BTV NEWS

ឃាត់ខ្លួនជនជាតិចិន៤នាក់ ធ្វើសកម្មចូលបន្លំលួចលុយតាមទីតាំងដូរប្រាក់វីងជាច្រើនកន្លែង ក្នុងរាជធានីភ្នំពេញ

លោកជំទាវបណ្ឌិត ពេជ ចន្ទមុន្នី ហ៊ុនម៉ាណែត អញ្ជើញជាអធិបតីដ៏ខ្ពង់ខ្ពស់ចូលរួម «ពិធីបើកយុទ្ធនាការ ១ម៉ឺនរៀល ១ម៉ឺននាក់» ឆ្នាំ២០២៦ និង«ពិធីសំណេះសំណាល និងប្រគល់-ទទួលថវិកាបរិច្ចាគពីវិស័យឯកជន ជូនមូលនិធិគន្ធបុប្ផាកម្ពុជា»

លោកជំទាវបណ្ឌិត ពេជ ចន្ទមុន្នី៖ កម្លាំងសាមគ្គីជាតិផុលផុសបានជួយសង្គ្រោះកុមារកម្ពុជាដែលជាធនធានមនុស្សអនាគតរាប់ម៉ឺនាក់ក្នុងមួយឆ្នាំៗ

មួយឆ្នាំមកនេះ រាជរដ្ឋាភិបាលបានខិតខំគ្រប់បែបយ៉ាង ដើម្បីការពារបូរណភាពទឹកដី និងរក្សាការពារសន្តិភាព

ព័ត៌មានជាតិ

កម្ពុជា-ហ្វីលីពីនបន្តពង្រឹង និងពង្រីកកិច្ចសហប្រតិបត្តិការកងទ័ពជើងគោកឱ្យកាន់តែរឹងមាំ

សម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្ដីនៃកម្ពុជា នៅព្រឹកថ្ងៃទី២៩ ខែកក្កដា ឆ្នាំ២០២៤នេះ បានអនុញ្ញាតឱ្យ ឯកឧត្តម ឧត្តមសេនីយ៍ឯក Roy M. Galido មេបញ្ជាការកងទ័ពជើងគោកនៃសាធារណរដ្ឋហ្វីលីពីន ក្នុងជំនួបសម្ដែងការគួរសម និងពិភាក្សាការងារនៅវិមានសន្តិភាព។ ក្នុងឱកាសនៃជំនួប ឯកឧត្តមឧត្តមសេនីយ៍ឯក Roy M. Galido មេបញ្ជាការកងទ័ពជើងគោក នៃសាធារណរដ្ឋហ្វីលីពីន បានវាយតម្លៃខ្ពស់ចំពោះការរីកចម្រើនប្រកបដោយផ្លែផ្កានៃទំនាក់ទំនង និងកិច្ចសហប្រតិបត្តិការរវាងកងទ័ព និងកងទ័ពនៃប្រទេសហ្វីលីពីន និងកម្ពុជា។ឯកឧត្តមមេបញ្ជាការកងទ័ពជើងគោកបានបង្ហាញនូវសុទិដ្ឋិនិយម និងបន្តប្ដេជ្ញាបន្តពង្រឹង និងពង្រីកកិច្ចសហប្រតិបត្តិការនៃកងទ័ពជើងគោក ហ្វីលីពីន-កម្ពុជាឱ្យកាន់តែរឹងមាំថែមទៀត។សម្ដេចធិបតី បានសម្ដែងនូវក្ដីសោមនស្សរីករាយចំពោះលទ្ធផលនៃកិច្ចសហប្រតិបត្តិការរវាងកងទ័ពជើងគោកនៃប្រទេសទាំងពីរ និងបានវាយតម្លៃខ្ពស់ចំពោះវគ្គបណ្តុះបណ្តាល និងការហ្វឹកហ្វឺនរួម ដែលបានរួមចំណែកកសាងសមត្ថភាព និងការយល់ដឹងពីគ្នាទៅវិញទៅមក បន្ថែមទៀត ក្នុងការត្រៀមខ្លួនឆ្លើយតបចំពោះការគម្រាមកំហែងមិនប្រពៃណី ជាយថាហេតុ។ សម្ដេចធិបតី និងឯកឧត្តមមេបញ្ជាការកងទ័ពជើងគោក ក៏បានពិភាក្សា និងផ្លាស់ប្តូរយោបល់លើការពង្រឹង និងពង្រីកកិច្ចសហប្រតិបត្តិការរវាងកងទ័ពជើងគោក នៃប្រទេសទាំងពីរឱ្យកាន់តែរឹងមាំថែមទៀត តាមរយៈការបន្តការហ្វឹកហ្វឺនរួមគ្នា ការបណ្ដុះបណ្ដាលធនធានមនុស្ស ការចែករំលែកព័ត៌មាន និងការផ្លាស់ប្តូរបទពិសោធន៍ ជាពិសេស ការប្រយុទ្ធប្រឆាំងនឹងឧក្រិដ្ឋកម្មបច្ចេកវិទ្យា ការពង្រឹងសមត្ថភាព ការត្រៀមលក្ខណៈក្នុងការចូលរួមប្រតិបត្តិការជួយសង្គ្រោះនៅពេលមានគ្រោះមហន្តរាយ និងផ្តល់ជំនួយមនុស្សធម៌ ក៏ដូចជាការជំរុញឱ្យមាននូវកិច្ចសហប្រតិបត្តិការរវាងអង្គភាព និងអង្គភាព នៃកងទ័ពជើងគោកប្រទេសទាំងពីរ នាពេលអនាគតផងដែរ៕

ក្រសួងសង្គមកិច្ច ដាក់ចេញគោលនយោបាយផ្តោតលើការថែទាំជំនួស លើកុមារកំព្រា និងងាយរងគ្រោះ

ក្រសួងសង្គមកិច្ច អតីតយុទ្ធជន និងយុវនីតិសម្បទា បានប្រកាសផ្សព្វផ្សាយ គោលនយោបាយថ្មី ស្ដីពីការថែទាំជំនួសចំពោះកុមារ។ គោលនយោបាយនេះផ្តោតសំខាន់ ទៅលើការថែទាំជំនួសសម្រាប់កុមារកំព្រា កុមាររងគ្រោះ និងងាយរងគ្រោះ ដែលពុំមែនជាកុមារដែលស្ថិតក្រោមការថែទាំរបស់ឪពុកម្ដាយបង្កើត។ នៅថ្ងៃទី ២៩ ខែកក្កដា ឆ្នាំ ២០២៤នេះ ក្រសួងសង្គមកិច្ច អតីតយុទ្ធជន និងយុវនីតិសម្បទា ដោយមានការចូលរួមពីអង្គការដៃគូអភិវឌ្ឍន៍ ក៏ដូចជាមន្ត្រីមកពីក្រសួងស្ថាប័ន និងរដ្ឋបាលរាជធានី-ខេត្ត បានប្រកាសផ្សព្វផ្សាយគោលនយោបាយស្ដីពីការថែទាំជំនួសចំពោះកុមារ។ គោលនយោបាយនេះ ផ្តោតសំខាន់លើការថែទាំជំនួសសម្រាប់កុមារកំព្រា កុមាររងគ្រោះ និងងាយរងគ្រោះ ដែលពុំមែនជាកុមារដែលស្ថិតក្រោមការថែទាំរបស់ឪពុកម្ដាយបង្កើត។ឯកឧត្តម ឌីន បូរី អគ្គនាយកសេវាសង្គមកិច្ច នៃក្រសួងសង្គមកិច្ច បានលើកឡើងថា ខ្លឹមសារគន្លឹះនៃគោលនយោបាយនេះ ផ្តោតលើ ៤ចំណុចសំខាន់ៗ។ ចំណុចសំខាន់ទី ១ សំដៅលើ ការកំណត់មុខសញ្ញារបស់កុមារដែលត្រូវកិច្ចការពារ និងការថែទាំ រីឯចំណុចសំខាន់ទី ២ផ្តោតលើការកំណត់ប្រភេទនៃការថែទាំជំនួស ដែលរាប់បញ្ចូលទាំងការថែទាំក្រៅផ្លូវការ និងការថែទាំផ្លូវការ។ ចំពោះចំណុចសំខាន់ទី ៣ ផ្តោតលើការកំណត់ពីគំរូនៃសេវាកម្មថែទាំជំនួស និងចំណុចសំខាន់ចុងក្រោយគឺការកំណត់ពីគោលការណ៍ ចក្ខុវិស័យ គោលបំណង គោលដៅ សុទ្ធសាស្ត្រ ផែនការ យន្តការ ការគាំទ្រហិរញ្ញវត្ថុ ការបណ្ដុះបណ្ដាលធនធានមនុស្ស និងការត្រួតពិនិត្យតាមដាន។ក្នុងពិធីផ្សព្វផ្សាយដដែលនេះ ឯកឧត្តម ជា សុមេធី រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លើកឡើងថា គោលនយាបាយស្ដីពីការថែទាំជំនួសចំពោះកុមារ នេះគឺជាវឌ្ឍនៈភាពថ្មីមួយលើការកំណែទម្រង់ការងារថែទាំជំនួសចំពោះកុមារ ដែលខ្ញុំសូមចាត់ទុកថា វាជាបរិបទមួយយ៉ាងសំខាន់ក្នុងការខិតខំគិតគូររួមគ្នាដើម្បីឧត្តមប្រយោជន៍កុមារនៅកម្ពុជា តាមរយៈការធ្វើឱ្យប្រសើរឡើងនូវគុណភាពសេវា ការគ្រប់គ្រងមណ្ឌលថែទាំកុមារ ការលើកកម្ពស់ថែទាំកុមារនៅតាមគ្រួសារ និងសហគមន៍ ស្របតាមកម្មវិធីគោលនយោបាយរបស់រាជរដ្ឋាភិបាល នីតិកាលទី៧ នៃរដ្ឋសភា ច្បាប់ជាតិ និងអន្តរជាតិ ជាពិសេសគោលការណ៍នៃការថែទាំជំនួសចំពោះ កុមាររបស់អង្គការសហប្រជាជាតិ ក្នុងនាមជាប្រទេសហត្ថលេខីនៃអនុសញ្ញាអន្តរជាតិស្តីពីសិទ្ធិកុមារ៕ អត្ថបទ៖ គឹមហុក

ទំនប់អាងស្តុកទឹកស្ទឹងស្រែ១ កំពុងបង្ហាញការចាប់អារម្មណ៍លើវិស័យទេសចរក្នុងស្រុក

ឧត្តរមានជ័យ៖ ទំនប់អាងស្តុកប្រភពទឹកស្ទឹងស្រែងទី១ ដែលមានទីតាំងស្ថិតនៅឃុំពង្រ ស្រុកចុងកាល់ ខេត្តឧត្តរមានជ័យ កំពុងបង្ហាញភាពទាក់ទាញលើវិស័យទេសចរ ក្នុងស្រុកមកលេងកម្សាន្ត ខណៈរដូវវស្សាមានប្រភពទឹកច្រើននៅតំបន់នេះ។លោក រិទ្ធី បក្ស អភិបាលស្រុកចុងកាល់ បានឲ្យដឹងថា តំបន់ទំនប់អាងស្តុកទឹកស្ទឹងស្រែងទី១នេះ គឺជាទីតាំងមួយគួរឲ្យចាប់អារម្មណ៍ច្រើនលើវិស័យទេសចរក្នុងស្រុក ។ក្នុងនោះក៏មានភ្ញៀវជាតិ និងអន្តរជាតិមកលេងកម្សាន្ត និងបោះតង់សម្រាក ផ្តិតយករូបភាពផងដែរ ។ លោក បានបន្ថែមថា តំបន់នេះ ជាតំបន់ទេសចរមួយដែលមានលក្ខណៈបែបធម្មជាតិព្រៃភ្នំហ៊ុមព័ទ្ធទៅដោយបឹងធម្មជាតិដ៏ធំល្វឹងល្វើយគួរជាទីគយគន់របស់អ្នកភ្ញៀវទេសចរ។លោកអភិបាលស្រុកចុងកាល់ បានបន្ដទៀតថា តំបន់នេះមានអត្ថប្រយោជន៍ច្រើនដល់ប្រជាពលរដ្ឋ ប្រកបមុខរបរលក់ដូរ ម្ហូបអាហារឲ្យភ្ញៀវ ដែលមកកម្សាន្តនៅតំបន់នេះផងដែរ៕

អាជ្ញាធរ និងពលរដ្ឋត្រៀមលក្ខណៈរួចរាល់ចូលរួមអបអរថ្ងៃបើកការដ្ឋានព្រែកជីកហ្វូណនតេជោ

អាជ្ញាធរមូលដ្ឋាន និងប្រជាពលរដ្ឋក្នុងរាជធានីភ្នំពេញ បានត្រៀមលក្ខណៈរួចរាល់ ដើម្បីចូលរួមអបអរសាទរថ្ងៃបើកការដ្ឋានគម្រោងព្រែកជីកហ្វូណនតេជោដែលកាន់តែខិតជិតមកដល់។ស្របពេលពិធីបើកការដ្ឋានគម្រោងព្រែកជីកហ្វូណនតេជោនៅសល់រយៈពេលតែ៧ថ្ងៃទៀតប៉ុណ្ណោះ តាមបណ្តារាជធានី-ខេត្តនៅទូទាំងប្រទេសបានប្រកាស និងណែនាំទៅអាជ្ញាធរឃុំ-សង្កាត់របស់ខ្លួន ដើម្បីសហការ និងរៀបចំពិធីអបអរសាទរថ្ងៃបើកការដ្ឋានគម្រោងព្រែកជីកហ្វូណនតេជោទៅតាមគ្រប់រូបភាពជាមួយប្រជាពលរដ្ឋ។ លោក សៅ ដារ៉ូ ចៅសង្កាត់អូរឬស្សីទី៣ ក្នុងខណ្ឌ៧មករា រាជធានីភ្នំពេញ បានប្រាប់ BTV ឱ្យដឹងនៅថ្ងៃទី២៩ ខែកក្កដា ឆ្នាំ២០២៤នេះថា តបតាមសេចក្តីអំពាវនាវរបស់រាជរដ្ឋាភិបាល និងការណែនាំរបស់រដ្ឋបាលរាជធានីភ្នំពេញ គឺរដ្ឋបាលសង្កាត់បានរៀបចំផែនការ និងសកម្មភាពរួចរាល់។ ក្នុងនោះរដ្ឋបាលសង្កាត់ និងប្រជាពលរដ្ឋចំនួនជិត១០០នាក់ នឹងជួបជុំគ្នានៅសាលាសង្កាត់អមជាមួយសារគាំទ្រ និងទង់ជាតិនៃព្រះរាជាណាចក្រកម្ពុជា ព្រមទាំងទូងស្គរដើម្បីវាយបន្លឺជាសំឡេងអបអរសាទរថ្ងៃបើកការដ្ឋានគម្រោងព្រែកជីកហ្វូណនតេជោ។ ជាមួយគ្នានេះប្រជាពលរដ្ឋរស់នៅសង្កាត់អូរឬស្សីទី៣ លើកឡើងថា ពួកគាត់នឹងចូលរួមជាមួយអាជ្ញាធរក្នុងថ្ងៃបើកការដ្ឋានគម្រោងព្រែកជីកហ្វូណនតេជោ ដើម្បីបង្ហាញពីទឹកចិត្តគាំទ្រដល់គម្រោងដ៏មានសាៈសំខាន់ និងផ្តល់ផលប្រយោជន៍យ៉ាងយូរអង្វែងដល់ជាតិ និងប្រជាពលរដ្ឋ។សូមជម្រាបថា គម្រោងព្រែកជីកហ្វូណនតេជោត្រូវបានកំណត់ពិធីបើកការដ្ឋាននៅថ្ងៃទី៥ ខែសីហា ឆ្នាំ២០២៤ខាងមុខនេះ ក្រោមអធិបតីភាពដ៏ខ្ពង់ខ្ពស់របស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី។ គម្រោងនេះត្រូវបានមជ្ឈដ្ឋានក្នុងនិងក្រៅប្រទេសបន្តគាំទ្រយ៉ាងពេញទំហឹង ដើម្បីឱ្យគម្រោងនេះក្លាយជាផ្លូវនាវាចរណ៍ និងប្រព័ន្ធភស្ដុភារកម្មទន្លេបាសាក់ ដោយតភ្ជាប់ផ្លូវទឹករវាងទន្លេទៅកាន់សមុទ្រកម្ពុជា ដោយឆ្លងកាត់ខេត្តចំនួន៤ រួមមាន៖ ខេត្តកណ្តាល តាកែវ កំពត និងខេត្តកែបខណៈគម្រោងគ្រោងចំណាយទុនសាងសង់ប្រមាណ ១,៧០០ លានដុល្លារអាមេរិក៕ អត្ថបទ សេក ឧត្តម ថត

វិទ្យាស្ថាន NIEI ត្រៀមរួចរាល់ដើម្បីអបអរសាទរពិធីបើកការដ្ឋានព្រែកជីកហ្វូណនតេជោ

ខណៈនៅថ្ងៃទី៥ ខែសីហាខាងមុខនេះកម្ពុជានឹងប្រារព្ធពិធីបើកការដ្ឋានសាងសង់ព្រែកជីកហ្វូណនតេជោ។ មន្រ្តីរាជការ បុគ្គលិក សាស្រ្តាចារ្យ និងសិស្ស និស្សិតជាច្រើននាក់នៃវិទ្យាស្ថានជាតិសហគ្រិនភាព និងនវានុវត្តន៍ (NIEI) បានប្រកាសត្រៀមរួចជាស្រេចនូវឧបករណ៍សំខាន់ៗមួយចំនួន ដើម្បីអបអរសាទរការបើកការដ្ឋានព្រែកជីកនេះដែលជាកេរមរតកប្រវត្តិសាស្ត្រសម្រាប់កូនចៅខ្មែរគ្រប់ៗរូប។ឯកឧត្តមបណ្ឌិត តាន់ កុសល នាយកវិទ្យាស្ថានជាតិសហគ្រិនភាព និងនវានុវត្តន៍ ក្នុងបទសម្ភាសន៍ជាមួយព័ត៌មាន ប៊ីធីវី បានមានប្រសាសន៍ថា ដើម្បីអបអរសាទរការបើកការដ្ឋានសាងសង់ព្រែកជីកហ្វូណនតេជោ មន្រ្តី រាជការ បុគ្គលិក លោកគ្រូ អ្នកគ្រូ រួមជាមួយសិស្សនិស្សិតជាច្រើននាក់ថែមទៀត នឹងណាត់ជួបប្រជុំគ្នាចាប់ម៉ោង៦កន្លះព្រឹកតទៅ នៅថ្ងៃទី៥ ខែសីហា ឆ្នាំ២០២៤ ដោយមានជាស្គរ គង ប៉ោត និងត្រដោកជាដើម ដើម្បីគោះបង្ហាញអំពីអ្វីដែលជាឆន្ទៈ និងគាំទ្រយ៉ាងពេញទំហឹងនូវអ្វីដែលមានសម្រាប់ជាផលប្រយោជន៍របស់ប្រទេសជាតិទាំងមូល ដែលជា ”គម្រោងរបស់ខ្មែរទាំងអស់គ្នា ដោយខ្មែរ និងដើម្បីខ្មែរគ្រប់រូប” និងផ្តល់ផលប្រយោជន៍ដ៏មហាសាលដល់សង្គម សេដ្ឋកិច្ចកម្ពុជា ជាពិសេសជាមរតកប្រវត្តិសាស្រ្តសម្រាប់កូនចៅជំនាន់ក្រោយទាំងអស់គ្នា។លោក ជឹម ចន្ថន ប្រធានយុវជនក្រុម១៨ ប្រចាំវិទ្យាស្ថានជាតិសហគ្រិនភាព និងនវានុវត្តន៍ បានបង្ហាញការគាំទ្រយ៉ាងពេញទំហឹងចំពោះការអនុវត្តគម្រោងព្រែកជីកហ្វូណនតេជោនេះ ដែលតភ្ជាប់ផ្លូវទឹក រវាងទន្លេរទៅកាន់សមុទ្រកម្ពុជា ដោយឆ្លងកាត់ខេត្តកណ្តាល តាកែវ កំពត និងខេត្តកែប ដែលមានប្រវែង១៨០គីឡូម៉ែត្រ ដែលនឹងផ្តល់អត្ថប្រយោជន៍ដ៏មហាសាលដល់ប្រទេសកម្ពុជា។ស្រដៀងគ្នាខាងលើនេះ អ្នកស្រី ថេត ផារីយា តំណាងឲ្យសិស្សជាច្រើននាក់ផ្សេងទៀតដែលកំពុងទទួលការបណ្តុះបណ្តាលជំនាញបច្ចេកទេស និងវិជ្ជាជីវៈ នៅវិទ្យាស្ថាន NIEI បានបង្ហាញការគាំទ្រ និងសម្តែងការជូនពរចំពោះថ្នាក់ដឹកនាំ ក៏ដូចជាក្រុមការងារដែលត្រូវបំពេញបេសកម្មក្នុងគម្រោងនេះ ឲ្យប្រព្រឹត្តទៅដោយរលូន និងជោគជ័យគ្រប់ភារកិច្ច។ដើម្បីជាការអបអរសាទរការបើកការដ្ឋានសាងសង់ព្រែកជីកហ្វូណនតេជោ នាពេលខាងមុខនេះ រាជរដ្ឋាភិបាលកម្ពុជា បានចេញសារាចរណែនាំដល់សាធារណជន ក្រសួង ស្ថាប័ន ទាំងថ្នាក់ជាតិ និងថ្នាក់ក្រោមជាតិទាំងអស់ ចូលរួមឲ្យបានកុះករ និងអធិកអធម តាមរយៈការទូងស្គរ វាយគង ជួង រគាំង ទះប៉ោត និងគោះត្រដោក តាមគ្រប់មធ្យោបាយ នៅវេលាម៉ោង ៩:០៩នាទីព្រឹក៕អត្ថបទ ឈិត បូរ៉ាវី

មន្ទីរពេទ្យកាល់ម៉ែត និងដៃគូសហការបើកសន្និសីទអន្តរជាតិស្តីពី «ជំនាញវះកាត់ចោះជំងឺរោគស្ត្រី»

មន្ទីរពេទ្យកាល់ម៉ែត នៃក្រសួងសុខាភិបាល និងសមាគមវះកាត់រោគស្ត្រីអាស៊ីប៉ាស៊ីហ្វិច បានបើកសន្និសីទអន្តរជាតិស្តីពី «ជំនាញវះកាត់ចោះជំងឺរោគស្ត្រី» (Advanced Minimal Invasive Gynecologic Workshop) នាព្រឹកថ្ងៃទី២៩ ខែកក្កដា ឆ្នាំ២០២៤នេះ។លោកវេជ្ជបណ្ឌិត គាន់ អូន ប្រធានផ្នែករោគស្រី្ត មនី្ទរពេទ្យកាល់ម៉ែត បានឲ្យដឹងថា សន្និសីទនាថ្ងៃនេះ ប្រារព្ធឡើងដើម្បីចូលរួមក្នុងការបង្កើនចំណេះដឹងដល់វេជ្ជបណ្ឌិតឯកទេសផ្នែក សម្ភព និងរោគស្ត្រីក៏ដូចជាការលើកកម្ពស់សុខមាលភាពប្រជាជនកម្ពុជា ស្របតាមយុទ្ធសាស្ត្ររបស់ក្រសួងសុខាភិបាល និងរាជរដ្ឋាភិបាល។ សន្និសីទថ្ងៃ នេះជាព្រឹត្តិការណ៍ដ៏មានសារៈសំខាន់សម្រាប់វេជ្ជបណ្ឌិតឯកទេសផ្នែកសម្ភព និងរោគស្ត្រី ទាំងអសក្នុងការអភិវឌ្ឍន៍ជំនាញវះកាត់ចោះ ដោយប្រើបច្ចេកទេស ទាន់ជំនាន់ និងបច្ចុប្បន្នភាពស្របតាមការវិវត្តន៍ផ្នែកវេជ្ជសាស្ត្រក្នុងតំបន់ និងអន្តរជាតិ។នាឱកាសនោះឯកឧត្តមសាស្រ្តាចារ្យ គង់ សន្យា អគ្គនាយកមនី្ទរពេទ្យកាល់ម៉ែត បានវាយតម្លៃខ្ពស់ចំពោះសមាគមវះកាត់រោគស្រី្តអាស៊ីប៉ាស៊ីហ្វិច និងក្រុមការងាររបស់មនី្ទរពេទ្យកាល់ម៉ែត ដែលបានខិតខំសហការគ្នារៀបចំសន្និសីទអន្តរជាតិនាពេលនេះ ដោយមានអ្នកជំនាញចូលរួមមកពីប្រទេសថៃ ឥណ្ឌា ចិន ជប៉ុន រួមទាំងគ្រូពេទ្យអញ្ជើញមកពីបណ្តាមនី្ទរពេទ្យមិត្តភាពខ្មែរ-សូវៀត មនី្ទរពេទ្យកុមារជាតិ មជ្ឈមណ្ឌលគាំពារមាតា និងទារក និងមនី្ទរពេទ្យបង្អែកខេត្ត ដើម្បីលើកកម្ពស់សមត្ថភាពប្រកបវិជ្ជាជីវៈរបស់វេជ្ជបណ្ឌិតជំនាញរោគស្រី្តឈានទៅលំដាប់ខ្ពស់ថ្មីមួយកម្រិតទៀត។ឯកឧត្តមសាស្រ្តាចារ្យ អគ្គនាយកមនី្ទរពេទ្យកាល់ម៉ែត បានបញ្ជាក់ថា ការជួបជុំគ្នារវាងអ្នកជំនាញវះកាត់ចោះរោគស្ត្រីនាពេលនេះ គឺជាការដកស្រង់បទពិសោធន៍ និងរបកគំហើញថ្មីៗក្នុងបច្ចេកទេសវះកាត់ផ្នែករោគស្ត្រី រវាងអ្នកជំនាញមកពីប្រទេសក្នុងតំបន់អាស៊ីប៉ាស៊ីហ្វិក ដែលនឹងផ្តល់អត្ថប្រយោជន៍យ៉ាងច្រើនក្នុងការលើកកម្ពស់សុខុមាលភាពស្រ្តី៕ អត្ថបទ រដ្ឋា

អាវុធហត្ថភ្នំពេញឃាត់ខ្លួន និងបញ្ជូនជនសង្ស័យ២នាក់ ទៅតុលាការ

ភ្នំពេញ ៖ អាវុធហត្ថរាជធានីភ្នំពេញឃាត់ខ្លួនជនសង្ស័យ២នាក់ វត្ថុតាងកាំភ្លើងខ្លី២ដើមបញ្ជូនទៅតុលាការ ដើម្បីចាត់ការតាមនីតិវិធី ។អាវុធហត្ថរាជធានីភ្នំពេញ ប្រាប់ឲ្យដឹងថា នៅវេលាម៉ោងប្រមាណ ០០និង៣០នាទី ថ្ងៃទី២៨ ខែកក្កដា ឆ្នាំ២០២៤ មានមនុស្សប្រុសស្រីមួយក្រុម បាននាំគ្នាចូលក្លឹបកំសាន្ត Central.X ដោយហៅស្រា Hennessy ០២ដប ផឹកស៊ីយ៉ាងហ៊ឺហា សម្ញែងឬកបែបអភិជន ដោយក្នុងនោះបុរសម្នាក់ដែលអ្នកផ្សេងក្នុងក្រុមហែរហមលើកតម្កើងជាមនុស្សសំខាន់ជាងគេ បានដកកាំភ្លើងខ្លីមួយដើមចេញពីចង្កេះ អាមេបញ្ចូលគ្រាប់ កាន់រេចុះឡើង សម្ញែងទៅលើទៅក្រោម ធ្វើឲ្យមានការភ្ញាក់ផ្អើលដល់ភ្ញៀវដ៏ទៃទៀតដែលនៅសាឡុងក្បែរៗនោះ។ ដោយឃើញសភាពបែបនេះ មេការក្លឹបបានតាមអង្វរបុរសម្នាក់នោះ សុំឲ្យយកកាំភ្លើងទៅទុកក្នុងឡាន ស្រាប់តែបុរសនោះ បានបាញ់ឡើងលើ០១គ្រាប់ ដើម្បីសម្តែងឬទ្ធិអំណាចរបស់ខ្លួន ធ្វើឲ្យភ្ញៀវផ្អើលឈូរឆររត់ចេញក្រៅ ត្រូវបានក្រុមសន្តិសុខរាយការណ៍ជូនអាវុធហត្ថខណ្ឌចំការមន ចុះអន្តរាគមន៍និងឃាត់ខ្លួនជនសង្ស័យ ដើម្បីយកទៅអនុវត្តតាមនិតិវិធី ព្រមទាំងដកហូតអាវុធខ្លីបាន ០២ដើម ដោយមួយដើម ម៉ាក GLOCK19 ជាអាវុធដែលជនសង្ស័យ កាន់ធ្វើសកម្មភាពបាញ់សម្ញែង និងមួយដើមទៀត ម៉ាក EKOL VOLGA សមត្ថកិច្ចឆែកឃើញក្នុងរថយន្តរបស់ជនសង្ស័យ។ ក្រោយពេលស្តាប់ចម្លើយ ជនសង្ស័យមាន ឈ្មោះ ខុន បញ្ចសិទ្ធិ ដែលគេដឹងថាជាអ្នកមានជាន់ថ្មី ដោយសារការរកស៊ីខាងដីធ្លី បានសារភាពទទួលស្គាល់ថា អាវុធខ្លីពិតជារបស់ខ្លួនមែន តែអ្នកបាញ់គឺជា តៃកុងឡានខ្លួននោះទេ រីឯតៃកងឡាន បានសារភាពទទួលស្គាល់ថាខ្លួនពិតជាអ្នកបាញ់ដូចសម្តីមេខ្លួនបានលើកឡើងពិតប្រាកដមែន។ តែតាមវិធានស្រាវជ្រាវរបស់សមត្ថកិច្ចអាវុធហត្ថរាជធានីភ្នំពេញ រកតម្រុយឃើញថាអ្នកបាញ់ពិតប្រាកដគឺជាបុគ្គលឈ្មោះ ខុន បញ្ចសិទ្ធិ មិនមែនជាតៃកុងឡាននោះទេ។ ដោយជនសង្ស័យទាំងពីរនៅតែផ្តល់ចម្លើយផ្ទុយពីសាក្សីនិងភស្តុតាង សមត្ថកិច្ចអាវុធហត្ថរាជធានីភ្នំពេញ ក៏ធ្វើការឃាត់ខ្លួនទាំងពីរនាក់ ដើម្បីកសាងសំណុំរឿង បញ្ជូនទៅតុលាការតែម្តង៕តារាវុទ្ធី

រយៈពេល៤ថ្ងៃ ក្រុមគ្រូពេទ្យស្ម័គ្រចិត្ត ស.ស.យ.ក ចុះពិនិត្យសុខភាពជូនប្រជាពលរដ្ឋក្រីក្រចំនួនជាង ១ម៉ឺនគ្រួសារ នៅខណ្ឌ៧មករា

ក្រុមគ្រូពេទ្យស្ម័គ្រចិត្ត សម្ព័ន្ធគ្រូពេទ្យសហភាពសហព័ន្ធយុវជនកម្ពុជា សហការជាមួយ ក្រុមគ្រូពេទ្យសហរដ្ឋអាមេរិក សង្គ្រោះវេជ្ជសាស្រ្តអន្តរជាតិ (IMR) បានចុះ ពិនិត្យសុខភាព ជូនប្រជាពលរដ្ឋក្រីក្រ ក្នុងមូលដ្ឋានខណ្ឌ៧មករា ក្នុងរយៈពេល៤ថ្ងៃ ចាប់ពីថ្ងៃទី២៩ កក្កដា ដល់ថ្ងៃទី១ សីហា ឆ្នាំ២០២៤ ដែលមានប្រជាជាពលរដ្ឋសរុបចំនួន១១៦៦៥គ្រួសារ។កម្មវិធីប្រព្រឹត្តធ្វើឡើងនៅព្រឹកថ្ងៃទី២៩ ខែកក្កដា ឆ្នាំ ២០២៤ ក្រោមអធិបតីភាព ឯកឧត្តម យស់ ផានីតា ទីប្រឹក្សាររបស់អង្គការសង្គ្រោះវេជ្ជសាស្រ្តអន្តរជាតិ ប្រចាំនៅកម្ពុជា និងលោក ថេង សុថុល អភិបាលខណ្ឌ៧មករា ដោយមានការចូលពី លោកវេជ្ជបណ្ឌិតក្រុមគ្រូពេទ្យអង្គការសង្គ្រោះវេជ្ជសាស្រ្តអន្តរជាតិ និងក្រុមគ្រូពេទ្យ សហភាពសហព័ន្ធយុវជនកម្ពុជា នៅទីតាំងក្នុងបរិវេណវត្តមង្គលវ័ន្ត ហៅវត្តថ្វាយបង្គំ សង្កាត់មិត្តភាព ខណ្ឌ៧មករា ។លោកស្រី ម៉ារីណា តំណាងឲ្យក្រុមគ្រូពេទ្យស្ម័គ្រចិត្ត បានប្រាប់ឲ្យBTV ដឹងថា កម្មវិធីនេះមានចំនួន៤ថ្ងៃថ្ងៃទី២៩ខែកក្កដា រហូតដល់ថ្ងៃទី០១ ខែសីហា ឆ្នាំ២០២៤ ក្នុងគោលបំណងផ្ដល់ការថែទាំសុខភាពបឋម និងការព្យាបាលនិងពិនិត្យជំងឺទូទៅជូនដល់ប្រជាពលរដ្ឋ ដែលពុំមានលទ្ធភាពទៅព្យាបាលជំងឺបាន ជាពិសេស បញ្ហាសុខភាពមាត់ធ្មេញ ពិនិត្យភ្នែក ពិនិត្យសន្លាក់ឆ្អឹង ទឹកនោមផ្អែម លើសឈាម ជាដើម។ប្រជាពលរដ្ឋដែលមកទទួលសេវាពិនិត្យនិងព្យាបាលជំងឺ មានសេចក្ដីរីករាយសប្បាយចិត្ត នូវការយកចិត្តទុកដាក់របស់អាជ្ញាធរមូលដ្ឋាន ក៏ដូចជាក្រុមគ្រូពេទ្យស័្មគ្រចិត្ត បានលះបង់ពេលវេលា មកព្យាបាលឲ្យប្រជាពលរដ្ឋក្រីក្រខ្វះលទ្ធភាព ទៅព្យាបាលនៅមន្ទីរពេទ្យឯកជន និងអាចសម្រាលបន្ទុកចំណាយរបស់ប្រជាពលរដ្ឋក្រីក្រខ្វះខាត ដែលមានបញ្ហាសុខភាពបានយ៉ាងច្រើន។ជាចុងក្រោយក្នុងពិធីនេះ លោក ថេង សុថុល អភិបាលខណ្ឌ៧មករា បានបញ្ជាក់ឲ្យដឹងថា កម្មវិធីពេលនេះគឺជាលើកទី២ ហើយដែលក្រុមគ្រូពេទ្យ សង្គ្រោះវេជ្ជសាស្រ្តអន្តរជាតិ ចុះមកខណ្ឌ៧មករា កម្មវិធីនេះដែរ កើតឡើងក្រោមការយកចិត្តទុកដាក់ជាប់ជាប្រចាំរបស់រាជរដ្ឋាភិបាលកម្ពុជា អាណត្តិទី៧ និងដោយមានកិច្ចសហការយ៉ាងជិតស្និទ្ធរវាងអង្គការដៃគូ សហភាពសហព័ន្ធយុវជនកម្ពុជា និងរដ្ឋបាលរាជធានីភ្នំពេញ។ លោកអភិបាលមានសេចក្តីសោមនស្សរីករាយឥតឧបមាដែល ក្រុមគ្រូពេទ្យស្ម័គ្រចិត្តសម្ព័ន្ធគ្រូពេទ្យសហភាពសហព័ន្ធយុវជនកម្ពុជា សហការជាមួយ ក្រុមគ្រូពេទ្យសហរដ្ឋអាមេរិក សង្គ្រោះវេជ្ជសាស្រ្តអន្តរជាតិ បានចុះមកពិនិត្យសុខភាពទូទៅជូនប្រជាពលរដ្ឋ ក្រីក្រខ្វះខាតនៅក្នុងមូលដ្ឋានខណ្ឌ៕ អត្ថបទ៖ កុម្ភះ

ប្រជាពលរដ្ឋរងគ្រោះដោយជំនន់ទឹកភ្លៀង នៅស្រុកកណ្ដាលស្ទឹង និងក្រុងតាខ្មៅ ត្រូវបានអាជ្ញាធរជម្លៀសមកទីទួលសុវត្ថិភាព

ប្រជាពលរដ្ឋដែររងគ្រោះដោយជំនន់ទឹកភ្លៀង នៅតាមបណ្ដោយប្រឡាយ៩៤ និង ៩៦ ស្ថិតនៅស្រុកកណ្ដាលស្ទឹង និងក្រុងតាខ្មៅ ខេត្តកណ្ដាល ត្រូវបានអាជ្ញាធរជម្លៀសមកទីទួលសុវត្ថិភាព ដើម្បីបញ្ជៀសនូវគ្រោះថ្នាក់ផ្សេងៗ។ នារសៀលថ្ងៃទី២៨ ខែកក្កដា ឆ្នាំ២០២៤ ឯកឧត្តម ហាក់ សុខមករា អភិបាលរងខេត្តកណ្ដាល តំណាងឯកឧត្តម គួច ចំរើន អភិបាល នៃគណៈអភិបាលខេត្ត បានដឹកនាំមន្ត្រីជំនាញ មន្ទីរអង្គភាពពាក់ព័ន្ធ និងអាជ្ញាធរស្រុកកណ្ដាលស្ទឹង និងក្រុងតាខ្មៅ ចុះពិនិត្យស្ថានភាពជំនន់ទឹកភ្លៀង នៅតាមបណ្ដោយប្រឡាយលេខ៩៤ និង ៩៦ ស្ថិតក្នុងស្រុកកណ្ដាលស្ទឹង និងក្រុងតាខ្មៅ ខេត្តកណ្ដាល។ ក្នុងឱកាសចុះពិនិត្យស្ថានភាពជំនន់ទឹកភ្លៀងនេះដែរ ឯកឧត្តមហាក់ សុខមករា អភិបាលរងខេត្តកណ្ដាល បានណែនាំដល់កងកម្លាំងមានសមត្ថកិច្ច ព្រមទាំងអាជ្ញាធរស្រុកកណ្ដាលស្ទឹង និងក្រុងតាខ្មៅ ត្រូវអញ្ជើញបងប្អូនប្រជាពលរដ្ឋដែលរងការជន់លិចទាំងអស់ មកទីទួលសុវត្ថិភាព ដើម្បីបញ្ជៀសនូវគ្រោះថ្នាក់ណាមួយកើតឡើងជាយថាហេតុ ព្រោះថាស្ថានភាពទឹកនៅពេលនេះនៅតែបន្តឡើងជាបន្តបន្ទាប់។ ជាមួយគ្នានេះផងដែរត្រូវចុះដល់មូលដ្ឋានដែលកំពុងជន់លិច ដោយមិនឱ្យមានប្រជាពលរដ្ឋណាម្នាក់បន្តរស់នៅតំបន់ដែលរងហានិភ័យដោយជំនន់ទឹកភ្លៀងនេះឡើយ ហើយអាជ្ញាធរទាំងអស់ត្រូវយកចិត្តទុកដាក់ខ្ពស់ក្នុងការការពារសុវត្ថិភាពរបស់បងប្អូនប្រជាពលរដ្ឋទាំងអស់ ដែលមកស្នាក់នៅបណ្ដោះអាសន្ននៅទីទួលសុវត្ថិភាពក្នុងមូលដ្ឋានរបស់ខ្លួន។ ជាមួយគ្នានេះផងដែរ ឯកឧត្តមបានណែនាំដល់មន្ទីរជំនាញពាក់ព័ន្ធ ត្រូវរៀបចំទឹកស្អាត បង្គន់អនាម័យ សម្រាប់បងប្អូនប្រជាពលរដ្ឋដែលមកស្នាក់នៅបណ្ដោះអាសន្ននៅទីទួលសុវត្ថិភាពនេះឱ្យបានគ្រប់គ្រាន់។ ឯកឧត្តមបានអំពាវនាវដល់បងប្អូនប្រជាពលរដ្ឋ នៅក្បែរតំបន់ជំនន់ទឹកភ្លៀង សូមមានការប្រុងប្រយ័ត្នខ្ពស់ចំពោះសត្វអសិរពិស ពិសេសមនុស្សចាស់ និងក្មេងៗមិនត្រូវឱ្យនៅក្បែរទឹកឡើយ ដែលអាចបណ្ដាលឱ្យមានគ្រោះថ្នាក់ណាមួយកើតឡើងជាយថាហេតុ។ សូមបញ្ជាក់ផងដែរថាក្នុងរយៈពេលប៉ុន្មានថ្ងៃមកនេះ មានភ្លៀងធ្លាក់ជាបន្តបន្ទាប់បណ្ដាលធ្វើឱ្យស្ទឹងព្រែកត្នោត និងតំបន់មួយចំនួនមានការជន់លិចដោយជំនន់ទឹកភ្លៀង ក្នុងនោះសង្កាត់កំពង់សំណាញ់ ក្រុងតាខ្មៅ ប្រជាពលរដ្ឋចំនួន ១១០គ្រួសារបានរងការជន់លិចដោយជំនន់ទឹកភ្លៀង និងបានរកទីទួលសុវត្ថិភាពរួចហើយ និង៨៨ គ្រួសារទៀតទទួលរងនូវផលប៉ះពាល់។ ដោយឡែកឃុំកណ្ដោក ស្រុកកណ្ដាលស្ទឹង ប្រជាពលរដ្ឋរងផលប៉ះពាល់ដោយជំនន់ទឹកភ្លៀងមានចំនួន ២៩៤ គ្រួសារ ហើយគ្រួសារមកទីទួលសុវត្ថិភាពមានចំនួន ៣៧ គ្រួសារ៕

ក្រសួងការងារ បន្តចុះផ្សព្វផ្សាយកម្មវិធីគោលនយោបាយអាទិភាពរបស់រាជរដ្ឋាភិបាល នៅខេត្តព្រះសីហនុ

ក្រសួងការងារ និងបណ្តុះបណ្តាលវិជ្ជាជីវៈ នាព្រឹកថ្ងៃទី២៩ ខែកក្កដា ឆ្នាំ២០២៤នេះ បានបន្តចុះផ្សព្វផ្សាយ ស្ដីពី “ការអនុវត្តរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តសម្រាប់អ្នកក្នុងបន្ទុកសមាជិក ប.ស.ស. ជាមន្ត្រីសាធារណៈ និង “កម្មវិធីបណ្ដុះបណ្ដាលជំនាញវិជ្ជាជីវៈ និងបច្ចេកទេស ដល់យុវជនមកពីគ្រួសារក្រីក្រ និងគ្រួសារងាយរងហានិភ័យ” ធ្វើឡើងនៅនៅវិទ្យាស្ថានពហុបច្ចេកទេសមិត្តភាពកម្ពុជា ចិន ខេត្តព្រះសីហនុ ដោយមានវត្តមានចូលរួមពីសមាជិកក្រុមប្រឹក្សាក្រុង ស្រុក ឃុំ សង្កាត់ និងអាជ្ញាធរពាក់ព័ន្ធគ្រប់លំដាប់ថ្នាក់ សរុបប្រមាណជិត ៣០០នាក់។ឯកឧត្តម ហួត ស៊ីនាដ រដ្ឋលេខាធិការ តំណាងដ៏ខ្ពង់ខ្ពស់របស់ ឯកឧត្តម ហេង សួរ រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ មានប្រសាសន៍ថា តាមរយៈការអនុវត្តរបបសន្តិសុខសង្គមផ្នែកថែទាំសុខភាពតាមរបបភាគទានដោយស្ម័គ្រចិត្តសម្រាប់អ្នកក្នុងបន្ទុកសមាជិក ប.ស.ស. ជាមន្ត្រីសាធារណៈ ដោយក្នុងនោះអ្នកនៅក្នុងបន្ទុកសមាជិក ប.ស.ស. ត្រូវទទួលបានអត្ថប្រយោជន៍ កម្រិតទី១ ដែលរួមមាន សេវាព្យាបាល និងថែទាំវេជ្ជសាស្ត្រ ដែលមានជម្រើសទៅព្យាបាល នៅមូលដ្ឋានសុខាភិបាលនានាជាដៃគូ ប.ស.ស. បន្ថែមពីលើមន្ទីរពេទ្យរដ្ឋ, បុគ្គលស្វ័យនិយោជន៍ ជាស្ត្រីដែលបង់ភាគទានបាន ៩ខែជាប់គ្នា នឹងទទួលបានប្រាក់បំណាច់លំហែមាតុភាពនៅពេលសម្រាលកូន, និងវិភាជន៍ប្រាក់បូជាសព នៅពេលពួកគាត់ទទួលមរណភាព។ ឯកឧត្តមរដ្ឋលេខា លើកឡើងបន្តថា ចំពោះការដាក់ចេញនូវកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសដល់យុវជនមកពីគ្រួសារក្រីក្រ និងគ្រួសារងាយរងហានិភ័យនៅទូទាំងប្រទេសចំនួនប្រមាណ ១,៥លាននាក់ កម្រិតសញ្ញាបត្របច្ចេកទេសនិងវិជ្ជាជីវៈ១ យុវជនដែលមកពីគ្រួសារក្រីក្រ និងគ្រួសារងាយរងហានិភ័យ អាចចុះឈ្មោះ និងទទួលបានការបណ្ដុះបណ្ដាលនៅតាមបណ្ដាគ្រឹះស្ថានអប់រំបណ្ដុះបណ្ដាលបច្ចេកទេស និងវិជ្ជាជីវៈនានា ក្នុងកម្រិតសញ្ញាបត្របច្ចេកទេស និងវិជ្ជាជីវៈ១ ដោយមិនបង់ថ្លៃសិក្សា និងទទួលបាននូវប្រាក់ឧបត្ថម្ភប្រចាំខែ២៨ម៉ឺនរៀល។ ដោយឡែក យុវជននានា រួមទាំងបុគ្គលនៃសេដ្ឋកិច្ចក្រៅប្រព័ន្ធ និងបងប្អូនកម្មករនិយោជិតក៏អាចចូលរៀនក្នុងកម្មវិធីបណ្តុះបណ្តាលជំនាញវិជ្ជាជីវៈ និងបច្ចេកទេសនេះ ដោយមិនបង់ថ្លៃផងដែរ ដើម្បីទទួលបានជំនាញមួយពិតប្រាកដ ដែលអាចយកទៅបង្កើតមុខរបរផ្ទាល់ខ្លួន ឬចូលបម្រើការងារនៅតាមសហគ្រាស គ្រឹះស្ថាននានា តាមរយៈការផ្លាស់ប្តូរជំនាញ ការបង្កើនជំនាញ ឬបង្កើនផលិតភាពពេញមួយជីវិត រួមទាំងនិយោជក ម្ចាស់សហគ្រាសដែលមានបំណងបង្កើនប្រសិទ្ធិភាព ផលិតភាពការងារនិងភាពប្រកួតប្រជែងខ្ពស់ ឬចំណេះដឹងផ្នែកសហគ្រិនភាពនិងផ្នែកផ្សេងៗប្រកបដោយចីរភាព ភាពធន់ និងបរិយាបន្ន ដោយរក្សាបាននូវស្ថិរភាពការងារ កំណើន ផលិតភាព ប្រាក់ចំណូលសមរម្យ លក្ខខណ្ឌការងារល្អប្រសើរ និងការប្រកួតប្រជែង៕

បណ្ដាញសង្គម

ព័ត៌មានថ្មីៗ

កោះតៃវ៉ាន់ ជំរុញឱ្យអាមេរិក បន្តលក់អាវុធ ដោយលើកឡើងពីចំណងមិត្តភាពដ៏រឹងមាំរវាងភាគីទាំងពីរ

ប្រជាជនហ្កាហ្សា ប្រមូលផ្តុំគ្នាសម្រាប់ការបួងសួងបុណ្យ Eid ក្នុងពេលមានជម្លោះ និងការលំបាកនៅបន្ត

រដ្ឋមន្ត្រីការបរទេស៖ អាមេរិក មិនអនុញ្ញាតឱ្យមានករណីជំងឺអេបូឡាណាមួយ ចូលក្នុងប្រទេសបានទេ

អ្នកវិភាគ៖ ភាពមិនប្រាកដប្រជានៃនយោបាយអាមេរិក និងសង្គ្រាមនៅអ៊ីរ៉ង់ នឹងគ្របដណ្ដប់លើកិច្ចប្រជុំកំពូលសន្តិសុខអាស៊ី

ភាពតានតឹងថ្មីកើនឡើងនៅជុំវិញភាគខាងត្បូងប្រទេសអ៊ីរ៉ង់ បន្ទាប់ពីការវាយប្រហាររបស់អាមេរិក

ប្រមុខការទូតកម្ពុជា-ចិន បញ្ជាក់ឡើងវិញអំពីការពង្រឹងភាពជាដៃគូយុទ្ធសាស្ត្រគ្រប់ជ្រុងជ្រោយ និងសហការគ្នាយ៉ាងជិតស្និទ្ធក្នុងវេទិកាពហុភាគី ដើម្បីលើកកម្ពស់ស្ថិរភាពក្នុងតំបន់

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877