BTV NEWS

ក្រុមការងារអភិវឌ្ឍវិស័យឯកជនប្រមូលធាតុចូល និងលក្ខខណ្ឌនានា គាំទ្រការផលិតស៊ីម៉ងត៍ក្នុងស្រុក

សម្ដេចធិបតី៖ រាជរដ្ឋាភិបាលមានលទ្ធភាពគ្រប់គ្រាន់បង្កើនថវិកាការពារជាតិមិនចាំបាច់កាត់ពីវិស័យផ្សេងទេ

សម្ដេចធិបតី៖ បរិការណ៍ពិភពលោកបច្ចុប្បន្ន កម្ពុជាត្រូវពន្លឿនការកែទម្រង់លើវិស័យសេដ្ឋកិច្ច និងការពារជាតិ

សម្ដេចតេជោ ហ៊ុន សែន ណែនាំមន្រ្ដីត្រូវបម្រើប្រជាជនដោយស្មោះត្រង់ និងលុបបំបាត់ទង្វើខុសឆ្គងចំពោះពលរដ្ឋ

ព័ត៌មានជាតិ

សម្តេចប្រធានរដ្ឋសភា៖កម្ពុជាឱ្យតម្លៃខ្លាំងណាស់ទៅលើសន្ដិភាពពីព្រោះកម្ពុជាធ្លាប់រងគ្រោះដោយសារសង្គ្រាម និងរបបប្រល័យពូជសាសន៍

ភ្នំពេញ ៖ នារសៀលថ្ងៃទី៦ ខែកញ្ញា ឆ្នាំ២០២៤ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បានអនុញ្ញាតឱ្យ គណៈប្រតិភូជាន់ខ្ពស់ សហព័ន្ធសន្តិភាពសកល សមាគមអន្តរជាតិនៃសភាដើម្បីសន្តិភាព ដឹកនាំដោយ ឯកឧត្តមបណ្ឌិត Charles Yang ប្រធានសហព័ន្ធសន្តិភាពសកល អន្តរជាតិ ចូលជួបសម្តែងការគួរសម និងពិភាក្សាការងារ នៅវិមានរដ្ឋសភា។ជាកិច្ចចាប់ផ្ដើមសម្ដេចប្រធានរដ្ឋសភា បានស្វាគមន៍យ៉ាងកក់ក្ដៅ និងថ្លែងអំណរគុណដល់ ឯកឧត្តមបណ្ឌិត Charles Yang ប្រធានសហព័ន្ធសន្តិភាពសកលអន្តរជាតិ និងគណៈប្រតិភូដែលបានអញ្ជើញមកព្រះរាជាណចក្រកម្ពុជា ដើម្បីចូលរួមចំណែកនៅក្នុងការពិភាក្សាកិច្ចប្រជុំប្រឹក្សាយោបល់ទៅលើធម្មនុញ្ញសន្ដិភាព ដែលរៀបចំឡើងដោយរដ្ឋសភា និងព្រឹទ្ធសភា នៃព្រះរាជាណាចក្រកម្ពុជា និងមានការគាំទ្រដោយវិទ្យាស្ថានចក្ខុវិស័យអាស៊ី។ កិច្ចប្រជុំប្រឹក្សាយោបល់ទៅលើធម្មនុញ្ញសន្ដិភាពនេះគឺជាផ្នែកមួយដ៏សំខាន់របស់កិច្ចប្រជុំកំពូលរបស់សភាអន្តរជាតិ សម្រាប់ភាពអត់ឱន និងសន្ដិភាព ដែលនឹងប្រព្រឹត្តិឡើងនៅខែវិច្ឆិកាឆ្នាំ២០២៤នេះ។ សម្ដេចប្រធានរដ្ឋសភា បានបញ្ជាក់ថាការចូលរួមរបស់សហព័ន្ធសន្តិភាពសកលអន្តរជាតិ ពិតជាបានដើរតួនាទីសំខាន់ ក្នុងការចូលរួមចំណែកកសាង និងរក្សាន្ដិភាព មិនមែនត្រឹមតែសម្រាប់សន្ដិភាពក្នុងតំបន់ប៉ុណ្ណោះទេ ប៉ុន្ដែនៅទូទាំងសកលលោកតែម្ដងពីព្រោះធម្មនុញ្ញសន្ដិភាពនេះ គឺជាឯកសារមួយដ៏សំខាន់ ក្នុងការចូលរួមចំណែកក្នុងការរក្សាសន្ដិភាព ខណៈពេលដែលស្ថានការណ៍បច្ចុប្បន្នតំបន់មួយចំនួននៅលើសកលលោកកំពុងមានសង្គ្រាមកើតឡើង ដែលនាំមកនូវការបំផ្លិចបំផ្លាញ និងជាគ្រោះមហន្តរាយដល់មនុស្សជាតិ។ សម្ដេចប្រធានរដ្ឋសភាពបញ្ជាក់ថា សម្រាប់ប្រទេសកម្ពុជា ដែលធ្លាប់រងគ្រោះដោយសារសង្គ្រាមសម័យខ្មែក្រហម និងអំពើប្រល័យពូជសាសន៍ ដូច្នេះកម្ពុជាឱ្យតម្លៃខ្លាំងណាស់ទៅលើសុខសន្ដិភាព ដូច្នេះហើយទើបកម្ពុជាដែលជាប្រទេសមួយតូច ប៉ុន្ដែបានខិតខំប្រឹងប្រែងខ្លាំងណាស់ ដើម្បីចូលរួមចំណែកក្នុងការកសាងសុខសន្ដិភាពសកល ក្នុងនោះមានសម្ដេចអគ្គមហាសនាបតីតេជោ ហ៊ុន សែន អតីតនាយករដ្ឋមន្រ្ដី និងបច្ចុប្បន្នជាប្រមុខរដ្ឋស្ដី សម្ដេចគឺជាបិតាស្ថាបនិកសន្ដិភាព និងនយោបាយឈ្នះឈ្នះរបស់កម្ពុជា។ជាការឆ្លើយតប ឯកឧត្តមបណ្ឌិត Charles Yang ប្រធានសហព័ន្ធសន្តិភាពសកលអន្តរជាតិ បានថ្លែងអំណរគុណដល់សម្ដេចប្រធានរដ្ឋសភា ដែលបានផ្ដល់ឱកាសដល់ឯកឧត្តម និងគណៈប្រតិភូបានចូលសម្ដែងការគួរសម។ ឯកឧត្តមបានបញ្ជាក់ថា សហព័ន្ធសន្តិភាពសកលអន្តរជាតិ គឺជាមិត្តល្អជាមួយកម្ពុជា និងតែងតែបានចូលរួមជាមួយកម្ពុជាជាច្រើននៅក្នុងវេទិកាសន្និសីទពិភពលោកតាំងពីឆ្នាំ២០១៩មក៕

កិច្ចការងារសន្តិសុខ នៅតែជាអាទិភាពដែលអាជ្ញាធរតាមមូលដ្ឋានខណ្ឌ បានបន្តយកចិត្តទុកដាក់ខ្ពស់

ភ្នំពេញ ៖ កិច្ចការងារសន្តិសុខ នៅតែជាការងារអាទិភាពដែលអាជ្ញាធរតាមមូលដ្ឋានខណ្ឌ បានបន្តយកចិត្តទុកដាក់ខ្ពស់ ដដើម្បីការពារធានាសុវត្ថិភាព ជូនពលរដ្ឋនៅក្នុងដែនដីរបស់ខ្លួន ។ នារសៀលថ្ងៃទី០៦ ខែកញ្ញា ឆ្នាំ២០២៤នេះ រដ្ឋបាលខណ្ឌបឹងកេងកង បានបើកកិច្ចប្រជុំគណះបញ្ជាការឯកភាពខណ្ឌ ដើម្បីពង្រឹងកិច្ចការងារសន្តិសុខឱ្យកាន់តែមានប្រសិទ្ធិភាពខ្ពស់ ។ កិច្ចប្រជុំនេះ ធ្វើឡើងក្រោមវត្តមាន លោកសុខ សម្បត្តិ អភិបាល នៃគណះអភិបាលខណ្ឌបឹងកេងកង និងមានការអញ្ចើ្ចញចូលរួមពីលោកអធិការនគរបាល , មេបញ្ជាការមូលដ្ឋានកងរាជអាវុធហត្ថ , លោកលោកស្រីជាចៅសង្កាត់ទាំង០៧ក្នុងមូលដ្ឋាន រួមជាមួយមន្ត្រីចំណុះរដ្ឋបាលខណ្ឌជាច្រើនរូបទៀតផងដែរ ។ លោក សុខ សម្បត្តិ អភិបាលខណ្ឌបឹងកេងកង បានលើកឡើងថា ៖ ពិតណាស់ថា បច្ចុប្បន្ននេះប្រទេសជាតិបានជួបនូវសុខសន្តិភាពក៏ពិតមែន ក៏ប៉ុន្តែអាជ្ញាធរក៏មិនត្រូវបណ្តែតបណ្តោយមិនខ្វាយខ្វល់លើការងារន្តិសុខនោះទេ ព្រោះអំពើអសន្តិសុខនានាអាចកើតមានបានគ្រប់ពេលវេលា ដែលបង្កឡើងដោយក្រុមជនមានចេតនាបង្កភាពវឹកវរដល់សង្គមជាតិ ។ លោកអភិបាលខណ្ឌបានណែនាំ ឱ្យមន្ត្រីក្រោមឱ្យវាទ បន្តយកចិត្តទុកដាក់ទប់ស្កាត់ និងបង្ក្រាបក្រុមក្មេងទំនើង ,ល្បែងស៊ីសង , បញ្ហាគ្រឿងញៀន និងបង្កើនការចេញល្បាតពួកស្ទាក់នៅក្នុងដែនដីរបស់ខ្លួនឱ្យបានខ្លាំង ដើម្បីត្រៀមបង្ក្រាបចំពោះសភាពការណ៍ លួច , ឆក់ ឬប្លន់ជាដើម ដែលសកម្មភាពទាំងនេះអាចកើតមានឡើងបានគ្រប់ពេល នៅរាល់ពេលដែលជនសង្ស័យមានឱកាសអាចប្រព្រឹត្តិសកម្មភាពបាន ។ បន្ថែមពីនោះទៅទៀត លោកអភិបាលខណ្ឌបានសង្កត់ធ្ងន់ ឱ្យយកចិត្តទុកដាក់ពិនិត្យតាមដានលើជនបរទេសដែលកំពុងស្នាក់នៅតាមខុនដូរ ឬសណ្ឋាគារ ដោយចាំបាច់ត្រូវសហការជាមួយម្ចាស់ទីតាំងអាជីវកម្ម ដើម្បីធ្វើបច្ចុប្បន្នភាពឱ្យបានច្បាស់លាស់ កំណត់បានថា ជនបរទេសទាំងនោះ ជាបុគ្គលចូលមកកម្ពុជាស្របច្បាប់ ជៀសវៀងក្រុមឧក្រិដ្ឋជនខ្លះបានយកកម្ពុជាជាទីកន្លែងជ្រកកោន ហើយប្រព្រឹត្តិសកម្មភាពបទល្មើសធំៗដូចជា ការជួញដូរគ្រឿងញៀនឆ្លងកាត់ប្រទេស , អំពើចាប់ជំរិតទារប្រាក់ និងការប៉ងបង្កភារវកម្មផ្សេងៗជាដើម .ល . ។ ជាកិច្ចបញ្ចប់ នៃអង្គប្រជុំ លោកសុខ សម្បត្តិ បានដាក់បញ្ជាការគណះបញ្ជាការឯកភាពថ្នាក់រដ្ឋបាលសង្កាត់ គឺត្រូវមានក្រុមទទួលវេនប្រចាំបញ្ជារជាប្រចាំថ្ងៃ ដើម្បីត្រៀមសម្រាប់ការឆ្លងតបជាមួយថ្នាក់ខណ្ឌ ក្នុងករណីមានសភាពការបន្ទាន់ណាមួយកើតឡើង ។ ដោយការត្រៀមនោះទៀតសោត មិនកំណត់ចាំបាច់ទាល់តែចៅសង្កាត់ជាអ្នកដឹកនាំវេនរហូតនោះទេ ពោលគឺត្រូវបង្កើតក្រុម ដើម្បីទទួលខុសត្រូវ និងម្ចាស់ការលើការងារនេះឱ្យបានទៀតទាត់ ។ អ្វីដែលកាន់តែសម្ខាន់ លោកអភិបាលបានដាស់តឿនដល់កម្លាំងគណះបញ្ជាការឯកភាពទាំងអស់ មិនត្រូវភ្លេចខ្លួន លើការប៉ងធ្វើចលនាបាតុកម្ម ឬកុបកម្មណាមួយដែលបង្កឡើងដោយក្រុមប្រឆាំងក្រៅច្បាប់ មានចេតនាទុច្ចរិតបង្កភាពវឹងវរដល់សន្តិសុខសង្គមជាតិ ពិសេសការប៉ងផ្តួលរំលំរាជរដ្ឋាភិបាលស្របច្បាប់នាពេលបច្ចុប្បន្ននេះ ពោលគឺត្រូវតែទប់ស្កាត់ និងបង្ក្រាបឱ្យបានដាច់ខាត ទោះក្នុងតម្លៃណាក៏ដោយ ៕ អត្ថបទ ៖ លីហេង

៥ឆ្នាំមកនេះ មជ្ឈមណ្ឌលមន្ទីរពេទ្យព្រះអង្គឌួង បានព្យាបាលកុមារ គ-ថ្លង់ ពីកំណើត បានចំនួនជាង៥០នាក់

ភ្នំពេញ ៖ ៥ឆ្នាំកន្លងមកនេះ ក្រុមការងារគ្រូពេទ្យនៅមជ្ឈមណ្ឌលមន្ទីរពេទ្យព្រះអង្គឌួង បានវះកាត់ព្យាបាលកុមារ គ-ថ្លង់ ពីកំណើត បានចំនួនជាង ៥០នាក់ ដោយជោគជ័យ ១០០% ដែលអាចឱ្យស្តាប់ឮសម្លេង និយាយបាន និងមានទំនាក់ទំនងទៅកាន់ពិភពលោកបាន។លោកសាស្រ្តាចារ្យ Choi Jae-young (ជុង ជេ យ៉ុង) មកពីមន្ទីរពេទ្យ Severance នៃប្រទេសកូរ៉េ បានលើកឡើង ក្នុងពិធីខួបគម្រប់ ៥ឆ្នាំ នៃការបង្កើតមជ្ឈមណ្ឌលមន្ទីរពេទ្យព្រះអង្គឌួង SEVERANCE និង KT នៃកី្តសង្ឃឹម នៅកម្មវិធីគាំទ្រការវះកាត់ និងស្តារនីតិសម្បទាសំរាប់កុមារ គ-ថ្លង់, នៅមនី្ទរពេទ្យព្រះអង្គឌួង នៃក្រសួងសុខាភិបាល ថ្ងៃទី៦ ខែកញ្ញា ឆ្នាំ២០២៤នេះថា កាលពីឆ្នាំ២០១៩ មនី្ទរពេទ្យព្រះអង្គឌួង បានសហការជាមួយមន្ទីរពេទ្យ Severance និងKT នៃកី្តសង្ឃឹម ដោយបង្កើតបានមជ្ឈមណ្ឌលមនី្ទរពេទ្យព្រះអង្គឌួង ដោយសំខាន់លើការវះកាត់ និងស្តារនីតិសម្បទាសំរាប់កុមារ គ-ថ្លង់។ កុមារទាំងអស់ ដែលទទួលបានវះកាត់ព្យាបាល គ-ថ្លង់ និងហ្វឹកហាត់ជាច្រើន នៅក្នុងមនី្ទរពេទ្យព្រះអង្គឌួង បានធ្វើឲ្យកុមារទាំងនោះ អាចស្តាប់ឮសម្លេងរបស់ឪពុក ម្តាយ អាណាព្យាបាល របស់គាត់ និងអាចស្តាប់ឮសម្លេងនៅមជ្ឈដ្ឋានខាងក្រៅបាន។ ដូច្នេះធ្វើក្រុមគ្រួសាររបស់គាត់ មានកី្តសង្ឃឹមយ៉ាងខ្លាំង។ ជាពិសេសក្នុងរយៈពេលជាង២ឆ្នាំកន្លងមកនេះ អ្នកគ្រូបង្ហាត់បង្រៀនដល់កុមារ គ-ថ្លង់ ធ្វើឲ្យកុមារ មានកី្តសង្ឃឹមថ្មី និងអាចនិយាយបានបន្ថែមទៀតផងដែរ។ចំណែកលោក Oh Tae-seong (អូ ថេ ស៊ុង)នាយកក្រុម KT ESG នៃប្រទេសកូរ៉េ បានមានប្រសាសន៍ថា ក្នុងរយៈពេល៥ឆ្នាំ ធ្វើកុមារកម្ពុជា មានកី្តសង្ឃឹមថ្មី ហើយឲ្យកុមារ មានទំនាក់ទំនងជាមួយពិភពលោកបាន។ លោកប្តេជ្ញាបន្តឧបត្ថម្ភ និងផ្គត់ផ្គង់ ជួយដល់កុមារកម្ពុជា ឲ្យទទួលបានការវះកាត់ព្យាបាល គ-ថ្លង់ ជោគជ័យ។ទន្ទឹមគ្នានោះដែរអាណាព្យាបាលដែលមានកូនៗ គ-ថ្លង់ពីកំណើត ក្រោយទទួលបានការវះកាត់ព្យាបាល គ-ថ្លង់ ពីក្រុមគ្រូពេទ្យជំនាញនៃមនី្ទរពេទ្យព្រះអង្គឌួង បានលើកឡើងរួមគ្នាថា គាត់គ្រប់រូបដែលមានកូនកើតមក គ-ថ្លង់ មិនអាចនិយាយ និងស្តាប់ឮសម្លេងបានតាំងពីកំណើតមកនោះ ពិតជាមានអារម្មណ៍ពិបាកចិត្ត និងអាណិតកូនខ្លាំងណាស់។ ប៉ុន្តែសូមផ្តាំផ្ញើដល់មាតា បិតា អាណាព្យាបាល កុំបាក់ទឹកចិត្ត យើងអាចមកទទួលសេវាព្យាបាលគ-ថ្លង់ ពីក្រុមការងារគ្រូពេទ្យនៃមនី្ទរពេទ្យព្រះអង្គឌួងបាន។នាឱកាសនោះលោកសាស្ត្រាចារ្យរង លូ លីឃាង នាយកមន្ទីរពេទ្យព្រះអង្គឌួង បានថ្លែងថា កាលពីប្រាំឆ្នាំមុន យើងបានចាប់ផ្តើមកម្មវិធីការវះកាត់កុមារ គ-ថ្លង់ និងការស្ថារនីតិសម្បទាសំរាប់ កុមារ គ-ថ្លង់ បន្ទាប់ពីទទួលការវះកាត់រួច ដើម្បីនាំមកនូវក្តីសង្ឃឹម និងការព្យាបាលដល់កុមារ គ-ថ្លង់ ពីកំណើត។ តាមរយៈការលះបង់របស់បុគ្គលិករបស់យើង ការគាំទ្រឥតងាករេរបស់ឪពុកម្តាយ និងការសហការដ៏មានតម្លៃជាមួយដៃគូរបស់យើងពី KT និងមន្ទីរពេទ្យ Severance នៅប្រទេសកូរ៉េ យើងបានបើកកម្មវិធីនេះឱ្យក្លាយជាការពិត។ ខួបនេះមិនមែនគ្រាន់តែជាការប្រារព្ធពិធីឡើយ តែក៏ជាការអបអរសាទរជីវិតកុមារដែលបានយកឈ្នះលើឧបសគ្គ និងមានអនាគតដ៏ភ្លឺស្វាង។ កុមារគ្រប់រូបដែលឮពិភពលោកកាន់តែច្បាស់ មាតាបិតាគ្រប់រូបដែលឃើញពីវឌ្ឍនភាពរបស់កូនពួកគេ និងបុគ្គលិកគ្រប់រូបដែលបានរូបចូលរួមកិច្ចការនេះ គឺជាសក្ខីភាពយាងពិតប្រាកដ។ជាចុងក្រោយលោកសាស្ត្រាចារ្យរង លូ លីឃាង សូមថ្លែងអំណរគុណយ៉ាងជ្រាលជ្រៅចំពោះដៃគូរបស់យើង គឺKT និងមន្ទីរពេទ្យ Severance ដែលបានផ្តល់ទាំងអ្នកជំនាញ ទាំងធនធាន និងចិត្តសប្បុរស ក្នុងការដើរតួយ៉ាងសំខាន់ក្នុងភាពជោគជ័យ នៃមជ្ឈមណ្ឌលនេះ។ យើងរួមគ្នាកសាងមិនត្រឹមតែជាកន្លែងមួយប៉ុណ្ណោះទេ ប៉ុន្តែជាសញ្ញានៃក្តីសង្ឃឹម សម្រាប់គ្រួសារជាច្រើនផងដែរ។ ហើយសូមឱ្យមជ្ឈមណ្ឌលនេះបន្តរីកចម្រើន និងបន្តជាកន្លែងមួយដែលផ្តល់ក្តីសង្ឃឹមដ៏ភ្លឺស្វាង សម្រាប់កុមារ គ-ថ្លង់៕ អត្ថបទ រដ្ឋា

មន្ត្រីបាលជលផលខេត្តក្រចេះ បន្តចុះបង្ក្រាបបទល្មើសនេសាទ និងបានប្រលែងត្រីចម្រុះ តូចធំជាង៣០០គីឡូក្រាម

នាថ្ងៃទី០៥ ខែកញ្ញាម្សិលមិញនេះ ខណ្ឌរដ្ឋបាលជលផលក្រចេះ បានសហការជាមួយកម្លាំងនគរបាលប្រឆាំងបទល្មើសសេដ្ឋកិច្ច នៃស្នងការដ្ឋាន នគរបាលខេត្ត គណៈបញ្ជាការឯកភាពស្រុក អាជ្ញាធរមូលដ្ឋាន និងសហគមន៍នេសាទ ចុះត្រួតពិនិត្យ បង្ក្រាបបទល្មើសនេសាទ នៅចំនុចបឹងត្រោះ បឹងទទឹងថ្ងៃ បឹងក្រចេះ និងបឹងចប់ ស្ថិតក្នុងឃុំបុសលាវ ស្រុកចិត្របុរី ខេត្តក្រចេះ និងបានរំដោះត្រីចម្រុះ តូចធំប្រមាណជាង៣០០គីឡូក្រាម ។ ប្រតិបត្តិការបង្ក្រាបបទល្មើសខាងលើ សមត្ថកិច្ចនិងមន្ត្រីជំនាញពាក់ព័ន្ធ បានធ្វើការរុះរើ និងដុតបំផ្លាញចោលនូវឧករណ៍នេសាទល្មើសច្បាប់មួយចំនួនធំ រួមមាន៖ របាំងព្រួលសាច់ណរ៉ាវ (សាច់កាវ) ចំនួន ១១ខ្សែ ប្រវែង ៥៥០ម៉ែត្រ ក្រឡាទំហំ ៣-០៤សង់ទីម៉ែត្រ, លបសាច់កាវ ចំនួន ១៤គ្រឿង ក្រឡាទំហំ ០២-០៤សង់ទីម៉ែត្រម, របាំងព្រួលស្បៃមុងចំនួន ២៩ខ្សែ មានប្រវែង ១៣៥០ម៉ែត្រ, លូស្បៃមុង ចំនួន ៣២មាត់លូ, របាំងកាត់ទទឹងជិតព្រែកចំនួន ០២របាំង និងលបសាច់កាវចំនួន ០៦គ្រឿង, បង្គោលចម្រឹងប្ញស្សីប្រមាណជា ៦០០ដើម ។ គិតត្រឹមតែរយៈពេល២ថ្ងៃ នៃដេីមខែកញ្ញា ឆ្នាំ២០២៤ ខណ្ឌរដ្ឋបាលជលផលក្រចេះ បានបង្ក្រាបបទល្មើសនេសាទ ជាបន្តបន្ទាប់ដូចភ្លៀងរលឹម និងបានបំផ្លាញចូលនូវឧបករណ៍ នេសាទមួយចំនួនធំ ព្រមទាំងបានរំដោះត្រីចម្រុះតូច-ធំ ជាង ៥០០គីឡូក្រាម ក្នុងនោះស្រុកព្រែកប្រសព្វ ចំនួន ២០០គីឡូក្រាម និងស្រុកចិត្របុរី ចំនួន ៣០០គីឡូក្រាម ៕

សិស្សានុសិស្សវិទ្យាល័យហ៊ុនសែនប្រាសាទបាគង ធ្វើទស្សនកិច្ចសិក្សានៅសារមន្ទីរព្រះនរោត្តមសីហនុ-អង្គរ

អាជ្ញាធរជាតិអប្សរា បានរៀបចំឱ្យមានដំណើរទស្សនកិច្ចរបស់សិស្សានុសិស្សនេះ ក្នុងគោលបំណង ធ្វើការតម្រង់ទិសដល់យុវជន ក្រោយពេលបញ្ចប់ការសិក្សាថ្នាក់វិទ្យាល័យ ដើម្បីកិច្ចការងារស្រាវជ្រាវអំពីប្រវត្តិសាស្ត្រមុនឈានទៅសិក្សានៅឧត្តមសិក្សា ជាពិសេសពួកគេភាគច្រើនរស់នៅក្នុងតំបន់បេតិកភណ្ឌ ត្រូវតែសិក្សាស្វែងយល់ឱ្យបានច្បាស់អំពីតម្លៃវប្បធម៌ និងបេតិកភណ្ឌជាតិ ដើម្បីជាអ្នកបន្តវេន និងថែរក្សាសម្បត្តិវប្បធម៌ទាំងនោះនាពេលអនាគត់។ការសិក្សាស្រាវជ្រាវនេះ បន្ទាប់ពីពួកគាត់ បានសិក្សានៅក្នុងថ្នាក់រៀន ស្តីពីការអប់រំបេតិកភណ្ឌ អស់រយៈពេលជាច្រើនខែមក សិស្សានុសិស្សនៃវិទ្យាល័យហ៊ុន សែន ប្រាសាទបាគង ខេត្តសៀមរាប នៅព្រឹកថ្ងៃទី០៦ ខែកញ្ញា ឆ្នាំ២០២៤នេះ បានធ្វើទស្សនកិច្ចសិក្សានៅសារមន្ទីរព្រះនរោត្តមសីហនុ-អង្គរ រៀបចំដោយអាជ្ញាធរជាតិអប្សរា។នេះជាដំណើរទស្សនកិច្ចលើកទី២ហើយ បន្ទាប់ពីដំណើរទស្សនកិច្ចលើកទី១ សិស្សានុសិស្សបានទៅទស្សនកិច្ចការធ្វើកំណាយស្រាវជ្រាវនៅតំបន់ភ្នំបូក។ ជាបន្តបន្ទាប់អាជ្ញាធរជាតិអប្សរា និងបន្តរៀបចំដំណើរទស្សនកិច្ចទៅកាន់ប្រាសាទបុរាណជាច្រើនទៀតក្នុងតំបន់រមណីយដ្ឋានអង្គរ។សូមជម្រាបថា ជារៀងរាល់ឆ្នាំអាជ្ញាធរជាតិអប្សរា សហការជាមួយអង្គការមរតកវប្បធម៌ និងអាជ្ញាធរក្នុងតំបន់មួយចំនួននៃរមណីយដ្ឋានអង្គរ បានបើកវគ្គបណ្តុះបណ្តាលស្តីពី៖ កម្មវិធីអប់រំបេតិកភណ្ឌ។ កម្មវិធីនេះមានសារៈសំខាន់ខ្លាំងណាស់ សម្រាប់អ្នកដែលរស់នៅក្នុងតំបន់បេតិកភណ្ឌ ជាពិសេសសម្រាប់យុវជនជំនាន់ក្រោយ បានយល់ដឹង អំពីតម្លៃបេតិកភណ្ឌ និងផ្តល់ឱកាសដល់យុវជន បានយល់ដឹងនូវតម្លៃមរតកវប្បធម៌ បេតិកភណ្ឌ បណ្តុះគំនិតជាមួយនឹងបេតិកភណ្ឌ ឱ្យពួកគាត់ចេះស្រឡាញ់ និងចូលរួមថែរក្សាការពារ ជាពិសេសយល់ដឹងអំពីតួនាទីភារកិច្ច នៃការការពារ អភិរក្ស និងការងារគ្រប់គ្រងរបស់អាជ្ញាធរជាតិអប្សរា និងអាចធ្វើជាគម្រូដល់សហគមន៍របស់ខ្លួនថែមទៀតផង៕

ឯកឧត្តម ឌិត ទីណា៖ វិស័យស្រូវអង្ករនឹងអាចរីកចម្រើនទៅមុខបាន ចាំបាច់ទាមទារឲ្យស្ថាប័នរដ្ឋ និងឯកជន សហការគ្នា

ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ លើកឡើងថា ការងារស្រូវ-អង្ករ គឺជាការងារអន្តរស្ថាប័នទាំងរដ្ឋ និងវិស័យឯកជន ដែលទាមទារឲ្យមានការសហការគ្នាល្អ រួមគ្នាពិនិត្យលើបញ្ហាប្រឈម ក៏ដូចជារកដំណោះស្រាយជាមួយគ្នា ដើម្បីជំរុញវិស័យស្រូវអង្ករឲ្យកាន់តែរីកចម្រើនទៅមុខបន្ថែមទៀត។ក្នុងឱកាសដឹកនាំកិច្ចប្រជុំក្រុមការងារផ្នែកស្រូវ-អង្ករ (ក្រុម ឈ) នៃវេទិការាជរដ្ឋាភិបាល-ផ្នែកឯកជន កាលពីរសៀលថ្ងៃទី៥ ខែកញ្ញា ឆ្នាំ២០២៤កន្លងទៅ ឯកឧត្តម ឌិត ទីណា បានគូសបញ្ជាក់ថា ការងារស្រូវ-អង្ករនេះ ទាំងស្ថាប័នរដ្ឋ និងវិស័យឯកជន ពិតជាត្រូវរួមគ្នាពិនិត្យលើបញ្ហាប្រឈមនានា វិភាគវាយតម្លៃឱ្យបានច្បាស់លាស់ តាមរយៈការក្តោបព័ត៌មានគ្រប់ជ្រុងជ្រោយ ដើម្បីពិភាក្សារកដំណោះស្រាយមានរយៈពេលវែង ទទួលយកបានទាំងអស់គ្នា និងមានផលប្រយោជន៍រួមជាលក្ខណៈសេដ្ឋកិច្ច ទាំងសម្រាប់វិស័យឯកជន និងសេដ្ឋកិច្ចជាតិ។បើតាមក្រសួងកសិកម្ម រុក្ខាប្រមាញ់ និងនេសាទ អង្គប្រជុំនេះ មានរបៀបវារៈចំនួន ៣សំខាន់ រួមមាន ផ្នែកផលិតកម្មនិងការដាំដុះ ផ្នែកផលិតកម្ម-ការកិនកែច្នៃ ផ្នែកពន្ធដារក្នុងវិស័យស្រូវអង្ករ។ សហគមន៍អ្នកផលិត តំណាងរោងម៉ាស៊ីនកិនស្រូវ ក្រុមហ៊ុននាំចេញអង្ករ និងថ្នាក់ដឹកនាំនៃក្រសួងកសិកម្ម រុក្ខាប្រមាញ់ និងនេសាទ បានស្ដាប់និងពិភាក្សាយ៉ាងលម្អិតលើរបៀបវារៈទាំង៣ និងសំណើរបស់ភាគីឯកជន មុននឹងឯកឧត្តមរដ្ឋមន្ដ្រី សហប្រធានក្រុមការងារផ្នែកស្រូវ-អង្ករ (ក្រុម ឈ) ផ្ដល់ជម្រើសដំណោះស្រាយចំពោះសំណើនីមួយៗ។ចំពោះសំណើមួយចំនួនដែលស្ថិតនៅក្រៅដែនសមត្ថកិច្ចរបស់ក្រសួងកសិកម្ម រុក្ខាប្រមាញ់ និងនេសាទ ឯកឧត្តមរដ្ឋមន្ដ្រី បានផ្ដល់អនុសាសន៍ដល់ភាគីឯកជន លើកយកទៅប្រជុំពិភាក្សាជាមួយក្រុមការងារទទួលបន្ទុក ដើម្បីទទួលបានដំណោះស្រាយដែលមានលក្ខណៈប្រាកដនិយម អាចអនុវត្តបាន និងទទួលបានផលចំណេញទាំងអស់គ្នា រាប់ចាប់តាំងពីអ្នកផលិតពូជស្រូវសុទ្ធ ប្រជាកសិករ រោងម៉ាស៊ីនកិនស្រូវ និងក្រុមហ៊ុននាំចេញអង្ករ ជាដើម៕ អត្ថបទ៖ ឈិត បូរ៉ាវី

រដ្ឋបាលជលផលខេត្តកណ្តាលឃាត់រថយន្តធន់ធ្ងន់មួយគ្រឿងជាមួយបង្កងខុសច្បាប់ និងមិនមានការបញ្ជាក់គុណភាពជិតមួយតោន

មន្រ្តីជំនាញរបស់នាយខណ្ឌរដ្ឋបាលជលផលកណ្តាល និងគណៈបញ្ជាការឯកភាពខេត្តកណ្តាល បានឃាត់រថយន្តធន់ធ្ងន់មួយគ្រឿងជាមួយនឹងបង្កងខុសច្បាប់ (ពុំមានលិខិតបញ្ជាក់អំពីគុណភាពនាំចូល និងនាំចូលផលិតផលជលផលគ្មានវិញ្ញាបនបត្របញ្ជាក់គុណភាពផ្នែករោគសាស្រ្តជលផល ជិតមួយតោន ដែលដឹកមកពីក្រៅប្រទេសយកមកលក់នៅស្រុកខ្មែរ។លោក ហេង សុភារិទ្ធ នាយខណ្ឌរដ្ឋបាលជលផលកណ្ដាលបានឲ្យដឹងថា បន្ទាប់ពី មានការចង្អុលបង្ហាញពីឯកឧត្តម គួច ចំរើន អភិបាលនៃគណៈអភិបាលខេត្តកណ្តាល កាលពីយប់រំលងអាទ្រាធនាថ្ងៃទី៤ ខែកញ្ញា ឆ្នាំ២០២៤នេះ នាយខណ្ឌរដ្ឋបាលជលផលកណ្តាល ជាមួយនិងមន្រ្តីកងរាជអាវុធបានធ្វើការចុះឃាត់ រថយន្តមួយគ្រឿង មានស្លាកលេខភ្នំពេញ 3G-5776 ជាមួយនឹងបង្កងខុសច្បាប់ចំនួន២៦ធុង ស្ថិតនៅចន្លោះគីឡូម៉ែត្រ៣៤-៣៥ នៅស្រុកកៀនស្វាយ ខេត្តកណ្តាល ដោយសារម្ចាស់រថយន្តនេះមិនព្រមសហការគ្នាជាមួយកម្លាំងសមត្ថកិច្ច បើទោះបីមន្រ្តីជំនាញធ្វើការណែនាំ និងព្រមានមួយដងជាពីរដងមកហើយនោះ។លោក ហេង សុភារិទ្ធ បានបញ្ជាក់បន្ថែមទៀតថា ម្ចាស់រថយន្តនេះរួមទាំងថៅកែបង្កង នោះពុំមានលិខិតស្នាមត្រឹមត្រូវក្នុងការដឹកជញ្ជូន(ដឹកអនាធិបតេយ្យ) ហើយសម្ថកិច្ច ក៏ធ្លាប់បានចុះណែនាំ និងព្រមានពីរបីដងហើយតែមិនព្រមសហការ ថែមទាំងប្រើសម្តីមិនគប្បីប្រមាថដល់ដែនសមត្ថកិច្ចផងដែរដូច្នេះ ឯកឧត្តមអភិបាលខេត្តកណ្តាលបានបញ្ជាឲ្យធ្វើការឃាត់រថយន្តនេះ រួមទាំងវត្ថុតាងតែម្តងដើម្បីកសាងនីតិវិធីទៅតាមច្បាប់ជាធរមាន។ យ៉ាងណាក៏ដោយលោក ហេង សុភារិទ្ធក៏បាន បញ្ជាក់ផងដែរថា បង្កងដែលបានរឹបអូសបានជិតមួយតោននេះត្រូវបានងាប់ស្អុយរលួយអស់ ហើយគណៈកម្មាការសម្រេចកប់ចោលនារសៀលនេះផងដែរ បន្ទាប់ពីមានការសម្រេចរបស់អភិបាលខេត្តកណ្តាល ឯកឧត្តម គួច ចំរើននោះ។ជាមួយគ្នានោះដែរ លោក ហេង សុភារិទ្ធ បានអះអាងផងដែរថា ក្រោយមានការណែនាំពីរដ្ឋមន្រ្តី ក្រសួងកសិកម្ម រុក្ខាប្រមាញ់ និងនេសាទ និងមានការចង្អុលបង្ហាញពីអភិបាលខេត្តកណ្តាល ឯកឧត្តម គួច ចំរើន នាយខណ្ឌរដ្ឋបាលជលផលកណ្តាល ក្នុងគោលបំណងរក្សាសុខភាព និងសុវត្ថិភាពចំណីអាហារដល់បងប្អូនប្រជាពលរដ្ឋខេត្តកណ្តាលក៏ដូចជាបងប្អូននៅទូទាំងប្រទេសនោះ នឹងខិតខំចាត់វិធានការឲ្យដូចជាភ្លៀងរលឹមចំពោះបទល្មើសជល់ផល ទាំងនេសាទខុសច្បាប់ និងការដឹកជញ្ជូនមិនមានភាពប្រក្រតី មិនមានគុណភាពត្រឹមត្រូវ និងច្បាស់លាស់ជាដើមនោះ។សូមបញ្ជាក់ថា បើយោងតាមច្បាប់ស្ដីពីជលផលមាត្រា៩៣ ចំណុច៦ បានបញ្ជាក់ថា កានាំចេញនាំចូលផលិតផលជលផលគ្មានវិញ្ញាបនបត្របញ្ជាក់គុណភាពផ្នែករោគសាស្រ្តជលផល គឺជាកាខុសនឹងច្បាប់ស្ដីពីជលផល៕ អត្ថបទ បាន ចក់

កិច្ចប្រជុំពិភាក្សាប្រាក់ឈ្នួលអប្បបរមាសម្រាប់ឆ្នាំ២០២៥ថ្ងៃនេះ តំណាងកម្មករនិយោជិតស្នើ តួលេខ ១០ដុល្លារ ឯតំណាងភាគីនិយោជកស្នើតួលេខ ២ដុល្លារ

ឆ្លងកាត់កិច្ចប្រជុំចរចារប្រាក់ឈ្នួលអប្បរមាកម្មករនិយោជិតវិស័យកាត់ដេរ រយៈពេលជិត ៣ម៉ោង នាព្រឹកថ្ងៃទី៦ ខែកញ្ញានេះ ជាលទ្ធផលបានបង្ហាញឲ្យដឹងថា ភាគីនិយោជក បានយល់ព្រមដំឡើងបន្ថែមពីចំនួន ១ដុល្លារ ទៅចំនួន២ដុល្លារ ខណៈភាគីសហជីពតំណាងឲ្យកម្មករនិយោជិត បានបន្ថយតួលេខវិញ ពីចំនួន ១៤ដុល្លារ មកចំនួន ១០ដុល្លារ លើប្រាក់ឈ្នួលបច្ចុប្បន្នចំនួន ២០៤ដុល្លារ។ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ និងជាប្រធានក្រុមប្រឹក្សាជាតិប្រាក់ឈ្នួលអប្បបរមា នៅក្រោយបញ្ចប់កិច្ចប្រជុំនេះ បានមានប្រសាសន៍ប្រាប់ក្រុមអ្នកសារព័ត៌មានឲ្យដឹងថា ទាក់ទងកិច្ចចរចាប្រាក់ឈ្នួលនេះ ភាគីរដ្ឋាភិបាលនឹងខិតខំសម្របសម្រួលឲ្យភាគីទាំងពីរកាន់តែយល់គ្នា និងខិតជិតរកគ្នា ពីព្រោះដូចបណ្តាប្រទេសដទៃទៀតដែរ អ្នកដែលដើរតួឯកក្នុងរឿងមិនមែនមានតែភាគីនិយោជក និងភាគីកម្មករនិយោជិត ហើយរដ្ឋាភិបាលនឹងខិតខំធ្វើម៉េចឲ្យមានប្រព័ន្ធ ឲ្យមានយន្តការ ហើយផ្តល់ហេតុផលស្ថិតិធ្វើម៉េចឲ្យបានសមរម្យ ដើម្បីឲ្យភាគីនីមួយៗអាចយោង និងពិភាក្សាគ្នាបាន។ពាក់ព័ន្ធទៅនឹងតួលេខរបស់ភាគីរដ្ឋាភិបាលវិញ ឯកឧត្តមរដ្ឋមន្រ្តី បានបញ្ជាក់ថា ជាទូទៅរដ្ឋាភិបាលព្យាយាមសម្របសម្រួលឲ្យអស់លទ្ធភាពសិន មុននឹងសម្រេចដាក់ចេញនូវតួលេខណាមួយឲ្យប្រហាក់ប្រហែល រវាងភាគីទាំងពីរ ដើម្បីឯកភាពគ្នាជាលក្ខណៈកុងស្យុងស៊ីសក៏ល្អ ហើយបើមិនឯកភាពគ្នាទេ នោះនឹងឈានទៅដល់ការបោះឆ្នោតសម្រេចផ្លូវការ។លោក គឹម ចាន់សំណាង ភាគីសហជីពតំណាងកម្មករនិយោជិត បានឲ្យដឹងថា មូលហេតុដែលក្រុមសហជីពបានឯកភាពគ្នាក្នុងការបន្ថយតួលេខស្នើសុំដំឡើងប្រាក់ឈ្នួលពីចំនួន ១៤ដុល្លារ មកត្រឹម ១០ដុល្លារវិញនេះ ដោយសារតែបានគិតនូវអ្វីដែលជាចម្បងបំផុតទាក់ទងតួលេខ។ ដូច្នេះការពិភាក្សា ការជជែកគ្នាដើម្បីរកតួលេខណាមួយឲ្យឈានមកដល់គោលដៅដែលយើងចង់បាន ជាធម្មតាគឺត្រូវចាប់ផ្តើមពីតួលេខច្រើនសិន ដើម្បីដាក់ស្នើរក្នុងអង្គប្រជុំ ទើបបន្តការចរចារគ្នាថែមទៀតនាពេលប្រជុំបន្តបន្ទាប់ ដើម្បីបញ្ជាក់ថា ការដំឡើង ហើយនិងទម្លាក់គឺអាចទទួលយកបានទាំងអស់គ្នា។សូមបញ្ជាក់ថា ក្រៅពីប្រាក់ឈ្នួលអប្បបរមាចំនួន ២០៤ដុល្លារ កម្មករនិយោជិត នឹងទទួលបានប្រាក់អត្ថប្រយោជន៍ផ្សេងៗទៀត ដូចជា ប្រាក់សោហ៊ុយធ្វើដំណើរនិងស្នាក់នៅ , ប្រាក់រង្វាន់ធ្វើការទៀងទាត់ចំនួន , ប្រាក់ថ្លៃបាយសម្រាប់ការធ្វើការងារបន្ថែមម៉ោងដោយស្ម័គ្រចិត្ត និងប្រាក់រង្វាន់អតីតភាពការងារ។ ដូចនេះជាមធ្យម កម្មករនិយោជិតម្នាក់ៗ នឹងទទួលបានប្រាក់ឈ្នួលយ៉ាងតិចចំនួនពី ២២០ ទៅ ២៣៦ដុល្លារ ក្នុងមួយខែៗ៕

អាកាសយានដ្ឋានអន្តរជាតិតេជោនឹងហោះហើរសាកល្បង ដើម្បីត្រួតពិនិត្យឧបករណ៍បញ្ជាការហោះហើរ

មកដល់ពេលនេះ អាកាសយានដ្ឋានអន្តរជាតិតេជោនឹងដាក់ឱ្យហោះហើរសាកល្បង ដើម្បីត្រួតពិនិត្យឧបករណ៍បញ្ជាការហោះហើរឱ្យបានរួចរាល់ មុនដាក់ឱ្យដំណើរហោះហើរការជាផ្លូវការនៅឆមាសទី១ឆ្នាំ ២០២៥ ហើយពេលនេះ នឹងដាក់ឱ្យហោះហើរសាកល្បង ដើម្បីត្រួតពិនិត្យឧបករណ៍បញ្ជាការហោះហើរនៅថ្ងៃទី៨កញ្ញា បន្ទាប់ពីឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល បានដឹកនាំប្រតិបត្តិដែលមានប្រតិភូអាកាសចរស៊ីវិល ប្រតិភូក្រុមហ៊ុនប្រតិបត្តិការអាកាសយានអន្តរជាតិតេជោ ប្រតិភូអាកាសយានដ្ឋានអន្តរជាតិភ្នំពេញ ប្រតិភូក្រុមហ៊ុន ខេមបូឌា អ៊ែរផត អ៊ិនវេសមិន ប្រតិភូក្រុមហ៊ុនអាកាសចរណ៍ និងស្ថាប័នជំនាញមួយចំនួនទៀត បានចុះពិនិត្យនៅអាកាសយានដ្ឋានអន្តរជាតិតេជោដោយផ្ទាល់។បញ្ជាក់ប្រាប់ BTV នៅអាកាសយានដ្ឋានអន្តរជាតិតេជោ ឯកឧត្តម សយ សុខាន់ រដ្ឋលេខាធិការ តំណាងឯកឧត្តមបណ្ឌិត ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអកាសចរស៊ីវិល បានប្រាប់ថា មកដល់ពេលប្រតិភូទំាងអស់បានប្រជុំសម្រេចរួចរាល់ រយៈពេល៥ថ្ងៃ ចាប់ពីថ្ងៃទី៨កញ្ញា ដល់ថ្ងៃទី១២កញ្ញា ឆ្នាំ២០២៤ អាកាសយានដ្ឋានអន្តរជាតិតេជោមួយនេះនឹងដាក់ ឱ្យហោះហើរសាកល្បង ដើម្បីត្រួតពិនិត្យរាល់ឧបករណ៍បញ្ជាការហោះហើរឱ្យបានរួចរាល់ជាមុន ក្នុងនេះក្រុមការងារជំនាញបានចុះមកពិនិត្យជាក់ស្តែងរាល់ឧបករណ៍ទំាងអស់ ដោយបានពិនិត្យឃើញថា នៅថ្ងៃទី៨កញ្ញា ដល់ថ្ងៃទី១២កញ្ញាឆ្នាំ២០២៤ អាកាសយានដ្ឋានអន្តរជាតិតេជោ អាចដំណើរការហោះហើរ សាកល្បង ដើម្បីត្រួតពិនិត្យឧបករណ៍បញ្ជាការហោះហើរបានដោយមិនមានបញ្ហារាំងស្ទះទេ ហើយការកំណត់ឱ្យហោះហើរសាកល្បងនេះ ត្រូវធ្វើឡើងចំនួន២ដង ដោយលើកទី១ មានរយៈពេល៥ថ្ងៃ ដោយចាប់ពីថ្ងៃទី៨កញ្ញា ដល់ថ្ងៃទី១២កញ្ញា និងលើកទី២ មានរយៈពេល៦ថ្ងៃ ដោយចាប់ពីថ្ងៃទី២៣កញ្ញា ដល់ថ្ងៃទី២៨កញ្ញាក្នុងឆ្នាំ២០២៤នេះដូចគ្នា ដើម្បីធ្វើតេស្តឱ្យបានរួចរាល់ មុនថ្ងៃដាក់ឱ្យដំណើរការហោះហើរជាផ្លូវការ នៅឆមាសទី១ឆ្នាំ២០២៥ និងដើម្បីឱ្យប្រាកដ មុនថ្ងៃដាក់ឱ្យដំណើរហោះហើរការផ្លូវការ។ចំណែកឯកឧត្តម ឆារស៍ វ៉ាន់ នាយកគ្រប់គ្រង នៃក្រុមហ៊ុន ខេមបូឌា អ៊ែរផត អ៊ិនវេសមិន បានបន្ថែមថា មកដល់ពេលនេះអាកាសយានដ្ឋានអន្តរជាតិតេជោ បានសម្រេចការសាងសង់បានប្រមាណជិត ៩០%ហើយ ហើយអាកាសយានដ្ឋានអន្តរជាតិមួយនេះនឹងចំណាយទឹកប្រាក់ក្នុងការសាងសង់ប្រមាណ១៥០០លានដុល្លារ លើទំហំផ្ទៃដីជាង ២ពាន់៦០០ហិកតា និងជាអាកាសយានដ្ឋានអន្តរជាតិលំដាប់ 4F អាចទទួលយន្តហោះធំៗចុះចតបានគ្រប់ប្រភេទ៕ អត្ថបទ៖ គង់ រ៉េន

រដ្ឋមន្ត្រីក្រសួងមហាផ្ទៃកម្ពុជា និងរដ្ឋមន្ត្រីក្រសួងសន្តិសុខសាធារណៈចិន ប្រជុំបូកសរុបលទ្ធផលការងារកិច្ចសហប្រតិបត្តិការ

ភ្នំពេញ៖ ឯកឧត្តមអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងជាប្រធានគណៈប្រតិភូជាន់ខ្ពស់ក្រសួងមហាផ្ទៃ នៃព្រះរាជាណាចក្រកម្ពុជា និងឯកឧត្តម វ៉ាង ស៊ាវហុង សមាជិកក្រុមប្រឹក្សារដ្ឋ និងជារដ្ឋមន្ត្រីក្រសួងសន្តិសុខសាធារណៈចិន នៅព្រឹកថ្ងៃទី៦ ខែកញ្ញា ឆ្នាំ២០២៤ ដឹកនាំកិច្ចប្រជុំបូកសរុបលទ្ធផលការងារសម្រាប់ឆ្នាំ នៃកិច្ចសហប្រតិបត្តិការអនុវត្តច្បាប់រវាងក្រសួងមហាផ្ទៃកម្ពុជា និងក្រសួងសន្តិសុខសាធារណៈចិន នៅរដ្ឋធានីប៉េកាំង នៃសាធារណរដ្ឋប្រជាមានិតចិន ។ក្នុងឱកាសនោះដែរ ថ្នាក់ដឹកនាំនៃក្រសួងទាំងពីរ ក៏បានចុះហត្ថលេខាលើផែនការការងារស្តីពីការបន្តអនុវត្តឆ្នាំ នៃកិច្ចសហប្រតិបត្តិការអនុវត្តច្បាប់ និងអនុស្សរណៈនៃការយោគយល់គ្នាស្តីពី ការបន្តដំណើរការការិយាល័ យសម្របសម្រួលកិច្ចសហប្រតិបត្តិការការអនុវត្តច្បាប់ រវាងក្រសួងមហាផ្ទៃ នៃព្រះរាជាណាចក្រកម្ពុជា និងក្រសួងសន្តិសុខសាធារណៈ នៃសាធារណរដ្ឋប្រជាមានិតចិន ៕

បណ្ដាញសង្គម

ព័ត៌មានថ្មីៗ

អតីតនាយករដ្ឋមន្ត្រីថៃ លោក ថាក់ស៊ីន ទទួលបានការលើកលែងទោសពីព្រះមហាក្សត្រ

ចិន រិះគន់ប្រមុខការពារជាតិហ្វីលីពីនជុំវិញការលើកឡើងពី «ការគំរាមកំហែង» របស់ចិន

សម្តេចតេជោ ហ៊ុន សែន៖ កំពង់ធំជាគោលដៅការចាប់អារម្មណ៍លើការវិនិយោគកែច្នៃស្វាយចន្ទី ខណៈមហិច្ឆតាកម្ពុជាចង់ប្រែក្លាយជាអធិរាជស្វាយចន្ទី

ក្រុមអ្នកតវ៉ា ដុតសំបកកង់រថយន្ត បន្តទាមទារឱ្យប្រធានាធិបតីប្រទេសបូលីវី ចុះចេញពីតំណែង

អង្គការឧតុនិយមពិភពលោក(WMO)៖ បាតុភូត El Nino បង្កើនហានិភ័យអាកាសធាតុធ្ងន់ធ្ងរ

WHO៖ ករណីសង្ស័យមានជំងឺអេបូឡាធ្លាក់មកត្រឹម១១៦ ករណីក្រោយមនុស្សរាប់រយនាក់ត្រូវបានដកចេញពីការតាមដាន

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

កិច្ចការងារសន្តិសុខ នៅតែជាអាទិភាពដែលអាជ្ញាធរតាមមូលដ្ឋានខណ្ឌ បានបន្តយកចិត្តទុកដាក់ខ្ពស់

៥ឆ្នាំមកនេះ មជ្ឈមណ្ឌលមន្ទីរពេទ្យព្រះអង្គឌួង បានព្យាបាលកុមារ គ-ថ្លង់ ពីកំណើត បានចំនួនជាង៥០នាក់

មន្ត្រីបាលជលផលខេត្តក្រចេះ បន្តចុះបង្ក្រាបបទល្មើសនេសាទ និងបានប្រលែងត្រីចម្រុះ តូចធំជាង៣០០គីឡូក្រាម

សិស្សានុសិស្សវិទ្យាល័យហ៊ុនសែនប្រាសាទបាគង ធ្វើទស្សនកិច្ចសិក្សានៅសារមន្ទីរព្រះនរោត្តមសីហនុ-អង្គរ

ឯកឧត្តម ឌិត ទីណា៖ វិស័យស្រូវអង្ករនឹងអាចរីកចម្រើនទៅមុខបាន ចាំបាច់ទាមទារឲ្យស្ថាប័នរដ្ឋ និងឯកជន សហការគ្នា

អាកាសយានដ្ឋានអន្តរជាតិតេជោនឹងហោះហើរសាកល្បង ដើម្បីត្រួតពិនិត្យឧបករណ៍បញ្ជាការហោះហើរ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

កិច្ចការងារសន្តិសុខ នៅតែជាអាទិភាពដែលអាជ្ញាធរតាមមូលដ្ឋានខណ្ឌ បានបន្តយកចិត្តទុកដាក់ខ្ពស់

៥ឆ្នាំមកនេះ មជ្ឈមណ្ឌលមន្ទីរពេទ្យព្រះអង្គឌួង បានព្យាបាលកុមារ គ-ថ្លង់ ពីកំណើត បានចំនួនជាង៥០នាក់

មន្ត្រីបាលជលផលខេត្តក្រចេះ បន្តចុះបង្ក្រាបបទល្មើសនេសាទ និងបានប្រលែងត្រីចម្រុះ តូចធំជាង៣០០គីឡូក្រាម

សិស្សានុសិស្សវិទ្យាល័យហ៊ុនសែនប្រាសាទបាគង ធ្វើទស្សនកិច្ចសិក្សានៅសារមន្ទីរព្រះនរោត្តមសីហនុ-អង្គរ

ឯកឧត្តម ឌិត ទីណា៖ វិស័យស្រូវអង្ករនឹងអាចរីកចម្រើនទៅមុខបាន ចាំបាច់ទាមទារឲ្យស្ថាប័នរដ្ឋ និងឯកជន សហការគ្នា

អាកាសយានដ្ឋានអន្តរជាតិតេជោនឹងហោះហើរសាកល្បង ដើម្បីត្រួតពិនិត្យឧបករណ៍​បញ្ជាការ​ហោះ​ហើរ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

អាកាសយានដ្ឋានអន្តរជាតិតេជោនឹងហោះហើរសាកល្បង ដើម្បីត្រួតពិនិត្យឧបករណ៍បញ្ជាការហោះហើរ