នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កម្ពុជាស្វាគមន៍ប្រទេសឥណ្ឌូនេស៊ីចាត់បញ្ជូននាយទាហានបន្តវេនចំនួនពីររូបមក ចូលរួមជាមួយក្រុម AOT ប្រចាំកម្ពុជា ដើម្បីចុះសង្កេតការណ៍ ផ្ទៀងផ្ទាត់បទឈប់បាញ់
សម្ដេចធិបតី៖ រាជរដ្ឋាភិបាលនៅតែបន្តផ្តល់អាទិភាពខ្ពស់លើការលើកកម្ពស់ជីវភាពរបស់កម្មករនិយោជិត
បង្រ្កាបអគារប្រព្រឹត្តបទល្មើស Online Scams នៅទីតាំង ១កន្លែង ក្នុងក្រុងប៉ោយប៉ែត ឃាត់ខ្លួនមនុស្សប្រមាណ ៣០០នាក់
សម្តេចតេជោ ហ៊ុន សែន ណែនាំដល់មន្ត្រីរក្សាសន្តិសុខសណ្តាប់ធ្នាប់សង្គមឲ្យបានល្អ ពិសេសបទល្មើសអនឡាញត្រូវបង្ក្រាបកុំអោយងើបឡើងវិញអោយសោះ

ព័ត៌មានជាតិ

ឆ្នាំ២០២៥ មជ្ឈមណ្ឌលមាត្រាសាស្រ្តជាតិ ផ្តល់សេវាសាធារណៈធ្វើព្យាសកម្មឧបករណ៍បាន ១.១២៤ គ្រឿង

2026/03/02 01:57:30 pm        353
Facebook Telegram Linkin
មជ្ឈមណ្ឌលមាត្រាសាស្រ្តជាតិនៅក្នុងឆ្នាំ២០២៥, ផ្តល់សេវាសាធារណៈធ្វើព្យាសកម្មឧបករណ៍មាត្រាសាស្ត្រសរុបចំនួន ១.១២៤ គ្រឿង ក្នុងនោះក្រុមហ៊ុន រោងចក្រ សហគ្រាស បានចំនួន ៧៨៣ គ្រឿង, អង្គភាពចំណុះមជ្ឈមណ្ឌលមាត្រាសាស្ត្រជាតិ ចំនួន ៧៨ គ្រឿង និងតាមបណ្តាមន្ទីររាជធានីខេត្តចំនួន ២៦៣ គ្រឿង។ ជុំវិញការងារមាត្រាសាស្រ្ត, បើតាមរបាយការណ៍លទ្ធផលការងារឆ្នាំ២០២៥ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និង នវានុវត្តន៍ បានបង្ហាញថា វិស័យមាត្រាសាស្ត្របានដើរតួនាទីយ៉ាងសំខាន់ ក្នុងជីវភាពរស់នៅរបស់ប្រជាពលរដ្ឋមានជាអាទិ៍ ការជួយ គាំទ្រសុខុមាលភាពរបស់សង្គម និងទំនើបកម្ម ដោយគាំទ្រលើផ្នែកពាណិជ្ជកម្ម ឧស្សាហកម្ម សុខភាព សុវត្ថិភាព បរិស្ថាន និងសេវាកម្ម ដោយអនុលោមតាមបទប្បញ្ញត្តិបច្ចេកទេស និងបទបញ្ហាបច្ចេកទេស។ការងារមាត្រសាស្រ្តនេះ នៅឆ្នាំ២០២៥, មជ្ឈមណ្ឌលមាត្រាសាស្រ្តជាតិ ដែលជាសេនាធិការរបស់ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានផ្តល់សេវាសាធារណៈធ្វើព្យាសកម្មឧបករណ៍ (ពិនិត្យភាពត្រឹមត្រូវនៃឧបករណ៍) មាត្រា សាស្ត្រសរុប ចំនួន ១.១២៤ គ្រឿង ក្នុងនោះក្រុមហ៊ុន រោងចក្រ សហគ្រាសបានចំនួន ៧៨៣ គ្រឿង (១៣៤ក្រុមហ៊ុន), អង្គភាព ចំណុះមជ្ឈមណ្ឌលមាត្រាសាស្ត្រជាតិ ចំនួន ៧៨ គ្រឿង, មន្ទីរ ឧ.វ.ប.ន. រាជធានី-ខេត្ត ចំនួន ២៦៣ គ្រឿង (១៣ ខេត្ត), ចេញវិញ្ញា បនបត្រព្យាសកម្ម ចំនួន ៧៥៣ ច្បាប់, ចេញវិញ្ញាបនបត្រស្តង់ដាប្រតិបត្តិ ចំនួន ៨៧ ច្បាប់, បានធ្វើការត្រួតពិនិត្យផ្ទៀងផ្ទាត់លើ ឧបករណ៍មាត្រាសាស្ត្រ និងទំនិញវេចខ្ចប់នាំចូល។ចំណែកការត្រួតពិនិត្យផ្ទៀងផ្ទាត់លើឧបករណ៍មាត្រាសាស្ត្រ និងទំនិញវេចខ្ចប់នាំចូលរួមមាន៖ ស៊ីទែនរថយន្តចំនួន ២០៥ គ្រឿង, ជញ្ជីងថ្លឹងរថយន្តចំនួន ២៦៩ គ្រឿង, ជញ្ជីងឌីជីថលចំនួន ២៤៦ គ្រឿង, ទំនិញវេចខ្ចប់នាំចូលចំនួន ៨១ ផលិតផល, ចេញ វិញ្ញាបនបត្របញ្ជាក់លក្ខណៈមាត្រាសាស្ត្រទំនិញវេចខ្ចប់នាំចូលចំនួន ១០ច្បាប់។ ចំពោះការងារដែលក្រសួងបានប្រតិភូកម្មជូនមន្ទីរ រួមមាន៖ ត្រួតពិនិត្យផ្ទៀងផ្ទាត់ដៃបាញ់ប្រេង ចំនួនជាង ៣៦ ពាន់ដៃ, ត្រួតពិនិត្យផ្ទៀងផ្ទាត់ជញ្ជីងក្រោម ១ ពាន់គីឡូក្រាម ចំនួនជាង ៤ ពាន់ជញ្ជីង, ត្រួតពិនិត្យផ្ទៀងផ្ទាត់ទំនិញផលិត និងទំនិញវេចខ្ចប់ ចំនួន ២១៦ ផលិតផល។ដោយឡែកការងារផ្តល់វិញ្ញាបនបត្រចុះបញ្ជីមាត្រាសាស្ត្រ នៅក្នុងឆ្នាំ២០២៥ មជ្ឈមណ្ឌលមាត្រាសាស្រ្តជាតិ អនុវត្តបានចំនួន សរុប ៩២៦ មូលដ្ឋាន ក្នុងនោះវិញ្ញាបនបត្រចុះបញ្ជីមាត្រាសាស្ត្រថ្មី ចំនួន ៣៨៣ មូលដ្ឋាន, វិញ្ញាបនបត្រចុះបញ្ជីមាត្រាសាស្ត្របន្ត ចំនួន ៥៤៣ មូលដ្ឋាន, ផ្តល់អាជ្ញាបណ្ណ ផលិត និងជួសជុលឧបករណ៍មាត្រាសាស្ត្រជូនក្រុមហ៊ុន ចំនួន៥ មូលដ្ឋាន (អាជ្ញាបណ្ណថ្មី១ និងអាជ្ញាបណ្ណបន្ត ៤)៕ អត្ថបទ៖ សុន រ៉ាឌី

អគ្គលេខាធិការអង្គការហ្វ្រង់កូហ្វូនីនឹងចុះសួរសុខទុក្ខពលរដ្ឋភៀសសឹកកម្ពុជា ខណៈសម្តេចតេជោចាត់ទុកដំណើរនេះបង្ហាញជំហរគាំទ្រសន្តិភាព

2026/03/02 01:51:18 pm        140
Facebook Telegram Linkin
ភ្នំពេញ៖ លោកជំទាវ ល្វីស មូស៊ីគីវ៉ាបូ (Louise Mushikiwabo) អគ្គលេខាធិការ អង្គការអន្តរជាតិនៃក្រុមប្រទេសនិយាយភាសាបារាំង ( Organisation internationale de la Francophonie)  បានឱ្យដឹងថា លោកស្រី និងគណៈប្រតិភូ នឹងធ្វើដំណើរចុះទៅសួរសុខទុក្ខជនភៀសសឹករបស់កម្ពុជា ដែលមិនទាន់បានត្រឡប់ទៅផ្ទះសម្បែង ព្រោះសង្គ្រាមនៅតាមព្រំដែនរវាងកម្ពុជា និងថៃ។លោកជំទាវ ល្វីស មូស៊ីគីវ៉ាបូ និងគណៈប្រតិភូ កំពុងបំពេញទស្សនកិច្ចនៅកម្ពុជា ដើម្បីជជែកពីការរៀបចំកិច្ចប្រជុំកំពូលលើកទី២០នៃអង្គការអន្តរជាតិនៃក្រុមប្រទេសនិយាយភាសាបារាំង ឬហៅថាហ្វ្រង់កូហ្វូនី ដែលគ្រោងធ្វើឡើងនៅរាជធានីភ្នំពេញនាខែវិច្ឆិកា ឆ្នាំ២០២៦នេះ។ នៅព្រឹកថ្ងៃចន្ទ ទី២ ខែមីនា ឆ្នាំ២០២៦នេះ លោកស្រីអគ្គលេខាធិការ និងគណៈប្រតិភូ បានអញ្ជើញជួបសម្តេចតេជោ ហ៊ុន សែន ប្រមុខរដ្ឋស្តីទី។ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងថា នៅក្នុងជំនួបនោះ លោកជំទាវអគ្គលេខាធិការ បានបង្ហាញពីការតាមដានរបស់លោកស្រីលើបញ្ហាព្រំដែនរវាងកម្ពុជា និងថៃ។ លោកជំទាវអគ្គលេខាធិការ បានជម្រាបសម្តេចតេជោ ហ៊ុន សែន ថា ក្នុងដំណើរមកកម្ពុជានាពេលនេះ លោកជំទាវនឹងអញ្ជើញទៅសួរសុខទុក្ខជនភៀសសឹក ដែលមិនទាន់បានត្រឡប់ទៅផ្ទះសម្បែងវិញ ហើយកំពុងបន្តស្នាក់នៅជំរំនៅឡើយ។សម្តេចតេជោ ហ៊ុន សែន បានថ្លែងអំណរគុណចំពោះការចាប់អារម្មណ៍របស់លោកស្រីអគ្គលេខាធិការ ជាពិសេសការគ្រោងទៅសួរសុខទុក្ខជនភៀសសឹករបស់កម្ពុជា។ សម្តេចតេជោ ចាត់ទុកដំណើរទៅសួរសុខទុក្ខជនភៀសសឹក ជាការបង្ហាញច្បាស់នូវជំហររបស់លោកស្រីអគ្គលេខាធិការគាំទ្រដល់សន្តិភាព ហើយមិនចង់ឃើញការកើតឡើងនូវភ្លើងសង្គ្រាម។សូមបញ្ជាក់ថាសង្គ្រាមឈ្លានរបស់កងទ័ពថៃ មកលើអធិបតេយ្យ និងបូរណភាពទឹកដីកម្ពុជា បានធ្វើឱ្យប្រជាពលរដ្ឋកម្ពុជាជាង ៦០ម៉ឺននាក់ ភៀសខ្លួនចេញពីផ្ទះសម្បែង។ បើទោះបីការផ្ទុះអាវុធត្រូវបានបញ្ចប់តាំងពីថ្ងៃទី២៧ ខែធ្នូ ឆ្នាំ២០២៥ រហូតមកដល់ពេលនេះ មានពលរដ្ឋជិត៥ម៉ឺននាក់ទៀត មិនទាន់បានត្រឡប់ទៅផ្ទះសម្បែងរបស់ពួកគេនៅឡើយទេ ដោយសារ ផ្ទះសម្បែងប្រជាពលរដ្ឋខ្លះត្រូវបានកងទ័ពថៃ ដាក់ទូកុងតឺន័រ និងរាយបន្លាលួសបិទមិនឱ្យប្រជាពលរដ្ឋចូលទៅកាន់ផ្ទះសម្បែងបានឡើយ៕

សម្តេចប្រមុខរដ្ឋស្ដីទីប្រាប់អគ្គលេខាធិការអង្គការហ្វ្រង់កូហ្វូនីថា បញ្ហាព្រំដែនកម្ពុជា-ថៃ មិន​ប៉ះ​ពាល់​ដល់​ការ​រៀបចំកិច្ចប្រជុំកំពូលហ្វ្រង់កូហ្វូនីនៅកម្ពុជានោះទេ

2026/03/02 01:48:22 pm        252
Facebook Telegram Linkin
សម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្តីទី បានថ្លែង​ប្រាប់​អគ្គ​លេខា​ធិការ​អង្គការ​អន្តរជាតិ​នៃ​បណ្តាប្រទេសនិយាយភាសាបារាំង ហៅកាត់ថា ហ្វ្រង់កូហ្វូនីថា បញ្ហាព្រំដែន​រវាង​កម្ពុជា ​និងថៃ នាពេលបច្ចុប្បន្ន មិនប៉ះពាល់ដល់ការរៀបចំកិច្ចប្រជុំកំពូលហ្វ្រង់កូហ្វូនី ដែល​គ្រោង​ធ្វើ​ឡើង​នៅ​ខែវិច្ឆិកា ចុងឆ្នាំ២០២៦នោះទេ ខណៈសម្តេចតេជោ​បាន​ផ្តាំ​ទៅ​កាន់​បណ្តា​មេដឹកនាំ​ប្រទេស​ជា​សមាជិកនៃអង្គការអន្តរជាតិមួយនេះកុំឱ្យមានការព្រួមបារម្ភ។សម្តេចតេជោ ហ៊ុន សែន បានមានប្រសាសន៍បញ្ជាក់បែបនេះ នៅក្នុងជំនួបជាមួយ លោកជំទាវ ល្វីស មូស៊ីគីវ៉ាបូ (Louise Mushikiwabo) អគ្គលេខាធិការ អង្គការ​អន្តរជាតិ​នៃ​ក្រុម​ប្រទេស​និយាយ​ភាសាបា​រាំង ( Organisation internationale de la Francophonie) ក្នុង​ជំនួប​សម្ដែង​ការ​គួរសម នៅវិមានសាមគ្គីភាពនៃព្រឹទ្ធសភាជាតិ រាជធានីភ្នំពេញ នៅព្រឹកថ្ងៃទី២ ខែមីនា ឆ្នាំ​២០២៦នេះ។ឯកឧត្តម ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងថា នៅក្នុងជំនួបនេះ សម្តេចតេជោ ហ៊ុន សែន បានសម្តែងការ​ស្វាគមន៍​យ៉ាង​កក់ក្តៅ​ចំពោះដំ​ណើរ​ទស្សន​កិច្ច​ជា​ថ្មី​រប​ស់​លោក​ស្រីអ​គ្គ​លេខា​ធិការ​មកកាន់កម្ពុជា។ សម្តេចតេជោ ចាត់ទុកដំណើរទស្សន​កិច្ច​របស់​លោក​ស្រី​ជា​ផ្នែក​ដ៏​សំខាន់​ក្នុង​ការរួមចំណែកលើកទឹកចិត្ត និងគាំទ្រដល់កម្ពុជា ក្នុងការរៀបចំកិច្ច​ប្រជុំ​កំពូល​ហ្វ្រង់កូហ្វូនី​លើកទី២០ ដែលគ្រោងធ្វើឡើងនៅខែវិច្ឆិកា ឆ្នាំ២០២៦។លោកជំទាវស្រី​អគ្គលេខាធិការ បានសម្តែងការអរគុណជាអនេកចំពោះការបដិសណ្ឋារកិច្ច និង​ការ​ស្វាគមន៍យ៉ាងកក់ក្តៅពីសំណាក់សម្តេចតេជោ ដោយបានអនុញ្ញាតឱ្យលោកស្រី និងគណៈ​ប្រតិភូ​បាន​ជួបសម្តែងការគួរសម។ លោកជំទាវ អគ្គលេខាធិការ បានគូសរំលេច​ពី​ចំណាប់​អារម្មណ៍​របស់លោកជំទាវ ពេលអញ្ជើញដល់ប្រទេសកម្ពុជា ដោយបានឃើញពី​ការ​រីក​ចម្រើន​របស់​កម្ពុជា​ ជាពិសេសអាកាសយានដ្ឋានអន្តរជាតិតេជោ។ លោកជំទាវ​បាន​កោត​សរសើរ​ចំពោះ​ការ​សាង​សង់អាកាសយានដ្ឋានថ្មីរបស់កម្ពុជាមួយនេះ មានភាពស្រស់​ស្អាត​ហើយ​អាកាសយានដ្ឋាន​នេះរង់​ចាំ​ទទួល​គណៈ​ប្រតិភូ​ថ្នាក់​ដឹកនាំ​នៃ​បណ្តា​ប្រទេស​អង្គការ​អន្តរជាតិ​ហ្វ្រង់​កូហ្វូនី​។លោកជំទាវអគ្គលេខាធិការ បានចាត់ទុកប្រទេសកម្ពុជា គឺជាប្រទេស​បាន​ចូល​រួម​ចំណែក​យ៉ាង​សកម្ម​នៅ​ក្នុងអង្គការអន្តរជាតិហ្វ្រង់កូហ្វូនី។ នៅចំពោះមុខសម្តេចតេជោ ហ៊ុន សែន, លោកជំទាវ អគ្គ​លេខាធិការ បានសរសើរអំពីភាពជាអ្នកដឹកនាំរបស់សម្តេចតេជោតាំងពីអតីតកាល ក៏ដូចជា​ដំណើរ​ស្វែង​រកសន្តិភាពសម្រាប់កម្ពុជាក្រោមការដឹកនាំរបស់សម្តេចពេលនៅជានាយករដ្ឋមន្ត្រី ដែល​ធ្វើឱ្យប្រទេសមានសន្តិភាពរហូតដល់បច្ចុប្បន្ន។សម្តេច​តេជោ ប្រមុខរដ្ឋស្តីទី បានសម្តែង​ការ​ពេញចិ​ត្ត​នូវ​អ្វី​ដែល​លោក​ស្រី​អគ្គ​លេខា​ធិការ​បាន​លើក​ឡើង​។ សម្តេចតេជោបានបញ្ជាក់ថា កម្ពុជាទន្ទឹងរង់ចាំ​ស្វាគមន៍​គណៈប្រតិភូ​នៃ​អង្គការ​អន្តរជាតិ​ហ្វ្រង់កូហ្វូនី អញ្ជើញមកកាន់ប្រទេសកម្ពុជា។ សម្តេចតេជោបានគូសរំលេចថា បើ​ទោះ​បី​ពេល​បច្ចុប្បន្នពិភពលោកស្ថិតនៅក្នុងស្ថានភាពដ៏ស្មុគស្មាញយ៉ាងណាក្តី តែសម្តេចរំពឹងថា កិច្ច​ប្រជុំ​ហ្វ្រង់​កូហ្វូនីនៅកម្ពុជានឹងទទួលបានជោគជ័យ ដើម្បីទុកជា​សមិទ្ធផល​ប្រវត្តិ​សាស្ត្រ​សម្រាប់​កម្ពុជា​ផង និងសម្រាប់អង្គការហ្វ្រង់កូហ្វូនីទាំងមូល ដែលកម្ពុជាធ្វើជាម្ចាសផ្ទះ។ សម្តេចតេជោ​បាន​បង្ហាញ​ក្តីសង្ឃឹមថា លោកជំទាវអគ្គលេខាធិការនឹងគាំទ្រយ៉ាងសកម្មដល់កម្ពុជា ក្នុងការ​រៀបចំ​កិច្ច​ប្រជុំកំពូលហ្វ្រង់កូហ្វូនី។នៅក្នុងឱកាសនៃជំនួបនេះលោកជំទាវអគ្គលេខាធិការអង្គការអន្តរជាតិហ្វ្រង់កូហ្វូនីបានសម្តែងនូវការ​ប្តេជ្ញាចិត្តជួយគាំទ្រកម្ពុជា ក្នុងការរៀបចំកិច្ចប្រជុំកំពូលនេះ។ លោកជំទាវបានបញ្ជាក់ថា ដំណើរ​របស់លោកស្រី និងគណៈប្រតិភូ អញ្ជើញមក​កម្ពុជា​នា​ពេល​នេះដើ​ម្បី​ចូល​រួម​ពិភាក្សា​ជាមួយ​កម្ពុជា​លើការងាររៀបចំកិច្ចប្រជុំកំពូលនេះ។សម្រាប់ក្នុង​បរិបទពិភពលោកដ៏ស្មុគស្មាញនេះ លោកជំទាវអគ្គលេ​ខាធិការ​អង្គការ​អន្តរជាតិ​ហ្វ្រង់​កូហ្វូនី បានទទួលស្គាល់នូវភាពស្មុគស្មាញរបស់ពិភពលោក ដែលតម្រូវ​ឱ្យប​ណ្តាប្រ​ទេស​សមាជិ​ក​អង្គកា​រ​អន្តរជាតិហ្វ្រង់កូហ្វូនី មានការគិតគូរចំពោះបញ្ហានេះផងដែរ។សូមជម្រាបថា នៅឆ្នាំ២០២៦នេះ កម្ពុជានឹង​ធ្វើ​ជាម្ចាស់​នៃ​កិច្ច​ប្រជុំ​កំពូល​អង្គកា​រ​អន្តរជាតិ​នៃ​ក្រុម​ប្រទេស​និយាយភាសាបារាំងលើកទី២០។ កិច្ចប្រជុំនេះ​ដំបូង​ឡើយ​គ្រោង​ធ្វើ​នៅ​លើ​ទឹក​ដី​ខេត្ត​សៀមរាប​ តែដើម្បីសម្រួលដល់ការស្នាក់នៅ និងការចូលរួម​របស់​ប្រតិភូ​នៃ​បណ្តា​ប្រទេស​នានា​នោះកិ​ច្ចប្រជុំត្រូវបានកែសម្រួលមកធ្វើនៅរាជធានីភ្នំពេញវិញ៕

រាជរដ្ឋាភិបាល និងថ្នាក់ដឹកនាំកម្ពុជាយកចិត្តទុកដាក់ខ្ពស់បំផុតលើគ្រួសារវីរយុទ្ធជន និង​ពលរដ្ឋ​ភៀសសឹក

2026/03/02 01:10:47 pm        198
Facebook Telegram Linkin
បន្ទាប់ពីកិច្ចខិតខំប្រឹងប្រែងស្វែងរកបទឈប់បាញ់ដើម្បីបញ្ចប់សោកនាដកម្មមកលើប្រទេសជាតិនិង​ប្រជាពលរដ្ឋ រាជរដ្ឋាភិបាល និងថ្នាក់ដឹកនាំដែលមានសម្តេចតេជោ ហ៊ុន សែន ប្រធាន​ព្រឹទ្ធសភា, សម្តេចសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា, សម្តេច​បវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ្រ ចន្ទមុនី ហ៊ុនម៉ាណែត បានផ្តោតការយកចិត្តទុកដាក់ខ្ពស់បំផុតលើគ្រួសារវីរយុទ្ធជនពលី វីរ​យុទ្ធជន​រង​របួស ​វីរយុទ្ធជនដែលឈរជើងនៅជួរមុខ និងប្រជាពលរដ្ឋភៀសសឹក។ នេះបើតាម​ការ​បញ្ជាក់​ជា​ថ្មី​របស់​អ្នក​នាំពាក្យរាជរដ្ឋាភិបាលកម្ពុជា។ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល បានថ្លែងតាមរយៈសន្និសីទសារព័ត៌មាននៅថ្ងៃទី២ ខែមីនា ឆ្នាំ២០២៦នេះថា ចំពោះការយកចិត្តទុកដាក់របស់រាជរដ្ឋាភិបាល និងថ្នាក់ដឹកនាំស្ថាប័នជាតិសំខាន់ៗចំពោះជនភៀសសឹក ក្នុងនោះ សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា កាលពីថ្ងៃទី២៨ ខែកុម្ភៈ ឆ្នាំ២០២៦ បានសម្រេចផ្តល់អំណោយមនុស្សធម៌ជាបន្ទាន់ដើម្បីជួយសម្រាលការលំបាកជូនប្រជាជនភៀសសឹកចំនួនជិត៣ ០០០ គ្រួសារដែលកំពុងស្នាក់នៅតាមជំរុំសុវត្ថិភាព ក្នុងស្រុកអូរជ្រៅនិងស្រុកថ្មពួក ខេត្តបន្ទាយមានជ័យ ដើម្បីជួយសម្រួលជីវភាពរស់នៅរបស់ពួកគេ ជាពិសេសបន្ទាប់ពីមានភ្លៀងធ្លាក់ខ្លាំងដែលធ្វើឱ្យពួកគេជួបការលំបាក។ អំណោយមនុស្សធម៌ទាំងនោះ ដែលជារួមមាន គ្រឿងឧបភោគបរិភោគ សម្ភារៈប្រើប្រាស់ និងថវិកាមួយចំនួនផង ដែលជាសទ្ធាជ្រះថ្លារបស់សប្បុរសជនគ្រប់មជ្ឈដ្ឋានតាមរយៈកាកបាទក្រហមកម្ពុជា នឹងត្រូវយកទៅចែកជូនផ្ទាល់ដៃដល់បងប្អូនប្រជាជនភៀសសឹកទាំងនោះនៅថ្ងៃទី៣ ខែមីនា ឆ្នាំ ២០២៦។ អ្នកនាំពាក្យរាជរដ្ឋាភិបាលបញ្ជាក់ថា បន្ទាប់ពីកិច្ចខិតខំប្រឹងប្រែងស្វែងរកបទឈប់បាញ់ដើម្បីបញ្ចប់សោកនាដកម្មមកលើប្រទេសជាតិនិងប្រជាពលរដ្ឋ រាជរដ្ឋាភិបាល និងថ្នាក់ដឹកនាំដែលមានសម្តេចតេជោ ហ៊ុន សែន ប្រធានព្រឹទ្ធសភា, សម្តេចសម្តេចកិត្តិព្រឹទ្ធបណ្ឌិត ប៊ុនរ៉ានី ហ៊ុនសែន ប្រធានកាកបាទក្រហមកម្ពុជា, សម្តេចបវរធិបតី ហ៊ុន ម៉ាណែត នាយករដ្ឋមន្ត្រី និងលោកជំទាវបណ្ឌិត ពេជ្រ ចន្ទមុនី ហ៊ុនម៉ាណែត បានផ្តោតការយកចិត្តទុកដាក់ខ្ពស់បំផុតលើគ្រួសារវីរយុទ្ធជនពលី វីរយុទ្ធជនរងរបួស វីរយុទ្ធជនដែលឈរជើងនៅជួរមុខ និងប្រជាពលរដ្ឋភៀសសឹក។ ក្នុងដំណើរអញ្ជើញចុះជួបសំណេះសំណាល និងសួរសុខទុក្ខពលរដ្ឋភៀសសឹកកាលពីពេលកន្លងទៅនេះ សម្តេចបវរធិបតីបានបញ្ជាក់ថា រាជរដ្ឋាភិបាលបានដាក់ចេញនូវវិធានការចាំបាច់ក្នុងការការដោះស្រាយសម្រាប់ទាំងបងប្អូនជនភៀសសឹកដែលអាចត្រឡប់ទៅលំនៅឋានវិញបាន ទាំងបងប្អូនជនភៀសសឹកដែលមិនទាន់អាចត្រឡប់ទៅលំនៅឋានវិញបាននៅឡើយ និងទាំងការស្តារឡើងវិញនូវហេដ្ឋានរចនាសម្ព័ន្ធដែលរងការខូចខាត។ សម្រាប់បងប្អូនជនភៀសសឹកដែលអាចវិលត្រឡប់ទៅលំនៅឋានវិញបាន ក្រសួងស្ថាប័នពាក់ព័ន្ធ និងអាជ្ញាធរមូលដ្ឋាន បាននិងកំពុងខ្នះខ្នែងរៀបចំសម្របសម្រួលឱ្យពួកគេអាចវិលត្រឡប់ទៅលំនៅឋានវិញ បានកាន់តែឆាប់តាមដែលអាចធ្វើទៅបានដោយផ្តល់ជូនទាំងសុវត្ថិភាព និងការជួយស្តារជីវភាពរបស់ពួកគេ។ រហូតមកទល់ពេលនេះ មានពលរដ្ឋភៀសសឹកជាង៩២% ហើយបានវិលត្រឡប់ទៅកាន់ផ្ទះសម្បែងវិញក្នុងចំណោមជនភៀសសឹកសរុបជាង៦៤ម៉ឺននាក់។ សម្រាប់បងប្អូនជនភៀសសឹកដែលមិនទាន់អាចត្រឡប់ទៅលំនៅឋានវិញបាន ដោយសារស្ថានភាពមិនទាន់អំណោយផល រាជរដ្ឋាភិបាលបានផ្តល់នូវដំណោះស្រាយសមរម្យទៅតាមស្ថានភាពជាក់ស្តែងដើម្បីជួយបងប្អូនអាចរស់នៅក្នុងបរិយាកាសល្អប្រសើរ និងរក្សាលំនឹងជីវភាពប្រចាំថ្ងៃក្នុងអំឡុងពេលដ៏លំបាកនេះ រហូតដល់បងប្អូនអាចវិលត្រឡប់ទៅលំនៅឋានវិញបាននាពេលខាងមុខ។ ចំពោះហេដ្ឋារចនាសម្ព័ន្ធដែលបានរងការខូចខាត មានដូចជា មណ្ឌលសុខភាព មន្ទីរពេទ្យបង្អែក ផ្សារ ផ្លូវ ស្ពាន សាលារៀន វត្តអារ៉ាម បណ្តាញទឹកស្អាត ភ្លើងអគ្គិសនី និងបណ្តាញទូរគមនាគមន៍ ជាដើម ក្រុមការងារចំពោះកិច្ចបាននិងកំពុងវាយតម្លៃផលខូចខាតទាំងនេះដើម្បីរាជរដ្ឋាភិបាលស្តារឡើងវិញឱ្យបានឆាប់រហ័សបំផុត តាមស្ថានភាពជាក់ស្តែង។ទន្ទឹមនឹងដៃម្ខាងដោះស្រាយបញ្ហាជូនពលរដ្ឋដែលរងផលប៉ះពាល់ពីសង្គ្រាមរំលោភបំពានរបស់ថៃ ដៃម្ខាងទៀត រាជរដ្ឋាភិបាលក៏បាននិងកំពុងខិតខំយ៉ាងខ្លាំងនិងយ៉ាងសកម្មលើនយោបាយការទូតដើម្បីជំរុញឱ្យមានដំណោះស្រាយបញ្ហាព្រំដែនដោយសន្តិវិធីតាមយន្តការ JBC ដោយអនុលោមតាមអនុសញ្ញា សន្ធិសញ្ញានិងច្បាប់អន្តរជាតិ និងគោរពយ៉ាងខ្ជាប់ខ្ជួននូវស្មារតីនៃសេចក្តីប្រកាសរួមនៃកិច្ចប្រជុំពិសេសលើកទី៣របស់គណៈកម្មាធិការព្រំដែនទូទៅ (GBC) ចុះថ្ងៃទី២៧ ខែធ្នូ ឆ្នាំ ២០២៥។អ្នកនាំពាក្យរាជរដ្ឋាភិបាលបញ្ជាក់ជាថ្មីថា រាជរដ្ឋាភិបាលកម្ពុជាប្រកាន់ជំហរម៉ឺងម៉ាត់ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជាមិនទទួលស្គាល់ដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ៕  

នៅឆ្នាំ២០២៥ មន្ទីរ​ប្រឆាំង​បទ​ល្មើស​គ្រឿងញៀន​បង្ក្រាប​បទ​ល្មើស​គ្រឿង​ញៀន​ជាង ៩ពាន់​ករណី​ ឃាត់​ខ្លួន​ជន​សង្ស័យជាង ២ម៉ឺននាក់ និងចាប់យកសារធាតុញៀនជាង ៧តោន

2026/03/02 12:45:29 pm        224
Facebook Telegram Linkin
ភ្នំពេញ៖ ការបង្ក្រាបបទល្មើសគ្រឿងញៀនបានធ្វើឡើងនៅក្នុងឆ្នាំ២០២៥, មន្ទីរប្រឆាំង​បទ​ល្មើស​គ្រឿង​ញៀន​បាន​បង្ក្រាបបទល្មើសគ្រឿងញៀនជាង ៩ពាន់ករណី ឃាត់ខ្លួនជនសង្ស័យជាង ២ម៉ឺន​នាក់ ចាប់យកសារធាតុញៀនជាង ៧តោន និងសារធាតុគីមីផ្សំជិត ៥០តោន។ នេះបើតាម នាយកមន្ទីរប្រឆាំងបទល្មើសគ្រឿងញៀន បញ្ជាក់ប្រាប់ BTV នៅថ្ងៃទី០២ ខែមីនានេះ។ឯកឧត្តម ឧត្តមសេនីយ៍ឯក ឃឹង សារ៉ាត់ នាយកមន្ទីរប្រឆាំងបទល្មើសគ្រឿងញៀន បាន​មាន​ប្រសាសន៍​ប្រាប់ ​BTV នៅថ្ងៃទី០២ ខែមីនា នេះថា ការពិតណាស់ រដ្ឋាភិបាលនីតិកាលទី៧ ដែល​មានសម្តេចមហាបវរធិបតី ហ៊ុន មាណែត ជានាយករដ្ឋមន្ត្រី បានបន្តយកចិត្តទុកដាក់ និងយក​បញ្ហា​គ្រឿង​នេះ ​ជាអាទិភាពទី១។ ហេតុនេះ ក្នុងឆ្នាំ២០២៥ កន្លងទៅ នគរបាលប្រឆាំង​គ្រឿង​ញៀន​បង្ក្រាប​បទល្មើសគ្រឿងញៀន សរុបចំនួន ៩,២១៨ ករណី ឃាត់ខ្លួន ជនសង្ស័យចំនួន ២២,៩២៦នាក់ (ស្រី ១,៦១៦នាក់) ចាប់យកសារធាតុញៀន សរុប ចំនួន ៧តោន ៨៥១គ.ក្រ និង​សារធាតុគីមីផ្សំ ជាង៤៨តោន។ឯកឧត្តម ឧត្តមសេនីយ៍ឯក ឃឹង សារ៉ាត់ បានបញ្ជាក់ថា សារធាតុ​ញៀន​ដែល​សមត្ថកិច្ច​ចាប់​បាន​ច្រើន​បំផុ​តគឺ ប្រភេទ អ៊ិចស្តាស៊ី សមត្ថកិច្ចចាប់បានជិត ៤ តោន ប្រភេទមេតំហ្វេតាមីន ជាង​១​តោន ​និងប្រភេទ កេតាមីន ជាង១តោន។ បើប្រៀប​ធៀប​លទ្ធ​ផលប​ង្ក្រាប​បទ​ល្មើសកា​ល​ពី​ឆ្នាំ​២០២៤​ ធៀបនិងឆ្នាំ២០២៥ ឃើញថា ៖ បទល្មើសគ្រឿងញៀនមានការកើនឡើងចំនួន ៨៨១​ករណី ​កើនឡើង ១០.៥៦%។ ជនសង្ស័យមានការកើនឡើង ចំនួន ១៨២៤នាក់ កើនឡើង ៨.៦៤%។ គ្រឿងញៀនដែលសមត្ថកិច្ចចាប់បាន មានការថយចុះ ប្រហែល ៣តោន។ សារ​ធាតុ​គីមី​ផ្សំ ​មានការកើនឡើង ជាង ៤៨តោន។ចំពោះស្ថាន​ភាពគ្រឿងញៀន ស្ថានភាពជាទូទៅនៃ​បទ​ល្មើស​គ្រឿង​ញៀន​នៅ​ក្នុង​កម្ពុជា​មាន​ការ​ថម​ថយ​ដោយ​ក្នុង​នោះ៖ មិនមានករណីផលិត កែឆ្នៃគ្រឿងញៀនទ្រង់ទ្រាយធំៗទៀតនោះទេ គឺ​មាន​តែ​ការកែច្នៃគ្រឿងញៀនទ្រង់ទ្រាយតូចៗ នៅតាមផ្ទះ និងតាមខុនដូរ។ ការប្រើ​ប្រាស់​គ្រឿង​ញៀន​​នៅ​តាមសប្បាយដ្ឋានមានការថយចុះ ស្ទើតែទាំងស្រុង៕ អត្ថបទ៖ វង្ស សុភាព 

ក្រសួងការងារ អំពាវនាវសាធារណជន​ជួយផ្សព្វផ្សាយព័ត៌មានការងារ ខណៈ​ឱកាស​ការងារ​នៅ​សល់​ជា​ង ៨ម៉ឺន​កន្លែង​កំពុង​មានតម្រូវការ

2026/03/02 12:35:12 pm        211
Facebook Telegram Linkin
មន្រ្តីជាន់ខ្ពស់នៃក្រសួងការងារ និងបណ្តុះបណ្តាលវិជ្ជាជីវៈ បានអំពាវនាវដល់សាធារណជនទូទៅ ក៏​ដូច​ជាភាគីពាក់ព័ន្ធ ករណីជួបប្រជាពលរដ្ឋ ជាពិសេសជួបអតីតពលករកំពុងស្វែងរកការងារធ្វើ សូមជួយណែនាំឱ្យទាក់ទងទៅកាន់លេខ ១២៩២ ខណៈបច្ចុប្បន្ននៅមានឱកាសការងារប្រមាណ ៨ម៉ឺននាក់ កំពុងរង់ចាំ។យោងតាមឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ កាលពី​កន្លង​ទៅ​នេះ បានមានប្រសាសន៍ឱ្យដឹងថា បច្ចុប្បន្ននៅមានឱកាសការងារប្រមាណ ៨ម៉ឺននាក់ទៀត សម្រាប់​ប្រជាពលរដ្ឋ ជាពិសេសសម្រាប់ពលករខ្មែរដែលវិលត្រឡប់ពីប្រទេសថៃ ហើយ​ក្នុង​ឆ្នាំ​២០២៥ ​ក្រសួងបានគ្រប់គ្រងការវិលត្រឡប់របស់អតីតពលករប្រមាណ ៩៥ម៉ឺននាក់ ដោយ​ប្រសិទ្ធ​ភាព ​ហើយបានប្រែក្លាយពួកគាត់ឱ្យទៅជាកម្លាំងផលិតកម្មជាតិដ៏មានសក្តានុពល ដែល​ឆ្លើយ​តប​នឹងកំណើនវិនិយោគ។ស្របតាមអនុសាសន៍ណែនាំដ៏ខ្ពង់ខ្ពស់របស់សម្តេចនាយករដ្ឋមន្រ្តី ហ៊ុន ម៉ាណែត ឯកឧត្តម​រដ្ឋ​មន្រ្តី ​បានលើកឡើងបន្តថា អតីតពលករប្រមាណ ៣១ម៉ឺននាក់ ទទួលបាន​ការងារ​ក្នុង​ប្រព័ន្ធ​នៅ​តាម​សហគ្រាស ក្រុមហ៊ុន និងរោងចក្រ ហើយប្រមាណ ៣១ម៉ឺននាក់ផ្សេងទៀត បាន​ទទួល​ការ​ងារ​ក្រៅ​ប្រព័ន្ធគិតត្រឹមឆ្នាំ២០២៥ ហើយមកដល់ពេលនេះ មានរហូតដល់ទៅ៦២ម៉ឺននាក់។ ឯកឧត្តម បានគូស​បញ្ជាក់​ពី​ការ​រក្សា​បាន​នូវ​ប្រាក់​ឈ្នួល​អប្ប​បរ​មា​សមរម្យ​សម្រាប់​កម្មករ​និយោជិត​ផ្នែក​វាយនភណ្ឌ កាត់ដេរ ផលិតស្បែកជើង និងផលិតផលិតផលធ្វើដំណើរ និងកាបូប ជាមួយ​នឹងលក្ខខណ្ឌការងារ សុខដុមនីយកម្មវិជ្ជាជីវៈ និងអនុលោម​តាម​ច្បាប់​ស្ដីពី​ការ​ងារ​កាន់​តែ​ប្រសើរ​។ ដើម្បីព​ង្រឹងប្រសិទ្ធភាពការងារ ឆ្នាំ២០២៦ ក្នុងទិសដៅបម្រើសេវាប្រជាពលរដ្ឋ កម្មករនិយោជិត និង​និយោជកឱ្យកាន់តែល្អប្រសើរ បង្កើនល្បឿនអភិវឌ្ឍវិស័យការងារ សន្តិសុខសង្គម និង​បណ្តុះ​បណ្តាល​វិជ្ជាជីវៈ ឯកឧត្តម ហេង សួរ បានកំណត់ទិសដៅ១៩ចំណុច ព្រមទាំងផ្តល់​អនុសាសន៍​ដ៏មាន​តម្លៃដល់មន្រ្តីក្រោមឱវាទទាំងអស់ ត្រូវបន្តអនុវត្តអនុសាសន៍ទាំង​១០ចំណុច របស់​សម្តេច​មហា​បវរ​ធិបតី ដោយត្រូវពង្រឹង និងពង្រីកសេវាការងារ ព័ត៌មានទីផ្សារការងារ វេទិកាការងារ និ​ង​ប្រព័ន្ធ Hotline ១២៩៧ដល់សាធារណជន ជាពិសេសអតីតពលករ, បន្តពង្រីក​ទីផ្សារ​ការងារ​នៅ​ក្រៅ​ប្រទេស, បន្តរៀបចំផលិត និងផ្សព្វផ្សាយរបាយការណ៍អង្កេត និងឯកសារសិក្សា​ស្រាវ​ជ្រាវ​ពាក់​ព័ន្ធនឹ​ងទីផ្សារការងារជាទៀងទាត់ ក៏ដូចជាបន្តពង្រឹងអភិបាលកិច្ចទេសន្តរប្រវេសន៍ការងារ និង​យន្តការសមាហរណកម្មជនទេសន្តរប្រវេសន៍៕ អត្ថបទ៖ ឈិត បូរ៉ាវី 

រយៈពេល២ខែឆ្នាំ២០២៦គ្រឹះស្ថានអង្គរ រកចំណូលជាង ៩លាន១៧ម៉ឺនដុល្លារ ពីការ​លក់​សំបុត្រ​ទស្សនា​រមណីយដ្ឋានអង្គរ

2026/03/02 12:23:57 pm        185
Facebook Telegram Linkin
យោងតាមសេចក្ដីប្រកាសព័ត៌មានរបស់គ្រឹះស្ថានអង្គរ បានបង្ហាញនៅ​ថ្ងៃ​ទី២ ខែ​មីនា ឆ្នាំ​២០២៦​នេះ​ថា ​ក្នុងរយៈពេល២ខែឆ្នាំ២០២៦នេះ ភ្ញៀវទេសចរ​អន្តរជាតិ​ទិញ​សំបុត្រ​ទស្សនា​រមណីយ​ដ្ឋាន​អង្គរ​មាន​ចំនួន១៨៨ ៨៨៥នាក់ ដោយទទួលបាន​ប្រាក់ចំ​ណូល​ចំនួ​ន​៩​លាន​១​៧​ម៉ឺន​៥២៧០​ដុល្លារ​ បើធៀបរយៈពេលដូចគ្នាក្នុងឆ្នាំ២០២៥ ថយចុះជាង៣០ភាគរយ ។យោងតាមសេចក្ដីប្រកាសព័ត៌ដដែល បានបង្ហាញថា នៅក្នុងខែកុម្ភៈឆ្នាំ២០២៦នេះ មាន​អ្នក​ទេសចរ​អន្ដរជាតិចំនួន៩៥ ៣៩៤នាក់ បានទិញបណ្ណចូលទស្សនារមណីយដ្ឋានអង្គរ ដែល​ចំនួន​នេះ ​មានការថយចុះជាង២៨ភាគរយ បៀបធៀបនឹងឆ្នាំ២០២៥ ដោយទទួល​បាន​ប្រាក់​ចំណូល​ពី​ការ​លក់បណ្ណនេះ មានចំនួន៤លាន៦៥ម៉ឺន២៤៩៣ដុល្លាអាមេរិក ថយចុះជាង២៥ភាគរយ បើ​ធៀប​នឹងឆ្នាំ២០២៥កន្លងកន្លងមក។ក្នុងរយៈ​ពេល២ខែនេះ ភ្ញៀវទេសចរទិញសំបុត្រចូលទស្សនារមណីយដ្ឋានអង្គរ មកពីសហរដ្ឋ​អាមេរិក​ជាប់​លេខ១ បារាំងលេខ២ ចក្រភពអង់គ្លេសលេខ៣ ចិនលេខ៤និងអាឡឺម៉ង់លេខ៥។គ្រឹះស្ថានអង្គរ បន្ថែមថា ក្នុងរយៈពេល២ខែ ចាប់ពីខែមករា ដល់ខែកុម្ភៈឆ្នាំ២០២៦នេះ ភ្ញៀវ​ទេសចរ​បរទេសទិញសំបុត្រចូលទស្សនាអង្គរមានចំនួន១៨៨ ៨៨៥នាក់ និងទទួលបាន​ប្រាក់​ចំណូល​ចំនួន​៩លាន១៧ម៉ឺន៥២៧០ដុល្លា ថយចុះជាង៣០ភាគរយ បើធៀបនឹងឆ្នាំ២០២៥​កន្លង​ទៅ៕

ប្រមុខការទូតកម្ពុជា អនុញ្ញាតជូនលោកជំទាវ អគ្គលេខាធិការអង្គការ OIF ចូលជួបសំដែងការគួរសម និងពិភាក្សាការងារ

2026/03/02 12:12:59 pm        158
Facebook Telegram Linkin
ឯកឧត្តមឧបនាយករដ្ឋមន្ត្រី ប្រាក់ សុខុន រដ្ឋមន្ត្រីការបរទេស និងសហប្រតិបត្តិការអន្តរជាតិ អនុញ្ញាតជូនលោកជំទាវ Louise Mushikiwabo អគ្គលេខាធិការអង្គការអន្តរជាតិហ្វ្រង់កូហ្វូនី (OIF) ចូលជួបសំដែងការគួរសម និងពិភាក្សាការងារ នាព្រឹកថ្ងៃទី០២ ខែមីនា ឆ្នាំ២០២៦ នៅទីស្តីការក្រសួង រាជធានីភ្នំពេញ។សូមជម្រាបថា តបតាមការអញ្ជើញរបស់ ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និង សហប្រតិបត្តិការអន្តរជាតិ លោកជំទាវ លោកជំទាវ ល្វី មូស៊ីគីវ៉ាបូ អគ្គលេខាធិការនៃអង្គការអន្តរជាតិ ហ្វ្រង់កូហ្វូនី (OIF) បានអញ្ជើញមកបំពេញទស្សនកិច្ចការងារ នៅកម្ពុជា ចាប់ពីថ្ងៃទី១ ដល់ ថ្ងៃទី៤ ខែមីនា ឆ្នាំ២០២៦។ក្នុងឱកាសបំពេញទស្សនកិច្ច លោកជំទាវអគ្គលេខាធិការបានអញ្ជើញជួបសម្តែងការគួរសមជាមួយសម្តេចអគ្គមហាសេនាបតីតេជោ ហ៊ុន សែន ប្រមុខរដ្ឋស្ដីទី ហើយក៏នឹងមានជំនួបជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃ រដ្ឋសភាផងដែរ។ លោកជំទាវអគ្គលេខាធិការ ក៏នឹងមានជំនួបទ្វេភាគីជាមួយ ឯកឧត្តមឧបនាយករដ្ឋមន្ត្រី ប្រាក់ សុខុន ដើម្បីពិភាក្សាអំពីវឌ្ឍនភាពនៃការត្រៀមរៀបចំកិច្ចប្រជុំកំពូលហ្វ្រង់កូហ្វូនីលើកទី២០ នៅថ្ងៃទី១៥-១៦ ខែវិច្ឆិកា ឆ្នាំ២០២៦ នៅរាជធានីភ្នំពេញ ដែលជាព្រឹត្តិការណ៍ដ៏មានសារៈសំខាន់សម្រាប់ប្រទេសកម្ពុជា ក៏ដូចជា សម្រាប់សហគមន៍ហ្វ្រង់កូហ្វូនទាំងមូល។ដំណើរទស្សនកិច្ចនាពេលខាងមុខរបស់ លោកជំទាវ Louise MUSHIKIWABO បង្ហាញពីការប្តេជ្ញា ចិត្តរួមគ្នារបស់អង្គការ OIF និងព្រះរាជាណាចក្រកម្ពុជា ក្នុងការពង្រឹងភាពជាដៃគូ ឱ្យកាន់តែស៊ីជម្រៅ ព្រម ទាំងបង្កើនកិច្ចសហប្រតិបត្តិការឱ្យបានកាន់តែច្រើន ដើម្បីជាប្រយោជន៍ដល់បណ្តាញអ្នកប្រើប្រាស់ភាសា បារាំងនៅក្នុងតំបន់អាស៊ី-ប៉ាស៊ីហ្វិក និងតំបន់ផ្សេងៗទៀត៕

អង្គការសហប្រជាជាតិប្រកាសបន្តកិច្ចសហការយ៉ាងជិតស្និទ្ធជាមួយកម្ពុជាក្នុងស្មារតីភាពជាដៃគូ និងការគោរពគ្នាទៅវិញទៅមក

2026/03/02 12:04:39 pm        232
Facebook Telegram Linkin
ភ្នំពេញ៖ អង្គការសហប្រជាជាតិ ប្រចាំនៅកម្ពុជា ប្រកាសបន្តកិច្ចសហការយ៉ាងជិតស្និទ្ធក្នុងស្មារតីភាពជាដៃគូ និងការគោរពគ្នាទៅវិញទៅមកជាមួយកម្ពុជា។ការប្រទេសរបស់អង្គការសហប្រជាជាតិបែបនេះ ធ្វើឡើងតាមរយៈជំនួបរវាង សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃព្រះរាជាណាចក្រកម្ពុជា ជាមួយ លោកស្រី វ្ល៉ាដាន់កា អាន់ឌ្រេវ៉ា (Vladanka Andreeva) អ្នកសម្របសម្រួល អង្គការសហប្រជាជាតិ (UN) ប្រចាំនៅកម្ពុជា ក្នុងឱកាសជំនួបសម្តែងការគួរសម និងពិភាក្សាការងារ។តាមរយៈហ្វេសប៊ុកផែកផ្លូវការរបស់ អង្គការសហប្រជាជាតិ ប្រចាំនៅកម្ពុជា បានឱ្យដឹងនៅក្រោយជំនួបនេះថា ជំនួបសម្តែងការគួរសមនេះ បានផ្តល់ឱកាសដើម្បីពិភាក្សាអំពីកិច្ចសហប្រតិបត្តិការដែលកំពុងបន្តរវាងអង្គការសហប្រជាជាតិ និងរាជរដ្ឋាភិបាលកម្ពុជា រួមទាំងអាទិភាពរួមក្នុងការជំរុញការអភិវឌ្ឍប្រកបដោយចីរភាព និងគាំទ្រសុខុមាលភាពរបស់ប្រជាជនកម្ពុជា។ «អង្គការសហប្រជាជាតិ បន្តកិច្ចសហការយ៉ាងជិតស្និទ្ធនេះ ក្នុងស្មារតីភាពជាដៃគូ និងការគោរពគ្នាទៅវិញទៅមកជាមួយកម្ពុជា»៕

ក្រសួងការងារនាំយកឱកាសការងារដ៏ច្រើនសម្រាប់អតីតពលករមកពីថៃ និង​ប្រជាពលរដ្ឋ​នៅ​ស្រុក​ក្រគរ ខេត្តពោធិ៍សាត់

2026/03/02 10:44:09 am        218
Facebook Telegram Linkin
រោងចក្រ សគ្រាស និងក្រុមហ៊ុនធំៗចំនួន១០ បាន​ចូលរួម​សម្ភាស​ជ្រើសរើស​បុគ្គលិក​ភ្លាមៗ​ដោយ​ផ្ទាល់​ តាមរយៈវេទិកាការងារ សន្តិសុខសង្គម និងបណ្តុះបណ្តាលវិជ្ជាជីវៈ ក្រោមប្រធានបទ «ខ្មែរ​ជួយរកការងារ និងផ្ដល់ការងារឱ្យខ្មែរ» ដែលនៅបរិវេណសាលាស្រុកក្រគរ ខេត្តពោធិ៍សាត់ ដែល​មាន​ការ​ចូល​រួម​ពីអតីពលករ និងយុវជនជាង៨០០នាក់។នៅក្នុងកម្មវិធីវេទិកាការងារ កាលពីថ្ងៃទី១ ខែមីនា ឆ្នាំ២០២៦នេះ ឯកឧត្តម ហេង សួរ រដ្ឋ​មន្រ្តី​ក្រសួង​ការងារ​ និងបណ្តុះបណ្តាលវិជ្ជាជីវៈ បានលើកឡើងថា វេទិកាការងារនេះ គឺជា​យុទ្ធនាការ​រួម​មួយ​ដ៏​មាន​ប្រសិទ្ធភាព ដែលផ្សារភ្ជាប់អ្នករកការងារជាមួយតំណាងនិយោជកមកជួបគ្នា ក្នុង​ការ​ចុះ​​ឈ្មោះ​សម្ភាសផ្តល់ និងទទួលបានការងារភ្លាមៗដល់មូលដ្ឋាន ដែល​ជួយ​កាត់​បន្ថយ​ទាំង​ពេល​វេលា​ និងការចំណាយថវិកា។ ជាក់ស្តែង ក្រសួងបាននាំយកឱកាសការងារប្រមាណ ៤ពាន់​កន្លែង​ សម្រាប់អតីតពលករ និងយុវជនរកការងារ ដែលជា​ផ្នែក​មួយ​នៃ​ឱកាស​ការងារ​ក្នុង​ស្រុក​ជាង​ ៨ម៉ឺនកន្លែងនៅទូទាំងប្រទេស។ ម្យ៉ាងទៀត វេទិកានេះ​ក៏ជួយ​លើក​កម្ពស់​ការ​យល់​ដឹង​អំពី​អត្ថ​ប្រយោជន៍​របបសន្តិសុខសង្គម និងផ្សព្វផ្សាយពី «កម្មវិធីបណ្តុះបណ្តាលជំនាញវិជ្ជាជីវៈ និង​បច្ចេក​ទេស ជូនដល់យុវជនមកពីគ្រួសារក្រីក្រ និងគ្រួសារងាយរងហានិភ័យ ១,៥លាននាក់»។ឯកឧត្តមរដ្ឋមន្ត្រី បានបន្តថា ជាមួយនឹងឱកាសការងារទាំងនេះ បងប្អូន​អាច​ជ្រើស​រើស​យក​ការ​ងារ​នៅ​ស្រុក​ក្រគរក៏បាន នៅរាជធានីភ្នំពេញ ឬនៅបណ្តាខេត្តផ្សេងៗក៏បាន ឬ​នៅ​ក្រៅប្រ​ទេស​ដែល​មាន​ប្រាក់ឈ្នួលខ្ពស់ក៏បានដែរ។ កាន់តែពិសេសជាងនេះ នៅឆ្នាំ២០២៦នេះ សម្រាប់​អ្នក​ដែល​មិនទាន់ចង់ចាកចេញពីស្រុកកំណើត គឺអាចចុះឈ្មោះចូលរៀនវគ្គបណ្តុះបណ្តាលខ្លីៗ ដែល​ក្រសួង​ការងារនឹងបញ្ជូនគ្រូបណ្តុះបណ្តាល និងសម្ភារៈចុះទៅបង្រៀនបងប្អូនដល់មូលដ្ឋានតែម្តង ដូចជា៖ ជំនាញឆុងកាហ្វេ ដុតនំ ធ្វើក្រចក ជួសជុលគ្រឿងម៉ាស៊ីន តបណ្តាញអគ្គិសនីជាដើម។ ការ​ផ្តល់ជូនជំនាញទាំងនេះ គឺបន្ថែមទៅលើការបង្កើតសហគ្រាស រោងចក្រ​កាត់​ដេរ​សម្លៀក​បំពាក់ ​និងរោងចក្រផលិតឧបករណ៍បណ្តាញអគ្គិសនី ដំឡើងរថយន្ត ហើយនៅ​ថ្ងៃ​អនាគត​ដ៏​ខ្លី​ខាង​មុខនឹងមានការបង្កើតរោងចក្រខ្នាតយក្សមួយទៀតនៅស្រុកក្រគរនេះ។  ឯកឧត្តម ហេង សួរ ក៏បានជំរុញ​ឱ្យ​យុវជន​ចុះ​ឈ្មោះ​ចូលរៀនវគ្គ​បណ្ដុះបណ្ដាល​បច្ចេក​ទេស និង​វិជ្ជា​ជីវៈ​ ជាពិសេស សម្រាប់អតីតពលករដែលមានបទពិសោធស្រាប់ ក៏អាច​ចូលរួម​ធ្វើ​តេស្ត​សមត្ថភាព​ក្នុង​កម្មវិធីការវាយតម្លៃការសិក្សាពីមុន (RPL) ដោយឥតគិតថ្លៃ ដើម្បី​ទទួល​បាន​វិញ្ញា​បន​បត្រ​ទទួល​ស្គាល់​ជំនាញចំនួន៨មុខក្នុងវិស័យសំណង់ នាពេលឆាប់ៗខាងមុខនេះ៕ អត្ថបទ៖ ឈិត បូរ៉ាវី

បណ្ដាញសង្គម

ព័ត៌មានថ្មីៗ

កម្ពុជាស្វាគមន៍ប្រទេសឥណ្ឌូនេស៊ីចាត់បញ្ជូននាយទាហានបន្តវេនចំនួនពីររូបមក ចូលរួមជាមួយក្រុម AOT ប្រចាំកម្ពុជា ដើម្បីចុះសង្កេតការណ៍ ផ្ទៀងផ្ទាត់បទឈប់បាញ់
04/26/2026 10:04 AM
Facebook Telegram Linkin
សម្ដេចធិបតី៖ រាជរដ្ឋាភិបាលនៅតែបន្តផ្តល់អាទិភាពខ្ពស់លើការលើកកម្ពស់ជីវភាពរបស់កម្មករនិយោជិត
04/26/2026 10:04 AM
Facebook Telegram Linkin
កងទ័ព៖ ខ្មាន់កាំភ្លើងធ្វើការវាយប្រហារក្នុងពេលដំណាលគ្នា នៅក្នុង និងក្រៅរដ្ឋធានីរបស់ម៉ាលី
04/25/2026 05:04 PM
Facebook Telegram Linkin
បង្រ្កាបអគារប្រព្រឹត្តបទល្មើស Online Scams នៅទីតាំង ១កន្លែង ក្នុងក្រុងប៉ោយប៉ែត ឃាត់ខ្លួនមនុស្សប្រមាណ ៣០០នាក់
04/25/2026 05:04 PM
Facebook Telegram Linkin
រដ្ឋមន្ត្រីការបរទេសអ៊ីរ៉ង់ជួបពិភាក្សាជាមួយប្រមុខកងទ័ពប៉ាគីស្ថាន អំពីលទ្ធភាពនៃការចរចាជុំទី២ ជាមួយអាមេរិក
04/25/2026 05:04 PM
Facebook Telegram Linkin
អ៊ីរ៉ង់ប្រហារជីវិតបុរសម្នាក់ ជុំវិញ «បេសកកម្ម» តំណាងឲ្យទីភ្នាក់ងារចារកម្មអ៊ីស្រាអែល
04/25/2026 05:04 PM
Facebook Telegram Linkin
សម្តេចតេជោ ហ៊ុន សែន ណែនាំដល់មន្ត្រីរក្សាសន្តិសុខសណ្តាប់ធ្នាប់សង្គមឲ្យបានល្អ ពិសេសបទល្មើសអនឡាញត្រូវបង្ក្រាបកុំអោយងើបឡើងវិញអោយសោះ
04/25/2026 05:04 PM
Facebook Telegram Linkin
សម្តេចតេជោ ហ៊ុន​ សែន ណែនាំដល់មន្ត្រីយកចិត្តទុកដាក់គ្រប់គ្រងនិងមើលថែដល់អតីតយុទ្ធជន និងនិវត្តជននៅតាមមូលដ្ឋាន
04/25/2026 04:04 PM
Facebook Telegram Linkin
មនុស្ស ៣នាក់ស្លាប់ អំឡុងការប៉ះទង្គិច នៅភាគឦសានរដ្ឋមានជម្លោះ Manipur របស់ឥណ្ឌា
04/25/2026 04:04 PM
Facebook Telegram Linkin
របាយការណ៍៖ អ៊ីរ៉ង់បញ្ជាក់ថា សមត្ថភាពមីស៊ីលភាគច្រើនមិនត្រូវបានប្រើឡើយ ក្នុងសង្គ្រាមជាមួយអាមេរិក
04/25/2026 04:04 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.