BTV NEWS

សម្ដេចធិបតី៖ ទំនាក់ទំនងពិសេសជិតស្និទ្ធកម្ពុជា-ចិន គឺជាដៃគូវិនិយោគ និងយុទ្ធសាស្រ្ដដ៏ធំបំផុតនៅកម្ពុជា

ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ បើកកិច្ចប្រជុំកំពូលសេដ្ឋកិច្ច និងបច្ចេកវិទ្យាចិនសកល ឆ្នាំ២០២៤ (GCET Summit 2024) នៅព្រឹកថ្ងៃទី២៦ ខែវិច្ឆិកា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់ថា ទំនាក់ទំនងពិសេសជិតស្និទ្ធកម្ពុជា-ចិន គឺជាដៃគូវិនិយោគ និងយុទ្ធសាស្រ្ដដ៏ធំបំផុតនៅកម្ពុជា។ សម្ដេចធិបតី នាយករដ្ឋមន្រ្ដីមានប្រសាសន៍ថា ឆ្នាំ ២០២៤នេះ គឺជាខួប ៧៥ នៃការបង្កើតសាធារណរដ្ឋប្រជាមានិតចិន ហើយប្រទេសចិនបានព្យាករណ៍ថា ការអភវឌ្ឍគុណភាពខ្ពស់របស់ចិនរយៈពេលមធ្យមទៅវែងនឹងជំរុញដោយកម្លាំងផលិតភាពថ្មី ដូចជា បញ្ញាសិប្បនិម្មិត ឬ AI, សេដ្ឋកិច្ចឌីជីថល, មនុស្សយន្ត វត្ថុធាតុដើមផលិតថ្មី និងឧស្សាហកម្មនវានុវត្តន៍ផ្សេងៗទៀត។ សម្ដេចធិបតី បញ្ជាក់ថា ប្រទេសចិន គឺជាអ្នកដឹកនាំកំណើនសេដ្ឋកិច្ចដ៏សំខាន់របស់ពិភពលោក ដូច្នេះនៅពេលដែលចិនផ្ដោតលើកការអភិវឌ្ឍប្រកបដោយគុណភាពខ្ពស់ សម្ដេចជឿជាក់ថា តំបន់ទាំងមូលពិតជាទទួលបានផលប្រយោជន៍ពីការតម្រង់ទិសគោលនយោបាយបែបនេះពីប្រទេសចិនផងដែរ។ ក្នុងឱកាសនោះសម្ដេចធិបតី បានបញ្ជាក់ថា ជាក់ស្ដែងតាមរយៈគំនិតផ្ដួចផ្ដើមខ្សែក្រវាត់ និងផ្លូវ និងទំនាក់ទំនងទ្វេភាគីរវាងកម្ពុជា-ចិន ធ្វើឱ្យចិនបាននាំមុខគេក្នុងការនាំយកភាពជឿនលឿនផ្នែកបច្ចេកវិទ្យាមកកម្ពុជា។ ចំណែកទំនាក់ទំនងវប្បធម៌ដ៏ជ្រៅកម្ពុជា-ចិន រួមផ្សំជាមួយនឹងទំនាក់ទំនងអន្តររដ្ឋាភិបាលដ៏រឹងមាំ បានបង្កើតបរិយាកាសអំណោយផលពិសេសមួយ សម្រាប់ការរីកចម្រើនរបស់វិនិយោគចិន តាមរយៈការប្រមូលផ្ដុំសហគមន៍ធុរកិច្ចចិនមកពីទូទាំងពិភពលោកផងដែរ៕អត្ថបទ៖ វ៉ន ដារ៉ា

កម្ពុជា ឡាវ វៀតណាម នឹងបន្តពង្រឹង និងពង្រីកកិច្ចសហប្រតិបត្តិការលើវិស័យការពារជាតិ

នាព្រឹកថ្ងៃទី២៦ ខែវិច្ឆិកា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឱ្យ ឯកឧត្តមនាយឧត្តមសេនីយ៍ ចាន់សាម៉ាន ចាន់យ៉ាឡាត់ (Chansamone Chanyalath) ឧបនាយករដ្ឋមន្ត្រី រដ្ឋមន្ត្រីក្រសួងការពារប្រទេសនៃសាធារណរដ្ឋប្រជាធិបតេយ្យប្រជាមានិតឡាវ និងឯកឧត្តម នាយឧត្តមសេនីយ៍ ហ្វាន វ៉ាន់ហ្សាង (Phan Van Giang) រដ្ឋមន្ត្រីក្រសួងការពារប្រទេសនៃសាធារណរដ្ឋសង្គមនិយមវៀតណាម ចូលជួបសម្ដែងការគួរសម និងពិភាក្សាការងារនៅវិមានសន្ដិភាព។ ក្នុងឱកាសនៃជំនួប ឯកឧត្តមរដ្ឋមន្ត្រីការពារប្រទេស ឡាវ និង វៀតណាម បានគោរពជម្រាបជូនសម្ដេចបវរធិបតី អំពីលទ្ធផលប្រកបដោយផ្លែផ្កានៃកិច្ចប្រជុំរដ្ឋមន្ត្រីការពារជាតិ កម្ពុជា ឡាវ និង វៀតណាម ក៏ដូចជាជោគជ័យនៃលំហាត់ហ្វឹកហ្វឺនរួមគ្នា ក្រោមប្រធានបទ «ប្រតិបត្តិការជួយសង្គ្រោះគ្រោះមហន្តរាយ បាក់រលំអគារ» ដែលកម្ពុជាធ្វើជាម្ចាស់ផ្ទះ នៅឆ្នាំ២០២៤ ផងដែរ។ ការណ៍នេះបានបង្ហាញពីទំនាក់ទំនង និង កិច្ចសហប្រតិបត្តិការល្អរវាងក្រសួងការពារជាតិនៃប្រទេសទាំងបី។ នាខណៈស្នាក់នៅក្នុងព្រះរាជាណាចក្រកម្ពុជា គណៈប្រតិភូនៃក្រសួងការពារប្រទេសឡាវ និង វៀតណាម បានធ្វើទស្សនកិច្ចទៅកាន់វិមានឈ្នះ ឈ្នះ ដែលជានិមិត្តរូបនៃការផ្សះផ្សាជាតិ, ការបិទបញ្ចប់នូវភ្លើងសង្គ្រាមស៊ីវិល និងការនាំមកនូវសុខសន្តិភាពពេញលេញ នៅកម្ពុជា។ ឯកឧត្តមរដ្ឋមន្ត្រីការពារប្រទេស ឡាវ និង វៀតណាម បានបង្ហាញពីការប្ដេជ្ញាចិត្តក្នុងការបន្តពង្រឹង និង ពង្រីកកិច្ចសហប្រតិបត្តិការ ឱ្យកាន់តែជិតស្និទ្ធបន្ថែមទៀត ជាមួយក្រសួងការពារជាតិកម្ពុជា តាមរយៈការបន្តធ្វើលំហាត់ហ្វឹកហ្វឺនរួមគ្នាដើម្បីសង្គ្រោះគ្រោះមហន្តរាយ, ការរៀបចំកិច្ចប្រជុំប្រចាំឆ្នាំរវាងក្រសួងការពារជាតិ នៃប្រទេសទាំងបី, ការផ្លាស់ប្ដូរទស្សនកិច្ចគ្រប់លំដាប់ថ្នាក់ រួមទាំងទស្សនកិច្ចសិក្សា ជាដើម។ជាការឆ្លើយតប សម្ដេចបវរធិបតីបានសម្ដែងនូវការរីករាយ ចំពោះវឌ្ឍនភាពនៃទំនាក់ទំនង និង កិច្ចសហប្រតិបត្តិការ រវាងក្រសួងការពារជាតិនៃប្រទេសទាំងបី និងបានអបអរសាទរចំពោះជោគជ័យនៃការរៀបចំលំហាត់ហ្វឹកហ្វឺនរួមគ្នាដើម្បីជួយសង្គ្រោះគ្រោះមហន្តរាយ ដែលកម្ពុជាធ្វើជាម្ចាស់ផ្ទះ នៅឆ្នាំ២០២៤។ សម្ដេចបវរធិបតីបានគូសបញ្ជាក់ថា កម្ពុជា ឡាវ និង វៀតណាម នៅមានសក្ដានុពលជាច្រើនទៀតដែលអាចពង្រឹង និងពង្រីកកិច្ចសហប្រតិបត្តិការ ជាពិសេសលើវិស័យវិនិយោគ និង ពាណិជ្ជកម្ម, ការតភ្ជាប់ហេដ្ឋារចនាសម្ព័ន្ធ, ទេសចរណ៍ និងសន្ដិសុខ ដោយផ្ដោតលើការប្រយុទ្ធប្រឆាំងបទល្មើសឆ្លងដែន ដូចជាការជួញដូរមនុស្ស និង គ្រឿងញៀន ជាដើម។ សម្ដេចបវរធិបតីបានលើកទឹកចិត្តដល់ក្រសួងការពារជាតិនៃប្រទេសទាំងបី បន្តពង្រឹង និងពង្រីកកិច្ចសហប្រតិបត្តិការជាមួយគ្នាឱ្យកាន់តែរីកចម្រើនបន្ថែមទៀត៕

សម្ដេចធិបតី៖ កម្ពុជាមានសេដ្ឋកិច្ចបើកចំហ និងសេរីបំផុតនៅអាស៊ី អំណោយផលដល់ការវិនិយោគ

ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ បើកកិច្ចប្រជុំកំពូលសេដ្ឋកិច្ច និងបច្ចេកវិទ្យាចិនសកល ឆ្នាំ២០២៤ (GCET Summit 2024) នៅព្រឹកថ្ងៃទី២៦ ខែវិច្ឆិកា ឆ្នាំ២០២៤នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានបញ្ជាក់សារជាថ្មីថា ប្រទេសកម្ពុជា គឺជាប្រទេសដែលមានសេដ្ឋកិច្ចបើកចំហ និងសេរីបំផុតនៅអាស៊ី ដែលអំណោយផលដល់ការវិនិយោគ។សម្ដេចធិបតីនាយករដ្ឋមន្រ្ដីមានប្រសាសន៍ថា ប្រទេសកម្ពុជាមានទីតាំងឋិតនៅចំកណ្ដាលនៃតំបន់អាស៊ីអាគ្នេយ៍ ដែលជាទីតាំងយុទ្ធសាស្រ្ដក្នុងការវិនិយោគ ដោយមានភាពងាយស្រួលក្នុងការតភ្ជាប់ទៅក្នុងតំបន់អាស៊ី និងអនុតំបន់មេគង្គ ដូច្នេះការជ្រើសរើសកម្ពុជាក្នុងការវិនិយោគ គឺជាការជ្រើសរើសការកាត់បន្ថយការចំណាយ និងបង្កើនល្បឿននៃការដឹកជញ្ជូន។សូមជម្រាបថា រាជដ្ឋាភិបាលអាណត្តិទី៧នេះ ក្រោមការដឹកនាំដោយសម្ដេចធិបតី ហ៊ុន ម៉ាណែត បានដាក់យុទ្ធសាស្រ្ដទាក់ទាញវិនិយោគិនមកវិនិយោគនៅកម្ពុជា (ទាក់ម៉ូយ) គឺអញ្ជើញអ្នកវិនិយោគមកដាក់ទុន ជាអាទិភាពមុតស្រួចនៃនយោនាយការទូតក្នុងអាណត្តិថ្មីនេះ៕ អត្ថបទ៖វ៉ន ដារ៉ា

សម្ដេចធិបតី អំពាវនាវដល់អ្នកវិនិយោគចូលរួមសរសេរជំពូកអច្ឆរិយភាពសេដ្ឋកិច្ច តំបន់អាស៊ីនៅកម្ពុជា

ក្នុងឱកាសអញ្ជើញជាអធិបតីភាពដ៏ខ្ពង់ខ្ពស់ បើកកិច្ចប្រជុំកំពូលសេដ្ឋកិច្ច និងបច្ចេកវិទ្យាចិនសកល ឆ្នាំ២០២៤ (GCET Summit 2024) នៅព្រឹកថ្ងៃទី២៦ ខែវិច្ឆិកា ឆ្នាំ២០២៤នេះដែរ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានអំពាវនាវដល់អ្នកវិនិយោគចូលរួមសរសេរជំពូកអច្ឆរិយភាពសេដ្ឋកិច្ចតំបន់អាស៊ីនៅកម្ពុជា តាមរយៈការចូលរួមមកវិនិយោគនៅកម្ពុជា។សម្ដេចធិបតីនាយករដ្ឋមន្រ្ដីបញ្ជាក់ថា ប្រទេសកម្ពុជា ជាប្រទេសមួយដែលមានប្រជាជនក្មេងច្រើនជាងគេនៅអាស៊ី ដោយ ២ភាគ៣ នៃប្រជាជនមានអាយុក្រោម ៣៥ ឆ្នាំ ជាមួយគ្នានេះ កម្ពុជា ក៏មានប្រជាជនរាប់លាននាក់ មានគំនិតភ្លឺស្វាង មានគំនិតច្នៃប្រឌិតខ្ពស់។ ជាមួយគ្នានេះ រាជរដ្ឋាភិបាលកំពុងអនុវត្តកម្មវិធីបង្កើនមូលធនមនុស្សតាមរយៈការបណ្ដុះបណ្ដាលបច្ចេកទេស និងវិជ្ជាជីវៈគ្រប់ជ្រុងជ្រោយដល់យុវជនចំនួន ១,៥ លាននាក់។ ចំណែកសិស្ស និស្សិតរបស់កម្ពុជាជាច្រើន ក៏ជាធនធានសំខាន់កំពុងទទួលបានការចាប់អារម្មណ៍ និងទទួលបានពានរង្វាន់ជាបន្តបន្ទាប់លើការប្រកួតប្រជែងផ្នែកបច្ចេកវិទ្យា និងឌីជីថលផងដែរ។ សម្ដេចធិបតីបញ្ជាក់ថា ធនធានមនុស្សរបស់កម្ពុជាទាំងនេះ គឺជាកម្លាំងចលករ ក្នុងការបង្កើតនូវភាពជោគជ័យលើអាជីវកម្ម ផ្ដល់នូវទស្សនថ្មីៗដល់អាជីវកម្ម និងអ្នកធុរកិច្ចដែលមកវិនិយោគនៅកម្ពុជា។ តាមរយៈនេះសម្ដេចធិបតីបានអំពាវនាវដ៏បណ្ដាវិនិយោគិនចូលរួមវិនិយោគនៅកម្ពុជាដើម្បីចូលរួមសរសេរជំពូកបន្ទាប់នៃអច្ឆរិយភាពសេដ្ឋកិច្ចរបស់តំបន់អាស៊ីនៅក្នុងប្រទេសកម្ពុជា ដោយរួមគ្នាកសាងអនាគតប្រកបដោយនិរន្តរភាព និងវិបុលភាពសម្រាប់ទាំងអស់គ្នា។ សូមជម្រាបថា តាមលទ្ធផលនៃការវាយតម្លៃលើស្ថានភាពម៉ាក្រូសេដ្ឋកិច្ចកម្ពុជា ក្នុងឆ្នាំ២០២៤នេះ កម្ពុជាមានកំណើនប្រមាណ ៥.៥% ដែលគាំទ្រដោយការងើបឡើងវិញលឿនជាងការរំពឹងទុកនៃវិស័យកាត់ដេរ និងវិស័យដឹកជញ្ជូន និងការបន្តចលនាការ (កម្រើកឡើងវិញ) នៃវិស័យទេសចរណ៍ និងវិស័យកសិកម្ម ខណៈដែលវិស័យសំណង់-អចលនទ្រព្យនៅបន្តកំណើនទាប។ ទោះបីកំណើនសេដ្ឋកិច្ចឆ្នាំ២០២៤នេះ ទាបជាងការរំពឹងទុកពីដើមឆ្នាំក្តី ក៏កំណើននេះជាកំណើនមួយខ្ពស់ក្នុងតំបន់ និងសកល និងនៅតែល្អជាងឆ្នាំ ២០២៣ កន្លងទៅ។ សម្រាប់ឆ្នាំ២០២៥ សេដ្ឋកិច្ចកម្ពុជា រំពឹងថានឹងមានកំណើនក្នុងរង្វង់ ៥.៧៥% ដែលបន្តគាំទ្រដោយវិស័យបម្រើដល់ការនាំចេញ និងការបន្តរក្សាបានកំណើនល្អនៃវិស័យទេសចរណ៍ និងកសិកម្ម៕អត្ថបទ៖ វ៉ន ដារ៉ា

សម្តេចធិបតី៖ រាជរដ្ឋាភិបាលអាណត្តិទី៧ ជាអាណត្តិនៃការទាក់ទាញបច្ចេកវិទ្យា និងធនធានមនុស្សដែលមានជំនាញ

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានសំដែងនូវមោទភាពចំពោះការរីកចម្រើនគួរ ឱ្យកត់សម្គាល់ជាច្រើនវិស័យនៃប្រទេសកម្ពុជា ហើយសម្តេចបានបញ្ជាក់ថា សម្រាប់អាណត្តិទី៧នេះ សម្តេចបានដាក់ ចេញនូវគោលនយោបាយជាសំខាន់ក្នុងការទាក់ទាញបច្ចេកវិទ្យា និងធនធានមនុស្សដែលមានជំនាញច្បាស់លាស់ ។សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា ខណៈអញ្ជើញជាអធិបតីបើកកិច្ចប្រជុំកំពូល ស្តីពីសេដ្ឋកិច្ច និងបច្ចេកវិទ្យាចិនសកល នាព្រឹកថ្ងៃទី២៦ ខែវិច្ឆិកា នេះ ដែលវិទ្យាស្ថានយុទ្ធសាស្ត្រសម្រាប់តំបន់អាស៊ី-ប៉ាស៊ីហ្វិក សហ ការជាមួយស្ថាប័ន និងអង្គការដទៃទៀតរបស់ចិនរៀបចំឡើង បានថ្លែងថា រាជរដ្ឋាភិបាលកម្ពុជា ជាមួយនឹងការដាក់ចេញ នូវគោលនយោបាយថ្មីៗ សម្រាប់ការប្រកួតប្រជែងក្នុងយុគ្គសម័យឌីជីថល ដោយបានសម្រួលដល់ដំណើរការអនុម័តការ វិនិយោគ បានបង្កើតយន្តការកម្រិតខ្ពស់សម្រាប់អាជីវកម្ម ដូចជាគណៈកម្មាធិការផ្តល់យោបល់លើគោលយោបាយពាណិជ្ជកម្ម ដែលធ្វើការជាអ្នកគិតគូរផ្នែកយុទ្ធសាស្ត្រដល់រដ្ឋាភិបាល តាមដាននិន្នាការសកល និងគោលនយោបាយ ដែល មានភាពប្រកួតប្រជែង និងគណៈកម្មាធិការជំរុញដោះស្រាយវិវាទវិស័យឯកជន ដែលដោះស្រាយបញ្ហាបានយ៉ាងឆាប់ រហ័យ ដែលរាជរដ្ឋាភិបាល ឈរនៅខាងអ្នកធុរកិច្ចជានិច្ច ។ជាទីបញ្ចប់សម្តេចធិបតី បានលើកទឹកចិត្តឱ្យមានការរួមគ្នាកសាងអនាគតប្រកបដោយនិរន្តរភាព វិបុលភាព បន្ថែមសម្រាប់យើងទាំងអស់គ្នា ។គួរបញ្ជាក់ថា ចិន និង អាស៊ាន អាចពង្រឹងកិច្ចសហប្រតិបត្តិការ រួមទាំងការជំរុញបច្ចេកវិទ្យាបៃតង គម្រោងថាម ពលកកើតឡើងវិញ និងការអភិវឌ្ឍទីក្រុងប្រកបដោយនិរន្តរភាព ក៏ដូចជាការពង្រឹងហេដ្ឋារចនាសម្ព័ន្ធឌីជីថល និងការច្នៃ ប្រឌិត។ តាមរយៈការវិនិយោគយុទ្ធសាស្ត្រ ការផ្ទេរបច្ចេកវិទ្យា និងការតម្រឹមគោលនយោបាយ ភាពជាដៃគូចិន-អាស៊ាន អាចបង្កើតក្របខ័ណ្ឌដ៏រឹងមាំដែលជំរុញកំណើនប្រកបដោយបរិយាប័ន្ន កាត់បន្ថយភាពខុសគ្នានៃសេដ្ឋកិច្ច និងគាំទ្រដល់ គោលដៅរបស់អាស៊ានសម្រាប់អនាគតប្រកបដោយចីរភាព ៕អត្ថបទ៖ មុត សុទ្ធ

សម្តេចធិបតី៖ សន្តិភាព គឺជាទំនិញដ៏រឹងមាំបំផុតសម្រាប់ទាក់ទាញអ្នកវិនិយោគបរទេសបន្ថែមទៀតមកកម្ពុជា

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានថ្លែងថា កត្តាសុខសន្តិភាព គឺជាទំនិញដ៏ មានតម្លៃបំផុតសម្រាប់ការទាក់ទាញការវិនិយោគពីបរទេសមកក្នុងប្រទេសកម្ពុជា ឱ្យកាន់តែច្រើនឡើងបន្ថែម ទៀត ដូច្នេះហើយបានជារាជរាជរដ្ឋាភិបាល ចាំបាច់ត្រូវតែថែរក្សា និងការពារនូវសុខសន្តិភាពនេះឱ្យខាងតែបាន។សម្តេចធិបតី ហ៊ុន ម៉ាណែត នាយករដ្ឋមន្រ្តី នៅក្នុងឱកាសអញ្ជើញជាអធិបតីបើកកិច្ចប្រជុំកំពូលសេដ្ឋកិច្ច និងបច្ចេកវិទ្យាចិនសកល ឆ្នាំ២០២៤ (GCET Summit 2024) នាព្រឹកថ្ងៃទី២៦ ខែវិច្ឆិកា បានរំលឹកថា សន្តិភាព ស្ថិរភាពរបស់កម្ពុជា គឺជាទីតាំងយុទ្ធសាស្រ្តអាស៊ី និងគោលនយោបាយដែលគាំទ្រ និងសម្រួលសេដ្ឋកិច្ចរបស់ កម្ពុជាដែលបានផ្តល់ជាជម្រើសឥតខ្ជោះសម្រាប់ការវិនិយោគពីសំណាក់បរទេសមកលើប្រទេសកម្ពុជា ។សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៃកម្ពុជា បានបញ្ជាក់បន្ថែមថា កម្ពុជា បានចំណាយ ពេលជាច្រើនឆ្នាំដើម្បីស្វែងរកស្ថិរភាព សន្តិភាព ខណៈប្រទេសខ្លះបានត្រឹមតែប៉ងប្រាថ្នាប៉ុណ្ណោះ សម្រាប់ពាក្យ សន្តិភាពនេះ។ មិនមែនគ្រប់ប្រទេសទាំងអស់ទេ ដែលទទួលបាននូវសុខសន្តិភាព ខណៈពាក្យថាសន្តិភាពនេះ គឺ ជាទំនិញដ៏កម្រ ហើយមិនចេះតែកើតមានទេ ប្រសិនគ្មានការប្តេជ្ញាចិត្ត និងយកចិត្តទុកដាក់ទេនោះ ៕អត្ថបទ៖ ចក់

ត្រឹមឆ្នាំ២០២៤ រដ្ឋកាត់ដីតំបន់៣ ជាង៨ម៉ឺនហិកតា ចែកពលរដ្ឋជិត៤ម៉ឺនគ្រួសារ ខណៈការកាត់ឆ្វៀលបានបិទបញ្ចប់

គិតត្រឹមឆ្នាំ២០២៤នេះ រាជរដ្ឋាភិបាលកម្ពុជា តាមរយៈក្រសួងស្ថាប័នពាក់ព័ន្ធនានា បានកាត់ឆ្វៀលដីតំបន់៣ ដែលស្ថិតនៅជុំវិញបឹងទន្លេសាប ប្រមាណជាង ៨ម៉ឺនហិកតា ដើម្បីចែកជូនប្រជាពលរដ្ឋជិត ៤ម៉ឺនគ្រួសារ សម្រាប់អាស្រ័យផល និងដាំដំណាំកសិកម្មផ្សេងៗ ហើយក៏បានបិទបញ្ចប់ការកាត់ឆ្វៀលបន្ថែមផងដែរ ។យោងតាមរបាយការណ៍លទ្ធផលការងារឆ្នាំ២០២៤ និងលើកទិសដៅអនុវត្តការងារបន្តឆ្នាំ២០២៥ របស់ក្រសួងរៀបចំដែនដី នគរូបនីយកម្ម និងសំណង់ បានឲ្យដឹងថា គិតពីចាប់ផ្ដើមអនុវត្តដល់ឆ្នាំ២០២៤ តាមរយៈការអនុវត្តវិធានការទប់ស្កាត់ការទន្ទ្រានដីរដ្ឋ ក្នុងដែនព្រៃលិចទឹកតំបន់ទន្លេសាប នៃខេត្តកំពង់ឆ្នាំង ខេត្តពោធិ៍សាត់ ខេត្តបាត់ដំបង ខេត្តបន្ទាយមានជ័យ ខេត្តសៀមរាប និងខេត្តកំពង់ធំ រាជរដ្ឋាភិបាលសម្រេចកែសម្រួលផ្ទៃដីទំហំចំនួនប្រមាសណ ២ ៩៨៨ហិកតា ចេញពីដីតំបន់៣បញ្ចូលមកក្នុងតំបន់១ និងផ្ដល់ជាកម្មសិទ្ធិជូនប្រជាពលរដ្ឋចំនួន ៩ ៦៣៩គ្រួសារ ។កែសម្រួលផ្ទៃដីទំហំចំនួន ៨៤ ៩៦៧ហិកតា ចេញពីតំបន់២ បញ្ចូលមកតំបន់១ និងផ្ដល់កម្មសិទ្ធិជូនប្រជាពលរដ្ឋចំនួន ៥៤ ៨៧៥គ្រួសារ, បានកែសម្រួលផ្ទៃដីទំហំចំនួន ៧៩ ១២៦ហិកតា ចេញពីតំបន់៣ ទៅជាតំបន់២ និងផ្ដល់សិទ្ធិកាន់កាប់ និងអាស្រ័យផលជូនប្រជាពលរដ្ឋចំនួន ២៨ ០៧៥គ្រួសារ និងកំណត់ផ្ទៃដីទំហំ ៣៨២ ៨៦៣ហិកតា ដែលសល់ពីការកែសម្រួលទុកជាតំបន់៣ នៃតំបន់បឹងទន្លេសាប ។ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា ការកំណត់ និងគ្រប់គ្រងតំបន់ទន្លេសាប ក្រសួងរៀបចំដែនដី បានទទួលភារកិច្ចពីរាជរដ្ឋាភិបាលកម្ពុជា ដឹកនាំគណៈកម្មការចំពោះកិច្ច ធ្វើការចុះបញ្ជីដីតំបន់ទន្លេសាបទាំងដីរដ្ឋ និងដីឯកជនរបស់ពលរដ្ឋ ដើម្បីថែរក្សាព្រៃលិចទឹកក៏ដូចជាបឹងទន្លេសាបទាំងមូលឱ្យគង់វង្ស។គួរបញ្ជាក់ថា លទ្ធផលការចុះបញ្ជីដីតំបន់ទន្លេសាបសម្រេចបាន គឺដីតំបន់៣ ជាតំបន់ព្រៃលិចទឹកដែលត្រូវការពារ ហាមប៉ះពាល់ដាច់ខាត (ដីរដ្ឋ) បានចុះបញ្ជីដីតំបន់៣ ជាដីរដ្ឋរួចរាល់ជាស្ថាពរ សម្រាប់ខេត្តកំពង់ឆ្នាំង និងខេត្តបន្ទាយមានជ័យ, ដីតំបន់២ ជាតំបន់វាលទំនាបលិចទឹកក្នុងរដូវវស្សា ដែលតំបន់នេះអាចផ្ដល់ត្រឹមជាសិទ្ធិប្រើប្រាស់ និងអាស្រ័យផលជូនប្រជាពលរដ្ឋ ដែលបានបង្កបង្កើនផលជាលក្ខណៈគ្រួសារ (ដីរដ្ឋ) បានវាស់វែងដីដែលប្រជាពលរដ្ឋប្រើប្រាស់ និងអាស្រ័យផលក្នុងតំបន់២ បានជាង ១៦ ម៉ឺនក្បាលដី ស្មើនឹង ៨០ភាគរយ នៃក្បាលដីប៉ាន់ស្មានប្រមាណ ២០ ម៉ឺនក្បាលដី ។ចំណែកដីតំបន់១ ជាតំបន់ភូមិដ្ឋានរបស់ប្រជាពលរដ្ឋអាចផ្ដល់ជាកម្មសិទ្ធិ (កម្មសិទ្ធិឯកជន) បានវាស់វែងរួចចំនួន ៧៦ម៉ឺនក្បាលដី ស្មើនឹង ៨៨ភាគរយ នៃក្បាលដីប៉ាន់ស្មានប្រមាណ ៨៦ម៉ឺនក្បាលដី និងបានចេញបណ្ណរួចចំនួន ៥៨ម៉ឺនក្បាល ដីជូនប្រជាពលរដ្ឋ ។ សម្រាប់ទិសដៅបន្ត ក្រុមការងារក្រសួង នឹងបន្តវាស់វែងបញ្ចប់ក្បាលដីក្នុងតំបន់ទន្លេសាប នៅឆ្នាំ២០២៥ និងបន្តអនុវត្តនីតិវិធីចុះបញ្ជី និងចេញបណ្ណទាំងដីរដ្ឋ និងដីឯកជនរបស់ប្រជាពលរដ្ឋ៕ អត្ថបទ បាន សុខរិទ្ធិ

វឌ្ឍនភាព នៃការកសាងផ្លូវក្រវាត់ព្រំដែនក្នុងទិសមណ្ឌលគិរី

នៅថ្ងៃទី២៥ ខែវិច្ឆិកា ឆ្នាំ២០២៤ នាយឧត្តមសេនីយ៍ ខ្វាន់ ស៊ាម អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការ បញ្ជាការដ្ឋានវិស្វកម្ម អនុប្រធានក្រុមការងារចំពោះកិច្ចគ្រប់គ្រង ”មូលនិធិកសាងហេដ្ឋារចនាសម្ព័ន្ធតាមព្រំដែន“ បានដឹកនាំក្រុមការងារចុះត្រួតពិនិត្យការកសាងផ្លូវក្រវាត់ព្រំដែនក្នុងទិសមណ្ឌលគិរី ។ តាមការចុះពិនិត្យស្ថានភាពផ្លូវជាក់ស្តែង សង្កេតឃើញមានការកើនឡើងនូវសំណង់សិល្បការ្យ ។ ទន្ទឹមនេះក៏មានបញ្ហាប្រឈមផងដែរ ដែលជាឧបសគ្គធ្វើឱ្យមានការយឺតយ៉ាវចំពោះការសារស្ថាបនា ដោយសារស្ថានភាពភ្នំខ្ពស់ ថ្មច្រើន ជ្រលងជ្រៅ ដែលត្រូវការកាយ កាត់សម្រុតបន្ទាបចំណោតជាច្រើន។ តែទោះលំបាកយ៉ាងណា ក៏កម្លាំងកងវិស្វកម្មអគ្គបញ្ជាការ បានពុះពារជម្នះឧបសគ្គដោយសម្រេចបានលទ្ធផលជារួមមានដួចជា៖កសាងផ្លូវតភ្ជាប់ពីផ្លូវជាតិ ៧៦-៤ ទៅបង្គោល ៦០/១(១) ប្រវែង ៧ គីឡូម៉ែត្រ ក្នុងនោះមានការ ឈូសព្រៃទទឹង២០ម៉ែត្រ បានប្រវែង ៦.៦០០ ម៉ែត្រ, កាត់សម្រុតតួផ្លូវបានប្រវែង ៦.៣៥០ ម៉ែត្រ, ក្រាលល្បាយថ្ម បាន ប្រវែង ៤.១០០ ម៉ែត្រ និងបានកំណត់សំណង់សិល្បការ្យប្រភេទថ្នល់បេតុងបង្ហៀរ ១កន្លែង ប្រវែង ៤៥ម៉ែត្រ និងលូមូលបេតុង ៨កន្លែង។ រីឯផ្លូវខ្សែក្រវាត់ទី១ព្រំដែនពីបង្គោល ៦០/២៦(១)-៦០/១(១) ប្រវែង ៤៩,៥២ គីឡូម៉ែត្រ ក្នុងនោះឈូសព្រៃទទឹង២០ម៉ែត្រ បានប្រវែង ៤.៨០០ ម៉ែត្រ, កាត់សម្រុតតួផ្លូវ បាន ប្រវ៉ែង ៣.៤០០ ម៉ែត្រ, ក្រាលល្បាយថ្ម បាន ប្រវ៉ែង ៣.០០០ ម៉ែត្រ និងបានកំណត់សំណង់សិល្បការ្យ ប្រភេទលូប្រអប់បង្កប់ មុខ៣ ១កន្លែង, លូប្រអប់បង្កប់ មុខ២ មានទំនប់ស្ទាក់ទឹក ១កន្លែង និងលូមូលបេតុង ៥កន្លែង បន្ថែមទៀត ៕

ប្រធានវិទ្យាស្ថាន KSI មានជំនឿយ៉ាងមុតមាំថា ក្រោមការដឹកនាំប្រកបដោយចក្ខុវិស័យ និងភាពឈ្លាសវៃរបស់សម្ដេចបវរធិបតី កម្ពុជានឹងបន្តអភិវឌ្ឍ រីកចម្រើនឈានទៅកម្រិតខ្ពស់មួយថែមទៀត

នាព្រឹកថ្ងៃទី២៦ ខែវិច្ឆិកា ឆ្នាំ២០២៤ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានអនុញ្ញាតឱ្យ លោកតាន់ស្រ៊ី មីសែល យ៉ាវ( Tan Sri Micheal Yeoh) ប្រធានវិទ្យាស្ថានយុទ្ធសាស្ត្រ ប្រចាំតំបន់អាស៊ីប៉ាស៊ីហ្វិក (KSI) ចូលជួបសម្ដែងការគួរសម និងពិភាក្សាការងារ នៅសណ្ឋាគារសូហ្វីតែល រាជធានីភ្នំពេញ។នៅក្នុងឱកាសនៃជំនួប លោកប្រធានវិទ្យាស្ថាន KSI បានគោរពជម្រាបជូនសម្ដេចបវរធិបតី អំពីដំណើរការនៃការរៀបចំកិច្ចប្រជុំកំពូល “សេដ្ឋកិច្ច និងបច្ចេកវិទ្យាចិនសកលឆ្នាំ ២០២៤” នៅកម្ពុជា ដែលមានការចូលរួមពីធុរជនជាច្រើនមកពីទ្វីបអឺរ៉ុប អាស៊ី និងបណ្ដាប្រទេសធំៗ ដូចជា ចក្រភពអង់គ្លេស អាល្លឺម៉ង់ អូស្រ្ដាលី ជប៉ុន ចិន និងបណ្ដាប្រទេសជាច្រើនទៀតនៅក្នុងតំបន់អាស៊ាន។ កិច្ចប្រជុំកំពូលនេះមានគោលបំណងបង្កើតជាវេទិកាមួយដើម្បីផ្ដល់ឱកាសដល់ធុរជន និងវិនិយោគិនបរទេសបានស្វែងយល់កាន់តែច្បាស់ថែមទៀតអំពីកាលានុវត្តភាព និងសក្ដានុពល នៃការវិនិយោគនៅកម្ពុជា ហើយបណ្ដាវិនិយោគិនដែលមានវត្តមាននៅក្នុងកិច្ចប្រជុំកំពូលនេះ ក៏មានបំណងវិនិយោគនៅកម្ពុជាផងដែរ។ ជាមួយគ្នានោះ លោកប្រធានក៏បានគូសបញ្ជាក់ថា វិទ្យាស្ថាន KSI នឹងអាចចូលរួមជាផ្នែកមួយក្នុងការអភិវឌ្ឍសង្គម-សេដ្ឋកិច្ចនៅកម្ពុជា។ លោកប្រធានវិទ្យាស្ថានមានជំនឿយ៉ាងមុតមាំថា ក្រោមការដឹកនាំប្រកបដោយភាពឈ្លាសវៃរបស់សម្ដេចបវរធិបតី កម្ពុជានឹងបន្តអភិវឌ្ឍ រីកចម្រើនឈានទៅកម្រិតខ្ពស់មួយថែមទៀតជាការឆ្លើយតប សម្ដេចបវរធិបតីបានថ្លែងអំណរគុណ និងវាយតម្លៃខ្ពស់ដល់វិទ្យាស្ថាន KSI ដែលបានរៀបចំកិច្ចប្រជុំកំពូលនេះនៅកម្ពុជា និងបានគូសបញ្ជាក់ថា រាជរដ្ឋាភិបាលនីតិកាលទី៧ នៃរដ្ឋសភា បានដាក់ចេញនូវយុទ្ធសាស្ត្របញ្ចកោណ-ដំណាក់កាលទី១ ដើម្បីកំណើន ការងារ សមធម៌ប្រសិទ្ធភាព និងចីរភាព។ សម្ដេចបវរធិបតីបានគូសបញ្ជាក់ផងដែរថា ការជំរុញកំណើនសេដ្ឋកិច្ច គឺជាអាទិភាពចម្បងរបស់រដ្ឋាភិបាលកម្ពុជា ហើយវិស័យឯកជនបានដើរតួនាទីគន្លឹះក្នុងការបង្កើតការងារ ដើម្បីចូលរួមចំណែកលើកកម្ពស់ជីវភាពរស់នៅរបស់ប្រជាពលរដ្ឋកម្ពុជាឱ្យកាន់តែល្អប្រសើរ និងជាមូលដ្ឋានគ្រឹះនៃការអភិវឌ្ឍលើគ្រប់វិស័យ។ ទន្ទឹមនឹងនោះ រាជរដ្ឋាភិបាលក៏បានដាក់ចេញនូវគោលនយោបាយ យន្តការចាំបាច់នានា និងការលើកទឹកចិត្តដើម្បីធានាបរិយាកាសវិនិយោគប្រកបដោយភាពប្រកួតប្រជែង និងការតភ្ជាប់ទៅកាន់ទីផ្សារតំបន់ និងពិភពលោក តាមរយៈកិច្ចព្រមព្រៀងពាណិជ្ជកម្មសេរីទ្វេភាគី និងពហុភាគី សំដៅធានានូវភាពជោគជ័យ និងកាលានុវត្តភាពកាន់តែច្រើនថែមទៀត សម្រាប់វការវិនិយោគនៅកម្ពុជា។នាឱកាសនោះ លោកប្រធានវិទ្យាស្ថាន KSI ក៏បានប្រគល់ពានរង្វាន់ “ភាពជាអ្នកដឹកនាំឆ្នើមពិភពលោក” ជូនសម្ដេចបវរធិបតី ផងដែរ៕

ប្រតិភូអង្គការ ICBL-CMC សម្តែងមតិបង្ហាញពីការប្រឆាំងនឹងការប្រើប្រាស់មីន

ប្រតិភូមកពីប្រទេសនានានៅជុំវិញពិភពលោក នៃអង្គការ យុទ្ធនាការអន្តរជាតិ ដើម្បីបញ្ឈប់ការប្រើប្រាស់មីន និងសម្ព័ន្ធគ្រាប់បែកចង្កោម (International Campaign to Ban Landmines – Cluster Munition Coalition (ICBL-CMC)) ដែលបានអញ្ជើញមកចូលរួមកិច្ចប្រជុំកំពូលស្តីពីពិភពលោកដែលគ្មានមីន នៅព្រះរាជាណាចក្រកម្ពុជា សម្តែងមតិដោយបង្ហាញពាក្យស្លោកផ្សេងៗពីការប្រឆាំងនឹងការប្រើប្រាស់គ្រាប់មីនគ្រប់ប្រភេទ។សូមបញ្ជាក់ថា អង្គការ ICBL តែងតែរៀបចំការសម្តែងមតិដូច្នេះដើម្បីជំរុញដល់ប្រទេសនានាជុំវិញពិភពលោកចូលរួមគោរពអនុសញ្ញាអូតាវ៉ា៕ ប្រភព៖ AKP

ព័ត៌មានជាតិ

សម្ដេចធិបតី៖ ទំនាក់ទំនងពិសេសជិតស្និទ្ធកម្ពុជា-ចិន គឺជាដៃគូវិនិយោគ និងយុទ្ធសាស្រ្ដដ៏ធំបំផុតនៅកម្ពុជា

កម្ពុជា ឡាវ វៀតណាម នឹងបន្តពង្រឹង និងពង្រីកកិច្ចសហប្រតិបត្តិការលើវិស័យការពារជាតិ

សម្ដេចធិបតី៖ កម្ពុជាមានសេដ្ឋកិច្ចបើកចំហ និងសេរីបំផុតនៅអាស៊ី អំណោយផលដល់ការវិនិយោគ

សម្ដេចធិបតី អំពាវនាវដល់អ្នកវិនិយោគចូលរួមសរសេរជំពូកអច្ឆរិយភាពសេដ្ឋកិច្ច តំបន់អាស៊ីនៅកម្ពុជា

សម្តេចធិបតី៖ រាជរដ្ឋាភិបាលអាណត្តិទី៧ ជាអាណត្តិនៃការទាក់ទាញបច្ចេកវិទ្យា និងធនធានមនុស្សដែលមានជំនាញ

សម្តេចធិបតី៖ សន្តិភាព គឺជាទំនិញដ៏រឹងមាំបំផុតសម្រាប់ទាក់ទាញអ្នកវិនិយោគបរទេសបន្ថែមទៀតមកកម្ពុជា

ត្រឹមឆ្នាំ២០២៤ រដ្ឋកាត់ដីតំបន់៣ ជាង៨ម៉ឺនហិកតា ចែកពលរដ្ឋជិត៤ម៉ឺនគ្រួសារ ខណៈការកាត់ឆ្វៀលបានបិទបញ្ចប់

វឌ្ឍនភាព នៃការកសាងផ្លូវក្រវាត់ព្រំដែនក្នុងទិសមណ្ឌលគិរី

ប្រតិភូអង្គការ ICBL-CMC សម្តែងមតិបង្ហាញពីការប្រឆាំងនឹងការប្រើប្រាស់មីន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

សម្ដេចធិបតី៖ ទំនាក់ទំនងពិសេសជិតស្និទ្ធកម្ពុជា-ចិន គឺជាដៃគូវិនិយោគ និងយុទ្ធសាស្រ្ដដ៏ធំបំផុតនៅកម្ពុជា

កម្ពុជា ឡាវ វៀតណាម នឹងបន្តពង្រឹង និងពង្រីកកិច្ចសហប្រតិបត្តិការលើវិស័យការពារជាតិ

សម្ដេចធិបតី៖ កម្ពុជាមានសេដ្ឋកិច្ចបើកចំហ និងសេរីបំផុតនៅអាស៊ី អំណោយផលដល់ការវិនិយោគ

សម្ដេចធិបតី អំពាវនាវដល់អ្នកវិនិយោគចូលរួមសរសេរជំពូកអច្ឆរិយភាពសេដ្ឋកិច្ច តំបន់អាស៊ីនៅកម្ពុជា

សម្តេចធិបតី៖ រាជរដ្ឋាភិបាលអាណត្តិទី៧ ជាអាណត្តិនៃការទាក់ទាញបច្ចេកវិទ្យា និងធនធានមនុស្សដែលមានជំនាញ

សម្តេចធិបតី៖ សន្តិភាព គឺជាទំនិញដ៏រឹងមាំបំផុតសម្រាប់ទាក់ទាញអ្នកវិនិយោគបរទេសបន្ថែមទៀតមកកម្ពុជា

ត្រឹមឆ្នាំ២០២៤ រដ្ឋកាត់ដីតំបន់៣ ជាង៨ម៉ឺនហិកតា ចែកពលរដ្ឋជិត៤ម៉ឺនគ្រួសារ ខណៈការកាត់ឆ្វៀលបាន​បិទបញ្ចប់

វឌ្ឍនភាព នៃការកសាងផ្លូវក្រវាត់ព្រំដែនក្នុងទិសមណ្ឌលគិរី​

ប្រតិភូអង្គការ ICBL-CMC សម្តែងមតិបង្ហាញពីការប្រឆាំងនឹងការប្រើប្រាស់មីន

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ត្រឹមឆ្នាំ២០២៤ រដ្ឋកាត់ដីតំបន់៣ ជាង៨ម៉ឺនហិកតា ចែកពលរដ្ឋជិត៤ម៉ឺនគ្រួសារ ខណៈការកាត់ឆ្វៀលបានបិទបញ្ចប់

វឌ្ឍនភាព នៃការកសាងផ្លូវក្រវាត់ព្រំដែនក្នុងទិសមណ្ឌលគិរី