នយោបាយ​ និង ការអភិវឌ្ឍន៍ វប្បធម៌ និងទេសចរណ៍ សន្តិសុខ និង សង្គម សិល្បៈកម្សាន្ត សេដ្ឋកិច្ច និង កសិកម្ម
កាកបាទក្រហមកម្ពុជា ទទួលថវិកាពីសមាគមឧកញ៉ាកម្ពុជាចំនួន ១,០០៩,៩៩៩ ដុល្លារ អាមេរិក ក្នុងទិវា ៨ឧសភា ២០២៦
ឱកាសការងារ ៣៥៥០កន្លែង ជាមួយនឹងអត្ថប្រយោជន៍ ប.ស.ស. និងកម្មវិធី TVET ត្រូវ​បាននាំ​យក​ទៅផ្សព្វផ្សាយជូន​ពលរដ្ឋដល់មូលដ្ឋានខេត្តសៀមរាប
វិស័យរដ្ឋបញ្ជាក់ពីការ​ប្តេជ្ញាចិត្តក្នុងការជួយពង្រឹងការយល់ដឹងអំពីច្បាប់ និងនីតិវិធីគយដល់វិស័យ SMEs
សមត្ថកិច្ចរាជធានីភ្នំពេញ បន្តត្រួតពិនិត្យទីតាំងស្នាក់នៅប្រមូលផ្ដុំ ដើម្បីស្វែងរក និង​បោស​សម្អាត​​បទ​ល្មើស Online Scams

ព័ត៌មានជាតិ

រដ្ឋមន្រ្តីកសិកម្ម ណែនាំមន្រ្តីក្រោមឱវាទធ្វើការជាមួយក្រុមហ៊ុនឯកជន ក្នុងការប្រើប្រាស់​ថាមពលសូឡាឲ្យមានប្រសិទ្ធិភាព

2024/09/03 10:12:09 am        183
Facebook Telegram Linkin
ភ្នំពេញ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ នៅ​រសៀលថ្ងៃទី២ កញ្ញា ឆ្នាំ២០២៣ បានចូលរួមស្តាប់បទបង្ហាញរបស់ក្រុមហ៊ុនសូឡា ហ្គ្រីន អេនើជី (ខេមបូឌា) ខូអិលធីឌី ស្តីពីស្ថានីយបូមទឹកដើរដោយពន្លឺព្រះអាទិត្យ និងម៉ូឌែលធុរកិច្ច នៃសេវាកម្មផ្គត់ផ្គង់ទឹកសម្រាប់ស្រូវប្រាំង នៅទីស្តីការក្រសួង។បន្ទាប់ពីបានទទួលស្តាប់ការធ្វើបទបង្ហាញរបស់ក្រុមហ៊ុន ឯកឧត្តមរដ្ឋមន្ត្រី បានណែនាំ​ក្រុមហ៊ុន​ពិនិត្យលទ្ធភាពធ្វើយ៉ាងណាឱ្យកសិករអាចប្រើប្រាស់សេវាកម្មនេះ ដោយចំណាយតិច ថ្លៃដើម​ផលិតទាប ទទួលបានផលចំនេញច្រើន និងមានប្រសិទ្ធភាពសេដ្ឋកិច្ចពិតប្រាកដ។ ជាមួយ​គ្នានេះដែរ ឯកឧត្តមរដ្ឋមន្ត្រី បានណែនាំឱ្យក្រុមការងារបច្ចេកទេស សហកា​រជាមួយ​ក្រុមហ៊ុន​ដើម្បីសិក្សាបន្ថែម តាមរយៈគោលដៅរួម គឺជួយគាំទ្រដល់កសិករ ជាពិសេស​សហគមន៍​កសិកម្ម​ទំនើប ដើម្បីទទួលបាននូវបច្ចេកទេសក្នុងការប្រើប្រាស់សម្ភារៈ និងសេវាកម្ម​ថាមពល​សូឡា ដែលមានភាពចំនេញ និងមានអត្ថប្រយោជន៍ជាច្រើនក្នុងវិស័យកសិកម្ម។ សូមជម្រាបជូនថា សូឡា ហ្គ្រីន អេនើជី (ខេមបូឌា) ខូ អិលធីឌី ជាក្រុមហ៊ុនផ្តោត​លើការផលិត​ផលិតផល​គ្រឿងចក្រដែលមានគុណភាពខ្ពស់ ផ្តល់ការគាំទ្រផ្នែកបច្ចេកទេស សេវាកម្មថែទាំ និង​ការច្នៃ​ប្រឌិតថ្មីនៃបច្ចេកវិទ្យាថាមពលកកើតឡើងវិញ៕ អត្ថបទ ឈិត បូរ៉ាវី 

សម្តេចធិបតី ហ៊ុន ម៉ាណែត បន្តថ្លែងអំណរគុណជនរួមជាតិ ខណៈចលនាជាតិគាំទ្រ​មូលនិធិ​កសាង​ហេដ្ឋារចនាសម្ព័ន្ធតាមព្រំដែននៅបន្តមិនដាច់

2024/09/03 10:06:45 am        172
Facebook Telegram Linkin
សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជាមានមោទនភាពយ៉ាង​ក្រៃលែង និង​បាន​បន្ត​ថ្លែង​អំណរ​គុណយ៉ាងជ្រាលជ្រៅដល់ជនរួមជាតិទាំងក្នុង និងក្រៅប្រទេ​ស​ដែល​បាន​និង​កំពុង​បន្ត​ចូល​រួម​គាំទ្រមូល​និធិកសាង​ហេដ្ឋា​រចនា​សម្ព័ន្ធ​តាមព្រំដែន​នៅ​ភូមិភាគ​ឦសាន​យ៉ាង​សស្រាក់​សស្រាំ​។តបទៅនឹងទឹកចិត្តដ៏ប្រពៃថ្លៃថ្លារបស់ជនរួមជាតិ សម្តេចធិបតី ហ៊ុន ម៉ាណែត នាយករដ្ឋមន្ត្រី នៃ​កម្ពុជាបន្តចេញលិខិតថ្លែងអំណរគុណដល់ជនរួមជាតិដោយសេចក្តីសោមនស្សរីករាយ។ក្នុង​នាមរាជរដ្ឋាភិបាល និងក្នុងនាមសម្តេចផ្ទាល់ សម្តេចបាន​ថ្លែងអំណរ​គុណ​ចំពោះ​សន្តាន​ចិត្ត​របស់​ឯកឧត្តម លោកជំទាវ លោក លោកស្រី អ្នកនាងកញ្ញា ដែលបានចូលរួម​នូវ​ថវិកា​ដោយ​ស្ម័គ្រចិត្ត ក្នុង “មូលនិធិកសាងហេដ្ឋារចនាសម្ព័ន្ធតាមព្រំដែន” ដើម្បីកសាងហេដ្ឋា​រចនាសម្ព័ន្ធ​តាម​បណ្តោយ​ព្រំដែន ដោយផ្តោតលើការកសាងផ្លូវក្រវាត់ព្រំដែន ។ សម្តេចបានកោតសរសើរដោយស្មោះ ចំពោះកាយវិការ និងមនសិការស្នេហាជាតិដ៏ឧត្តុង្គឧត្តម សរបញ្ជាក់អំពីធ្លុងមហាសាមគ្គី ស្មារតីជាតិខ្មែរតែមួយ ដើម្បីសុខសន្តិភាព អធិបតេយ្យភាពជាតិ និងបូរណភាពទឹកដី រួមទាំងការអភិវឌ្ឍនៅតាមតំបន់ព្រំដែនឲ្យបានកាន់តែរឹងមាំប្រកបដោយ ចីរភាព។ជាមួយទឹកចិត្តដ៏ថ្លៃថ្លានេះ សម្តេចបានសូមជូនពរ ឯកឧត្តម លោកជំទាវ លោក លោកស្រី អ្នក​នាង​កញ្ញា បានជួបប្រទះតែនឹងពរទាំងប្រាំប្រការ គឺអាយុ វណ្ណៈ សុខៈ ពលៈ និងបដិភាណ កុំបីឃ្លៀងឃ្លាតឡើយ។គួរបញ្ជាក់ថា កាលពីថ្ងៃទី ២៦ ខែសីហា ខុទ្ទកាល័យសម្តេចធិបតី នាយករដ្ឋ​មន្ត្រី​បាន​ចេញ​សេចក្តី​ជូន​ដំណឹង ស្តីពី «មូលនិធិកសាងហេដ្ឋា​រចនា​សម្ព័ន្ធ​តាម​ព្រំដែន» ដោយ​មាន​ខ្លឹមសារ​ថា​ ខុទ្ទកាល័យ សម្តេចមហាបវរធិបតី នាយករដ្ឋមន្ត្រី មានកិត្តិយសសូមជម្រាបជូនដំណឹងដល់ សាធារណជន មេត្តាជ្រាបថា៖ កាលពីថ្ងៃទី២២ ខែសីហា ឆ្នាំ២០២៤ កន្លងទៅនេះ សម្តេច​មហា​បវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានប្រកាសបង្កើតនូវ “មូលនិធិ កសាងហេដ្ឋារចនាសម្ព័ន្ធតាមព្រំដែន” ក្នុង​គោលបំ​ណង​ដើម្បី​កៀរគរ​ថវិកា​បន្ថែម​សម្រាប់​កសាងហេដ្ឋារចនាសម្ព័ន្ធតាម បណ្តោយព្រំដែន ដោយផ្តោតលើ​ការ​កសាង​ផ្លូវ​ក្រវាត់​ព្រំ​ដែន ព្រមទាំងដើម្បីផ្តល់ឱកាសឱ្យប្រជាពលរដ្ឋខ្មែរគ្រប់ មជ្ឈដ្ឋានក្នុងនិងក្រៅប្រទេស បាន​ចូលរួម​ចំណែក​ដោយ​ផ្ទាល់ជាមួយរាជរដ្ឋាភិបាលក្នុងបុព្វហេតុរួមគ្នាកសាង និង ការពារមាតុភូមិ​របស់​យើង​៕ អត្ថបទ៖ មុត សុទ្ធ

សម្តេចរដ្ឋសភាធិបតី ឃួន សុដារី អនុញ្ញាតឱ្យលោកជំទាវ ចុង មីង (Zong Ming) ចូលជួប​សម្តែងការគួរសម និងពិភាក្សាការងារ

2024/09/03 09:36:46 am        258
Facebook Telegram Linkin
ភ្នំពេញ៖ នាព្រឹកថ្ងៃទី៣ ខែកញ្ញា ឆ្នាំ២០២៤ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា បានអនុញ្ញាតឱ្យ លោកជំទាវ ចុង មីង (Zong Ming) អនុប្រធានគណៈកម្មាធិការអចិន្ត្រៃយ៍សភាតំណាងប្រជាជនចិនក្រុងសៀងហៃ ចូលជួបសម្តែងការគួរសម និងពិភាក្សាការងារ នៅវិមានរដ្ឋសភា។ជាកិច្ចចាប់ផ្ដើមសម្តេចមហារដ្ឋសភាធិការធិបតី បានស្វាគមន៍យ៉ាងកក់ក្ដៅចំពោះវត្តមានរសប់លោកជំទាវ និងគណៈប្រតិភូនៃ សភាតំណាងប្រជាជនចិនក្រុងសៀងហៃ ដែលបានអញ្ជើញមកធ្វើទស្សនកិច្ចផ្លូវការនៅកម្ពុជា ហើយបានអញ្ជើញទៅទស្សនានៅតំបន់រម្មណីយដ្ឋានអង្គរ និងប្រាសាទអង្គរវត្តផងដែរ។ សម្ដេចបានមានប្រសាសន៍ថា ទំនាក់ទំនងកម្ពុជា-ចិន គឺជាទំនាក់ទំនងជាប្រវត្តិសាស្រ្ដដែលបានចាប់ផ្ដើមតាំងពីយូរឡុងណាស់មកហើយ តាំងពីជំនាន់ការដឹកនាំរបស់សម្ដេចព្រះរមរតនកោដ្ឋ ព្រះមហាវីរក្សត្រ រហូតដល់សម្ដេចតេជោ ហ៊ុន សែន អតីតនាយករដ្ឋមន្រ្ដី និងសម្ដេចធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជានាពេលបច្ចុប្បន្ននេះ ក៏នៅតែបន្តនៅការពង្រឹង និងពង្រីកទំនាក់ទំនងប្រទេសទាំងពីរជាប្រចាំ។ រហូតមកដល់ចប្ចុប្បន្ននេះ ទំនាក់ទំនងប្រទេសទាំងពីរបានឈានដល់ទំនាក់ទំនងមិត្តភាពដែកថែប ដែលមានភាពជាដៃគូយុទ្ធសាស្រ្ដគ្រប់ជ្រុងជ្រោយ និងតែងតែជួយគ្នាទៅវិញទៅមកនូវគ្រប់កាលៈទេសៈទាំងអស់។ សម្ដេចប្រធានរដ្ឋសភា បានបញ្ជាក់ជាថ្មីនូវជំហររបស់កម្ពុជា មិនដែលងាករេចំពោះការគាំទ្រនូវគោលនយោបាយចិនតែមួយ។ ទន្ទឹមនឹងនេះ សម្ដេចក៏បានថ្លែងអំណរគុណដល់មិត្តចិនដែលតែងតែបានជួយគាំទ្រដល់កម្ពុជា ជាពិសេសការអភិវឌ្ឍសេដ្ឋកិច្ច និងសង្គមកម្ពុជា រួមនឹងការគាំទ្រដល់ការស្ថាបនាលើហេដ្ឋារចនាសម្ព័ន្ធជាច្រើនរបស់កម្ពុជាផងដែរ។ជាការឆ្លើយតប លោកជំទាវ សភាតំណាងប្រជាជនចិនក្រុងសៀងហៃ បានថ្លែងអំណរគុណដល់សម្ដេចប្រធានរដ្ឋសភា ក៏ដូចជារដ្ឋសភាទាំងមូលដែលបានទទួលស្វាគមន៍យ៉ាងកក់ក្ដៅ និងរៀបចំទទួលបដិសណ្ឋារកិច្ចយ៉ាងល្អ ដែលធ្វើឱ្យលោកជំទាវមានអារម្មណ៍កក់ក្ដៅ ប្រៀបដូចជាមកដល់ផ្ទះរបស់បងប្អូន។ លោកជំទាវបន្តថា លោកជំទាវ និងគណៈប្រតិភូក៏បានទៅទស្សនកិច្ចនៅព្រលានយន្តហោះថ្មី ខេត្តសៀមរាបដែលសមិទ្ធផលនេះ ក៏ជានិមិត្តរូបមួយនៃទំនាក់ទំនងកម្ពុជា-ចិនផងដែរ ដែលសមិទ្ធផលនេះ ជាការរួមចំណែកក្នុងការចូលរួមអភិវឌ្ឍប្រទេសកម្ពុជារបស់ចិនតាមរយៈគោលនយោបាយខ្សែក្រវាត់ និងផ្លូវរបស់ចិន៕

សម្ដេចធិបតី ហ៊ុន ម៉ាណែត អញ្ជើញដាក់កម្រងផ្កាគោរពវិញ្ញាណក្ខន្ធសព សម្តេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល

2024/09/03 09:32:03 am        152
Facebook Telegram Linkin
ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នាព្រឹកថ្ងៃទី៣ ខែកញ្ញា ឆ្នាំ២០២៤នេះ បានអញ្ជើញ ដាក់កម្រងផ្កាគោរពវិញ្ញាណក្ខន្ធសព សម្តេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល សមាជិករដ្ឋសភា, ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង, ប្រធានគណៈកម្មាធិការជាតិរៀបចំបុណ្យជាតិ-អន្តរជាតិ និងជាអនុប្រធាន កាកបាទក្រហមកម្ពុជា ដែលបានទទួលមរណភាព នៅថ្ងៃចន្ទ ទី២ ខែកញ្ញា ឆ្នាំ២០២៤ វេលាម៉ោង ០៨:៣៥នាទីព្រឹក ក្នុងជន្មាយុ ៩៤ឆ្នាំ ដោយជរាពាធ។ក្នុងឱកាសនោះ សម្ដេចធិបតី បានគោរពឧទ្ទិសបួងសួងដល់ដួងវិញ្ញាណក្ខន្ធ សម្តេចចៅហ្វាវាំង វរវៀងជ័យ អធិបតីស្រឹង្គារ គង់ សំអុល សូមឆាប់បានយោនយកកំណើតក្នុងសុគតិភព កុំបីឃ្លៀងឃ្លាតឡើយ៕

រដ្ឋមន្រ្តីក្រសួងសុខាភិបាល ចុះពិនិត្យការផ្តល់សេវាចាក់ថ្នាំបង្ការ នៅមជ្ឈមណ្ឌលជាតិគាំពារមាតា និងទារក និងសំណេះសំណាលជាមួយមន្ត្រីរាជការនៃកម្មវិធីជាតិផ្តល់ថ្នាំបង្ការ

2024/09/02 09:20:08 pm        119
Facebook Telegram Linkin
ភ្នំពេញ ÷ ឯកឧត្តមសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាល បានអញ្ជើញចុះពិនិត្យការផ្តល់សេវាចាក់ថ្នាំបង្ការ នៅមជ្ឈមណ្ឌលជាតិគាំពារមាតា និងទារក និងសំណេះសំណាលជាមួយបុគ្គលិក មន្ត្រីរាជការនៃកម្មវិធីជាតិផ្តល់ថ្នាំបង្ការ ក្នុងគោលបំណងដើម្បីពិនិត្យវឌ្ឍនភាព និងលើកទិសដៅការងារបន្ត ក្នុងការសម្រេចឱ្យបានអត្រាគ្របដណ្តប់នៃការផ្តល់ថ្នាំបង្ការទាំង១៣មុខ របស់កម្មវិធីជាតិផ្តល់ថ្នាំបង្ការ នៅទូទាំងប្រទេស, ព្រឹកថ្ងៃទី២ ខែកញ្ញា ឆ្នាំ២០២៤ ។ក្នុងឱកាសចុះពិនិត្យ និងសំណេះសំណាល ឯកឧត្តមសាស្រ្តាចារ្យរដ្ឋមន្រ្តី បានសំដែងនូវការកោតសរសើរ ចំពោះលទ្ធផលដែលសម្រេចបានតាមរយៈការខិតខំប្រឹងប្រែងរបស់មន្រ្តីកម្មវិធីជាតិ ក្នុងការផ្តល់ការគាំទ្រ ណែនាំ និងអភិបាលដល់មន្ត្រីថ្នាក់ក្រោមជាតិទាំង ២៥ខេត្ត-រាជធានី រហូតសម្រេចបានជោគជ័យគួរជាទីមោទនៈ ក្នុងនោះលើសពីការបំបាត់បានជំងឺកាចសាហាវ និងពិការភាព ដូចជាជំងឺស្វិតដៃជើង ជំងឺកញ្ជ្រិល ជំងឺតេតាណូស របេង ជាដើម ក៏នៅមានជំងឺជាច្រើនត្រូវបានកាត់បន្ថយមកអប្បបរមា មានជំងឺរលាកថ្លើមបេ រលាកសួត រលាកខួរក្បាល និងស្រោមខួរ ។ ទន្ទឹមនឹងនោះដែរ ឯកឧត្តមសាស្រ្តាចារ្យរដ្ឋមន្រ្តី ក៏បានផ្តល់អនុសាសន៍ជាគន្លឹះមួយចំនួន ដើម្បីឱ្យដំណើរការកម្មវិធីជាតិផ្តល់ថ្នាំបង្ការកាន់តែមានប្រសិទ្ធភាពបន្ថែមទៀត ដូចជា៖១) ត្រូវរៀបចំស្នូលនៃចក្ខុវិស័យសម្រាប់ការបង្ការជំងឺទាំង១២មុខ ដោយផ្អែកលើចំណេះ ជំនាញ គុណតម្លៃពីថ្នាក់ជាតិ រហូតដល់មូលដ្ឋានភូមិ-ឃុំ។២) អនុវត្តការងារឲ្យមានគុណភាព ដោយរលូន និងមានឯកភាពគ្នាគ្រប់ទីកន្លែង ទាំងថ្នាក់ជាតិរហូតដល់មូលដ្ឋានភូមិ-ឃុំ។៣) ដើម្បីជួយដល់សុខភាពស្ត្រី ទារក កុមារ និងប្រជាពលរដ្ឋគ្រប់រូប គោលដៅចម្បងរបស់កម្មវិធីផ្តល់ថ្នាំបង្ការគឺ ធ្វើឲ្យសម្រេចបាននូវអត្រាគ្របដណ្តប់ថ្នាំបង្ការទាំង១២មុខ ប្រមាណ១០០% តាមរយៈការបង្កើនការផ្តល់ថ្នាំបង្ការនៅនឹងមន្ទីរពេទ្យ មណ្ឌលសុខភាព ដោយបង្កើនការចុះតាមដានស្រាវជ្រាវរក និងផ្តល់ថ្នាំបង្ការដល់ទារក និងកុមារដែលមិនទាន់បានទទួល គ្រប់ទីកន្លែង ពិសេសនៅតំបន់ដាច់ស្រយាល។៤) បង្កើនការអប់រំសុខភាពជូនប្រជាពលរដ្ឋ ដោយពន្យល់អំពីផលប្រយោជន៍នៃការផ្តល់ថ្នាំបង្ការជំងឺទាំង១២មុខ និងផលវិបាកនៃការឆ្លងជំងឺ ពិការភាព ឬស្លាប់ក្នុងករណីដែលមិនព្រមទទួលថ្នាំបង្ការ។៥) ការរៀបចំផែនការឆ្នាំ ផែនការរំកិល៣ឆ្នាំ ទិសដៅនាពេលអនាគតសម្រាប់ការផ្តល់ថ្នាំបង្ការ និងផែនការពង្រីកការផ្តល់ថ្នាំបង្ការជំងឺផ្សេងៗបន្ថែមទៀត។ ៦) ពង្រឹងកិច្ចសហការលើកទឹកចិត្តមន្ត្រី បុគ្គលិកសុខាភិបាល ជាមួយអាជ្ញាធរមូលដ្ឋាន ភូមិ ឃុំ បង្កើនការផ្សព្វផ្សាយអំពីសារៈសំខាន់នៃការចាក់ថ្នាំបង្ការជំងឺ។ជាទីបញ្ចប់ ឯកឧត្តមសាស្រ្តាចារ្យរដ្ឋមន្រ្តី សូមថ្លែងនូវការអរគុណដល់បុគ្គលិកនៃកម្មវិធីផ្តល់ថ្នាំបង្ការទាំងអស់ និងត្រូវមានស្មារតីរួបរួមគ្នា ចេះជួយគ្នា សាមគ្គីភាពគោរពវិន័យការងារ ដើម្បីជាប្រយោជន៍រួមធានា ក្នុងការបម្រើសេវាជូនដល់ប្រជាពលរដ្ឋ ប្រកបដោយគុណភាព សុវត្ថិភាព ប្រសិទ្ធភាព ស័ក្តិសិទ្ធភាព និងសមធម៌ ដើម្បីឈានទៅសម្រេចបាននូវការគ្របដណ្តប់សុខភាពជាសកល។ក្នុងការចុះពិនិត្យនេះដែរ ក៏មានការអញ្ជើញចូលរួមអមដំណើរដោយ ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការ ទីប្រឹក្សាក្រសួង ទទួលបន្ទុក និងលោក លោកស្រី នាយកមជ្ឈមណ្ឌលជាតិគាំពារមាតា និងទារក ប្រធានឃ្លាំងឱសថកណ្តាលនៃក្រសួងសុខាភិបាល៕អត្ថបទ រដ្ឋា

អ្នកវិភាគនៅកម្ពុជាមិនគាំទ្រការធ្វើបាតុកម្មនៅកូរ៉េដែលចង់ផ្តួលរំលំរដ្ឋាភិបាលក្រោមលេសCLV

2024/09/02 07:01:09 pm        264
Facebook Telegram Linkin
ភ្នំពេញ ៖ អ្នកស្រាវជ្រាវ និងអ្នកវិភាគនយោបាយនៅកម្ពុជា បានបដិសេដ្ឋមិនគាំទ្រចំពោះសកម្មភាពក្រុមឧទ្ទាមក្រៅច្បាប់ ដឹកនាំដោយជនក្បត់ជាតិ ៣ជំនាន់ សម រង្ស៊ី បម្រើនយោបាយបរទេសបំផុសបំផុលធ្វើបាតុកម្មនៅកូរ៉េខាងត្បូង និងបណ្តាប្រទេសផ្សេងៗ ក្នុងចេតនាធ្វើបដិវត្តន៍ផ្តួលរំលំរាជរដ្ឋាភិបាលស្របច្បាប់ ក្រោមលេសកិច្ចសហប្រតិបត្តិការ CLV នាំឱ្យបាត់បងទឹកដី។ លោកបណ្ឌិត យង់ ពៅ អ្នកវិភាគភូមិសាស្ត្រនយោបាយនៅកម្ពុជា មានប្រសាសន៍ថា ការធ្វើបាតុកម្មពីក្រៅប្រទេសដើម្បីផ្តួលរំលំរាជរដ្ឋាភិបាលជាការនាំឱ្យប្រទេសជាតិច្របូកច្របល់វិលចូលសង្គ្រាមស៊ីវិលឡើងវិញ បើសិនជាបដិវត្តនោះបានសម្រេច។ មួយវិញទៀត សកម្មភាពផ្តួលរំលំតាមបែបបដិវត្តពណ៌នេះ មានន័យថា ក្រុមប្រឆាំងមានចារិកនយោបាយមិនគាំទ្រការដឹកនាំតាមបែបប្រជាធិបតេយ្យ។  លោកថ្លែងថា៖«នេះជាអ្វីដែលនាំឱ្យប្រទេសច្របូកច្របល់ កើតមានកលិយុគឡើងវិញ កើតសង្គ្រាមស៊ីវិលឡើងវិញ ដូចដែលខ្ញុំលើកឡើងខាងដើម ប៉ុន្តែទោះយ៉ាងណារាជរដ្ឋាភិបាលត្រូវតែមានកាតព្វកិច្ចការពារនូវសមិទ្ធផលទាំងឡាយ ការពារនូវលទ្ធិប្រជាធិបតេយ្យ របស់ព្រះរាជាណាចក្រកម្ពុជា ការពារច្បាប់រដ្ឋធម្មនុញ្ញ មិនអាចឱ្យការធ្វើបាតុកម្មហ្នឹងបានជោគជ័យទេ»។ ទន្ទឹមនេះលោកបណ្ឌិត គិន ភា ប្រធានវិទ្យាស្ថានទំនាក់ទំនងអន្តរជាតិ នៃរាជបណ្ឌិត្យសភាកម្ពុជា លើកឡើងថា សកម្មភាពរបស់ក្រុមឧទ្ទាមជ្រុលនិយម ដែលបំភ្លៃការពិតដើម្បីអូសទាញពលករធ្វើបាតុកម្មក្រៅប្រទេសនោះ មានបំណងធំៗ២ គឺទី១ ដើម្បីប្រមូលលុយសម្រាប់ជាប្រយោជន៍របស់ក្រុមខ្លួន ចំណែកទី២គឺធ្វើបដិវត្តន៍ពណ៌ផ្តួលរំលំរាជរដ្ឋាភិបាលស្របច្បាប់ ដែលកើតចេញពីឆន្ទៈរបស់ពលរដ្ឋដោយការបោះឆ្នោត។ លោកថ្លែងថា៖«ចំណុច២ហ្នឹងគឺគ្រាប់គ្រាន់ ដែលអាចនិយាយថាពួកនេះក្បត់ទាំងប្រយោជន៍ប្រជាជន ក្បត់ទាំងប្រយោជន៍ជាតិ ដែលដើរបញ្ច្រាសចរន្តនៃដំណើរការប្រជាធិបតេយ្យភាវូបនីយកម្ម។ប្រសិនបើគេនិយាយពីការផ្លាស់ប្តូរ នៅក្នុងសង្គមប្រជាធិបតេយ្យ គេអត់អាចប្រើកម្លាំងបះបោរ ឬការបង្កចលាចល ឬក៏ការអំពាវនាវកងកម្លាំងប្រដាប់អាវុធ ឱ្យផ្តួលរំលំរដ្ឋាភិបាលទេ គេត្រូវតែធ្វើការផ្លាស់ប្តូរតាមរយៈសន្លឹកឆ្នោត»។ លោកបន្តថា សម្រាប់បងប្អូនដែលជ្រុលខ្លួនលង់ជឿតាមការអូសទាញ របស់ក្រុមជ្រុលនិយមអាចប្រញាប់ដកខ្លួនចេញវិញ ដើម្បីសេចក្តីសុខខ្លួនឯង ក្រុមគ្រួសារ និងសង្គមជាតិទាំងមូល ព្រោះក្រុមប្រឆាំងទាំងនោះគ្មានបំណងនាំមកនូវប្រជាធិបតេយ្យ ការអភិវឌ្ឍ និងសុខសន្តិភាពសម្រាប់ប្រទេសជាតិនោះទេ។ ចំណែកលោកបណ្ឌិត ឈត ប៊ុនថង អ្នកស្រាវជ្រាវ និងជាអ្នកទស្សនៈវិជ្ជា នៃរាជបណ្ឌិត្យសភាកម្ពុជា ថ្លែងថា ការធ្វើបាតុកម្មអហិង្សាគឺជាសិទ្ធិពលរដ្ឋដែលមានចែងក្នុងច្បាប់ ប៉ុន្តែបើការធ្វើបាតុកម្ម ឬកូដកម្មនោះប្រែក្លាយពីបាតុកម្មស្របច្បាប់ ទៅបដិវត្តពណ៌ផ្តួលរំលំរដ្ឋាភិបាល បង្កចលាចលធ្វើឱ្យសង្គមវឹកវរនោះ គឺជារឿងខុសច្បាប់ ដែលអាជ្ញាធរមានសិទ្ធិគ្រប់គ្រាន់ក្នុងការបង្ក្រាប។ លោកថ្លែងថា៖«បើអាជ្ញាធរពាក់ព័ន្ធរកឃើញថា កូដកម្មមានបំណងទុច្ចរិត ហើយបំណងនៃបាតុកម្មនោះផ្ទុយពីច្បាប់អនុញ្ញាត អាជ្ញាធរមានសិទ្ធិគ្រប់គ្រាន់នៅក្នុងការបង្ក្រាប មិនអាចធ្វើឱ្យប្រទេសមានចលាចល មានសង្គ្រាមបះបោរ ដូចបណ្តាប្រទេសផ្សេងៗ ដូចជានៅ បង់ក្លាដេស ស៊ីរី លីប៊ីជាដើម»៕

សហជីពនៅកម្ពុជាថ្កោលទោសបាតុកម្មនៅកូរ៉េដែលចង់ផ្តួលរំលំរដ្ឋាភិបាលក្រោមលេសCLV

2024/09/02 05:15:27 pm        758
Facebook Telegram Linkin
សហជីពនៅកម្ពុជាចេញថ្កោលទោសចំពោះសកម្មភាពក្រុមឧទ្ទាមក្រៅច្បាប់ ដឹកនាំដោយ​ជន​ក្បត់​ជាតិ ៣ជំនាន់ ធ្វើបាតុកម្មនៅកូរ៉េខាងត្បូង និងបណ្តាប្រទេសផ្សេងៗ មានចេតនា​ធ្វើ​បដិវត្តន៍​ផ្តួល​រំលំ​រាជ​រដ្ឋាភិបាលស្របច្បាប់ ក្រោមលេសកិច្ចសហប្រតិបត្តិការ CLV នាំឱ្យបាត់បងទឹកដី។ លោក ហង្ស រ៉ាវី ប្រធានសហភាពសហជីពរក្សាសិទ្ធិកម្មករកម្ពុជា បានថ្កោល​ទោស​ចំពោះ​បាតុកម្ម​ក្បត់​ជាតិ​នៅប្រទេសកូរ៉េខាងត្បូង ដែលដឹកនាំដោយជន​ក្បត់​ជាតិ ៣ជំនាន់ កាលពីថ្ងៃទី១ ខែកញ្ញា។ មេឧទ្ទាមនេះបានយករឿង CLV ទៅបំភ្លៃការពិតប្រមូលកម្លាំងពលករ ដោយ​វិធី​សាស្ត្រ​ខ្ចី​កម្លាំង​ពលករធ្វើបាតុកម្មប៉ុន្តែការពិតដើម្បីអនុវត្តផែនការផ្តួលរំលំរាជរដ្ឋាភិបាលស្របច្បាប់។ ជាក់​ស្តែងបាតុករម្នាក់បានប្រកាសពីផែនការផ្តួលរំលំរាជរដ្ឋាភិបាលកម្ពុជា ដោយស្រែក​លាប​ពណ៌​ថា ទម្លាក់របបផ្តាច់ការទើបទឹកដីខ្មែរស្ថិតនៅគង់វង្សជាអមតៈ។លោកថ្លែងថា «ការចូលរួមសម្តែងមតិទាមទារឬក៏ការតវ៉ាណាមួយគឺជាសិទ្ធិ ប៉ុន្តែការចូលរួម​ក្នុង​ចេតនា​ផ្តួល​រំលំ រាជរដ្ឋាភិបាលតាមការធ្វើបាតុកម្ម ឬកុបកម្ម គឺជារឿងខុសច្បាប់ទាំងស្រុង ហើយ​បង​ប្អូន​ពលករឬជនណាក៏ដោយ ដែលចូលរួម​សកម្មភាព​ធ្វើ​បាតុកម្ម​ដើម្បី​ផ្តួល​រំលំ​រដ្ឋាភិបាល​ស្រប​ច្បាប់កើតចេញពីការបោះឆ្នោតគឺជាជនក្បត់ជាតិ ខុសច្បាប់ទាំងស្រុង»។ ទន្ទឹមនេះលោក សំ សឿន ប្រធានសហភាពពលកម្មជាតិកម្ពុជា ក៏បាន បានថ្លែងថ្កោល​ទោស​យ៉ាង​ដាច់អហង្ការចំពោះសកម្មភាពបាតុកម្មផ្តួលរំលំរាជរដ្ឋាភិបាលដឹកនាំដោយជនក្បត់ជាតិ៣ជំនាន់ សម រង្ស៊ី។ លោកថា ការធ្វើបាតុកម្មនេះ គ្មានគោលបំណងស្នើសុំរាជរដ្ឋាភិបាលដកខ្លួនចេញពី CLV នោះទេ ប៉ុន្តែជាការបញ្ជាក់ក្នុងន័យច្បាស់ថា ជាបាតុកម្មផ្តួលរំលំរាជរដ្ឋាភិបាលស្របច្បាប់តើចេញពីការបោះឆ្នោត មានបំណងចង់ឱ្យមានចលាចលក្នុងសង្គម បែកបាក់ជាតិ ចេតនាបង្កាត់ភ្លើងសង្គ្រាមជាថ្មី។ លោកថ្លែងថា៖«ក្នុងនាមសហជីពខ្ញុំសូមធ្វើការថ្កោលទោសយ៉ាងដាច់អហង្ការ ចំពោះក្រុមជ្រុលនិយមក្បត់ជាតិ ជាពិសេស គឺជនក្បត់ជាតិ៣ជំនាន់ សម រង្ស៊ី និងក្រុមចលនាបាតុកម្មនៅកូរ៉េដែលមានចេតនាធ្វើបដិវត្តន៍ពណ៌ ផ្តួលរំលំរាជរដ្ឋាភិបាលស្របច្បាប់។ សូមអាជ្ញាធរមានសមត្ថកិច្ចចាត់វិធានការឱ្យបានម៉ឺងម៉ាត់ចំពោះជនជ្រុលនិយមក្បត់ជាតិទាំងអស់នេះ»។ ចំណែកលោក អ៊ុន ដារ៉ា ប្រធានសហភាពសហជីពកម្ពុជាពន្លឺកម្មករ ថ្លែងថា មិនគាំទ្រដាច់ខាត និងថ្កោលទោសយ៉ាងដាច់អហង្ការ ចំពោះសកម្មភាពបំផុលបំផុសឱ្យពលករស្លូតត្រង់ចូលរួមបាតុកម្មក្បត់ជាតិ មានបំណង់ធ្វើឱ្យអស្ថេរភាពសង្គម អាប់អោនកេរ្តិ៍ឈ្មោះកិត្តិយសជាតិ។  លោកថ្លែងថា៖«សូមបងប្អូនយើងកុំលង់កុំឈ្លក់ជាមួយជនអគតិមួយចំនួនដែលកំពុងតែធ្វើឱ្យប្អូន ខាតផលប្រយោជន៍ខាតពេលវេលា ហើយខ្ញុំសូមថ្កោលទោសចំពោះជនដែលបាននឹងកំពុងធ្វើបាតុកម្មនោះ វាជាបាតុកម្មមួយមិនត្រឹមត្រូវតាមច្បាប់ ហើយជាបាតុកម្មក្បត់ជាតិ»។សហជីពនៅកម្ពុជា បានអំពាវនាវដល់បងប្អូនក្រៅប្រទេស ជាពិសេសនៅកូរ៉េខាងត្បូងត្រូវពិចារណាឱ្យ បានច្បាស់បើមិនចង់ឱ្យខ្លួនឯងក្លាយទៅជាអ្នកចូលរួមចលនាក្បត់ជាតិ កុំធ្វើធ្វើសកម្មភាព កុំដើរតាមការអូសទាញពីក្រុមឧទ្ទាមក្រៅច្បាប់។បើបងប្អូនចូលរួមជាមួយនឹងសកម្មភាពទាំងនោះ ចៀសមិនផុតពីចូលរួមនូវសកម្មភាពក្បត់ជាតិ និងត្រូវទទួលទោសចំពោះមុខច្បាប់៕

ពលរដ្ឋកម្ពុជាថ្កោលទោសបាតុកម្មនៅកូរ៉េដែលចង់ផ្តួលរំលំរដ្ឋាភិបាលក្រោមលេស CLV

2024/09/02 04:53:03 pm        828
Facebook Telegram Linkin
ប្រជាពលរដ្ឋកម្ពុជាបានថ្កោលទោសចំពោះសកម្មភាពក្រុមឧទ្ទាមក្រៅច្បាប់ ដឹកនាំ​ដោយ​ជន​ក្បត់​ជាតិ ៣ជំនាន់ ធ្វើបាតុកម្មនៅកូរ៉េខាងត្បូង និងបណ្តាប្រទេសផ្សេងៗ ដែលមាន​ចេត​នា​ធ្វើ​បដិវត្តន៍​ផ្តួល​រំលំ​រាជរដ្ឋាភិបាលស្របច្បាប់ ក្រោមលេសកិច្ចសហប្រតិបត្តិការ CLV នាំឱ្យបាត់បងទឹកដី។ លោក យ៉ោក សុទ្ធី នាយកវិទ្យាស្ថានជាតិបណ្តុះបណ្តាលបច្ចេកទេស NTTI ថ្លែងថា ក្នុង​នាម​ប្រជាពលរដ្ឋ​ម្នាក់រស់នៅក្នុងប្រទេសដែលកំពុងមានការអភិវឌ្ឍលើគ្រប់វិស័យ លោកមិនគាំទ្រ​ដាច់​ខាត និងថ្កោលទោសយ៉ាងដាច់អហង្ការចំពោះសកម្មភាពបំផ្លាញរាជរដ្ឋាភិបាល ក្នុង​បំណង​ធ្វើ​ឱ្យ​ប្រទេស​ជាតិ​វឹកវរ ចលាចល បាត់បង់សន្តិភាព។ លោកថ្លែងថា «ក្នុងនាមខ្ញុំជាមន្ត្រីរាជការ ហើយក៏ក្នុងនាម​ខ្ញុំ​ជា​ប្រជាពលរដ្ឋខ្មែរ​ម្នាក់​ដែល​កំពុ​ង​រស់​នៅ​ស្រុក​ខ្មែរ គឺខ្ញុំមិនគាំទ្រ ហើយខ្ញុំសូមថ្កោលទោសទាំងស្រុងចំពោះទង្វើទាំងអស់នេះ ព្រោះ កាល​ណា​ញុះញង់ធ្វើឱ្យមានបដិវត្តន៍ពណ៌ ធ្វើឱ្យសង្គ្រាមស៊ីវិលកើតឡើងចៀសមិនរួចទេ បើ​សិន​ជា​រឿងហ្នឹងទប់ស្កាត់មិនបាន»។ លោកនាយកវិទ្យាស្ថាន NTTI បញ្ជាក់ថា បាតុកម្មនៅកូរ៉េខាងត្បូង គឺជន​ក្បត់​ជាតិ ៣ជំនាន់ បំភ្លៃ​ការ​ពិត​ធ្វើ​ឱ្យបងប្អូនពលករយល់ច្រឡំថា កិច្ចសហប្រតិបត្តិការ CLV នាំឱ្យបាត់បង់ទឹកដី ប៉ុន្តែ​ការ​ពិត​ពួកគេប្រើកម្លាំងពលករដើម្បីធ្វើបដិវត្តន៍ផ្តួលរំលំរដ្ឋាភិបាលកើតចេញពីការបោះឆ្នោត ធ្វើឱ្យ​ពលរដ្ឋ​ដែល​មិនបានគិតគូរច្បាស់លាស់ ធ្លាក់ខ្លួនក្លាយជាជនក្បត់ជាតិជាមួយក្រុមឧទ្ទាមទាំងនោះ ដោយមិនដឹងខ្លួន។ លោក តែប តុន ប្រជាពលរដ្ឋនៅរាជធានីភ្នំពេញ បានលើកឡើងថា បាតុកម្មនៅកូរ៉េខាងត្បូង ក៏ដូចជា​បណ្តា​ប្រទេសផ្សេងៗគឺមានក្រុមប្រឆាំងនៅពីក្រោយខ្នង ដឹកនាំ ដោយ ជន​ក្បត់​ជាតិ ៣ជំនាន់ ដែលមានគោលបំណងចង់ផ្តួលរំលំរដ្ឋាភិបាលស្របច្បាប់ មិនមែនជារឿង​ជំទាស់​ការ​អភិវឌ្ឍ​នៅ​តំបន់ត្រីកោណនោះទេ។ លោកនិយាយថា «ចំពោះខ្ញុំផ្ទាល់ សូមថ្កោលទោសយ៉ាង​ដាច់​អហង្ការ​ចំពោះ​អ្នក​ដែល​បញ្ជា​នៅ​ពី​ក្រោយ​ខ្នង និងអ្នកដែលចូលរួមមួយក្តាប់តូចក្នុងគោលបំណងធ្វើឱ្យរាជរដ្ឋាភិបាលដួលរលំ ហើយ​រឿង​នេះ បើរាជរដ្ឋាភិបាលមិនខំប្រឹងទប់ស្កាត់ទេ អាចក្លាយជារឿងសង្គ្រាមស៊ីវិលរ៉ាំរៃក្នុងស្រុក ដែល​ធ្វើឱ្យប្រជាជនទាំងអស់មិនអាចរស់នៅបានសុខស្រួលនោះទេ»។ ប្រជាពលរដ្ឋ​ម្នាក់​ទៀតគឺ លោក ឌិន សំអាត បានលើកឡើងថា សកម្មភាពបាតុកម្ម​នៅ​កូរ៉េ​ខាង​ត្បូង គឺជាការប្រឆាំងចង់ផ្តួលរំលំរាជរដ្ឋាភិបាល ក្រោមលេស CLV ដែលមិនអាចទទួលយកបាន។ ពលករនៅក្រៅប្រទេសគួរតែមានការគិតគូរឱ្យបានច្បាស់ មុននឹងចូលរួមសកម្មភាពទាំងនោះ ព្រោះ​ក្បាលម៉ាស៊ីនដឹកនាំបាតុកម្ម ធ្វើឡើងដើម្បីតែផលប្រយោជន៍ ពោលគឺគេ​យក​កម្លាំង​ពលករ​ធ្វើ​បដិវត្តន៍ពណ៌ផ្តួលរំលំរដ្ឋាភិបាល និងដើម្បីប្រមូលលុយប៉ុណ្ណោះ។ លោកថ្លែងថា«ក្នុងនាមប្រជាពលរដ្ឋម្នាក់ និងក្រុមគ្រួសារទាំងមូល ខ្ញុំសុំថ្កោលទោស​ចំពោះ​ពួក​គាត់​តែម្តង ជាពិសេសគឺក្បាលម៉ាស៊ីនដឹកនាំធ្វើកូដកម្មហ្នឹង គឺសុំថ្កោលទោសគាត់តែម្តង បើ​សិន​ណា​ជា​រាជរដ្ឋាភិបាលមានច្រកណាដែលអនុវត្តច្បាប់ពួកគាត់ឱ្យវាសម អាហ្នឹងគួរតែអនុវត្ត អត់​អាច​បណ្តោយចឹងបានទេ»៕

សាលារៀនសុវណ្ណភូមិ បើកបវេសនកាលឆ្នាំសិក្សាថ្មី ២០២៤-២០២៥ លើកម្មវិធី​ចំណេះ​ទូទៅខ្មែរ និងអន្តរភាសា IEP

2024/09/02 04:32:02 pm        877
Facebook Telegram Linkin
លោកឧកញ៉ា ជា ធីឡាយ អគ្គនាយក និងស្ថាបនិកនៃស្ថាប័នអប់រំ អ៊ិន ធី ស៊ី គ្រុប បាន​អញ្ជើញ​បើក​បវេសនកាលសាលារៀនសុវណ្ណភូមិ ឆ្នាំសិក្សាថ្មី២០២៤-២០២៥ កម្មវិធីចំណេះទូទៅខ្មែរ និង​អន្តរភាសា IEP និងប្រគល់បណ្ណសរសើរ និងរង្វាន់ដល់សិស្សជ័យលាភី, នៅព្រឹកថ្ងៃទី០១ ខែ​កញ្ញា ឆ្នាំ២០២៤។ក្នុងពិធីបើកបវេសនកាលឆ្នាំសិក្សាថ្មីនេះ មានការអញ្ជើញចូលរួមពីលោកជំទាវ យូ ឃីម ធីឡាយ និង​លោក ឃឹម ផុន ប្រធាននាយកប្រតិបត្តិ អ៊ិន ធី ស៊ី គ្រុប និងតំណាងដៃគូសហការ ថ្នាក់ដឹកនាំ លោក​គ្រូ អ្នកគ្រូ បុគ្គលិក គ្រប់លំដាប់ថ្នាក់ និងក្មួយៗ កូនៗ សិស្សានុសិស្ស​សាលា​រៀន​សុវណ្ណភូមិ​។កញ្ញា ឡុង កែនណារ៉ូ ប្រធានផ្នែកគ្រប់គ្រងកម្មវិធីអន្តរភាសា ខ្មែរ-អង់គ្លេស បានឲ្យដឹងថា កម្មវិធី​អន្តរ​ភាសា ខ្មែរ-អង់គ្លេស(IEP) គឺជាកម្មវិធីសិក្សាពេញមួយថ្ងៃចាប់ពីកម្រិតមត្តេយ្យសិក្សា ដល់​ថ្នាក់​ទី១២ ដែលមានកម្មវិធីសិក្សាខ្មែរថ្នាក់ជាតិ កម្មវិធីអង់គ្លេសកំរិតស្តង់ដារអន្តរជាតិ និង​កម្ម​វិធី​ភាសា​ចិន។ យើងមានគ្រូថ្នាក់ជាតិ និងគ្រូបរទេស ជាគ្រូបន្ទុកថ្នាក់ផ្ទាល់ ប្រកបដោយវិជ្ជាជីវៈ និង​គរុកោសល្យដែលពោពេញដោយជំនាញច្បាស់លាស់ និងមានឆន្ទៈ​ក្នុង​ការ​ពង្រឹង​ការ​សិក្សា​របស់​សិស្សានុសិស្ស។ សិស្សនុសិស្សបញ្ចប់ការសិក្សាក្នុងកម្មវិធីអន្តរភាសា IEP ទទួលបានសញ្ញាបត្រ និងទទួល​ស្គាល់ដោ​យ​ស្តង់ដារជាតិ និងអន្តរជាតិ។ ក្នុងឆ្នាំសិក្សាកន្លងមកនេះ កម្មវិធីអន្តរភាសា IEP បាន​ផ្តល់​សេវា​អប់រំស្តង់ដារអន្តរជាតិ ប្រកបដោយគុណភាពក្នុងទីតាំងទាំង១៥ នៃសាលា​រៀន​សុវណ្ណ​ភូមិ ដែលមានចំនួនសិស្ស ប្រមាណ ១៥០០នាក់។ ជាមួយគ្នានោះដែរលោក ម៉ោញ សុផាត នាយកការិយាល័យសិក្សាចំណេះទូទៅខ្មែរ បាន​លើក​ឡើង​ថា ស្ថិតិសិស្សនៅដើមឆ្នាំ២០២៤-២០២៥នេះ សិស្ស​ចំណេះ​ទូទៅ​ខ្មែរ​សរុប​មាន​ចំនួន​ ៣២.២៩៦នាក់ សិស្សមត្តេយ្យសិក្សាសរុបមាន ៥.៥២១នាក់ សិស្សបឋមសិក្សាមានចំនួន ១៥.៨៧៩នាក់ និងសិស្សមធ្យមសិក្សា ពីថ្នាក់ទី៧ ដល់ទី១២មានចំនួន ១០.៨៩៦នាក់ បើធៀ​ប​នឹង​ដើម​ឆ្នាំសិក្សា២០២៣-២០២៤ ដែលសិស្សសរុប មានចំនួន ២៩.២៥៩នាក់ នោះមានន័យថាសិស្សមានការកើនឡើងចំនួន ៣.០៣៧នាក់។ ចំពោះលទ្ធផលសិស្សថ្នាក់ទី៩ និងទី១២ បួនឆ្នាំកន្លងមកនេះ ឆ្នាំសិក្សា២០២០-២០២១ ថ្នាក់ទី៩ និទ្ទេសល្អ ៣៨១នាក់ ចំណែកថ្នាក់ទី១២ និទ្ទេស A ៤៦នាក់, ឆ្នាំសិក្សា២០២១-២០២២ និទ្ទេសល្អ ១៩២នាក់ ចំណែកថ្នាក់ទី១២ និទ្ទេស A ៤៩នាក់, ឆ្នាំសិក្សា២០២២-២០២៣ និទ្ទេសល្អ ១៥១នាក់ ចំណែក​ថ្នាក់ទី១២ និទ្ទេស A ៧៥នាក់ និងឆ្នាំសិក្សា២០២៣-២០២៤ និទ្ទេសល្អ២១០នាក់។ជាចុង​ក្រោយក្នុងនាមលោកឧកញ៉ា ជា ធីឡាយ ស្ថាបនិក និងជាអ្នក​ទទួល​ខុស​ត្រូវ​រួម​រប​ស់​សាលា​រៀន​សុវណ្ណភូមិ នឹងចូលរួមលើកកម្ពស់គុណភាពអប់រំរបស់សាលារៀនសុវណ្ណភូមិ ធ្វើ​យ៉ាង​ណា​ឱ្យក្មួយៗ ប្អូនៗសិស្សានុសិស្ស ទទួលបាននូវវិជ្ជា សម្បទា បំណិនសម្បទា ចរិយាសម្បទា និង​កាយ​សម្បទាពេញលេញ ដើម្បីឱ្យពួកគាត់ក្លាយជាពលរដ្ឋ ពេញលេញ​ប្រកប​ដោយ​សេចក្តី​ថ្លៃថ្នូរ​។លោកឧកញ៉ា ជា ធីឡាយ សូមសម្តែងការកោតសរសើរ និងវាយតម្លៃខ្ពស់ ចំពោះ​លោក​ប្រធាន​នាយក​ប្រតិបត្តិ ថ្នាក់ដឹកនាំ លោកគ្រូ-អ្នកគ្រូ និងបុគ្គលិកសិក្សាគ្រប់ផ្នែកទាំងអស់ ដែលបាន​ខិតខំ​ប្រឹង​ប្រែង យកចិត្តទុកដាក់យ៉ាងសកម្ម ទាំងកម្លាំងកាយ កម្លាំងចិត្ត និងស្មារតី​ទទួល​ខុស​ត្រូវ​ ក្នុងការបំពេញការងារ ស្របតាមចក្ខុវិស័យ និងបេសកកម្មរបស់ស្ថាប័នទាំងមូល៕ អត្ថបទ រដ្ឋា

ព្រះមហាក្សត្រ ចេញព្រះរាជក្រឹត្យតែងតាំងមុខតំណែងសម្តេចមហាមន្ត្រី គុយ សុផល ជា «ឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង»

2024/09/02 04:09:27 pm        699
Facebook Telegram Linkin
ភ្នំពេញ៖ ព្រះករុណា ព្រះបាទ សម្តេចព្រះ បរមនាថ នរោត្តម សីហមុនី ព្រះមហាក្សត្រនៃកម្ពុជា នៅថ្ងៃទី០២ ខែកញ្ញា ឆ្នាំ២០២៤នេះ បានចេញព្រះរាជក្រឹត្យតែងតាំងមុខតំណែង សម្តេចមហាមន្ត្រី គុយ សុផល ជាឧបនាយករដ្ឋមន្ត្រី និងជារដ្ឋមន្ត្រីក្រសួងព្រះបរមរាជវាំង ជំនួសសម្តេចចៅហ្វាវាំង គង់ សំអុល ដែលទទួលមរណភាព។ការត្រាស់បង្គាប់តែងតាំងនេះ ធ្វើឡើងបន្ទាប់ពីមានសំណើក្រាបបង្គំទូលថ្វាយរបស់សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ។ខាងក្រោមនេះជាព្រះរាជក្រឹត្យព្រះមហាក្សត្រ៖

បណ្ដាញសង្គម

ព័ត៌មានថ្មីៗ

កាកបាទក្រហមកម្ពុជា ទទួលថវិកាពីសមាគមឧកញ៉ាកម្ពុជាចំនួន ១,០០៩,៩៩៩ ដុល្លារ អាមេរិក ក្នុងទិវា ៨ឧសភា ២០២៦
06/13/2026 05:06 PM
Facebook Telegram Linkin
យន្តហោះចម្បាំងស៊ុយអែត ស្ទាក់យន្តហោះប្រយុទ្ធ​របស់​រុស្ស៊ី នៅជិតព្រំដែន
06/13/2026 05:06 PM
Facebook Telegram Linkin
លីបង់រាយការណ៍ពីការវាយប្រហាររបស់អ៊ីស្រាអែលនៅភាគខាងត្បូង ក្រោយ​មាន​ការព្រមានជម្លៀស
06/13/2026 05:06 PM
Facebook Telegram Linkin
ប៉ាគីស្ថាន និងអេហ្ស៊ីបស្វាគមន៍វឌ្ឍនភាព រវាងអាមេរិក និងអ៊ីរ៉ង់ ដោយសង្ឃឹមមាន​កិច្ចព្រមព្រៀងសន្តិភាពដំបូង
06/13/2026 05:06 PM
Facebook Telegram Linkin
ចំនួនអ្នកស្លាប់ដោយសារ​​រញ្ជួយដី នៅហ្វីលីពីន កើនឡើងដល់ ៦១នាក់ ខណៈប្រតិបត្តិការ​ជួយ​សង្គ្រោះកំពុង​បន្ត​
06/13/2026 05:06 PM
Facebook Telegram Linkin
នាយករដ្ឋមន្ត្រីឥណ្ឌា លោក Modi ចាប់ផ្តើមដំណើរទស្សនកិច្ចផ្លូវការទៅកាន់បារាំង និងស្លូវ៉ាគី
06/13/2026 05:06 PM
Facebook Telegram Linkin
[UPDATE] គ្រោះថ្នាក់ធ្លាក់យន្តហោះរបស់កងទ័ពអាកាសឥណ្ឌា មាន​អ្នកស្លាប់ ៥នាក់​
06/13/2026 05:06 PM
Facebook Telegram Linkin
យន្តហោះដឹកជញ្ជូនយោធាធ្លាក់ នៅឥណ្ឌា ខណៈចំនួនអ្នកស្លាប់ និងរបួស មិន​ទាន់​ដឹង​នៅ​ឡើយទេ
06/13/2026 04:06 PM
Facebook Telegram Linkin
ឱកាសការងារ ៣៥៥០កន្លែង ជាមួយនឹងអត្ថប្រយោជន៍ ប.ស.ស. និងកម្មវិធី TVET ត្រូវ​បាននាំ​យក​ទៅផ្សព្វផ្សាយជូន​ពលរដ្ឋដល់មូលដ្ឋានខេត្តសៀមរាប
06/13/2026 04:06 PM
Facebook Telegram Linkin
វិស័យរដ្ឋបញ្ជាក់ពីការ​ប្តេជ្ញាចិត្តក្នុងការជួយពង្រឹងការយល់ដឹងអំពីច្បាប់ និងនីតិវិធីគយដល់វិស័យ SMEs
06/13/2026 04:06 PM
Facebook Telegram Linkin

អាស័យដ្ឋាន

address ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
phone ទូរស័ព្ទ:(+855)61 999 877

ផែនទី

ទាញយកកម្មវិធី
© 2020 BTV NEWS . All Rights Reserved.