នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
ស្ថានទូតខ្មែប្រចាំនៅសាធារណរដ្ឋកូរ៉េ ចុះ MOU ជាមួយមន្ទីរពេទ្យដៃគូ ដើម្បីផ្ដល់អត្ថប្រយោជន៍ដល់ពលរដ្ឋខ្មែរនៅកូរ៉េ
ក្រុមការងារអភិវឌ្ឍវិស័យឯកជនប្រមូលធាតុចូល និងលក្ខខណ្ឌនានា គាំទ្រការផលិតស៊ីម៉ងត៍ក្នុងស្រុក
សម្ដេចធិបតី៖ រាជរដ្ឋាភិបាលមានលទ្ធភាពគ្រប់គ្រាន់បង្កើនថវិកាការពារជាតិមិនចាំបាច់កាត់ពីវិស័យផ្សេងទេ
សម្ដេចធិបតី៖ បរិការណ៍ពិភពលោកបច្ចុប្បន្ន កម្ពុជាត្រូវពន្លឿនការកែទម្រង់លើវិស័យសេដ្ឋកិច្ច និងការពារជាតិ

ព័ត៌មានជាតិ

កម្មករនៅតំបន់សេដ្ឋកិច្ចពិសេសខេត្តស្វាយរៀង ចូលរួមមូលនិធិជាមួយរដ្ឋាភិបាល ព្រោះចង់ឃើញការអភិវឌ្ឍបន្ថែមទៀត

2024/09/07 12:59:14 pm        1076
Facebook Telegram Linkin
កម្មករនិយោជិតរោងចក្រនៅក្នុងតំបន់សេដ្ឋកិច្ចពិសេសរួមមាន តំបន់សេដ្ឋកិច្ចពិសេស តាយ សេង បាវិត, តំបន់ស៊ីន បាវិត, និងតំបន់អ៊ិនធើវៀ អូតូម៉ូបាល អ៊ិនដាស្រ្ទៀល ខមផ្លេកស៍ បានបរិច្ចាគថវិកាចូលក្នុងមូលនិធិ ដោយសារចង់ចូលរួមអភិវឌ្ឍកសាងហេដ្ឋារចនាសម្ព័ន្ធនៅតាមតំបន់ព្រំដែន។កម្មករនិយោជិតនៅខេត្តស្វាយរៀង នៅថ្ងៃទី ៦ ខែកញ្ញាឆ្នាំ២០២៤នេះ បានយល់ច្បាស់អំពីគម្រោងអភិវឌ្ឍន៍តំបន់ត្រីកោណកម្ពុជា-វៀតណាម-ឡាវ (CLV) និងធ្វើការចូលរួមបរិច្ចាគថវិកាក្នុងមូលនិធិអភិវឌ្ឍកសាងហេដ្ឋារចនាសម្ព័ន្ធនៅតាមតំបន់ព្រំដែន ព្រោះចង់ចូលរួមជាមួយរាជរដ្ឋាភិបាលក្នុងការការពារព្រំដែន។ពួកគាត់បានអំពាវនាវដល់កម្មកនិយោជិតផ្សេងទៀត គួរតែចៀសវាងការជឿតាមការឃោសនាអកុសលរបស់ក្រុមជ្រុលនិយមនៅក្រៅប្រទេសដែលបានបំផុសឲ្យមានបាតុកម្ម និងប្រកាសប្រឆាំងចំពោះសកម្មភាពប៉ុនប៉ងផ្តួលរំលំរដ្ឋាភិបាលស្របច្បាប់។កម្មករនិយោជិតនៅរោងចក្រក្នុងតំបន់សេដ្ឋកិច្ចពិសេសរួមមាន តំបន់សេដ្ឋកិច្ចពិសេស តាយ សេង បាវិត, តំបន់ស៊ីន បាវិត, និងតំបន់អ៊ិនធើវៀ អូតូម៉ូបាល អ៊ិនដាស្រ្ទៀល ខមផ្លេកស៍ បានបង្ហាញពីពេញចិត្តចំពោះរាជរដ្ឋាភិបាលក្រោមការដឹកនាំរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជណាចក្រកម្ពុជា។ពួកគាត់បានមើលឃើញថា សម្ដេចមហាបវរធិបតី ហ៊ុន ម៉ាណែត បាននិងកំពុងខិតខំប្រឹងប្រែងដោយឥតឈប់ឈរ ដើម្បីអភិវឌ្ឍហេដ្ឋារចនាសម្ព័ន្ធនៅតាមព្រំដែនតាមរយៈការបង្កើតឱ្យមានមូលនិធិកសាងហេដ្ឋារចនាសម្ព័ន្ធតាមតំបន់ព្រំដែនដែលជាការបើកឱកាសឱ្យពលរដ្ឋគ្រប់និន្នាការនយោបាយទាំងអស់បានចូលរួមកសាងប្រទេសជាតិរួមគ្នា។កម្មករនិយោជិតនៅខេត្តស្វាយរៀង បានយល់កាន់តែច្បាស់ពីគម្រោងទុច្ចរិតរបស់ក្រុមឧទ្ទាមក្រៅច្បាប់នៅក្រៅប្រទេសមួយចំនួន តាមរយៈការបំផុសឲ្យមានការធ្វើបាតុកម្មប្រឆាំងនឹងគម្រោងអភិវឌ្ឍន៍តំបន់ CLV និងប៉ុនប៉ងបាតុកម្មផ្តួលរំលំរដ្ឋាភិបាលស្របច្បាប់ ដែលតម្រូវឱ្យពលរដ្ឋចូលរួមជាមួយរាជរដ្ឋាភិបាល ដើម្បីទប់ស្កាត់អំពើបង្កហេតុទាំងអស់នេះ។កម្មកររោងចក្រសហគ្រាសក្នុងតំបន់សេដ្ឋកិច្ចពិសេសទាំងអស់ បានបង្ហាញនូវការគាំទ្រដល់រាជរដ្ឋាភិបាល ថែមទាំងបានប្តេជ្ញាចិត្តផ្សព្វផ្សាយបន្តដល់កម្មករនិយោជិតក្នុងមូលដ្ឋានរបស់ខ្លួនឱ្យបានទូលំទូលាយ និងចូលរួមបរិច្ចាគថថវិកាដល់មូលនិធិកសាងហេដ្ឋរចនាសម្ព័ន្ធព្រំដែនដោយស្ម័គ្រចិត្តទាំងអស់គ្នា៕

ពលករខ្មែរកំពុងធ្វើការងារនៅប្រទេសថៃ ចូលរួមមូលនិធិជាមួយរាជរដ្ឋាភិបាល ព្រោះចង់ឃើញការអភិវឌ្ឍនៅតាមព្រំដែន

2024/09/07 12:50:33 pm        1052
Facebook Telegram Linkin
ពលករខ្មែរដែលកំពុងបម្រើការងារនៅប្រទេសថៃ បានសម្តែងក្ដីពេញចិត្តក្នុងការចូលរួមបរិច្ចាគថវិកាជាមួយរាជរដ្ឋាភិបាល តាមរយៈមូលនិធិកសាងហេដ្ឋារចនាសម្ព័ន្ធតាមព្រំដែន នៅថ្ងៃទី៦ ខែកញ្ញា ឆ្នាំ២០២៤នេះ ដោយសារការស្រលាញ់ជាតិពិតប្រាកដ និងចង់ឃើញការអភិវឌ្ឍនៅតាមព្រំដែន។ពលករខ្មែរដែលកំពុងធ្វើការងារនៅថៃអ្នកស្រី ញ៉ិប នីកា បានឱ្យដឹងថា ការចូលរួមថវិកាជូនមូលនិធិអភិវឌ្ឍន៍ព្រំដែនជាមួយរាជរដ្ឋភិបាល គឺជាទឹកចិត្តស្រលាញ់ជាតិមាតុភូមិ ចង់ឱ្យតំបន់ព្រំដែនមានការអភិវឌ្ឍរីកចម្រើន មានភាពទាក់ទាញកាន់តែខ្លាំងបន្ថែមទៀត។អ្នកស្រីបន្ថែមថា៖«នាងខ្ញុំ និងក្រុមគ្រួសារសូមចូលរួមជាចំណែកតូចមួយជាមួយរាជរដ្ឋាភិបាលក្នុងមូលនិធិអភិវឌ្ឍកសាងហេដ្ឋារចនាសម្ព័ន្ធតាមព្រំដែន ដើម្បីបព្វហេតុប្រទេសជាតិរបស់យើងទាំងអស់គ្នា»។លោក ប៉ុន ណេច៍ ជាពលករកំពុងបម្រើការងារនៅថៃបាននិយាយថា ការចូលរួមបរិច្ចាគនេះ គឺជាការបង្ហាញទឹកចិត្តស្នេហាជាតិ ការរួបរួមគ្នារបស់ប្រជាជាតិទាំងអស់ក្នុងការកសាងរបងការពារជាតិយ៉ាងរឹងមាំ គឺហេដ្ឋារចនាសម្ព័ន្ធនៅតាមតំបន់បណ្ដោយព្រំដែនកម្ពុជាជាមួយនឹងប្រទេសជិតខាង។លោកបន្ថែមថា៖«ក្នុងនាមខ្ញុំជាប្រជាពលរដ្ឋខ្មែរ សូមគាំទ្រចំពោះគម្រោងអភិវឌ្ឍតាមតំបន់ព្រំដែន ដើម្បីចូលរួមជាមួយរាជរដ្ឋាភិបាលរបស់យើង។ បើទោះបីជាថវិកាតិចតួច ប៉ុន្ដែវាជាទឹកចិត្តដោយក្ដីគោរព ស្រលាញ់ពេញចិត្តរាជរដ្ឋាភិបាល»។ពលករខ្មែរដែលកំពុងបម្រើការងារនៅថៃ ថន ស្រីភីន បាននិយាយថា ការស្ម័គ្រចិត្តចូលរួមមូលនិធិនេះ គឺចង់ឱ្យមានការអភិវឌ្ឍ ហើយទាក់ទាញភ្ញៀវទេសចរ ងាយស្រួលទៅលេងនៅតំបន់ព្រំដែន។ពលកររូបនេះចង់ឃើញភ្ញៀវទេសចរទៅលេងទីនោះកាន់តែច្រើនថែមទៀត។នាងបានបញ្ជាក់ថា៖«ការដែលខ្ញុំចង់ចូលរួមមូលនិធិហ្នឹង គឺខ្ញុំចង់ឱ្យមានការអភិវឌ្ឍព្រំដែន ហើយនិងឱ្យមានភ្ញៀវទេសចរទៅកម្សាន្តនៅព្រំដែនហ្នឹងឱ្យបានច្រើន មានការវិនិយោគដែលធ្វើឱ្យប្រជាជននៅតាមព្រំដែនមានការងារធ្វើច្រើនដែរ»។ជាមួយគ្នានេះ ពលករកម្ពុជាធ្វើការងារនៅថៃ បានអំពាវនាវដល់បងប្អូនជនរួមជាតិមិនថាក្នុងស្រុក ឬក្រៅប្រទេសទេ បើពិតជាស្រលាញ់ជាតិមាតុភូមិ ចង់ឱ្យប្រទេសជាតិរីកចម្រើនជឿនលឿនបានកាន់តែឆាប់រហ័ស គួរតែចូលរួមជាមួយរាជរដ្ឋាភិបាល តាមរយៈមូលនិធិកសាងហេដ្ឋារចនាសម្ព័ន្ធតាមព្រំដែនឱ្យបានគ្រប់ៗគ្នា៕

កម្មករនិយោជិតរោងចក្រ បូវឃើ ខេត្តកណ្តាល ចូលរួមមូលនិធិជាមួយរាជរដ្ឋាភិបាល ព្រោះស្រលាញ់ជាតិពិតប្រាកដ

2024/09/07 10:22:25 am        1127
Facebook Telegram Linkin
ភ្នំពេញ៖ កម្មករនិយោជិតរោងចក្រកាត់ដេរសម្លៀកបំពាក់ បូវឃើ ខេត្តកណ្តាល (BOWKER GARMENT FACTORY (CAMBODIA) COMPANY LIMITED) បានសម្តែងក្ដីពេញចិត្តក្នុងការចូលរួមបរិច្ចាគថវិកាជាមួយរាជរដ្ឋាភិបាល តាមរយៈមូលនិធិកសាងហេដ្ឋារចនាសម្ព័ន្ធតាមព្រំដែន នៅថ្ងៃទី៦ ខែកញ្ញា ឆ្នាំ២០២៤នេះ ដោយសារការស្រលាញ់ជាតិពិតប្រាកដ។កម្មករនិយោជិតក្នុងរោងចក្រ បូវឃើ ខេត្តកណ្តាលអ្នកស្រី ឆេន ស្រីនួន បានឱ្យដឹងថា ការចូលរួមថវិកាជូនមូលនិធិអភិវឌ្ឍន៍ព្រំដែនជាមួយរាជរដ្ឋភិបាល គឺជាទឹកចិត្តស្រលាញ់ជាតិមាតុភូមិ ចង់ឱ្យតំបន់ព្រំដែនមានការអភិវឌ្ឍរីកចម្រើន មានភាពទាក់ទាញកាន់តែខ្លាំងបន្ថែមទៀត។ អ្នកស្រីបន្តថា ការចូលរួមបរិច្ចាគនេះ គឺជាការបង្ហាញទឹកចិត្តស្នេហាជាតិ ការរួបរួមគ្នារបស់ប្រជាជាតិទាំងអស់ក្នុងការកសាងរបងការពារជាតិយ៉ាងរឹងមាំ គឺហេដ្ឋារចនាសម្ព័ន្ធនៅតាមតំបន់បណ្ដោយព្រំដែនកម្ពុជាជាមួយនឹងប្រទេសជិតខាង។អ្នកស្រីបន្ថែមថា៖«ក្នុងនាមខ្ញុំជាប្រជាពលរដ្ឋខ្មែរ សូមគាំទ្រចំពោះគម្រោងអភិវឌ្ឍតាមតំបន់ព្រំដែន ហើយខ្ញុំបានចូលរួមបរិច្ចាគថវិកាខ្លះ ដើម្បីជាចំណែកតូចមួយក្នុងការចូលរួមជាមួយរាជរដ្ឋាភិបាលរបស់យើង។ បើទោះបីជាថវិកាតិចតួច ប៉ុន្ដែវាជាទឹកចិត្តដោយក្ដីគោរព ស្រលាញ់រាជរដ្ឋាភិបាល និងប្រទេសជាតិរបស់យើង»។កម្មការិនីរោងចក្រម្នាក់ទៀតអ្នកស្រី ឡុង លីណា បាននិយាយថា ការស្ម័គ្រចិត្តចូលរួមមូលនិធិនេះ គឺចង់ឱ្យមានការអភិវឌ្ឍ ហើយទាក់ទាញភ្ញៀវទេសចរ ងាយស្រួលទៅលេងនៅតំបន់ព្រំដែន។ ជាពិសេស អ្នកស្រីចង់ឃើញភ្ញៀវទេសចរទៅលេងទីនោះកាន់តែច្រើនថែមទៀត។អ្នកស្រីបញ្ជាក់ថា៖«ការដែលខ្ញុំចង់ចូលរួមមូលនិធិហ្នឹង គឺខ្ញុំចង់ឱ្យមានការអភិវឌ្ឍព្រំដែន ហើយនិងឱ្យមានភ្ញៀវទេសចរទៅកម្សាន្តនៅព្រំដែនហ្នឹងឱ្យបានច្រើន មានការវិនិយោគដែលធ្វើឱ្យប្រជាជននៅតាមព្រំដែនមានការងារធ្វើច្រើនដែរ»។ស្រដៀងគ្នានេះអ្នកស្រី ណយ ស្រីល័ក្ខ អាយុ ២៨ឆ្នាំ ជាកម្មការិនី បូវឃើ បាននិយាយថា៖«ខ្ញុំបានចូលរួមថវិកាបន្តិចបន្តួចក្នុងការអភិវឌ្ឍនៅតំបន់ព្រំដែនឱ្យមានសោភ័ណភាពសម្រាប់ទាក់ទាញភ្ញៀវទេសចរ ចង់ឱ្យតំបន់នោះក្លាយជាតំបន់សេដ្ឋកិច្ចរីកចម្រើនឡើង ដោយសារទីនោះជាតំបន់ដាច់ស្រយាល ចឹងយើងអាចចូលរួមទាំងអស់គ្នាបាន មិនថាតិចតួចក្តី ច្រើនក្តីតាមស្ថាប័នផ្ទាល់ខ្លួន ឬតំបន់ដែលយើងរស់នៅក៏បានដែរ»។ជាមួយគ្នានេះ កម្មករនិយោជិតនៅរោងចក្រ បូវឃើ ទាំងអស់បានអំពាវនាវដល់បងប្អូនជនរួមជាតិ មិនថាក្នុងស្រុក ឬក្រៅប្រទេសទេ បើពិតជាស្រលាញ់ជាតិមាតុភូមិ ចង់ឱ្យប្រទេសជាតិរីកចម្រើនជឿនលឿនបានកាន់តែឆាប់រហ័ស គួរតែចូលរួមជាមួយរាជរដ្ឋាភិបាល តាមរយៈមូលនិធិកសាងហេដ្ឋារចនាសម្ព័ន្ធតាមព្រំដែនឱ្យបានគ្រប់ៗគ្នា៕

កម្ពុជា-ចិន ប្ដេជ្ញាបន្តសហការលើការងារសន្តិសុខ ការស្វែងរកជនល្មើស និងការពង្រឹងច្បាប់

2024/09/07 09:55:08 am        1050
Facebook Telegram Linkin
ភ្នំពេញ៖ ក្រសួងមហាផ្ទៃកម្ពុជា និងក្រសួងសន្តិសុខសាធារណៈចិន បានប្ដេជ្ញាបន្តសហការអនុវត្តលើការងារសន្តិសុខ ការស្វែងរកជនល្មើស និងការធ្វើមាតុភូមិនិវត្តន៍ ការពង្រឹងការអនុវត្តច្បាប់ជាក់ស្តែង ការកសាងសមត្ថភាព ការលើកកម្ពស់គុណភាព និងប្រសិទ្ធភាពកិច្ចសហប្រតិបត្តិការ ។ ការប្ដេជ្ញានេះ បានធ្វើឡើងតាមរយៈការចុះហត្ថលេខា លើផែនការការងារស្តីពី ការបន្តអនុវត្តឆ្នាំនៃកិច្ចសហប្រតិបត្តិការអនុវត្តច្បាប់បន្ទាប់ពីបានអនុវត្តដោយជោគជ័យ ជាបន្តបន្ទាប់ ចាប់ពីឆ្នាំ២០១៩មក រវាងឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងឯកឧត្តម វ៉ាង ស៊ាវហុង សមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងសន្តិសុខសាធារណៈចិន នៅទីក្រុងប៉េកាំង កាលពីថ្ងៃទី៦ ខែកញ្ញា ឆ្នាំ២០២៤ ។ការចុះហត្ថលេខា រវាងក្រសួងផ្ទៃកម្ពុជា និងក្រសួងសន្តិសុខសាធារណៈចិន បានឆ្លុះបញ្ចាំងពីការយកចិត្តទុកដាក់ និងការប្តេជ្ញាចិត្តរវាងរដ្ឋាភិបាល នៃប្រទេសទាំងពីរ ក៏ដូចជារវាងក្រសួងមហាផ្ទៃកម្ពុជា និងក្រសួងសន្តិសុខសាធារណៈចិន ក្នុងកិច្ចសហការថែរក្សាសន្តិសុខ សុវត្ថិភាព និងសណ្តាប់ធ្នាប់សាធារណៈ ។ បន្ទាប់ពីធ្វើជាសហប្រធានដឹកនាំកិច្ចប្រជុំ និងចុះហត្ថលេខា លើឯកសារសហប្រតិបត្តិការ ឯកឧត្តមអភិសន្តិបណ្ឌិត បានកោតសរសើរ និងវាយតម្លៃខ្ពស់ ចំពោះកិច្ចសហការនានា ដែលភាគីចិនបាននិងកំពុងជួយកម្ពុជាលើវិស័យសន្តិសុខ មានទាំងការផ្តល់សម្ភារបច្ចេកទេស ការបណ្តុះបណ្តាលធនធានមនុស្ស ការប្រយុទ្ធប្រឆាំងឧក្រិដ្ឋកម្មឆ្លងដែន ការជួញដូរមនុស្ស និងសកម្មភាពឆបោកតាមអនឡាញជាដើម ។ ជាមួយគ្នានេះ ឯកឧត្តម វ៉ាង ស៊ាវហុង ក៏បានវាយតម្លៃខ្ពស់ ចំពោះកិច្ចសហប្រតិបត្តិការរវាងភាគីទាំងពីរ នាពេលកន្លងមក ព្រមទាំងបានបង្ហាញក្ដីសង្ឃឹមជឿជាក់ខ្ពស់នៅក្នុងអាណត្តិថ្មី នៃរាជរដ្ឋាភិបាលកម្ពុជា កិច្ចសហប្រតិបត្តិការអនុវត្តច្បាប់រវាងក្រសួងមហាផ្ទៃកម្ពុជា និងក្រសួងសន្តិសុខសាធារណៈចិន នឹងកាន់តែមានភាពរីកចម្រើនជាផ្លែផ្កា ហើយភាគីចិន នៅតែបន្តគាំទ្រ និងផ្តល់ជំនួយទាំងផ្នែកពង្រឹងសមត្ថភាព និងសម្ភារផ្សេងៗផងដែរ ។ទន្ទឹមនឹងការផ្លាស់ប្ដូរយោបល់គ្នា លើប្រធានបទសំខាន់ៗមួយចំនួន ក្នុងជំនួបនោះ ភាគីទាំងពីរ ក៏បានគូសបញ្ជាក់នូវអំណរសាទរ ចំពោះលទ្ធផល នៃដំណើរទស្សនកិច្ចទាំងពីរលើក របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ទៅកាន់ប្រទេសចិន កាលពីឆ្នាំ២០២៣ ជាពិសេសការឯកភាពពង្រឹង និងពង្រីកកិច្ចសហប្រតិបត្តិការគ្រប់វិស័យ ដោយបានចុះហត្ថលេខាលើផែនការសកម្មភាព នៃការកសាងសហគមន៍វាសនារួម កម្ពុជា-ចិន ក្នុងយុគសម័យថ្មី សម្រាប់ឆ្នាំ២០២៤-២០២៨។គួរបញ្ជាក់ថា គិតត្រឹមឆ្នាំ២០២៣ ដល់ឆមាសទី១ ឆ្នាំ២០២៤ ក្រសួងមហាផ្ទៃកម្ពុជា និងក្រសួងសន្តិសុខសាធារណៈចិន បានសហការស្រាវជ្រាវ និងបង្ក្រាបបទល្មើសឆ្លងដែនជាច្រើនករណី ដែលមានទាំងបទល្មើសតាមប្រព័ន្ធបច្ចេកវិទ្យា អំពើជួញដូរមនុស្ស និងបទល្មើសគ្រឿងញៀនជាដើម ៕ អត្ថបទ បាន សុខរិទ្ធិ

លោកនាយក លោកគ្រូអ្នកគ្រូនៃវិទ្យាល័យព្រះបាតសុរាម្រឹតកំពង់ឆ្នាំង នឹងនាំសិស្សទៅលេងតំបន់(CLV-DTA) ដើម្បីឈ្វេងយល់ពីការរីកចម្រើន និងគម្រោងនានារបស់រដ្ឋាភិបាលកម្ពុជា

2024/09/07 09:53:09 am        137
Facebook Telegram Linkin
កំពង់ឆ្នាំង៖ លោកនាយក លោកគ្រូអ្នកគ្រូនៃវិទ្យាល័យព្រះបាតសុរាម្រឹតកំពង់ឆ្នាំង នៅព្រឹកថ្ងៃទី០៧ ខែកញ្ញា ឆ្នាំ២០២៤នេះ បានអះអាងថា ពួកគាត់នឹងនាំលោកគ្រូអ្នកគ្រូ សិស្សានុសិស្ស ពិសេសយុវជន និងអាណាព្យាបាលសិស្ស ទៅសិក្សាឈ្វេងយល់នៅព្រំដែន ក្នុងតំបន់នៃគម្រោងសហប្រតិបត្តិការត្រីកោណអភិវឌ្ឍន៍ កម្ពុជា ឡាវ វៀតណាម (CLV-DTA) ដើម្បីឈ្វេងយល់ពីការរីកចម្រើន និងគម្រោងនានារបស់រដ្ឋាភិបាលកម្ពុជា ។   លោកនាយក លោកគ្រូអ្នកគ្រូនៃវិទ្យាល័យព្រះបាតសុរាម្រឹត ស្ថិតក្នុងក្រុងកំពង់ឆ្នាំង បានថ្លែងថា៖ លោកបាននាំគ្នាដាក់ពាក្យទៅមន្ទីរព័ត៌មានខេត្តកំពង់ឆ្នាំងរួចហើយ ដើម្បីបាននាំលោកគ្រូអ្នកគ្រូ សិស្សានុសិស្ស ពិសេសយុវជន និងអាណាព្យាបាលសិស្សទៅទស្សនៈកិច្ចសិក្សា ទៅពិនិត្យមើលពីភាពរីកចម្រើននៅតំបន់ CLV-DTA ។ ពួកយើងនឹងរៀបចំដំណើរទស្សនកិច្ច របស់លោកគ្រូអ្នកគ្រូ សិស្ស បងប្អូនប្រជាពលរដ្ឋ ក៏ដូចជាយុវជន ទៅកាន់តំបន់ព្រំដែន ដើម្បីឱ្យបងប្អូនយើងមើលឃើញ ស្ថានភាពជាក់ស្ដែងនៅទីនោះផ្ទាល់ កុំឱ្យជឿគេដែលចេះតែថា។  នៅព្រឹកថ្ងៃដដែលនេះ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង បានបញ្ជាក់ថា៖ នៅពេលខាងមុខនេះឯកឧត្តម កំពុងរៀបចំក្បួនមន្ត្រីរាជការគ្រប់មន្ទីរ សិស្សានុសិស្ស លោកគ្រូអ្នកគ្រូ និងប្រជាពលរដ្ឋ ទៅកាន់ខេត្តនៅខេត្តទាង៤ គឺក្រចេះ ស្ទឹងត្រែង មណ្ឌលគីរី និងរតនៈគីរី ដើម្បីអោយពួកគាត់សិក្សាឈ្វេងយល់មើលថាតើ ដូចអ្វីដែលក្រុមប្រឆាំងក្រៅស្រុកបាននិយាយបំភ្លើសបំភ្លៃដែរអត់?។  ឯកឧត្តមបានបន្ថែមថា៖ ក្នុងរយៈពេលមួយឆ្នាំនេះ រដ្ឋាភិបាលដែលដឹកនាំដោយសម្តេចធិបតី ហ៊ុន ម៉ាណែត នាយករដ្ឋមន្ត្រី បានសម្រេចសមិទ្ធផលធំៗចំនួន៦។ សមិទ្ធផលទាំងនេះ រួមមាន ផ្នែកថែរក្សាសុខសន្តិភាព ស្ថេរភាពនយោបាយ, ការការពារអធិបតេយ្យភាពជាតិ និងបូរណភាពទឹកដី ,ការបើកការដ្ឋានព្រែកជីកហ្វូណន ,ការផ្ដល់សេវាសុខាភិបាល ,វិធានការទីមួយ នៃកំណែរទម្រង់ស៊ីជម្រៅរបស់ក្រសួងមុខងារសាធារណៈ និងការចុះជួបពលរដ្ឋដោយផ្ទាល់១៥២លើក ពេញមួយឆ្នាំនេះ៕ កាំង ហុងវាស្នា

ពលករ និងបងប្អូនខ្មែរនៅកូរ៉េបន្តចូលរួមមូលនិធិអភិវឌ្ឍន៍ព្រំដែន ​ជាមួយរាជរដ្ឋាភិបាលយ៉ាង​គគ្រឹកគគ្រេង

2024/09/07 09:22:37 am        1144
Facebook Telegram Linkin
ពលករ និងបងប្អូនសហគមន៍ខ្មែរកំពុងរស់នៅ និងធ្វើការនៅសាធារណរដ្ឋកូរ៉េ រីករាយបរិច្ចាគថវិកាជូន «មូលនិធិកសាងហេដ្ឋារចនាសម្ព័ន្ធតាមព្រំដែន» យ៉ាងគគ្រឹកគគ្រេងបន្ថែមទៀត នៅថ្ងៃទី៦ ខែកញ្ញា ឆ្នាំ២០២៤នេះ ព្រោះទឹកចិត្តស្រលាញ់ជាតិមាតុភូមិ និងចង់ជួយរួមចំណែកអភិវឌ្ឍន៍តំបន់ព្រំដែន។ ពលករ និងបងប្អូនប្រជាពលរដ្ឋខ្មែរនៅប្រទេសកូរ៉េបានលើកឡើងថា ការបាញ់លុយចូលមូលនិធិកសាងហេដ្ឋារចនាសម្ព័ន សំខាន់ដើម្បីចូលរួមចំណែកជាមួយរាជរដ្ឋាភិបាលក្នុងការអភិវឌ្ឍតំបន់ព្រំដែន ឱ្យបានកាន់តែរីកចម្រើនថែមទៀត ព្រោះ មានតែការការភិវឌ្ឍតំបន់ព្រំដែនឱ្យទៅជាទីកន្លែងអ៊ូអរ ជាទីប្រជុំជនមានមនុស្សច្រើនប៉ុណ្ណោះ ទើបធ្វើឱ្យព្រំដែនប្រទេសជាតិរឹងមាំគង់វង្សជារៀងរហូតទៅ។ លោក ប៉ា ស៊ីន ពលករនៅប្រទេសកូរ៉េ បញ្ជាក់ថា៖«ក្នុងនាមជាពលរដ្ឋខ្មែរ ខ្ញុំបាទសូមគាំទ្រ និងស្ម័គ្រចិត្តចូលរួមថវិកាផ្ទាល់ខ្លួនចំនួន១៥ដុល្លារ រួមគ្នាកសាងហេដ្ឋារចនាសម្ព័ន្ធតាមព្រំដែន»។ ស្រដៀងគ្នានេះ លោក ម៉េង ណារ៉ូ បានលើកឡើងថា៖«ខ្ញុំបាទរូមទាំងគ្រួសារ មានថវិកាស្តួចស្តើង សូមចូលរួមជាមួយរាជរដ្ឋាភិបាលក្នុងការអភិវឌ្ឍហេដ្ឋារចនាសម្ព័ន្ធតាមព្រំដែន»។ ចំណែកលោក ផល សុភ័ណ្ឌ ពលករនៅកូរ៉េម្នាក់ទៀតបានបញ្ជាក់ថា៖«ខ្ញុំសូមចូលរួមជាមួយរាជរដ្ឋាភិបាល ក្នុងការកសាងហេដ្ឋារចនាសម្ព័ន្ធនានានៅតាមបណ្តោយព្រំដែន»។ សូមបញ្ជាក់ថា សម្តេចធិបតីហ៊ុន ម៉ាណែត នាយករដ្ឋមន្រ្តីនៃកម្ពុជា បានសម្រេចបង្កើត «មូលនិធិកសាងហេដ្ឋារចនាសម្ព័ន្ធតាមព្រំដែន» កាលពីថ្ងៃទី២២ ខែសីហា ក្នុងគោលបំណងដើម្បីកៀរគរថវិកាបន្ថែម សម្រាប់កសាងហេដ្ឋារចនាសម្ព័ន្ធតាមបណ្ដោយព្រំដែន ដោយផ្ដោតលើការកសាងផ្លូវក្រវាត់ព្រំដែន។ ជាមួយគ្នានោះ សម្តេចក៏បានផ្តល់ឱកាសឱ្យប្រជាពលរដ្ឋខ្មែរគ្រប់មជ្ឈដ្ឋាន ទាំងក្នុង និងក្រៅប្រទេស បានចូលរួមចំណែកដោយផ្ទាល់ជាមួយ រាជរដ្ឋាភិបាលនៅក្នុងបុព្វហេតុការពារ និងអភិវឌ្ឍជាតិ ក្នុងស្មារតីមហាសាមគ្គីជាតិខ្មែរ ដើម្បីថែរក្សា សុខសន្តិភាព អធិបតេយ្យ និងបូរណភាពទឹកដី ក៏ដូចជាការជំរុញការអភិវឌ្ឍ នៅតាមតំបន់ព្រំដែនឱ្យបានកាន់តែរឹងមាំ និងប្រកបដោយចីរភាព៕

អាវុធហត្ថរាជធានីឃាត់ខ្លួនជនសង្ស័យ១១នាក់ បញ្ជូនទៅតុលាការករណីហិង្សា

2024/09/07 09:07:11 am        520
Facebook Telegram Linkin
ភ្នំពេញ៖ កម្លាំងជំនាញកងរាជអាវុធហត្ថរាជធានីភ្នំពេញ ស្រាវជ្រាវឃាត់ខ្លួនជនសង្ស័យ ប្រុស ស្រី ១១នាក់បញ្ជូនទៅតុលាការករណីហិង្សា ។កងរាជអាវុធហត្ថរាជធានីភ្នំពេញ ប្រាប់ឲ្យដឹងថា កាលពីវេលាម៉ោង ០៥ និង០០នាទីព្រឹក ថ្ងៃទី០៥ ខែកញ្ញា ឆ្នាំ២០២៤ មានយុវវ័យ ប្រុស-ស្រី មួយក្រុម បានធ្វើសកម្មភាព វាយនិងយកដុំថ្មគប់ទៅលើ យុវវ័យមួយក្រុមទៀត បណ្ដាលឲ្យរងរបួស ចំនួន ០៦នាក់ (ប្រុស ០១នាក់ ស្រី ០៥នាក់) នៅចំណុចផ្លូវបេតុង សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ តែនៅមិនអស់ចិត្ត ក្រុមជនសង្ស័យខាងលើនេះ ​បាននាំគ្នាទៅធ្វើសកម្មភាព ​វាយជនរងគ្រោះដល់ផ្ទះម្ដងទៀត​យ៉ាង​ក្លាហានគ្មានសំចៃដៃ គ្មានខ្លាចក្រែងញញើតច្បាប់ ក្នុងវេលាម៉ោងប្រមាណ ០៦ និង៣០នាទី ព្រឹកថ្ងៃដដែល នៅចំណុចភូមិដំណាក់ធំ២ សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ ។បន្ទាប់ពីបានឃើញមានវីដេអូ ផុសតាមបណ្តាញសង្គម កម្លាំងជំនាញអាវុធហត្ថរាជធានីភ្នំពេញ គ្រប់គោលដៅ បានបើកការស្រាវជ្រាវ រហូតដល់ម៉ោង១៣ និង៥២នាទី ថ្ងៃដដែល មូលដ្ឋាន​អាវុធហត្ថខណ្ឌមានជ័យ បានធ្វើការឃាត់ខ្លួនជនសង្ស័យប្រុសស្រីចំនួន ១១នាក់ (ប្រុសចំនួន ០៣នាក់ ស្រីចំនួន ០៨នាក់) ក្នុងចំណោម ១៣នាក់ ពាក់ព័ន្ធករណីហិង្សាខាងលើ យកមកធ្វើការ​សាកសួរតាមនីតិវិធី។ក្រោមវិធានការជំនាញ ជនសង្ស័យប្រុសស្រីទាំង១១នាក់ បានឆ្លើយសារភាពឱ្យដឹងដូចៗគ្នាថា ពួកខ្លួនពិតជាធ្វើសកម្មភាពប្រើអំពើហិង្សា ដោយនាំគ្នាព្រួតវាយ និងយកដុំថ្មគប់ ទៅលើជនរងគ្រោះ បណ្តាលឲ្យរងរបួស ពិតប្រាកដមែន ព្រោះតែមូលហេតុពួកខ្លួន ​មានជម្លោះជាមួយក្រុមជនរងគ្រោះ​ដែល​ជាបុគ្គលិកលក់ស្រាក្រឡុក មានទីតាំងនៅក្បែរគ្នា។ចំពោះក្រុមជនជនសង្ស័យប្រុសស្រីទាំង ១១នាក់ ត្រូវបានកម្លាំងជំនាញការិយាល័យប្រឆាំង​បទល្មើស​ព្រហ្មទណ្ឌ នៃកងរាជអាវុធហត្ថរាជធានីភ្នំពេញ ​កសាងសុំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់ ។ ​ចំណែកឯបក្ខពួកដែលកំពុងរត់គេចខ្លួន អាវុធហត្ថរាជធានីភ្នំពេញ កំពុងស្រាវជ្រាវ​តាមចាប់ខ្លួនបន្តទៀត ៕ 

សម្តេចធិបតី៖ កំណាត់ផ្លូវជាតិលេខ៧៨ដើរតួនាទីដឹកជញ្ជូនកសិកម្មទេសចរណ៍ និងបម្រើដល់យុទ្ធសាស្រ្តយោធា

2024/09/07 08:45:39 am        279
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានរំលឹកអំពីអត្ថប្រយោជន៍ផ្លូវជាតិលេខ៧៨ ខណៈ ផ្លូវមួយនេះ គឺជាផ្លូវយុទ្ធសាស្រ្តក្នុងការតភ្ជាប់ភូមិភាគឦសាន ពីខេត្តស្ទឹងត្រែង ទៅកាន់ខេត្តរតនគិរី រហូត ដល់តំបន់កន្ទុយនាគ ហើយមិនតែប៉ុណ្ណោះផ្លូវនេះបានដើរតួនាទីយ៉ាងសំខាន់ក្នុងវិស័យដឹកជញ្ជូនផ្នែក កសិកម្ម ទេសចរណ៍ និងបម្រើដល់យុទ្ធសាស្រ្តយោធាផងដែរ។តាមរយៈផេកហ្វេសបុកផ្ទាល់របស់សម្តេច នាព្រឹកថ្ងៃទី៧ ខែកញ្ញា ឆ្នាំ២០២៤នេះ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា កំណាត់ផ្លូវជាតិលេខ៧៨ ត្រង់ចំណុចស្រុកសេសាន ខេត្តស្ទឹងត្រែង និងស្រុកកូនមុំ ខេត្តរតនគិរី ។ សម្តេចបានបន្ថែមទៀតថា ផ្លូវជាតិលេខ៧៨ គឺជាផ្លូវយុទ្ធសាស្ត្រក្នុងការតភ្ជាប់ភូមិភាគឦសាន ពីខេត្តស្ទឹងត្រែង ទៅកាន់ខេត្តរតនគិរី ដោយបន្តរហូតដល់តំបន់កន្ទុយនាគ នៃព្រះរាជាណាចក្រកម្ពុជា ។ ផ្លូវនេះ មានប្រវែងជាង ១៩១គីឡូម៉ែត្រ ដោយបានសាងសង់ជាប្រភេទផ្លូវកម្រាលកៅស៊ូ DBST និង AC ។ នាកន្លងមក ផ្លូវនេះ ក៏ត្រូវបានប្រើប្រាស់សម្រាប់បម្រើដល់យុទ្ធសាស្ត្រយោធាផងដែរ គឺតាំងតែពីផ្លូវនៅដីក្រហមមកម្ល៉េះ ។សម្រាប់នាពេលបច្ចុប្បន្ន ផ្លូវជាតិលេខ៧៨ ត្រូវបានសម្តេចធិបតី នាយករដ្ឋមន្រ្តីអះអាងថា វាបានដើរតួនាទីយ៉ាងសំខាន់ ក្នុងវិស័យដឹកជញ្ជូន និងទេសចរណ៍ ដែលបានផ្តល់អត្ថប្រយោជន៍ជាច្រើនដល់ពលរដ្ឋ ក្នុងការកសាងមូលដ្ឋានសេដ្ឋកិច្ចនៅតាមតំបន់ព្រំដែនឱ្យបានកាន់តែរឹងមាំ និងរីកចម្រើន ។ បន្ថែមពីនេះ ផ្លូវជាតិលេខ៧៨ក៏ត្រូវប្រើប្រាស់ផងដែរនៅក្នុងការដឹកកសិផលរបស់កម្ពុជា សម្រាប់ទីផ្សារក្នុងស្រុក និងក្រៅស្រុកបានកាន់តែលឿនផងដែរ និងប្រកបដោយប្រសិទ្ធភាព ដែលរក្សាបាននូវគុណភាពកសិផលរបស់ប្រជាពលរដ្ឋ។តាមរយៈសំណេរក្នុងហ្វេសបុកនេះដែរ សម្តេចធិបតី ហ៊ុន ម៉ាណែត ក៏បានគូសរំលេចផងដែរថា ផ្លូវ ស្ពាន គឺជាសរសៃឈាមនៃសេដ្ឋកិច្ចជាតិ និងជាអាទិភាពគន្លឹះទី២ ក្នុងចំណោមអាទិភាពគន្លឹះទាំង៥ «មនុស្ស ផ្លូវ ទឹក ភ្លើង និងបច្ចេកវិទ្យា» នៃយុទ្ធសាស្ត្របញ្ចកោណ ដំណាក់កាលទី១ ដោយក្នុងកិច្ចការអាទិភាពទី២ នៃបញ្ចកោណទី២ គឺការលើកកម្ពស់ការតភ្ជាប់ និងការបង្កើនប្រសិទ្ធភាពនៃវិស័យដឹកជញ្ជូន ដែលមានគោលដៅយុទ្ធសាស្ត្រផ្តោតលើការបន្តកសាង និងពង្រឹងមូលដ្ឋានគ្រឹះ តាមរយៈការបង្កើនប្រសិទ្ធភាពហេដ្ឋារចនាសម្ព័ន្ធគាំទ្រ និងការកសាង ព្រមទាំងការអភិវឌ្ឍហេដ្ឋារចនាសម្ព័ន្ធថ្មីៗជាដើម៕ អត្ថបទបាន ចក់

មជ្ឈមណ្ឌលបណ្ដុះធុរកិច្ចថ្មីតេជោ ដាក់ប្រើសាកល្បងប្រព័ន្ធកំណត់អត្តសញ្ញាណសហគ្រាសនៅកម្ពុជា

2024/09/06 07:16:09 pm        545
Facebook Telegram Linkin
ភ្នំពេញ ÷ មជ្ឈមណ្ឌលបណ្ដុះធុរកិច្ចថ្មី “តេជោ" ដាក់ឱ្យប្រើប្រាស់សាកល្បង ប្រព័ន្ធកំណត់អត្តសញ្ញាណសហគ្រាស (e-KYB) ដើម្បី បង្កើតនូវមូលដ្ឋានជាក់លក្ខ សម្រាប់សហគ្រាសឯកបុគ្គល ឬដៃគូរ ជាពិសេសការផ្តល់ភាពងាយស្រួលដល់ស្ថានប័នរដ្ឋ ឬឯកជន ក្នុងការស្វែងរកអត្តសញ្ញាណសហគ្រាសនីមួយៗ តាមរយៈការគាំទ្រសកម្មភាពផ្សេងៗ។ឯកឧត្តមបណ្ឌិត តាំង ងួនលី នាយកប្រតិបត្តិមជ្ឈមណ្ឌលបណ្តុះធុរកិច្ចថ្មី "តេជោ" លើកឡើងនៅក្នុងពិធីប្រកាសដាក់ឱ្យ ប្រើប្រាស់សាកល្បង "ប្រព័ន្ធកំណត់អត្តសញ្ញាណសហគ្រាស (Electronic Know Your Business, e-KYB)" នៅថ្ងៃទី ៦ ខែ កញ្ញា ឆ្នាំ ២០២៤ នេះថា រយៈពេលជាង ៤ ឆ្នាំមកនេះ ថ្នាលផ្លាស់ប្តូរទិន្នន័យកម្ពុជា (CamDX) ត្រូវបានដាក់ដំណើរការ។ ថ្នាលនេះ ត្រូវបានចាត់ទុកថា ជាដំណោះស្រាយបច្ចេកវិទ្យាឌីជីថល ស្ថិតក្នុងទម្រង់ជាហេដ្ឋារចនាសម្ព័ន្ធ ហើយបានក្លាយជាថ្នាលឌីជីថលគ្រឹះ រួមរបស់រាជរដ្ឋាភិបាល ដែលបាននិងកំពុងក្លាយជាបច្ចេកវិទ្យាឆ្អឹងខ្នងដ៏មានសក្តានុពល បើកឱកាសឱ្យប្រព័ន្ធបច្ចេកវិទ្យា ព័ត៌មានរបស់ ក្រសួង-ស្ថាប័ននីមួយៗតភ្ជាប់គ្នា និងចែករំលែកទិន្នន័យរវាងគ្នានិងគ្នា នៅក្នុងប្រព័ន្ធអេកូឡូស៊ីឌីជីថលសម្រាប់ធុរកិច្ច ជំរុញការផ្តល់ សេវាអេឡិចត្រូនិកប្រកបដោយប្រសិទ្ធភាព នៅក្រោមក្របខ័ណ្ឌ និងគោលការណ៍ច្បាស់លាស់, តម្លាភាព និងភាពជឿទុកចិត្តបាន។ឯកឧត្តមបណ្ឌិត បន្តថា សម្រាប់ថ្នាលសម្គាល់អត្តសញ្ញាណអតិថិជនឌីជីថលកម្ពុជា (CamDigiKey) បានលេចរូបរាងឡើង ជាដំណោះស្រាយ e-KYC ក្នុងទម្រង់ជាយន្តការផ្ទៀងផ្ទាត់អត្តសញ្ញាណបុគ្គល ដោយមានការផ្ទៀងផ្ទាត់ជាមួយទិន្នន័យអត្តសញ្ញា ណកម្មរបស់ក្រសួងមហាផ្ទៃ។ ដោយឡែកការប្រកាសដាក់ឱ្យប្រើប្រាស់សាកល្បងនូវ “ប្រព័ន្ធកំណត់អត្តសញ្ញាណសហគ្រាស (e-KYB)” នេះ គឺជាការផ្សព្វផ្សាយ និងចែករំលែកនូវសមិទ្ធផលថ្មីនេះ ដែលកើតចេញពីកិច្ចសហការរួមរវាងក្រសួង ស្ថាប័ននៅក្នុង រាជរដ្ឋាភិបាល ជាពិសេសក្រសួងពាណិជ្ជកម្ម, ក្រសួងការងារ និងបណ្តុះបណ្តាលវិជ្ជាជីវៈ, អគ្គនាយកដ្ឋានពន្ធដារ នៃក្រសួងសេដ្ឋកិច្ច និងហិរញ្ញវត្ថុ និងការចូលរួមគាំទ្រយ៉ាងពេញទំហឹងពីសមាជិកដែលមកពីវិស័យឯកជនផងដែរ។ឯកឧត្តមបណ្ឌិត តាំង ងួនលី បញ្ជាក់ឱ្យដឹងថា គិតត្រឹមដំណាច់ខែ សីហា ឆ្នាំ ២០២៤ នេះ, សមាជិកស្វ័យប្រវត្តិ និងមិនស្វ័យ ប្រវត្តិនៃថ្នាល CamDX សរុបមានចំនួន ៦២ ដោយក្នុងនោះសមាជិកស្វ័យប្រវត្តិក្នុងវិស័យសាធារណៈចំនួន ៣០ ជាក្រសួង-ស្ថាប័ន នៃរាជរដ្ឋាភិបាល បានបញ្ចូលសេវាសាធារណៈអាទិភាពរបស់ខ្លួនដែលត្រូវការញឹកញាប់ និងជាប្រចាំចំនួន ៣១ សេវា រួចមកហើយ ហើយបាននិងកំពុងបញ្ចូលសេវាសាធារណៈចំនួន ១០ បន្ថែមទៀត។ ទន្ទឹមនេះ, សមាជិកមិនមែនស្វ័យប្រវត្តិ គឺតាមរយៈការស្នើសុំ ចូលរួមពីវិស័យឯកជន ជាពិសេសពីវិស័យហិរញ្ញវត្ថុ, ធនាគារ និងធានារ៉ាប់រង មានចំនួន ៣២ ស្ថាប័នផងដែរ៕អត្ថបទ៖ សុន រ៉ាឌី

កម្ពុជា-ឥណ្ឌូណេស៊ី ប្ដេជ្ញាបន្តពង្រឹង និងពង្រីកទំនាក់ទំនងឱ្យកាន់តែរឹងមាំថែមទៀត

2024/09/06 06:44:23 pm        146
Facebook Telegram Linkin
ភ្នំពេញ ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នារសៀលថ្ងៃទី៦ ខែកញ្ញា ឆ្នាំ ២០២៤នេះ បានអនុញ្ញាតឱ្យឯកឧត្ដម Prabowo Subianto រដ្ឋមន្ត្រីក្រសួងការពារជាតិ និងជាប្រធានាធិបតីជាប់ឆ្នោត នៃសាធារណរដ្ឋឥណ្ឌូណេស៊ី ក្នុងជំនួបសម្តែងការគួរសម និងពិភាក្សាការងារ នៅវិមានសន្តិភាព។ក្នុងឱកាសនៃជំនួប ឯកឧត្តម Prabowo Subianto រដ្ឋមន្ត្រីការពារជាតិ និងជាប្រធានាធិបតីជាប់ឆ្នោត នៃសាធារណរដ្ឋឥណ្ឌូណេស៊ី បានកោតសរសើរ និងវាយតម្លៃខ្ពស់ចំពោះការអភិវឌ្ឍរីកចម្រើនដ៏ឆាប់រហ័ស និងរឹងមាំលើគ្រប់វិស័យនៅកម្ពុជា។ ឯកឧត្តមរដ្ឋមន្ត្រីការពារជាតិ និងជាប្រធានាធិបតីជាប់ឆ្នោតក៏បានគូសបញ្ជាក់ពីទំនាក់ទំនង និងកិច្ចសហប្រតិបត្តិការដ៏ល្អប្រសើររវាងប្រទេសទាំងពីរ ព្រមទាំងប្ដេជ្ញាចិត្តក្នុងការបន្តពង្រឹង និងពង្រីកទំនាក់ទំនងឥណ្ឌូណេស៊ី-កម្ពុជាឱ្យកាន់តែជិតស្និទ្ធ និងរឹងមាំថែមទៀត។ សម្ដេចធិបតីបានវាយតម្លៃខ្ពស់ចំពោះទំនាក់ទំនងដ៏យូរលង់ និងកិច្ចសហប្រតិបត្តិការដ៏ល្អប្រសើររវាងកម្ពុជា និងឥណ្ឌូណេស៊ី និងបានគូសបញ្ជាក់ថា ដំណើរទស្សនកិច្ចរបស់ឯកឧត្តមរដ្ឋមន្ត្រីការពារជាតិ និងជាប្រធានាធិបតីជាប់ឆ្នោត នាពេលនេះ នឹងចូលរួមពូនជ្រំទំនាក់ទំនង និងកិច្ចសហប្រតិបត្តិការកម្ពុជា-ឥណ្ឌូណេស៊ីថែមទៀត ស្របពេលប្រទេសទាំងពីរប្រារព្ធខួបលើកទី៦៥ នៃការបង្កេីតទំនាក់ទំនងការទូត ក្នុងឆ្នាំនេះ។ សម្តេចធិបតីបានអបអរសារទរឯកឧត្តមរដ្ឋមន្ត្រីការពារជាតិ ដែលត្រូវបានជាប់ឆ្នោត ជាប្រធានាធិបតីនៃសាធារណរដ្ឋឥណ្ឌូណេស៊ី និងបានគូសបញ្ជាក់ពីការប្ដេជ្ញាចិត្តក្នុងត្រៀមធ្វើការជាមួយឯកឧត្តមរដ្ឋមន្ត្រីការពារជាតិ និងជាប្រធានាធិបតីជាប់ឆ្នោត ដើម្បីបន្តពង្រឹង និងពង្រីកទំនាក់ទំនងរវាងប្រទេសទាំងពីរថែមទៀត។ សម្ដេចធិបតី និង ឯកឧត្តមរដ្ឋមន្ត្រីការពារជាតិ និងជាប្រធានាធិបតីជាប់ឆ្នោត ក៏បានផ្លាស់ប្តូរទស្សនៈអំពីការពង្រឹង និងពង្រីកកិច្ចសហប្រតិបត្តិការទ្វេភាគី លើវិស័យសក្ដានុពលមួយចំនួន មានជាអាទិ៍ វិស័យសេដ្ឋកិច្ច ពាណិជ្ជកម្ម ការពារជាតិនិងសន្ដិសុខ កសិកម្ម និងទេសចរណ៍ រួមទាំងការពិចារណាលើលទ្ធភាពក្នុងការបង្កើនជើងហោះហើរត្រង់រវាងប្រទេសទាំងពីរបន្ថែមទៀត៕

បណ្ដាញសង្គម

ព័ត៌មានថ្មីៗ

ស្ថានទូតខ្មែប្រចាំនៅសាធារណរដ្ឋកូរ៉េ ចុះ MOU ជាមួយមន្ទីរពេទ្យដៃគូ ដើម្បីផ្ដល់អត្ថប្រយោជន៍ដល់ពលរដ្ឋខ្មែរនៅកូរ៉េ
06/03/2026 01:06 PM
Facebook Telegram Linkin
ក្រុមជម្រើសជាតិបារាំងជួបប្រធានាធិបតីបារាំង Emmanuel Macron មុនចេញដំណើរទៅ World Cup
06/03/2026 01:06 PM
Facebook Telegram Linkin
តេជោលីគ រកឃើញក្រុមខ្លាំងឡើងជុំទី២ ខណៈបញ្ជាការដ្ឋានអង្គរក្ស ជាក្រុមតែមួយគត់ មិនស្គាល់ចាញ់
06/03/2026 01:06 PM
Facebook Telegram Linkin
ក្រុមការងារអភិវឌ្ឍវិស័យឯកជនប្រមូលធាតុចូល និងលក្ខខណ្ឌនានា គាំទ្រការផលិតស៊ីម៉ងត៍ក្នុងស្រុក
06/03/2026 12:06 PM
Facebook Telegram Linkin
សម្ដេចធិបតី៖ រាជរដ្ឋាភិបាលមានលទ្ធភាពគ្រប់គ្រាន់បង្កើនថវិកាការពារជាតិមិនចាំបាច់កាត់ពីវិស័យផ្សេងទេ
06/03/2026 12:06 PM
Facebook Telegram Linkin
អតីតនាយករដ្ឋមន្ត្រីថៃ លោក ថាក់ស៊ីន ទទួល​បាន​ការលើកលែងទោសពីព្រះមហាក្សត្រ
06/03/2026 12:06 PM
Facebook Telegram Linkin
សម្ដេចធិបតី៖ បរិការណ៍ពិភពលោកបច្ចុប្បន្ន កម្ពុជាត្រូវពន្លឿនការកែទម្រង់លើវិស័យសេដ្ឋកិច្ច និងការពារជាតិ
06/03/2026 12:06 PM
Facebook Telegram Linkin
សម្ដេចតេជោ ហ៊ុន សែន ណែនាំមន្រ្ដីត្រូវបម្រើប្រជាជនដោយស្មោះត្រង់ និង​លុប​បំបាត់​ទង្វើ​ខុស​ឆ្គង​ចំពោះ​ពលរដ្ឋ
06/03/2026 12:06 PM
Facebook Telegram Linkin
ចិន រិះគន់ប្រមុខការពារជាតិហ្វីលីពីនជុំវិញការលើកឡើងពី «ការគំរាមកំហែង» របស់ចិន
06/03/2026 12:06 PM
Facebook Telegram Linkin
សម្តេចតេជោ ហ៊ុន សែន៖ កំពង់ធំជាគោលដៅការចាប់អារម្មណ៍លើការវិនិយោគកែច្នៃស្វាយចន្ទី ខណៈ​មហិច្ឆតាកម្ពុជាចង់ប្រែក្លាយជាអធិរាជស្វាយចន្ទី
06/03/2026 12:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.