពង្រីក ថែទាំ និងជួសជុលផ្លូវជនបទក្រាលកៅស៊ូពីរជាន់ ឬបេតុង ដើម្បីបង្កភាពងាយស្រួលក្នុងការធ្វើដំណើររបស់ប្រជាពលរដ្ឋ កាត់បន្ថយពេលវេលា និងកាត់បន្ថយចំណាយលើការដឹកជញ្ជូនកសិផល និងទំនិញផ្សេងៗនៅជនបទ។ ទន្ទឹមគ្នានេះ លោកបានវាយតម្លៃខ្ពស់ និងបានកោតសរសើរដល់នាយកដ្ឋានវិស្វកម្ម ក្រសួងការពារជាតិ ដែលបានយកចិត្តទុកដាក់ ស្ថាបនាផ្លូវចំនួន ៣ ដោយរក្សាបាននូវគុណភាពល្អប្រសើរ រហូតដល់បញ្ចប់សុពលភាព ដែលនេះជាការចូលរួម ចំណែកដ៏សំខាន់ជាមួយរាជរដ្ឋាភិបាល ក្នុងការចូលរួមរក្សាគុណភាពផ្លូវ ព្រោះផ្លូវមានសារៈសំខាន់ណាស់ ផ្លូវគឺជាសរសៃឈាម ជំរុញ អន្តរកម្មទាំងផ្នែកសេដ្ឋកិច្ចនិងសង្គម តាមរយៈការលើកកម្ពស់ជីវភាពរស់នៅរបស់ប្រជាជន និងប្រែក្លាយជនបទឱ្យទៅជាតំបន់ ដែលមាន ភាពរីកចម្រើន ជឿនលឿន និងស៊ីវីល័យ។លោកឧត្តមសេនីយ៍ទោ ហាយ ហ៊ីង នាយករងនាយកដ្ឋានវិស្វកម្ម ក្រសួងការពារជាតិ លើកឡើងថា ជុំវិញការថែទាំផ្លូវខាងលើ នេះ ឃើញថា អ្នកដែលអនុវត្តផ្ទាល់ បានយកចិត្តទុកដាក់យ៉ាងខ្លាំង ចាប់តាំងពីការចាប់ផ្តើមស្ថាបនា រហូតដល់ការថែទាំ ដើម្បីចូលរួមរក្សាគុណភាពផ្លូវនេះ សម្រាប់ជាប្រយោជន៍យូរអង្វែងជូនប្រជាពលរដ្ឋមូលដ្ឋាន និងសាធារណជនដែលធ្វើដំណើរឆ្លងកាត់។បន្ថែមពីនេះ លោក អ៊ិន ចន្ថា បានសំណូមពរដល់អាជ្ញាធរមូលដ្ឋាន ចូលរួមថែទាំផ្លូវ និងសំណង់សិល្បការ្យផ្សេងៗ នៅក្នុងមូលដ្ឋានរបស់ខ្លួនឱ្យបានល្អប្រសើរ សម្រាប់បម្រើដល់ប្រជាជននៅក្នុងសហគមន៍ផ្ទាល់ ធ្វើយ៉ាងរក្សាគុណភាពផ្លូវនេះ ឱ្យបានគង់វង្សយូរអង្វែង និងត្រូវចាត់ទុកថា ផ្លូវនេះជារបស់យើងគ្រប់ៗគ្នា៕អត្ថបទ: សុន រ៉ាឌី

គណៈប្រតិភូក្រសួងកសិកម្ម គោរពព្រះវិញ្ញាណក្ខន្ធ ព្រះករុណាព្រះបាទសម្តេចព្រះ នរោត្តម សីហនុ

ភ្នំពេញ៖ នាព្រឹកថ្ងៃទី២៦ ខែឧសភា ឆ្នាំ២០២៥នេះ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានដឹកនាំគណៈប្រតិភូក្រសួង គោរពព្រះវិញ្ញាណក្ខន្ធ ព្រះករុណាព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ “ព្រះបរមរតនកោដ្ឋ” នៅព្រះបរមរាជវាំង។ ក្នុងឱកាសចូលគាល់ សម្តេចព្រះមហាក្សត្រី នរោត្តម មុនិនាថ សីហនុ ព្រះវររាជមាតាជាតិខ្មែរ ឯកឧត្តមរដ្ឋមន្រ្តី បានដឹកនាំប្រតិភូ គោរពព្រះវិញ្ញាណក្ខន្ធ ព្រះករុណាព្រះបាទសម្តេចព្រះ នរោត្តម សីហនុ ព្រះមហាវីរក្សត្រ ព្រះវររាជបិតា ឯករាជ្យ បូរណភាពទឹកដី និងឯកភាពជាតិខ្មែរ “ព្រះបរមរតនកោដ្ឋ”៕

បណ្ដាញសង្គម

ព័ត៌មានថ្មីៗ

មន្ទីរប្រឆាំងគ្រឿងញៀន ប្រជុំបូកសរុបលទ្ធិផលការងារប្រចាំខែមិថុនា និងលើកទិសដៅការងារបន្ត

សម្តេច ឃួន សុដារី អនុញ្ញាតឱ្យអនុប្រធានគណៈកម្មការកិច្ចការជនជាតិភាគតិចសភាតំណាងប្រជាជនចិនទូទាំងប្រទេស ចូលជួបសម្តែងការគួរសម និងពិភាក្សាការងារ

អាជ្ញាធរកោះកុង សម្របសម្រួលពលករខ្មែរ១៦នាក់ បញ្ចូនមកកម្ពុជាវិញ

រដ្ឋចំនួន ៥ របស់ EU នឹងសាកល្បងកម្មវិធីពិនិត្យអាយុ ដើម្បីការពារកុមារតាមអ៊ីនធឺណិត

យោធាអ៊ីស្រាអែលនិយាយថា ខ្លួនវាយប្រហារលើគោលដៅជាច្រើនរបស់ក្រុមហេសបូឡា នៅភាគខាងកើតលីបង់

លោក Zelenskiy ដឹងគុណលោក Trumpសម្រាប់ការត្រៀមខ្លួនការពារអាយុជីវិតពលរដ្ឋអ៊ុយក្រែន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877