BTV NEWS

ប៉ូលិសកម្ពុជាបញ្ជាក់ពីការចាប់ជនជាតិសាម៉នពីរនាក់បាញ់ប្រហារលើជនជាតិអូស្ត្រាលីពីរនាក់នៅទីក្រុងហូជីមិញ

ចាប់គិតចាប់ពីខែកក្កដាឆ្នាំមុនដល់ពេលនេះសមត្ថកិច្ចបង្ក្រាប Onlin Scams ជាង៤០០ករណី និងបណ្តេញជនបរទេសជិត ២ម៉ឺននាក់ចេញពីកម្ពុជា

មន្រ្តីជាន់ខ្ពស់ក្រសួងកោតសរសើរមន្ទីរអភិវឌ្ឍន៍ជនបទខេត្តកំពង់ឆ្នាំង ថែទាំផ្លូវបានល្អជូនប្រជាពលរដ្ឋ

ឯកឧត្តម គន់ គីម អញ្ជើញចុះសួរសុខទុក្ខសមាជិក អ.ន.ក.តាមខ្នងផ្ទះ ក្នុងខេត្តស្វាយរៀង

ព័ត៌មានជាតិ

ប្រធានក្រុមប្រឹក្សាធម្មនុញ្ញ៖ សមិទ្ធផល៣០ឆ្នាំនៃរដ្ឋធម្មនុញ្ញធ្វើឱ្យកម្ពុជាបន្តមានលទ្ធិប្រជាធិបតេយ្យ

ភ្នំពេញ ៖ ឯកឧត្តមកិត្តិនីតិកោលបណ្ឌិត អ៉ឹម ឈុនលឹម ប្រធានក្រុមប្រឹក្សាធម្មនុញ្ញ ថ្លែងថា សមិទ្ធផលសម្រេចបានក្នុងរយៈពេល៣០ឆ្នាំនៃរដ្ឋធម្មនុញ្ញធ្វើឱ្យកម្ពុជាបន្តមានលទ្ធិប្រជាធិបតេយ្យ និងជឿនលឿន។នៅថ្ងៃទី១ ខែសីហា ឆ្នាំ២០២៤ ក្រុមប្រឹក្សាធម្មនុញ្ញបានសហការជាមួយរដ្ឋបាលខេត្តកណ្តាលអញ្ជើញផ្សព្វផ្សាយអំពីសមិទ្ធផលធម្មនុញ្ញសម្រេចបានក្នុង រយៈពេល៣០ឆ្នាំ” ក្រោមអធិបតីភាព ឯកឧត្តមកិត្តិនីតិកោលបណ្ឌិត អ៉ឹមម ឈុនលឹម ប្រធានក្រុមប្រឹក្សាធម្មនុញ្ញ ដើម្បីធ្វើបទបង្ហាញជូនដល់អាជ្ញាធរខេត្ត ក្រុង ស្រុក និងស្ថាប័ន-អង្គភាពមន្រ្តីរាជការជុំវិញខេត្តសរុបចំនួនជាង ២០០រូប។ក្នុងពិធីនោះ ឯកឧត្តម អ៉ឹម ឈុនលឹម មានប្រសាសន៍ថា រដ្ឋធម្មនុញ្ញឆ្នាំ១៩៩៣ ជារដ្ឋធម្មនុញ្ញមានលក្ខណៈប្រជាធិបតេយ្យជឿនលឿន ដែលបានកើតចេញពីឆន្ទៈរួមរបស់ប្រជាពស្ត្រខ្មែរគ្រប់និន្នាការនយោបាយ។ ក្នុងនោះ សភាធម្មនុញ្ញបានតាក់តែងរក្សាឱ្យមានមកវិញនូវគុណតម្លៃប្រពៃណីខ្មែរ (គឺជាតិ សាសនា ព្រះមហាក្សត្រ) អមជាមួយគុណតម្លៃធម្មនុញ្ញទំនើបជាមូលដ្ឋានគ្រឹះ (គឺប្រជាធិបតេយ្យ សិទ្ធិមនុស្ស នីតិរដ្ឋ) ដោយតាក់តែងបញ្ចូលទាំងស្រុង និងដោយលម្អិតនូវខ្លឹមសារនៃឧបសម្ព័ន្ធទី៥ នៃកិច្ចព្រមព្រៀងសន្តិភាពទីក្រុងប៉ារីសស្តីពី “គោលការណ៍នៃរដ្ឋធម្មនុញ្ញថ្មីរបស់កម្ពុជា”។ ឯកឧត្តម អ៉ឹម ឈុនលឹម មានប្រសាសន៍ទៀតថា ក្នុងដំណើរការអនុវត្តនៃគុណតម្លៃខាងលើបានបង្កនូវកម្លាំងសម្របសម្រួល និងជំរុញរួមគ្នាក្នុងការដោះស្រាយបញ្ហានយោបាយ និងបញ្ហាច្បាប់ដែលបានកើតមានឡើង ជាបន្តបន្ទាប់ ដោយរក្សាបាននូវភាពសុខដុមរមនាក្នុងសង្គមញុំាងឱ្យរដ្ឋធម្មនុញ្ញនេះ និងរបបនយោបាយមានស្ថិរភាពរយៈពេលវែងរហូត៣០ឆ្នាំ (ពីឆ្នាំ១៩៩៣ ដល់ឆ្នាំ២០២៣)។ឯកឧត្តម អ៉ឹម ឈុនលឹម បញ្ជាក់ថា រដ្ឋធម្មនុញ្ញនៃព្រះរាជាណាចក្រកម្ពុជា គឺសមិទ្ធផលប្រវត្តិសាស្ត្រ ដោយក្នុងដំណើរការអនុវត្តរដ្ឋធម្មនុញ្ញនេះ ពិសេសក្រោយប្រទេសជាតិសម្រេចបានសុខសន្តិភាព ឯកភាពជាតិពេញលេញ ក្រោមនយោបាយឈ្នះ-ឈ្នះ ដែលត្រូវបានដាក់ចេញ និងដឹកនាំអនុវត្តផ្ទាល់ដោយ សម្តេចអគ្គមហាសេនាបតី ហ៊ុន សែន អតីតនាយករដ្ឋមន្ត្រី នៅចុងឆ្នាំ១៩៩៨ ធ្វើឱ្យប្រទេសកម្ពុជាមានលក្ខខណ្ឌអំណោយផលគ្រប់គ្រាន់ ដើម្បីបន្តប្រតិបត្តិរដ្ឋធម្មនុញ្ញនេះ ជាអាទិ៍ការអនុវត្តលទ្ធិប្រជាធិបតេយ្យ សេរីពហុបក្ស, សិទ្ធិមនុស្ស, នីតិរដ្ឋ, និងសេដ្ឋកិច្ចទីផ្សារ។ លើសពីនេះ ឯកឧត្តម បញ្ជាក់ទៀតថា ចំពោះការអនុវត្តរដ្ឋធម្មនុញ្ញរយៈពេល៣០ឆ្នាំ សម្រេចបាននូវសមិទ្ធផលធម្មនុញ្ញដ៏ថ្លៃថ្លា ដែលរួមមាន៖ កម្ពុជារក្សាការពារ និងគោរពលើកតម្កើងរបបរាជានិយមអាស្រ័យរដ្ឋធម្មនុញ្ញ, ការបង្កើតឡើងវិញនូវរបបរាជានិយមអាស្រ័យរដ្ឋធម្មនុញ្ញក្នុងទម្រង់ជារាជានិយមជឿនលឿនស្របនឹងបរិបទនៃសង្គមខ្មែរ ដែលមានអង្គព្រះមហាក្សត្រ គង់ប្រថាប់ជាម្លប់ដ៏ត្រជាក់របស់ជាតិ និង ជានិមិត្តរូបនៃឯកភាពជាតិ និងនិរន្តរភាពជាតិ។ក្រៅពីនោះ លទ្ធិប្រជាធិបតេយ្យសេរីពហុបក្ស ជាមូលដ្ឋានគ្រឹះនៃសណ្តាប់ធ្នាប់នយោបាយទំនើបនៃកម្ពុជា ដោយរបបប្រជាធិបតេយ្យ សេរីពហុបក្សកម្ពុជាសម្រេចបានជំហានវឌ្ឍនភាពថ្មីៗ តាមរយៈការអនុវត្តនិយាមគោលការណ៍ធម្មនុញ្ញសំខាន់ៗ។ ឯកឧត្តម បន្ថែមថា កម្ពុជាឈានឡើងជាសង្គមនីតិរដ្ឋ ជារដ្ឋប្រតិបត្តិ តាមរដ្ឋធម្មនុញ្ញ និងច្បាប់ ពោលគឺកម្ពុជាតម្កល់រដ្ឋធម្មនុញ្ញជាច្បាប់កំពូលរបស់ប្រប្រទេស ហើយច្បាប់ និងសេចក្តីសម្រេចទាំងឡាយនៃស្ថាប័ននានារបស់រដ្ឋត្រូវស្របនឹងរដ្ឋធម្មនុញ្ញជាដាច់ខាត។អត្ថបទ សេក ឧត្តម

ក្រសួងវប្បធម៌បើកសន្និសីទបង្ហាញលទ្ធផលគណៈកម្មាធិការបេតិកភណ្ឌពិភពលោកនៅប្រទេសឥណ្ឌា

ភ្នំពេញ ៖ ក្រសួងវប្បធម៍ និងវិចិត្រសិល្បៈ នាព្រឹកថ្ងៃទី១ ខែសីហា ឆ្នាំ២០២៤នេះ បានរៀបចំសន្និសីទសារព័ត៌មានស្តីពី «លទ្ធផលកិច្ចប្រជុំលើកទី៤៦ របស់គណៈកម្មាធិការបេតិកភណ្ឌពិភពលោកនៅទីក្រុងញូវដេលី សាធារណរដ្ឋឥណ្ឌា» ខណៈគណៈកម្មាធិការបេតិកភណ្ឌពិភពលោកកាន់តែមានភាពមមាញឹកនៅក្នុងកាលៈទេសៈ នៃការសម្រេចបញ្ចូលសម្បត្តិបេតិកភណ្ឌរបស់បណ្តាប្រទេសផ្សេងៗទៅក្នុងបញ្ជីបេតិកភណ្ឌពិភពលោក។នៅក្នុងសន្និសីទនេះ ឯកឧត្តម ហង់ ពៅ អគ្គនាយកអាជ្ញាធរជាតិអប្សរា បានមានប្រសាសន៍បញ្ជាក់ថា កិច្ចប្រជុំនេះធ្វើឡើងជារៀងរាល់ឆ្នាំ ក្នុងគោលបំណងដើម្បីផ្តោតទៅលើការតាមដាន និងវាយតម្លៃទៅលើបេតិកភណ្ឌពិភពលោកទាំងអស់ដែលបានចុះបញ្ជីនៅក្នុងពិភពលោក ខណៈគិតមកដល់បច្ចុប្បន្ននេះ សម្បត្តិបេតិកភណ្ឌដែលបានចុះបញ្ជីមានចំនួន ១,២៣៧បេតិកភណ្ឌនៅលើពិភពលោក។ កិច្ចប្រជុំនេះ គឺដើម្បីតាមដានពីស្ថានភាពការអភិរក្សរបស់បេតិកភណ្ឌពិភពលោកនីមួយៗ ក៏ដូចជាការចុះបញ្ជីបេតិកភណ្ឌថ្មីៗរបស់ប្រទេសនីមួយៗផងដែរ។ ឯកឧត្តមអគ្គនាយក បានបញ្ជាក់បន្ថែមថា សម្រាប់កិច្ចប្រជុំប្រចាំឆ្នាំនេះដែរ ជាទូទៅត្រូវបានប្តូរវេនគ្នា ដែលមានរដ្ឋចំនួន២១ជាសមាជិកអចិន្ត្រៃយ៍នៅក្នុងគណៈកម្មាធិការ ដែលតម្រូវឲ្យបោះឆ្នោតត្រូវប្តូរវេនគ្នា ដូចជាប្រទេសកម្ពុជានៅក្នុងឆ្នាំ២០១៣ ក៏ជាប្រទេសមួយទទួលការប្រជុំរបស់បេតិកភណ្ឌពិភពលោកនេះដែរ ដែលប្រព្រឹត្តទៅនៅទីស្តីការគណៈរដ្ឋមន្រ្តី ហើយឆ្នាំ២០៤នេះជាវេនរបស់ប្រទេសឥណ្ឌា និងនៅឆ្នាំក្រោយគឺប្រទេសប៊ុលហ្គារី ទទួលវិញម្តង ក្នុងការប្រជុំដូចគ្នាខាងលើនេះ ដែលបានរៀបចំទៅក្នុងប្រព័ន្ធការងាររបស់គណៈកម្មាធិការបេតិកភណ្ឌពិភពលោក។ឯកឧត្តម ហង់ ពៅ បានលើកឡើងបន្តថា យោងតាមសេចក្តីសម្រេចនៃកិច្ចប្រជុំនៅទីក្រុងញូដេលី ប្រទេសកម្ពុជា បានគោរពអនុវត្តត្រឹមត្រូវតាមបទដ្ឋានគតិយុត្តនានាជាអន្តរជាតិ និងអនុវត្តតាមលក្ខខណ្ឌតម្រូវនានារបស់គណៈកម្មាធិការបេតិកភណ្ឌពិភពលោកផងដែរ។ នៅក្នុងកិច្ចប្រជុំនោះ លោកជំទាវ Audrey Azoulay អគ្គនាយិកាអង្គការយូណេស្កូ បានលើកឡើងថា យន្តការអនុវត្តរបស់គណៈកម្មាធិការអន្តរជាតិសម្របសម្រួលកិច្ចគាំពារ និងអភិរក្សតំបន់អង្គរ គឺជាយន្តការគំរូមួយសម្រាប់កិច្ចអភិរក្ស និងអភិវឌ្ឍន៍រមណីយដ្ឋានបេតិកភណ្ឌពិភពលោក ដែលមកដល់ពេលនេះ យន្តការ ICC Angkor មានអាយុកាល ៣០ឆ្នាំ និងបានបន្តរយៈពេល ១០ឆ្នាំទៅមុខទៀត។ សូមបញ្ជាក់ជូនថា តំបន់រមណីយដ្ឋានអង្គរ គឺជាបេតិកភណ្ឌពិភពលោកដែលផ្ទៃក្រឡាធំជាងគេ និងមានប្រជាជនរស់នៅច្រើនជាងគេ និងបានប្រសិទ្ធនាមថា ជាតំបន់បេតិកភណ្ឌមានជីវិត ព្រោះមានការរស់នៅប្រជាពលរដ្ឋ និងបានថែរក្សាជំនឿ ប្រពៃណី ទំនៀមទំលាប់របស់ពួកគេជាមួយនឹងប្រាសាទ៕អត្ថបទ ឈិត បូរ៉ាវី

រដ្ឋមន្ត្រីក្រសួងការងារ ចុះពិនិត្យមើលទីតាំងសាងសង់ទារកដ្ឋាន និងពិនិត្យសង្វាក់ផលិតកម្មដ៏ទំនើបរបស់រោងចក្រម៉ាវ៉ល

ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ នៅថ្ងៃទី០១ ខែសីហា ឆ្នាំ២០២៤ បានចុះពិនិត្យមើលទីតាំងសម្រាប់សាងសង់ទារកដ្ឋាន និងពិនិត្យសង្វាក់ផលិតកម្មដ៏ទំនើបក្នុងតំបន់រោងចក្រម៉ាវ៉ល ហ្កាមិន ដែលស្ថិតក្នុងតំបន់សេដ្ឋកិច្ចពិសេសភ្នំពេញ ខណ្ឌកំបូល រាជធានីភ្នំពេញ។ក្នុងឱកាសនោះ ឯកឧត្តមរដ្ឋមន្ត្រីបានត្រួតពិនិត្យដោយផ្ទាល់នៅទីតាំងសាងសង់ជាទារកដ្ឋាននៅក្នុងតំបន់រោងចក្រនេះ សម្រាប់ការមើលថែទាំកូនៗរបស់កម្មករនិយោជិត ដែលមានអាយុចាប់ពីទារកក្រោយពេលកើតរហូតដល់អាយុ ៣ឆ្នាំ។ ឯកឧត្តមរដ្ឋមន្ត្រី បានណែនាំឱ្យមន្រ្តីជំនាញរបស់ក្រសួងបន្តធ្វើការសហការជាមួយភាគីរោងចក្រដើម្បីឈានដល់ការសាងសង់ក្នុងពេលឆាប់ៗខាងមុខ រហូតដល់បញ្ចប់ដំណើរការសាងសង់ឲ្យបានរលូន ដើម្បីជួយសម្រួលដល់បងប្អូនកម្មករនិយោជិតក្នុងរោងចក្រអាចយកកូនៗមកផ្ញើក្នុងទារកដ្ឋាន ដើម្បីទទួលបានការមើលថែទាំសុខភាព និងទទួលបានអាហារូបត្ថម្ភគ្រប់គ្រាន់សម្រាប់ទារក ដែលជាមូលធនមនុស្សកម្ពុជាចាប់ពីតូចទៅតែម្តង។ឯកឧត្តមរដ្ឋមន្ត្រី បានគូសបញ្ជាក់ថា នេះជាការយកចិត្តទុកដាក់ពីសំណាក់រាជរដ្ឋាភិបាលកម្ពុជាក្នុងអាណត្តិទី៧នេះ ដឹកនាំដោយសម្តេចមហាបវរធិបតី ហ៊ុន ម៉ាណែត ដោយមានក្រសួងការងារ និងបណ្ដុះបណ្ដាលវិជ្ជាជីវៈជាសេនាធិការក្នុងការអនុវត្តកិច្ចការងារដ៏សំខាន់នេះចាប់ពីឆ្នាំ២០២៤នេះតទៅ ដើម្បីបម្រើជាប្រយោជន៍ដល់កម្មករនិយោជិត ក៏ដូចជាធនធានមនុស្សជំនាន់ក្រោយ។ នៅក្នុងឱកាសនោះដែរ ឯកឧត្តមរដ្ឋមន្ត្រី ក៏បានពិនិត្យមើលសង្វាក់ផលិតកម្មក្នុងរោងចក្រកាត់ដេរ ម៉ាវ៉ល ដែលបំពាក់ដោយគ្រឿងបរិក្ខារទំនើបពាក់កណ្តាលស្វ័យប្រវត្តិ និងមានកន្លែងធ្វើការប្រកបដោយផាសុកភាព និងមានលក្ខណៈស្តង់ដាខ្ពស់ និងស្របតាមបទដ្ឋានបច្ចេកទេសស្តង់ដាការងារថែមទៀតផង៕

ឧបនាយករដ្ឋមន្រ្ដី ស៊ុន ចាន់ថុល៖ បរិយាកាសសេដ្ឋកិច្ច និងកាលានុវត្តភាពធុរកិច្ចនៅកម្ពុជា ត្រូវបានធានាតាមរយៈ សុខសន្តិភាព ស្ថិរភាពនយោបាយ និងលំនឹងម៉ាក្រូសេដ្ឋកិច្ច

ភ្នំពេញ៖ នាព្រឹកថ្ងៃទី១ ខែសីហា ឆ្នាំ២០២៤ ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានអញ្ជើញជាវាគ្មិនកិត្តិយសក្នុងកិច្ចពិភាក្សាក្រោមប្រធានបទ៖ “បរិយាកាសសេដ្ឋកិច្ច និងកាលានុវត្តភាពធុរកិច្ច នៅកម្ពុជា” (Cambodia Economic Environment and Business Opportunities) ត្រូវបានរៀបចំឡើងក្នុងវេទិកាសហគ្រិនឆ្នើម (Pinnacle Entrepreneur Forum) នៃបណ្តាញសហគ្រិនស្ត្រីអាស៊ាន (ASEAN Women Entrepreneur Network – AWEN) ដែលកម្ពុជាគឺជាម្ចាស់ផ្ទះ សម្រាប់ឆ្នាំ២០២៤នេះ។ នៅក្នុងវេទិកានៃកិច្ចពិភាក្សានេះដែរ ក៏មានការអញ្ជើញចូលរួមពី ឯកឧត្តមរដ្ឋមន្ត្រី ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ លោកជំទាវរដ្ឋលេខាធិការតំណាង ក្រសួងពាណិជ្ជកម្ម និងក្រសួងកិច្ចការនារី។ថ្លែងក្នុងកិច្ចពិភាក្សានាឱកាសនេះ ឯកឧត្តមឧបនាយករដ្ឋមន្ត្រី បានរំលេចអំពីសក្តានុពលវិជ្ជមាននានា របស់ព្រះរាជាណាចក្រកម្ពុជា មានជាអាទិ៍ សុខសន្តិភាព និងស្ថិរភាពនយោបាយ លំនឹងម៉ាក្រូសេដ្ឋកិច្ច កម្លាំងពលកម្មវ័យក្មេងដែលមានលក្ខណៈរួចរាល់សម្រាប់បរិវត្តកម្មឌីជីថល ការគាំទ្រពីសំណាក់រាជរដ្ឋាភិបាលដល់ការរីកលូតលាស់នៃវិស័យធុរកិច្ចឯកជន បែបបទនៃការវិនិយោគដែលមានភាពបត់បែន និងអនុគ្រោះ ព្រមទាំងហេដ្ឋារចនាសម្ព័ន្ធអន្តរមធ្យោបាយដែលបាន និងកំពុងអភិវឌ្ឍឱ្យកាន់តែមានភាពសម្បូរបែប ប្រទាក់ក្រឡាផងដែរ។ឯកឧត្តមឧបនាយករដ្ឋមន្ត្រី បានបន្ថែមថា ដើម្បីភាពរីកចម្រើនលូតលាស់ទៅមុខទាំងអស់គ្នា សហគ្រិនគ្រប់រូប គួរតែត្រៀមលក្ខណៈឱ្យបានរួចរាល់ក្នុងការបន្ស៊ីខ្លួនចូលក្នុងរបត់ថ្មីនៃសង្គម តាមរយៈនវានុវត្តន៍ថ្មីៗ និងបរិវត្តកម្មឌីជីថល។ ការទទួលយកនូវបម្លាស់ផ្តូរ និងរៀនសូត្រនូវអ្វីថ្មីៗ នឹងធ្វើឱ្យយើងដើរទាន់ស្ថានការណ៍ ទាំងក្នុងតំបន់ និងជុំវិញពិភពលោក។ជម្រាបទៅកាន់សហគ្រិនស្ត្រីដែលអញ្ជើញចូលរួម ពីបណ្តាប្រទេសទាំង១០ នៃសមាគមអាស៊ាន ឯកឧត្តមឧបនាយករដ្ឋមន្ត្រី ក្នុងនាមអនុប្រធានទី១ ក្រុមប្រឹក្សាអភិវឌ្ឍន៍កម្ពុជា បានបញ្ជាក់អំពីចក្ខុវិស័យ និងបេសកកម្មយ៉ាងច្បាស់លាស់ របស់ក្រុមប្រឹក្សាអភិវឌ្ឍន៍កម្ពុជា ដែលជាសេនាធិការរបស់រាជរដ្ឋាភិបាល ក្នុងការផ្សព្វផ្សាយអំពីបច្ចុប្បន្នភាពបរិយាកាសវិនិយោគ និងកាលានុវត្តភាពនៃការធ្វើធុរកិច្ចនៅកម្ពុជា ទៅកាន់ពិភពលោក សំដៅគោះទ្វារទាក់ទាញវិនិយោគិនឱ្យងាកមកពិចារណា និងសិក្សាស្វែងយល់បន្ថែមពីឱកាសក្នុងការមកបណ្តាក់ទុនវិនិយោគផងដែរ៕

ស្ថានីយសំខាន់ៗចំនួន៧ គ្រោងដាក់បញ្ចូលក្នុងបេតិកភណ្ឌពិភពលោកនាពេលខាងមុខ

ភ្នំពេញ ៖ មន្រ្តីជាន់ខ្ពស់នៃក្រសួងវប្បធម៍ និងវិចិត្រសិល្បៈ បានឲ្យដឹងថា នៅពេលអនាគតខាងមុខ កម្ពុជាគ្រោងនឹងដាក់បញ្ចូលស្ថានីយសំខាន់ៗចំនួន៧ ទៅក្នុងបេតិកភណ្ឌពិភពលោក មានដូចជា សារមន្ទីរទួលស្លែង អង្គបុរី បន្ទាយឆ្មារ ឧត្តុង្គ ភ្នំគូលែន ប្រាសាទព្រះខ័ន កំពង់ស្វាយ និងប្រាសាទបេងមាលា។នៅក្នុងសន្និសីទសារព័ត៌មានស្តីពី «លទ្ធផលកិច្ចប្រជុំលើកទី៤៦ របស់គណៈកម្មាធិការបេតិកភណ្ឌពិភពលោក នៅទីក្រុងញូវដេលី សាធារណរដ្ឋឥណ្ឌា» កាលពីព្រឹកថ្ងៃទី១ ខែសីហានេះ ឯកឧត្តម ឈុំ ម៉េងហុង អគ្គនាយកគណៈកម្មការជាតិយូណេស្កូកម្ពុជា បានមានប្រសាសន៍ឲ្យដឹងថា មុននឹងបញ្ចូលស្ថានីយណាមួយចូលសម្បត្តិបេតិកភណ្ឌពិភពលោក គឺត្រូវបញ្ចូលស្ថានីយនោះ ទៅក្នុងបញ្ជីត្រៀមសិន យ៉ាងហោចណាស់ឱ្យបានមួយឆ្នាំមុនពេលដាក់ឯកសារ។ ឯកឧត្តម បន្ថែមទៀតថា នាឆ្នាំ២០២៣កន្លងទៅ កម្ពុជាបានដាក់បញ្ចូលប្រាសាទកោះកេរក្នុងបញ្ជីបេតិកភណ្ឌពិភពលោក ដោយឡែកឆ្នាំ២០២៤នេះ មិនមានបញ្ចូលអ្វីទេ ប៉ុន្តែនៅឆ្នាំ២០២៥ខាងមុខ កម្ពុជានឹងដាក់សារមន្ទីរទួលស្លែង និងស្ថានីយជើងឯកជាមួយគ្នា ដែលដាក់ជាស្ថានីយថ្មី ទាក់ទងជាមួយនឹងការចងចាំ។ ឯកឧត្តម ឈុំ ម៉េងហុង បានគូសបញ្ជាក់ថា ក្រៅពីស្ថានីយសំខាន់ៗទាំង៧ខាងលើ ក៏មានសម្បត្តិវប្បធម៌អរូបី ដែលជាមរតកបង្កើតដោយមនុស្សបានផ្ទេរបន្តពីជំនាន់មួយ ទៅជំនាន់មួយ ដូចជាក្រមាជាដើម បានបញ្ជូនឯកសារទៅអង្គការយូណេស្កូសព្វគ្រប់អស់ហើយ ដោយកំពុងរង់ចាំចម្លើយមកវិញ ថាអាចបញ្ចូលក្រមាជាសម្បត្តិវប្បធម៌អរូបីក្នុងបេតិកភណ្ឌពិភពលោកបានទេ។ ដោយឡែក សម្រាប់សម្លៀកបំពាក់ប្រពៃណីខ្មែរវិញ កម្ពុជាក៏បានត្រៀមជូនដំណឹង និងកំពុងរៀបចំឯកសារនានា ក្នុងការស្នើដាក់ចូលជាសម្បត្តិបេតិកភណ្ឌទៅអង្គការយូណេស្កូផងដែរនាពេលខាងមុខ៕ អត្ថបទ ឈិត បូរ៉ាវី

រដ្ឋមន្ត្រីក្រសួងសុខាភិបាល ជួបសំណេះសំណាលថ្នាក់ដឹកនាំ មន្រ្តីរាជការបុគ្គលិកសុខាភិបាល ខេត្តកែប

កែប ៖ ឯកឧត្តមសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងប្រតិភូសុខាភិបាល បានជួបសំណេះសំណាល សួរសុខទុក្ខ ព្រមទាំងផ្តល់អនុសាសន៍ ដល់ថ្នាក់ដឹកនាំ មន្រ្តីរាជការបុគ្គលិកសុខាភិបាល នៃមន្ទីរសុខាភិបាលនៃរដ្ឋបាលខេត្តកែប, នារសៀលថ្ងៃទី១ ខែសីហា ឆ្នាំ២០២៤នេះ។ក្នុងពិធីនេះដែរ មានការអញ្ជើញចូលរួម ពីប្រតិភូអមដំណើរ ជាឯកឧត្តម លោកជំទាវ ជារដ្ឋលេខាធិការ អគ្គនាយក អគ្គនាយករងបច្ចេកទេស អគ្គនាយក អគ្គនាយករងរដ្ឋបាល-ហិរញ្ញវត្ថុ និងសមាសភាពចូលរួមពីអាជ្ញាធរមូលដ្ឋាន ឯកឧត្តម ប៊ុន យោង អភិបាលរងខេត្តកែប និងប្រធានមន្ទីរសុខាភិបាលនៃរដ្ឋបាលខេត្តកែប អនុប្រធានមន្ទីរសុខាភិបាល ប្រធានការិយាល័យមន្ទីរសុខាភិបាល ប្រធានការិយាល័យសុខាភិបាលស្រុកប្រតិបត្តិ ប្រធាន អនុប្រធានមន្ទីរពេទ្យ និងប្រធានមណ្ឌលសុខភាព កងកម្លាំងប្រដាប់អាវុធ និងមន្ទីរជុំវិញខេត្ត។ឯកឧត្តមសាស្រ្តាចារ្យរដ្ឋមន្រ្តី បានជូនជ្រាបដល់មន្ត្រីជាថ្នាក់ដឹកនាំសុខាភិបាលនៃរដ្ឋបាលខេត្តពីលទ្ធផលនៃការចុះពិនិត្យ អំពីតម្រូវការបង្កើនសមត្ថភាពជំនាញ តម្រូវការបណ្តុះបណ្តាលបន្ត ការពិនិត្យអាទិភាពលើសេវាសង្គ្រោះបន្ទាន់ សេវាវះកាត់ និងបន្ថែមលើសពីនេះការខិតខំថែរក្សាធនធានមនុស្ស។ឯកឧត្តមសាស្រ្តាចារ្យ ក៏បានជូនអនុសាសន៍គន្លឹះបន្ថែម សម្រាប់មន្ត្រីជាថ្នាក់ដឹកនាំ ដើម្បីបង្កើនប្រសិទ្ធភាពក្នុងការផ្តល់សេវាសុខាភិបាលជូនប្រជាពលរដ្ឋ ដូចជា៖ យកចិត្តទុកដាក់លើការបំរើផ្តល់ជូនសេវាថែទាំព្យាបាល និងខិតខំពន្យល់ជូនប្រជាពលរដ្ឋអោយបានទូលំទូលាយ អំពីការប្រើប្រាស់អត្ថប្រយោជន៍សុខភាពតាមរយៈបណ្ណ័សមធម៌ និងប.ស.ស។ សម្ភារៈបរិក្ខារពេទ្យ ឱសថ រួមទាំងការទុកដាក់ និងថែទាំឱ្យបានត្រឹមត្រូវ និងខិតខំកត់ត្រាព័ត៌មានអ្នកជំងឺអោយបានគ្រប់ជ្រុងជ្រោយ និងថែរក្សាឯកសារឱ្យបានត្រឹមត្រូវ និងទទួលយកនូវព័ត៌មានត្រលប់ពីប្រជាពលរដ្ឋ ពីការពេញចិត្ត និងការផ្តល់ជាគំនិតស្ថាបនា និងបង្កើនសកម្មភាពអប់រំសុខភាព លើកកំពស់សុខភាព ពីវិធីបង្ការ និងថែទាំសុខភាពទាំងក្នុងមូលដ្ឋានសុខាភិបាល និងទាំងក្នុងសហគមន៍។ឯកឧត្តមសាស្រ្តាចារ្យ សូមអំពាវនាវដល់អាជ្ញាធរមូលដ្ឋាន កងកម្លាំងប្រដាប់អាវុធ សូមជួយថែរក្សាការពារសន្តិសុខប្រជាពលរដ្ឋ ជាពិសេសមន្រ្តីសុខាភិបាលនៅតាមមូលដ្ឋានសុខាភិបាល ដែលបម្រើការងារនៅពេល២៤ម៉ោង លើ២៤ម៉ោង ទាំងនៅតំបន់ឆ្ងាយពីទីប្រជុំជន ដើម្បីជាការពារ និងលើកទឹកចិត្តដល់មន្រ្តីសុខាភិបាលបានផ្តល់សេវាជូនប្រជាពលរដ្ឋប្រកបដោយប្រសិទ្ធភាព គុណភាព ស័ក្តិសិទ្ធភាព និងសមធម៌។ជាចុងបញ្ចប់ ឯកឧត្តមសាស្រ្តាចារ្យរដ្ឋមន្រ្តី ផ្តាំផ្ញើដល់មន្រ្តីសុខាភិបាលគ្រប់លំដាប់ថ្នាក់ បន្តស្មារតីចេះជួយគ្នា ស្មោះត្រង់គ្នា សាមគ្គីភាពរឹងមាំទូលំទូលាយ បន្តតម្កល់ខ្ពស់វិន័យការងារ និងក្រមសីលធម៌វិជ្ជាជីវៈ ដែលត្រូវឆ្លុះបញ្ចាំងមកវិញតាមរយៈការបម្រើសេវាប្រកបដោយគុណភាព សុវត្ថិភាព ប្រសិទ្ធភាព និងសមធម៌ ជូនបងប្អូនអ្នកជំងឺ និងក្រុមគ្រួសារ៕ អត្ថបទ រដ្ឋា

រដ្ឋបាលក្រុងបានចុះរុះរើស្លាកសញ្ញាស្រាបៀរបាន៧៥ផ្លាក

កំពង់ឆ្នាំង : តាមការបញ្ជាក់របស់លោក ហ៊ីង ភ័ព្វមីនា អភិបាលក្រុងកំពង់ឆ្នាំងនៅរសៀលថ្ងៃទី០១ ខែសីហា ឆ្នាំ២០២៤នេះថា ផ្លាកស្រាបៀរតាំងផ្សាយក្នុងក្រុងកំពង់ឆ្នាំងប្រមាណ៧៥ផ្លាក ត្រូវបានរុះរើចេញអស់ ហើយផ្លាកស្រាបៀរធំៗកាត់ទទឹងផ្លូវជាតិលេខ៥ រដ្ឋបាលក្រុងកំពង់ឆ្នាំងនឹងត្រូវរុះរើបន្ត។

រដ្ឋមន្ត្រីក្រសួងសុខាភិបាល ចុះពិនិត្យការផ្តល់សេវាសុខាភិបាល ជូនពលរដ្ឋនៅមណ្ឌលសុខភាពចំនួន២ និងមន្ទីរពេទ្យខេត្តកែប

ឯកឧត្តមសាស្ត្រាចារ្យ ឈាង រ៉ា រដ្ឋមន្រី្តក្រសួងសុខាភិបាល បានធ្វើដំណើរចុះពិនិត្យការផ្តល់សេវា សុខាភិបាលសាធារណៈ និងសួរសុខទុក្ខបុគ្គលិកសុខាភិបាល រួមទាំងអ្នកជំងឺ និងក្រុមគ្រួសារ នៅមណ្ឌលសុខភាពអង្កោល មណ្ឌលសុខភាពពងទឹក និងមន្ទីរពេទ្យខេត្តកែប ក្នុងខេត្តកែប, នាព្រឹកថ្ងៃទី១ ខែសីហា ឆ្នាំ២០២៤នេះ។ឯកឧត្តមសាស្រ្តាចារ្យរដ្ឋមន្រ្តី និងក្រុមការងារជំនាញនៃក្រសួងសុខាភិបាល បានជួបបងប្អូនប្រជាពលរដ្ឋ ដែលលោកមកទទួលសេវាសុខភាពនៅមណ្ឌលភាព និងមនី្ទរពេទ្យខេត្ត ដោយបានសំណេះសំណាលសួរនាំអំពីការទទួល ការពន្យល់ ការផ្តល់ការថែទាំសុខភាពពីបុគ្គលិកសុខាភិបាលមណ្ឌលសុខភាព។ក្រុមការងាជំនាញនៃប្រតិភូ បានត្រួតពិនិត្យតាមទីតាំងថែទាំ ទាំងពិគ្រោះក្រៅ ទាំងពិនិត្យផ្ទៃពោះ ទាំងការទុកដាក់ថ្នាំសង្កូវ សម្ភារៈបរិក្ខា និងអនាម័យតាមគ្រប់ទីតាំង រួមទាំងបង្គន់អនាម័យសំរាប់ទាំងបុគ្គលិក និងបងប្អូនសាធារណៈជន។ចំណែកបងប្អូនប្រជាពលរដ្ឋ ដែលមកទទួលសេវានៅមណ្ឌលសុខភាព និងមនី្ទរពេទ្យខេត្តកែប បានលើកឡើងស្រៀងគ្នាថា ពួកគាត់ពិតជាមានភាពរីករាយជាខ្លាំង ក្នុងពេលមានជំងឺឈឺស្កាត់ មកទទួលសេវាពិនិត្យ សម្រាកព្យាបាល គឺលោកគ្រូពេទ្យ អ្នកគ្រូពេទ្យ បានទទួលស្វាគមន៍ និងផ្តល់សេវាបានទាន់ពេលវេលា។អ្នកគ្រូ ឈឿង សី្រម៉ៅ ប្រធានផ្នែកមនី្ទរពិសោធន៍ នៃមនី្ទរពេទ្យខេត្តកែប ពិតជាមានអារម្មណ៍សប្បាយរីករាយជាខ្លាំង ដែលឯកឧត្តមសាស្រ្តាចារ្យ ឈាង រ៉ា រដ្ឋមន្ត្រី បានអញ្ជើញចុះមកពិនិត្យផ្នែកមនី្ទរពិសោធន៍ និងទទួលបានអនុសាសន៍ល្អៗ ដើម្បីមកធ្វើការកែលម្អ និងអភិវឌ្ឍផ្នែកមួយនេះឲ្យកាន់តែរីកចម្រើន។ឯកឧត្តមសាស្រ្តាចារ្យរដ្ឋមន្ត្រី ឆ្លៀតផ្តល់ជូនអនុសាសន៍ណែនាំ និងជំរុញដល់មន្រ្តីមណ្ឌលសុខភាព ត្រូវបន្តយកចិត្តទុកដាក់បន្ថែមទៀតដូចជា ការថែរក្សាទុកដាក់ឱសថ កត់ត្រារក្សាទុកឯកសារអ្នកជំងឺឱ្យបានគត់មុតល្អ ថែរក្សាវ៉ាក់សាំង រក្សាអនាម័យបរិស្ថាន និងបន្ទប់ថែទាំឱ្យបានស្អាត ការថែរក្សានិ ងប្រើប្រាស់រថយន្តគិលានុសង្រ្គោះឱ្យបានត្រឹមត្រូវល្អ និងឆ្លើយតបបានបន្ទាន់ ពេលតម្រូវការ។ ពិសេសធានាឱ្យបានការបម្រើ និងផ្តល់ជូនសេវាពិនិត្យថែទាំសុខភាពជូនប្រជាពលរដ្ឋ ២៤ម៉ោង លើ២៤ម៉ោង និង៧ថ្ងៃក្នុងមួយសប្តាហ៍៕ អត្ថបទ រដ្ឋា

គណៈកម្មការទី៣ នៃរដ្ឋសភា អញ្ជើញជួបពិភាក្សាការងារជាមួយថ្នាក់ដឹកនាំរដ្ឋបាលខេត្តត្បូងឃ្មុំ

ប្រធានគណៈកម្មការទី៣ គណៈកម្មការផែនការ វិនិយោគ កសិកម្ម រុក្ខាប្រមាញ់ នេសាទ អភិវឌ្ឍន៍ជនបទ បរិស្ថាន ធនធានទឹក និងឧតុនិយមនៃរដ្ឋសភាឯកឧត្តម សន្តិបណ្ឌិត ឡូយ សុផាត នាថ្ងៃទី៣១ ខែកក្កដា ឆ្នាំ២០២៤នេះបានចុះជួបពិភាក្សាការងារមួយចំនួនជាមួយថ្នាក់ដឹកនាំខេត្តត្បូងឃ្មុំដើម្បីពិនិត្យ និងចង់ដឹងអំស្ថានភាពរស់នៅទូទៅរបស់បងប្អូនប្រជាពលរដ្ឋនៃខេត្តត្បូងឃ្មុំ។ក្រោយស្តាប់នូវរបាយការណ៍របស់លោក ពាង ណារិទ្ធ អភិបាលខេត្តស្តីទី នៃគណៈអភិបាលខេត្តត្បូងឃ្មុំទាក់ទងនឹងការរស់នៅ និងការប្រកបអាជីវកម្មរបស់បងប្អូននៃខេត្តត្បូងឃ្មុំហើយនោះ ឯកឧត្តម ឡូយ សុផាត បានលើកឡើងថា ដំណើរការចុះជួបពិភាក្សារវាងគណៈកម្មការទី៣ នៃរដ្ឋសភានៅខេត្តត្បូងឃ្មុំនាពេលនេះគឺមិនមែនជាការចុះមកត្រួតពិនិត្យ អធិការកិច្ច ឬសួរដេញដោលថ្នាក់ដឹកនាំរដ្ឋបាលខេត្ត និងមន្ទីរអង្គភាពជំនាញនោះទេ គឺមានគោលបំណងដ៏សំខាន់នោះ គឺចង់ឈ្វេងយល់ ដើម្បីប្រមូលព័ត៌មាន និងបញ្ហាប្រឈមនានា ក្នុងការប្រតិបត្តិច្បាប់នៅមូលដ្ឋាន ដែលត្រូវរួមសហការគ្នារវាងស្ថាប័ននីតិប្បញ្ញត្តិ និងស្ថាប័ននីតិប្រតិបត្តិ ដើម្បីជំរុញការអនុវត្តន៍កម្មវិធីនយោបាយ និងយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភាតែប៉ុណ្ណោះ។ ជាមួយគ្នានោះដែរឯកឧត្តម ប្រធានគណៈកម្មការទី៣នៃរដ្ឋសភាក៏បាន កត់សម្គាល់នូវបញ្ហាប្រឈមមួយចំនួនដែលខេត្តបានជួបប្រទះ ហើយឯកឧត្តមបានលើកទឹកចិត្ត និងជំរុញដល់ថ្នាក់ដឹកនាំខេត្ត និងសហការីទាំងអស់ រួមគ្នាខិតខំបំពេញការងារបន្ថែមទៀត ក្នុងការដោះស្រាយរាល់បញ្ហាប្រឈមទាំងនោះ។ ចំណែកឯគណៈកម្មការ នឹងពាំនាំយកបញ្ហាប្រឈមទាំងនេះ ទៅជម្រាបជូនសម្តេចប្រធានរដ្ឋសភា ដើម្បីជួយធ្វើអន្តរាគមន៍ទៅរាជរដ្ឋាភិបាលជួយដោះស្រាយឲ្យបានទាន់ពេលវេលាដើម្បីឲ្យខេត្តមានលទ្ធភាពពេញលេញ ក្នុងការបំពេញភារកិច្ចបម្រើប្រជាពលរដ្ឋ និងផលប្រយោជន៍របស់ប្រទេសជាតិ ។ យ៉ាងណាក៏ដោយឯកឧត្តម ឡូយ សុផាត បានកោតសរសើរពីការខិតខំប្រឹងប្រែង របស់រដ្ឋបាលខេត្តត្បូងឃ្មុំ លើការងារអភិវឌ្ឍន៍ខេត្ត ឱ្យកាន់តែមានសោភណ្ឌភាព និងការរីកចម្រើនគួរឱ្យកត់សម្គាល់ ។ ជាការពិតខេត្តត្បូងឃ្មុំ ជាខេត្តមួយទើបតែបានបង្កើតថ្មី ហើយពីមួយថ្ងៃទៅមួយថ្ងៃ គឺមានការអភិវឌ្ឍន៍រីកចម្រើនជាលំដាប់ ពិសេស បានសម្តែងនូវការពេញចិត្តជាខ្លាំងនៅវិធានការណ៍ទាំង៤ចំណុចរបស់រដ្ឋបាលខេត្ត ក្នុងការបង្ក្រាបបទល្មើសគ្រឿងញៀន ល្បែងស៊ីសងគ្រប់ប្រភេទ ការត្រួតពិនិត្យការប្រើប្រាស់អាវុធខុសច្បាប់ និងក្មេងទំនើង ដែលស្របទៅតាមវិធានរបស់សម្តេចមហាបវធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា និងគោលនយោបាយរបស់រដ្ឋាភិបាលនីតិកាលទី៧នៃរដ្ឋសភា។ ឯកឧត្តមសន្តិបណ្ឌិត ក៏បានលើកឡើងនូវបទពិសោធន៍ និងអនុសាសន៍ល្អៗមួយចំនួន ដើមី្បជាមូលដ្ឋានគ្រឹះសម្រាប់ថ្នាក់ក្រោមជាតិ យកទៅអនុវត្តឱ្យកាន់តែមានប្រសិទ្ធភាពខ្ពស់ និងប្រកបដោយផ្លែផ្កា។ ឯកឧត្តម សន្តិបណ្ឌិត ក៏បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំខេត្តគ្រប់លំដាប់ថ្នាក់ ដោយរួមទាំងមន្ត្រីរាជការ និងកងកម្លាំងប្រដាប់អាវុធទាំងអស់ ដែលបានសហការសាមគ្គីរួមគ្នាជាធ្លុងមួយបានយ៉ាងល្អ ខិតខំយកអស់កម្លាំងកាយចិត្ត ប្រាជ្ញាស្មារតី និងធនធានយកចិត្តទុកដាក់បំពេញការងារ និងតួនាទីប្រកបដោយវិជ្ជាជីវៈ និងប្រកបដោយការទទួលខុសត្រូវខ្ពស់ រហូតឈានទៅសម្រេចបាននូវសមិទ្ធផលជាច្រើនជូនប្រជាពលរដ្ឋក្នុងទូទាំងខេត្តផងដែរ៕ អត្ថបទបាន ចក់

សភាពាណិជ្ជកម្មកម្ពុជានឹងដឹកនាំគណៈប្រតិភូ ចុះស្វែងយល់អំពីឱកាសអាជីវកម្ម និងវិនិយោគនៅខេត្ដកោះកុង

សភាពាណិជ្ជកម្មកម្ពុជានឹងដឹកនាំគណៈប្រតិភូ ចុះទស្សនកិច្ចនៅតំបន់ពាណិជ្ជកម្មមួយចំនួននៃខេត្ដកោះកុងនាថ្ងៃទី១៣ ដល់ថ្ងៃទី១៦ ខែសីហា ឆ្នាំ២០២៤ ខាងមុខនេះ ដើម្បីស្វែងយល់អំពីឱកាសអាជីវកម្ម និងវិនិយោគក្នុងវិស័យអាទិភាពនានា។ថ្លែងក្នុងសន្និសីទសារព័ត៌មាន ស្ដីពីទស្សនកិច្ចពាណិជ្ជកម្ម ខេត្ដកោះកុង នៅព្រឹកថ្ងៃទី១ ខែសីហា ឆ្នាំ២០២៤នេះ លោកឧកញ៉ា លឹម សុជាតិ អនុប្រធានសភាពាណិជ្ជកម្មកម្ពុជា បានបញ្ជាក់ថា កម្មវិធីទស្សនកិច្ចពាណិជ្ជកម្មនេះ មានគោលបំណងសំខាន់ ក្នុងការស្វែងយល់អំពីឱកាសអាជីវកម្ម និងវិនិយោគ ក្នុងវិស័យអាទិភាពនានា ក្នុងខេត្តកោះកុងផ្ទាល់ ដោយក្នុងនោះមានដូចជា នៅកំពង់ផែកោះកុង តំបន់សេដ្ឋកិច្ចពិសេស,អាកាសយានដ្ឋាន ខេត្តកោះកុង,ក្រុមហ៊ុន យូញៀន ឌីវីឡុបមិន គ្រុប (Union Development Group),ក្រុមហ៊ុន Diamond Bay Tianjin, ក្រុមហ៊ុនសហគ្រាសផលិតទឹកត្រីកោះកុង,សហគ្រាសផលិត-កែច្នៃ គ្រឿងសមុទ្រ,និងសហគ្រាស លក់រាយ និងបោះដុំ គ្រឿងសមុទ្រជាដើម។លោកឧកញ៉ា លឹម សុជាតិ បានបន្ថែមទៀតថា តាមរយៈទស្សនកិច្ចពាណិជ្ជកម្មនៅខេត្ដកោះកុងនេះ សភាពាណិជ្ជកម្មកម្ពុជាសង្ឃឹមថា ប្រតិភូដែលអញ្ជើញចូលរួម នឹងទទួលបានបទពិសោធន៍ថ្មីៗ ពីដំណើរការ នៃការគ្រប់គ្រងសង្វាក់ផលិតកម្ម និងការចាប់ដៃគូរពាណិជ្ជកម្ម នាពេលអនាគត តាមសក្ដានុពលខេត្តកោះកុង។ ថ្លែងប្រាប់អ្នកសារព័ត៌មាន ក្នុងឱកាសសន្និសីទកាសែតនោះដែរ លោកឧកញ៉ា ងួន ម៉េងតិច ក៏បានឲ្យដឹងផងដែរថា ទស្សនកិច្ចពាណិជ្ជកម្មនេះ សភាពាណិជ្ជកម្មកម្ពុជា និងគណៈប្រតិភូ ក៏មានជំនួបសម្តែងការគួសម និងពិភាក្សាការងារ ជាមួយរដ្ឋបាលខេត្តកោះកុង, ជំនួបពាណិជ្ជកម្ម (B2B) ជាមួយពាណិជ្ជករខេត្តកោះកុង ព្រមទាំងអាហារសាមគ្គី ជាមួយថ្នាក់ដឹកនាំខេត្ត និងសភាពាណិជ្ជកម្ម ខេត្តកោះកុង ផងដែរ។ លោកឧកញ៉ា លឹម សុជាតិ បានលើកឡើងផងដែរថាកម្មវិធីទស្សនកិច្ចពាណិជ្ជកម្ម ខេត្តកោះកុង ដែលនឹងប្រព្រឹត្តទៅនាពាក់កណ្ដាលខែសីហានេះ ជាផ្នែកមួយនៃកិច្ចខិតខំប្រឹងប្រែងជាបន្តបន្ទាប់ របស់អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា ដែលផ្តួចផ្តើមគំនិតដ៏មានសារៈសំខាន់ ខណៈកម្មវិធីទស្សនកិច្ចពាណិជ្ជកម្មនេះ បង្កើតឡើងក្នុងគោលបំណង ដើម្បីពង្រីកការទំនាក់ទំនង អាជីវកម្ម ដើម្បីជំរុញ សេដ្ឋកិច្ច-ពាណិជ្ជកម្ម នៅបណ្តាខេត្តនានា ក្នុងប្រទេសកម្ពុជា។សូមរំលឹកផងដែរថា សម្រាប់ឆ្នាំ២០២៤ កម្មវិធីទស្សនកិច្ចពាណិជ្ជកម្មនេះ បានរៀបចំម្តងរួចមកហើយ កាលពីខែកុម្ភៈដើមឆ្នាំកន្លងទៅថ្មីៗនេះ ដែលពេលនោះ មានប្រតិភូចូលរួមសរុបចំនួន២២រូប ដែលក្នុងនោះ មាន១០រូប ជាពាណិជ្ជករថៃ។ជាលទ្ធផល ក្រោយកម្មវិធីទស្សនកិច្ចពាណិជ្ជកម្ម បានបញ្ចប់ មានផលិតផលខ្មែរចំនួន៣សហគ្រាស បានដាក់ចូលក្នុងម៉ាត 7-Eleven និងមានការដោះដូរពាណិជ្ជកម្ម រវាងគណៈប្រតិភូ និងពាណិជ្ជករខេត្តបាត់ដំបង ជាបន្តបន្ទាប់៕ អត្ថបទ៖ បាន ចក់

បណ្ដាញសង្គម

ព័ត៌មានថ្មីៗ

ការិយាល័យឧតុនិយមអង់គ្លេស៖ អាកាសធាតុក្តៅជាប់កំណត់ត្រាខែឧសភា មិនទាន់អាចចាត់ថ្នាក់ថាជារដូវក្តៅខ្លាំងនោះទេ

ប្រមុខ WHO ព្រមានថា ជម្លោះជំរុញឲ្យវិបត្តិជំងឺ Ebola កាន់តែអាក្រក់ នៅភាគខាងកើតកុងហ្គោ

អ៊ីរ៉ង់៖ សេចក្តីព្រាងកិច្ចព្រមព្រៀងជាមួយអាមេរិក នឹងបើកច្រកសមុទ្រ Hormuz ឡើងវិញ និងបញ្ចប់បិទផ្លូវទឹក

នគរបាលអេស្ប៉ាញសម្រុកចូលទីស្នាក់ការកណ្តាលគណបក្សសង្គមនិយមរបស់លោក Sanchez

ហ្គាណាធ្វើមាតុភូមិនិវត្តន៍ពលរដ្ឋរបស់ខ្លួន ក្រោយការវាយប្រហារប្រឆាំងជនបរទេសនៅអាហ្វ្រិកខាងត្បូង

ជនមូស្លីមនៅទូទាំងតំបន់មជ្ឈិមបូព៌ា និងអាហ្វ្រិកខាងជើងប្រារព្ធថ្ងៃដំបូងនៃពិធីបុណ្យ Eid

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877