BTV NEWS

ឃាត់ខ្លួនជនជាតិចិន៤នាក់ ធ្វើសកម្មចូលបន្លំលួចលុយតាមទីតាំងដូរប្រាក់វីងជាច្រើនកន្លែង ក្នុងរាជធានីភ្នំពេញ

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាអធិបតីដ៏ខ្ពង់ខ្ពស់ចូលរួម «ពិធីបើកយុទ្ធនាការ ១ម៉ឺនរៀល ១ម៉ឺននាក់» ឆ្នាំ២០២៦ និង«ពិធីសំណេះសំណាល និងប្រគល់-ទទួលថវិកាបរិច្ចាគពីវិស័យឯកជន ជូនមូលនិធិគន្ធបុប្ផាកម្ពុជា»

លោកជំទាវបណ្ឌិត ពេជ ចន្ទមុន្នី៖ កម្លាំងសាមគ្គីជាតិផុលផុសបានជួយសង្គ្រោះកុមារកម្ពុជាដែលជាធនធានមនុស្សអនាគតរាប់ម៉ឺនាក់ក្នុងមួយឆ្នាំៗ

មួយឆ្នាំមកនេះ រាជរដ្ឋាភិបាលបានខិតខំគ្រប់បែបយ៉ាង ដើម្បីការពារបូរណភាពទឹកដី និងរក្សាការពារសន្តិភាព

ព័ត៌មានជាតិ

រដ្ឋមន្ត្រីក្រសួងវប្បធម៌ និងវិចិត្រសិល្បៈ និងឯកអគ្គរដ្ឋទូតចិនប្រចាំព្រះរាជាណាចក្រកម្ពុជាជួបពិភាក្សាគ្នាផ្តោតលើកិច្ចសហប្រតិបត្តិការ និងការគាំទ្រគ្នាទៅ វិញទៅមកនៅលើឆាកអន្តរជាតិក្នុងវិស័យវប្បធម៌

ភ្នំពេញ ៖ លោកជំទាវបណ្ឌិតសភាចារ្យរដ្ឋមន្ត្រី ភឿង សកុណា រដ្ខមន្ត្រីក្រសួងវប្បធម៌ និងវិចិត្រសិល្បៈ បានទទួលជួបឯកឧត្តម Wang Wenbin ឯកអគ្គទូតវិសាមញ្ញនិងពេញសមត្ថភាពនៃសាធារណរដ្ឋប្រជាមានិតចិនប្រចាំព្រះរាណាចក្រកម្ពុជានៅសាកលវិទ្យាល័យភូមិន្ទវិចិត្រសិល្បៈនៅរសៀលថ្ងៃទី៧ ខែសីហា ឆ្នាំ ២០២៤ ។ ដែលក្នុងជំនួបនេះផងដែរ ភាគីទាំងពីរបានរំលឹកអំពីទំនាក់ទំនងកិច្ចសហប្រតិបត្តិការ និងការគាំទ្រគ្នាទៅវិញទៅមកនៅលើ ឆាកអន្តរជាតិក្នុងវិស័យវប្បធម៌នៃប្រទេសទាំងពីរ ខណះដែលឆ្នាំ២០២៤នេះគឺ ឆ្នាំផ្លាស់ប្តូរប្រជាជននិងប្រជាជន កម្ពុជា-ចិន ។លោកជំទាវបណ្ឌិតសភាចារ្យរដ្ឋមន្ត្រី ក្រៅពីមាន ប្រសាសន៍អបអរសាទរចំពោះឯកឧត្តម Wang Wen bin ដែលត្រូវបានតែងតាំងជាឯកអគ្គរដ្ឋទូតនៅកម្ពុជា និងបានរំលឹកពីកិច្ចសហប្រតិ បត្តិការដែលធ្លាប់មានកន្លងមកលើវិស័យវប្បធម៌។លោកជំទាវក៍បានថ្លែងអំណរគុណដល់ស្ថានទូតចិនប្រចាំនៅកម្ពុជា ដែលជានិច្ចកាល បានផ្តល់នូវកិច្ចសហការនិងសម្រប សម្រួលលើគ្រប់កម្មវិធីនិងព្រឹត្តិការណ៍ ទាំងនៅក្នុងប្រទេសកម្ពុជា ក៏ដូចជានៅក្នុងប្រទេសចិន ដែលនាំឱ្យប្រទេសយើងទាំងពីរអាចរៀបចំនិងប្រារព្ធរួមគ្នានូវការងារជា ច្រើន ដោយរាប់បញ្ចូលទាំងព្រឹត្តិការណ៍សិល្បៈ សិក្ខាសាលា វគ្គបណ្តុះបណ្តាលការផ្លាស់ប្តូរអ្នកជំនាញ ទាំងទៅលើវិស័យអភិរក្សបេតិកភណ្ឌ វិស័យសិល្បៈ និងវិស័យភាពយន្ត ជាដើម។ លោកជំទាវរដ្ឋមន្ត្រីក៏បានប្រកាស បន្តធ្វើការឱ្យកាន់តែជិតស្និទ្ធជា មួយស្ថានទូតចិននៅភ្នំពេញ ដើម្បីបន្តពង្រីកសកម្មភាពរួមគ្នា ចូល រួមដល់ការពង្រឹងទំនាក់ទំនងមិត្តភាពរបស់ប្រទេសទាំងពីរទៅតាមជំហរដឹកនាំដ៏ខ្ពង់ខ្ពស់របស់ថ្នាក់ដឹកនាំកំពូល នៃរដ្ឋាភិបាលរបស់ប្រទេសទាំងពីរគឺ “មិត្តភាពដែកថែបកម្ពុជា-ចិន” ៕អត្ថបទ,ភារម្យ

រដ្ឋមន្រ្តីកសិកម្មណែនាំក្រុមការងារអច្ឆរិយភាពទន្លេមេគង្គ ជួយបង្កកំណើតប្រភេទសត្វកម្រដើម្បីបង្កើនសត្វក្នុងធម្មជាតិ

ភ្នំពេញ ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ កាលពីកន្លងទៅនេះ បានទទួលជួបសម្តែងការគួរសម និងពិភាក្សាការងារជាមួយក្រុមការងារអច្ឆរិយភាពនៃទន្លេមេគង្គ (Wonders of the Mekong) ដើម្បីពិភាក្សាមួយចំនួនពាក់ព័ន្ធការបង្ករបង្កើនសត្វក្នុងធម្មជាតិ។ ប្រភពក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី៨ សីហា ឆ្នាំ២០២៤នេះ បានលើកឡើងក្នុងផេកផ្លូវការថា នៅក្នុងជំនួបនាឱកាសនោះ ឯកឧត្តមរដ្ឋមន្ត្រី បានសម្តែងនូវការស្វាគមន៍ ដល់ក្រុមការងារអច្ឆរិយភាពនៃទន្លេមេគង្គ ក្នុងការពិនិត្យលទ្ធភាពសហការធ្វើការជាមួយគ្នា ដើម្បីឱ្យមានភាពប្រសើរឡើងនូវធនធានធម្មជាតិនៃទន្លេមេគង្គ ដែលមានសារៈប្រយោជន៍សម្រាប់មនុស្សជាតិ។ ជាមួយគ្នានេះ ឯកឧត្តម បានណែនាំឱ្យក្រុមការងារត្រូវគិតគូរពីយុទ្ធសាស្រ្តគ្រប់គ្រងធនធានធម្មជាតិឱ្យមានតុល្យភាព ដោយកំណត់អំពីបរិមាណតម្រូវការចំណីអាហាររបស់ប្រជាពលរដ្ឋ ប្រកបដោយប្រសិទ្ធភាព និងមាននិរន្តរភាព។ លើសពីនេះទៅទៀត ឯកឧត្តមរដ្ឋមន្ត្រី បានគូសបញ្ជាក់ប្រាប់ក្រុមការងារ ត្រូវមានគោលដៅពិនិត្យមើលអំពីលទ្ធភាពបង្កកំណើត និងបង្កាត់ប្រភេទ ត្រីបបែលយក្ស សត្វផ្សោត ត្រីគល់រាំង និងសត្វកម្រផ្សេងៗទៀត ដើម្បីបង្កើនចំនួននៃសត្វទាំងនេះ នៅក្នុងធម្មជាតិ។ជាយន្តការបន្ទាប់ ឯកឧត្តមរដ្ឋមន្ត្រី បានជំរុញឱ្យក្រុមការងារអច្ឆរិយភាពនៃទន្លេមេគង្គ ចូលរួមសហការជាមួយរដ្ឋបាលជលផល សាកលវិទ្យាល័យភូមិន្ទកសិកម្ម ហើយក្រសួងនឹងជួយគាំទ្រទាំងលក្ខណៈផ្លូវច្បាប់ និងបច្ចេកទេស៕អត្ថបទ ឈិត បូរ៉ាវី

ក្រសួងការងារ ផ្សព្វផ្សាយឱកាសការងាររាប់ម៉ឺនកន្លែងដល់និស្សិតនៅសាកលវិទ្យាល័យធំៗចំនួន៤ នៅរាជធានីភ្នំពេញ

ទីភ្នាក់ងារជាតិមុខរបរ និងការងារ (NEA)នៃក្រសួងការងារ និងបណ្តុះបណ្តាលវិជ្ជាជីវៈតាមរយៈមជ្ឈមណ្ឌលការងារចល័ត នៅថ្ងៃទី៨ ខែសីហា ឆ្នាំ២០២៤នេះ បានចុះផ្សព្វផ្សាយឱកាសការងាររ៉ាប់ម៉ឺនកន្លែងដល់និស្សិតនៅសាកលវិទ្យាល័យធំៗចំនួន៤ នៅរាជធានីភ្នំពេញ។ សាកលវិទ្យាល័យធំៗទាំងនោះរួមមានសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE) , សាកលវិទ្យាល័យភូមិន្ទវិចិត្រសិល្បះ (RUFA) , សាកលវិទ្យាល័យអន្តរជាតិ ( IU) និងសាកលវិទ្យាល័យបញ្ញាសាស្រ្តកម្ពុជា(PUC)។ លោក ជិន ខិ អនុប្រធានមជ្ឈមណ្ឌលការងាររាជធានីភ្នំពេញនៃទីភ្នាក់ងារជាតិមុខរបរ និងការងារ នៃក្រសួងការងារ និងបណ្ដុះបណ្ដាលវិជ្ជាជីវៈ បានលើកឡើងថា មជ្ឈមណ្ឌលចល័តរបស់យើងបានចុះទៅដល់គ្រប់ទីកន្លែង មិនត្រឹមតែនៅតាមសាកលវិទ្យាល័យក្នុងរាជធានីភ្នំពេញនោះទេ ទីតាំងសាធារណៈផ្សេងៗទៀតក៏យើងទៅដល់ដែរ។ លោក ជិន ខិ បញ្ជាក់បន្ថែមថា តាមរយៈការផ្សព្វផ្សាយពីឱកាសការងារទៅដល់ទីកន្លែងនេះ យើងមើលឃើញថាមានការចាប់អារម្មណ៍ជាច្រើនពីសំណាក់យុវជន សិស្ស និស្សិត ក៏ដូចជាអ្នកកំពុងស្វែងរកការងារធ្វើ ឬអ្នកមានបំណងចង់ផ្លាស់ប្តូរការងារ។ លើសពីនេះទៀត យើងក៏ទទួលបានការសាកសួរព័ត៌មានអំពីឱកាសការងារក្នុងវិស័យផ្សេងៗជាច្រើនផងដែរ។លោកបានឱ្យដឹងទៀតថា ក្រៅពីការងារចុះផ្សព្វផ្សាយពីឱកាសការងារដល់ទីតាំងផ្ទាល់នេះ ទីភ្នាក់ងារជាតិមុខរបរ និងការងារ ក៏នឹងបន្តរៀបចំវេទិកាការងារ ពិព័រណ៍ការងារ និងកិច្ចសម្ភាសការងារជាប្រចាំ ដើម្បីបង្កើតជាកន្លែងជួបជុំគ្នាដោយងាយស្រួលរវាងអ្នកស្វែងរកការងារធ្វើ និងនិយោជកដែលកំពុងត្រូវការជ្រើសរើសបុគ្គលិកអាចពិភាក្សា និងស្វែងយល់អំពីតម្រូវការជំនាញ នៅក្នុងទីផ្សារការងារ ដែលកំពុងមានតម្រូវការនាពេលបច្ចុប្បន្នផងដែរ។ការចុះផ្សព្វផ្សាយនេះធ្វើឡើងតាមរយៈមជ្ឈមណ្ឌលចល័តនេះ ដែលនេះគឺជាយន្តការបន្តសកម្មភាពផ្សព្វផ្សាយឱកាសការងារនៅតាមសាកលវិទ្យាល័យនានា ដើម្បីផ្តល់ព័ត៌មានអំពីទីផ្សារការងារ និងនាំយកឱកាសការងារឱ្យខិតជិតដល់យុវជន សិស្ស និស្សិត សាធារណជនទូទៅ ក្នុងគោលបំណងបង្កើនលទ្ធភាពនៃការទទួលបានព័ត៌មានការងារ និងឱកាសការងារកាន់តែឆាប់រហ័ស៕

ឯកឧត្តម ឌិត ទីណា៖ កម្ពុជាបើកទូលាយសម្រាប់អ្នកវិនិយោគលើវិស័យផ្នែកកែច្នៃ និងវេចខ្ចប់ស្រូវអង្ករសម្រាប់ការនាំចេញ

ភ្នំពេញ ៖ ឯកឧត្តម ឌិត ទីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ និងថ្នាក់ដឹកនាំ បានទទួលជួបសម្តែងការគួរសមជាមួយឯកឧត្តម Shaharuddin Onn ឯកអគ្គរាជទូតម៉ាឡេស៊ីថ្មី ប្រចាំនៅកម្ពុជា នៅទីស្តីការក្រសួងកសិកម្ម។ ក្រោយចប់ជំនួបនេះ ក្រសួងកសិកម្ម រុក្ខាប្រមាញ់ និងនេសាទ បានឲ្យដឹងលើផេកផ្លូវការ នៅរសៀលថ្ងៃទី៨ សីហា ឆ្នាំ២០២៤នេះថា ក្នុងជំនួបនេះ ឯកឧត្តមរដ្ឋមន្ត្រី បានសម្តែងនូវការសាទរ និងស្វាគមន៍ឯកឧត្តមឯកអគ្គរាជទូតថ្មី ក្នុងបេសកកម្មបន្តពង្រឹងកិច្ចសហប្រតិបត្តិការរវាងប្រទេសទាំងពីរ និងជំរុញការវិនិយោគលើការកែច្នៃស្រូវអង្ករទៅប្រទេសម៉ាឡេស៊ី។ នៅក្នុងវិស័យកសិកម្ម ឯកឧត្តមរដ្ឋមន្ត្រី បានគូសបញ្ជាក់ថា ការកសាងទំនុកចិត្តជាមួយវិស័យឯកជន គឺជារឿងចាំបាច់ ដើម្បីសហការរួមគ្នាឈានទៅផ្តល់ផលចំណេញទាំងអស់គ្នា និងមាននិរន្តរភាពសេដ្ឋកិច្ចពិតប្រាកដ។បើតាម ឯកឧត្តមរដ្ឋមន្ត្រី កម្ពុជាបើកទូលាយសម្រាប់អ្នកវិនិយោគមកវិនិយោគលើផ្នែកកែច្នៃ វេចខ្ចប់ស្រូវអង្ករសម្រាប់នាំចេញទៅទីផ្សារអន្តរជាតិ ហើយកម្ពុជាមានកសិផលជាច្រើនទៀត ដែលមានគុណភាពល្អប្រណិត (Premium) ដោយមិនប្រកួតលើបរិមាណនោះទេ។ ក្រសួងកសិកម្ម បានបញ្ជាក់បន្ថែមថា ឆ្លៀតក្នុងឱកាសនោះដែរ ឯកឧត្តម ឌិត ទីណា ក៏បានលើកឡើងពីព្រែកជីកហ្វូណនតេជោ ដែលមានអត្ថប្រយោជន៍យ៉ាងច្រើនសម្រាប់ប្រជាជន និងសេដ្ឋកិច្ចកម្ពុជា ក្នុងការកាត់បន្ថយរយៈពេល និងតម្លៃនៃការដឹកជញ្ជូន ការបង្កើតតំបន់ពាណិជ្ជកម្ម ជួយគាំទ្រដល់ការអភិវឌ្ឍក្នុងវិស័យកសិកម្ម ធារាសាស្ត្រ វារីប្បកម្ម ជាពិសេសជួយគាំទ្រដល់ការអភិវឌ្ឍប៉ូលសេដ្ឋកិច្ចទី៤ របស់កម្ពុជា៕អត្ថបទ ឈិត បូរ៉ាវី

សម្ដេចតេជោ ហ៊ុន សែន បញ្ចេញរូបថតមួយចំនួនដែលសម្ដេចមិនធ្លាប់បានឃើញ ទទួលបានពីមហាជន

ភ្នំពេញ៖ សម្តេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភា និងជាប្រធានក្រុមឧត្តមប្រឹក្សាផ្ទាល់ ព្រះមហាក្សត្រនៃព្រះរាជាណាចក្រកម្ពុជានៅរសៀលថ្ងៃទី៨ ខែសីហា ឆ្នាំ២០២៤នេះ បានបញ្ចេញរូបថតមួយចំនួនដែលសម្ដេចមិនធ្លាប់បានឃើញ ទទួលបានមកពីមហាជនផ្ដល់ជូន និងផ្សព្វផ្សាយនៅលើបណ្ដាញសង្គម។សម្ដេចតេជោ ហ៊ុន សែន មានប្រសាសន៍ថា៖ «មួយរយៈមកនេះមានការបញ្ចេញរូបថតរបស់ខ្ញុំដែលខ្ញុំមិនធ្លាប់ឃើញឬធ្លាប់ឃើញតែមិនដឹងថាថតនៅពេលណានៅកន្លែងណា អ្នកណាជាអ្នកថត?។ រូបថតភាគច្រើនមានទឹកមុខញញឹម។សម្ដេចតេជោបញ្ជាក់ថា៖«មនុស្សដូចខ្ញុំនេះពេលថតរូបឲ្យដឹងខ្លួន និងឲ្យញញឹមដាក់កាមេរ៉ាមិនចេះញញឹម ទេតែបើលួចថតមិនឲ្យដឹងខ្លួនទើបមានទឹកមុខញញឹម»៕

សិស្សសាលា ប៊ែលធី ក្លាយជាជ័យលាភីក្នុងការជជែកដេញដោលយុវជនថ្នាក់ជាតិឆ្នាំ ២០២៤

សិស្សសាលា ប៊ែលធី អន្តរជាតិ បានក្លាយជាជើងឯក ក្នុងការប្រកួតប្រជែងជជែកដេញដោលយុវជនថ្នាក់ជាតិ ឆ្នាំ២០២៤ ដែលរៀបចំដោយក្រសួងអប់រំ យុវជន និងកីឡា។ រីឯជ័យលាភីលេខពីរបានទៅក្រុមសិស្សមកពី វិទ្យាល័យ ហ៊ុន សែន កំពង់ចាម សាលារៀនជំនាន់ថ្មី។ការប្រកួតជជែកដេញដោលយុវជន ថ្នាក់ជាតិ ឆ្នាំ២០២៤ បានឈានដល់វគ្គផ្ដាច់ព្រ័តនៅថ្ងៃទី៨ ខែសីហា ឆ្នាំ២០២៤នេះ។ វគ្គផ្ដាច់ព្រ័ត ធ្វើឡើងលើប្រធានបទ «ការបង្កើនសាលារៀនគំរូ គឺជាមាគ៌ាអាទិភាពក្នុងការលើកកម្ពស់គុណភាពអប់រំនៅកម្ពុជា»។ ការប្រកួតនេះក្រុមស្រប គឺជាសិស្សមកពីវិទ្យាល័យ ហ៊ុន សែន កំពង់ចាម សាលារៀនជំនាន់ថ្មី។ រីឯក្រុមបដិសេធ ជាសិស្សមកពីសាលាប៊ែលធីអន្តរជាតិ។ក្រោយបញ្ចប់ការប្រកួតយ៉ាងស្វិតស្វាញ ជ័យលាភីលេខ១ បានទៅក្រុមសិស្សមកពីសាលា ប៊ែលធី អន្តរជាតិ រីឯសិស្សវិទ្យាល័យ ហ៊ុន សែន កំពង់ចាម សាលារៀនជំនាន់ថ្មី ទទួលបានចំណាត់ថ្នាក់លេខ២។ លទ្ធផលទទួលបានពីការវាយតម្លៃ របស់ក្រុមគណៈមេប្រយោគ ដែលជាអ្នកជំនាញ។បន្ទាប់ពីទទួលជ័យលាភី ក្រុមសិស្សសាលា ប៊ែលធី បង្ហាញក្ដីរីករាយជាខ្លាំង ដែលក្រុមខ្លួនអាចសម្រេចបាន។ ជ័យលាភីនេះ ក៏ជាជ័យលាភីលើកទី១ សម្រាប់សាលាផងដែរ ដោយកន្លងទៅសាលារបស់ពួកគេ ទទួលបានត្រឹមចំណាត់ថ្នាក់លេខ ២ប៉ុណ្ណោះ។ ពួកគេក៏សូមសំណូមពរឱ្យយុវជនថ្នាក់ទី១១ ទូទាំងប្រទេស ចូលរួមក្នុងការប្រកួតនេះ ដើម្បីក្រេបយកចំណេះដឹង និងទទួលបានបទពិសោធន៍ និងការបណ្ដុះបណ្ដាលជាច្រើន។លោក ម៉ិល ផនសីហា ប្រធាននាយកដ្ឋានអប់រំយុវជន និងកុមារនៃក្រសួងអប់រំ លើកឡើងដែរថា ការចូលរួមក្នុងការប្រកួតប្រជែងនេះ ជាភាពចាំបាច់មួយដែល បេក្ខជននឹងទទួលបានអត្ថប្រយោជន៍ជាច្រើន។ អត្ថប្រយោជនលើសពីប្រាក់រង្វាន់។ បេក្ខជន គឺទទួលបានការបណ្ដុះបណ្ដាល ទទួលបានភាពក្លាហាន ទទួលបានការទំនាក់ទំនងសង្គម និងទទួលបានបទពិសោធន៍ជាច្រើន ដែលជាដើមទុនសម្រាប់ពេលអនាគត។ឯកឧត្តម ឧបនាយករដ្ឋមន្ត្រី ហង់ ជួនណារ៉ុន រដ្ឋមន្ត្រីក្រសួងអប់រំ ក៏បានកោតសសើរចំពោះសមត្ថភាពរបស់ក្រុមទាំងពីរផងដែរ។ ឯកឧត្តមលើកទឹកចិត្តឱ្យក្រុមទាំងពីរ ក៏ដូចជាសិស្សានុសិស្សទាំងអស់ ត្រូវបន្តខិតខំសិក្សា ដើម្បីក្លាយជាធនធានសម្រាប់អនាគតកម្ពុជា។សូមជម្រាបថា ការប្រកួតជជែកដេញដោលយុវជនថ្នាក់ជាតិនេះ ជាព្រឹត្តិការប្រកួតប្រចាំឆ្នាំ ដែលក្រសួងអប់រំ យុវជន និងកីឡា រៀបចំឡើងជាប្រចាំឆ្នាំ។ ការប្រកួតនេះ សម្រាប់សិស្សកម្រិតថ្នាក់ទី១១ ទាំងសិស្សសាលារដ្ឋ និងសិស្សសាលាឯកជន។ ការប្រកួតនៅក្នុងឆ្នាំ ២០២៤នេះ ក្រុមជ័យលាភីឆ្លងកាត់ ៣១ ប្រកួត ដែលចំណាយពេលរហូតដល់ ៨ខែ៕ អត្ថបទ៖ គឹម ហុក

សម្តេចធិបតី៖ រាជរដ្ឋាភិបាលកំពុងខិតខំបង្កើនធនធានមនុស្សក្នុងដំណើរឆ្ពោះទៅឆ្នាំ២០៥០

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានថ្លែងបញ្ជាក់អំពីការខិតខំជំរុញ បង្កើនធនធានមនុស្ស ដែលជាស្នូលនៃដំណើរឆ្ពោះទៅរកសម្រេចចក្ខុវិស័យឆ្នាំង២០៥០ នៃគោលនយោ បាយរបស់រាជរដ្ឋាភិបាល ។ក្នុងឱកាសអញ្ជើញជាអធិបតីសម្ពោធសាកលវិទ្យាល័យ De Montfort ដែលជាសាកលវិទ្យាល័យ លើកដំបូងរបស់ចក្រភពអង់គ្លេសលើទឹកដីកម្ពុជា នាព្រឹកថ្ងៃទី៨ ខែសីហានេះ សម្តេចធិបតី ហ៊ុន ម៉ាណែត បានថ្លែងថា រាជរដ្ឋាភិបាលនីតិកាលទី៧ នៃរដ្ឋសភា បានបន្តការយកចិត្តទុកដាក់ខ្ពស់ ក្នុងការបណ្ដុះធនធានមនុស្ស សម្រាប់ជំរុញការអភិវឌ្ឍប្រទេសជាតិឆ្ពោះទៅកាន់ប្រទេសមានចំណូលខ្ពស់ ស្របតាមចក្ខុវិស័យកម្ពុជាឆ្នាំ២០៥០ ។សម្តេចមហាបវរធិបតី ហ៊ុន ម៉ាណែត បានផ្តាំផ្ញើថា ដើម្បីឈានទៅដល់គោលដៅនេះ ស្ថាប័ន ឧត្តមសិក្សា គឺជាដៃគូសំខាន់ដែលមិនអាចខ្វះបានរបស់រាជរដ្ឋាភិបាល បើនិយាយជារួម និងដោយឡែក ស្ថាប័នឧត្តមសិក្សារបស់អង់គ្លេសថ្មីមួយនេះ ក៏មានតម្លៃបន្ថែមជាពិសេសរបស់ខ្លួនទាក់ទងទៅនឹងការចូល រួមចែករំលែកបទពិសោធន៍របស់អង់គ្លេសនៅក្នុងការកសាងសង្គម-សេដ្ឋកិច្ច និងឧស្សាហកម្មជឿនលឿន ដែលផ្អែកលើចំណេះដឹង និងជំនាញ ៕អត្ថបទ៖ មុត សុទ្ធ

ឯកឧត្តម លីធុជ ៖ គោលនយោបាយឈ្នះ-ឈ្នះរបស់សម្តេចតេជោ ផ្តល់ទំនុកចិត្តដល់អ្នកដោះមីន អាចធ្វើការដោយគ្មានការភ័យខ្លាចនោះឡើយ

ភ្នំពេញ ៖ គោលនយោបាយឈ្នះ-ឈ្នះរបស់សម្តេចតេជោ ហ៊ុន សែន អតីតនាយករដ្ឋមន្រ្តី គឺជាអំណាចនៃការផ្លាស់ប្តូរ និងបានបង្កើតបរិយាកាសមួយក្នុងការកសាងសហគម ន៍ឡើងវិញ ហើយអ្នកដោះមីនអាចធ្វើការដោយគ្មានការ ភ័យខ្លាច ។ នេះជាការលើកឡើងរបស់ ឯកឧត្តមបណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន និងជាប្រធានអនុសញ្ញាអូតាវ៉ាឆ្នាំ២០២៤ អញ្ជើញជាអធិបតីក្នុងកម្មវិធីបើកកិច្ចប្រជុំអនុសញ្ញាហាមប្រាមការប្រើប្រាស់មីនប្រឆាំងមនុស្ស៖ ជោគជ័យបញ្ហាប្រឈម និងឱកាស នាព្រឹកថ្ងៃទី០៨ ខែសីហា ឆ្នាំ២០២៤ នៅសណ្ឋាគារ Raffles Hotel Le Royal ដែលរៀបចំឡើងដោយគណៈកម្មាធិការកាកបាទក្រហមអន្តរជាតិ (ICRC) ក្រោមកិច្ចសហការជា មួយអាជ្ញាធរមីន និងអង្គភាពគាំទ្រការអនុវត្តអនុសញ្ញាអូតាវ៉ា (ISU)។ ក្នុងឱកាសនោះ ឯកឧត្តមទេសរដ្ឋមន្រ្តី បានសម្តែងនូវការដឹងគុណយ៉ាងជ្រាលជ្រៅចំពោះ សម្តេចតេជោ ហ៊ុន សែន អតីតនាយករដ្ឋមន្ត្រី នៃព្រះរាជាណាចក្រកម្ពុជា និងទស្សនៈវិស័យនយោបាយឈ្នះឈ្នះ ដែលបាននាំមកនូវសុខសន្តិ ភាព និងស្ថិរភាពយូរអង្វែងដល់ប្រទេសជាតិ ព្រោះបើគ្មានកត្តាសំខាន់ទាំងពីរនេះទេ វឌ្ឍនភាពដែលយើងបានធ្វើនៅ ក្នុងវិស័យសកម្មភាពមីននឹងមិនអាចទៅរួចនោះទេ។ ទន្ទឹមនឹងនោះ ឯកឧត្តមបណ្ឌិត លី ធុជ បានថ្លែងទៀតថា ជាមួយភាពជោគជ័យក្នុងវិស័យមីន កម្ពុជា មានកិត្តិយសដែលបានចូលកាន់តំណែងជាប្រធាន និងជាម្ចាស់ផ្ទះនៃកិច្ចប្រជុំត្រួតពិនិត្យលើកទី៥ ឬ កិច្ចប្រជុំកំពូលសៀមរាប-អង្គរ នៃអនុសញ្ញាអូតាវ៉ាឆ្នាំ២០២៤ ដើម្បីបន្តរក្សានូវស្មារតី និងគោលបំណងនៃអនុសញ្ញាក្នុងការរួមចំណែកជំរុញគោលដៅរួមនៃពិភពលោកគ្មានការគំរាមពីមីនប្រឆាំងមនុស្ស ក្នុងនោះការជំរុញធ្វើសកលភាវូបនីយកម្មនៃអនុ សញ្ញាគឺចាំបាច់សម្រាប់ពិភពលោកមួយដែលគ្មានមីន។ឯកឧត្តមបណ្ឌិត លី ធុជ បានគូសបញ្ជាក់ថា កិច្ចខិតខំប្រឹងប្រែងរបស់កម្ពុជាក្នុងការលើកកម្ពស់សកលភាវូប នីយកម្មនៃអនុសញ្ញានេះ នឹងមិនមានអ្វីកើតឡើងឡើយ ប្រ សិនបើគ្មានការដឹកនាំប្រកបដោយចក្ខុវិស័យ និងការណែនាំរបស់សម្តេចធីបតី ហ៊ុន ម៉ាណែត នាយករដ្ឋមន្ត្រីនៃព្រះ រាជាណាចក្រកម្ពុជា។ សម្តេចធិបតី បានបង្ហាញនូវការ ណែ នាំពិសេសក្នុងការលើកកម្ពស់គោលការណ៍នៃអនុសញ្ញាទាំងក្នុងតំបន់ និងនៅលើឆាកអន្តរជាតិ ដែលក្នុងនោះវិស័យការទូតបានរួមចំណែកយ៉ាងសំខាន់ក្នុងការពង្រឹងកិច្ចខិតខំប្រឹងប្រែងជាសកលក្នុងការលុបបំបាត់មីន។ មុននឹងបញ្ចប់ ក្នុងនាមរាជរដ្ឋាភិបាលកម្ពុជា និងជាប្រធានកិច្ចប្រជុំត្រួតពិនិត្យលើកទី៥ នៃអនុសញ្ញាអូតាវ៉ា ឯកឧត្តមបណ្ឌិត លី ធុជ បានថ្លែងអំណរគុណដល់គណៈកម្មាធិការកាកបាទក្រហមអន្តរជាតិ(ICRC) ចំពោះការលះបង់ឥតឈប់ឈរក្នុងការងារមនុស្សធម៌ ជាពិសេសក្នុងការគាំទ្រអនុសញ្ញាហាមប្រាមការប្រើប្រាស់មីនប្រឆាំងមនុស្ស ដែលអនុសញ្ញានេះតំណាងឱ្យសមិទ្ធផលសំខាន់មួយក្នុងការ ស្វែងរកសន្តិភាព និងសន្តិសុខអន្តរជាតិ ដែលក្នុងនោះអង្គភាព ISU គឺជាឆ្អឹងខ្នងមួយយ៉ាងសំខាន់ក្នុងជំរុញឱ្យគោលដៅរបស់អនុសញ្ញាទទួលជោគជ័យ។កិច្ចប្រជុំនេះ មានការចូលរួមពី លោក Paht Tanat ta nawin ប្រធានផ្នែកប្រតិបត្តិការ ICRC , លោក Juan Carlos Ruan នាយក ISU, តំណាងស្ថានទូតនិងក្រសួងការបរទេសឡាវ ជប៉ុន ចិន ថៃ ម៉ាឡេស៊ី និងហ្វីលីពីន និងតំណាង ICRC ប្រចាំប្រទេសថៃ ចិន និងកម្ពុជា៕អត្ថបទ ៖ ភារម្យ

រដ្ឋមន្ត្រីក្រសួងសុខាភិបាលកម្ពុជា ចូលរួមកិច្ចប្រជុំចង្អៀតរដ្ឋមន្ត្រីសុខាភិបាលអាស៊ានលើកទី១៦ នៅទីក្រុងវៀងចន្ទន៍

ទីក្រុងវៀងចន្ទន៍ សាធារណរដ្ឋប្រជាធិបតេយ្យប្រជាមានិតឡាវ៖ នាព្រឹកថ្ងៃទី៨ ខែសីហា ឆ្នាំ២០២៤ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រី ក្រសួងសុខាភិបាល បានអញ្ជើញដឹកនាំគណៈប្រតិភូក្រសួងសុខាភិបាល ចូលរួមកិច្ចប្រជុំចង្អៀតរដ្ឋមន្ត្រីសុខាភិបាលអាស៊ាន លើកទី១៦ (Retreat of the 16th ASEAN Health Ministers Meeting, AHMM) នៅទីក្រុងវៀងចន្ទន៍ នៃសាធារណរដ្ឋប្រជាធិបតេយ្យប្រជាមានិតឡាវ ដែលមានការចូលរួមពី ប្រទេសជាសមាជិកអាស៊ានទាំង១០ និងទីម័រឡេស្តេ ក្រោមមូលបទ «បរិវត្តកម្មភាពធន់នៃការអភិវឌ្ឍវិស័យសុខាភិបាលអាស៊ានក្នុងបរិបទថ្មី៖ការពង្រឹងសមត្ថភាពប្រព័ន្ធសុខាភិបាលក្រោយការរាតត្បាតនៃជំងឺ ដើម្បីលើកកម្ពស់ភាពធន់ក្នុងតំបន់»។កិច្ចប្រជុំធ្វើឡើងក្រោមប្រធានបទ៖ ចក្ខុវិស័យ និងការរៀបចំអាទិភាពសុខាភិបាល សម្រាប់អាស៊ានក្រោយឆ្នាំ២០២៥ ក្នុងគោលបំណងចែករំលែកបទពិសោធន៍នៃអន្តរាគមន៍ជាយុទ្ធសាស្រ្ត និងវឌ្ឍនភាព ដើម្បីកំណត់ទស្សនៈវិស័យ អាទិភាពសុខភាព កិច្ចខិតខំប្រឹងប្រែងក្នុងការលើកកម្ពស់ រក្សាសុខភាព និងសុខុមាលភាពប្រជាជាតិសហគមន៍អាស៊ាន។ រដ្ឋមន្រ្តីសុខាភិបាលអាស៊ានបានធ្វើអន្តរាគមន៍ ចែករំលែកទស្សនៈនិងការផ្លាស់ប្តូរផ្សេងទៀតលើប្រធានបទខាងលើ សម្រាប់តម្រង់ទិសដៅយុទ្ធសាស្ត្រសហគមន៍ប្រជាជាតិអាស៊ានក្រោយឆ្នាំ២០២៥ លើវិស័យសុខាភិបាល រួមទាំងអាទិភាពសុខភាពនាពេលអនាគត ពង្រឹងកម្មវិធី សកម្មភាពការងារ និងយន្តការដឹកនាំ វិស័យសុខាភិបាល និងកិច្ចសហប្រតិបត្តិការជាមួយដៃគូខាងក្រៅដោយគ្មានជម្លោះផលប្រយោជន៍។ក្នុងកិច្ចប្រជុំចង្អៀតរដ្ឋមន្ត្រីសុខាភិបាលអាស៊ាន ឯកឧត្តមសាស្ត្រាចារ្យរដ្ឋមន្ត្រី បានផ្តល់ជូនជាទស្សនទានអំពីបញ្ហាប្រឈមចម្បងៗនៃថ្នាក់តំបន់អំពីសុខភាពជារួម ពិសេសអំពីជំងឺឆ្លង ក៏ដូចជាជំងឺមិនឆ្លង ដែលបាន និងបន្តកើតឡើងថែមទៀត ដែលតម្រូវឱ្យសហគមន៍អាស៊ានត្រូវតែត្រៀមខ្លួនឱ្យបានកាន់តែប្រសើរ និងមាំទាំបំផុតឱ្យបានឆាប់រហ័ស តាមរយៈយន្តការសុវត្តិភាពផ្សេងៗ ដែលជាដំណោះស្រាយកម្រិតតំបន់៕ អត្ថបទ រដ្ឋា

ប្រធានអាជ្ញាធរជាតិប្រយុទ្ធនឹងជំងឺអេដស៍ ស្នើបណ្តាញអ្នកសារព័ត៌មាន ផ្សព្វផ្សាយឱ្យកាន់តែសកម្ម អំពីហានិភ័យនៃមេរោគអេដស៍

ភ្នំពេញ ៖ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ ស្នើបណ្តាញអ្នកសារព័ត៌មាន និងសិក្ខាកាមទាំងអស់ ចូលរួមផ្សព្វផ្សាយឱ្យកាន់តែសកម្មអំពីហានិភ័យនៃមេរោគអេដស៍ លើកទឹកចិត្តឱ្យអ្នកសង្ស័យទៅធ្វើតេស្តរកមេរោគអេដស៍ និងផ្សព្វផ្សាយពីរឿងរ៉ាវជោគជ័យនៃគ្រួសារដែលរងគ្រោះដោយសារមេរោគអេដស៍ និងចូលរួមលុបបំបាត់ការមាក់ងាយ និងរើសអើងលើគ្រប់ទម្រង់ ភេទ អ្នកផ្ទុកមេរោគអេដស៍ និងអ្នកជំងឺអេដស៍។ការថ្លែងរបស់ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ យ៉ាងដូច្នេះក្នុងពិធីបើកសិក្ខាសាលាជាមួយបណ្តាញសារព័ត៌មានស្តីពី ស្ថានភាព និងការចូលរួមឆ្លើយតបទៅនឹងមេរោគអេដស៍ និងជំងឺអេដស៍នៅប្រទេសកម្ពុជា នៅព្រឹកថ្ងៃទី៨ ខែសីហា ឆ្នាំ ២០២៤នេះ។ឯកឧត្តមទេសរដ្ឋមន្រ្តី បានបន្តថា កម្ពុជាយើងជាប្រទេសដែលទទួលបាននូវការទទួលស្គាល់ពីអង្គការយូអិនអេដស៍ថាឈរនៅលំដាប់កំពូលក្នុងការឆ្លើយតបនឹងមេរោគអេដស៍និងជំងឺអេដស៍ក្នុងតំបន់អាស៊ីប៉ាស៊ីហ្វ៊ិក។ ជោគជ័យរបស់កម្ពុជាគឺដោយសារមានសសរស្តម្ភ៣សំខាន់៖ ១- ភាពជា អ្នកដឹកនាំ ឬភាពជាម្ចាស់ ២- ភាពជាដៃគូ និង៣- ការវិនិយោគ។ នៅក្នុងភាពជាអ្នកដឹកនាំ ឬភាពជាម្ចាស់រាជរដ្ឋាភិបាលកម្ពុជាបានដាក់ចេញនូវផែនការយុទ្ធសាស្រ្តជាតិក្នុងឆ្លើយតបជាពហុវិស័យ និងផែនទីបង្ហាញផ្លូវឆ្ពោះទៅកាន់ចីរភាពនៃការឆ្លើយតប។ ជាពិសេសក្នុងខែមីនាឆ្នាំ២០២៤នេះ រាជរដ្ឋាភិបាលបានដាក់ចេញនូវគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ផងដែរ។ ចំពោះភាពដៃគូ យើងបានសហការគ្នាជាមួយម្ចាស់ជំនួយ ដៃគូអភិវឌ្ឍ អង្គការសង្គមស៊ីវិលធ្វើការឆ្លើយតបព្រមគ្នា។ ចំណែកឯការវិនិយោគវិញ រាជរដ្ឋាភិបាលបានចូលរួមចំណែកទិញឱសថប្រឆាំងនឹងមេរោគអេដស៍តាំងពីឆ្នាំ២០១៥មក ព្រមទាំងផ្តល់ការគាំទ្របុគ្គលិកជាប់កិច្ចសន្យាផងដែរ។ នៅក្នុងសន្និសីទអន្តរជាតិស្តីពីអេដស៍ មានវឌ្ឍនភាពខាងវិទ្យាសាស្ត្រ ដោយអ្នកស្រាវជ្រាវរកឃើញវិធីបង្ការការចម្លងមេរោគអេដស៍តាមរយៈការចាក់ថ្នាំ២ដងក្នុងមួយឆ្នាំ និងវិធីព្យាបាលឱ្យជាដាច់(បច្ចុប្បន្នបាន៧នាក់)ផងដែរ។ ប៉ុន្តែ វិធីសាស្ត្រចាក់ថ្នាំបង្ការត្រូវឆ្លងការពិនិត្យពីអង្គការសុខភាពពិភពលោកជាមុនសិន ហើយថ្នាំក៏អាចមានតម្លៃថ្លៃ។ បន្ថែមពីលើនោះ ក៏មានការព្រួយបារម្ភពីការកាត់បន្ថយការឆ្លងថ្មីដែលគោលដៅឆ្នាំ២០២៥ថាឱ្យមានចំនួន ៣៧០.០០០នាក់នៅជុំវិញពិភពលោកនោះ នៅក្នុងឆ្នាំ២០២៣មានអ្នកឆ្លងថ្មី១,៣លាននាក់នៅឡើយ។ ឯថវិកាឆ្លើយតបក៏មានការថយចុះផងដែរ។ ប៉ុន្តែ ថ្នាក់ដឹកនាំអង្គការអន្តរជាតិទប់ស្កាត់ការរីករាលដាលមេរោគអេដស៍ដូចជាអង្គការយូអិនអេដស៍ជាដើមលើកមតិឡើងថា គោលដៅបញ្ចប់អេដស៍នៅឆ្នាំ២០៣០ នៅតែអាចសម្រេចបាន ប្រសិនបើជំនួយហិរញ្ញវត្ថុមិនត្រូវបានកាត់បន្ថយ និងការគោរពសិទ្ធមនុស្សត្រូវបានលើកកម្ពស់គ្រប់ទីកន្លែង។ លោកវេជ្ជបណ្ឌិត ឈឹម សារ៉ាត់ នាយកប្រចាំតំបន់អាស៊ី អង្គការមូលនិធិថែទាំសុខភាពអ្នកជំងឺអេដស៍ បានលើកឡើងថា មកដល់ពេលនេះអង្គការមូលនិធិថែទាំសុខភាពអ្នកជំងឺអេដស៍ទូទាំងសកល បានសម្រេចនិងទទួលសមិទ្ធផលដ៏ធំធេងក្នុងបេសកកម្មរបស់ខ្លួនក្នុងការថែទាំនិងផ្តល់ឱសថព្រមទាំងការស្វែងរកការគាំទ្រដោយមិនគិតពីលទ្ធភាពនៃការបង់ថ្លៃ ដល់ប្រជាជនចំនួន២លាននាក់បាននិងកំពុងរស់នៅក្នុងការថែទាំ។ជាចុងក្រោយលោកស្រីវេជ្ជបណ្ឌិត ហួយ ស៊ីខេង ប្រធានកម្មវិធីប្រចាំប្រទេសកម្ពុជា AHF បានបញ្ជាក់ថា ផែនការបន្តរបស់អង្គការមូលនិធិថែទាំសុខភាពអ្នកជំងឺអេដស៍ គឺបន្តអនុវត្តគម្រោងសកម្មភាពបច្ចុប្បន្ន (គម្រោងបង្ការ ធ្វើតេស្ត ថែទាំព្យាបាល និងគម្រោគាំទ្របន្ថែម) អោយកាន់តែមានប្រសិទ្ធផល។ សាកល្បងចាប់ផ្តើមគម្រោងធ្វើតេស្តនិងព្យាបាលជម្ងឺកាមរោគ ដោយសហការណ៍ ជាមួយមជ្ឈមណ្ឌលជាតិប្រយុទ្ធជំងឺអេដស៍ សើរស្បែក និងកាមរោគ៕អត្ថបទ រដ្ឋា

បណ្ដាញសង្គម

ព័ត៌មានថ្មីៗ

កោះតៃវ៉ាន់ ជំរុញឱ្យអាមេរិក បន្តលក់អាវុធ ដោយលើកឡើងពីចំណងមិត្តភាពដ៏រឹងមាំរវាងភាគីទាំងពីរ

ប្រជាជនហ្កាហ្សា ប្រមូលផ្តុំគ្នាសម្រាប់ការបួងសួងបុណ្យ Eid ក្នុងពេលមានជម្លោះ និងការលំបាកនៅបន្ត

រដ្ឋមន្ត្រីការបរទេស៖ អាមេរិក មិនអនុញ្ញាតឱ្យមានករណីជំងឺអេបូឡាណាមួយ ចូលក្នុងប្រទេសបានទេ

អ្នកវិភាគ៖ ភាពមិនប្រាកដប្រជានៃនយោបាយអាមេរិក និងសង្គ្រាមនៅអ៊ីរ៉ង់ នឹងគ្របដណ្ដប់លើកិច្ចប្រជុំកំពូលសន្តិសុខអាស៊ី

ភាពតានតឹងថ្មីកើនឡើងនៅជុំវិញភាគខាងត្បូងប្រទេសអ៊ីរ៉ង់ បន្ទាប់ពីការវាយប្រហាររបស់អាមេរិក

ប្រមុខការទូតកម្ពុជា-ចិន បញ្ជាក់ឡើងវិញអំពីការពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយ និងសហការគ្នាយ៉ាងជិតស្និទ្ធក្នុងវេទិកាពហុភាគី ដើម្បីលើកកម្ពស់ស្ថិរភាពក្នុងតំបន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877