BTV NEWS

ប្រធានអង្គការមូលនិធិអភិវឌ្ឍន៍មូស្លីមកម្ពុជា ផ្ដល់អំណោយជូនជនភៀសសឹកចំនួន ១៥០០គ្រួសារ នៅខេត្តបន្ទាយមានជ័យ

ប្រមុខការទូតកម្ពុជាធ្វើបទបង្ហាញជូនអង្គទូត ស្តីពីការសម្រេចចិត្តរបស់កម្ពុជា ពាក់ព័ន្ធនឹងតំបន់ទាមទារដែនសមុទ្រត្រួតគ្នាជាមួយ ប្រទេសថៃ

កម្ពុជា-ឥណ្ឌាដាក់ឱ្យដំណើរការទូទាត់ឆ្លងដែនតាមឃ្យូអរកូត ដើម្បីសម្រួលដល់ប្រជាជនឥណ្ឌាមកកម្ពុជា

គិតត្រឹមខែឧសភា ឆ្នាំ២០២៦ ក្រសួងបរិស្ថានបានបណ្តុះកូនឈើ បានចំនួនជាង៤លានដើម ក្នុងនោះដើមត្នោតចំនួនជាង១លានដើម ដើម្បីចែកជូនប្រជាពលរដ្ឋ យកទៅដាំនៅតាមទីសាធារណៈ និងដាំស្តារព្រៃ

ព័ត៌មានជាតិ

លោកជំទាវ ចម និម្មល លើកឡើង៤ចំណុចសំខាន់ៗដើម្បីលើកកម្ពស់ការពង្រឹងសិទ្ធិអំណាចសេដ្ឋកិច្ចដល់ស្ត្រី

ភ្នំពេញ៖ លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម នៅថ្ងៃទី២៦ សីហា ឆ្នាំ២០២៤នេះ បានអញ្ជើញជាអធិបតីក្នុងពិធីបើកសិក្ខាសាលាស្តីពី“ការផ្ទៀងផ្ទាត់ការសិក្សាទស្សនៈវិស័យស្ត្រីក្នុងពាណិជ្ជកម្ម” នៅសណ្ឋាគារ ហៃយ៉ាត់ រីជេនស៊ី ភ្នំពេញ។ក្នុងពិធីបើកសិក្ខាសាលានេះ លោកជំទាវរដ្ឋមន្រ្តី បានមានប្រសាសន៍ថា គឺជាវេទិកាដ៏មានតម្លៃសម្រាប់ការផ្លាស់ប្តូរចំណេះដឹង បទពិសោធន៍ និងឧត្តមានុវត្តន៍ជាច្រើនពាក់ព័ន្ធនឹងសហគ្រិនភាពស្ត្រីក្នុងវិស័យពាណិជ្ជកម្ម ដែលលើសពីនេះ ក៏ជាព្រឹតិ្តការណ៍ដ៏មានសារៈសំខាន់សម្រាប់កម្ពុជា និងជាការប្តេជ្ញាចិត្តរួមគ្នាក្នុងការលើកកម្ពស់សមភាពយែនឌ័រក្នុងវិស័យពាណិជ្ជកម្ម ដែលអាចគូសវាស់ និងពិនិត្យលើភាពឆកល្វែងលើទិន្នន័យ ព្រមទាំងកំណត់វិស័យចាំបាច់សម្រាប់កំណែទម្រង់គោលនយោបាយប្រកបដោយបរិយាប័ន្ន។ក្នុងឱកាសនោះដែរ លោកជំទាវបានលើកឡើងនូវចំណុចសំខាន់ៗចំនួន៤ ដើម្បីចូលរួមដោះស្រាយបញ្ហាប្រឈម និងលើកកម្ពស់ការពង្រឹងសិទ្ធិអំណាចខាងសេដ្ឋកិច្ចដល់ស្ត្រី មានដូចជា៖ ១. ត្រូវបង្កើនការរួមបញ្ចូលផ្នែកហិរញ្ញវត្ថុសម្រាប់សហគ្រិនជាស្ត្រី តាមរយៈការផ្តល់កម្មវិធីផ្តល់ប្រាក់កម្ចីមានគោលដៅជាក់លាក់ ការផ្តល់នូវគ្រឹះស្ថានមីក្រូហិរញ្ញវត្ថុ និងការផ្តល់នូវការបណ្តុះបណ្តាលចំណេះដឹងផ្នែកហិរញ្ញវត្ថុដល់ស្ត្រី ២. កំណែទម្រង់គោលនយោបាយមានភាពចាំបាច់ក្នុងការលើកកម្ពស់សមភាពយេនឌ័រក្នុងវិស័យពាណិជ្ជកម្ម រួមទាំងវិធានការប្រយុទ្ធប្រឆាំងអំពើហិង្សានិងការរើសអើងលើស្ត្រី ៣. ការវិនិយោគលើកម្មវិធីអភិវឌ្ឍន៍ជំនាញសម្រាប់ស្ត្រី ដោយផ្តោតសំខាន់លើផ្នែកពាក់ព័ន្ធពាណិជ្ជកម្ម ដូចជាការគ្រប់គ្រងអាជីវកម្ម នីតិវិធីនាំចេញ និងចំណេះដឹងផ្នែកអក្ខរកម្មឌីជីថល គឺពិតជាសំខាន់ និង ៤. ការជំរុញកម្មវិធីណែនាំ (Mentorship) និងឱកាសកសាងបណ្តាញទំនាក់ទំនង នឹងអាចជួយស្ត្រីក្នុងវិស័យពាណិជ្ជកម្ម ផ្សារភ្ជាប់ខ្លួនជាមួយនឹងបុគ្គលគំរូ និងបង្កើតបណ្តាញគាំទ្រនានា។នៅចំពោះមុខអង្គពិធី លោកជំទាវរដ្ឋមន្រ្តី បានបញ្ជាក់ថា រាជរដ្ឋាភិបាលកម្ពុជាយកចិត្តទុកដាក់ខ្ពស់ និងបានដាក់ចេញនូវគោលនយោបាយជាតិស្តីពីការងារឆ្នាំ២០១៥-២០២៥ និងក្របខ័ណ្ឌគោលនយោបាយសេដ្ឋកិច្ច និងសង្គមឌីជីថលកម្ពុជាឆ្នាំ២០២១-២០២៥ ដែលមានយន្តការដោះស្រាយវិសមភាពយេនឌ័រនៅក្នុងទីផ្សារការងារ តាមរយៈការលើកកម្ពស់ឱ្យមានឱកាសស្មើគ្នា និងលទ្ធភាពទទួលបានការងារសមរម្យរវាងបុរសនិងស្ត្រី ព្រមទាំងបានផ្ដល់សិទ្ធិអំណាចដល់ស្ត្រីក្នុងការចូលរួមយ៉ាងសកម្មនៅក្នុងសេដ្ឋកិច្ចឌីជីថល ដែលរួមទាំងពាណិជ្ជកម្មតាមប្រព័ន្ធអេឡិចត្រូនិក និងពាណិជ្ជកម្មអនឡាញផងដែរ។បន្ថែមពីលើគោលនយោបាយទាំងនេះ លោកជំទាវដ្ឋមន្រ្តី គូសបញ្ជាក់ថា ក្រសួងពាណិជ្ជកម្ម បាននិងកំពុងដើរតួយ៉ាងសកម្ម ក្នុងការបង្កើតបរិយាកាសធុរកិច្ចប្រកបដោយយុត្តិធម៌ និងគាំទ្រទាំងបុរស និងស្ត្រី ដោយបានផ្តល់កម្មវិធីបណ្តុះបណ្តាល និងអប់រំជាច្រើនសំដៅជួយស្ត្រីឱ្យទទួលបានភាពជោគជ័យខ្ពស់ក្នុងអាជីវកម្ម និងលើកកម្ពស់គោលនយោបាយនានាដែលទទួលស្គាល់ និងផ្តល់ការកោតសរសើរដល់សមិទ្ធផលនានារបស់ស្ត្រី។ ជាមួយគ្នានេះ ក្រសួងពាណិជ្ជកម្មក៏បានដាក់ចេញនូវកម្មវិធីជាក់លាក់មួយចំនួន ដូចជា កម្មវិធីអភិវឌ្ឍន៍សហគ្រិនភាពស្ត្រី ដែលផ្តល់ការបណ្តុះបណ្តាល ការណែនាំ (Mentoring) និងការគាំទ្រផ្នែកហិរញ្ញវត្ថុ ដល់សហគ្រិនស្ត្រីក្នុងវិស័យនានា រួមទាំងពាណិជ្ជកម្មផងដែរ៕

យុវជន ចាន់ សំរ៉ុង៖ «ខ្ញុំមិនបោះបង់ក្ដីស្រមៃរបស់ខ្លួនជាអ្នកជំនាញខាងអគ្គិសនី ដូចបោះបង់ការសិក្សានៅវិទ្យាល័យនោះទេ»

ភ្នំពេញ៖ អតីតសិស្សម្នាក់ដែលបានបោះបង់ការសិក្សានៅត្រឹមថ្នាក់វិទ្យាល័យ យុវជន ចាន់ សំរ៉ុង បាននិងកំពុងខិតខំប្រឹងប្រែងស្រវ៉ាចាប់យកជំនាញខាងអគ្គិសនីពីវិទ្យាស្ថានពហុបច្ចេកទេសភូមិភាគតេជោសែនខេត្តតាកែវ ដើម្បីពង្រឹងសមត្ថភាព និងបង្កើនលទ្ធភាពក្នុងការរកចំណូលបន្ថែម។យុវជន ចាន់ សំរ៉ុង វ័យ ១៦ឆ្នាំកំពុងសិក្សាជំនាញខាងអគ្គីសនី បាននិយាយទាំងទឹកមុខស្រងូតស្រងាត់ថា ដោយសារតែខ្លួនរៀននៅវិទ្យាល័យមិនសូវពូកែ ហើយមិនអាចចាប់យកជំនាញផ្សេងទៀតបាន ក៏សម្រេចចិត្តបោះបង់ការសិក្សាទាំងស្ដាយស្រណោះត្រឹមថ្នាក់ ១០នៅខេត្តតាកែវ។ក្រោយពីបោះបង់ការសិក្សា សំរ៉ុង ហាក់ដូចជារស់នៅក្នុងភាពខ្វះជាតិអ្វីម្យ៉ាង ពោលគឺខ្វះការសិក្សា និងខ្វះជំនាញប្រចាំជីវិតរបស់គេ។ ក្រោយមានការលើកទឹកចិត្តពីមិត្តភក្ដិ និងឱពុកម្ដាយ សំរ៉ុងបានសម្រេចចិត្តមកចុះឈ្មោះចូលរៀនជំនាញខាងអគ្ដិសនីនៅវិទ្យាស្ថានពហុបច្ចេកទេសភូមិភាគតេជោសែនខេត្តតាកែវ។យុវជនរូបនេះបន្តថា៖«ប្រសិនបើខ្ញុំរៀនចប់បាក់ឌុប ក៏គ្រួសារខ្ញុំមិនមានលទ្ធភាពឱ្យខ្ញុំរៀនបន្តនៅមហាវិទ្យាល័យដែរ ហើយវាបូករួមទាំងប្រាជ្ញាស្មារតីរបស់ខ្ញុំមិនសូវចាប់បាននូវការសិក្សាជំនាញផ្សេងៗផង។ ខ្ញុំក៏បោះបង់ការសិក្សានៅវិទ្យាល័យតែម្ដង ប៉ុន្ដែខ្ញុំមករៀនជំនាញនៅទីនេះ គឺខ្ញុំក៏អាចមានឱកាសច្រើនក្នុងការរកប្រាក់ចំណូល ព្រោះត្រូវចំណាយសិក្សាខ្លីដែរ»។សំរ៉ុង បានតស៊ូសិក្សារៀនសូត្រយ៉ាងខ្លាំង ដោយសារគិតក្នុងចិត្តថា នេះជាឱកាសចុងក្រោយសម្រាប់ការសិក្សារបស់ខ្លួន។ សំរ៉ុង ក៏មានបំណងចង់បន្តការសិក្សាថ្នាក់បរិញ្ញាបត្រទៀតដែរ ប៉ុន្ដែភ្លាមៗនោះនៅមិនទាន់មានលទ្ធភាពគ្រប់គ្រាន់ទេ។យុវជនរូបនេះបន្តថា បើទោះបីជាខ្លួនមិនទាន់មានលទ្ធភាពបង្កើតក្រុមការងារជាងតម្លើងអគ្គិសនីជាលក្ខណៈធំដុំ ប៉ុន្ដែខ្លួនគេមានលទ្ធភាពធ្វើការងារសមរម្យ និងទទួលបានប្រាក់ចំណូលខ្ពស់ដែរ។ សំរ៉ុង នៅតែមានមហិច្ឆតាចង់សិក្សាជំនាញខាងអគ្គិសនីឱ្យបានច្រើនជាងនេះ ព្រោះខ្លួននៅវ័យក្មេងនៅឡើយ។សំរ៉ុង នៅតែមានក្ដីសង្ឃឹមជានិច្ច និងមិនបោះបង់ក្ដីស្រមៃរបស់ខ្លួនដូចបោះបង់ការសិក្សានៅវិទ្យាល័យនោះទេ ហើយខ្លួននឹងបន្តខិតខំប្រឹងប្រែងក្នុងការសិក្សាជំនាញដែលខ្លួនស្រលាញ់ពេញចិត្ត ដើម្បីធ្វើជាស្ពានចម្លងអនាគតខ្លួនផង ក្រុមគ្រួសារផង និងធ្វើជាយុវជនគំរូនៅក្នុងសង្គមជាតិ៕

រយៈពេល១ឆ្នាំដើមអាណត្តិទី៧ ខេត្តព្រះសីហនុ បានអនុវត្តយុទ្ធសាស្រ្តបញ្ចកោណយ៉ាងខ្ជាប់ខ្ជួន និងខិតខំដោះស្រាយបញ្ហាប្រឈម

ព្រះសីហនុ៖ ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងជាប្រធានក្រុមការងារចុះមូលដ្ឋានខេត្តព្រះសីហនុ បានថ្លែងថា រយៈពេល១ឆ្នាំ ដើមអាណត្តិទី៧នេះ ខេត្តព្រះសីហនុ អនុវត្តបាននូវយុទ្ធសាស្រ្តបញ្ចកោណដំណាក់កាលទី១ ប្រកបដោយមោទនភាព ដែលឆ្លើយតបទៅនឹងអាទិភាពគន្លឹះ៥ របស់ប្រមុខរាជរដ្ឋាភិបាល ជាពិសេសគឺធានាបានថា នៅទូទាំងខេត្តព្រះសីហនុ ប្រជាពលរដ្ឋនឹងមានទឹក អគ្គិសនី និងផ្លូវប្រើប្រាស់គ្រប់គ្រាន់ ។ ក្នុងកិច្ចប្រជុំបូកសរុបលទ្ធផលការងារប្រចាំឆមាសទី១ ឆ្នាំ២០២៤ និងលើកទិសដៅអនុវត្តបន្ត របស់ក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ នាថ្ងៃទី ២៦ ខែសីហា ឆ្នាំ២០២៤ ឯកឧត្តមឧបនាយករដ្ឋមន្ត្រី បានជំរុញដល់ក្រុមការងារទាំងអស់ឲ្យសហការជាមួយរដ្ឋបាលខេត្ត ដើម្បីគិតគូរក្នុងការរៀបចំខេត្តព្រះសីហនុឲ្យបានល្អ អភិវឌ្ឍន៍ឱ្យចំទិសដៅ ដើម្បីបង្កើនសេដ្ឋកិច្ចក្នុងខេត្ត ឱ្យកាន់តែប្រសើរឡើង ឆ្លើយតបបានតាមសេចក្តីត្រូវការរបស់ប្រជាពលរដ្ឋ ពីព្រោះខេត្តនេះ ជាខេត្តមួយសំខាន់នៅក្នុងរបៀងសេដ្ឋកិច្ចតំបន់ឆ្នេរ។ក្នុងនាមជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ ឯកឧត្តម ឯកភាពខ្ពស់ទៅនឹងអ្វីដែលរដ្ឋបាលខេត្តព្រះសីហនុបានធ្វើកន្លងមក និងបានកោតសរសើរ ចំពោះការអនុវត្តបានយ៉ាងត្រឹមត្រូវនូវយុទ្ធសាស្ត្របញ្ចកោណ ដំណាក់កាលទី១ ទាំងស្មារតី និងការទទួលខុសត្រូវរបស់រដ្ឋបាលខេត្ត។ ឯកឧត្តម សាយ សំអាល់ បានបន្ថែមថា ថា ក្នុងរយៈពេល១ឆ្នាំ ដើមអាណត្តិទី៧នេះ យើងសម្រេចបាននូវការងារជាច្រើនយ៉ាងឆាប់រហ័ស និងជាក់លាក់ ប៉ុន្តែទន្ទឹមនោះ យើងក៏បានជួបបញ្ហាជាច្រើនដែលជាការសាកល្បងទាំងកម្លាំង ទាំងស្មារតីនិងការទទួលខុសត្រូវ ព្រមទាំងភាពវាងវៃរបស់យើង ដែលនេះជាឱកាសបញ្ជាក់ពីភាពរឹងមាំក្រោមការដឹកនាំដ៏ត្រឹមត្រូវរបស់សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា ដោយបានធ្វើឱ្យប្រជាពលរដ្ឋកម្ពុជាមានទំនុកចិត្តជឿជាក់មកលើការដឹកនាំរបស់រាជរដ្ឋាភិបាលដែលជាអ្នកបន្តវេន ។សូមជម្រាបជូបថា យុទ្ធសាស្ត្របញ្ចាកោណដំណាក់កាលទី១ នីតិកាលទី៧ នៃរដ្ឋសភាមានបាវចនា ៥ គោលដៅយុទ្ធសាស្ត្រ៥ និងអាទិភាពគន្លឹះ ៥។ បាវចនា ៥ រួមមាន៖ កំណើន ការងារ សមធម៌ ប្រសិទ្ធភាព និងចីរភាព។ គោលដៅយុទ្ធសាស្ត្រ ៥៖ ១. ធានាឱ្យបានកំណើនសេដ្ឋកិច្ច ២. បង្កើតការងារឱ្យកាន់បានតែច្រើន ៣. សម្រេចឱ្យបាននូវគោលដៅកាន់បន្ថយភាពក្រីក្រ ៤. បន្តពង្រឹងសមត្ថភាពអភិបាលកិច្ច និងលើកកម្ពស់គុណភាពស្ថាប័ន និង ៥. ធានាឱ្យបាននូវចីរភាពនៃការអភិវឌ្ឍនសង្គម-សេដ្ឋកិច្ច។ អាទិភាពគន្លឹះ ៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា ៕អត្ថបទ បាន សុខរិទ្ធិ

កម្លាំងខណ្ឌរដ្ឋបាលជលផលកណ្តាល បង្ក្រាបបទល្មើសនេសាទខុសច្បាប់ នៅស្រុកពញ្ញាឮ

កណ្ដាល៖ កម្លាំងខណ្ឌរដ្ឋបាលជលផលកណ្តាល ផ្នែករដ្ឋបាលជលផលបាសាក់ និងសង្កាត់ពញាឮ ដឹកនាំដោយលោក ប៉ុម សីហា នាយរងខណ្ឌតំណាងលោក ហេង សុភារិទ្ធិ នាយខណ្ឌរដ្ឋបាលជលផលកណ្តាល សហការជាមួយកម្លាំងគណៈបញ្ជាការឯកភាពស្រុកពញាឮ ដឹកនាំដោយលោក ថន សុវណ្ណា អភិបាលស្រុកពញាឮ កម្លាំងអធិការដ្ឋានរដ្ឋបាលជលផលចតុមុខ ដឹងនាំដោយលោក ថោ ឡូ នាយអធិការដ្ឋានចតុមុខ និងកម្មករសរុប៥០នាក់ ចុះបង្ក្រាបបទល្មើសនេសាទ នៅចំណុចពាមលង្វែក ឃុំកំពង់លួង និងចំណុចតាមដងទន្លេសាប ឃុំកោះចិន ស្រុកពញាឮខេត្តកណ្តាល។ក្រោយប្រតិបត្តិការចុះបង្ក្រាបលទ្ធផល៖ លូស្បៃមុង ចំនួន ៥០មាត់លូ ,របាំងព្រួលស្បៃមុង ៧០០០ម៉ែត្រ ,បង្គោលតូចធំ ៣៥០០ដើម ,ចាក់លែងកូនត្រីចំរុះ ២០០គីឡូក្រាម វត្ថុតាងទាំងអស់ត្រូវបានដុតបំផ្លាញចោលសរុប ២ករណី។

ព្រះធម្មវនវាសី ចន្ទ មុនី បាននិមន្តទស្សនកិច្ចតាមបន្ទាត់ព្រំដែន ក្នុងភូមិសាស្រ្តខេត្តឧត្ដរមានជ័យ

នៅថ្ងៃចុងសប្ដាហ៍នេះ ព្រះធម្មវនវាសី ចន្ទ មុនី បាននិមន្តទស្សនកិច្ច ក្នុងភូមិសាស្រ្តខេត្តឧត្ដរមានជ័យ អមដំណើរដោយឯកឧត្ដម មាន ចាន់យ៉ាដា អភិបាលខេត្ត ដើម្បីសួរសុខទុក្ខ និងសំណេះសំណាលជាមួយប្រជាពលរដ្ឋ ដែលរស់នៅតាមខ្សែបន្ទាត់ព្រំដែន។បន្ទាប់ពីការសម្តែងធម្មទេសនាអប់រំចិត្តក្នុងវត្តជ័យទឹកជុំ នៅស្រុកអន្លង់វែង ព្រះអង្គបានបន្តនិមន្ត ទៅពិនិត្យផ្ទាល់ទីតាំងបង្គោលព្រំដែនទី១ រវាងខេត្តជាប់ព្រំដែនកម្ពុជា-ថៃ ។ក្នុងនោះប្រជាពលរដ្ឋនៅខេត្តឧត្ដរមានជ័យ រង់ចាំទទួលការនិមន្តទស្សនកិច្ច ព្រះអង្គនៅតាមបង្គោលព្រំដែន។ យ៉ាងណាម៉ិញ ការទទួលដំណើរទស្សនកិច្ចរបស់ព្រះអង្គ បានបង្ហាញពីការរស់នៅយ៉ាងសុខសាន្ត ក្រោមម្លប់សុខសន្តិភាព ដែលកំពុងមាន និងបន្តចង់បានពីសំណាក់បងប្អូនប្រជាពលរដ្ឋខេត្តឧត្តរមានជ័យ ដូចគ្នាជាមួយប្រជាពលរដ្ឋរស់នៅខេត្តជាប់ព្រំដែនដទៃទៀត ដូចជាខេត្តជាប់ព្រំដែនទាំង៤ ក្រចេះ ស្ទឹងត្រែង រតនគិរី មណ្ឌលគិរី នៃតំបន់អភិវឌ្ឍន៍ត្រីកោណ កម្ពុជា ឡាវ វៀតណាម CLV-DTA។គួរបញ្ជាក់ថា សម្រាប់ការនិមន្តទស្សនកិច្ចនេះ មានការទទួលស្វាគមន៍ និងរៀបចំទទួលយ៉ាងកក់ក្តៅពីសំណាក់ឯកឧត្ដម មាន ចាន់យ៉ាដា អភិបាលខេត្តទាំងព្រមទាំងមន្រ្តី និងកងកម្លាំងសមត្ថកិច្ចជាច្រើននាក់ផងដែរ៕

ទេសចរអន្តរជាតិភាគច្រើនផ្តោតការទស្សនាតំបន់អភិវឌ្ឍន៍អេកូទេសចរណ៍នៅខេត្តភាគឦសានកម្ពុជា

គ្រប់ភ្ញៀវទេសចរអន្តរជាតិដែលមកស្នាក់នៅកម្ពុជារយៈពេលវែង និងខ្លះដើរកម្សាន្តរយៈពេលខ្លី ភាគច្រើនគឺបានទៅទស្សនាតំបន់អភិវឌ្ឍន៍អេកូទេសចរណ៍ ទេសចរណ៍ធម្មជាតិ នៅខេត្តរតនៈគិរី មណ្ឌលគិរី ក្រចេះ និងខេត្តស្ទឹងត្រែង ខណៈនៅតំបន់នោះមានអភិវឌ្ឍន៍ ប្រព័ន្ធផ្លូវស្រួលធ្វើដំណើរ និងមានទីកន្លែងដើរកម្សាន្តច្រើន។បើតាមភ្ញៀទេសចរអន្តរជាតិ មកពីប្រទេសស្រីលង្កា និងអង់គ្លេសជាដើម បានថ្លែងប្រាប់ BTV នៅថ្ងៃទី២៤ ខែសីហានេះថា ជាក់ស្តែងប្រទេសកម្ពុជា ក្រៅពីទស្សនាខេត្តសៀមរាបអង្គរ គឺគោលដៅទេសចរណ៍វប្បធម៌ ប្រវត្តិសាស្ត ទេសចរណ៍ធម្មជាតិ ច្រើនកន្លែងរាប់មិនអស់ ក្នុងនោះសម្រាប់គោលដៅទេសចរណ៍នៅភូមិភាគឦសាន្តកម្ពុជាវិញ គឺគោលដៅមានតំបន់ទេសភាពព្រៃឈើធំធេង កន្លែងដើរកម្សាន្តច្រើន មានភាពទាក់ទាញ ពោលគឺទៅទស្សនាម្តងហើយចង់ទៅទស្សនាម្តងទៀត។ ឯកឧត្តម តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ បានថ្លែងថា ជារួមគោលដៅទេសចរណ៍នៅតាមបណ្តាខេត្តទាំងបួន រួមមាន ខេត្តរតនគិរី មណ្ឌលគិរី ក្រចេះ និងខេត្តស្ទឹងត្រែង នៅភូមិភាគឦសាន្តកម្ពុជានេះ បច្ចុប្បន្នបាននិងកំពុងទទួលបានគុណតម្លៃ និងអត្ថប្រយោជន៍ជាច្រើនពីការខំប្រឹងអភិវឌ្ឍរបស់រាជរដ្ឋាភិបាលកម្ពុជា ហើយការអភិវឌ្ឍក្នុងក្របខណ្ឌកិច្ចសហប្រតិបត្តិការតំបន់អភិវឌ្ឍន៍ត្រីកោណ កម្ពុជា ឡាវ វៀតណាម CLV DTA ក៏បានជួយផ្តល់សម្របសម្រួលគ្នាទៅវិញទៅមក លើការផ្សព្វផ្សាយទីផ្សារគោលដៅទេសចរណ៍ សម្រួលការឆ្លងដែនល្អជូនឲ្យទេសចរអន្តរជាតិ ការជំរុញការវិនិយោគ ការបង្កើតឱកាសការងារ ពិសេសគឺការអភិវឌ្ឍតំបន់ទេសចរណ៍ គុណភាពទេសចរណ៍ អភិរក្សធនធានធម្មជាតិ និងការបង្ការហានិភ័យលើគ្រោះមហន្តរាយណ៍ជាដើម ហើយរាល់សកម្មភាពនេះគឺធ្វើដើម្បីជំរុញកម្រិតជីវភាពពលរដ្ឋល្អប្រសើរឡើង៕ អត្ថបទ ស៊ុម សុខជា

វិស័យឯកជនកំពុងស្វែករកគន្លឹះល្អៗ ដើម្បីលើកកម្ពស់ការធ្វើអាជីវកម្មឱ្យកាន់តែល្អប្រសើរ

សមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជា រៀបចំចងក្រង ជួបជុំ រវាងក្រុមហ៊ុនដឹកជញ្ជូន និងក្រុមវិនិយោគិនលើ វិស័យផ្សេងៗ បានជួបពិភាក្សា និងការស្វែករកគន្លឹះវិជ្ជមានមួយចំនួន ដើម្បីលើកកម្ពស់ការធ្វើអាជីវកម្មនៅកម្ពុជាឱ្យកាន់តែល្អប្រសើរ។លោក ជា ចាន់ដារ៉ា ប្រធានសមាគមពាណិជ្ជករដឹកជញ្ជូននិងខ្សែច្រវ៉ាក់ផ្គត់ផ្គង់នៅកម្ពុជា លើកឡើងនៅក្នុងពិធីជួបជុំម្ចាស់ អាជីវកម្ម នាំចេញ-ចូល ក្រុមហ៊ុនដឹកជញ្ជូន និងឡូជីស្ទិកលើកទី៥ នេះថា បើតាមរយៈរបាយការណ៍របស់ក្រុមប្រឹក្សាអភិវឌ្ឍន៍កម្ពុជា ចាប់ពីឆ្នាំ ២០២៣ កម្ពុជាបានកំពុងស្រូបយកវិនិយោគមកបណ្តាក់ទុននៅព្រះរាជណាចក្រកម្ពុជា មានជាហូរហែរ ខណៈការធ្វើ ពាណិជ្ជកម្មជាអន្តរជាតិ បើតាមរបាយការណ៍គយ និងរដ្ឋាករកម្ពុជា ឃើញថា ចាប់ពីចុងឆ្នាំ ២០២៣ គឺមានកំណើនកើនឡើងជាបន្ត បន្ទាប់, មកដល់បច្ចុប្បន្ន ការធ្វើពាណិជ្ជកម្ម ជាពិសេសការនាំចេញទំនិញរបស់កម្ពុជាបានកំពុងហក់ឡើងកាន់តែល្អប្រសើរ។លោក បន្តថា នេះគឺជាពេលវេលាមួយដ៏ល្អមួយសម្រាប់វិស័យឯកជន ជាក់ស្តែងការចងក្រងរវាងក្រុមហ៊ុនដឹកជញ្ជូន ឡូជីស្ទិក និងក្រុមហ៊ុនវិនិយោគលើវិស័យផ្សេងៗនេះ បានជួបជុំពិភាក្សា ការផ្លាស់ប្តូរបទពិសោធន៍ និងការស្វែករកគន្លឹះវិជ្ជមានល្អៗមួយចំនួននា ពេលនេះ គឺជាការជំរុញនូវកិច្ចសហប្រតិបត្តិការរួមគ្នា ដើម្បីលើកកម្ពស់ដល់ការធ្វើពាណិជ្ជកម្មនៅកម្ពុជាកាន់តែល្អប្រសើរ ទាំងប្រតិបត្តិ ការនៅក្នុងការធ្វើអាជីវកម្ម ក៏ដូចជាការដឹកជញ្ជូន និងឡូជីស្ទិក ជាក់ស្តែងនាពេលកន្លងមកនេះ ចំពោះវិស័យដឹកជញ្ជូនវិញ បានកំពុង រើបឡើងវិញជាបណ្តើរៗ ដែលគាំទ្រដោយសម្ទុះការងើបឡើងនៃសកម្មភាពសេដ្ឋកិច្ច។សូមបញ្ជាក់ថា នៅក្នុងរយៈពេល ៦ ខែ ក្នុងឆ្នាំ ២០២៤ នេះ បើតាមរបាយការណ៍ស្តីពីលទ្ធផលនៃការអនុវត្តថវិកាឆមាសទី១ របស់ ក្រសួងសេដ្ឋកិច្ច និងហិរញ្ញវត្ថុ, សេដ្ឋកិច្ចកម្ពុជាត្រូវបានប៉ាន់ស្មានថា នឹងសម្រេចបាន ៦% ដោយមានវិស័យខ្លះៗបានងើបឡើង សមរម្យ ខ្លះយឺត និងវិស័យខ្លះទៀតងើបឡើងបន្តក្នុងកំណើនទាប ខណៈដែលមិនទាន់មានភាពប្រាកដប្រជានៃសេដ្ឋកិច្ចសកល។ ក្នុងនោះសម្រាប់អនុវិស័យដឹកជញ្ជូន និងគមនាគមន៍វិញ, ឃើញថា នៅពាក់កណ្តាលឆ្នាំនេះត្រូវបានរំពឹងថា នឹងបន្តមានកំណើន ៥,២% ដោយសារការបន្តរក្សាចលនការនៃសកម្មភាពដឹកជញ្ជូន ទាំងនិន្នាការដឹកជញ្ជូនឡូជីស្ទីក ជាពិសេសការងើបសន្សឹមៗនៃ អនុវិស័យគាំទ្រការដឹកជញ្ជូន ដូចជាអនុវិស័យកាត់ដេរជាដើម៕ អត្ថបទ៖ សុន រ៉ាឌី

ឧត្តមនាវីឯក ទៀ សុខា ប្រកាសគាំទ្ររាជរដ្ឋាភិបាលបង្កើតមូលនិធិ ដើម្បីកសាងហេដ្ឋារចនាសម្ព័ន្ធតាមព្រំដែន

ឧត្តមនាវីឯក ទៀ សុខា មេបញ្ជាការងកងទ័ពជើងទឹក និងជាអគ្គលេខាធិការរង នៃគណៈកម្មាធិការជាតិសន្តិសុខលម្ហសមុទ្រ បានប្រកាសគាទ្រយ៉ាងពេញទំហឹង ដល់រាជរដ្ឋាភិបាលកម្ពុជា ដែលបានបង្កើត«មូលនិធិកសាងហេដ្ឋារចនាសម្ព័ន្ធតាមព្រំដែន» ខណៈការបង្កើតនូវមូលនិធិនេះឡើង គឺជាការផ្តល់ឱកាសមួយ ទៀតឲ្យបងប្អូនប្រជាពលរដ្ឋខ្មែរមកពីគ្រប់ទិសទី បានចូលរួមចំណែកដោយផ្ទាល់ជាមួយរាជដ្ឋាភិបាលនៅក្នុងបុព្វហេតុការពារ និងអភិវឌ្ឍន៍ ជាតិ ក្នុងស្មារតីសាមគ្គីជាតិខ្មែរស្រលាញ់ខ្មែរ និងស្រលាញ់ជាតិជាដើម។ថ្លែងប្រាប់ទូរទស្សន៍BTVតាមរយៈតេលេក្រាម នាថ្ងៃតី២៦ ខែសីហា ឆ្នាំ២០២៤នេះ ឯកឧត្តម ឧត្កមនាវីឯក ទៀ សុខា បានបញ្ជាក់ថា តាំងនាមឲ្យនាយនាវី នាយវាវីរង ពលនាវីទាំងអស់នៃបញ្ជាការដ្ឋានកងទ័ពជើងទឹក សូមប្រកាសគាំទ្រយ៉ាងពេញទំហឹងចំពោះសម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា ដែលបានបង្កើតនូវ«មូលនិធិកសាងហេដ្ឋារចនាសម្ព័ន្ធតាមព្រំដែន» ដោយការបង្កើតនេះគឺជា ឱកាសមួយទៀតសម្រាប់ផ្តល់ភាពងាយស្រួលដល់ប្រជាពលរដ្ឋខ្មែរក្នុងការធ្វើដំណើរកម្សាន្ត និងប្រកបមុខ របររកស៊ីនៅតាមបណ្តោយព្រំដែនកម្ពុជា និងប្រទេសជិតខាងកាន់តែគគ្រឹកគគ្រេងបន្ថែមទៀត។សូមបញ្ជាក់ថា ភ្លាមៗបន្ទាប់ពីសម្តេចធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា បានអំពាវនាវ និងសម្រេចបង្កើត«មូលនិធិកសាងហេដ្ឋារចនាសម្ព័ន្ធតាមព្រំដែន» នាថ្ងៃទី២៦ ខែសីហា ឆ្នាំ២០២៤នេះបងប្អូនប្រជាពលរដ្ឋខ្មែរមកពីគ្រប់ទិសទី បានចូលរួមបរិច្ចាគថវិកាជាបន្តបន្ទាប់ ខណៈចលនានៃការចូលរួម បរិច្ចាគនេះគឺជាការបង្ហាញនូវសាមគ្គីភាពជាធ្លុងមួយ ដើម្បីជាឧត្តមប្រយោជន៍ជាតិ និងប្រជាជនកម្ពុជា ទាំងមូលនោះ។រាជារដ្ឋាភិបាល បានសម្រេចបង្កើត«មូលនិធិកកសាងហេដ្ឋារចនាសម្ព័ន្ធតាមព្រំដែន» ក្នុងគោលបំណង ដើម្បីកៀរគរថវិកាបន្ថែមសម្រាប់កសាងហេដ្ឋារចនាសម្ព័ន្ធនានានៅតាមបណ្តោយ ព្រំដែន ដោយកម្មវិធីមូលនិធិនេះ ក៏ជាការផ្តល់ឱកាសឲ្យបងប្អូនប្រជាពលរដ្ឋខ្មែរគ្រប់មជ្ឈដ្ឋាន ទាំងក្នុងនិង ក្រៅប្រទេស បានចូលរួមចំណែកដោយផ្ទាល់ជាមួយរាជដ្ឋាភិបាលនៅក្នុងបុព្វហេតុការពារ និងអភិវឌ្ឍន៍ជាតិ ក្នុងស្មារតីសាមគ្គីជាតិខ្មែរ ដើម្បីថែរក្សា សុខសន្តិភាព អធិបតេយ្យ និងបូរណភាពទឹកដី ក៏ដូចជាការ ជំរុញការអភិវឌ្ឍនៅតាមតំបន់ព្រំដែនឲ្យបានកាន់តែរឹងមាំ និងប្រកបដោយចីរភាពជាដើម៕អត្ថបទ៖ បាន ចក់

រាជរដ្ឋាភិបាលកម្ពុជា បានកំពុងធ្វើឱ្យមានតុល្យភាពសេដ្ឋកិច្ចឡើងវិញ

សមិទ្ធផលដែលរាជរដ្ឋាភិបាលសម្រេចបានពេញក្នុងមួយឆ្នាំ ក្នុងអាណត្តិ ទី ៧ នៃរដ្ឋសភា, ជាពិសេសការសម្រេចបានលើការនាំ ចេញរបស់កម្ពុជា បានកំពុងគាំទ្រដល់ការធ្វើពាណិជ្ជកម្មជាអន្តរជាតិ នឹងបានកំពុងរុញច្រានសេដ្ឋកិច្ចកម្ពុជាឱ្យបន្តងើបឡើងវិញ។រាជរដ្ឋាភិបាល ក្នុងនីតិកាលទី៧ នៃរដ្ឋសភា ដែលដឹកនាំប្រកបដោយភាពឈ្លាសវៃរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី នៅក្នុងរយៈពេល ១២ ខែ កន្លងមកនេះ, ទោះបីស្ថិតក្នុងដំណាក់កាលដែលសភាពការណ៍អន្តរជាតិមានការវិវត្តប្រកប ដោយភាពស្មុគស្មាញ និងពិបាកប៉ាន់ស្មាន កម្ពុជានៅតែបាននិងកំពុងបន្តធ្វើដំណើរក្នុងគន្លងវិជ្ជមាន និងសម្រេចបាននូវសមិទ្ធផល សំខាន់ៗជាច្រើន ជាក់ស្តែងទាក់ទិនការធ្វើពាណិជ្ជកម្មអន្តរជាតិសរុប គិតចាប់ពីខែ សីហា ឆ្នាំ ២០២៣ ដល់ ខែកក្កដា ឆ្នាំ ២០២៤ ធៀបនឹងរយៈពេលដូចគ្នានៃឆ្នាំមុន បានកើនឡើងប្រមាណ ៩,៤% ក្នុងទំហំទឹកប្រាក់ប្រមាណ ៥២ ពាន់លានដុល្លារ, ការនាំចេញ មានកំណើន ១២% ក្នុងទំហំប្រមាណ ២៥ ពាន់លានដុល្លារ ទៅកាន់ ១៧០ ប្រទេស ក្នុងនោះទីផ្សារធំៗមានដូចជា៖ អាស៊ាន, សហភាពអឺរ៉ុប, សហរដ្ឋអាមេរិក, ចិន, ជប៉ុន និង កាណាដាជាដើម។ជុំវិញការសម្រេចកំណើនការធ្វើពាណិជ្ជកម្មនេះ, ឧកញ៉ា ប៉ិច បូឡែន ប្រធានសមាគមសហគ្រិនវ័យក្មេងកម្ពុជា លើកឡើង ថា សម្រាប់សមិទ្ធផលដែលសម្រេចបាន ជាពិសេសការសម្រេចបានលើការនាំចេញ ដែលគាំទ្រដល់កំណើនសេដ្ឋកិច្ច មិនមែនកើត ឡើងដោយចចៃដន្យនោះទេ ហើយកម្ពុជាក៏មិននៅតែឯងនោះឡើយ ដែលទាំងអស់នេះគឺបានកើតឡើងពីការខិតខំប្រឹងប្រែងរបស់រាជរដ្ឋាភិបាល ធ្វើយ៉ាងណាឱ្យមានតុល្យភាពសេដ្ឋកិច្ច ជំរុញឱ្យមានកំណើនកើនឡើងបន្តិចម្តងៗឡើងវិញ បន្ទាប់ពីការរងប៉ះពាល់នៃ វិបត្តិសកល ជាពិសេសសង្រ្គាមរុស្សី អ៊ុយក្រែន ដែលកំពុងនៅអូសបន្លាយ។សូមបញ្ជាក់ថា សេដ្ឋកិច្ចកម្ពុជានៅឆ្នាំ ២០២៣ សម្រេចបានកំណើន ៥% ហើយត្រូវបានព្យាករណ៍ថា នឹងកើនឡើងក្នុងរង្វង់ ៦% នៅឆ្នាំ២០២៤ ក្នុងនោះវិស័យសំខាន់ៗដែលគាំទ្រកំណើនរួមមាន៖ វិស័យកសិកម្ម, វិស័យឧស្សាហកម្ម (ជាពិសេសវិស័យកាត់ដេរ), វិស័យកម្មន្តសាលមិនមែនកាត់ដេរ និងវិស័យសេវាកម្ម ក្នុងនោះសម្រាប់ការនាំចេញនៃវិស័យកម្មន្តសាល មានកំណើនប្រមាណ ២០% ក្នុងទំហំទឹកប្រាក់ប្រមាណជាង ១៥ ពាន់លានដុល្លារ វិស័យសំខាន់នាំចេញរួមមាន៖ សម្លៀកបំពាក់, វាយនភណ្ឌ, ស្បែកជើង, សម្ភារៈ ធ្វើដំណើរ, សំបកកង់រថយន្ត, កង់ និងសម្ភារៈអគ្គីសនី ។ ចំណែកការនាំចេញផលិតផលកសិកម្មវិញ មានកំណើនប្រមាណ ៣៦% ក្នុងទំហំទឹកប្រាក់ ៣,៧ ពាន់លានដុល្លារ ដែលក្នុងនោះទំនិញសំខាន់ៗរួមមាន៖ ស្រូវ, អង្ករ, ម្រេច, ដំឡូងមី, ស្វាយចន្ទី, ស្វាយកែវ រមៀត, ជ័រកៅស៊ូ និងទំនិញផ្សេងទៀត៕ អត្ថបទ៖ សុន រ៉ាឌី

និស្សិតខ្មែរទៅរៀននៅបរទេសនឹងខិតខំផ្សព្វផ្សាយពីសក្ដានុពលប្រទេសខ្លួនទៅដល់និស្សិតបរទេស

ក្រុមនិស្សិតអាហារូបករណ៍ទៅសិក្សានៅប្រទេសចិន បានប្ដេជ្ញាខិតខំរៀនសូត្រនាំយកនូវចំណេះដឹង ថ្មីៗមកចូលរួមអភិវឌ្ឍប្រទេសជាមួយនឹងការផ្សព្វផ្សាយពីសក្ដានុពល ឬតំបន់ទេសចរណ៍នានាទៅកាន់និស្សិតបរទេស និងប្រជាជននៃប្រទេសចិនឱ្យស្គាល់កាន់តែពីកម្ពុជា ។ក្រុមនិស្សិតអាហារូបករណ៍ថ្នាក់អនុបណ្ឌិត និងបណ្ឌិត លើកឡើងថា ប្រទេសចិន គឺជាប្រទេស មានប្រជាជនដ៏ច្រើនលំដាប់ទី២លើពិភពលោក និងក៏ជាប្រទេសមហាអំណាចសេដ្ឋកិច្ចផងដែរ ហើយការបានអាហារូបករណ៍ទៅសិក្សានៅប្រទេសចិននេះ គឺជាឱកាសដ៏ល្អអាចឲ្យបានសិក្សាស្វែងយល់បន្ថែមពី ភាពខ្លាំងនៃប្រទេសនោះ មកចូលរួមអភិវឌ្ឍប្រទេសកម្ពុជាឱ្យកាន់តែរីកចម្រើន ជាពិសេសលើមុខជំនាញ នានាដែលពួកគេត្រូវសិក្សា ។សិស្សនិស្សិតទាំងនោះ បានបង្ហាញការជឿជាក់ថា សាកលវិទ្យាល័យដែលពួកគេរៀន នឹងមាននិស្សិតបរទេសជាច្រើនប្រទេសទៀត ចូលសិក្សាក្នុងថ្នាក់ជាមួយ ដែលនេះជាឱកាសដ៏ល្អមួយផងដែរ ដែលអាចផ្សព្វផ្សាយពីវប្បធម៌ អរិយធម៌ តំបន់ទេសចរណ៍ សុខសន្តិភាព ស្ថិរភាពនយោបាយនៅក្នុងប្រទេសយើង ទៅកាន់និស្សិតបរទេសទាំងអស់នោះ ជាពិសេសប្រជាជនចិន រស់នៅក្នុងតំបន់ដែលពួកគេសិក្សា។ជាមួយនេះ ក្រុមនិស្សិតទាំងអស់នោះ ក៏បានចែករំលែកពីបទពិសោធន៍ ក្នុងការទទួលបានអាហា រូបករណ៍ទៅកាន់ប្អូនៗជំនាន់ក្រោយ រួមមានត្រូវកំណត់មុខវិជ្ជាឱ្យបានច្បាស់លាស់ត្រូវមានពិន្ទុល្អលើមុខជំនាញរបស់ខ្លួនត្រូវសិក្សា តាំងពីថ្នាក់ក្រោមមក ជាពិសេសត្រូវពង្រឹងលើភាសាបរទេស មានអង់គ្លេស និងចិន ជាដើម ។ ក្រុមនិស្សិតអាហារូបករណ៍ទាំងអស់នេះ នឹងទៅសិក្សាបន្តនៅប្រទេសចិន នៅដើមខែកញ្ញា ឆ្នាំ២០២៤ខាងមុខនេះ ដែលសរុបចំនួន១៤៨នាក់ ដោយសិក្សានៅតាមសាកលវិទ្យាល័យក្នុងខេត្ត និងក្រុង សរុបចំនួន២៦ និងរហូតមកដល់នឹងពេលនេះ មានរយៈពេល១២ឆ្នាំមកហើយ ដែលសមាគមនិស្សិតកម្ពុជាប្រចាំប្រទេសចិន បានជួយទៅដល់សិស្សានុសិស្ស ចំនួន១,២០០នាក់ បានទៅសិក្សានៅប្រទេសចិន៕ អត្ថបទ៖ បាន សុខរិទ្ធិ

បណ្ដាញសង្គម

ព័ត៌មានថ្មីៗ

UNICEF ៖ សង្រ្គាមអ៊ីរ៉ង់គំរាមកំហែងដល់ការចែកចាយគ្រឿងផ្គត់ផ្គង់សង្រ្គោះជីវិតកុមារ

ក្រុមហ៊ុន Moderna និងក្រុមហ៊ុនផ្សេងទៀត ទទួលបានប្រាក់ ៦០លានដុល្លារ ដើម្បីផលិតវ៉ាក់សាំងបង្ការជំងឺអេបូឡា

កូដកម្មរថភ្លើងក្រោមដីធ្វើឲ្យប៉ះពាល់ដល់អ្នកដំណើរនៅទីក្រុងឡុងដ្រ៍ ចក្រភពអង់គ្លេស

របាយការណ៍៖ EU ពិចារណាដាក់ទណ្ឌកម្មរដ្ឋមន្ត្រីអ៊ីស្រាអែល ជុំវិញការប្រព្រឹត្តិ ចំពោះនាវាមនុស្សធម៌ឆ្ពោះទៅហ្កាហ្សា

WHO៖ ករណីសង្ស័យជំងឺ Ebola ធ្លាក់ចុះ ក្រោយមនុស្សរាប់រយនាក់ត្រូវបានដកចេញ

ប្រធានគ្លីនិករងការខូចខាតដោយសារការវាយប្រហាររុស្ស៊ីនិយាយថា ទីក្រុងមូស្គូ មិនចង់បញ្ចប់សង្រ្គាមនោះទេ

អគ្គិភ័យដ៏ធំមួយ បានឆាបឆេះផ្សារមួយកន្លែងស្ថិតក្នុងទីក្រុងហ្សាកាតា ប្រទេសឥណ្ឌូនេស៊ី

មនុស្សយ៉ាងតិច ១៥នាក់រងរបួស ដោយសារព្យុះនៅជប៉ុន ខណៈមានការអំពាវនាវឲ្យជម្លៀស

លោក Trump ថាលោកបាននិយាយជាមួយក្រុមហេសបូឡា តាមរយៈអន្តរការី

លោក Netanyahu ប្រាប់លោក Trump ថា អ៊ីស្រាអែលនឹងវាយប្រហារទីក្រុងបេរូត បើសិនការវាយប្រហាររបស់ក្រុមហេសបូឡានៅតែបន្ត

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877