BTV NEWS

ស្ថានទូតឥណ្ឌូនេស៊ី រំពឹងថា ពិធីបុណ្យផ្សាររាត្រី នឹងទាក់ទាញភ្ញៀវទេសចរកាន់តែច្រើន ឱ្យចូលរួមទស្សនាផ្លូវថ្មើរជើងចតុមុខ

សកម្មជនមកពីគណបក្សប្រឆាំងចំនួន៧០នាក់ ស្រុកស្អាង ខេត្តកណ្តាល ចូលរួមជីវភាពនយោបាយជាមួយគណបក្សប្រជាជនកម្ពុជា

ការងារជោគជ័យអាស្រ័យមន្រ្តីមាន «សុខភាពល្អ»

ឯកឧត្តម ហ៊ុន ម៉ានី៖“សុខទុក្ខមន្ត្រី គឺជាស្នូលនៃការអនុវត្តការងារកែទម្រង់រដ្ឋបាលសាធារណៈ ស្របតាមចក្ខុវិស័យរបស់ សម្តេចមហាបវរធិបតីនាយករដ្ឋមន្ត្រី”

ព័ត៌មានជាតិ

រដ្ឋមន្រ្តីការងារជំរុញឱ្យមន្ត្រីបន្តពង្រីកទីផ្សារការងារក្រៅប្រទេសដែលមានប្រាក់ឈ្នួលខ្ពស់ និងពាក់ព័ន្ធនឹងការអភិវឌ្ឍសេដ្ឋកិច្ចកម្ពុជា

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានណែនាំឱ្យមន្ត្រីក្រោមឱវាទ និងភាគីពាក់ព័ន្ធ ត្រូវបន្តពង្រីកទីផ្សារការងារនៅក្រៅប្រទេស ដែលមានប្រាក់ឈ្នួលខ្ពស់ លក្ខខណ្ឌការងារល្អ និងមាននិងញក់ព័ន្ធនឹងការអភិវឌ្ឍសេដ្ឋកិច្ចកម្ពុជា។ នៅក្នុងពិធីបិទសន្និបាតបូកសរុបលទ្ធផលការងាររបស់ក្រសួងការងារក្នុងឆ្នាំ២០២៥ និងលើកទិសដៅការងារសម្រាប់ឆ្នាំ២០២៦ កាលពីរសៀលថ្ងៃទី២៧ ខែកុម្ភៈកន្លងទៅ ឯកឧត្តមរដ្ឋមន្រ្តី បានឱ្យដឹងថា គិតត្រឹមឆ្នាំ២០២៥ ប្រជាពលរដ្ឋខ្មែរដែលកំពុងស្នាក់នៅ និងធ្វើការនៅក្រៅប្រទេសដោយស្របច្បាប់ មានចំនួនប្រមាណជាង ៤៣ម៉ឺននាក់ ដោយបានបញ្ជូនប្រាក់បញ្ជើមកក្នុងប្រទេសវិញប្រមាណ ១ពាន់ ៨៦០លានដុល្លារ។ ពលករកម្ពុជាដែលកំពុងស្នាក់នៅនិងបម្រើការនៅក្រៅប្រទេសនោះ រួមមាន៖ ប្រទេសថៃ កូរ៉េខាងត្បូង ជប៉ុន ម៉ាឡេស៊ី សិង្ហបុរី ហុងកុង អារ៉ាប់ប៊ីសាអូឌីត និងអ៊ីស្រាអែលជាដើម។ឯកឧត្តមរដ្ឋមន្រ្តី បានលើកឡើងដោយណែនាំដល់មន្រ្តីក្រោមឱវាទ បន្តពង្រឹង និងពង្រីកការផ្តល់សេវាការងារ សេវាប្រឹក្សាយោបល់ និងមគ្គទេសក៍អាជីព ការផ្សព្វផ្សាយព័ត៌មានទី ផ្សារការងារ ការតម្រង់ទិសមុនចូលទីផ្សារការងារ និងការបន្តរៀបចំព្រឹត្តិការណ៍ការងារ រួមមាន ទីផ្សាការងារ ពិព័រណ៍ការងារ និងការផ្គូផ្គង និងសម្ភាសការងារ និងការពង្រឹងប្រសិទ្ធភាពនៃដំណើរការប្រព័ន្ធឆ្លើយតបបន្ទាន់ ១២៩៧ ដល់សាធារណៈ និងជាពិសេសអតីតពលករដែលត្រឡប់មកពីប្រទេសថៃ។ ឯកឧត្តម ក៏បានឱ្យបន្តពង្រឹងអភិបាលកិច្ចទេសន្តរប្រវេសន៍ការងារ ការគាំពារជនទេសន្តរប្រវេសន៍ការងារខ្មែរទៅធ្វើការនៅក្រៅ ប្រទេស និងយន្តការសមាហរណកម្មជនទេសន្តរប្រវេសន៍ការងារខ្មែរប្រកបដោយប្រសិទ្ធភាពនិងចីរភាព។ឯកឧត្តម ហេង សួរ ក៏ណែនាំឱ្យបន្តរៀបចំ ផលិត និងផ្សព្វផ្សាយរបាយការណ៍អង្កេត និងឯកសារសិក្សាស្រាវជ្រាវពាក់ព័ន្ធនឹងតម្រូវការទីផ្សារ ការងារ ជាពិសេសទស្សនវិស័យមុខរបរ និងការងារឱ្យបានទៀងទាត់ និងកាន់តែគ្រប់ជ្រុងជ្រោយ ដើម្បីផ្តល់ព័ត៌មានទីផ្សារការងារឱ្យបានគ្រប់ជ្រុងជ្រោយដល់អ្នកស្វែងរកការងារ កម្មករនិយោជិត និយោជក អ្នកផ្តល់ការ បណ្តុះបណ្តាល និងសាធារណជន៕ អត្ថបទ៖ ឈិត បូរ៉ាវី

កម្ពុជា-វៀតណាម ប្តេជ្ញាពង្រឹងកិច្ចសហប្រតិបត្តិការវិស័យសន្ដិសុខតាមព្រំដែន ដើម្បីរួមចំណែកជំរុញទំហំពាណិជ្ជកម្មទ្វេភាគី

កម្ពុជា និងវៀតណាម ប្តេជ្ញានឹងខិតខំសហការគ្នាដើម្បីពង្រឹងកំណើនសេដ្ឋកិច្ច និងការដោះដូរពាណិជ្ចកម្មតាមព្រំដែនបន្ថែមទៀត ដើម្បីរួមចំណែកជំរុញទំហំពាណិជ្ជកម្មទ្វេភាគី និងលើកស្ទួយជីវភាពរស់នៅរបស់ប្រជាជននៃប្រទេសទាំងពីរ។ ការប្តេជ្ញានេះ ក្នុងជំនួបពិភាក្សាការងាររវាងឯកឧត្ដមសន្ដិបណ្ឌិត នេត សាវឿន ឧបនាយករដ្ឋមន្ដ្រី និងឯកឧត្តម Nguyen Minh Vu អនុរដ្ឋមន្ត្រីប្រចាំការ នៃក្រសួងការបរទេសវៀតណាម កាលពីរសៀលថ្ងៃទី២៧ ខែកុម្ភៈ ឆ្នាំ២០២៦នេះ នៅទីស្ដីការគណៈរដ្ឋមន្ដ្រី។ក្នុងជំនួបពិភាក្សា ឯកឧត្តម សន្ដិបណ្ឌិត នេត សាវឿន បានធ្វើការវាយតម្លៃខ្ពស់ចំពោះវត្តមានរបស់អនុរដ្ឋមន្ត្រី ដែលបានមកកម្ពុជានាពេលនេះ គឺជាពេលវេលាដ៏សមស្របមួយ ក្នុងការបន្តជំរុញសន្ទុះ នៃកិច្ចសហប្រតិបត្តិការព្រំដែននៃប្រទេសទាំង បន្ទាប់ពីកម្ពុជាបានធ្វើជាម្ចាស់ផ្ទះនៃកិច្ចប្រជុំកំពូលទ្វេភាគីកម្ពុជា-វៀតណាម និងកិច្ចប្រជុំត្រីភាគីកម្ពុជា-វៀតណាម-ឡាវ។ ក្នុងន័យនេះ ថ្នាក់ដឹកនាំនៃប្រទេសទាំងបី បានសម្តែងនូវការពេញចិត្តយ៉ាងខ្លាំងចំពោះលទ្ធផលនៃកិច្ចប្រជុំ និងបានប្តេជ្ញាចិត្តរួមគ្នាក្នុងការពង្រឹងសាមគ្គីភាព ក៏ដូចជាកិច្ចសហប្រតិបត្តិការឲ្យកាន់តែស្អិតរមួតបន្ថែមទៀត។ឯកឧត្តម សន្ដិបណ្ឌិត ក៏បានគូសបញ្ជាក់ថា វៀតណាមជាប្រទេសដែលមានសន្ទុះកំណើនសេដ្ឋកិច្ច គួរឲ្យកត់សម្គាល់ក្នុងកម្រិត៨% ទាំងក្នុងតំបន់ និងលើសកលលោក។ ដោយឡែក ឮកម្ពុជាក៏សម្រេចបានកំណើនសេដ្ឋកិច្ច៥% ផងដែរ ដូច្នេះភាពរីកចម្រើនរបស់ប្រទេសវៀតណាម បានផ្តល់ផលវិជ្ជមានដល់កម្ពុជា តាមរយៈការបំពេញឲ្យគ្នាទៅវិញទៅមកនៃសេដ្ឋកិច្ចរបស់ប្រទេសទាំងពីរ។ អនុរដ្ឋមន្ត្រីប្រចាំការ នៃក្រសួងការបរទេសវៀតណាមបានថ្លែងថា តាមស្មារតីនៃសេចក្តីថ្លែងការណ៍រួម នៃដំណើរទស្សនកិច្ចផ្លូវរដ្ឋកន្លងទៅនេះ ក្រោមតួនាទីក្រសួងការបរទេសវៀតណាម បានប្តេជ្ញាពង្រីកកិច្ចសហប្រតិបត្តិការល្អបន្ថែមទៀត ជាមួយភាគីកម្ពុជា ជាពិសេសកិច្ចសហប្រតិបត្តិការតាមព្រំដែនឲ្យកាន់តែល្អប្រសើរ ក្នុងគោលបំណងពង្រឹងកំណើនសេដ្ឋកិច្ចជាតិ និងការថែរក្សាសន្តិសុខតាមព្រំដែននៃប្រទេសទាំងពីរ។ ក្នុងនោះ បើបន្តជំរុញកិច្ចសហការគ្នាល្អតាមព្រំដែនរវាងកម្ពុជា និងវៀតណាម នោះទំហំពាណិជ្ជកម្មកម្ពុជា-វៀតណាម អាចរំពឹងថានឹងកើនឡើងបន្ថែមទៀត។ឯកឧត្តមក៏បានស្នើឲ្យប្រទេសកម្ពុជា យកចិត្តទុកដាក់ជំរុញការពិភាក្សាលើកិច្ចសហការគ្រប់គ្រងបញ្ហាតាមព្រំដែន ដើម្បីរួមចំណែកក្នុងការអភិវឌ្ឍសេដ្ឋកិច្ចតាមព្រំដែននៃប្រទេស និងប្រជាជនទាំង២ និងស្នើសុំឲ្យខិតខំជំរុញទំនាក់ទំនងពាណិជ្ជកម្ម ដើម្បីឈានដល់គោលដៅ ទំហំពាណិជ្ជកម្មទ្វេភាគីឲ្យដល់២០ពាន់លានដុល្លារអាម៉េរិក នៅពេលឆាប់ៗខាងមុខនេះ។ សង្ឃឹមថា ភាគីទាំងពីរនឹងខិតខំសហការគ្នា ដើម្បីពង្រឹងកំណើនសេដ្ឋកិច្ច និងការដោះដូរពាណិជ្ចកម្មតាមព្រំដែនបន្ថែមទៀត ដើម្បីលើកស្ទួយជីវភាពរស់នៅរបស់ប្រជាជននៃប្រទេសទាំងពីរ។ក្នុងន័យនេះ ឯកឧត្តម សន្ដិបណ្ឌិត នេត សាវឿន បានសម្ដែងការគាំទ្រ នៃការលើកឡើងរបស់ឯកឧត្តមអនុរដ្ឋមន្ដ្រី ក្នុងនោះឯកឧត្តមបញ្ជាក់ថា នឹងសម្របសម្រួលដល់ក្រសួងស្ថាប័នពាក់ព័ន្ធ ដើម្បីបង្កើនកិច្ចសហប្រតិបត្តិការតាមព្រំដែន ដើម្បីថែរក្សាសន្តិសុខតាមព្រំដែននៃប្រទេសទាំងពីរ៕ អត្ថបទ៖ វង្ស សុភាព

អគ្គលេខាធិការនៃអង្គការអន្តរជាតិហ្វ្រង់កូហ្វូនី (OIF) នឹងអញ្ជើញមកបំពេញទស្សនកិច្ចការងារនៅកម្ពុជាចាប់ពីថ្ងៃទី១-៤ ខែមីនា

តបតាមការអញ្ជើញរបស់ឯកឧត្តម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និង សហប្រតិបត្តិការអន្តរជាតិ លោកជំទាវ Louise MUSHIKIWABO អគ្គលេខាធិការនៃអង្គការអន្តរជាតិ ហ្វ្រង់កូហ្វូនី (OIF) នឹងអញ្ជើញមកបំពេញទស្សនកិច្ចការងារ នៅព្រះរាជាណាចក្រកម្ពុជា ចាប់ពីថ្ងៃទី១ ដល់ ថ្ងៃទី៤ ខែមីនា ឆ្នាំ២០២៦។ក្នុងឱកាសបំពេញទស្សនកិច្ច លោកជំទាវអគ្គលេខាធិការ នឹងអញ្ជើញជួបសម្តែងការគួរសម សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងឯកឧត្តមកិត្តិសេដ្ឋាបណ្ឌិត ជាម យៀប អនុប្រធានទី១ នៃ រដ្ឋសភា។ លោកជំទាវអគ្គលេខាធិការ ក៏នឹងមានជំនួបទ្វេភាគីជាមួយ ឯកឧត្តមឧបនាយករដ្ឋមន្ត្រី ប្រាក់ សុខុន ដើម្បីពិភាក្សាអំពីវឌ្ឍនភាពនៃការត្រៀមរៀបចំកិច្ចប្រជុំកំពូលហ្វ្រង់កូហ្វូនីលើកទី២០ នៅថ្ងៃទី១៥-១៦ ខែវិច្ឆិកា ឆ្នាំ២០២៦ នៅរាជធានីភ្នំពេញ ដែលជាព្រឹត្តិការណ៍ដ៏មានសារៈសំខាន់សម្រាប់ប្រទេសកម្ពុជា ក៏ដូចជា សម្រាប់សហគមន៍ហ្វ្រង់កូហ្វូនទាំងមូល។ដំណើរទស្សនកិច្ចនាពេលខាងមុខរបស់ លោកជំទាវ Louise MUSHIKIWABO បង្ហាញពីការប្តេជ្ញាចិត្តរួមគ្នារបស់អង្គការ OIF និងព្រះរាជាណាចក្រកម្ពុជា ក្នុងការពង្រឹងភាពជាដៃគូ ឱ្យកាន់តែស៊ីជម្រៅ ព្រមទាំងបង្កើនកិច្ចសហប្រតិបត្តិការឱ្យបានកាន់តែច្រើន ដើម្បីជាប្រយោជន៍ដល់បណ្តាញអ្នកប្រើប្រាស់ភាសា បារាំងនៅក្នុងតំបន់អាស៊ី-ប៉ាស៊ីហ្វិក និងតំបន់ផ្សេងៗទៀត៕ អត្ថបទ៖ វង្ស សុភាព

កម្ពុជាជាប្រទេសដំបូងដែលត្រូវបានទទួលស្គាល់ជាសាកល ចំពោះឧត្តមភាពបរិវត្តកម្មឌីជីថលប្រព័ន្ធគាំពារសង្គម

ទីភ្នាក់ងារគំនិតផ្តួចផ្តើមការបង្រួបបង្រួមឌីជីថលសាកល (Digital Convergence Initiative) ដែលមានប្រទេសជាសមាជិកចំនួនប្រមាណ៣០ បានផ្តល់ពានរង្វាន់ “ការទទួលស្គាល់ជាសាកល – Global Recognition Award” ជូនក្រុមប្រឹក្សាជាតិគាំពារសង្គម តាមរយៈស្ថានទូតអាល្លឺម៉ង់ប្រចាំកម្ពុជា។ នេះបើតាមសេចក្ដីប្រកាសព័ត៌មានរបស់អគ្គលេខាធិការដ្ឋានក្រុមប្រឹក្សាជាតិគាំពារសង្គម។ ពានរង្វាន់កម្រិតសាកលនេះ ត្រូវបានប្រគល់ជូនដោយ លោក ស្តេហ្វាន មេសសេរ័រ ឯកអគ្គរដ្ឋទូតអាល្លឺម៉ង់ប្រចាំកម្ពុជា ដែលបានប្រព្រឹត្តទៅនៅថ្ងៃទី២៧ ខែកុម្ភៈ ឆ្នាំ២០២៦ នៅស្ថានទូតអាល្លឺម៉ង់ប្រចាំកម្ពុជា។ អគ្គលេខាធិការដ្ឋានក្រុមប្រឹក្សាជាតិគាំពារសង្គម បានបញ្ជាក់ថា ពានរង្វាន់នេះ បានធ្វើឱ្យកម្ពុជាក្លាយជាប្រទេសដំបូងគេ ដែលត្រូវបានទទួលស្គាល់ជាសាកល ចំពោះឧត្តមភាពនៃបរិវត្តកម្មឌីជីថលក្នុងប្រព័ន្ធគាំពារសង្គម និងជាប្រទេសលេចធ្លោគំរូមួយសម្រាប់ការកសាង និងអភិវឌ្ឍប្រព័ន្ធគាំពារសង្គម ជាពិសេសឌីជីថលគាំពារសង្គម ស្របតាមស្តង់ដាអន្តរជាតិ ប្រកបដោយប្រសិទ្ធភាព តម្លាភាព និងបរិយាបន្ន។ថ្នាលឌីជីថល DSPP បាន និងកំពុងបំពេញតួនាទីជាមូលដ្ឋានឌីជីថលស្នូលដ៏មានសារៈសំខាន់ សម្រាប់គាំទ្រការអនុវត្តក្របខណ្ឌគោល-នយោបាយជាតិគាំពារសង្គម ២០២៤-២០៣៥ ជាពិសេសបានធ្វើសុខដុមនីយកម្មលើការចុះបញ្ជី និងការបើកផ្តល់អត្ថប្រយោជន៍នៃកម្មវិធីជាតិជំនួយសង្គម និងរបបសន្តិសុខសង្គម លើថ្នាលឌីជីថលរួម។អគ្គលេខាធិការដ្ឋានក្រុមប្រឹក្សាជាតិគាំពារសង្គមថា «ការទទួលបាន “ពានរង្វាន់ទទួលស្គាល់ជាសាកល” លើឧត្តមភាពនៃការធ្វើបរិវត្តកម្មឌីជីថលក្នុងប្រព័ន្ធគាំពារសង្គមនេះ បានឆ្លុះបញ្ចាំងពីការប្តេជ្ញាចិត្តរបស់រាជរដ្ឋាភិបាលកម្ពុជា ក្នុងការធ្វើបរិវត្តកម្មឌីជីថល ក្នុងវិស័យសេវាសាធារណៈ ជាពិសេសក្នុងប្រព័ន្ធគាំពារសង្គម តាមរយៈនវានុវត្តន៍ឌីជីថល ក្នុងគោលដៅពង្រឹងប្រសិទ្ធភាព និងគុណភាពនៃការផ្តល់សេវា និងបង្កើនតម្លាភាពក្នុងសង្គម និងជាសក្ខីភាពបញ្ជាក់ពីកិច្ចខិតខំរបស់រាជរដ្ឋាភិបាល ក្នុងការអភិវឌ្ឍប្រទេស, ការគាំពារប្រជាជន, និងលើកកម្ពស់ផលប្រយោជន៍សាធារណៈយ៉ាងពិតប្រាកដ»។ថ្នាលគាំពារសង្គមឌីជីថលកម្ពុជាដែលអភិវឌ្ឍដោយអគ្គលេខាធិការដ្ឋានក្រុមប្រឹក្សាជាតិគាំពារសង្គម ត្រូវបានដាក់ឱ្យដំណើការជាផ្លូវការ កាលពីថ្ងៃទី០៦ ខែតុលា ឆ្នាំ២០២៥។ ថ្នាលគាំពារសង្គមឌីជីថលកម្ពុជាកន្លងទៅក៏បានឈ្នះពានរង្វាន់មាស នៃពានរង្វាន់ឌីជីថលអាស៊ានឆ្នាំ២០២៦ កាលពីពាក់កណ្ដាលខែមករា ឆ្នាំ២០២៦ផងដែរ៕ អត្ថបទ៖ គឹមហុក

មន្រ្តីជំនាញក្រសួងបរិស្ថាន បាននិងកំពុងត្រួតពិនិត្យគុណភាពបរិស្ថាន របស់រោងចក្រ មួយនៅស្រុកខ្សាច់កណ្តាល ខេត្តកណ្តាល ក្រោយមានកម្មករដួលសន្លប់ និងស្លាប់ចំនួន១នាក់ ពេលបញ្ជូនទៅដល់មន្ទីរពេទ្យ

ក្រសួងបរិស្ថានបានចាត់ឱ្យមន្រ្តីជំនាញ ធ្វើការចុះត្រួតពិនិត្យគុណភាពបរិស្ថាននៅជុំវិញនិងក្នុងបរិវេណរោងចក្រ CAMBO UNISOLL LTD. ដែលមានមូលដ្ឋាននៅស្ថិតនៅភូមិព្រៃចាស់ ឃុំវិហាសួគ៌ ស្រុកខ្សាច់កណ្តាល ខេត្តកណ្តាល។ ការចុះប្រតិបត្តិការនេះធ្វើឡើងបន្ទាប់ពីមាន សេចក្តីរាយការណ៍ពីអាជ្ញាធរ កាលពីព្រឹកថ្ងៃទី២៧ ខែកុម្ភៈ ឆ្នាំ២០២៦ ថាមានករណីកម្មករចំនួន១១នាក់ បានដួលសន្លប់ និងស្លាប់ចំនួន១នាក់ នៅពេលបញ្ជូនទៅដល់មន្ទីរពេទ្យ។សូមបញ្ជាក់ថា ក្រោយពីមានសេចក្តីរាយការណ៍ពីអាជ្ញាធរលើករណីខាងលើ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន បានណែនាំដល់ក្រុមការងារអធិការកិច្ចនៃអគ្គនាយកដ្ឋានគាំពារបរិស្ថាន ក្រសួងបរិស្ថាន ធ្វើការអន្តរាគមន៍ទប់ស្កាត់ការបំពុលបរិស្ថាន ដែលអាចកើតមានឡើងនៅតំបន់រោងចក្រ។ ក្រុមការងារជំនាញក្រសួងបរិស្ថាន បានសហការជាមួយអាជ្ញាធរពាក់ព័ន្ធ បានធ្វើការចុះត្រួតពិនិត្យ គុណភាពខ្យល់ ដោយដាក់ឧបករណ៍វិភាគគុណភាពខ្យល់ នៅក្នុងទីតាំងរោងចក្រផ្ទាល់។ ពេលនេះក្រុមការងារបាននិងកំពុងប្រមូលព័ត៌មានពាក់ព័ន្ធ នៅក្នុងទីតាំងរោងចក្រ ដើម្បីធ្វើវាយតម្លៃរកមូលហេតុប៉ះពាល់ដល់បរិស្ថាន និងសុខភាពរបស់កម្មករ។ អាស្រ័យហេតុនេះសូមសាធារណជនមេត្តាជ្រាបជាព័ត៌មាន។ ក្រសួងបរិស្ថាននឹងជម្រាបជូនព័ត៌មានលម្អិតបន្ថែមទៀត នៅពេលមានការវាយតម្លៃ ឬការរកឃើញករណី បំពុលបរិស្ថានណាមួយកើតឡើងជាយថាហេតុ នៅក្នុងរោងចក្រខាងលើ និងវិធានការច្បាប់ស្របតាមក្រមបរិស្ថាន និងធនធានធម្មជាតិ៕

សណ្តាប់ធ្នាប់នៅក្បែរផ្សារអូឬស្សី មានសោភ័ណភាពល្អប្រសើរ ក្រោយអាជីវកចូលរួមសហការជាមួយអាជ្ញាធរ

ភ្នំពេញ៖ បញ្ហាបរិស្ថានអនាម័យសណ្ដាប់ធ្នាប់សាធារណៈមានសោភ័ណភាពល្អប្រសើរទាល់តែភាគីពាក់ព័ន្ធចូលរួមសហការទាំងអស់គ្នាជាមួយនឹងអាជ្ញាធរដោយពឹងផ្អែកលើអាជ្ញាធរតែមួយផ្នែក មិនអាចឈានទៅដល់ការរៀបចំឲ្យមានភាពល្អល្អប្រសើរបាននោះទេ។ ជាក់ស្ដែងកន្លងមកកំណាត់ផ្លូវលេខ១៦៦ ក្បែរផ្សារអូរឫស្សីសង្កេតឃើញថាបងប្អូនអាជីវករបានតាំងលក់របស់របរ ម្ហូប បន្លែ ត្រីសាច់ លើផ្លូវតែម្ដងបង្ករការកកស្ទះដល់បងប្អូនជាពលរដ្ឋអ្នកធ្វើដំណើរ។នៅរសៀលថ្ងៃទី២៧ ខែកុម្ភៈ ឆ្នាំ២០២៦ គណ:បញ្ជាការឯកភាព ខណ្ឌ៧មករា ដឹកនាំដោយ លោក ថេង សុថុល អភិបាល នៃគណ:អភិបាលខណ្ឌ៧មករា និងមានការចូលរួមពីលោក អភិបាលរង លោកចៅសង្កាត់ និង ក្រុមការងារមូលដ្ឋានសង្កាត់អូរឬស្សីទី២ បានចុះត្រួតពិនិត្យទីតាំង ការរៀបចំសណ្តាប់ធ្នាប់ អោយមានរបៀបរៀបរយ តាមបណ្ដោយផ្លូវ១៦៦ ក្នុងសង្កាត់អូរឫស្សី២ ខណ្ឌ៧មករា សង្កេតឃើញថាបងប្អូនអាជីវករបានចូលរួមសហការជាមួយនឹងអាជ្ញាធរដើម្បីរៀបចំសណ្ដាប់ធ្នាប់នូវកំណាត់ផ្លូវនេះឲ្យមានសោភ័ណភាពល្អប្រសើរ។សូមបញ្ជាក់ថាក្រោយពីបានធ្វើការផ្សព្វផ្សាយ និង កំណត់ទីតាំងលក់ដូរ ជូនបងប្អូនប្រជាពលរដ្ឋដែរបានប្រកបអាជីវកម្មលើកំណាត់ផ្លូវលេខ ១៦៦ អោយមានរបៀបរៀបរយរួចមក ឃើញថាបងប្អូនអាជីវករ បានចូលរួមសហការជាមួយអាជ្ញាធរ និង សម្តែងការសប្បាយរីករាយ និងបានលើកឡើងថា អស់រយះពេលរាប់សិបឆ្នាំហើយ ពីមុនផ្លូវនេះតូចចង្អៀតរកកន្លែងដេីរស្ទេីតែមិនបាន កុំថាឡើយម៉ូតូឡានជិះចូលគឺធ្វើដំណើរមិនបានទាល់តែសោះគឺដោយសារបងប្អូនអាជីវករខ្លះគាត់ដាក់លក់លើផ្លូវតែម្តងដែរបណ្តាលអោយមានការកកស្ទះចេញចូលមិនបាន តែឥឡូវនេះ អាជ្ញាធរខណ្ឌ និងសង្កាត់ បានធ្វើការពន្យល់ណែនាំ និងរៀបចំកំណត់ទីតាំងអោយមានការដាក់លក់ដូរមានរបៀបរៀបរយសណ្តាប់ធ្នាប់ល្អធ្វើអោយមានច្រកផ្លូវចេញចូលបានល្អប្រសើរខ្លាំង និង សំណូមពរអោយការដាក់លក់នៅបន្តរក្សាគម្លាតបែបនេះជារៀងរហូតតែម្តង។អត្ថបទ៖ កុម្ភៈ

សម្ដេចតេជោ ហ៊ុន សែន ជួបពិភាក្សាការងារតាមទូរស័ព្ទជាមួយប្រធានាធិបតីអ៊ុយក្រែន

ភ្នំពេញ៖ នៅរសៀលថ្ងៃទី២៧ ខែកុម្ភៈ ឆ្នាំ២០២៦ នេះ សម្ដេចតេជោ ហ៊ុន សែន ប្រមុខរដ្ឋស្តីទីនៃព្រះរាជាណាចក្រកម្ពុជា បានជួបពិភាក្សាការងារតាមទូរស័ព្ទជាមួយ លោក Volodymyr Zelenskyy ប្រធានាធិបតីអ៊ុយក្រែន។ ឯកឧត្តម ជា ធីរិទ្ធ អ្នកនាំពាក្យសសម្ដេចតេជោ បានឱ្យដឹងថា នៅក្នុងជំនួបនេះ ថ្នាក់ដឹកនាំទាំងពីរបានជម្រាបជូនគ្នាទៅវិញទៅមកអំពីសភាពការណ៍នៃប្រទេសរៀងៗខ្លួន និង ពិភាក្សាអំពីកិច្ចសហប្រតិបត្តិការទ្វេភាគីនៅវិស័យនានាដែលជាផលប្រយោជន៍រួម ជាពិសេសការប្រារព្ធខួបលើកទី៣៥ឆ្នាំនៃការបង្កើតទំនាក់ទំនងការទូតរវាងកម្ពុជា និងអ៊ុយក្រែន (១៩៩២-២០២៧) នៅឆ្នាំក្រោយ៕

អាកាសចរណ៍ស៊ីវិល បានកំណត់ឆ្នាំ២០២៦នេះ ដឹកអ្នកដំណើរតាមផ្លូវអាកាស ឱ្យបានចំនួន៨លាននាក់

ក្នុងពិធីបិទសន្និបាតបូកសរុបលទ្ធផលការងារឆ្នាំ២០២៥ និងលើកទិសដៅការងារឆ្នាំ២០២៦ របស់រដ្ឋលេខាធិការដ្ឋានអាកាសចរណ៍ស៊ីវិល ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានដាក់ផែនការកំណតក្នុងឆ្នាំ២០២៦នេះ ត្រូវដឹកដំណើរតាមផ្លូវអាកាស ឱ្យបានចំនួន៨លាននាក់។ ថ្លែងក្នុងពិធីបិទសន្និបាតប្រចាំឆ្នាំ ឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរណ៍ស៊ីវិល បានមានប្រសាសន៍ថា ក្នុងឆ្នាំ២០២៦នេះ រដ្ឋលេខាធិការដ្ឋានអាកាសចរណ៍ស៊ីវិលបានសម្រេចដាក់ចេញនូវទិសដៅការងារអាទិភាពចំនួន៦០ ដោយក្នុងនោះមាន២០ទិសដៅការងារថ្មី និង៤០ទិសដៅការងារអនុវត្តបន្ត ដើម្បីអនុវត្តឱ្យបានហើយការដឹកជញ្ជូនតាមផ្លូវអាកាស ត្រូវសម្រេចឱ្យបានចំនួន៨លាននាក់ និងដឹកជញ្ជូនទំនិញតាមផ្លូវអាកាសចំនួន១១២ពាន់តោន ជើងហោះហើរចេញ-ចូលជាង៧២ពាន់ជើង ដោយសារមានតម្រូវការពាណិជ្ជកម្ម ទេសចរណ៍ និងការដោះដូរវប្បធម៌ ហើយនឹងនាំមកនូវសុវត្ថិភាពនិងសន្តិសុខអាកាសចរណ៍ស៊ីវិលប្រសើរថែមទៀត ដោយសារមានច្បាប់អាកាសចរណ៍ស៊ីវិលថ្មី និងការកសាងបទប្បញ្ញត្តិថ្មីៗបន្ថែមទៀត និងសមត្ថភាពមន្ត្រីជំនាញទទួលបន្ទុកសុវត្ថិភាពនិងសន្តិសុខ ត្រូវបានពង្រឹងជាបន្តបន្ទាប់។ ជាមួយគ្នានេះឯកឧត្តមបណ្ឌិតរដ្ឋមន្ត្រី បានដាក់ចេញនូវគោលការណ៍ណែនាំបន្ថែមទៀត ដើម្បីទទួលបានលទ្ធការងារកាន់តែប្រសើ ក្នុងនោះត្រូវផ្សព្វផ្សាយច្បាប់អាកាសចរណ៍ថ្មី ចូលជាធរមានរួចហើយ, ត្រូវរៀបចំបទប្បញ្ញត្តិសេដ្ឋកិច្ចដឹកជញ្ជូនតាមផ្លូវអាកាស និងបទប្បញ្ញត្តិធានារ៉ាប់រងដឹកជញ្ជូនតាមផ្លូវអាកាស ដែលជាបន្ទុករបស់អគ្គនាយកដ្ឋានដឹកជញ្ជូនតាមផ្លូវអាកាស បន្ទាប់ច្បាប់អាកាសចរណ៍ថ្មី ចូលជាធរមានរួចហើយ, ត្រូវពិនិត្យកែសម្រួល ឬ ធ្វើថ្មីឡើងវិញបទប្បញ្ញត្តិអាកាសចរណ៍ស៊ីវិល(Cambodia Civil Aviation Regulations) ច្បាប់អាកាសយានគ្មានមនុស្សបើក(Drone Regulation) ត្រូវពង្រឹងនិងបង្កើនប្រសិទ្ធភាពការងារ បង្កើនកិច្ចសហប្រតិបត្តិការផ្ទៃក្នុង ព្រមទាំង ឲ្យបានល្អ, ត្រូវសិក្សានិងរៀបចំផែនទីបង្ហាញផ្លូវ សម្រាប់វិស័យអាកាសចរណ៍ស៊ីវិលប្រកបដោយនិរន្តរភាព(Sustainable Aviation Road Map) ស្របតាមគោលការណ៍អាស៊ាន ជាបន្ទុករបស់អគ្គនាយកដ្ឋានគោលនយោបាយដឹកជញ្ជូនតាមផ្លូវអាកាស ទើបអាចសម្រេចបានតាមផែនការក្នុងឆ្នាំដំណាច់ឆ្នាំ២០២៦នេះ។សូមបញ្ជាក់ថា ក្នុងឆ្នាំ២០២៥កន្លងទៅនេះ អាកាសចរណ៍ស៊ីវិល ទទួលបានលទ្ធផលការងារជាច្រើន ក្នុងនោះបានដឹកជញ្ជូនអ្នកដំណើរតាមផ្លូវអាកាសជិត៧លាននាក់កើន១២% ប្រៀបធៀបឆ្នាំ២០២៤,បានដឹកជញ្ជូនទំនិញតាមផ្លូវជាង៩ម៉ឺនតោនកើន២១% ប្រៀបធៀបឆ្នាំ២០២៤ ហើយមានក្រុមហ៊ុនអាកាសចរណ៍ហោះហើរចេញ-ចូលចំនួន ៣៦ក្រុមហ៊ុន បានភ្ជាប់ជើងហោះហើរទៅកាន់ ៥២ទីក្រុង និង១៨ប្រទេស ហើយបានរកចំណូលជូនរដ្ឋបានជាង១លានដុល្លារសហរដ្ឋអាម៉េរិក ៕ផលិត គង់ រ៉េន

ឯកអគ្គរដ្ឋទូតចិនប្រចាំកម្ពុជា ចូលជួបសួរសុខទុក្ខសម្តេច ហោ ណាំហុង នៅគេហដ្ឋានផ្ទាល់

សម្តេចឥស្សរវិទេសបញ្ញា ហោ ណាំហុង ឧត្តមប្រឹក្សាផ្ទាល់ព្រះមហាក្សត្រ នៅថ្ងៃទី២៧ ខែកុម្ភៈ ឆ្នាំ២០២៦នេះ បានអនុញ្ញាតឲ្យឯកឧត្តម វ៉ាង វិនធាន ឯកអគ្គរដ្ឋទូតចិនប្រចាំកម្ពុជា ចូលជួបសំណេះសំណាល និងសួរសុខទុក្ខ នៅគេហដ្ឋានសម្តេចផ្ទាល់។ នាឱកាសនោះឯកឧត្តម វ៉ាង វិនធាន បានថ្លែងអំណរគុណចំពោះសម្តេចឥស្សរវិទេសបញ្ញា ហោ ណាំហុង ដែលសម្តេចបានចំណាយពេលវេលាដ៏មានតម្លៃអនុញ្ញាតឲ្យឯកឧត្ដម ចូលជួបសំណេះសំណាល និងសួរសុខទុក្ខសម្តេច។ ឯកឧត្តមក៏បាននាំនូវការផ្តាំផ្ញើសាកសួរសុខទុក្ខ និងក្តីនឹករលឹកពីសំណាក់ឯកឧត្តម វ៉ាង យី រដ្ឋមន្ត្រីការបរទេសចិន និងឯកឧត្តម ស៊ី ជិនពីង ប្រធានាធិបតីចិនដល់សម្តេចផងដែរ។ឯកឧត្តមឯកអគ្គរដ្ឋទូតចិនបានជម្រាបជូនថា សម្តេចឥស្សរវិទេសបញ្ញា ហោ ណាំហុង តាមរយៈកិច្ចខិតខំប្រឹងប្រែងរបស់សម្តេច ក្នុងនាមជាអតីតឧបនាយករដ្ឋមន្ត្រី រដ្ឋមន្ត្រីការបរទេសកម្ពុជា និងជាអតីតសហប្រធានគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន គឺជាស្ពានមួយ ដែលរួមចំណែកជួយពួនជ្រុំមិត្តភាពកម្ពុជា និងចិន ឲ្យក្លាយទៅជាមិត្តដែកថែបនៅក្នុងយុគសម័យថ្មី នៅក្នុងក្របខណ្ឌកិច្ចសហប្រតិបត្តិការទ្វេភាគីឆកោណត្បូងពេជ្រ ដូចពេលបច្ចុប្បន្ននេះ។ ជាការឆ្លើយតប សម្តេចឥស្សរវិទេសបញ្ញា ហោ ណាំហុង បានថ្លែងអំណរគុណឯកឧត្តម វ៉ាង វិនធាន ដែលបានឆ្លៀតពេលដ៏មមាញឹក ដើម្បីសួរសុខទុក្ខសម្តេចផ្ទាល់នៅគេហដ្ឋាន។សម្តេចឥស្សរវិទេសបញ្ញា បានលើកឡើងថា សម្តេច និងឯកឧត្តម វ៉ាង យី គឺជាមិត្តភក្តិដ៏ល្អ និងមានអនុស្សាវរីយ៍ល្អៗ ធ្វើការជាមួយគ្នាយ៉ាងជោគជ័យជាច្រើន ដើម្បីពង្រឹងមិត្តភាពកម្ពុជា និងចិន ដែលសម្តេចមិនអាចបំភ្លេចបានឡើយ។ សម្តេចឥស្សរវិទេសបញ្ញា ហោ ណាំហុង បានក្តុកក្តួលយ៉ាងខ្លាំងនៅពេលរំលឹកពីអនុស្សាវរីយ៍ទទួលទានអាហារជាមួយឯកឧត្តម វ៉ាង យី ដោយលោកបានទះស្មាសម្តេច និងនិយាយថា «មិត្តចាស់» ដែលពាក្យនេះ ធ្វើឲ្យសម្តេចចងចាំអស់មួយជីវិត។បន្ថែមលើនេះ សម្តេចឥស្សរវិទេសបញ្ញា ហោ ណាំហុង បានលើកឡើងទៀតថា បើទោះបីជាពិភពលោក មានបម្រែបម្រួលខ្លាំងយ៉ាងណាក៏ដោយក៏កម្ពុជា និងចិននៅតែជាមិត្តដ៏ល្អនឹងគ្នាជានិច្ច។ ជាចុងក្រោយ សម្តេចបានផ្តាំតាមរយៈ ឯកឧត្តម វ៉ាង វិនធាន ឲ្យជួយសួរសុខទុក្ខ ឯកឧត្តម វ៉ាង យី ដែលជាមិត្តល្អរបស់សម្តេចផងដែរ៕

ក្រុមអ្នកនយោបាយសភាស្ត្រីកម្ពុជា ជួបប្រជុំជាមួយ តំណាងអង្គការ UN Women និងUNFPA ប្រចាំកម្ពុជា ដើម្បីពិភាក្សាលម្អិតពីខ្លឹមសារកម្មវិធី «សភាត្រាប់» ដើម្បីពង្រឹងសមត្ថភាពដឹកនាំដល់យុវតី

ភ្នំពេញ៖ ក្រុមសភាជាតិកម្ពុជានៃអ្នកនយោបាយសភាស្ត្រីនារសៀលថ្ងៃទី២៧ ខែកុម្ភៈ ឆ្នាំ២០២៦នេះបានបន្តកិច្ចប្រជុំពិភាក្សាយ៉ាងស៊ីជម្រៅលើខ្លឹមសារឯកសារ ដើម្បីត្រៀមរៀបចំកម្មវិធី “សភាត្រាប់” ក្នុងគោលដៅបណ្តុះបណ្តាល និងជំរុញយុវតីកម្ពុជាឱ្យឈានជើងចូលក្នុងវិស័យនយោបាយ និងភាពជាអ្នកដឹកនាំ។ កិច្ចប្រជុំនេះបានប្រព្រឹត្តទៅ ក្រោមការដឹកនាំរបស់ លោកជំទាវ គ្រួច សំអាន អនុប្រធានគណៈកម្មការ ទី៦ និង លោកជំទាវ សាន្ត អារុណ សមាជិកគណៈកម្មការទី៨ នៃរដ្ឋសភា ដោយមានការចូលរួមពីតំណាងអង្គការ UN Women និង UNFPA ប្រចាំកម្ពុជា។កម្មវិធី “សភាត្រាប់” ដែលគ្រោងនឹងអនុវត្តនាពេលខាងមុខនេះ គឺជាកម្មវិធីសាកល្បងលើកទី១ ដែលនឹងផ្តល់ឱកាសឱ្យស្ត្រីវ័យក្មេងមកពីសាកលវិទ្យាល័យនានា បានមកកាន់វិមានរដ្ឋសភា ដើម្បីសិក្សាពីបទពិសោធន៍ជាក់ស្តែង។ យុវតីដែលចូលរួមនឹងមានឱកាសសិក្សាផ្ទាល់ពីតួនាទីរបស់សមាជិកសភាស្ត្រី និងសមាជិកសភាវ័យក្មេងក្នុងការបំពេញភារកិច្ចស្នូលសំខាន់ៗមួយចំនួនរួមមាន៖ ការធ្វើច្បាប់ ការធ្វើជាតំណាងឱ្យពលរដ្ឋ និងការតាមដានការអនុវត្តច្បាប់ ក៍ដូចជាមុខងារការទូតសភាជាដើម។គួររំលឹកផងដែរថា ចាប់ពីឆ្នាំ២០១៩ ដល់ឆ្នាំ២០២២ ក្រុមអ្នកនយោបាយសភាស្ត្រីកម្ពុជា បានសម្រេចជោគជ័យគួរអោយកត់សំគាល់ក្នុងយុទ្ធនាការ girl2leader នៅទូទាំងប្រទេស ដើម្បីលើកទឹកចិត្តឱ្យក្មេងស្រីហ៊ានសុបិន្តក្លាយជាអ្នកដឹកនាំ។ ដោយឡែក កម្មវិធី “សភាត្រាប់” គឺជាការវិវត្តទៅមុខមួយកម្រិតទៀតដែលប្តូរពីការចែករំលែកបទពិសោធន៍មកជាការផ្តល់បទពិសោធន៍ជាក់ស្តែងក្នុងបរិយាកាសសភាពិតៗ។កម្មវិធី “សភាត្រាប់” គឺជាគំនិតផ្តួចផ្តើមដ៏មានសារៈសំខាន់ ទទួលបានការគាំទ្រផ្នែកថវិកា និងបច្ចេកទេសពីអង្គការ UN Women និងមូលនិធិសហប្រជាជាតិសម្រាប់ប្រជាជន (UNFPA)។ លោកស្រី Sandra Bernklau តំណាងអង្គការដៃគូ បានចូលរួមផ្តល់យោបល់យ៉ាងសកម្ម ដើម្បីធានាថាឯកសារត្រៀមរៀបចំកម្មវិធីនេះ មានភាពគ្រប់ជ្រុងជ្រោយ និងឆ្លើយតបទៅនឹងតម្រូវការជាក់ស្តែងរបស់យុវជន។ក្រុមសភាជាតិកម្ពុជានៃអ្នកនយោបាយសភាស្ត្រី រំពឹងយ៉ាងមុតមាំថា កម្មវិធី “សភាត្រាប់” នឹងក្លាយជាវេទិកាគន្លឹះក្នុងការកសាងយុវជនជំនាន់ក្រោយ ជាពិសេសស្ត្រីវ័យក្មេង ឱ្យកាន់តែមានទំនុកចិត្ត និងមានចំណេះដឹងទូលំទូលាយ ក្នុងវិស័យនយោបាយ និងការអភិវឌ្ឍជាតិប្រកបដោយចីរភាព៕

បណ្ដាញសង្គម

ព័ត៌មានថ្មីៗ

ការងារជោគជ័យអាស្រ័យមន្រ្តីមាន «សុខភាពល្អ»

ឯកឧត្តម ចាយ បូរិន អញ្ជើញចុះសួរសុខទុក្ខនិងនាំយកអំណោយដ៏ថ្លៃថ្លារបស់ សម្តេចមហាបរធិបតី ហ៊ុន ម៉ាណែត និង លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត ជូនឯកឧត្តម កង ណម នៅគេហដ្ឋាន

ការនាំចេញប្រេងឆៅ និងផលិតផលប្រេងរបស់សហរដ្ឋអាមេរិកបានឈានដល់កម្រិតខ្ពស់បំផុតមិនធ្លាប់មាន

អ៊ីរ៉ង់និយាយថាខ្លួន បានត្រៀមរួចរាល់ហើយដើម្បីទប់ទល់នឹងការគំរាមកំហែងគ្រប់បែបយ៉ាង

មនុស្ស១៤ នាក់បានស្លាប់ក្នុងការបំផ្ទុះគ្រាប់បែកនៅភាគនិរតីរបស់ប្រទេសកូឡុំប៊ី

អតីតសកម្មជនបក្សប្រឆាំងជាច្រើននាក់ទៀត នៅស្រុកត្រាំកក់ សម្រេចចូលរួមជីវភាពនយោបាយ ជាមួយគណប្រជាជនកម្ពុជា

អាជ្ញាធរខេត្តប៉ៃលិន បន្តចុះត្រួតពិនិត្យជនបរទេសដែលលួចចូលមករស់នៅខុសច្បាប់ ក្នុងខេត្ត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877