នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ជន​ជាតិចិន ៣២៩នាក់ ពាក់​ព័ន្ធករណីឆបោកតាមប្រព័ន្ធអនឡាញ (Online Scams) ត្រូវបានបណ្ដេញចេញ​ពី​ព្រះរាជាណាចក្រកម្ពុជា
រាជរដ្ឋាភិបាលកម្ពុជា បង្កើតក្រុមការងារចម្រុះចំណុះលេខាធិការដ្ឋាន គ.ប.ឆ.ប.ដើម្បីបង្កើនប្រសិទ្ធភាពបង្ក្រាប និងបោសសម្អាតការឆបោកតាមប្រព័ន្ធបច្ចេកវិទ្យា
អភិបាលរាជធានីណែនាំឱ្យមន្ត្រី និងកងកម្លាំងប្រឹងប្រែងបន្ថែមទៀតលើការរក្សាសន្តិសុខ និងការងារនានា
ករណី Online Scams ៖ តំណាងអយ្យការសម្រេចចោទប្រកាន់លើមន្ត្រីនគរបាលផ្កាយបី១នាក់ ,ផ្កាយពីរ ១នាក់ និងពាក់ព័ន្ធ ៤នាក់ផ្សេងទៀត

ព័ត៌មានជាតិ

វិស័យឯកជនរំពឹងថា ឆ្នាំ២០២៦នឹងក្លាយជាឆ្នាំ​នៃការស្តារ​ទំនុក​ចិត្ត​ឡើង​វិញ​ សម្រាប់​វិស័យ​លំនៅ​ឋាន​នៅ​កម្ពុជា

2026/03/08 11:53:55 am        245
Facebook Telegram Linkin
សមាគមអ្នកអភិវឌ្ឍន៍លំនៅឋានកម្ពុជា រំពឹងថា ជាមួយនឹងស្មារតីសាមគ្គីភាព វិន័យវិជ្ជាជីវៈ និង​កិច្ច​សហប្រតិបត្តិការជិតស្និទ្ធ គឺមានទំនុកចិត្តយ៉ាងខ្លាំងថា ឆ្នាំ២០២៦នេះ នឹង​ក្លាយ​ជា​ឆ្នាំ​នៃ​ស្ថិរភាព​ ការកែទម្រង់ និងការស្តារទំនុកចិត្តឡើងវិញ សម្រាប់​វិស័យ​លំនៅ​ឋាន​នៅ​កម្ពុជា​របស់​យើង​។ក្នុងសន្និបាតបូកសរុបលទ្ធផលការងារប្រចាំឆ្នាំ២០២៥ និងលើក​ទិសដៅ​ការ​ងារ​សម្រាប់​ឆ្នាំ​២០២៦ ​កាលពីរសៀលថ្ងៃទី៧ ខែមីនាកន្លងទៅ លោកអ្នកឧកញ៉ា លី ហួរ ប្រធាន​សមាគម​អ្នក​អភិវឌ្ឍន៍​លំនៅ​ឋានកម្ពុជា បានលើកឡើងថា ការរំពឹងនេះដោយសារក្នុងឆ្នាំ២០២៥ ជាអំឡុង​ពេល​មួយ​ក្នុងចំណោមគ្រាលំបាកបំផុត ក្នុងប្រវត្តិសាស្ត្រ​នៃ​វិស័យ​អភិវឌ្ឍន៍​លំនៅ​ឋាន​នៅ​កម្ពុជា​ដែល​បណ្តាល​មកពីការធ្លាក់ចុះនៃសេដ្ឋកិច្ចសកល ភាពមិនច្បាស់លាស់នៃភូមិសាស្ត្រ នយោបាយ​ក្នុង​តំបន់ ភាពតានតឹងតាមព្រំដែនរវាងកម្ពុជានិងថៃនាពេលថ្មីៗនេះ និងភាព​តឹង​រ៉ឹង​នៃ​ការ​បញ្ចេញ​ចរន្ត​សាច់ប្រាក់ បានធ្វើឱ្យមានសម្ពាធយ៉ាងខ្លាំងដល់ទាំងអ្នកអភិវឌ្ឍន៍ និងអ្នក​ទិញ​លំ​នៅ​ឋាន​។ លោកបានបន្តថា ចំពោះសកម្មភាពនៅក្នុងទីផ្សារអចលនទ្រព្យក៏បានធ្លាក់ចុះយ៉ាងខ្លាំង ហើយ​ក្រុម​ហ៊ុនសមាជិកជាច្រើនបានជួបប្រទះនូវបញ្ហាប្រឈមធ្ងន់ធ្ងរ រួមមានការ​យឺត​យ៉ាវ​ក្នុង​ការ​បង់​ប្រាក់​ពី​អតិថិជន ការទាមទារឱ្យក្រុម ហ៊ុនទិញផ្ទះត្រឡប់មកវិញ ការរឹតបន្តឹង​លើ​ការ​អនុវត្ត​ច្បាប់ ​និងបទប្បញ្ញត្តិនានាជាដើម។យ៉ាងណាក៏ដោយ លោកប្រធានសមាគម បានបន្ថែមថា ក្រោមការ​ដឹក​នាំ​ប្រកប​ដោយ​ចក្ខុ​វិស័យ​វែង​ឆ្ងាយ​របស់​សម្តេចតេជោ ហ៊ុន សែន និងសម្តេចធិបតី ហ៊ុន ម៉ាណែត ប្រទេសជាតិនៅ​តែ​បន្ត​រក្សា​បាន​ នូវស្ថិរភាពនយោបាយ និងភាពធន់នៃម៉ាក្រូសេដ្ឋកិច្ចយ៉ាងប្រសើរ។ ក្នុងបរិយាកាសនេះ សមាគមដែលមានសមាជិករហូតដល់ ៥៥ក្រុមហ៊ុន បានខិតខំប្រឹងប្រែងដោយភាព ហ្មត់ចត់ និង​ការ​ប្តេជ្ញា​ចិត្តខ្ពស់ ដើម្បីពង្រឹងការសម្របសម្រួលក្នុងចំណោមសមាជិក-សមាជិកា លើក​កម្ពស់​ការ​អនុវត្ត​តាម​បទប្បញ្ញត្តិនានា គាំទ្រដល់កិច្ចសន្ទនាគោលនយោបាយប្រកបដោយការស្ថាបនា ជាមួយ​ក្រសួងពាក់ព័ន្ធ និងធនាគារជាតិនៃកម្ពុជា ព្រមទាំងតស៊ូមតិ​ដើម្បី​ទទួល​បាន​វិធាន​ការ​គាំទ្រ​ជាក់​ស្តែងសម្រាប់អ្នកអភិវឌ្ឍន៍ និងអ្នកទិញលំនៅឋាន។ ក្នុងឱកាស​អញ្ជើញជាអធិបតីក្នុងពិធីបិទសន្និបាតនេះ ឯកឧត្តម សាយ សំអាល់ ឧបនាយក​រដ្ឋមន្រ្តី រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានមានប្រសាសន៍ថា ការ​អភិវឌ្ឍ​លំ​នៅឋាននៅកម្ពុជាបានចាប់ផ្តើមជាបណ្តើៗតាំងពីឆ្នាំ១៩៨៩មក នៅពេល​ដែល​ប្រទេស​កម្ពុជា​ទទួលស្គាល់កម្មសិទ្ធិឯកជន និងធ្វើការចុះបញ្ជីដីធ្លីឡើងវិញ ព្រោះប្រជាពលរដ្ឋ​មាន​សិទ្ធិ​ពេញ​លេញ​ក្នុងការអភិវឌ្ឍលំនៅឋានផ្ទាល់ខ្លួនជាផ្ទះឈើ ផ្ទះល្វែង ផ្ទះវីឡាជាដើម។ ឯកឧត្តម ឧបនាយករដ្ឋមន្រ្តី បានគូសបញ្ជាក់ថា ពីនេះទៅមុខ ដើម្បីជៀសវាងនូវបញ្ហា និង​កសាង​ភាព​ធន់ជាមួយនឹងភាពមិនច្បាស់លាស់នាពេលអនាគតក្នុងក្របខណ្ឌសង្គម និង​សេដ្ឋកិច្ច​ពិភព​លោក ត្រូវឈរលើទស្សនៈរួម និងធ្វើការដោយ​ផ្អែក​លើ​ទិន្ន​ន័យ​វិទ្យាសាស្ត្រ​ជាក់​លាក់​ក្នុង​ការ​អភិវឌ្ឍ​លំនៅ​ឋានដើម្បីរៀបចំឱ្យឧស្សាហកម្មមួយនេះ បន្តផ្តល់ឱកាសការងារ​ផ្តល់​ប្រាក់​ចំណូល​ដល់​ប្រជាជន ផ្តល់កន្លែងរស់នៅសមរម្យ ផ្តល់ជីវិតគ្រួសារថ្មី ដោយរក្សាបាននូវតម្លៃវប្បធម៌ ប្រពៃណី ទំនៀមទម្លាប់ និងធ្វើឱ្យសង្គមកាន់តែរីកចម្រើនទៅមុខទៀត៕ អត្ថបទ៖ ឈិត បូរ៉ាវី 

រដ្ឋមន្រ្តីការងារ ចាត់ទុកស្ត្រីជាឆ្អឹងខ្នងក្នុងការរួមចំណែកការអភិវឌ្ឍប្រទេសជាតិ ជាពិសេស​ស្ត្រីគ្រួសារ​វីរកងកម្លាំងប្រដាប់អាវុធ

2026/03/08 11:37:28 am        232
Facebook Telegram Linkin
ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ និងជាប្រធានក្រុមការងារ​រាជរដ្ឋាភិបាល​ចុះមូលដ្ឋានខណ្ឌចំការមន និងខណ្ឌពោធិ៍សែនជ័យ បានអញ្ជើញចូលរួមពិធីអបអរសាទរខួបលើកទី១១៥ ទិវាអន្តរជាតិនារី ៨មីនា ឆ្នាំ២០២៦ ដោយក្នុងឱកាសនោះ បានគូសបញ្ជាក់ពីការលះបង់របស់ស្រ្តី នារី និងក្មេងស្រីពីគ្រួសារវីរកងកម្លាំងប្រដាប់អាវុធ និងជនភៀសសឹកពីសង្រ្គាមឈ្លានពានទឹកដី។ នៅក្នុងពិធីអបអរសាទរទិវាអន្តរជាតិនារី ៨មីនា កាលពីថ្ងៃទី៧ ខែមីនា ឆ្នាំ២០២៦ ក្រោមប្រធានបទ «សន្តិភាព និងសន្តិសុខសម្រាប់ស្រ្តី និងគ្រួសារ» នៅកោះពេជ្រ ដែលមានសមាសភាពចូលរួមពី មន្រ្តីរាជការ ថ្នាក់ដឹកនាំក្រសួងការងារ និងបណ្តុះបណ្តាលវិជ្ជាជីវៈ ភរិយាវីរកងទ័ព នគរបាល កងរាជអាវុធហត្ថ អតីតយុទ្ធជន គ្រួសារពលី និងមរណភាព មន្រ្តីរាជការខណ្ឌ ក្រុមប្រឹក្សា និងមន្រ្តីសង្កាត់ មកពីខណ្ឌចំការមន និងខណ្ឌពោធិ៍សែនជ័យ សរុបជាង ២ពាន់នាក់។ ឯកឧត្តមរដ្ឋមន្រ្តី ហេង សួរ បានលើកឡើងថា ការជ្រើសរើសយកប្រធានបទនេះ គឺពិតជាចំកាលៈទេសៈ និងស្ថានភាពជាក់ស្តែងដែលបានកើតឡើងចំពោះស្រ្តី នារី និងក្មេងស្រីនៃគ្រួសារវីរកងទ័ព កម្លាំងប្រដាប់អាវុធ និងជនភៀសសឹក។ នេះជាទិដ្ឋភាពជាក់ស្តែង និងចាក់ចំបេះដូងប្រជាពលរដ្ឋ ដែលនៅតែចងចាំស្រ្តីពីគ្រួសារវីរកងទ័ព ដែលត្រូវមានចិត្តអំណត់ មោះមុត ក្នុងការលើកទឹកចិត្តគ្រួសារ ប្តី កូន និងឳពុករបស់ខ្លួន ឱ្យមានចិត្តនឹងនប្រមូលផ្តុំកម្លាំងកាយចិត្ត ដើម្បីប្រយុទ្ធប្រឆាំងនឹងការឈ្លានពាន ដើម្បីការពារបូរណភាពទឹកដីកម្ពុជា។ ឯកឧត្តមរដ្ឋមន្រ្តី បានគូសបញ្ជាក់ថា តួអង្គដ៏សំខាន់ក្នុងការចូលរួមអនុវត្តយុទ្ធសាស្ត្រ “ស្ងាត់តែមិនស្ងៀម” របស់សម្តេច នាយករដ្ឋមន្រ្តី ហ៊ុន ម៉ាណែត គឺវីរកងទ័ពកម្ពុជា ដែលត្រូវជាឪពុក ស្វាមី ពូ បងប្អូន ក្មួយ និងកូនៗរបស់អ្នកមីង បងស្រី ប្អូនស្រី និងក្មួយស្រី ដែលកំពុងមានវត្តមាននៅទីនេះផ្ទាល់។ បងប្អូនវីរកងទ័ពបានលះបង់សាច់ស្រស់ ឈាមស្រស់ និងគោរពដាច់ខាតនូវបទបញ្ជារបស់ថ្នាក់ដឹកនាំ ក្នុងការការពារបូរណភាពទឹកដី និងទប់កុំឱ្យសង្រ្គាមរីករាលដាលក្នុងទ្រង់ទ្រាយធំ។ ការលះបង់ និងការពលីរបស់វីរកងទ័ពកម្ពុជា គឺជាការលះបង់ដ៏ធំធេង ជាគំរូវីរភាពមួយ និងមានគុណបំណាច់មិនអាចកាត់ថ្លៃបាន ចំពោះជាតិកម្ពុជាទាំងមូល ដែលយើងត្រូវតែគោរព និងផ្តល់តម្លៃជាវីរបុរសពិតរបស់ជាតិ ប្រកបដោយកិត្តិយសជាអមតៈ ដែលត្រូវបានចារឹកទុកក្នុងប្រវត្តិសាស្ត្រកម្ពុជា។ឯកឧត្តមរដ្ឋមន្រ្តីបានលើកឡើងថា ការលើកកម្ពស់សមភាពយេនឌ័រនៅតែជាស្នូលមួយនៃកម្មវិធីនយោបាយ និងគោលនយោបាយរបស់រាជរដ្ឋាភិបាលនៅគ្រប់នីតិកាល។ ក្រោមការចង្អុលបង្ហាញ និងតម្រង់ទិសរបស់សម្តេចធិបតី រាជរដ្ឋាភិបាលបានបន្តកំណត់ការលើកកម្ពស់សិទ្ធិ សេរីភាព សមភាពយេនឌ័រ និងការបង្កើនភាពអង់អាចរបស់ស្ត្រី និងក្មេងស្រីនៅគ្រប់វិស័យ ជាអាទិភាពនៅក្នុងរបៀបវារៈគោលនយោបាយ និងយុទ្ធសាស្ត្របញ្ចកោណ ដំណាក់កាលទី១ តាមរយៈការពង្រឹងភាពជាពលរដ្ឋក្នុងសង្គមដែលមានអារ្យធម៌ខ្ពស់ប្រកបដោយសីលធម៌ សមធម៌ និងបរិយាបន្ន ដែលក្នុងនោះ “ស្ត្រីគឺជាស្នូល”៕ អត្ថបទ៖ ឈិត បូរ៉ាវី 

ក្រុមការងារបក្សចុះខេត្តកំពង់ធំ អញ្ជើញជាអធិបតីសម្ពោធអគារសិក្សា និងសមិទ្ធផលនានា នៅ​សាលា​បឋ​មសិក្សាត្រពាំងផ្តៀក

2026/03/08 11:26:18 am        253
Facebook Telegram Linkin
អនុប្រធានទី២ នៃក្រុមការងារគណបក្សចុះមូលដ្ឋានខេត្តកំពង់ធំ អញ្ជើញជាអធិបតីសម្ពោធ​អគារសិក្សា ១ខ្នង មាន៥បន្ទប់ និង សមិទ្ធផលនានា នៅសាលាបឋមសិក្សាត្រពាំងផ្តៀក ស្ថិតក្នុងឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ដែលជាការចូលរួម ចំណែកដល់ការអភិវឌ្ឍធនធានមនុស្សនៅកម្ពុជា។ លោកជំទាវបណ្ឌិត ជា សិរី សមាជិកគណៈអចិន្រ្តៃយ៍នៃគណៈកម្មាធិការកណ្ដាល គណបក្សប្រជាជនកម្ពុជា និងជាអនុ ប្រធានទី២ នៃក្រុមការងារគណបក្សចុះមូលដ្ឋានខេត្តកំពង់ធំ ថ្លែងក្នុងពិធីសម្ពោធអគារសិក្សា១ខ្នង ៥បន្ទប់ និងសមិទ្ធផលនានា នៅ សាលាបឋមសិក្សា ត្រពាំងផ្តៀក ស្ថិតក្នុងឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ នៅថ្ងៃទី៧ ខែមីនា ឆ្នាំ២០២៦ នេះថា ជុំវិញការអភិវឌ្ឍប្រទេសជាតិ ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន ក្នុងអាណត្តិ កន្លងទៅ និងសម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងអាណត្តិទី៧នេះ តែងតែចាត់ទុក ការសិក្សាអប់រំជាអាទិភាពមួយដ៏សំខាន់ ក្នុងការអភិវឌ្ឍសង្គម-សេដ្ឋកិច្ចជាតិ។ ក្នុងន័យនេះរាជរដ្ឋាភិបាលបានស្តារ និងពង្រឹងវិស័យ អប់រំជាបន្តបន្ទាប់ តាមរយៈការពង្រឹងទាំងគុណភាពសិក្សា និងការកសាងអគារសិក្សានៅទូទាំងប្រទេស។ ដោយឡែកនៅខេត្តកំពង់ធំ ឯកឧត្តមជា ចាន់តូ ទេសាភិបាលកិត្តិយស ធនាគារជាតិនៃកម្ពុជា និងជាអតីតតំណាងរាស្ត្រ មណ្ឌលខេត្តកំពង់ធំ តែងតែខិតខំប្រឹង ប្រែងអស់ពីកម្លាំងកាយចិត្ត កសាងសមិទ្ធផលជាច្រើននៅក្នុងខេត្តកំពង់ធំ ជាពិសេសបាន បន្សល់ទុកនូវអគារសិក្សា និងសមិទ្ធផល នានាជាច្រើន ទាំងនៅបឋមសិក្សា អនុវិទ្យាល័យ និងវិទ្យាល័យ។ លោកជំទាវបណ្ឌិត បន្តថា ជុំវិញវិស័យអប់រំនេះ សាលាបឋមសិក្សាត្រពាំងផ្តៀក គឺជាថ្នាលសិក្សាគ្រឹះមួយដ៏សំខាន់ ដែលបាន ចូលរួមចំណែកអភិវឌ្ឍធនធានមនុស្សកម្ពុជា តាមរយៈការពង្រឹងការបណ្តុះបណ្តាលដល់ក្មួយៗសិស្សានុសិស្ស ដែលជាទំពាំងស្នង ឬស្សីជំនាន់ក្រោយប្រកបដោយគុណភាព។ បញ្ហានេះ យើងខ្ញុំទាំងអស់គ្នាជាថ្នាក់ដឹកនាំ និងមន្ត្រីបុគ្គលិកធនាគារជាតិនៃកម្ពុជាទាំង អស់ ពិតជាមានចិត្តសប្បាយរីករាយ ដែលបានចូលរួមវិភាគទានក្នុងដំណើរការពង្រឹងវិស័យអប់រំនៅកម្ពុជា ដែលជាបុព្វហេតុកសាង ធនធានមនុស្សប្រកបដោយចំណេះដឹងគ្រប់គ្រាន់ ដែលអាចចូលរួមចំណែក ក្នុងកិច្ចការអភិវឌ្ឍសង្គមជាតិ ស្របតាមយុទ្ធសាស្រ្តបញ្ច កោណរបស់រាជរដ្ឋាភិបាល។ ការពង្រឹងការបណ្តុះបណ្តាលដល់ក្មួយៗសិស្សានុសិស្ស គឺជាកម្លាំងបន្ដវេន និងធនធានមនុស្សប្រកប ដោយសក្ដានុពល នឹងនាំឱ្យប្រទេសជាតិកាន់តែរីកចម្រើន និងមានការអភិវឌ្ឍជាលំដាប់។ ជាក់ស្តែង ក្រៅពីអគារសិក្សា ១ខ្នង មាន ៥បន្ទប់នេះ សមិទ្ធផលនានាដូចជាក្លោងទ្វារសាលា ការជួសជុលអគារសិក្សា ការសាងសង់ផ្ទះបាយ និងការចាក់ដីបន្ថែម ដើម្បីផ្ដល់ ជូននូវទីតាំងកន្លែងសិក្សា និងបរិស្ថាន ដែលល្អប្រសើរ និងកាន់តែទាក់ទាញក្មួយៗឱ្យខិតខំសិក្សារៀនសូត្រផងដែរ។លោកជំទាវបណ្ឌិត ជា សិរី បានថ្លែងអំណរគុណយ៉ាងជ្រាលជ្រៅ ចំពោះអាជ្ញាធរមានសមត្ថកិច្ចគ្រប់លំដាប់ថ្នាក់ មន្ទីរអប់រំយុវជន និងកីឡា លោកនាយក លោកគ្រូអ្នកគ្រូ និងដៃគូអភិវឌ្ឍនានា ដែលបានផ្តល់កិច្ចសហប្រតិបត្តិការល្អ និងរួមសាមគ្គីគ្នាកសាងអគារសិក្សានេះឡើង សម្រាប់បម្រើវិស័យអប់រំ និងសម្រួលដល់លោកគ្រូអ្នកគ្រូ និងសិស្សានុសិស្សទាំងអស់គ្នាក្នុងដំណើរឆ្ពោះទៅ សម្រេចនូវគោលដៅអភិវឌ្ឍន៍ធនធានមនុស្សនៅកម្ពុជា៕ អត្ថបទ៖ សុន រ៉ាឌី

ស្នងការរាជធានី៖ តម្លៃរបស់នារីមិនមែន​ត្រូវ​បាន​ផ្តល់សម្រាប់តែថ្ងៃ៨មីនានោះទេ គឺ​មាន​គ្រប់​ពេល

2026/03/08 11:13:41 am        238
Facebook Telegram Linkin
នៅរសៀលថ្ងៃទី៧ ខែមីនា ឆ្នាំ២០២៦ ស្នងការដ្ឋាននគរបាលរាជធានីភ្នំពេញ បានរៀបចំពិ​ធី​សំណេះ​សំណាល​ខួប​លើកទី១១៥ ទិវាអន្តរជាតិនារី ០៨ មីនា ឆ្នាំ២០២៦ ក្រោមប្រធានបទ “ សន្តិភាព និងសន្តិសុខសម្រាប់ស្ត្រី និងគ្រួសារ“។ពិធីនេះ ប្រព្រឹត្តទៅ ក្រោមអធិបតីភាព ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និង​​​ជា​ស្នងការនគរបាលរាជធានីភ្នំពេញ និងមានការអញ្ជើញចូលរួមពីលោក-លោកស្រីស្នងការរង លោក​អនុ​ប្រធានផែន លោក-លោកស្រីនាយការិយាល័យជំនាញ លោកអធិការ​នគរបាល​ទាំង​១៤​ខណ្ឌ ​និងមន្ត្រីនគរបាលក្រោមឱវាទជានារីទាំងអស់ និវត្តន៍ជនជានារី មន្ត្រីកិច្ចសន្យាជានារី បុគ្គលិក​នារី​ថែទាំអគារ សរុបចំនួន៧២៤នាក់ ។ក្នុងឱកាសនោះ លោកស្រីឧត្តមសេនីយ៍ត្រី ឆេង សារ៉េត ស្នងការរង ទទួលការងារយ៉េនឌ័រ បាន​ឡើង​អាន​ព្រះរាជសារជូនពរទាំងស្រុង របស់សម្តេចព្រះមហាក្សត្រី នរោត្តម មុនីនាថ សីហនុ ព្រះ​វររា​ជ​មាតាជាតិខ្មែរ ដោយភ្ជាប់នូវអត្ថន័យខ្លឹមសារជ្រាលជ្រៅប្រកបដោយក្តីនឹករលឹក និង​ក្តី​ស្រលាញ់ ជូនដល់នារីទូទាំងប្រទេស ។ ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរង និងជាស្នងការនគរបាលរាជធានីភ្នំពេញ បានមានប្រសាសន៍ពាំនាំបណ្តាំសាកសួរសុខទុក្ខពីសំណាក់ ឯកឧត្តម អភិសន្តិបណ្ឌិត ស សុខា ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងឯកឧត្តម នាយឧត្តមសេនីយ៍ ស ថេត អគ្គស្នងការនគរបាលជាតិ ជូនចំពោះកងកម្លាំងនគរបាលរាជធានីភ្នំពេញជានារីនឹងក៏បានសម្តែងនូវការកោតសរសើរ ហើយវាយតម្លៃខ្ពស់ចំពោះ ថ្នាក់ដឹកនាំ ព្រមទាំងនគរបាលជានារី នៃស្នងការដ្ឋាននគរបាលរាជធានីភ្នំពេញ ដែលបានខិតខំបំពេញភារកិច្ចប្រកបដោយឆន្ទៈខ្ពស់ ចូលរួមការពារថែរក្សាសន្តិសុខសណ្តាប់ធ្នាប់ សុវត្ថិភាពសង្គម ជាពិសេសដើរតួនាទីយ៉ាងសំខាន់ ក្នុងការលើកកម្ពស់ គុណតម្លៃនារីឱ្យកាន់តែមានភាពថ្កុំថ្កើន តាមរយៈការបង្ហាញពីសមត្ថភាព គុណភាព វិន័យ សីលធម៌ល្អ ក្នុងនាមជាកងកម្លាំងបម្រើផលប្រយោជន៍ និងភាពស្មោះពិតប្រាកដចំពោះប្រជាពលរដ្ឋនិងប្រទេសជាតិ ។ ជាមួយគ្នានេះដែរ ឯកឧត្តមស្នងការ ក៏បានណែនាំកងកម្លាំងនគរបាលនារី ត្រូវបន្តពង្រឹងសមត្ថភាព និងពង្រឺកចំណេះ ជំនាញ ជាពិសេសចំណេះដឹងផ្នែកបច្ចេកទេស ឌីជីថល ភាសាបរទេស ដើម្បីចូលរួមចំណែកលើកកម្ពស់សមភាពយេនឌ័រ និងយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាលកម្ពុជា នីតិកាលទី៧នៃរដ្ឋសភា ក្រោមការដឹកនាំដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា យ៉ាងពិតប្រាកដ ។ ក្នុងកាលៈទេសៈនេះ ក្នុងនាមអ្នកសមរភូមិក្រោយ ឯកឧត្តមស្នងការ ក៏បានសម្តែងការស្ញប់ស្ញែង និងកោតសរសើរចំពោះវីរភាពអង់អាចក្លាហានរបស់កងកម្លាំងជានារីទាំងអស់ នៅសមរភូមិមុខ ដែលកំពុងបំពេញភារកិច្ចដ៏ឧត្តុងឧត្តមក្នុងបុព្វហេតុការពារទឹកដី ដែលបញ្ជាក់ឲ្យឃើញយ៉ាងច្បាស់ថា នារីជាផ្នែកដ៏សំខាន់ មានស្នាដៃ និងការលះបង់មិនចាញ់បុរសនោះឡើយ ហើយក៏ជាតួអង្គសំខាន់ដែលសង្គមជាតិមិនអាចខ្វះបាននោះឡើយ ។ ចុងបញ្ចប់ នៃពិធី ឯកឧត្តមស្នងការ និងលោកស្នងការង ក៏បានអញ្ជើញប្រគល់បាច់ផ្កាជូន មន្ត្រីនគរបាលជានារី និងភរិយា និងបានថតរូបទុកជាអនុស្សាវរីយ៍ផងដែរ៕ លីហេង

សម្ដេចធិបតី៖ រាជរដ្ឋាភិបាលលើកកម្ពស់សមភាពយេនឌ័រ និងបង្កើនភាពអង់អាចរបស់ស្ត្រី និង​ក្មេងស្រី ជាអាទិភាព

2026/03/08 10:37:33 am        303
Facebook Telegram Linkin
ភ្នំពេញ៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា មាន​ប្រសាសន៍​បញ្ជាក់​ថា រាជរដ្ឋាភិបាលកម្ពុជា បានបន្តកំណត់ការលើកកម្ពស់សមភាពយេនឌ័រ និង​ការ​បង្កើន​ភាព​អង់​អាច​របស់ស្ត្រី និងក្មេងស្រីនៅគ្រប់វិស័យជាអាទិភាព នៅក្នុង​របៀប​វារៈ​គោល​នយោបាយ​ និងយុទ្ធសាស្ត្របញ្ចកោណ ដំណាក់កាលទី១ តាមរយៈការ​ពង្រឹង​ភាព​ជា​ពលរដ្ឋ​ក្នុង​សង្គម​ដែល​មាន​អារ្យធម៌ខ្ពស់ប្រកបដោយសីលធម៌ សមធម៌ និងបរិយាបន្ន ដែលក្នុងនោះ ស្ត្រី​គឺ​ជា​ស្នូល​។តាមរយៈសារលិខិតសម្តេចធិបតី នាយករដ្ឋមន្ត្រី ក្នុងឱកាសអបអរសាទរខួបលើកទី១១៥ ទិវា​អន្តរ​ជាតិ​នារី ៨ មីនា ឆ្នាំ២០២៦ ក្រោមប្រធានបទ «សន្តិភាព និងសន្តិសុខសម្រាប់ស្ត្រី និង​គ្រួសារ​»​ នៅថ្ងៃអាទិត្យ ទី៨ ខែមីនា ឆ្នាំ២០២៦នេះ, សម្ដេចធិបតី និងភរិយា មាន​សេចក្តី​រីក​រាយ​ក្រៃ​លែង​ដែល​បានចូ​លរួមជាមួយ បងប្អូនជនរួមជាតិ បងប្អូន កូនក្មួយនារីៗទូទាំងប្រទេស និង​សហគមន៍​អន្តរជាតិ ក្នុងឱកាសនៃការប្រារព្ធទិវាអន្តរជាតិឆ្នាំនេះ។ សម្ដេធិបតី មានប្រសាសន៍ថា ប្រធាន​បទឆ្នាំ​នេះរំលឹកយើងថា «សន្តិភាព និងសន្តិសុខ មិនត្រឹម​តែ​ជា​វត្ថុ​បំណង​នៃ​ប្រជាជាតិ​មួយ​ ឬ​ពិភពលោកប៉ុណ្ណោះទេ ប៉ុន្តែវាជាតថភាពជាក់ស្តែង ដែលផ្តើមចេញពីផ្ទះរបស់យើង សហគមន៍​ និងជីវិតប្រចាំថ្ងៃ របស់ស្ត្រី និងក្រុមគ្រួសារ»។សម្ដេចធិបតីបានថ្លែងថា ទោះបីជាត្រូវប្រឈមនឹងការលំបាក និងឧបសគ្គទាំងកត្តាខាងក្នុង និង​កត្តា​ខាង​ក្រៅ​យ៉ាង​ណាក្តី កម្ពុជារក្សាបាននូវសន្តិភាពក្នុងផ្ទៃប្រទេស ស្ថិរភាពនយោបាយ សន្តិសុខ សណ្តាប់ធ្នាប់សង្គម ព្រមទាំងស្ថិរភាពម៉ាក្រូសេដ្ឋកិច្ច ដែលបាន​ផ្តល់​ភាព​អនុ​គ្រោះ​ដល់​ការ​អភិវឌ្ឍ​សេដ្ឋកិច្ចសង្គម និងរក្សាលំនឹងនៃជីវភាពរបស់ប្រជាជន ជាក់ស្តែង ក្នុង​ឆ្នាំ​២០២៥​កន្ល​ង​ទៅ​កម្ពុជាបានបោះជំហានទៅមុខយ៉ាងស្វាហាប់លើមាគ៌ាសន្តិភាព ប្រជាធិបតេយ្យ នីតិរដ្ឋ និង​អភិវឌ្ឍន៍ ជាមួយចក្ខុវិស័យច្បាស់លាស់ ការប្តេជ្ញាចិត្តមោះមុត ស្ថិរភាពនយោបាយ និងសន្តិសុខ ត្រូវ​បាន​ ការពារយ៉ាងរឹងមាំ លទ្ធិប្រជាធិបតេយ្យ សិទ្ធិសេរីភាព និងនីតិរដ្ឋត្រូវបានពង្រឹង និង​លើក​កម្ពស់​ឥត​ឈប់ឈរសេដ្ឋកិច្ចជាតិបន្តលូតលាស់ប្រកបដោយចីរភាព ជីវភាពប្រជាជន​មាន​ស្ថិរភាព ​កំណែទម្រង់នានាត្រូវបានអនុវត្តដោយឆន្ទៈមុតស្រួច និងប្រសិទ្ធភាព ប្រព័ន្ធ​គាំពារ​សង្គម​​កាន់តែត្រូវបានអភិវឌ្ឍប្រកបដោយគុណភាព។សម្ដេចនាយករដ្ឋមន្រ្ដីបានថ្លែងថា៖«រាជរដ្ឋាភិបាលកម្ពុជា បានបន្ត​កំណត់​ការ​លើក​កម្ពស់​សមភា​ព​យេ​នឌ័រ និងការបង្កើនភាពអង់អាចរបស់ស្ត្រី និងក្មេងស្រីនៅគ្រប់វិស័យជាអាទិភាព នៅក្នុង​របៀប​វារៈ​គោលនយោបាយ និងយុទ្ធសាស្ត្របញ្ចកោណ ដំណាក់កាលទី១ តាមរយៈ​ការ​ពង្រឹង​ភាព​ជា​ពលរដ្ឋ​ក្នុងសង្គមដែលមានអារ្យធម៌ខ្ពស់ប្រកបដោយសីលធម៌ សមធម៌ និងបរិយាបន្ន ដែល​ក្នុង​នោះ ស្ត្រីគឺជាស្នូល»។ សម្ដេចបានបន្តថា រាជរដ្ឋាភិបាលបានបន្តបង្កើនការវិនិយោគលើសមភាពយេនឌ័រ និងបង្កើនភាព អង់​អាចដល់ស្ត្រីនិងក្មេងស្រីនៅក្នុងវិស័យសេដ្ឋកិច្ច អប់រំ សុខភាព និងការដឹកនាំសាធារណៈ ដើម្បី​ទាញយក អត្ថប្រយោជន៍ពីភាគលាភយេនឌ័រ ការប​ង្ក​លក្ខណៈ​អំណោយ​ផល​ដល់​ស្ត្រី​ក្នុង​ការ​ប្រើ​ប្រាស់សិទ្ធិក្នុងការសម្រេចចិត្ត លើផែនការគ្រួសារ ការកាត់បន្ថយ​ភាព​ងាយ​រង​គ្រោះ​ដោយ​អំពើ​ហិង្សា​ទាក់ទងនឹងយេនឌ័រ និងការលើកកម្ពស់ ទំនាក់ទំនងអន្តរជំនាន់។ សម្ដេច​នាយករដ្ឋមន្រ្ដីបានថ្លែងថា រាជរដ្ឋាភិបាលកម្ពុជា បានទទួល​ស្គាល់​យ៉ាង​មុត​មាំ​ថា​ស្ត្រីមិ​ន​ត្រឹម​តែ​ជា​អ្នកទទួលផលពីសុខសន្តិភាពប៉ុណ្ណោះទេ ប៉ុន្តែក៏ជាភ្នាក់ងារដ៏ចាំបាច់ និងបាន​ដើរ​តួនាទី​យ៉ាង​សំខាន់​ក្នុងការរួម ចំណែកកសាង និងថែរក្សាសុខសន្តិភាព រាប់ចាប់តាំងពីគ្រួសារ សហគមន៍​ និងសង្គមជាតិ ព្រមទាំងនៅលើឆាក អន្តរជាតិផងដែរ។ សម្ដេចបានគូសបញ្ជាក់ថា កម្ពុជា​ត្រូវបានទទួលស្គាល់លើឆាកអន្តរជាតិ ក្នុងការបញ្ជូនកងកម្លាំងរក្សាសន្តិភាពជាស្ត្រី ចូល​រួម​បេស​កក​ម្ម​រក្សាសន្តិភាពអង្គការសហប្រជាជាតិ នៅក្នុងប្រទេស ចំនួន១០ បើគិតចាប់​ពី​ឆ្នាំ​២០០៦ ​ដល់ឆ្នាំ២០២៥ កម្ពុជាបានបញ្ជូនកងកម្លាំងសរុប ១០ ៤៤៧នាក់ ក្នុងនោះស្ត្រី មាន​ចំនួន ៩៩០នាក់។ ការណ៍​នេះ​ក៏ឆ្លើយតបទៅនឹងក្របខ័ណ្ឌសកលស្តីពីរបៀបវារៈស្តីពីស្ត្រី សន្តិភាព និងសន្តិសុខ របស់ក្រុមប្រឹក្សា សន្តិសុខអង្គការសហប្រជាជាតិ លេខ១៣២៥ ដែលរំលេចពី​តួនាទី​ដ៏​សំខា​ន់​របស់​ស្ត្រី និងក្មេងស្រី ក្នុងការចូលរួម កសាង ការពារសន្តិភាព និងសន្តិសុខ តាមរយៈ​ការ​ចូល​រួម​បង្ការ ​ទប់ស្កាត់ជម្លោះ ការកសាងសន្តិភាព ព្រមទាំង ការស្តារឡើងវិញក្រោយជម្លោះ។ ជា​សក្ខី​ភាព​​ កម្ពុជាបានក្លាយជាអ្នកនាំមុខនៅក្នុងតំបន់ក្នុងការលើកកម្ពស់ការអនុវត្ត របៀបវារៈស្ត្រី សន្តិភាព និងសន្តិសុខ ដោយកាលពីឆ្នាំ២០២២កន្លងទៅ ប្រទេសកម្ពុជា តាមរយៈ​ក្រសួង​កិច្ច​ការ​នារី ​បានដឹកនាំរៀបចំផែនការសកម្មភាពតំបន់អាស៊ានស្តីពីស្ត្រី សន្តិភាព និងសន្តិសុខ ដែល​ត្រូវ​បាន​អនុម័ត​ក្នុងកិច្ចប្រជុំ កំពូលអាស៊ាន ហើយកម្ពុជាកំពុងដើរតួនាទីជាប្រធានក្រុមប្រឹក្សាអាស៊ាន ស្តីពីស្ត្រី សន្តិភាព និងសន្តិសុខ ក្នុង ការតាមដាន និងជំរុញការអនុវត្តផែនការនេះផងដែរ៕

ក្រុមការងារបក្សចុះខេត្តកំពង់ធំ អញ្ជើញជាអធិបតីសម្ពោធអគារសិក្សា និងសមិទ្ធផលនានា នៅសាលាបឋមសិក្សាត្រពាំងផ្តៀក

2026/03/07 10:08:26 pm        55
Facebook Telegram Linkin
អនុប្រធានទី២ នៃក្រុមការងារគណបក្សចុះមូលដ្ឋានខេត្តកំពង់ធំ អញ្ជើញជាអធិបតីសម្ពោធអគារសិក្សា ១ខ្នង មាន៥បន្ទប់ និង សមិទ្ធផលនានា នៅសាលាបឋមសិក្សាត្រពាំងផ្តៀក ស្ថិតក្នុងឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ ដើម្បីចូលរួមចំណែក ដល់ការអភិវឌ្ឍធនធានមនុស្សនៅកម្ពុជា។  លោកជំទាវបណ្ឌិត ជា សិរី សមាជិកគណៈអចិន្រ្តៃយ៍នៃគណៈកម្មាធិការកណ្ដាល គណបក្សប្រជាជនកម្ពុជា និងជាអនុ ប្រធានទី២ នៃក្រុមការងារគណបក្សចុះមូលដ្ឋានខេត្តកំពង់ធំ ថ្លែងក្នុងពិធីសម្ពោធអគារសិក្សា១ខ្នង ៥បន្ទប់ និងសមិទ្ធផលនានា នៅ សាលាបឋមសិក្សា ត្រពាំងផ្តៀក ស្ថិតក្នុងឃុំសាលាវិស័យ ស្រុកប្រាសាទបល្ល័ង្ក ខេត្តកំពង់ធំ នៅថ្ងៃទី៧ ខែមីនា ឆ្នាំ២០២៦ នេះថា ជុំវិញការអភិវឌ្ឍប្រទេសជាតិ ក្រោមការដឹកនាំប្រកបដោយគតិបណ្ឌិត របស់សម្តេចអគ្គមហាសេនាបតីតេជោ ហ៊ុន សែន ក្នុងអាណត្តិ កន្លងទៅ និងសម្តេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ក្នុងអាណត្តិទី៧នេះ តែងតែចាត់ទុក ការសិក្សាអប់រំជាអាទិភាពមួយដ៏សំខាន់ ក្នុងការអភិវឌ្ឍសង្គម-សេដ្ឋកិច្ចជាតិ។ ក្នុងន័យនេះរាជរដ្ឋាភិបាលបានស្តារ និងពង្រឹងវិស័យ អប់រំជាបន្តបន្ទាប់ តាមរយៈការពង្រឹងទាំងគុណភាពសិក្សា និងការកសាងអគារសិក្សានៅទូទាំងប្រទេស។ ដោយឡែកនៅខេត្តកំពង់ធំ ឯកឧត្តមជា ចាន់តូ ទេសាភិបាលកិត្តិយស ធនាគារជាតិនៃកម្ពុជា និងជាអតីតតំណាងរាស្ត្រ មណ្ឌលខេត្តកំពង់ធំ តែងតែខិតខំប្រឹង ប្រែងអស់ពីកម្លាំងកាយចិត្ត កសាងសមិទ្ធផលជាច្រើននៅក្នុងខេត្តកំពង់ធំ ជាពិសេសបាន បន្សល់ទុកនូវអគារសិក្សា និងសមិទ្ធផល នានាជាច្រើន ទាំងនៅបឋមសិក្សា អនុវិទ្យាល័យ និងវិទ្យាល័យ។ លោកជំទាវបណ្ឌិត បន្តថា ជុំវិញវិស័យអប់រំនេះ សាលាបឋមសិក្សាត្រពាំងផ្តៀក គឺជាថ្នាលសិក្សាគ្រឹះមួយដ៏សំខាន់ ដែលបាន ចូលរួមចំណែកអភិវឌ្ឍធនធានមនុស្សកម្ពុជា តាមរយៈការពង្រឹងការបណ្តុះបណ្តាលដល់ក្មួយៗសិស្សានុសិស្ស ដែលជាទំពាំងស្នង ឬស្សីជំនាន់ក្រោយប្រកបដោយគុណភាព។ បញ្ហានេះ យើងខ្ញុំទាំងអស់គ្នាជាថ្នាក់ដឹកនាំ និងមន្ត្រីបុគ្គលិកធនាគារជាតិនៃកម្ពុជាទាំង អស់ ពិតជាមានចិត្តសប្បាយរីករាយ ដែលបានចូលរួមវិភាគទានក្នុងដំណើរការពង្រឹងវិស័យអប់រំនៅកម្ពុជា ដែលជាបុព្វហេតុកសាង ធនធានមនុស្សប្រកបដោយចំណេះដឹងគ្រប់គ្រាន់ ដែលអាចចូលរួមចំណែក ក្នុងកិច្ចការអភិវឌ្ឍសង្គមជាតិ ស្របតាមយុទ្ធសាស្រ្តបញ្ច កោណរបស់រាជរដ្ឋាភិបាល។ ការពង្រឹងការបណ្តុះបណ្តាលដល់ក្មួយៗសិស្សានុសិស្ស គឺជាកម្លាំងបន្ដវេន និងធនធានមនុស្សប្រកប ដោយសក្ដានុពល នឹងនាំឱ្យប្រទេសជាតិកាន់តែរីកចម្រើន និងមានការអភិវឌ្ឍជាលំដាប់។ ជាក់ស្តែង ក្រៅពីអគារសិក្សា ១ខ្នង មាន ៥បន្ទប់នេះ សមិទ្ធផលនានាដូចជាក្លោងទ្វារសាលា ការជួសជុលអគារសិក្សា ការសាងសង់ផ្ទះបាយ និងការចាក់ដីបន្ថែម ដើម្បីផ្ដល់ ជូននូវទីតាំងកន្លែងសិក្សា និងបរិស្ថាន ដែលល្អប្រសើរ និងកាន់តែទាក់ទាញក្មួយៗឱ្យខិតខំសិក្សារៀនសូត្រផងដែរ។លោកជំទាវបណ្ឌិត ជា សិរី បានថ្លែងអំណរគុណយ៉ាងជ្រាលជ្រៅ ចំពោះអាជ្ញាធរមានសមត្ថកិច្ចគ្រប់លំដាប់ថ្នាក់ មន្ទីរអប់រំយុវជន និងកីឡា លោកនាយក លោកគ្រូអ្នកគ្រូ និងដៃគូអភិវឌ្ឍនានា ដែលបានផ្តល់កិច្ចសហប្រតិបត្តិការល្អ និងរួមសាមគ្គីគ្នាកសាងអគារសិក្សានេះឡើង សម្រាប់បម្រើវិស័យអប់រំ និងសម្រួលដល់លោកគ្រូអ្នកគ្រូ និងសិស្សានុសិស្សទាំងអស់គ្នាក្នុងដំណើរឆ្ពោះទៅ សម្រេចនូវគោលដៅអភិវឌ្ឍន៍ធនធានមនុស្សនៅកម្ពុជា៕អត្ថបទ៖ សុន រ៉ាឌី

រាជរដ្ឋាភិបាលចាត់ទុកការអភិវឌ្ឍមូលធនមនុស្សជាការចាំបាច់ ជួយជំរុញពិពិធកម្មនិងកំណើនសេដ្ឋកិច្ច

2026/03/07 09:37:44 pm        58
Facebook Telegram Linkin
រាជរដ្ឋាភិបាលកម្ពុជាចាត់ទុកការអភិវឌ្ឍមូលធនមនុស្ស ជាអាទិភាពនៅក្នុងយុទ្ធសាស្ត្របញ្ចកោណ សម្រាប់ការអនុវត្តនៅគ្រប់ ដំណាក់កាល សំដៅដល់ការអប់រំមានចំណេះដឹងទូលាយ ជំនាញពិតប្រាកដ ព្រមទាំងសីលធម៌ គុណធម៌ និងមនសិការសេ្នហាជាតិ។ លោកជំទាវបណ្ឌិត ជា សិរី សមាជិកគណៈអចិន្រ្តៃយ៍នៃគណៈកម្មាធិការកណ្ដាល គណបក្សប្រជាជនកម្ពុជា និងជាអនុ ប្រធានទី២ នៃក្រុមការងារគណបក្សចុះមូលដ្ឋានខេត្តកំពង់ធំ ថ្លែងក្នុងពិធីសម្ពោធអគារសិក្សា១ខ្នង មាន២ជាន់ ស្មើ១២បន្ទប់ និង អគារបណ្ណាល័យ១ខ្នង នៅវិទ្យាល័យជា ស៊ីម កំពង់ថ្ម ស្ថិតក្នុងឃុំបល្ល័ង្គ ស្រុកបារាយណ៍ ខេត្តកំពង់ធំ នៅថ្ងៃទី៧ ខែមីនា ឆ្នាំ២០២៦ ថា រាជរដ្ឋាភិបាលកម្ពុជា ក្រោមការដឹកនាំរបស់សម្តេចធិបតី នាយករដ្ឋមន្ត្រី បាននិងកំពុងធ្វើដំណើរទៅមុខយ៉ាងស្វាហាប់ និងបន្ត យកចិត្តទុកដាក់យ៉ាងខ្លាំង ទៅលើវិស័យសំខាន់ៗនានាក្នុងការអភិវឌ្ឍសេដ្ឋកិច្ចជាតិ។ ក្នុងនោះរាជរដ្ឋាភិបាលកម្ពុជាបានចាត់ទុកការ អភិវឌ្ឍមូលធនមនុស្ស ជាអាទិភាពនៅក្នុងយុទ្ធសាស្ត្របញ្ចកោណ សម្រាប់ការអនុវត្តនៅគ្រប់ដំណាក់កាល ដែលសំដៅដល់ការអប់រំ ឱ្យមានចំណេះដឹងទូលាយ ជំនាញពិតប្រាកដ ព្រមទាំងសីលធម៌ គុណធម៌ និងមនសិការសេ្នហាជាតិ ជាពិសេសការបណ្ដុះបណ្ដាល ជំនាញបច្ចេកទេស វិទ្យាសាស្រ្ត និងបច្ចេកវិទ្យា។ជាក់ស្តែងសម្តេចធិបតី នាយករដ្ឋមន្ត្រី បានផ្ដល់អនុសាសន៍គន្លឹះ៤ចំណុច សំដៅលើកកម្ពស់គុណភាពអប់រំ ដោយផ្តោត សំខាន់លើការពង្រឹងគុណភាពសាលារៀនរដ្ឋរួមមាន៖ ទី១. ការពង្រឹងអភិបាលកិច្ច, ទី២. ការពិនិត្យ កែសម្រួល និងរៀបចំកម្មវិធី សិក្សា និងសកម្មភាពក្រៅម៉ោងសិក្សាឱ្យស្របទៅតាមតម្រូវការ ក្នុងការពង្រឹងចំណេះដឹង វិន័យ សីលធម៌ និងឥរិយាបថរបស់សិស្ស, ទី៣. ការយកចិត្តទុកដាក់លើសុខភាពរបស់សិស្ស និងទី៤. ការជំរុញ និងលើកទឹកចិត្តការចូលរួមរបស់មាតាបិតា អាណាព្យាបាល និង សហគមន៍ក្នុងការអប់រំ ស្របតាមពាក្យស្លោក “ភាពជាដៃគូរដ្ឋ និងសហគមន៍ ដើម្បីការអប់រំ”។ លោកជំទាវបណ្ឌិត បន្តថា ជុំវិញការអប់រំនេះ វិទ្យាល័យជាស៊ីម កំពង់ថ្ម គឺជាថ្នាលសិក្សាមូលដ្ឋានមួយដ៏សំខាន់មួយ បាន ចូលរួមចំណែកអភិវឌ្ឍធនធានមនុស្សកម្ពុជា តាមរយៈការពង្រឹងការបណ្តុះបណ្តាលដល់ក្មួយៗសិស្សានុសិស្ស ដែលជាទំពាំងស្នង ឬស្សីជំនាន់ក្រោយប្រកបដោយគុណភាព។ បញ្ហានេះក្នុងនាមថ្នាក់ដឹកនាំ និងមន្ត្រីបុគ្គលិកធនាគារជាតិនៃកម្ពុជាទាំងអស់ ព្រមទាំង សប្បុរសជនធនាគារ អេស៊ីលីដា ភីអិលស៊ី និងគ្រឹះស្ថានមីក្រូហិរញ្ញវត្ថុ ហ្វឺស ហ្វាយនែន ភីអិលស៊ី ពិតជាមានចិត្តសប្បាយរីករាយដែល បានចូលរួមវិភាគទាន ក្នុងដំណើរការពង្រឹងវិស័យអប់រំកន្លងមក។ តាមរយៈការពង្រឹងការបណ្តុះ បណ្តាលដល់ក្មួយៗសិស្សានុសិស្ស ដែលជាកម្លាំងបន្ដវេន និងធនធានមនុស្សប្រកបដោយ សក្ដានុពល នឹងនាំឱ្យប្រទេសជាតិកាន់តែរីកចម្រើន និងមានការអភិវឌ្ឍជា លំដាប់។ ជាការពិតណាស់ ការផ្ដល់ជូននូវអគារសិក្សា និងបណ្ណាល័យ ជាមួយនឹងការបំពាក់នូវបរិក្ខារថ្មីៗ នឹងកាន់តែទាក់ទាញក្មួយៗ ឱ្យខិតខំសិក្សារៀនសូត្របានកាន់តែខ្លាំងជាងមុនពីមួយថ្ងៃទៅមួយថ្ងៃ។លោកជំទាវបណ្ឌិត ក៏បានអំពាវនាវឱ្យលោកគ្រូ អ្នកគ្រូ សិស្សានុសិស្ស អាជ្ញាធរមានសមត្ថកិច្ច មាតាបិតា និងអាណាព្យាបាល សិស្សទាំងអស់ សូមជួយថែរក្សាអគារសិក្សានិងបណ្ណាល័យនេះ ឱ្យបានគង់វង្សជាប្រយោជន៍ ដើម្បីប្រើប្រាស់សមិទ្ធផលទាំងនេះឱ្យបានយូរអង្វែងសម្រាប់កូនចៅជំនាន់ក្រោយ និងផ្ដាំផ្ញើដល់សិស្សានុសិស្សខិតខំប្រឹងប្រែងរៀនសូត្រ ដើម្បីទទួលនិទ្ទេសល្អសម្រាប់អនាគតខ្លួនឯង និងការចូលរួមកសាងប្រទេសជាតិឱ្យកាន់តែរីកម្រើន៕អត្ថបទ៖ រ៉ាឌី

ក្រសួងបរិស្ថានបញ្ជាឱ្យមន្ទីរបរិស្ថានរាជធានី–ខេត្ត ពិនិត្យទីតាំងស្តុកសំណល់អេតចាយទូទាំងប្រទេស បន្ទាប់ពីរកឃើញទីតាំងខុសច្បាប់មួយកន្លែងឆេះបង្កការបំពុល

2026/03/07 05:01:15 pm        171
Facebook Telegram Linkin
ភ្នំពេញ (ថ្ងៃទី៧ ខែមីនា ឆ្នាំ២០២៦) ក្រសួងបរិស្ថានបានបញ្ជាឱ្យមន្ទីរបរិស្ថានរាជធានី–ខេត្តទាំងអស់ ពិនិត្យ និងរាយការណ៍អំពីទីតាំងស្តុកសំណល់អេតចាយនៅទូទាំងប្រទេស ដើម្បីធានាឱ្យមានការអនុវត្តតាមបទប្បញ្ញត្តិបរិស្ថាន បន្ទាប់ពីអាជ្ញាធររកឃើញទីតាំងស្តុកសំណល់ខុសច្បាប់មួយកន្លែងបានឆេះ បង្កការបំពុលបរិស្ថានយ៉ាងធ្ងន់ធ្ងរ។ក្រសួងបានបញ្ជាក់ថា សេចក្តីណែនាំនេះត្រូវបានចេញបន្ទាប់ពីមានអគ្គិភ័យឆេះទីតាំងស្តុកសំណល់អេតចាយខុសច្បាប់មួយកន្លែង នៅខេត្តកំពង់ស្ពឺ ដែលបង្កផ្សែងខ្មៅក្រាស់ និងបង្កការព្រួយបារម្ភអំពីផលប៉ះពាល់ដល់បរិស្ថាន និងសុខភាពសាធារណៈ។តាមការណែនាំ មន្ទីរបរិស្ថានរាជធានី–ខេត្តត្រូវចុះត្រួតពិនិត្យ និងរៀបចំរបាយការណ៍អំពីទីតាំងស្តុក និងកែច្នៃសំណល់អេតចាយនៅក្នុងដែនសមត្ថកិច្ចរបស់ខ្លួន។ ការត្រួតពិនិត្យនេះនឹងផ្តោតលើការអនុវត្តតាមបទដ្ឋានបរិស្ថាន រួមមានការស្តុកសំណល់ឱ្យបានត្រឹមត្រូវ ការគ្រប់គ្រងសំណល់គ្រោះថ្នាក់ និងការទទួលបានលិខិតអនុញ្ញាតបរិស្ថានត្រឹមត្រូវ។មន្ត្រីក្រសួងបរិស្ថានបានបញ្ជាក់ថា ការត្រួតពិនិត្យនេះមានគោលបំណងបង្ការហានិភ័យបរិស្ថាន ដូចជា អគ្គិភ័យ ការបំពុលខ្យល់ និងការគ្រប់គ្រងសារធាតុគ្រោះថ្នាក់មិនបានត្រឹមត្រូវ ដែលអាចកើតមាននៅទីតាំងស្តុកសំណល់ដែលគ្មានការគ្រប់គ្រងត្រឹមត្រូវ។ក្រសួងក៏បានព្រមានថា អាជីវកម្មណាដែលមិនអនុវត្តតាមច្បាប់ និងបទប្បញ្ញត្តិបរិស្ថាន អាចប្រឈមមុខនឹងវិធានការរដ្ឋបាល ឬចាត់វិធានការតាមផ្លូវច្បាប់ ស្របតាម ក្រមបរិស្ថាន និងធនធានធម្មជាតិ របស់កម្ពុជា។អាជ្ញាធរបានបញ្ជាក់ថា ការត្រួតពិនិត្យទូទាំងប្រទេសនេះ មានគោលបំណងពង្រឹងការតាមដានបរិស្ថាន និងធានាថាសកម្មភាពគ្រប់គ្រងសំណល់ មិនបង្កហានិភ័យដល់បរិស្ថាន និងសុខភាពប្រជាពលរដ្ឋ។

តុលាការក្រុងភ្នំពេញសម្រេចឃុំខ្លួនមេខ្លោង Online scam ចំនួន៧នាក់ដាក់ពន្ធនាគារ

2026/03/07 03:32:19 pm        323
Facebook Telegram Linkin
ភ្នំពេញ៖ ក្រុមជនត្រូវចោទជាមេខ្លោងចំនួន៧នាក់ ត្រូវបានបញ្ជូនទៅឃុំខ្លួនជាបណ្តោះអាសន្ននៅមណ្ឌលអប់រំកែប្រែទី១ កាលពីថ្ងៃទី៥ ខែមីនា ឆ្នាំ២០២៦ ក្រោមបទល្មើសឆបោកមានស្ថានទម្ងន់ទោស ដែលប្រព្រឹត្តនៅអគារស្តាស៊ីធី អគារលេខ២ ជាន់ទី៩ បន្ទប់ ៩១២ ភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ កាលពីអំឡុងឆ្នាំ២០២៥ រហូតមកដល់ថ្ងៃទី២៥ ខែកុម្ភៈ ឆ្នាំ២០២៦។យោងតាមដីកាសម្រេចចំនួន៧ផ្សេងគ្នារបស់លោក ឡោ ក្រឹម ចៅក្រមស៊ើបសួរនៃសាលាដំបូងរាជធានីភ្នំពេញ បានបញ្ជាក់ថា ការសម្រេចឃុំខ្លួននេះ ធ្វើឡើងបន្ទាប់ពីបានពិនិត្យយ៉ាងល្អិតល្អន់លើសំណុំរឿង ដែលកសាងដោយសមត្ថកិច្ចនៃស្នងការដ្ឋាននគរបាលរាជធានីភ្នំពេញ។ជនត្រូវចោទ ទី១មានឈ្មោះ XI BING ភេទប្រុស ជនជាតិចិន , ទី២ ឈ្មោះ CHEN LANG ភេទប្រុស ជនជាតិចិន , ទី៣ឈ្មោះ XIA CHAO ភេទប្រុស ជនជាតិចិន, ទី៤ ឈ្មោះ NAN LIANG ភេទប្រុស ជនជាតិចិន , ទី៥ឈ្មោះ FAN LEI ភេទប្រុស ជនជាតិចិន , ទី៦ឈ្មោះ KIRAN KUMA RBAYAK ភេទប្រុស ជនជាតិនេប៉ាល់ និងទី៧ ឈ្មោះ MOHD SAKIB ភេទប្រុស ជនជាតិឥណ្ឌា ។ជនបរទេសទាំង៧នាក់នេះ ត្រូវបានដាក់ឱ្យនៅក្រោមការពិនិត្យពីបទឆបោកមានស្ថានទម្ងន់ទោស ជាក្រុមមានការចាត់តាំង ដែលចែងឱ្យផ្តន្ទាទោសតាមមាត្រា ៣៧៧ និងមាត្រា ៣៨០ ចំណុចទី៥ នៃក្រមព្រហ្មទណ្ឌ។តាមរបាយការណ៍របស់ក្រសួងយុត្តិធម៌បានឱ្យដឹងថា ក្នុងរយៈពេល៨ខែចុងក្រោយនេះ តុលាការកម្ពុជាបានអនុវត្តនីតិវិធីផ្លូវច្បាប់លើសំណុំរឿងពាក់ព័ន្ធនឹងការឆបោកអនឡាញ ដើម្បីផ្តន្ទាទោសមេខ្លោង និងបក្ខពួកចំនួនជាង៥០០នាក់ ក្នុងនោះរាប់បញ្ចូលទាំងសំណុំរឿង ចេន ស៊ី, សំណុំរឿងឧកញ៉ា លី គួង និងសំណុំរឿងធំៗពាក់ព័ន្ធនឹងមេខ្លោងជាជនបរទេសផ្សេងទៀត។ សមត្ថកិច្ចបានបន្តសហការជាមួយបណ្តាប្រទេសដៃគូ ដើម្បីស្រាវជ្រាវ ធ្វើកោសល្យវិច័យលើវត្ថុតាង និងស៊ើបអង្កេតប្រព័ន្ធហិរញ្ញវត្ថុរបស់ក្រុមឧក្រិដ្ឋជន ដើម្បីឈានទៅវែកមុខក្រុមអង្គការចាត់ដែលបានយកកម្ពុជាធ្វើជាទីតាំងឆបោកទៅក្រៅប្រទេស។សូមបញ្ជាក់ថា សម្តេចមហាបវរធិបតីហ៊ុនម៉ាណែត នាយករដ្ឋមន្ត្រីកម្ពុជាបានបញ្ជាក់នាពេលកន្លងមកយ៉ាងច្បាស់ថា កម្ពុជាមិនមែនជាកន្លែងសម្រាប់ឧក្រិដ្ឋជនបច្ចេកវិទ្យាប្រើប្រាស់ក្នុងការប្រព្រឹត្តការឆបោក ឬបទល្មើសឆ្លងដែនឡើយ។ រាល់បុគ្គល ឬអង្គភាពទាំងឡាយណាដែលនៅពីក្រោយសកម្មភាពឆបោកទាំងនេះ នឹងត្រូវប្រឈមមុខនឹងទោសទណ្ឌខ្ពស់បំផុតដោយគ្មានការយោគយល់ ឬការអន្តរាគមន៍ណាមួយឡើយ។ វិធានការដែលបាន និងកំពុងអនុវត្តទាំងនេះ នឹងអាចធ្វើអាចឱ្យកម្ពុជាឈានទៅលុបបំបាត់ការឆបោកតាមប្រព័ន្ធបច្ចេកវិទ្យានៅពេលខាងមុខ៕ប្រភព៖ លេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងការឆបោកតាមប្រព័ន្ធបច្ចេកវិទ្យា (គ.ប.ឆ.ប.)

ពលរដ្ឋភៀសសឹកទទួលអំណោយមនុស្សធម៌ពីសម្តេចមហារដ្ឋសភាធិបតី ក្នុងឱកាសទិវាអន្តរជាតិសិទ្ធិនារី៨មីនា២០២៦

2026/03/07 02:58:52 pm        302
Facebook Telegram Linkin
ឧត្តរមានជ័យ៖ មន្ទីរកិច្ចការនារីខេត្តឧត្តរមានជ័យ បានរៀបចំពិធីផ្តល់អំណោយមនុស្សធម៌ របស់សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ជូនដល់ជនភៀសសឹក ដែលកំពុងស្នាក់ក្នុងជំរំវត្តបាត់ថ្កៅ ដែលមិនអាចទាន់វិលត្រឡប់ទៅលំនៅឋានវិញ ចំនួនជាង២០០គ្រួសារ ដើម្បីអបអរសាទរក្នុងឱកាសខួបលើកទី១១៥ទិវាអន្តរជាតិសិទ្ធិនារី៨មីនា ២០១៦ ។ ក្នុងឱកាសនោះដែរឯកឧត្តម មាន ចាន់យ៉ាដា អភិបាលខេត្តឧត្តរមានជ័យ បានលើកឡើងការផ្តាំផ្ញើ​ការសួរសុខទុក្ខពីសម្តេចរដ្ឋសភាធិបតី ឃួន សុដារី ប្រធានរដ្ឋសភាជាតិ និងសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា និងលោកជំទាវបណ្ឌិត ពីក្តី​នឹករលឹកមកលើ​បងប្អូន​ដែលកំពុងភៀសសឹកគ្រប់ៗគ្នា ក្នុងឱកាសទិវាអន្តរជាតិសិទ្ធិនារី៨មីនា ឆ្នាំ២០២៦ ។ ឯកឧត្តម បានបន្តថា ទោះស្ថិតក្នុងដំណាក់កាលដ៏លំបាកនេះ បងប្អូនប្រជាពលរដ្ឋ ដែលកំពុងភៀសសឹក​ត្រូវបន្តការ​អត់ធ្មត់​ឲ្យ​បានខ្ពស់និងមានការជឿជាក់លើប្រមុខរាជរដ្ឋាភិបាល ក្នុងការដោះស្រាយបញ្ហាជម្លោះព្រំដែន ដើម្បីធ្វើឲ្យស្ថានភាពអាច និងវិលត្រឡប់ទៅស្ថេរភាព​ដូចដើមវិញ។ដូច្នេះយើងត្រូវបន្តការអត់ធ្មត់ ​ឲ្យបានខ្ពស់ និងត្រូវរស់នៅក្នងជំរំដោយមានអនាម័យល្អ ដើម្បីការពារដល់សុខភាពរបស់បងប្អូន ខណះរដូវនេះ ជារដូវក្តៅផងនោះ។ ទន្ទឹមគ្នានោះ ក្នុងទិវាអន្តរជាតិសិទ្ធិនារី៨មីនា ​បងប្អូន​ប្រជាពលរដ្ឋ​ភៀសសឹក បាន​អំពាវនាវ​ដល់​សហគមន៍​អន្តរជាតិធ្វើយ៉ាងណា​ ជួយ​ពន្លឿន​ការ​អន្តរាគមន៍​បញ្ឈប់ការ​ឈ្លានពាន​របស់​យោធា​សៀមឲ្យបានឆាប់ ដើម្បីពួកគាត់បានវិលត្រឡប់​ទៅលំនៅឋាន​បាន​រស់នៅ​ប្រកបមុខ​របរ​រកស៊ីទទួល​ទាន​បានជាធម្មតាដូចដើមវិញផងដែរ៕

បណ្ដាញសង្គម

ព័ត៌មានថ្មីៗ

លោក Netanyahu ថាលោកទទួលការព្យាបាលជំងឺមហារីកក្រពេញប្រូស្តាតដោយជោគជ័យ
04/24/2026 09:04 PM
Facebook Telegram Linkin
លោក Zelenskiy ធ្វើដំណើរទៅដល់អារ៉ាប៊ីសាអ៊ូឌីត ដើម្បីស្វែងរកកិច្ចសហប្រតិបត្តិការសន្តិសុខ
04/24/2026 08:04 PM
Facebook Telegram Linkin
មនុស្ស ២នាក់ស្លាប់ អំឡុងការវាយប្រហារតាមអាកាស ខណៈយោធោអ៊ីស្រាអែលចេញការព្រមានជម្លៀស នៅភាគខាងត្បូងលីបង់
04/24/2026 08:04 PM
Facebook Telegram Linkin
សមាជិកសភាហេសបូឡា៖ បទឈប់បាញ់ «គ្មានន័យ» ទេ ដោយសារតែការវាយប្រហាររបស់អ៊ីស្រាអែល
04/24/2026 08:04 PM
Facebook Telegram Linkin
កងកម្លាំងរក្សាសន្តិភាពឥណ្ឌូនេស៊ីរបស់ UN ស្លាប់ដោយសាររបួស អំឡុងការផ្ទុះ នៅលីបង់
04/24/2026 07:04 PM
Facebook Telegram Linkin
ទីក្រុងប៉េកាំងច្រានចោលការចោទប្រកាន់របស់លោក Trumpថា នាវាអ៊ីរ៉ង់ស្ទាក់ចាប់បានមានអំណោយពីចិន
04/24/2026 07:04 PM
Facebook Telegram Linkin
អាល្លឺម៉ង់ និងអ៊ីតាលី សង្កត់ធ្ងន់លើការរួបរួម ក្នុងចំណោមសមាជិករបស់អង្គការណាតូ
04/24/2026 07:04 PM
Facebook Telegram Linkin
លោក Putinនិយាយថា រុស្ស៊ីនឹងការពារផលប្រយោជន៍របស់ខ្លួននៅតំបន់អាក់ទិក
04/24/2026 07:04 PM
Facebook Telegram Linkin
ក្តីបារម្ភ និងភាពមិនច្បាស់លាស់កើតមាននៅអ៊ីរ៉ាក់ ខណៈអាមេរិកបញ្ឈប់ការដឹកជញ្ជូនប្រាក់ដុល្លារ
04/24/2026 07:04 PM
Facebook Telegram Linkin
គណៈកម្មការស៊ើបអង្កេតតង់ហ្សានី៖ មនុស្សជាង ៥០០នាក់ ត្រូវបានសម្លាប់ក្នុងអំពើហិង្សាបោះឆ្នោតឆ្នាំមុន
04/24/2026 07:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.