នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
មូលនិធិគន្ធបុប្ផាកម្ពុជាប្រកាសបើកយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៥ ចាប់ពីដើមខែក្រោយ
សមាគមខ្មែរនៅប្រទេសកូរ៉េខាងត្បូង នាំយកសិល្បៈវប្បធម៌ខ្មែរ ទៅបង្ហាញក្នុងពិធីបុណ្យវប្បធម៌ពិភពលោក ក្រុងហ្វាសង់លើកទី១៨
លោកជំទាវ ហ៊ុន ម៉ាណា អញ្ជើញដឹកនាំក្រុមគ្រូពេទ្យស្ម័គ្រចិត្តចុះពិនិត្យ និងព្យាបាលជំងឺជូនបងប្អូនប្រជាពលរដ្ឋ កងទ័ព គ្រួសារកងទ័ព នៅខេត្តស្ទឹងត្រែង
ការប្រឡងជ្រើសរើសមន្ត្រីឱ្យចូលបម្រើការនៅអគ្គលេខាធិការដ្ឋានក្រុមប្រឹក្សាអ្នកច្បាប់ (វិញ្ញាសាសរសេរលើកទី១) បញ្ចប់ទៅដោយរលូន ខណៈដំណើរ​ការ​កែ​សន្លឹក​កិច្ចការ​ នឹង​ចាប់​ផ្តើម​នៅ​ព្រឹកស្អែក

ព័ត៌មានជាតិ

រដ្ឋមន្រ្ដីក្រសួងអប់រំ៖ សកម្មភាពកាយរឹទ្ធិកំពុងរួមចំណែកប្រែក្លាយកូនខ្មែរឱ្យមានឆន្ទៈការពារជាតិមាតុភូមិ

2025/03/12 01:20:33 pm        259
Facebook Telegram Linkin
ឯកឧត្តម បណ្ឌិតសភាចារ្យ ហង់ ជួនណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំយុវជន និង​កីឡា បានមានប្រសាសន៍ ជំរុញឱ្យគ្រឹះស្ថានឧត្តមសិក្សា បង្កើន​ការ​ចលនា​សកម្មភាព​យុវជន​កាយរឹទ្ធិ​ឲ្យបានច្រើន និងមានបុគ្គលិកលក្ខណៈពេញលេញដល់យុវជននិស្សិតកំពុងសិក្សា ខណៈ​​ការងារនេះកំពុងរួមចំណែកយ៉ាងសកម្មប្រែក្លាយពួកគេទៅជា ពលរដ្ឋល្អ ជាពលរដ្ឋសកល និង​មាន​ស្មារតីស្រឡាញ់ជាតិ ការពារមាតុភូមិ និងការអភិវឌ្ឍសង្គមកម្ពុជា ។នៅក្នុងពិធីបិទវគ្តតម្រង់ទិសកាយរឹទិ្ធកម្ម សច្ចាប្រណិធាន និង​បំពាក់​កន្សែង​ជូន​នូវ​កាយ​រឹទិ្ធ​រៀម​ច្បង នៃកងឯកភាពសាកលវិទ្យាល័យជាតិគ្រប់គ្រង ថ្ងៃទី១២ ខែមីនានេះ ឯកឧត្តម ឧបនាយក​រដ្ឋ​មន្ត្រី ហង់ ជួនណារ៉ុន ក្នុងនាមប្រធានកាយរឹទ្ធិជាតិកម្ពុជា ថ្លែងថា បេសកកម្ម​របស់​កាយ​រឹទិ្ធ​ជាតិ​កម្ពុជា គឺពិតជាបានឆ្លើយតបយ៉ាងវិជ្ជមាន និងមានប្រសិទ្ធភាពបំផុត លើការងារ​លើក​កម្ពស់​គុណ​ភាព​អប់រំ ផ្តោតលើការពង្រឹងគុណភាពសាលារៀនរដ្ឋ ដោយកែប្រែទៅជាសាលារៀនគំរូ ចាប់​ពី​ថ្នាក់មត្តេយ្យសិក្សាដល់មធ្យមសិក្សា។ឯកឧត្តមឧបនាយករដ្ឋមន្ត្រី បន្តថា ការអប់រំបែបកាយរឹទិ្ធកម្ម ត្រូវដាក់បញ្ចូល​ទៅ​ក្នុង​សកម្មភាព​ក្រៅ​ម៉ោង​សិក្សា ក្នុងការពង្រឹងវិន័យ សីលធម៌ ចរិយាធម៌ សុជីវធម៌ គុណធម៌ និងឥរិយាបថ​ល្អរ​បស់​សិស្សនៅតាមសាលារៀនគំរូ ហើយការរៀបចំ “ក្លឹបកាយរឹទិ្ធ” និង “រចនាសម្ព័ន្ធកងល្បាត” នៅ​តាមគ្រឹះស្ថានសិក្សា ចាប់ពីកម្រិតបឋមសិក្សា រហូតដល់កម្រិតឧត្តមសិក្សា គឺពិត​ជា​បាន​ចូល​រួម​ចំណែកក្នុងការបណ្តុះបណ្តាល ការអភិវឌ្ឍបុគ្គលិកលក្ខណៈពេញលេញ និងបំណិន​សតវត្សរ៍​ទី២១ ដល់​យុវជននិងកុមារ ដើម្បីប្រែក្លាយពួកគេទៅជា ពលរដ្ឋល្អ ជាពលរដ្ឋសកល និងមាន​ស្មារតី​ស្រឡាញ់ជាតិ ការពារមាតុភូមិ និងការអភិវឌ្ឍសង្គមកម្ពុជា។ ឯកឧត្តម​បណ្ឌិតសភាចារ្យ ហង់ ជួនណារ៉ុន ថ្លែងថា បច្ចុប្បន្ននេះ ទូទាំងប្រទេស កាយរឹទិ្ធ​ជាតិ​កម្ពុជា មានសមាជិកសរុប ១៨ម៉ឺន៥ ៣៥៦នាក់ ស្រី ៩ម៉ឺន១ ០៣៨នាក់ ស្មើនឹងជាង​៤៩​ភាគ​រយ ហើយបាននិងកំពុងចូលរួមយ៉ាងសកម្ម តាមរយៈ កម្មវិធីអប់រំក្រៅប្រព័ន្ធ ការអប់រំ​តាម​បែប​កាយ​រឹទិ្ធកម្ម និងបានគាំទ្រយ៉ាង​ពេញ​ទំហឹង​ដល់ក​ម្ម​វិធី​សិក្សា​ក្រៅ​ម៉ោង​បន្ថែម​នៅ​ក្នុង​ស្តង់​ដា​សាលា​រៀន​គំរូ។ ឯកឧត្តម សាស្ត្រាចារ្យ ហោ ប៉េង សកលវិទ្យាធិការសកលវិទ្យាល័យជាតិគ្រប់គ្រង ថ្លែងថា នៅ​ថ្ងៃនេះ មានសិស្សនិស្សិតសកលវិទ្យាល័យជាតិគ្រប់គ្រងជាង៣០០នាក់ ស្រី២០៥នាក់ បាន​ធ្វើ​សច្ចា​ប្រណិធាន និងបំពាក់កន្សែងចូលជាសមាជិកយុវជនកាយរឹទ្ធិរៀមច្បងជំនាន់ទី៧ ខណៈ​ចាប់​ពី​ឆ្នាំ​២០១២ មកដល់បច្ចុប្បុន្ន នៅក្នុងសកលវិទ្យាល័យជាតិគ្រប់គ្រងទាំងមូល មាន​យុវជន​កាយ​រឹទ្ធិសរុប ១៣១៦នាក់៕ អត្ថបទ៖ ស៊ុម សុខជា 

ឯកឧត្តម ប៉ែន បូណា៖ «មានមនុស្សមួយចំនួនតូចជាពិសេស​ក្រុមប្រកាន់​មនោគមវិជ្ជា​ជ្រុលនិយម​ហួសហេតុហាក់ដូចជាកំពុងវង្វេងនៅលើវិថីប្រជាធិបតេយ្យ»

2025/03/12 12:27:18 pm        140
Facebook Telegram Linkin
ឯកឧត្តម ប៉ែន បូណា អ្នកនាំពាក្យរាជរដ្ឋាភិបាល នៅព្រឹកថ្ងៃទី១២ ខែមីនា ឆ្នាំ២០២៥នេះ បានមានប្រសាសន៍បញ្ជាក់ថា កម្ពុជាប្រកាន់យករបបនយោបាយប្រជាធិបតេយ្យ សេរីពហុបក្ស ដោយយកការបោះឆ្នោតជាយន្តការសម្រេចក្នុងការជ្រើសរើសមេដឹកនាំ។ ការបោះឆ្នោតត្រូវធ្វើឡើងជាទៀងទាត់រយៈពេល៥ឆ្នាំម្តង ទាំងថ្នាក់ជាតិ និងក្រោមជាតិ ដោយកំណត់យកមតិភាគច្រើនជាអ្នកឈ្នះ និងដឹកនាំប្រទេស។ ដំណើរការប្រជាធិបតេយ្យបាននិងកំពុងប្រព្រឹត្តទៅយ៉ាងរលូនប្រកបដោយសុខសន្តិភាព និងកាន់តែចាក់គ្រឹះរឹងមាំជាលំដាប់នៅលើទឹកដីកម្ពុជា។ឯកឧត្តមបានថ្លែងថា ក្នុងរបបប្រជាធិបតេយ្យ គេទទួលស្តាប់មតិភាគតិច តែការសម្រេច គឺនៅលើមតិភាគច្រើន មានន័យថា គ្មានក្រុមណាមួយត្រូវបានទាត់ចោលទេ។ អ្នកនៅក្នុងក្រុមមតិភាគតិចក៏មានសិទ្ធិបញ្ចេញមតិ និងលើកពីសំណូមពរនានាបានដែរ។ ប្រសិនបើមតិយោបល់ឬសំណូមពរទាំងនោះសមហេតុផល ក្រុមមតិភាគច្រើនអាចយកទៅពិចារណាដើម្បីជាធាតុចូលឬដោះស្រាយតាមការជាក់ស្តែង។ ប៉ុន្តែ ប្រសិនបើមតិយោបល់នោះមិនសមហេតុផលឬគ្រាន់តែដើម្បីបម្រើមហិច្ឆតានយោបាយផ្ទាល់ខ្លួនដូចដែលក្រុមមនុស្សមួយចំនួនបានធ្វើ គ្មានការចាំបាច់ដែលត្រូវលើកយកមកពិចារណាឡើយ។ បើតាម ឯកឧត្តម ប៉ែន បូណា នៅកម្ពុជា មានមនុស្សមួយចំនួនតូច ជាពិសេសក្រុមដែលប្រកាន់មនោគមន៍វិជ្ជាជ្រុលនិយមហួសហេតុ ហាក់ដូចជាកំពុងវង្វេងនៅលើវិថីប្រជាធិបតេយ្យនេះ ដោយពួកគេហៅខ្លួនឯងថា «អ្នកប្រជាធិបតេយ្យ» ប៉ុន្តែ អ្វីដែលពួកគេធ្វើផ្ទុយស្រឡះពីគន្លងប្រជាធិបតេយ្យ។ ជាក់ស្តែង ពួកគេចាញ់ឆ្នោតតែបែរជាដេញអ្នកឈ្នះឆ្នោតឱ្យចុះចេញពីតំណែង។ ពួកគេកៀរគរមនុស្សមួយចំនួនតូចដែលពេលខ្លះមិនដល់១%ផង ឱ្យធ្វើបាតុកម្មហើយដាក់សម្ពាធលើរាជរដ្ឋាភិបាលឱ្យធ្វើតាមអ្វីដែលខ្លួនចង់បាន។ អាក្រក់ជាងនេះ ពួកគេប៉ុនប៉ងប្រើកម្លាំងក្រៅច្បាប់ដែលហៅថា ចលនា «បដិវត្តន៍ពណ៌» ដើម្បីផ្តួលរំលំរាជរដ្ឋាភិបាលស្របច្បាប់ ដែលកើតចេញពីការបោះឆ្នោត។ឯកឧត្តមបន្តថក្រៅពីនោះ នៅមានក្រុមអង្គការសង្គមស៊ីវិលមួយចំនួនដែលបង្កើតឡើងដោយមនុស្សមួយក្រុមតូច បែរជាតាំងខ្លួនជាតំណាងប្រជាពលរដ្ឋហើយដាក់សម្ពាធទៅលើរាជរដ្ឋាភិបាលឱ្យធ្វើតាមអ្វីដែលខ្លួនចង់បាន។ ក៏ដូចជាក្រុមអ្នកនយោបាយជ្រុលនិយមដែរ ក្រុមអង្គការសង្គមស៊ីវិលលម្អៀងទាំងនោះតែងយករឿងអវិជ្ជមានតិចតួចដែលកើតឡើងក្នុងសង្គមទៅធ្វើជាមូលដ្ឋានក្នុងការវាយតម្លៃសភាពការណ៍ទូទាំងប្រទេសដោយមិនខ្វល់ទាល់តែសោះពីចំណុចវិជ្ជមានដ៏ច្រើនលើសលប់ដែលរាជរដ្ឋាភិបាលសម្រេចបាន។ឯកឧត្តម ប៉ែន បូណា រម្លឹកថា ដើម្បីពង្រឹងប្រជាធិបតេយ្យនៅកម្ពុជា ជម្រើសមានតែមួយគត់ គឺការប្រើប្រាស់យន្តការបោះឆ្នោតដោយគោរពតាមការសម្រេចចិត្តរបស់ប្រជាពលរដ្ឋភាគច្រើន និងគោរពច្បាប់កម្ពុជា។ រាជរដ្ឋាភិបាលដែលកើតចេញពីការបោះឆ្នោតដែលទទួលសំឡេងគាំទ្រភាគច្រើនលើសលប់ពីប្រជាពលរដ្ឋមានការទទួលខុសត្រូវខ្ពស់និងមានគោលនយោបាយដែលត្រូវអនុវត្តតាមការសន្យាជាមួយម្ចាស់ឆ្នោត ដោយមិនអនុញ្ញាតឱ្យក្រុមណាមួយ មកបង្កភាពវឹកវរក្នុងសង្គមតាមទំនើងចិត្តបានឡើយ។ ឯកឧត្តមបញ្ជាក់ថា៖«ដូច្នេះ សូមអ្នកវង្វេងប្រជាធិបតេយ្យទាំងឡាយយល់ឱ្យច្បាស់និងគួរតែប្រញាប់កែខ្លួនជាបន្ទាន់ ពោលគឺ កែរបៀបធ្វើការឱ្យស្របតាមគោលការណ៍ប្រជាធិបតេយ្យ។ បើមិនដូច្នោះទេ ត្រូវកែឈ្មោះដោយមិនត្រូវតាំងខ្លួនជា «អ្នកប្រជាធិបតេយ្យ» ទៀតទេ ពីព្រោះអំពើរបស់អ្នកមិនឆ្លុះបញ្ចាំងពីគោលការណ៍ប្រជាធិបតេយ្យឡើយ តែវាគឺជាការបំផ្លាញប្រជាធិបតេយ្យទៅវិញទេ»៕

ដំរីអាស៊ីនៅតំបន់ព្រៃឡង់ មានលក្ខណៈធនធានសេនេទិចខ្ពស់ជាងជួរភ្នំក្រវាញ និងតំបន់ខាងកើត​នៃប្រទេសកម្ពុជា

2025/03/12 12:13:15 pm        184
Facebook Telegram Linkin
តាមរយៈសេចក្តីប្រកាសព័ត៌មានរបស់អង្គការសត្វព្រៃ និងរុក្ខជាតិកម្ពុជា ដែល BTV ទទួលបាននៅថ្ងៃទី១២ ខែមីនា ឆ្នាំ២០២៥នេះ បានឲ្យដឹងថា ការសិក្សាស្រាវជ្រាវជាលើកដំបូងដែលត្រូវបានបោះពុម្ពផ្សាយនៅក្នុងគេហទំព័រដ៏ល្បី PeerJ នៅថ្ងៃបានផ្តល់នូវទិន្នន័យការប៉ាន់ប្រមាណអំពីចំនួនដំរីអាស៊ីនៅតំបន់ខ្ពង់រាបភាគខាងជើង។ ការសិក្សានេះត្រូវបានធ្វើឡើងដោយអង្គការសត្វព្រៃ និងរុក្ខជាតិកម្ពុជា ក្នុងកិច្ចសហការជាមួយក្រសួងបរិស្ថាននៅឆ្នាំ២០២០ ដល់២០២១ នារដូវប្រាំង ដោយប្រើប្រាស់បច្ចេកទេសនៃការប្រមូលសំណាក DNA ដែលមិនមានផលប៉ះពាល់ដល់សត្វនៅតំបន់ការពារចំនួន៣គឺ សំខាន់ៗរួមមាន ដែនជម្រកសត្វព្រៃព្រៃឡង់ ដែនជម្រកសត្វព្រៃព្រះរកា និងដែនជម្រកសត្វព្រៃឆែប។ ការសិក្សាសេនេទិចនេះបានធ្វើឡើងនៅសាកលវិទ្យាល័យភូមិន្ទភ្នំពេញ ដោយមានការគាំទ្រផ្នែកបច្ចេកទេសពី Royal Zoological Society of Scotland។ សេចក្តីប្រកាសព័ត៌មានដដែល បានបន្តថា ក្រុមអ្នកស្រាវជ្រាវបានប៉ាន់ប្រមាណថា មានដំរីអាស៊ី ៥១ក្បាលរស់នៅក្នុងតំបន់ទាំងនេះ ដែលជាចំនួនច្រើនជាងការប៉ាន់ស្មានពីសិក្សាស្រាវជា្រវពីមុន ហើយដំរីអាស៊ីនៅតំបន់ទេសភាពព្រៃឡង់នេះ មានលក្ខណៈធនធានសេនេទិចខ្ពស់ជាងតំបន់ជួរភ្នំក្រវាញ និងតំបន់ខ្ពង់រាបខាងកើត ដែលជាកត្តាសំខាន់ក្នុងការបន្តរស់រានមានជីវិតនៃប្រភេទនេះក្នុងរយ:ពេលវែង។ ជាមួយនឹងទីជម្រកសមស្របដែលនៅសេសសល់ក្នុងតំបន់នេះ ដំរីអាស៊ីអាចនឹងវត្តមានកើនឡើង ប្រសិនបើតំបន់ទាំងនេះត្រូវបានការពារឲ្យបានតឹងរ៉ឹង។ការសិក្សាស្រាវជ្រាវនេះគឺជាការសិក្សាលើកទី២ ដែលមានការបោះពុម្ភផ្សាយក្នុងប្រទេសកម្ពុជា ដែលបានប្រើប្រាស់បច្ចេកទេសនៃការប្រមូលសំណាក DNA ក្នុងការប៉ាន់ប្រមាណអំពីទំហំនៃចំនួនដំរីអាស៊ី និងជាការសិក្សាដំបូងអំពីលក្ខណៈសេនេទិចលើប្រភេទដំអាស៊ី ដែលមិនធ្លាប់ធ្វើឡើងលើប្រភេទសត្វព្រៃណាមួយនៅក្នុងប្រទេសកម្ពុជា។ វាក៏ជាការស្រាវជ្រាវលើកដំបូងក្នុងប្រទេសកម្ពុជា ក្នុងពេលតែមួយនៃការវាយតម្លៃលើចំនួនដំរីអាស៊ី លក្ខណៈសេនេទិច និងភាពសមស្របនៃទីជម្រក។ ការសិក្សាទម្រង់បែបនេះមិនមានច្រើនឡើយនៅទូទាំងពិភពលោក ដែលធ្វើឱ្យការសិក្សាស្រាវជ្រាវនេះក្លាយជាគំរូដ៏មានសក្តានុពលសម្រាប់ការសិក្សាទម្រង់ស្រដៀងគ្នានៅទូទាំងពិភពលោក។លោក Pablo Sinovas នាយកអង្គការសត្វព្រៃនិងរុក្ខជាតិ ប្រចាំកម្ពុជា បានមានប្រសាសន៍ថា  ដោយសារសត្វព្រៃនៅទូទាំងពិភពលោក បាននិងកំពុងមានការធ្លាក់ចុះ ដោយសារការបាត់បង់ និងភាពរេចរឹលនៃជម្រក ដូច្នេះ វាពិតជាមានសារៈសំខាន់ណាស់ក្នុងការគ្រប់គ្រងប្រភេទនេះ ដែលមានការរស់នៅជាក្រុមតូចៗ និងបែកខ្ញែកពីគ្នា។ នៅក្នុងការសិក្សានេះ យើងបានប្រើប្រាស់នូវបច្ចេកទេសរួមគ្នានៃការវិភាគគំរូម៉ូលេគុល និងទីតាំង ដើម្បីវាយតម្លៃពីចំនួនដំរីអាស៊ី លក្ខណៈសេនេទិច និងការវាយតម្លៃភាពសមស្របនៃទីជម្រក។ ទោះបីជាចំនួនដំរីអាស៊ីមានចំនួនតិចក៏ដោយ ប្រភេទនេះ មានលក្ខណៈសេនេទិចពិសេស ដែលជាមូលដ្ឋានគ្រឹះដ៏សំខាន់សម្រាប់ការរស់រានមានជីវិតរយៈពេលវែង។ គួបផ្សំនឹងជម្រកដ៏សំខាន់ដែលមាននៅក្នុងតំបន់នេះ វាជាឱកាសដ៏ល្អសម្រាប់ការស្តារនូវវត្តមាននៃប្រភេទនេះ។លោកបានបន្តថា ការសិក្សារបស់យើងផ្តល់នូវមូលដ្ឋានវិទ្យាសាស្ត្រដ៏រឹងមាំសម្រាប់សកម្មភាពអភិរក្សលើប្រភេទនេះ ហើយយើងសង្ឃឹមថា វាក៏អាចធ្វើជាគំរូសិក្សាស្រាវជ្រាវស្រដៀងគ្នាសម្រាប់ថនិកសត្វធំៗដែលកំពុងប្រឈមនឹងបញ្ហាប្រហាក់ប្រហែលគ្នានៅទូទាំងពិភពលោក។លោកបណ្ឌិត Alex Ball ប្រធានផ្នែកអភិរក្ស WildGenes នៃ Royal Zoological Society of Scotland បានមានប្រសាសន៍ថា ការមានលក្ខណៈធនធានសេនេទិចខ្ពស់ គឺជាមូលដ្ឋានគ្រឹះដ៏សំខាន់សម្រាប់អនាគតដ៏យូរអង្វែងរបស់ប្រភេទនេះ ដូច្នេះហើយយើងពិតជាមានការភ្ញាក់ផ្អើលយ៉ាងខ្លាំងចំពោះលទ្ធផលនៃគម្រោងនេះ។ វាគឺជាកិច្ចខិតខំប្រឹងប្រែងជាក្រុមដោយដៃគូមកពីប្រទេសកម្ពុជា និងស្កុតឡែន។ ឥឡូវនេះ យើងសង្ឃឹមថា នឹងពង្រីកវិធីសាស្រ្តនេះ នៅទូទាំងប្រទេសកម្ពុជា និងនៅតំបន់ផ្សេងទៀត ដោយជួយពង្រឹងទិន្នន័យជាក់លាក់បន្ថែមទៀតនៃចំនួនដំរីអាស៊ី ដែលជាទិន្នន័យសំខាន់ក្នុងការស្វែងរកវិធីសាស្ត្រដើម្បីកាត់បន្ថយការបាត់បង់នៃប្រភេទនេះ។ គួរបញ្ជាក់ដែរថា ដំរីអាស៊ីត្រូវបានចាត់ចូលជាប្រភេទជិតផុតពូជ ហើយត្រូវបានប៉ានប្រមាណថាមានចំនួនប្រមាណ ៤០០-៦០០ក្បាលប៉ុណ្ណោះនៅក្នុងព្រៃនៃប្រទេសកម្ពុជា។ លទ្ធផលរកឃើញនៃការសិក្សានេះគូសបញ្ជាក់អំពីសក្តានុពលនៃតំបន់ទេសភាពព្រៃឡង់ ដែលនឹងអាចក្លាយជាជម្រកដ៏សំខាន់សម្រាប់សត្វដំរីអាស៊ី ដែលរួមចំណែកដល់គោលដៅអភិរក្សជីវៈចម្រុះនៅក្នុងប្រទេសកម្ពុជា៕ អត្ថបទ៖ទូច សោភ័ណ

ឯកឧត្តម ស៊ុន ចាន់ថុលដឹកនាំកិច្ចប្រជុំគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន ពិនិត្យលើរបាយការណ៍ស្តីពី លទ្ធផលវឌ្ឍនភាពនៃការអនុវត្តផែនការសកម្មភាព នៃការកសាងសហគមន៍វាសនារួម ក្នុងយុគសម័យថ្មី (២០២៤-២០២៨)

2025/03/12 11:56:45 am        125
Facebook Telegram Linkin
ភ្នំពេញ៖ នៅព្រឹកថ្ងៃពុធ ទី១២ ខែមីនា ឆ្នាំ២០២៥ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា និងជាសហប្រធានគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន បានអញ្ជើញដឹកនាំកិច្ចប្រជុំគណៈកម្មាធិការសម្របសម្រួលអន្តររដ្ឋាភិបាល កម្ពុជា-ចិន ដោយមានការចូលរួមពី ឯកឧត្តម លោកជំទាវ តំណាងក្រសួងស្ថាប័នពាក់ព័ន្ធ ដែលជាសមាជិក សមាជិកាគណៈកម្មាធិការ និងមន្ត្រីពាក់ព័ន្ធជាច្រើនរូបផងដែរ។កិច្ចប្រជុំនាព្រឹកនេះ ត្រូវបានរៀបចំឡើងក្នុងគោលបំណងដើម្បីពិនិត្យពិភាក្សាលើរបាយការណ៍ស្តីពី លទ្ធផលវឌ្ឍនភាពការងារសម្រាប់ឆមាសទី២ ឆ្នាំ២០២៤ នៃការអនុវត្តផែនការសកម្មភាពនៃការកសាងសហគមន៍វាសនារួមកម្ពុជា-ចិន ក្នុងយុគសម័យថ្មី (២០២៤-២០២៨) និងកំណត់ទិសដៅការងារជាអាទិភាពសំខាន់ៗ សម្រាប់អនុវត្តបន្តនាពេលខាងមុខផងដែរ។ ផែនការសកម្មភាពនៃការកសាងសហគមន៍វាសនារួម កម្ពុជា-ចិន នេះ គឺផ្តោតសំខាន់លើវិស័យអាទិភាពចំនួន ៦ ដូចជា៖ (១)កិច្ចសហប្រតិបត្តិការនយោបាយ (២)សមត្ថភាពផលិត និងវិនិយោគ (៣)កសិកម្ម (៤)ថាមពល និងអភិវឌ្ឍន៍បៃតង (៥)សន្តិសុខ និង (៦)ការផ្លាស់ប្តូររវាងប្រជាជននិងប្រជាជន ដែលក្នុងនោះ មានការចូលរួមអនុវត្តដោយក្រសួង ស្ថាប័ន ចំនួន២៧។ គួររម្លឹកដែរថា៖ ផែនការសកម្មភាព នៃការកសាងសហគមន៍វាសនារួមកម្ពុជា-ចិន ក្នុងយុគសម័យថ្មី (២០២៤-២០២៨) ត្រូវបានរៀបចំឡើងដើម្បីជំរុញកិច្ចសហប្រតិបត្តិការភាពជាដៃគូយុទ្ធសាស្ត្រគ្រប់ជ្រុងជ្រោយរវាងប្រទេសទាំងពីរ ដែលត្រូវបានចុះហត្ថលេខាកាលពីថ្ងៃទី១៥ ខែកញ្ញា ឆ្នាំ២០២៣ ដោយតំណាងនៃរាជរដ្ឋាភិបាល និងរដ្ឋាភិបាលនៃប្រទេសទាំងពីរ ដែលមាន ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្កុជា និង ឯកឧត្តម វ៉ាង យី សមាជិកការិយាល័យនយោបាយ នៃគណៈកម្មាធិការមជ្ឈិមបក្សកុម្មុយនីស្តចិន ប្រធានការិយាល័យគណៈកម្មាធិការកិច្ចការបរទេស និងជារដ្ឋមន្ត្រីការបរទេស នៃសាធារណរដ្ឋប្រជាមានិតចិន ជាសហហត្ថលេខី៕

ឧប នេត សាវឿន ស្នើដល់ភាគីពាក់ព័ន្ធបង្កើនការទប់ស្កាត់បទល្មើស​គ្រឿងញៀនឲ្យកាន់​តែខ្លាំងក្លាបន្ថែមទៀត

2025/03/12 11:47:52 am        198
Facebook Telegram Linkin
ឯកឧត្តមសន្តិបណ្ឌិត នេត សាវឿន ឧបនាយករដ្ឋមន្ត្រី ប្រធានអាជ្ញាធរជាតិប្រយុទ្ធប្រឆាំងគ្រឿងញៀន បានក្រើនរំលឹកដល់ភាគីពាក់ព័ន្ធទាំងអស់ឆ្លើយតបឲ្យបានទាន់ពេលវេលា និងរួមគ្នាឲ្យបានសកម្មបន្ថែមទៀត ក្នុងដោះស្រាយបញ្ហាប្រឈមនានាពាក់ព័ន្ធនឹងគ្រឿងញៀន ខណៈករណីគ្រឿងញៀននេះបានកំពុងបង្ករភាពស្មុគ្រស្មាញយ៉ាងខ្លាំងទាំងក្នុងតំបន់ និងពិភពលោកនោះ។ថ្លែងនៅក្នុងពិធីបើកសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅការងារឆ្នាំ២០២៥ របស់អាជ្ញាធរជាតិប្រយុទ្ធប្រឆាំងគ្រឿងញៀន និងផ្សព្វផ្សាយផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១០ នាព្រឹកថ្ងៃទីថ្ងៃទី១២ ខែមីនា ឆ្នាំ២០២៥នេះ នៅទីស្ដីការក្រសួងមហាផ្ទៃ ឯកឧត្តមនេត សាវឿន លើកឡើងថា បញ្ហាគ្រឿងញៀន បានក្លាយទៅជាប្រធានបទដ៏ក្តៅគគុកមួយ មិនតែសម្រាប់ប្រទេសកម្ពុជាយើងប៉ុណ្ណោះទេ ប៉ុន្តែវាបានក្លាយទៅជាសត្រូវដ៏កាចសាហាវមួយ របស់បណ្តាប្រទេសទាំងអស់នៅលើសកលលោក ដែលស្របជាមួយ បញ្ហាអសន្តិសុខសកល ដែលកំពុងកើតឡើងផងនោះ ក្រុមឧក្រិដ្ឋជនទុច្ចរិត បានឆ្លៀតឱកាសបង្កើនសកម្មភាព និងឧបាយកលរបស់ខ្លួន ក្នុងការផលិត ចែកចាយ ជួញដូរ និង ចរាចរ ជាពិសេសនៅតំបន់ ត្រីកោណមាស និងអឌ្ឍច័ន្ទមាស។ឯកឧត្តមឧបនាយករដ្ឋមន្រ្តីបានលើកឡើងទៀតថា ដើម្បីឆ្លើយតបទៅនឹងបញ្ហាដ៏ស្មុគស្មាញនេះ រាជរដ្ឋាភិបាលកម្ពុជា តែងតែឈរលើគោលការណ៍ដ៏រឹងមាំមុតស្រួចមួយ ក្នុងការតម្កល់ការងារប្រយុទ្ធប្រឆាំងគ្រឿងញៀន ជាទិសដៅអាទិភាពចម្បងបំផុត និងដាក់ចេញនូវគោលនយោបាយ យុទ្ធសាស្ត្រ និងវិធីសាស្ត្រ គ្រប់បែបយ៉ាង ដើម្បីឆ្លើយតបទាន់ពេលនូវរាល់បញ្ហា និងការពារថែរក្សាសង្គមកម្ពុជាជាសង្គម ស្អាតស្អំ ដែលគ្រឿងញៀនលែងជាឧបសគ្គដល់កិច្ចអភិវឌ្ឍជាតិ។ ជាក់ស្តែងយុទ្ធសាស្ត្រ បញ្ចកោណដំណាក់កាលទី១ កម្មវិធីនយោបាយរបស់រាជរដ្ឋាភិបាល វិធានការគន្លឹះទាំង៥ និងគោលនយោបាយ ភូមិ ឃុំ សង្កាត់ មានសុវត្ថិភាព ជាពិសេសការសម្រេចបន្តដាក់ចេញ «ផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់លើកទី១០ សុទ្ធតែជាសក្ខីភាពដ៏ប្រត្យក្សមួយអំពីគោលនយោបាយមុតស្រួច ប្រឆាំងនឹងគ្រឿងញៀនរបស់រាជរដ្ឋាភិបាល។បន្ថែមពីលើនេះទៀត ជាមួយចក្ខុវិស័យវែងឆ្ងាយ និងការដោះស្រាយមុតស្រួចចំបញ្ហាសម្តចធិបតី ហ៊ុន ម៉ាណែត បានដាក់ចេញនូវយុទ្ធសាស្ត្រដ៏នស័ក្តិសិទ្ធិភាពមួយគឺ «គោលការណ៍សម្អាតចកចេញពីផ្ទៃបឹង» ក្នុងការចាត់វិធានការម៉ឺងម៉ាត់ចំពោះមន្ត្រីរាជការ កងកម្លាំងប្រដាប់អាវុធទាំងឡាយណា ដែលមានការជាប់ពាក់ព័ន្ធ និងប្រើប្រាស់គ្រឿងញៀន គឺត្រូវបណ្តេញចេញពីក្របខ័ណ្ឌដោយគ្មានលើកលែង ក្នុងគោលបំណងលើកកម្ពស់អភិបាលកិច្ចល្អ ភាពស្អាតស្អំ និងភាពគំរូនៃការអនុវត្តច្បាប់ជាដើម។បើយោងតាមការរបស់អាជ្ញាធរជាតិប្រយុទ្ធប្រឆាំងគ្រឿងញៀន បានឲ្យដឹងថា កម្ពុជានៅតែបន្តរងការគំរាមកំហែងពីនិន្នាការនៃគ្រឿងញៀនសកល ជាពិសេសពីតំបន់ត្រីកោណមាស។ លទ្ធផលនៃកិច្ចប្រតិបត្តិការបង្រ្កាបបង្ហាញថា បទល្មើសគ្រឿងញៀនពុំមានការថមថយនោះទេ បើធៀបនឹងឆ្នាំ២០២៣។ ជាក់ស្តែងនៅឆ្នាំ២០២៤ ចំនួនករណីគ្រឿងញៀនដែល បង្ក្រាបបានកើន៣១,៨៤% និងគ្រឿងញៀនចាប់យក កើន៣៩៩% ក្នុងនោះសមត្ថកិច្ចបង្ក្រាបបទល្មើសគ្រឿងញៀនបានចំនួន ១០.៦៣០ករណី កើនឡើង ២.៥៦៧​ករណី ស្មើរ ៣១,៨៤% បើប្រៀបធៀបនឹងឆ្នាំ២០២៣។ ឃាត់ខ្លួនជន សង្ស័យ​ចំនួន​២៧.០៧១នាក់ កើន ៣៥,៥៣% , គ្រឿងញៀនចាប់យក ១៤តោន ៩០៩គីឡូក្រាម កើនឡើង ១១ តោន ៩២០ គ.ក្រ ស្មើរ ៣៩៨,៨២% (កើន៤ដង បើធៀបឆ្នាំ២០២៣)។ ដោយ​ឡែក​សារ​ធាតុ​គីមី​ផ្សំរឹបអូសបានចំនួន ៣៥៤ គីឡូក្រាម ថយចុះ ១តោន ១១៥ គ.ក្រ ថយចុះ ៧៦%​បើធៀប​នឹង​ឆ្នាំ២០២៣៕ អត្ថបទ៖ បាន ចក់

ក្រសួងការងារចុះពិនិត្យ តាមដាន និងវាយតម្លៃការអនុវត្តកម្មវិធី TVET នៅខេត្តកំពង់ស្ពឺ

2025/03/12 11:35:51 am        104
Facebook Telegram Linkin
នៅថ្ងៃទី១១ ខែមីនា ឆ្នាំ២០២៥ ឯកឧត្តម ឡា វិបុល អនុរដ្ឋលេខាធិការនៃក្រសួងការងារ និង​បណ្ដុះ​បណ្ដាលវិជ្ជាជីវៈ បានដឹកនាំក្រុមការងារនៃអគ្គនាយកដ្ឋានអប់រំបណ្តុះបណ្តាលបច្ចេកទេស និង​វិជ្ជាជីវៈ(TVET) ចុះពិនិត្យ តាមដាន និងវាយ​តម្លៃ​ការ​អនុវត្ត​កម្ម​វិធី​បណ្តុះ​បណ្ដាល​ជំនាញ​វិជ្ជា​ជីវៈ និងបច្ចេកទេស TVET គ្រប់កម្រិត ជាពិសេសកម្មវិធី TVET ១,៥លាននាក់ នៅវិទ្យាស្ថាន​ពហុ​បច្ចេកទេស ខេត្តកំពង់ស្ពឺ ដើម្បីប្រមូលព័ត៌មាន​ទាក់ទង​នឹង​ការ​រៀបចំ​ដំណើរ​ការ​បណ្តុះ​បណ្តាល​ ការប្រឈម សំណូមពរនានា។ ក្នុងឱកាសនោះ ឯកឧត្តមអនុរដ្ឋលេខាធិការ បានចុះត្រួតពិនិត្យហេដ្ឋារចនាសម្ព័ន្ធរូបវ័ន្ត និង​បរិវេណ​ជុំវិញគ្រឹះស្ថាន និងការសិក្សារបស់សិស្សតាមថ្នាក់រៀន រោងជាង និងបន្ទប់ពិសោធន៍ ដោ​យ​បានលើកទឹកចិត្តដល់សិស្សានុសិស្សឱ្យខិតខំប្រឹងប្រែងរៀនសូត្រ និង​ត្រូវ​មាន​គោល​ដៅ​ច្បាស់​លាស់​ចំពោះ​ការសិក្សារបស់ខ្លួន។ ទន្ទឹមនោះ ឯកឧត្តមអនុរដ្ឋលេខាធិការ បានជួបប្រជុំជាមួយនាយក នាយករង គណៈ​គ្រប់​គ្រង​គ្រឹះ​ស្ថាន លោកគ្រូ អ្នកគ្រូ និងមន្ត្រី ដោយឯកឧត្តមបានលើកឡើងថា វិទ្យាស្ថាន​ពហុ​បច្ចេក​ទេស​ខេត្ត​កំពង់​ស្ពឺ អនុវត្តកម្មវិធីបណ្តុះបណ្តាលជំនាញបច្ចេកទេស ជាពិសេសកម្មវិធី TVET 1.5M ដែល​បាន​និងកំពុងដើរតួនាទីយ៉ាងសំខាន់ ក្នុងការផលិតធនធានមនុស្ស ស្របតាម​តម្រូវ​ការ​ទីផ្សា​រ​ការងារនាពេលបច្ចុប្បន្ន និងឱកាសការងារជូនយុវជន ដូចនេះលោកគ្រូ អ្នកគ្រូ វិទ្យាស្ថាន​ត្រូវ​ផ្តោត​យក​ចិត្តទុកដាក់ និងពង្រឹងការងារ ទាំងវិន័យការងារ យកចិត្តទុកដាក់បង្រៀនសិស្ស ត្រូវ​ពង្រឹង​សមត្ថភាពដើម្បីធានាគុណភាពគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈ។ ឯកឧត្តមអនុរដ្ឋលេខាធិការ ក៏បាន​ជំរុញ​ដល់​វិទ្យាស្ថាន​ត្រូវ​បន្ត​រៀបចំ​ការ​បណ្តុះ​បណ្តាល​ឱ្យ​កាន់​តែ​ឆ្លើយ​តប​ជាអាទិភាពទៅនឹងតម្រូវការទីផ្សារ និងបន្តសហការជាមួយក្រសួង ស្ថាប័ន និងដៃគូ​ពាក់​ព័ន្ធ ជាពិសេសរដ្ឋបាល រាជធានី-ខេត្ត អាជ្ញាធរមូលដ្ឋានគ្រប់លំដាប់ថ្នាក់ ដើម្បីផ្សព្វ​ផ្សាយ​វគ្គ​បណ្តុះ​បណ្តាល​ TVET ១,៥លាននាក់ ឱ្យកាន់តែទូលំទូលាយ និងចំគោលដៅ​ទៅ​តាម​ផែន​ការ​បណ្តុះ​បណ្តាល និងដើម្បីទទួលបានសិស្សចុះឈ្មោះចូលរៀន សិស្សមានកន្លែងចុះធ្វើកម្មសិក្សា និង​មានការងារធ្វើស្របតាមអភិក្រម “រៀនឱ្យចេះ រៀនឱ្យចប់ ឱ្យមានការងារ”៕

អាជ្ញាធរជាតិប្រយុទ្ធប្រឆាំងគ្រឿងញៀន៖ សភាពការណ៍គ្រឿងញៀន​នៅតែស្ថិត​ក្នុង​ភាព​ស្មុគស្មាញ និងគ្រោះថ្នាក់គួរឱ្យព្រួយបារម្ភ

2025/03/12 11:17:14 am        171
Facebook Telegram Linkin
អាជ្ញាធរជាតិប្រយុទ្ធប្រឆាំងគ្រឿងញៀនបានលើកឡើងថា សភាពការណ៍​គ្រឿង​ញៀន​ទាំង​ក្នុង​ក្រប​ខណ្ឌ​អន្តរជាតិ និងក្នុងតំបន់ នៅតែមានការវិវត្តប្រែប្រួលយ៉ាងស្មុគស្មាញ និងគ្រោះថ្នាក់ គួរ​ឱ្យ​ព្រួយ​បារម្ភ ខណៈសង្រ្គាមនៅអ៊ុយក្រែន និងមជ្ឈឹមបូព៌ា ជម្លោះប្រដាប់អាវុធនៅមីយ៉ាន់ម៉ា រួម​ទាំង​កត្តា​អស្ថិរភាពនយោបាយនៅលើពិភពលោក និងក្នុងតំបន់ បានធ្វើឱ្យ​ឧក្រិដ្ឋ​ជន​គ្រឿងញៀន​មាន​ឱកាសប​ង្កើន​សកម្មភាពដាំដុះនិងផលិតគ្រឿងញៀន។ថ្លែងក្នុងឱកាសបើកសន្និបាតបូកសរុបលទ្ធផលការងារឆ្នាំ២០២៤ និងលើកទិសដៅ​ការងារ​ឆ្នាំ​២០២៥​ របស់អាជ្ញាធរជាតិប្រយុទ្ធប្រឆាំងគ្រឿងញៀន និងផ្សព្វផ្សាយ​ផែន​ការ​យុទ្ធនាការ​ប្រយុទ្ធ​ប្រឆាំង​គ្រឿង​ញៀន​ខុសច្បាប់លើកទី១០ នាព្រឹកថ្ងៃទីថ្ងៃទី១២ ខែមីនា ឆ្នាំ២០២៥នេះ នៅ​ទីស្ដី​ការ​ក្រសួង​មហាផ្ទៃ នាយឧត្តមសេនីយ៍ មាស វិរិទ្ធ អគ្គលេខាធិការ​អាជ្ញាធរ​ជាតិ​ប្រយុទ្ធ​ប្រឆាំង​គ្រឿង​ញៀន បានលើកឡើងថា សភាពការណ៍គ្រឿងញៀននាពេលបច្ចុប្បន្ននេះ មានការ​លួច​លាក់​ចរាចរ​សារធាតុគីមីផ្សំខុសច្បាប់ទៅកាន់ទីតាំងផលិតគ្រឿងញៀន ជាពិសេសនៅ​តំបន់​អាមេរិក​កណ្តាល អឌ្ឍចន្ទមាស និងត្រីកោណមាស គឺបានបានរុញច្រាន​ទីផ្សារ​គ្រឿង​ញៀន​កាន់​តែ​រី​ក​ធំ​ជាង​មុន ហើយបរិមាណ​គ្រឿងញៀន​ដែល​បាន​ចាប់​យក​មាន​ការ​កើន​ឡើង​បើ​ធៀប​នឹង​ឆ្នាំ​២០២៣​។ដោយឡែកសម្រាប់នៅកម្ពុជា ឯកឧត្តមអគ្គលេខាធិការអាជ្ញាធរជាតិប្រយុទ្ធប្រឆាំងគ្រឿងញៀន បាន​បញ្ជាក់ថា នៅតែបន្តរងការគំរាមកំហែងពីនិន្នាការនៃគ្រឿងញៀនសកល ជាពិសេស​ពី​តំបន់​ត្រី​កោណ​មាស​។ លទ្ធផលនៃកិច្ចប្រតិបត្តិការបង្រ្កាបបង្ហាញថា បទល្មើសគ្រឿងញៀន​ពុំ​មាន​ការ​ថម​ថយ​នោះ​ទេ បើធៀបនឹងឆ្នាំ២០២៣។ ជាក់ស្តែងនៅឆ្នាំ២០២៤ ចំនួនករណីគ្រឿង​ញៀន​ដែល​ បង្ក្រាបបានចំនួន ១០.៦៣០ករណី កើនឡើង ២.៥៦៧ករណី ស្មើរ៣១,៨៤% បើ​ប្រៀប​ធៀប​នឹង​ឆ្នាំ២០២៣។ ឃាត់ខ្លួនជនសង្ស័យចំនួន២៧.០៧១នាក់ កើន ៣៥,៥៣% , គ្រឿង​ញៀន​ចាប់​យក១៤តោន ៩០៩គីឡូក្រាម កើនឡើង១១ តោន ៩២០ គ.ក្រ ស្មើរ ៣៩៨,៨២% (កើន៤ដង បើធៀបឆ្នាំ២០២៣)។ ដោយឡែកសារធាតុគីមីផ្សំរឹបអូសបានចំនួន ៣៥៤ គីឡូ​ក្រាម ថយចុះ១តោន ១១៥ គ.ក្រ ថយចុះ ៧៦% បើធៀបនឹងឆ្នាំ២០២៣។ឯក​ឧត្តមមនាយឧត្តមសេនីយ៍ មាស វិរិទ្ធ បានលើកឡើងទៀត​ក្នុង​ចំណោម​គ្រឿង​ញៀន​ដែល​បាន​ចាប់​យក​ខាងលើនេះ ជាប្រភេទមេតំហ្វេតាមីន កេតាមីន ហេរ៉ូអ៊ីន និងអ៊ិចស្តាស៊ី មាន​ប្រភព​ពី​តំបន់​ត្រីកោណ​មាស កូកាអ៊ីន មានប្រភពពីអាមេរិកខាងត្បូងនិងអាមេរិកកណ្តាល ហើយកេតា​មីន​ និងអ៊ិចស្តាស៊ីមួយចំនួនមានប្រភពពីតំបន់អឺរ៉ុប៕ អត្ថបទ៖ បាន ចក់

មន្រ្តីជាន់ខ្ពស់ធនាគារជាតិ ជំរុញឱ្យមន្ត្រីតាមបណ្តាខេត្ត បញ្ជ្រាបចំណេះដឹងផ្នែកហិរញ្ញវត្ថុ​ដល់ប្រជាជន

2025/03/12 10:58:04 am        274
Facebook Telegram Linkin
មន្រ្តីជាន់ខ្ពស់ធនាគារជាតិនៃកម្ពុជា ជំរុញឱ្យមន្ត្រី-បុគ្គលិកនៅតាមបណ្តាខេត្ត បញ្ជ្រាបចំណេះដឹងផ្នែកហិរញ្ញវត្ថុ ដល់ប្រជាជន ក្នុងមូលដ្ឋាន សំដៅលើកកម្ពស់ការប្រើប្រាស់សេវាហិរញ្ញវត្ថុឱ្យកាន់តែមានប្រសិទ្ធភាពបន្ថែមទៀត។ លោកជំទាវបណ្ឌិត ជា សិរី ទេសាភិបាល ធនាគារជាតិនៃកម្ពុជា នៅថ្ងៃទី ១០-១១ ខែមីនា ឆ្នាំ២០២៥ បានអញ្ជើញ ជាអធិបតីក្នុងពិធីប្រកាសផ្ទេរភារកិច្ច នាយកសាខាធនាគារជាតិនៃកម្ពុជា នៅតាមបណ្តាខេត្តចំនួន៣រួមមាន ខេត្តកំពង់ចាម ក្រចេះ និងខេត្តរតនគីរី ក្នុងពិធីនេះលោកជំទាវទេសាភិបាល មានប្រសាសន៍ថា ការកែសម្រួលភារកិច្ចនេះ ធ្វើឡើងក្នុងគោលបំណងបំពេញ តម្រូវការរបស់ស្ថាប័ន តាមរយៈការនាំមកនូវជំនាញ និងបទពិសោធន៍ថ្មីបន្ថែមទៀត ដើម្បីបន្តនិរន្តរភាពការងារ និងប្រតិបត្តិការរបស់ សាខា ឱ្យប្រព្រឹត្តទៅបានរលូននិងមានប្រសិទ្ធភាពខ្ពស់ថែមទៀត។ លោកជំទាវបានយកឱកាសនេះណែនាំមន្ត្រី-បុគ្គលិកសាខាតាម បណ្តាខេត្តទាំង៣ ឱ្យត្រៀមខ្លួនសហការក្នុងការធ្វើអង្កេតទំនុកចិត្តធុរកិច្ច ដើម្បីតាមដានស្ថានភាពនៃសកម្មភាពសេដ្ឋកិច្ចទាំងក្នុង និងក្រៅប្រព័ន្ធផងដែរ។បន្ថែមលើនេះ លោកជំទាវបណ្ឌិត ក៏បានជំរុញលើកទឹកចិត្តមន្ត្រី-បុគ្គលិកទាំងអស់ឱ្យបន្តអភិវឌ្ឍសមត្ថភាពជាប្រចាំ និងខិតខំ បំពេញការងារប្រកបដោយការទទួលខុសត្រូវខ្ពស់ ព្រមទាំងចូលរួមបង្កើនសកម្មភាពបញ្ជ្រាបចំណេះដឹងផ្នែកហិរញ្ញវត្ថុដល់ប្រជាជន ក្នុងមូលដ្ឋាន សំដៅលើកកម្ពស់ការប្រើប្រាស់សេវាហិរញ្ញវត្ថុឱ្យកាន់តែមានប្រសិទ្ធភាពខ្ពស់ថែមទៀត។ជុំវិញការលើកកម្ពស់បរិយាបន្នហិរញ្ញវត្ថុ និងចំណេះដឹងផ្នែកហិរញ្ញវត្ថុ, ធនាគារជាតិនៃកម្ពុជា បន្តយកចិត្តទុកដាក់ក្នុងការជំរុញកម្រិត បរិយាបន្នហិរញ្ញវត្ថុនៅកម្ពុជា ដើម្បីលើកកម្ពស់ការទទួលបាន និងការប្រើប្រាស់សេវាហិរញ្ញវត្ថុផ្លូវការទាន់ពេលវេលា តម្លៃសមរម្យ និង មានកិច្ចការពារតាមផ្លូវច្បាប់ តាមរយៈការលើកកម្ពស់ចំណេះដឹងផ្នែកហិរញ្ញវត្ថុ និងការពង្រឹងកិច្ចការពារអតិថិជន។ ធនាគារជាតិនៃ កម្ពុជាបាននិងកំពុងសហការយ៉ាងជិតស្និទ្ធជាមួយក្រសួង-ស្ថាប័នរដ្ឋ និងដៃគូអភិវឌ្ឍន៍ជាតិនិងអន្តរជាតិពាក់ព័ន្ធ ក្នុងការដាក់ចេញ និងអនុវត្តនូវសកម្មភាពយុទ្ធនាការផ្សព្វផ្សាយ កម្មវិធីអប់រំចំណេះដឹងផ្នែកហិរញ្ញវត្ថុ និងយន្តការនានា ស្របតាមផែនការសកម្មភាព ដែលកំណត់ក្នុងយុទ្ធសាស្ត្រជាតិស្តីពីបរិយាបន្នហិរញ្ញវត្ថុ ឆ្នាំ២០១៩-២០២៥ ដូចជា៖ ការងារបញ្ជ្រាបចំណេះដឹងផ្នែកហិរញ្ញវត្ថុក្នុង កម្មវិធីសិក្សាចំណេះដឹងទូទៅ, ការងារលើកកម្ពស់ចំណេះដឹងផ្នែកហិរញ្ញវត្ថុសម្រាប់ស្រ្តីនិងសហគ្រិនជាស្រ្តី, យុទ្ធនាការផ្សព្វផ្សាយចំ ណេះដឹងហិរញ្ញវត្ថុ (តោះនិយាយនិយាយពីលុយ), គម្រោងពង្រីងសុវត្ថិភាពហិរញ្ញវត្ថុដល់សហគមន៍, និងការបើកសិក្ខាសាលាផ្សព្វ ផ្សាយស្តីពីវិស័យមីក្រូនៅកម្ពុជាជាដើម៕ អត្ថបទ៖ សុន រ៉ាឌី

ក្រសួងពាណិជ្ជកម្មប្រកាសរៀបចំ «ពិព័រណ៍ផលិតផលខ្មែរ» ក្នុងព្រឹត្តិការណ៍អង្គរសង្ក្រាន្តនាខែមេសាខាងមុខ នៅខេត្តសៀមរាប

2025/03/12 10:47:23 am        119
Facebook Telegram Linkin
ក្រសួងពាណិជ្ជកម្មកម្ពុជា បានឲ្យដឹងថា ក្រោមកិច្ចសហការជាមួយសហភាពសហព័ន្ធយុវជនកម្ពុជា (ស.ស.យ.ក.) នឹងរៀបចំ “ពិព័រណ៍ផលិតផលខ្មែរ» ក្នុងព្រឹត្តិការណ៍អង្គរសង្ក្រាន្ត ក្រោមប្រធានបទ ញញឹមសាទរសង្ក្រាន្តឆ្នាំថ្មី ពីថ្ងៃទី១៤ ដល់ថ្ងៃទី១៦ ខែមេសា ឆ្នាំ២០២៥ នៅបរិវេណមុខប្រាសាទអង្គរវត្ត ខេត្តសៀមរាប។នៅក្នុងសេចក្តីជូនដំណឹង ចេញផ្សាយនៅព្រឹកថ្ងៃទី១២ ខែមីនានេះ ក្រសួងពាណិជ្ជកម្ម បានឲ្យដឹងទៀតថា ការរៀបចំព្រឹត្តិការណ៍ពិព័រណ៍នេះឡើង ក្នុងគោលបំណង ដើម្បីចូលរួមអបអរសាទរពិធីបុណ្យចូលឆ្នាំថ្មីប្រពៃណៃខ្មែរ។ ព្រឹត្តិការណ៍នេះជាឱកាសដែលប្រជាពលរដ្ឋខ្មែរទូទៅទាំងអស់ បានជួបជុំគ្នាក្នុងនាមជាមហាគ្រួសារខ្មែរ ដើម្បីអបអរសាទរពិធីបុណ្យចូលឆ្នាំប្រពៃណីជាតិ។ ព្រឹត្តិការណ៍នេះ បានក្លាយទៅជាវេទិកាចែករំលែកបទពិសោធន៍ របស់មនុស្សជំនាន់មុន និងយុវជនជំនាន់ក្រោយ ហើយក៏បានប្រែក្លាយទៅជាយន្តការអភិរក្ស និងអភិវឌ្ឍន៍ វប្បធម៌ប្រពៃណីខ្មែរផងដែរ។ក្រសួងពាណិជ្ជកម្ម បានអំពាវនាវដល់ពាណិជ្ជករ និងសាធារណជនទូទៅ ដែលមានចំណាប់អារម្មណ៍ចង់ចូលរួមដាក់តាំងបង្ហាញ លក់ផលិតផលឬសេវាកម្ម និងស្វែងរកដៃគូពាណិជ្ជកម្ម ក្នុងព្រឹត្តិការណ៍ពិព័រណ៍ខាងលើនេះ អាចទំនាក់ទំនងមកបំពេញបែបបទចូលរួម តាមរយៈនាយកដ្ឋានកិច្ចការពិព័រណ៍ អគ្គនាយកដ្ឋានជំរុញពាណិជ្ជកម្ម នៃក្រសួងពាណិជ្ជកម្ម យ៉ាងយូរបំផុតត្រឹមថ្ងៃទី១ ខែមេសា ឆ្នាំ ២០២៥៕ អត្ថបទ៖ ឈិត បូរ៉ាវី

ខេត្តក្រចេះ ទទួលសត្វផ្សោតមួយថែមទៀតដែលទើបកើតថ្មីនៅថ្ងៃទី១១ ខែមីនានេះ

2025/03/12 10:37:18 am        142
Facebook Telegram Linkin
ភ្នំពេញ៖ ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងថា កូនផ្សោតទើបកើតថ្មី១ក្បាល មានអាយុប្រមាណ២ថ្ងៃ ត្រូវបានស្រាវជ្រាវ និងថតបានដោយក្រុមការងារស្រាវជ្រាវនៃរដ្ឋបាលជលផល និងអង្គការ WWF នាថ្ងៃទី១១ ខែមីនា ឆ្នាំ២០២៥ នៅអន្លង់កាំពី ភូមិកាំពី ឃុំសំបុក ស្រុកចិត្របុរី ខេត្តក្រចេះ។ ប្រភពដដែល បានសសេរឲ្យដឹងទៀតថា តាមរយៈការពិនិត្យរបស់ក្រុមអ្នកស្រាវជ្រាវ កូនផ្សោតនេះ កើតពីមេផ្សោតដែលមានលេខកូដ១២៣ និងស្ថិតនៅក្នុងក្រុមសត្វផ្សោតពេញវ័យ ចំនួន ៣ក្បាលផ្សេងទៀត។ នេះគឺជាកូនផ្សោតទី៥ ដែលបានកើតនៅដើមឆ្នាំ២០២៥នេះ។ក្រសួងកសិកម្ម បានបញ្ជាក់ថា សត្វផ្សោតទន្លេមេគង្គ ត្រូវចាត់ថ្នាក់ក្នុងបញ្ជីក្រហមរបស់អង្គការ IUCN ជាប្រភេទសត្វជិតផុតពូជ និងកំពុងត្រូវបានការពារ និងអភិរក្សយ៉ាងតឹងរឹង ដោយច្បាប់ស្តីពីជលផល និងអនុក្រឹត្យស្តីពីការ បង្កើតតំបន់គ្រប់គ្រងនិងការពារសត្វផ្សោតទន្លេមេគង្គនៃព្រះរាជាណាចក្រកម្ពុជា។ទន្ទឹមនេះ ក្រសួងកសិកម្ម រុក្ខាប្រមាញ់ និងនេសាទ អំពាវនាវដល់ប្រជានេសាទថា ប្រសិនបើបានប្រទះឃើញសត្វផ្សោត ពិសេសកូនផ្សោត សូមផ្តល់ព័ត៌មានមកសមត្ថកិច្ចជលផល ដែលមានលេខទូរស័ព្ទ៖ ០១២ ៨៩៧ ៩៤៣ ០១១ ៣៥៥ ៨៨៣ ០៩៩ ៧៩១ ៩១៩ ០៩២ ៩១៨ ១៤៤ និង ០១៧ ៨១៨ ៣៨២៕

បណ្ដាញសង្គម

ព័ត៌មានថ្មីៗ

មូលនិធិគន្ធបុប្ផាកម្ពុជាប្រកាសបើកយុទ្ធនាការ “១ម៉ឺនរៀល ១ម៉ឺននាក់” ឆ្នាំ២០២៥ ចាប់ពីដើមខែក្រោយ
05/19/2025 08:05 AM
Facebook Telegram Linkin
សមាគមខ្មែរនៅប្រទេសកូរ៉េខាងត្បូង នាំយកសិល្បៈវប្បធម៌ខ្មែរ ទៅបង្ហាញក្នុងពិធីបុណ្យវប្បធម៌ពិភពលោក ក្រុងហ្វាសង់លើកទី១៨
05/18/2025 07:05 PM
Facebook Telegram Linkin
លោកជំទាវ ហ៊ុន ម៉ាណា អញ្ជើញដឹកនាំក្រុមគ្រូពេទ្យស្ម័គ្រចិត្តចុះពិនិត្យ និងព្យាបាលជំងឺជូនបងប្អូនប្រជាពលរដ្ឋ កងទ័ព គ្រួសារកងទ័ព នៅខេត្តស្ទឹងត្រែង
05/18/2025 06:05 PM
Facebook Telegram Linkin
ការប្រឡងជ្រើសរើសមន្ត្រីឱ្យចូលបម្រើការនៅអគ្គលេខាធិការដ្ឋានក្រុមប្រឹក្សាអ្នកច្បាប់ (វិញ្ញាសាសរសេរលើកទី១) បញ្ចប់ទៅដោយរលូន ខណៈដំណើរ​ការ​កែ​សន្លឹក​កិច្ចការ​ នឹង​ចាប់​ផ្តើម​នៅ​ព្រឹកស្អែក
05/18/2025 05:05 PM
Facebook Telegram Linkin
អ៊ុយក្រែន៖ រុស្ស៊ី បើកការវាយប្រហារយានដ្រូនធំបំផុតក្នុងសង្រ្គាម បន្ទាប់ពីកិច្ចចរចាសន្តិភាព
05/18/2025 05:05 PM
Facebook Telegram Linkin
ចិន ប្រកាសដាក់ពន្ធលើការលក់បង្ខូចតម្លៃនៃផលិតផលប្លាស្ទិកពីអាមេរិក អឺរ៉ុប ជប៉ុន និងកោះតៃវ៉ាន់
05/18/2025 05:05 PM
Facebook Telegram Linkin
មនុស្សយ៉ាងតិច ១៧នាក់ បានស្លាប់ក្នុងអគ្គិភ័យដ៏ធំនៅក្រុង Hyderabad ប្រទេសឥណ្ឌា
05/18/2025 05:05 PM
Facebook Telegram Linkin
ស៊ីរី កំណត់ពេល ១០ថ្ងៃឱ្យ 'ក្រុមប្រដាប់អាវុធតូចៗ' ចូលរួមជាមួយក្រសួងការពារជាតិ
05/18/2025 05:05 PM
Facebook Telegram Linkin
បាតុករគាំទ្រប៉ាឡេស្ទីន ចេញធ្វើបាតុកម្មជុំវិញពិភពលោក ដើម្បីប្រារព្ធទិវាជម្លៀសខ្លួន Nakba
05/18/2025 05:05 PM
Facebook Telegram Linkin
ការប្រឡងប្រជែងជ្រើសរើសមន្ត្រីច្បាប់ ឱ្យចូលបម្រើការងារក្នុងក្របខណ្ឌទីស្តីការគណៈរដ្ឋមន្រ្តី បានឈានមកដល់ វិញ្ញាសាទី២
05/18/2025 04:05 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.