BTV NEWS

ព្រះអង្គម្ចាស់ នរោត្តម ចក្រាវុធ ជួបពិភាក្សាការងារជាមួយ ឯកឧត្តម Chen Zhou អនុរដ្ឋមន្រ្តី ក្រសួងទំនាក់ទំនងអន្តរជាតិចិន

សេដ្ឋកិច្ចកម្ពុជានៅបន្តរឹងមាំ៖ ២២ខែនៃរាជរដ្ឋាភិបាលអាណតិ្តទី៧របស់សម្តេចធិបតី រោងចក្រសហគ្រាសកើនជាង៥,៣ពាន់ដែលបង្ហាញពីភាពរឹងមាំ និងជំនឿទុកចិត្ត

លោកសាស្រ្តាចារ្យរង លូ លីឃាង អញ្ជើញសម្ពោធបើកជាផ្លូវការគ្លីនិកជំងឺភ្នែកស្ងួត នៃមនី្ទរពេទ្យព្រះអង្គឌួង

ក្រសួងធម្មការ បើកវគ្គបណ្ដុះបណ្ដាលស្ដីពីតួនាទី ភារកិច្ចនិងក្រមសីលធម៌អាចារ្យខ្មែរ (ជំនាន់ទី៥០)

ព័ត៌មានជាតិ

ក្រសួងបរិស្ថាន និងភាគីពាក់ព័ន្ធបានពិនិត្យរៀបចំចុះបញ្ជីភ្នំសំពៅ និងភ្នំបាណន់ក្នុងខេត្តបាត់ដំបង ជាតំបន់បេតិភណ្ឌធម្មជាតិ

មន្រ្តីជំនាញនៃក្រសួងបរិស្ថាន សហការជាមួយអាជ្ញាធរខេត្តបាត់ដំបង មន្ទីរបរិស្ថានខេត្ត អង្គការសត្វព្រៃ និងរុក្ខជាតិអន្តរជាតិនៅកម្ពុជា(FFI) និង ដៃគូអភិវឌ្ឍន៍ កំពុងរួមគ្នាសិក្សាលើទិន្នន័យ និងពិនិត្យពិភាក្សាទៅលើសក្តានុពលនៃតំបន់ភ្នំថ្មកំបោរ ចំនួន២គឺភ្នំសំពៅ និងតំបន់ភ្នំបាណន់ នៅក្នុងភូមិសាស្រ្តខេត្តបាត់ដំបង ដើម្បីរៀបចំចុះបញ្ជីជាតំបន់បេតិភណ្ឌធម្មជាតិ។មន្រ្តីអ្នកនាំពាក្យក្រសួងបរិស្ថាន ឯកឧត្តម ខ្វៃ អាទិត្យា បានថ្លែងនៅថ្ងៃទី៩ ខែ កក្កដា ឆ្នាំ ២០២៥នេះថា តាមរយៈការរពិនិត្យ ស្រាវជ្រាវពីសំណាក់មន្រ្តីជំនាញ និងភាគីពាក់ព័ន្ធ បានកំពុងប្រែក្លាយតំបន់នេះជាតំបន់ដែលមានសក្តានុពលយ៉ាងសំខាន់ ប្រវត្តិសាស្រ្ត និងមានសម្បត្តិធនធានធម្មជាតិដែលអាចរៀបចំជាគោលដៅលំហែបៃតងផងដែរ។លោក ហេង ហុង ប្រធាននាយកដ្ឋានតំបន់បេតិកភណ្ឌធម្មជាតិ អគ្គនាយកដ្ឋានសហគមន៍មូលដ្ឋាន នៃក្រសួងបរិស្ថាន ជាប្រធានក្រុមការងារក្រសួងបរិស្ថាន កាលពីថ្ងៃទី៧- ៨ ខែកក្កដា ឆ្នាំ២០២៥ បានសហការជាមួយ អ្នកស្រាវជ្រាវមកពី អង្គការសត្វព្រៃ និងរុក្ខជាតិអន្តរជាតិនៅកម្ពុជា(FFI) និងមានការចូលរួមពីមន្ទីរបរិស្ថានខេត្តបាត់ដំបង បានផ្សព្វផ្សាយលទ្ធផលស្តីពី «ការសិក្សាស្រាវជ្រាវជីវៈចម្រុះនៅ ភ្នំបាណន់ និងភ្នំសំពៅ» ដោយអង្គការ(FFI) និងនាយកដ្ឋានជីវៈចម្រុះកាលពីឆ្នាំ២០២៤, និងបានចុះពិនិត្យទីតាំងសក្តានុពលនៅភ្នំបាណន់ និងភ្នំសំពៅ និងជួបសំណេះសំណាលជាមួយសហគមន៍មូលដ្ឋាន។ សូមបញ្ជាក់ថា តាមលទ្ធផលនៃកាសិក្សាស្រាវជ្រាវដោយដាក់ម៉ាស៊ីនថតស្វ័យប្រវត្តិ(Camera trap) បានរកឃើញប្រភេទសត្វស្ថិតនៅក្នុងចំណាត់ថ្នាក់កំពុងរងគ្រោះថ្នាក់ជាសាកល រួមមាន សត្វពង្រូល, ក្ងោក, កែះ, ស្វាត្រោស, ស្វាក្តាម និងប្រភេទសត្វ មានដោយបង្គួរជាច្រើនទៀត ដូចជា សត្វឆ្កែចចក, ឆ្មាដាវ, ប្រម៉ា, ក្តាន់ញ៉ែងតូច និងជាពិសេសបានរកឃើញប្រភេទសត្វតុកកែ,សត្វជីងចក់ និងខ្យងគោកដែលជាប្រភេទថ្មីសម្រាប់កម្ពុជានិងពិភពលោក។ សូមបញ្ជាក់ថាភ្នំបាណន់ និងភ្នំសំពៅ គឺជាទីតាំងក្រុងបុរាណខ្មែរនាសម័យអង្គរ, មានសិលាចារឹក K.1434, មានប្រាសាទបុរាណ, មានល្អាងជាច្រើន និងជាទីតាំងថ្មកំបោរដ៏កម្រដែលជាអតីតនៅក្នុងសមុទ្រមានអាយុកាលក្នុងស័កទី១ Paleozoic ក្នុងសម័យកាល Permian មាន អាយុកាល(២៥១-២៩៩ លានឆ្នាំមុន)។ ក្រៅអំពីសក្តាសក្តានុពលតម្លៃជីវៈចម្រុះ និងធនធានធម្មជាតិ, តម្លៃវប្បធម៌ប្រវត្តិសាស្រ្ត, ភ្នំបាណន់ និងភ្នំសំពៅ គឺជាទីតាំងទាក់ទាញភ្ញៀវទេសចរទៅគោរពបូជាផ្នែកសាសនា, ទស្សនាព្រៃឈើ និងទស្សនាផ្ទាំងទស្សនីយ ភាពសត្វប្រចៀវ ហោះហើរចេញពីរូងជារៀងរាល់ថ្ងៃ នៅចន្លោះម៉ោង៥ ដល់ម៉ោង៦ល្ងាច ដែលផ្ទាំងទស្សនីយភាពនេះ អ្នកភូមិហៅហ្វូងប្រចៀវទាំងនោះថា«កងទ័ពប្រចៀវ» មានប្រមាណ ៥លានក្បាល។ជាមួយនឹងផលប្រយោជន៍ផ្នែកទេសចរណ៍ខាងលើ សត្វប្រចៀវបានផ្តល់ប្រាក់ចំណូលដល់សហគមន៍មូលដ្ឋាន តាមរយៈប្រមូលអាចម៍ប្រចៀវពីក្នុងល្អាងនៃភ្នំទាំង២ ដែលក្នុងមួយឆ្នាំៗ ជាមធ្យមទទួលបាន ៣ម៉ឺនដុល្លារ ពីភ្នំបាណន់ និង២ម៉ឺនដុល្លារពីភ្នំសំពៅ។ កន្លងមកថ្មីៗនេះអ្នកជំនាញបានរកឃើញនៅភ្នំបាណន់ និងថ្មកំបោរខេត្តបាត់ដំបងជាប្រភេទ «ខ្យងឧទយាទិត្យ» ជាកំណត់ត្រាថ្មីរបស់ពិភពលោក និងត្រូវបានទទួលស្គាល់ថាជាប្រភេទខ្យងគោកថ្មីសម្រាប់វិទ្យាសាស្រ្ត។អ្នកជំនាញបានឱ្យដឹងដែរថាការរកឃើញនេះ គឺជាខ្យងរស់ មិនមែនជាសំណាកខ្យងទេ ហើយវាមានចំនួនច្រើននៅតាមភ្នំថ្មកំបោរក្នុងខេត្តបាត់ដំបង ពិសេសនៅភ្នំបាណន់តែម្តង។ លើសពីនេះកាលពីថ្មីៗកន្លងមក ក្រសួងបរិស្ថានក៏រកឃើញប្រភេទតុកែនិងជីងចក់ កំណត់ត្រាថ្មីសម្រាប់ពិភពលោកនៅកម្ពុជា។ តុកកែ១ប្រភេទ និងជីងចក់២ប្រភេទ ដែលក្រុមអ្នកវិទ្យាសាស្ត្របរិស្ថានមួយក្រុម ដែលក្នុងនោះមកពីក្រសួងបរិស្ថាន អង្គការសត្វព្រៃនិងរុក្ខជាតិកម្ពុជា និងសាកលវិទ្យាល័យ La Sierra របស់សហរដ្ឋអាមេរិក រកឃើញនៅតំបន់ភ្នំថ្មកំបោរ ខេត្តបាត់ដំបង ត្រូវបានទទួលស្គាល់ ជាប្រភេទកំណត់ត្រាថ្មីសម្រាប់ពិភពលោក។ ក្រុមអ្នកស្រាវជ្រាវបានរកឃើញ កាលពីខែមីនា ឆ្នាំ២០២៤ កន្លងទៅ សិក្សាលើប្រភេទជីវៈចម្រុះថ្មីនៅតំបន់ ភ្នំកំពីងពួយ ភ្នំបាណន់ ភ្នំសំពៅ និងភ្នំខ្ពស់ ក្នុងភូមិសាស្រ្តខេត្តបាត់ដំបង។ ហើយថ្មីៗនេះអ្នកវិទ្យាសាស្រ្តបានបង្ហាញលទ្ធផលលើការរកឃើញ លើប្រភេទជីវៈចម្រុះចំនួន៣ ជាប្រភេទកំណត់ត្រាថ្មីសម្រាប់ពិភពលោក ក្នុងនោះរួមមាន៖១-តុកកែភ្នំកំពីងពួយ (Cyrtodactylus kampingpoiensis) រកឃើញនៅ ភ្នំកំពីងពួយ ភ្នំបាណន់ ភ្នំសំពៅ និងភ្នំខ្ពស់។ kampingpoiensis សរសេរជាភាឡាតាំង មានន័យថាជាភ្នំកំពីងពួយ។ ២-ជីងចក់ស្លឹកបាត់ដំបង (Dixonius noctivagus) រកឃើញក្នុងទីតាំងដូចតុកកែភ្នំកំពីងពួយដែរ។ noctivagus ជាភាសាឡាតាំងមានន័យថារកស៊ីនៅពេលយប់។៣-ជីងចក់ភ្នំខ្ពស់(Hemiphyllodactylus khpoh)រកឃើញនៅតាមភ្នំថ្មកំបោរភ្នំខ្ពស់ ស្រុកបាណន់។ khpohសរសេរជាភាឡាតាំង មានន័យថាជាភ្នំខ្ពស់៕

ទំនប់អូរតេធិបតី ត្រៀមផ្គត់ផ្គង់ទឹកស្អាតជូនពលរដ្ឋរាប់ពាន់គ្រួសារបន្ថែមទៀតក្នុងខេត្តមណ្ឌលគិរី

មណ្ឌលគិរី៖ ទំនប់អូរតេធិបតី ដែលជាសមិទ្ធផលដ៏សំខាន់មួយនៅស្រុកអូររាំង ខេត្តមណ្ឌលគិរី បាននិងកំពុងឈានទៅរកដំណាក់កាលចុងក្រោយនៃការត្រៀមខ្លួនផ្គត់ផ្គង់ទឹកស្អាតជូនប្រជាពលរដ្ឋ។ ដោយប្រជាពលរដ្ឋរាប់ពាន់គ្រួសារបន្ថែមទៀត ក្នុងក្រុងសែនមនោរម្យ និងស្រុកពេជ្រាដា និងមានបណ្ដាញទឹកស្អាតប្រើប្រាស់ក្នុងពេលដ៏ខ្លីខាងមុខ ។ លោក សូរ សុវណ្ណារិទ្ធ អគ្គនាយកនៃរដ្ឋាករទឹកខេត្តមណ្ឌលគិរី បានបញ្ជាក់ប្រាប់ BTV តាមទូរស័ព្ទថា បច្ចុប្បន្នក្រុមការងារកំពុងដាក់ដេញថ្លៃការសាងសង់ស្ថានីយចែកចាយទឹកស្អាតមួយ ដើម្បីអាចយកទឹកពីទំនប់អូរតេធិបតីទៅចែកចាយបន្ថែមដល់ប្រជាពលរដ្ឋក្នុងក្រុងសែនមនោរម្យ និងឃុំពូជ្រៃ ស្រុកពេជ្រាដា។ លោកបានគូសបញ្ជាក់ថា យ៉ាងយូរនៅដើមឆ្នាំ២០២៧ ស្ថានីយចែកចាយនឹងអាចដំណើរការផ្គត់ផ្គង់ទឹកស្អាតចេញពីទំនប់អូរតេធិបតី។ ទំនប់នេះមានសមត្ថភាពអាចផ្ដល់តម្រូវការទឹកស្អាតប្រមាណ ៩,០០០ម៉ែត្រគូបក្នុងមួយថ្ងៃ ខណៈតម្រូវការជាក់ស្ដែងត្រឹម ៧,០០០ម៉ែត្រគូបប៉ុណ្ណោះ។ នេះមានន័យថា ទំនប់អូរតេធិបតីមានសក្ដានុពលខ្ពស់ក្នុងការផ្គត់ផ្គង់ទឹកស្អាតដល់ប្រជាពលរដ្ឋប្រមាណ ៧,០០០គ្រួសារបន្ថែមទៀត ក្រៅពីទឹកស្អាតក្នុងក្រុងសែនមនោរម្យដែលអាចផ្គត់ផ្គង់ប្រហែលជាង ៣,០០០គ្រួសាររួចទៅហើយ។ លោក សៀក មុន្នី អភិបាលស្រុកអូររាំង បានលើកឡើងថា ក្រៅពីសមិទ្ធផលទំនប់អូរតេធិបតី ដែលជាប្រភពចែកចាយទឹកស្អាតដ៏ធំសម្បើមនេះ អនាគតដ៏ខ្លីខាងមុខ គម្រោងថាមពលកង្ហារខ្យល់ដ៏ធំមួយសម្រាប់ផលិតអគ្គិសនី ក៏នឹងបើកការដ្ឋានសាងសង់ក្នុងស្រុកអូររាំង ដែលនឹងរួមចំណែកយ៉ាងសំខាន់ក្នុងការផ្គត់ផ្គង់ថាមពល និងបង្កើតការងារក្នុងតំបន់។ គួររម្លឹកថា ទំនប់អូរតេធិបតី ដែលជាគម្រោងធនធានទឹកពហុវិស័យតម្លៃ ៦២លានដុល្លារអាម៉េរិក បានសម្ពោធដាក់ឲ្យប្រើប្រាស់ជាផ្លូវការកាលពីចុងឆ្នាំ២០២៤ ក្រោយចំណាយពេលសាងសង់ប្រមាណ៣ឆ្នាំ។ ទំនប់នេះមានសមត្ថភាពស្តុកទឹក ១២លានម៉ែត្រគូប និងបំពាក់ដោយហេដ្ឋារចនាសម្ព័ន្ធសំខាន់ៗជាច្រើន រួមមាន៖ ទំនប់បេតុងប្រវែង ៣០៦ម៉ែត្រ ដែលដើរតួជាស្ពានឆ្លងកាត់, សំណង់បង្ហូរទឹក, អគារការិយាល័យ, និងផ្លូវបេតុងជុំវិញអាង។ ក្រៅពីទឹកស្អាត អាជ្ញាធរខេត្តក៏រំពឹងថា ទំនប់នេះនឹងរួមចំណែកជំរុញវិស័យទេសចរណ៍ និងអភិវឌ្ឍន៍ហេដ្ឋារចនាសម្ព័ន្ធផ្សេងៗទៀត ។ ទំនប់អូរតេធិបតី គឺជាផ្នែកមួយនៃផែនការមេរបស់ក្រសួងធនធានទឹក ដើម្បីធានាការផ្គតផ្គង់ទឹក និងជំរុញនិរន្តរភាពសម្រាប់ការអភិវឌ្ឍខេត្តមណ្ឌលគិរីទាំងមូល៕ អ៊ិត ភីរុណ

សម្ដេចតេជោ ហ៊ុន សែន អញ្ជើញដង្ហែព្រះមហាក្សត្រក្នុងព្រះរាជពិធី «រុក្ខទិវា ៩ កក្កដា» នៅស្រុកចំការលើ ខេត្តកំពង់ចាម

នៅព្រឹកថ្ងៃពុធ ១៤កើត ខែអាសាឍ ឆ្នាំម្សាញ់ សប្តស័ក ព.ស. ២៥៦៩ ត្រូវនឹង ថ្ងៃទី៩ ខែកក្កដា ឆ្នាំ២០២៥ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា នៃព្រះរាជាណាចក្រកម្ពុជា បានអញ្ជើញដង្ហែព្រះករុណាព្រះបាទសម្ដេចព្រះបរមនាថ នរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ស្ដេចយាងជាព្រះរាជាធិបតីភាពដ៏ខ្ពង់ខ្ពស់បំផុតក្នុងព្រះរាជពិធី «រុក្ខទិវា ៩កក្កដា» ដែលប្រារព្ធធ្វើឡើងនៅកសិដ្ឋានផលិតពូជដំណាំតំបន់ដីខ្ពស់ចម្ការលើ ភូមិកសិដ្ឋាន ឃុំបុសខ្នុរ ស្រុកចំការលើ ខេត្តកំពង់ចាម។ក្នុងព្រះរាជពិធីនេះ ក៏មានការអញ្ជើញដង្ហែព្រះករុណាជាអម្ចាស់ជីវិតលើត្បូងពីសំណាក់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ព្រះមហាក្សត្រ, សម្តេចមហារដ្ឋសភាធិការបតី ឃួន សុដារី ប្រធានរដ្ឋសភា, សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ព្រមទាំងសមាជិក សមាជិកា ឧត្តមប្រឹក្សាផ្ទាល់ព្រះមហាក្សត្រ សមាជិក សមាជិកាព្រឹទ្ធសភា-រដ្ឋសភា រាជរដ្ឋាភិបាល ឯកអគ្គរាជទូត ឯកអគ្គរដ្ឋទូត ភ្ញៀវកិត្តិយសជាតិ-អន្តរជាតិ ថ្នាក់ដឹកនាំ មន្ត្រីរាជការខេត្តកំពង់ចាម ព្រមទាំងមានការអញ្ជើញចូលរួមប្រជាពលរដ្ឋខេត្តកំពង់ចាម ជាច្រើនរូបទៀត។«រុក្ខទិវា ៩កក្កដា» ជាមរតកកើតចេញពីព្រះរាជបញ្ញាញាណដ៏ភ្លឺស្វាងបំផុតរបស់ព្រះករុណា នរោត្តម សីហនុ ព្រះមហាវីរក្សត្រ ព្រះវររាជបិតាជាតិខ្មែរ ព្រះបរមរតនកោដ្ឋ ជាទីគោរពសក្ការៈដ៏ខ្ពង់ខ្ពស់បំផុត កាលពីឆ្នាំ១៩៥២ ដែលព្រះអង្គបានបំផុសចលនាដាំដើមឈើ ហៅថា រុក្ខទិវា នេះឡើង ព្រមទាំងផ្តល់ព្រះរាជបន្ទូលទូន្មានដល់ប្រជារាស្រ្តទូទាំងប្រទេស ឱ្យដាំនិងថែរក្សាព្រៃឈើតកូន តចៅ ដើម្បីឱ្យអាកាសធាតុមានប្រក្រតីភាពជាវិជ្ជមានចំពោះវិស័យកសិកម្ម និងមនុស្សជាតិ។ ស្របតាមព្រះរាជបញ្ញាញាណដ៏ត្រចះត្រចង់នេះ និងដើម្បីបន្តស្នាព្រះហស្ថរបស់ព្រះករុណា ព្រះបរមរតនកោដ្ឋ សម្តេចតេជោ ហ៊ុន សែន អតីតនាយករដ្ឋមន្ត្រីបានសម្រេចបង្កើតឡើងវិញនូវពិធី «រុក្ខទិវា ៩កក្កដា» នៅឆ្នាំ១៩៩០ និងបានចាប់ផ្តើមប្រារព្ធពិធីនេះឡើងវិញជារៀងរាល់ឆ្នាំចាប់ពីឆ្នាំ១៩៩២មក។យោងតាមរបាយការណ៍របស់ ឯកឧត្តម ឌិត ទីណា រដ្ឋមន្ត្រីក្រសួងកសិកម្មរុក្ខាប្រមាញ់ និងនេសាទ បានឲ្យដឹងថា គិតត្រឹមឆ្នាំ២០២៥ រដ្ឋបាលព្រៃឈើ និងខណ្ឌរដ្ឋបាលព្រៃឈើ បានបណ្តុះ និងដាំកូនឈើជាង ២១លានដើម ដោយប្រើប្រាស់ថវិការដ្ឋ ខណៈដែលកូនឈើជាច្រើនលានដើម ផ្សេងទៀតត្រូវបានបណ្តុះ និងដាំដោយប្រជាពលរដ្ឋនៅទូទាំងប្រទេស ដោយមិនរាប់បញ្ចូលឈើហូបផ្លែ ឬដំណាំឧស្សាហកម្ម ដូចជាស្វាយ ខ្នុរ ដូង ដូងប្រេង កៅស៊ូ និងស្វាយចន្ទីជាដើម។ល។ សម្រាប់ពិធី រុក្ខទិវា៩ កក្កដា លើកទី៣០នេះ កូនឈើចម្រុះប្រភេទ មានដូចជា ធ្នង់ នាងនួន គ្រញូង បេង ក្ងោក និងត្របែកព្រៃសរុបចំនួន ១៥ ០០០ដើម នឹងត្រូវដាំក្នុងសួនរុក្ខទិវាទំហំ១០ហិកតានេះ ស្ថិតក្នុងភូមិកសិដ្ឋាន ឃុំបុសខ្នុរ ស្រុកចំការលើ ខេត្តកំពង់ចាម។ កាលពីដើមឡើយ ពោលគឺចាប់ពីឆ្នាំ១៩៣៤មក ទីតាំងនេះគឺជាអតីត ស្ថានីយកសិកម្ម ចំការក្រូច ប៉ុន្តែត្រូវបានប្តូរឈ្មោះមកជា ស្ថានីយ៍ពិសោធន៍ដំណាំកប្បាសចំការលើ នៅឆ្នាំ១៩៨១ ក្រោយពេលដែលក្រសួង កសិកម្ម និងអ្នកជំនាញការអតីតសហភាពសូវៀតបានសហការដាំដើមកប្បាសនៅលើទីតាំងនេះ ដើម្បីបម្រើឱ្យឧស្សាហកម្ម ដំណាំកប្បាស និងបំពេញតម្រូវការរោងចក្រវាយនភណ្ឌ។ ជាអកុសល នៅខែសីហា ឆ្នាំ១៩៨៣ អ្នកជំនាញការសូវៀត ចំនួន ៩នាក់បានបាត់បង់ជីវិតក្រោមការពួនស្ទាក់បាញ់ប្រហាររបស់ពួក ប៉ុល ពត ដែលបានធ្វើឱ្យគម្រោងផលិតកម្មដំណាំ កប្បាសត្រូវបានផ្អាកទាំងស្រុង ហើយក្នុងឆ្នាំដដែលនោះ ក្រសួងកសិកម្មបានសម្រេចប្តូរឈ្មោះស្ថានីយ៍នេះ មកជា ស្ថានីយ៍ ពិសោធន៍ដំណាំចំការលើវិញ។ នៅឆ្នាំ១៩៩០ ស្ថានីយ៍នេះត្រូវបានផ្លាស់ប្ដូរឈ្មោះម្ដងទៀត មកជា កសិដ្ឋានផលិតពូជ ដំណាំតំបន់ដីខ្ពស់ចំការលើ និងត្រូវបានប្រើប្រាស់សម្រាប់ពិសោធវិធីសាស្ត្រដាំដុះពូជដំណាំផ្សេងៗ រហូតមក។កម្ពុជា គឺជាប្រទេសឈានមុខគេមួយនៅក្នុងតំបន់ និងពិភពលោក ដែលបានដាក់តំបន់ព្រៃឈើទំហំជាង ៤០%នៃផ្ទៃប្រទេស ជាតំបន់ការពារធម្មជាតិ និងបន្តជំរុញការដាំស្តារព្រៃឈើឡើងវិញ។ ជាមួយគ្នានេះផងដែរ ក្នុងស្មារតីជំរុញវិបុលកម្មសត្វ សម្ដេចតេជោ ក៏បានសម្រេចអនុញ្ញាតឱ្យបងប្អូនប្រជាពលរដ្ឋដែលស្រឡាញ់សត្វ អាចចិញ្ចឹមសត្វព្រៃជាលក្ខណៈគ្រួសារ ដើម្បីឱ្យសត្វទាំងនេះអាចបន្តពូជ និងបង្កើនចំនួន និងអាចត្រូវបានព្រលែងចូលក្នុងព្រៃធម្មជាតិវិញ ក្រោមការពិនិត្យ និងការផ្ដល់បច្ចេកទេសពីរដ្ឋបាលព្រៃឈើ នៃក្រសួងកសិកម្ម រុក្ខាប្រមាញ់ និងនេសាទ។ តាមរយៈកិច្ចខិតខំប្រឹងប្រែងឥតឈប់ឈររបស់រាជរដ្ឋាភិបាលជាច្រើនអាណត្តិកន្លងមកនេះ ដោយមានក្រសួងកសិកម្ម រុក្ខាប្រមាញ់ និងនេសាទ ក្រសួងបរិស្ថាន អាជ្ញាធរពាក់ព័ន្ធ និងរដ្ឋបាលថ្នាក់ក្រោមជាតិ ជាសេនាធិការ ព្រះរាជាណាចក្រកម្ពុជានៅតែបន្តរក្សាបាននូវតុល្យភាព និងនិរន្តរភាពល្អប្រសើរក្នុងកិច្ចការអភិរក្ស និងអភិវឌ្ឍធនធានធម្មជាតិសម្រាប់ប្រជាពលរដ្ឋទូទាំងប្រទេស និងកូនចៅជំនាន់ក្រោយរបស់កម្ពុជា៕

សម្ដេចតេជោ ហ៊ុន សែន ផ្ដល់ដំបូន្មានទៅអ្នកនយោបាយ និងក្រុមអគតិថៃមួយចំនួនជុំវិញពួកគេធ្វើស្ទង់មតិពលរដ្ឋខ្លួនថាស្រឡាញ់សម្ដេច ឬអត់!

ភ្នំពេញ៖ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃកម្ពុជា នៅថ្ងៃទី៩ ខែកក្កដា ឆ្នាំ២០២៥នេះ បានផ្ដល់ដំបូន្មានទូន្មានទៅអ្នកនយោបាយ និងក្រុមអគតិមួយចំនួនរបស់ថៃ ជុំវិញពួកគេធ្វើស្ទង់មតិពលរដ្ឋខ្លួនថាស្រឡាញ់សម្ដេចឬអត់!សម្ដេចតេជោ បានសរសេរថា៖«ខ្ញុំសូមទូន្មានចំពោះអ្នកនយោបាយ និងក្រុមអគតិមួយចំនួនរបស់ថៃ! វាជារឿងដ៏ចម្លែក និងកម្រណាស់នៅលើពិភពលោក ដែលប្រទេសមួយកំពុងប្រឈមមុខដាក់គ្នា បែរជានាំគ្នាធ្វើការស្ទង់មតិចំពោះមេដឹកនាំប្រទេសមួយទៀតដែលជាសត្រូវរបស់ខ្លួនទៅវិញ វាជារឿងគួរឲ្យអស់សំណើច និងគ្មានហេតុផលអ្វីដែលត្រូវធ្វើបែបនេះទេ ប៉ុន្តែប្រទេសថៃអាចធ្វើរឿងបែបនេះបាន»។សម្ដេចតេជោ បានបញ្ជាក់ថា ការរៀបចំស្ទង់មតិរបស់វិទ្យាស្ថាន NIDA ដើម្បីចង់ដឹងទឹកចិត្តប្រជាជនថៃ ចំពោះរូបខ្ញុំ ហ៊ុន សែន វាបង្ហាញពីការចាប់អារម្មណ៍ខ្លាំង និងផ្តល់តម្លៃចំពោះខ្ញុំទៅវិញទេ។ សម្ដេចតេជោ បានលើកឡើងថា គួរណាស់ប្រជាជនថៃ នាំគ្នាស្ទង់មតិមេដឹកនាំរបស់ខ្លួនឯងទៅ ដូច្នេះខ្ញុំសូមទូន្មានថា «អ្វីដែលខ្ញុំខ្លាចបំផុតនោះគឺ ប្រជាជនថៃស្រឡាញ់ ហ៊ុន សែន ដែលអាចបង្ហាញពីខ្ញុំក្បត់ជាតិសាសន៍ និងប្រជាជនរបស់ខ្ញុំ ប៉ុន្តែអ្វីដែលខ្ញុំចង់បានបំផុតនោះគឺសត្រូវវាយតម្លៃ ហ៊ុន សែន ក្នុងកម្រិតទាបបំផុត ដែលចំណុចនេះបង្ហាញថា ខ្ញុំកំពុងធ្វើរឿងដ៏ត្រឹមត្រូវចំពោះប្រទេសជាតិ និងប្រជាជនរបស់ខ្ញុំ»៕

ផ្លូវមួយខ្សែប្រវែង៩០០០ម៉ែត្រ ត្រូវបានស្ថាបនាឡើងដោយក្រសួងអភិវឌ្ឍន៍ជនបទ ដើម្បីសម្រួលការធ្វើចរាចរជូនពលរដ្ឋ ក្នុងតំបន់ដីសម្បទានសង្គមកិច្ចស្រុកចុងកាល់

ឧត្តរមានជ័យ៖ ដើម្បីធ្វើការអភិវឌ្ឍឲ្យកាន់តែមានការរីកចម្រើនបន្ថែមទៀត ក្នុងមូលដ្ឋានជនបទរបស់បងប្អូនប្រជាពលរដ្ឋអតីតយុទ្ធជន ក្នុងភូមិស្រះទឹកតេជោសែនជ័យ ឃុំចុងកាល់ ស្រុកចុងកាល់ ខេត្តឧត្តរមានជ័យ ស្ថិតនៅចំណុចទីតាំងដីសម្បទានសង្គមកិច្ច នាព្រឹកថ្ងៃទី៩កក្កដា ឆ្នាំ២០២៥នេះ ឯកឧត្តម ប៊ុន ច័ន្ទវណ្ណៈ រដ្ឋលេខាធិការក្រសួងអភិវឌ្ឍន៍ជនបទ និងមានការចូលរួមពីអាជ្ញាធរ ខេត្ត ស្រុកចុងកាល់ បានចុះបើកដ្ឋានស្ថាបនាផ្លូវក្រាលដីគ្រួសល្បាយមួយខ្សែ មាន៤កំណាត់ ប្រវែង៩០០០ម៉ែត្រ ទទឹង៨ម៉ែត្រ កម្រាស០,២ម៉ែត្រ និងសងលូមូលចំនួន៦កន្លែង លូមុខពីចំនួន២កន្លែង ដែលជាអំណោយដ៏ថ្លៃថ្លារបស់ប្រមុខរាជរដ្ឋាភិបាលកម្ពុជា ផ្តល់ជូនបងប្អូនអតីតយុទ្ធជន។ក្នុងពិធីនោះដែរឯកឧត្តម ប៊ុន ច័ន្ទវណ្ណៈ រដ្ឋលេខាធិការក្រសួងអភិវឌ្ឍន៍ជនបទ មានប្រសាសន៍ថា ផ្លូវ មួយខ្សែដែលដែលស្ថាបនាជូនបងប្អូនពលរដ្ឋនាឱកានេះ គឺជាអំណោយដ៏ថ្លៃថ្លារបស់សម្តេចធិបតីនាយករដ្ឋមន្រ្តីនៃកម្ពុជា ដើម្បីធ្វើការអភិវឌ្ឍតំបន់នេះ ឲ្យកាន់តែមានការរីកចម្រើនបន្ថែមទៅមុខទៀតក្នុងមូលដ្ឋានរស់នៅរបស់បងប្អូនអតីតយុទ្ធជន។ឯកឧត្តមបានបន្តថា ក្នុងនោះដែរមិនត្រឹមតែបងប្អូនទទួលផ្លូវ នោះទេ គឺមានប្រព័ន្ធទឹក ប្រព័ន្ធភ្លើងអគ្គីសនី និងមណ្ឌលសុខភាព សាលារៀន ផ្សារ និងវត្តអារាមផងដែរ ក្នុងមូលដ្ឋានរបស់បងប្អូន។ទាំងអស់នេះគឺជាការគិតគូរ និងយកចិត្តទុកដាក់ខ្ពស់ពីរាជរដ្ឋាភិបាលកម្ពុជាមកលើបងប្អូនប្រជាពលរដ្ឋដែលជាអតីតយុទ្ធជន គ្រប់ៗគ្នា។ឯកឧត្តម បានឲ្យដឹងថា បន្ទាប់ពីបងប្អូនទទួលបាននូវការស្ថាបនាផ្លូវទាំងអស់នេះហើយ សូមបងប្អូននាំគ្នាចូលរួមថែរក្សាផ្លូវនេះ ឲ្យគង់វង្សយូរអង្វែង ព្រោះវាជាសម្បត្តិ និងផលប្រយោជន៍រួមរបស់បងប្អូនក្នុងមូលដ្ឋានផងដែរ៕ ឃិនសារិទ្ធ

អាជ្ញាធរមូលដ្ឋានប្ដេជ្ញាបន្ថែមការយកចិត្តទុកដាក់បម្រើពលរដ្ឋឱ្យបានល្អ ពិសេសការអនុវត្តគោលនយោបាយភូមិឃុំមានសុវត្ថិភាព

បណ្តាមេភូមិនៅតាមមូលដ្ឋាន បានប្ដេជ្ញាបន្ថែមការយកចិត្តទុកដាក់បម្រើពលរដ្ឋឱ្យកាន់តែល្អប្រសើរ ពិសេសការអនុវត្តគោលនយោបាយភូមិឃុំមានសុវត្ថិភាពឱ្យមានប្រសិទ្ធិភាព ។ នាព្រឹកថ្ងៃទី៩ ខែកក្កដា ឆ្នាំ២០២៥នេះ រដ្ឋបាលខណ្ឌ៧មករា បានធ្វើពិធីជួបសំណេះសំណាលជាមួយមេភូមិទាំង៦៦ភូមិ ក្នុងមូលដ្ឋានរបស់ខ្លួន ដើម្បីស្ទង់មតិយោបល់ និងផ្តល់បទពិសោធថ្មីៗ ជាទុនសម្រាប់មេភូមិទាំងអស់យកទៅអនុវត្តកិច្ចការងារជាមួយពលរដ្ឋឱ្យមានគុណភាព និងប្រសិទ្ធិភាព។ ពិធីសំណេះសំណាលនេះ ធ្វើឡើងក្រោមវត្តមានលោកថេង សុថុល អភិបាលខណ្ឌ៧មករា និងមានការអញ្ចើញចូលរួមពីលោកលោកស្រីអភិបាលរងខណ្ឌ លោកអធិការ មេបញ្ជាការ និងលោកចៅសង្កាត់ទាំង៨ផងដែរ ។ លោក ថេង សុថុល អភិបាលខណ្ឌ៧មករា បានមានមតិសំណេះសំណាលប្រកបដោយភាពស្និទ្ធិស្នាល និងផ្តល់នូវយោបល់អប់រំណែនាំផ្សេងៗជាច្រើន ទៅដល់បណ្តាមេភូមិទាំងអស់ដែលកំពុងមានវត្តមានក្នុងអង្គពិធី ដើម្បីបង្កើនការខិតខំប្រឹងប្រែងយកចិត្តទុកដាក់ជាមួយប្រជាពលរដ្ឋគ្រប់ពេលវេលា ពិសេសរាល់ពេលពលរដ្ឋមានបញ្ហានានា មិនថាបញ្ហាតូច ឬធំនោះទេ ។ ក្នុងករណីបញ្ហានោះ មេភូមិមិនអាចដោះស្រាយបាន ឬផុតដែនសមត្ថភាពរបស់ខ្លួន ត្រូវរាយការណ៍មកកាន់ថ្នាក់លើ ដើម្បីសុំគោលការណ៍ និងការអន្តរាគមន៍ដោះស្រាយឱ្យបានទាន់ពេលវេលាជូនពលរដ្ឋ បញ្ចៀសបានការទុកបញ្ហាចោល ដោយប្រឈរភ្នែកមើលមិនព្រមដោះស្រាយ។បណ្តាមេភូមិចំណុះរដ្ឋបាលសង្កាត់អូរឫស្សីទី៣ នៃខណ្ឌ៧មករា ក៏បានបញ្ចាក់គោលជំហរមុខមាំ ក្នុងការខិតខំបំពេញភារកិច្ចខ្លួន ជូនពលរដ្ឋ ឱ្យស្របទៅនឹងយុទ្ធសាស្ត្រ និងគោលនយោបាយរបស់រាជរដ្ឋាភិបាលកម្ពុជា ។ ក្នុងឱកាសដដែលនោះ លោក ថេង សុថុល អភិបាលខណ្ឌ៧មករា ក៏បានណែនាំឱ្យមេភូមិទាំងអស់យកចិត្តទុកដាក់លើបញ្ហា ផ្លូវថ្នល់ផងដែរ ពិសេសជង្ហុកសំបុកមាន់ ដែលជាផ្លូវខូចតូចៗ ត្រូវជួសជុលឱ្យបានស្អាត បើខូចធំចាំបាច់ត្រូវរាយការណ៍មកថ្នាក់លើដើម្បីចុះទៅជួសជុល ព្រោះខណ្ឌ៧មករា ជាខណ្ឌនៅកណ្តាលរាជធានីភ្នំពេញ ដូច្នោះហើយរាល់ដងផ្លូវត្រូវតែធានាភាពស្អាត និងបរិស្ថានអនាម័យល្អឱ្យសាកសមជាទីក្រុងដែលជាបេះដូង នៃប្រទេសជាតិ៕ កុម្ភៈ

អភិបាលខេត្តប៉ៃលិន អន្តរាគមន៍យកពលករខ្មែរម្នាក់ មានជំងឺធ្ងន់ធ្ងរ ចេញពីប្រទេសថៃ ក្រោយត្រូវបានគេទុកចោលមិនព្យាបាល

ប៉ៃលិន៖ បន្ទាប់ពីទទួលបានព័ត៌មានថា មានពលករខ្មែរម្នាក់កំពុងមានជំងឺធ្ងន់ធ្ងរនៅប្រទេសថៃ និងត្រូវ បានគេទុកចោលមិនព្យាបាល លោកជំទាវបណ្ឌិត បាន ស្រីមុំ អភិបាលខេត្តប៉ៃលិន បានចាត់ឱ្យមន្ត្រីជំ នាញច្រកទ្វារព្រំដែនអន្តរជាតិព្រំ និងក្រុមគ្រូពេទ្យ សម្របសម្រួលយកពលករខ្មែរនោះចេញមកព្យាបាល ភ្លាមៗ ដោយមិនទុកពលករខ្មែរយើងចោលនោះឡើយ ។ពលករមានជំងឺ ដែលថៃទុកចោលមិនព្យាបាល មានស្រុកកំណើតនៅខេត្តព្រៃវែង ជាពលករបេះ ផ្លែឈើនៅប្រទេសថៃ មានរោគសញ្ញាអស់កម្លាំង ឈឺក្បាល វិលមុខ រាគ ភ្នែកក្រហម ចេញកន្ទួក្រហម ពេញខ្លួន ហើយធ្លាប់មានជំងឺតេតាណុស ដែលបើតាមការសន្និដ្ឋានបឋមរបស់ក្រុមគ្រូពេទ្យប្រចាំការនៅ ច្រកទ្វារព្រំដែនអន្តរជាតិព្រំ អាចជាជំងឺគ្រុនឈាម ឬជំងឺគ្រុនឈិក។លោក ប៉ិច ប៊ិន ប្រធានទីស្នាក់ការច្រកទ្វារព្រំដែនអន្តរជាតិព្រំ ខេត្តប៉ៃលិន បានឱ្យដឹងថា ការអន្តរាគមន៍ យកពលករខ្មែរមានជំងឺចេញពីប្រទេសថៃ ដែលក្រុមគ្រូពេទ្យប្រទេសនេះមិនទទួលព្យាបាល ក្រោយមានបញ្ហាជម្លោះព្រំដែនកើតឡើងនោះ បានសបញ្ជាក់ឱ្យឃើញពីការយកចិត្តទុកដាក់ខ្ពស់ចំពោះ សុខទុក្ខរបស់ពលករចំណាកស្រុកធ្វើការនៅប្រទេសថៃ របស់លោកជំទាវបណ្ឌិត បាន ស្រីមុំ អភិបាលខេត្ត ហើយសកម្មភាពនេះ មិនត្រឹមតែជាការលើកទឹកចិត្តប៉ុណ្ណោះទេ ប៉ុន្តែថែមទាំងជាសកម្មភាពជាក់ស្តែង ក្នុង ការជួយដោះស្រាយបញ្ហាប្រឈមនានា ដែលពលករបានជួបប្រទះ តាមការណែនាំដ៏ខ្ពង់ខ្ពស់របស់ប្រមុខ រាជរដ្ឋាភិបាលកម្ពុជា សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ៕

កងរាជអាវុធហត្ថបានរួមចំណែកយ៉ាងសកម្មក្នុងកិច្ចការពារជាតិ និងសន្តិសុខ សណ្តាប់ធ្នាប់ជូនពលរដ្ឋ

រយៈពេល ៣២ឆ្នាំក្រោយបង្កើតកងរាជអាវុធហត្ថលើផ្ទៃប្រទេស ពោលគឺថ្ងៃទី១៤ កក្កដា ឆ្នាំ១៩៩៣-ថ្ងៃទី១៤ កក្កដា ឆ្នាំ២០២៥ កងរាជអាវុធហត្ថបានចូលរួមយ៉ាងសកម្មក្នុងកិច្ចការពារសន្តិសុខ សណ្តាប់ធ្នាប់ ការពារជាតិ សាសនា ព្រះមហាក្សត្រ និងការពាររាជរដ្ឋាភិបាលស្របច្បាប់កើតចេញពីការបោះឆ្នោត ហើយនឹងប្តេជ្ញាបន្តអនុវត្តឲ្យបានម៉ឺងម៉ាត់បំផុតរាល់បទបញ្ជារបស់រាជរដ្ឋាភិបាល ទប់ស្កាត់រាល់ឧបាយកលនានារបស់ពួកបច្ចាមិត្ត ដែលប្រឆាំងនឹងផលប្រយោជន៍ប្រទេសជាតិ និងប្រជាជន ។ថ្លែងក្នុងសន្និសីទសារព័ត៌មាន ស្តីពីការប្រារព្ធខួបលើកទី៣២ឆ្នាំ នៃការបង្កើតកងរាជអាវុធហត្ថ និងសម្ពោធនូវសមិទ្ធផលនានានៅមជ្ឈមណ្ឌលហ្វឹកហ្វឺនកងរាជអាវុធហត្ថភ្នំជុំសែនរីករាយស្ថិតនៅខេត្តកំពង់ឆ្នាំង ដែលនឹងប្រព្រឹត្តទៅនាថ្ងៃទី១៤ ខែកក្កដា ឆ្នាំ២០២៥ខាងមុខនេះក្រោមអធិបតីភាព សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជានោះ អ្នកនាំពាក្យកងរាជអាវុធហត្ថលើផ្ទៃប្រទេស លោកឧត្តមសេនីយ៍ អេង ហ៊ី បានឲ្យដឹងថា តាំងពី បង្កើតមកកងរាជអាវុធហត្ថបានការពារសន្តិសុខ សណ្តាប់ធ្នាប់ ការពារបូរណភាពទឹកដឹក និងអធិបតេយ្យភាពខ្មែ ការងារសង្រ្គោះគ្រោះមហន្តរាយ រួមទាំងបានរួមចំណែកសកម្មភាព មនុស្សធម៌ជាច្រើនទៀតផងដែរ ជាមួយរាជរដ្ឋាភិបាល និងសម្បុរសជនដទៃទៀតនោះ។បើតាមលោកឧត្តមសេនីយ៍ អេង ហ៊ី បានលើកឡើងផងដែរថា កងរាជអាវុធហត្ថ ជាកម្លាំងប្រដាប់អាវុធមួយដែលស្ថិតនៅក្រោមបញ្ជាផ្ទាល់របស់នាយករដ្ឋមន្ត្រី ហើយបេសកកម្មចម្បងរបស់កងរាជអាវុធហត្ថ គឺបម្រើ ការពារ និងសង្គ្រោះ ដោយឈរលើតួនាទីជាមូលដ្ឋានសំខាន់ៗជាច្រើនដូចជា តួនាទីជានគរបាលរដ្ឋបាល,ជានគរបាលយុត្តិធម៌ និងបំពេញបេសកកម្មពិសេសផ្នែកយោធា រួមទាំងកិច្ចការងារជាច្រើនទៀត។អ្នកនាំពាក្យរូបនេះ បានឲ្យដឹងផងដែរថា កងរាជអាវុធហត្ថក៏មានតួនាទីដឹកនាំ និងចូលរួមទប់ស្កាត់បទល្មើសព្រៃឈើ និងទប់ស្កាត់បទល្មើសនេសាទ និងប្រយុទ្ធប្រឆាំងបទល្មើសគ្រឿងញៀន បទល្មើសបច្ចេកវិទ្យាអនឡាញ ទប់ស្កាត់អំពើជួយដូរមនុស្ស និងបទឧក្រិដ្ឋកម្មជាច្រើនទៀតផងដែរ ដើម្បីភាពសុខសាន្តរបស់ប្រជាពលរដ្ឋ និងប្រទេសជាតិទាំងមូលនោះ៕ អត្ថបទ៖ បាន ចក់

ក្រសួងមុខងារសាធារណៈបាននឹងកំពុងពិនិត្យឡើងវិញ ដើម្បីកែលម្អបែបបទ និងនីតិវិធីការបើកផ្តល់បៀវត្ស និងប្រាក់ឧបត្ថម្ភដល់មន្រ្ដីរាជការ

ភ្នំពេញ៖ ក្រសួងមុខងារសាធារណៈនៅថ្ងៃទី៩ ខែក្កដា ឆ្នាំ២០២៥នេះ បានឱ្យដឹងថា ក្រសួងបាននឹងកំពុងពិនិត្យឡើងវិញដើម្បីកែលម្អបែបបទ និងនីតិវិធីការបើកផ្តល់បៀវត្ស និងប្រាក់ឧបត្ថម្ភដល់មន្រ្ដីរាជការ ពិសេសតាមរយៈការអភិវឌ្ឍប្រព័ន្ធឌីជីថល ដើម្បីលើកកម្ពស់ប្រសិទ្ធភាពនៃការគ្រប់គ្រង និងការប្រើប្រាស់ថវិកាសម្រាប់បៀវត្ស និងប្រាក់ឧបត្ថម្ភឱ្យកាន់តែប្រសើរស្របតាមវិធានការកែទម្រង់របស់រាជរដ្ឋាភិបាល។ ក្រសួងមុខងារសាធារណៈ បានបញ្ជាក់នៅលើហ្វេសប៊ុកផ្លូវការរបស់ខ្លួនទៀតថា ក្នុងអាណត្តិរាជរដ្ឋាភិបាល នីតិកាលទី៧នៃរដ្ឋសភា ទន្ទឹមនឹងភាពមមាញឹកក្នុងការអនុវត្តវិធានការគន្លឹះក្នុងការកែទម្រង់រដ្ឋបាលសាធារណៈក្រោមការដឹកនាំផ្ទាល់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី ក្រសួងមុខងារសាធារណៈ ក៏បានប្រឹងប្រែងបំពេញការងារយ៉ាងសកម្មក្នុងការធានានូវការបើកផ្តល់បៀវត្សនិងប្រាក់ឧបត្ថម្ភផ្សេងៗជូនមន្ត្រីរាជការនិងមន្ត្រីជាប់កិច្ចសន្យា ស្របតាមគោលការណ៍រាជរដ្ឋាភិបាលនិងការធានានូវប្រសិទ្ធភាពនៃការគ្រប់គ្រងថវិការដ្ឋ។ ទី១៖ ការបើកផ្តល់បៀវត្សនិងប្រាក់ឧបត្ថម្ភ ត្រូវបានអនុវត្តតាមគណនីរបស់មន្ត្រី ទាន់ពេលវេលា ទៀងទាត់ និងរៀងរាល់២សប្តាហ៍ម្តង។ ដោយឡែកនៅក្នុងខែដែលមានពិធីចូលឆ្នាំថ្មីប្រពៃណីជាតិនិងបុណ្យភ្ជុំបិណ្ឌ មន្ត្រីរាជការនិងមន្ត្រីជាប់កិច្ចសន្យា ទទួលបានបៀវត្សនិងប្រាក់ឧបត្ថម្ភ មុនពេលពិធីបុណ្យ និង ទទួលបានការបើកផ្តល់មុនកាលកំណត់ថែមទៀតនៅក្រោយពិធីបុណ្យ។ ការរៀបចំបើកផ្តល់ទាន់ពេល ទៀងទាត់ និងឆាប់រហ័សនេះ បានបង្ហាញនូវការយកចិត្តទុកដាក់ខ្ពស់និងជាប្រចាំរបស់រាជរដ្ឋាភិបាលចំពោះជីវភាពរស់នៅ និងសេចក្តីត្រូវប្រចាំថ្ងៃរបស់មន្ត្រីរាជការ និងមន្ត្រីជាប់កិច្ចសន្យា។ ទី២៖ ការគ្រប់គ្រងការបើកផ្តល់បៀវត្ស និងប្រាក់ឧបត្ថម្ភប្រកបដោយប្រសិទ្ធភាព និងការធានានូវការប្រើប្រាស់ថវិកាដោយត្រឹមត្រូវ។ ក្រសួងមុខងារសាធារណៈ ដោយមានកិច្ចសហការពីក្រសួង ស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ បានរៀបចំនូវយន្តការតាមដាន និងត្រួតពិនិត្យជាប្រចាំ លើការបើកផ្តល់បៀវត្ស និងប្រាក់ឧបត្ថម្ភផ្សេងៗ ដើម្បីធានាថា ថវិកាសម្រាប់បៀវត្សនិងប្រាក់ឧបត្ថម្ភផ្សេងៗ ត្រូវបានប្រើប្រាស់ដោយត្រឹមត្រូវ និងចំគោលដៅកំណត់ដោយលិខិតបទដ្ឋានគតិយុត្តរបស់រាជរដ្ឋាបាល។ ក្នុងស្ថានភាពដែលមានការបើកបៀវត្ស ឬប្រាក់ឧបត្ថម្ភមិនស្របតាមគោលការណ៍ ដោយហេតុការផ្តល់ព័ត៌មានដល់អង្គភាពមិនទាន់ពេលវេលាពាក់ព័ន្ធនឹងការប្រែប្រួលស្ថានភាពមន្ត្រីឬការបំពេញឯកសារមិនបានស្របតាមការកំណត់ ដូចជាករណី មរណភាព ការស្ថិតក្នុងភាពទំនេរគ្មានបៀវត្ស ការស្ថិតក្រៅក្របខ័ណ្ឌដើម ការចូលនិវត្តន៍ ការឈប់សម្រាកពីការងារជាដើម ត្រូវបានតាមដាននិងត្រួតពិនិត្យជាប្រចាំដោយក្រសួងមុខងារសាធារណៈ។ ករណីមានការបើកហួស ក្រសួងមុខងារសាធារណៈបានជំរុញឱ្យអង្គភាពនៃក្រសួង ស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិធ្វើការបង្វិលសាច់ប្រាក់ចូលក្នុងថវិកាជាតិវិញ។ កិច្ចការនេះ ត្រូវបានយកចិត្តទុកដាក់ និងអនុវត្តជាប្រចាំ។ ក្រសួងបានបញ្ជាក់ថា៖«ក្រសួងបាននិងកំពុងពិនិត្យឡើងវិញដើម្បីកែលម្អបែបបទ និងនីតិវិធីនៃការបើកផ្តល់បៀវត្ស និងប្រាក់ឧបត្ថម្ភ ពិសេសតាមរយៈការអភិវឌ្ឍប្រព័ន្ធឌីជីថលនៃការបើកផ្តល់បៀវត្សនិងប្រាក់ឧបត្ថម្ភ ដើម្បីលើកកម្ពស់ប្រសិទ្ធភាពនៃការគ្រប់គ្រង និងការប្រើប្រាស់ថវិកាសម្រាប់បៀវត្ស និងប្រាក់ឧបត្ថម្ភឱ្យកាន់តែប្រសើរស្របតាមវិធានការកែទម្រង់របស់រាជរដ្ឋាភិបាល»៕

ឯកឧត្តម ស៊ុន ចាន់ថុល អំពាវនាវដល់ម្ចាស់រោងចក្រសូមរក្សាភាពស្ងាត់ស្ងៀម និងជឿជាក់លើរាជរដ្ឋាភិបាលដែលកំពុងខិតខំប្រឹងប្រែង

ឯកឧត្តម ស៊ុន ចាន់ថុល អំពាវនាវដល់បណ្តាម្ចាស់រោងចក្រ សហគ្រាសនៅកម្ពុជាទាំងអស់ សូមរក្សានូវភាពស្ងាត់ស្ងៀម និងសូម ជឿទុកចិត្តលើរាជរដ្ឋាភិបាល ដែលបាននិងកំពុងបន្តខិតខំប្រឹងប្រែងការពារផលប្រយោជន៍របស់បងប្អូន តាមរយៈការបន្តចរចារពន្ធ បដិការជាមួយអាមេរិក និងការបើកទីផ្សារថ្មីៗបន្ថែម។ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា លើកឡើងនៅក្នុងសន្និសីទសារព័ត៌ មាន ស្ដីអំពីពន្ធបដិការរបស់សហរដ្ឋអាមេរិក នៅទីស្ដីការក្រុមប្រឹក្សាអភិវឌ្ឍន៍កម្ពុជា នៅថ្ងៃទី៨ ខែកក្កដា ម្សិលមិញនេះថា ចំពោះ អត្រាពន្ធគយដែលសហរដ្ឋអាមេរិកបានកំណត់ ៣៦ ភាគរយ គឺមិនទាន់ចូលជាធរមាននោះឡើយ ដោយកម្ពុជានៅមានឱកាសចរចារ បន្ថែមទៀត ដើម្បីបន្ថូបន្ថយនូវអត្រាពន្ធបដិការ បញ្ហានេះក្រុមការងារចរចាលើពន្ធបដិការរវាងកម្ពុជានិងអាមេរិក គឺបាននិងកំពុងធ្វើ ការងារជាបន្តទៀត ក្នុងគម្រោងចេញទៅចរចារបន្ត ដើម្បីធ្វើយ៉ាងណាជំរុញបន្ធូរបន្ថយនូវអត្រាពន្ធនេះបន្ថែមទៀត។ឯកឧត្តមឧបនាយករដ្ឋមន្ត្រី ក៏បានអំពាវនាវដល់ម្ចាស់រោងចក្រ សហគ្រាសទាំងអស់ដែលកំពុងប្រតិបត្តិអាជីវកម្មនៅកម្ពុជា សូមរក្សានូវភាពស្ងាត់ស្ងៀម និងសូមកុំមានការជ្រួលច្របល់អ្វីទាំងអស់ ដោយរាជរដ្ឋាភិបាលកម្ពុជាមានលទ្ធភាពគ្រប់បែបយ៉ាង ដើម្បី ការពារនិយោជក-និយោជិត និងផលប្រយោជន៍របស់កម្ពុជា និងសូមជឿទុកចិត្តលើរាជរដ្ឋាភិបាល ក្រោមការដឹកនាំរបស់សម្តេចធិបតី នាយករដ្ឋមន្រ្តី ដែលបាននិងកំពុងបន្តខិតខំប្រឹងប្រែងការពារផលប្រយោជន៍ជាតិ។សូមបញ្ជាក់ថា នៅថ្ងៃទី៧ ខែកក្កដា ឆ្នាំ២០២៥ នេះ ប្រធានាធិបតីអាមេរិក គឺលោកដូណាល់ត្រាំ បានសម្រេចយកពន្ធគយបដិការ លើប្រទេសដៃគូពាណិជ្ជកម្មចំនួន ១៤ ក្នុងនោះរួមមាន៖ កម្ពុជា ៣៦%, ឥណ្ឌូណេស៊ី ៣២%, ថៃ ៣៦%, មីយ៉ាន់ម៉ា ៤០%, ឡាវ៤០%, ម៉ាឡេស៊ី ២៥%, បង់ក្លាដែស ៣៥%, ជប៉ុន ២៥%, សាធារណរដ្ឋកូរ៉េ ២៥%, ទុយនេស៊ី ២៥%, កាហ្សាក់ស្ថាន ២៥%, អាហ្វ្រិកខាងត្បូង ៣០%, ស៊ែប៊ី ៣៥%, បូស្នៀ និងហឺហ្សេហ្គោវីណា ៣០%៕ អត្ថបទ៖ សុន រ៉ាឌី

បណ្ដាញសង្គម

ព័ត៌មានថ្មីៗ

ការពិនិត្យឡើងវិញ៖ ភាពយន្តឯកសារពីតំបន់ហ្កហ្សារបស់ BBC បំពានគោលការណ៍ណែនាំអំពីភាពត្រឹមត្រូវ

មនុស្សជាច្រើននាក់ស្លាប់ក្នុងអគ្គិភ័យនៅមជ្ឈមណ្ឌលសង្គ្រោះ ក្នុងរដ្ឋ Massachusetts

ជំនួយការរបស់លោក Netanyahu ប្រឈមនឹងការចោទប្រកាន់ផ្លូវការ ជុំវិញការបែកធ្លាយព័ត៌មានយោធា

រដ្ឋមន្ត្រីការបរទេសអ៊ីស្រាអែល និងប៉ាឡេស្ទីន នឹងចូលរួមកិច្ចប្រជុំរបស់ EU

អ៊ីរ៉ង់៖ ការដាក់ទណ្ឌកម្មជាថ្មីរបស់ UN នឹងជួបជាមួយការឆ្លើយតបយ៉ាងសមស្រប

វិមានក្រឹមឡាំង៖ ការបញ្ជូនអាវុធ និងគ្រាប់រំសេវទៅអ៊ុយក្រែនពីអាមេរិក កំពុងបន្តមានធម្មតា

នគរបាលឃាត់ខ្លួនមនុស្ស ៨នាក់ ក្រោយមានការប៉ះទង្គិចរបស់ក្រុមប្រឆាំងជនអន្តោប្រវេសន៍ ក្នុងទីក្រុងនៅអេស្ប៉ាញ

EU នឹងត្រៀមបញ្ជីពន្ធ ២៤,៥២ពាន់លានដុល្លារ សម្រាប់ទំនិញរបស់អាមេរិក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

ទំនប់អូរតេធិបតី ត្រៀមផ្គត់ផ្គង់ទឹកស្អាតជូនពលរដ្ឋរាប់ពាន់គ្រួសារបន្ថែមទៀតក្នុងខេត្តមណ្ឌលគិរី

កងរាជអាវុធហត្ថបានរួមចំណែកយ៉ាងសកម្មក្នុងកិច្ចការពារជាតិ និងសន្តិសុខ សណ្តាប់ធ្នាប់ជូនពលរដ្ឋ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

ទំនប់អូរតេធិបតី ត្រៀមផ្គត់ផ្គង់ទឹកស្អាតជូនពលរដ្ឋរាប់ពាន់គ្រួសារបន្ថែមទៀតក្នុងខេត្តមណ្ឌលគិរី

កងរាជអាវុធហត្ថបានរួមចំណែកយ៉ាងសកម្មក្នុងកិច្ចការពារជាតិ និងសន្តិសុខ សណ្តាប់ធ្នាប់​ជូន​ពលរដ្ឋ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

កងរាជអាវុធហត្ថបានរួមចំណែកយ៉ាងសកម្មក្នុងកិច្ចការពារជាតិ និងសន្តិសុខ សណ្តាប់ធ្នាប់ជូនពលរដ្ឋ