BTV NEWS

កម្ពុជា-ឡាវ បានប្រែក្លាយពីទំនាក់ទំនងទ្វេភាគីមកជាដៃគូយុទ្ធសាស្ត្រគ្រប់ជ្រុងជ្រោយ ដើម្បីការរីកចម្រើនប្រទេសទាំងពីរ

ឃាត់ខ្លួនជនជាតិចិន៤នាក់ ធ្វើសកម្មចូលបន្លំលួចលុយតាមទីតាំងដូរប្រាក់វីងជាច្រើនកន្លែង ក្នុងរាជធានីភ្នំពេញ

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាអធិបតីដ៏ខ្ពង់ខ្ពស់ចូលរួម «ពិធីបើកយុទ្ធនាការ ១ម៉ឺនរៀល ១ម៉ឺននាក់» ឆ្នាំ២០២៦ និង«ពិធីសំណេះសំណាល និងប្រគល់-ទទួលថវិកាបរិច្ចាគពីវិស័យឯកជន ជូនមូលនិធិគន្ធបុប្ផាកម្ពុជា»

លោកជំទាវបណ្ឌិត ពេជ ចន្ទមុន្នី៖ កម្លាំងសាមគ្គីជាតិផុលផុសបានជួយសង្គ្រោះកុមារកម្ពុជាដែលជាធនធានមនុស្សអនាគតរាប់ម៉ឺននាក់ក្នុងមួយឆ្នាំៗ

ព័ត៌មានជាតិ

គណៈកម្មការទី៦ នៃរដ្ឋសភា ចុះសិក្សាស្វែងយល់ពីការអនុវត្តច្បាប់ និងវិស័យយុត្តិធម៌ នៅខេត្តតាកែវ

បន្ទាប់ពីចុះបំពេញបេសកកម្មនៅខេត្តកំពតរួចមក គណៈប្រតិភូគណៈកម្មការនីតិកម្ម និងយុត្តិធម៌ នៃរដ្ឋសភា (គណៈកម្មការទី៦) ដឹកនាំដោយ ឯកឧត្តម អង្គ វង្សវឌ្ឍានា ប្រធានគណៈកម្មការ នៅថ្ងៃទី៨ ខែសីហា ឆ្នាំ២០២៤ បានអញ្ជើញទៅកាន់ខេត្តតាកែវ ជាបន្តទៀត។ នៅក្នុងខេត្តតាកែវ គណៈប្រតិភូគណៈកម្មការ បានអញ្ជើញជួបពិភាក្សាការងារជាមួយ ឯកឧត្តម វ៉ី សំណាង អភិបាលនៃគណ:អភិបាលខេត្តតាកែវ ព្រមទាំងស្នងការនគរបាល កងរាជអាវុធហត្ថ មន្ទីរអង្គភាពជំនាញជុំវិញខេត្ត ដើម្បីសិក្សាស្វែងយល់ និងប្រមូលព័ត៌មានមួយចំនួន ពាក់ព័ន្ធនឹងវិស័យទទួលបន្ទុករបស់គណៈកម្មការ ដោយផ្ដោតលើវឌ្ឍនភាពការងារ ប្រសិទ្ធភាពនៃការអនុវត្តច្បាប់ លិខិតបទដ្ឋានគតិយុត្តនានា និងបញ្ហាប្រឈមដែលខេត្តបានជួបប្រទះ ដើម្បីរួមសហការគ្នារវាងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិ នៅក្នុងការជំរុញការអនុវត្តកម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភាឱ្យមានប្រសិទ្ធភាពខ្ពស់។ឯកឧត្តម វ៉ី សំណាង អភិបាលនៃគណ:អភិបាលខេត្តតាកែវ បានមានប្រសាសន៍ថា កន្លងមកក៏ដូចជាពេលបច្ចុប្បន្ន តាំងពីរាជរដ្ឋាភិបាលអាណត្តិមុនៗ និងអាណត្តិទី៧នេះ ក្រោមការដឹកនាំរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងដោយមានការជួយឧបត្ថម្ភគាំទ្រពីក្រសួងស្ថាប័នថ្នាក់ជាតិ រួមជាមួយនឹងការខិតខំបំពេញការងាររបស់រដ្ឋបាលខេត្ត បានធ្វើឱ្យខេត្តតាកែវ មានការអភិវឌ្ឍរីកចម្រើនគួរឱ្យកត់សម្គាល់។ ដោយឡែក លើការងារអនុវត្តច្បាប់ រដ្ឋបាលខេត្តបានយកចិត្តទុកដាក់ខ្ពស់ ក្នុងការដឹកនាំសម្របសម្រួល និងជំរុញដល់គ្រប់មន្ទីរអង្គភាពជុំវិញខេត្ត ក្នុងការអនុវត្តតួនាទីភារកិច្ចរបស់ខ្លួន ស្របតាមច្បាប់ និងលិខិតបទដ្ឋានពាក់ព័ន្ធ ក៏ដូចជាយុទ្ធសាស្រ្តបញ្ចកោណដំណាក់កាលទី១របស់រាជរដ្ឋាភិបាល និងគោលការណ៍នានារបស់រដ្ឋបាលខេត្ត ប្រកបដោយទំនួលខុសត្រូវខ្ពស់។ រដ្ឋបាលខេត្តក៏បានធ្វើការផ្សព្វផ្សាយច្បាប់ជូនដល់ប្រជាពលរដ្ឋ គ្រប់ភាគីពាក់ព័ន្ធ និងអាជ្ញាធរគ្រប់លំដាប់ថ្នាក់ បានយល់ដឹង និងចូលរួមអនុវត្តច្បាប់ទាំងអស់គ្នា។ ក្នុងករណីមានបទល្មើសណាមួយកើតឡើង រដ្ឋបាលខេត្ត តែងបានចាត់វិធានការក្នុងការទប់ស្កាត់ បានទាន់ពេលវេលា។ ជាមួយគ្នានេះ រដ្ឋបាលខេត្តក៏បានយកចិត្តទុកដាក់ ក្នុងការបំពេញការងារ ការបង្ក្រាប ទប់ស្កាត់ បញ្ហាការជួញដូរការប្រើប្រាស់គ្រឿងញៀន ការបំផ្លិចបំផ្លាញទ្រព្យសម្បត្តិសាធារណៈ និងឯកជន ការទន្រ្ទានធនធានធម្មជាតិ ការត្រួតពិនិត្យសុវត្ថិភាពចរាចរណ៍ និងភាពអសកម្មផ្សេងៗជាដើម។ និយាយជារួម រាល់ការដោះស្រាយទំនាស់ ទាំងក្នុងប្រព័ន្ធតុលាការ និងក្រៅប្រព័ន្ធតុលាការ រដ្ឋបាលខេត្តមានកិច្ចសហការល្អ ជាមួយអយ្យការអមសាលាដំបូងខេត្ត អង្គភាពអនុវត្តច្បាប់ និងភាគីពាក់ព័ន្ធ ធ្វើការដោះស្រាយបានទាន់ពេលវេលា និងអាចទទួលយកបាន។ឯកឧត្តម អង្គ វង្ស វឌ្ឍានា បានកោតសរសើរ និងវាយតម្លៃខ្ពស់ជូនរដ្ឋបាលខេត្តតាកែវ និងមន្ទីរពាក់ព័ន្ធដែលបានខិតខំយកអស់កម្លាំងកាយចិត្តក្នុងការអនុវត្តតួនាទីភារកិច្ចរបស់ខ្លួន ប្រកបដោយការទទួលខុសត្រូវ តាមរយៈការអនុវត្តច្បាប់ និងលិខិតបទដ្ឋាននានា ជាមួយនឹងការជំរុញការផ្សព្វផ្សាយច្បាប់ជូនដល់ប្រជាពលរដ្ឋបានយល់ដឹង ដើម្បីឱ្យពួកគាត់ចូលរួមក្នុងការអនុវត្តច្បាប់ទាំងអស់គ្នាដើម្បីប្រែក្លាយប្រទេសកម្ពុជាឱ្យទៅជាប្រទេសនីតិរដ្ឋពិតប្រាកដ។ចំណែកសំណូមពររបស់រដ្ឋបាលខេត្ត និងមន្ទីរពាក់ព័ន្ធ ដែលបានលើកឡើង ឯកឧត្តម ប្រធានគណៈកម្មការ បានមានប្រសាសន៍ថា គណៈកម្មការនឹងធ្វើរបាយការណ៍ តាមរយៈសម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា ជូនទៅរាជរដ្ឋាភិបាលនិងស្ថាប័នពាក់ព័ន្ធ ដើម្បីជួយអន្តរាគមន៍រកមធ្យោបាយដោះស្រាយជូន៕

សមាជិកគណបក្សភ្លើងទៀននៅតែបន្តសុំចូលរួមជីវភាពនយោបាយជាមួយគណបក្សប្រជាជនកម្ពុជាដូចភ្លៀងរលឹម

ក្នុងរយៈពេលប៉ុន្មានខែនេះ គេបានមើលឃើញសមាជិក សមាជិកាមកពីគណបក្សភ្លើងទៀនបានប្រកាសផ្តាច់ខ្លួនចេញពីបក្សប្រឆាំង សុំចូលរួមក្នុងជីវភាពនយោបាយជាមួយគណបក្សប្រជាជនកម្ពុជាវិញជាបន្តបន្ទាប់ដូចភ្លៀងរលឹមរដូវវស្សា។ជាក់ស្តែងកាលពីថ្ងៃទី៨សីហាតាមតេឡេក្រាមផ្លូវការរបស់សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជាបានបង្ហាញឃ្លីបវីដេអូ របស់សមាជិក សមាជិក មកពីគណបក្សភ្លើងទៀន ជាបេក្ខភាពនៃក្រុមប្រឹក្សាសង្កាត់ព្រៃឃ្មុំចំនួន៨រូប និងសង្កាត់កំពង់កណ្តាល ខេត្តកំពតចំនួន១រូប បានប្រកាសផ្តាច់ខ្លួនពីបក្សប្រឆាំង និងគោរពស្នើសម្តេចតេជោសុំចូលរួមជីវភាព នយោបាយជាមួយគណបក្សប្រជាជនកម្ពុជា។សូមបញ្ជាក់ថា គិតមកដល់ពេលនេះមានបងប្អូនដែលបានផ្តាច់ខ្លួនចាកចេញពីបក្សប្រឆាំងយ៉ាងច្រើនដោយសារតែពួកគាត់បានមើលឃើញពីគោលនយោបាយដ៏ត្រឹមត្រូវ និងការដឹកនាំប្រកបដោយជោគជ័យរបស់គណបក្សប្រជាជននិងរាជរដ្ឋាភិបាលលើការអភិវឌ្ឍ ជាពិសេសការបន្តរក្សាបាននូវសុខសន្តិភាព ស្ថិរភាព និងការអភិវឌ្ឍលើគ្រប់វិស័យ ដើម្បីផលប្រយោជន៍សម្រាប់ប្រទេសជាតិ និងប្រជាជនជាធំ គឺខុសពីបក្សប្រឆាំងដែលពុំមានអ្វីក្រៅពីការបំភ្លៃ បំពុល មួលបង្កាច់រាជរដ្ឋាភិបាលដើម្បីតែមហិច្ឆតាទុច្ចរឹត ចង់ផ្តួលរំលំរាជរដ្ឋាភិបាលស្របច្បាប់តែប៉ុណ្ណោះ៕

សម្ដេចធិបតី ហ៊ុន ម៉ាណែត អនុញ្ញាតឱ្យនាយកប្រតិបត្តិក្រុមហ៊ុន Gumball 3000 ជួបពិភាក្សាការងារ

ភ្នំពេញ៖ សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នាព្រឹកថ្ងៃទី៩ ខែសីហា ឆ្នាំ ២០២៤នេះ បានអនុញ្ញាតឱ្យ លោក Maximillion Cooper ស្ថាបនិក និងជានាយកប្រតិបត្តិ នៃក្រុមហ៊ុន Gumball 3000 ចូលជួបសម្ដែងការគួរសម និងពិភាក្សាការងារនៅវិមានសន្តិភាព។ក្រុមហ៊ុន Gumball 3000 ត្រូវបានបង្កើតឡើងក្នុងឆ្នាំ១៩៩៩ ដោយជនជាតិអង់គ្លេស គឺជាម៉ាកយីហោដ៏ល្បីផ្តោតលើកការរៀបចំព្រឹត្តិការណ៍ ការកម្សាន្ត និងរបៀបរស់នៅបែបប្រណិតភាព។ការរៀបចំព្រឹត្តិការណ៍ “Gumball 3000 Rally in Cambodia” នឹងចូលរួមចំណែកលើកកម្ពស់វិស័យទេសចរណ៍របស់កម្ពុជា ជាពិសេសទេសចរណ៍ទៅក្នុងខេត្តសៀមរាប។

រាជរដ្ឋាភិបាល ណែនាំឲ្យស្ថាប័នពាក់ព័ន្ធបន្តយកចិត្តទុកដាក់ និងលើកកម្ពស់ការអភិវឌ្ឍ និងអភិរក្សជនជាតិដើមភាគតិច

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពជា បានណែនា ដល់ក្រសួងអភិវឌ្ឍន៍ជនបទ និងស្ថាប័នពាក់ព័ន្ធទាំងអស់បន្តយកចិត្តទុកដាក់អនុវត្តន៍ការងារលើកកម្ពស់អភិវឌ្ឍ និងអភិរក្សដល់បងប្អូនជនជាតិដើមភាគតិចឲ្យកាន់តែល្អប្រសើរបន្ថែមទៀត ខណៈរាជរដ្ឋាភិបាល បានចាត់ទុកជនជាតិដើមភាគតិច មានសិទ្ធិស្មើគ្នាទាំងអស់របស់ប្រជាជនកម្ពុជាដោយមិនគិតពីពូជសាសន៍ ពណ៌សម្បុរ ភេទ ភាសា ជំនឿ និងសាសនានោះ។ក្នុងឱកាសអបអរសាទរទិវាអន្ដរជាតិជនជាតិដើមភាគតិចពិភពលោក លើកទី៣០ និងលើកទី២០ នៅកម្ពុជានាថ្ងៃទី៩ ខែសីហា ឆ្នាំ២០២៤នេះ ក្រោមប្រធានបទ«ការការពារសិទ្ធិរស់នៅ និងប្រាស្រ័យទាក់ទងតាមបែបប្រពៃណីជនជាតិដើមភាគតិចដោយស្ម័គចិត្ត»សម្តេចធិបតី ហ៊ុន ម៉ាណែត នាយករដ្ឋ មន្រ្តីបានលើកឡើងថា «រាជរដ្ឋាភិបាលបាននិងកំពុងយកចិត្តទុកដាក់យ៉ាងខ្លាំងដល់បងប្អូនជនជាតិដើមភាគតិច ក្នុងការការពារ អភិរក្ស និងថែរក្សាតម្លៃសីលធម៌ វប្បធម៌ ប្រពៃណីដ៏ល្អផូរផង់ និងរស់រវើក ជាពិសេសបានផ្ដល់ឱកាស និងសិទ្ធិសេរីភាពក្នុងការបញ្ចេញមតិ ដើម្បីចូលរួមចំណែក អភិវឌ្ឍន៍ប្រទេសជាតិ។ យើងកត់សម្គាល់ឃើញថា ក្នុងរយៈពេលចុងក្រោយនេះ ការងារអភិវឌ្ឍន៍និង អភិរក្សជនជាតិដើមភាគតិចមានការរីកចម្រើន និងសម្រេចបាននូវសមិទ្ធផលជាច្រើនគួរជាទីមោទនៈ។ ទាំងអស់នេះ កើតឡើងពីការប្តេជ្ញាចិត្ត ការយកចិត្តទុកដាក់ និងការខិតខំប្រឹងប្រែងយ៉ាងសកម្មរបស់ រាជរដ្ឋាភិបាល និងមានការចូលរួមសហការ និងគាំទ្រយ៉ាងជិតស្និទ្ធពីដៃគូអភិវឌ្ឍ អង្គការមិនមែនរដ្ឋាភិបាល និងការចូលរួមយ៉ាងសកម្មពីគ្រប់ភាគីពាក់ព័ន្ធទាំងអស់ ដែលនេះបានឆ្លុះបញ្ចាំងឱ្យឃើញ អំពីការយល់ដឹងនូវសារៈសំខាន់នៃការងារអភិវឌ្ឍន៍ និងអភិរក្សជនជាតិដើមភាគតិច»។យ៉ាងណាក៏ដោយ តាមរយៈសារលិខិតអបអរសាទរទិវាអន្ដរជាតិជនជាតិដើមភាគតិចនេះដែរ សម្តេចធិបតី នាយករដ្ឋមន្រ្តី ក៏បានអំពាវនាវឲ្យក្រសួងអភិវឌ្ឍន៍ជនបទត្រូវបន្តយកចិត្តទុកដាក់អនុវត្តន៍ការងារលើកកម្ពស់ការអភិវឌ្ឍ និងអភិរក្សជនជាតិដើមភាគតិច ស្របតាមផែនការយុទ្ធសាស្ត្ររបស់ក្រសួង និងគោលនយោបាយជាតិ ស្តីពីការអភិវឌ្ឍជនជាតិដើមភាគតិច និងត្រូវរៀបចំឯកសារគតិយុត្តពាក់ព័ន្ធផ្សេងៗ ដើម្បីជំរុញឱ្យការងារអភិវឌ្ឍន៍ និងអភិរក្សជនជាតិដើមភាគតិចកាន់តែមានប្រសិទ្ធភាព។ ហើយក្រសួងអភិវឌ្ឍន៍ជនបទ ត្រូវបន្តពង្រឹងការសម្របសម្រួល និងសហប្រតិបត្តិការជាមួយក្រសួង ស្ថាប័ន្ធពាក់ព័ន្ធ និងខិតខំស្វែងរកការគាំទ្រ និងកៀរគរធនធានបន្ថែមពីដៃគូអភិវឌ្ឍនានាអង្គការមិនមែនរដ្ឋាភិបាល និងភាគីពាក់ព័ន្ធទាំងអស់ ដើម្បីបង្កើនវឌ្ឍនភាពបន្ថែមលើការងារអភិវឌ្ឍន៍ និងអភិរក្សជនជាតិដើមភាគតិច ជាពិសេសការចុះបញ្ជី និងការទទួលស្គាល់អត្តសញ្ញាណជនជាតិដើមភាគតិច។សម្តេចធិបតី នាយករដ្ឋមន្រ្តី ក៏បានណែនាំដល់ក្រសួងអភិវឌ្ឍន៍ជនបទ ត្រូវយកចិត្តទុកដាក់លើការងារអភិវឌ្ឍន៍ និងអភិរក្សជនជាតិដើម ភាគតិច ដោយខិតខំរៀបចំ និងអភិវឌ្ឍន៍ភូមិជនជាតិដើមភាគតិចទៅជាភូមិគំរូ ផ្អែកលើសក្ដានុពល វប្បធម៌ ទំនៀមទម្លាប់ ប្រពៃ និងទេសចរណ៍ ដើម្បីលើកកម្ពស់ជីវភាពរស់នៅរបស់បងប្អូនជន ជាតិដើមភាគតិច ស្របតាមយុទ្ធសាស្ត្របញ្ចកោណរបស់រាជរដ្ឋាភិបាល។ភាគីពាក់ព័ន្ធទាំងអស់ ត្រូវបន្តអប់រំ និងផ្សព្វផ្សាយអំពីភាពចាំបាច់ និងសារៈសំខាន់ការអភិវឌ្ឍនិងអភិរក្សជនជាតិដើមភាគតិច ឱ្យបានទូលំទូលាយ ទៅដល់គ្រប់សហគមន៍ជនជាតិដើមភាគ តិច និងសាធារណជន។ មួយវិញទៀតគ្រប់ភាគីពាក់ព័ន្ធទាំងអស់ ត្រូវប្រកាន់ខ្ជាប់នូវអភិក្រម ការអភិវឌ្ឍដើរទន្ទឹមនឹងការអភិរក្ស ក្នុងគោលដៅកសាងសង្គមជាតិមួយដែលមានសមាហរណកម្ម សុខដុមនីយកម្ម មិនមានការរើសអើងក្នុងនាមជនជាតិខ្មែរតែមួយផងដែរ។សូមបញ្ជាក់ថា នៅកម្ពុជានាពេលបច្ចុប្បន្ននេះ មានជនជាតិដើមភាគតិច ដូចជាកួយ ទំពួន គ្រឹង ចារាយ ព្នង ព្រៅ កាវ៉ែត ស្ទៀង ក្រោល មិល កាចក់ ព័រ ខោញ ជង សួយ ថ្នូន លុន ស្ទូច រដែ ខិ រអង ល្ហុង ល្អីន សំរ និងជនជាតិដើមភាគតិចមួយចំនួនផ្សេងទៀត។ បងប្អូនជនជាតិដើមភាគតិចទាំងអស់ មានប្រមាណជា ១,៤% នៃចំនួនប្រជាជនសរុប និងរស់នៅក្នុងខេត្តមួយចំនួនដូចជា រតនៈគិរី មណ្ឌលគិរី ក្រចេះ ព្រះវិហារ កំពង់ធំ ស្ទឹងត្រែង ឧត្តរមានជ័យ ត្បូងឃ្មុំ ពោធិ៍សាត់ កំពង់ស្ពឺ កោះកុង បាត់ដំបង ព្រះសីហនុ បន្ទាយមានជ័យ សៀមរាប និងនៅតាមតំបន់មួយចំនួនទៀត៕ អត្ថបទ បាន ចក់

អ្នកតាមដានស្ថានភាពនយោបាយ និងអភិវឌ្ឍន៍សង្គមប្រកាសថ្កោលទោសទណ្ឌិតក្បត់ជាតិបីជំនាន់ ដែលញុះញង់ឲ្យពលរដ្ឋខ្មែររត់រកសេចក្តីស្លាប់

អ្នកតាមដានស្ថានភាពនយោបាយ និងការអភិវឌ្ឍន៍សង្គម លោក យឿន យឿត បានប្រកាសថ្កោលទោសយ៉ាងដាច់អហង្ការ ចំពោះជនក្បត់ជាតិបីជំនាន់ ដែលបានធ្វើការញុះញង់ឲ្យបងប្អូនប្រជាពលរដ្ឋខ្មែររត់រកសេចក្តីស្លាប់តាមរយៈការធ្វើបាតុកម្មហិង្សាដូចប្រទេសបង់ក្លាដេស ហើយថាការញុះញង់របស់ជននេះជាទង្វើរមានចេតនាបំផ្លិតបំផ្លាញជាតិសាសន៍ខ្លួនឯងសុទ្ធសាធ។តាមរយៈកិច្ចសម្ភាសន៍ជាមួយទូរទស្សន៍BTV តាមតេលេក្រាម នាថ្ងៃទី៩ ខែសីហា ឆ្នាំ២០២៤នេះ លោក យឿន យឿត បានលើកឡើងថា ការផ្សព្វផ្សាយតាមរយៈវីដេអូឃ្លីបរបស់ជនក្បត់ជាតិបីជំនាន់ កាលពីថ្ងៃទី៨ ខែសីហាកន្លងទៅនេះ ដើម្បីអំពាវនាវឲ្យបងប្អូនប្រជាពលរដ្ឋខ្មែរ ធ្វើបាតុកម្មដូចប្រទេសបង់ក្លាដេសនោះ គឺមិនអាចទៅរួចនោះឡើយ ហើយថាការនិយាយរបស់ទណ្ឌិតរត់ចោលស្រុករូបនេះក៏ គ្មានបងប្អូនប្រជាពលរដ្ឋណាស្តាប់ និងធ្វើតាមតទៅទៀតដែរ ដោយសារតែជនធ្វើអ្វី និយាយអ្វីមិនដែល គិតដល់ផលប្រយោជន៍ជាតិ និងប្រជាជនជាធំនោះទេ ពោលគឺគិតតែផលប្រយោជន៍ខ្លួនតាំងពីនៅស្រុក ខ្មែររហូតដល់រត់ចោលស្រុកនោះ។ លោកយឿន យឿត បានលើកឡើងទៀតថា នេះគឺជាទង្វើដ៏អាក្រក់បំផុតដែលជនក្បត់ជាតិបីជំនាន់រូបនេះបាននឹងកំពុងប្រមាថជីវិតរបស់ប្រជាពលរដ្ឋខ្មែរខ្លួនឯង ដោយព្យាយាមញុះញង់អូសទាញពលរដ្ឋឲ្យយកជីវិតទៅស្លាប់ដើម្បីបម្រើមហិច្ឆិតា និងគំនុំរបស់ខ្លួន។ អស់រយៈពេលជាច្រើនឆ្នាំមកនេះទណ្ឌិតរត់ចោលស្រុករូបនេះ តែងបានបំផុសបំផុលញុះញង់ពលរដ្ឋគ្រប់រូបភាព ដើម្បីធ្វើអោយប្រទេសជាតិមានចលាចលមិនឈប់មិនឈរ។អ្នកតាមដានស្ថានភាពនយោបាយ និងការអភិវឌ្ឍន៍សង្គមរូបនេះ បានសង្កត់ធ្ងន់ថា«សូមថ្កោលទោសប្រឆាំងយ៉ាងដាច់អហង្កាចំពោះទណ្ឌិត សម រង្ស៊ី ដែលព្យាយាមញុះញង់ឲ្យប្រជាពលរដ្ឋខ្មែរយកជីវិតទៅស្លាប់ ដើម្បីតែបំពេញមហិច្ឆិតារបស់ខ្លួន ហើយក៏សូមអំពាវនាវផងដែរដល់បងប្អូនខ្មែរទាំងអស់ទាំងក្នុង និងក្រៅប្រទេសសូមកុំជឿ ចំពោះអ្នកនយោបាយដែលរត់ចោលស្រុកមួយនេះ ដែលព្យាយាមអូសទាញឲ្យបងប្អូនឲ្យខាតបង់ផលប្រយោជន៍ និងគ្រោះថ្នាក់ដល់អាយុជីវិត ហើយក្នុងនាមប្រជាពលរដ្ឋខ្មែរម្នាក់សូមចាត់ទុកទណ្ឌិត សម រង្ស៊ី ថា ជាជនវង្វេងស្មារតី បំផ្លាញជាតិសាសន៍ខ្លួនឯងម្តងហើយម្តងទៀត»។លោក យឿន យឿត ក៏បានប្រកាសប្ដេជ្ញាចិត្តផងដែរថា ក្នុងនាមជាកូនខ្មែរមួយរូប សូមចូលរួមទប់ស្កាត់ និងកម្ចាត់ចោលនយោបាយជ្រុលនិយមរបស់ជនក្បត់ជាតិបីជំនាន់ និងបក្សពួក ដែលធ្វើសកម្មភាពនយោបាយទុច្ចរិតញុះញង់លាបពណ៌ឱ្យខ្មែរបែកបាក់សាមគ្គីផ្ទៃក្នុងម្តងហើយម្តងទៀត ដើម្បីតែបម្រើនយោបាយឱ្យបរទេស និងភាពច្រណែនឈ្នានីសរបស់ជននេះផងដែរ៕អត្ថបទ បាន ចក់

សមាគមសិល្បករខ្មែរសហការជាមួយរដ្ឋបាលខេត្តសៀមរាប រៀបចំព្រឹត្តិការណ៍«ស្នាមញញឹមនៃកម្ពុជា» ផ្សព្វផ្សាយវប្បធម៌ដល់ទេសចរណ៍ នៅដើមសប្ដាហ៍ក្រោយ

ដើម្បីជំរុញនូវយុទ្ធនាការ «ទស្សនាសៀមរាប ឆ្នាំ២០២៤» ដែលបានដាក់ចេញដោយ សម្ដេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា សមាគមសិល្បករខ្មែរដែលដឹកនាំដោយលោកជំទាវអ្នកឧកញ៉ា ម៉ៅ ចំណាន សហការជាមួយរដ្ឋបាលខេត្តសៀមរាប រៀបចំព្រឹត្តិការណ៍ «ស្នាមញញឹមនៃកម្ពុជា» ដើម្បីផ្សព្វផ្សាយវប្បធម៌ដល់ទេសចរណ៍ នៅថ្ងៃទី១២-១៦ ខែសីហា ឆ្នាំ២០២៤ ខាងមុខនេះ សមាគមសិល្បករខ្មែរ រួមជាមួយរដ្ឋបាលខេត្តសៀមរាប បានសហការរៀបចំព្រឹត្តិការណ៍ «ស្នាមញញឹមនៃកម្ពុជា» ដើម្បីផ្សព្វផ្សាយវប្បធម៌ដល់ទេសចរណ៍ និងជាការទាក់ទាញភ្ញៀវទេសចរអន្តរជាតិមកទស្សនាផងដែរ។ ពិធីនេះនឹងរៀបចំនៅអតីតទីស្នាក់ការអង្គភាពនគរបាលការពារបេតិកភណ្ឌប្រចាំមរណីដ្ឋានអង្គរ។ កម្មវិធីនេះ សមាគមនឹងរៀបចំនូវសកម្មភាពមួយចំនួនរួមមាន កម្មវិធីកម្សាន្ត ការបង្ហាញពិព័រណ៍ខ្នាតតូចនៃមុខម្ហូបខ្មែរ បង្កើតនូវស្នាដៃផ្សព្វផ្សាយពីវប្បធម៌ បង្កបរិយាកាស និងកម្មវិធីផ្សេងៗមួយចំនួនទៀត ដើម្បីជាស្នាមញញឹមដល់ភ្ញៀវទេសចរដែលបានមកចូលរួមក្នុងព្រឹត្តិការណ៍នេះ។ សូមបងប្អូន និងភ្ញៀវទេសចរអញ្ជើញចូលរួមឱ្យបានច្រើនកុះករ។

កម្ពុជា-ឥណ្ឌូនេស៊ី ចុះអនុស្សរណៈនៃការយោគយល់គ្នា ស្តីពីកិច្ចសហប្រតិបត្តិការក្នុងវិស័យសុខាភិបាល នៅទីក្រុងវៀងចន្ទន៍

ទីក្រុងវៀងចន្ទន៍៖ នារសៀលថ្ងៃទី៨ ខែសីហា ឆ្នាំ២០២៤នេះ តបតាមសំណើរបស់រដ្ឋមន្ត្រីសុខាភិបាល នៃសាធារណៈរដ្ឋឥណ្ឌូនេស៊ី ព្រមទាំងទទួលបានសិទ្ធិប្រទានដ៏ខ្ពង់ខ្ពស់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញចូលរួម និងចុះហត្ថលេខា លើអនុស្សរណៈនៃការយោគយល់គ្នា រវាងក្រសួងសុខាភិបាល នៃព្រះរាជាណាចក្រកម្ពុជា និងក្រសួងសុខាភិបាល នៃសាធារណរដ្ឋឥណ្ឌូណេស៊ី ស្តីពីកិច្ចសហប្រតិបត្តិការក្នុងវិស័យសុខាភិបាល ជាមួយនិងឯកឧត្តម ប៊ូឌី សាឌីគីន (HE Budi G. Sadikin) រដ្ឋមន្ត្រីសុខាភិបាល នៃសាធារណៈរដ្ឋឥណ្ឌូនេស៊ី និងអមដោយគណៈប្រតិភូ នៃក្រសួងសុខាភិបាលនៃប្រទេសទាំងពីរ ក្នុងអំឡុងពេលនៃការចូលរួមក្នុងកិច្ចប្រជុំរដ្ឋមន្ត្រីសុខាភិបាលអាស៊ានលើកទី១៦ និងកិច្ចប្រជុំពាក់ព័ន្ធ (The 16th ASEAN Health Ministers Meeting and Related Meetings) នៅទីក្រុងវៀងចន្ទន៍ សាធារណរដ្ឋប្រជាធិបតេយ្យប្រជាមានិតឡាវ។អនុស្សរណៈយោគយល់នេះត្រូវបានរៀបចំឡើងក្នុងគោលបំណងបង្កើតក្របខណ្ឌកិច្ចសហប្រតិបត្តិការលើកកម្ពស់សេវាសុខាភិបាល ភាពធន់ នៃវិស័យសុខាភិបាល ការសង្គ្រោះបន្ទាន់ផ្នែកសុខភាពសាធារណៈ សុវត្ថិភាព ផលិតផលសុខាភិបាល និងឧបករណ៍បរិក្ខារពេទ្យ និងបច្ចេកវិទ្យាសុខាភិបាល រួមទាំងសុខាភិបាលឌីជីថល និងបច្ចេកវិទ្យាជីវវេជ្ជសាស្រ្ត។ អនុស្សរណៈនៃការយោគយល់នេះ ក៏នឹងបន្តពង្រឹងវិសាលភាពនៃកិច្ចសហប្រតិបត្តិការក្នុងវិស័យសុខាភិបាល នៃប្រទេសយើងទាំងពីរ និងបានឆ្លើយតបនឹងចំនុចអាទិភាពសុខាភិបាលជាចម្បងលើការពង្រឹងប្រព័ន្ធសេវាសុខាភិបាល សំដៅការលើកកម្ពស់សុខុមាលភាព ការលើកកម្ពស់គុណភាពសេវាសុខាភិបាល និងការអភិវឌ្ឍធនធានមនុស្សសុខាភិបាល ដើម្បីរួមចំណែកជាមួយនឹងកិច្ចខិតខំប្រឹងប្រែងរបស់ក្រសួងសុខាភិបាល នៃព្រះរាជាណាចក្រកម្ពុជា ក្នុងការលើកកម្ពស់សុខុមាលភាពរបស់ប្រជាជនកម្ពុជា ដើម្បីឈានទៅសម្រេចបាននូវការគ្របដណ្តប់សុខភាពជាសកល ស្របតាមផែនការយុទ្ធសាស្រ្តបញ្ចកោណ ដំណាក់កាលទី១នៃរាជរដ្ឋាភិបាលអាណត្តិទី៧ ក្រោមការដឹកនាំប្រកបដោយគតិបណ្ឌិត ភាពប៉ិនប្រសប់ និងចក្ខុវិស័យវែងឆ្ងាយរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ក្នុងពិធីចុះហត្ថលេខានេះ ឯកឧត្តមរដ្ឋមន្ត្រីសុខាភិបាលឥណ្ឌូនេស៊ី បានលើកឡើងនូវសំណើសហប្រតិបតិការ ជាមួយក្រសួងសុខាភិបាលកម្ពុជា ដូចជាភាពជាដៃគូកិច្ចសហប្រតិបត្តិការនៃមជ្ឈមណ្ឌលជាតិព្យាបាលជំងឺបេះដូង ជំងឺមហារីក និងភាពជាដៃគូសហប្រតិបត្តិការ និងគាំទ្រដល់មន្ទីរពេទ្យជាតិ មិត្តភាពខ្មែរ-សូវៀត ជាដើម។ ជាកិច្ចឆ្លើយតប ឯកឧត្តមសាស្ត្រាចារ្យរដ្ឋមន្ត្រី បានសំដែងនូវការស្វាគមន៍យ៉ាងកក់ក្តៅចំពោះការពង្រឹងនិងពង្រីកកិច្ចសហប្រតិបត្តិការ និងបានបញ្ជាក់ថាកិច្ចសហប្រតិបត្តិការនេះពិតជាការរិតចំណងមិត្តភាពរវាងប្រទេសយើងទាំងពីរ ដែលមានរយៈពេល៦៥ឆ្នាំកន្លងមក៕អត្ថបទ៖ រដ្ឋា

រដ្ឋមន្ត្រីសុខាភិបាល ចូលរួមកិច្ចប្រជុំពេញអង្គរដ្ឋមន្ត្រីសុខាភិបាលអាស៊ានលើកទី១៦ ក្រោមមូលបទ”បរិវត្តកម្មការអភិវឌ្ឍវិស័យសុខាភិបាលអាស៊ានក្នុងបរិបទថ្មី”

ភ្នំពេញ ៖ ដោយទទួលបានគោលការណ៍អនុញ្ញាតដ៏ខ្ពង់ខ្ពស់ពី សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា នារសៀលថ្ងៃទី៨ ខែសីហា ឆ្នាំ២០២៤នេះ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានអញ្ជើញដឹកនាំគណៈប្រតិភូ ចូលរួមកិច្ចប្រជុំពេញអង្គរដ្ឋមន្ត្រីសុខាភិបាលអាស៊ានលើកទី១៦ ក្រោមមូលបទ”បរិវត្តកម្មការអភិវឌ្ឍវិស័យសុខាភិបាលអាស៊ានក្នុងបរិបទថ្មី” ដោយមានការសម្របសម្រួលពីលេខាធិការដ្ឋានអាស៊ាន ដោយមានការចូលរួមពីរដ្ឋមន្ត្រីសុខាភិបាលអាស៊ានទាំង១០ប្រទេស រដ្ឋមន្ត្រីសុខាភិបាលទីម័រឡេស្តេ និងនាយកអង្គការសុខភាពពិភពលោកប្រចាំតំបន់ប៉ាស៊ីហ្វិកខាងលិច និងនាយកអង្គការសុខភាពពិភពលោកប្រចាំតំបន់អាស៊ីអាគ្នេយ៍ នៅទីក្រុងវៀងចន្ទន៍ នៃសាធារណៈរដ្ឋប្រជាធិបតេយ្យប្រជាមានិតឡាវ។រដ្ឋមន្ត្រីសុខាភិបាលអាស៊ានទាំង១០ប្រទេស រួមជាមួយរដ្ឋមន្ត្រីសុខាភិបាលទីម័រឡេស្តេ បានបញ្ជាក់គោលជំហររបស់ខ្លួនតាមរយៈសេចក្តីថ្លែងការណ៍រួមក្រោមប្រធានបទ៖ “ពង្រឹងសមត្ថភាពប្រព័ន្ធសុខាភិបាលក្រោយការរាតត្បាត ដើម្បីពង្រឹងភាពធន់ក្នុងតំបន់” និងបានឯកភាពគ្នាលើចំនុចមួយចំនួនដូចខាងក្រោម៖១-បង្កើតទស្សនវិស័យអភិវឌ្ឍអាទិភាព និងយុទ្ធសាស្ត្រសុខាភិបាលអាស៊ានក្រោយឆ្នាំ២០២៥ តាមរយៈ ASEAN SOMHD និង ASEAN Health Clusters ដោយបញ្ចូលមេរៀនបទពិសោធន៍ពីជំងឺកូវីដ-១៩ និងការគំរាមកំហែងផ្នែកសុខភាពសាធារណៈផ្សេងទៀត និងបញ្ហាប្រឈមឆ្លងវិស័យផ្សេងទៀតដែលមានផលប៉ះពាល់ដល់សុខភាព។២-ពង្រីក និងបន្តនិរន្តរភាពនៃសកម្មភាពរួមក្នុងតំបន់ ដើម្បីពង្រឹងបន្ថែមនូវសមត្ថភាពប្រព័ន្ធសុខភាពក្រោយជំងឺរាតត្បាត និងបង្កើនភាពធន់ក្នុងតំបន់ តាមរយៈការពង្រឹងកិច្ចសហប្រតិបត្តិការជាមួយដៃគូខាងក្រៅ ដើម្បីផលប្រយោជន៍ទៅវិញទៅមក ការចែករំលែកព័ត៌មាន និងការផ្លាស់ប្តូរបច្ចេកទេស ការកសាងសមត្ថភាព ការពង្រឹងមន្ទីរពិសោធន៍ និងការតាមដានជំងឺ។ ៣-ពង្រីកយន្តការដឹកនាំវិស័យសុខាភិបាលអាស៊ានដែលមានស្រាប់ ដើម្បីជំរុញសន្តិសុខសុខភាពក្នុងតំបន់ ដោយបង្កើនគំនិតផ្តួចផ្តើមរបស់យើងស្តីពីការត្រៀមលក្ខណៈ ការការពារ ការស្រាវជ្រាវ និងសមត្ថភាពឆ្លើយតបចំពោះការគំរាមកំហែងសុខភាពនាពេលអនាគត និងការសង្គ្រោះបន្ទាន់ ក្នុងចំណោមបណ្តាញមជ្ឈមណ្ឌលប្រតិបត្តិការបន្ទាន់អាស៊ាន (EOC) មជ្ឈមណ្ឌលវាយតម្លៃហានិភ័យ និងទំនាក់ទំនងហានិភ័យអាស៊ាន មជ្ឈមណ្ឌលនិម្មិត BioDiaspora អាស៊ាន បណ្តាញបណ្តុះបណ្តាលផ្នែករោគរាតត្បាតក្នុងតំបន់អាស៊ានបូក៣ និងបណ្តាញសុខភាពតែមួយអាស៊ាន។៤-ជំរុញគំនិតផ្តួចផ្តើមក្នុងតំបន់រួមជាមួយដៃគូពាក់ព័ន្ធ លើការលើកកម្ពស់របៀបរស់នៅដែលមានសុខភាពល្អ ឆ្លើយតបទៅនឹងរាល់គ្រោះថ្នាក់ និងការគំរាមកំហែងដែលកំពុងកើតមាន ការពង្រឹងប្រព័ន្ធសុខាភិបាល និងការទទួលបានការថែទាំ ធានាសុវត្ថិភាពចំណីអាហារ និងសេចក្តីប្រកាសទាក់ទងនឹងសុខភាព និងការប្តេជ្ញាចិត្តពាក់ព័ន្ធនឹងប្រព័ន្ធសម្របសម្រួលបន្ទាន់ផ្នែកសុខភាពសាធារណៈ ការបញ្ចប់គ្រប់ទម្រង់នៃកង្វះអាហារូបត្ថម្ភ ការប្រយុទ្ធប្រឆាំងនឹងភាពស៊ាំនឹងថ្នាំសម្លាប់មេរោគ ការលើកកម្ពស់សុខភាពផ្លូវចិត្ត ការគ្រប់គ្រងសុខភាពគ្រោះមហន្តរាយ សុខភាពមនុស្សចាស់ដែលសកម្ម ការការពារ និងគ្រប់គ្រងជំងឺមិនឆ្លង សុវត្ថិភាព និងការពឹងផ្អែកលើខ្លួនឯងស្តីពីវ៉ាក់សាំង ឱសថ និងការធ្វើរោគវិនិច្ឆ័យ ការបញ្ចប់ជំងឺអេដស៍នៅឆ្នាំ២០៣០ និងគំនិតផ្តួចផ្តើមសុខភាពតែមួយ។៥-សេចក្តីប្រកាសរួមរបស់មេដឹកនាំអាស៊ានស្តីពីការពង្រឹងជីវសុវត្ថិភាពជីវសន្តិសុខក្នុងតំបន់ នឹងត្រូវដាក់ស្នើសុំអនុម័តនៅក្នុងកិច្ចប្រជុំកំពូលអាស៊ានលើកទី៤៤ និង៤៥។៦-ជំរុញនវានុវត្តន៍ និងការប្រើប្រាស់បច្ចេកវិទ្យាសុខភាពឌីជីថល ដើម្បីកែលម្អលទ្ធផលសុខភាព លើកកម្ពស់ការផ្តល់សេវាថែទាំសុខភាព និងសម្របសម្រួលកិច្ចសហការឆ្លងព្រំដែន និងការផ្លាស់ប្តូរព័ត៌មានក្នុងចំណោមរដ្ឋសមាជិកអាស៊ាន រួមទាំងភាពជាដៃគូសាធារណៈ និងឯកជន ដើម្បីពន្លឿនការអនុម័ត និងការរួមបញ្ចូលដំណោះស្រាយសុខភាពឌីជីថល។៧-ពន្លឿនប្រតិបត្តិការនៃមជ្ឈមណ្ឌលអាស៊ានសម្រាប់គ្រោះអាសន្នសុខភាពសាធារណៈ និងជំងឺកើតថ្មី (ACPHEED) តាមរយៈការពិនិត្យបញ្ចប់ និងការចុះហត្ថលេខាលើកិច្ចព្រមព្រៀងបង្កើត (EA) និងកិច្ចព្រមព្រៀងប្រទេសម្ចាស់ផ្ទះ និងការបញ្ចូលសកម្មភាពនៅក្នុងផែនការអភិវឌ្ឍន៍វិស័យសុខាភិបាលអាស៊ានក្រោយឆ្នាំ២០២៥។ អង្គប្រជុំបានចាត់តាំងឧត្តមមន្ត្រីជាន់សុខាភិបាលអាស៊ាន ឱ្យអនុវត្តកិច្ចការបន្ទាន់ និងចំពោះមុខមួយចំនួន ដើម្បីគាំទ្រសេចក្តីសម្រេចរបស់រដ្ឋមន្រ្តីសុខាភិបាលអាស៊ាន នៅក្នុងកិច្ចប្រជុំខាងលើនេះ ឱ្យមានប្រសិទ្ធភាពខ្ពស់ និងផលប្រយោជន៍រួម ស្របតាមចក្ខុវិស័យ បេសកកម្ម គោលដៅ យុទ្ធសាស្ត្រ និងអាទិភាពសុខភាពរបស់វិស័យសុខាភិបាលអាស៊ាន និងប្រកាន់ខ្ជាប់នូវធម្មនុញ្ញអាស៊ាន និងវិធាននៃនីតិវិធីស្តីពីការចូលរួមរបស់អង្គភាពជាមួយវិស័យសុខាភិបាលអាស៊ាន។កិច្ចប្រជុំបានអនុម័តលើសេចក្តីថ្លែងការរួមនៃកិច្ចប្រជុំរដ្ឋមន្ត្រីសុខាភិបាលអាស៊ានលើកទី១៦ ដោយបានប្តេជ្ញាក្នុងការធ្វើបរិវត្តកម្ម និងអភិវឌ្ឍន៍សុខភាពអាស៊ានឱ្យមានភាពធន់ក្នុងបរិបទថ្មីសម្រាប់ក្រោយឆ្នាំ២០២៥ ដោយកិច្ចប្រជុំបានសង្កត់ធ្ងន់លើការកំណត់អាទិភាពសុខភាព នឹងយកបទពិសោធន៍ដែលបាន ឆ្លងកាត់កន្លងមក ជាពិសេសការរីករាលដាលនៃជំងឺកូវីដ-១៩។ រដ្ឋមន្ត្រីសុខាភិបាលអាស៊ានបានយល់ព្រមពង្រីកកិច្ចសហប្រតិបត្តិការក្នុងតំបន់ ពង្រឹងសមត្ថភាពប្រព័ន្ធសុខាភិបាល និងជំរុញសន្តិសុខសុខភាព ដោយបង្កើតគំនិតផ្តួចផ្តើមដូចជាបណ្តាញមជ្ឈមណ្ឌលប្រតិបត្តិការគ្រាអាសន្នអាស៊ាន មជ្ឈមណ្ឌលវាយតម្លៃហានិភ័យ និងទំនាក់ទំនងហានិភ័យអាស៊ាន និងយន្តការសំខាន់ៗផ្សេងទៀតក្នុងតំបន់៕អត្ថបទ រដ្ឋា

ក្នុងករណីគ្រោះរញ្ជួយដីនៅជប៉ុន៖ រដ្ឋមន្ត្រីក្រសួងការងារ ណែនាំឱ្យពលករខ្មែរស្តាប់ការណែនាំរបស់អាជ្ញាធររបស់ជ៉ុន និងជូនពរឱ្យមានសុវត្ថិភាព

ភ្នំពេញ ៖ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈឯកឧត្តម ហេង សួរ នៅថ្ងៃទី០៨ ខែសីហា ឆ្នាំ២០២៤នេះ បានណែនាំឱ្យពលរដ្ឋខ្មែរ និងពលករដែលកំពុងស្នាក់នៅក្នុងខេត្តជាប់ឆ្នេរសមុទ្រទាំង៥ឱ្យស្តាប់ការណែនាំរបស់អាជ្ញាធរជប៉ុន។ តាមបណ្តាញសង្គមផ្លូវការ ឯកឧត្តមរដ្ឋមន្ត្រីបានបញ្ជាក់ថា “សូមបងប្អូនប្រជាពលរដ្ឋខ្មែរដែលកំពុងរស់នៅតំបន់ខាងលើ មានការប្រុងប្រយ័ត្នខ្ពស់ និងអនុវត្តតាមការណែនាំរបស់អាជ្ញាធរមូលដ្ឋានក្នុងករណីមានការជម្លៀសទៅកាន់កន្លែងមានសុវត្ថិភាព ហើយប្រសិនបើបងប្អូនបានទទួលព័ត៌មានអំពីករណីពលរដ្ឋខ្មែរយើងដែលរងផលប៉ះពាល់ សូមមេត្តាជូនដំណឹងមកស្ថានទូតជាបន្ទាន់តាមរយៈហ្វេសប៊ុកស្ថានឯកអគ្គរាជទូតកម្ពុជាប្រចាំប្រទេសជប៉ុន Royal Embassy of Cambodia in Japan ឬ 080 4689 9374”។ជាមួយគ្នានេះ ឯកឧត្តម ហេង សួរ ក៏បានជូនពរឱ្យបងប្អូនទាំងអស់គ្នាជួបសុខសុវត្ថិភាព ចៀសផុតពីគ្រោះធម្មជាតិនេះផងដែរ។គួរបញ្ជាក់ថា យោងតាមការផ្សព្វផ្សាយរបស់ទីភ្នាក់ងារឧតុនិយមជប៉ុននៅរសៀលថ្ងៃទី០៨ ខែសីហា ឆ្នាំ២០២៤នេះ មានគ្រោះរញ្ជួយដីកម្រិត៦រ៉ិចទ័រដែលអាចបង្កឱ្យមានហានិភ័យនៃរលកយក្សស៊ូណាមិនៅតាមតំបន់ជាប់មាត់សមុទ្រនៃខេត្ត Kochi, ខេត្ត Miyazaki, ខេត្ត Oita, ខេត្ត Kagoshima និងខេត្ត Ehime៕

បណ្តាគណបក្សនយោបាយចេញញត្តិថ្កោលទោសជនក្បត់ជាតិសម រង្ស៊ីដែលញុះញង់ឲ្យពលរដ្ឋខ្មែររត់រកសេចក្តីស្លាប់

ភ្នំពេញ ៖ បណ្តាគណបក្សនយោបាយនានានៅកម្ពុជា នៅថ្ងៃទី៨ ខែសីហា ឆ្នាំ២០២៤នេះ បានចេញ្ញត្តិថ្កោលទោសជាបន្តបន្ទាប់ដោយដាច់អហង្ការ ចំពោះជនក្បត់ជាតិបីជំនាន់ សម រង្ស៊ី ដែលបានធ្វើការញុះញង់ឲ្យបងប្អូនប្រជាពលរដ្ឋខ្មែររត់រកសេចក្តីស្លាប់តាមរយៈធ្វើបាតុកម្មហិង្សាដូចប្រទេសបង់ក្លាដេស។តាមរយៈញ្ញត្តិថ្កោលទោសរបស់បណ្តាគណបក្សនយោបាយនានា ដែលបានចេញដាច់ដោយឡែកពីគ្នា នាថ្ងៃនេះ បានលើកឡើងថា ការញុះញង់របស់ទណ្ឌិតក្បត់ជាតិបីជំនាន់ សម រង្សី គឺជាការព្យាយាមញុះញង់ឲ្យពលរដ្ឋខ្មែរយកជីវិតទៅស្លាប់រាប់រយនាក់ក្នុងបាតុកម្មហឹង្សាដូចប្រទេសបង់ក្លាដេស ហើយបណ្តាគណបក្សទាំងនោះបានចាត់ទុកថា ទង្វើរបស់ជននេះ គឺមានចេតនាបំផ្លាញជាតិសាសន៍ខ្លួនឯងសុទ្ធសាធ។ តាមរយៈញ្ញតិ្តថ្កោលទោសនេះ បានឲ្យដឹងថា នៅថ្ងៃទី៨ ខែសីហា ឆ្នាំ២០២៤ ផេកផ្លូវការណ៍របស់ទណ្ឌិត សម រង្ស៊ី បានធ្វើការផ្សព្វផ្សាយវីដេអូដែលមានរយៈ ពេល១នាទី១៣វិនាទី បានបញ្ជាក់ថា បាតុកម្មនាប្រទេសបង់ក្លាដេស គឺមានបាតុករជាង៣០០នាក់ត្រូវស្លាប់រហូតទើបធ្វើឲ្យរដ្ឋាភិបាលបង់ក្លាដេសអាណិតប្រជាពលរដ្ឋខ្លួនសម្រេចនាំមេដឹកនាំប្រទេសចាកចេញពីប្រទេស ហើយនៅទីបំផុតក្រុមបាតុករក៏បានជោគជ័យ។ ការនិយាយរបស់ទណ្ឌិត សម រង្ស៊ី នេះគឺមានលក្ខណៈញុះញង់ ប៉ះបំបោរចង់ផ្ដួលរលំរាជារដ្ឋាភិបាលស្របច្បាប់ ចង់ឲ្យពលរដ្ឋខ្មែរយកជីវិតទៅធ្វើបាតុកម្មហឹង្សាស្លាប់ឲ្យបានច្រើនរយនាក់ដូចប្រទេសបង់ក្លាដេស។ បណ្តាគណបក្សនយោបាយទាំងនោះបានយល់ឃើញថានេះគឺជាទង្វើដ៏អាក្រក់បំផុតដែលរូបទណ្ឌិត សម រង្ស៊ី បាននឹងកំពុងប្រមាថជីវិតរបស់ប្រជាពលរដ្ឋខ្មែរខ្លួនឯង ដោយព្យាយាមញុះញង់អូសទាញពលរដ្ឋឲ្យយកជីវិតទៅស្លាប់ដើម្បីបម្រើមហិច្ឆិតា និងគំនុំរបស់ខ្លួន។ ពួកគេបានបន្ថែមថា«អស់រយៈពេលជាច្រើនឆ្នាំមកនេះទណ្ឌិត សម រង្ស៊ី តែងបានបំផុសបំផុលញុះញង់ពលរដ្ឋគ្រប់រូបភាព ដើម្បីធ្វើអោយប្រទេសជាតិមានចលាចលមិនឈប់មិនឈរ»។គណបក្សនយោបាយទាំងនោះបានប្រកាសថា« សូមថ្កោលទោសប្រឆាំងយ៉ាងដាច់អហង្កាចំពោះទណ្ឌិត សម រង្ស៊ី និងបុគ្គលអ្នកនយោបាយទាំងឡាយណាដែលព្យាយាមញុះញង់ឲ្យប្រជាពលរដ្ឋខ្មែរយកជីវិតទៅស្លាប់ ដើម្បីបំពេញមហិច្ឆិតារបស់ខ្លួន និងសូមអំពាវដល់បងប្អូនខ្មែរទូទាំងប្រទេស សូមកុំជឿ និងលុងអ្នកនយោបាយណាមួយដែលអូសទាញឲ្យបងប្អូនទាំងអស់ឲ្យខាតបង់ផលប្រយោជន៍ និងគ្រោះថ្នាក់ដល់អាយុជីវិតជាយថាហេតុ និងសូមចាត់ទុកបុគ្គលទណ្ឌិត សម រង្ស៊ី ថាជាជនបំផ្លាញ ជាតិសាសន៍ ដែលច្បាប់មិនគួរត្រូវលើកលែងជាដាច់ខាត»។ជាមួយគ្នានោះដែរបណ្តាគណបក្សនយោបាយទាំងនោះ បានប្រកាសសូមប្ដេជ្ញាចិត្តចូលរួមទប់ស្កាត់ និងកម្ចាត់ចោលនយោបាយជ្រុលនិយមទាំងឡាយណា ដែលធ្វើសកម្មភាពនយោបាយទុច្ចរិតញុះញង់លាបពណ៌ឱ្យខ្មែរបែកបាក់សាមគ្គីផ្ទៃក្នុង ដើម្បីបម្រើនយោបាយឱ្យបរទេស ឈ្លានពាន ជាមួយភាពទុច្ចរិតក្នុងការប៉ុនប៉ងដណ្ដើមអំណាចស្របច្បាប់របស់កម្ពុជា គឺត្រូវតែកម្ចាត់ជនទាំងឡាយនោះ ឱ្យបានជាដាច់ខាត និងសូមប្រកាសចូលរួមចំណែកការពាររដ្ឋធម្មនុញ្ញឆ្នាំ១៩៩៣ ព្រមទាំងបន្តការគាំទ្ររាជរដ្ឋាភិបាលកម្ពុជា ស្របច្បាប់ តាមគោលការណ៍លទ្ធិប្រជាធិបតេយ្យ សេរីពហុបក្ស និងការអនុវត្តតាមច្បាប់គណបក្សនយោបាយនៅកម្ពុជាផងដែរ៕អត្ថបទ ៖ បាន ចក់

បណ្ដាញសង្គម

ព័ត៌មានថ្មីៗ

UN ព្រួយបារម្ភយ៉ាងខ្លាំងចំពោះការសម្លាប់ជនស៊ីវិលហ្កាហ្សាដោយអ៊ីស្រាអែល នៅជិតខ្សែបន្ទាត់បទឈប់បាញ់

ជនជាតិហ្គាណា ៣០០នាក់ វិលត្រឡប់មកពីអាហ្វ្រិកខាងត្បូងវិញ បន្ទាប់ពីមានភាពតានតឹងប្រឆាំងជនអន្តោប្រវេសន៍

ផ្ទុះស៊ីទែនស្តុកគីមីនៅរដ្ឋវ៉ាស៊ីនតោន បានបណ្តាលឲ្យមនុស្សយ៉ាងតិច ២នាក់ ស្លាប់ និង ៩នាក់ បាត់ខ្លួន

ន័រវែសនឹងចូលរួមកម្មវិធីទប់ស្កាត់នុយក្លេអ៊ែរដឹកនាំដោយប្រទេសបារាំង

អារ៉ាប៊ីសាអ៊ូឌីតផ្តល់ជំនួយដល់ប្រទេសយេម៉ែននូវផលិតផលប្រេងដែលមានតម្លៃ ១៥០លានដុល្លារ អាមេរិក

មន្ត្រីជាន់ខ្ពស់ក្រុមហេសបូឡាបដិសេធការរំសាយអាវុធ ខណៈអ៊ីស្រាអែលបន្តវាយប្រហារនៅភាគខាងត្បូងលីបង់

នាយករដ្ឋមន្ត្រីអ៊ីរ៉ាក់ជំរុញឲ្យក្រុមប្រដាប់អាវុធធ្វើប្រតិបត្តិការ ក្រោមអំណាចរបស់រដ្ឋ

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877