BTV NEWS

សម្តេចធិបតីនាយករដ្ឋមន្ត្រី ផ្តល់ស្ពានបេតុងចំនួន១ កន្លែង ប្រវែង ៩០ ម៉ែត្រ ជូនដល់ប្រជាពលរដ្ឋនៅស្រុកជីក្រែង ខេត្តសៀមរាប

កម្ពុជាតែងឈរលើគោលគំនិតសន្ដិភាពនិយម ព្រោះកម្ពុជាធ្លាប់ឆ្លងកាត់សង្គ្រាមជាង៣ទសវត្សរ៍ហើយ

ក្រសួងការងារ បន្តនាំយកឱកាសការងារជាង ១ម៉ឺនកន្លែង និងអត្ថប្រយោជន៍ ប.ស.ស. ព្រមទាំងកម្មវិធីបណ្តុះបណ្តាលជំនាញ TVET ដល់ពលរដ្ឋខេត្តពោធិ៍សាត់

ប្រមុខការពារជាតិរំឭកខ្មែរគ្រប់រូបរួបរួមគ្នាជាធ្លុងមួយក្រោកឡើងលើកតម្កើងកិត្យានុភាពជាតិ និងរួមគ្នាការពារជាតិទោះត្រូវលះបង់ក្នុងតម្លៃណាក៏ដោយ

ព័ត៌មានជាតិ

ផ្លូវដែកថ្មី រវាងភ្នំពេញ-ប៉ោយប៉ែត គ្រោងនឹងដាក់ឲ្យដំណើរការឆាប់ៗខាងមុខនេះ

ភ្នំពេញ៖ មន្រ្តីជាន់ខ្ពស់នៃកម្ពុជា បានបញ្ជាក់ឲ្យដឹងថា នៅពេលខាងមុខឆាប់ៗនេះ រថភ្លើងជប៉ុនលើផ្លូវភាគខាងជើង រហូតដល់ក្រុងប៉ោយប៉ែត ខេត្តបន្ទាយមានជ័យ (ព្រំដែនកម្ពុជា-ថៃ) គ្រោងនឹងដាក់ឲ្យដំណើរការជាផ្លូវការ ខណៈក្រុមហ៊ុន រ៉ូយ៉ាល់ រេលវេ (Royal Railway Cambodia-RRC)) បានកំពុងដំណើរការបើកសាកល្បងជាមុនសិន ដើម្បីឲ្យប្រាកដថា អ្នកដំណើរនឹងមានសុវត្ថិភាពនៅពេលជិះ។ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន នៅរសៀលថ្ងៃទី២៥ ខែកក្កដា ឆ្នាំ២០២៤នេះ បានមានប្រសាសន៍ប្រាប់ព័ត៌មាន ប៊ីធីវី ឲ្យដឹងថា ពេលនេះក្រុមហ៊ុនបានដំណើរការបើកសាកល្បងខ្សែរថភ្លើង Kiha183-182 លើផ្លូវដែកទិសខាងជើង(ភ្នំពេញ-ប៉ោយប៉ែត) ចំនួន៤ទូ មានដូចជាប្រភេទ Kiha183-4559 , Kiha182-7561 , Kiha182-7552 និង Kiha182-4558។ឯកឧត្តម បានបញ្ជាក់បន្ថែមថា ដំណើរការបើកសាកល្បងរថភ្លើងជប៉ុនលើផ្លូវភាគខាងជើងនេះ គឺដើម្បីពិនិត្យមើលផ្លូវដែកសម្រាប់អ្នកដំណើរ និងជាសារប្រាប់ទៅដល់អ្នកដំណើរ ពីការដំណើរការឡើងវិញ ខ្សែរថភ្លើងសម្រាប់អ្នកដំណើរ (ភ្នំពេញ-ប៉ោយប៉ែត) បន្ទាប់ពីផ្អាកអស់រយៈពេលវែង ដើម្បីឱ្យក្រុមការងារបច្ចេកត្រួតពិនិត្យ និងសិក្សាលម្អិតរួមគ្នា លើដំណើរការកែប្រព័ន្ធជើងក្រោម ទ្វារចេញ-ចូល ម៉ាស៊ីនត្រជាក់ ច្រកទ្វារសុវត្ថិភាព សម្ភារៈបរិក្ខា និងការងារផ្សេងៗទៀត ដើម្បីប្រាកដថាមានសុវត្ថិភាពខ្ពស់ សម្រាប់ដឹកជញ្ជូនអ្នកដំណើរ មុននឹងសម្រេចដាក់ឱ្យដំណើរការជាផ្លូវការនាពេលឆាប់ៗដ៏ខ្លីខាងមុខ។គួរបញ្ជាក់ថា ខ្សែរថភ្លើងសម្រាប់អ្នកដំណើរផ្លូវដែកភាគខាងជើង (ភ្នំពេញ-ប៉ោយប៉ែត) បានផ្អាករយៈពេលវែង ចាប់ពីការរីករាលដាល នៃជំងឺកូវីដ-១៩មកម្លេះ ចំពោះការដឹកទំនិញ បានធ្វើឡើងជាប្រចាំ (៣ជើងក្នុងមួយសប្តាហ៍)៕

រដ្ឋមន្រ្តីក្រសួងបរិស្ថាន ចូលរួមដាំកូនឈើ១៥០០០ដើម នៅដែនជម្រកសត្វព្រៃសង្ឃរុក្ខាវន្ត

ឧត្តរមានជ័យ៖ ឯកឧត្តមបណ្ឌិត អ៊ាង សុផល្លែត រដ្ឋមន្រ្តីក្រសួងបរិស្ថាន នាថ្ងៃព្រឹកទី២៥ ខែកក្កដា ឆ្នាំ២០២៤នេះ បានអញ្ជើញជាអធិបតី ក្នុងពិធីដាំកូនឈើចំនួន១៥០០០ដើម លើផ្ទៃដី៣ហិកតា នៅចំណុចបរិវេណដែនជម្រកសត្វព្រៃសង្ឃរុក្ខាវន្ត ស្ថិតនៅភូមិថ្មី ឃុំត្រពាំងតាវ ស្រុកអន្លង់វែង ខេត្តឧត្តរមានជ័យ ព្រមទាំងមានការចូលរួមពីមន្ទីរស្ថាប័នអង្គភាពជុំវិញខេត្ត ប្រជាពលរដ្ឋ និងសិស្សានុសិស្សយ៉ាងច្រើនកុះករ ។ក្នុងឱកាសនោះឯកឧត្តមបណ្ឌិត អ៊ាង សុផល្លែត បានថ្លែងកោតសរសើរ និងវាយតម្លៃខ្ពស់ ចំពោះការខិតខំប្រឹងប្រែងការងារកន្លងមក របស់មន្រ្តីបរិស្ថានខេត្តឧត្តរមានជ័យ ដែលជានិច្ចកាលតែងតែពុះពារជំនះរាល់ឧបសគ្គក្នុងការការពារទប់ស្កាត់ប្រឆាំងរាល់បទល្មើសនានាក្នុងដែនព្រៃឈើសហគមន៍ក្នុងភូមិសាស្រ្តខេត្តឧត្តរមានជ័យ។ ក្នុងនោះបានបំផុសស្មារតីដល់ មន្ទីរស្ថាប័ន គ្រឹះស្ថានអប់រំ អង្គការសង្គមស៊ីវិល អង្គការក្រៅរដ្ឋាភិបាល ព្រះសង្ឃ អាជ្ញាធរមូលដ្ឋាន សិស្សានុសិស្ស និងប្រជាពលរដ្ឋ បានចូលរួមយ៉ាងផុសផលក្នុងការដាំកូនឈើឡើងវិញ ដើម្បីធ្វើឲ្យសហគមន៍យើងទទួលបានបរិស្ថានល្អប្រកបដោយពណ៌បៃតងស្រស់បំព្រងផងដែរ។យ៉ាងណាម៉ិញឯកឧត្តមបណ្ឌិត អ៊ាង សុផល្លែត បានណែនាំដល់គ្រប់មន្ទីរស្ថាប័នទាំងអស់ ពិសេសអាជ្ញាធរមូលដ្ឋាន និងប្រជាសហគមន៍ឲ្យចេះស្រលាញ់ធនធានធម្មជាតិ និងនាំគ្នាចូលរួមដាំបន្តទៀតឲ្យបានកាន់តែច្រើននៅគ្រប់ទីកន្លែង ដើម្បីស្តារគម្របព្រៃឈើ និងអភិរក្សព្រៃឈើឲ្យកាន់តែសំបូរឡើងវិញនៅគ្រប់ទីកន្លែងដែលខ្វះចន្លោះ។ ពិសេសនោះក្មួយៗសិស្សានុសិស្សត្រូវចូលរួមដាំនៅតាមសាលារៀន និងនៅតាមខ្នងផ្ទះ ដោយសិស្សម្នាក់ដើមឈើមួយដើម ក្នុងមួយឆ្នាំយើងអាចដាំឲ្យបានមួយម៉ឺនដើមផងដែរ៕

ប្រធានអង្គការ Halo Trust កោតសសើរអាជ្ញាធរមីនកម្ពុជាក្នុងកិច្ចគាំទ្រភាពជាដៃគូ និងសហការជិតស្និទ្ធលើសកម្មភាពមីនមនុស្សធម៌

ភ្នំពេញ ៖ លោក Miles Hawthorn ប្រធានអង្គការ Halo Trust បានថ្លែងអំណរគុណជូនចំពោះរាជរដ្ឋាភិបាលកម្ពុជា និងកោតសសើរអាជ្ញាធរមីន ដែលបានផ្តល់នូវការគាំទ្រភាពជាដៃគូ និង កិច្ចសហការយ៉ាងជិតស្និទ្ធលើកម្មវិធីសកម្មភាពមីនមនុស្ស ធម៌របស់អង្គការ Halo Trust នៅកម្ពុជា ព្រមទាំងបានវាយតម្លៃខ្ពស់ភាពជាអ្នកដឹកនាំយ៉ាងរឹងមាំរបស់អាជ្ញាធរមីនក្នុងការគ្រប់គ្រង និងសម្របសម្រួលវិស័យសកម្មភាពមីននៅទូទាំងប្រទេសកម្ពុជាផងដែរ។ ការថ្លែងកោតសសើរនេះខណៈលោក Miles Haw thorn ប្រធានអង្គការ Halo Trust ប្រចាំនៅកម្ពុជា ចូលជួបសម្ដែងការគួរសម និង ជម្រាបលា ឯកឧត្តម បណ្ឌិត លី ធុជ ទេសរដ្ឋមមន្ត្រីនិងជាអនុប្រធានទី១ អាជ្ញាធរមីន និង ទទួលស្វាគមន៍ចំពោះលោក Tobias Wehitt ត្រូវបានជ្រើសតាំងជាប្រធានអង្គការ Halo Trust (ថ្មី) ប្រចាំនៅកម្ពុជា នាថ្ងៃទី២៥ ខែកក្កដា ឆ្នាំ២០២៤ នៅទីស្នាក់ការអាជ្ញាធរមីន ។លោក Miles Hawthorn បានបញ្ជាក់ថា រយៈពេលជាង ៣០ឆ្នាំនេះ ដោយមានការគាំទ្រពីរាជរដ្ឋាភិបាលកម្ពុជា អង្គការ Halo Trust បានចូលរួមជាផ្នែកមួយនៃភាពជោគជ័យរបស់កម្ពុជាក្នុងវិស័យសកម្មភាពមីន ហើយទោះបីលោកបានបញ្ចប់បេសកកម្មនៅកម្ពុជាក៏ដោយ ប៉ុន្តែប្រទេសកម្ពុជា និងប្រជាជនកម្ពុជា តែងតែស្ថិតក្នុងបេះដូងរបស់គាត់ជានិច្ច។ ក្នុងឱកាសនោះ តាងនាម សម្ដេចធិបតី ហ៊ុន ម៉ាណែត នាយករដ្ឋមន្ត្រី និងជាប្រធានអាជ្ញាធរមីន ឯកឧត្តម ទេសរដ្ឋមន្ត្រី លី ធុជ បានថ្លែងអំណរគុណយ៉ាងជ្រាលជ្រៅចំពោះរួមចំណែករបស់អង្គការ Halo Trust នៅកម្ពុជា ចាប់តាំងពីឆ្នាំ១៩៩១។ ផ្ទៃដីមានមីន និងសំណល់ជាតិផ្ទុះពីសង្រ្គាមជាង ៥១១ គីឡូម៉ែត្រការ៉េ ត្រូវបានរំដោះដោយអង្គការ Halo Trust ហើយមីនប្រឆាំងមនុស្ស ៣២២ .០១៥ គ្រាប់ មីនប្រឆាំងរថក្រោះ ៥១១៧គ្រាប់ សំណល់ជាតិផ្ទុះពីសង្រ្គាម ២១៩៥៧១គ្រាប់ និងអាវុធធុនតូចជាង ១,៥ លានគ្រាប់ ត្រូវបានរកឃើញ និងកម្ទេចចោល។ឯកឧត្តមទេសរដ្ឋមន្ត្រី លី ធុជ បន្តទៀតថា លទ្ធផលសម្រេចបានរបស់អង្គការ Halo Trust បានមកពីការគាំ ទ្រពីប្រទេសអាល្លឺម៉ង់ សហរដ្ឋអាម៉េរិក ចក្រភពអង់គ្លេស ស្វីស អៀកឡង់ និងកម្មវិធី HDR&D ដែលជាដៃគូក្នុង ចំណោមប្រទេស និង ដៃគូអភិវឌ្ឍន៍ដទៃទៀត រួមចំណែកដល់កម្មវិធីសកម្មភាពមីនមនុស្សធម៌នៅកម្ពុជារយៈពេលជាង ៣០ឆ្នាំ។ក្នុងនោះ ឯកឧត្តម លី ធុជ បានថ្លែងអរគុណជូនចំពោះអ្នកដោះមីនទាំងអស់ដែលបានអនុវត្តន៍ការងារទីវាលផ្ទាល់ និងប្រថុយប្រថានជីវិត ក្នុងការផ្ដល់ដីសុវត្ថិ ភាពនិងជួយសង្រ្គោះដល់ប្រជាពលរដ្ឋកម្ពុជា។ បងប្អូនអ្នកដោះមីនទាំងអស់ ត្រូវបានចាត់ទុកជាឆ្អឹងខ្នងយ៉ាងរឹងមាំ និង ចាំបាច់បំផុត ព្រមទាំងដើរតួយ៉ាងសំខាន់ក្នុងការ សម្រេចបាននូវសមិទ្ធផលយ៉ាងត្រចះត្រចង់ក្នុងវិស័យសកម្មភាពមីនរបស់កម្ពុជារយៈពេលជាង ៣០ឆ្នាំកន្លងនេះ៕ អត្ថបទ ៖ ភារម្យ

ប្រធានរដ្ឋវៀតណាមសន្យាបន្តកសាងនូវមិត្តភាពជាបងប្អូន ជាមិត្តជិតខាងល្អរវាងកម្ពុជា-វៀតណាម

ភ្នំពេញ ៖ នៅវេលាថ្ងៃត្រង់ថ្ងៃទី២៥ ខែកក្កដា ឆ្នាំ២០២៤ សម្ដេចអគ្គមហាសេនាបតីតេជោ ហ៊ុន សែន ប្រធានព្រឹទ្ធសភានៃព្រះរាជាណាចក្រកម្ពុជា និងជាប្រធានគណបក្សប្រជាជនកម្ពុជា អញ្ជើញធ្វើជំនួបពិភាក្សាជាមួយឯកឧត្តម តូ ឡឹម ប្រធានរដ្ឋ នៃសាធារណរដ្ឋសង្គមនិយមវៀតណាម។ក្នុងជំនួបដ៏មានសារសំខាន់នោះ ភាគីទាំងពីរបានថ្លែងអំណរគុណគ្នាទៅវិញទៅមក ពិសេសឯកឧត្តម តូ ឡឹម បានថ្លែងអំណរគុណជូនចំពោះសម្ដេចតេជោប្រធានព្រឹទ្ធសភាកម្ពុជា ដែលបានចំណាយពេលវេលាដ៏មានតម្លៃ អញ្ជើញមកចូលរួមគោរពវិញ្ញាណក្ខន្ធ ឯកឧត្តម ង្វៀន ភូជុង អគ្គលេខាធិកាមជ្ឈិមបក្សកុម្មុយនីស្ដវៀតណាម នៅរដ្ឋធានីហាណូយ ប្រទេសវៀតណាម នាឱកាសនេះ។ឯកឧត្តម តូ ឡឹម មានប្រសាសន៍ថ្លែងអំណរគុណថ្វាយ និងជូនចំពោះព្រះករុណាព្រះមហាក្សត្រនៃព្រះរាជាណាចក្រកម្ពុជា សម្ដេចមហាបវរនាយករដ្ឋមន្ត្រីនិងថ្នាក់ដឹកនាំគ្រប់ស្ថាប័នទាំងអស់របស់ព្រះរាជាណាចក្រកម្ពុជា ដែលបានផ្ញើនូវសាររំលែកទុក្ខចំពោះការបាត់បង់ ថ្នាក់ដឹកនាំដែលជាមហាបុរសរដ្ឋវៀតណាម និងជាការបាត់បង់របស់ប្រជាជនកម្ពុជាផងដែរ។ភាគីទាំងពីរបានសម្ដែងនូវមនោសញ្ចេតនាយ៉ាងជ្រាលជ្រៅចំពោះការបាត់បង់នូវធនធានមហាបុរសរដ្ឋនេះ ទាំងបក្ស និងប្រជាជនវៀតណាម។ ភាគីទាំងពីរបានសន្យាពង្រឹងពង្រីកនូវកិច្ចសហប្រតិបត្តិការកម្ពុជា-វៀតណាម ក៏ដូចជាកម្ពុជា វៀតណាម ឡាវ ក្នុងន័យនេះ ឯកឧត្តមប្រធានរដ្ឋវៀតណាមបានសន្យាថា និងបន្តនូវភារកិច្ចដែលឯកឧត្តមអគ្គលេខាធិការបន្សល់ទុក នូវស្នាដៃនៃការកសាងប្រទេស ក៏ដូចជាការកសាងនូវមិត្តភាព ជាបងប្អូន ជាមិត្តជិតខាងល្អរវាងកម្ពុជា វៀតណាម និងពង្រឹងពង្រីកបន្ថែមទៀត សម្រាប់មនុស្សជំនាន់ថ្មី។ឯកឧត្តម តូ ឡឹម មានប្រសាសន៍ថ្លែងអំណរគុណជូនចំពោះសម្ដេចតេជោ ដែលបានបង្ហាញនូវមនោសញ្ចេតនា ក្នុងការចូលរួមជាគ្រួសារ និងជូនដំណើរជាលើកចុងក្រោយជូនវិញ្ញាណក្ខន្ធ ឯកឧត្តម ង្វៀន ភូជុង រហូតដល់ថ្ងៃទី២៦កក្កដាស្អែកទៀត ដែលនេះបានបង្ហាញឱ្យឃើញថា មិត្តភាពដែលមានជាង១ទសវត្សរ៍កន្លងទៅ រវាងឯកឧត្តម ង្វៀន ភូជុង ដែលបានធ្វើការជាមួយសម្ដេចតេជោ គឺពិតជាមានតម្លៃខ្លាំងណាស់។ក្នុងនាមជាប្រធានរដ្ឋថ្មីរបស់វៀតណាម ឯកឧត្តមនិងបន្តការងារទាំងអស់នោះ ដើម្បីឱ្យការងារទាំងបក្ស និងរដ្ឋនៃប្រទេសទាំងពីរកម្ពុជា វៀតណាម ក៏ដូចជាការងារបក្ស និងរដ្ឋ នៃប្រទេសទាំងបី កម្ពុជា វៀតណាម ឡាវ ឱ្យកាន់តែរឹងមាំយូរអង្វែងតទៅមុខទៀត។ តាមរយៈនេះភាគីទាំងពីរ និងបន្តកិច្ចសហប្រតិបត្តិការគ្រប់ជ្រុងជ្រោយនៃប្រទេសទាំងពីរ និងអនុវត្តន៍កិច្ចព្រមព្រៀងដែលមានស្រាប់ ដើម្បីឱ្យស្ថាប័នពាក់ព័ន្ធទាំងអស់អនុវត្តន៍ឱ្យកាន់តែមានប្រសិទ្ធភាព ពិសេសលើកិច្ចព្រមព្រៀង កិច្ចសហប្រតិបត្តិការទាំងឡាយ ដែលថ្នាក់ដឹកនាន់មុនបានបន្សល់ទុក៕

ក្រុមយុវជន អាស៊ានបូកបី-វិថី នៃអ្នកវិទ្យាសាស្រ្តវ័យក្មេងចូលរួមដាំកូនឈើជានិមិត្តរូបនៅតំបន់រមណីយដ្ឋានអង្គរ

ក្រុមយុវជនជាអ្នកវិទ្យាសាស្រ្តវ័យក្មេងមកពី១៣ប្រទេស ដែលចូលរួមក្នុងកិច្ចប្រជុំ អាស៊ានបូកបី-វិថីនៃអ្នកវិទ្យាសាស្រ្តវ័យក្មេង (ASEAN Plus Three Junior Science Odyssey_ATP JSO) លើកទី១០ នៅខេត្ដសៀមរាប បានចូលរួមដាំកូនឈើដើម្បីជានិមិត្តរូបនៅក្នុងរមណីយដ្ឋានអង្គរ។ ពិធីកដាំកូនឈើនេះ ធ្វើឡើងនៅថ្ងៃទី២៥ ខែកក្កដា ឆ្នាំ២០២៤ ដែលមានប្រភេទកូនឈើធ្នង់ ត្រូវបានរៀបចំដាំនៅបរិវេណខាងត្បូងកសិន្ធុអង្គរវត្ត៕

រាជរដ្ឋាភិបាលកម្ពុជា៖ គ្មានការកាត់ទឹកដីបួនខេត្តឱ្យវៀតណាម ដូចការលើកឡើងរបស់ក្រុមជ្រុលនិយមមួយក្តាប់តូចឡើយ

អ្នកនាំពាក្យរបស់រាជរដ្ឋាភិបាលកម្ពុជា បានបញ្ជាក់ថា គ្មានការកាត់ទឹកដីរបស់ខ្លួនឲ្យទៅវៀតណាម ដូចការលើកឡើងរបស់ក្រុមជ្រុលនិយមមួយក្តាប់តូចនោះឡើយ ហើយមួយវិញទៀត ក៏គ្មានដែរ ក្នុងការអនុញ្ញាតឲ្យមានចលនាចេញចូលរបស់ប្រជាពលរដ្ឋដោយសេរី ពោលគឺប្រទេសនីមួយៗ នៅតែគ្រប់គ្រង និងរក្សាឯករាជ្យភាពអធិបតេយ្យភាព និងបូរណភាពទឹកដីខ្លួន ស្របតាមច្បាប់ជាធរមាន ដោយគ្មានការបង្កើត ដែនដីរួមគ្នាណាមួយដូចការញុះញង់របស់ពួកប្រឆាំងជ្រុលនិយមទាំងនោះផងដែរ។ការបញ្ជាក់របស់អ្នកនាំពាក្យរបស់រាជរដ្ឋាភិបាលនេះ គឺបានធ្វើឡើង បន្ទាប់ពីនៅមានមនុស្សមួយចំនួនតូចនៅតែបន្តលើកឡើងដោយបំភាន់បើទោះបីជាសម្តេចតេជោ ហ៊ុន សែន អតីតនាយករដ្ឋមន្រ្តី និង ជាប្រធានព្រឹទ្ធសភាកម្ពុជា បានបញ្ជាក់យ៉ាងច្បាស់អំពីកិច្ចសហប្រតិបត្តិការតំបន់អភិវឌ្ឍន៍ត្រីកោណរវាងកម្ពុជា ឡាវ និងវៀតណាម CLV ជូលដល់បងប្អូនប្រជាពលដ្ឋ កាលពីថ្ងៃទី២៣ ខែកក្កដា ឆ្នាំ២០២៤កន្លងទៅថ្មីៗ យ៉ាងណាក៏ដោយនោះ ប៉ុន្តែពួកជ្រុលនិយមទាំងនោះ នៅតែបំភាន់ការពិតដើម្បីគេងចំណេញនយោបាយរបស់ខ្លួននោះ។តាមសេចក្តីថ្លែងការណ៍របស់អ្នកនាំពាក្យរាជរដ្ឋាភិបាល នាថ្ងៃទី២៥ ខែកក្កដា ឆ្នាំ២០២៤នេះ បានបញ្ជាក់យ៉ាងច្បាស់ជាថ្មីម្តងទៀតថា «គ្មានការកាត់ទឹកដី ៤ខេត្តជូនប្រទេសវៀតណាមដូចការចោទប្រកាន់មូលបង្កាច់ពីក្រុមជ្រុលនិយមមួយចំនួនតូចនោះឡើយ។ គ្មានការយកខេត្តទាំង៤ របស់កម្ពុជា ទៅហ៊ុនជាមួយប្រទេសជិតខាង ដើម្បីរួមបញ្ចូលគ្នាជាដែនដីតែមួយ ដូចការលើកឡើងដោយបំភាន់ ឬដោយ ការភាន់ច្រឡំមួយចំនួននោះឡើយ។ គ្មានការដាក់ហ៊ុនធនធានធម្មជាតិ ដូចជាធនធានរ៉ែ និងធនធានព្រៃឈើជាដើម របស់ខេត្តទាំងបួនដើម្បីវិនិយោគរួមគ្នា ដូចការលើកឡើងនោះឡើយ។ និងគ្មានការអនុញ្ញាត ឲ្យប្រជាពលរដ្ឋនៃប្រទេសនីមួយៗចេញចូលដោយសេរី ក្នុងទឹកដីតំបន់អភិវឌ្ឍន៍ត្រីកោណនោះឡើយ»។តាមរយៈសេចក្តីថ្លែងការណ៍នេះអ្នកនាំពាក្យរបស់រាជរដ្ឋាភិបាលកម្ពុជា ក៏បានបញ្ជាក់បន្ថែមជូន ដល់សាធារណៈជនផងដែរថា កិច្ចសហប្រតិបត្តិការអភិវឌ្ឍត្រីកោណនេះ ធ្វើឡើងតែក្នុងក្របខណ្ឌអាជ្ញាធរប្រទេសទាំងបី ដើម្បីផលប្រយោជន៍សេដ្ឋកិច្ច ហេដ្ឋារចនាសម្ព័ន្ធ សុខាភិបាល អប់រំ សន្តិសុខ និងការ គ្រប់គ្រងគ្រោះមហន្តរាយជាដើម ដូចការបញ្ជាក់យ៉ាងច្បាស់របស់សម្តេចតេជោ ហ៊ុន សែន ប្រធានព្រឹទ្ធសភាយ៉ាងដូច្នេះដែរ។ជាមួយគ្នានោះដែរ អ្នកនាំពាក្យរបស់រាជរដ្ឋាភិបាលកម្ពុជា ក៏បានបញ្ជាក់ផងដែរថា រាជរដ្ឋាភិបាល ដឹកនាំដោយគណបក្សប្រជាជនកម្ពុជា បានលះបង់គ្រប់បែបយ៉ាង ដោយយកជីវិតធ្វើជាដើមទុន ដើម្បីរំដោះប្រទេសចេញពីរបបប្រល័យពូជសាសន៍ បញ្ចប់សង្រ្គាមដែលអូសបន្លាយជិត៣ទសវត្សរ៍ និងស្វែងរក សន្តិភាពពេញលេញជូនប្រទេសជាតិ ដោយបានដឹកនាំអភិវឌ្ឍន៍ប្រទេសឲ្យរីកចម្រើនគ្រប់វិស័យដូចសព្វថ្ងៃ ដោយរក្សាបាននូវឯករាជ្យភាព អធិបតេយ្យភាពជាតិ និងបូរណភាពទឹកដីទាំងស្រុង៕អត្ថបទបាន ចក់

កម្ពុជា គ្រោងបង្កើតមជ្ឈមណ្ឌលពាណិជ្ជកម្មឯកជនកម្ពុជានៅទីក្រុងម៉ាកាវ

ឯកឧត្តម ស៊ាង ថៃ រដ្ឋលេខាធិការក្រសួងពាណិជ្ជកម្ម កាលពីកន្លងទៅថ្មីៗនេះ បានដឹកនាំគណៈប្រតិភូក្រសួងពាណិជ្ជកម្ម ចុះត្រួតពិនិត្យទីតាំងជាក់ស្តែងសម្រាប់បង្កើតមជ្ឈមណ្ឌលពាណិជ្ជកម្មឯកជនកម្ពុជា នៅទីក្រុងម៉ាកាវ នៃសាធារណរដ្ឋប្រជាមានិតចិន ក្នុងគោលបំណងដើម្បីជំរុញការនាំចេញផលិតខ្មែរទៅកាន់ទីផ្សារក្រៅប្រទេស ព្រមទាំងដាក់តាំងបង្ហាញផលិតផល និងផ្សព្វផ្សាយឯកសារទាក់ទងនឹងវិស័យពាណិជ្ជកម្ម សេដ្ឋកិច្ច វិនិយោគ ទេសចរណ៍ និងវប្បធម៌របស់កម្ពុជានៅក្រៅប្រទេស។ ប្រភពក្រសួងពាណិជ្ជកម្មកម្ពុជា នៅថ្ងៃទី២៤ កក្កដា ឆ្នាំ២០២៤កន្លងទៅ បានសសេរលើផេកផ្លូវការថា នៅក្នុងដំណើរទស្សនកិច្ចនាឱកាសនោះ ឯកឧត្តមរដ្ឋលេខាធិការ បានជួបពិភាក្សាការងារជាមួយ លោកស្រីប្រធានមូលនិធិវិនិយោគតំបន់ Hengqin និងក្រុមហ៊ុនឯកជនចំនួន២ផ្សេងទៀត ដាច់ដោយឡែកពីគ្នា។ ក្នុងជំនួបនោះ ឯកឧត្តម បានបង្ហាញពីបរិយាកាសធុរកិច្ច វិស័យសក្ដានុពលដែលគួរវិនិយោគ ភាពអនុគ្រោះដែលកម្ពុជាកំពុងមានក្នុងឋានៈជាប្រទេសអភិវឌ្ឍន៍តិចតួច ព្រមទាំងបានជំរុញឱ្យក្រុមហ៊ុនទាំងនោះជួយផ្សព្វផ្សាយ និងទិញកសិផលពីកម្ពុជា។ ជាការឆ្លើយតប ក្រុមហ៊ុនមួយបានបង្ហាញពីចំណាប់អារម្មណ៍ក្នុងការបង្កើតកន្លែងកែច្នៃគ្រឿងសង្ហារឹមសម្រាប់នាំចេញ ដោយប្រើប្រាស់វត្ថុធាតុដើមនាំចូល និងក្រុមហ៊ុនមួយទៀត បានបញ្ជាក់ថា ក្រុមហ៊ុន នឹងសិក្សាពីលទ្ធភាពក្នុងការទិញផលិតផលមួយចំនួនពីកម្ពុជា៕

ក្រុមយុវជនចុះជួបធ្វើកិច្ចពិភាក្សាជាមួយអាជ្ញាធរមូលដ្ឋានដើម្បីត្រៀមលក្ខណៈចូលរួមអបអរសាទរពិធីបើកការដ្ឋាន «ព្រែកជីកហ្វូណនតេជោ» ដើមខែក្រោយ

នាព្រឹកថ្ងៃទី២៥ ខែសីហា នេះ ក្រុមយុវជនពិសេសសម្តេចតេជោ បានចុះកិច្ចពិភាក្សាជាមួយអាជ្ញាធរមូលដ្ឋានសង្កាត់អូឡាំពិក ក្នុងនោះក៏បានផ្តល់នូវផ្ទាំងផ្សព្វផ្សាយ ការអបអរសាទរ «ព្រែកជីកហ្វូណនតេជោ» ដែលជាមហាព្រឹត្តការន៍ជាប្រវត្តសាស្រ្តក្នុងការបើកការដ្ឋានសាងសង់ នាថ្ងៃទី៥ ខែសីហា ឆ្នាំ២០២៤ នេះ។លោក ពៅ សុជាតិ គណៈកម្មាធិការក្រុមយុវជនក៏បានឲ្យដឹងថា ថ្ងៃនេះក្រុមការងារបានធ្វើកិច្ចពិភាក្សាជាមួយលោក សឹង តូច នាយកសាលា បឋមសិក្សាវត្តមហាមន្រ្តី និងមន្រ្តីរដ្ឋបាលសង្កាត់ ដើម្បីរៀបចំកម្មវិធី ការចែករំលែក ក្តីស្រឡាញ់ និងស្នាមញញឹមលើកទី១៥ ស្របតាមគោលនយោបាយ ក្រសួងអប់រំ យុវជន និងកីឡា ពិសេសអនុត្តន៍នូវយុទ្ធនាការណ៍របស់ក្រសូងបរិស្ថាន ឯកឧត្តមបណ្ឌិត អ៊ាង សុផល្លែត ស្តីពី បរិស្ថានបៃតង នៅកម្ពុជា។ ជាមួយគ្នានេះ លោកនាយក សឹង តូច បានទទួលស្វាគម៍យ៉ាងរ៉ាកទាក់ ក្នុងកម្មវិធី ការចែករំលែក ក្តីស្រឡាញ់ និងស្នាមញញឹមលើកទី១៥ ដែលប្រព្រឹត្តនៅថ្ងៃទី៣ ខែសីហា ឆ្នាំ២០២៤ ខាងមុខនេះ។ ក្នុងឱកាសពិធីចែករំលែកក្ដីស្រឡាញ់នេះដែរ លោកគ្រូអ្នកគ្រូ និងរដ្ឋបាលសង្កាត់អូឡាំពិក និងគណៈអធិបតី និងចេញសារគាំទ្ររួមគ្នា ក្នុងការអបអរសាទរ ពិធីបើកការដ្ឋាន «ព្រែកជីកហ្វូណនតេជោ» ផងដែរ៕

ឧត្តមសេនីយ៍ឯក ណុប នរិន្ទ អគ្គនាយករងអន្តោប្រវេសន៍ ចុះបើកប្រអប់សំបុត្រនៅប៉ុស្ដិ៍ច្រកទ្វារអន្ដរជាតិម៉ឺនជ័យ ត្រពាំងផ្លុង និងត្រពាំងស្រែ

ឯកឧត្ដមឧត្តមសេនីយ៍ឯកបណ្ឌិត ណុប នរិន្ទ អគ្គនាយករង និងជាប្រធានក្រុមការងាររៀបចំត្រួតពិនិត្យ បើកប្រអប់សំបុត្រតំណាងដ៏ខ្ពង់ខ្ពស់ឯកឧត្តម ឧត្តមសេនីយ៍ឯកអគ្គនាយកអន្តោប្រវេសន៍ នៅថ្ងៃទី២៤ ខែកក្កដា ឆ្នាំ២០២៤ ម្សិលមិញនេះ បានដឹកនាំក្រុមការងារបើកប្រអប់សំបុត្រ ចុះបើកប្រអប់សំបុត្រនៅប៉ុស្ដិ៍នគរបាលច្រកទ្វារអន្ដរជាតិម៉ឺនជ័យ ត្រពាំងផ្លុង និង ត្រពាំងស្រែ នៃនាយកដ្ឋានច្រកទ្វារទី២ ។នាឱកាសនោះឯកឧត្ដមឧត្តមសេនីយ៍ឯកបណ្ឌិត ណុប នរិន្ទ ក៏បានពាំនាំនូវប្រសាសន៍ផ្ដាំផ្ញើសួរសុខទុក្ខរបស់ឯកឧត្តមឧត្ដមសេនីយ៍ឯកអគ្គនាយកដល់មន្រ្តីនគរបាលអន្តោប្រវេសន៍ដែលប្រចាំការនៅទីនោះផងដែរ។ជាមួយគ្នានេះដែរឧត្តមសេនីយ៍ឯក ណុប នរិន្ទ បានធ្វើការកោតសរសើរចំពោះការខិតខំប្រឹងប្រែងធ្វើការងារ និងការធ្វើបដិសណ្ឋារកិច្ចចំពោះភ្ញៀវជាតិ-អន្ដរជាតិដោយបញ្ចេញស្នាមញញឹមរាក់ទាក់ស្វាគមន៍របស់មន្ត្រីនគរបាលអន្តោប្រវេសន៍ផងដែរ។ជាចុងបញ្ចប់ឯកឧត្ដមឧត្តមសេនីយ៍ឯកបណ្ឌិត ណុប នរិន្ទ អគ្គនាយករងអន្តោប្រវេសន៍ ក៏បានធ្វើការណែនាំ និងក្រើនរំលឹកដល់មន្ដ្រីរបស់ខ្លួន ឱ្យគោរពវិន័យ ពង្រឹងការសាមគ្គីភាពផ្ទៃក្នុង ឲ្យបានល្អប្រសើរថែមទៀត ការស្លៀកពាក់ឯកសណ្ឋានឱ្យបានត្រឹមត្រូវក្នុងពេលបំពេញការងារ៕

ឯកឧត្តម ឈឹម ឃិនដារ៉េត៖ ការងារឆ្លើយតបមេរោគអេដស៍ និងជំងឺអេដស៍នៅកម្ពុជា ត្រូវធ្វើឡើងជាពហុវិស័យ

ឯកឧត្តមបណ្ឌិត ឈឹម ឃិនដារ៉េត អគ្គលេខាធិការ នៃអាជ្ញាធរជាតិប្រយុទ្ធនឹងជំងឺអេដស៍ និងជាប្រធានក្រុមប្រឹក្សាបច្ចេកទេស បានអៈអាងថា ការងារឆ្លើយតបមេរោគអេដស៍ និងជំងឺអេដស៍នៅកម្ពុជា ធ្វើឡើងជាពហុវិស័យ ដោយរួមបញ្ចូលទាំងផ្នែកសុខាភិបាល និងទាំងផ្នែកមិនមែនសុខាភិបាល ដែលតម្រូវឱ្យយើងបន្តប្រឹងប្រែងរួមគ្នាសម្រេចនូវគោលដៅដែលបានកំណត់ក្នុងគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍ សម្រាប់ឆ្នាំ២០២៣-២០២៨ របស់រាជរដ្ឋាភិបាល ក្រោមមគ្គទេសក៍ដ៏ខ្ពង់ខ្ពស់បំផុត សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា។ការថ្លែងរបស់ឯកឧត្តមបណ្ឌិត ឈឹម ឃិនដារ៉េត យ៉ាងដូច្នេះក្នុងកិច្ចប្រជុំក្រុមប្រឹក្សាបច្ចេកទេសលើកទី៧ ស្តីពី៖ «បច្ចុប្បន្នភាពនៃការអនុវត្តការផ្តល់សេវាប្រិព (PrEP) នៅកម្ពុជា» ដែលមានសមាជិក សមាជិកា ចូលរួមមកពីក្រសួង ស្ថាប័ន រាជធានី ខេត្ត ប្រមាណ ៧០រូប តាមរយៈដោយផ្ទាល់ និងតាមប្រព័ន្ធ Zoom។ ឯកឧត្តមបណ្ឌិតអគ្គលេខាធិការ បានបន្តថា ការងារបង្ការ គឺជាយុទ្ធសាស្ត្រចម្បងក្នុងការងារសុខភាពសាធារណៈ ហើយក៏ជាមូលដ្ឋានគ្រឹះក្នុងការឆ្ពោះទៅសម្រេចនូវគោលដៅការគ្របដណ្តប់សុខភាពសកល។ ឯកឧត្តមបណ្ឌិត បានជំរុញលើកទឹកចិត្តឱ្យសមាជិកក្រុមប្រឹក្សាបច្ចេកទេសដែលអនុវត្តផ្ទាល់លើការងារអេដស៍ លើកពីបទពិសោធន៍រួមជាមួយនឹងឧបសគ្គនានា ក្នុងការអនុវត្តការងារប្រយុទ្ធនឹងមេរោគអេដស៍ និងជំងឺអេដស៍ ដើម្បីរកវិធីសាស្ត្រឆ្លើយតបឱ្យបានទាន់ពេល និងមានប្រសិទ្ធភាពខ្ពស់។ ឯកឧត្តមបណ្ឌិត ឈឹម ឃិនដារ៉េត បានសង្កត់ធ្ងន់ថា កិច្ចសហការរវាងអាជ្ញាធរជាតិប្រយុទ្ធនឹងជំងឺអេដស៍ និងមជ្ឈមណ្ឌលជាតិប្រយុទ្ធនឹងជំងឺអេដស៍ សើស្បែក និងកាមរោគ នៃក្រសួងសុខាភិបាល រួមនិងអង្គការយូអិនអេដស៍ (UNAIDS) បានសង្កេតឃើញថាក្នុងទិន្នន័យនៃអ្នកឆ្លងមេរោគអេដស៍ ថ្មី មានការថយចុះ។ កម្ពុជា បានកាត់បន្ថយការចម្លងថ្មីនៃមេរោគអេដស៍ ពី១៤០០នាក់ ក្នុងឆ្នាំ២០២២។ ពី១៣០០នាក់ ក្នុងឆ្នាំ២០២៣ និងពី១២០០នាក់ ក្នុងឆ្នាំ២០២៤ ចំណែកចំនួនអ្នកស្លាប់ ១១០០នាក់(ឋិតនៅក្នុងចំនួនដដែល) ជាពិសេសដោយមានការយកចិត្តទុកដាក់ និងទប់ស្កាត់ ចំពោះការឆ្លងមេរោគអេដស៍ ពីម្តាយ ទៅទារក មានការថយចុះ។ បើទោះបីជាយើងទទួលបានភាពជោគជ័យ ប៉ុន្តែយើងក៏នៅមានកត្តាប្រឈមមួយចំនួន ជាពិសេសក្រុមប្រជាជនគន្លឹះ នៅតែជាបញ្ហាដដែល ពុំទាន់មានការប្រែប្រួល។ សូមបញ្ជាក់ផងដែរថា របៀបវារៈនៃកិច្ចប្រជុំ គឺពិនិត្យ និងពិភាក្សាលើការអនុវត្តការបង្ការនៃឆ្លងមេរោគអេដស៍តាមវិធីសាស្ត្រលេបថ្នាំបង្ការមុន នៅពេលប្រព្រឹត្តប្រឈមនឹងការឆ្លងមេរោគអេដស៍ (PrEP)។ ប្រទេសកម្ពុជា បានចាប់ផ្តើមអនុវត្តសេវាផ្តល់ឱសថ PrEP ដោយឥតគិតប្រាក់ នៅឆ្នាំ២០១៩ តាមរយៈឯកសារគោលគំនិតស្តីអំពីការអនុវត្តវិធីលេបថ្នាំបង្ការជាមុននៅពេលប្រព្រឹត្តប្រឈមនឹងការឆ្លងមេរោគអេដស៍ (PrEP) នៅព្រះរាជាណាចក្រកម្ពុជា រៀបចំដោយក្រសួងសុខាភិបាល នៅខែមីនា ឆ្នាំ២០១៩។ ការប្រើប្រាស់ឱសថ PrEP ត្រូវបានផ្តល់អនុសាសន៍ដោយអង្គការសុខភាពពិភពលោក (WHO) គឺជាផ្នែកមួយនៃវិធីសាស្រ្តបង្ការមេរោគអេដស៍ដែលមានលក្ខណៈគ្រប់ជ្រុងជ្រោយ វិធីសាស្ត្រនេះ មានសុវត្ថិភាពខ្ពស់ និងមានអត្រាភាពស៊ាំនឹងឱសថប្រឆាំងមេរោគអេដស៍កម្រិតទាប។ ប្រទេសលោកខាងលិចជាច្រើនរួមមាន៖ សហរដ្ឋអាមេរិក អង់គ្លេស បារាំង បែលហ្ស៊ិក និង ហូឡង់ បានយល់ស្របតាមអនុសាសន៍អង្គការ WHO និងបានដាក់បញ្ចូលការបង់ថ្លៃសេវា PrEP ទៅក្នុងសេវាធានារ៉ាប់រងសុខភាព ឬការបង់ថ្លៃដោយខ្លួនឯង៕អត្ថបទ រដ្ឋា

បណ្ដាញសង្គម

ព័ត៌មានថ្មីៗ

អ៊ីស្រាអែលបង្កើនការវាយប្រហារលើតំបន់ភាគខាងត្បូងលីបង់ បណ្តាលឲ្យមនុស្សយ៉ាងហោច ១៦នាក់ស្លាប់

រុស្ស៊ីចុះហត្ថលេខាលើកិច្ចព្រមព្រៀងតម្លៃ ១៦,៥ពាន់លានដុល្លារ ដើម្បីសាងសង់រោងចក្រថាមពលនុយក្លេអ៊ែរដំបូងនៅកាហ្សាក់ស្ថាន

រុស្ស៊ី៖ អឺរ៉ុបគួរបង្ហាញភ័ស្តុតាងពីអំណះអំណាងថាទីក្រុងមូស្គូរំខានសញ្ញា GPS

មន្ត្រីរុស្ស៊ី៖ គំនិតផ្តួចផ្តើមសន្តិភាពអ៊ុយក្រែន ជាមួយសហរដ្ឋអាមេរិក កំពុង «ជាប់គាំង»

ក្រុមហ៊ុន Temu របស់ចិនរងការផាកពិន័យ ២៣២លានដុល្លារ សម្រាប់ការបំពានច្បាប់លក់របស់ EU

ទីភ្នាក់ងារអាកាសធាតុអេស្ប៉ាញ ព្យាករសីតុណ្ហភាពខ្ពស់ខ្លាំងអំឡុងរដូវក្តៅ និងហានិភ័យភ្លើងឆេះព្រៃ

កូរ៉េខាងត្បូងធ្វើសមយុទ្ធបាញ់គ្រាប់ពិត ដើម្បីបញ្ជាក់ការជំរុញការការពារពឹងផ្អែកលើខ្លួនឯង

លោក Zelenskiy ៖ អ៊ុយក្រែនរៀបចំជំហានដឹរឹងមាំសម្រាប់យន្តហោះចម្បាំង Gripen

នាយករដ្ឋមន្រ្តីជប៉ុនលោកស្រី Takaichi ជួបពិភាក្សាការងារជាមួយប្រធានាធិបតីហ្វីលីពីននៅទីក្រុងតូក្យូ

កម្មករធ្វើផ្លូវនៅភាគនិរតីប្រទេសបារាំង ពិបាកស៊ូទ្រាំនឹងអាកាសធាតុក្តៅខ្លាំងអំឡុងខែឧសភា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877

ព័ត៌មានជាតិ

ផ្លូវដែកថ្មី រវាងភ្នំពេញ-ប៉ោយប៉ែត គ្រោងនឹងដាក់ឲ្យដំណើរការឆាប់ៗខាងមុខនេះ

រដ្ឋមន្រ្តីក្រសួងបរិស្ថាន ចូលរួមដាំកូនឈើ១៥០០០ដើម នៅដែនជម្រកសត្វព្រៃសង្ឃរុក្ខាវន្ត

ប្រធានរដ្ឋវៀតណាមសន្យាបន្តកសាងនូវមិត្តភាពជាបងប្អូន ជាមិត្តជិតខាងល្អរវាងកម្ពុជា-វៀតណាម

កម្ពុជា គ្រោងបង្កើតមជ្ឈមណ្ឌលពាណិជ្ជកម្មឯកជនកម្ពុជានៅទីក្រុងម៉ាកាវ

ឯកឧត្តម ឈឹម ឃិនដារ៉េត៖ ការងារឆ្លើយតបមេរោគអេដស៍ និងជំងឺអេដស៍នៅកម្ពុជា ត្រូវធ្វើឡើងជាពហុវិស័យ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ព័ត៌មានជាតិ

ផ្លូវដែកថ្មី រវាងភ្នំពេញ-ប៉ោយប៉ែត គ្រោងនឹងដាក់ឲ្យដំណើរការឆាប់ៗខាងមុខនេះ

រដ្ឋមន្រ្តីក្រសួងបរិស្ថាន ចូលរួមដាំកូនឈើ១៥០០០ដើម នៅដែនជម្រកសត្វព្រៃសង្ឃរុក្ខាវន្ត

ប្រធានរដ្ឋវៀតណាមសន្យាបន្តកសាងនូវមិត្តភាពជាបងប្អូន ជាមិត្តជិតខាងល្អរវាងកម្ពុជា-វៀតណាម

កម្ពុជា គ្រោងបង្កើតមជ្ឈមណ្ឌលពាណិជ្ជកម្មឯកជនកម្ពុជានៅទីក្រុងម៉ាកាវ

ឯកឧត្តម ឈឹម ឃិនដារ៉េត៖ ការងារឆ្លើយតបមេរោគអេដស៍ និងជំងឺអេដស៍នៅកម្ពុជា ត្រូវធ្វើ​ឡើង​​ជាពហុវិស័យ

បណ្ដាញសង្គម

ព័ត៌មានថ្មីៗ

អាស័យដ្ឋាន

ផែនទី

ទាញយកកម្មវិធី

ឯកឧត្តម ឈឹម ឃិនដារ៉េត៖ ការងារឆ្លើយតបមេរោគអេដស៍ និងជំងឺអេដស៍នៅកម្ពុជា ត្រូវធ្វើឡើងជាពហុវិស័យ