BTV NEWS

លោកជំទាវបណ្ឌិត ពេជ ចន្ទមុន្នី៖ កម្លាំងសាមគ្គីជាតិផុលផុសបានជួយសង្គ្រោះកុមារកម្ពុជាដែលជាធនធានមនុស្សអនាគតរាប់ម៉ឺនាក់ក្នុងមួយឆ្នាំៗ

មួយឆ្នាំមកនេះ រាជរដ្ឋាភិបាលបានខិតខំគ្រប់បែបយ៉ាង ដើម្បីការពារបូរណភាពទឹកដី និងរក្សាការពារសន្តិភាព

ប្រមុខការទូតកម្ពុជា-ចិន បញ្ជាក់ឡើងវិញអំពីការពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយ និងសហការគ្នាយ៉ាងជិតស្និទ្ធក្នុងវេទិកាពហុភាគី ដើម្បីលើកកម្ពស់ស្ថិរភាពក្នុងតំបន់

បច្ចុប្បន្នភាពករណីគ្រោះថ្នាក់ចរាចរណ៍នៅកំពង់ឆ្នាំង និងស្វាយរៀង៖ អ្នកសះស្បើយត្រឡប់ទៅផ្ទះវិញចំនួន ៨៥នាក់ ខណៈមន្រ្តីជំនាញបន្តយកចិត្តទុកដាក់ផ្ទាល់ដល់មន្ទីរពេទ្យ

ព័ត៌មានជាតិ

ឯកឧត្តមបណ្ឌិត លី ធុជ ថ្លែងអំណរគុណប្រទេសស្វីស សម្រាប់ការគាំទ្រដល់មន្ទីរពេទ្យគន្ធបុប្ផា និងការបោសសម្អាតមីននៅកម្ពុជា

តាងនាមរាជរដ្ឋាភិបាលកម្ពុជា ឯកឧត្តមបណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន ខណៈចូលរួមជាភ្ញៀវកិត្តិយស និងថ្លែងសុន្ទរកថា ក្នុងកម្មវិធីប្រារព្ធទិវាជាតិនៃសហព័ន្ធស្វីស នាថ្ងៃទី៨ ខែសីហា ឆ្នាំ២០២៤ នេះ ឯកឧត្តមបានវាយតម្លៃខ្ពស់នូវភាពជាដៃគូយូរអង្វែងរវាងកម្ពុជា-ស្វីស និងថ្លែងអំណរគុណសម្រាប់ការគាំទ្ររបស់ប្រទេសស្វីសដល់មន្ទីរពេទ្យគន្ធបុប្ផាអស់រយៈពេលជាង ៣០ឆ្នាំ ក្នុងការធ្វើឱ្យប្រសើរឡើងនូវលទ្ធផល នៃការថែទាំសុខភាពសម្រាប់កុមារកម្ពុជា និងបានជួយសង្គ្រោះជីវិតមនុស្សរាប់ មិនអស់និងជាពិសេសចំពោះតួនាទីជាប្រធាននៃអនុសញ្ញាហាមប្រាមមីនប្រឆាំងមនុស្ស របស់កម្ពុជា។ ក្នុងពិធីនោះ ឯកឧត្តមទេសរដ្ឋមន្រ្តី លី ធុជ បានលើកឡើងថា កម្ពុជា និងស្វីស មានទំនាក់ទំនងការទូតជាមួយគ្នាចាប់តាំងពីឆ្នាំ ១៩៦៣ មកម្ល៉េះ ដែលត្រូវបានកំណត់ដោយការគោរពគ្នាទៅវិញទៅមកការយោគយល់គ្នា និងការសហការគ្នា ហើយការប្រារព្ធទិវាជាតិនាថ្ងៃនេះ គឹដើម្បីគោរពដល់ស្មារតីនៃមិត្តភាព កិច្ចសហប្រតិបត្តិការ និងការគោរពគ្នាទៅវិញទៅមក ដែលបានចងភ្ជាប់ទំនាក់ទំនងរវាងប្រទេសទាំងពីរ។ ឯកឧត្តមទេសរដ្ឋមន្រ្តី លី ធុជ បានគូស បញ្ជាក់ទៀតថា ភាពជាដៃគូយូរអង្វែងរវាងប្រទេសទាំងពីរ គឺជាសក្ខីភាពមួយចំពោះការប្តេជ្ញាចិត្តរួមគ្នាសម្រាប់សន្តិភាព វិបុលភាព និងការអភិវឌ្ឍន៍ប្រកប ដោយចីរភាព ។ ប្រទេសស្វីស បានចូលរួមចំណែកយ៉ាងសំខាន់ក្នុងការអភិវឌ្ឍរបស់ប្រទេសកម្ពុជា តាមរយៈទីភ្នាក់ងារស្វីសសម្រាប់ការអភិវឌ្ឍន៍ និងកិច្ចសហប្រតិបត្តិការ(SDC) ហើយតាមរយៈគម្រោង SDC បានជួយលើកកម្ពស់ការអភិវឌ្ឍប្រកបដោយចីរភាព ការកែលម្អជីវភាពរស់នៅ និងការជំរុញកំណើនសេដ្ឋកិច្ចនៅកម្ពុជា។ក្នុងឱកាសនោះផងដែរ តាងនាមរាជរដ្ឋាភិបាល និងប្រជាជនកម្ពុជា ឯកឧត្តមទេសរដ្ឋមន្រ្តី លី ធុជ បានថ្លែងអំណរគុណយ៉ាងជ្រាលជ្រៅចំពោះការគាំទ្ររបស់ប្រទេសស្វីសដល់មន្ទីរពេទ្យគន្ធបុប្ផាអស់រយៈពេលជាង ៣០ ឆ្នាំ ក្នុងការធ្វើឱ្យប្រសើរឡើងនូវលទ្ធផលនៃការថែទាំសុខភាពសម្រាប់កុមារកម្ពុជា និងបានជួយ សង្គ្រោះជីវិតមនុស្សរាប់មិនអស់។ពាក់ព័ន្ធនឹងវិស័យសកម្មភាពមីន តាងនាម សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងជាប្រធានអាជ្ញាធរមីន ឯកឧត្តមបណ្ឌិត លី ធុជ បានកោតសរសើរ និងវាយតម្លៃខ្ពស់ចំពោះកិច្ចសហប្រតិបត្តិការ និងការគាំទ្ររបស់ប្រទេសស្វីស។ ការរួមចំណែករបស់រដ្ឋាភិបាលស្វីសចំពោះការបោសសម្អាតមីន គឺមានតម្លៃមិនអាចកាត់ថ្លៃបាន និងបានគូសបញ្ជាក់ពីសារៈសំខាន់នៃកិច្ចខិតខំប្រឹងប្រែងអន្តរជាតិក្នុងការដោះស្រាយបញ្ហាប្រឈមមនុស្សធម៌ និងការលើកកម្ពស់សន្តិភាព។ កម្ពុជាសង្ឃឹមថា ប្រទេសស្វីស ដែលជាដៃគូដ៏សំខាន់មួយ នឹងបន្តគាំទ្រដល់គោលដៅរបស់កម្ពុជាក្នុងការក្លាយជាប្រទេសគ្មានមីន។ ជាមួយគ្នានោះ ឯកឧត្តមទេសរដ្ឋមន្រ្តី លី ធុជ បានថ្លែងអំណរគុណសម្រាប់ការគាំទ្រជាបន្តបន្ទាប់របស់ប្រទេសស្វីសចំពោះតួនាទីជាប្រធាននៃអនុសញ្ញាហាមប្រាមមីនប្រឆាំងមនុស្ស និងកិច្ចប្រជុំត្រួតពិនិត្យឡើងវិញលើកទី៥ របស់ប្រទេសកម្ពុជា។ ការគាំទ្រនេះ គឺមានសារៈសំខាន់នៅក្នុងបេសកកម្មរួមគ្នាក្នុងការលុបបំបាត់ការគំរាមកំហែងនៃគ្រាប់មីន និងលើកកម្ពស់ពិភពលោកដែលមានសុវត្ថិភាព និងសុវត្ថិភាពជាងមុន៕ អត្ថបទ,ភារម្យ

ក្រុមនិស្សិតជំរុញឱ្យយុវជនស្វែងយល់ពីអត្ថប្រយោជន៍សេដ្ឋកិច្ច សង្គមតំបន់ត្រីកោណ CLV

ក្រោយពីក្រសួងពាណិជ្ជកម្ម បង្ហាញរបាយការណ៍ក្របខណ្ឌកិច្ចសហប្រតិបត្តិការអភិវឌ្ឍន៍តំបន់ត្រីកោណ CLV-DTA មក បណ្តានិស្សិតសិក្សាថ្នាក់បរិញ្ញាបត្រទំនាក់ទំនងអន្តរជាតិ នៃសកលវិទ្យាល័យភូមិន្ទភ្នំពេញ បានជំរុញយុវជនជំនាន់ក្រោយនាំគ្នាសិក្សាស្វែងយល់អំពីគម្រោងអភិវឌ្ឍ CLV-DTA ឱ្យបានច្បាស់លាស់ ខណៈពលរដ្ឋបណ្តាខេត្តទាំងបួននោះកំពុងទទួលបានអត្ថប្រយោជន៍ជាច្រើនពីគម្រោងអភិវឌ្ឍនេះលើផ្នែកសេដ្ឋកិច្ច វិនិយោគ និងទេសចរណ៍ជាដើម។បណ្តានិស្សិតទំនាក់ទំនងអន្តរជាតិ បានថ្លែងប្រាប់ BTV នៅថ្ងៃទី៨ ខែសីហានេះថា នៅក្នុងដំណើរការសិក្សាថ្នាក់បរិញ្ញាបត្រទំនាក់ទំនងអន្តរជាតិ និងការទូត ពួកគេក៏បានលើកយកករណីទំនាក់ទំនង CLV-DTA មកសិក្សាផងដែរ ក្នុងនោះបានពិនិត្យឃើញថា ទំនាក់ទំនាក់កិច្ចសហប្រតិបត្តិការ CLV –DTA នេះគឺបានជំរុញការអភិវឌ្ឍន៍សេដ្ឋកិច្ច ពាណិជ្ជកម្ម ការវិនិយោគ និងទេសចរណ៍ ខេត្តទាំងបួន មានខេត្តរតនគិរី មណ្ឌលគិរី ស្ទឹងត្រែង និងខេត្តក្រចេះ ឱ្យមានការរីកចម្រើនជាបន្តបន្ទាប់ ជាពិសេស គឺក៏ធសនាធ្វើឲ្យខ្សែបន្ទាត់ព្រំដែននៃខេត្តកម្ពុជាទាំងបួនដែលជាប់ជាមួយប្រទេសជិតខាង មានភាពរឹងម៉ាំ និងក្លាយជាបង្គោលព្រំដែនសន្តិភាព និងមានការទទួលស្គាល់គ្នាទៅវិញទៅមក។ សូមបញ្ជាក់ថា បច្ចុប្បន្ន ប្រមុខថ្នាក់ដឹកនាំរាជរដ្ឋាភិបាលកម្ពុជា បាននិងកំពុងត្រៀមខ្លួនធ្វើម្ចាស់ផ្ទះរៀបចំកិច្ចប្រជុំកំពូល CLV DTA លើកទី១២ នៅចុងឆ្នាំនេះ បន្ទាប់ប្រទេសឡាវ ធ្វើម្ចាស់ផ្ទះរៀបចំកិច្ចប្រជុំគណៈកម្មាធិការសម្របសម្រួលចម្រុះលើកទី១៣ របស់ CLV DTA រួចហើយ។ ទំនាក់ទំនងកម្ពុជា ក្នុងក្របខណ្ឌកិច្ចសហប្រតិបត្តិការអភិវឌ្ឍន៍តំបន់ត្រីកោណកម្ពុជា ឡាវ វៀតណាម ឬហៅកាត់ថា CLV-DTA ប្រមុខថ្នាក់ដឹកនាំប្រទេសទាំងបីបានឯកភាពបង្កើតនៅឆ្នាំ១៩៩៩ ហើយបើតាមប្រសាសន៍សម្តេចតេជោ ហ៊ុន សែន អតីតនាយករដ្ឋមន្ត្រីកម្ពុជា នៅក្នុងកិច្ចប្រជុំកំពូលមេដឹកនាំ CLV-DTA លើកទី៩ បានសង្កត់ធ្ងន់ថា តំបន់ CLV-DTA បានប្រែក្លាយពីតំបន់អភិវឌ្ឍន៍តិចតួចទៅជាតំបន់អភិវឌ្ឍន៍សេដ្ឋកិច្ចល្អ ហើយសម្តេចបានលើកជាឧទាហរណ៍ គឺប្រាក់ចំណូលពលរដ្ឋម្នាក់ៗក្នុង១ឆ្នាំ គឺបានកើនពី២៩៤ដុល្លារ ដល់ ១៣០០ ដុល្លារ ហើយនឹងបន្តកើនរហូតមកដល់បច្ចុប្បន្ន៕ អត្ថបទ ស៊ុម សុខជា

KOICA និង MLVT កំពុងនឹងដាក់បញ្ជូល ICT នៅវិទ្យាស្ថាន TVET ដើម្បីឆ្លើយតបទីផ្សារការងារ

ភ្នំពេញ ÷ ទីភ្នាក់ងារសហប្រតិបត្តិការអន្តរជាតិកូរ៉េ KOICA និងក្រសួងការងារ និងបណ្តុះបណ្តាលវិជ្ជាជីវៈ MLVT បានកំពុងអភិវឌ្ឍនិង ដាក់បញ្ចូលនូវកម្មវិធីសិក្សាជំនាញ ICT នៅតាមបណ្តាវិទ្យាស្ថាន TVET សាធារណៈទាំង២០របស់គម្រោង ឱ្យមានភាពស៊ីសង្វាក់ ស្របតាមទីផ្សារការងារ ICT នៅកម្ពុជា ផ្តល់ជំនាញច្បាស់លាស់ដល់និស្សិត អាចយកទៅអនុវត្តផ្ទាល់នៅតាមស្ថាប័ន ក្រុមហ៊ុន ការងារនានា។Korea Productivity Center – Sangmyung University Consortium ក្រោមគម្រោងសម្រាប់ការកសាងសមត្ថភាព និងការបង្កើតបរិយាកាសក្នុងកម្មវិធី ICT នៅក្នុងវិទ្យាស្ថាន TVET នៅកម្ពុជា ក្រោមជំនួយឧបត្ថម្ភរបស់ទីភ្នាក់ងារសហប្រតិបត្តិការ អន្តរជាតិកូរ៉េ KOICA នៅក្នុងសប្តាហ៍កន្លងមកនេះ បានរៀបចំកិច្ចប្រជុំលើកម្មវិធីសិក្សា ICT ក្នុងគោលបំណងសំខាន់ នៃកិច្ចប្រជុំ នេះ គឺដើម្បីធានាថា កម្មវិធីសិក្សាជំនាញ ICT ដែលនឹងត្រូវដាក់បញ្ចូលនៅក្នុងវិទ្យាស្ថាន TVET ឱ្យមានភាពស៊ីសង្វាក់ស្របតាម ទីផ្សារការងារ ICT បច្ចុប្បន្ននៅកម្ពុជា។ កម្មវិធីសិក្សា ICT ដែលបានរៀបចំស្នើក្នុងការកែលម្អបន្ថែមរួមមាន មុខវិជ្ជាសំខាន់ៗដូចជា៖ database programming, server programming, and web development ដែលសុទ្ធសឹងតែជាមុខវិជ្ជាដែលចាំបាច់នៅក្នុង ជំនាញ ICT ។ ហើយកម្មវិធីសិក្សា ICT ក៏ជាការអភិវឌ្ឍន៍បន្ថែមរួមមាន៖ Internet of things, edge computing, web application development ដើម្បីផ្តល់ជំនាញច្បាស់លាស់មួយ ដល់និស្សិតអាចយកទៅអនុវត្តផ្ទាល់នៅតាមស្ថាប័នការងារនានា។ជុំវិញកម្មវិធីខាងលើនេះដែរ, ស្ថាប័នពាក់ព័ន្ធដែលបានចូលរួម បានផ្តល់មតិយ៉ាងសកម្ម ក្នុងកិច្ចពិភាក្សាអំពីជំនាញ ក្នុង វិស័យការងារ ក៏ដូចជាស្វែងរកដំណោះស្រាយដ៏មានប្រសិទ្ធភាព តាមរយៈកម្មវិធីបណ្តុះបណ្តាលផ្សេងៗ ក្នុងនោះចំពោះតំណាង មកពីវិស័យធនាគារនិងក្រុមហ៊ុនឯកជនផ្សេងៗ ក៏បានធ្វើការចែករំលែក អំពីការយល់ឃើញទាក់ទងនឹងផែនការជ្រើសរើសបុគ្គលិក នាពេលអនាគត គឺបានផ្តល់តម្លៃលើសមត្ថភាព។ បញ្ហានេះចំពោះអ្នកដែលមកពីបណ្តាស្ថាប័នផ្សេងៗទៀតដែលបានចូលរួម បាន សម្តែងភាពរីករាយយ៉ាងខ្លាំង ចំពោះការបញ្ជូលកម្មវិធីសិក្សាជំនាញ ICT នេះឡើង។ ខណៈដែលក្រុមហ៊ុនមួយចំនួន ក៏បង្ហាញនូវ ការពេញចិត្ត ក្នុងការជ្រើសរើសនិស្សិតដែលបញ្ចប់ការសិក្សាពីវិទ្យាស្ថាន TVET សាធារណៈដើម្បីបម្រើការងារផងដែរ។លោក Min Phannarak ប្រធានគ្រប់គ្រងនៃក្រុមហ៊ុន CODE CLANS បានលើកឡើងអំពីសារៈសំខាន់ នៃកិច្ចសហការ រវាងវិទ្យាស្ថាន TVET សាធារណៈ និងវិស័យឯកជន ក្នុងការអភិវឌ្ឍន៍កម្មវិធីសិក្សា ICT ដែលនេះជាឱកាសដ៏ល្អសម្រាប់វិទ្យាស្ថាន TVET សាធារណៈ និងវិស័យឯកជន ក្នុងការរួមគ្នាពិភាក្សាអំពីការអភិវឌ្ឍន៍កម្មវិធីសិក្សា ដែលនឹងបង្កើតធនធានមនុស្សនាពេល អនាគត។ លោកMin Phannarak ក៏បានបញ្ជាក់អំពីតម្រូវការសម្រាប់ការបន្តកិច្ចសន្ទនា និងកិច្ចសហការដើម្បីជម្រុញឱ្យជំនាញ ICT ក្នុងប្រទេសកម្ពុជាជឿនលឿនទៅមុខ។សូមបញ្ជាក់ថា គម្រោងខាងលើនេះគឺមានគោលដៅលើកកម្ពស់វិទ្យាស្ថាន TVET សាធារណៈ ត្រូវបានជ្រើសរើសឱ្យក្លាយជាអ្នកដឹក នាំ ក្នុងការបណ្តុះបណ្តាលបច្ចេកទេសក្នុងជំនាញ ICT, គោលបំណងគម្រោងនេះរួមមាន៖ ការពង្រឹងកម្មវិធីសិក្សាជំនាញ ICT ឱ្យស្របតាមតម្រូវការការងារ, ការពង្រឹងសមត្ថភាពគ្រូបង្រៀនជំនាញ ICT តាមរយៈការបណ្តុះបណ្តាលទាំងនៅក្នុងប្រទេសកូរ៉េ និងក្នុងស្រុក, ការបង្កើតបរិយាកាសសិក្សាជំនាញ ICT តាមរយៈការកែលម្អគ្រឿងបរិក្ខារសិក្សាឱ្យកាន់តែប្រសើរឡើង និងគាំទ្រ រាល់កម្មវិធីពាក់ព័ន្ធលើជំនាញ ICT តាមរយៈកិច្ចសហការ និងការប្រកួតប្រជែងផ្សេងៗទៀត។ ក្នុងកិច្ចពិភាក្សាខាងលើនេះបានផ្តោត លើវិស័យការងារក៏ដូចជា ស្វែងរកដំណោះស្រាយដ៏មានប្រសិទ្ធភាពតាមរយៈកម្មវិធីបណ្តុះបណ្តាលផ្សេងៗ៕អត្ថបទ: សុន រ៉ាឌី

សំណុំរឿងកាប់បំផ្លាញព្រៃឈើ២ហិកតា និងហ៊ុមរបងយកដី២០ហិកតា ក្នុងតំបន់ប្រើប្រាស់ច្រើនយ៉ាង ត្រូវបានអយ្យការសាលាដំបូងខេត្តកំពង់ឆ្នាំង កំពុងកោះហៅអាជ្ញាធរភូមិឃុំស្រុកមកសាកសួរ

កំពង់ឆ្នាំង៖ សំណុំរឿងកាប់បំផ្លាញព្រៃឈើ២ហិកតា និងហ៊ុមរបងយកដី២០ហិកតា ក្នុងតំបន់ប្រើប្រាស់ច្រើនយ៉ាង នៅចំណុច៥៥ ស្ថិតក្នុងភូមិចំបក់ខ្ពស់ ឃុំស្វាយរំពារ ស្រុកកំពង់លែង ខេត្តកំពង់ឆ្នាំង ត្រូវបានតំណាងអយ្យការសាលាដំបូងខេត្តកំពង់ឆ្នាំង កំពុងកោះហៅអាជ្ញាធរភូមិឃុំស្រុកមកសាកសួរបន្ត ។ នេះបើតាមការបញ្ជាក់ពីលោក យ៉ែម លក្ខិណា អភិបាលស្រុកកំពង់លែង នៅព្រឹកថ្ងៃទី០៨ ខែសីហា ឆ្នាំ២០២៤នេះ ។លោក យ៉ែម លក្ខិណា បានបន្តថា ៖ ក្នុងរយៈពេលប៉ុន្មានថ្ងៃនេះ តំណាងអយ្យការសាលាដំបូងខេត្តកំពង់ឆ្នាំង កំពុងយកចិត្តទុកដាក់បន្តនីតិវិធីយ៉ាងខ្លាំងពាក់ព័ន្ធសំណុំរឿងជនសង្ស័យចូលទន្ទ្រានកាប់បំផ្លាញព្រៃឈើអស់២ហិកតា និងហ៊ុមព័ទ្ធយកដីក្នុងតំបន់ប្រើប្រាស់ច្រើនយ៉ាងភ្នំនាងកង្រី និងភ្នំទូកមាស ដែលគ្រប់គ្រងដោយក្រសួងបរិស្ថាន ។ ចំណែកអាជ្ញាធរស្រុក ឃុំ និងភូមិវិញ នឹងត្រូវចូលមកបំភ្លឺក្នុងថ្ងៃនេះ និងថ្ងៃស្អែក ព្រោះទីតាំងដែលជនសង្ស័យប្រព្រឹត្តិបទល្មើសនោះ តំណាងអយ្យការ បានទៅឃើញផ្ទាល់ហើយ។ គួរបញ្ជាក់ថា៖ នៅក្នុងស្រុកកំពង់លែង ខេត្តកំពង់ឆ្នាំង មានករណីជនសង្ស័យជាច្រើនរូប បាន និងកំពុងប្រព្រឹត្តបទល្មើសជាបន្តបន្ទាប់ មានទាំងការឈូសបំផ្លាញព្រៃឈើធំៗក្នុងតំបន់ប្រើប្រាស់ច្រើនយ៉ាង ភ្នំកង្រី និងភ្នំទូកមាស, ឈូសបំផ្លាញព្រៃលិចទឹកយកដីក្នុងតំបន់៣, ឈូសបំផ្លាញព្រៃលិចទឹកក្នុងតំបន់២យកដី ក្នុងពេលស្រុកកំពង់លែង ត្រូវបានប្រមុខរដ្ឋាភិបាល បាន និងកំពុងអោយពន្លឿនការចុះបញ្ជីដីធ្លីលក្ខណៈប្រព័ន្ធផងដែរ។ ករណីសំណុំកាប់បំផ្លាញព្រៃឈើ២ហិកតា និងធ្វើរបងព័ទ្ធយកដីព្រៃអស់ជិត២០ហិកតានេះ តំណាងអយ្យការបានស្គាល់ជនសង្ស័យដែលបានប្រព្រឹត្តិទង្វើរល្មើសនេះហើយ បានស្គាល់ទាំងតាំងរស់នៅពិតប្រាកដ និងបានកោះហៅមកសាកសួរ១លើករួចហើយ។ ប្រជាពលរដ្ឋក្នុងស្រុកកំពង់លែង ខេត្តកំពង់ឆ្នាំង កំពុងរង់ចាំមើលនីតិវិធីរបស់តំណាងអយ្យការសាលាដំបូងខេត្តកំពង់ឆ្នាំង អាចចាត់ការទៅលើជនសង្ស័យនោះបានឬអត់? ឬមួយជនសង្ស័យរូបនោះអាចរួចខ្លួនពីសំណាញ់ច្បាប់ ព្រោះសំណុំរឿងនេះ ខាងមន្ទីរបរិស្ថានខេត្តកំពង់ឆ្នាំង បានបង្ហាញពីកំហុសរបស់ជនសង្ស័យហើយ ៕ កាំង ហុងវាស្នា

ទូតហ្វីលីពីន៖ ព្រែកជីកហ្វូណនតេជោនឹងជួយដល់សេដ្ឋកិច្ច និងពាណិជ្ជកម្មក្នុងតំបន់ និងអន្តរជាតិ

លោកជំទាវឯកអគ្គរដ្ឋទូតហ្វីលីពីនប្រចាំកម្ពុជា ថ្លែងថា ព្រែកជីកហ្វូណនតេជោនឹងជួយដល់សេដ្ឋកិច្ច និងពាណិជ្ជកម្មក្នុងតំបន់ និងអន្តរជាតិ។បន្ទាប់ពីរាជរដ្ឋាភិបាល និងប្រជាពលរដ្ឋខ្មែរបានអបអរសាទរលើគម្រោងព្រែកជីកហ្វូណនតេជោដែលបានបើកការដ្ឋានជាផ្លូវការកាលពីថ្ងៃទី៥ ខែសីហា ឆ្នាំ២០២៤ លោកជំទាវ ហ្វ្លើរីដា អាន ខេមៀល ភី ម៉ាយូ ឯកអគ្គរដ្ឋទូតហ្វីលីពីនប្រចាំកម្ពុជា បានប្រាប់ BTV ឱ្យដឹងនៅថ្ងៃទី៨ ខែសីហានេះថា គម្រោងព្រែកជីកហ្វូណនតេជោនេះ គឺជាគម្រោងដ៏មានសក្តានុពលសម្រាប់ទាំងកម្ពុជា និងក្នុងតំបន់ ព្រមទាំងសម្រាប់ប្រជាជាតិទាំងមូលដែលនាំមកនូវភាពរុងរឿង និងសន្តិភាព។លោកជំទាវ ឯកអគ្គរដ្ឋទូត បញ្ជាក់ថា គម្រោងព្រែកជីកហ្វូណនតេជោនឹងក្លាយចលករជួយការដល់រីកចម្រើនពាណិជ្ជកម្មរបស់កម្ពុជា ហើយលោកជំទាវសង្ឃឹមថាតាមរយៈគម្រោងនេះនឹងរួមចំណែកដល់ទំនាក់ទំនងទ្វេភាគីរវាងកម្ពុជា-ហ្វីលីពីនបន្ថែមទៀត។ សូមជម្រាបថា ក្នុងឱកាសពិធីបើកការដ្ឋានព្រែកជីកហ្វូណនតេជោ កាលពីថ្ងៃទី៥ ខែសីហា ឆ្នាំ២០២៤នេះ មហាជនគ្រប់មជ្ឈដ្ឋាន គាំទ្រយ៉ាងពេញទំហឹង ដើម្បីឱ្យគម្រោងនេះក្លាយជាផ្លូវនាវាចរ និងប្រព័ន្ធភស្ដុភារកម្មទន្លេបាសាក់ ដោយតភ្ជាប់ផ្លូវទឹករវាងទន្លេទៅកាន់សមុទ្រកម្ពុជា ហើយឆ្លងកាត់ខេត្តចំនួន៤ រួមមាន៖ ខេត្តកណ្តាល តាកែវ កំពត និងខេត្តកែប៕អត្ថបទ សេក ឧត្តម

រដ្ឋមន្ត្រីក្រសួងសុខាភិបាលកម្ពុជា ជួបជាមួយនាយកប្រតិបត្តិអង្គការ Gavi នៅសាធារណៈរដ្ឋប្រជាមានិតឡាវ

នៅក្នុងអំឡុងពេលបំពេញបេសកកម្មចូលរួមកិច្ចប្រជុំរដ្ឋមន្ត្រីសុខាភិបាលអាស៊ានលើកទី១៦ និងកិច្ចប្រជុំពាក់ព័ន្ធ នាព្រឹកថ្ងៃទី៨ ខែសីហា ឆ្នាំ២០២៤នេះឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានទទួលជួបសម្តែងការគួរសម និងពិភាក្សាការងារជាមួយលោកស្រីវេជ្ជបណ្ឌិត Sania Nishatar នាយកប្រតិបត្តិអង្គការ និងប្រតិភូ Gavi, the Vaccine Alliance និងប្រតិភូ នៅសាធារណៈរដ្ឋប្រជាធិបតេយ្យ ប្រជាមានិតឡាវ។ក្នុងជំនួបនេះ ឯកឧត្តមរដ្ឋមន្រ្តីក្រសួងសុខាភិបាលកម្ពុជាបានថ្លែងអំណរគុណចំពោះការគាំទ្រជាបន្តបន្ទាប់របស់ Gavi ដល់ប្រទេសកម្ពុជាចាប់តាំងពីឆ្នាំ២០០១។ ឯកឧត្តមសាស្ត្រាចារ្យរដ្ឋមន្ត្រី បានថ្លែងអំណរគុណចំពោះការគាំទ្ររបស់ Gavi ដែលបានប្តេជ្ញាបន្តគាំទ្រពង្រឹងកម្មវិធីជាតិផ្តល់ថ្នាំបង្ការរបស់កម្ពុជា តាមរយៈគម្រោង Gavi-FPP សម្រាប់រយៈពេល ៥ ឆ្នាំ(២០២៣ ដល់ ២០២៧)បន្ថែម ដែលការគាំទ្រថ្មីនេះរបស់ Gavi ផ្តោតលើគ្រប់ទារក/កុមារ និងសហគមន៍ងាយរងគ្រោះ។សូមបញ្ជាក់ថា ការចាក់ថ្នាំបង្ការ គឺជាសេវាកម្មសំខាន់មួយ និងជាវិធានការបង្ការដ៏មានប្រសិទ្ធភាពបំផុតមួយ ដើម្បីការពារអាយុជីវិតប្រជាជនកម្ពុជា។ កម្មវិធីជាតិផ្តល់ថ្នាំបង្ការ សម្រេចបាននូវសមិទ្ធផលជាច្រើន ដែលរួមចំណែកដល់ការកាត់បន្ថយអត្រាមរណភាពមាតា និងទារកក្នុងប្រទេស។ កម្ពុជារក្សាបាននូវស្ថានភាពគ្មានជំងឺស្វិតដៃជើងតាំងពីឆ្នាំ២០០០ ការលុបបំបាត់តេតាណូសមាតា និងទារកតាំងពីឆ្នាំ២០១៥ ហើយក្រសួងសុខាភិបាលកម្ពុជា ប្តេជ្ញារក្សាសមិទ្ធផលទាំងនេះបន្តទៅមុខទៀត។ ក្រោមយុទ្ធសាស្ត្របញ្ចកោណដំណាក់កាលទី១នៃរាជរដ្ឋាភិបាលអាណត្តិទី៧ ក្រោមការដឹកនាំប្រកបដោយគតិបណ្ឌិត ភាពប៉ិនប្រសប់ និងចក្ខុវិស័យវែងឆ្ងាយរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា ក្រសួងសុខាភិបាលបានដាក់គោលដៅធានានូវជីវិតមានសុខភាពល្អ និងលើកកម្ពស់សុខុមាលភាពសម្រាប់មនុស្សគ្រប់វ័យ។ កម្មវិធីចាក់ថ្នាំបង្ការ ជាសេវាស្នូលនៃការថែទាំសុខភាពបឋម ដើម្បីសម្រេចបាននូវការគ្របដណ្តប់សុខភាពជាសកល។ ក្រសួងសុខាភិបាលនឹងបន្តកិច្ចខិតខំប្រឹងប្រែងពង្រឹងនិងពង្រីកសេវាផ្តល់ថ្នាំបង្ការដែលមានគុណភាពខ្ពស់ដល់គ្រប់សហគមន៍រួមទាំងប្រជាជនដែលមានហានិភ័យខ្ពស់៕ អត្ថបទ រដ្ឋា

សម្តេចរដ្ឋសភាធិបតី ឃួន សុដារី អនុញ្ញាតឱ្យគណៈប្រតិភូសមាគមសិល្បករខ្មែរ ចូលជួបសម្តែងការគួរសម និងពិភាក្សាការងារ

នាព្រឹកថ្ងៃទី៨ ខែសីហា ឆ្នាំ២០២៤ សម្តេចមហារដ្ឋសភាធិការធិបតី ឃួន សុដារី ប្រធានរដ្ឋសភា នៃព្រះរាជាណាចក្រកម្ពុជា អនុញ្ញាតឱ្យគណៈប្រតិភូសមាគមសិល្បករខ្មែរ ដឹកនាំដោយ លោកជំទាវអ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ ចូលជួបសម្តែងការគួរសម និងពិភាក្សាការងារ នៅវិមានរដ្ឋសភា។

កម្ពុជាគ្រោងបើកពិព័រណ៍ B2B វិស័យផ្គត់ផ្គង់ម្ហូបអាហារ សណ្ឋាគារ និងបដិសណ្ឋារកិច្ច នាខែវិច្ឆិកាខាងមុខ

នៅខែវិច្ឆិកា ឆ្នាំ២០២៤ខាងមុខនេះ Informa Markets Cambodia ទទួលស្គាល់ដោយក្រសួងពាណិជ្ជកម្ម ស្ថិតក្រោមឈ្មោះ AMB Tarsus Exhibitions (Cambodia) Pte Ltd) គ្រោងនឹងរៀបចំពិព័រណ៍ B2B ផ្នែកវិស័យផ្គត់ផ្គង់ ម្ហូបអាហារ សណ្ឋាគារ និងបដិសណ្ឋារកិច្ចកំពូលរបស់កម្ពុជា រួមជាមួយការប្រកួតប្រជែងចំអិនម្ហូប និងបដិសណ្ឋារកិច្ចថ្នាក់ជាតិ នៅអគារមជ្ឈមណ្ឌលពិព័រណ៍កោះពេជ្រ។លោកស្រី Alice Lam នាយកគ្រប់គ្រង និងអភិវឌ្ឍន៍អាជីវកម្មប្រចាំប្រទេសម៉ាឡេស៊ី និងកម្ពុជា នៃក្រុមហ៊ុន Informa នៅក្នុងសន្និសីទសារព័ត៌មានស្តីពីការតាំងពិព័រណ៍វិស័យផ្គត់ផ្គង់ ម្ហូបអាហារ សណ្ឋាគារ និងបដិសណ្ឋារកិច្ចកំពូលរបស់កម្ពុជា (CAMFOOD & CAMHOTEL) នៅរសៀលថ្ងៃទី៧ ខែសីហា បានមានប្រសាសន៍ថា ពិព័រណ៍នេះ នឹងរៀបចំឡើងរយៈ៣ថ្ងៃ ចាប់ពីថ្ងៃទី៦ ដល់៨ ខែវិច្ឆិកា ឆ្នាំ២០២៤ ដែលនឹងមានក្រុមហ៊ុនដាក់តាំងជាង១៥០ ជាមួយអ្នកទស្សនាជាង ១២,០០០នាក់ ត្រូវបានរំពឹងថា នឹងចូលរួមកម្មវិធីនេះ។ លោកស្រី បានបញ្ជាក់ថា ព្រឹត្តិការណ៍ដ៏សំខាន់នេះដែរ ឆ្លុះបញ្ចាំងពីកំណើនដ៏រឹងមាំ និងសក្ដានុពលដ៏ធំធេងនៃឧស្សាហកម្មបដិសណ្ឋារកិច្ចរបស់ប្រទេសកម្ពុជា។ បន្ថែមពីនេះ នឹងក្លាយជាមជ្ឈមណ្ឌល ដ៏រស់រវើកដើម្បីបង្ហាញអំពីឧត្តមភាពនៃសង្វាក់ផ្គត់ផ្គង់នៃឧស្សាហកម្មម្ហូបអាហារកម្ពុជា ជាមួយនិន្នាការនៃការវិត្តន៍នៃវិស័យ បដិសណ្ឋារកិច្ចទំនើបទាន់សម័យនាពេលបច្ចុប្បន្ននិងអនាគត។លោកស្រី បានបន្ថែមថា ការតាំងពិព័រណ៍នេះដែរ នឹងផ្តល់នូវវេទិកាដ៏ទូលំទូលាយមួយសម្រាប់អ្នកជំនាញក្នុងឧស្សាហកម្ម ដើម្បីបង្ហាញផលិតផល ប្រភពអ្នកផ្គត់ផ្គង់ថ្មី និន្នាការ និងបង្កើតទំនាក់ទំនងអាជីវកម្មសំខាន់ៗសម្រាប់អាជីវកម្មគ្រប់ទំហំ បង្កើតឱកាស និងបណ្តាញទំនាក់ទំនង រវាងភាគីរោងចក្រ អ្នកចែកចាយ និងដៃគូដែលមានសក្តានុពល។នាឱកាសនេះ លោក លូ ម៉េង សហប្រធានក្រុមការងារផ្នែកទេសចរណ៍ បានមានប្រសាសន៍ថា វិស័យផ្គត់ផ្គង់ ម្ហូបអាហារ សណ្ឋាគារ និងបដិសណ្ឋារកិច្ច នឹងមានកំណើនដែលមិនធ្លាប់មានពីមុនមក ដែលជំរុញដោយកំណើនទេសចរណ៍ និងការពង្រីកទីផ្សារក្នុងស្រុក។ ការតាំងពិព័រណ៍នេះ ជាយុទ្ធសាស្ត្រដើម្បីទាញយកទុនលើការបង្កើនការវិនិយោគលើហេដ្ឋារចនាសម្ព័ន្ធទេសចរណ៍ និងការបង្កើនការផ្សព្វផ្សាយ មុខម្ហូបខ្មែរលើឆាកអន្តរជាតិ។សូមបញ្ជាក់ថា នៅក្នុងព្រឹត្តិការណ៍ពិព័រណ៌វិស័យផ្គត់ផ្គង់ ម្ហូបអាហារ សណ្ឋាគារ និងបដិសណ្ឋារកិច្ចកំពូលរបស់កម្ពុជានាពេលខាងមុខនេះ ក៏នឹងមានរៀបចំការប្រកួតប្រជែងចំអិនម្ហូប និងបដិសណ្ឋារកិច្ចថ្នាក់ជាតិផងដែរ។ សូមជម្រាបជូនទៀតថាក្រោយចប់សន្និសីទសារព័ត៌មាន ក៏មានពិធីចុះអនុស្សារណៈយោគយល់គ្នា (MOU) រវាងសហព័ន្ធទេសចរណ៍កម្ពុជា និងក្រុមហ៊ុនរៀបចំពិព័រណ៍ INFORMA MARKETS។ MOU នេះជាគំនិតផ្តួចផ្តើមរួមគ្នា ដែលផ្តោតលើការចែករំលែកចំណេះដឹង និងបទពិសោធន៍ដល់ឧស្សាហកម្ម និងកិច្ចខិតខំប្រឹងប្រែងទីផ្សាររួមគ្នា ដើម្បីលើកកម្ពស់វិស័យបដិសណ្ឋារកិច្ចលំប្រទេសកម្ពុជា៕ អត្ថបទ៖ ឈិត បូរ៉ាវី

សម្តេចធិបតី៖ វត្តមានសាកលវិទ្យាល័យ De Montfortគឺជាកាលានុវត្តភាពមួយទៀត សម្រាប់និស្សិតកម្ពុជា

សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានលើកឡើងថា ការបើកសាកលវិទ្យាល័យDe Montfort របស់អង់គ្លេសនៅលើទឹកដីនៃព្រះរាជាណាចក្រកម្ពុជានាពេលនេះ គឺជាកាលានុវត្តភាពថ្មីមួយទៀតសម្រាប់ សិស្សនិស្សិតកម្ពុជា ហើយសម្តេចធិបតី រំពឹងថា សាកលវិទ្យាល័យនេះ ក្លាយទៅជាហឹប និងដែកឆក់នៃការវិនិយោគមកពីចក្រភពអង់គ្លេសមកលើទឹកដីកម្ពុជា ឲ្យកាន់តែខ្លាំងក្លាឡើងបន្ថែមទៀតផងដែរ។ក្នុងឱកាសអញ្ជើញចូលរួមជាអធិបតីភាពសម្ពោធដាក់ឲ្យប្រើប្រាស់ជាផ្លូវនៃសាកលវិទ្យាល័យ De Montfort របស់អង់គ្លេស នាថ្ងៃទី៨ ខែសីហា ឆ្នាំ២០២៤នេះសម្តេចធិបតី បានបញ្ជាក់ថា វត្តមានជារូបវន្តនៃសាកលវិទ្យាល័យរបស់ប្រទេសមហាអំណាចមួយនេះ នឹងផ្តល់នូវអត្ថប្រយោជន៍ខាងវិស័យអប់រំដល់កម្ពុជាកាន់តែល្អប្រសើរបន្ថែមទៀត។ ជាមួយគ្នាសម្តេច ក៏បានលើកទឹកចិត្តឲ្យសាកលវិទ្យាល័យនេះ ធ្វើការសហការជាមួយ ស្ថាប័នពាក់ព័ន្ធរបស់កម្ពុជា ដើម្បីទទួលបានការគាំទ្រផេ្សងៗទាក់ទងនឹងការបណ្តុះសហគ្រិនភាព ដើម្បីចូលរួម បង្កើតការងារជាក់ស្តែងនៅកម្ពុជាផងដែរ។នៅក្នុងឱកាសសម្ពោធជាផ្លូវការនូវសាកលវិទ្យាល័យដ៏ល្បីល្បាញរបស់អង់គ្លេស លើទឹកដីកម្ពុជានេះដែរ សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានសម្តែងមោទនភាពចំពោះសាកលវិទ្យាល័យ មួយនេះដែលមាននៅកម្ពុជា ខណៈវត្តមាននេះ គឺកើតឡើងដំបូងគេបង្អស់នៅតំបន់អាស៊ីអាគ្នេយ៍នេះ។សូមបញ្ជាក់ថា សាកលវិទ្យាល័យDe Montfort ត្រូវបានបង្កើតឡើងក្នុងឆ្នាំ១៨៧០ និងមានប្រវត្តិនៃការ បង្រៀនជាង១៥០ឆ្នាំ។មាននិស្សិតប្រមាណបីម៉ឺនប្រាំពាន់នាក់កំពុងសិក្សានៅក្នុងចក្រភពអង់គ្លេស និងក្រៅប្រទេស។ សាកលវិទ្យាល័យនេះ មានកម្រិតស្តង់ដាអន្តរជាតិពិតៗ មានសាខានៅចក្រភពអង់គ្លេស មជ្ឈិមបូព៌ា (ឌុបៃ) អាស៊ីបូព៌ា (កាហ្សាក់ស្ថាន) និងបច្ចុប្បន្ននៅអាស៊ីអាគ្នេយ៍គឺនៅប្រទេសកម្ពុជានេះតែម្តង៕ អត្ថបទបាន ចក់

ចំណោតចំនួន២ លើកំណាត់ផ្លូវ៤៨ ក្នុងភូមិសាស្រ្តខេត្តកោះកុង ត្រូវបានជួសជុលកែលម្អឲ្យប្រសើរងាយស្រួលចរាចរណ៍ឡើងវិញ

មេឃបើកថ្ងៃល្អរយៈពេល៣ថ្ងៃមកនេះ ជាអំណោយផលសម្រាប់ក្រុមការងារស្ថាបនាផ្លូវជាតិលេខ៤៨ ពិសេសចំណោតទឹកជ្រោះតាប៉ន និងចំណោតហួសអាស្រមលោកយាយម៉ៅ ស្ថិតនៅសង្កាត់ស្មាច់មានជ័យ ក្រុងខេមរភូមិន្ទ ខេត្តកោះកុង ត្រូវបានជួសជុលកែលម្អអោយងាយស្រួលចរាចរណ៍ឡើងវិញហើយ។បើតាមមន្រ្តីមន្ទីរសាធារណការ និងដឹកជញ្ជូនខេត្តកោះកុង បានឲ្យដឹងនៅព្រឹកថ្ងៃទី៨ ខែសីហា ឆ្នាំ២០២៤ថា ក្រុមការងារស្ថាបនាផ្លូវ៤៨ បានយកចិត្តទុកដាក់ខ្ពស់លើការជួសជុលកំណាត់ផ្លូវ៤៨ដែលរងផលប៉ះពាល់ដោយសារទឹកភ្លៀងរដូវវស្សា ពោលគ្រាន់តែមេឃបើកថ្ងៃភ្លាម គឺសម្រុកជួសជុលចំណោតដែលរអិលខ្លាំង ដើម្បីសម្រួលចរាចរណ៍ដល់ប្រជាពលរដ្ឋ អ្នកទេសចរ និងការដឹកជញ្ជូនទំនិញពាណិជ្ជកម្មបានឆាប់រហ័សទាន់ពេលវេលា។កន្លងទៅរដ្ឋបាលខេត្តកោះកុង បានដាក់ពង្រាយកម្លាំងនគរបាលចរាចរណ៍ និងអន្តរាគមន៍រង់ចាំជួយសម្រួលចរាចរណ៍ពេលមានការកកស្ទះ ខណៈផ្លូវ៤៨ត្រង់ចំណុចចំណោតហួសលោកយាយម៉ៅ មានសភាពរអិលខ្លាំងពេលមេឃភ្លៀងពិបាកធ្វើដំណើរ។អំឡុងពេលនោះ សមត្ថកិច្ចជំនាញ និងក្រុមការងារធ្វើការដ្ឋាន ត្រៀមឈរជើងប្រចាំការជួយសម្រួលចរាចរណ៍២៤ម៉ោងលើ២៤ម៉ោងត្រង់ចំណុចដែលប្រឈមនឹងការកកស្ទះ។ ២ថ្ងៃនេះអាកាសធាតុហាក់ល្អមិនមានភ្លៀងធ្លាក់ខ្លាំង ដែលជំរុញឱ្យក្រុមហ៊ុនម៉ៅការសាងសង់ផ្លូវជាតិ៤៨ពន្លឿនការជួសជុលកែលម្អផ្លូវដែលមានចំណុចលំបាក។គួររំលឹកថា ចំណោតផ្លូវ៤៨ដែលលំបាកធ្វើដំណើរពេលភ្លៀងធ្លាក់រដូវវស្សាឆ្នាំនេះ គឺទី១ចំណោតជ្រោះតាប៉ន ទី២ ចំណោតហួសអាស្រមលោកយាយម៉ៅ និងទី៣ ចំណោតវរៈសេនាតូចលេខ២ ជិតដល់ស្ពានតាតៃ។ ប៉ុន្តែក៏ត្រូវបានកៀរសម្រួលឱ្យងាយស្រួលធ្វើដំណើរបណ្តោះអាសន្នហើយដែរ ស្របពេលអាកាសធាតុមិនភ្លៀង៕ អត្តបទៈ ឈឹម មករា

បណ្ដាញសង្គម

ព័ត៌មានថ្មីៗ

ប្រជាជនហ្កាហ្សា ប្រមូលផ្តុំគ្នាសម្រាប់ការបួងសួងបុណ្យ Eid ក្នុងពេលមានជម្លោះ និងការលំបាកនៅបន្ត

រដ្ឋមន្ត្រីការបរទេស៖ អាមេរិក មិនអនុញ្ញាតឱ្យមានករណីជំងឺអេបូឡាណាមួយ ចូលក្នុងប្រទេសបានទេ

អ្នកវិភាគ៖ ភាពមិនប្រាកដប្រជានៃនយោបាយអាមេរិក និងសង្គ្រាមនៅអ៊ីរ៉ង់ នឹងគ្របដណ្ដប់លើកិច្ចប្រជុំកំពូលសន្តិសុខអាស៊ី

ភាពតានតឹងថ្មីកើនឡើងនៅជុំវិញភាគខាងត្បូងប្រទេសអ៊ីរ៉ង់ បន្ទាប់ពីការវាយប្រហាររបស់អាមេរិក

[UPDATE] ក្រុមអ្នកជួយសង្គ្រោះនៅឡាវ ត្រូវការអុកស៊ីសែនបន្ថែមទៀត ដើម្បីបញ្ចប់បេសកកម្មជួយអ្នកជាប់ក្នុងរូងភ្នំ

ចងចាំ! ថ្ងៃនេះឆ្នាំមុនវីរកងទ័ពកម្ពុជាត្រូវបានយោធាថៃបំពាន និងលួចបាញ់សម្លាប់ដែលជាសេនារីយោសង្គ្រាមឈ្លានពានទឹកដីកម្ពុជារហូតផ្ទុះជាសង្គ្រាមចំនួនពីរលើក

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877