BTV NEWS

អ្នកនាំពាក្យ៖ កម្មវិធីនយោបាយ និងការអភិវឌ្ឍរបស់កម្ពុជា បាននិងកំពុងដំណើរការទៅមុខជានិច្ច បើទោះបីកម្ពុជារងការឈ្លានពានពីថៃ

ប្រតិភូសភាប្រើភាសាបារាំង ១៧ប្រទេសធ្វើសិក្ខាសាលា អំពីក្របខ័ណ្ឌ និងការប្រើប្រាស់ឌីជីថលក្នុងសភា

គណបក្សប្រជាជនកម្ពុជា បានទទួលសមាជិកថ្មីជិត១ ០០០នាក់ នៅសង្កាត់រការធំ ខេត្តកំពង់ស្ពឺ

ក្រសួងទេសចរណ៍បើកយុទ្ធនាការ ទស្សនាកម្ពុជានៅរដូវកាលបៃតងឆ្នាំ ២០២៦

ព័ត៌មានជាតិ

គយ បន្តពង្រឹងការបង្ក្រាបទំនិញខូចគុណភាព និងខុសច្បាប់ ពិសេសមុខទំនិញសាច់បង្កក

អគ្គនាយកដ្ឋានគយ និងរដ្ឋាករកម្ពុជា អះអាងថា មន្រ្តីមានសមត្ថកិច្ចនឹងបន្តកិច្ចខិតខំប្រឹងប្រែង ទប់ស្កាត់ និងបង្រ្កាបទំនិញខូចគុណភាព និងទំនិញគេចពន្ធឱ្យកាន់តែសកម្មឡើងថែមទៀត ជាពិសេសលើមុខទំនិញសាច់បង្កកគ្រប់ប្រភេទ ចូលមកកម្ពុជា។ឯកឧត្ដមបណ្ឌិត គុណ ញឹម រដ្ឋមន្ត្រីប្រតិភូអមនាយករដ្ឋមន្ត្រី អគ្គនាយកនៃអគ្គនាយកដ្ឋានគយ និងរដ្ឋាករកម្ពុជា បានបញ្ជាក់ថា ការទប់ស្កាតអំពើរត់ពន្ធផលិតផលពីសត្វ គឺជាកិច្ចការអាទិភាពរបស់អគ្គនាយកដ្ឋានគយ និងរដ្ឋាករកម្ពុជា។ នេះគឺជាវិធានការមួយ ត្រូវបានដាក់ចេញក្នុងវេទិការាជរដ្ឋាភិបាល-វិស័យឯកជនលើកទី១៩ ដែលជាកាតព្វកិច្ចបន្ថែមក្នុងការពង្រឹងការគ្រប់គ្រងនៃការនាំចូល ឬពង្រឹងការគេចបង់ពន្ធលើមុខទំនិញពីសាច់សត្វនេះ។ ជាក់ស្តែង ក្នុងឆ្នាំ ២០២៥កន្លងទៅ អគ្គនាយកដ្ឋានគយនិងរដ្ឋាករកម្ពុជា បានបង្រាប និងដុតកម្ទេចចោលសាច់បង្កក និងទំនិញបង្កកដែលគ្មានគុណភាពចំនួនជិត ២០តោន។ ឯកឧត្ដមបណ្ឌិត គុណ ញឹម ថ្លែងដូចនេះ ត្រូវបានធ្វើងនៅក្នុងសន្និសីទសារព័ត៌មាន កាលពីថ្ងៃទី១២ ខែកុម្ភៈ ឆ្នាំ២០២៦។លោក ស្រ៊ុន ពៅ ប្រធានសមាគមអ្នកចិញ្ចឹមសត្វកម្ពុជា សង្កេតឃើញថា ក្នុងឆ្នាំ២០២៥កន្លងទៅ អគ្គនាយកដ្ឋានគយ និងរដ្ឋាករកម្ពុជា បានយកចិត្តទុកដាក់ក្នុងការទប់ស្កាតទំនិញខូចគុណភាព និងទំនិញគេចពន្ធបានល្អប្រសើរគួរឱ្យកត់សម្គាល់ បើទោះជា មានជនខិលខូចមួយចំនួនតូច បានលួចនាំចូលសាច់បង្កកតាមច្រករបៀងខ្លះក៏ដោយ។លោកថាសម្រាប់ឆ្នាំ ២០២៦នេះ វិស័យឯកជននៅតែបន្តជឿជាក់លើការទប់ស្កាតលើទំនិញនាំចូលដែលគ្មានគុណភាព ព្រោះ ការររឹតបន្តឹងរបស់រាជរដ្ឋាភិបាលនាំឱ្យអ្នកនំាចូលគោរពច្បាប់តាមរយៈការបង់ពន្ធត្រឹមត្រូវជូនរដ្ឋ។ ទន្ទឹមនឹងនេះ លោក ស្រ៊ុន ពៅ បន្តអំពាវនាវដល់អ្នកចិញ្ចឹមសត្វទាំងអស់ត្រូវពង្រឹងគុណភាពបន្ថែមទៀត ហើយសូមឱ្យអាជ្ញាធរមានសមត្ថកិច្ច បន្តទប់ស្កាត់ការនាំចូលទំនិញខុសច្បាប់ឱ្យខ្លាំងក្លាឡើងថែមទៀត។សូមបញ្ជាក់ថា ដើម្បីបង្កើនប្រសិទ្ធភាពប្រមូលចំណូលសម្រាប់ផែនការសកម្មភាពប្រចាំឆ្នាំ២០២៦ របស់អគ្គនាយកដ្ឋានគយនិងរដ្ឋាករកម្ពុជា ក្រសួងសេដ្ឋកិច្ច និងហិរញ្ញវត្ថុ បានផ្ដល់ការណែនាំឱ្យបន្តការយកចិត្តទុកដាក់ប្រយុទ្ធប្រឆាំងនឹងអំពើរត់គេចពន្ធ និងការនាំចូល ទំនិញហាមឃាត់នានា ព្រមទាំងការពង្រឹងអនុលោមភាពពាក់ព័ន្ធវិធានដើមកំណើតចំពោះផលិតផលនាំចេញ៕ អត្ថបទ ៖ ធូ វិរៈ

មន្ទីរទេសចរណ៍អំពាវនាវភ្ញៀវមកលេងកម្សាន្តនៅខេត្តបាត់ដំបង ក្នុងឱកាសបុណ្យចូលឆ្នាំចិន

មន្ទីរទេសចរណ៍ខេត្តបាត់ដំបង អំពាវនាវដល់បងប្អូនប្រជាពលរដ្ឋ ភ្ញៀវទេសចរជាតិ និងអន្តរជាតិ សូមអញ្ជើញមកទស្សនាកម្សាន្តសប្បាយនៅខេត្តបាត់ដំបងឱ្យបានច្រើនកុះករក្នុងឱកាសពិធីបុណ្យចូលឆ្នាំចិន ខណៈតំបន់រមណីយដ្ឋាន និងគោលដៅទេសចរណ៍នៅទូទាំងខេត្តបានត្រៀមលក្ខណៈរួចជាស្រេចក្នុងការទទួលស្វាគមន៍ភ្ញៀវមកពីគ្រប់ទិសទី។លោក ហម អរុណ អនុប្រធានមន្ទីរទេសចរណ៍ខេត្តបាត់ដំបង គូសបញ្ជាក់ថា ខេត្តបាត់ដំបង គឺជាទឹកដីដ៏ស្រស់ប្រិមប្រិយមានសក្ដានុពលទេសចរណ៍ទាំងធម្មជាតិ វប្បធម៌ សិល្បៈ ប្រពៃណី ហើយអ្វីដែលកាន់តែចាប់អារម្មណ៍នោះ គឺនៅតាមគោលដៅទេសចរណ៍ជាប់ប្រភពទឹកគឺល្អមែនទែនសម្រាប់ការងូតទឹកលេងកម្សាន្តនារដូវកាលនេះ។សូមរំលឹកថា មន្ទីរទេសចរណ៍ខេត្តបាត់ដំបងបានសហការជាមួយកម្លាំងនគរបាលទេសចរណ៍នៃស្នងការដ្ឋាននគរបាលខេត្ត ចុះណែនាំការពង្រឹងគុណភាពសេវាកម្មទេសចរណ៍ដើម្បីត្រៀមលក្ខណៈទទួលស្វាគមន៍ភ្ញៀវទេសចរក្នុងឱកាសបុណ្យចូលឆ្នាំចិន។មន្ទីរទេសចរណ៍ខេត្តបាត់ដំបង ក៏បានណែនាំដល់ម្ចាស់អាជីវកម្មទាំងអស់ត្រូវចូលរួមថែរក្សាអនាម័យបរិស្ថាន និងរៀបចំសណ្ដាប់ធ្នាប់ឱ្យបានរៀបរយដើម្បីធានាថាភ្ញៀវដែលបានមកលេងកម្សាន្តមានអារម្មណ៍ស្រស់ស្រាយសប្បាយរីករាយ។សូមជម្រាបថា ខេត្តបាត់ដំបង គឺជាទឹកដីដ៏ស្រស់ប្រិមប្រិយមានទាំងរមណីយដ្ឋានបែបប្រវត្តិសាស្រ្ត វប្បធម៌ ប្រពៃណី សិល្បៈ ម្ហូបអាហារ និងមានគោលដៅទេសចរណ៍សរុបចំនួន១១៥កន្លែងក្នុងនោះរួមមាន៖ រមណីយដ្ឋានទេសចរណ៍ចំនួន២២កន្លែង សហគមន៍ទេសចរណ៍ និងអេកូទេសចរណ៍ចំនួន៤កន្លែង តំបន់គោលដៅទេសចរណ៍ចំនួន៥៤កន្លែង សារមន្ទីរចំនួន២កន្លែង ទេសចរណ៍បែបសាសនាចំនួន២៩កន្លែង និងគោលដៅកសិទេសចរណ៍ចំនួន៤កន្លែង៕

កម្ពុជាលើកទឹកចិត្តពន្ធដារដល់សហគ្រាសក្នុងវិស័យទេសចរណ៍ខេត្តសៀមរាប ដល់បំណាច់ឆ្នាំ២០២៦

រាជរដ្ឋាភិបាលលើកទឹកចិត្តពន្ធដារ ចំពោះសហគ្រាសក្នុងវិស័យទេសចរណ៍រួមមាន សណ្ឋាគារ ផ្ទះសំណាក់ ភោជនីយដ្ឋាន និង ក្រុមហ៊ុនភ្នាក់ងារទេសចរណ៍ នៅខេត្តសៀមរាប គិតចាប់ពីខែមករា ឆ្នាំ២០២៦ រហូតដល់ដំណាច់ខែធ្នូ ឆ្នាំ២០២៦។ក្រសួងសេដ្ឋកិច្ច និងហិរញ្ញវត្ថុ ចេញសេចក្តីប្រកាស ស្តីពីការលើកទឹកចិត្តពន្ធដារ ចំពោះសហគ្រាសក្នុងវិស័យទេសចរណ៍នៅ ខេត្តសៀមរាប ដែលគោលបំណងផ្តល់ការលើកទឹកចិត្តពន្ធដារ ដល់សហគ្រាសក្នុងវិស័យទេសចរណ៍រួមមាន សណ្ឋាគារ ផ្ទះសំណាក់ ភោជនីយដ្ឋាន និងក្រុមហ៊ុន ភ្នាក់ងារទេសចរណ៍ ដែលស្ថិតនៅខេត្តសៀមរាប ត្រូវទទួលបានការលើកទឹកចិត្តពន្ធដារដូចជា៖ ១. លើក លែងការបង់ពន្ធអាករប្រចាំខែគ្រប់ប្រភេទ វៀរលែងតែអាករលើតម្លៃបន្ថែម និងអាករលើការស្នាក់នៅ គិតចាប់ពីខែមករា ឆ្នាំ២០២៦ រហូតដល់ដំណាច់ខែធ្នូ ឆ្នាំ២០២៦, ២- លើកលែងពន្ធលើប្រាក់ចំណូលប្រចាំឆ្នាំ២០២៦, ចំពោះប្រាក់រំដោះពន្ធលើប្រាក់ចំណូលដែល សហគ្រាសបានបង់រួចឆ្នាំ២០២៧ នឹងត្រូវបានអនុញ្ញាតជាឥណទានពន្ធសម្រាប់កាត់កងជាមួយពន្ធលើប្រាក់ចំណូលប្រចាំ, និង ៣- មិនទទួលរងការធ្វើសវនកម្មពន្ធដារ សម្រាប់ការិយបរិច្ឆេទឆ្នាំ២០២៦។ក្នុងអំឡុងពេលនៃការលើកទឹកចិត្តពន្ធដារដូចមានចែងក្នុងប្រការនេះ សហគ្រាសនៅតែមានកាតព្វកិច្ចដូចខាងក្រោម៖ ១- អ្នក ជាប់ពន្ធមធ្យម និងអ្នកជាប់ពន្ធធំ ត្រូវដាក់លិខិតប្រកាសពន្ធអាករដោយប្រើប្រាស់ប្រព័ន្ធគ្រប់គ្រងការប្រកាសពន្ធអាជីវកម្មអនឡាញ (e-Fiing) ជារៀងរាល់ខែ និងត្រូវដាក់លិខិតប្រកាសពន្ធលើប្រាក់ចំណូលប្រចាំឆ្នាំ ដោយប្រើប្រាស់ប្រព័ន្ធគ្រប់គ្រងការដាក់លិខិត ប្រកាសពន្ធលើប្រាក់ចំណូលប្រចាំឆ្នាំ តាមអនឡាញ (Tol e-Firg) ស្របតាមច្បាប់ និងលិខិតបទដ្ឋានគតិយុត្តស្តីពីពន្ធដារ។ ដោយ ឡែកអ្នកជាប់ពន្ធតូចត្រូវដាក់លិខិតប្រកាសពន្ធទៅតាមទម្រង់ ពេលវេលា និងទីកន្លែងដែលកំណត់ដោយរដ្ឋបាលសារពើពន្ធ ឬអាច ដាក់លិខិតប្រកាសពន្ធតាមរយៈកម្មវិធីប្រកាសពន្ធអាជីវកម្ម សម្រាប់អ្នកជាប់ពន្ធតូច (GOT Tax Preiling App)។ ២- អ្នកជាប់ពន្ធត្រូវ កាន់កត់ត្រា និងថែរក្សាឯកសារបញ្ជីកាគណនេយ្យនិងព័ត៌មានដែលទាក់ទិននឹងសកម្មភាពអាជីវកម្ម ស្របតាមច្បាប់និងលិខិតបទដ្ឋាន គតិយុត្តស្តីពីពន្ធដារ។សូមបញ្ជាក់ថា ជុំវិញការលើកទឹកចិត្តពន្ធដារនេះ កាលពីឆ្នាំ២០២៤កន្លងមក រាជរដ្ឋាភិបាលក៏បានផ្តល់ការលើកទឹកចិត្តពន្ធដារ ដល់ សហគ្រាសក្នុងវិស័យទេសចរណ៍នៅខេត្តសៀមរាប ស្របតាមវិធានការអន្តរាគមន៍របស់រាជរដ្ឋាភិបាល ដើម្បីជួយស្ដារវិស័យទេសចរណ៍ ឱ្យបានល្អប្រសើរឡើងវិញរួមមាន៖ លើកលែងការបង់ពន្ធអាករប្រចាំខែគ្រប់ប្រភេទ វៀរលែងតែអាករ ចាប់ពីខែកក្កដា ឆ្នាំ២០២៤ ដល់ ដំណាច់ខែមិថុនា ឆ្នាំ២០២៥, លើកលែងពន្ធលើប្រាក់ចំណូលប្រចាំឆ្នាំ២០២៤ ជាដើម។ចំណែកក្នុងឆ្នាំ២០២៦នេះ, វិស័យសេវាកម្ម ត្រូវបានរាជរដ្ឋាភិបាលព្យាករថា នឹងមានកំណើនទាបក្នុងរង្វង់ ៣,៧% ក្នុងនោះអនុវិស័យ បដិសណ្ឋារកិច្ច និងសេវាកម្មម្ហូបអាហារ, ត្រូវបានព្យាករថានឹងងើបឡើងវិញសន្សឹមៗ ផ្អែកលើការរំពឹងទុកការ ងើបឡើងវិញនៃភ្ញៀវ ទេសចរណ៍អន្តរជាតិ បន្ទាប់ពីទទួលរងផលប៉ះពាល់គួរឱ្យកត់សម្គាល់ក្នុងឆ្នាំ២០២៥ ដោយសារការបិទខ្ទប់ព្រំដែនគោកកម្ពុជា-ថៃ។ បើ ទោះបីស្ថានភាពនៃវិស័យទេសចរណ៍ ជាពិសេសទេសចរណ៍ដែលពឹងផ្អែកលើទីផ្សារ និងកញ្ចប់ទេសចរណ៍ថៃ ត្រូវបានរំពឹងថា នឹងមិន អាចវិលត្រលប់ទៅរកប្រក្រតីភាពដូចស្ថានភាពមុនមានការបិទខ្ទប់ព្រំដែនគោកក៏ពិតមែន ក៏និន្នាការទេសចរណ៍ទីផ្សារផ្សេងទៀត ជាពិសេសទេសចរធ្វើដំណើរផ្លូវឆ្ងាយ ត្រូវបានរំពឹងថា នឹងមាននិន្នាការកើនឡើង៕ អត្ថបទ៖ សុន រ៉ាឌី

អ្នកនាំពាក្យ៖ ការតវ៉ារបស់កម្ពុជាចំពោះសកម្មភាពរំលោភបំពានពីសំណាក់ភាគីថៃជាភស្តុតាងផ្នែកគតិយុត្តមិនអាចខ្វះបាន

ការតវ៉ារបស់រាជរដ្ឋាភិបាលកម្ពុជាដែលបានធ្វើឡើងជាបន្តបន្ទាប់ ប្រឆាំងនឹងសកម្មភាពរំលោភបំពានច្បាប់អន្តរជាតិ និងរំលោភសិទ្ធិប្រជាពលរដ្ឋខ្មែរពីសំណាក់ភាគីថៃ គឺជាភស្តុតាងដែលមានតម្លៃផ្នែកគតិយុត្តមិនអាចខ្វះបានក្នុងការការពារអធិបតេយ្យភាព និងបូរណភាពទឹកដីរបស់របស់កម្ពុជា។ នេះបើតាមការបញ្ជាក់របស់អ្នកនាំពាក្យរាជរដ្ឋាភិបាលកម្ពុជា។ ឯកឧត្តម ប៉ែន បូណា អ្នកនាំពាក្យរាជរដ្ឋាភិបាលកម្ពុជា ថ្លែងបញ្ជាក់តាមរយៈសន្និសីទសារព័ត៌មាននៅថ្ងៃទី១៦ ខែកុម្ភៈ ឆ្នាំ២០២៦នេះថា ការចូលកាន់កាប់ទឹកដីនៃប្រទេសអធិបតេយ្យមួយដោយប្រើកម្លាំងយោធា គឺផ្ទុយទាំងស្រុងទៅនឹងធម្មនុញ្ញអាស៊ាន ធម្មនុញ្ញអង្គការសហប្រជាជាតិ និងច្បាប់អន្តរជាតិ។ ចំណែកឯការបំផ្លិចបំផ្លាញផ្ទះសម្បែង ការលួចទ្រព្យសម្បត្តិជនស៊ីវិល និងការរារាំងមិនឱ្យវិលត្រឡប់ទៅលំនៅឋានរបស់ខ្លួនវិញ គឺជាការរំលោភយ៉ាងធ្ងន់ធ្ងរលើបទប្បញ្ញត្តិនានានៃសេចក្តីប្រកាសជាសកលស្តីពីសិទ្ធិមនុស្ស, កតិកាសញ្ញាអន្តរជាតិស្តីពីសិទ្ធិសេដ្ឋកិច្ច សង្គមកិច្ច និងវប្បធម៌ (ICESCR) កតិកាសញ្ញាអន្តរជាតិស្តីពីសិទ្ធិពលរដ្ឋ និងសិទ្ធិនយោបាយ(ICCPR) អនុសញ្ញាស្តីពីសិទ្ធិកុមារ (CRC)1) អនុសញ្ញាស្តីពីសិទ្ធិជនមានពិការភាព(CRPD) អនុសញ្ញាស្តីពីការលុបបំបាត់រាល់ទម្រង់នៃការរើសអើងប្រឆាំងនឹងនារីភេទ (CEDAW) និងអនុសញ្ញាទីក្រុងហ្សឺណែវ ឆ្នាំ១៩៤៩ និងអនុសញ្ញាទីក្រុងឡាអេ ឆ្នាំ១៩០៧ ជាដើម។ ឯកឧត្តមបានបន្តថា ច្បាប់អន្តរជាតិទាំងអស់នេះ បានហាមប្រាមការចូលកាន់កាប់ទឹកដីនៃប្រទេសអធិបតេយ្យមួយដោយប្រើកម្លាំង និងការពារសិទ្ធិប្រជាពលរដ្ឋគ្រប់រូបដែលត្រូវមានលំនៅឋានសមរម្យ និងចៀសផុតពីការជ្រៀតជ្រែកលើលំនៅឋាន និងការរឹបអូសឬលួចប្លន់យកទ្រព្យសម្បត្តិឯកជនពីបុគ្គល ឬក្រុមណាមួយ។ ប៉ុន្តែ ភាគីថៃបានរំលោភបំពានច្បាប់អន្តរជាតិទាំងនេះ ហើយបាន និងកំពុងបង្កការលំបាកធ្ងន់ធ្ងរចំពោះជនភៀសសឹកកម្ពុជា ជាពិសេសស្ត្រី កុមារ ជនចាស់ជរា អ្នកជំងឺ និងជនមានពិការភាព ដែលជាក្រុមជនងាយរងគ្រោះស្រាប់។ ពួកគេជួបការលំបាកកាន់តែខ្លាំង ដូចជា ភាពក្រីក្រ ការបាត់បង់ការសិក្សា បញ្ហាសុខភាពទាំងផ្លូវកាយ និងផ្លូវចិត្ត ព្រមទាំងបាត់បង់ឱកាសទទួលបានសេវាចាំបាច់ផ្សេងៗទៀត។ឯកឧត្តម ប៉ែន បូណា បានថ្លែងបញ្ជាក់ថា ចំពោះមុខការរំលោភបំពាននេះ រាជរដ្ឋាភិបាលកម្ពុជា តាមរយៈក្រសួងការបរទេសនិងសហប្រតិបត្តិការអន្តរជាតិ បានធ្វើកំណត់ទូតតវ៉ាជាបន្តបន្ទាប់ដោយបានសម្តែងនូវការប្រឆាំងជំទាស់យ៉ាងខ្លាំងចំពោះសកម្មភាពរបស់កងកម្លាំងប្រដាប់អាវុធថៃ ដែលធ្វើឱ្យមានការកែប្រែនូវបរិយាកាសសន្តិសុខនៅក្នុងឬជុំវិញតំបន់ជនស៊ីវិល ពង្រឹងការគ្រប់គ្រងយោធា ឬបង្កើតស្ថានភាពថ្មីនៅលើទីតាំងជាក់ស្តែង និងរារាំងដល់ការវិលត្រឡប់របស់ជនស៊ីវិលទៅកាន់ផ្ទះសម្បែងនិងកាន់កាប់ទ្រព្យសម្បត្តិរបស់ពួកគេដោយសុវត្ថិភាពនិងសេចក្តីថ្លៃថ្នូរ។ រាជរដ្ឋាភិបាល តាមរយៈគណៈកម្មាធិការសិទ្ធិមនុស្សកម្ពុជា ក៏បានផ្ញើលិខិតទៅប្តឹងតវ៉ាយ៉ាងខ្លាំងជូនទៅដល់ស្ថាប័នសិទ្ធិមនុស្សនានាទាំងថ្នាក់តំបន់ និងអន្តរជាតិ ដោយបានស្នើសុំឱ្យចាត់វិធានការប្រឆាំងការរំលោភបំពានសិទ្ធិពលរដ្ឋខ្មែរដ៏ធ្ងន់ធ្ងរនេះជាបន្ទាន់ និងទៅតាមសមត្ថកិច្ចរៀងៗខ្លួន។ ឯកឧត្តមបានរម្លឹកថា សម្តេចធិបតី ហ៊ុន ម៉ាណែត នាយករដ្ឋមន្ត្រី កាលពីថ្ងៃទី១០ ខែកុម្ភៈ ឆ្នាំ២០២៦ បានមានប្រសាសន៍បញ្ជាក់ថា «ការការពារទឹកដី និងប្រជាជន គឺជាអាទិភាពខ្ពស់បំផុតរបស់រាជរដ្ឋាភិបាល ហើយរាល់ការសម្រេចចិត្តទាំងអស់របស់រាជរដ្ឋាភិបាល គឺដើម្បីឧត្តមប្រយោជន៍ជាតិ និងប្រជាជន»។ សម្តេចនាយករដ្ឋមន្ត្រីបញ្ជាក់ថា «រាជរដ្ឋាភិបាលដាច់ខាតមិនបោះបង់កាតព្វកិច្ចក្នុងការទាមទារទឹកដីឡើយ ហើយបាននិងកំពុងខិតខំដោះស្រាយបញ្ហាដោយសន្តិវិធីដោយឈរលើមូលដ្ឋានច្បាប់អន្តរជាតិដើម្បីធានានូវដំណោះស្រាយប្រកបដោយប្រសិទ្ធភាព និងរយៈពេលយូរសម្រាប់ប្រទេសជាតិ និងប្រជាពលរដ្ឋ»។ ចំណែកសម្តេចតេជោ ហ៊ុន សែន ប្រធានព្រឹទ្ធសភា និងជាប្រធានគណបក្សប្រជាជនកម្ពុជាដែលជាបក្សកាន់អំណាចក៏បានបញ្ជាក់ច្បាស់ថា កម្ពុជានឹងមិនធ្វើសម្បទានណាមួយចំពោះអធិបតេយ្យ និងសេចក្តីថ្លៃថ្នូររបស់ខ្លួនឡើយ។ អ្នកនាំពាក្យរាជរដ្ឋាភិបាលបញ្ជាក់ជូនជនរួមជាតិថា៖«ការតវ៉ារបស់រាជរដ្ឋាភិបាលកម្ពុជាដែលបានធ្វើឡើងជាបន្តបន្ទាប់ ប្រឆាំងនឹងសកម្មភាពរំលោភបំពានច្បាប់អន្តរជាតិ និងរំលោភសិទ្ធិប្រជាពលរដ្ឋខ្មែរពីសំណាក់ភាគីថៃ គឺជាភស្តុតាងដែលមានតម្លៃផ្នែកគតិយុត្តមិនអាចខ្វះបានក្នុងការការពារអធិបតេយ្យភាព និងបូរណភាពទឹកដីរបស់ខ្លួន។ ចំណែកឯជំហរច្បាស់លាស់ និងដាច់ខាតរបស់រាជរដ្ឋាភិបាលនិងថ្នាក់ដឹកនាំកម្ពុជា គឺជាសក្ខីភាពនៃភាពម៉ឺងម៉ាត់ក្នុងការការពារទឹកដី និងប្រជាពលរដ្ឋ ខណៈដែលកម្លាំងមហាសាមគ្គីក្នុងចំណោមប្រជាពលរដ្ឋខ្មែរ គឺជាខឿនការពារជាតិរបស់ប្រជាជនដ៏រឹងមាំ។ ទាំងនេះគឺជាចន្ទុលដ៏រឹងមាំក្នុងការការពារអធិបតេយ្យភាពជាតិ បូរណភាពទឹកដី និងការពារប្រជាពលរដ្ឋខ្មែរពីការរំលោភបំពាន»។អ្នកនាំពាក្យរាជរដ្ឋាភិកម្ពុជាបញ្ជាក់ជាថ្មីថា កម្ពុជាប្រកាន់ជំហរដាច់ខាតក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែន ឥណ្ឌូចិន-សៀម ដោយគោរពគោលការណ៍ច្បាប់អន្តរជាតិ គោលការណ៍ខ្សែព្រំដែនមិនកែប្រែ (Uti Possidetis Juris) គោរពអនុសញ្ញា សន្ធិសញ្ញាបារាំង-សៀម ផែនទី និងកំណត់ ហេតុបោះបង្គោលព្រំដែនរបស់គណៈកម្មការបោះបង្គោលព្រំដែនឥណ្ឌូចិន-សៀម ព្រមទាំងកិច្ចព្រមព្រៀង និងឯកសារពាក់ព័ន្ធនានាដែលភាគីទាំងពីរបានឯកភាពគ្នានាពេលកន្លងមក។ កម្ពុជា មិនទទួលស្គាល់ជាដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំង៕

ពលរដ្ឋខ្មែរត្រឡប់ពីអាមេរិកស្ងើចសរសើរការដឹកនាំរបស់រាជរដ្ឋាភិបាលធ្វើឱ្យប្រទេសជាតិមានការអភិវឌ្ឍ

បន្ទាប់ពីបានដើរលេងកម្សាន្តនៅក្នុងប្រទេសកម្ពុជាជាច្រើនសប្តាហ៍កន្លងទៅនេះ ពលរដ្ឋខ្មែរមកពីសហរដ្ឋអាម៉េរិកបានបង្ហាញការភ្ញាក់ផ្អើល និងស្ងើចសរសើរចំពោះការដឹកនាំរបស់រាជរដ្ឋាភិបាលធ្វើឱ្យប្រទេសកម្ពុជា មានការអភិវឌ្ឍ រីកចម្រើនគ្រប់ទីកន្លែង។ ពលរដ្ឋខ្មែរមកពីសហរដ្ឋអាមេរិកនៅព្រឹកថ្ងៃទី១៦ខែកុម្ភៈនេះបានប្រាប់ BTV ឲ្យដឹងថា អស់រយៈពេលជិតមួយខែមកហើយ ដែលពួកគាត់បានមកប្រទេសកម្ពុជា និងបានដើរលេងនៅរាជធានីភ្នំពេញ តាមបណ្តាខេត្តមួយចំនួន ជាពិសេសស្រុកកំណើតនៅខេត្តព្រៃវែង។ ពលរដ្ឋខ្មែរទើបត្រឡប់ពីអាមេរិកសង្កេតឃើញថា បច្ចុប្បន្នប្រទេសកម្ពុជាមានការអភិវឌ្ឍរីកចម្រើនច្រើន ទាំងហេដ្ឋារចនាសម្ព័ន្ធ ផ្លូវ ស្ពាន ព្រលានយន្តហោះថ្មីស្អាតទំនើប និងអគារខ្ពស់ៗរាប់សិបដែលពួកគាត់មិននឹកស្មានដល់។ពលរដ្ឋខ្មែរមកពីសហរដ្ឋអាមេរិកនោះបន្តទៀតថា បើទោះបីបច្ចុប្បន្នប្រទេសកម្ពុជា និងថៃ មានជម្លោះព្រំដែនជាមួយគ្នាក្តី តែក្រៅពីតំបន់ជម្លោះព្រំដែន ប្រទេសកម្ពុជា មានសុវត្ថិភាព និងសណ្តាប់ធ្នាប់ល្អ ម្លោះហើយប្រជាពលរដ្ឋខ្មែរនៅបរទេស ក៏ដូចជាភ្ញៀសទេសចរ អាចមកលេងប្រទេសកម្ពុជាបានជាធម្មតា ពីព្រោះមានតំបន់ទេសចរណ៍ស្អាតៗជាច្រើន ជាពិសេសនៅតំបន់ប្រាសាទអង្គរវត្ត ខេត្តសៀមរាប។ សូមជម្រាបថា ប្រទេសកម្ពុជា ក្រោមការដឹកនាំរបស់សម្តេចតេជោ ហ៊ុន សែន អតីតនាយករដ្ឋមន្រ្តី និងបច្ចុប្បន្នបន្តដឹកនាំដោយ សម្តេចធិបតី ហ៊ុន ម៉ាណែត នាយករដ្ឋមន្រ្តីកម្ពុជា បានដឹកនាំប្រទេសជាតិឱ្យមានការអភិវឌ្ឍរីកចម្រើនលើគ្រប់វិស័យ និងបានយកចិត្តទុកដាក់ពីសុខទុក្ខប្រជាពលរដ្ឋគ្រប់កាលៈទេសៈ៕ អត្ថបទ៖ទូច សោភ័ណ

កម្ពុជាក្លាយជាប្រទេសនាំចេញស៊ីម៉ង់ត៍ជាលើកដំបូង បន្ទាប់ការផ្គត់ផ្គង់ក្នុងស្រុកបានគ្រប់គ្រាន់

អគ្គនាយកនៃអគ្គនាយកដ្ឋានធនធានរ៉ែ បានបង្ហាញនូវមោទនភាពនៃកម្ពុជា ដែលបានប្រែក្លាយពីប្រទេសដែលនាំចូលស៊ីម៉ង់ត៍ ១០០ ភាគរយ ទៅជាប្រទេសអាចផ្គត់ផ្គង់តម្រូវការទាំងស្រុង និងក្លាយជាប្រទេសដែលនាំចេញស៊ីម៉ង់ត៍ជាលើកដំបូងទៅកាន់ទីផ្សារអន្តរជាតិ។ឯកឧត្តម អ៊ឹង ឌីប៉ូឡា អគ្គនាយកនៃអគ្គនាយកដ្ឋានធនធានរ៉ែ ក្រសួងរ៉ែ និងថាមពល លើកឡើងនៅក្នុងពិព័រណ៍ផលិតផល រ៉ែឆ្នាំ២០២៦ នៅចុងសប្តាហ៍កន្លងមកថា ជុំវិញវិស័យរ៉ែនេះ កម្ពុជាកំពុងទទួលបានការធ្វើអាជីវកម្មធនធានរ៉ែគ្រប់ប្រភេទ ក្នុងនោះចំ ពោះថ្មសំណង់ និងរ៉ែខ្សាច់សំណង់ បាននិងកំពុងដើរតួយ៉ាងសំខាន់ក្នុងការធានានិរន្តរភាព នៃការផ្គត់ផ្គង់វត្ថុធាតុដើមបានគ្រប់គ្រាន់ និងតម្លៃសមរម្យ ក្នុងការអភិវឌ្ឍនូវហេដ្ឋារចនាសម្ព័ន្ធសាធារណៈ និងសំណង់ធំ-តូចនានានៅទូទាំងប្រទេស ជាក់ស្តែងផលិតផល ស៊ីម៉ង់ត៍ចាប់ពីឆ្នាំ២០២៣មក កម្ពុជាបានប្រែក្លាយពីប្រទេសនាំចូលស៊ីម៉ង់ត៍ ១០០ ភាគរយ ទៅជាប្រទេសអាចផ្គត់ផ្គង់តម្រូវការទាំង ស្រុង និងក្លាយជាប្រទេសដែលនាំចេញស៊ីម៉ង់ត៍ជាលើកដំបូង ក្នុងរង្វង់ ៣ ម៉ឺនតោនក្នុងមួយឆ្នាំ នៅមុនការផ្ទុះជម្លោះព្រំដែនកម្ពុជា-ថៃ ផងដែរ។អ្នកឧកញ៉ា វិញ ហួរ ប្រធានសមាគមឧស្សាហកម្មស៊ីម៉ង់ត៍កម្ពុជា លើកឡើងថា ជុំវិញវិស័យស៊ីម៉ង់ត៍នេះ ពីមុនកម្ពុជាបាននាំ ចូលស៊ីម៉ង់ត៍ពីប្រទេសជិតខាងទាំងស្រុង ប៉ុន្តែដោយសារការខិតខំប្រឹងប្រែងរបស់រាជរដ្ឋាភិបាល ដែលមានក្រសួងរ៉ែ និងថាមពល ជា សេនាធិការ បានធ្វើឱ្យវិស័យស៊ីម៉ង់ត៍នៅកម្ពុជារីកចម្រើនគួរកត់សម្គាល់ និងបានកំពុងកើនឡើងយ៉ាងខ្លាំងសម្រាប់តម្រូវការនៅទូទាំងប្រទេស ជាក់ស្តែងមកដល់ពេលនេះ កម្ពុជាមានក្រុមហ៊ុនដែលកំពុងប្រតិបត្តិការអាជីវកម្មចំនួន ៦ មានសមត្ថភាពផលិតស៊ីម៉ង់ត៍ សរុបបានចំនួន ១២ លានតោន ក្នុង១ឆ្នាំ ដែលបានឆ្លើយតបដល់ការអភិឌ្ឍក្នុងស្រុក និងនាំចេញ។ ឯកឧត្តម កែវ រតនៈ រដ្ឋមន្ត្រីក្រសួងរ៉ែ និងថាមពល លើកឡើងថា វិស័យរ៉ែបានកំពុងចូលរួមដល់ដ៏សំខាន់នៅក្នុងសេដ្ឋកិច្ច ជាតិ ជាក់ស្តែងគិតមកដល់ពេលនេះ វិស័យរ៉ែមានទុនវិនិយោគសរុបជិត ៣ ពាន់លានដុល្លារអាម៉េរិក និងបានបង្កើតការងារដោយ ផ្ទាល់ប្រមាណ១២ពាន់កន្លែង ដោយប្រជាពលរដ្ឋខ្មែរប្រមាណ ១១ ពាន់កន្លែង ស្មើនឹង ៩៥% ក្នុងនោះនៅក្នុងរយៈពេល១០ឆ្នាំចុង ក្រោយនេះ កម្ពុជាបានប្រមូលចំណូលមិនមែនសារពើពន្ធពីវិស័យរ៉ែ បានប្រមាណពីជាង ១៣ លានដុល្លារអាម៉េរិក នៅក្នុងឆ្នាំ២០១៦ ដល់ជាង ១៣៥ លានដុល្លារអាម៉េរិក នៅក្នុងឆ្នាំ២០២៥ ខណៈដែលរ៉ែមាសបាននិងកំពុងលេចធ្លា នៃការចូលរួមយ៉ាងសកម្មក្នុងសេដ្ឋ កិច្ចជាតិ៕អត្ថបទ៖ សុន រ៉ាឌី

ក្រសួងបរិស្ថានកម្ពុជា និងសហព័ន្ធសមាគមមេធាវីជប៉ុន ចុះអនុស្សរណៈជាមួយគ្នាដើម្បីពង្រឹងកិច្ចការច្បាប់ និងអភិបាលកិច្ចបរិស្ថាន

នៅព្រឹកថ្ងៃទី១៦ ខែកុម្ភៈ ឆ្នាំ ២០២៦ នៅទីក្រុងតូក្យូ ប្រទេសជប៉ុន ឯកឧត្តមបណ្ឌិត អ៊ាង សុផល្លែត រដ្ឋមន្ត្រីក្រសួងបរិស្ថាន បានដឹកនាំប្រតិភូ ចុះហត្ថលេខាលើអនុស្សរណៈនៃកិច្ចសហប្រតិបត្តិការជាមួយសហព័ន្ធសមាគមមេធាវីជប៉ុន Shiho-Shoshi ។លោក Ozawa Yoshinori ប្រធានសហព័ន្ធ Shiho-Shoshi សមាគមមេធាវីជប៉ុន បានគូសបញ្ជាក់ថា នឹងគាំទ្រនិងបន្តពង្រឹងកិច្ចសហប្រតិបត្តិការជាមួយកម្ពុជា ដោយចូលរួមចំណែកដល់ការព្យាករណ៍បរិស្ថាននៅកម្ពុជា។ឯកឧត្តមបណ្ឌិត អ៊ាង សុផល្លែត បានគូសបញ្ជាក់ថា កិច្ចព្រមព្រៀងស្តីពីកិច្ចសហប្រតិបត្តិការនេះ មានគោលបំណងសម្រេចបាននូវគោលដៅសំខាន់ៗចំនួនបីគឺ (១) លើកកម្ពស់ការអនុវត្តច្បាប់បរិស្ថាន(2) ពង្រឹងតម្លាភាពក្នុងការអនុញ្ញាត និងអភិបាលកិច្ចបរិស្ថាន និង (៣)កសាងក្របខ័ណ្ឌស្ថាប័នឱ្យកាន់តែរឹងមាំសម្រាប់ការគ្រប់គ្រងធនធានធម្មជាតិ។ឯកឧត្តមបណ្ឌិតរដ្ឋមន្ត្រីបានបន្ថែមថា នៅពេលស្ថាប័នរបស់យើងមានតម្លាភាព ច្បាប់គាំទ្រដល់ការអភិវឌ្ឍប្រកបដោយចីរភាព យើងនឹងបង្កើតបានមូលដ្ឋានគ្រឹះនៃភាពជោគជ័យយូរអង្វែង៕

ប្រឡាយទឹកក្នុងឃុំកោះសំរោង សមិទ្ធផលថ្មី នៃស្រុកកំពង់សៀម ត្រូវបានអាជ្ញាធរធ្វើការស្តារឡើងវិញ

ប្រឡាយជាង ៣០០០ ម៉ែត្រ ជាសមិទ្ធផលថ្មី ក្នុងឃុំកោះសំរោង នៃស្រុកកំពង់សៀម ត្រូវបានអាជ្ញាធរធ្វើការស្តារឡើងវិញ និងកែលម្អដើម្បីធ្វើជាអាងស្តុកទឹកសម្រាប់បងប្អូនប្រជាពលរដ្ឋនៅតំបន់នោះស្រោចស្រពដំណាំកសិកម្ម និងការរស់នៅប្រចាំថ្ងៃ។ឃុំកោះសំរោង ជាឃុំមួយមានផ្ទៃស្ថិតលើតំបន់ដីកោះ និងជាឃុំមួយក្នុងចំណោមឃុំទាំង១៥ នៃស្រុកកំពង់សៀម ខេត្តកំពង់ចាម ហើយឃុំនេះហ៊ុមព័ទ្ធជុំវិញដោយទឹកទន្លេមេគង្គ។ លោក សក សុក មេឃុំកោះសំរោង នៃស្រុកកំពង់សៀម ខេត្តកំពង់ចាម បានឲ្យដឹងថា តាមរយៈថវិកាមូលនិធិឃុំសង្កាត់ឆ្នាំ២០២៥ រដ្ឋបាលឃុំបានយកថវិកានេះ ទៅអភិវឌ្ឍន៍ដោយស្តារប្រឡាយ និងពង្រីកអាងស្តុកទឹកនៅរដូវប្រាំងបានប្រវែងជិត ៤ពាន់ម៉ែត្រ។ លោកមេឃុំកោះសំរោង បញ្ជាក់ថា ប្រឡាយមួយនេះជាសមិទ្ធផលថ្មីមួយដែលចាំបាច់បំផុតសម្រាប់អ្នកភូមិ ក្នុងការធ្វើកសិកម្ម និងជួយលើកស្ទួយជីវភាពប្រចាំថ្ងៃដោយពលរដ្ឋអាចទាញទឹកមកប្រើប្រាស់ដោយមិនអាចខ្វះខាតបន្តទៀតនៅរដូវប្រាំង។ ទន្ទឹមនឹងនេះដែរ លោក សន សុក មេឃុំកោះសំរោង រូបនេះក៏បានប្តេជ្ញាចិត្តបន្តបម្រើសេវាសាធារណៈជូនប្រជាពលរដ្ឋដែលមកទទួលសេវាតាមតម្រូវដោយធ្វើឲ្យលឿនរហ័ស តម្លាភាព និងបន្តដឹកនាំកសាងអភិវឌ្ឍន៍នៅមូលដ្ឋានឲ្យកាន់តែរីកចម្រើនបន្ថែមទៀត។ លោកមេឃុំបានឱ្យដឹងថា រដ្ឋបាលឃុំ ក៏បាន ត្រៀមផែនការអភិវឌ្ឍន៍ផ្លូវបេតុងដែលសេសសល់ រួមនឹងបន្តអភិវឌ្ឍន៍តំបន់ក្រោយសាលាឃុំធ្វើជាទំបន់បង្ហៀទឹក មានសួនច្បារអាចឲ្យបងប្អូនប្រជាពលរដ្ឋដើរហាត់ប្រាណ និងលំហែកម្សាន្តនៅពេលល្ងាចផងដែរ៕ អត្ថបទ៖ ថុង សីហា

ការលក់ដូរទំនិញក្នុងរដូវកាលចូលឆ្នាំចិន-វៀតណាមនៅខេត្តសៀមរាប មិនមានការដំឡើងថ្លៃនោះទេ

អាជីវករ និងកូនខ្មែរកាត់ចិន នៅខេត្ដសៀមរាប បានសម្ដែងការរីករាយ ក្នុងការលក់ដូរគ្រឿងរណ្ដាប់ ឬទំនិញផ្សេងៗ ដូចជានំផ្លែឈើ ផ្កា សម្រាប់សែនពិធីបុណ្យចូលឆ្នាំចិន វៀតណាម នៅឆ្នាំនេះ ដោយពួកគាត់លើកឡើងថា ទំនិញនៅឆ្នាំនេះមានតម្លៃធម្មតា ការលក់ដូរមិនមានការដំឡើងថ្លៃនោះទេ។អាជីវករនៅផ្សារ ក្រុងសៀមរាប បានឱ្យដឹងថា ក្នុងរយៈពេលបីថ្ងៃនេះមានប្រជាពលរដ្ឋខ្មែរសែស្រឡាយចិន និងវៀតណាម ជាច្រើនបានមកទិញទំនិញ ក៏ដូជាសម្ភារៈ សម្រាប់សែនព្រេនក្នុងពិធីចូលឆ្នាំចិន វៀតណាមហើយតម្លៃទំនិញមិនមានការតម្លើងថ្លៃនោះទេ។ ប៉ុន្ដែក្រុមអាជីវករសង្កេតឃើញថា សន្ទុះចំនួនអ្នកមកទិញមានការធ្លាក់ចុះបន្ដិចបន្ទួច បើធៀបនឹងឆ្នាំ២០២៥កន្លងទៅ។ ក្រុមអាជីវករលើកឡើងថា ទំនិញដែលបានលក់ដូរដាច់ច្រើន មានដូចជាផ្កា នំសែន និងផ្លែឈើ ខណៈដែលពួកគាត់ជាប់សែស្រឡាយចិន វៀតណាម តែងតែរក្សាប្រពៃណីបុណ្យចូលឆ្នាំថ្មីប្រពៃណីចិន-វៀតណាម និងធ្វើពិធីសែនចូលឆ្នាំចិនជារៀងរាល់ឆ្នាំ។ ជាមួយគ្នានេះ ប្រជាពលរដ្ឋសែស្រឡាយចិន បានលើកឡើងថា ពិធីបុណ្យចូលឆ្នាំប្រពៃណីចិន វៀតណាមនេះ ធ្វើឡើងទៅតាមទំនៀមទម្លាប់របស់ពួកគាត់ ហើយការធ្វើបុណ្យទាននេះបានធ្វើទៅតាមលទ្ធភាព។ ពួកគាត់បន្ដថា តម្លៃទំនិញ ក៏ដូចជាសម្ភារៈសម្រាប់សំណែនបុណ្យនេះ គឺមានលក្ខណៈធម្មតា។ ក្នុងពេលជាមួយគ្នានេះ ពលរដ្ឋក៏បានអំពាវនាវឱ្យពលរដ្ឋមានការប្រុងប្រយ័ត្នខ្ពស់ចំពោះការអុចទៀនធូប ក្នុងពិធីបុណ្យចូលឆ្នាំចិន វៀតណាមនេះ ខណៈដែលពិធីនេះមានរយៈពេល៣ថ្ងៃចាប់ពីថ្ងៃទី១៧ ដល់ថ្ងៃទី១៩ ខែកុម្ភៈ ឆ្នាំ២០២៦៕ អត្ថបទ៖ ឈិត សាវី

សម្ដេចធិបតី ហ៊ុន ម៉ាណែត ដឹកនាំគណៈប្រតិភូកម្ពុជាទៅចូលរួមកិច្ចប្រជុំលើកដំបូងរបស់ក្រុមប្រឹក្សាសន្តិភាពនៅអាមេរិក និងទស្សនកិច្ចនៅអឺរ៉ុប

ភ្នំពេញ៖ នៅយប់ថ្ងៃទី១៥ ខែកុម្ភៈ ឆ្នាំ២០២៦នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីនៃព្រះរាជាណាចក្រកម្ពុជា បានដឹកនាំគណៈប្រតិភូរាជរដ្ឋាភិបាលកម្ពុជាអញ្ជើញទៅចូលរួមកិច្ចប្រជុំក្រុមប្រឹក្សាសន្តិភាព (Board of Peace) នៅរដ្ឋធានីវ៉ាស៊ីនតោន សហរដ្ឋអាមេរិក និងទស្សនកិច្ចការងារ នៅទីក្រុងហ្សឺណែវ ប្រទេសស្វីស និងទីក្រុងព្រុចសែល ប្រទេសបែលហ្សិក ពីថ្ងៃទី១៥-២៧ ខែកុម្ភៈ ឆ្នាំ២០២៦ ។សូមជម្រាបជូនថា កិច្ចប្រជុំក្រុមប្រឹក្សាសន្តិភាព (Board of Peace) នឹងប្រព្រឹត្តទៅនៅថ្ងៃទី១៩ ខែកុម្ភៈ ឆ្នាំ២០២៦ នៅវិទ្យាស្ថានសន្តិភាពសហរដ្ឋអាម៉េរិក ដូណាល់ ជេ ត្រាំ ក្នុងរដ្ឋធានីវ៉ាស៊ីនតោនដែលគឺជាការចាប់ផ្តើមជាផ្លូវការនៃអាណត្តិការងាររបស់ក្រុមប្រឹក្សាសន្តិភាព ស្របតាមសេចក្តីសម្រេចរបស់ក្រុមប្រឹក្សាសន្តិសុខអង្គការសហប្រជាជាតិ ដែលត្រូវបានអនុម័តកាលពីថ្ងៃទី១៧ ខែវិច្ឆិកា ឆ្នាំ២០២៥ ក្នុងគោលដៅជំរុញសន្តិភាព និងកិច្ចខិតខំប្រឹងប្រែងឆ្ពោះទៅរកការកសាងឡើងវិញនៅតំបន់ហ្គាហ្សា។ ជាមួយគ្នានេះដែរ មេដឹកនាំដែលអញ្ជើញចូលរួមកិច្ចប្រជុំនេះក៏រំពឹងថានឹងពិភាក្សាគ្នាយ៉ាងទូលំទូលាយអំពីសន្តិភាព ស្ថិរភាព និងការអភិវឌ្ឍក្នុងតំបន់ និងពិភពលោក។ក្នុងអំឡុងពេលស្នាក់នៅរដ្ឋធានីវ៉ាស៊ីនតោន សម្តេចធិបតីនាយករដ្ឋមន្ត្រី នឹងជួបទ្វេភាគីជាមួយ ឥស្សរជនសហរដ្ឋអាម៉េរិក និងមេដឹកនាំនៃប្រទេសឯទៀតមួយចំនួន ដើម្បីផ្លាស់ប្តូរយោបល់គ្នាលើការពង្រឹងទំនាក់ទំនងទ្វេភាគី និងពង្រីកកិច្ចសហប្រតិបត្តិការលើវិស័យនានា។ សម្តេចធិបតីនាយករដ្ឋមន្ត្រី ក៏មានគម្រោងធ្វើទស្សនកិច្ចការងារទៅកាន់ទ្វីបអឺរ៉ុប រួមទាំងទីក្រុងហ្សឺណែវ និងទីក្រុងព្រុចសែល ដោយនឹងមានជំនួបជាមួយថ្នាក់ដឹកនាំ និងអ្នកពាក់ព័ន្ធសំខាន់ៗ ដើម្បីបង្កើនភាពជាដៃគូ និងកិច្ចសហការបន្ថែមទៀត៕

បណ្ដាញសង្គម

ព័ត៌មានថ្មីៗ

កូរ៉េខាងជើងច្រានចោលការចោទប្រកាន់របស់អាមេរិកថា ទីក្រុងព្យុងយ៉ាង គឺជាការគំរាមកំហែងតាមប្រព័ន្ធអ៊ីនធឺណិត

ប្រធានាធិបតីគុយបាបរិហារទណ្ឌកម្មថ្មីរបស់សហរដ្ឋអាមេរិកលើប្រទេសរបស់លោក

មនុស្ស ១១នាក់ស្លាប់ ក្នុងហេតុការណ៍ក្រឡាប់រថយន្តក្រុងនៅភាគខាងលិចម៉ិកស៊ិក

ក្រុមមន្រ្តីនិយាយថា សហរដ្ឋអាមេរិកដកទាហាន ៥ពាន់នាក់ចេញពីប្រទេសអាល្លឺម៉ង់

ជម្លោះនៅតែកើតមានរវាងក្រុមហេសបូឡា និងអ៊ីស្រាអែលនៅតំបន់ភាគខាងត្បូងលីបង់

លោក Trump និយាយថា មានលទ្ធភាពដែលអាមេរិកអាចចាប់ផ្តើមវាយប្រហារអ៊ីរ៉ង់ម្តងទៀត

មនុស្សយ៉ាងហោច ៩នាក់ស្លាប់ ក្នុងហេតុការណ៍អគ្គិភ័យនៅទីក្រុងញូវដែល្លី ប្រទេសឥណ្ឌា

សហរដ្ឋអាមេរិកអនុម័តលក់អាវុធតម្លៃ ៨,៦ពាន់លានដុល្លារដល់សម្ព័ន្ធមិត្តមជ្ឈិមបូព៌ា

អាស័យដ្ឋាន

ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។

ទូរស័ព្ទ:(+855)61 999 877