BTV NEWS

ឯកឧត្តមរដ្ឋមន្រ្តី ជា វ៉ាន់ដេត ចូលរួមសំណេះសំណាលជាមួយសិស្សថ្នាក់ទី១២ នៅវិទ្យាល័យដែលមានមជ្ឈមណ្ឌលបច្ចេកវិទ្យាសហគមន៍ ១៨ទីតាំង ក្នុងខេត្តតាកែវ ប្រមាណ ៤០០០នាក់ តាមប្រព័ន្ធវីដេអូ ZOOM

កម្ពុជារៀបចំពិធីជប់លៀងជាផ្លូវការជូនគណៈប្រតិភូចូលរួមសន្និសីទកំពូលប្រព័ន្ធផ្សព្វផ្សាយ អាស៊ី លើកទី២០

សម្តេចធិបតី៖ រាជរដ្ឋាភិបាលយកចិត្តទុកដាក់ខ្ពស់ ក្នុងការទប់ស្កាត់ និងប្រយុទ្ធប្រឆាំង នឹងការរំលោភបំពានគ្រប់ទម្រង់លើកុមារកម្ពុជា

ជិត១ខែសមត្ថកិច្ចបង្រ្កាបបទល្មើសឆបោកតាមប្រព័ន្ធបច្ចេកវិទ្យា ១៣៨ទីតាំង ឃាត់ជនសង្ស័យជាង៣ពាន់នាក់

ព័ត៌មានជាតិ

ក្រសួងឧស្សាហកម្ម រៀបចំកម្មវិធីប្រកួតប្រជែងការកែច្នៃអាហារសម្រន់ពីបន្លែ ផ្លែឈើ និងគ្រាប់ធញ្ញជាតិ

ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានចាប់ផ្តើមអនុវត្តកម្មវិធីប្រកួតប្រជែង ថ្នាលបណ្តុះអាជីវកម្ម សម្រាប់ការអភិវឌ្ឍផលិតផលម្ហូបអាហារ ក្រោមប្រធានបទការកែច្នៃអាហារសម្រន់ពីបន្លែ ផ្លែឈើ និងគ្រាប់ធញ្ញជាតិ ដើម្បីបំផុសគំនិត ច្នៃប្រឌិត និងសហគ្រិនភាពក្នុងវិស័យម្ហូបអាហារ។ឯកឧត្តម ញឹម ខេមរា រដ្ឋលេខាធិការប្រចាំការ នៃក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ លើកឡើងនៅ ក្នុងសិក្ខាសាលាផ្សព្វផ្សាយ ស្តីពីថ្នាលបណ្តុះអាជីវកម្មសម្រាប់ការអភិវឌ្ឍផលិតផលម្ហូបអាហារ នៅថ្ងៃទី២៧ ខែឧសភា ឆ្នាំ២០២៥ ម្សិលមិញនេះថា តាមរយៈកម្មវិធីប្រកួតប្រជែងនេះ ក្រសួងរួមចំណែកអភិវឌ្ឍធនធានមនុស្ស និងជំរុញនវានុវត្តន៍ ក្នុងវិស័យកែច្នៃ ម្ហូបអាហារ ព្រមទាំងផ្តល់ឱកាសឱ្យក្រុមនិស្សិតចូលរួមប្រកួតប្រជែង ដើម្បីអភិវឌ្ឍខ្លួនជាសហគ្រិនជោគជ័យ និងជួយដល់សង្គម តាមរយៈការប្រើប្រាស់វត្ថុធាតុដើមជាកសិផលក្នុងស្រុក ដើម្បីបង្កើតតម្លៃបន្ថែមសម្រាប់សេដ្ឋកិច្ច។ឯកឧត្តមលើកឡើងឱ្យដឹងថា គម្រោងបានអនុវត្តក្រោមជំនួយរបស់រដ្ឋាភិបាលចិន តាមរយៈក្របខ័ណ្ឌកិច្ចសហប្រតិបត្តិការ មេគង្គ-ឡានឆាង សម្រាប់កម្មវិធីប្រកួតប្រជែង ថ្នាលបណ្តុះអាជីវកម្មសម្រាប់ការអភិវឌ្ឍផលិតផលម្ហូបអាហារ គាំទ្រដល់កិច្ចខិតខំប្រឹង ប្រែងរបស់កម្ពុជាក្នុងការពង្រឹងខ្សែច្រវាក់តម្លៃវិស័យកសិឧស្សាហកម្ម និងជំរុញកំណើនសេដ្ឋកិច្ចប្រកបដោយចីរភាព និងបរិយាបន្ន។ សូមបញ្ជាក់ថា កម្មវិធីប្រកួតប្រជែងនេះ និងលើកទឹកចិត្តដល់និស្សិតសាកលវិទ្យាល័យ ដែលសិក្សាជំនាញវិទ្យាសាស្ត្រអាហារ និង ជំនាញពាក់ព័ន្ធ ឱ្យបណ្តុះគំនិតច្នៃប្រឌិត និងប្រែក្លាយគំនិតទាំងនោះ ទៅជាផលិតផលអាហារសម្រន់ដែលមានគុណភាពខ្ពស់ និង អាចដាក់លក់លើទីផ្សារ៕អត្ថបទ៖ សុន រ៉ាឌី

សួនកសិ-ឧស្សាហកម្មកែច្នៃគ្រាប់ស្វាយចន្ទីដ៏ធំមួយ នឹងលេចរូបរាងនៅក្នុងខេត្តកំពង់ធំឆាប់ៗ

ខេត្តកំពង់ធំគ្រោងបង្កើតសួនកសិ-ឧស្សាហកម្មកែច្នៃគ្រាប់ស្វាយចន្ទីដ៏ធំមួយ ដែលនឹងស្រូបយកគ្រាប់ស្វាយចន្ទីស្រស់ក្នុងស្រុក ជាច្រើន សម្រាប់ផ្គត់ផ្គង់ក្នុងដំណើរការខ្សែច្រវាក់ផលិតកម្ម ដោយកសិ-ឧស្សាហកម្មនេះនឹងស្រូបយកំលាំងពលកម្មជាច្រើនចូលបម្រើ ការងារ ដែលនឹងចូលរយំចំណែកបង្កើនប្រាក់ចំណូលដល់ការរស់នៅរបស់ប្រជាជន។ ឯកឧត្តម នួន ផារ័ត្ន អភិបាលនិងគណៈអភិបាលខេត្តកំពង់ធំ លើកឡើងក្នុងការប្រកាសដាក់ឱ្យដំណើរការអនុវត្តគម្រោង កែលម្អស្តង់ដារ អនាម័យ នៃអាជីវកម្មម្ហូបអាហារតាមដងផ្លូវ នៅខេត្តកំពង់ធំ នៅចុងសប្តាហ៍ កន្លងមកថា ជុំវិញបញ្ហាសេដ្ឋកិច្ចនៅខេត្ត កំពុងធំ ប្រជាជនភាគច្រើនគឺធ្វើស្រែនិងចម្ការ។ ដើម្បីជំរុញឱ្យប្រជាជនមានជីវភាពកាន់តែប្រសើរ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី បានជំរុញឱ្យខេត្តបង្កើតនូវធំៗចំនួន៣រួមមាន៖ ការបង្កើតគម្រោងវារីប្បកម្មនៅក្នុងស្រុកស្ទោង បច្ចុប្បន្ន ខេត្តបានកំពុងសម្របសម្រួល ដោយគម្រោងនេះនិងអាចស្រូបយកកំលាំងពលកម្មប្រមាណ ២ ពាន់នាក់។ ក្រៅនេះសម្តេចធិបតី នាយករដ្ឋមន្រ្តី ក៏បានជំរុញឱ្យបង្កើតគម្រោង រោងចក្រកាត់ដេរនៅបារាយណ៍តាំង-គោក ប្រសិនបើគម្រោងនេះដំណើរការបន្ថែមទៀត នឹងអាចស្រូបយកកំលាំងធ្វើការមួយផ្នែកធំថែមទៀត។ឯកឧត្តមអភិបាល បន្តថា ចំណែកគម្រោងកែច្នៃគ្រាប់ស្វាយចន្ទី សម្តេចមហាបវរធិបតី ហ៊ុន ម៉ាណែត បានជំរុញឱ្យខេត្ត បង្កើតសួនកសិ-ឧស្សាហកម្មកែច្នៃគ្រាប់ស្វាយចន្ទីមួយដ៏ធំមួយ នៅជាប់ព្រំប្រទល់ស្ទឹងសែន-កំពុងស្វាយ ដែលតាមតាមរយៈនេះ បង ប្អូនយើងលែងនាំគ្រាប់ស្វាយចន្ទីស្រស់នៅប្រទេសជិតខាងទៀតហើយ។ ដែលបញ្ហានេះ ឯកឧត្តមអភិបាល សូមប្រជាជនដែលដាំដុះ ស្វាយចន្ទី ត្រូវថែទាំ និងយកចិត្តទុកដាក់លើការដាំដុះបន្ថែមទៀត ដើម្បីបង្កើនប្រាក់ចំណូលក្នុងគ្រួសារឱ្យកាន់តែប្រសើរ។ទាក់ទងការដាំដុះស្វាយន្ទីនៅខេត្តកំពង់ធំ, កន្លងមកនេះ លោក អួន ស៊ីឡុត ប្រធានសមាគមស្វាយចន្ទីកម្ពុជា ថ្លែងឱ្យដឹងថា កម្ពុជាមានផ្ទៃដីដែលដាំដុះស្វាយចន្ទីប្រមូលផលសរុប មានចំនួនជាង ៥២ ម៉ឺនហិចតា ក្នុងនោះខេត្តកំពង់ធំមានផ្ទៃដីដាំដុះច្រើនជាង គេ មានចំនួនប្រមាណជាង ១៧ ម៉ឺនហិចតា ផ្ទៃដីប្រមូលផលមានជាង ១៤ ម៉ឺនហិចតា និង ៣ ម៉ឺនហិចតាផ្សេងទៀតកំពុងដាំដុះ។សូមបញ្ជាក់ថា បច្ចុប្បន្នខេត្តកំពុងធំ មានរោងចក្ររបស់ក្រុមហ៊ុន MIRARTH Agritech មួយ ស្ថិតនៅឃុំជ័យ ស្រុកកំពង់ស្វាយ ខេត្ត កំពង់ធំ ដោយរោងចក្រនេះបានកំពុងធ្វើការកែច្នៃ និងបានប្រមូលទិញគ្រាប់ស្វាយចន្ទីស្រស់ពីសហគមន៍មួយចំនួនដូចជា សហគមន៍ សាលាវិស័យ, សហគមន៍ឃុំក្រយា, និងសហគមន៍សន្ទុក, ព្រមទាំងសហគមន៍ទំនើបចំនួន៣ផ្សេងទៀត ក្នុងខេត្តកំពង់ធំ និងបាន កំពុងស្រូបយកគ្រាប់ស្វាយចន្ទីស្រស់ក្នុងស្រុកប្រមាណ ៦ តោន ក្នុង១ថ្ងៃៗ ក្នុងនោះក្រុមហ៊ុនគ្រោងពង្រីកសមត្ថភាពកែច្នៃ បន្ថែម ទៀត ឱ្យបានជាង ២ ម៉ឺនតោន ក្នុង១ឆ្នាំ សម្រាប់បម្រើទីផ្សារនាំចេញ៕ អត្ថបទ៖ សុន រ៉ាឌី

កម្ពុជាផ្សព្វផ្សាយលទ្ធផលការធ្វើអង្កេតក្នុងភាពដៃគូសកល សម្រាប់កិច្ចសហប្រតិបត្តិការអភិវឌ្ឍន៍

កម្ពុជាផ្សព្វផ្សាយលទ្ធផលស្តីពីការធ្វើអង្កេតលើកទី៤ ក្នុងភាពជាដៃគូសកល សម្រាប់ប្រសិទ្ធភាពនៃកិច្ចសហប្រតិបត្តិការអភិវឌ្ឍន៍ ដោយការអង្កេតនេះត្រូវបានប្រើប្រាស់ទិន្នន័យភាគច្រើន ក្នុងប្រព័ន្ធទិន្នន័យស្តីពីហិរញ្ញប្បទានសហប្រតិបត្តិការនៅកម្ពុជា ដែលជាមូល ដ្ឋានដ៏សំខាន់សម្រាប់ការប្រមូលទិន្នន័យពីដៃគូអភិវឌ្ឍន៍។ ឯកឧត្តម ឈៀង យ៉ាណារ៉ា ទេសរដ្ឋមន្រ្តី ទទួលបន្ទុកបេសសកម្មពិសេស អនុប្រធានទី២ នៃក្រុមប្រឹក្សាអភិវឌ្ឍន៍កម្ពុជា បានធ្វើជាសហប្រធាន ជាមួយលោកស្រី Alissar Chaker, តំណាងប្រចាំប្រទេសរបស់កម្មវិធីអភិវឌ្ឍន៍សហប្រជាជាតិ (UNDP) នៅកម្ពុជា នៅថ្ងៃទី២៧ ខែឧសភា ឆ្នាំ២០២៥ បានដឹកនាំកិច្ចប្រជុំផ្សព្វផ្សាយលទ្ធផល ស្តីពីការធ្វើអង្កេតលើកទី៤ ស្តីពីភាពជាដៃគូ សកលសម្រាប់ប្រសិទ្ធភាពនៃកិច្ចសហប្រតិបត្តិការអភិវឌ្ឍន៍ ។ ឯកឧត្តមទេសរដ្ឋមន្រ្តី បានសម្តែងការស្វាគមន៍ចំពោះតំណាងរាជរដ្ឋាភិបាល ដែលមកពីក្រសួង-ស្ថាប័នពាក់ព័ន្ធ, តំណាង ដៃគូអភិវឌ្ឍន៍ និងអង្គការមិនមែនរដ្ឋាភិបាល ដែលបានអញ្ជើញចូលរួមកិច្ចប្រជុំនេះ។ ឯកឧត្តមទេសរដ្ឋមន្រ្តី បានគូសបញ្ជាក់អំពី អាទិភាពរបស់រាជរដ្ឋាភិបាល ក្នុងការបន្តទទួលស្គាល់ពីតួនាទីសំខាន់ នៃស័ក្តិសិទ្ធភាពក្នុងកិច្ចសហប្រតិបត្តិការអភិវឌ្ឍន៍ និងថ្លែង អំណរគុណដល់តួអង្គអភិវឌ្ឍន៍ទាំងអស់ ដែលបានចូលរួមយ៉ាងសកម្មក្នុងការធ្វើអង្កេតលើកទី៤ ស្តីពីភាពជាដៃគូសកលសម្រាប់ ប្រសិទ្ធភាព នៃកិច្ចសហប្រតិបត្តិការអភិវឌ្ឍន៍នៅក្នុងឆ្នាំ២០២៤ និងបានធ្វើឱ្យកិច្ចដំណើរការប្រព្រឹត្តទៅដោយភាពជោគជ័យខ្ពស់។ គួរកត់សម្គាល់ថា ការធ្វើអង្កេតត្រូវបានប្រើប្រាស់ទិន្នន័យភាគច្រើន ក្នុងប្រព័ន្ធទិន្នន័យស្តីពីហិរញ្ញប្បទានសហប្រតិបត្តិការ នៅកម្ពុជា ដែលជាមូលដ្ឋានដ៏សំខាន់សម្រាប់ការប្រមូលទិន្នន័យពីដៃគូអភិវឌ្ឍន៍ ដែលចូលរួមការអង្កេតនេះ ។ ទន្ទឹមនេះ, សូចនាករសំ ខាន់ៗដែលបានកំណត់ក្នុងការធ្វើអង្កេត ទទួលបានពិន្ទុល្អប្រសើរ ប្រៀបធៀបនឹងការអង្កេតនៅក្នុងឆ្នាំ២០១៨ កន្លងមក។ កិច្ចប្រជុំក៏បានឯកភាពជាគោលការណ៍ លើការកំណត់អាទិភាពការងារជំហានបន្ទាប់ ក្នុងការលើកកម្ពស់ស័ក្តិសិទ្ធភាពក្នុងកិច្ចសហប្រតិបត្តិការ អភិវឌ្ឍន៍នៅកម្ពុជា ដែលជាការងារដំណាក់កាលចុងក្រោយនៃការធ្វើអង្កេតនេះ។ ការត្រៀមរៀបចំផែនការសកម្មភាព ជាក់លាក់ដែល ត្រូវអនុវត្ត និងការគ្រោងរៀបចំកិច្ចពិគ្រោះយោបល់ពហុភាគីថ្នាក់ជាតិ សំដៅបន្តជំរុញលើកកម្ពស់ប្រសិទ្ធភាព នៃកិច្ចសហប្រតិបត្តិការ អភិវឌ្ឍន៍៕ អត្ថបទ៖ សុន រ៉ាឌី

គណៈប្រតិភូក្រុមមិត្តភាពសភាថៃ-កម្ពុជាអញ្ជើញទស្សនា និងសិក្សាឈ្វេងយល់វិមាន ឈ្នះ ឈ្នះ

គណៈប្រតិភូសមាជិកសភា នៃព្រះរាជាណាចក្រថៃ ដឹកនាំដោយលោក ណាត់ថាឆា ប៊ុនឆៃអ៊ីនសារ៉ាត់ សមាជិកសភាតំណាងរាស្ត្រ និងជាប្រធានក្រុមមិត្តភាពសភាថៃ-កម្ពុជា នារសៀលថ្ងៃទី២៧ ខែឧសភា ឆ្នាំ២០២៥នេះបានអញ្ជើញ បំពេញទស្សនកិច្ច និងសិក្សាឈ្វេងយល់ នៅសារមន្ទីរតេជោសន្តិភាព នៅវិមានឈ្នះ ឈ្នះ។ខណៈបំពេញទស្សនកិច្ចនោះ នាយឧត្តមសេនីយ៍ ណឹម សុវត្ថិ អគ្គនាយក អគ្គនាយកដ្ឋាននយោបាយ និងកិច្ចការបរទេស ក្រសួងការពារជាតិ និងជាអគ្គលេខាធិការ គណៈកម្មាធិការជាតិប្រវត្តិសាស្ត្រយោធា បានទទួលស្វាគមន៍ និងបានបង្ហាញអំពីខ្លឹមសារ ក៏ដូចជាសារៈសំខាន់នៃនយោបាយឈ្នះ ឈ្នះ របស់សម្ដេចតេជោ ហ៊ុន សែន ដែលបានបញ្ចប់សង្រ្គាមស៊ីវិលទាំងស្រុងនៅកម្ពុជា នាំមកនូវសន្តិភាព និងការឯកភាពជាតិពេញលេញក្នុងប្រវត្តិសាស្ត្រកម្ពុជាជាង៥០០ឆ្នាំចុងក្រោយ។ តាមរយៈដំណើរទស្សនាសារមន្ទីតេជោសន្តិភាព និងរចនាបទសំណង់ស្ថាបត្យកម្មនៃវិមានឈ្នះ ឈ្នះបានឈ្វេងយល់ពីអត្ថន័យ និងសារសំខាន់នៃស្ថាបត្យកម្មជាប្រវត្តិសាស្ត្រមួយដែលបង្ហាញអំពីសក្ខីភាពនៃការស្វែងរកសន្តិភាព និងការឯកភាពជាតិពេញលេញ តាមរយៈការបញ្ចប់សង្រ្គាមស៊ីវិលទាំងស្រុងនៅកម្ពុជា ដោយនយោបាយឈ្នះ ឈ្នះ។ ក្នុងអំឡុងពេលទស្សនកិច្ចគណៈប្រតិភូសមាជិកសភានៃព្រះរាជាណាចក្រថៃ បានទស្សនា សិលាចារឹក ចម្លាក់ គំនូរ ពិព័រណ៍ បណ្ណាល័យ អគារពិជ័យសេនា និងសារមន្ទីរតេជោសន្តិភាព ដោយបានឈ្វេងយល់អំពីប្រវត្តិសាស្ត្រកម្ពុជាពាក់ព័ន្ធនឹងចំណុចចាប់ផ្ដើមនៃភាពជាអ្នកដឹកនាំ របស់សម្ដេចតេជោ ហ៊ុន សែន ក្នុងដំណើរសង្រ្គោះជាតិចេញពីរបបប្រល័យពូជសាសន៍ប៉ុល ពត ដំណើរស្វែងរកសន្តិភាពនៅកម្ពុជា ជាពិសេសការអនុវត្តដ៏ជោគជ័យនៃនយោបាយឈ្នះ ឈ្នះ របស់សម្ដេច ដែលបានបញ្ចប់សង្រ្គាមស៊ីវិលទាំងស្រុងនៅកម្ពុជា នាថ្ងៃទី២៩ ខែធ្នូ ឆ្នាំ១៩៩៨ នាំមកនូវសន្តិភាព និងការឯកភាពជាតិពេញលេញ។សូមបញ្ជាក់ថាដំណើរការសាងសង់វិមានឈ្នះ ឈ្នះ ត្រូវបានផ្តួចផ្តើមឡើងដោយសម្តេចអគ្គមហាសេនាបតីតេជោ ហ៊ុន សែន ក្នុងឆ្នាំ២០១៤។ ក្រោមការដឹកនាំសាងសង់របស់សម្ដេចពិជ័យសេនា ទៀ បាញ់ ឧត្តមប្រឹក្សាផ្ទាល់ព្រះមហាក្សត្រ ហើយការកសាងវិមានឈ្នះ ឈ្នះបានផ្សារភ្ជាប់ជាមួយនឹងអត្តសញ្ញាណជាតិ វប្បធម៌ និងអរិយធម៌ខ្មែរ និងជាសម្បត្តិសាធារណៈ ដែលអនុញ្ញាតជូនសាធារណៈជនជាតិ និងអន្តរជាតិបានចូលទស្សនា រៀនសូត្រ និងឈ្វេងយល់អំពីសច្ចភាពប្រវត្តិសាស្ត្រនៅកម្ពុជា ខណៈគិតត្រឹមខែឧសភា ឆ្នាំ២០២៥នេះ មានសាធារណៈជាតិ និងអន្តរជាតិបានចូលទស្សនាវិមានឈ្នះ ឈ្នះ ជាង១៧ម៉ឺននាក់។ បច្ចុប្បន្ន វិមានឈ្នះ ឈ្នះកំពុងបន្តក្រោមការដឹកនាំពីសំណាក់ឯកឧត្តម នាយឧត្តមសេនីយ៍ ទៀ សីហា ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មការសិក្សាស្រាវជ្រាវសាងសង់វិមាមឈ្នះ ឈ្នះ។ក្នុងអំឡុងដំណើរទស្សនកិច្ចនៅវិមានឈ្នះ ឈ្នះ លោក ណាត់ថាឆា ប៊ុនឆៃអ៊ីនសារ៉ាត់ បានថ្លែងអំណរគុណចំពោះការទទួលស្វាគមន៍យ៉ាងកក់ក្ដៅ និងបានលើកឡើងថាអ្នកដឹកនាំការងារសាងសង់ស្ថាបត្យកម្មប្រវត្តិសាស្ត្រនេះជាអ្នកឆ្លងកាត់ដោយផ្ទាល់ក្នុងប្រវត្តិសាស្ត្រនៃនយោបាយឈ្នះ ឈ្នះ ដូច្នេះការដាក់បង្ហាញអំពីខ្លឹមសារ និងអត្ថន័យនៅវិមានឈ្នះ ឈ្នះ មានភាពគ្រប់ជ្រុងជ្រោយប្រកបដោយសច្ចភាព។ លោកបន្តថា លោកពិតជាមានការគាំទ្រ និងឯកភាពខ្ពស់ចំពោះចក្ខុវិស័យដឹកនាំរបស់សម្ដេចពិជ័យសេនា ទៀ បាញ់ ដែលរៀបចំឲ្យវិមានឈ្នះ ឈ្នះក្លាយជាមជ្ឈមណ្ឌលសិក្សាប្រវត្តិសាស្ត្រនៅកម្ពុជា ហើយមិនត្រឹមតែសម្រាប់យុវជន និងប្រជាជនកម្ពុជាប៉ុណ្ណោះទេ គឺបូករួមទាំងអន្តរជាតិផងដែរ៕ អត្ថបទបាន ចក់

សម្ដេចធិបតីបញ្ជាក់ការគាំទ្រយ៉ាងខ្លាំងរបស់កម្ពុជាចំពោះសមាជិកភាពពេញលេញរបស់ទីម័រឡេស្តេក្នុងអាស៊ាន

នៅក្នុងឱកាសចូលរួម កិច្ចប្រជុំកំពូលអាស៊ាន លើកទី៤៦ ក្រោមមូលបទ «បរិយាបន្ន និងចីរភាព» ជាមួយមេដឹកនាំអាស៊ាន កាលពីថ្ងៃទី ២៥-២៧ ខែឧសភា ឆ្នាំ២០២៥នេះ នៅទីក្រុងគូឡាឡាំពួ ប្រទេសម៉ាឡេស៊ី សម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា បានរំលឹកឡើងវិញនូវការគាំទ្រយ៉ាងខ្លាំង និងជាប់លាប់របស់កម្ពុជាចំពោះសមាជិកភាពពេញលេញរបស់ទីម័រឡេស្តេក្នុងអាស៊ាននៅឆ្នាំនេះ។ នេះបើយោងតាមសេចក្ដីប្រកាសព័ត៌មានស្ដីពីកិច្ចប្រជុំកំពូលអាស៊ាន លើកទី៤៦ ប្រកាសដោយក្រសួងការបរទេសកម្ពុជា។ តាមរយៈសេចក្ដីប្រកាសព័ត៌មានបានបញ្ជាក់ថា នៅក្នុងឱកាសចូលរួមកិច្ចប្រជុំកំពូលអាស៊ាន លើកទី៤៦ ក្រោមមូលបទ «បរិយាបន្ន និងចីរភាព» ជាមួយមេដឹកនាំអាស៊ាន សម្ដេចធិបតី ក៏បានគូសបញ្ជាក់ថា ការចូលជាសមាជិកពេញលេញរបស់ទីម័រឡេស្តេនៅក្នុងអាស៊ាន មិនត្រឹមតែពង្រឹងឯកភាព និងបរិយាបន្នរបស់អាស៊ានប៉ុណ្ណោះទេ ប៉ុន្តែថែមទាំងពង្រឹងសមត្ថភាពរួមរបស់អាស៊ានក្នុងការដោះស្រាយបញ្ហាប្រឈមដែលទាំងកំពុងកើតមាន និងកើតមានថ្មីៗនេះផងដែរ។ សម្ដេចធិបតីបានបញ្ជាក់នៅក្នុងកិច្ចប្រជុំកំពូលនេះថា សារៈសំខាន់ដូចគ្នា គឺការចូលជាសមាជិកពេញលេញរបស់ទីម័រ នឹងអាចឱ្យទីម័រឡេស្តេចូលរួម និងទទួលបានអត្ថប្រយោជន៍ពីសមាហរណកម្មនៅក្នុងតំបន់។ នៅពេលដែលយើងមកដល់ចំណុចដ៏សំខាន់មួយដែលយើងត្រូវគូសផែនទីបង្ហាញផ្លូវសម្លឹងឆ្ពោះទៅអនាគតសម្រាប់រយៈពេលពីរទសវត្សរ៍ខាងមុខ សម្តេចធិបតីបានរំលេចថា ចក្ខុវិស័យអាស៊ានឆ្នាំ២០៤៥ រួមទាំងផែនការយុទ្ធសាស្ត្រ នឹងដើរតួរជាត្រីវិស័យសម្រាប់នាំផ្លូវរួមសម្រាប់អាស៊ានឆ្ពោះទៅកាន់អនាគតប្រកបដោយភាពធន់ នវានុវត្តន៍ ថាមវន្ត និងផ្ដោតលើប្រជាជនជាចម្បង។ក្នុងឱកាសកិច្ចប្រជុំនេះ ប្រមុខដឹកនាំអាស៊ាន ក៏បានគូសបញ្ជាក់ផងដែរពីសារៈសំខាន់នៃសមាហរណកម្មសេដ្ឋកិច្ចកាន់តែស៊ីជម្រៅ និងការបង្កើនឡើងបន្ថែមទៀតនៃលំហូរពាណិជ្ជកម្ម និងការវិនិយោគក្នុងអាស៊ាន ដោយផ្ដោតលើកំណើនប្រកបដោយបរិយាបន្ន ភាពធន់ និងចីរភាព ដែលមិនទុកនរណាម្នាក់ និងកន្លែងណាមួយចោលដើម្បីដោះស្រាយភាពមិនប្រាកដប្រជានៃភូមិសាស្ត្រសេដ្ឋកិច្ចដែលកំពុងកើនឡើង។ ប្រមុខដឹកនាំបានបញ្ជាក់ជាថ្មីនូវការគាំទ្រប្រព័ន្ធពាណិជ្ជកម្មពហុភាគីសេរី បើកចំហ ស្មើភាព បរិយាបន្ន និងផ្នែកលើច្បាប់។ក្នុងនោះសម្តេចធិបតីបានសង្កត់ធ្ងន់ថា នៅចំពោះមុខនៃការប្រកួតប្រជែងភូមិសាស្ត្រនយោបាយកាន់តែខ្លាំង ជម្លោះប្រដាប់អាវុធ អូសបន្លាយ ការថយចុះនៃកិច្ចសហប្រតិបត្តិការពហុភាគី និងការកើនឡើងនៃការគំរាមកំហែងពីបញ្ហាប្រឈមសន្តិសុខមិនប្រពៃណី អាស៊ានត្រូវតែមានការឯកភាពគ្នាលើគោលដៅយុទ្ធសាស្ត្រលើចក្ខុវិស័យ និងភាពច្បាស់លាស់លើសកម្មភាពរួម។ សម្តេចធិបតី បានគូសបញ្ជាក់ពីភាពចាំបាច់នៃការធ្វើសមាហរណកម្មតំបន់ឱ្យស៊ីជម្រៅ និងការពង្រឹងកិច្ចសហប្រតិបត្តិការជាមួយដៃគូដែលមានចំណាប់អារម្មណ៍ ដើម្បីធានាថាអាស៊ាននៅតែជាតំបន់ដែលមានស្ថិរភាព និងអាចព្យាករណ៍ទុកជាមុន អំឡុងពេលពិភពលោកកាន់តែមានភាពមិនច្បាស់លាស់។ ហើយដើម្បីបង្កើនពាណិជ្ជកម្មក្នុងអាស៊ាន សម្តេចធិបតីបានសង្កត់ធ្ងន់លើសារៈសំខាន់នៃការសម្រួលដំណើរការនីតិវិធីឱ្យកាន់តែរលូន និងមានប្រសិទ្ធភាពការដកចេញនូវរបាំងនានា ការបន្សំក្របខ័ណ្ឌបទបញ្ញត្តិ និងការទទួលយកអន្តរកាលឌីជីថល និងបរិស្ថានបៃតងក្នុងការបង្កើតទីផ្សារ តំបន់ដែលគ្មានរបាំង និងមានភាពធន់ផងដែរ៕

សម្ដេចធិបតី និងលោកជំទាវបណ្ឌិតអញ្ជើញដល់ជប៉ុន ទទួលបានការស្វាគមន៍យ៉ាងកក់ក្ដៅពីពលរដ្ឋនៅទីនោះ

ក្រោយបញ្ចប់បេសកកម្ម ចូលរួមកិច្ចប្រជុំកំពូលអាស៊ានលើកទី៤៦ និងកិច្ចប្រជុំកំពូលពាក់ព័ន្ធរយៈពេល៣ថ្ងៃនៅប្រទេសម៉ាឡេស៊ី នៅព្រឹកថ្ងៃទី២៨ ខែឧសភានេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត បានអញ្ជើញដឹកនាំគណៈប្រតិភូជាន់ខ្ពស់ បំពេញទស្សនកិច្ចការងារផ្លូវការនៅប្រទេសជប៉ុន តបតាមការអញ្ជើញរបស់រដ្ឋាភិបាលជប៉ុន និងអញ្ជើញចូលរួមសន្និសីទអន្តរជាតិលើកទី៣០ ស្តីពី «អនាគតរបស់អាស៊ី» ចាប់ពីថ្ងៃទី ២៨-៣១ ខែឧសភា ឆ្នាំ២០២៥ នៅរដ្ឋធានីភូក្យូ ប្រទេសជប៉ុន។នៅព្រឹកថ្ងៃទី២៨ ខែឧសភានេះ សម្ដេចធិបតី និងលោកជំទាវបណ្ឌិត បានដឹកនាំគណៈប្រតិភូរាជរដ្ឋាភិបាលកម្ពុជាទៅដល់អាកាសយានដ្ឋានអន្តរជាតិ ហាណេដា (HANEDA) ប្រកបដោយសុវត្ថិភាព ព្រមទាំងបានការទទួលស្វាគមន៍ពីសំណាក់ លោកជំទាវ IKUINA Akiko សមាជិកសភា និងជាអនុរដ្ឋមន្ត្រីការបរទេសជប៉ុន និង ឯកឧត្តម MIYASHITA Tadayuki ប្រធានពិធីការ។ក្រោយអញ្ជើញដល់កន្លែងស្នាក់នៅ ក្នុងទីក្រុងតូក្យូ សម្ដេចធិបតី និងលោកជំទាវបណ្ឌិត រួមទាំងគណៈប្រតិភូជាន់ខ្ពស់កម្ពុជា ទទួលបានការស្វាគមន៍យ៉ាងកក់ក្តៅពីសំណាក់ពីសំណាក់បងប្អូនសហគមន៍ខ្មែរដែលកំពុងរស់នៅ ធ្វើការ និងសិក្សានៅប្រទេសជប៉ុន។ ក្នុងឱកាសនោះសម្ដេចធិបតី បានថ្លែងអំណរគុណដល់បងប្អូនប្រជាពលរដ្ឋខ្មែរដែលកំពុងរស់នៅ ធ្វើការ និងសិក្សានៅប្រទេសជប៉ុន ដែលបានមករង់ចាំ និងទទួលស្វាគមន៍យ៉ាងកក់ក្តៅ និងស្និទ្ធស្នាលបំផុត ក្នុងឱកាសគណៈប្រតិភូរាជរដ្ឋាភិបាលកម្ពុជា មកបំពេញទស្សនកិច្ចការងារផ្លូវការរយៈពេល៤ថ្ងៃ ទីក្រុងតូក្យូ ប្រទេសជប៉ុននេះ។សូមជម្រាបថា សម្តេចធិបតី ក្នុងដំណើរ បន្តដឹកនាំគណៈប្រតិភូ ជាន់ខ្ពស់កម្ពុជាបំពេញទស្សនកិច្ចការងារផ្លូវការនៅប្រទេសជប៉ុន និងអញ្ជើញចូលរួមសន្និសីទអន្តរជាតិលើកទី៣០ ស្តីពី «អនាគតរបស់អាស៊ី» នេះ នឹងជំរុញបន្ថែមទៀតនូវភាពជាដៃគូយុទ្ធសាស្ត្រគ្រប់ជ្រុងជ្រោយ រវាងប្រទេសទាំងពីរ។ ក្នុងឱកាសនៃការបំពេញទស្សនកិច្ចការងារផ្លូវការនៅប្រទេសជប៉ុននេះ សម្តេចធិបតីនឹងមានជំនួបទ្វេភាគីជាមួយឯកឧត្តម អឺស្តិ៍បា ស្ទីកេរុ (ISHIBA Shigeru) នាយករដ្ឋមន្ត្រីជប៉ុន ព្រមទាំងគ្រោង នឹងមានជំនួបទ្វេភាគីដាច់ដោយឡែកជាមួយថ្នាក់ដឹកនាំ នៃស្ថាប័ននីតិបញ្ញត្តិជប៉ុនផងដែរ។ សម្តេចធិបតី ក៏នឹងអញ្ជើញចូលរួមថ្លែងសុន្ទរកថាគន្លឹះនៅក្នុងសន្និសីទអន្តរជាតិលើកទី៣០ ស្តីពី «អនាគតរបស់អាស៊ី» និងអញ្ជើញចូលរួមវេទិកាធុរកិច្ចកម្ពុជា-ជប៉ុន ព្រមទាំងទទួលជំនួបសម្តែងការសមដោយបណ្តាក្រុមហ៊ុនវិនិយោគមួយចំនួនទៀត។ បន្ថែមលើនេះសម្តេចធិបតី និងលោកជំទាវបណ្ឌិត ក៏នឹងអញ្ជើញជួបសំណេះសំណាលជាមួយសហគមន៍ខ្មែរនៅប្រទេសជប៉ុនផងដែរ៕

សម្ដេចធិបតី ហ៊ុន ម៉ាណែត បញ្ចប់បេសកកម្មចូលកិច្ចប្រជុំកំពូលអាស៊ាន លើកទី៤៦ និងកិច្ចប្រជុំកំពូលពាក់ព័ន្ធ នៅម៉ាឡេស៊ី ប្រកបដោយផ្លែផ្កា

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុនម៉ាណែត បានអញ្ជើញដឹកនាំគណៈប្រតិភូជាន់ខ្ពស់ ចូលរួមកិច្ចប្រជុំកំពូលអាស៊ានលើកទី៤៦ និងកិច្ចប្រជុំកំពូលពាក់ព័ន្ធចាប់ពីថ្ងៃទី ២៥-២៧ ខែឧសភា ឆ្នាំ២០២៥ នៅប្រទេសម៉ាឡេស៊ី។ បេសកកម្មរយៈពេល៣ថ្ងៃនេះ ប្រមុខរាជរដ្ឋាភិបាលកម្ពុជាបានអញ្ជើញចូលរួមកិច្ចប្រជុំកំពូលពាក់ព័ន្ធចំនួន ៧ ជំនួបត្រីភាគី ទ្វេភាគី និងជំនួបសម្តែងការគួរសមជាមួយប្រមុខរដ្ឋាភិបាលចំនួន៧ និងបានអនុញ្ញាតឱ្យក្រុមហ៊ុនធំៗចំនួន៣ចូលជួបសម្តែងការគួរសម និងស្វែងរកឱកាសវិនិយោគនៅកម្ពុជា។ក្នុងកិច្ចប្រជុំកំពូលអាស៊ាន លើកទី៤៦៖ សម្តេចមហាបវរធិបតី ហ៊ុន ម៉ាណែត បានអញ្ជើញចូលរួមកិច្ចប្រជុំកំពូលអាស៊ាន លើកទី៤៦ ក្រោមមូលបទ «បរិយាបន្ន និងចីរភាព»។ ក្នុងកិច្ចប្រជុំកំពូលអាស៊ាននេះ ប្រមុខដឹកនាំអាស៊ានបានពិនិត្យវឌ្ឍនភាពនៃកិច្ចខិតខំប្រឹងប្រែងកសាងសហគមន៍អាស៊ានលើការបញ្ចប់ប្រកបដោយជោគជ័យ នូវចក្ខុវិស័យសហគមន៍អាស៊ានឆ្នាំ២០២៥។ក្រៅពីកិច្ចប្រជុំកំពូលអាស៊ាន លើកទី៤៦ សម្តេចធិបតី ក៏បានអញ្ជើញចូលរួមជំនួបរវាងប្រមុខដឹកនាំអាស៊ាន និងតំណាងអន្តរសភាអាស៊ាន ជំនួបរវាងប្រមុខដឹកនាំអាស៊ាន និងតំណាងយុវជនអាស៊ាន ជំនួបរវាងប្រមុខដឹកនាំអាស៊ាននិងតំណាងក្រុមប្រឹក្សាធុរកិច្ចអាស៊ាន កិច្ចប្រជុំកំពូលអាស៊ាន និងក្រុមប្រឹក្សាសហប្រតិបត្តិការឈូងសមុទ្រលើកទី២ កិច្ចប្រជុំកំពូលអាស៊ាន និងក្រុមប្រឹក្សាសហប្រតិបត្តិការឈូងសមុទ្រ-ចិន និងពិធីចុះហត្ថលេខាលើសេចក្តីថ្លែងការណ៍គូឡាឡាំពួស្តីពីអាស៊ានឆ្នាំ២០៤៥ «អនាគតរួមគ្នារបស់យើង»។ក្នុងឱកាសនៃកិច្ចប្រជុំកំពូលអាស៊ាននេះ សម្តេចធិបតី បានអញ្ជើញចូលរួមពិធីលៀងសាយភោជន៍រៀបចំដោយ ព្រះចៅស៊ុលតង់ ព្រះមហាក្សត្រម៉ាឡេស៊ី នៅព្រះបរមរាជវាំង Istana Negara ដើម្បីទទួលស្វាគមន៍ប្រមុខថ្នាក់ដឹកនាំអាស៊ាន។ ទន្ទឹមគ្នានេះ សម្តេចធិបតី និង លោកជំទាវបណ្ឌិត ក៏បានអញ្ជើញចូលរួមពិធីជប់លៀង រៀបចំដោយ ឯកឧត្តមនាយករដ្ឋមន្ត្រីម៉ាឡេស៊ី និង លោកជំទាវបណ្ឌិត។ជំនួបត្រីភាគីកម្ពុជា-ឡាវ-វៀតណាម៖ ក្នុងជំនួបអាហារពេលព្រឹកការងារ សម្តេចធិបតី ហ៊ុន ម៉ាណែត នាយករដ្ឋមន្ត្រី កម្ពុជា, ឯកឧត្តមបណ្ឌិត សនសៃ ស៊ីផាន់ដន នាយករដ្ឋមន្ត្រីឡាវ និងឯកឧត្តម ផាម មិញ ជីញ នាយករដ្ឋមន្ត្រី វៀតណាម បានសម្ដែងនូវការពេញចិត្តចំពោះការរីកចម្រើននៃទំនាក់ទំនង និងបានវាយតម្លៃខ្ពស់ចំពោះវឌ្ឍនភាពនៃកិច្ចសហប្រតិបត្តិការលើគ្រប់វិស័យដែលត្រូវបានពង្រឹង និងពង្រីកជាបន្តបន្ទាប់។ ជាមួយគ្នានេះប្រមុខរដ្ឋាភិបាលទាំងបី បានពិភាក្សាអំពីការជំរុញកិច្ចសហប្រតិបត្តិការបន្ថែមទៀត លើវិស័យសក្ដានុពលជាច្រើន រួមមាន វិស័យពាណិជ្ជកម្ម ការតភ្ជាប់ហេដ្ឋារចនាសម្ព័ន្ធ ថាមពល (អគ្គិសនី) ទេសចរណ៍ សន្តិសុខ និងការពារជាតិ ព្រមទាំងបានផ្លាស់ប្ដូរមតិយោបល់លើបញ្ហាតំបន់ និងអន្តរជាតិ។ក្នុងជំនួបទ្វេភាគីកម្ពុជា-ម៉ាឡេស៊ី៖ សម្ដេចធិបតី បានអបអរសាទរ និងកោតសរសើរចំពោះការរៀបចំបានយ៉ាងល្អប្រសើរនូវកិច្ចប្រជុំកំពូលអាស៊ាន លើកទី៤៦ និងកិច្ចប្រជុំកំពូលពាក់ព័ន្ធ ព្រមទាំងបានវាយតម្លៃខ្ពស់ចំពោះកិច្ចសហប្រតិបត្តិការរវាងប្រទេសទាំងពីរដែលមានការវិវត្តរីកចម្រើនជាបន្តបន្ទាប់។ ជាការឆ្លើយតប ឯកឧត្តម ដាតុ ស៊េរី អាន់វ៉ា អ៊ីប្រាហ៊ីម បានវាយតម្លៃខ្ពស់ចំពោះវឌ្ឍនភាពនៃទំនាក់ទំនងល្អប្រសើររវាងប្រទេសទាំងពីរ។ ថ្នាក់ដឹកនាំទាំងពីរ បានពិភាក្សាអំពីការបន្តពង្រឹង និងពង្រីកកិច្ចសហប្រតិបត្តិការលើវិស័យសំខាន់ៗដូចជា វិស័យថាមពល និងហាឡាល់ ដោយបានលើកទឹកចិត្តដល់ក្រសួង ស្ថាប័នពាក់ព័ន្ធកម្ពុជានិងម៉ាឡេស៊ី បន្តពិភាក្សាគ្នាឱ្យបានស៊ីជម្រៅបន្ថែមទៀត។ជំនួបទ្វេភាគី កម្ពុជា-ចិន៖ សម្តេចធិបតី បានសម្តែងនូវការពេញចិត្តនិងវាយតម្លៃខ្ពស់ចំពោះដំណើរទស្សនកិច្ចផ្លូវរដ្ឋរបស់ ឯកឧត្តម ស៊ី ជីនពីង ប្រធានាធិបតី នៃសាធារណរដ្ឋប្រជាមានិតចិន មកកាន់ព្រះរាជាណាចក្រកម្ពុជា កាលពីខែមេសា ឆ្នាំ២០២៥ កន្លងទៅនេះ ដែលតាមរយៈដំណើរទស្សនកិច្ចនេះ ចំណងមិត្តភាពកម្ពុជា-ចិន ត្រូវបានពង្រឹង និងពង្រីកកាន់តែខ្លាំងក្លាថែមទៀត។ ជាមួយគ្នានេះ ឯកឧត្តម លី ឈាង នាយករដ្ឋមន្ត្រី នៃសាធារណរដ្ឋប្រជាមានិតចិន បានគូសបញ្ជាក់ថា ជំនួបជាញឹកញាប់រវាងថ្នាក់ដឹកនាំកំពូលនៃប្រទេសទាំងពីរ ឆ្លុះបញ្ចាំងពីភាពរឹងមាំ និងការរីកចម្រើននៃទំនាក់ទំនងមិត្តភាពដ៏យូរអង្វែង និងជាមិត្តដែកថែបកម្ពុជា-ចិន។ជំនួបទ្វេភាគី កម្ពុជា-ហ្វីលីពីន៖ សម្ដេចធិបតី បានសម្ដែងនូវការពេញចិត្តចំពោះភាពរីកចម្រើននៃទំនាក់ទំនង កម្ពុជា-ហ្វីលីពីន ព្រមទាំងបានស្វាគមន៍ចំពោះការបន្តស្វែងរកកាលានុវត្តភាពថ្មីៗថែមទៀត ដើម្បីបន្តពង្រឹងនិងពង្រីកទំហំពាណិជ្ជកម្មទ្វេភាគីនៃប្រទេសទាំងពីរ។ ឯកឧត្តម ហ្វឺឌីណាន់ ម៉ាកូស ជេអ ប្រធានាធិបតីនៃសាធារណរដ្ឋហ្វីលីពីន បានសម្ដែងការពេញចិត្តចំពោះទំនាក់ទំនងដ៏ល្អប្រសើរនៃប្រទេសទាំងពីរ និងបានគូសបញ្ជាក់អំពីបំណងពង្រឹង និងពង្រីកទំនាក់ទំនងផ្នែកពាណិជ្ជកម្មបន្ថែមទៀត។ ប្រមុខថ្នាក់ដឹកនាំទាំងពីរបានពិភាក្សាគ្នាអំពីវិស័យសក្ដានុពលសំខាន់ៗមួយចំនួន ជាអាទិ៍ ឌីជីថល បច្ចេកវិទ្យា និងបញ្ញាសិប្បនិម្មិត (AI) សហគ្រាសមីក្រូធុនតូច និងមធ្យម (MSMEs) ពាណិជ្ជកម្មតាមប្រព័ន្ធអេឡិចត្រូនិក សេវាកម្មថែទាំសុខភាព ទេសចរណ៍ ព្រមទាំងវិស័យសន្តិសុខនិងការពារជាតិ។ជំនួបទ្វេភាគី កម្ពុជា-បារ៉ែន៖ សម្ដេចធិបតី បានជម្រាបជូនព្រះអង្គម្ចាស់រជ្ជទាយាទ អំពីការធ្វើពិពិធកម្មដៃគូពាណិជ្ជកម្មរបស់កម្ពុជា រួមទាំងតំបន់មជ្ឈិមបូព៌ា ដោយកម្ពុជាកំពុងពង្រីកការតភ្ជាប់ និងប្រព័ន្ធឡូជីស្ទីករបស់ខ្លួន តាមរយៈការកសាងហេដ្ឋារចនាសម្ព័ន្ធសំខាន់ៗ ដូចជា អាកាសយានដ្ឋានអន្តរជាតិ ផ្លូវល្បឿនលឿន និងការអភិវឌ្ឍសមត្ថភាពកំពង់ផែស្វយ័តក្រុងព្រះសីហនុ ឱ្យក្លាយជាមជ្ឈមណ្ឌលឡូជីស្ទីក និងមានសមត្ថភាពទទួលនាវាដឹកទំនិញពីទូទាំងពិភពលោក។ជំនួបសម្តែងការគួរសម កម្ពុជា-កូវ៉ែត៖ ព្រះអង្គម្ចាស់ Sheikh Sabah Khaled Al-Hamad Al-Sabah បានគូសបញ្ជាក់ពីបំណងក្នុងការពង្រឹងទំនាក់ទំនង និងពង្រីកកិច្ចសហប្រតិបត្តិការរវាងប្រទេសទាំងពីរ ពិសេសការត្រៀមខ្លួនរបស់កូវ៉ែត ដើម្បីចែករំលែកបទពិសោធជាមួយកម្ពុជា ក្នុងវិស័យថាមពល (ប្រេង)។ ព្រះអង្គម្ចាស់ Sheikh បានសង្កត់ធ្ងន់អំពីការបន្តការផ្លាស់ប្តូរទស្សនកិច្ចកម្រិតខ្ពស់ ដែលនឹងបើកផ្លូវជំរុញកិច្ចសហប្រតិបត្តិការបន្ថែមទៀត។ជំនួបសម្តែងការគួរសម កម្ពុជា-អូម៉ង់៖ សម្ដេចធិបតី បានថ្លែងអំពីសុខដុមនីយកម្មសាសនានៅកម្ពុជា និងការយកចិត្តទុកដាក់របស់រាជរដ្ឋាភិបាល ក្នុងការធានាដល់ការប្រតិបត្តិជំនឿសាសនាទាំងអស់នៅកម្ពុជា។ សម្ដេចធិបតី បានគូសបញ្ជាក់ថា កម្ពុជា-អូម៉ង់ មានសក្ដានុពលច្រើនក្នុងការពង្រឹង និងពង្រីកកិច្ចសហប្រតិបត្តិការលើវិស័យជាច្រើនទៀត ហើយក្រសួងពាណិជ្ជកម្មកម្ពុជាបាននិងកំពុងខិតខំស្វែងរកឱកាស និងការផ្សារភ្ជាប់ទំនាក់ទំនងបន្ថែមទៀត ដើម្បីជំរុញទំហំពាណិជ្ជកម្ម និងទាក់ទាញការវិនិយោគបន្ថែមពីតំបន់មជ្ឈិមបូព៌ា រួមទាំងប្រទេសអូម៉ង់។សូមបញ្ជាក់ថា នេះជាដំណើរបំពេញបេសកកម្មការងារនៅក្រៅប្រទេសលើកទី១៩ របស់ សម្តេចមហាបវរធិបតី ហ៊ុន ម៉ាណែត ក្នុងនាមជានាយករដ្ឋមន្ត្រីនៃព្រះរាជាណាចក្រកម្ពុជា បន្ទាប់ពី សម្តេច បានអញ្ជើញបំពេញទស្សនកិច្ចប្រកបដោយជោគជ័យដ៏ធំធេងក្នុងតំបន់អាស៊ី អាម៉េរិក អឺរ៉ុប និងមជ្ឈិមបូព៌ា នាពេលកន្លងមក។ ដំណើរអញ្ជើញចូលរួមកិច្ចប្រជុំកំពូលអាស៊ាន លើកទី៤៦ និងកិច្ចប្រជុំកំពូលពាក់ព័ន្ធ នៅប្រទេសម៉ាឡេស៊ីរបស់ សម្តេចធិបតី នាពេលនេះ គឺជាព្រឹត្តិកាណ៍ថ្មីមួយទៀតដែលបង្ហាញពីតួនាទីដ៏សំខាន់របស់កម្ពុជា នៅក្នុងឆាកតំបន់និងអន្តរជាតិ។ នេះក៏ជាសមិទ្ធផលការងារការទូតដ៏ធំមួយទៀត ដែលរាជរដ្ឋាភិបាលកម្ពុជាសម្រេចបានក្នុងរយៈពេលជិត២ឆ្នាំមកនេះ ក្នុងចំណោមសមិទ្ធផលធំៗជាច្រើនទាំងក្នុងនិងក្រៅប្រទេស ដែលធ្វើឱ្យប្រជាពលរដ្ឋមានមោទនភាព និងមានក្តីសង្ឃឹមយ៉ាងមុតមាំចំពោះអនាគតដ៏ត្រចះត្រចង់សម្រាប់ប្រទេសជាតិ ក្រោមការដឹកនាំរបស់រាជរដ្ឋាភិបាលដឹកនាំដោយ គណបក្សប្រជាជនកម្ពុជា៕

ឯកឧត្តមទេសរដ្ឋមន្រ្តី គន់ គីម ជួបសំណេះសំណាលជាមួយនិវត្តជនខេត្តពោធិ៍សាត់ចំនួន៧០០នាក់

ឯកឧត្តម ទេសរដ្ឋមន្រ្តី គន់ គីម អគ្គលេខាធិការសមាគមអតីតយុទ្ធជនកម្ពុជា បានអញ្ជើញជួបសំណេះសំណាលជាមួយនិវត្តជនខេត្តពោធិ៍សាត់ចំនួន៧០០នាក់ ដើម្បីពន្យល់ពីគោលបំណងវិសោធនកម្មលក្ខន្តិកៈសមាគមអតីតយុទ្ធជនកម្ពុជា ក្នុងការបញ្ជូលនិវត្តជនទាំងអស់ក្នុងការគ្រប់គ្រងសមាគមអតីតយុទ្ធជនកម្ពុជាតែមួយ។តបតាមអនុសាសន៍របស់សម្តេចតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានសមាគមអតីតយុទ្ធជនកម្ពុជា ឯកឧត្តមកិត្តិសង្គហបណ្ឌិត គន់ គីម ទេសរដ្ឋមន្ត្រី អនុប្រធាន និងជាអគ្គលេខាធិការសមាគមអតីតយុទ្ធជនកម្ពុជា(ស.អ.ក) នៅថ្ងៃទី២៧ ខែឧសភា ឆ្នាំ២០២៥ បានអញ្ជើញជួបសំណេះសំណាល ជាមួយនិវត្តជនខេត្តពោធិ៍សាត់ ក្នុងគោលបំណងស្តាប់ និងពន្យល់ពីការពង្រាងវិសោធនកម្មលក្ខន្តិកៈ សមាគមអតីតយុទ្ធជន ឱ្យមានវិសាលភាពគ្របដណ្តប់ទៅលើនិវត្តជនទាំងអស់ ដោយរួមបញ្ចូលទាំងមន្ត្រីរាជការ គ្រូបង្រៀន និងកងកម្លាំងប្រដាប់អាវុធគ្រប់ប្រភេទដែលចូលនិវត្តន៍។ពិធីសំណេះសំណាលនេះត្រូវបានធ្វើឡើង នៅស្នាក់ការគណបក្សខេត្ត ស្ថិតក្នុងសង្កាត់ព្រៃញី ក្រុងពោធិ៍សាត់ ខេត្តពោធិ៍សាត់ ដោយបានការចូលរួមពីឯកឧត្តម ខូយ រីដា អភិបាលខេត្ត និងជាប្រធានកិត្តិយសសមាគមអតីតយុទ្ធជនខេត្ត, លោក លោកស្រី ជាសមាជិក សមាជិកា សមាគមអតីតយុទ្ធជនកម្ពុជា និងមន្រ្តីពាក់ព័ន្ធ។ឯកឧត្តមកិត្តិសង្គហបណ្ឌិត គន់ គីម បានពាំនាំការផ្តាំផ្ញើសាកសួរសុខទុក្ខរបស់សម្តេចតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ព្រមទាំងសម្តេចបវរធិបតី ហ៊ុន ម៉ាណែត នាយករដ្ឋមន្ត្រី ជូនដល់បងប្អូននិវត្តជនខេត្តពោធិ៍សាត់ទាំងអស់។ឯកឧត្តមកិត្តិសង្គហបណ្ឌិត គន់ គីម បានឱ្យដឹងថា ក្នុងជំនួបសំណេះសំណាល ជាមួយបងប្អូននាថ្ងៃនេះ គឺផ្ដោតសំខាន់ ដើម្បីស្តាប់យោបល់របស់និវត្តជន ក្នុងពេលថ្នាក់ដឹកនាំសមាគមអតីតយុទ្ធជនរៀបចំការធ្វើវិសោធនកម្មលក្ខន្តិកៈ របស់សមាគមអតីតយុទ្ធជនកម្ពុជា ទៅជា«សមាគមអតីតយុទ្ធជន និងនិវត្តជនកម្ពុជា» តបតាមប្រសាសន៍ណែនាំដ៏ខ្ពង់ខ្ពស់របស់សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជនកម្ពុជា ក្នុងផែនការដាក់បញ្ចូលនិវត្តជននៃមន្រ្តីរាជការស៊ីវិលចូលទៅក្នុងសមាគមអតីតយុទ្ធជនកម្ពុជា។ឯកឧត្តម អគ្គលេខាធិការ បានគូសបញ្ជាក់ថា គោលបំណងរបស់សម្ដេចតេជោ ហ៊ុន សែន នាពេលនេះ គឺបង្ហាញពីការយកចិត្តទុកដាក់ខ្ពស់ ចំពោះមន្ត្រីរាជការចូលនិវត្តន៍ទាំងអស់ ពោលគឺទាំងមន្ត្រីកងកម្លាំងប្រដាប់អាវុធ និងមន្ត្រីរាជការស៊ីវិល ដោយមិនទុកឱ្យមន្ត្រីចូលនិវត្តន៍ណាម្នាក់ នៅឯកោ និងរស់នៅដោយលំបាកឡើយ។ឯកឧត្តមកិត្តិសង្គហបណ្ឌិត គន់ គីម មានប្រសាសន៍លើកឡើងនូវចំណុចស្នូលសំខាន់ ទាក់ទងទៅនឹងការធ្វើវិសោធនកម្មលក្ខន្តិកៈ អតីតសមាគមយុទ្ធជនកម្ពុជា ដោយសម្តេចតេជោ ហ៊ុន សែន បានផ្តល់អនុសាសន៍ឱ្យមានការរៀបចំ ដើម្បីឈានទៅដល់ការធ្វើវិសោធនកម្ម លក្ខន្តិកៈ អតីតយុទ្ធជនកម្ពុជា សំដៅធ្វើយ៉ាងណាឈានទៅដល់ការគ្រប់គ្រង និងជួយជំរុញបន្ថែមទៀតដល់និវត្តជនទូទៅ ដោយមិនចំពោះតែអតីតយុទ្ធជន កន្លងមកនោះទេ។តាមរយៈពិធីសំណេះសំណាលនេះ ឃើញថាគ្រួសារនិវត្តជនខេត្តពោធិ៍សាត់បានសាទរ និងគាំទ្រ ចំពោះការយកចិត្តទុកដាក់របស់សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានសមាគមអតីតយុទ្ធជនកម្ពុជា ដែលសម្តេចតែងតែគិតគូរជួយដល់អ្នកចូលនិវត្ដន៍ទាំងអស់ ទាំងមន្ត្រីរាជការស៊ីវិល និងកងកម្លាំងប្រដាប់អាវុធដែលចូលនិវត្តន៍ ដើម្បីឱ្យពួកគាត់បានចូលនៅក្នុងក្របខ័ណ្ឌ នៃ«សមាគមអតីតយុទ្ធជន និងនិវត្តជនកម្ពុជា»៕ អត្ថបទ សេក ឧត្តម

សមយុទ្ធនាគមាសឆ្នាំ២០២៥ រវាងកងទ័ពកម្ពុជា និងចិនត្រូវបិទបញ្ចប់ថ្ងៃនេះ ប្រកបដោយភាពជោគជ័យ

នាយឧត្តមសេនីយ៍ ទៀ សីហា ឧបនាយករដ្ឋមន្រ្តី រដ្ឋមន្រ្តីក្រសួងការពារជាតិកម្ពុជា និងឧត្តមនាវីឯក WEI WENHUI មេបញ្ជាការរងតំបន់ភូមិភាគខាងត្បូង កងទ័ពរំដោះប្រជាជនចិន នៅព្រឹកថ្ងៃទី២៨ ខែឧសភា ឆ្នាំ២០២៥នេះ បានអញ្ជើញចូលរួមពិធីបិទសមយុទ្ធ«នាគមាសឆ្នាំ២០២៥» បន្ទាប់ពីកងទ័ពកម្ពុជា និងចិន ជាងពីរពាន់នាក់ធ្វើសមយុទ្ធរួមគ្នារយៈពេល១៥ថ្ងៃពោលគឺចាប់ពីថ្ងៃទី១៤ ដល់ថ្ងៃទី២៨ ខែឧសភា ទទួលលទ្ធផលយ៉ាងត្រចះប្រចង់ប្រកបដោយផ្លែផ្កានោះ។សមយុទ្ធ «នាគមាស-២០២៥» រវាងកងទ័ពកម្ពុជា និងចិនលើកទី៧នេះបានប្រព្រឹត្តទៅក្រោមប្រធានបទ៖ «ប្រតិបត្តិការប្រឆាំងភេរវកម្មរួមគ្នា និងការងារសង្គ្រោះមនុស្សធម៌» នាមជ្ឈមណ្ឌលហ្វឹកហ្វឺនកងរាជអាវុធហត្ថ នៅស្រុកសាមគ្គីមានជ័យ ខេត្តកំពង់ឆ្នាំង ដោយសមយុទ្ធនាគមាសឆ្នាំ២០២៥នេះ ធ្វើឡើងក្នុងគោលបំណងផ្លាស់ប្តូរបទពិសោធន៍ ការពង្រឹងទស្សនៈសន្តិសុខដែលមានលក្ខណៈរួមគ្នា និងការលើកកម្ពស់សមត្ថភាពប្រយុទ្ធជាក់ស្តែងរវាងកងទ័ពប្រទេសទាំងពីរ ក្នុងការប្រយុទ្ធប្រឆាំងអំពើភេរវកម្ម រួមចំណែកដល់ការពង្រឹងទំនាក់ទំនង និងកិច្ចសហប្រតិបត្តិការគ្រប់ជ្រុងជ្រោយ ដែលប្រទេសទាំងពីរបានឯកភាពគ្នា កសាងសហគមន៍វាសនារួមកម្ពុជា-ចិន គ្រប់រដូវកាល ក្នុងយុគសម័យថ្មី។សមយុទ្ធនាគមាស ឆ្នាំ២០២៥នេះ ត្រូវបានចែកចេញជា២ផ្នែក ដោយទី១៖ សមយុទ្ធលើគោក និងអាកាស នៅមជ្ឈមណ្ឌលហ្វឹកហ្វឺនកងរាជអាវុធហត្ថ (ភ្នំជុំសែនរីករាយ) ខេត្តកំពង់ឆ្នាំង និងទី២៖ សមយុទ្ធសមុទ្រនិងអាកាស នៅលើផ្ទៃសមុទ្រនិងដែនអាកាសកម្ពុជា ក្នុងតំបន់ខេត្តព្រះសីហនុ ដោយមានកម្លាំងទ័ពកម្ពុជា-ចិន សរុបជាង ២ពាន់នាក់ចូលរួម ព្រមទាំងមានការប្រើប្រាស់សព្វាវុធ គ្រឿងបំពាក់កាន់តែទំនើបៗ ក្នុងនោះក៏មានការប្រើប្រាស់បញ្ញាសិប្បនិម្មិត (AI) ដែលជាការឆ្លើយតបទៅនឹងការធ្វើទំនើបកម្មរបស់កងយោធពលខេមរភូមិន្ទ នៃព្រះរាជាណាចក្រកម្ពុជា ស្របតាមស្ថានភាពវិវឌ្ឍន៍នាពេលបច្ចុប្បន្នផងដែរ។ជាការកត់សម្គាល់ សមយុទ្ធនាគមាសបានក្លាយ ជានិម្មិតរូបនៃកិច្ចសហប្រតិបត្តិការដ៏រឹងមាំមិនអាចបំបែកបាន រវាងកម្ពុជា និងចិន។ សមយុទ្ធនេះ ពិតជាផ្ដល់នូវសារសំខាន់ក្នុងការលើកកម្ពស់សមត្ថភាព និងការយល់ដឹងបន្ថែមទៀតដល់កងទ័ពទាំងពីរប្រទេស ដូចជាការបង្ហាញអំពីសមត្ថភាព ការផ្លាស់ប្ដូរបទពិសោធន៍គ្នាទៅវិញទៅមក បង្កើនការយល់ដឹងពីការបញ្ញាចម្រុះ និងនីតិវិធីប្រតិបត្តិការចម្រុះ យុទ្ធោបករណ៍ បច្ចេកទេស និងជំនាញថ្មីៗ ហើយមួយវិញទៀត សមយុទ្ធនេះ ក៏បានធ្វើឱ្យកងទ័ពកម្ពុជា និងចិន ពង្រឹងបាននូវទំនាក់ទំនងល្អ បង្កើនចំណងសាមគ្គីភាព ចេះសម្របសម្រួល អាចរស់នៅ និងធ្វើការងាររួមគ្នាជាមួយជាតិសាសន៍ដទៃក្នុងពេលធ្វើប្រតិបត្តិការរួម ដើម្បីឆ្លើយតបយ៉ាងមានប្រសិទ្ធភាព និងទាន់ពេលវេលាក្នុងប្រតិបត្តិការទាំងថ្នាក់ជាតិ និងអន្តរជាតិ ក្នុងគោលបំណងចូលរួមទប់ស្កាត់ និងដោះស្រាយបញ្ហាប្រឈមនានា ដែលអាចកើតមានឡើងជាយថាហេតុណាមួយនោះ។សូមបញ្ជាក់ថាសមយុទ្ធនាគមាសប្រចាំឆ្នាំរវាងកងយោធពលខេមរភូមិន្ទជាមួយកងទ័ពរំដោះប្រជាជនចិននៅឆ្នាំ២០២៥នេះ ត្រូវបានពង្រីកទំហំកាន់តែធំ ខ្លឹមសារកាន់តែស៊ីជម្រៅ និងចំនួនយោធិន យុទ្ធោបករណ៍ចូលរួមកាន់តែច្រើន និងទំនើបជាងឆ្នាំមុនៗ ខណៈមានកម្លាំងចូលរួមចម្រុះគ្នារវាងកងទ័ពជើងគោក កងទ័ពជើងទឹក កងទ័ពជើងអាកាស កងរាជអាវុធហត្ថលើផ្ទៃប្រទេស និងមានជំនាញផ្សេងៗចូលរួមផងដែរ ដើម្បីឱ្យស្របទៅនឹងទំហំកិច្ចសហប្រតិបត្តិការរវាងកងទ័ពទាំងពីរកម្ពុជា-ចិន ដែលកាន់តែរីកចម្រើន និងស៊ីជម្រៅជាលំដាប់លើគ្រប់វិស័យនោះ៕ អត្ថបទ បាន ចក់

សម្ដេចធិបតី ហ៊ុន ម៉ាណែត ថ្លែងអំណរគុណដល់ប្រជាពលរដ្ឋខ្មែររស់នៅប្រទេសជប៉ុន ដែលបានរង់ចាំទទួលស្វាគមន៍យ៉ាងកក់ក្ដៅ និងស្និទ្ធស្នាលបំផុត

នៅព្រឹកថ្ងៃទី២៨ ខែឧសភា ឆ្នាំ២០២៥នេះ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា និងលោកជំទាវបណ្ឌិត ពេជ ចន្ទមុន្នី ហ៊ុន ម៉ាណែត ព្រមទាំងគណៈប្រតិភូរាជរដ្ឋាភិបាលកម្ពុជា បានអញ្ជើញដល់អាកាសយានដ្ឋានអន្តរជាតិ ហាណេដា (HANEDA) ទីក្រុងតូក្យូ ប្រទេសជប៉ុន ប្រកបដោយសុវត្ថិភាព ព្រមទាំងបានការទទួលស្វាគមន៍ពីសំណាក់ លោកជំទាវ IKUINA Akiko សមាជិកសភា និងជាអនុរដ្ឋមន្ត្រីការបរទេសជប៉ុន និង ឯកឧត្តម MIYASHITA Tadayuki ប្រធានពិធីការ។ក្នុងដំណើរអញ្ជើញដល់នេះដែរ សម្ដេចធិបតី ហ៊ុន ម៉ាណែត បានថ្លែងអំណរគុណបងប្អូនប្រជាពលរដ្ឋខ្មែរដែលកំពុងរស់នៅ ធ្វើការ និងសិក្សានៅប្រទេសជប៉ុន ដែលបានមករង់ចាំ និងទទួលស្វាគមន៍យ៉ាងកក់ក្តៅ និងស្និទ្ធស្នាលបំផុត ក្នុងឱកាសគណៈប្រតិភូរាជរដ្ឋាភិបាលកម្ពុជា មកបំពេញទស្សនកិច្ចការងារផ្លូវការ រយៈពេល៤ថ្ងៃ ទីក្រុងតូក្យូ ប្រទេសជប៉ុន។

បណ្ដាញសង្គម

ព័ត៌មានថ្មីៗ

អ្នកស្លាប់ដោយសារជំនន់ទឹកភ្លៀងមូសុងនៅប៉ាគីស្ថាន ឡើងជាង ២៤០នាក់ ចាប់តាំងពីចុងខែមិថុនាមក

លោក Trump កំណត់ពន្ធ ១៩% លើហ្វីលីពីន ក្នុងកិច្ចព្រមព្រៀងពាណិជ្ជកម្មថ្មីរវាងសម្ព័ន្ធមិត្តទាំងពីរ

ចំនួនអ្នកស្វែងរកជំនួយដែលត្រូវសម្លាប់ដោយអ៊ីស្រាអែលនៅហ្កាហ្សា កើនលើសពី ១.០០០នាក់

[UPDATE] ផ្ទុះការតវ៉ានៅបង់ក្លាដែស ខណៈអ្នកស្លាប់ក្នុងគ្រោះថ្នាក់ធ្លាក់យន្តហោះរបស់ទ័ពអាកាសឡើងជាង ៣០នាក់

រុស្ស៊ី បង្ហើបថា នឹងពុំមានការទម្លាយភាពជាប់គាំងសម្រាប់កិច្ចចរចាអ៊ុយក្រែននាពេលខាងមុខនេះទេ

លោក Trump៖ អាចនឹងធ្វើទស្សនកិច្ចនៅប្រទេសចិនដើម្បីជួបលោក Xi នាពេលខាងមុខឆាប់ៗនេះ

[BREAKING NEWS] សេចក្ដីរាយការណ៍៖ នាយករដ្ឋមន្ត្រីជប៉ុន លោក Ishiba ត្រូវរំពឹងថា នឹងប្រកាសចុះពីតំណែងនៅខែក្រោយនេះ

សហរដ្ឋអាមេរិក និងចិន គ្រោងពិភាក្សាពីការបន្ថែមពេលកំណត់ពន្ធនៅស៊ុយអែត សប្ដាហ៍ក្រោយនេះ

មន្ត្រីរបស់លោក Trump៖ ឥណ្ឌូនេស៊ីនឹងកាត់ពន្ធ និងរបាំងមិនមែនពន្ធ ក្នុងកិច្ចព្រមព្រៀងពាណិជ្ជកម្មជាមួយអាមេរិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877