BTV NEWS

ប៉ូលិសកម្ពុជាបញ្ជាក់ពីការចាប់ជនជាតិសាម៉នពីរនាក់បាញ់ប្រហារលើជនជាតិអូស្ត្រាលីពីរនាក់នៅទីក្រុងហូជីមិញ

ចាប់គិតចាប់ពីខែកក្កដាឆ្នាំមុនដល់ពេលនេះសមត្ថកិច្ចបង្ក្រាប Onlin Scams ជាង៤០០ករណី និងបណ្តេញជនបរទេសជិត ២ម៉ឺននាក់ចេញពីកម្ពុជា

មន្រ្តីជាន់ខ្ពស់ក្រសួងកោតសរសើរមន្ទីរអភិវឌ្ឍន៍ជនបទខេត្តកំពង់ឆ្នាំង ថែទាំផ្លូវបានល្អជូនប្រជាពលរដ្ឋ

ឯកឧត្តម គន់ គីម អញ្ជើញចុះសួរសុខទុក្ខសមាជិក អ.ន.ក.តាមខ្នងផ្ទះ ក្នុងខេត្តស្វាយរៀង

ព័ត៌មានជាតិ

រដ្ឋាករទឹកស្វយ័តក្រុងភ្នំពេញកំពុងពន្លឿនការដាក់បំពង់មេនាំទឹកទៅកាន់តំបន់ជាយរាជធានីភ្នំពេញ

បច្ចុប្បន្ន រដ្ឋាករទឹកស្វយ័តក្រុងភ្នំពេញកំពុងសម្រាកសម្រាំងធ្វើការងារដាក់បំពង់មេនាំទឹកដើម្បីរុញទឹកទៅផ្គត់ផ្គង់នៅតាមតំបន់ជាយរាជធានីភ្នំពេញ ភាគខាងជើង ត្បូង លិច និងខាងកើត។ នេះបើតាមប្រសាន៍ឯកឧត្តម ឡុង ណារ៉ូ ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃរដ្ឋាករទឹកស្វយ័តក្រុងភ្នំពេញ បានផ្តល់បទសម្ភាសជាមួយBTV នៅថ្ងៃទី០៦ ខែសីហានេះ។នៅក្នុងបទសម្ភាស ឯកឧត្តមបានបន្តថា តាមការគ្រោងទុកនៅចុងឆ្នាំ២០២៤នេះ ការងារដាក់បំពង់មេនាំទឹកដែលមាននៅក្នុងផែនការមេ នឹងត្រូវបញ្ចប់នៅជំហានទី១ ក្នុងគម្រោងរោងចក្រផលិតទឹកស្អាតបាក់ខែងទី១ និងបាក់ខែងទី២។ អញ្ចឹងទឹកអាចនឹងផ្គត់ផ្គង់បាននៅប៉ែកខាងលិច និងប៉ែកខាងត្បូងឈាងខាងកើត ជាពិសេសតំបន់គួរស្រូវ។ ចំពោះប៉ែកខាងជើង និងប៉ែកខាងកើត រាជធានីភ្នំពេញ មានសង្កាត់មួយចំនួនស្ថិតនៅក្រោមការគ្រប់គ្រងរបស់ប្រតិបត្តិករឯកជន ខណៈរដ្ឋាករទឹកស្វយ័តក្រុងភ្នំពេញកំពុងធ្វើកិច្ចសហការជាមួយប្រតិបត្តិករឯកជន ដើម្បីរកវិធីផ្គត់ផ្គង់ទឹកស្អាតជូនដល់អតិថិជន។ គួរបញ្ជាក់ដែរថា បច្ចុប្បន្ន រដ្ឋាករទឹកស្វយ័តក្រុងភ្នំពេញ កំពុងដាក់ឱ្យដំណើរការរោងចក្រផលិតទឹកស្អាតចំនួន៥ទីតាំង ដែលក្នុងនោះរួមមាន៖ទី១.រោងចក្រផលិតទឹកស្អាតភូមិព្រែក ស្ថិតនៅខេត្តកណ្តាល ទី២.រោងចក្រផលិតទឹកស្អាតជ្រោយចង្វា ទី៣.រោងចក្រផលិតទឹកស្អាតចំការមន ទី៤.រោងចក្រផលិតទឹកស្អាតនិរោធ និងទី៥.រោងចក្រផលិតទឹកស្អាតបាក់ខែង ។ រោងចក្រទាំង៥នេះ អាចផលិតទឹកស្អាតបានចំនួនជិត១លានម៉ែត្រគូបក្នុងមួយថ្ងៃ៕ អត្ថបទ៖ទូច សោភ័ណ

អ្នកជំនាញបង្ហាញភាពខុសគ្នាអំពីសេវាធានារ៉ាប់រង រវាងវិស័យរដ្ឋ និងឯកជន

ខណៈអនុវិស័យធានារ៉ាប់រងរបស់វិស័យឯកជន ក៏ដូចជារបបសន្តិសុខសង្គមរបស់វិស័យរដ្ឋ (ប.ស.ស.) បានកំពុងដើរតួនាទីយ៉ាងសំខាន់ និងសកម្មក្នុងការជំរុញកំណើនសេដ្ឋកិច្ចជាតិ។ ឯកឧត្តមអគ្គនាយកនិយ័តករធានារ៉ាប់រងនៅកម្ពុជា បានបញ្ជាក់អំពីភាពខុសគ្នានៃការចំណាយប្រាក់ ដើម្បីទទួលបាននូវអត្ថប្រយោជន៍របស់វិស័យទាំងអស់នោះ។ជួបសម្ភាសន៍ជាមួយព័ត៌មាន ប៊ីធីវី ឯកឧត្តម ប៊ូ ច័ន្ទភីរូ អគ្គនាយកនិយ័តករធានារ៉ាប់រងនៅកម្ពុជា បានមានប្រសាសន៍ថា ជាកាពិត នៅក្នុងប្រទេសក្របខ័ណ្ឌរាជរដ្ឋាភិបាល ដែលហៅថា សន្តិសុខសង្គម មិនថាកម្ពុជា នៅប្រទេសផ្សេងទៀតទេ គឺរដ្ឋាភិបាលគិតថា គួរតែមានសំណាញ់សុវត្ថិភាពសង្គមមួយសម្រាប់ប្រជាពលរដ្ឋ ពិសេសក្នុងការព្យាបាលថែទាំសុខភាព និងគ្រោះថ្នាក់ការងារ ដែលមានបង្កើតគម្រោងជាក្របខណ្ឌសេវាមួយជាកាតព្វកិច្ច ហើយបែងចែកទៀតថា ជាការធានារ៉ាប់រងដូចគ្នា ដូចជា ធានារ៉ាប់រងសុខភាព ធានារ៉ាប់រងគ្រោះថ្នាក់បុគ្គល ប៉ុន្តែជាកាត្វកិច្ច។ឯកឧត្តមបានបន្ថែមថា អ្វីដែលជាការផ្តល់កាតព្វកិច្ចក្នុងក្របខណ្ឌរបស់រាជរដ្ឋាភិបាលជាសេវាមូលដ្ឋាន មានន័យថា តម្រូវឲ្យពលរដ្ឋ កម្មករនិយោជិត ដែលធ្វើការក្នុងសេដ្ឋកិច្ចក្នុងប្រព័ន្ធតំរូវឲ្យបង់ភាគទាន បានកាត់ចេញពីប្រាក់ខែតែម្តង ហើយរដ្ឋផ្តល់សេវាជូនវិញតាមរយៈសេវាសុខាភិបាលជាដើម ដែលនេះជាកាតព្វកិច្ច។ ឯកឧត្តម បានឲ្យដឹងទៀតថា ចំណែកឯការធានារ៉ាប់រងផ្នែកសុខភាពរបស់ក្រុមហ៊ុនឯកជន គឺជាសេវាស្ម័គ្រចិត្ត បានន័យថា ប្រសិនបើប្រជាពលរដ្ឋ ពេលដែលបានទទួលសេវាសុខភាពពី ប.ស.ស. ដែលយល់ថា មិនគ្រប់គ្រាន់នោះទេ គឺអាចទិញបន្ថែមចំពោះសេវាធានារ៉ាប់រងរបស់ឯកជនបន្ថែមទៀតដូចជា ការទៅព្យាបាលនៅក្រៅប្រទេស និងសេវាផ្សេងៗដទៃទៀតជាដើម។កាលពីពេលកន្លងទៅ លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា បានលើកឡើងថា សារៈសំខាន់នៃធានារ៉ាប់រងត្រូវបានទទួលស្គាល់ជាទូទៅ ជាពិសេសនៅក្នុងបណ្តាប្រទេសដែលមានសេដ្ឋកិច្ចជឿនលឿន ដោយសារជាសំណាញ់សុវត្ថិភាពហិរញ្ញវត្ថុ ដែលជួយកក្រុមគ្រួសារ និងធុរកិច្ចនានាឲ្យបានរួចផុតពីទុក្ខលំបាកផ្នែកហិរញ្ញវត្ថុ នៅពេលមានគ្រោះអកុសលកើតឡើង ដូចជាមរណភាពនៃមេគ្រួសារ អគ្គិភ័យ គ្រោះថន្នាក់ចរាចរណ៍ និងជំងឺធ្ងន់ធ្ងរជាដើម។ ប៉ុន្តែសារៈសំខាន់នេះ ត្រូវបានមើលរំលងដោយក្រុមគោលដៅមួយចំនួន ជាពិសេសនៅកម្ពុជា ដោយសារកត្តាជាសារវ័ន្តមួយចំនួន ដូចជាទីផ្សារធានារ៉ាប់រងនៅមានអាយុក្មេងខ្ចី និងកង្វះការយល់ដឹងជាសាធារណៈអំពីហានិភ័យ ក៏ដូចជាមុខងារ និងអត្ថប្រយោជន៍នៃធានារ៉ាប់រង។បច្ចុប្បន្ននេះ កម្ពុជាមានក្រុមហ៊ុនធានារ៉ាប់រងចំនួន ៤០ក្រុមហ៊ុន ក្នុងនោះក្រុមហ៊ុនធានារ៉ាប់រងប្រភេទទូទៅចំនួន១៨ , ក្រុមហ៊ុនធានារ៉ាប់រងអាយុជីវិតចំនួន១៤ , ក្រុមហ៊ុនខ្នាតតូចធានារ៉ាប់រងខ្នាតតូចចំនួន៧ និងក្រុមហ៊ុនធានារ៉ាប់រងបន្តចំនួន១។ ក្រុមហ៊ុនទំាងអស់នេះ មានទ្រព្យសកម្មសរុបចំនួនប្រមាណជាង ១ពាន់លានដុល្លារ៕ អត្ថបទ ឈិត បូរ៉ាវី

សកម្មភាពសេដ្ឋកិច្ចក្នុងស្រុកនឹងបន្តងើបឡើង គាំទ្រដោយវិស័យចម្បងមួយចំនួន

សកម្មភាពសេដ្ឋកិច្ចកម្ពុជានឹងបន្តចលនាងើបឡើង ដែលគាំទ្រដោយវិស័យសេវាកម្ម និងពាណិជ្ជកម្ម ជាពិសេសលើវិស័យ ពាណិជ្ជកម្មអន្តរជាតិ ជាមួយសម្ទុះនៃការនាំចេញ ដែលជំរុញដោយភាពជាដៃគូអន្តរជាតិ និងកិច្ចព្រមព្រៀងពាណិជ្ជកម្មផ្សេងៗ។ សូចនាករសេដ្ឋកិច្ចសំខាន់ៗ នៃរយៈពេល ៦ ខែ ឆ្នាំ ២០២៤, បានបង្ហាញនូវនិន្នាការសេដ្ឋកិច្ចកាន់តែល្អប្រសើរជាបន្តបន្ទាប់ ក្នុងនោះបើគិតត្រឹមឆមាសទី១ ទំហំពាណិជ្ជកម្មលើទីផ្សារអន្តរជាតិរបស់កម្ពុជា មានទឹកប្រាក់ប្រមាណជាង ២៦ លានពាន់ដុល្លារអា មេរិក កើនជាង ១២ ភាគរយ បើធៀបនឹងឆមាសទី១ ក្នុងឆ្នាំ ២០២៣ ក្នុងនោះកម្ពុជាបាននាំចេញមានទឹកប្រាក់ជាង ១២ ពាន់ លានដុល្លារកើន ១២ភាគរយ ខណៈការនាំចូលមានទឹកប្រាក់ជាង ១៣ ពាន់លានដុល្លារ កើនជាង ១២ភាគរយ។ជុំវិញបញ្ហានេះដែរ, អ្នកឧកញ៉ា លឹម ហេង អនុប្រធានប្រធានសភាពាណិជ្ជកម្មកម្ពុជា លើកឡើងថា បើយោងតាមស្ថានភាពខាង លើនេះ បានបង្ហាញសញ្ញាណកាន់តែល្អ ជាពិសេសលើការធ្វើពាណិជ្ជកម្មអន្តរជាតិ នឹងរំពឹងថា សកម្មភាពសេដ្ឋកិច្ចកម្ពុជានឹងបន្ត ចលនាងើបឡើងជាបន្តបន្ទាប់។ ចំពោះការងើបឡើងនេះ បានកើតចេញជាពីការខិតខំប្រឹងប្រែងរបស់ប្រមុខរាជរដ្ឋាភិបាល ជាក់ស្តែង កន្លងមកនេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា សម្តេចបានអញ្ជើញចេញទៅក្រៅ ប្រទេសជាបន្តបន្ទាប់ ដើម្បីបង្កើតនូវទំនាក់ទំនង និងកិច្ចសហប្រតិបត្តិការ ជាពិសេសការដឹកនាំរៀបចំនូវវេទិការធុរកិច្ចជាដើម រួមជា មួយកិច្ចព្រមព្រៀងពាណិជ្ជកម្ម បានកំពុងជំរុញនាំចេញ និងវិនិយោគ ដែលជាចំណែកដល់ការអភិវឌ្ឍជាតិ។ចំណែកការវិនិយោគវិញ, អ្នកឧកញ៉ា លឹម ហេង លើកឡើងបន្ថែមថា នៅក្នុងវិបត្តិជាសកលនេះ ឃើញថា ប្រទេសមួយចំនួនជួប អស្ថិរភាពនយោបាយ ដែលជាហេតុធ្វើឲ្យអ្នកវិនិយោគងាកមករកកម្ពុជា ជាក់ស្តែងមកដល់ពេលនេះ កម្ពុជានៅតែទទួលបានក្រុមហ៊ុនថ្មីៗ មកបណ្តាក់ទុនជាបន្តបន្ទាប់។សូមបញ្ជាក់ថា បើយោងតាមរបាយការណ៍និន្នាការសេដ្ឋកិច្ច-សង្គម នៃក្រសួងសេដ្ឋកិច្ច និងហិរញ្ញវត្ថុ ការនាំចេញទំនិញ នៅក្នុងខែ មិថុនា ឆ្នាំ២០២៤ ហាក់បានបង្ហាញពីការធ្លាក់ចុះបន្តិច រវាងប្រទេសដែលនៅប៉ែកអាស៊ី ជាពិសេសក្នុងតំបន់អាស៊ាន និងចិន ខណៈដែលការនាំចេញ ជារួមក្នុងឆមាសទី១នេះ មានកំណើនល្អប្រសើរទៅគ្រប់បណ្តាទីផ្សារសំខាន់ៗ។ ជាក់ស្ដែង ក្នុងខែ មិថុនា ឆ្នាំ២០២៤ ការនាំចេញទៅកាន់ទីផ្សារក្នុងតំបន់អាស៊ាន ចិន និងជប៉ុន បានធ្លាក់ចុះក្នុងរង្វង់ជិត ១៦ ភាគរយ, ជិត ៨ ភាគរយ និង ០,៥ រៀងគ្នា ដោយសារការនាំចេញទៅប្រទេស ទាំងនេះ ភាគច្រើនជាទំនិញកសិផល ប៉ុន្តែគិតត្រឹមឆមាសទី១ ឆ្នាំ២០២៤ ការនាំចេញទៅកាន់ទីផ្សារតំបន់អាស៊ាន មានទំហំ ២ ៦៨៧ លានដុល្លារ កើនជាង ៨ ភាគរយ ក្នុងនោះទីផ្សារអឺរ៉ុប មានទំហំ ១ ៩៩៥ លានដុល្លារ កើនជាង ៩ ភាគរយ, ទីផ្សារអាម៉េរិក ៤ ៤០១ លានដុល្លារ កើនជិត ៤ ភាគរយ, ទីផ្សារចិន ៨១៥ លានដុល្លារ កើនជាង ១៤ ភាគរយ, ទីផ្សារជប៉ុន ៦២៩ លានដុល្លារ កើន ១៥ ភាគរយ, និងទីផ្សារប្រទេសផ្សេងទៀត មានទំហំ ១ ៤៧៤ លានដុល្លារ កើនឡើងជាង ១២ ភាគរយ ធៀបនឹងឆមាសទី១ឆ្នាំមុន៕ អត្ថបទ៖ សុន រ៉ាឌី

សម្ដេចធិបតី៖ រាជរដ្ឋាភិបាលនឹងដាក់ចេញគោលនយោបាយថ្មីការពារដីធ្លីដោយយកពលរដ្ឋធ្វើជាអ្នកការពារ

សម្ដេចមហាបវរធិបតីហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា នៅពេលខ្លីខាងមុខនេះ រាជរដ្ឋាភិបាល នឹងដាក់ចេញនូវគោលនយោបាយដីធ្លីមួយសំខាន់ ដោយប្រើប្រាស់ប្រជាជនឱ្យធ្វើជាអ្នកការពារដីតែម្ដង ។សម្ដេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា ក្នុងឱកាសអញ្ជើញជាអធិបតីប្រគល់សញ្ញា បត្រជូនដល់និស្សិតសាកលវិទ្យាល័យពុទ្ធិសាស្ត្រ នាព្រឹកថ្ងៃទី០៦ ខែសីហា នេះ បានប្រកាសថា ដើម្បីការ ពារដីធ្លី ទប់ស្កាត់ការទន្ទ្រានដីធ្លីខុសច្បាប់ ពិសេសតំបន់ភាគឦសាន និងតំបន់សំខាន់មួយចំនួនទៀត រាជរដ្ឋាភិបាល បានរៀបចំផែនយុទ្ធសាស្ត្រថ្មី ដែលកិច្ចការងារនេះ នឹងផ្សព្វផ្សាយដើម្បីពន្លត់ និងដោះ ស្រាយបញ្ហាការកាប់ទន្ទ្រានដីធ្លី និងបញ្ហាប្រជាភិថុតអត់ដី និងបាត់ទឹកដី ដែលគោលនយោបាយនេះ គឺព្រួញមួយ បាញ់បានសត្វពីរ ។រាជរដ្ឋាភិបាលច្បាស់ណាស់ហ៊ាននិយាយហ៊ានធានាសម្ដេចមិនមានគោលការណ៍ស្ពាយកូនប្រពន្ធទៅណាទេក្រៅពីរស់នៅស្រុកខ្មែរសម្ដេចក៏មានបងប្អូនមិត្តភក្កិធ្វើការដែរ។ ថ្មីៗនេះសម្ដេចធិបតី បានចុះហត្ថលេខាឯកភាពជាមួយអាជ្ញាធរដែនដីផ្ដល់ថវិកាជាង ៣ លានដុល្លារសាងសង់មន្ទីរពេទ្យបង្អែកមួយនៅបឹងកន្សែងខេត្តរតនគិរី ៕ អត្ថបទ៖ ម៉ក់ រ៉េនីតា

សិស្សានុសិស្សមានមោទនភាព ចំពោះការសាងសង់ព្រែកជីកហ្វូណនតេជោ ដែលជាសមិទ្ធផល សម្រាប់ជាតិ

សិស្សានុសិស្សបង្ហាញពីក្ដីសាទរ និងក្ដីមោទនភាពជាខ្លាំង ចំពោះការចាប់ផ្ដើមបើកការដ្ឋានសាងសង់ព្រែកជីកហ្វូណនតេជោ កាលពីថ្ងៃទី ៥ ខែសីហា ម្សិលម៉ិញ។ ក្ដីសាទរ និងក្ដីមោទនភាពនេះ ក៏ដោយសារពួកគេមើលឃើញពីអត្ថប្រយោជន៍ដ៏ធំធេងដែល កម្ពុជា នឹងទទួលបានក្រោយព្រែកជីកហ្វូណនតេជោ សាងសង់រួចរាល់។រាជរដ្ឋាភិបាល មន្ត្រីរាជការ ព្រះសង្ឃ សិស្សានុសិស្ស ក៏ដូចជាប្រជាពលរដ្ឋ គ្រប់មជ្ឈដ្ឋានទូទាំងប្រទេស បានបង្ហាញនូវការសាទរ គាំទ្រយ៉ាងក្លៀវក្លាចំពោះការបើកការដ្ឋានសាងសង់ព្រែកជីកហ្វូណនតេជោ កាលពីថ្ងៃម្សិលម៉ិញនេះ។ ការបើកការដ្ឋានសាងសង់គម្រោងដ៏ធំនេះ ត្រូវបានប្រសិទ្ធនាមថា ជាគម្រោងប្រវត្តិសាស្ត្រសម្រាប់កម្ពុជា ដែលពុំធ្លាប់មាន ។ សម្រាប់ការសាង់សង់ព្រែកជីកហ្វូណនតេជោនេះ សិស្សានុសិស្សសិក្សានៅវិទ្យាល័យ ហ៊ុនសែន តាខ្មៅ បានបង្ហាញនូវក្ដីមោទនភាពជាខ្លាំង។ មោទនភាព ដោយសារពួកគេមើលឃើញពីអត្ថប្រយោជន៍ធំធេង ដែលកម្ពុជានឹងទទួលបានក្រោយព្រែកជីកសាងសង់រួចរាល់។ ក្នុងនាមជាយុវជនផងដែរ ពួកគេចង់ឃើញសមិទ្ធផលដ៏ធំធេងមួយនេះ បញ្ចប់ការសាងសង់ឆាប់ៗ ហើយវានឹងក្លាយទៅជាសមិទ្ធផលសម្រាប់ប្រជាជនកម្ពុជាទាំងមូល។ព្រែកជីកហ្វូណន តេជោ ជាគម្រោងក្រោមការផ្ដួចផ្ដើមដោយសម្ដេច ហ៊ុន សែន អតីតនាយករដ្ឋមន្ត្រីកម្ពុជា។ ព្រែកជីកហ្វូណនតេជោ ចាប់ផ្ដើមសាងសង់ នៅក្នុងរាជរដ្ឋាភិបាលថ្មី នីតិកាលទី ៧ ក្រោមការដឹកនាំដោយសម្ដេចធិបតី ហ៊ុន ម៉ាណែត។ សម្ដេចធិបតី ហ៊ុន ម៉ាណែត បានប្រកាសជាថ្មីនៅថ្ងៃនេះដែរថា ការសាងសង់ព្រែកជីកហ្វូណនតេជោ គឺធ្វើដើម្បីផលប្រយោជន៍ជាតិពិតប្រាកដ និងសូមឱ្យពលរដ្ឋរង់ចាំមើល ខណៈព្រែកជីកហ្វូណនតេជោនេះ គ្រោងបញ្ចប់ការសាងសង់នៅក្នុងឆ្នាំ២០២៨។ព្រែកជីកហ្វូណនតេជោ នឹងផ្តល់ផលប្រយោជន៍ដ៍មហាសាលដល់សង្គម-សេដ្ឋកិច្ចកម្ពុជា ព្រមទាំងធ្វើឱ្យប្រទេសកម្ពុជាពង្រឹងនូវឯករាជ្យភាពលើការដឹកជញ្ជូនតាមផ្លូវទឹក ដោយពុំចាំបាច់ការពឹងផ្អែកលើប្រទេសជិតខាង ហើយនឹងមិនបង្កផលប៉ះពាល់ដល់បរិស្ថាន ប្រព័ន្ធអេកូឡូស៊ី និងរំហូរទឹកទន្លេមេគង្គឡើយ។ព្រែកជីកហ្វូណនតេជោ ជាប្រព័ន្ធធារាសាស្ត្រ ដែលសាងសង់ ដោយឆ្លងកាត់ខេត្តកណ្ដាល តាកែវ កំពត និងខេត្តកែប ដោយមានទីតាំងចាប់ពីព្រែកតាកែវ ឆ្លងកាត់ព្រែកតាឯក ចូលតាមព្រែកតាហ៊ីង និងបន្តរហូតដល់សមុទ្រខេត្តកែប។ព្រែកជីកនេះ មានទទឹងខាងលើ ១០០ម៉ែត្រ ទទឹងខាងក្រោម ៨០ម៉ែត្រ និងជម្រៅ ៥,៤ម៉ែត្រ។ ព្រែកជីកហ្វូណនតេជោ នេះមានសន្ទះផ្លូវនាវាចរណ៍មាន ០៣កន្លែង ស្ពាន ១១កន្លែង ផ្លូវអមសងខាងប្រវែងសរុបប្រមាណ ២០៨គីឡូម៉ែត្រ៕ អត្ថបទ៖ គឹម ហុក

សម្តេចធិបតី រំលឹកថា វិស័យសុខាភិបាលជាវិស័យអាទិភាពសំខាន់មួយរបស់រាជរដ្ឋាភិបាល

សម្តេចធិបតី ហ៊ុន ម៉ាណែត នាយករដ្ឋមន្ត្រី នៃកម្ពុជា បានគូសបញ្ជាក់ជាថ្មីថា ក្នុងចំណោមវិស័យសំខាន់ៗនានា វិស័យសុខាភិបាលគឺជាវិស័យអាទិភាពសំខាន់មួយរបស់រាជរដ្ឋាភិបាល នៅក្នុងការធានានូវសុខុមាលភាពរបស់ប្រជាជន។សម្តេចធិបតី ហ៊ុន ម៉ាណែត នាយករដ្ឋមន្ត្រី ក្នុងពិធីចែកសញ្ញាបត្រជូនដល់និស្សិតជ័យលាភី នៃ សាកលវិទ្យាល័យពុទ្ធិសាស្ត្រ នៅមជ្ឈមណ្ឌលសន្និបាតនិងពិព័រណ៍អន្តរជាតិជ្រោយចង្វារ នាព្រឹកថ្ងៃទី៦ ខែសីហា នេះ បានគូសបញ្ជាក់ថា កាលពីខែឧសភាកន្លងទៅនេះ សម្តេចបានប្រកាសដាក់ឱ្យអនុវត្តនូវផែនទីបង្ហាញផ្លូវឆ្ពោះទៅការគ្របដណ្តប់សុខភាពជាសកលនៅកម្ពុជា នៅឆ្នាំ២០២៤-២០៣៥ ។សម្តេចធិបតីនាយករដ្ឋមន្ត្រី បានបញ្ជាក់ថា ក្នុងការជំរុញការអនុវត្តគោលនយោបាយរាជរដ្ឋាភិបាលតែងតែចាត់ទុកស្ថាប័នគ្រឹះស្ថានឧត្តមសិក្សាជាដៃគូសហការយ៉ាងជិតស្និត និងមិនអាចខ្វះបាន ក្នុងការតម្រង់ទិសអនាគតមូលធនមនុស្សឱ្យចំគោលដៅ ដោយផ្អែកលើចក្ខុវិស័យរួមប្រកបដោយមហិច្ឆតារបស់កម្ពុជា។ ស្ថាប័នឧត្តមសិក្សា គឺជាតួអង្គដ៏សំខាន់ក្នុងការធនាថា យុវជនជំនាន់ក្រោយរបស់កម្ពុជា មានជំនាញសម្រាប់អនាគត មានភាពធន់ និងសមត្ថភាពសម្របសម្រួលបានឆាប់រហ័ស តាមទាន់ការវិវត្តជឿនលឿននៃបរិការណ៍សង្គម និងបច្ចេកវិទ្យា ។ ក្នុងស្មារតីនេះសម្តេចបានលើកទឹកចិត្តសាកលវិទ្យាល័យពុទ្ធិសាស្ត្រ ក៏ដូចជាស្ថាប័នឧត្តមសិក្សាដទៃទៀតបន្តពង្រឹងការស្ថាប័នទាំងផ្អែករឹង និងផ្នែកទន់ដើម្បីបង្កើនទំនុកទុកចិត្ត និងឧត្តមភាពនិងការប្រកួតប្រជែងលើឆាកអន្តរជាតិ ៕ អត្ថបទ៖ មុត សុទ្ធ

វិនិយោគិនមកពីឌូបៃ ឥណ្ឌា និងសិង្ហបុរី កំពុងគ្រោងធ្វើការវិនិយោគលើវិស័យសុខាភិបាលនៅកម្ពុជា

ក្រុមវិនិយោគិនមកពីទីក្រុងឌូបៃ ប្រទេសអារ៉ាប៊ីសាអ៊ូឌីត ប្រទេសឥណ្ឌា និងសិង្ហបុរី បានបង្ហាញការចាប់អារម្មណ៍ និងគ្រោងធ្វើការវិនិយោគលើវិស័យសុខាភិបាល និងភោជនីយកដ្ឋាន ជាដើម នៅក្នុងប្រទេសកម្ពុជា ។ក្នុងពេលនេះ ក្រុមអ្នកវិនិយោគមកពីទីក្រុងឌូបៃ ប្រទេសអារ៉ាប៊ីសាអ៊ូឌីត ប្រទេសឥណ្ឌា និងសិង្ហ បុរី កំពុងធ្វើទស្សនកិច្ចប្រទេសកម្ពុជា ដើម្បីសិក្សាស្វែងយល់បន្ថែម និងជួបជាមួយមន្ត្រី ឬអ្នកពាក់ព័ន្ធនៅកម្ពុជា ។ លោកវេជ្ជបណ្ឌិត សារ៉ាយូឌីន (Sirajuddin) ដែលជាអ្នកសម្របសម្រួលក្រុមអ្នកវិនិយោគនេះ បានឱ្យដឹងថា លោកបានមកដល់ប្រទេសកម្ពុជាប្រមាណ៧ឆ្នាំមកហើយ និងបាននាំអ្នកវិនិយោគមក កម្ពុជាជាច្រើន ហើយពេលនេះ បាននាំអ្នកវិនិយោគបន្ថែមទៀតមកពីឌូបៃ សិង្ហបុរី និងឥណ្ឌា ដែលពួកគេ ពិតជាចង់វិនិយោគនៅក្នុងប្រទេសកម្ពុជា ដោយចង់បង្កើតក្រុមហ៊ុន និងអ្វីៗជាច្រើនទៀត ព្រោះកម្ពុជា ជាប្រទេសដ៏ស្រស់ស្អាតខ្លាំង និងគួរឲ្យទាក់ទាញ ។លោកបានបង្ហាញការពេញចិត្ត និងស្រឡាញ់ពលរដ្ឋ និងប្រទេសកម្ពុជា ដែលមានបរិយាកាសល្អ ហើយនឹងបន្តនាំអ្នកវិនិយោគមកកាន់តែច្រើនបន្ថែមទៀតពីជុំវិញពិភពលោក ដើម្បីចូលរួមលើកកម្ពស់ ប្រទេសកម្ពុជាឱ្យកាន់តែរីកចម្រើន ខណៈពេលនេះ ក៏បាននាំអ្នកវិនិយោគមកពីឌូបៃ សិង្ហបុរី និងឥណ្ឌា ក្នុងនោះមានអ្នកមានបទពិសោធន៍លើការផលិតភាគយន្តនៅឥណ្ឌា និងសមាគមភោជនីដ្ឋានហាឡាល់ ជាដើម ។អ្នកវិនិយោគ បានលើកឡើងថា កម្ពុជា មានវប្បធម៌ និងអរិយធម៌ដ៏យូរលង់ណាស់មកហើយ ជា មួយនឹងការមានបទពិសោធន៍ផ្នែកពាណិជ្ជកម្មដ៏សម្បូរបែប ហើយពួកគេ គឺមានបំណងយកនាំមកនូវការ វិនិយោគបែបស្ដង់ដាអន្តរជាតិមកកាន់កម្ពុជា រួមទាំងការនាំយកផលិតផលពីកម្ពុជាទៅកាន់ពិភពលោក។ពួកគេបានបន្តថា ជាមួយនឹងការមានបទពិសោធន៍ និងការិយាល័យក្រុមហ៊ុន នៅក្នុងប្រទេស ចំនួន១៨ជុំវិញពិភពលោក ដែលកំពុងផ្តោតសំខាន់លើទេសចរណ៍វេជ្ជសាស្រ្ត ក៏ចង់ធ្វើការវិនិយោគវិស័យ នេះនៅក្នុងប្រទេសកម្ពុជា ជាមួយនឹងការបើកនូវភោជនីយកដ្ឋានបែបឥណ្ឌា និងអារ៉ាប់ ជាដើម ខណៈ ដែលកម្ពុជា មានស្ថិរភាពនយោបាយល្អ ជាអ្វីដែលអ្នកវិនិយោគបរទេសចង់បាន និងមានទំនុកចិត្ត ។ក្នុងដំណើរស្វែងរកឱកាសវិនិយោគនេះ វិនិយោគិនឌូបៃ ឥណ្ឌា និងសិង្ហបុរី ក៏មានគម្រោងជួប ជាមួយថ្នាក់ដឹកនាំ និងមន្ត្រីនៃក្រសួងស្ថាប័នពាក់ព័ន្ធមួយចំនួន ដែលក្នុងនោះមានរដ្ឋមន្ត្រីក្រសួងព័ត៌មាន និងរដ្ឋមន្ត្រីក្រសួងទេសចរណ៍ ជាដើម៕ អត្ថបទ៖ បាន សុខរិទ្ធិ

ឯកឧត្តមទេសរដ្ឋមន្រ្តី លី ធុជ អនុញ្ញាតឱ្យឯកអគ្គរាជទូតម៉ាឡេស៊ីប្រចាំនៅកម្ពុជា ចូលជួបសម្តែង ការគួរសម និងស្វែងយល់អំពីកម្មវិធីកិច្ចប្រតិបត្តិការសកម្មភាពមីននៅកម្ពុជា

នៅថ្ងៃទី០៦ ខែសីហា ឆ្នាំ២០២៤ ឯកឧត្តមបណ្ឌិត លី ធុជ ទេសរដ្ឋមន្រ្តី និងជាអនុប្រធានទី១ អាជ្ញាធរមីន បានអនុញ្ញាតឱ្យ ឯកឧត្តម Shaharuddin Onn ឯកអគ្គរាជទូតម៉ាឡេស៊ីប្រចាំនៅកម្ពុជា ដឹកនាំប្រតិភូចូលជួបសម្តែងការគួរសម និងស្វែងយល់អំពីកម្មវិធីកិច្ចប្រតិបត្តិការសកម្មភាពមីននៅកម្ពុជា។ ក្នុងជំនួបនោះ ឯកឧត្តមទេសរដ្ឋមន្រ្តី លី ធុជ បានលើកឡើងអំពីទំនាក់ទំនងការទូតជាប្រវត្តិសាស្រ្តរវាងប្រទេសកម្ពុជា និងម៉ាឡេស៊ី រយៈពេល ៦៧ឆ្នាំ ចាប់តាំងពីថ្ងៃទី៣១ ខែសីហា ឆ្នាំ១៩៥៧ ជាពិសេសបានចូលរួមយ៉ាងសកម្មក្នុងដំណើរការស្វែងរកសន្តិភាពនៅកម្ពុជា ដើម្បីបញ្ចប់ការវិលត្រឡប់មកវិញរបស់របបខ្មែរក្រហម និងការបញ្ជូនកងកម្លាំងរបស់ខ្លួននៅឆ្នាំ១៩៩៣ ក្នុងការរួមចំណែកដល់បេសកម្មសម័យ UNTAC ផងដែរ។ ឯកឧត្តមបណ្ឌិត លី ធុជ បានគូសបញ្ជាក់ទៀតថា ក្រោយបញ្ចប់សង្រ្គាមរ៉ាំរ៉ៃនៅកម្ពុជា ប្រទេសម៉ាឡេស៊ី បានដើរតួនាទីមួយយ៉ាងសំខាន់ក្នុងការសម្រេចចិត្តមកធ្វើការវិនិយោគ និងការស្តារឡើងវិញនូវសេដ្ឋកិច្ចរបស់កម្ពុជា។ ជាងនេះទៅទៀត ចាប់តាំងពីឆ្នាំ២០២២ ក្រុមហ៊ុនម៉ាឡេស៊ី មួយចំនួនរួមមាន៖ សភាពាណិជ្ជកម្មម៉ាឡេស៊ីប្រចាំកម្ពុជា អង្គភាពVirtus Media (Khmer Times) និងធនាគារមេឃប៊ែង ជាដើម មិនត្រឹមតែរួមចំណែកដល់ការអភិវឌ្ឍ និងបង្កើតឱកាសការងារដល់ប្រជាពលរដ្ឋកម្ពុជាប៉ុណ្ណោះទេ ថែមទាំងរួមចំណែកដល់សកម្មភាពមនុស្សធម៌ដូចជាការងារបោសសម្អាតមីន និងកិច្ចសង្រ្គោះជនរងគ្រោះដោយសារមីន និងសំណល់ជាតិផ្ទុះពីសង្រ្គាម។ ក្នុងនាមរាជរដ្ឋាភិបាល និងប្រជាជនកម្ពុជា ឯកឧត្តម ទេសរដ្ឋមន្រ្តី លី ធុជ បានទទួលស្គាល់ការគាំទ្រ និងភាពជាដៃគូ ក្នុងការរួមចំណែកជំរុញកិច្ចខិតខំប្រឹងប្រែងដល់ការអភិវឌ្ឍសេដ្ឋកិច្ចសង្គមជូនដល់ប្រជាពលរដ្ឋកម្ពុជានៅតាមមូលដ្ឋាន តាមរយៈការឧបត្ថម្ភគាំទ្ររបស់ក្រុមហ៊ុនម៉ាឡេស៊ី។ ឯកឧត្តម Shaharuddin Onn បានវាយតម្លៃខ្ពស់ចំពោះទំនាក់ទំនងរវាប្រទេស និងប្រជាជនទាំងពីរ ព្រមទាំងកោតសរសើរចំពោះភាពជាអ្នកដឹកនាំរបស់រាជរដ្ឋាភិបាលកម្ពុជាក្នុងវិស័យសកម្មភាពមីនរយៈពេលជាង ៣០ឆ្នាំ តាមរយៈអាជ្ញាធរមីន។ ជាមួយគ្នានោះ ឯកឧត្តមអគ្គរាជទូត បានសម្តែងនូវការអបអរសាទរចំពោះកម្ពុជា ដែលត្រូវបានជ្រើសតាំងជាប្រធាន និងម្ចាស់ផ្ទះរៀបចំកិច្ចប្រជុំត្រួតពិនិត្យឡើងវិញលើកទី៥ ឬកិច្ចប្រជុំកំពូលសៀមរាប-អង្គរស្តីពីពិភពលោកមួយដែលគ្មានមីន នៃអនុសញ្ញាអូតាវ៉ាឆ្នាំ២០២៤ និងបានជូនពរឱ្យកម្ពុជាទទួលបានជោគជ័យក្នុងដំណើរការរៀបចំកិច្ចប្រជុំកំពូលនេះ៕ អត្ថបទ,ភារម្យ

ដើមខែសីហានេះ អាវុធហត្ថរាជធានីភ្នំពេញ បង្រ្កាបក្មេងទំនើងបង្ហោះម៉ូតូ ២៦នាក់ ឃាត់ម៉ូតូ ១៥គ្រឿង រក្សាទុករយៈពេល៣ខែ

ភ្នំពេញ៖ បន្ទាប់ពីសម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បានដាក់បទបញ្ជាពាក់ព័ន្ធនឹងការចាត់វិធានការ ចំពោះបញ្ហាក្រុមក្មេងទំនើងបង្ហោះម៉ូតូតាមដងផ្លូវសាធារណៈ តាមរយៈសារសំឡេងពិសេស កាលពីថ្ងៃទី២៨ ខែកក្កដា ឆ្នាំ២០២៤ ដែលសម្តេច បានណែនាំឲ្យឃាត់ម៉ូតូរក្សារទុករយៈពេលបីខែ ចំពោះការប្រព្រឹត្តលើកទីមួយ និងប្រាំមួយខែប្រសិនបើមិនរាងចាល នៅតែប្រព្រឹត្តបន្តទៀតលើកទីពីរ ។អាវុធហត្ថរាជធានីភ្នំពេញ ដើមខែសីហា ឆ្នាំ២០២៤ កម្លាំងបង្ក្រាបបានក្មេងទំនើង បង្ហោះម៉ូតូ ចំនួន០៣ក្រុម ស្មើនឹង២៦នាក់ ឃាត់ម៉ូតូបាន ១៥គ្រឿង ក្នុងនោះបង្ក្រាបកាលពីថ្ងៃទី៣១ ខែកក្កដា ឈានចូល ថ្ងៃទី០១ ខែសីហា ឆ្នាំ២០២៤ បង្ក្រាបបាន ០៦នាក់ ម៉ូតូ ០៤គ្រឿង ដែលបានចេញពីជួបជុំគ្នាផឹកទឹកត្នោតជូរ ទៅបង្ហោះម៉ូតូទៅម្ដុំបឹងកក់ ។ នៅយប់ថ្ងៃទី០១ ឈានចូលថ្ងៃទី០២ ខែសីហា ឆ្នាំ២០២៤ បង្ក្រាបបាន ០៥នាក់ ម៉ូតូ ០៣គ្រឿង នៅចំណុចមុខហាងហ្គោលឌែនមាស ផ្លូវប៉េតុង ក្រុមហ៊ុន OCIC ភូមិដើមគរ សង្កាត់ជ្រោយចង្វារ ខណ្ឌជ្រោយចង្វារ និងចំណុចសួនច្បារ ឬស្សីកែវ ខណ្ឌឬស្សីកែវ រាជធានីភ្នំពេញ និងនៅល្ងាចថ្ងៃទី០២ ខែសីហា ឆ្នាំ២០២៤ បង្ក្រាបបាន ១៥នាក់ រួមនិងម៉ូតូចំនួន ០៨គ្រឿង នៅចំណុចផ្លូវបេតុង ភូមិជ័យជម្នះ សង្កាត់ឪឡោក ខណ្ឌកំបូល រាជធានីភ្នំពេញ។អាវុធហត្ថរាជធានីភ្នំពេញ សូមអំពាវនាវបងប្អូនប្រជាពលរដ្ឋ ប្រសិនបើបានឃើញទង្វើទំនើងទាំងឡាយរបស់ក្រុមក្មេងស្ទាវ សូមទំនាក់ទំនងផ្តល់ព័ត៌មាន ទៅកាន់កងរាជអាវុធហត្ថរាជធានីភ្នំពេញ តាមរយៈទូរស័ព្ទ Hotline លេខ ១២៩១ អាវុធហត្ថរាជធានីភ្នំពេញ នឹងរក្សាការសម្ងាត់ជូន៕ តារាវុទ្ធី

សម្តេចធិបតី៖ ការជំរុញការកសាងព្រែកជីកហ្វូណន ឱ្យខាងតែបាននឹងបញ្ចប់ក្ដីមន្ទិលសង្ស័យរបស់ពលរដ្ឋ

សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា បានថ្លែងបញ្ជាក់ថា ការកសាងព្រែកជីក ហ្វូណនតេជោ គឺនឹងធ្វើឱ្យជនរួមជាតិទាំងអស់ ទាំងក្រុមប្រឆាំង និងមិនប្រឆាំង អស់មន្ទិលសង្ស័យ និងអស់កង្វល់ ក្រោយគម្រោងនេះសាងសង់រួចជាស្ថាពរហើយនោះ ហើយរាជរដ្ឋាភិបាល នឹងខិតខំជំរុញ គម្រោងនេះឱ្យចេញជារូបរាង ដើម្បីឧត្តមប្រយោជន៍រួមរបស់ជាតិ និងប្រជាជនខ្មែរទាំងមូលនោះ។ក្នុងឱកាសអញ្ជើញជាអធិបតីភាពក្នុងពិធីប្រគល់សញ្ញាបត្រ ជូននិស្សិតសាកលវិទ្យាល័យពុទ្ធិ សាស្ត្រ នាព្រឹកថ្ងៃទី០៦ ខែសីហានេះ សម្តេចធិបតីនាយករដ្ឋមន្រ្តី បានលើកឡើងថា មានក្រុមអ្នកវិភាគ មួយក្តាប់តូច នៅតែរិះគន់ចំពោះគម្រោងព្រែកជីកហ្វូណនតេជោ បើទោះបីជាគម្រោងនេះបានសម្ពោធ បើកការដ្ឋានសាងសង់ជាផ្លូវការហើយនោះ ។ក្រុមអ្នកវិភាគខ្លះ បាននិយាយថា គម្រោងព្រែកជីកនេះ សាងសង់មានភាពបត់បែនច្រើន មិនធ្វើត្រង់ ដោយសារតែពុករលួយ និងខ្លះទៀតនៅតែនិយាយច្រំដែលៗថា ការសាងសង់នូវគម្រោងនេះ នឹងបាត់បង់នូវអធិបតេយ្យជាតិជាដើម ។ សម្តេចធិបតី បានបញ្ជាក់ថា មូលហេតុដែលគម្រោងព្រែកជីកហ្វូណនតេជោត្រូវធ្វើបត់បែន មិនធ្វើ ត្រង់ ឬជីកត្រង់នោះ គឺដើម្បីបញ្ចៀសផលប៉ះពាល់ដល់បរិស្ថានធម្មជាតិ និងប៉ះពាល់ដល់គេហដ្ឋានប្រជា ពលរដ្ឋជាដើម ខណៈគម្រោងនេះជីកកន្លែងថ្មី មានត្រឹមតែប៉ុន្មានគីឡូប៉ុណ្ណោះ ។យ៉ាងណាក៏ដោយ សម្តេចធិបតី ហ៊ុន ម៉ាណែត នាយករដ្ឋមន្រ្តី បានប្រកាសថ្លែងអំណរគុណដល់ជនរួមជាតិទាំងអស់ទាំងក្នុង និងក្រៅប្រទេស ដែលបានគាំទ្រនូវគម្រោងព្រែកជីកហ្វូណនតេជោ ដោយគ្រប់ស្ថាប័នរដ្ឋ ឯកជន និងតាមសាលារៀន វត្តអារាមទាំងអស់ ដែលបានវាយជួង ទូងស្គរ និងរគាំងដើម្បីជាការរួមចំណែកជាមួយរាជរដ្ឋាភិបាលចំពោះគម្រោងដ៏ប្រវត្តិសាស្រ្តមួយនេះ។ សម្តេចនៅតែនិយាយអះអាងថា គម្រោង ព្រែកជីកហ្វូណនតេជោនឹងផ្តល់អត្ថប្រយោជន៍ដ៏មហាសាលដល់សង្គម និងសេដ្ឋកិច្ចជាតិកម្ពុជា ដូចជាការពង្រីកការតភ្ជាប់ប្រព័ន្ធដឹកជញ្ជូន ពហុធម្យោបាយ ចំណេចចម្ងាយផ្លូវ ពេលវេលា និងថ្លៃដឹកជញ្ជូនប្រកបដោយ ភាពប្រកួតប្រជែងត្រង់ទៅសមុទ្រ បង្កើនវិសាលភាពប្រព័ន្ធស្រោចស្រព និងរំដោះទឹកជំនន់ ជួយពង្រីកនិង បង្កើនផលិតភាពនៃការដាំដុះនៅភាគនារតី ទទួលបានផលពីនេសាទ និងពីវារីវប្បកម្ម ព្រមទាំងជំរុញវិស័យ ទេសចរណ៍ និងវិនិយោគ ជាពិសេសការបង្កើតតំបន់សេដ្ឋកិច្ចពិសេស តំបន់ឧស្សាហកម្ម និងការកែច្នៃនាំចេញ ជាដើម៕អត្ថបទបាន ចក់

បណ្ដាញសង្គម

ព័ត៌មានថ្មីៗ

ការិយាល័យឧតុនិយមអង់គ្លេស៖ អាកាសធាតុក្តៅជាប់កំណត់ត្រាខែឧសភា មិនទាន់អាចចាត់ថ្នាក់ថាជារដូវក្តៅខ្លាំងនោះទេ

ប្រមុខ WHO ព្រមានថា ជម្លោះជំរុញឲ្យវិបត្តិជំងឺ Ebola កាន់តែអាក្រក់ នៅភាគខាងកើតកុងហ្គោ

អ៊ីរ៉ង់៖ សេចក្តីព្រាងកិច្ចព្រមព្រៀងជាមួយអាមេរិក នឹងបើកច្រកសមុទ្រ Hormuz ឡើងវិញ និងបញ្ចប់បិទផ្លូវទឹក

នគរបាលអេស្ប៉ាញសម្រុកចូលទីស្នាក់ការកណ្តាលគណបក្សសង្គមនិយមរបស់លោក Sanchez

ហ្គាណាធ្វើមាតុភូមិនិវត្តន៍ពលរដ្ឋរបស់ខ្លួន ក្រោយការវាយប្រហារប្រឆាំងជនបរទេសនៅអាហ្វ្រិកខាងត្បូង

ជនមូស្លីមនៅទូទាំងតំបន់មជ្ឈិមបូព៌ា និងអាហ្វ្រិកខាងជើងប្រារព្ធថ្ងៃដំបូងនៃពិធីបុណ្យ Eid

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877